ᠡᠳ᠋ ᠰᠢᠯᠭᠠᠭᠴᠢ ᠶᠢᠨ ᠲᠠᠮᠠᠭᠠ – ᠴᠠᠨᠳᠠ ᠶᠢᠨ ᠱᠠᠭᠳᠠᠷ Эд шалгагчийн тамга – Цандын Шагдар
267ᠡᠳ᠋ ᠰᠢᠯᠭᠠᠭᠴᠢ ᠶᠢᠨ ᠲᠠᠮᠠᠭᠠ
ᠵᠠᠮᠠᠴᠠ ᠶ᠋ᠢᠨ ᠱᠠᠭᠳᠠᠷ
( ᠱᠣᠭ ᠰᠢᠯᠦᠭ)
ᠡᠳ᠋ ᠰᠢᠯᠭᠠᠭᠴᠢ ᠶ᠋ᠢᠨ ᠭᠠᠷ ᠲᠤ᠌
ᠡᠯᠳᠡᠪ ᠶᠠᠩᠵᠤ ᠶ᠋ᠢᠨ ᠲᠠᠮᠠᠭᠠ ᠪᠠᠢᠪᠠ᠂
ᠮᠠᠭᠤ ᠰᠠᠢᠨ ᠢ᠋ ᠨᠢ ᠦᠵᠡᠯ ᠦᠭᠡᠢ
ᠮᠤᠲᠤᠷᠯᠠᠵᠤ ᠪᠠᠢᠳᠠᠭ ᠵᠠᠩ ᠲᠠᠢ ᠪᠠᠢᠪᠠ᠃
ᠲᠡᠷᠮᠡ ᠬᠡᠦᠬᠡᠨ ᠢ᠋ ᠤᠷᠳᠤᠭᠤᠷ ᠢ᠋ᠶ᠋ᠠᠨ ᠭᠠᠷᠬᠤ ᠳ᠋ᠤᠨᠢ
ᠳᠠᠷᠠᠭᠠᠷ( ᠳᠠᠷᠳᠠᠭᠠᠷ) ᠰᠠᠢᠬᠠᠨ ᠴᠤᠪᠠ ᠶ᠋ᠢ ᠨᠢ
ᠳᠠᠮᠵᠢᠯᠭᠠ ᠶ᠋ᠢᠨ ᠪᠠᠷᠠᠭᠠ ᠭᠡᠵᠦ ᠠᠨᠳᠠᠭᠤᠷᠠᠭᠠᠳ
ᠲᠠᠮᠠᠭᠠᠯᠠᠭᠠᠳ ᠥᠩᠭᠡᠷᠡᠭᠰᠡᠨ ᠤᠳᠠᠭᠠ ᠪᠠᠢᠨᠠ᠃
ᠰᠢᠯᠭᠠᠬᠤ ᠶᠠᠭᠤᠮᠠ ᠨᠢ ᠪᠥᠭᠡᠮᠨᠡᠷᠡᠴᠢᠬᠡᠭᠡᠳ
ᠰᠠᠨᠳᠤᠷᠤᠭᠰᠠᠨ ᠨᠢᠭᠡ ᠦᠶᠡ ᠳ᠋ᠦ᠍
ᠳᠠᠩᠬᠠᠷ ᠳᠣᠷᠵᠢ ᠶ᠋ᠢ ᠳᠡᠪᠡᠯ ᠲᠡᠢ ᠶᠠᠪᠤᠬᠤ ᠳ᠋ᠤᠨᠢ
ᠳᠠᠬᠢᠨ ᠢᠨᠳᠡᠦᠳᠡᠭᠰᠡᠨ ᠬᠣᠶᠠᠳᠤᠭᠠᠷ ᠵᠡᠷᠭᠡ ᠭᠡᠵᠦ
ᠲᠠᠯᠤᠨ ᠳᠡᠭᠡᠷᠡ ᠨᠢ ᠲᠠᠮᠠᠭᠠᠯᠠᠭᠰᠠᠨ ᠪᠠᠢᠨᠠ
ᠳᠡᠮᠡᠢ ᠶᠠᠷᠢᠶᠠᠨ ᠳ᠋ᠠᠭᠠᠨ ᠬᠠᠯᠠᠴᠢᠬᠠᠭᠠᠳ
ᠳᠠᠩ ᠲᠤᠩ ᠰᠠᠭᠤᠬᠤ ᠳ᠋ᠠᠭᠠᠨ
ᠷᠢᠨᠴᠢᠨ ᠨᠢᠷᠪᠠ ᠶ᠋ᠢᠨ ᠤᠯᠠᠭᠠᠨ ᠬᠠᠮᠠᠷ ᠢ᠋
ᠡᠷᠲᠡ ᠶ᠋ᠢᠨ ᠤᠯᠠᠷᠢᠯ ᠭᠡᠵᠦ ᠡᠨᠳᠡᠭᠦᠷᠡᠭᠡᠳ
ᠡᠳ᠋ ᠦ᠋ᠨ ᠳᠡᠭᠡᠳᠦ ᠭᠡᠵᠦ ᠲᠠᠮᠠᠭᠠᠯᠠᠭᠰᠠᠨ ᠪᠠᠢᠨᠠ᠃
ᠴᠢᠨᠠᠷ ᠰᠢᠯᠭᠠᠭᠴᠢ ᠶ᠋ᠢᠨ ᠬᠠᠵᠠᠭᠤ ᠪᠠᠷ ᠥᠩᠭᠡᠷᠡᠭᠰᠡᠨ
ᠴᠡᠪᠡᠷᠯᠡᠭᠴᠢ ᠠᠪᠠᠭᠠᠢ ᠶ᠋ᠢᠨ ᠬᠠᠭᠤᠴᠢᠨ ᠱᠦᠭᠦᠷ ᠢ᠋
ᠴᠡᠪᠡᠷᠬᠡᠨ ᠰᠠᠢᠨ ᠡᠳ᠋ ᠭᠡᠵᠦ
ᠨᠢᠭᠡᠳᠦᠭᠡᠷ ᠵᠡᠷᠭᠡ ᠭᠡᠰᠡᠨ
ᠨᠢᠭᠡᠨ ᠲᠠᠮᠠᠭᠠ ᠳᠠᠷᠤᠭᠰᠠᠨ ᠪᠠᠢᠨᠠ᠃
ᠬᠠᠷᠢᠶᠠᠲᠤ ᠳᠠᠷᠤᠭᠠ ᠨᠢ ᠲᠡᠭᠦᠨ ᠢ᠋ ᠰᠣᠨᠣᠰᠤᠭᠠᠳ
ᠬᠠᠷᠢᠭᠤᠴᠠᠯᠭᠠ ᠶ᠋ᠢ ᠨᠢ ᠰᠢᠯᠭᠠᠬᠤ ᠪᠠᠷ ᠢᠷᠡᠬᠦ ᠳ᠋ᠦ᠍
ᠴᠠᠭᠠᠰᠢ ᠪᠠᠨ ᠬᠠᠷᠠᠵᠤ ᠶᠠᠷᠢᠵᠤ ᠰᠠᠭᠤᠬᠤ ᠳ᠋ᠠᠭᠠᠨ
ᠴᠠᠭᠠᠰᠤᠨ ᠳᠠᠪᠤᠤ ᠶ᠋ᠢᠨ ᠡᠳ᠋ᠯᠡᠯ ᠭᠡᠳ
ᠴᠠᠮᠴᠠ ᠶ᠋ᠢᠨ ᠳᠡᠭᠡᠷᠡ ᠨᠢ ᠲᠠᠮᠠᠭᠠᠯᠠᠭᠰᠠᠨ ᠪᠠᠢᠨᠠ᠃
ᠡᠳ᠋ ᠰᠢᠯᠭᠠᠭᠴᠢ ᠢᠩᠭᠢᠵᠦ
ᠬᠡᠳᠦ ᠬᠠᠷᠢᠭᠤᠴᠠᠯᠭᠠ ᠠᠯᠳᠠᠵᠤ
ᠵᠡᠷᠭᠡ ᠶ᠋ᠢᠨ ᠲᠠᠮᠠᠭᠠ ᠬᠠᠮᠢᠶᠠ ᠦᠭᠡᠢ ᠳᠠᠷᠤᠭᠰᠠᠨ
ᠬᠡᠷᠡᠭ ᠦ᠋ᠨ ᠤᠴᠢᠷ ᠪᠤᠷᠤᠭᠤᠳᠠᠭᠰᠠᠨ ᠪᠠᠢᠨᠠ᠃
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ
ᠬᠢᠨᠠᠭ᠍ᠴᠢ : ᠲᠤᠭᠴᠢ ᠰᠠᠷᠠᠨᠠ
2024᠂ 3᠂ 1 ᠤ ᠡᠳᠦᠷ