ᠲᠣᠣ ᠶᠢᠨ ᠳᠦ ᠥᠨᠭᠭᠡᠷᠡᠭᠦᠯᠦᠭᠰᠡᠨ ᠨᠢᠭᠡᠨ ᠡᠳᠦᠷ – ᠰ ᠂ᠡᠷᠳᠡᠨᠢ Доогийнд өнгөрүүлсэн нэгэн өдөр – С ᠂ Эрдэнэ
403ᠲᠣᠣ ᠶᠢᠨ ᠳᠦ ᠥᠨᠭᠭᠡᠷᠡᠭᠦᠯᠦᠭᠰᠡᠨ ᠨᠢᠭᠡᠨ ᠡᠳᠦᠷ
ᠰ · ᠡᠷᠳᠡᠨᠢ
( ᠱᠣᠭ ᠥᠭᠦᠯᠡᠯᠭᠡ)
ᠲᠤᠤ ᠶ᠋ᠢᠨ ᠳᠤ ᠥᠩᠭᠡᠷᠡᠭᠦᠯᠦᠭᠰᠡᠨ ᠨᠢᠭᠡ ᠡᠳᠦᠷ ᠦ᠋ᠨ ᠳᠠᠷᠠᠭᠠ ᠨᠢᠭᠡᠨ ᠰᠣᠩᠭᠣᠳᠠᠭ ᠵᠣᠬᠢᠶᠠᠯᠴᠢ ᠶ᠋ᠢᠨ ᠬᠤᠷᠴᠠ ᠥᠭᠦᠯᠡᠯᠭᠡ ᠶ᠋ᠢ ᠰᠠᠨᠠᠵᠤ ᠪᠢᠯᠡ᠃ ᠮᠢᠨᠦ ᠪᠡᠶᠡ ᠲᠡᠷᠡ ᠬᠦ᠌ ᠰᠣᠩᠭᠣᠳᠠᠭ ᠤ᠋ᠨ ᠰᠢᠭᠡᠵᠡᠢ ᠶ᠋ᠢᠨ ᠬᠤᠷᠤᠭᠤᠨ ᠳ᠋ᠤ᠌ ᠬᠦᠷᠬᠦ ᠦᠭᠡᠢ ᠪᠣᠯᠪᠠᠴᠤ ᠲᠡᠷᠡ ᠨᠢᠭᠡ ᠡᠳᠦᠷ ᠦ᠋ᠨ ᠲᠤᠬᠠᠢ ᠪᠢᠴᠢᠮᠡᠷ ᠰᠠᠨᠠᠭᠳᠠᠭᠠᠳ ᠶᠡᠷᠦ ᠪᠣᠯᠤᠭᠰᠠᠨ ᠦᠭᠡᠢ᠃
ᠥᠭᠦᠯᠡᠬᠦ ᠨᠢ ᠪᠣᠭᠳᠠ ᠠᠭᠤᠯᠠ ᠶ᠋ᠢᠨ ᠬᠣᠷᠮᠣᠢ ᠳ᠋ᠠᠬᠢ ᠵᠤᠰᠠᠯᠠᠩ ᠤ᠋ᠨ ᠰᠡᠷᠭᠦᠯᠡᠩ ᠳᠡᠨᠵᠢᠨ ᠳ᠋ᠦ᠍ ᠲᠤᠤ ᠨᠠᠢᠵᠠ ᠶ᠋ᠢᠨ ᠬᠢᠨ ᠪᠠᠭᠤᠵᠠᠢ᠃ ᠥᠪᠡᠷ ᠢ᠋ ᠪᠡᠨ ᠪᠢᠴᠢᠭ ᠦ᠋ᠨ ᠬᠥᠮᠦᠨ ᠳ᠋ᠦ᠍ ᠲᠣᠭᠠᠴᠠᠭᠰᠠᠭᠠᠷ ᠤᠳᠠᠵᠤ ᠪᠠᠢᠭᠠ ᠪᠣᠯᠪᠠᠴᠤ ᠲᠣᠢᠮᠣ ᠲᠠᠢ ᠪᠦᠲᠦᠭᠡᠯ ᠦᠭᠡᠢ ᠪᠤᠶᠤ ᠬᠠᠭᠤᠷᠠᠢ ᠵᠣᠬᠢᠶᠠᠯᠴᠢ ᠭᠡᠵᠦ ᠪᠣᠯᠤᠮᠠᠷ ᠲᠡᠷᠡ ᠨᠥᠬᠥᠷ ᠮᠠᠨᠢ ᠠᠭᠤᠯᠵᠠᠬᠤ ᠪᠣᠯᠭᠠᠨ ᠳ᠋ᠠᠭᠠᠨ《 ᠴᠢ ᠮᠠᠨ ᠤ᠋ ᠬᠠᠭᠠᠯᠭᠠ ᠪᠠᠷ ᠪᠠᠭᠲᠠᠬᠤ ᠪᠠᠨ ᠪᠣᠯᠢᠭᠰᠠᠨ ᠰᠢᠭ᠋ ᠪᠠᠢᠨᠠ᠂ ᠠᠷᠭᠠ ᠪᠣᠯᠤᠯᠴᠠᠭᠠ ᠪᠠᠢᠳᠠᠭ ᠪᠣᠯ ᠮᠣᠷᠢᠯᠠᠨ ᠣᠴᠢᠵᠤ ᠮᠠᠭᠤ ᠲᠤᠤ ᠶ᠋ᠢᠨ ᠢ᠋ᠶ᠋ᠡᠨ ᠪᠣᠷᠣ ᠭᠡᠷ ᠢ᠋ ᠭᠡᠢᠭᠦᠯᠵᠦ ᠥᠭᠭᠦᠭᠡᠴᠢ》 ᠭᠡᠳ ᠪᠠᠢᠬᠤ ᠪᠠᠷ ᠨᠢ ᠣᠢᠰᠢᠶᠠᠯ ᠦᠭᠡᠢ ᠥᠩᠭᠡᠷᠡᠵᠦ ᠪᠣᠯᠤᠭᠰᠠᠨ ᠦᠭᠡᠢ᠂ ᠮᠢᠨᠦ ᠭᠡᠢᠭᠦᠯᠬᠦ ᠪᠣᠯᠤᠭᠰᠠᠨ ᠪᠣᠷᠣ ᠭᠡᠷ ᠭᠡᠳᠡᠭ ᠨᠢ ᠵᠤᠰᠠᠯᠠᠩ ᠤ᠋ᠨ ᠨᠣᠭᠣᠭᠠᠨ ᠵᠦᠯᠭᠡᠨ ᠳᠡᠭᠡᠷᠡ ᠴᠡᠮᠴᠡᠢᠵᠦ ᠪᠥᠮᠪᠥᠢᠭᠰᠡᠨ ᠲᠣᠮᠣ ᠭᠡᠷ ᠪᠠᠢᠬᠤ ᠪᠥᠭᠡᠳ ᠠᠯᠲᠠᠨ ᠵᠦᠮᠪᠠᠢ ᠲᠠᠢ ᠡᠷᠢᠶᠡᠨ ᠬᠠᠭᠠᠯᠭᠠ ᠶ᠋ᠢ ᠴᠠᠯᠠᠢᠲᠠᠯᠠ ᠨᠡᠭᠡᠭᠡᠵᠦ ᠬᠠᠶᠠᠭᠠ ᠶ᠋ᠢ ᠰᠡᠬᠦᠭᠰᠡᠨ ᠪᠠᠢᠯᠠ᠃
ᠭᠡᠷ ᠲᠤ ᠪᠥᠭᠡᠮ ᠨᠠᠷᠭᠢᠶᠠᠨ ᠪᠣᠯᠵᠤ ᠪᠠᠢᠪᠠ᠂ ᠬᠡᠦᠬᠡᠨ ᠨᠦ᠍ᠭᠦᠳ ᠳᠡᠰ ᠳᠡᠰ ᠬᠥᠭᠦᠷᠡᠯᠳᠦᠵᠤ ᠬᠥᠭᠵᠢᠮ ᠬᠠᠩᠭᠢᠨᠠᠵᠤ ᠪᠠᠢᠨᠠ᠃ ᠪᠠᠬᠠᠨ ᠲᠦᠳᠡᠭᠡᠯᠵᠡᠵᠦ ᠪᠠᠢᠭᠠᠳ ᠣᠷᠣᠵᠤ ᠶᠠᠪᠤᠴᠢᠬᠠᠭᠰᠠᠨ ᠴᠢᠨᠢ ᠨᠢᠳᠦ ᠭᠢᠯᠪᠠᠨᠠ ᠭᠡᠳᠡᠭ ᠨᠢ ᠪᠣᠯᠤᠯᠠ᠃ ᠬᠣᠢᠮᠣᠷ ᠲᠤ ᠤᠷᠲᠤ ᠰᠢᠷᠡᠭᠡ ᠵᠠᠰᠠᠵᠤ ᠢᠳᠡᠭᠡ ᠪᠤᠳᠠᠭᠠ ᠳᠡᠯᠭᠡᠨ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠵᠠᠯᠠᠭᠤᠴᠤᠳ ᠨᠠᠢᠷᠯᠠᠵᠤ ᠪᠠᠢᠪᠠ᠃ ᠲᠤᠤ ᠨᠠᠢᠵᠠ ᠪᠣᠰᠤᠨ ᠬᠠᠷᠠᠢᠵᠤ《 ᠲᠠ ᠮᠢᠨᠢ ᠡᠭᠦᠨ ᠢ᠋ ᠬᠠᠷᠠᠪᠠ ᠤᠤ》 ᠭᠡᠵᠦ ᠳᠠᠭᠤ ᠠᠯᠲᠠᠨ᠄
