ᠪᠢᠯᠳᠠᠤᠴᠢ ᠂ ᠳᠠᠷᠤᠭᠠ ᠲᠠᠢ ᠪᠠᠨ ᠶᠠᠷᠢᠭᠰᠠᠨ ᠨᠢ – ᠴᠠᠨᠳᠠ ᠶᠢᠨ ᠱᠠᠭᠳᠠᠷ Бялдууч ᠂ Даргатайгаа ярьсан нь – Цандын Шагдар
667ᠪᠢᠯᠳᠠᠤᠴᠢ ᠂ ᠳᠠᠷᠤᠭᠠ ᠲᠠᠢ ᠪᠠᠨ ᠶᠠᠷᠢᠭᠰᠠᠨ ᠨᠢ
( ᠬᠣᠱᠣᠩ ᠰᠢᠯᠦᠭ)
— ᠳᠠᠷᠤᠭᠠ ᠠ᠋! ᠲᠠᠨ ᠤ᠋ ᠪᠡᠶᠡ ᠵᠦᠭᠡᠷ ᠪᠢᠵᠡ
ᠳᠠᠷᠤᠯᠲᠠ ᠮᠠᠷᠤᠯᠲᠠ ᠴᠢᠨᠢ ᠭᠠᠢ ᠦᠭᠡᠢ ᠤᠤ
ᠲᠠᠩᠳᠠ ᠪᠢ ᠲᠠᠨ ᠢ᠋ ᠪᠣᠳᠣᠭᠠᠳ
ᠲᠠᠭᠠᠷᠠᠵᠤ ᠪᠠᠢᠭᠠ ᠪᠣᠯᠪᠠ ᠤᠤ ᠭᠡᠵᠦ ᠵᠣᠪᠠᠭᠠᠳ ᠁
— ᠵᠦᠭᠡᠷ ᠵᠦᠭᠡᠷ ᠪᠡᠶᠡ ᠰᠠᠢᠨ
ᠵᠢᠷᠦᠬᠡ ᠳᠠᠷᠤᠯᠲᠠ ᠪᠦᠭᠦᠳᠡ ᠰᠠᠢᠨ
ᠲᠠᠨ ᠤ᠋ ᠥᠪᠡᠷ ᠦ᠋ᠨ ᠪᠡᠶᠡ ᠰᠠᠢᠨ ᠤᠤ?
ᠲᠠᠷᠭᠤᠨ ᠲᠠᠪᠠᠲᠠᠢ ᠡᠪᠦᠯᠵᠢᠵᠦ ᠪᠠᠢᠨᠠ ᠤᠤ?
— ᠤᠤᠯ ᠨᠢ ᠪᠢ ᠭᠡᠳᠡᠭ ᠬᠥᠮᠦᠨ ᠪᠣᠯ
ᠤᠯᠤᠰ ᠤ᠋ᠨ ᠲᠥᠯᠥᠭᠡ ᠲᠥᠷᠥᠭᠰᠡᠨ ᠰᠢᠭ ᠪᠠᠢᠨᠠ᠃
ᠬᠦᠨᠳᠦᠬᠡᠨ ᠠᠵᠢᠯ ᠬᠢᠬᠦ ᠲᠣᠰᠤᠮ ᠢ᠋ᠶ᠋ᠠᠨ
ᠬᠦᠴᠦ ᠣᠷᠣᠭᠠᠳ ᠪᠠᠢᠬᠤ ᠰᠢᠭ᠋ ᠪᠠᠢᠨᠠ᠃
ᠳᠠᠷᠤᠭᠠ ᠠ᠋ ᠲᠠᠨ ᠤ᠋ ᠬᠢᠨ ᠴᠥᠮ ᠯᠡ
ᠲᠠᠵᠢ ᠦᠭᠡᠢ ᠮᠡᠨᠳᠦ ᠰᠠᠢᠨ ᠪᠢᠵᠡ ᠳᠡ?
