ᠰᠠᠷᠮᠠᠢ ᡀᠦᠨᠳᠦᠪ – ᠯ ᠂ ᠴᠣᠶ᠋ᠢᠵᠢᠯᠰᠥ᠋ᠷᠦᠩ Сармай лхүндэв – Л ᠂ Чойжилсүрэн
322ᠰᠠᠷᠮᠠᠢ ᡀᠦᠨᠳᠦᠪ
ᠯ · ᠴᠤᠢᠵᠢᠯᠰᠥ᠋ᠷᠦᠩ
( ᠬᠣᠱᠣᠩ ᠥᠭᠦᠯᠡᠯᠭᠡ)
ᠪᠢ ᠪᠠᠭᠠ ᠪᠠᠢᠬᠤ ᠳ᠋ᠠᠭᠠᠨ ᠡᠨᠡ ᠬᠥᠮᠦᠨ ᠡᠴᠡ ᠶᠡᠬᠡ ᠠᠶᠤᠳᠠᠭ ᠪᠠᠢᠵᠤ ᠪᠢᠯᠡ᠃ ᠭᠠᠭᠴᠠ ᠪᠢ ᠴᠦ᠍ ᠪᠢᠰᠢ᠂ ᠶᠡᠷᠦ ᠨᠢ ᠮᠠᠨ ᠤ᠋ ᠬᠣᠲᠠ ᠶ᠋ᠢᠨ ᠵᠢᠭᠠᠯ ᠤ᠋ᠳ ᠡᠨᠡ ᠨᠡᠷᠡ ᠶ᠋ᠢ ᠳᠤᠭᠤᠯᠤᠮᠠᠭᠴᠠ ᠨᠢᠭᠡᠨᠡ ᠡᠮᠢᠶᠡᠬᠦ ᠪᠥᠭᠡᠳ ᠪᠢᠳᠡᠨ ᠢ᠋ ᠵᠦᠭ ᠦᠭᠡᠢᠳᠡᠬᠦ ᠪᠡᠷ《 ᠳᠣᠣᠷᠠᠲᠤ ᠬᠥᠪᠡᠭᠡ ᠪᠡᠷ ᠰᠠᠷᠮᠠᠢ ᠭᠠᠷᠴᠤ ᠢᠷᠡᠵᠦ ᠪᠠᠢᠨᠠ ᠰᠢᠦ》 ᠭᠡᠵᠦ ᠲᠣᠮᠣᠴᠤᠤᠯ ᠰᠠᠨᠠᠭᠤᠯᠬᠤ ᠳ᠋ᠤ᠌ ᠴᠥᠮ ᠰᠢᠷᠭᠢᠳᠡᠭ ᠪᠠᠢᠪᠠ᠃ ᠭᠡᠲᠡᠯᠡ ᠲᠡᠷᠡ ᠪᠡᠷ ᠪᠢᠳᠡᠨ ᠢ᠋ ᠨᠢᠭᠡ ᠶᠡᠬᠡ ᠠᠶᠤᠯᠭᠠᠵᠤ ᠪᠠᠢᠭᠰᠠᠨ ᠤᠳᠠᠭᠠ ᠦᠭᠡᠢ᠃ ᡀᠦᠨᠳᠦᠪ ᠭᠤᠸᠠᠢ ᠳᠥᠴᠢ ᠡᠷᠭᠢᠮᠡ ᠨᠠᠰᠤᠨ ᠤ᠋ ᠠᠪᠬᠠᠯᠵᠢ ᠬᠡᠢ ᠮᠣᠷᠢ ᠲᠠᠢ ᠢᠳᠡᠷᠬᠡᠨ ᠡᠷᠡ ᠭᠡᠪᠡᠴᠦ ᠬᠠᠯᠠᠭᠤᠨ ᠵᠤᠨ ᠴᠤ᠌ ᠭᠡᠰᠡᠨ ᠢᠯᠭᠢᠨ ᠰᠠᠷᠮᠠᠢ ᠳᠡᠪᠡᠯ ᠡᠮᠦᠰᠴᠦ᠂ ᠡᠷᠢᠶᠡᠨ ᠡᠰᠢᠲᠡᠢ ᠲᠣᠮᠣ ᠬᠢᠲᠤᠭᠠ ᠪᠥᠰᠡᠨ ᠳ᠋ᠡᠭᠡᠨ ᠬᠠᠪᠴᠢᠭᠤᠯᠵᠤ ᠲᠠᠷᠪᠠᠭᠠᠨ ᠤ᠋ ᠠᠷᠠᠰᠤᠨ ᠤᠭᠤᠲᠠ ᠪᠠᠷ ᠵᠠᠮᠤᠭ ᠤ᠋ᠨ ᠬᠠᠮᠠᠭᠠᠯᠠᠯᠲᠠ ᠬᠢᠭᠰᠡᠨ ᠴᠠᠬᠢᠭᠤᠷ ᠫᠤᠤ ᠡᠭᠦᠷᠴᠦ ᠶᠠᠪᠤᠬᠤ ᠨᠢ ᠰᠦᠷᠲᠡᠢ ᠬᠠᠷᠠᠭᠳᠠᠨᠠ᠃ ᠪᠢᠳᠡ ᠡᠷᠢᠶᠡᠨ ᠡᠰᠢᠲᠦ ᠬᠢᠲᠤᠭᠠᠨ ᠠ᠋ᠴᠠ ᠨᠢ ᠶᠡᠬᠡᠳᠡ ᠰᠦᠷᠳᠡᠨ ᠠᠶᠤᠬᠤ ᠪᠥᠭᠡᠳ ᠬᠡᠦᠬᠡᠳ ᠦ᠋ᠨ《 ᠪᠥᠭᠡᠷᠡ ᠠᠪᠳᠠᠭ ᠶᠤᠮ》 ᠭᠡᠳᠡᠭ ᠲᠤ ᠢᠲᠡᠭᠡᠳᠡᠭ ᠪᠠᠢᠵᠠᠢ᠃ ᡀᠦᠨᠳᠦᠪ ᠭᠤᠸᠠᠢ ᠶ᠋ᠢᠨ ᠬᠢ ᠲᠠᠷᠪᠠᠭᠠ ᠬᠡᠷᠡᠮᠦᠬᠡᠨ ᠠᠩᠨᠠᠵᠤ ᠣᠯᠵᠠ ᠣᠮᠣᠭᠲᠠᠢ ᠪᠠᠢᠳᠠᠭ᠃ ᠮᠠᠯ ᠭᠡᠬᠦ ᠪᠡᠷ ᠴᠦ᠍ ᠶᠠᠭᠤᠮᠠ ᠦᠭᠡᠢ᠂ ᠰᠠᠭᠠᠯᠢ ᠶ᠋ᠢᠨ ᠬᠣᠶᠠᠷ ᠦᠨᠢᠶᠡ᠂ ᠤᠨᠤᠭᠠᠨ ᠤ᠋ ᠭᠠᠭᠴᠠ ᠮᠣᠷᠢ ᠲᠠᠢ ᠲᠠᠷᠵᠢᠩᠬᠠᠨ ᠠᠢᠯ᠂ ᠨᠡᠭᠦᠬᠦ ᠳ᠋ᠡᠭᠡᠨ ᠮᠠᠨ ᠤ᠋ ᠬᠢ ᠡᠴᠡ ᠯᠡ ᠭᠣᠣᠯᠳᠠᠭᠤ ᠬᠥᠰᠬᠡ ᠭᠤᠶᠤᠨᠠ᠃ ᠬᠠᠳᠠᠮ ᠤ᠋ᠨ ᠬᠢᠨ ᠲᠡᠢ ᠪᠡᠨ ᠬᠠᠮᠲᠤ ᠬᠣᠶᠠᠷᠬᠠᠨ ᠭᠡᠷ ᠢ᠋ᠶ᠋ᠡᠷ ᠪᠠᠢᠨᠠ᠃ ᠭᠡᠬᠦ ᠳ᠋ᠡᠭᠡᠨ ᠵᠣᠵᠢᠭ ᠵᠠᠩᠲᠠᠢ ᠭᠡᠵᠦ ᠨᠤᠲᠤᠭ ᠤ᠋ᠨ ᠬᠢᠨ ᠦᠯᠦ ᠶᠠᠷᠢᠨᠠ᠃ ᠬᠠᠷᠢᠨ ᠠᠵᠢᠯ ᠠᠯᠪᠠᠨ ᠤ᠋ ᠳᠡᠯᠢᠮ ᠢ᠋ᠶ᠋ᠡᠷ ᠬᠠᠪᠢ ᠶ᠋ᠢᠨ ᠬᠡᠳᠦᠨ ᠵᠢᠯᠠᠭᠠ ᠬᠡᠰᠦᠵᠦ ᠶᠠᠪᠤᠬᠤ ᠲᠤᠯᠠ ᠵᠠᠷᠢᠮ ᠨᠢ ᠦᠭᠡᠢᠯᠡᠳᠡᠭ ᠪᠠᠢᠭᠰᠠᠨ ᠪᠢᠵᠡ᠃ ᠮᠣᠷᠢᠨ ᠤ᠋ ᠳᠡᠯ ᠵᠠᠰᠠᠬᠤ ᠳ᠋ᠠᠭᠠᠨ ᠶᠣᠰᠣᠲᠠᠢ ᠠᠳᠤᠭᠤ ᠲᠠᠢ ᠠᠢᠯ ᠤ᠋ᠨ ᠬᠥᠮᠦᠨ ᠰᠢᠭ ᠰᠤᠮᠤᠯᠠᠵᠤ ᠣᠷᠬᠢᠨᠠ ᠳᠠ᠃ ᠶᠡᠷᠦ ᠨᠢ ᠶᠠᠭᠤᠮᠠᠨ ᠳ᠋ᠤ᠌ ᠡᠪᠰᠡᠭᠡᠷᠬᠡᠨ ᠪᠢᠯᠡ᠃ ᠲᠠᠷᠪᠠᠭᠠ ᠳᠠᠯᠠᠯᠬᠤ ᠳ᠋ᠠᠭᠠᠨ ᠭᠥᠷᠦᠭᠡᠰᠦᠨ ᠦ᠌ ᠬᠣᠶᠠᠷ ᠴᠢᠬᠢ ᠲᠣᠯᠣᠭᠠᠢ ᠳ᠋ᠠᠭᠠᠨ ᠤᠶᠠᠵᠤ᠂ ᠲᠣᠮᠣ ᠴᠠᠭᠠᠨ ᠳᠠᠯᠠᠯᠤᠭᠤᠷ ᠤᠷᠲᠤ ᠬᠣᠢᠨᠠ ᠪᠠᠨ ᠪᠠᠷᠢᠨ ᠰᠠᠭᠰᠠᠭᠨᠠᠭᠤᠯᠬᠤ ᠳ᠋ᠤ᠌ ᠲᠡᠷᠡ ᠵᠢᠯᠠᠭᠠ ᠶ᠋ᠢᠨ ᠲᠠᠷᠪᠠᠭᠠ ᠲᠡᠨᠳᠡ ᠡᠨᠳᠡ ᠦᠭᠡᠢ ᠬᠤᠰᠬᠢᠴᠡᠨ ᠲᠤᠰᠢᠨ ᠳᠡᠭᠡᠷᠡ ᠪᠡᠨ ᠣᠴᠣᠢᠭᠠᠳ ᠱᠠᠭᠢᠵᠤ ᠭᠠᠷᠤᠨᠠ᠃ ᡀᠦᠨᠳᠦᠪ ᠭᠤᠸᠠᠢ ᠴᠤ᠌ ᠠᠯᠢ ᠲᠠᠷᠪᠠᠭᠠ ᠶ᠋ᠢ ᠨᠢ ᠫᠤᠤᠳᠠᠬᠤ ᠪᠠᠨ ᠰᠣᠩᠭᠣᠵᠤ ᠶᠠᠳᠠᠭᠰᠠᠨ ᠮᠡᠲᠦ ᠲᠠᠯᠠ ᠲᠠᠯᠠ ᠲᠠᠢᠰᠢ ᠬᠠᠷᠠᠵᠤ᠂ ᠨᠣᠭᠣᠭᠠᠨ ᠳᠣᠲᠣᠷᠠ ᠬᠡᠪᠲᠡᠵᠦ᠂ ᠰᠠᠭᠤᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠨᠢᠭᠡ ᠤᠷᠤᠭᠤ ᠨᠢ ᠳᠥᠭᠥᠵᠦ ᠣᠴᠢᠭᠠᠳ ᠤᠷᠲᠤ ᠬᠥᠯ ᠲᠡᠢ ᠴᠠᠬᠢᠭᠤᠷ ᠫᠤᠤ ᠪᠠᠨ ᠲᠤᠬᠠᠲᠠᠢ ᠭᠡᠭᠴᠢ ᠰᠢᠭᠢᠷᠡᠯᠡᠵᠦ᠂ ᠱᠠᠭᠠᠢᠵᠤ ᠱᠠᠭᠠᠢᠵᠤ ᠫᠢᠩ ᠬᠢᠯᠭᠡᠨᠡ᠃ ᠴᠢᠬᠢᠨ ᠦ᠌ ᠬᠢᠨᠢ ᠳᠠᠷᠢ ᠶ᠋ᠢᠨ ᠤᠲᠤᠭᠠ ᠮᠠᠨᠠᠰᠬᠢᠮᠡᠭᠴᠡ ᠪᠢᠳᠡᠨ ᠦ᠌ ᠪᠠᠬᠠ ᠲᠠᠪᠠ ᠬᠠᠨᠳᠠᠭ ᠰᠠᠨ᠃ ᡀᠦᠨᠳᠦᠪ ᠭᠤᠸᠠᠢ ᠴᠤ᠌ ᠰᠢᠭᠢᠷᠡᠯᠡᠭᠰᠡᠨ ᠫᠤᠤ ᠪᠠᠨ ᠣᠷᠬᠢᠴᠢᠬᠠᠭᠠᠳ ᠫᠤᠤᠳᠠᠭᠰᠠᠨ ᠵᠦᠭ ᠤᠷᠤᠭᠤ ᠪᠠᠨ ᠬᠠᠷᠠ ᠬᠤᠷᠳᠤ ᠪᠠᠷ ᠭᠦᠶᠦᠵᠦ ᠣᠴᠢᠭᠠᠳ ᠨᠦᠬᠡ ᠤᠷᠤᠭᠤ ᠨᠢ ᠤᠳᠠᠲᠠᠯᠠ ᠲᠣᠩᠭᠣᠢᠨ ᠬᠠᠷᠠᠳᠠᠭ ᠰᠠᠨ᠃ ᠪᠠᠷᠤᠭ ᠨᠢᠳᠦ ᠶ᠋ᠢ ᠨᠢ ᠪᠦᠯᠲᠡᠩᠨᠡᠭᠦᠯᠵᠦ ᠪᠠᠢᠭᠠᠳ ᠫᠤᠤᠳᠠᠳᠠᠭ ᠬᠢᠷᠢᠨᠡ ᠠᠪᠴᠤ ᠬᠣᠴᠣᠷᠬᠤ ᠨᠢ ᠬᠣᠪᠣᠷ᠂ ᠥᠪᠡᠷ ᠢ᠋ ᠨᠢ ᠶᠠᠷᠢᠬᠤ ᠶ᠋ᠢ ᠰᠣᠨᠣᠰᠬᠤ ᠳ᠋ᠤ᠌ ᠭᠣᠣᠯᠳᠠᠭᠤ ᠯᠠ ᠨᠦᠬᠡᠨ ᠳ᠋ᠦ᠍ᠨᠢ ᠠᠯᠠᠴᠢᠬᠠᠯᠠ᠂ ᠨᠦᠬᠡᠨ ᠦ᠌ ᠪᠡᠨ ᠳᠤᠮᠳᠠ ᠬᠢᠷᠢ ᠳᠤᠤᠭᠠᠷᠤᠭᠠᠳ ᠪᠠᠢᠨᠠ ᠭᠡᠬᠦ ᠪᠥᠭᠡᠳ ᠡᠳᠦᠷ ᠲᠤ ᠲᠠᠪᠤᠨ ᠲᠠᠷᠪᠠᠭᠠ ᠠᠯᠠᠪᠠᠯ ᠶᠡᠬᠡ ᠣᠯᠵᠠ ᠲᠠᠢ ᠳ᠋ᠤ᠌ ᠲᠣᠭᠠᠴᠠᠨᠠ᠃ ᠮᠠᠨ ᠤ᠋ ᠭᠣᠣᠯ ᠤ᠋ᠨ ᠬᠢᠨ ᠲᠡᠭᠦᠨ ᠢ᠋ ᠰᠠᠢᠨ ᠬᠡᠯᠡᠬᠦ ᠨᠢ ᠬᠣᠪᠣᠷ᠃ ᠨᠡᠷᠡ ᠶ᠋ᠢ ᠨᠢ ᠮᠠᠷᠲᠠᠴᠢᠬᠠᠭᠰᠠᠨ ᠶᠤᠮ ᠰᠢᠭ᠋ ᠯᠡ ᠰᠠᠷᠮᠠᠢ ᠭᠡᠵᠦ ᠳᠠᠭᠤᠳᠠᠬᠤ ᠪᠣᠯᠪᠠᠴᠤ ᠬᠡᠨ ᠬᠥᠮᠦᠨ ᠦᠭᠡᠢ ᠪᠢᠲᠡᠭᠦᠬᠡᠨ ᠳ᠋ᠡᠭᠡᠨ ᠡᠮᠢᠶᠡᠨᠡ᠃ ᡀᠦᠨᠳᠦᠪ ᠭᠤᠸᠠᠢ ᠪᠠᠭ ᠤ᠋ᠨ ᠤᠬᠠᠭᠤᠯᠤᠭᠴᠢ ᠪᠣᠯᠬᠣᠷ ᠲᠡᠢᠨ ᠬᠦ᠌ ᠡᠮᠢᠶᠡᠳᠡᠭ ᠪᠠᠢᠪᠠ ᠤᠤ᠂ ᠡᠰᠡᠪᠡᠯ ᠬᠡᠯᠡ ᠠᠮᠠ ᠬᠤᠷᠴᠠ ᠳ᠋ᠤᠨᠢ ᠲᠦᠪᠡᠭᠰᠢᠶᠡᠳᠡᠭ ᠯᠡ ᠪᠠᠢᠭᠰᠠᠨ ᠶᠤᠮ ᠤᠤ ᠪᠦᠦ ᠮᠡᠳᠡ ᠠ᠋᠂ ᠬᠠᠷᠢᠨ ᠤᠬᠠᠭᠤᠯᠵᠤ ᠶᠠᠷᠢᠬᠤ ᠦᠭᠡᠨ ᠳ᠋ᠦ᠍ᠨᠢ ᠰᠦᠢᠳ ᠲᠡᠢ ᠢᠲᠡᠭᠡᠬᠦ ᠨᠢ ᠶᠠᠭᠤ ᠯᠠ ᠪᠠᠢᠭᠰᠠᠨ ᠶᠤᠮ ᠪᠣᠯ! ᠨᠢᠭᠡ ᠤᠳᠠᠭᠠ ᠠᠶᠠᠨ ᠤ᠋ ᠬᠥᠮᠦᠨ ᠲᠡᠳᠡᠨ ᠦ᠌ ᠬᠢ ᠪᠡᠷ ᠳᠠᠭᠠᠷᠢᠬᠤ ᠳ᠋ᠠᠭᠠᠨ《 ᠲᠠᠨ ᠤ᠋ ᠬᠢ ᠰᠠᠷᠮᠠᠢ ᡀᠦᠨᠳᠦᠪ ᠦ᠋ᠨ ᠬᠢ ᠭᠡᠳᠡᠭ ᠮᠥᠨ ᠤᠤ》 ᠭᠡᠵᠦ ᠠᠰᠠᠭᠤᠬᠤ ᠳ᠋ᠤᠨᠢ《 ᠶᠠᠭᠤ ᠭᠡᠪᠡ ᠲᠠ᠂ ᠠᠢᠯ ᠠᠨᠳᠠᠭᠤᠷᠠᠭᠰᠠᠨ ᠪᠠᠢᠯᠭᠦᠢ᠂ ᠮᠠᠨ ᠤ᠋ ᠬᠢ ᠲᠣᠷᠭᠠᠨ ᡀᠦᠨᠳᠦᠪ ᠦ᠋ᠨ ᠬᠢ ᠭᠡᠳᠡᠭ》 ᠭᠡᠮᠡᠨ ᠮᠠᠳ ᠲᠠᠯᠪᠢᠵᠠᠢ᠃
ᠵᠤᠨ ᠤ᠋ ᠨᠢᠭᠡ ᠠᠵᠢᠷᠭᠠᠨ ᠪᠣᠷᠣᠭᠠ ᠲᠠᠢ ᠰᠥᠨᠢ ᠨᠣᠬᠠᠢ ᠪᠤᠷᠭᠤᠭᠠᠵᠤ᠂ ᠳᠥᠷᠥᠭᠡ ᠬᠠᠷᠰᠢᠬᠤ᠂ ᠬᠥᠮᠦᠨ ᠳᠤᠤᠭᠠᠷᠬᠤ ᠴᠢᠮᠡᠭᠡᠨ ᠢ᠋ᠶ᠋ᠡᠷ ᠪᠢ ᠰᠡᠷᠡᠵᠡᠢ᠃ ᠳᠡᠭᠡᠪᠦᠷ ᠴᠣᠬᠢᠯᠠᠬᠤ ᠪᠣᠷᠣᠭᠠ ᠱᠠᠭᠢᠨ ᠠᠰᠬᠠᠷᠠᠭᠰᠠᠭᠠᠷ ᠪᠠᠢᠪᠠ᠃ ᠭᠠᠳᠠᠭᠠ ᠬᠥᠮᠦᠨ ᠢᠷᠡᠪᠡ ᠪᠣᠯᠤᠯᠲᠠᠢ《 ᠶᠠᠭᠠᠬᠢᠪᠠ ᠠ᠋? ᠲᠡᠯᠢᠢ᠂ ᠶᠠᠭᠤ ᠭᠡᠭᠴᠢ ᠶ᠋ᠢᠨ ᠭᠤᠳᠤᠷᠭᠠ ᠪᠣᠢ 》 ᠭᠡᠵᠦ ᠪᠠᠷᠬᠢᠷᠠᠭᠠᠳ ᠮᠠᠨ ᠤ᠋ ᠬᠠᠯᠲᠠᠷ ᠨᠣᠬᠠᠢ ᠲᠠᠢ ᠲᠡᠮᠡᠴᠡᠯᠳᠦᠨ ᠪᠠᠢᠭᠠ ᠶ᠋ᠢ ᠨᠤᠢᠷᠤᠨ ᠳ᠋ᠠᠭᠠᠨ ᠪᠢ ᠳᠠᠮ ᠳᠤᠮᠬᠠᠨ ᠮᠡᠳᠡᠪᠡ ᠃ ᠤᠳᠠᠯ ᠦᠭᠡᠢ ᠬᠠᠭᠠᠯᠭᠠᠨ ᠤ᠋ ᠣᠨᠢᠰᠣ ᠲᠣᠷ ᠬᠢᠨ ᠬᠥᠮᠦᠨ ᠣᠷᠣᠵᠤ ᠢᠷᠡᠪᠡ ᠃ ᠡᠵᠢ ᠱᠦᠳᠡᠨᠵᠡ ᠵᠤᠷᠠᠨ ᠳ᠋ᠧᠩ ᠪᠠᠷᠢᠪᠠᠯ ᠢᠮᠠᠭᠠᠨ ᠳᠠᠬᠤ ᠡᠮᠦᠰᠦᠭᠰᠡᠨ ᠬᠥᠮᠦᠨ ᠡᠭᠦᠳᠡᠨ ᠳ᠋ᠦ᠍ ᠵᠣᠭᠰᠣᠵᠤ ᠪᠠᠢᠭᠠ ᠶ᠋ᠢ ᠪᠢ ᠬᠤᠴᠢᠯᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠬᠠᠷᠠᠭᠠᠳ ᠰᠠᠷᠮᠠᠢ ᡀᠦᠨᠳᠦᠪ ᠭᠡᠵᠦ ᠲᠠᠨᠢᠯᠠ ᠃
— ᠰᠠᠢᠨ ᠪᠠᠢᠨᠠ ᠤᠤ ? ᠰᠣᠨᠢᠨ ᠶᠠᠭᠤᠲᠠᠢ ᠪᠣᠢ ᠳᠠ ᠭᠡᠵᠦ ᠠᠪᠤ ᠣᠷᠣᠨ ᠠ᠋ᠴᠠ ᠪᠠᠨ ᠥᠨᠳᠡᠢᠨ ᠮᠡᠨᠳᠦᠯᠡᠵᠦ ᠪᠠᠢᠨᠠ ᠃ ᡀᠦᠨᠳᠦᠪ ᠭᠤᠸᠠᠢ ᠮᠣᠳᠣᠨ ᠥᠮᠥᠳᠥ ᠡᠮᠦᠰᠦᠭᠰᠡᠨ ᠶᠦᠮ ᠰᠢᠭ ᠡᠭᠦᠳᠡᠨ ᠳ᠋ᠦ᠍ ᠵᠣᠭᠰᠣᠭᠰᠠᠭᠠᠷ ᠮᠡᠨᠳᠦ ᠶ᠋ᠢᠨ ᠬᠠᠷᠢᠭᠤ ᠴᠤ᠌ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ ᠶᠡᠬᠡ ᠠᠭᠤᠷᠲᠠᠢ ᠬᠠᠷᠠᠭᠳᠠᠬᠤ ᠳ᠋ᠤᠨᠢ ᠭᠠᠢᠬᠠᠯᠠ᠃ ᠪᠢ ᠲᠡᠭᠦᠨ ᠢ᠋ ᠪᠦᠷᠬᠦᠭᠰᠡᠨ ᠲᠡᠭᠷᠢ ᠰᠢᠭ ᠡᠢᠮᠦ ᠲᠦᠩᠰᠡᠬᠡᠷ ᠪᠠᠢᠬᠤ ᠶ᠋ᠢ ᠦᠵᠡᠭᠡ ᠦᠭᠡᠢ ᠪᠢᠯᠡ ᠂ ᠲᠡᠭᠡᠭᠡᠳ ᠳᠣᠣᠷᠠ ᠫᠠᠯ ᠬᠢᠬᠦ ᠰᠢᠭ ᠪᠣᠯᠵᠤ ᠨᠥᠭᠦᠭᠡ ᠡᠷᠢᠶᠡᠨ ᠡᠰᠢᠲᠡᠢ ᠲᠣᠮᠣ ᠬᠢᠲᠤᠭᠠ ᠨᠢ ᠪᠥᠰᠡᠨ ᠳ᠋ᠡᠭᠡᠨ ᠶᠠᠪᠤᠭᠠ ᠪᠣᠯᠪᠠ ᠤᠤ ᠭᠡᠬᠦ ᠡᠴᠡ ᠠᠢᠳᠠᠰ ᠬᠦᠷᠦᠯᠡ ᠃ ᠠᠪᠤ ᠶ᠋ᠢ ᠠᠷᠠᠢ ᠵᠣᠳᠣᠬᠤ ᠬᠡ ᠦᠭᠡᠢ ᠪᠠᠢᠭᠠ ᠳᠠ ᠭᠡᠵᠦ ᠪᠣᠳᠣᠬᠤ ᠠ᠋ᠴᠠ ᠵᠢᠷᠦᠬᠡ ᠲᠦᠭ ᠲᠦᠭ ᠴᠣᠬᠢᠯᠠᠵᠤ ᠠᠪᠤ ᠶ᠋ᠢᠨ ᠲᠣᠮᠣ ᠲᠠᠰᠢᠭᠤᠷ ᠠᠴᠠᠨ ᠳ᠋ᠤ᠌ ᠡᠯᠭᠦᠭᠡᠰᠦᠲᠡᠢ ᠪᠣᠢ ᠰᠢᠦ ᠳᠡ ᠭᠡᠵᠦ ᠭᠡᠨᠡᠳᠲᠡ ᠰᠠᠨᠠᠪᠠ ᠃ ᠭᠡᠲᠡᠯᠡ ᡀᠦᠨᠳᠦᠪ ᠭᠤᠸᠠᠢ ᠨᠢᠭᠡ ᠯᠡ ᠪᠣᠳᠣᠯᠭᠠᠰᠢᠷᠠᠭᠰᠠᠨ ᠪᠠᠢᠳᠠᠯ ᠲᠠᠢ ᠭᠡᠷ ᠦ᠋ᠨ ᠪᠠᠷᠠᠭᠤᠨ ᠲᠠᠯᠠ ᠥᠭᠡᠳᠡ ᠥᠭᠰᠥᠨ ᠳᠠᠬᠤ ᠪᠠᠨ ᠴᠤ᠌ ᠲᠠᠢᠯᠤᠭᠰᠠᠨ ᠦᠭᠡᠢ ᠨᠠᠮᠠ ᠶ᠋ᠢ ᠬᠠᠯᠠᠭᠯᠠᠨ ᠰᠠᠭᠤᠪᠠᠰᠤ ᠤᠰᠤ ᠳᠤᠰᠤᠯᠠᠭᠰᠠᠨ ᠬᠣᠷᠮᠣᠢ ᠨᠣᠢᠲᠠ ᠣᠷᠭᠢᠭᠤᠯᠬᠤ ᠳ᠋ᠤ᠌ ᠪᠢ ᠬᠥᠯ ᠢ᠋ᠶ᠋ᠡᠨ ᠲᠠᠲᠠᠪᠠ ᠃