— ᠵᠠ ᠴᠢ ᠮᠠᠨ ᠤ ᠡᠭᠦᠳᠡ ᠪᠡᠷ ᠠᠰᠢᠭᠦᠢ ᠨᠢᠭᠡ ᠪᠠᠭᠲᠠᠵᠤ ᠣᠷᠣᠪᠠ ᠤᠤ᠃ ᠴᠢᠭᠢᠭ ᠲᠡᠢ ᠪᠠᠢᠰᠢᠩ ᠳ᠋ᠤ᠌ ᠲᠠᠷᠢᠬᠢ ᠪᠠᠨ ᠭᠠᠰᠢᠯᠭᠠᠵᠤ ᠰᠠᠭᠤᠳᠠᠭ ᠬᠥᠮᠦᠨ ᠵᠤᠰᠠᠯᠠᠩ ᠤ᠋ᠨ ᠰᠠᠯᠬᠢ ᠪᠠᠷ ᠨᠢᠭᠡ ᠠᠮᠢᠰᠬᠤᠯᠠᠬᠤ ᠰᠠᠢᠨ᠃ ᠰᠠᠭᠤᠭᠰᠠᠨ ᠴᠡᠴᠡᠨ ᠡᠴᠡ ᠶᠠᠪᠤᠭᠰᠠᠨ ᠲᠡᠨᠡᠭ ᠳᠡᠭᠡᠷᠡ ᠭᠡᠳᠡᠭ ᠰᠢᠦ ᠳᠡ᠂ ᠬᠠ ᠬᠠ ᠬᠠ᠂ ᠵᠠ ᠰᠠᠭᠤ᠃ ᠮᠠᠨ ᠤ᠋ ᠺᠠᠮᠫᠠᠨᠢ( ᠬᠠᠮᠰᠠᠭᠠᠲᠠᠨ) ᠨᠤᠭᠤᠳ ᠲᠠᠢ ᠲᠠᠨᠢᠯᠴᠠ ᠭᠡᠵᠦ ᠰᠢᠷᠡᠭᠡᠨ ᠳ᠋ᠦ᠍ ᠰᠠᠭᠤᠯᠭᠠᠪᠠ᠃ ᠲᠤᠤ ᠶ᠋ᠢᠨ ᠡᠬᠡᠨᠡᠷ ᠶᠠ ᠤᠯᠠᠭᠠᠨ ᠲᠣᠷᠭᠠᠨ ᠲᠠᠱᠶ᠋ᠨᠵᠠ ᠲᠠᠢ᠂ ᠴᠢᠷᠠᠢ ᠵᠢᠰᠦ ᠪᠠᠰᠠ ᠴᠦ᠍ ᠤᠯᠠᠭᠠ ᠪᠤᠲᠠᠷᠠᠵᠤ ᠰᠠᠭᠤᠨᠠ᠃ ᠬᠣᠩᠭᠣᠷ ᠦᠰᠦ ᠲᠡᠢ ᠰᠢᠷᠠ ᠬᠡᠦᠬᠡᠨ ᠰᠠᠨ᠃ ᠣᠳᠣ ᠳᠡᠰ ᠬᠠᠷᠠ ᠦᠰᠦ ᠲᠡᠢ ᠱᠣᠪᠣᠯᠵᠠᠭᠰᠠᠨ ᠤᠯᠠᠭᠠᠨ ᠬᠡᠦᠬᠡᠨ ᠪᠠᠢᠨᠠ᠂ ᠶᠠ ᠶ᠋ᠢᠨ ᠳᠡᠷᠭᠡᠳᠡ ᠴᠠᠭᠠᠨ ᠬᠤᠪᠴᠠᠰᠤ ᠲᠠᠢ ᠭᠤᠸᠠᠯᠢᠭ ᠪᠣᠷᠣ ᠬᠡᠦᠬᠡᠨ ᠰᠠᠭᠤᠨᠠ᠂ ᠪᠣᠷᠣ ᠴᠢᠷᠠᠢ ᠪᠠᠨ ᠴᠠᠢᠯᠭᠠᠬᠤ ᠭᠡᠵᠦ ᠣ ᠡᠩᠭᠡᠰᠬᠡ ᠬᠡᠲᠦᠷᠬᠡᠢ ᠲᠦᠷᠬᠢᠵᠦ ᠤᠷᠤᠭᠤᠯ ᠢ᠋ᠶ᠋ᠠᠨ ᠴᠢᠰ ᠤᠯᠠᠭᠠᠨ ᠢ᠋ᠶ᠋ᠠᠷ ᠪᠣᠳᠣᠵᠠᠢ᠃ ᠲᠣᠮᠣ ᠬᠠᠷᠠ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠨᠠᠭᠠᠯᠠᠩᠬᠠᠢᠲᠠᠨ ᠬᠥᠭᠵᠢᠮ ᠦ᠋ᠨ ᠠᠶᠠ ᠪᠠᠷ ᠲᠣᠯᠣᠭᠠᠢ ᠪᠠᠨ ᠬᠥᠳᠡᠯᠭᠡᠨ ᠰᠠᠭᠤᠨᠠ᠃ ᠭᠤᠷᠪᠠᠳᠠᠬᠢ ᠬᠡᠦᠬᠡᠨ ᠵᠡᠭᠦᠨ ᠣᠷᠣᠨ ᠳᠡᠭᠡᠷᠡ ᠰᠠᠭᠤᠵᠤ ᠪᠠᠢᠪᠠ᠃ ᠪᠢᠴᠢᠬᠠᠨ ᠬᠠᠷᠠ ᠲᠠᠱᠶ᠋ᠨᠵᠠ ᠲᠠᠢ ᠲᠡᠷᠡ ᠲᠠᠷᠭᠤᠨ ᠴᠠᠭᠠᠨ ᠬᠡᠦᠬᠡᠨ ᠬᠣᠷᠮᠣᠢ ᠪᠠᠨ ᠠᠷᠠᠢ ᠴᠦ᠍ ᠬᠡᠲᠦᠷᠬᠡᠢ ᠡᠷᠭᠦᠵᠦ ᠦᠵᠡᠮᠵᠢ ᠦᠭᠡᠢ ᠪᠣᠭᠣᠨᠢ ᠬᠥᠯ ᠢ᠋ᠶ᠋ᠡᠨ ᠢᠯᠡ ᠭᠠᠷᠭᠠᠭᠠᠳ ᠶᠠᠷᠢᠶᠠᠨ ᠠ᠋ᠴᠠ ᠪᠠᠨ ᠵᠠᠯᠬᠠᠭᠰᠠᠨ ᠮᠡᠲᠦ ᠨᠣᠢᠷᠮᠤᠭ ᠨᠢᠳᠦ ᠪᠡᠷ ᠬᠠᠷᠠᠵᠤ ᠰᠠᠭᠤᠯᠠ᠃ ᠡᠨᠡ ᠭᠤᠷᠪᠠᠨ ᠬᠡᠦᠬᠡᠨ ᠤᠯᠠᠭᠠᠨ᠂ ᠬᠠᠷᠠ᠂ ᠴᠠᠭᠠᠨ ᠬᠤᠪᠴᠠᠰᠤ ᠡᠮᠦᠰᠴᠦ ᠵᠣᠷᠢᠭᠤᠳᠠ ᠥᠩᠭᠡ ᠢᠯᠭᠠᠭᠰᠠᠨ ᠪᠤᠶᠤ ᠶᠠᠮᠠᠷ ᠨᠢᠭᠡ ᠶᠠᠩᠵᠤ ᠮᠠᠶᠢᠭ ᠡᠭᠦᠰᠬᠡᠵᠦ ᠪᠠᠢᠭᠠ ᠬᠡᠷᠡᠭ ᠪᠢᠵᠡ ᠠ᠋᠃ ᠭᠡᠷ ᠦ᠋ᠨ ᠪᠠᠷᠠᠭᠤᠨ ᠡᠲᠡᠭᠡᠳ ᠲᠤ ᠲᠡᠭᠦᠯᠳᠡᠷ ᠬᠤᠭᠤᠷ ᠤ᠋ᠨ ᠡᠮᠦᠨᠡ ᠳᠤᠰᠤᠯᠠᠵᠤ ᠠᠮᠰᠠᠬᠠᠭᠰᠠᠨ ᠤᠷᠲᠤ ᠦᠰᠦᠲᠡᠢ ᠴᠠᠭᠠᠨ ᠨᠸᠢᠯᠤᠩ ᠴᠠᠮᠴᠠ ᠲᠠᠢ ᠳᠠᠷᠤᠤᠬᠠᠨ ᠵᠠᠯᠠᠭᠤ ᠬᠥᠭᠵᠢᠮᠴᠢᠨ ᠮᠠᠶᠢᠭ ᠤ᠋ᠨ ᠤᠷᠲᠤ ᠬᠤᠷᠤᠭᠤ ᠨᠤᠭᠤᠳ ᠢ᠋ᠶ᠋ᠠᠨ ᠭᠦᠶᠦᠯᠭᠡᠨ ᠶᠠᠮᠠᠷ ᠨᠢᠭᠡ ᠬᠥᠩᠭᠡᠨ ᠠᠶᠠ ᠲᠣᠭᠯᠠᠵᠤ ᠪᠠᠢᠪᠠ᠃ ᠶᠠᠭ ᠪᠢᠳᠡ ᠬᠣᠶᠠᠷ ᠤ᠋ᠨ ᠳᠤᠮᠳᠠ ᠨᠢᠭᠡ ᠰᠠᠢᠬᠠᠨ ᠪᠦᠳᠦᠭᠦᠨ ᠡᠷᠡ ᠬᠥᠯᠥᠰᠥ ᠪᠡᠨ ᠠᠷᠴᠢᠨᠠ ᠭᠡᠳᠡᠭ ᠠᠷᠭᠠ ᠦᠭᠡᠢ ᠯᠡ ᠲᠠᠷᠭᠤᠨ ᠬᠥᠮᠦᠨ ᠦ᠌ ᠵᠣᠪᠠᠯᠠᠩ ᠳᠠ᠃ ᠰᠠᠢᠬᠠᠨ ᠭᠡᠳᠡᠭ ᠨᠢ ᠮᠢᠨᠦ ᠰᠠᠨᠠᠯ ᠪᠢᠰᠢ ᠬᠠᠷᠢᠨ ᠲᠤᠤ ᠶ᠋ᠢᠨ ᠡᠬᠡᠨᠡᠷ ᠶᠠ᠂ ᠪᠣᠷᠣ ᠬᠡᠦᠬᠡᠨ ᠬᠣᠶᠠᠷ ᠲᠠᠯᠠ ᠲᠠᠯᠠ ᠠ᠋ᠴᠠ ᠨᠢ ᠨᠠᠢᠷ ᠲᠠᠯᠪᠢᠨ ᠠᠯᠢ ᠪᠣᠯᠬᠤ ᠠᠶᠠᠲᠠᠢ ᠨᠠᠮᠪᠠᠭᠠ ᠲᠠᠢ ᠦᠢᠯᠡᠴᠢᠯᠡᠬᠦ ᠭᠡᠵᠦ ᠤᠷᠤᠯᠳᠤᠵᠤ ᠪᠠᠢᠭᠠ ᠶ᠋ᠢ ᠦᠵᠡᠭᠡᠳ ᠯᠡ ᠲᠡᠭᠡᠭᠰᠡᠨ ᠬᠡᠷᠡᠭ᠃ ᠲᠡᠷᠡ ᠰᠠᠢᠬᠠᠨ ᠡᠷᠡ ᠮᠠᠨᠢ ᠥᠳᠬᠡᠨ ᠬᠠᠷᠠ ᠬᠥᠮᠥᠰᠬᠡ ᠲᠡᠢ᠂ ᠣᠨᠢᠭᠠᠷᠳᠠᠬᠤ ᠵᠠᠯᠢᠲᠠᠢ ᠨᠢᠳᠦ ᠲᠡᠢ᠂ ᠣᠷᠣᠭᠰᠢ ᠲᠦᠷᠢᠭᠰᠡᠨ ᠤᠷᠲᠤ ᠡᠷᠡᠦ ᠲᠡᠢ᠂ ᠪᠣᠭᠣᠨᠢ ᠬᠦᠵᠦᠭᠦᠦ ᠲᠡᠢ ᠲᠤᠯᠣᠳᠣᠭᠠᠨᠠᠭᠰᠠᠨ ᠬᠥᠮᠥᠨ ᠠᠵᠢ᠃ ᠪᠦᠳᠦᠭᠦᠨ ᠬᠦᠵᠦᠬᠦᠦ ᠲᠡᠢ ᠡᠷᠡ ᠳᠡ ᠭᠡᠵᠦ ᠬᠥᠮᠦᠨ ᠢ᠋ ᠶᠣᠵᠣᠯᠠᠨ ᠬᠡᠯᠡᠳᠡᠭ ᠨᠢ ᠬᠡᠦᠬᠡᠨ ᠨᠦ᠍ᠭᠦᠳ ᠲᠦ᠍ ᠭᠠ ᠠᠷᠠᠢ ᠣᠨᠳᠣᠣ ᠪᠠᠷ ᠣᠢᠯᠠᠭᠠᠭᠳᠠᠳᠠᠭ ᠶᠤᠮ ᠪᠣᠯᠪᠠ ᠤᠤ ᠳᠠ᠃ ᠲᠠᠨᠢᠯᠴᠠᠬᠤ ᠶ᠋ᠢᠨ ᠲᠤᠬᠠᠢ ᠳ᠋ᠤ᠌ ᠪᠣᠯ ᠲᠦᠪᠡᠭ ᠦᠭᠡᠢ ᠪᠣᠯᠤᠯᠠ᠃ ᠲᠤᠤ ᠨᠠᠢᠵᠠ ᠨᠠᠮᠠ ᠶ᠋ᠢ ᠶᠡᠬᠡ ᠪᠢᠴᠢᠭ ᠦ᠋ᠨ ᠬᠥᠮᠦᠨ᠂ ᠰᠣᠶᠣᠨ ᠭᠡᠢᠭᠦᠯᠦᠭᠴᠢ ᠭᠡᠵᠦ ᠪᠠᠢᠨᠠ᠃ ᠬᠡᠦᠬᠡᠨ ᠨᠦ᠍ᠭᠦᠳ ᠦᠬᠦᠭᠰᠡᠨ ᠬᠣᠢᠨᠠ ᠪᠠᠨ ᠭᠡᠰᠡᠨ ᠶᠠᠩᠵᠤ ᠲᠠᠢ ᠰᠢᠷᠪᠢ ① ᠲᠡᠳᠡᠨ᠂ ᠲᠡᠷᠡ ᠳᠠᠷᠤᠢ ᠭᠣᠯᠣᠭᠳᠠᠯ ᠭᠠᠷᠭᠠᠭᠰᠠᠨ ᠬᠢᠷᠢᠨᠡ ᠬᠠᠭᠤᠷᠮᠠᠭᠴᠢ ᠢᠨᠢᠶᠡᠮᠰᠦᠭᠯᠡᠯ ᠬᠠᠢᠷᠠᠯᠠᠪᠠ᠃
ᠬᠠᠷᠠ ᠬᠣᠪᠴᠠᠰᠤᠲᠠᠢ ᠬᠡᠦᠬᠡᠨ ᠨᠣᠢᠷᠮᠤᠭ ᠨᠢᠳᠦ ᠪᠡᠨ ᠨᠡᠭᠡᠭᠡᠵᠦ ᠨᠢᠭᠡᠨᠲᠡ ᠬᠠᠷᠠᠭᠠᠳ ᠄
— ᠠᠯᠢᠪ ᠲᠠ ᠨᠠᠳᠠ ᠨᠢᠭᠡ ᠶᠠᠩᠵᠤᠤᠷ ᠠᠪᠤᠭᠠᠳ ᠥᠭ ᠭᠡᠵᠦ ᠵᠠᠬᠢᠷᠤᠯᠠ᠃
ᠲᠡᠭᠦᠨ ᠳ᠋ᠦ᠍ ᠶᠠᠩᠵᠤᠤᠷ ᠵᠠᠭᠤᠯᠭᠠᠵᠤ ᠠᠰᠠᠭᠠᠵᠤ ᠥᠭᠭᠦᠯᠡ ᠂ ᠲᠡᠭᠡᠭᠡᠳ ᠰᠠᠭᠤᠯᠠ᠃ ᠠᠷᠢᠬᠢ ᠂ ᠠᠢᠷᠠᠭ ᠤᠤᠭᠤᠯᠠ᠃ ᠡᠳᠡᠨ ᠦ᠌ ᠳᠣᠲᠣᠷᠠ ᠬᠠᠮᠤᠭ ᠤ᠋ᠨ ᠠᠬᠠᠮᠠᠳ ᠨᠢ ᠲᠤᠤ ᠨᠠᠢᠵᠠ ᠶᠤᠮ᠂ ᠪᠠᠭᠠ ᠵᠡᠷᠭᠡ ᠬᠠᠯᠵᠠᠨ᠂ ᠬᠠᠰᠤᠬᠤ ᠳᠥᠷᠪᠡ ᠶ᠋ᠢᠨ ᠨᠢᠳᠦᠨ ᠦ᠌ ᠰᠢᠯ ᠲᠡᠢ᠂ ᠶᠡᠷᠦ ᠪᠠᠢᠳᠠᠯ ᠨᠢ ᠠᠷᠭᠠ ᠦᠭᠡᠢ ᠯᠡ ᠪᠢᠴᠢᠭ ᠦ᠋ᠨ ᠬᠥᠮᠦᠨ ᠦ᠌ ᠰᠢᠨᠵᠢ ᠲᠡᠢ᠃ ᠨᠠᠢᠷ ᠴᠦ᠍ ᠵᠢᠭᠳᠡᠷᠡᠵᠦ ᠳᠠᠭᠤ ᠴᠦ᠍ ᠴᠢᠩᠭᠠᠷᠠᠯᠠ᠂ ᠬᠠᠷᠠ ᠬᠤᠪᠴᠠᠰᠤᠲᠤ ᠬᠡᠦᠬᠡᠨ ᠭᠡᠨᠡᠳᠲᠡ ᠰᠡᠷᠭᠦᠵᠦ ( ᠶᠡᠷᠦ ᠨᠢ ᠶᠠᠭᠤᠮᠠ ᠪᠦᠬᠦᠨ ᠢ᠋ ᠭᠡᠨᠡᠳᠲᠡ ᠬᠢᠳᠡᠭ ᠪᠣᠯᠤᠯᠲᠠᠢ )᠄
— ᠰᠣᠨᠢᠨ ᠶᠠᠭᠤᠮᠠ ᠶᠠᠷᠢᠭᠠᠴᠢ ᠲᠠ ᠮᠢᠨᠢ ᠃ ᠶᠠᠭᠤᠨ ᠲᠥᠯᠥᠭᠡ ᠤᠷᠠᠨ ᠵᠣᠬᠢᠶᠠᠯᠴᠢᠳ ᠪᠠᠢᠭᠠ ᠪᠢᠯᠡ ᠳᠠ ᠭᠡᠵᠦ ᠱᠠᠭᠠᠷᠳᠠᠪᠠ
ᠳᠤᠤ ᠨᠠᠢᠵᠠ ᠪᠢᠴᠢᠭ ᠵᠣᠬᠢᠶᠠᠯ ᠤ᠋ᠨ ᠲᠤᠬᠠᠢ ᠶᠠᠷᠢᠬᠤ ᠳ᠋ᠤ᠌ ᠬᠡᠵᠢᠶᠡᠳᠡ ᠪᠡᠯᠡᠨ ᠪᠠᠢᠳᠠᠭ ᠤᠴᠢᠷ ᠳᠠᠬᠢᠨ ᠱᠠᠭᠠᠷᠳᠠᠭᠤᠯᠤᠭᠰᠠᠨ ᠦᠭᠡᠢ ᠄
— ᠾᠧᠠ ᠸᠮᠢᠨᠭᠣᠢ 《 ᠵᠡᠪᠰᠡᠭ ᠨᠢᠭᠡᠲᠡᠢ ᠨᠥᠬᠥᠳ 》 ᠭᠡᠳᠡᠭ ᠨᠣᠮ ᠳ᠋ᠠᠭᠠᠨ ᠁ ᠭᠡᠲᠡᠯᠡ ᠲᠡᠭᠦᠯᠳᠡᠷ ᠬᠤᠭᠤᠷᠴᠢ ᠢᠨᠢᠶᠡᠳᠦ ᠠᠯᠳᠠᠵᠤ ᠄
— ᠵᠠᠷ ᠵᠡᠪᠰᠡᠭ ᠮᠢᠨᠢ ᠪᠠᠶᠠᠷᠲᠠᠢ ᠭᠡᠳᠡᠭ ᠪᠤᠰᠤ ᠤᠤ ? ᠭᠡᠬᠦ ᠳ᠋ᠦ᠍ ᠲᠤᠤ ᠨᠠᠢᠵᠠ ᠬᠡᠨᠡᠭ ᠴᠦ᠍ ᠦᠭᠡᠢ ᠄
— ᠶᠤ᠋ ᠵᠣᠯᠢᠭ ᠪᠢ ᠪᠤᠷᠤᠭᠤ ᠶᠠᠷᠢᠵᠤ ᠪᠠᠢᠨᠠ ᠃ ᠾᠧᠨ ᠸᠮᠢᠨᠭᠤᠢ ᠬᠡᠦᠬᠡᠨ ᠤ ᠪᠠᠨ ᠬᠡᠦᠬᠡᠳ ᠭᠠᠷᠭᠠᠵᠤ ᠪᠠᠢᠭᠠ ᠶ᠋ᠢ ᠮᠥᠨ ᠴᠦ᠍ ᠵᠢᠪᠡᠭᠦᠨ ᠪᠢᠴᠢᠵᠡᠢ ᠭᠡᠬᠦ ᠳ᠋ᠦ᠍ ᠂
— ᠬᠡᠦᠬᠡᠳ ᠭᠠᠷᠭᠠᠵᠤ ᠪᠠᠢᠬᠠ ᠶᠢ ᠪᠢᠴᠢᠨᠡ ᠭᠡᠳᠡᠭ ᠴᠢᠨᠢ ᠳᠡᠮᠡᠢ ᠬᠡᠷᠡᠭ ᠪᠠᠢᠨᠠ ᠳᠠ ᠭᠡᠵᠦ ᠬᠠᠷᠠ ᠬᠤᠪᠴᠠᠰᠤᠲᠤ ᠬᠡᠯᠡᠪᠡ᠃ ᠪᠦᠳᠦᠭᠦᠨ ᠰᠠᠢᠬᠠᠨ ᠡᠷᠡ ᠬᠤᠨᠳᠠᠭᠠ ᠲᠠᠢ ᠠᠷᠢᠬᠢ ᠪᠠᠨ ᠬᠥᠨᠳᠡᠷᠴᠦ ᠥᠭᠡᠬᠦ ᠲᠡᠢ ᠮᠢᠬᠠ ᠪᠠᠷ ᠳᠠᠷᠤᠭᠤᠯᠤᠭᠠᠳ᠄
