ᠣᠷᠣᠢ ᠦᠭᠡᠢ ᠰᠦᠮᠡ – ᠬᠣᠷᠢ ᠶᠢᠰᠦ ᠂ ᠨᠢᠭᠦᠯ ᠨᠢᠭᠦᠯ ᠠᠴᠠ ᠴᠢᠭ ᠠᠶᠤᠭᠰᠠᠨ ᠦᠭᠡᠢ Оройгүй сүм – Хорь ес ᠂ Нүгэл нүглээс чиг айсангүй - Oroigui sum 29
699ᠬᠣᠷᠢ ᠶᠢᠰᠦ ᠂ ᠨᠢᠭᠦᠯ ᠨᠢᠭᠦᠯ ᠠᠴᠠ ᠴᠢᠭ ᠠᠶᠤᠭᠰᠠᠨ ᠦᠭᠡᠢ
ᠬᠠᠯᠠ ᠦᠵᠡᠳᠡᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠭᠠᠷ ᠭᠠᠳᠠᠨᠠ
ᠬᠠᠷᠠ ᠨᠢᠳᠦᠨ ᠡᠴᠡ ᠬᠥᠮᠥᠰᠬᠡ ᠭᠠᠳᠠᠨᠠ
ᠭᠡᠨᠡᠳᠲᠡ ᠲᠩᠷᠢ ᠮᠠᠭᠤᠳᠠᠵᠤ ᠪᠥᠭᠡᠮ ᠬᠠᠷᠠ ᠡᠭᠦᠯᠡ ᠨᠡᠭᠦᠵᠦ ᠳᠠᠭᠤ ᠴᠠᠬᠢᠯᠭᠠᠨ ᠲᠠᠢ ᠪᠣᠷᠣᠭᠠ ᠣᠷᠣᠵᠤ ᠡᠬᠢᠯᠡᠯᠡ᠃ ᠣᠢᠷᠠᠬᠠᠨ ᠪᠠᠢᠭᠠ ᠬᠥᠳᠡᠭᠡ ᠭᠡᠷ ᠲᠦ᠍ ᠪᠡᠨ ᠣᠴᠢᠬᠤ ᠪᠠᠷ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠮᠣᠷᠢ ᠪᠠᠷ ᠭᠠᠷᠤᠭᠰᠠᠨ ᠬᠠᠮᠪᠤ ᠯᠠᠮᠠ ᠰᠠᠩᠵᠢᠳᠠᠯᠪᠢᠴᠣᠢᠵᠠᠮᠰᠤ ᠲᠡᠷᠡ ᠬᠦ᠌ ᠰᠢᠷᠦᠭᠦᠨ ᠪᠣᠷᠣᠭᠠᠨ ᠳ᠋ᠤ᠌ ᠲᠣᠬᠢᠶᠠᠯᠳᠤᠵᠤ ᠵᠦᠭ ᠴᠢᠭ ᠢ᠋ᠶ᠋ᠡᠨ ᠠᠯᠳᠠᠯᠠ᠃ ᠵᠠᠯᠠᠭᠤᠪᠲᠤᠷ ᡀᠠᠷᠠᠮᠪᠠ ᠶ᠋ᠢᠨ ᠡᠷᠡᠮᠡᠬᠡᠢ ᠵᠠᠩ ᠨᠢ ᠲᠡᠭᠦᠨ ᠢ᠋ ᠡᠢᠨ ᠬᠦ᠌ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠵᠠᠮ ᠳ᠋ᠤ᠌ ᠭᠠᠷᠭᠠᠬᠤ ᠳ᠋ᠤ᠌ ᠬᠦᠷᠭᠡᠵᠡᠢ᠃ ᠮᠣᠷᠢ ᠨᠢ ᠴᠦ᠍ ᠬᠤᠢᠰᠠᠭᠠᠨᠠᠨ᠂ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠵᠢᠬᠡᠷᠡᠭᠦᠳᠡᠰᠦ ᠨᠢ ᠬᠦᠷᠴᠦ ᠠᠭᠠᠳᠠᠷ ᠪᠣᠷᠣᠭᠠ ᠶ᠋ᠢ ᠲᠦᠷᠭᠡᠨ ᠥᠩᠭᠡᠷᠡᠭᠡᠰᠡᠢ ᠭᠡᠵᠦ ᠬᠦᠰᠡᠮᠵᠢᠯᠡᠨ ᠨᠥᠮᠥᠷᠢ ᠭᠠᠵᠠᠷ ᠪᠠᠷᠠᠳᠠᠬᠤ ᠶ᠋ᠢ ᠣᠷᠣᠯᠳᠣᠭᠰᠠᠨ ᠪᠣᠯᠪᠠᠴᠤ ᠪᠦᠲᠦᠭᠰᠡᠨ ᠦᠭᠡᠢ᠃ ᠵᠢᠯᠠᠭᠠ ᠳ᠋ᠤ᠌ ᠮᠣᠷᠢ ᠨᠢ ᠲᠣᠭᠲᠠᠬᠤ ᠦᠭᠡᠢ ᠪᠠᠢᠯᠠ᠃ ᠲᠡᠢᠨ ᠬᠦ᠌ ᠵᠢᠯᠠᠭᠠ ᠤᠷᠤᠭᠤᠳᠠᠨ ᠶᠠᠪᠤᠭᠰᠠᠭᠠᠷ ᠨᠡᠯᠢᠶᠡᠳ ᠬᠤᠭᠤᠴᠠᠭᠠ ᠥᠩᠭᠡᠷᠡᠯᠡ᠃ ᠠᠭᠠᠳᠠᠷ ᠪᠣᠷᠣᠭᠠ ᠠᠭᠠᠵᠢᠮ ᠢ᠋ᠶ᠋ᠠᠷ ᠵᠦᠰᠡᠷᠡᠵᠦ ᠰᠥᠨᠢᠵᠢᠨ ᠣᠷᠣᠬᠤ ᠲᠥᠯᠥᠪ ᠲᠡᠢ ᠪᠣᠯᠪᠠ᠃ ᠲᠡᠭᠡᠲᠡᠯᠡ ᠠᠰᠢᠭᠦᠢ ᠵᠢᠯᠠᠭᠠ ᠶ᠋ᠢᠨ ᠠᠮᠠ ᠣᠷᠣᠭᠣᠬᠢ ᠨᠢᠭᠡᠨ ᠲᠣᠬᠣᠢ ᠳ᠋ᠤ᠌ ᠬᠣᠶᠠᠷ ᠭᠡᠷ ᠪᠠᠢᠬᠤ ᠲᠠᠢ ᠲᠠᠭᠠᠷᠠᠯᠳᠤᠪᠠ᠃ ᠨᠢᠭᠡ ᠶ᠋ᠢᠨ ᠭᠠᠳᠠᠭᠠ ᠨᠢ ᠵᠢᠯᠣᠭᠣ ᠲᠡᠳᠡᠨ ᠵᠣᠭᠰᠣᠭᠠᠳ ᠬᠠᠮᠪᠤ ᠯᠠᠮᠠ ᠮᠣᠷᠢᠨ ᠠ᠋ᠴᠠ ᠪᠠᠭᠤᠵᠤ᠂ ᠭᠡᠷ ᠦ᠋ᠨ ᠪᠠᠷᠠᠭᠤᠨ ᠪᠥᠰᠡᠨ ᠡᠴᠡ ᠴᠤᠯᠪᠤᠭᠤᠷ ᠢ᠋ᠶ᠋ᠠᠷ ᠨᠢ ᠤᠶᠠᠭᠠᠳ ᠴᠢᠳᠥᠷᠯᠡᠵᠦ᠂ ᠡᠮᠡᠭᠡᠯ ᠢ᠋ᠶ᠋ᠡᠨ ᠰᠢᠭᠤᠭᠠᠳ ᠡᠭᠦᠳᠡ ᠶ᠋ᠢ ᠠᠶᠠᠷᠬᠠᠨ ᠰᠡᠬᠦᠵᠦ ᠲᠡᠷᠡ ᠠᠢᠯ ᠳ᠋ᠤ᠌ ᠣᠷᠣᠯᠠ᠃ ᠭᠡᠷ ᠦ᠋ᠨ ᠬᠣᠢᠮᠣᠷ ᠲᠤ᠌ ᠭᠦᠡᠭ᠌ᠭᠠᠷᠪᠠ ᠶ᠋ᠢᠨ ᠡᠮᠦᠨᠡ ᠭᠠᠭᠴᠠ ᠵᠤᠯᠠ ᠭᠣᠯᠣᠢᠲᠠᠯᠠ ᠠᠰᠠᠭᠠᠰᠤᠲᠠᠢ ᠪᠠᠢᠪᠠ᠃ ᠬᠥᠮᠦᠨ ᠦᠭᠡᠢ ᠠᠢᠯ ᠶᠤᠮ ᠤᠤ ᠳᠠ ᠭᠡᠵᠦ ᠬᠠᠮᠪᠤ ᠯᠠᠮᠠ ᠬᠡᠯᠡᠭᠡᠳ ᠭᠠᠢᠬᠠᠨ ᠵᠣᠭ ᠲᠣᠰᠤᠯᠠ᠃ ᠲᠡᠭᠡᠲᠡᠯᠡ ᠭᠡᠷ ᠦ᠋ᠨ ᠵᠡᠭᠦᠨ ᠬᠠᠶᠠᠭᠠᠨ ᠳ᠋ᠤ᠌ ᠡᠷᠭᠢᠨᠡᠭ ᠦ᠋ᠨ ᠡᠮᠦᠨᠡ ᠨᠢᠭᠡ ᠬᠥᠮᠦᠨ ᠪᠥᠭᠲᠥᠭᠡᠨᠡᠨ ᠶᠠᠭᠤᠮᠠ ᠬᠢᠵᠦ ᠪᠠᠢᠭᠠ ᠶ᠋ᠢ ᠣᠯᠵᠤ ᠬᠠᠷᠠᠯᠠ᠃
- ᠰᠠᠢᠨ ᠪᠠᠢᠨᠠ ᠤᠤ? ᠭᠡᠵᠦ ᠬᠠᠮᠪᠤ ᠯᠠᠮᠠ ᠲᠡᠷᠡ ᠬᠥᠮᠦᠨ ᠦ᠌ ᠠᠮᠤᠷ ᠢ᠋ ᠡᠷᠢᠭᠰᠡᠨ ᠴᠢᠨᠢ ᠴᠣᠴᠢᠬᠤ ᠮᠡᠲᠦ ᠳᠠᠭᠤ ᠠᠯᠳᠠᠬᠤ ᠳ᠋ᠤ᠌ ᠨᠢ ᠪᠦᠰᠡᠭᠦᠢ ᠬᠥᠮᠦᠨ ᠭᠡᠵᠦ ᠲᠠᠨᠢᠯᠠ᠃
- ᠰᠠᠢᠨ᠂ ᠲᠠ ᠰᠠᠢᠨ ᠤᠤ? ᠥᠭᠡᠳᠡ ᠪᠡᠨ ᠰᠠᠭᠤ! ᠭᠡᠵᠦ ᠭᠡᠷ ᠦ᠋ᠨ ᠡᠵᠡᠭᠲᠡᠢ ᠬᠡᠯᠡᠭᠡᠳ ᠪᠠᠷᠠᠭᠤᠨ ᠬᠠᠶᠠᠭᠠ ᠤᠷᠤᠭᠤ ᠪᠠᠨ ᠵᠢᠭᠠᠯᠠ᠃《ᠶᠠᠭᠠᠬᠢᠭᠰᠠᠨ ᠲᠠᠨᠢᠯ ᠳᠠᠭᠤ ᠪᠣᠢ?》 ᠭᠡᠵᠦ ᠬᠠᠮᠪᠤ ᠯᠠᠮᠠ ᠡᠷᠡᠭᠡᠯᠵᠡᠨ ᠭᠠᠢᠬᠠᠭᠠᠳ ᠪᠠᠷᠠᠭᠤᠨ ᠬᠣᠢᠮᠣᠷ ᠥᠭᠡᠳᠡ ᠶᠠᠪᠤᠬᠤ ᠵᠠᠭᠤᠷᠠ ᠶᠡᠦᠳᠡᠨ ᠢ᠋ᠶ᠋ᠡᠨ ᠰᠡᠬᠦᠪᠡ᠃ ᠭᠡᠷ ᠦ᠋ᠨ ᠡᠵᠡᠭᠲᠡᠢ ᠬᠠᠢᠴᠢ᠂ ᠰᠢᠯᠡᠭᠡᠪᠦᠷ ᠢ᠋ᠶ᠋ᠡᠨ ᠳᠤᠤᠭᠠᠷᠭᠠᠨ ᠭᠠᠯ ᠳ᠋ᠤ᠌ ᠪᠠᠨ ᠠᠷᠭᠠᠯ ᠵᠡᠷᠭᠡᠯᠡᠵᠦ ᠡᠬᠢᠯᠡᠪᠡ᠃ ᠬᠠᠮᠪᠤ ᠯᠠᠮᠠ ᠪᠠᠷᠠᠭᠤᠨ ᠬᠣᠶᠢᠮᠣᠷ ᠭᠠᠷᠴᠤ ᠢᠮᠠᠭᠠᠨ ᠤ᠋ ᠠᠷᠠᠰᠤᠨ ᠳᠡᠪᠢᠰᠬᠡᠷ ᠳᠡᠭᠡᠷᠡ ᠰᠠᠭᠤᠬᠤ ᠵᠠᠭᠤᠷᠠ ᠭᠡᠷ ᠦ᠋ᠨ ᠡᠵᠡᠨ ᠢ᠋ ᠠᠵᠢᠭᠯᠠᠨ ᠬᠠᠷᠠᠯᠠ᠃ ᠵᠤᠯᠠ ᠶ᠋ᠢᠨ ᠪᠦᠳᠡᠭᠢ ᠭᠡᠷᠡᠯ ᠳ᠋ᠦ᠍ ᠭᠡᠷ ᠳᠣᠲᠣᠷᠠᠬᠢ ᠶᠠᠭᠤᠮᠠ ᠣᠯᠢᠭᠲᠠᠢ ᠬᠠᠷᠠᠭᠳᠠᠬᠤ ᠦᠭᠡᠢ ᠪᠠᠢᠪᠠ᠃ ᠡᠵᠡᠭᠲᠡᠢ ᠭᠠᠯ ᠳ᠋ᠤ᠌ ᠪᠠᠨ ᠠᠷᠭᠠᠯ ᠵᠡᠷᠭᠡᠯᠡᠨ ᠭᠣᠣᠯ ᠳ᠋ᠤ᠌ ᠨᠢ ᠬᠣᠮᠣᠯ ᠦᠩᠭᠡᠭᠡᠳ ᠮᠣᠳᠣᠨ ᠦᠯᠢᠶᠡᠭᠦᠷ ᠢ᠋ᠶ᠋ᠡᠷ ᠦᠯᠢᠶᠡᠵᠦ ᠡᠬᠢᠯᠡᠪᠡ᠃ ᠲᠦᠳᠡᠬᠡᠨ ᠭᠠᠯ ᠨᠢ ᠳᠦᠷᠡᠯᠵᠡᠨ ᠠᠰᠠᠵᠤ ᠭᠡᠷ ᠲᠦ᠍ ᠭᠡᠷᠡᠯ ᠭᠡᠭᠡ ᠲᠡᠢ ᠪᠣᠯᠤᠯᠠ᠃ ᠳᠦᠷᠡᠯᠵᠡᠭᠰᠡᠨ ᠭᠠᠯ ᠤ᠋ᠨ ᠭᠡᠷᠡᠯ ᠳ᠋ᠦ᠍ ᠭᠡᠷ ᠦ᠋ᠨ ᠡᠵᠡᠭᠲᠡᠢ ᠶ᠋ᠢᠨ ᠴᠢᠷᠠᠢ ᠵᠢᠰᠦ ᠨᠢ ᠲᠣᠳᠣᠷᠠᠨ ᠦᠵᠡᠭᠳᠡᠬᠦ ᠳ᠋ᠦ᠍ ᠬᠠᠮᠪᠤ ᠯᠠᠮᠠ ᠲᠡᠭᠦᠨ ᠢ᠋ ᠲᠠᠨᠢᠭᠠᠳ ᠴᠣᠴᠢᠰᠬᠢᠯᠡ᠃
- ᠤᠳᠬᠤᠨ ᠤᠤ ᠳᠠ? ᠭᠡᠵᠦ ᠯᠠᠮᠠ ᠳᠠᠭᠤ ᠠᠯᠳᠠᠯᠠ᠃