ᡀᠦᠨᠳᠦᠪ ᠭᠤᠸᠠᠢ ᠭᠡᠨᠡᠳᠲᠡ ᠪᠠᠴᠢᠮ ᠲᠠᠰᠤᠯᠳᠠᠩᠭᠤᠢ ᠳᠠᠭᠤ ᠪᠠᠷ ᠄
— ᠲᠡᠢᠨ ᠡᠬᠢᠯᠡᠵᠡᠢ ! ᠭᠡᠳ ᠳᠠᠷᠠᠭᠠᠬᠢ ᠦᠭᠡ ᠪᠡᠨ ᠵᠠᠯᠭᠢᠪᠠ᠃ ᠠᠪᠤ ᠴᠣᠴᠢᠬᠤ ᠰᠢᠭ᠋ ᠪᠣᠯᠵᠤ᠄
— ᠲᠡᠢᠨ ᠭᠡᠨᠡ ᠂ ᠳᠠᠬᠢᠭᠠᠳ ᠡᠬᠢᠯᠡᠴᠢᠬᠡ ᠤᠤ ? ᠭᠡᠵᠦ ᠭᠠᠢᠬᠠᠭᠰᠠᠨ ᠪᠠᠢᠳᠠᠯ ᠲᠠᠢ ᠠᠰᠠᠭᠤᠪᠠ ᠃
ᡀᠦᠨᠳᠦᠪ ᠄
— ᠬᠠᠯᠭᠠ ᠭᠣᠣᠯ ᠳ᠋ᠤ᠌ ᠶᠠᠪᠬᠠᠨ ( ᠶᠠᠫᠣᠨ 〉 ᠳᠠᠷᠤᠭᠳᠠᠭᠰᠠᠨ ᠃ ᠲᠡᠷᠡ ᠪᠢᠰᠢ ᠠ᠋ ！CCCP ① ᠤᠷᠤᠭᠤ ᠭᠧᠷᠮᠠᠨ ᠹᠠᠰᠢᠰᠮ ᠳᠣᠪᠲᠣᠯᠤᠭᠰᠠᠨ ᠪᠠᠢᠨᠠ᠃ ᠡᠨᠡ ᠪᠣᠯ ᠮᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠨᠢᠭᠡᠨ ᠠᠳᠠᠯᠢ ᠤᠴᠠᠷᠠᠵᠤ ᠪᠠᠢᠭᠠ ᠠᠶᠤᠯ ᠃ ᠮᠠᠷᠭᠠᠰᠢ ᠰᠠᠯᠪᠤᠷᠢᠲᠤ ᠶ᠋ᠢᠨ ᠠᠮᠠᠨ ᠤ᠋ ᠰᠢᠷᠠᠪ ᠤ᠋ᠨ ᠬᠣᠲᠠ ᠳ᠋ᠤ᠌ ᠬᠤᠷᠠᠯ ᠲᠠᠢ ᠂ ᠬᠣᠲᠠ ᠶ᠋ᠢᠨ ᠬᠢᠨ ᠳ᠋ᠡᠭᠡᠨ ᠵᠠᠷᠯᠠᠭᠠᠷᠠᠢ ᠂ ᠡᠷᠦᠬᠡ ᠪᠦᠷᠢ ᠡᠴᠡ ᠬᠥᠮᠦᠨ ᠳᠤᠲᠠᠬᠤ ᠦᠭᠡᠢ ᠶᠦᠮ ᠰᠢᠦ ᠭᠡᠪᠡ ᠃
— ᠵᠠ ᠮᠣᠷᠢ ᠪᠠᠨ ᠪᠠᠷᠢᠵᠤ ᠠᠪᠤᠭᠰᠠᠨ ᠨᠢ ᠤᠨᠤᠯᠠ ᠰᠢᠦ ( ᠠᠪᠤ ᠡᠢᠨ ᠥᠪᠡᠷ ᠲᠡᠭᠡᠨ ᠬᠡᠯᠡᠪᠡ )
ᠭᠠᠳᠠᠭᠠ ᠪᠣᠷᠣᠭᠠ ᠱᠠᠭᠢᠭᠰᠠᠭᠠᠷ ᠪᠠᠢᠨᠠ ᠂ ᡀᠦᠨᠳᠦᠪ ᠭᠤᠸᠠᠢ ᠶᠠᠪᠤᠬᠤ ᠪᠠᠷ ᠵᠠᠪᠳᠤᠨ ᠪᠣᠰᠤᠯᠠ ᠃
— ᠲᠠ ᠶᠠᠭᠠᠬᠢᠬᠤ ᠨᠢ ᠤᠤ ᠭᠡᠵᠦ ᠠᠪᠤ ᠠᠰᠠᠭᠤᠪᠠ ᠃
— ᠪᠢ ᠥᠨᠥ ᠰᠥᠨᠢ ᠠᠰᠠᠭᠲᠤ ᠶ᠋ᠢᠨ ᠭᠣᠣᠯ ᠣᠷᠣᠯ ᠦᠭᠡᠢ ᠪᠣᠯᠬᠤ ᠦᠭᠡᠢ᠂ ᠲᠡᠢᠨ ᠪᠣᠯᠤᠭᠰᠠᠨ ᠢ᠋ ᠬᠥᠮᠦᠨ ᠪᠦᠬᠦᠨ ᠳ᠋ᠦ᠍ ᠳᠣᠭᠣᠯᠭᠠᠬᠤ᠂ ᠪᠠᠰᠠ ᠪᠠᠭ ᠤ᠋ᠨ ᠬᠤᠷᠠᠯ ᠵᠠᠷᠯᠠᠬᠤ ᠶᠣᠰᠣᠲᠠᠢ ᠃ ᠶᠡᠬᠡ ᠠᠵᠢᠯ ᠤ᠋ᠨ ᠬᠠᠵᠠᠭᠤ ᠳ᠋ᠤ᠌ ᠡᠨᠡ ᠪᠣᠷᠣᠭᠠ ᠶᠠᠭᠤ ᠴᠤ᠌ ᠪᠣᠢ ᠳᠠ ! ᠭᠡᠵᠦ ᠬᠡᠯᠡᠭᠡᠳ ᠢᠰᠡᠭᠡᠢ ᠡᠭᠦᠳᠡ ᠰᠡᠪᠬᠢᠲᠡᠯᠡ ᠰᠡᠬᠦᠨ ᠭᠠᠷᠴᠤ ᠭᠥᠯᠢᠮ ᠢ᠋ᠶ᠋ᠡᠨ ᠳᠠᠪᠢᠷᠠᠨ ᠫᠢᠵᠢᠭᠢᠨᠡᠭᠦᠯᠪᠡ ᠃
ᠰᠥᠨᠢ ᠶ᠋ᠢᠨ ᠵᠣᠴᠢᠨ ᠢ᠋ ᠶᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠳ᠋ᠧᠩ ᠤᠨᠲᠠᠷᠠᠭᠠᠳ ᠤᠳᠠᠭᠰᠠᠨ ᠂ ᠭᠡᠪᠡᠴᠦ ᠠᠪᠤ ᠶ᠋ᠢᠨ ᠨᠣᠢᠷ ᠬᠦᠷᠬᠦ ᠦᠭᠡᠢ ᠪᠠᠢᠭᠠ ᠪᠣᠯᠤᠯᠲᠠᠢ ᠣᠷᠣᠨ ᠳ᠋ᠠᠭᠠᠨ ᠡᠷᠭᠢᠵᠦ ᠬᠥᠷᠪᠡᠨᠡ ᠃ ᠶᠠᠭᠤ ᠡᠰᠡ ᠪᠣᠳᠣᠭᠠ ᠠᠵᠢ ᠳᠠ ᠃ ᠲᠡᠢᠨ ᠡᠬᠢᠯᠡᠴᠢᠬᠡᠭᠰᠡᠨ ᠪᠣᠯ ᠡᠦᠲᠦ ᠶᠠᠭᠠᠬᠢᠨᠠ ? ᠭᠡᠰᠡᠨ ᠪᠣᠳᠣᠯ ᠨᠠᠳᠠ ᠠ᠋ᠴᠠ ᠣᠭᠲᠣ ᠰᠠᠯᠬᠤ ᠦᠭᠡᠢ ᠂ ᠬᠠᠵᠠᠭᠤ ᠠ᠋ᠴᠠ ᠦᠯᠢᠭᠡᠷ ᠲᠦ᠍ ᠭᠠᠷᠳᠠᠭ ᠬᠠᠷᠠ ᠮᠠᠩᠭᠤᠰ ᠪᠠᠷᠢᠭᠠᠳ ᠠᠪᠬᠤ ᠭᠡᠵᠦ ᠪᠠᠢᠭᠠ ᠶᠤᠮ ᠰᠢᠭ᠋ ᠪᠡᠶᠡ ᠬᠠᠴᠢᠨ ᠡᠪ ᠦᠭᠡᠢ ᠠᠭᠵᠢᠰᠬᠢᠨᠡ ᠃ ᡀᠦᠨᠳᠦᠪ ᠭᠤᠸᠠᠢ ᠶ᠋ᠢ ᠰᠠᠭᠤᠵᠤ ᠪᠠᠢᠬᠤ ᠳ᠋ᠤ᠌ ᠪᠣᠯ ᠲᠡᠢᠨ ᠬᠠᠷᠠ ᠳᠠᠷᠤᠬᠤ ᠦᠭᠡᠢ ᠪᠠᠢᠵᠠᠢ ᠃ ᠪᠥᠰᠡᠨ ᠳ᠋ᠦ᠍ᠨᠢ ᠶᠠᠪᠤᠭᠠ ᠲᠣᠮᠣ ᠬᠢᠲᠤᠭᠠᠨ ᠠ᠋ᠴᠠ ᠪᠢᠳᠡ ᠲᠡᠳᠦᠢ ᠦᠭᠡᠢ ᠳᠠᠢᠰᠤᠨ ᠴᠤ᠌ ᠪᠠᠰᠠ ᠠᠶᠤᠨᠠ ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠨᠥᠮᠥᠷᠢ ᠲᠡᠢ ᠰᠠᠨᠠᠭᠳᠠᠭᠰᠠᠨ ᠶᠤᠮ ᠤᠤ ᠪᠤᠤ ᠮᠡᠳᠡ ᠳᠠ ᠃ ᠠᠪᠤ ᠠᠩ ᠡᠰᠡ ᠠᠩᠨᠠᠬᠤ ᠲᠤᠯᠠ ᠮᠠᠨ ᠤ᠋ ᠳ᠋ᠤ᠌ ᠶᠠᠮᠠᠷ ᠫᠤᠤ ᠪᠠᠢᠬᠤ ᠪᠢᠰᠢ ᠂ ᠬᠡᠷᠪᠡ ᠪᠠᠢᠭᠰᠠᠨ ᠪᠣᠯ ᠪᠠᠰᠠ ᠯᠠ ᠨᠥᠮᠥᠷᠢ ᠲᠡᠢ ᠰᠠᠨᠠᠭᠳᠠᠬᠤ ᠪᠠᠢᠭᠰᠠᠨ ᠪᠣᠯᠪᠠ ᠤᠤ ?
ᠫᠤᠤ ᠵᠡᠪᠰᠡᠭ ᠭᠡᠳᠡᠭ ᠴᠢᠨᠢ ᠠᠩ ᠠᠩᠨᠠᠬᠤ ᠂ ᠬᠣᠲᠠᠨ ᠳ᠋ᠤ᠌ ᠳᠤᠤᠭᠠᠷᠭᠠᠬᠤ ᠳ᠋ᠤ᠌ ᠲᠡᠳᠦᠢ ᠦᠭᠡᠢ ᠳᠠᠢᠰᠤᠨ ᠢ ᠠᠶᠤᠯᠭᠠᠬᠤ ᠂ ᠮᠠᠩᠭᠤᠰ ᠢ᠋ ᠳᠠᠷᠤᠬᠤ ᠳ᠋ᠤ᠌ ᠬᠡᠷᠡᠭᠲᠡᠢ ᠶᠠᠭᠤᠮᠠ ᠭᠡᠵᠦ ᠲᠡᠷᠡ ᠰᠥᠨᠢ ᠪᠢ ᠪᠣᠳᠣᠨ ᠪᠣᠳᠣᠭᠰᠠᠭᠠᠷ ᠣᠯᠠᠨ ᠲᠣᠯᠣᠭᠠᠢ ᠲᠠᠢ ᠮᠠᠩᠭᠤᠰ ᠰᠠᠯᠬᠢ ᠰᠢᠭᠤᠷᠭᠠ ᠢᠰᠬᠡᠷᠦᠭᠦᠯᠦᠨ ᠢᠷᠡᠬᠦ ᠳ᠋ᠦ᠍ ᠲᠡᠭᠦᠨ ᠲᠡᠢ ᠪᠢ ᠪᠠᠷᠢᠯᠴᠠᠨ ᠠᠪᠴᠤ ᠳᠡᠭᠡᠷᠡ ᠳᠣᠣᠷᠠ ᠪᠠᠨ ᠣᠷᠣᠵᠤ ᠪᠠᠢᠨᠠ ᠭᠡᠵᠦ ᠬᠠᠷᠠ ᠳᠠᠷᠤᠨ ᠵᠡᠭᠦᠳᠦᠯᠡᠭᠡᠳ ᠰᠡᠷᠡᠬᠦ ᠳ᠋ᠦ᠍ ᠪᠦᠬᠦ ᠪᠡᠶᠡ ᠬᠥᠯᠥᠷᠡᠴᠢᠬᠡᠭᠰᠡᠨ ᠪᠠᠢᠵᠤ ᠪᠢᠯᠡ ᠃ ᠡᠨᠡ ᠪᠣᠯ ᠲᠡᠢᠨ ᠭᠡᠳᠡᠭ ᠦᠭᠡᠨ ᠡᠴᠡ ᠡᠭᠦᠰᠦᠨ ᠲᠥᠷᠥᠭᠰᠡᠨ ᠠᠩᠬᠠᠨ ᠤ᠋ ᠠᠶᠤᠮᠰᠢᠭ ᠲᠦᠭᠰᠢᠭᠦᠷᠢ ᠪᠠᠢᠭᠰᠠᠨ ᠠᠵᠢ ᠃
ᠲᠡᠷᠡ ᠡᠳᠦᠷ ᠡᠴᠡ ᠬᠣᠢᠰᠢ ᠰᠠᠷᠮᠠᠢ ᡀᠦᠨᠳᠦᠪ ᠮᠠᠨ ᠤ᠋ ᠬᠣᠲᠠ ᠳ᠋ᠤ᠌ ᠬᠡᠳᠦ ᠬᠣᠨᠣᠭᠠᠳ ᠯᠠ ᠦᠵᠡᠭᠳᠡᠬᠦ ᠪᠣᠯᠤᠯᠠ᠃ ᠲᠡᠮᠦᠷ ᠢ᠋ᠶ᠋ᠡᠷ ᠬᠢᠮᠤᠰᠤ ᠬᠢᠭᠰᠡᠨ ᠤᠷᠲᠤ ᠭᠦᠨ ᠲᠡᠢ ᠴᠠᠬᠢᠭᠤᠷ ᠫᠤᠤ ᠪᠠᠨ ᠲᠠᠩᠳᠠ ᠡᠭᠦᠷᠴᠦ ᠶᠠᠪᠤᠳᠠᠭ ᠪᠣᠯᠤᠭᠰᠠᠨ ᠳ᠋ᠤᠨᠢ 《 ᠮᠢᠬᠠᠴᠢᠨ ᠤ᠋ ᠵᠢᠯ 》 ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠵᠤ ᠨᠢᠭᠡ ᠯᠡ ᠡᠪ ᠦᠭᠡᠢ ᠪᠣᠳᠣᠯ ᠲᠥᠷᠥᠳᠡᠭ ᠰᠠᠨ᠃ ᠶᠠᠭᠤ ᠭᠡᠪᠡᠯ ᠲᠡᠷᠡ ᠨᠢᠭᠡᠨ ᠵᠢᠯ ᠪᠢ ᠵᠢᠷᠭᠤᠭᠠᠨ ᠨᠠᠰᠤᠲᠠᠢ ᠪᠠᠢᠯᠠ ᠤᠤ ᠳᠠ᠃ ᠮᠢᠬᠠᠴᠢᠨ ᠭᠠᠷᠴᠠᠢ ! ᠭᠡᠳᠡᠭ ᠶᠠᠷᠢᠶᠠ ᠮᠠᠨ ᠤ᠋ ᠨᠤᠲᠤᠭ ᠢ᠋ᠶ᠋ᠠᠷ ᠶᠠᠭ ᠯᠠ ᠡᠨᠡ ᠲᠡᠢᠨ ᠦ᠌ ᠴᠢᠮᠡᠭᠡ ᠰᠢᠭ ᠬᠣᠷᠣᠮᠬᠠᠨ ᠲᠠᠷᠬᠠᠵᠤ ᠪᠢᠯᠡ᠃ ᠭᠡᠪᠡᠴᠦ ᠲᠡᠷᠡ ᠮᠢᠬᠠᠴᠢᠨ ᠢ᠋ ᠦᠵᠡᠭᠰᠡᠨ ᠬᠥᠮᠦᠨ ᠪᠠᠢᠭᠰᠠᠨ ᠦᠭᠡᠢ ᠬᠠᠷᠢᠨ ᠡᠯᠡᠰᠦᠨ ᠳᠡᠭᠡᠷᠡ ᠶᠠᠪᠤᠭᠰᠠᠨ ᠠᠰᠤᠷᠤ ᠲᠣᠮᠣ ᠲᠠᠪᠠᠬᠠᠢ ᠶ᠋ᠢᠨ ᠮᠥᠷ ᠯᠡ ᠪᠠᠢᠨᠠ ᠭᠡᠵᠦ ᠱᠤᠤᠭᠢᠭᠰᠠᠨ ᠪᠠᠢᠵᠠᠢ᠃ ᠲᠡᠷᠡ ᠡᠪᠦᠯ ᠬᠠᠪᠤᠷ ᠲᠠᠭᠠᠨ ᠡᠨᠡ ᠶᠠᠷᠢᠶᠠ ᠲᠠᠰᠤᠷᠠᠭᠰᠠᠨ ᠦᠭᠡᠢ ᠵᠠᠷᠢᠮ ᠭᠠᠭᠴᠠ ᠪᠡᠶᠡ ᠬᠥᠭᠰᠢᠴᠦᠦᠯ ᠭᠡᠷ ᠲᠡᠭᠡᠨ ᠤᠨᠲᠠᠬᠤ ᠠ᠋ᠴᠠ ᠠᠶᠤᠭᠠᠳ ᠠᠢᠯ ᠳ᠋ᠤ᠌ ᠣᠴᠢᠳᠠᠭ ᠪᠠᠢᠪᠠ᠃ ᠮᠠᠨ ᠤ᠋ ᠠᠪᠤ ᠬᠣᠲᠠᠨ ᠳ᠋ᠤ᠌ ᠳᠤᠤᠭᠠᠷᠭᠠᠳᠠᠭ ᠴᠠᠬᠢᠭᠤᠷ ᠫᠤᠤ ᠪᠠᠨ ᠣᠷᠣᠨ ᠤ᠋ ᠪᠠᠨ ᠠᠷᠤ ᠳ᠋ᠤ᠌ ᠡᠯᠭᠦᠵᠦ᠂ ᠡᠵᠢ ᠬᠠᠭᠠᠯᠭᠠᠨ ᠳ᠋ᠠᠭᠠᠨ ᠬᠢᠷᠥᠭᠡ ᠪᠠᠷᠢᠵᠤ᠂ ᠨᠣᠬᠠᠢ ᠪᠠᠨ ᠲᠡᠮᠦᠷ ᠤᠶᠠᠭᠠ ᠪᠠᠷ ᠳᠠᠷᠤᠭᠤᠯᠵᠤ ᠬᠦᠯᠢᠭᠡᠳ ᠤᠨᠲᠠᠳᠠᠭ ᠰᠠᠨ᠃ ᠲᠡᠭᠡᠬᠦ ᠳ᠋ᠦ᠍ᠨᠢ ᠪᠢ ᠮᠢᠬᠠᠴᠢᠨ ᠬᠠᠭᠠᠯᠭᠠ ᠪᠠᠷ ᠣᠷᠣᠵᠤ ᠢᠷᠡᠵᠦ ᠴᠢᠳᠠᠳᠠᠭ ᠦᠭᠡᠢ ᠶᠦᠮ ᠠ᠋ ᠭᠡᠬᠦ ᠳ᠋ᠦ᠍ ᠠᠪᠤ ᠶ᠋ᠢᠨ ᠣᠷᠣᠨ ᠲᠠᠯᠠ ᠠ᠋ᠴᠠ ᠭᠠᠳᠠᠨᠠ ᠠ᠋ᠴᠠ ᠨᠢ ᠲᠣᠮᠣ ᠬᠢᠲᠤᠭᠠ ᠪᠠᠷ ᠬᠠᠳᠬᠤᠴᠢᠬᠠᠬᠤ ᠪᠣᠢ ᠭᠡᠵᠦ ᠶᠡᠬᠡᠳᠡ ᠲᠦᠭᠰᠢᠨᠡ᠃ ᠮᠠᠨ ᠤ᠋ ᠬᠢ ᠵᠠᠭᠤᠳᠠᠭ ᠬᠠᠷᠠ ᠨᠣᠬᠠᠢ ᠪᠠᠨ ᠰᠥᠨᠢ ᠤᠶᠠᠭᠠᠨ ᠠ᠋ᠴᠠ ᠨᠢ ᠲᠠᠯᠪᠢᠬᠤ ᠲᠤᠯᠠ ᠮᠢᠬᠠᠴᠢᠨ ᠳ᠋ᠤ᠌ ᠠᠮᠠᠷ ᠳᠡᠢᠯᠦᠭᠳᠡᠬᠦ ᠦᠭᠡᠢ ᠭᠡᠴᠦ ᠪᠣᠳᠣᠬᠤ ᠳ᠋ᠤ᠌ ᠳᠣᠲᠣᠷᠠ ᠠᠭᠤᠵᠢᠷᠠᠬᠤ ᠰᠢᠭ᠋ ᠪᠣᠯᠳᠠᠭ ᠰᠠᠨ᠃ ᠲᠡᠷᠡ ᠡᠪᠦᠯ ᠬᠠᠪᠤᠷ ᠨᠠᠮᠠ ᠶ᠋ᠢ ᠬᠣᠨᠢᠨ ᠳ᠋ᠤ᠌ ᠶᠠᠪᠤᠭᠤᠯᠳᠠᠭ ᠦᠭᠡᠢ ᠪᠠᠢᠯᠠ᠃ ᠠᠪᠤ ᠮᠢᠨᠢ ᠫᠤᠤ ᠡᠭᠦᠷᠦᠭᠡᠳ ᠬᠣᠨᠢᠨ ᠤ᠋ ᠪᠠᠨ ᠡᠭᠡᠯᠵᠢᠨ ᠳ᠋ᠦ᠍ ᠦᠷᠭᠦᠯᠵᠢ ᠶᠠᠪᠤᠳᠠᠭ ᠰᠠᠨ᠃
ᠡᠨᠡ ᠶᠠᠷᠢᠶᠠ ᠶᠠᠭᠠᠬᠢᠭᠠᠳ ᠭᠠᠷᠤᠭᠰᠠᠨ ᠢ᠋ ᠪᠤᠤ ᠮᠡᠳᠡ᠂ ᠮᠢᠬᠠᠴᠢᠨ ᠦᠵᠡᠭᠰᠡᠨ ᠬᠥᠮᠦᠨ ᠪᠠᠢᠭᠰᠠᠨ ᠦᠭᠡᠢ ᠂ ᠮᠢᠬᠠᠴᠢᠨ ᠳ᠋ᠤ᠌ ᠢᠳᠡᠭᠦᠯᠦᠭᠰᠡᠨ ᠬᠥᠮᠦᠨ ᠴᠦ᠍ ᠳᠤᠭᠤᠯᠳᠠᠭᠰᠠᠨ ᠦᠭᠡᠢ ᠃ ᠭᠡᠪᠡᠴᠦ ᠮᠢᠬᠠᠴᠢᠨ ᠤ᠋ ᠵᠢᠯ ᠭᠡᠳᠡᠭ ᠶᠠᠷᠢᠶᠠ ᠡᠦᠲᠦ ᠬᠦᠷᠲᠡᠯᠡ ᠦᠯᠡᠳᠡᠭᠰᠡᠨ ᠪᠠᠢᠵᠠᠢ ᠃
ᠬᠠᠷᠢᠨ ᠡᠨᠡ ᠲᠡᠢᠨ ᠦ᠌ ᠴᠢᠮᠡᠭᠡ ᠮᠢᠬᠠᠴᠢᠨ ᠠ᠋ᠴᠠ ᠣᠨᠳᠣᠣ ᠪᠠᠢᠯᠠ ᠃ ᠰᠠᠷᠮᠠᠢ ᡀᠦᠨᠳᠦᠪ ᠡᠴᠡ ᠪᠢᠳᠡ ᠠᠶᠤᠬᠤ ᠶ᠋ᠢ ᠪᠣᠯᠢᠵᠤ ᠂ ᠤᠯᠤᠰ ᠤ᠋ᠳ ᠤ᠋ᠨ ᠠᠷᠤ ᠳ᠋ᠤ᠌ ᠣᠴᠢᠭᠠᠳ ᠶᠠᠷᠢᠶᠠ ᠶ᠋ᠢ ᠨᠢ ᠤᠳᠠᠲᠠᠯᠠ ᠴᠢᠩᠨᠠᠳᠠᠭ ᠪᠣᠯᠪᠠ ᠃
ᠰᠠᠷᠮᠠᠢ ᡀᠦᠨᠳᠦᠪ ᠲᠠᠩᠺ ᠂ ᠶᠡᠬᠡ ᠫᠤᠤ ᠂ ᠪᠥᠮᠪᠥᠭᠡ ᠂ ᠤᠯᠠᠢᠷᠠᠭᠰᠠᠨ ᠶᠠᠷᠭᠠᠴᠢᠳ ᠭᠡᠬᠦᠴᠢᠯᠡᠨ ᠶᠠᠷᠢᠬᠤ ᠳ᠋ᠠᠭᠠᠨ ᠳᠠᠭᠤ ᠪᠠᠨ ᠥᠨᠳᠥᠷ ᠨᠠᠮ ᠪᠣᠯᠭᠠᠨ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠨ ᠬᠥᠳᠡᠯᠭᠡᠳᠡᠭ ᠰᠠᠨ ᠃ ᠨᠢᠭᠡ ᠡᠳᠦᠷ ᠢᠷᠡᠬᠦ ᠳ᠋ᠡᠭᠡᠨ ᠵᠠᠮ ᠳ᠋ᠠᠭᠠᠨ ᠠᠯᠠᠭᠰᠠᠨ ᠪᠣᠯᠤᠯᠲᠠᠢ ᠬᠣᠶᠠᠷ ᠲᠣᠮᠣ ᠲᠠᠷᠪᠠᠭᠠ ᠭᠠᠨᠵᠤᠭᠠᠯᠠᠴᠢᠬᠠᠭᠰᠠᠨ ᠂ ᠢᠯᠭᠢᠨ ᠰᠠᠷᠮᠠᠢ ᠳᠡᠪᠡᠯ ᠡᠮᠦᠰᠦᠭᠰᠡᠨ ᠶᠠᠪᠤᠬᠤ ᠳ᠋ᠤᠨᠢ ᠢᠨᠢᠶᠡᠳᠦ ᠬᠦᠷᠬᠦ ᠰᠢᠭ ᠪᠣᠯᠵᠤ ᠶᠣᠰᠣᠲᠠᠢ ᠯᠠ ᠰᠠᠷᠮᠠᠢ ᠨᠡᠷᠡ ᠳ᠋ᠡᠭᠡᠨ ᠳᠤᠢᠵᠤ ᠳᠠ ᠭᠡᠵᠦ ᠪᠣᠳᠣᠵᠤ ᠪᠢᠯᠡ ᠃