— ᠲᠡᠭᠡᠵᠦ ᠪᠣᠯᠬᠤ ᠦᠭᠡᠢ᠂ ᠤᠷᠠᠨ ᠵᠣᠬᠢᠶᠠᠯ ᠳ᠋ᠤ᠌ ᠠᠮᠢᠳᠤᠷᠠᠯ ᠢ᠋ ᠪᠢᠴᠢᠳᠡᠭ ᠡᠴᠡ ᠬᠣᠢᠰᠢ ᠶᠠᠭᠤ ᠴᠦ᠍ ᠪᠢᠴᠢᠵᠦ ᠪᠣᠯᠤᠨᠠ᠃ ᠦᠨᠡᠨ ᠶᠠᠭᠤᠮᠠ ᠦᠨᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠢᠬᠤ ᠶᠣᠰᠣᠲᠠᠢ᠂ ᠮᠠᠨ ᠤ᠋ ᠵᠣᠬᠢᠶᠠᠯᠴᠢᠳ ᠳᠡᠩᠳᠡᠭᠦᠦ ᠰᠢᠨᠲᠠᠷᠠᠮᠠᠲᠠᠭᠠᠢ ᠶᠤᠮ ᠠ᠋᠃ ᠵᠢᠱ᠌ᠢᠶᠡ ᠨᠢ ᠬᠠᠢᠷᠠ ᠳᠤᠷᠠᠯᠠᠯ ᠤ᠋ᠨ ᠲᠤᠬᠠᠢ ᠪᠢᠴᠢᠬᠦ ᠳ᠋ᠡᠭᠡᠨ ᠳᠡᠩᠳᠡᠭᠦᠦ ᠢᠴᠢᠮᠡᠬᠡᠢ ᠪᠣᠯᠬᠢ ᠪᠠᠢᠨᠠ᠃ ᠣᠷᠴᠢᠨ ᠦᠶᠡ ᠶ᠋ᠢᠨ ᠵᠠᠯᠠᠭᠤᠴᠤᠳ ᠤ᠋ᠨ ᠳᠤᠷᠠᠯᠠᠯ ᠭᠡᠳᠡᠭ ᠣᠨᠳᠣᠣ ᠰᠢᠦ ᠳᠡ᠂ ᠠᠯᠢᠨ ᠪᠣᠯᠭᠠᠨ ᠬᠠᠴᠠᠷ ᠳᠡᠭᠡᠷᠡ ᠨᠢ ᠦᠨᠦᠰᠴᠦ ᠪᠠᠢᠬᠤ ᠪᠣᠢ ᠳᠠ ᠭᠡᠬᠦ ᠳ᠋ᠦ᠍ ᠴᠣᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠥᠭᠵᠢᠯᠳᠦᠨ ᠢᠨᠢᠶᠡᠪᠡ ᠂ ᠲᠤᠤ ᠶ᠋ᠢᠨ ᠡᠬᠡᠨᠡᠷ ᠶᠠ ᠠᠯᠠᠭᠠ ᠪᠠᠨ ᠬᠠᠪᠰᠤᠷᠴᠤ ᠬᠥᠯ ᠢ᠋ᠶ᠋ᠡᠨ ᠬᠠᠪᠴᠢᠵᠤ ᠪᠠᠢᠭᠠᠳ ᠣᠨᠴᠠ ᠶ᠋ᠢᠨ ᠪᠠᠶᠠᠷ ᠲᠠᠢ ᠢᠨᠢᠶᠡᠯᠡ᠃
ᠲᠤᠤ ᠨᠠᠢᠵᠠ ᠰᠣᠩᠭᠣᠳᠠᠭ ᠵᠣᠬᠢᠶᠠᠯᠴᠢᠳ ᠢ᠋ ᠨᠡᠷᠡᠯᠡᠬᠦ ᠳᠤᠷᠠᠲᠠᠢ ᠪᠢᠯᠡ᠃ ᠲᠡᠭᠦᠨ ᠦ᠌ ᠬᠡᠪᠯᠡᠭᠳᠡᠭᠡ ᠦᠭᠡᠢ ᠵᠣᠬᠢᠶᠠᠯ ᠤ᠋ᠳ ᠲᠤ᠌ ᠪᠧᠲ᠋ᠾᠧᠦᠸᠸᠨ ᠤ ᠬᠥᠭᠵᠢᠮ ᠢ᠋ ᠰᠣᠨᠣᠰᠤᠭᠠᠳ ᠤᠶᠠᠷᠠᠵᠤ ᠪᠠᠢᠭᠠ ᠵᠠᠯᠠᠭᠤ ᠪᠦᠰᠡᠭᠦᠢ᠂ ᠷᠧᠮᠪᠷᠨᠠᠳ᠋ᠠᠲ ᠤ᠋ᠨ ᠵᠢᠷᠤᠭ ᠢ᠋ ᠨᠡᠷᠡᠯᠡᠵᠦ ᠪᠠᠢᠭᠠ ᠰᠣᠶᠣᠯᠲᠤ ᠬᠥᠮᠦᠰ ᠳᠦᠭᠦᠷᠡᠩ ᠪᠣᠢ᠃ ᠲᠡᠨᠦᠮᠡᠯ ᠬᠦᠦ ᠶ᠋ᠢᠨ ᠪᠤᠴᠠᠵᠤ ᠢᠷᠡᠭᠰᠡᠨ ᠨᠢ ( ᠷᠧᠮᠪᠷᠨᠠᠳ᠋ᠠᠲ ᠤ᠋ᠨ ᠵᠢᠷᠤᠭ ᠠ᠋ᠴᠠ ᠰᠡᠳᠦᠪᠯᠡᠨ ᠪᠢᠴᠢᠪᠡ ᠭᠡᠰᠡᠨ ᠲᠠᠢᠯᠪᠤᠷᠢ ᠲᠠᠢ ) ᠭᠡᠳᠡᠭ ᠵᠣᠬᠢᠶᠠᠯ ᠴᠦ᠍ ᠪᠣᠢ᠂ ᠲᠤᠤ ᠨᠠᠢᠵᠠ ᠶ᠋ᠢᠨ ᠬᠠᠮᠤᠭ ᠤ᠋ᠨ ᠶᠡᠬᠡ ᠭᠤᠳᠤᠷᠠᠳᠠᠭ ᠵᠦᠢᠯ ᠭᠡᠪᠡᠯ ᠣᠷᠴᠢᠨ ᠦᠶᠡ ᠶ᠋ᠢᠨ ᠰᠣᠶᠣᠯ ᠠ᠋ᠴᠠ ᠬᠣᠴᠣᠷᠤᠭᠳᠠᠭᠰᠠᠳ ᠤᠨ ᠲᠤᠬᠠᠢ ᠶᠤᠮ ᠂ ᠤᠷᠠᠨ ᠵᠣᠬᠢᠶᠠᠯ ᠤᠨ ᠲᠤᠬᠠᠢ ᠳ᠋ᠤ᠌ ᠪᠣᠯ ᠣᠷᠴᠢᠨ ᠦᠶᠡ ᠶ᠋ᠢᠨ ᠪᠢᠰᠢ ᠭᠡᠳᠡᠭ ᠵᠢᠮᠡᠯᠡᠯ ᠢ᠋ ᠪᠠᠷᠠᠭᠤᠨ ᠵᠡᠭᠦᠨ ᠦᠭᠡᠢ ᠰᠢᠳᠡᠯᠡᠨᠡ ᠃ ᠲᠤᠤ ᠨᠠᠢᠵᠠ ᠵᠢᠭᠠᠬᠠᠨ ᠬᠠᠯᠠᠵᠤ ᠪᠠᠢᠭᠠ ᠪᠣᠯᠤᠯᠲᠠᠢ᠄
— ᠲᠠ ᠨᠠᠷ ᠴᠢᠩᠭᠢᠰ ᠠᠶ᠋ᠢᠭᠡᠮᠡᠲ᠋ᠣᠸ ᠦ᠋ᠨ ᠵᠣᠬᠢᠶᠠᠯ ᠁ ᠭᠡᠲᠡᠯᠡ ᠄
— ᠠᠶ᠋ᠢᠭᠡᠮᠡᠲ᠋ᠣᠸ ᠪᠢᠰᠢ ᠠᠶ᠋ᠢᡁᠠᠮᠠᠲ᠋ᠣᠸ ᠭᠡᠭᠴᠢ ᠭᠡᠵᠦ ᠠᠪᠠᠭᠠᠢ ᠨᠢ ᠵᠠᠯᠠᠷᠠᠭᠤᠯᠪᠠ
— ᠠ ᠲᠡᠢᠨ᠂ ᠣᠷᠴᠢᠭᠤᠯᠭᠠ ᠨᠢ ᠮᠠᠭᠤᠬᠠᠨ ᠪᠣᠯᠤᠭᠰᠠᠨ ᠰᠢᠭ᠋ ᠪᠠᠢᠨᠠ ᠯᠠᠢ ᠂ ᠶᠣᠰᠣᠲᠠᠢ ᠣᠷᠴᠢᠨ ᠦᠶᠡ ᠶ᠋ᠢᠨ ᠵᠣᠬᠢᠶᠠᠯ ᠭᠡᠳᠡᠭ ᠲᠡᠢᠮᠦ ᠯᠡ ᠪᠠᠢᠬᠤ ᠶᠣᠰᠣᠲᠠᠢ᠂ ᠪᠢᠳᠠ ᠠᠮᠢᠳᠤᠷᠠᠯ ᠳ᠋ᠤ᠌ ᠬᠡᠲᠦᠷᠬᠡᠢ ᠬᠦᠯᠢᠭᠳᠡᠵᠦ ᠪᠠᠷᠢᠭᠳᠠᠵᠤ ᠪᠠᠢᠨᠠ᠃ ᠡᠨᠡ ᠶᠢᠷᠲᠢᠨᠴᠦ ᠳ᠋ᠦ᠍ ᠰᠡᠳᠬᠢᠯ ᠢ᠋ᠶ᠋ᠡᠨ ᠴᠢᠯᠥᠭᠡᠲᠡᠢ ᠲᠠᠯᠪᠢᠬᠤ ᠬᠡᠷᠡᠭᠲᠡᠢ᠂ ᠢᠳᠡᠰᠢ ᠪᠠᠨ ᠬᠠᠷᠴᠠᠭᠠᠢ ᠰᠢᠭ᠋ ᠰᠢᠭᠦᠷᠡᠵᠦ ᠴᠢᠳᠠᠪᠠᠯ ᠪᠣᠯᠬᠤ ᠨᠢ ᠲᠡᠷᠡ᠃ ᠶᠠᠭᠤᠮᠠ ᠶᠡᠬᠡ ᠨᠠᠷᠢᠨ ᠣᠯᠵᠤ ᠯᠠ ᠬᠠᠷᠠᠬᠤ ᠬᠡᠷᠡᠭᠲᠡᠢ᠃ ᠣᠲ᠋ᠸᠯᠯᠣ ᠬᠠᠷᠠ᠂ ᠳ᠋ᠸᠽᠳ᠋ᠸᠮᠣᠨᠠ ᠴᠠᠭᠠᠨ ᠪᠠᠢᠭᠰᠠᠨ ᠠ᠋ᠴᠠ ᠯᠠ ᠬᠠᠮᠤᠭ ᠤᠴᠢᠷ ᠨᠢ ᠤᠷᠭᠤᠳᠠᠭ ᠂ ᠱᠠᠺᠰᠫᠢᠶᠸᠷ ᠭᠡᠳᠡᠭ ᠦᠨᠡᠬᠡᠷ ᠠᠵᠢᠭᠴᠢ ᠬᠥᠮᠦᠨ ᠪᠠᠢᠵᠤ ᠂ ᠲᠡᠢᠮᠦ ᠤᠤ?
— ᠵᠠ ᠲᠡᠢᠮᠦ ᠴᠦ᠍ ᠪᠣᠯ ᠤᠤ ᠳᠠ ᠭᠡᠵᠦ ᠬᠠᠷᠢᠭᠤᠯᠪᠠ᠃ ᠲᠤᠤ ᠨᠠᠢᠵᠠ ᠬᠠᠷᠠᠪᠠ ᠤᠤ ᠭᠡᠰᠡᠨ ᠶᠠᠩᠵᠤ ᠲᠠᠢ ᠤᠷᠮᠠᠲᠠᠢᠬᠠᠨ ᠮᠢᠰᠢᠪᠡᠯᠵᠡᠪᠡ᠃ ᠬᠣᠢᠮᠣᠷ ᠤ᠋ᠨ ᠠᠪᠳᠠᠷᠠ ᠳᠡᠭᠡᠷᠡ ᠦᠵᠡᠰᠬᠦᠯᠡᠩ ᠪᠣᠯᠭᠠᠵᠤ ᠲᠠᠯᠪᠢᠭᠰᠠᠨ ᠲᠣᠮᠣ ᠭᠠᠤᠯᠢᠨ ᠪᠤᠷᠬᠠᠨ ᠪᠠᠰᠠ ᠮᠢᠰᠢᠯᠵᠡᠵᠦ ᠪᠠᠢᠬᠤ ᠰᠢᠭ᠋᠃ ᠲᠤᠤ ᠶ᠋ᠢᠨ ᠡᠬᠡᠨᠡᠷ ᠶᠠ ᠶ᠋ᠢᠨ ᠬᠣᠷᠮᠣᠢ ᠳ᠋ᠤ᠌ ᠰᠠᠯᠬᠢ ᠣᠷᠣᠭᠰᠠᠨ ᠪᠣᠯᠤᠯᠲᠠᠢ ᠢᠳᠡᠭᠡ ᠪᠤᠳᠠᠭᠠ ᠪᠠᠨ ᠰᠢᠨᠡᠳᠬᠡᠨ ᠭᠦᠶᠦᠨᠡ᠃ ᠬᠠᠷᠠ ᠬᠤᠪᠴᠠᠰᠤᠲᠤ ᠴᠠᠭᠠᠨ ᠬᠤᠪᠴᠠᠰᠤᠲᠤ ᠬᠣᠶᠠᠷ ᠠᠮᠠ ᠪᠠᠬᠠᠨ ᠵᠠᠳᠠᠭᠠᠢᠷᠠᠵᠤ ᠤᠴᠢᠷ ᠰᠢᠯᠲᠠᠭᠠᠨ ᠦᠭᠡᠢ ᠬᠥᠭᠡᠷᠡᠯᠳᠦᠭᠡᠨ ᠪᠣᠯᠪᠠ᠃ ᠤᠳᠬᠠ ᠵᠣᠬᠢᠶᠠᠯ ᠤ᠋ᠨ ᠲᠤᠬᠠᠢ ᠣᠨᠣᠯᠴᠢ ᠶᠠᠷᠢᠶᠠ ᠶ᠋ᠢ ᠳᠡᠮᠵᠢᠬᠦ ᠬᠥᠮᠦᠨ ᠣᠯᠳᠠᠬᠤ ᠦᠭᠡᠢ ᠲᠤᠯᠠ ᠪᠦᠳᠦᠭᠦᠨ ᠰᠠᠢᠬᠠᠨ ᠡᠷᠡ ᠠᠮᠢᠳᠤᠷᠠᠯ ᠤ᠋ᠨ ᠲᠤᠬᠠᠢ ᠶᠠᠷᠢᠶᠠ ᠪᠠᠷ ᠲᠠᠰᠤᠯᠠᠨ ᠠᠪᠴᠤ ᠡᠢᠨ ᠥᠭᠦᠯᠡᠷᠦᠨ᠄
— ᠠᠵᠠ ᠵᠢᠷᠭᠠᠯ ᠤ᠋ᠨ ᠲᠤᠬᠠᠢ ᠮᠠᠷᠭᠤᠪᠠᠯ ᠮᠠᠷᠭᠤᠶᠠ᠂ ᠲᠠ ᠨᠠᠷ ᠰᠢᠭ᠋ ᠡᠢᠮᠦ ᠵᠠᠯᠠᠭᠤ ᠰᠠᠢᠬᠠᠨ ᠪᠦᠰᠡᠭᠦᠢᠴᠦᠳ ᠡᠨᠡ ᠲᠤᠬᠠᠢ ᠶᠠᠷᠢᠬᠤ ᠶᠡᠬᠡ ᠳᠤᠷᠠᠲᠠᠢ ᠪᠠᠢᠳᠠᠭ ᠰᠢᠦ ᠳᠡ᠃ ᠪᠣᠳᠣᠭᠠᠳ ᠪᠠᠢᠪᠠᠯ ᠮᠠᠷᠭᠤᠭᠠᠳ ᠴᠦ᠍ ᠪᠠᠢᠬᠤ ᠪᠠᠷ ᠶᠠᠭᠤᠮᠠ ᠪᠣᠢ ᠯᠠ ᠳᠠ᠂ ᠣᠳᠣ ᠪᠢᠳᠡ ᠰᠢᠷᠡᠭᠡ ᠲᠣᠭᠣᠷᠢᠭᠠᠳ ᠰᠠᠢᠬᠠᠨ ᠨᠠᠷᠭᠢᠵᠤ ᠪᠠᠢᠨᠠ᠃ ᠪᠦᠳᠦᠭᠦᠨ ᠡᠷᠡ ᠳᠡᠷᠡᠰᠦᠨ ᠦ᠌ ᠪᠣᠯᠣᠷ ᠵᠦᠩᠵᠡ ᠪᠡᠷ ᠳᠦᠭᠦᠷᠭᠡᠭᠰᠡᠨ ᠬᠠᠷᠠ ᠠᠷᠢᠬᠢ ᠤᠤᠭᠤᠵᠤ ᠲᠠᠮᠰᠢᠶᠠᠯᠠᠬᠤ ᠳ᠋ᠤ᠌《 ᠳᠠᠭᠤᠰᠲᠠᠯᠠ ᠤᠤᠭᠤᠨᠠ ᠭᠡᠳᠡᠭ ᠲᠤᠩ ᠵᠥᠪ》 ᠭᠡᠵᠦ ᠬᠡᠦᠬᠡᠨ ᠨᠦ᠍ᠭᠦᠳ ᠲᠠᠯᠠᠷᠬᠠᠪᠠ᠃ ᠴᠣᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠳᠠᠭᠤᠰᠲᠠᠯᠠ ᠤᠤᠭᠤᠯᠠ᠃
— ᠠᠵᠠ ᠵᠢᠷᠭᠠᠯ ᠭᠡᠳᠡᠭ ᠴᠢᠨᠢ ᠬᠠᠢᠷᠠ ᠳᠤᠷᠠᠯᠠᠯ ᠮᠥᠨ᠂ ᠮᠠᠷᠭᠤᠭᠠᠨ ᠦᠭᠡᠢ ᠲᠡᠢᠮᠦ ᠰᠢᠦ ᠳᠡ᠃ ᠬᠠᠷᠢᠨ ᠬᠠᠢᠷᠠ ᠳᠤᠷᠠᠯᠠᠯ ᠳ᠋ᠤ᠌ ᠬᠠᠷᠠᠮᠴᠢ ᠵᠠᠩ ᠪᠠᠢᠵᠤ ᠪᠣᠯᠬᠤ ᠦᠭᠡᠢ᠂ ᠲᠡᠭᠡᠪᠡᠯ ᠵᠢᠷᠭᠠᠯ ᠪᠢᠰᠢ ᠶᠡᠷᠦ ᠶ᠋ᠢᠨ ᠵᠠᠯᠬᠠᠭᠤ ᠲᠠᠢ ᠠᠮᠢᠳᠤᠷᠠᠯ ᠪᠣᠯᠤᠨᠠ᠃ ᠨᠠᠮᠤᠷ ᠤ᠋ᠨ ᠮᠣᠳᠣ ᠬᠠᠮᠤᠭ ᠨᠠᠪᠴᠢ ᠪᠠᠨ ᠭᠦᠪᠢᠵᠦ ᠨᠢᠴᠦᠭᠦᠷᠡᠳᠡᠭ ᠰᠢᠭ ᠪᠦᠬᠦ ᠨᠠᠪᠴᠢ ᠪᠠᠨ ᠲᠠᠰᠤᠯᠵᠤ ᠬᠠᠶᠠᠵᠤ ᠪᠠᠢᠵᠤ ᠰᠠᠶᠢ ᠵᠢᠷᠭᠠᠨᠠ᠃
— ᠠᠢ ᠵᠣᠯᠢᠭ ᠭᠡᠵᠦ ᠶᠣᠰᠣᠲᠠᠢ ᠵᠥᠪ᠂ ᠴᠢ ᠶᠡᠷᠦ ᠤᠷᠠᠨ ᠵᠣᠬᠢᠶᠠᠯ ᠪᠢᠴᠢᠪᠡᠯ ᠰᠦᠷᠡᠬᠡᠢ ᠳᠠᠯᠳᠠ ᠤᠳᠬᠠ ᠲᠠᠢ ᠵᠣᠬᠢᠶᠠᠯ ᠪᠢᠴᠢᠬᠦ ᠬᠥᠮᠦᠨ ᠰᠢᠦ ᠭᠡᠵᠦ ᠲᠤᠤ ᠨᠠᠢᠵᠠ ᠭᠠᠯ ᠳᠡᠭᠡᠷᠡ ᠲᠣᠰᠣ ᠨᠡᠮᠡᠯᠡ᠃ ᠴᠠᠭᠠᠨ ᠬᠤᠪᠴᠠᠰᠤᠲᠤ ᠪᠣᠰᠤᠨ ᠬᠠᠷᠠᠢᠵᠤ᠄
— ᠬᠥᠶᠢ ᠨᠠᠳᠠ ᠨᠢᠭᠡ ᠰᠠᠨᠠᠯ ᠪᠠᠢᠨᠠ᠂ ᠪᠥᠵᠢᠭᠯᠡᠵᠡᠭᠡᠪᠡᠯ ᠶᠠᠭᠠᠬᠢᠭᠰᠠᠨ ᠶᠤᠮ ᠭᠡᠵᠦ ᠱᠣᠮᠪᠣᠯᠵᠠᠪᠠ᠃ ᠤᠤᠬᠠᠢ ᠶ᠋ᠢᠨ ᠳᠡᠰ ᠪᠥᠵᠢᠭᠯᠡᠬᠦ ᠶᠦᠮ ᠪᠣᠯᠤᠯᠠ᠃ ᠲᠡᠭᠦᠯᠳᠡᠷ ᠬᠤᠭᠤᠷᠴᠢ ᠶ᠋ᠢᠨ ᠣᠩᠭᠣᠳ ᠨᠢ ᠣᠷᠣᠯᠠ᠃ ᠡᠪ ᠳᠠᠪ ᠬᠢᠭᠰᠡᠨ ᠶᠠᠮᠠᠷ ᠨᠢᠭᠡ ᠠᠳᠠ ᠲᠠᠢ ᠠᠶᠠ ᠡᠭᠦᠰᠬᠡᠵᠦ ᠤᠷᠲᠤ ᠦᠰᠦ ᠪᠡᠨ ᠰᠡᠭᠰᠡᠯᠵᠡᠭᠦᠯᠦᠨ ᠰᠠᠨᠳᠠᠯᠢ ᠳᠡᠭᠡᠷᠡ ᠪᠡᠨ ᠦᠰᠦᠷᠴᠦ ᠪᠠᠭᠤᠵᠤ ᠪᠠᠢᠨᠠ᠂ ᠲᠤᠤ ᠨᠠᠢᠵᠠ ᠬᠠᠷᠠ ᠬᠤᠪᠴᠠᠰᠤᠲᠤ ᠶ᠋ᠢ ᠠᠪᠤᠯᠠ᠂ ᠲᠤᠤ ᠶ᠋ᠢᠨ ᠡᠬᠡᠨᠡᠷ ᠶᠠ ᠪᠦᠳᠦᠭᠦᠨ ᠡᠷᠡ ᠳ᠋ᠦ᠍ ᠣᠴᠢᠪᠠ᠂ ᠴᠠᠭᠠᠨ ᠬᠤᠪᠴᠠᠰᠤᠲᠤ ᠨᠠᠮᠠ ᠶ᠋ᠢ ᠰᠢᠷᠪᠢ ᠲᠠᠲᠠᠭᠠᠳ᠄