- ᠲᠡᠢᠮᠦ ᠠ᠋᠃ ᠲᠠ ᠬᠡᠨ ᠪᠣᠢ? ᠭᠡᠵᠦ ᠣᠳᠬᠣᠨ ᠬᠡᠦᠬᠡᠨ ᠠᠰᠠᠭᠤᠬᠤ ᠳ᠋ᠤ᠌ ᠪᠠᠨ ᠯᠠᠮᠠ ᠶ᠋ᠢᠨ ᠵᠦᠭ ᠪᠢᠰᠢ ᠬᠠᠷᠢᠨ ᠭᠠᠯ ᠤᠷᠤᠭᠤ ᠪᠠᠨ ᠰᠢᠷᠲᠡᠵᠦ ᠪᠠᠢᠯᠠ᠃ ᠲᠡᠭᠦᠨ ᠦ᠌ ᠴᠢᠷᠠᠢ ᠨᠢ ᠰᠢᠨᠠᠯᠭᠠᠨ ᠲᠠᠢ ᠮᠡᠲᠦ ᠪᠣᠯᠪᠠᠴᠤ ᠪᠠᠷᠤᠭ ᠯᠠ ᠬᠠᠭᠤᠴᠢᠨ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠢᠯᠠ᠃ ᠬᠠᠮᠪᠤ ᠯᠠᠮᠠ ᠡᠢᠮᠦ ᠰᠠᠨᠠᠮᠰᠠᠷ ᠦᠭᠡᠢ ᠲᠣᠬᠢᠶᠠᠯᠳᠤᠯ ᠢ᠋ᠶ᠋ᠠᠷ ᠠᠭᠤᠯᠵᠠᠭᠰᠠᠨ ᠳ᠋ᠤ᠌ ᠪᠠᠨ ᠭᠠᠢᠬᠠᠬᠤ ᠪᠣᠯᠪᠠᠴᠤ ᠪᠠᠰᠠ ᠬᠦ᠌ ᠣᠯᠵᠠᠭᠤᠷᠬᠠᠵᠤ᠂
- ᠪᠢ ᠰᠠᠩᠵᠢ ᠪᠠᠢᠨᠠ᠃ ᠡᠴᠢᠭᠡ ᠶ᠋ᠢᠨ ᠬᠥᠳᠡᠭᠡ ᠭᠡᠷ ᠲᠦ᠍ ᠣᠴᠢᠬᠤ ᠭᠡᠵᠦ ᠶᠠᠪᠤᠭᠠᠳ ᠪᠣᠷᠣᠭᠠᠨ ᠳ᠋ᠤ᠌ ᠲᠥᠭᠡᠷᠡᠴᠢᠬᠡᠯᠡ ᠭᠡᠪᠡ᠃ ᠤᠳᠬᠤᠨ ᠲᠡᠭᠦᠨ ᠢ᠋ ᠰᠣᠨᠣᠰᠤᠭᠠᠳ ᠰᠡᠷᠭᠦᠨ ᠪᠠᠶᠠᠷᠯᠠᠬᠤ ᠮᠡᠲᠦ ᠪᠣᠯᠵᠤ᠂
- ᠦ ᠲᠠ ᠪᠠᠢᠭᠰᠠᠨ ᠶᠤᠮ ᠤᠤ? ᠪᠢ ᠲᠠᠨᠢᠭᠰᠠᠨ ᠦᠭᠡᠢ᠃ ᠲᠠᠨ ᠢ᠋ ᠡᠷᠭᠢᠵᠦ ᠢᠷᠡᠭᠡᠳ ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠦ᠋ᠨ ᠬᠠᠮᠪᠣᠲᠠᠨ ᠪᠣᠯᠤᠭᠰᠠᠨ ᠭᠡᠵᠦ ᠲᠤᠭᠤᠯᠵᠤ ᠪᠠᠢᠯᠠ᠃ ᠲᠡᠭᠡᠭᠡᠳ ᠬᠡᠢᠳ ᠢ᠋ᠶ᠋ᠡᠷ ᠣᠴᠢᠵᠤ ᠠᠭᠤᠯᠵᠠᠳᠠᠭ ᠶᠤᠮ ᠪᠢᠯᠢᠤ ᠭᠡᠵᠦ ᠪᠣᠳᠣᠵᠤ ᠯᠠ ᠪᠠᠢᠯᠠ᠃ ᠶᠠᠳᠠᠭᠤ ᠮᠠᠭᠤ ᠭᠡᠷ ᠲᠦ᠍ ᠮᠢᠨᠢ ᠲᠠᠨ ᠢ᠋ ᠢᠩᠭᠢᠭᠡᠳ ᠣᠷᠣᠭᠠᠳ ᠢᠷᠡᠬᠦ ᠶᠦ᠍ᠮ ᠭᠡᠵᠦ ᠣᠭᠲᠣᠬᠠᠨ ᠴᠤ᠌ ᠰᠠᠨᠠᠭᠰᠠᠨ ᠦᠭᠡᠢ᠃ ᠲᠠ ᠪᠣᠷᠣᠭᠠᠨ ᠳ᠋ᠤ᠌ ᠨᠣᠷᠴᠢᠬᠠᠭᠰᠠᠨ ᠪᠣᠯ ᠬᠤᠪᠴᠠᠰᠤ ᠪᠠᠨ ᠬᠠᠲᠠᠭᠠᠵᠤ ᠦᠵᠡ! ᠪᠢ ᠭᠠᠯ ᠥᠷᠳᠡᠭᠡᠳ ᠤᠷᠭᠢᠶᠠ ᠭᠡᠵᠦ ᠬᠡᠯᠡᠭᠡᠳ ᠭᠠᠯ ᠳ᠋ᠤ᠌ ᠪᠠᠨ ᠠᠷᠭᠠᠯ ᠤᠯᠠᠮ ᠨᠡᠮᠡᠵᠦ᠂ ᠲᠣᠭᠣᠭᠠ ᠪᠠᠨ ᠲᠤᠯᠭᠠᠨ ᠳᠡᠭᠡᠷᠡ ᠲᠠᠯᠪᠢᠵᠤ ᠤᠰᠤ ᠬᠢᠯᠡ᠃ ᠰᠠᠩᠵᠢ᠂
- ᠴᠤᠪᠠ ᠲᠠᠢ ᠪᠣᠯᠬᠣᠷ ᠨᠢᠭᠡ ᠶᠡᠬᠡ ᠨᠣᠷᠤᠭᠰᠠᠨ ᠦᠭᠡᠢ᠃ ᠴᠤᠪᠠ ᠪᠠᠨ ᠯᠠ ᠬᠠᠲᠠᠭᠠᠶᠠ ᠳᠠ! ᠭᠡᠪᠡ᠃ ᠣᠳᠬᠣᠨ ᠬᠡᠦᠬᠡᠨ ᠪᠥᠭᠡᠮ ᠪᠠᠶᠠᠷ ᠪᠣᠯᠵᠤ ᠴᠠᠢ ᠬᠣᠭᠣᠯᠠ ᠬᠢᠬᠦ ᠪᠡᠷ ᠰᠢᠢᠳᠴᠡᠢ᠃
- ᠲᠠᠨ ᠳ᠋ᠤ᠌ ᠴᠠᠢ ᠬᠢᠭᠡᠳ ᠥᠭᠭᠦᠶᠡ! ᠭᠡᠵᠦ ᠲᠡᠷᠡ ᠬᠡᠯᠡᠭᠡᠳ ᠤᠬᠤᠰᠬᠢᠨ ᠬᠥᠳᠡᠯᠵᠦ ᠠᠶᠠᠭᠠ ᠰᠠᠪᠠ ᠪᠠᠨ ᠴᠡᠪᠡᠷᠯᠡᠵᠦ ᠡᠬᠢᠯᠡᠪᠡ᠃ ᠰᠠᠩᠵᠢ ᠲᠡᠷᠡ ᠬᠣᠭᠣᠷᠣᠨᠳᠣ ᠴᠤᠪᠠ ᠪᠠᠨ ᠲᠠᠢᠯᠤᠨ ᠪᠠᠷᠠᠭᠤᠨ ᠬᠠᠨᠠᠨ ᠳ᠋ᠠᠬᠢ ᠴᠠᠬᠣᠨ ᠠ᠋ᠴᠠ ᠡᠯᠭᠦᠯᠡ᠃
- ᠲᠠᠨ ᠲᠠᠢ ᠬᠠᠮᠲᠤ ᠣᠯᠠᠨ ᠬᠠᠭᠠᠯᠭᠠᠲᠤ ᠰᠦᠮᠡ ᠳ᠋ᠦ᠍ ᠣᠴᠢᠵᠤ ᠮᠥᠷᠭᠥᠭᠡᠳ ᠢᠷᠡᠭᠰᠡᠨ ᠡᠴᠡ ᠬᠣᠢᠰᠢ ᠣᠯᠠᠨ ᠵᠢᠯ ᠥᠩᠭᠡᠷᠡᠯᠡ᠃ ᠡᠨᠡ ᠬᠣᠭᠣᠷᠣᠨᠳᠣ ᠪᠦᠬᠡᠮᠠᠩᠯᠠᠢ ᠶ᠋ᠢᠨ ᠰᠤᠷᠠᠭ ᠭᠠᠷᠤᠭᠰᠠᠨ ᠦᠭᠡᠢ᠃ ᠲᠥᠪᠡᠳ ᠦ᠋ᠳ ᠲᠦ᠍ ᠪᠠᠷᠢᠭᠳᠠᠭᠠᠳ ᠯᠠ ᠠᠮᠢ ᠦᠷᠡᠭᠳᠡᠭᠰᠡᠨ ᠶᠦ᠍ᠮ ᠰᠢᠭ ᠪᠠᠢᠨᠠ ᠯᠠ ᠭᠡᠵᠦ ᠤᠳᠬᠤᠨ ᠬᠣᠭᠣᠯᠠᠢ ᠨᠢ ᠵᠠᠩᠭᠢᠷᠠᠨ ᠶᠠᠷᠢᠯᠠ᠃ ᠰᠠᠩᠵᠢ ᠲᠡᠭᠦᠨ ᠢ᠋ ᠰᠣᠨᠣᠰᠤᠭᠠᠳ᠂
- ᠪᠦᠬᠡᠮᠠᠩᠯᠠᠢ ᠭᠤᠸᠠᠢ ᠲᠠᠢ ᠪᠢ ᠳᠠᠭᠠᠷᠢᠯᠳᠤᠭᠰᠠᠨ ᠁ ᠭᠡᠰᠡᠨ ᠴᠢᠨᠢ ᠤᠳᠬᠤᠨ ᠳᠠᠭᠤ ᠠᠯᠳᠠᠵᠤ᠂
- ᠦ ᠲᠡᠢᠮᠦ ᠤᠤ? ᠬᠠᠮᠢᠭᠠ ᠳᠠᠭᠠᠷᠢᠯᠳᠤᠪᠠ᠃ ᠠᠮᠢᠳᠤ ᠶᠠᠪᠤᠨᠠ ᠤᠤ᠂ ᠠᠰᠢᠭᠦᠢ? ᠭᠡᠬᠦ ᠳ᠋ᠦ᠍ ᠰᠠᠩᠵᠢ᠂
- ᠠᠮᠢᠳᠤ ᠪᠠᠷ ᠪᠠᠷᠠᠬᠤ ᠤᠤ? ᠲᠥᠪᠡᠳ ᠦ᠋ᠨ ᠴᠡᠷᠢᠭ ᠡᠴᠡ ᠣᠷᠭᠣᠭᠠᠳ ᠠᠭᠤᠯᠠᠨ ᠳ᠋ᠤ᠌ ᠭᠠᠷᠴᠤ ᠭᠣᠯᠣᠣᠭ ᠣᠮᠣᠭ ᠤ᠋ᠨ ᠬᠢᠨ ᠲᠡᠢ ᠨᠡᠢᠯᠡᠵᠦ ᠰᠠᠢᠨ ᠡᠷᠡ ᠪᠣᠯᠤᠭᠰᠠᠨ ᠪᠠᠢᠨᠠ ᠪᠢᠯᠡ᠃ ᠨᠠᠮᠠᠶ᠋ᠢ ᠨᠡᠰᠢ ᠨᠢ ᠨᠤᠲᠤᠭ ᠤ᠋ᠨ ᠪᠠᠷᠠ ᠬᠠᠷᠠᠭᠤᠯᠵᠤ ᠥᠭᠭᠦᠭᠡᠳ ᠪᠤᠴᠠᠭᠰᠠᠨ ᠯᠠ ᠳᠠ ᠭᠡᠵᠦ ᠰᠠᠨᠠᠭᠠᠨ ᠳ᠋ᠤ᠌ ᠦᠭᠡᠢ ᠶᠠᠷᠢᠬᠤ ᠳ᠋ᠤ᠌ ᠣᠳᠬᠣᠨ᠂
- ᠲᠡᠭᠡᠭᠡᠳ ᠲᠠᠨ ᠲᠠᠢ ᠬᠠᠮᠲᠤ ᠨᠠᠭᠠᠰᠢ ᠪᠠᠨ ᠢᠷᠡᠬᠦ ᠦᠭᠡᠢ ᠶᠠᠭᠠᠬᠢᠭᠰᠠᠨ ᠶᠤᠮ ᠪᠣᠯ? ᠮᠢᠨᠦ ᠲᠤᠬᠠᠢ ᠶᠠᠷᠢᠬᠤ ᠦᠭᠡᠢ ᠪᠠᠢᠨᠠ ᠤᠤ? ᠭᠡᠵᠦ ᠠᠰᠠᠭᠤᠪᠠ᠃ ᠰᠠᠩᠵᠢ ᠪᠠᠰᠠ ᠯᠠ ᠶᠠᠭᠤᠮᠠ ᠪᠣᠳᠣᠭᠰᠠᠨ ᠦᠭᠡᠢ᠂
- ᠢᠷᠡᠬᠦ ᠦᠭᠡᠢ ᠶᠦ᠍ᠮ ᠰᠢᠭ ᠪᠠᠢᠨᠠ ᠯᠠᠢ᠃ ᠲᠥᠪᠡᠳ ᠡᠬᠡᠨᠡᠷ ᠠᠪᠤᠭᠰᠠᠨ ᠭᠡᠨᠡ! ᠭᠡᠪᠡ᠃ ᠤᠳᠬᠤᠨ ᠬᠡᠦᠬᠡᠨ ᠰᠠᠨᠠᠭᠠ ᠠᠯᠳᠠᠵᠤ᠂
- ᠨᠠᠮᠠᠶ᠋ᠢ ᠦᠷᠡ ᠦᠭᠡᠢ ᠭᠡᠳ ᠯᠡ ᠲᠥᠪᠡᠳ ᠡᠬᠡᠨᠡᠷ ᠠᠪᠤᠭᠠ ᠪᠢᠵᠡ ᠳᠡ! ᠭᠡᠵᠦ ᠠᠶᠠᠷᠬᠠᠨ ᠬᠡᠯᠡᠬᠦ ᠳ᠋ᠦ᠍ ᠨᠢ ᠰᠠᠩᠵᠢ ᠰᠠᠢ ᠯᠠ ᠡᠪ ᠦᠭᠡᠢ ᠰᠡᠳᠦᠪ ᠢ᠋ᠶ᠋ᠡᠷ ᠶᠠᠷᠢᠭᠰᠠᠨ ᠢ᠋ᠶ᠋ᠠᠨ ᠣᠢᠯᠠᠭᠠᠵᠤ᠂
- ᠶᠠᠭᠠᠬᠢᠭᠰᠠᠨ ᠠᠢᠬᠤᠪᠲᠤᠷ ᠰᠢᠷᠦᠭᠦᠨ ᠪᠣᠷᠣᠭᠠ ᠣᠷᠣᠳᠠᠭ ᠪᠠᠢᠨᠠ? ᠤᠰᠤᠨ ᠭᠠᠯᠪᠠ ᠶᠡᠭᠦᠯᠡᠬᠦ ᠰᠢᠭ ᠯᠡ ᠪᠣᠯᠤᠯᠠ ᠰᠢᠦ! ᠭᠡᠪᠡ᠃ ᠤᠳᠬᠤᠨ ᠪᠥᠭᠡᠮ ᠬᠥᠯ ᠬᠥᠭᠡᠷᠴᠦᠭ ᠪᠣᠯᠵᠤ᠂
- ᠪᠢ ᠲᠠᠨ ᠳ᠋ᠤ᠌ ᠣᠳᠣᠬᠠᠨ ᠬᠣᠭᠣᠯᠠ ᠬᠢᠭᠡᠳ ᠥᠭᠭᠦᠶᠡ᠃ ᠣᠳᠣ ᠶᠡᠬᠡ ᠣᠷᠣᠢ ᠪᠣᠯᠵᠠᠢ᠃ ᠲᠡᠭᠡᠭᠡᠳ ᠡᠨᠡ ᠬᠠᠷᠠ ᠤᠰᠤᠨ ᠪᠣᠷᠣᠭᠠᠨ ᠢ᠋ᠶ᠋ᠠᠷ ᠬᠠᠮᠢᠭᠠᠰᠢ ᠪᠠᠨ ᠶᠠᠪᠤᠬᠤ ᠪᠣᠢ? ᠲᠠ ᠥᠨᠵᠢᠭᠡᠳ ᠥᠷᠯᠥᠭᠡ ᠡᠷᠲᠡ ᠶᠠᠪᠤᠭᠰᠠᠨ ᠨᠢ ᠳᠡᠭᠡᠷᠡ ᠪᠠᠢᠯᠭᠦᠢ ᠳᠡ! ᠭᠡᠪᠡ᠃ ᠰᠠᠩᠵᠢ 《ᠨᠡᠭᠡᠷᠡᠨ ᠯᠡ ᠲᠡᠭᠡᠬᠦ ᠡᠴᠡ ᠪᠢᠰᠢ ᠳᠡ! ᠬᠠᠷᠠᠩᠭᠤᠢ ᠰᠥᠨᠢ ᠪᠡᠷ ᠬᠠᠮᠢᠭᠠ ᠭᠡᠵᠦ ᠶᠠᠪᠤᠬᠤ ᠪᠣᠢ?》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠣᠳᠣᠯᠠ᠃
- ᠰᠢᠨᠡ ᠮᠢᠬᠠ ᠱᠥᠯᠥ ᠪᠠᠢᠬᠤ ᠦᠭᠡᠢ᠃ ᠵᠢᠭᠠᠬᠠᠨ ᠪᠣᠷᠴᠠ ᠯᠠ ᠪᠠᠢᠨᠠ᠃ ᠲᠠ ᠪᠣᠷᠴᠠ ᠲᠠᠢ ᠬᠣᠭᠣᠯᠠ ᠭᠣᠯᠣᠬᠤ ᠦᠭᠡᠢ ᠪᠢᠵᠡ? ᠭᠡᠵᠦ ᠤᠳᠬᠤᠨ ᠬᠡᠦᠬᠡᠨ ᠵᠣᠪᠠᠩᠭᠣᠢᠷᠠᠬᠠᠨ ᠠᠰᠠᠭᠤᠯᠠ᠃