ᠪᠢ ᠲᠡᠷᠡ ᠦᠶᠡᠰ ᠭᠤᠷᠪᠠᠳᠤᠭᠠᠷ ᠠᠩᠭᠢ ᠳ᠋ᠤ᠌ ᠰᠤᠷᠴᠤ ᠪᠠᠢᠭᠰᠠᠨ ᠬᠢᠭᠡᠳ ᠨᠠᠮᠤᠷ ᠨᠢ ᠰᠤᠷᠭᠠᠭᠤᠯᠢ ᠳ᠋ᠠᠭᠠᠨ ᠣᠴᠢᠪᠠ ᠃ ᠶᠠᠭᠤᠮᠠ ᠪᠦᠬᠦᠨ ᠬᠠᠭᠤᠴᠢᠨ ᠬᠡᠪ ᠢ᠋ᠶ᠋ᠡᠷ ᠭᠡᠪᠡᠴᠦ ᠬᠣᠶᠠᠳᠤᠭᠠᠷ ᠤᠯᠠᠷᠢᠯ ᠠ᠋ᠴᠠ ᠡᠬᠢᠯᠡᠨ ᠳᠡᠪᠲᠡᠷ ᠬᠠᠷᠠᠨᠳᠠ ᠬᠣᠪᠣᠷᠳᠠᠵᠠᠢ ᠃ ᠪᠠᠭᠰᠢ ᠨᠢᠮᠭᠡᠨ ᠳᠡᠪᠲᠡᠷ ᠢ᠋ ᠳᠤᠮᠳᠠᠭᠤᠷ ᠨᠢ ᠣᠭᠲᠣᠯᠤᠨ ᠲᠠᠯᠠ ᠲᠠᠯᠠ ᠳᠡᠪᠲᠡᠷ ᠪᠢᠳᠡᠨ ᠳ᠋ᠦ᠍ ᠲᠠᠯᠪᠢᠵᠤ ᠥᠭᠪᠡ᠂ ᠬᠣᠣᠷᠠᠲᠠᠢ ᠬᠠᠷᠠᠨᠳᠠ ᠴᠤ᠌ ᠪᠦᠷ ᠨᠢᠳᠦᠨ ᠦ᠌ ᠭᠡᠮ ᠪᠣᠯᠪᠠ᠃《 ᠲᠡᠢᠨ ᠪᠣᠯᠵᠤ ᠪᠠᠢᠭᠠ》 ᠭᠡᠵᠦ ᠪᠢᠳᠡ ᠴᠥᠮ ᠮᠡᠳᠡᠵᠦ ᠪᠠᠢᠯᠠ᠃ ᠥᠷᠯᠥᠭᠡ ᠣᠷᠣᠢ ᠳ᠋ᠤ᠌ ᠵᠠᠬᠢᠷᠤᠯ ᠪᠠᠭᠰᠢ ᠠ᠋ᠴᠠ ᠡᠬᠢᠯᠡᠨ ᠰᠤᠮᠤ ᠶ᠋ᠢᠨ ᠲᠥᠪ ᠦ᠋ᠨ ᠬᠢᠨ ᠵᠡᠭᠦᠨ ᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠪᠠᠭᠤᠤ ᠶ᠋ᠢᠨ ᠳᠡᠭᠡᠷᠡ《өхсdmo》② ᠭᠡᠰᠡᠨ ᠦᠭᠡ ᠪᠦᠬᠦᠢ ᠭᠤᠷᠪᠠᠯᠵᠢᠨ ᠲᠡᠮᠳᠡᠭ ᠬᠠᠲᠠᠵᠤ᠂ ᠮᠣᠳᠣ ᠪᠠᠷ ᠬᠢᠭᠰᠡᠨ ᠫᠤᠤ ᠪᠠᠷᠢᠴᠢᠬᠠᠭᠠᠳ ᠭᠤᠷᠪᠠ ᠭᠤᠷᠪᠠ ᠪᠠᠷ ᠢ᠋ᠶ᠋ᠠᠨ ᠵᠢᠭᠰᠠᠨ ᠴᠠᠰᠤᠨ ᠳᠤᠮᠳᠠ ᠰᠤᠷᠭᠠᠭᠤᠯᠢ ᠬᠢᠵᠦ ᠬᠠᠷᠠᠭᠳᠠᠳᠠᠭ ᠰᠠᠨ᠃ ᠨᠢᠭᠡ ᠡᠳᠦᠷ ᠮᠠᠨ ᠤ᠋ ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠠᠰᠢᠶᠠᠨ ᠤ᠋ ᠠᠷᠤ ᠳ᠋ᠤ᠌ ᠪᠠᠬᠠᠨ ᠤᠯᠤᠰ ᠮᠣᠳᠣᠨ ᠫᠤᠤ ᠪᠠᠷᠢᠭᠠᠳ ᠵᠢᠭᠰᠠᠵᠤ ᠶᠠᠪᠤᠬᠤ ᠪᠠᠷ ᠨᠢ ᠰᠢᠪᠡᠭᠡᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠣᠴᠢᠵᠤ ᠬᠠᠷᠠᠪᠠ᠃ ᠮᠠᠨ ᠤ᠋ ᠠᠩᠭᠢ ᠶ᠋ᠢᠨ ᠪᠠᠭᠰᠢ ᠵᠢᠩᠬᠢᠨᠢ ᠵᠢᠳᠠ ᠲᠠᠢ ᠫᠤᠤ ᠪᠠᠷᠢᠴᠢᠬᠠᠭᠰᠠᠨ ᠲᠡᠳᠡᠨ ᠢ᠋ ᠺᠣᠮᠠᠨᠳ᠋ᠯᠠᠵᠤ ᠪᠠᠢᠪᠠ( ᠮᠠᠨ ᠤ᠋ ᠪᠠᠭᠰᠢ ᠬᠠᠯᠬᠠ ᠭᠣᠣᠯ ᠳ᠋ᠤ᠌ ᠪᠠᠢᠯᠳᠤᠵᠤ ᠶᠠᠪᠤᠭᠰᠠᠨ ᠬᠥᠮᠦᠨ ᠪᠢᠯᠡ)᠃ ᠭᠡᠲᠡᠯᠡ ᠲᠡᠷᠡ ᠵᠢᠭᠰᠠᠭᠠᠯ ᠤ᠋ᠨ ᠰᠡᠭᠦᠯ ᠬᠢᠷᠢ ᠮᠠᠨ ᠤ᠋ ᠨᠤᠲᠤᠭ ᠤ᠋ᠨ ᡀᠦᠨᠳᠦᠪ ᠭᠤᠸᠠᠢ ᠬᠥᠯ ᠭᠠᠷ ᠢ᠋ᠶ᠋ᠠᠨ ᠴᠤ᠌ ᠣᠯᠬᠤ ᠦᠭᠡᠢ ᠶᠠᠪᠤᠬᠤ ᠨᠢ ᠦᠷᠦ ᠡᠪᠡᠳᠦᠮᠡᠷ ᠴᠦ᠍ ᠢᠨᠢᠶᠡᠳᠦ ᠬᠦᠷᠦᠮᠡᠷ ᠴᠦ᠍ ᠬᠠᠷᠠᠭᠳᠠᠪᠠ᠃ ᠪᠠᠭᠰᠢ 《ᠳᠣᠣᠷᠠ ᠪᠠᠨ》 ᠭᠡᠵᠦ ᠬᠠᠰᠬᠢᠷᠤᠭᠰᠠᠨ ᠢ᠋ᠶ᠋ᠠᠨ《 ᠨᠢᠭᠡ᠂ ᠬᠣᠶᠠᠷ》 ᠭᠡᠵᠦ ᠳᠣᠣᠷᠠ ᠨᠢ ᠭᠢᠰᠬᠢᠭᠦᠯᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ《 