ᠪᠢ ᠲᠡᠳᠡᠨ ᠢ᠋ ᠲᠠᠨᠢᠳᠠᠭ ᠪᠣᠯᠬᠣᠷ ᠢ᠋ᠶ᠋ᠠᠨ
ᠪᠢᠲᠡᠭᠦᠬᠡᠨ ᠳ᠋ᠡᠭᠡᠨ ᠪᠣᠳᠣᠭᠠᠳ ᠯᠠ ᠶᠠᠪᠤᠬᠤ ᠶᠤᠮ᠃
— ᠰᠠᠢᠨ ᠰᠠᠢᠨ ᠪᠦᠭᠦᠳᠡ ᠰᠠᠢᠨ
ᠰᠠᠨᠠᠭᠠ ᠵᠣᠪᠠᠯᠲᠠ ᠦᠭᠡᠢ ᠮᠡᠨᠳᠦ ᠰᠠᠢᠨ
ᠥᠪᠡᠷ ᠢ᠋ᠶ᠋ᠡᠨ ᠶᠠᠭᠤ ᠬᠢᠵᠦ ᠪᠠᠢᠨᠠ ᠳᠠ?
ᠡᠭᠦᠷᠭᠡᠲᠦ ᠠᠵᠢᠯ ᠲᠠᠩᠬᠢ ᠪᠢᠵᠡ?
— ᠰᠢᠵᠢᠭᠡ ᠶ᠋ᠢᠨ ᠲᠤᠤᠶᠤ ᠪᠢ ᠪᠣᠯ
ᠰᠢᠨᠡ ᠶ᠋ᠢ ᠰᠠᠨᠠᠭᠠᠴᠢᠯᠠᠬᠤ ᠪᠠᠷ ᠲᠥᠷᠥᠭᠰᠡᠨ ᠰᠢᠭ ᠪᠠᠢᠨᠠ᠃
ᠠᠰᠢᠭᠲᠠᠢ ᠨᠢᠭᠡ ᠶᠠᠭᠤᠮᠠ ᠰᠠᠨᠠᠭᠠᠴᠢᠯᠠᠬᠤ ᠭᠡᠳ
ᠠᠷᠠᠢ ᠭᠦᠢᠴᠡᠬᠦ ᠦᠭᠡᠢ ᠳᠥᠭᠥᠭᠡᠳ ᠯᠡ ᠪᠠᠢᠨᠠ ᠳᠠ᠃
ᠳᠠᠷᠤᠭᠠ ᠠ᠋! ᠲᠠᠨ ᠤ᠋ ᠮᠠᠰᠢᠨ ᠤ᠋ ᠳᠤᠭᠤᠢ ᠶ᠋ᠢ
ᠳᠠᠪᠬᠤᠷ ᠬᠢᠴᠢᠬᠡᠵᠦ ᠪᠣᠯᠬᠤ ᠦᠭᠡᠢ ᠶᠦᠮ ᠤᠤ?
ᠬᠠᠶᠠ ᠪᠢ ᠨᠢᠭᠡ ᠬᠠᠷᠠᠬᠤ ᠪᠠᠷ ᠢ᠋ᠶ᠋ᠠᠨ
ᠬᠠᠭᠠᠷᠠᠴᠢᠬᠠᠬᠤ ᠪᠣᠢ ᠭᠡᠵᠦ ᠠᠶᠤᠭᠠᠳ ᠪᠠᠢᠬᠤ ᠶᠤᠮ᠃
— ᠮᠠᠰᠢᠨ ᠤ᠋ ᠳᠤᠭᠤᠢ ᠵᠦᠭᠡᠷ ᠵᠦᠭᠡᠷ
ᠮᠠᠰᠢ ᠪᠥᠬᠡ ᠡᠳ᠋ ᠪᠠᠢᠭᠠ ᠶᠤᠮ᠂
ᠳᠡᠮᠡᠢ ᠶᠠᠭᠤᠮᠠᠨ ᠳ᠋ᠤ᠌ ᠰᠠᠨᠠᠭᠠ ᠵᠣᠪᠠᠭᠠᠳ ᠪᠠᠢᠪᠠᠯ
ᠳᠡᠩᠳᠡᠭᠦᠦ ᠶᠠᠳᠠᠷᠠᠴᠢᠬᠠᠵᠤ ᠮᠡᠳᠡᠨᠡ ᠰᠢᠦ ᠳᠡ