- ᠵᠦᠭᠡᠷ᠂ ᠵᠦᠭᠡᠷ᠃ ᠬᠠᠷᠢᠨ ᠴᠤ᠌ ᠰᠣᠨᠢᠨ ᠪᠠᠢᠬᠠ ᠭᠡᠵᠦ ᠰᠠᠩᠵᠢ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠢ᠋ ᠵᠠᠰᠠᠯᠠ᠃ ᠤᠳᠬᠤᠨ ᠣᠭᠣᠷ ᠨᠦᠳᠦᠭᠦᠷ ᠢ᠋ᠶ᠋ᠡᠨ ᠠᠶᠠᠷᠬᠠᠨ ᠲᠣᠭᠰᠢᠵᠤ ᠪᠠᠢᠪᠠ᠃
ᠭᠡᠷ ᠦ᠋ᠨ ᠳᠣᠲᠣᠷᠠ ᠶᠡᠬᠡ ᠯᠡ ᠶᠠᠳᠠᠭᠤ ᠲᠠᠪᠢᠯᠭᠠ ᠲᠠᠢ ᠪᠠᠢᠯᠠ᠃ ᠬᠣᠢᠮᠣᠷ ᠲᠤ᠌ ᠭᠠᠭᠴᠠ ᠠᠪᠳᠠᠷᠠ᠂ ᠵᠡᠭᠦᠨ ᠲᠠᠯᠠ ᠳ᠋ᠤ᠌ ᠪᠠᠷᠤᠭ ᠭᠠᠵᠠᠷ ᠰᠢᠬᠠᠮ ᠵᠠᠰᠠᠭᠰᠠᠨ ᠣᠷᠣ᠂ ᠲᠡᠭᠦᠨ ᠦ᠌ ᠴᠠᠭᠠᠨᠠ ᠪᠠᠰᠠ ᠨᠢᠭᠡ ᠠᠪᠳᠠᠷᠠ᠂ ᠡᠷᠭᠢᠨᠡᠭ ᠡᠢᠮᠦ ᠯᠡ ᠬᠣᠭᠰᠢᠯ ᠲᠠᠢ ᠠᠢᠯ ᠠᠵᠢ᠃
- ᠣᠯᠠᠨ ᠬᠠᠭᠠᠯᠭᠠᠲᠤ ᠰᠦᠮᠡ ᠳ᠋ᠦ᠍ ᠮᠥᠷᠭᠥᠵᠦ ᠢᠷᠡᠭᠰᠡᠨ ᠡᠴᠡ ᠬᠣᠢᠰᠢ ᠠᠮᠢᠳᠤᠷᠠᠯ ᠠᠬᠤᠢ ᠴᠤ᠌ ᠳᠡᠭᠡᠷᠡᠳᠡᠭᠰᠡᠨ ᠦᠭᠡᠢ᠂ ᠦᠷᠡ ᠬᠡᠦᠬᠡᠳ ᠴᠦ᠍ ᠵᠠᠶᠠᠭᠠᠭᠰᠠᠨ ᠦᠭᠡᠢ᠃ ᠡᠷᠡ ᠨᠥᠬᠥᠷ ᠴᠦ᠍ ᠡᠷᠭᠢᠵᠦ ᠢᠷᠡᠭᠰᠡᠨ ᠦᠭᠡᠢ᠃ ᠶᠠᠳᠠᠭᠤ ᠵᠦᠳᠡᠭᠦᠦ ᠯᠡ ᠠᠮᠢᠳᠤᠷᠠᠵᠤ ᠪᠠᠢᠨᠠ᠃ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤ᠌ ᠪᠠᠢᠭᠠ ᠭᠡᠷ ᠲᠦ᠍ ᠪᠠᠯᠵᠢᠨ ᠡᠮᠡᠭᠡᠨ ᠰᠠᠭᠤᠳᠠᠭ ᠶᠤᠮ᠃ ᠬᠦᠦ ᠨᠢ ᠬᠠᠶᠠ ᠡᠷᠭᠢᠵᠦ ᠢᠷᠡᠳᠡᠭ᠃ ᠮᠠᠨ ᠤ᠋ ᠬᠣᠶᠠᠷ ᠳᠣᠯᠣᠭᠠᠨ ᠢᠮᠠᠭᠠ ᠨᠢᠭᠡ ᠦᠨᠢᠶᠡ ᠲᠡᠢ᠃ ᠲᠡᠭᠦᠪᠡᠷ ᠢ᠋ᠶ᠋ᠡᠨ ᠯᠡ ᠠᠮᠢ ᠵᠢᠭᠤᠵᠤ ᠪᠠᠢᠨᠠ᠃ ᠠᠶᠠᠨᠴᠢᠨ ᠳᠠᠭᠠᠵᠤ ᠤᠷᠤᠭᠰᠢ ᠪᠠᠨ ᠶᠠᠪᠤᠬᠤ ᠰᠠᠨᠠᠭᠠ ᠲᠠᠢ! ᠭᠡᠵᠦ ᠤᠳᠬᠤᠨ ᠰᠣᠨᠢᠨ ᠪᠣᠯᠭᠠᠨ ᠶᠠᠷᠢᠯᠠ᠃ ᠲᠡᠭᠦᠨ ᠳ᠋ᠦ᠍ ᠨᠢ ᠭᠠᠢᠬᠠᠰᠢ ᠲᠥᠷᠥᠪᠡ᠃
- ᠣᠳᠣ ᠪᠠᠰᠠ ᠶᠠᠪᠤᠵᠤ ᠶᠠᠭᠠᠬᠢᠬᠤ ᠨᠢ ᠪᠣᠢ? ᠭᠡᠵᠦ ᠰᠠᠩᠵᠢ ᠭᠠᠢᠬᠠᠨ ᠯᠠᠪᠯᠠᠪᠠ᠃ ᠤᠳᠬᠤᠨ ᠬᠡᠦᠬᠡᠨ ᠢᠴᠢᠩᠭᠦᠷᠡᠭᠰᠡᠨ ᠢ᠋ᠶ᠋ᠡᠨ᠂
- ᠨᠢᠭᠡᠨᠲᠡ ᠯᠡ ᠦᠷᠡ ᠶ᠋ᠢᠨ ᠬᠤᠲᠤᠭ ᠵᠠᠶᠠᠭᠠᠭᠠ ᠦᠭᠡᠢ ᠨᠢ ᠭᠠᠷᠴᠠᠭᠠ ᠦᠭᠡᠢ ᠪᠣᠯᠤᠭᠰᠠᠨ ᠠ᠋ᠴᠠ ᠴᠠᠰᠢ ᠪᠡᠷᠢᠮᠦᠭ ᠡᠮᠡᠭᠡᠨ ᠦ᠌ ᠶᠠᠷᠢᠳᠠᠭ ᠪᠠᠢᠭᠰᠠᠨ ᠠᠨᠢᠭ ᠭᠣᠮᠪᠣ ᠭᠡᠳᠡᠭ ᠰᠢᠮᠨᠠᠨᠼ ᠤ᠋ᠨ ᠬᠡᠢᠳ ᠲᠦ᠍ ᠣᠴᠢᠵᠤ ᠪᠦᠬᠦ ᠨᠠᠰᠤ ᠪᠠᠨ ᠥᠩᠭᠡᠷᠡᠭᠡᠳᠡᠭ ᠶᠦ᠍ᠮ ᠤᠤ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠭᠡᠰᠡᠨ ᠢ᠋ᠶ᠋ᠡᠨ᠂
- ᠮᠠᠷᠲᠠᠭᠰᠠᠨ ᠨᠥᠭᠦᠭᠡ ᠪᠡᠷᠢᠮᠦᠭ ᠡᠮᠡᠭᠡᠨ ᠠᠮᠢᠳᠤ ᠰᠡᠷᠡᠭᠦᠨ ᠤᠤ᠂ ᠵᠠᠢᠯᠠᠭᠤᠯ! ᠭᠡᠪᠡ᠃ ᠰᠠᠩᠵᠢ ᠰᠠᠨᠠᠭᠠ ᠠᠯᠳᠠᠵᠤ᠂
- ᠡᠮᠡᠭᠡᠨ ᠥᠭᠡᠳᠡ ᠪᠣᠯᠤᠭᠰᠠᠨ! ᠮᠠ ᠨᠢ ᠪᠠᠳ ᠮᠧ ᠬᠣᠮ! ᠠᠨᠢᠭ ᠭᠣᠮᠪᠣ ᠳ᠋ᠤ᠌ ᠡᠷᠭᠦᠯ ᠦᠭᠭᠦᠭᠦᠯᠦᠭᠰᠡᠨ ᠢ᠋ ᠨᠢ ᠬᠦᠷᠭᠡᠵᠦ ᠥᠭᠴᠦ ᠶᠠᠪᠤᠵᠤ ᠠᠮᠢ ᠠᠯᠳᠠᠬᠤ ᠰᠢᠬᠠᠭᠰᠠᠨ ᠁ ᠲᠡᠨᠳᠡ ᠣᠴᠢᠵᠤ ᠰᠠᠭᠤᠵᠤ ᠶᠠᠭᠠᠬᠢᠬᠤ ᠨᠢ ᠪᠣᠢ ᠳᠠ? ᠭᠡᠵᠦ ᠠᠰᠠᠭᠤᠯᠠ᠃ ᠤᠳᠬᠤᠨ᠂
- ᠶᠠᠭᠠᠬᠢᠬᠤ ᠪᠣᠢ ᠳᠠ! ᠥᠭᠡᠷᠡ ᠵᠢᠷᠭᠠᠯ ᠭᠡᠮᠡᠷ ᠶᠠᠭᠤᠮᠠ ᠠᠯᠠᠭᠠ᠃ ᠪᠡᠷᠢᠮᠦᠭ ᠡᠮᠡᠭᠡᠨ ᠵᠠᠯᠠᠭᠤ ᠨᠠᠰᠤ ᠪᠠᠨ ᠲᠡᠨᠳᠡ ᠥᠩᠭᠡᠷᠡᠭᠡᠭᠰᠡᠨ ᠯᠡ ᠭᠡᠵᠦ ᠶᠠᠷᠢᠳᠠᠭ ᠪᠠᠢᠭᠰᠠᠨ ᠁ ᠲᠡᠭᠡᠭᠡᠳ ᠯᠡ ᠣᠴᠢᠳᠠᠭ ᠶᠤᠮ ᠤᠤ ᠭᠡᠵᠦ ᠪᠣᠳᠣᠭᠰᠠᠨ ᠬᠡᠷᠡᠭ᠃ ᠪᠠᠰᠠ ᠪᠦᠬᠡᠮᠠᠩᠯᠠᠢ ᠶ᠋ᠢᠨ ᠰᠤᠷᠠᠭ ᠭᠠᠷᠴᠤ ᠴᠤ᠌ ᠮᠠᠭᠠᠳ ᠦᠭᠡᠢ ᠭᠡᠵᠦ ᠭᠣᠷᠢᠳᠠᠭᠰᠠᠨ ᠶᠤᠮ᠃ ᠲᠡᠷᠡ ᠴᠦ᠍ ᠲᠡᠭᠡᠪᠡᠯ ᠥᠩᠭᠡᠷᠡᠭᠰᠡᠨ ᠯᠡ ᠳᠡ᠁ ᠭᠡᠬᠦ ᠳ᠋ᠦ᠍ ᠰᠠᠩᠵᠢ ᠶ᠋ᠢᠨ ᠰᠡᠳᠬᠢᠯ ᠨᠢ ᠬᠢᠮᠤᠷᠠᠵᠤ ᠳᠠᠭᠤ ᠦᠭᠡᠢ ᠰᠠᠭᠤᠯᠠ᠃ ᠤᠳᠬᠤᠨ ᠬᠡᠦᠬᠡᠨ ᠢ᠋ ᠥᠷᠦ ᠡᠪᠡᠳᠦᠯᠡ᠃
ᠪᠣᠷᠴᠠ ᠲᠠᠢ ᠰᠢᠷᠠ ᠪᠤᠳᠠᠭᠠ ᠨᠢ ᠴᠦ᠍ ᠤᠳᠠᠯ ᠦᠭᠡᠢ ᠪᠣᠯᠤᠯᠠ᠃ ᠰᠠᠩᠵᠢ ᠠᠶᠠᠭᠠᠨ ᠤ᠋ ᠪᠠᠨ ᠤᠭᠤᠲᠠᠨ ᠠ᠋ᠴᠠ ᠪᠠᠭᠪᠤᠷ ᠢ᠋ᠶ᠋ᠠᠨ ᠭᠠᠷᠭᠠᠵᠤ ᠬᠣᠭᠣᠯᠠ ᠲᠣᠰᠣᠨ ᠠᠪᠴᠤ ᠳᠠᠭᠤ ᠴᠢᠮᠡᠭᠡ ᠦᠭᠡᠢᠬᠡᠨ ᠢᠳᠡᠵᠦ ᠡᠬᠢᠯᠡᠬᠦ ᠵᠠᠭᠤᠷᠠ ᠣᠳᠬᠣᠨ ᠬᠡᠦᠬᠡᠨ ᠢ᠋ ᠥᠷᠥ ᠡᠪᠡᠳᠦᠨ ᠠᠵᠢᠭᠯᠠᠵᠤ ᠪᠠᠢᠯᠠ᠃ ᠰᠠᠩᠵᠢ ᠠ᠋ᠴᠠ ᠳᠣᠯᠣᠭᠠ ᠨᠠᠢ᠍ᠮᠠ ᠡᠭᠡᠴᠢ ᠲᠡᠷᠡ ᠪᠦᠰᠡᠭᠦᠢ ᠰᠦᠯᠵᠢᠮᠡᠯ ᠬᠠᠷᠠ ᠦᠰᠦ ᠲᠡᠢ᠂ ᠮᠠᠷᠢᠶᠠᠯᠢᠭ ᠲᠦᠭᠦᠷᠡᠭ ᠴᠢᠷᠠᠢᠲᠠᠢ᠂ ᠳᠤᠮᠳᠠ ᠵᠡᠷᠭᠡ ᠶ᠋ᠢᠨ ᠨᠢᠷᠤᠭᠤ ᠲᠠᠢ᠂ ᠢᠷᠠᠯᠵᠠᠭᠰᠠᠨ ᠴᠠᠭᠠᠨ ᠰᠢᠲᠦ ᠲᠡᠢ ᠠᠵᠢ᠃ ᠦᠰᠦ ᠪᠡᠨ ᠶᠠᠭᠠᠬᠢᠭᠠᠳ ᠴᠤ᠌ ᠶᠤᠮ ᠪᠣᠢ ᠨᠠᠢ᠍ᠮᠠᠨ ᠰᠠᠯᠠᠭᠠ ᠰᠦᠯᠵᠢᠭᠡᠳ ᠵᠡᠰ ᠪᠣᠭᠣᠯᠲᠠ ᠪᠠᠷ ᠨᠢᠭᠡᠳᠬᠡᠨ ᠪᠣᠭᠣᠵᠤ᠂ ᠳᠤᠬᠤᠨ ᠲᠤᠰᠢᠶᠠ ᠪᠠᠭᠠ ᠵᠡᠷᠭᠡ ᠮᠥᠩᠭᠥ ᠣᠷᠣᠭᠰᠠᠨ ᠬᠠᠭᠠᠰ ᠳᠠᠷᠤᠭᠤᠯᠭᠠ ᠪᠠᠷ ᠳᠠᠷᠤᠵᠤ ᠬᠠᠪᠴᠢᠶᠠᠷᠢ ᠪᠠᠷ ᠲᠣᠭᠲᠠᠭᠠᠵᠠᠢ᠃ ᠬᠦᠵᠦᠭᠦᠨ ᠳ᠋ᠦ᠍ ᠪᠡᠨ ᠬᠤᠪᠣᠨ ᠬᠣᠭᠣᠯᠠᠢᠪᠴᠢ ᠵᠡᠭᠦᠨᠡ᠃《ᠦᠷᠡ ᠶ᠋ᠢᠨ ᠬᠦᠰᠡᠯᠡᠩ ᠪᠣᠯᠤᠭᠰᠠᠨ ᠡᠨᠡ ᠠᠮᠢᠲᠠᠨ ᠣᠳᠣ ᠪᠠᠰᠠ ᠳᠠᠬᠢᠵᠤ ᠬᠣᠯᠠ ᠵᠠᠮ ᠲᠤᠭᠤᠯᠵᠤ ᠠᠨᠢᠭ ᠭᠣᠮᠪᠣ ᠬᠡᠢᠳ ᠢ᠋ ᠵᠣᠷᠢᠬᠤ ᠪᠠᠷ ᠰᠢᠢᠳᠴᠦ ᠪᠠᠢᠭᠠ ᠶᠤᠮ ᠭᠡᠵᠦ ᠤᠤ ᠳᠠ? ᠮᠥᠨ ᠯᠠᠢ ᠲᠠᠢ ᠶᠠ?》 ᠭᠡᠵᠦ ᠰᠠᠩᠵᠢ ᠳᠣᠲᠣᠷᠠ ᠪᠠᠨ ᠪᠣᠳᠣᠵᠤ ᠰᠠᠭᠤᠯᠠ᠃ ᠲᠡᠭᠦᠨ ᠦ᠌ ᠳᠡᠮᠡᠢ ᠬᠦᠰᠡᠯ ᠰᠠᠨᠠᠭᠠ ᠶ᠋ᠢ ᠥᠭᠡᠷᠡᠴᠢᠯᠡᠮᠡᠷ ᠪᠠᠢᠯᠠ᠃
ᠬᠣᠭᠣᠯᠠ ᠢᠳᠡᠵᠦ ᠰᠠᠭᠤᠬᠤ ᠳ᠋ᠤ᠌ ᠤᠳᠬᠤᠨ᠂
- ᠲᠠᠨ ᠤ᠋ ᠮᠣᠷᠢ ᠶ᠋ᠢ ᠶᠠᠭᠠᠬᠢᠬᠤ ᠪᠣᠢ? ᠭᠡᠵᠦ ᠠᠰᠠᠭᠤᠯᠠ᠃