— ᠲᠠ ᠨᠠᠮᠠ ᠶ᠋ᠢ ᠤᠷᠢᠬᠤ ᠦᠭᠡᠢ ᠤᠤ? ᠭᠡᠵᠦ ᠪᠠᠢᠨᠠ᠃
— ᠪᠢ ᠪᠥᠵᠢᠭᠯᠡᠵᠦ ᠴᠢᠳᠠᠳᠠᠭ ᠦᠭᠡᠢ ᠯᠡ ᠳᠡ ᠭᠡᠰᠡᠨ ᠴᠢᠨᠢ᠂
— ᠠ᠋ ᠴᠠᠪᠠᠰᠤ ᠳᠠ ᠭᠡᠵᠦ ᠴᠥᠬᠥᠷᠡᠩ ᠢ᠋ᠶ᠋ᠡᠨ ᠪᠠᠷᠠᠪᠠ᠃ ᠲᠡᠭᠦᠯᠳᠡᠷ ᠬᠤᠭᠤᠷᠴᠢ ᠸᠠᠭ ᠸᠠᠭ ᠭᠡᠵᠦ ᠣᠷᠢᠯᠠᠨ ᠬᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠱᠠᠯᠠ ᠳᠡᠪᠰᠡᠯᠡᠨ ᠬᠦᠴᠦ ᠨᠡᠮᠡᠵᠦ ᠤᠯᠠᠭᠠᠨ ᠬᠠᠷᠠ ᠶ᠋ᠢᠨ ᠤᠭᠤᠴᠠ ᠨᠢᠷᠤᠭᠤ ᠬᠤᠯᠪᠢᠯᠵᠠᠨ᠂ ᠭᠠᠷ ᠬᠥᠯ ᠲᠠᠲᠠᠪᠠᠭᠠᠨᠠᠨ ᠰᠦᠢᠳ ᠪᠣᠯᠤᠯᠠ᠃ ᠲᠤᠤ ᠨᠠᠢᠵᠠ ᠮᠥᠴᠡᠭᠡ ᠪᠡᠨ ᠥᠭᠬᠦ ᠦᠭᠡᠢ ᠪᠠᠢᠨᠠ᠂ ᠣᠷᠴᠢᠨ ᠦᠶᠡ ᠶ᠋ᠢᠨ ᠲᠤᠬᠠᠢ ᠨᠣᠮᠯᠠᠯ ᠳ᠋ᠠᠭᠠᠨ ᠬᠠᠷᠢᠨ ᠨᠢᠭᠡ ᠳᠡᠪᠡᠷᠴᠦ ᠳᠡᠪᠬᠡᠷᠡᠵᠦ ᠪᠠᠢᠭᠠ ᠪᠣᠯᠤᠯᠲᠠᠢ᠂ ᠭᠡᠰᠡᠨ ᠴᠦ᠍ ᠨᠣᠮ ᠪᠢᠰᠢᠯᠭᠠᠭᠴᠢ ᠶ᠋ᠢᠨ ᠳᠦᠷᠢ᠂ ᠬᠣᠯᠠ ᠶ᠋ᠢᠨ ᠬᠠᠷᠠᠭᠠ ᠮᠠᠭᠤᠳᠠᠭᠰᠠᠨ ᠨᠢᠳᠦᠨ ᠦ᠌ ᠰᠢᠯ ᠨᠢ ᠠᠯᠢ ᠠᠯᠢᠨ ᠲᠠᠢ ᠨᠢᠭᠡ ᠶᠡᠬᠡ ᠲᠠᠭᠠᠷᠠᠮᠵᠢᠲᠠᠢ ᠪᠢᠰᠢ ᠪᠥᠭᠡᠳ ᠬᠥᠭᠡᠷᠦᠬᠦᠢᠯᠡᠯᠲᠡᠢ ᠪᠠᠢᠯᠠ᠃ ᠴᠠᠭᠠᠨ ᠬᠤᠪᠴᠠᠰᠤᠲᠤ ᠲᠡᠰᠴᠦ ᠶᠠᠳᠠᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ《 ᠪᠣᠯᠬᠢ ᠠᠮᠢᠲᠠᠨ ᠴᠢ ᠲᠡᠭᠡᠭᠡᠳ ᠠᠩᠭᠠᠢᠭᠠᠳ ᠰᠠᠭᠤᠵᠤ ᠪᠠᠢ》 ᠭᠡᠰᠡᠨ ᠶᠠᠩᠵᠤ ᠲᠠᠢ ᠨᠠᠮᠠ ᠶ᠋ᠢ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠨᠤᠯᠮᠤᠭᠠᠳ ᠴᠠᠬᠢᠯᠭᠠᠨ ᠡᠭᠡᠰᠢᠭᠲᠦ ᠬᠠᠢᠷᠴᠠᠭ ᠲᠤ ᠤᠯᠠᠮ ᠴᠦ᠍ ᠠᠳᠠ ᠲᠠᠢ ᠬᠥᠭᠵᠢᠮ ᠲᠠᠯᠪᠢᠭᠠᠳ ᠲᠡᠭᠦᠯᠳᠡᠷ ᠬᠤᠭᠤᠷᠴᠢᠨ ᠳ᠋ᠤ᠌ ᠪᠡᠶᠡ ᠪᠡᠨ ᠲᠤᠰᠢᠶᠠᠯᠠ᠃
ᠵᠤᠨ ᠤ᠋ ᠬᠠᠯᠠᠭᠤᠨ ᠡᠳᠦᠷ ᠪᠠᠢᠭᠰᠠᠨ ᠰᠠᠨ᠂ ᠪᠦᠳᠦᠭᠦᠨ ᠰᠠᠢᠬᠠᠨ ᠡᠷᠡ ᠬᠥᠯᠥᠰᠥᠨ ᠳ᠋ᠡᠭᠡᠨ ᠨᠡᠪᠲᠡᠷᠡᠵᠡᠢ᠃ ᠬᠠᠷᠠ ᠬᠤᠪᠴᠠᠰᠤᠲᠤ ᠶ᠋ᠢᠨ ᠵᠤᠵᠠᠭᠠᠨ ᠪᠡᠶᠡ ᠤᠶᠠᠨ ᠬᠠᠳᠠᠨ ᠣᠭᠲᠣ ᠦᠭᠡᠢ ᠪᠣᠯᠪᠠᠴᠤ ᠡᠷᠴᠢᠭᠨᠡᠨ ᠬᠥᠲᠥᠯᠬᠦ ᠨᠢ ᠭᠠᠢᠬᠠᠯᠲᠠᠢ᠂ ᠴᠠᠭᠠᠨ ᠬᠤᠪᠴᠠᠰᠤᠲᠤ ᠴᠣᠬᠣᠮ《 ᠠᠯᠠᠭᠠᠳ》 ᠥᠭᠭᠦᠯᠡ᠃ ᠲᠤᠤ ᠨᠠᠢᠵᠠ ᠶ᠋ᠢᠨ ᠪᠥᠮᠪᠥᠭᠡᠷ ᠴᠠᠭᠠᠨ ᠭᠡᠷ ᠬᠥᠪᠭᠥᠯᠵᠡᠵᠦ ᠪᠠᠢᠬᠤ ᠰᠢᠭ᠋᠂ ᠬᠥᠭᠵᠢᠮ ᠵᠣᠭᠰᠣᠬᠤ ᠳ᠋ᠤ᠌ ᠮᠠᠨᠢ ᠬᠡᠳᠦ ᠶᠡᠬᠡ ᠬᠦᠴᠢᠷ ᠠᠵᠢᠯ ᠬᠢᠭᠰᠡᠨ ᠶᠦᠮ ᠰᠢᠭ ᠤᠭᠤᠬᠢᠯᠳᠤᠨ ᠬᠦᠢᠲᠡᠨ ᠠᠢᠷᠠᠭ ᠵᠠᠯᠭᠢᠯᠠᠪᠠ᠂ ᠲᠤᠤ ᠨᠠᠢᠵᠠ ᠶ᠋ᠢᠨ ᠡᠬᠡᠨᠡᠷ ᠦ᠋ᠨ ᠨᠢᠳᠦ ᠵᠢᠭᠲᠡᠢᠬᠡᠨ ᠮᠠᠨᠠᠷᠠᠵᠤ ᠴᠢᠷᠠᠢ ᠶ᠋ᠢᠨ ᠬᠢᠨᠢ ᠴᠢᠰᠤ ᠣᠭᠰᠢᠴᠢᠬᠠᠭᠰᠠᠨ ᠪᠠᠢᠯᠠ᠃ ᠪᠢ ᠵᠠᠶᠠᠭᠠ ᠲᠠᠢ ᠯᠠ ᠢᠨᠢᠶᠡᠳᠦ ᠠᠯᠳᠠᠴᠢᠬᠠᠭᠰᠠᠨ ᠦᠭᠡᠢ ᠰᠠᠯᠬᠢᠨ ᠳ᠋ᠤ᠌ ᠭᠠᠷᠤᠯᠠ᠃