— ᠲᠡᠢᠮᠦ ᠠ᠋᠂ ᠳᠠᠷᠤᠭᠠ ᠠ᠋᠂ ᠪᠢ ᠶᠡᠷᠦ ᠨᠢ
ᠳᠡᠷᠡᠨ ᠦ᠌ ᠲᠥᠯᠥᠭᠡ ᠲᠥᠷᠥᠭᠰᠡᠨ ᠰᠢᠭ ᠪᠠᠢᠨᠠ᠃
ᠳᠡᠯᠡᠬᠡᠢ ᠶ᠋ᠢᠨ ᠪᠥᠮᠪᠥᠷᠴᠡᠭ ᠢ᠋ ᠨᠠᠷᠠᠨ ᠳ᠋ᠤ᠌ ᠣᠢᠷᠠᠲᠤᠭᠤᠯᠬᠤ ᠭᠡᠵᠦ
ᠳᠡᠩᠰᠡᠯᠵᠦ ᠪᠣᠳᠣᠭᠠᠳ ᠨᠣᠢᠷ ᠦᠭᠡᠢ ᠬᠣᠨᠣᠬᠤ ᠶᠤᠮ᠃
— ᠬᠥᠶᠢ ᠳᠠᠷᠤᠭᠠ ᠠ᠋ ᠲᠠ
ᠬᠥᠯᠳᠡᠭᠦᠦ ᠭᠠᠵᠠᠷ ᠣᠢᠴᠢᠪᠠ ᠳᠠ᠂ ᠮᠡᠳᠡᠭᠡᠷᠡᠢ
ᠲᠠᠰᠢᠭᠤ ᠭᠠᠵᠠᠷ ᠬᠠᠷᠠᠬᠤ ᠪᠠᠷ ᠢ᠋ᠶ᠋ᠠᠨ ᠪᠢ
ᠲᠠᠨ ᠢ᠋ ᠣᠢᠴᠢᠬᠤ ᠪᠣᠢ ᠭᠡᠵᠦ ᠠᠶᠤᠳᠠᠭ ᠶᠤᠮ᠃
— ᠬᠥᠶᠢ ᠳᠠᠷᠤᠭᠠ ᠠ᠋᠂ ᠳᠠᠷᠤᠭᠠ ᠠ᠋!
ᠬᠥᠯᠳᠡᠭᠦᠦ ᠭᠠᠵᠠᠷ ᠣᠢᠴᠢᠪᠠ ᠳᠠ ᠲᠠ
ᠬᠠᠮᠢᠭᠠ ᠴᠦ᠍ ᠭᠡᠰᠡᠨ ᠲᠡᠷᠡ᠂ ᠶᠠᠪᠤᠬᠤ ᠳ᠋ᠠᠭᠠᠨ
ᠬᠠᠵᠠᠭᠠᠢ ᠭᠠᠵᠠᠷ ᠬᠠᠷᠠᠬᠤ ᠪᠠᠷ ᠢ᠋ᠶ᠋ᠠᠨ
ᠬᠥᠭᠡᠷᠦᠬᠦᠢ ᠳᠠᠷᠤᠭᠠ ᠮᠢᠨᠢ ᠡᠨᠳᠡ
ᠬᠥᠯ ᠨᠢ ᠬᠠᠯᠲᠤᠷᠢᠬᠤ ᠪᠣᠢ ᠭᠡᠵᠦ ᠠᠶᠤᠳᠠᠭ ᠶᠤᠮ᠃
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠠᠯᠲᠠᠨᠴᠢᠮᠡᠭ
ᠬᠢᠨᠠᠭ᠍ᠴᠢ : ᠲᠤᠭᠴᠢ ᠰᠠᠷᠠᠨᠠ
2024᠂ 3᠂ 1 ᠤ ᠡᠳᠦᠷ