- ᠶᠠᠭᠠᠬᠢᠬᠤ ᠪᠣᠢ᠃ ᠴᠠᠳᠬᠤᠯᠠᠩ ᠮᠣᠷᠢ ᠯᠠ ᠳᠠ᠃ ᠲᠡᠭᠡᠰᠬᠢᠭᠡᠳ ᠡᠮᠡᠭᠡᠯ ᠨᠢ ᠰᠢᠭᠤᠯᠲᠠ ᠲᠠᠢ ᠬᠣᠨᠣᠭ ᠤᠤ ᠳᠠ ᠭᠡᠵᠦ ᠰᠠᠩᠵᠢ ᠲᠡᠭᠡᠨᠡᠭᠡᠯᠵᠡᠯᠡ᠃ ᠤᠳᠬᠤᠨ᠂
- ᠵᠠ ᠶᠠᠭᠠᠬᠢᠬᠤ ᠪᠣᠢ᠃ ᠪᠢ ᠨᠢᠭᠡ ᠠᠷᠭᠠᠯᠠᠭᠠᠳ ᠢᠷᠡᠶᠡ᠃ ᠡᠨᠡᠦᠬᠡᠨ ᠳ᠋ᠦ᠍ ᠭᠠᠳᠠᠰᠤ ᠲᠠᠢ ᠠᠷᠭᠠᠮᠵᠢᠶᠠ ᠪᠣᠢ᠃ ᠳᠡᠷᠡᠨ ᠡᠴᠡ ᠠᠷᠭᠠᠮᠵᠢᠭᠠᠳ ᠣᠷᠬᠢᠭᠰᠠᠨ ᠨᠢ ᠳᠡᠭᠡᠷᠡ ᠪᠠᠢᠬᠠ ᠭᠡᠳ ᠭᠠᠷᠴᠤ ᠣᠳᠤᠯᠠ᠃
《ᠦᠭᠡᠢ ᠡᠳᠡᠨ ᠦ᠌ ᠳ᠋ᠦ᠍ ᠬᠣᠨᠣᠭᠯᠠᠳᠠᠭ ᠴᠢᠨᠢ ᠵᠥᠪ ᠪᠣᠯᠵᠤ ᠪᠠᠢᠨᠠ ᠤᠤ᠂ ᠪᠤᠷᠤᠭᠤ ᠪᠣᠯᠵᠤ ᠪᠠᠢᠨᠠ ᠤᠤ? ᠭᠠᠭᠴᠠ ᠪᠡᠶᠡ ᠪᠦᠰᠡᠭᠦᠢ ᠶ᠋ᠢᠨ ᠬᠢ ᠪᠡᠷ ᠪᠤᠶᠠᠨᠵᠠᠯᠪᠠᠷᠢᠬᠤ ᠶ᠋ᠢᠨ ᠬᠠᠮᠪᠤ ᠯᠠᠮᠠ ᠬᠣᠨᠣᠭ ᠲᠥᠭᠡᠷᠢᠭᠦᠯᠵᠦ ᠶᠠᠪᠤᠭᠠ ᠲᠤᠬᠠᠢ ᠶᠠᠷᠢᠶᠠ ᠭᠠᠷᠴᠤ ᠬᠥᠭ ᠪᠣᠯᠬᠤ ᠦᠭᠡᠢ ᠪᠠᠢᠭᠠ?》 ᠭᠡᠵᠦ ᠰᠠᠩᠵᠢ ᠬᠡᠪ ᠭᠡᠨᠡᠳᠲᠡ ᠤᠬᠠᠭᠠᠷᠠᠨ ᠪᠣᠳᠣᠬᠤ ᠳ᠋ᠤ᠌ ᠪᠠᠨ ᠠᠶᠤᠬᠤ ᠰᠢᠭ᠋ ᠪᠣᠯᠪᠠ᠃
- ᠲᠠᠨ ᠤ᠋ ᠮᠣᠷᠢ ᠶ᠋ᠢ ᠠᠷᠭᠠᠮᠵᠢᠴᠢᠬᠠᠯᠠ᠃ ᠶᠠᠭᠠᠬᠢᠭᠰᠠᠨ ᠶᠡᠬᠡ ᠤᠰᠤ ᠲᠠᠢ ᠪᠣᠷᠣᠭᠠ ᠣᠷᠣᠵᠤ ᠪᠠᠢᠨᠠ?ᠬᠤᠪᠢᠩ ᠢ᠋ᠶ᠋ᠠᠷ ᠴᠢᠳᠬᠤᠬᠤ ᠰᠢᠭ᠋ ᠯᠡ ᠪᠣᠯᠵᠤ ᠪᠠᠢᠨᠠ᠃ ᠰᠥᠨᠢᠵᠢᠨ ᠶᠡᠭᠦᠯᠡᠬᠦ ᠪᠠᠢᠬᠠ! ᠭᠡᠭᠰᠡᠭᠡᠷ ᠣᠳᠬᠣᠨ ᠬᠡᠦᠬᠡᠨ ᠣᠷᠣᠵᠤ ᠢᠷᠡᠯᠡ᠃《ᠵᠠ ᠶᠠᠪᠤᠳᠠᠭ ᠮᠠᠨᠢ ᠴᠤ᠌ ᠥᠩᠭᠡᠷᠡᠯᠡ᠃ ᠥᠷᠯᠥᠭᠡ ᠠᠢᠬᠣᠪᠲᠣᠷ ᠡᠷᠲᠡ ᠯᠡ ᠶᠠᠪᠤᠵᠤ ᠦᠵᠡᠶᠡ》 ᠭᠡᠵᠦ ᠰᠠᠩᠵᠢ ᠳᠣᠲᠣᠷᠠ ᠪᠠᠨ ᠪᠣᠳᠣᠯᠠ᠃ ᠣᠳᠬᠣᠨ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠵᠡᠭᠦᠨ ᠲᠠᠯᠠ ᠳ᠋ᠤ᠌ ᠪᠠᠢᠭᠠ ᠭᠠᠵᠠᠷ ᠣᠷᠣ ᠪᠠᠨ ᠶᠠᠩᠵᠤᠯᠠᠵᠤ ᠵᠠᠰᠠᠭᠠᠳ᠂
- ᠵᠠ ᠲᠠ ᠡᠨᠳᠡ ᠤᠨᠲᠠᠵᠤ ᠠᠮᠠᠷᠠ! ᠭᠡᠵᠦ ᠬᠡᠯᠡᠯᠡ᠃
ᠰᠠᠩᠵᠢ ᠪᠣᠰᠴᠤ ᠲᠡᠷᠡ ᠵᠠᠰᠠᠭᠰᠠᠨ ᠭᠠᠵᠠᠷ ᠨᠢ ᠣᠴᠢᠯᠠ᠃ ᠲᠡᠷᠡ ᠮᠥᠴᠡ ᠳ᠋ᠦ᠍ ᠭᠡᠷ ᠦ᠋ᠨ ᠳᠣᠲᠣᠷᠠ ᠡᠨᠳᠡ ᠲᠡᠨᠳᠡ ᠳᠤᠰᠤᠭᠠᠯ ᠭᠣᠭᠣᠵᠢᠵᠤ ᠪᠠᠢᠭᠠ ᠶ᠋ᠢ ᠠᠵᠢᠭᠯᠠᠵᠤ ᠮᠡᠳᠡᠯᠡ᠃
ᠤᠳᠬᠤᠨ ᠤ᠋ ᠵᠠᠰᠠᠭᠰᠠᠨ ᠣᠷᠣᠨ ᠳᠡᠭᠡᠷᠡ ᠬᠠᠵᠠᠭᠤᠯᠳᠠᠪᠠ᠃ ᠵᠤᠵᠠᠭᠠᠨ ᠰᠡᠭᠰᠦᠭᠦᠷᠭᠡᠨ ᠳᠡᠪᠡᠯ ᠭᠠᠭᠴᠠ ᠶ᠋ᠢ ᠰᠠᠩᠵᠢ ᠳ᠋ᠤ᠌ ᠬᠤᠴᠢᠯᠭᠠ ᠪᠣᠯᠭᠠᠨ ᠦᠭᠭᠦᠯᠡ᠃ ᠲᠡᠭᠦᠪᠡᠷ ᠬᠤᠴᠢᠭᠠᠳ ᠯᠠᠮᠠᠪᠤᠭᠠᠢ ᠲᠣᠭᠣᠨᠣᠨ ᠥᠭᠡᠳᠡ ᠰᠢᠷᠲᠡᠨ ᠬᠡᠪᠲᠡᠯᠡ᠃ ᠣᠳᠬᠣᠨ ᠬᠡᠦᠬᠡᠨ ᠭᠠᠯ ᠭᠦᠰᠦ ᠪᠡᠨ ᠵᠠᠰᠠᠵᠤ ᠶᠠᠩᠵᠤᠯᠠᠭᠠᠳ ᠡᠷᠭᠢᠨᠡᠭ ᠦ᠋ᠨ ᠢ᠋ᠶ᠋ᠡᠨ ᠡᠮᠦᠨᠡ ᠴᠣᠮᠴᠣᠢᠨ ᠰᠠᠭᠤᠭᠰᠠᠭᠠᠷ ᠪᠠᠢᠬᠤ ᠳ᠋ᠤ᠌ ᠨᠢ᠂
- ᠥᠪᠡᠷ ᠢ᠋ᠶ᠋ᠡᠨ ᠤᠨᠲᠠᠬᠤ ᠦᠭᠡᠢ ᠶᠠᠭᠠᠬᠢᠭᠠ ᠪᠣᠢ? ᠭᠡᠵᠦ ᠰᠠᠩᠵᠢ ᠠᠶᠠᠷᠬᠠᠨ ᠠᠰᠠᠭᠤᠯᠠ᠃ ᠣᠳᠬᠣᠨ ᠲᠦᠷ ᠳᠠᠭᠤ ᠦᠭᠡᠢ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠂
- ᠣᠳᠣᠬᠠᠨ! ᠭᠡᠵᠦ ᠬᠡᠯᠡᠪᠡ᠃ ᠭᠠᠳᠠᠭᠠ ᠪᠣᠷᠣᠭᠠ ᠱᠠᠭᠢᠨ ᠣᠷᠣᠭᠰᠠᠭᠠᠷ ᠪᠠᠢᠯᠠ᠃ ᠪᠠᠰᠠ ᠬᠡᠳᠦᠨ ᠮᠥᠴᠡ ᠥᠩᠭᠡᠷᠡᠯᠡ᠃《ᠠ ᠡᠨᠡ ᠴᠢᠨᠢ ᠣᠷᠣ ᠪᠠᠨ ᠨᠠᠳᠠ ᠳ᠋ᠤ᠌ ᠦᠭᠴᠢᠬᠡᠭᠡᠳ ᠤᠨᠲᠠᠬᠤ ᠭᠠᠵᠠᠷ ᠦᠭᠡᠢ ᠪᠣᠯᠤᠭᠠᠳ ᠰᠠᠭᠤᠵᠤ ᠪᠠᠢᠭᠠ ᠬᠥᠮᠦᠨ ᠶᠤᠮᠰᠠᠨᠵᠠᠢ᠃ ᠲᠦᠷᠦᠭᠦᠨ ᠦ᠌ ᠠᠵᠢᠬᠤ ᠦᠭᠡᠢ ᠳᠡ》 ᠭᠡᠵᠦ ᠰᠠᠩᠵᠢ ᠭᠡᠨᠡᠳᠲᠡ ᠪᠣᠳᠣᠭᠠᠳ ᠶᠠᠭᠠᠬᠢᠵᠤ ᠡᠨᠡ ᠪᠠᠢᠳᠠᠯ ᠠ᠋ᠴᠠ ᠭᠠᠷᠬᠤ ᠶ᠋ᠢ ᠰᠦᠪᠡᠭᠴᠢᠯᠡᠪᠡ᠃ ᠭᠡᠪᠡᠴᠦ ᠠᠷᠭᠠ ᠪᠠᠢᠭᠰᠠᠨ ᠦᠭᠡᠢ᠃ ᠬᠠᠮᠢᠭᠠ ᠨᠢ ᠴᠦ᠍ ᠲᠡᠷᠡ ᠤᠨᠲᠠᠬᠤ ᠶᠤᠮ ᠪᠢᠯᠡ ᠳᠠ᠃
- ᠮᠢᠨᠦ ᠡᠨᠡᠦᠬᠡᠨ ᠬᠠᠵᠠᠭᠤ ᠪᠠᠷ ᠬᠡᠪᠲᠡᠭᠡᠳ ᠥᠭ ᠯᠡ ᠳᠡ ᠭᠡᠵᠦ ᠰᠠᠩᠵᠢ ᠠᠷᠠᠢ ᠶᠠᠳᠠᠨ ᠳᠤᠤᠭᠠᠷᠤᠯᠠ᠃ ᠣᠳᠬᠣᠨ ᠬᠡᠦᠬᠡᠨ ᠭᠠᠭᠴᠠᠬᠦ ᠡᠭᠦᠨ ᠢ᠋ ᠯᠡ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠶᠤᠮ ᠰᠢᠭ᠋ ᠤᠬᠤᠰᠬᠢᠨ ᠪᠣᠰᠴᠤ ᠬᠠᠮᠪᠤ ᠯᠠᠮᠠ ᠶ᠋ᠢᠨ ᠤᠷᠢᠳᠤ ᠲᠠᠯᠠ ᠪᠠᠷ ᠲᠤᠯᠭᠠᠨ ᠠ᠋ᠴᠠ ᠪᠠᠨ ᠬᠣᠯᠠ ᠦᠭᠡᠢ ᠭᠠᠵᠠᠷ ᠲᠤ᠌ ᠬᠠᠭᠤᠴᠢᠨ ᠲᠡᠷᠯᠢᠭ ᠨᠥᠮᠥᠷᠦᠭᠡᠳ ᠪᠠᠰᠠ ᠨᠢᠭᠡ ᠲᠡᠢᠮᠦ ᠨᠣᠣᠯᠠᠩᠬᠠᠢ ᠴᠡᠭᠡᠳᠡᠭ ᠳᠡᠷᠡᠯᠡᠭᠡᠳ ᠬᠠᠵᠠᠭᠤᠯᠳᠠᠨ ᠬᠡᠪᠲᠡᠯᠡ᠃ ᠨᠠᠰᠤᠨ ᠲᠤᠷᠰᠢ ᠳ᠋ᠤ᠌ ᠪᠠᠨ ᠡᠮᠡᠭᠲᠡᠢ ᠬᠥᠮᠦᠨ ᠲᠡᠢ ᠡᠢᠨ ᠬᠦ᠌ ᠵᠡᠷᠭᠡᠴᠡᠨ ᠬᠡᠪᠲᠡᠵᠦ ᠪᠠᠢᠭᠠ ᠦᠭᠡᠢ ᠪᠣᠯᠬᠣᠷ ᠬᠠᠮᠪᠤ ᠶ᠋ᠢᠨ ᠰᠡᠳᠬᠢᠯ ᠲᠠᠪᠠ ᠮᠠᠭᠤ ᠲᠠᠢ ᠪᠠᠢᠯᠠ᠃ ᠬᠡᠦᠬᠡᠨ ᠦ᠌ ᠵᠥᠭᠡᠯᠡᠨ ᠠᠮᠢᠰᠬᠤᠭᠠ ᠪᠠᠷᠤᠭ ᠯᠠ ᠬᠠᠮᠠᠷ ᠳᠡᠭᠡᠷᠡ ᠨᠢ ᠰᠣᠨᠣᠰᠤᠭᠳᠠᠬᠤ ᠰᠢᠭ᠋ ᠪᠣᠯᠵᠤ᠂ ᠡᠯᠳᠡᠪ ᠦ᠋ᠨ ᠶᠠᠭᠤᠮᠠ ᠪᠣᠳᠣᠭᠳᠠᠵᠤ ᠨᠣᠢᠷ ᠨᠢ ᠬᠤᠯᠵᠢᠪᠠ᠃ ᠲᠡᠭᠡᠲᠡᠯᠡ ᠰᠠᠩᠵᠢ ᠶ᠋ᠢᠨ ᠮᠥᠷᠥ ᠤᠷᠤᠭᠤ ᠨᠣᠢᠲᠠ ᠣᠷᠬᠢᠨ ᠳᠤᠰᠤᠭᠠᠯ ᠲᠣᠰᠤᠯᠠ᠃ ᠲᠡᠭᠦᠨ ᠡᠴᠡ ᠪᠡᠶᠡ ᠪᠡᠨ ᠵᠠᠢᠯᠠᠭᠤᠯᠬᠤ ᠰᠠᠨᠠᠭᠠᠲᠠᠢ ᠪᠠᠷᠠᠭᠤᠨ ᠲᠡᠰᠢ ᠪᠡᠨ ᠵᠢᠭᠠᠬᠠᠨ ᠬᠥᠳᠡᠯᠦᠭᠡᠳ ᠣᠷᠬᠢᠭᠰᠠᠨ ᠴᠢᠨᠢ ᠭᠠᠷ ᠲᠤ᠌ ᠨᠢ ᠣᠳᠬᠣᠨ ᠬᠡᠦᠬᠡᠨ ᠦ᠌ ᠰᠢᠬᠠᠮᠠᠯ ᠪᠢᠰᠢᠯᠠᠭ ᠰᠢᠭ᠋ ᠲᠥᠪᠥᠭᠡᠷ ᠬᠥᠬᠥ ᠨᠢ ᠳᠠᠭᠠᠷᠢᠯᠳᠤᠵᠤ᠂ ᠰᠠᠩᠵᠢ ᠶ᠋ᠢᠨ ᠬᠠᠮᠤᠭ ᠪᠡᠶᠡ ᠪᠡᠷ ᠭᠦᠶᠦᠳᠡᠯ ᠭᠦᠶᠦᠬᠦ ᠰᠢᠭ ᠬᠠᠴᠢᠨ ᠪᠣᠯᠤᠯᠠ᠃ ᠡᠮᠵᠡᠭ ᠭᠠᠵᠠᠷ ᠨᠢ ᠯᠠᠮᠠᠪᠤᠭᠠᠢ ᠶ᠋ᠢᠨ ᠭᠠᠷ ᠰᠠᠨᠠᠮᠰᠠᠷ ᠦᠭᠡᠢ ᠬᠦᠷᠦᠭᠰᠡᠨ ᠢ᠋ ᠣᠳᠬᠣᠨ ᠬᠡᠦᠬᠡᠨ ᠣᠢᠯᠠᠭᠠᠬᠤ ᠳ᠋ᠤ᠌ ᠪᠠᠨ ᠰᠠᠨᠠᠭᠠ ᠲᠠᠢ ᠬᠦᠷᠦᠯᠡ ᠭᠡᠳ ᠪᠤᠳᠤᠴᠢᠬᠠᠵᠠᠢ᠃
- ᠮᠢᠨᠦ ᠡᠨᠳᠡ ᠡᠴᠡ ᠳᠤᠰᠤᠭᠠᠯ ᠭᠣᠭᠣᠵᠢᠭᠠᠳ ᠪᠠᠢᠨᠠ᠃ ᠲᠠᠨ ᠤᠷᠤᠭᠤ ᠵᠢᠭᠠᠬᠠᠨ ᠰᠢᠬᠠᠭᠠᠳ ᠬᠡᠪᠲᠡᠵᠦ ᠪᠣᠯᠬᠤ ᠤᠤ? ᠭᠡᠵᠦ ᠣᠳᠬᠠᠨ ᠰᠢᠪᠡᠭᠡᠨᠡᠪᠡ᠃ ᠰᠠᠩᠵᠢ ᠲᠡᠭᠦᠨ ᠳ᠋ᠦ᠍ ᠶᠠᠭᠤ ᠭᠡᠵᠦ ᠬᠡᠯᠡᠬᠦ ᠪᠡᠨ ᠮᠡᠳᠡᠬᠦ ᠦᠭᠡᠢ ᠠᠯᠮᠠᠢᠷᠠᠵᠠᠢ᠃ ᠳᠤᠭᠤᠢ ᠯᠠ ᠪᠠᠢᠯᠠ᠃ ᠳᠠᠭᠤ ᠦᠭᠡᠢ ᠪᠠᠢᠭᠠ ᠶ᠋ᠢ ᠨᠢ ᠤᠳᠬᠤᠨ ᠬᠡᠦᠬᠡᠨ ᠮᠥᠨ ᠯᠡ ᠥᠪᠡᠷ ᠦ᠋ᠨ ᠬᠢ ᠪᠡᠷ ᠢ᠋ᠶ᠋ᠡᠨ ᠣᠢᠯᠠᠭᠠᠵᠤ ᠪᠠᠷᠤᠭ ᠯᠠ ᠡᠪᠦᠷ ᠲᠦ᠍ ᠨᠢ ᠣᠷᠣᠭᠠᠳ ᠢᠷᠡᠵᠡᠢ᠃ ᠰᠠᠩᠵᠢ ᠤᠯᠠᠮ ᠬᠦᠨᠳᠦ ᠪᠠᠢᠳᠠᠯ ᠳ᠋ᠤ᠌ ᠣᠷᠣᠵᠤ ᠬᠠᠮᠢᠭᠠᠰᠢ ᠪᠠᠨ ᠴᠤ᠌ ᠬᠥᠳᠡᠯᠵᠦ ᠴᠢᠳᠠᠬᠤ ᠦᠭᠡᠢ ᠪᠠᠢᠯᠠ᠃ ᠭᠠᠳᠠᠭᠠ ᠪᠣᠷᠣᠭᠠ ᠤᠯᠠᠮ ᠰᠢᠷᠦᠭᠦᠰᠦᠨ ᠣᠷᠣᠵᠤ᠂ ᠦᠶᠡ ᠦᠶᠡ ᠲᠩᠷᠢ ᠳᠤᠤᠭᠠᠷᠤᠭᠰᠠᠭᠠᠷ ᠯᠠ ᠠᠵᠢ᠃ ᠤᠳᠬᠤᠨ ᠬᠡᠦᠬᠡᠨ ᠦ᠌ ᠵᠥᠭᠡᠯᠡᠨ ᠠᠮᠢᠰᠬᠤᠭᠠ ᠣᠳᠣ ᠰᠠᠩᠵᠢ ᠶ᠋ᠢᠨ ᠪᠦᠷ ᠬᠠᠴᠠᠷ ᠳᠡᠭᠡᠷᠡ ᠨᠢ ᠮᠡᠳᠡᠷᠡᠭᠳᠡᠵᠦ ᠪᠠᠢᠯᠠ᠃ ᠰᠠᠩᠵᠢ ᠲᠡᠭᠦᠨ ᠢ᠋ ᠮᠡᠳᠡᠭᠡ ᠦᠭᠡᠢ ᠬᠥᠮᠦᠨ ᠪᠣᠯᠬᠤ ᠭᠡᠵᠦ ᠨᠢᠭᠡ ᠬᠡᠰᠡᠭ ᠲᠦ᠍ ᠪᠡᠨ ᠡᠯᠳᠡᠪ ᠢ᠋ᠶ᠋ᠡᠷ ᠴᠢᠷᠮᠠᠢᠵᠤ ᠪᠠᠢᠯᠠ᠃ ᠭᠡᠪᠡᠴᠦ ᠡᠬᠢᠯᠡᠭᠡᠳ ᠭᠡᠷ ᠦ᠋ᠨ ᠪᠥᠷᠢᠶᠡᠰᠦᠨ ᠳᠡᠭᠡᠷᠡ ᠱᠠᠭᠢᠬᠤ ᠪᠣᠷᠣᠭᠠᠨ ᠤ᠋ ᠴᠢᠮᠡᠭᠡ ᠶ᠋ᠢ᠂ ᠬᠠᠵᠠᠭᠤ ᠲᠠᠯᠠ ᠪᠠᠷ ᠳᠤᠰᠤᠯᠠᠬᠤ ᠳᠤᠰᠤᠭᠠᠯ ᠤ᠋ᠨ ᠳᠠᠭᠤ ᠶ᠋ᠢ ᠰᠠᠩᠵᠢ ᠰᠣᠨᠣᠰᠬᠤ ᠪᠠᠨ ᠪᠣᠯᠢᠵᠤ᠂ ᠳᠠᠷᠠᠭᠠ ᠨᠢ ᠲᠩᠷᠢ ᠳᠤᠤᠭᠠᠷᠬᠤ ᠶ᠋ᠢ ᠮᠡᠳᠡᠷᠡᠬᠦ ᠪᠡᠨ ᠪᠠᠢᠵᠠᠢ᠃ ᠣᠷᠴᠢᠯᠠᠩ ᠬᠣᠷᠸᠠ ᠲᠡᠢᠨ ᠬᠦ᠌ ᠪᠠᠢᠬᠤ ᠦᠭᠡᠢ ᠶᠦ᠍ᠮ ᠰᠢᠭ ᠪᠣᠯᠵᠤ᠂ ᠭᠠᠭᠴᠠᠬᠦ ᠤᠳᠬᠤᠨ ᠬᠡᠦᠬᠡᠨ ᠢ᠋ ᠯᠡ ᠬᠠᠵᠠᠭᠤ ᠳ᠋ᠤ᠌ ᠨᠢ ᠪᠠᠢᠭᠠ ᠶ᠋ᠢ ᠰᠠᠩᠵᠢ ᠣᠰᠣᠯᠳᠠᠬᠤ ᠦᠭᠡᠢ ᠮᠡᠳᠡᠷᠡᠵᠦ᠂ ᠰᠡᠳᠬᠢᠯ ᠦ᠋ᠨ ᠬᠢᠮᠤᠷᠠᠯ ᠳ᠋ᠤ᠌ ᠳᠣᠩᠰᠣᠯᠤᠨ᠂ ᠭᠢᠷᠪᠢᠰᠢᠵᠦ ᠪᠠᠢᠲᠠᠯᠠ ᠤᠷᠤᠭᠤᠯ ᠳᠡᠭᠡᠷᠡ ᠨᠢ ᠣᠳᠬᠣᠨ ᠤ᠋ ᠤᠯᠠᠭᠠ ᠪᠤᠲᠠᠷᠠᠭᠰᠠᠨ ᠵᠥᠭᠡᠯᠡᠬᠡᠨ ᠬᠠᠴᠠᠷ ᠠᠶᠠᠷᠬᠠᠨ ᠨᠠᠭᠠᠯᠳᠤᠯᠠ᠁
᠁ ᠪᠣᠷᠣᠭᠠ ᠭᠡᠨᠡᠳᠲᠡ ᠵᠣᠭᠰᠣᠵᠠᠢ᠃ ᠪᠣᠷᠣᠭᠠ ᠵᠣᠭᠰᠣᠮᠠᠭᠴᠠ ᠦᠷ ᠴᠠᠢᠵᠠᠢ᠃ ᠤᠳᠬᠤᠨ ᠬᠡᠦᠬᠡᠨ ᠠᠯᠢ ᠬᠡᠳᠦᠢᠨᠠᠢ ᠪᠣᠰᠤᠭᠠᠳ ᠴᠠᠢ ᠴᠢᠨᠠᠵᠤ ᠪᠠᠢᠪᠠ᠃ ᠦᠷ ᠦ᠋ᠨ ᠡᠮᠦᠨᠡᠬᠡᠨ ᠬᠡᠰᠡᠭ ᠵᠠᠭᠤᠷᠠ ᠲᠠᠭ ᠤᠨᠲᠠᠴᠢᠬᠠᠭᠰᠠᠨ ᠢ᠋ᠶ᠋ᠠᠨ ᠰᠠᠩᠵᠢ ᠮᠡᠳᠡᠵᠦ ᠰᠡᠷᠢᠮᠡᠭᠴᠡ ᠪᠡᠨ ᠥᠨᠳᠡᠢᠨ ᠬᠤᠪᠴᠠᠰᠤᠯᠠᠵᠤ ᠡᠬᠢᠯᠡᠪᠡ᠃ ᠭᠡᠷ ᠳᠣᠲᠣᠷᠠ ᠪᠣᠷᠣᠭᠠᠨ ᠤ᠋ ᠴᠢᠭᠢᠭ᠂ ᠤᠲᠤᠭᠠ ᠬᠣᠶᠠᠷ ᠬᠣᠯᠢᠯᠳᠤᠨ ᠦᠨᠦᠷᠳᠡᠵᠦ᠂ ᠳᠥᠩᠭᠡᠵᠢ ᠴᠢᠨᠠᠭᠰᠠᠨ ᠰᠢᠷᠠ ᠴᠠᠢ ᠶ᠋ᠢᠨ ᠠᠭᠠᠭ ᠲᠠᠢ ᠳᠠᠪᠬᠤᠴᠠᠨ ᠪᠠᠢᠯᠠ᠃ ᠣᠳᠬᠣᠨ ᠬᠡᠦᠬᠡᠨ ᠲᠤᠯᠭᠠᠨ ᠤ᠋ ᠪᠠᠨ ᠳᠡᠷᠭᠡᠳᠡ ᠨᠥᠮᠥᠭᠡᠨ ᠰᠠᠭᠤᠭᠠᠳ ᠴᠠᠢ ᠪᠠᠨ ᠰᠠᠮᠤᠷᠴᠤ ᠪᠠᠢᠪᠠ᠃ ᠲᠡᠭᠦᠨ ᠦ᠌ ᠮᠢᠬᠠᠯᠢᠭᠳᠠᠭᠤᠬᠠᠨ ᠪᠥᠭᠡᠷᠡᠩᠬᠡᠢ ᠪᠡᠶᠡ ᠶ᠋ᠢᠨ ᠡᠪᠯᠢᠭ ᠠᠶᠠᠲᠠᠢ ᠶ᠋ᠢ ᠰᠠᠩᠵᠢ ᠣᠳᠣ ᠰᠠᠢ ᠯᠠ ᠣᠯᠵᠤ ᠬᠠᠷᠠᠬᠤ ᠰᠢᠭ᠋ ᠪᠣᠯᠪᠠ᠃ ᠳᠥᠩᠭᠡᠵᠢ ᠣᠳᠣ ᠯᠠ ᠬᠠᠷᠠᠯᠠ ᠭᠡᠵᠦ ᠤᠤ? ᠴᠡᠩᠬᠡᠷ ᠲᠣᠭᠣᠨᠣ ᠶ᠋ᠢᠨ ᠳᠠᠪᠠᠭᠠᠨ ᠳ᠋ᠤ᠌ ᠠᠷᠪᠠᠭᠠᠳ ᠵᠢᠯ ᠦ᠋ᠨ ᠲᠡᠷᠲᠡᠭᠡ ᠬᠡᠭᠡᠷᠡ ᠤᠨᠲᠠᠭᠠᠳ ᠪᠣᠰᠳᠠᠭ ᠲᠡᠷᠡ ᠥᠷᠯᠥᠭᠡ ᠣᠳᠬᠣᠨ ᠬᠡᠦᠬᠡᠨ ᠢ᠋ ᠭᠣᠷᠣᠬᠠ ᠶ᠋ᠢᠨ ᠤᠰᠤᠨ ᠳ᠋ᠤ᠌ ᠨᠢᠭᠤᠷ ᠢ᠋ᠶ᠋ᠠᠨ ᠤᠬᠢᠶᠠᠵᠤ ᠪᠠᠢᠬᠤ ᠶ᠋ᠢ ᠰᠠᠩᠵᠢ ᠰᠡᠮᠬᠡᠨ ᠬᠠᠷᠠᠭᠠ ᠦᠭᠡᠢ ᠭᠡᠵᠦ ᠤᠤ? ᠬᠠᠷᠠᠮᠠᠭᠴᠠ ᠨᠢᠳᠦ ᠪᠤᠷᠤᠭᠤᠯᠠᠨ ᠥᠪᠡᠷ ᠢ᠋ ᠪᠡᠨ ᠵᠢᠮᠡᠯᠡᠭᠰᠡᠨ᠃ ᠲᠡᠭᠡᠬᠦ ᠳ᠋ᠦ᠍ ᠣᠳᠬᠣᠨ ᠨᠥᠬᠥᠷ ᠲᠡᠢ᠂ ᠰᠠᠩᠵᠢ ᠪᠣᠯ ᠰᠠᠬᠢᠯ ᠰᠠᠨᠸᠠᠷ ᠰᠠᠬᠢᠭᠰᠠᠨ ᠪᠠᠨᠳᠢ ᠶᠠᠪᠤᠵᠠᠢ᠃ ᠳᠠᠷᠠᠭᠠ ᠨᠢ ᠬᠡᠳᠦᠨ ᠵᠢᠯ ᠥᠩᠭᠡᠷᠡᠬᠦ ᠳ᠋ᠦ᠍ ᠦᠢᠴᠦᠦ ᠮᠥᠷᠡᠨ ᠢ᠋ᠶ᠋ᠡᠷ ᠦᠬᠡᠷ ᠦ᠋ᠨ ᠰᠢᠷᠢᠨ ᠵᠠᠪᠢ ᠪᠠᠷ ᠶᠠᠪᠤᠵᠤ ᠪᠠᠢᠬᠤ ᠳ᠋ᠤ᠌ ᠤᠰᠤᠨ ᠤ᠋ ᠳᠣᠯᠭᠢᠶᠠᠨ ᠳ᠋ᠤ᠌ ᠪᠡᠶᠡ ᠨᠢ ᠡᠪᠭᠦᠢᠷᠬᠡᠵᠦ ᠰᠠᠩᠵᠢ ᠲᠡᠭᠦᠨ ᠦ᠌ ᠪᠦᠰᠡᠯᠡᠭᠦᠷ ᠢ᠋ᠶ᠋ᠡᠷ ᠲᠡᠪᠡᠷᠢᠨ᠂ ᠤᠰᠤ ᠤᠷᠤᠭᠤ ᠣᠢᠴᠢᠬᠤ ᠠ᠋ᠴᠠ ᠨᠢ ᠪᠣᠯᠭᠣᠮᠵᠢᠯᠠᠵᠤ ᠶᠠᠪᠤᠭᠠ ᠦᠭᠡᠢ ᠭᠡᠵᠦ ᠤᠤ? ᠲᠡᠢᠮᠦ ᠶᠠᠭᠤᠮᠠ ᠪᠣᠯᠵᠤ ᠯᠠ ᠪᠠᠢᠭᠰᠠᠨ᠃ ᠲᠡᠭᠡᠬᠦ ᠳ᠋ᠦ᠍ ᠰᠠᠩᠵᠢ ᠰᠠᠬᠢᠯ ᠰᠠᠨᠸᠠᠷ ᠢ᠋ᠶ᠋ᠠᠨ ᠪᠠᠲᠤ ᠰᠠᠬᠢᠭᠰᠠᠨ ᠭᠠᠪᠵᠤ ᠪᠠᠢᠭᠰᠠᠨ ᠯᠠ ᠳᠠ᠃ ᠡᠯᠳᠡᠪ ᠢ᠋ ᠪᠣᠳᠣᠳᠠᠭ ᠴᠤ᠌ ᠦᠭᠡᠢ ᠶᠠᠪᠤᠵᠠᠢ᠃ ᠭᠡᠬᠦ ᠳ᠋ᠦ᠍ ᠪᠡᠨ ᠣᠳᠬᠣᠨ ᠬᠡᠦᠬᠡᠨ ᠰᠠᠩᠵᠢ ᠶ᠋ᠢᠨ ᠪᠦᠬᠦᠢ ᠯᠡ ᠠᠮᠢᠳᠤᠷᠠᠯ ᠤ᠋ᠨ ᠨᠢ ᠪᠣᠳᠢ ᠮᠥᠷ ᠢ᠋ ᠬᠥᠭᠡᠭᠡᠭᠰᠡᠨ ᠵᠠᠮ ᠳᠡᠭᠡᠷᠡ ᠨᠢ ᠮᠥᠷ ᠰᠣᠯᠢᠪᠢᠯᠴᠠᠨ ᠲᠣᠬᠢᠶᠠᠯᠳᠤᠭᠰᠠᠨ ᠣᠢᠷᠠᠯᠴᠠᠭᠠ ᠨᠠᠰᠤᠨ ᠤ᠋ ᠴᠣᠷᠢ ᠶ᠋ᠢᠨ ᠭᠠᠭᠴᠠ ᠪᠦᠰᠡᠭᠦᠢ ᠬᠥᠮᠦᠨ ᠪᠠᠢᠭᠰᠠᠨ ᠢ᠋ ᠰᠠᠩᠵᠢ ᠣᠳᠣ ᠯᠠ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠯᠠ᠃ ᠪᠠᠨᠳᠢ ᠪᠠᠢᠬᠤ ᠳ᠋ᠤ᠌ ᠪᠠᠨ ᠪᠦᠰᠡᠭᠦᠢ ᠬᠥᠮᠦᠨ ᠳ᠋ᠦ᠍ ᠣᠢᠷᠠᠲᠣᠬᠣ ᠪᠠᠢᠲᠤᠭᠠᠢ ᠲᠡᠭᠦᠨ ᠤᠷᠤᠭᠤ ᠰᠢᠨᠤᠯᠲᠠᠢ ᠪᠠᠷ ᠬᠠᠷᠠᠬᠤ ᠯᠠ ᠶᠤᠮ ᠪᠣᠯ ᠵᠠᠪᠰᠠᠷ ᠦᠭᠡᠢ ᠬᠠᠷᠠ ᠨᠢᠭᠦᠯ ᠦ᠋ᠨ ᠨᠢᠭᠡ ᠶ᠋ᠢ ᠦᠢᠯᠡᠳᠴᠦ ᠠᠯᠳᠠᠰ ᠬᠢᠵᠦ ᠪᠠᠢᠭᠠ ᠨᠢ ᠲᠡᠷᠡ ᠭᠡᠳᠡᠭ ᠢ᠋ ᠯᠠᠮᠠ ᠪᠠᠭᠰᠢ ᠠ᠋ᠴᠠ ᠪᠠᠨ᠂ ᠶᠡᠷᠦ ᠨᠢ ᠯᠠᠮᠠ ᠲᠣᠯᠣᠭᠠᠢ ᠲᠠᠢ ᠪᠦᠷᠢ ᠡᠴᠡ ᠪᠠᠲᠤ ᠰᠣᠨᠣᠰᠴᠤ ᠪᠦᠷᠢᠨ ᠢᠲᠡᠭᠡᠭᠰᠡᠨ ᠪᠢᠯᠡ᠃ ᠭᠠᠪᠵᠤ ᠪᠠᠢᠬᠤ ᠳ᠋ᠤ᠌ ᠪᠠᠨ ᠮᠥᠨ ᠲᠡᠷᠡ ᠰᠤᠷᠭᠠᠯ ᠢ᠋ ᠪᠤᠰᠤᠳ ᠲᠤ᠌ ᠠᠢᠯᠠᠳᠳᠠᠭ᠂ ᠥᠪᠡᠷ ᠢ᠋ᠶ᠋ᠡᠨ ᠪᠣᠯ ᠪᠦᠰᠡᠭᠦᠢ ᠬᠥᠮᠦᠨ ᠦ᠌ ᠲᠤᠬᠠᠢ ᠮᠥᠷᠥᠭᠡᠳᠬᠦ ᠴᠠᠭ ᠢ᠋ᠶ᠋ᠠᠨ ᠪᠤᠷᠬᠠᠨ ᠤ᠋ ᠨᠣᠮ ᠳ᠋ᠤ᠌ ᠰᠢᠪᠬᠠᠨ ᠥᠭᠭᠦᠭᠰᠡᠭᠡᠷ ᠪᠠᠢᠭᠠᠳ ᠰᠡᠭᠦᠯ ᠰᠡᠭᠦᠯ ᠳ᠋ᠦ᠍ ᠪᠡᠨ ᠠᠷᠢᠬᠢ ᠳᠠᠷᠠᠰᠤ ᠤᠤᠭᠤᠵᠤ ᠤᠭ ᠠ᠋ᠴᠠ ᠪᠠᠨ ᠰᠤᠷᠤᠭᠠ ᠦᠭᠡᠢ ᠬᠥᠮᠦᠨ ᠲᠡᠭᠦᠨ ᠢ᠋ ᠣᠭᠲᠣᠬᠠᠨ ᠴᠤ᠌ ᠲᠣᠭᠣᠳᠠᠭ ᠦᠭᠡᠢ ᠶ᠋ᠢᠨ ᠠᠳᠠᠯᠢ ᠪᠠᠷ ᠡᠮᠡᠰ᠂ ᠥᠬᠢᠳ ᠦ᠋ᠨ ᠲᠤᠬᠠᠢ ᠳ᠋ᠤ᠌ ᠪᠣᠳᠣᠬᠤ ᠰᠠᠨᠠᠬᠤ ᠴᠤ᠌ ᠶᠠᠭᠤᠮᠠ ᠦᠭᠡᠢ ᠪᠣᠯᠵᠤ᠂ ᠪᠠᠢᠭᠠᠯᠢ ᠠ᠋ᠴᠠ ᠵᠠᠶᠠᠭᠠᠭᠳᠠᠭᠰᠠᠨ ᠰᠠᠷᠠᠯ ᠨᠢ ᠠᠭᠠᠵᠢᠮ ᠢ᠋ᠶ᠋ᠠᠷ ᠤᠨᠲᠠᠷᠠᠵᠠᠢ᠃
ᠬᠠᠮᠪᠤ ᠯᠠᠮᠠ ᠶ᠋ᠢᠨ ᠵᠡᠷᠭᠡ ᠳ᠋ᠦ᠍ ᠬᠦᠷᠴᠦ ᠨᠣᠮ ᠪᠦᠬᠦᠨ ᠦ᠌ ᠨᠠᠭᠠᠳᠤ ᠴᠠᠭᠠᠳᠤ ᠤᠴᠢᠷ ᠢ᠋ ᠭᠦᠨᠡ ᠤᠬᠠᠭᠠᠷᠠᠭᠰᠠᠨ ᠡᠨᠡ ᠦᠶᠡ ᠳ᠋ᠡᠭᠡᠨ ᠰᠠᠩᠵᠢ ᠶ᠋ᠢᠨ ᠪᠣᠳᠣᠬᠤ ᠰᠠᠨᠠᠬᠤ ᠨᠢ ᠶᠡᠬᠡ ᠯᠡ ᠥᠭᠡᠷᠡᠴᠢᠯᠡᠭᠳᠡᠵᠦ ᠪᠦᠰᠡᠭᠦᠢ ᠬᠥᠮᠦᠨ ᠪᠠᠢᠬᠤ ᠦᠭᠡᠢ ᠪᠣᠯ ᠬᠥᠮᠦᠨ ᠦ᠌ ᠣᠷᠴᠢᠯᠠᠩ ᠳᠠᠭᠤᠰᠪᠤᠷᠢ ᠪᠣᠯᠤᠨᠠ᠂ ᠯᠠᠮᠠ ᠪᠦᠬᠦᠨ ᠪᠦᠰᠡᠭᠦᠢ ᠬᠥᠮᠦᠨ ᠡᠴᠡ ᠲᠥᠷᠥᠭᠰᠡᠨ ᠶᠦ᠍ᠮ ᠭᠡᠳᠡᠭ ᠢ᠋ ᠬᠡᠨ ᠢ᠋ᠶ᠋ᠡᠷ ᠴᠦ᠍ ᠬᠡᠯᠡᠭᠦᠯᠦᠯᠲᠡ ᠦᠭᠡᠢ ᠮᠡᠳᠡᠵᠦ ᠪᠠᠢᠯᠠ᠃ ᠡᠬᠡᠨᠡᠷ ᠠᠪᠬᠤ ᠦᠭᠡᠢ ᠶ᠋ᠢᠨ ᠰᠠᠬᠢᠯ ᠰᠠᠨᠸᠠᠷ ᠢ᠋ ᠭᠠᠭᠴᠠᠬᠦ ᠽᠣᠡᠭ᠌ᠺᠡᠸᠠ ᠶᠢᠨ ᠰᠤᠷᠭᠠᠯ ᠪᠠᠷᠢᠮᠲᠠᠯᠠᠭᠴᠢᠳ ᠲᠡᠷᠡ ᠳᠣᠲᠣᠷᠠ ᠪᠠᠨ ᠮᠣᠩᠭᠣᠯ ᠯᠠᠮᠠ ᠨᠠᠷ ᠯᠠ ᠬᠠᠲᠠᠭᠤ ᠰᠠᠬᠢᠵᠤ ᠪᠠᠢᠳᠠᠭ ᠪᠣᠯᠬᠤ ᠠ᠋ᠴᠠ ᠪᠢᠰᠢ ᠡᠨᠡᠳᠬᠡᠭ᠂ ᠪᠠᠯᠪᠤ᠂ ᠬᠠᠴᠸ᠂ ᠬᠠᠰᠲ᠂ ᠰᠠᠩᠭᠠᠰ᠂ ᠯᠠᠩᠭᠠᠨ᠂ ᠪᠠᠮᠠᠭᠠᠯ ᠤ᠋ᠨ ᠶᠡᠬᠡᠩᠬᠢ ᠯᠠᠮᠠ ᠨᠠᠷ ᠡᠢᠮᠦ ᠰᠦᠵᠢᠭ ᠦ᠋ᠨ ᠬᠦᠯᠢᠶᠡᠭᠰᠡᠨ ᠡᠴᠡ ᠴᠢᠯᠥᠭᠡᠲᠡᠢ ᠪᠠᠢᠳᠠᠭ ᠢ᠋ ᠴᠦ᠍ ᠰᠠᠩᠵᠢᠳᠠᠯᠪᠢᠴᠣᠢᠵᠠᠮᠰᠤᠲᠠᠨ ᠮᠡᠳᠡᠵᠦ ᠪᠠᠢᠯᠠ᠃ ᠲᠡᠳᠡ ᠨᠢᠭᠦᠯ ᠡᠴᠡ ᠠᠶᠤᠬᠤ ᠦᠭᠡᠢ ᠭᠡᠷᠯᠡᠳᠡᠭ ᠪᠢᠰᠢ ᠤᠤ?
ᠦᠷᠡ ᠶ᠋ᠢᠨ ᠬᠤᠲᠤᠭ ᠣᠯᠬᠤ ᠭᠡᠵᠦ ᠤᠳᠬᠤᠨ ᠬᠡᠦᠬᠡᠨ ᠦ᠌ ᠥᠴᠢᠨᠡᠨ ᠵᠣᠪᠠᠯᠠᠩ ᠲᠤᠭᠤᠯᠵᠤ᠂ ᠬᠡᠴᠢᠨᠡᠨ ᠰᠦᠵᠢᠭ ᠪᠢᠰᠢᠷᠡᠯ ᠭᠠᠷᠭᠠᠭᠰᠠᠨ ᠢ᠋ ᠰᠠᠩᠵᠢ ᠠ᠋ᠴᠠ ᠥᠭᠡᠷᠡ ᠰᠠᠢᠨ ᠮᠡᠳᠡᠬᠦ ᠬᠥᠮᠦᠨ ᠣᠳᠣ ᠦᠭᠡᠢ ᠪᠢᠯᠡ᠃ ᠦᠷᠡ ᠲᠥᠷᠥᠭᠦᠯᠬᠦ ᠡᠭᠦᠷᠭᠡ ᠲᠡᠢ ᠪᠡᠷ ᠬᠣᠷᠸᠠ ᠳ᠋ᠤ᠌ ᠵᠠᠶᠠᠭᠠᠭᠰᠠᠨ ᠪᠣᠯᠬᠣᠷ ᠪᠦᠰᠡᠭᠦᠢ ᠬᠥᠮᠦᠨ ᠲᠡᠭᠦᠨ ᠢ᠋ᠶ᠋ᠡᠨ ᠪᠣᠳᠣᠵᠤ ᠶᠠᠪᠤᠳᠠᠭ ᠨᠢ ᠶᠠᠭᠤᠨ ᠨᠢᠭᠦᠯ᠂ ᠠᠯᠳᠠᠰ ᠲᠤ᠌ ᠬᠣᠯᠪᠣᠭᠳᠠᠬᠤ ᠪᠢᠯᠡ?
ᠤᠳᠬᠤᠨ ᠬᠡᠦᠬᠡᠨ ᠦ᠌ ᠴᠢᠷᠠᠢ ᠥᠩᠭᠡᠯᠢᠭ ᠰᠠᠢᠬᠠᠨ ᠬᠠᠷᠠᠭᠳᠠᠵᠤ ᠪᠠᠢᠯᠠ᠃ ᠭᠡᠪᠡᠴᠦ ᠲᠡᠷᠡ ᠬᠠᠮᠪᠤ ᠶ᠋ᠢᠨ ᠥᠭᠡᠳᠡ ᠡᠴᠡ ᠡᠭᠴᠡᠯᠡᠨ ᠬᠠᠷᠠᠵᠤ ᠴᠢᠳᠠᠬᠤ ᠦᠭᠡᠢ ᠢᠴᠢᠩᠭᠦᠷᠡᠨ ᠰᠠᠭᠤᠬᠤ ᠰᠢᠭ᠋ ᠰᠠᠨᠠᠭᠳᠠᠯᠠ᠃ ᠰᠠᠩᠵᠢ᠂ ᠬᠡᠦᠬᠡᠨ ᠢ᠋ ᠴᠦ᠍ ᠵᠢᠮᠡᠯᠡᠭᠰᠡᠨ ᠦᠭᠡᠢ᠂ ᠥᠪᠡᠷ ᠢ᠋ ᠪᠡᠨ ᠴᠦ᠍ ᠵᠥᠪᠲᠥᠭᠡᠭᠰᠡᠨ ᠦᠭᠡᠢ᠃ ᠲᠡᠢᠮᠦᠷᠬᠦ ᠶᠠᠭᠤᠮᠠ ᠪᠣᠳᠣᠬᠤ ᠠᠷᠭᠠ ᠦᠭᠡᠢ ᠪᠠᠢᠯᠠ᠃ ᠬᠠᠷᠢᠨ ᠨᠢᠭᠡ ᠶᠡᠬᠡ ᠠᠢᠬᠤᠪᠲᠤᠷ ᠶᠠᠭᠤᠮᠠᠨ ᠤ᠋ ᠰᠠᠪᠠᠷ ᠠ᠋ᠴᠠ ᠮᠤᠯᠲᠤᠷᠠᠨ ᠭᠠᠷᠤᠭᠰᠠᠨ ᠶᠤᠮ ᠰᠢᠭ᠋᠂ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠲᠣᠯᠣᠭᠠᠢ ᠶ᠋ᠢ ᠥᠪᠡᠷ ᠢ᠋ᠶ᠋ᠡᠨ ᠮᠡᠳᠡᠳᠡᠭ ᠪᠣᠯᠴᠢᠬᠠᠭᠰᠠᠨ ᠶᠤᠮ ᠰᠢᠭ᠋ ᠡᠰᠡᠪᠡᠯ ᠬᠡᠢ ᠠᠭᠠᠷ ᠲᠤ᠌ ᠭᠠᠨᠳᠠᠷᠢᠰᠤᠨ ᠪᠠᠯᠭᠠᠰᠤᠨ ᠳ᠋ᠤ᠌ ᠣᠯᠠᠨ ᠵᠢᠯ ᠰᠠᠭᠤᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠲᠣᠷᠭᠠᠨ ᠨᠣᠭᠣᠭᠠᠨ ᠵᠦᠯᠭᠡᠨ ᠳᠡᠭᠡᠷᠡ᠂ ᠪᠦᠷ ᠨᠢᠰᠤᠬᠠᠢ ᠵᠢᠭᠠᠯ ᠶᠠᠪᠤᠬᠤ ᠳ᠋ᠤ᠌ ᠪᠠᠨ ᠬᠤᠷᠠᠭᠠ ᠬᠠᠷᠢᠭᠤᠯᠵᠤ ᠬᠥᠯ ᠨᠢᠴᠦᠭᠦᠨ ᠭᠦᠶᠦᠵᠦ ᠶᠠᠪᠤᠭᠰᠠᠨ ᠳᠤᠮᠳᠠ ᠬᠠᠢᠯᠠᠰᠤᠲᠠᠢ ᠶ᠋ᠢᠨ ᠭᠣᠣᠯ ᠤ᠋ᠨ ᠵᠥᠭᠡᠯᠡᠬᠡᠨ ᠰᠢᠷᠢᠭᠢ ᠳᠡᠭᠡᠷᠡ ᠪᠠᠭᠤᠭᠠᠳ ᠢᠷᠡᠴᠢᠬᠡᠭᠰᠡᠨ ᠶᠦ᠍ᠮ ᠰᠢᠭ ᠬᠥᠩᠭᠡᠨ ᠬᠥᠭᠵᠢᠶᠡᠨ ᠲᠡᠢ ᠰᠡᠳᠬᠢᠭᠳᠡᠯ ᠳ᠋ᠦ᠍ ᠯᠡ ᠰᠠᠩᠵᠢ ᠪᠦᠷᠢᠨ ᠠᠪᠲᠠᠭᠳᠠᠵᠠᠢ᠃ ᠮᠥᠷᠦᠨ ᠳᠡᠭᠡᠭᠦᠷ ᠨᠢ ᠬᠡᠳᠦ ᠣᠷᠢᠶᠠᠨ ᠪᠣᠭᠣᠵᠤ ᠪᠠᠢᠳᠠᠭ ᠵᠢᠷᠠᠨ ᠬᠤᠨᠢᠶᠠᠰᠤᠲᠤ ᠣᠷᠬᠢᠮᠵᠢ ᠪᠠᠨ ᠠᠪᠤᠭᠠᠳ ᠲᠠᠯᠪᠢᠴᠢᠬᠠᠭᠰᠠᠨ ᠶᠤᠮ ᠰᠢᠭ᠋᠂ ᠡᠭᠡᠳᠡᠨ ᠭᠤᠲᠤᠯ ᠢ᠋ᠶ᠋ᠠᠨ ᠲᠠᠢᠯᠤᠭᠠᠳ ᠬᠥᠯ ᠨᠢᠴᠦᠭᠦᠨ ᠶᠠᠪᠤᠵᠤ ᠪᠠᠢᠬᠤ ᠰᠢᠭ᠋ ᠬᠠᠴᠢᠨ ᠰᠠᠨᠠᠭᠳᠠᠭᠰᠠᠨ ᠳ᠋ᠤ᠌ ᠰᠠᠩᠵᠢ ᠬᠡᠦᠬᠡᠨ ᠦ᠌ ᠥᠭᠭᠦᠭᠰᠡᠨ ᠴᠠᠢ ᠶ᠋ᠢ ᠱᠠᠯᠠᠮᠠᠭᠬᠠᠨ ᠰᠣᠷᠣᠵᠤ ᠤᠤᠭᠤᠯᠠ᠃ ᠥᠴᠥᠭᠡᠳᠦᠷᠬᠡᠨ ᠯᠡ ᠥᠨᠳᠥᠷ ᠨᠠᠰᠤᠲᠠᠢ ᠪᠠᠭᠤᠷᠢ ᠲᠠᠢ ᠰᠠᠭᠤᠷᠢ ᠲᠠᠢ᠂ ᠯᠠᠮᠠ ᠪᠦᠷᠢ ᠶ᠋ᠢᠨ ᠠᠬᠠ ᠵᠠᠬᠠ᠂ ᠰᠢᠲᠦᠯᠭᠡᠲᠡᠨ ᠪᠦᠷᠢ ᠶ᠋ᠢᠨ ᠪᠠᠭᠰᠢ ᠮᠡᠲᠦ ᠪᠡᠷ ᠥᠪᠡᠷ ᠲᠦ᠍ ᠨᠢ ᠰᠠᠨᠠᠭᠳᠠᠵᠤ ᠶᠡᠬᠡᠮᠰᠦᠭ᠂ ᠬᠥᠳᠡᠯᠭᠡᠭᠡᠨ ᠦᠭᠡᠢ᠂ ᠰᠦᠷ ᠶᠡᠬᠡ ᠲᠡᠢ ᠪᠠᠢᠳᠠᠯ ᠦᠵᠡᠭᠦᠯᠬᠦ ᠶ᠋ᠢ ᠬᠢᠴᠢᠶᠡᠵᠦ ᠶᠠᠪᠤᠭᠰᠠᠨ ᠰᠠᠩᠵᠢ ᠳ᠋ᠤ᠌ ᠥᠨᠥᠳᠥᠷ ᠠᠭᠰᠤᠮ ᠬᠤᠷᠳᠤᠨ ᠮᠣᠷᠢ ᠤᠨᠤᠭᠠᠳ ᠬᠡᠭᠡᠷᠡ ᠲᠠᠯᠠ ᠪᠠᠷ ᠳᠠᠪᠬᠢᠭᠤᠯᠴᠢᠬᠠᠮᠠᠷ᠂ ᠨᠠᠢᠷ ᠤ᠋ᠨ ᠰᠥᠩ ᠲᠦᠰᠢᠭᠡᠳ ᠤᠷᠲᠤ ᠶ᠋ᠢᠨ ᠳᠠᠭᠤᠤ ᠠᠶᠠᠯᠠᠵᠤ ᠰᠠᠭᠤᠮᠠᠷ ᠬᠦᠰᠡᠯ ᠲᠥᠷᠥᠵᠦ ᠪᠠᠢᠯᠠ᠃ ᠪᠤᠷᠬᠠᠨ ᠤ᠋ ᠨᠣᠮ ᠳ᠋ᠤ᠌ ᠭᠠᠷᠳᠠᠭ ᠢ᠋ᠶ᠋ᠠᠷ 《ᠠᠷᠤ ᠶ᠋ᠢᠨ ᠠᠭᠤᠯᠠ ᠨᠢ ᠽᠠᠨᠳᠠᠨ ᠤ᠋ ᠣᠢ ᠴᠡᠴᠡᠷᠯᠢᠭ ᠲᠦ᠍ ᠰᠦᠮᠪᠦᠷ᠂ ᠥᠪᠥᠷ ᠦ᠋ᠨ ᠠᠭᠤᠯᠠ ᠨᠢ ᠨᠣᠭᠣᠭᠠᠨ ᠲᠠᠲᠠᠷ ᠬᠡᠢᠰᠬᠦ ᠠᠳᠠᠯᠢ᠂ ᠪᠠᠷᠠᠭᠤᠨ ᠠᠭᠤᠯᠠ ᠨᠢ ᠬᠠᠷᠠ ᠬᠥᠬᠡ ᠲᠣᠷᠭᠠᠨ ᠬᠥᠰᠢᠭᠡ ᠰᠤᠩᠭᠠᠭᠰᠠᠨ ᠠᠳᠠᠯᠢ᠂ ᠵᠡᠭᠦᠨ ᠠᠭᠤᠯᠠ ᠨᠢ ᠴᠠᠭᠠᠨ ᠠᠷᠰᠯᠠᠨ ᠣᠭᠲᠠᠷᠭᠤᠢ ᠳ᠋ᠤ᠌ ᠳᠡᠭᠦᠯᠡᠬᠦ ᠠᠳᠠᠯᠢ᠂ ᠤᠷᠤᠰᠬᠠᠯ ᠤᠰᠤ ᠨᠢ ᠬᠠᠷᠠ ᠮᠣᠭᠠᠢ ᠭᠠᠵᠠᠷ ᠤ᠋ᠨ ᠤᠷᠤᠭᠤ ᠭᠦᠶᠦᠬᠦ ᠠᠳᠠᠯᠢ ᠳᠡᠭᠡᠳᠦᠰ ᠦ᠋ᠨ ᠵᠢᠷᠭᠠᠯ ᠬᠡᠮᠡᠬᠦ ᠣᠷᠣᠨ ᠳ᠋ᠤ᠌ ᠱᠠᠯ ᠳᠣᠪᠵᠢᠶᠠ ᠨᠢ ᠲᠡᠮᠦᠷ᠂ ᠳᠥᠷᠪᠡᠨ ᠲᠤᠭᠤᠷᠭᠠ ᠨᠢ ᠠᠯᠲᠠ᠂ ᠬᠠᠰᠢᠶᠠ ᠨᠢ ᠣᠭ᠌ᠶᠤ᠂ ᠯᠠᠪᠠᠢ ᠡᠭᠦᠳᠡ ᠲᠡᠢ᠂ ᠽᠦᠨᠡᠷᠳᠡᠨᠢ ᠪᠠ ᠱᠢᠷᠣᠨ ᠱᠠᠯᠠ ᠲᠠᠢ᠂ ᠲᠤᠭ ᠨᠢ ᠤᠯᠠᠭᠠᠨ ᠠᠷᠠᠨᠵᠢᠯ ᠵᠡᠰ ᠢ᠋ᠶ᠋ᠡᠷ ᠪᠠᠷᠢᠭᠰᠠᠨ᠂ ᠵᠡᠭᠦᠨ ᠳ᠋ᠦ᠍ ᠨᠢ ᠲᠡᠮᠦᠷ ᠪᠡᠴᠢᠨ ᠤᠯᠠᠭᠠᠨ ᠨᠢᠭᠤᠷ ᠲᠤ᠌ ᠵᠠᠭᠤᠨ ᠲᠣᠳᠢ ᠣᠯᠠᠨ ᠢ᠋ᠶ᠋ᠠᠷ ᠨᠠᠭᠠᠳᠤᠭᠰᠠᠨ᠂ ᠤᠷᠲᠤ ᠨᠢ ᠤᠯᠠᠭᠠᠨ ᠬᠥᠮᠦᠨ ᠤᠯᠠᠭᠠᠨ ᠮᠣᠷᠢᠳ ᠢ᠋ ᠤᠷᠤᠯᠳᠤᠭᠤᠯᠤᠭᠰᠠᠨ ᠤᠷᠲᠤ ᠬᠠᠷᠰᠢ ᠶ᠋ᠢᠨ》 ᠭᠠᠳᠠᠭᠤᠷ ᠨᠢ ᠦᠷᠭᠦᠯᠵᠢ ᠶᠠᠪᠤᠭᠰᠠᠭᠠᠷ ᠪᠠᠢᠭᠠᠳ ᠥᠨᠥ ᠰᠥᠨᠢ ᠠᠩᠬᠠ ᠤᠳᠠᠭᠠ ᠯᠠ ᠲᠡᠭᠦᠨ ᠦ᠌ ᠳᠣᠲᠣᠷᠠ ᠣᠷᠣᠵᠤ ᠦᠵᠡᠭᠰᠡᠨ ᠮᠡᠲᠦ ᠰᠠᠨᠠᠭᠳᠠᠬᠤ ᠳ᠋ᠤ᠌ ᠰᠠᠩᠵᠢᠳᠠᠯᠪᠢᠴᠣᠢᠵᠠᠮᠰᠤ ᡀᠠᠷᠠᠮᠪᠠᠲᠠᠨ ᠰᠡᠳᠬᠢᠯ ᠦ᠋ᠨ ᠬᠢᠮᠤᠷᠠᠯ ᠳ᠋ᠤ᠌ ᠳᠠᠬᠢᠨ ᠵᠢᠪᠪᠦᠵᠦ᠂ ᠴᠢᠷᠠᠢ ᠨᠢ ᠨᠢᠭᠡ ᠤᠯᠠᠢᠵᠤ᠂ ᠨᠢᠭᠡ ᠴᠠᠢᠵᠤ ᠰᠠᠭᠤᠭᠰᠠᠭᠠᠷ ᠬᠡᠳᠦᠨ ᠴᠦ᠍ ᠠᠶᠠᠭᠠ ᠴᠠᠢ ᠤᠤᠭᠤᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠭᠰᠡᠨ ᠦᠭᠡᠢ᠃ ᠤᠳᠬᠤᠨ ᠲᠠᠢ ᠬᠠᠷᠠᠴᠠ ᠲᠤᠯᠭᠠᠷᠠᠬᠤ ᠠ᠋ᠴᠠ ᠠᠶᠤᠵᠤ ᠪᠠᠢᠪᠠ᠃
- ᠴᠠᠢ ᠮᠠᠨᠢ ᠳᠠᠭᠤᠰᠴᠢᠬᠠᠯᠠ᠃ ᠲᠠ ᠤᠤᠭᠤᠮᠠᠷ ᠪᠠᠢᠪᠠᠯ ᠳᠠᠬᠢᠭᠠᠳ ᠴᠢᠨᠠᠬᠤ ᠤᠤ? ᠭᠡᠵᠦ ᠣᠳᠬᠣᠨ ᠬᠡᠦᠬᠡᠨ ᠢ᠋ ᠠᠰᠠᠭᠤᠬᠤ ᠳ᠋ᠤ᠌ ᠰᠠᠩᠵᠢᠳᠠᠯᠪᠢᠴᠣᠢᠵᠠᠮᠰᠤᠲᠠᠨ ᠰᠠᠶᠢ ᠯᠠ ᠬᠥᠮᠦᠨ ᠦ᠌ ᠣᠷᠴᠢᠯᠠᠩ ᠳ᠋ᠤ᠌ ᠣᠳᠬᠣᠨ ᠬᠡᠦᠬᠡᠨ ᠦ᠌ ᠤᠲᠤᠭᠠᠲᠤ ᠬᠠᠷᠠ ᠭᠡᠷ ᠲᠦ᠍ ᠰᠡᠳᠬᠢᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠡᠷᠭᠢᠨ ᠢᠷᠡᠯᠡ᠃
- ᠵᠠ ᠪᠢ ᠴᠦ᠍ ᠶᠠᠪᠤᠬᠤ ᠤᠤ ᠳᠠ! ᠭᠡᠳ ᠰᠠᠩᠵᠢ ᠪᠣᠰᠬᠤ ᠶ᠋ᠢ ᠵᠠᠪᠳᠤᠬᠤ ᠳ᠋ᠤ᠌ ᠤᠳᠬᠤᠨ ᠬᠡᠦᠬᠡᠨ᠂
- ᠵᠢᠯᠠᠭᠠ ᠥᠭᠰᠥᠭᠡᠳ ᠬᠥᠲᠥᠯ ᠢ᠋ᠶ᠋ᠡᠷ ᠳᠠᠪᠠᠭᠠᠳ ᠵᠡᠭᠦᠨ ᠳᠠᠰᠢ ᠡᠷᠭᠢᠵᠦ ᠨᠡᠯᠢᠶᠡᠳ ᠶᠠᠪᠤᠭᠠᠳ ᠮᠣᠳᠣ ᠦᠭᠡᠢ ᠨᠢᠴᠦᠭᠦᠨ ᠠᠭᠤᠯᠠ ᠶ᠋ᠢ ᠳᠠᠪᠠᠭᠠᠳ ᠴᠠᠭᠠᠳᠤ ᠬᠥᠨᠳᠡᠢ ᠳ᠋ᠦ᠍ ᠨᠢ ᠠᠪᠤ ᠶ᠋ᠢᠨ ᠬᠢ ᠴᠢᠨᠢ ᠪᠣᠢ ᠰᠢᠦ! ᠭᠡᠵᠦ ᠭᠠᠵᠠᠷ ᠱᠠᠭᠠᠢᠨ ᠰᠠᠭᠤᠭᠰᠠᠨ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠡᠯᠡᠬᠦ ᠳ᠋ᠦ᠍ ᠢᠩᠭᠢᠵᠦ ᠶᠠᠪᠤᠬᠤ ᠶ᠋ᠢ ᠵᠢᠭᠠᠭᠰᠠᠨ ᠳ᠋ᠤ᠌
- ᠲᠡᠭᠡᠶᠡ ᠲᠡᠭᠡᠶᠡ! ᠭᠡᠵᠦ ᠰᠠᠩᠵᠢ ᠬᠡᠯᠡᠭᠡᠳ ᠪᠣᠰᠤᠯᠠ᠃
- ᠪᠢ ᠲᠠᠨ ᠢ᠋ ᠭᠠᠷᠭᠠᠵᠤ ᠥᠭᠭᠦᠶᠡ! ᠭᠡᠳ ᠤᠳᠬᠤᠨ ᠮᠥᠨ ᠯᠡ ᠪᠣᠰᠤᠯᠠ᠃ ᠰᠠᠩᠵᠢ ᠲᠡᠭᠦᠨ ᠢ᠋ ᠬᠡᠷᠡᠭ ᠦᠭᠡᠢ ᠭᠡᠵᠦ ᠬᠣᠷᠢᠭᠯᠠᠬᠤ ᠭᠡᠰᠡᠨ ᠪᠣᠯᠪᠠᠴᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠣᠳᠬᠣᠨ ᠣᠢᠯᠠᠭᠠᠵᠤ᠂
- ᠪᠠᠷᠠᠭᠤᠨ ᠠᠢᠯ ᠤ᠋ᠨ ᠡᠮᠧ ᠭᠡᠷ ᠡᠴᠡ ᠪᠡᠨ ᠪᠠᠷᠤᠭ ᠭᠠᠷᠴᠤ ᠴᠢᠳᠠᠳᠠᠭ ᠦᠭᠡᠢ ᠶᠦ᠍ᠮ᠃ ᠡᠨᠡ ᠬᠠᠪᠢ ᠳ᠋ᠤ᠌ ᠥᠭᠡᠷᠡ ᠬᠡᠨ ᠴᠦ᠍ ᠪᠠᠢᠬᠤ ᠦᠭᠡᠢ᠃ ᠯᠠᠮᠠᠪᠤᠭᠠᠢ ᠶ᠋ᠢ ᠮᠣᠷᠢᠨ ᠳ᠋ᠤ᠌ ᠨᠢ ᠮᠣᠷᠳᠠᠭᠤᠯᠵᠤ ᠥᠭᠬᠦ ᠬᠥᠮᠦᠨ ᠪᠢ ᠯᠡ ᠪᠠᠢᠨᠠ ᠰᠢᠦ ᠳᠡ ᠭᠡᠳ ᠲᠡᠷᠡ ᠬᠣᠶᠠᠭᠤᠯᠠ ᠭᠡᠷ ᠡᠴᠡ ᠭᠠᠷᠤᠯᠠ᠃ ᠰᠠᠩᠵᠢ ᠶ᠋ᠢᠨ ᠮᠣᠷᠢ ᠶ᠋ᠢ ᠠᠯᠢ ᠬᠡᠳᠦᠢᠨᠠᠢ ᠠᠪᠴᠢᠷᠠᠵᠤ ᠡᠮᠡᠭᠡᠯᠯᠡᠭᠡᠳ ᠥᠴᠥᠭᠡᠳᠦᠷ ᠣᠷᠣᠢ ᠪᠠᠢᠭᠰᠠᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠨᠢ ᠪᠡᠯᠡᠳᠬᠡᠴᠢᠬᠡᠵᠡᠢ᠃ ᠰᠠᠩᠵᠢ ᠲᠡᠭᠦᠨ ᠳ᠋ᠦ᠍ ᠭᠠᠢᠬᠠᠨ ᠪᠠᠶᠠᠷᠯᠠᠪᠠ᠃
- ᠶᠠᠳᠠᠭᠤ ᠮᠠᠭᠤ ᠭᠡᠷ ᠢ᠋ᠶ᠋ᠡᠷ ᠮᠢᠨᠢ ᠲᠠ ᠰᠣᠶᠣᠷᠬᠠᠨ ᠣᠷᠣᠵᠤ ᠲᠠᠭᠠᠯᠠᠯ ᠢ᠋ᠶ᠋ᠠᠨ ᠬᠠᠢᠷᠠᠯᠠᠭᠰᠠᠨ ᠳ᠋ᠤ᠌ ᠥᠨᠥᠴᠢᠨ ᠵᠢᠷᠦᠬᠡ ᠮᠢᠨᠢ ᠵᠢᠷᠭᠠᠨ ᠭᠢᠯᠠᠢᠯᠠ! ᠭᠡᠵᠦ ᠣᠳᠬᠣᠨ ᠬᠡᠦᠬᠡᠨ ᠰᠢᠪᠡᠨᠡᠬᠦ ᠲᠡᠳᠦᠢ ᠬᠡᠯᠡᠯᠡ᠃ ᠰᠠᠩᠵᠢ ᠡᠨᠡ ᠦᠭᠡᠨ ᠳ᠋ᠦ᠍ ᠤᠶᠠᠷᠠᠨ ᠪᠠᠷᠢᠴᠠ ᠠᠯᠳᠠᠵᠤ᠂