ᠦᠳᠡ ᠶ᠋ᠢᠨ ᠬᠣᠭᠣᠯᠠᠨ ᠤ᠋ ᠳᠠᠷᠠᠭᠠ ᠲᠤᠤᠯᠠ ᠶ᠋ᠢᠨ ᠭᠣᠣᠯ ᠳ᠋ᠤ᠌ ᠣᠴᠢᠵᠤ ᠤᠰᠤᠨ ᠳ᠋ᠤ᠌ ᠣᠷᠣᠬᠤ ᠶᠤᠮ ᠪᠣᠯᠪᠠ᠃ ᠲᠤᠤ ᠨᠠᠢᠵᠠ ᠶ᠋ᠢᠨ ᠭᠠᠷᠭᠠᠭᠰᠠᠨ ᠡᠨᠡ ᠰᠠᠨᠠᠯ ᠢ᠋ ᠴᠥᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠳᠡᠮᠵᠢᠪᠡ᠃ ᠰᠢᠨᠡ ᠲᠠᠷᠭᠤᠨ ᠮᠢᠬᠠ ᠪᠠᠷ ᠬᠢᠭᠰᠡᠨ ᠪᠤᠤᠵᠠ ᠢᠳᠡᠵᠦ ᠠᠢᠷᠠᠭ ᠤᠤᠭᠤᠭᠰᠠᠨ ᠤ᠋ ᠳᠠᠷᠠᠭᠠ ᠬᠡᠲᠦᠷᠬᠡᠢ ᠴᠠᠳᠴᠤ ᠦᠭᠡ ᠳᠠᠭᠤ ᠴᠦ᠍ ᠴᠥᠭᠡᠨ ᠪᠣᠯᠵᠠᠢ᠃ ᠲᠤᠤᠯᠠ ᠶ᠋ᠢᠨ ᠡᠷᠭᠢ ᠳ᠋ᠦ᠍ ᠬᠤᠪᠴᠠᠰᠤ ᠪᠠᠨ ᠲᠠᠢᠴᠢᠵᠤ ᠤᠰᠤᠨ ᠳ᠋ᠤ᠌ ᠣᠷᠣᠪᠠ᠃ ᠴᠡᠪᠡᠷ ᠢᠴᠢᠮᠡᠲᠡᠭᠡᠢ ᠭᠡᠳᠡᠭ ᠣᠷᠴᠢᠨ ᠦᠶᠡ ᠳ᠋ᠦ᠍ ᠪᠠᠰᠠ ᠯᠠ ᠥᠭᠡᠷᠡ ᠪᠣᠯᠤᠭᠰᠠᠨ ᠭᠡᠳᠡᠭ ᠢ᠋ ᠵᠣᠷᠢᠭᠤᠳᠠ ᠦᠵᠡᠭᠦᠯᠵᠦ ᠪᠠᠢᠬᠤ ᠮᠡᠲᠦ ᠤᠯᠠᠭᠠᠨ᠂ ᠴᠠᠭᠠᠨ᠂ ᠬᠠᠷᠠ ᠲᠠᠱᠶ᠋ᠨᠵᠠ ᠨᠤᠭᠤᠳ ᠨᠣᠭᠣᠭᠠᠨ ᠵᠦᠯ ᠬᠡᠨ ᠳᠡᠭᠡᠷᠡ ᠤᠨᠠᠵᠤ᠂ ᠭᠤᠸᠠ ᠦᠵᠡᠮᠵᠢ ᠪᠡᠷ ᠭᠠᠷᠭᠠᠩᠭᠤᠢ ᠬᠠᠭᠳᠠᠷᠠᠵᠤ ᠦᠵᠡᠭᠦᠯᠵᠦ ᠶᠠᠪᠤᠭᠠ ᠬᠡᠦᠬᠡᠨ ᠨᠦ᠍ᠭᠦᠳ ᠦ᠋ᠨ ᠪᠡᠶᠡ ᠲᠤᠤᠯᠠ ᠶ᠋ᠢᠨ ᠤᠰᠤᠨ ᠳ᠋ᠤ᠌ ᠤᠬᠢᠶᠠᠭᠳᠠᠪᠠ᠃ ᠲᠤᠤ ᠨᠠᠢᠵᠠ ᠵᠦᠯᠭᠡᠨ ᠳᠡᠭᠡᠷᠡ ᠢᠳᠡᠭᠡ ᠪᠤᠳᠠᠭᠠ ᠳᠡᠯᠭᠡᠵᠦ ᠭᠣᠣᠯ ᠤ᠋ᠨ ᠤᠰᠤᠨ ᠳ᠋ᠤ᠌ ᠰᠡᠷᠢᠭᠦᠴᠡᠭᠦᠯᠦᠭᠰᠡᠨ ᠳᠠᠷᠠᠰᠤ ᠰᠥᠩᠨᠡᠪᠡ᠃ ᠰᠠᠢᠬᠠᠨ ᠬᠡᠦᠬᠡᠨ ᠨᠦ᠍ᠭᠦᠳ ᠲᠡᠢ ᠤᠰᠤᠨ ᠳ᠋ᠤ᠌ ᠣᠷᠣᠵᠤ ᠳᠠᠷᠠᠰᠤ ᠤᠤᠭᠤᠬᠤ ᠰᠢᠭ᠋ ᠵᠢᠷᠭᠠᠯ ᠡᠨᠡ ᠶᠡᠷᠲᠢᠨᠴᠦ ᠳ᠋ᠦ᠍ ᠦᠭᠡᠢ ᠭᠡᠨᠡ᠃ ᠤᠷᠠᠨ ᠵᠣᠬᠢᠶᠠᠯ ᠠᠮᠢᠳᠤᠷᠠᠯ ᠤ᠋ᠨ ᠲᠤᠬᠠᠢ ᠰᠦᠷᠵᠢᠨ ᠶᠠᠷᠢᠶᠠ ᠠᠯᠢ ᠬᠡᠳᠦᠢᠨ ᠮᠠᠷᠲᠠᠭᠳᠠᠵᠤ ᠴᠢᠬᠢ ᠴᠢᠨᠢ ᠠᠯᠲᠠ ᠪᠣᠯᠤᠭ ᠭᠡᠳ ᠶᠠᠷᠢᠳᠠᠭ ᠶᠠᠷᠢᠶᠠ ᠡᠬᠢᠯᠡᠵᠡᠢ᠃ ᠡᠭᠦᠨ ᠳ᠋ᠦ᠍ ᠭᠤᠷᠪᠠᠨ ᠬᠡᠦᠬᠡᠨ ᠳᠤᠷᠠᠲᠠᠢ ᠭᠡᠳᠡᠭ ᠨᠢ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ᠃ ᠴᠠᠭᠠᠨ ᠬᠤᠪᠴᠠᠰᠤᠲᠤ ᠨᠠᠷᠠᠨ ᠳ᠋ᠤ᠌ ᠪᠣᠷᠣᠯᠠᠭᠰᠠᠨ( ᠬᠥᠷᠥᠰᠥᠵᠢᠭᠰᠡᠨ) ᠭᠣᠣᠯ ᠰᠢᠭ᠋ ᠪᠡᠶᠡ ᠪᠡᠨ ᠭᠠᠢᠬᠠᠭᠤᠯᠵᠤ ᠨᠠᠭᠠᠰᠢ ᠴᠠᠭᠠᠰᠢ ᠭᠡᠲᠡᠩ ᠭᠣᠳᠣᠩ ᠶᠠᠪᠤᠨᠠ᠃ ᠪᠡᠶᠡ ᠶ᠋ᠢᠨ ᠦᠵᠡᠮᠦᠷᠢ ᠣᠨᠴᠠ ᠦᠭᠡᠢ ᠬᠠᠷᠠ ᠬᠤᠪᠴᠠᠰᠤᠲᠤ ᠲᠡᠭᠦᠨ ᠢ᠋ ᠠᠲᠠᠭᠠᠷᠬᠠᠯᠲᠠᠢ ᠰᠢᠷᠪᠠᠨ ᠬᠠᠷᠠᠨᠠ᠂ ᠲᠤᠤ ᠶ᠋ᠢᠨ ᠡᠬᠡᠨᠡᠷ ᠪᠦᠳᠦᠭᠦᠨ ᠡᠷᠡ ᠶ᠋ᠢ ᠮᠠᠰᠢᠳᠠ ᠰᠠᠢᠰᠢᠶᠠᠨ ᠢᠯᠡᠷᠬᠡᠢ ᠡᠷᠬᠡᠯᠡᠨ ᠱᠣᠮᠪᠣᠯᠵᠠᠵᠤ ᠪᠠᠢᠯᠠ᠃ ᠪᠦᠳᠦᠭᠦᠨ ᠡᠷᠡ ᠤᠯᠠᠮ ᠬᠥᠭᠡᠷᠴᠦ ᠪᠡᠶᠡ ᠪᠡᠨ ᠮᠠᠭᠲᠠᠨᠠ᠃ ᠲᠡᠭᠦᠯᠳᠡᠷ ᠬᠤᠭᠤᠷᠴᠢ ᠴᠠᠭᠠᠨ ᠬᠤᠪᠴᠠᠰᠤᠲᠤ ᠳᠤ ᠦᠢᠯᠡᠴᠢᠯᠡᠨᠡ᠃ ᠲᠤᠤ ᠨᠠᠢᠵᠠ ᠶᠠᠪᠠᠭᠠᠨ ᠱᠣᠭ ᠶᠠᠷᠢᠵᠤ ᠥᠪᠡᠷ ᠢ᠋ᠶ᠋ᠡᠨ ᠥᠪᠡᠷ ᠢ᠋ ᠪᠡᠨ ᠢᠨᠢᠶᠡᠯᠭᠡᠨᠡ᠃ ᠬᠠᠷᠠ ᠬᠤᠪᠴᠠᠰᠤᠲᠤ ᠰᠤᠨᠳᠤᠭᠠᠢᠷᠠᠬᠤ ᠠ᠋ᠴᠠ ᠪᠠᠨ ᠲᠦᠷᠦᠭᠦᠨ ᠳ᠋ᠦ᠍ ᠲᠤᠤ ᠨᠠᠢᠵᠠ ᠶ᠋ᠢ ᠪᠠᠷᠠᠳᠠᠨ ᠨᠠᠭᠠᠯᠢᠩᠬᠠᠢᠲᠤᠵᠤ ᠡᠬᠢᠯᠡᠪᠡ᠃ ᠣᠷᠣᠭᠠ ᠮᠣᠷᠢ ᠢᠵᠢᠯᠢ ᠪᠡᠨ ᠣᠯᠤᠨᠠ ᠭᠡᠳᠡᠭ ᠦᠨᠡᠨ ᠦᠭᠡ ᠶᠦᠮ᠃ ᠡᠨᠡ ᠬᠡᠦᠬᠡᠨ ᠨᠦ᠍ᠭᠦᠳ ᠪᠡᠶᠡ ᠪᠡᠶᠡ ᠪᠡᠨ ᠮᠥᠨ ᠰᠠᠢᠬᠠᠨ ᠣᠯᠵᠠᠢ᠃ ᠲᠡᠢᠨ ᠪᠠᠢᠲᠠᠯᠠ ᠬᠡᠷᠡᠭ ᠪᠢᠰᠢᠳᠡᠯᠡ᠃ ᠬᠠᠷᠠ ᠬᠤᠪᠴᠠᠰᠤᠲᠤ ᠴᠠᠭᠠᠨ ᠬᠤᠪᠴᠠᠰᠤᠲᠤ ᠬᠣᠶᠠᠷ ᠨᠢᠭᠡ ᠮᠡᠳᠡᠭᠰᠡᠨ ᠴᠢᠨᠢ ᠬᠡᠷᠡᠭᠦᠯ ᠦ᠋ᠨ ᠬᠤᠷᠴᠠ ᠢᠯᠳᠦ ᠵᠦᠷᠢᠭᠦᠯᠴᠢᠭᠡᠭᠰᠡᠨ ᠪᠠᠢᠯᠠ᠃