- ᠬᠤᠪᠢ ᠲᠠᠪᠢᠯᠠᠩ ᠤ᠋ᠨ ᠮᠢᠨᠢ ᠲᠥᠭᠡᠷᠭᠡ ᠡᠢᠮᠦ ᠪᠠᠢᠭᠰᠠᠨ ᠶᠤᠮ ᠪᠠᠢᠯᠭᠦᠢ ᠳᠡ! ᠭᠡᠰᠡᠨ ᠢ᠋ᠶ᠋ᠡᠨ ᠴᠠᠰᠢ ᠨᠢ ᠶᠠᠭᠤ ᠴᠤ᠌ ᠬᠡᠯᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ ᠮᠣᠷᠢᠨ ᠳ᠋ᠤ᠌ ᠪᠠᠨ ᠮᠣᠷᠳᠠᠨ ᠳᠠᠪᠢᠷᠠᠬᠤ ᠠᠶᠠᠳᠠᠭᠰᠠᠨ ᠢ᠋ᠶ᠋ᠠᠨ ᠵᠢᠯᠣᠭᠣ ᠪᠠᠨ ᠲᠠᠲᠠᠵᠤ ᠣᠳᠬᠣᠨ ᠬᠡᠦᠬᠡᠨ ᠤᠷᠤᠭᠤ ᠡᠬᠡ ᠬᠦᠴᠦ ᠭᠠᠷᠭᠠᠨ ᠡᠭᠴᠡᠯᠡᠨ ᠬᠠᠷᠠᠯᠠ᠃ ᠲᠡᠭᠦᠨ ᠦ᠌ ᠲᠥᠭᠥᠷᠢᠭ ᠴᠠᠢᠪᠤᠷ ᠴᠢᠷᠠᠢ᠂ ᠭᠢᠯᠠᠯᠵᠠᠭᠰᠠᠨ ᠪᠣᠷᠣ ᠨᠢᠳᠦ᠂ ᠲᠤᠩ ᠴᠠᠭᠠᠨ ᠰᠢᠲᠦ᠂ ᠨᠢᠮᠭᠡᠪᠲᠦᠷ ᠤᠯᠠᠭᠠᠨ ᠤᠷᠤᠭᠤᠯ᠂ ᠬᠢᠩᠭᠠᠳᠠᠭᠤ ᠰᠢᠯᠤᠭᠤᠨ ᠬᠠᠮᠠᠷ ᠨᠢ ᠶᠢᠷᠲᠢᠨᠴᠦ ᠶ᠋ᠢᠨ ᠡᠪᠦᠭᠡ ᠡᠴᠢᠭᠡ ᠭᠡᠭᠳᠡᠳᠡᠭ ᠮᠠᠬᠠᠰᠣᠸᠠᠷ ᠯᠢᠭ᠌ᠳᠡᠨᠸᠠᠡᠭ᠌ᠴᠢᠭ᠌ᠴᠢᠮᠪᠣᠣ ᠪᠤᠷᠬᠠᠨ ᠤ᠋ ᠳᠥᠷᠪᠡᠨ ᠡᠬᠡᠨᠡᠷ ᠪᠤᠶᠤ ᠶ᠋ᠢᠨ ᠶᠣᠬᠣᠸᠠ ᠶ᠋ᠢᠨ ᠴᠢᠨᠵᠢᠳᠮᠠ ᠬᠥᠯᠦᠭᠴᠢ ᠡᠬᠡ ᠲᠡᠢ ᠠᠪ ᠠᠳᠠᠯᠢᠬᠠᠨ ᠶᠤᠮ ᠰᠢᠭ᠋ ᠰᠠᠨᠠᠭᠳᠠᠯᠠ᠃
- ᠠᠨᠢᠭ ᠭᠣᠮᠪᠣ ᠤᠷᠤᠭᠤ ᠬᠡᠵᠢᠶᠡ ᠶᠠᠪᠤᠬᠤ ᠪᠣᠢ? ᠲᠡᠭᠦᠨ ᠢ᠋ ᠪᠡᠨ ᠨᠠᠳᠠ ᠳ᠋ᠤ᠌ ᠳᠣᠭᠣᠯᠭᠠᠭᠠᠷᠠᠢ! ᠭᠡᠵᠦ ᠰᠠᠩᠵᠢ ᠭᠤᠶᠤᠯᠠ᠃ ᠱᠣᠭᠯᠠᠭᠰᠠᠨ ᠶᠤᠮ ᠰᠢᠭ᠋ ᠪᠣᠯᠪᠠ ᠭᠡᠵᠦ ᠪᠠᠰᠠ ᠲᠡᠪᠡᠳᠡᠪᠡ᠃
- ᠣᠳᠣ ᠪᠢ ᠠᠨᠢᠭ ᠭᠣᠮᠪᠣ ᠤᠷᠤᠭᠤ ᠶᠠᠪᠤᠬᠤ ᠦᠭᠡᠢ᠁ ᠶᠠᠪᠤᠭᠠᠳ ᠴᠤ᠌ ᠶᠠᠭᠠᠬᠢᠬᠤ ᠶᠤᠮ ᠪᠢᠯᠡ᠁ ᠭᠡᠵᠦ ᠤᠳᠬᠤᠨ ᠡᠷᠡᠰ ᠲᠣᠳᠣ ᠬᠡᠯᠡᠯᠡ᠃ ᠡᠨᠡ ᠦᠭᠡᠨ ᠳ᠋ᠦ᠍ ᠰᠠᠩᠵᠢ ᠴᠣᠴᠢᠬᠤ ᠶ᠋ᠢᠨ ᠬᠠᠮᠲᠤ ᠪᠠᠶᠠᠷᠯᠠᠬᠤ ᠰᠢᠭ᠋ ᠪᠣᠯᠤᠯᠠ᠃ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠢᠨᠢᠶᠡᠮᠰᠦᠭᠯᠡᠵᠦ ᠣᠷᠬᠢᠯᠠ᠃ ᠤᠳᠬᠤᠨ ᠪᠠᠰᠠ ᠢᠨᠢᠶᠡᠮᠰᠦᠭᠯᠡᠪᠡ᠃ ᠪᠡᠶᠡ ᠪᠡᠶᠡ ᠪᠡᠨ ᠢᠨᠢᠶᠡᠮᠰᠦᠭᠯᠡᠯ ᠢ᠋ᠶ᠋ᠡᠷ ᠥᠲᠡᠯᠡ᠃ ᠰᠠᠩᠵᠢᠳᠠᠯᠪᠢᠴᠣᠢᠵᠠᠮᠰᠤ ᡀᠠᠷᠠᠮᠪᠠᠲᠠᠨ ᠮᠣᠷᠢ ᠪᠠᠨ ᠳᠠᠪᠢᠷᠠᠨ᠂ ᠵᠢᠯᠠᠭᠠ ᠥᠭᠰᠥᠨ ᠣᠳᠤᠯᠠ᠃《ᠮᠠᠬᠠᠰᠣᠸᠠᠷ ᠤ᠋ᠨ ᠶᠣᠬᠣᠸᠠ ᠴᠢᠨᠵᠢᠳᠮᠠ ᠮᠢᠨᠢ᠂ ᠪᠤᠷᠬᠠᠨ ᠤ᠋ ᠨᠣᠮ ᠤ᠋ᠨ ᠬᠦᠯᠢᠶᠡᠰᠦ ᠶ᠋ᠢ ᠰᠡᠳᠬᠢᠯ ᠡᠴᠡ ᠮᠢᠨᠢ ᠴᠢ ᠲᠠᠢᠯᠵᠤ᠂ ᠠᠬᠤᠢ ᠨᠢᠰᠸᠠᠨᠢᠰ ᠤ᠋ᠨ ᠰᠢᠨᠡ ᠬᠦᠯᠢᠶᠡᠰᠦ ᠪᠡᠷ ᠪᠡᠶᠡ ᠶ᠋ᠢ ᠮᠢᠨᠢ ᠬᠦᠯᠢᠬᠦ ᠶᠦ᠍ᠮ ᠭᠡᠵᠦ ᠤᠤ ᠳᠠ!》 ᠭᠡᠮᠡᠨ ᠪᠣᠳᠣᠵᠤ ᠶᠠᠪᠤᠯᠠ᠃ ᠰᠠᠩᠵᠢ ᠲᠡᠢᠨ ᠬᠦ᠌ ᠥᠭᠡᠷᠡ ᠶᠠᠭᠤᠮᠠ ᠪᠣᠳᠣᠬᠤ ᠴᠢᠳᠠᠪᠤᠷᠢ ᠦᠭᠡᠢ ᠪᠣᠯᠴᠢᠬᠠᠭᠰᠠᠨ ᠮᠡᠲᠦ ᠭᠠᠭᠴᠠᠬᠠᠨ ᠰᠡᠳᠦᠪ ᠢ᠋ᠶ᠋ᠡᠷ ᠡᠯᠳᠡᠪ ᠢ᠋ ᠪᠢᠰᠢᠯᠭᠠᠭᠰᠠᠭᠠᠷ ᠭᠤᠷᠪᠠ ᠬᠣᠨᠣᠭ ᠥᠩᠭᠡᠷᠡᠯᠡ᠃
ᠡᠴᠢᠭᠡ ᠶ᠋ᠢᠨ ᠭᠡᠷ ᠲᠦ᠍ ᠲᠠᠪᠠ ᠳᠣᠬᠢ ᠦᠭᠡᠢ ᠶᠦ᠍ᠮ ᠰᠢᠭ ᠰᠠᠨᠠᠭᠳᠠᠵᠤ ᠰᠡᠳᠬᠢᠯ ᠨᠢ ᠳᠡᠩᠰᠡᠯᠵᠦ᠂ ᠲᠣᠭᠲᠠᠵᠤ ᠰᠠᠭᠤᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠯᠠ᠃ ᠨᠢᠭᠡ ᠶᠡᠬᠡ ᠶᠠᠭᠤᠮᠠ ᠳᠤᠲᠠᠭᠠᠳ ᠪᠠᠢᠬᠤ ᠰᠢᠭ᠋ ᠰᠠᠨᠠᠭᠳᠠᠨᠠ᠃ ᠭᠡᠲᠡᠯᠡ ᠳᠤᠲᠠᠭᠰᠠᠨ ᠶᠠᠭᠤᠮᠠ ᠪᠠᠨ ᠶᠠᠭᠤ ᠪᠣᠯᠬᠤ ᠶ᠋ᠢ ᠦᠯᠦ ᠲᠣᠢᠮᠣᠯᠠᠨᠠ᠃ ᠨᠢᠭᠡ ᠪᠣᠳᠣᠬᠤ ᠳ᠋ᠤ᠌ ᠶᠡᠬᠡ ᠬᠠᠷᠠ ᠨᠢᠭᠦᠯ ᠦ᠋ᠨ ᠡᠵᠡᠨ ᠴᠦ᠍ ᠶᠦ᠍ᠮ ᠰᠢᠭ᠃ ᠨᠥᠭᠦᠭᠡ ᠪᠣᠳᠣᠬᠤ ᠳ᠋ᠤ᠌ ᠰᠦᠵᠢᠭ ᠦ᠋ᠨ ᠬᠦᠯᠢᠶᠡᠭᠰᠡᠨ ᠡᠴᠡ ᠴᠢᠯᠥᠭᠡᠯᠡᠭᠳᠡᠭᠰᠡᠨ ᠮᠡᠲᠦ ᠠᠵᠢ᠃ ᠶᠠᠪᠤᠨ ᠶᠠᠪᠤᠭᠰᠠᠭᠠᠷ ᠰᠦᠵᠢᠭ ᠦ᠋ᠨ ᠬᠦᠯᠢᠶᠡᠭᠰᠡᠨ ᠡᠴᠡ ᠴᠢᠯᠥᠭᠡᠯᠡᠭᠳᠡᠭᠰᠡᠨ ᠭᠡᠬᠦ ᠪᠣᠳᠣᠯ ᠳ᠋ᠤ᠌ ᠪᠠᠨ ᠳᠡᠢᠯᠦᠭᠳᠡᠯᠡ᠃ ᠦᠵᠡᠵᠦ ᠴᠡᠭᠡᠵᠢᠯᠡᠭᠰᠡᠨ ᠨᠣᠮ ᠰᠤᠳᠤᠷ ᠠ᠋ᠴᠠ ᠪᠠᠨ ᠥᠪᠡᠷ ᠢ᠋ ᠪᠡᠨ ᠵᠥᠪᠲᠥᠭᠡᠬᠦ ᠶᠠᠭᠤᠮᠠ ᠶᠠᠭᠤ ᠪᠢᠯᠡ ᠭᠡᠵᠦ ᠤᠳᠠᠲᠠᠯᠠ ᠪᠣᠳᠣᠯᠭᠠᠰᠢᠷᠠᠯᠠ᠃ ᠲᠡᠢᠮᠦ ᠨᠣᠮᠯᠠᠯ ᠢ᠋ ᠪᠠᠷᠤᠭ ᠦᠵᠡᠭᠡ ᠦᠭᠡᠢ ᠪᠢᠯᠡ᠃
《ᠭᠡᠪᠡᠴᠦ ᠪᠠᠢᠵᠠ᠃ ᠬᠠᠮᠢᠭᠠ ᠨᠢᠭᠡᠲᠡᠭᠡ ᠯᠡ ᠪᠣᠢ ᠳᠠ᠃ ᠰᠠᠢᠨ ᠰᠠᠨᠠᠬᠤ ᠦᠭᠡᠢ ᠶᠦ᠍ᠮ ᠤᠤ?》 ᠭᠡᠵᠦ ᠰᠠᠩᠵᠢ ᠪᠣᠳᠣᠭᠰᠠᠭᠠᠷ ᠪᠠᠢᠵᠤ ᠭᠡᠨᠡᠳᠲᠡ ᠣᠯᠤᠯᠠ᠃《ᠠ ᠲᠡᠢᠮᠦ! ᠯᠣᠨᠰᠣᠯ ᠰᠤᠳᠤᠷ ᠲᠤ᠌ ᠪᠣᠢ ᠰᠢᠦ ᠳᠡ》 ᠭᠡᠵᠦ ᠰᠠᠩᠵᠢ ᠭᠡᠨᠡᠳᠲᠡ ᠳᠤᠬᠤ ᠪᠠᠨ ᠠᠯᠠᠭᠠᠳᠠᠨ ᠪᠠᠶᠠᠷᠯᠠᠪᠠ᠃ ᠶᠢᠷᠲᠢᠨᠴᠦ ᠶ᠋ᠢᠨ ᠡᠬᠢᠯᠡᠯ ᠪᠣᠯ ᠣᠫᠠᠶᠠ (ᠡᠷᠡ )ᠫᠷᠠᠵᠤᠨᠠ (ᠡᠮᠡ) ᠬᠣᠶᠠᠷ ᠤ᠋ᠨ ᠨᠡᠢᠯᠡᠪᠦᠷᠢ ᠭᠡᠵᠦ ᠯᠣᠨᠰᠣᠯ ᠰᠤᠳᠤᠷ ᠲᠤ᠌ ᠪᠣᠢ᠃ 《ᠶᠠᠭᠤᠮᠠ ᠪᠦᠬᠦᠨ ᠦ᠌ ᠭᠠᠷᠬᠤ ᠶ᠋ᠢᠨ ᠣᠷᠣᠨ ᠢᠮᠠᠭᠲᠠ ᠤᠮᠠᠢ ᠶ᠋ᠢᠨ ᠨᠢᠭᠤᠴᠠ ᠲᠠᠷᠨᠢ ᠪᠦᠬᠦᠨ ᠦ᠌ ᠣᠷᠣᠨ ᠶᠡᠬᠡ ᠠᠮᠤᠭᠤᠯᠠᠩ ᠤ᠋ᠨ ᠪᠢᠯᠢᠭ ᠪᠢᠯᠢᠭᠦᠨ ᠡᠴᠡ ᠭᠠᠷᠳᠠᠭ ᠪᠣᠢ᠃ ᠡᠭᠦᠨ ᠢ᠋ ᠰᠢᠲᠦᠬᠦ ᠡᠴᠡ ᠥᠭᠡᠷᠡ ᠠᠷᠭᠠ ᠦᠭᠡᠢ》 ᠭᠡᠵᠦ ᠯᠣᠨᠰᠣᠯ ᠨᠣᠮᠯᠠᠳᠠᠭ ᠪᠢᠰᠢ ᠤᠤ? ᠲᠡᠷᠡ ᠨᠣᠮᠯᠠᠯ ᠠ᠋ᠴᠠ ᠭᠠᠵᠢᠭᠠ ᠤᠤ᠂ ᠪᠢ?》 ᠭᠡᠵᠦ ᠰᠠᠩᠵᠢ ᠥᠪᠡᠷ ᠢ᠋ ᠪᠡᠨ ᠵᠥᠪᠲᠦᠭᠡᠨ ᠰᠤᠳᠤᠷ ᠨᠣᠮ ᠠ᠋ᠴᠠ ᠭᠡᠷᠡᠴᠢ ᠲᠠᠲᠠᠵᠤ ᠪᠣᠳᠣᠭᠰᠠᠭᠠᠷ ᠪᠠᠢᠵᠤ ᠡᠳᠦᠷ ᠬᠣᠨᠣᠭ ᠠᠷᠠᠢᠬᠢᠨ ᠪᠠᠷᠠᠯᠠ᠃
ᠪᠤᠴᠠᠬᠤ ᠵᠠᠮ ᠳ᠋ᠤ᠌ ᠪᠠᠨ ᠰᠠᠩᠵᠢ ᠠᠭᠯᠠᠭ ᠠᠭᠤᠯᠠ ᠶ᠋ᠢᠨ ᠰᠢᠯᠢ ᠳ᠋ᠦ᠍ ᠤᠳᠠᠲᠠᠯᠠ ᠰᠠᠭᠤᠵᠤ᠂ ᠥᠩᠭᠡᠷᠡᠭᠦᠯᠦᠭᠰᠡᠨ ᠠᠮᠢᠳᠤᠷᠠᠯ ᠤ᠋ᠨ ᠢ᠋ᠶ᠋ᠠᠨ ᠲᠤᠬᠠᠢ ᠤᠳᠠᠲᠠᠯᠠ ᠴᠡᠩᠨᠡᠨ ᠪᠣᠳᠣᠯᠠ᠃ ᠬᠠᠷᠠᠮᠰᠠᠬᠤ ᠮᠡᠲᠦ ᠪᠣᠯᠵᠤ ᠪᠠᠢᠪᠠ᠃ ᠲᠡᠭᠡᠭᠡᠳ ᠬᠠᠷᠠᠩᠭᠤᠢ ᠪᠣᠯᠬᠤ ᠳ᠋ᠤ᠌ ᠮᠣᠷᠢᠨ ᠳ᠋ᠤ᠌ ᠪᠠᠨ ᠮᠣᠷᠳᠠᠵᠤ ᠵᠠᠮ ᠪᠤᠷᠤᠭᠤᠯᠠᠨ ᠶᠠᠪᠤᠭᠰᠠᠭᠠᠷ ᠣᠳᠬᠣᠨ ᠬᠡᠦᠬᠡᠨ ᠦ᠌ ᠭᠠᠳᠠᠭᠠ ᠢᠷᠡᠵᠦ ᠪᠠᠭᠤᠪᠠ᠃