— ᠪᠢ ᠴᠢᠮᠠ ᠶ᠋ᠢ ᠮᠡᠳᠡᠨᠡ ᠭᠡᠵᠦ ᠬᠠᠷᠠ ᠬᠤᠪᠴᠠᠰᠤᠲᠤ ᠬᠡᠯᠡᠪᠡ᠃
— ᠴᠢᠨᠦ ᠮᠡᠳᠡᠳᠡᠭ ᠲᠡᠨᠳᠡ ᠪᠠᠨ ᠯᠠ ᠪᠢᠵᠡ ᠭᠡᠵᠦ ᠴᠠᠭᠠᠨ ᠬᠤᠪᠴᠠᠰᠤᠲᠤ ᠬᠡᠯᠡᠪᠡ᠃
— ᠴᠢᠨᠦ ᠭᠣᠶᠣ ᠰᠠᠢᠬᠠᠨ ᠴᠢᠨᠢ ᠲᠡᠨᠳᠡ ᠪᠢᠵᠡ ᠭᠡᠬᠦ ᠳ᠋ᠦ᠍
— ᠴᠢᠮᠠ ᠲᠠᠢ ᠠᠳᠠᠯᠢᠬᠠᠨ ᠬᠠᠷᠠ ᠬᠥᠮᠦᠨ ᠡᠷᠭᠢᠭᠦᠯᠳᠡᠭ ᠦᠭᠡᠢ ᠭᠡᠵᠦ ᠪᠠᠢᠨᠠ᠃ ᠲᠡᠷᠡ ᠬᠣᠶᠠᠷ ᠢ᠋ ᠡᠪᠯᠡᠷᠡᠭᠦᠯᠬᠦ ᠭᠡᠵᠦ ᠪᠥᠭᠡᠮ ᠬᠥᠯ ᠪᠣᠯᠪᠠ᠃ ᠲᠡᠭᠦᠯᠳᠡᠷ ᠬᠤᠭᠤᠷᠴᠢ ᠴᠠᠭᠠᠨ ᠬᠤᠪᠴᠠᠰᠤᠲᠤ ᠶ᠋ᠢ ᠲᠤᠤ ᠨᠠᠢᠵᠠ ᠬᠠᠷᠠ ᠬᠤᠪᠴᠠᠰᠤᠲᠤ ᠶ᠋ᠢ ᠠᠷᠭᠠᠳᠠᠪᠠ᠃
ᠲᠤᠤᠯᠠ ᠶ᠋ᠢᠨ ᠤᠰᠤᠨ ᠳ᠋ᠤ᠌ ᠰᠡᠷᠢᠭᠦᠴᠡᠭᠰᠡᠨ ᠦ᠌ ᠳᠠᠷᠠᠭᠠ ᠲᠤᠤ ᠶ᠋ᠢᠨ ᠭᠡᠷ ᠲᠤ ᠢᠷᠡᠵᠦ ᠣᠷᠣᠢ ᠶ᠋ᠢᠨ ᠬᠣᠭᠣᠯᠠ ᠢᠳᠡᠪᠡ᠃ ᠣᠷᠣᠢ ᠶ᠋ᠢᠨ ᠬᠣᠭᠣᠯᠠᠨ ᠳ᠋ᠤ᠌ ᠲᠣᠰᠣ ᠪᠣᠬᠢᠰᠢᠬᠰᠡᠨ ᠱᠣᠷᠣᠯᠠᠭ ᠢᠳᠡᠵᠦ ᠪᠠᠰᠠ ᠠᠢᠷᠠᠭ ᠠᠷᠢᠬᠢ ᠤᠤᠭᠤᠯᠠ᠃ ᠴᠠᠳᠴᠤ ᠪᠠᠢᠭᠠ ᠭᠡᠵᠦ ᠵᠢᠭᠲᠡᠢᠬᠡᠨ᠂ ᠢᠯᠠᠩᠭᠤᠶᠠ ᠬᠠᠷᠠ ᠬᠤᠪᠴᠠᠰᠤᠲᠤ᠂ ᠪᠦᠳᠦᠭᠦᠨ ᠡᠷᠡ ᠬᠣᠶᠠᠷ ᠤ᠋ᠨ ᠢᠳᠡᠵᠦ ᠤᠤᠭᠤᠬᠤ ᠨᠢ ᠭᠠᠢᠬᠠᠯᠲᠠᠢ᠂ ᠪᠤᠰᠤᠳ ᠤ᠋ᠨ ᠭᠤᠸᠠ ᠰᠠᠢᠬᠠᠨ ᠳ᠋ᠤ᠌ ᠠᠲᠠᠭᠠᠷᠬᠠᠵᠤ ᠶᠠᠪᠤᠳᠠᠭ ᠪᠣᠯ ᠢᠩᠭᠢᠲᠡᠯᠡ ᠪᠡᠨ ᠢᠳᠡᠬᠦ ᠶ᠋ᠢᠨ ᠬᠡᠷᠡᠭ ᠪᠠᠢᠨᠠ ᠤᠤ᠃ ᠨᠠᠷᠠᠨ ᠰᠢᠩᠭᠡᠬᠦ ᠦᠶᠡ ᠪᠡᠷ ᠲᠡᠭᠦᠯᠳᠡᠷ ᠬᠤᠭᠤᠷᠴᠢ ᠪᠥᠵᠢᠭᠯᠡᠵᠦ ᠪᠥᠵᠢᠭᠯᠡᠵᠦ ᠣᠢᠴᠢᠪᠠ᠃ ᠴᠠᠭᠠᠨ ᠬᠤᠪᠴᠠᠰᠤᠲᠤ ᠲᠡᠭᠦᠨ ᠢ᠋ ᠰᠡᠷᠡᠭᠡᠬᠦ ᠭᠡᠵᠦ ᠤᠷᠤᠯᠳᠤᠨ《 ᠬᠥᠭᠡᠷᠦᠬᠦᠢ ᠮᠢᠨᠢ᠂ ᠬᠥᠭᠡᠷᠦᠬᠦᠢ ᠮᠢᠨᠢ》 ᠤᠬᠢᠯᠠᠩᠨᠠᠨ ᠪᠠᠢᠯᠠ᠃ ᠬᠠᠷᠠᠩᠭᠤᠢ ᠴᠦ᠍ ᠪᠣᠯᠪᠠ᠂ ᠲᠤᠤ ᠨᠠᠢᠵᠠ ᠨᠠᠮᠠ ᠶ᠋ᠢ ᠤᠨᠲᠠᠭᠠᠳ ᠶᠠᠪᠤ ᠭᠡᠵᠦ ᠪᠠᠢᠨᠠ᠂ ᠪᠢ ᠵᠠ ᠭᠡᠳ ᠭᠠᠷᠤᠯᠠ᠃ ᠭᠡᠷ ᠡᠴᠡ ᠵᠠᠢᠳᠠᠭᠤᠬᠠᠨ ᠲᠤᠤ ᠨᠠᠢᠵᠠ ᠶ᠋ᠢᠨ ᠠᠪᠠᠭᠠᠢ ᠪᠦᠳᠦᠭᠦᠨ ᠡᠷᠡ ᠬᠣᠶᠠᠷ ᠲᠡᠪᠡᠷᠢᠯᠳᠦᠨ ᠵᠣᠭᠰᠣᠵᠤ ᠪᠠᠢᠪᠠ᠃
— ᠶᠠᠭᠠᠬᠢᠵᠤ ᠪᠣᠯᠬᠤ ᠶᠤᠮ ᠪᠣᠢ! ᠪᠣᠯᠬᠤ ᠦᠭᠡᠢ ᠰᠢᠦ ᠳᠡ ᠭᠡᠵᠦ ᠲᠤᠤ ᠨᠠᠢᠵᠠ ᠶ᠋ᠢᠨ ᠠᠪᠠᠭᠠᠢ《 ᠬᠢ ᠬᠢ ᠬᠢ》 ᠭᠡᠵᠦ ᠪᠣᠯᠤᠨᠠ ᠭᠡᠰᠡᠨ ᠶᠠᠩᠵᠤ ᠲᠠᠢ ᠵᠥᠭᠡᠯᠡᠨ ᠢᠨᠢᠶᠡᠵᠦ ᠪᠠᠢᠨᠠ᠃
ᠪᠢ ᠡᠨᠡ ᠡᠳᠦᠷ ᠦ᠋ᠨ ᠲᠡᠭᠦᠰᠬᠡᠯ ᠶᠠᠮᠠᠷ ᠪᠣᠯᠬᠤ ᠶ᠋ᠢ ᠲᠠᠭᠠᠮᠠᠭᠯᠠᠨ ᠭᠡᠷ ᠲᠡᠭᠡᠨ ᠬᠠᠷᠢᠬᠤ ᠪᠠᠷ ᠶᠠᠪᠤᠯᠠ᠃ ᠲᠤᠤ ᠨᠠᠢᠵᠠ ᠶ᠋ᠢᠨ ᠴᠠᠭᠠᠨ ᠭᠡᠷ ᠰᠥᠨᠢ ᠶ᠋ᠢᠨ ᠬᠠᠷᠠᠩᠭᠤᠢ ᠳ᠋ᠤ᠌ ᠴᠠᠢᠪᠠᠯᠵᠠᠨ ᠬᠣᠴᠣᠷᠪᠠ᠃《 ᠡᠨᠡ ᠪᠦᠬᠦᠨ ᠭᠡᠷ ᠲᠤ ᠪᠣᠯᠵᠤ ᠪᠠᠢᠨᠠ ᠰᠢᠦ ᠳᠡ》 ᠭᠡᠵᠦ ᠪᠢ ᠪᠣᠳᠣᠯᠠ᠃
– – – –
① ᠨᠢᠳᠦᠨ ᠪᠤᠯᠤᠩ ᠢ᠋ᠶ᠋ᠠᠷ ᠡᠭᠳᠡᠭᠦᠴᠡᠨ ᠬᠠᠷᠠᠭᠠᠳ ᠨᠢᠳᠦ ᠪᠤᠷᠤᠭᠤᠯᠠᠬᠤ
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ᠂ ᠪᠣᠷᠵᠢᠭᠢᠨ ᠪᠠᠭᠠᠲᠤᠷ᠂ ᠣᠳᠣᠨᠬᠤᠸᠠᠷ
ᠬᠢᠨᠠᠭ᠍ᠴᠢ : ᠣᠳᠣᠨᠬᠤᠸᠠᠷ᠂ ᠲᠤᠭᠴᠢ ᠰᠠᠷᠠᠨᠠ
2024᠂ 3᠂ 13 ᠤ ᠡᠳᠦᠷ