ᠵᠣᠭᠰᠣ》 ᠭᠡᠵᠦ ᠺᠣᠮᠠᠨᠳ᠋ᠯᠠᠭᠠᠳ ᠨᠢᠭᠡ ᠶᠠᠭᠤᠮᠠ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ《 ᠠᠯᠬᠤᠭᠠᠳ》 ᠭᠡᠪᠡᠯ ᡀᠦᠨᠳᠦᠪ ᠭᠤᠸᠠᠢ ᠨᠢᠭᠡ ᠬᠥᠮᠦᠨ ᠦ᠌ ᠬᠠᠮᠲᠤ ᠤᠷᠤᠭᠰᠢ ᠬᠥᠯ ᠲᠠᠯᠪᠢᠬᠤ ᠳ᠋ᠠᠭᠠᠨ ᠴᠡᠭᠡᠵᠢ ᠪᠡᠨ ᠭᠡᠳᠡᠢᠯᠭᠡᠨ ᠲᠩᠷᠢ ᠶ᠋ᠢᠨ ᠬᠠᠶᠠᠭᠠ ᠬᠠᠷᠠᠭᠠᠳ ᠭᠠᠷ ᠬᠥᠯ ᠬᠠᠶᠠᠯᠠᠨ ᠠᠯᠬᠤᠭᠰᠠᠨ ᠢ᠋ᠶ᠋ᠠᠨ ᠭᠦᠶᠦᠪᠡ᠃ ᠲᠡᠷᠡ ᠬᠣᠶᠠᠷ ᠨᠢᠭᠡ ᠬᠥᠨᠳᠡᠯᠡᠨ ᠮᠣᠳᠣ ᠤᠷᠤᠭᠤ ᠵᠡᠷᠭᠡ ᠰᠢᠬᠠᠮ ᠭᠦᠶᠦᠵᠦ ᠣᠴᠢᠭᠠᠳ ᠳᠠᠪᠠᠬᠤ ᠳ᠋ᠠᠭᠠᠨ ᡀᠦᠨᠳᠦᠪ ᠭᠤᠸᠠᠢ ᠬᠣᠷᠮᠣᠢ ᠳ᠋ᠠᠭᠠᠨ ᠲᠡᠭᠡᠭᠯᠡᠨ ᠭᠡᠳᠡᠷᠭᠦ ᠪᠡᠨ ᠣᠢᠴᠢᠬᠤ ᠳ᠋ᠤᠨᠢ ᠪᠢ ᠬᠥᠨᠳᠡᠯᠡᠨ ᠡᠴᠡ ᠢᠴᠢᠵᠦ ᠦᠷᠦ ᠡᠪᠡᠳᠬᠦ ᠬᠣᠣᠰᠯᠠᠵᠤ ᠪᠢᠯᠡ᠃ ᠶᠡᠷᠦ ᠨᠢ ᠲᠡᠷᠡ ᠵᠢᠭᠰᠠᠭᠰᠠᠨ ᠬᠥᠮᠦᠰ ᠦ᠋ᠨ ᠳᠣᠲᠣᠷᠠ ᡀᠦᠨᠳᠦᠪ ᠭᠤᠸᠠᠢ ᠠᠯᠬᠤᠬᠤ ᠳ᠋ᠠᠭᠠᠨ ᠭᠠᠳᠠᠨᠠᠬᠢ ᠰᠡᠪᠡᠭᠦᠨ ᠪᠠᠢᠳᠠᠯ ᠨᠢ ᠦᠭᠡᠢ ᠪᠣᠯᠵᠤ᠂ ᠣᠯᠠᠨ ᠡᠷᠡ ᠶ᠋ᠢᠨ ᠰᠦᠷ ᠲᠤ ᠳᠠᠷᠤᠭᠳᠠᠭᠠᠳ ᠨᠢᠭᠡ ᠯᠡ ᠵᠣᠯ᠂ ᠦᠳᠡᠯᠦᠭᠡ ᠳᠣᠷᠣᠢ ᠬᠠᠷᠠᠭᠳᠠᠳᠠᠭ ᠰᠠᠨ᠃ ᠮᠠᠭᠠᠳ ᠴᠤ᠌ ᠦᠭᠡᠢ᠂ ᠡᠭᠦᠨ ᠡᠴᠡ ᠪᠣᠯᠤᠭᠠᠳ ᠲᠡᠷᠡ ᠬᠦ᠌ ᠵᠤᠨ ᠤ᠋ ᠠᠮᠠᠷᠠᠯᠲᠠ ᠪᠠᠷ ᠬᠠᠪᠤᠷ ᠨᠢ ᠬᠠᠷᠢᠭᠠᠳ ᠪᠢ ᠶᠡᠬᠡᠳᠡ ᠨᠣᠮ ᠦᠵᠡᠭᠰᠡᠨ ᠬᠥᠮᠦᠨ ᠦ᠌ ᠴᠡᠭᠡᠵᠢ ᠭᠠᠷᠭᠠᠨ ᠬᠣᠲᠠ ᠶ᠋ᠢᠨ ᠢ᠋ᠶ᠋ᠡᠨ ᠬᠡᠦᠬᠡᠳ ᠲᠤ ᠶᠠᠯᠢᠮ ᠦᠭᠡᠢ ᠶᠡᠬᠡᠮᠰᠦᠭ ᠮᠡᠳᠡᠮᠡᠬᠡᠢᠷᠡᠵᠦ ᠶᠠᠪᠤᠬᠤ ᠳ᠋ᠠᠭᠠᠨ ᡀᠦᠨᠳᠦᠪ ᠭᠤᠸᠠᠢ ᠠ᠋ᠴᠠ ᠠᠶᠤᠬᠤ ᠶ᠋ᠢ ᠨᠢᠭᠡᠨᠡ ᠪᠣᠯᠢᠵᠤ ᠬᠥᠯ ᠭᠠᠷ ᠢ᠋ᠶ᠋ᠠᠨ ᠴᠤ᠌ ᠣᠯᠳᠠᠭ ᠦᠭᠡᠢ ᠤᠤ ᠭᠡᠵᠦ ᠦᠯᠦ ᠲᠣᠭᠣᠮᠰᠠᠷᠯᠠᠨ ᠰᠠᠨᠠᠬᠤ ᠪᠣᠯᠪᠠ᠃
ᠲᠡᠷᠡ ᠵᠢᠯ ᠮᠠᠨ ᠤ᠋ ᠨᠤᠲᠤᠭ ᠲᠤ ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤ᠋ᠨ ᠢ᠋ᠶ᠋ᠠᠨ ᠦᠰᠦ ᠨᠣᠣᠰᠣ ᠶ᠋ᠢ ᠠᠪᠬᠤ ᠰᠢᠭᠤᠷᠬᠠᠢ ᠠᠵᠢᠯ ᠡᠬᠢᠯᠡᠴᠢᠬᠡᠭᠰᠡᠨ ᠶᠣᠰᠣᠲᠠᠢ ᠨᠢᠭᠡ ᠤᠷᠢᠲᠤ ᠦᠵᠡᠭᠳᠡᠭᠡ ᠦᠭᠡᠢ ᠬᠥᠯ ᠪᠣᠯᠵᠤ ᠪᠠᠢᠵᠤ ᠪᠢᠯᠡ᠃ ᠠᠳᠤᠭᠤ ᠳᠠᠯᠠᠯᠵᠤ᠂ ᠦᠬᠡᠷ ᠦ᠋ᠨ ᠰᠠᠪᠠᠭᠠ ᠰᠡᠭᠦᠯ ᠬᠢᠷᠭᠠᠬᠤ ᠴᠤ᠌ ᠭᠠᠢᠭᠤᠢ ᠬᠡᠷᠡᠭ᠂ ᠬᠠᠮᠤᠭ ᠤ᠋ᠨ ᠶᠠᠷᠪᠢᠭᠲᠠᠢ ᠨᠢ ᠢᠮᠠᠭᠠ ᠰᠠᠮᠨᠠᠬᠤ ᠪᠠᠢᠯᠠ᠃ ᠡᠨᠡ ᠠᠵᠢᠯ ᠳ᠋ᠤ᠌ ᠬᠥᠭᠰᠢᠨ ᠵᠠᠯᠠᠭᠤ᠂ ᠬᠡᠦᠬᠡᠳ ᠪᠠᠭᠠᠴᠤᠳ ᠦᠭᠡᠢ ᠣᠷᠣᠯᠴᠠᠨᠠ᠃ ᠨᠢᠭᠡ ᠥᠷᠯᠥᠭᠡ ᠠᠪᠤ ᠮᠢᠨᠢ ᠨᠠᠮᠠ ᠶ᠋ᠢ ᠰᠡᠷᠡᠭᠡᠭᠡᠳ᠄
ᠮᠢᠨᠦ ᠬᠦᠦ ᠪᠣᠰᠴᠤ ᠥᠷᠥᠮᠡ ᠪᠡᠨ ᠢᠳᠡ᠃ ᠲᠡᠭᠡᠭᠡᠳ ᠶᠠᠭᠠᠨ ᠰᠡᠷᠬᠡ ᠪᠡᠨ ᠰᠠᠮᠨᠠᠭᠠᠷᠠᠢ! ᠬᠠᠰᠢᠶᠠᠨ ᠳᠣᠲᠣᠷᠠ ᠤᠶᠠᠴᠢᠬᠠᠭᠰᠠᠨ ᠰᠢᠦ᠃ ᠦᠳᠡ ᠶ᠋ᠢᠨ ᠬᠣᠨᠢ ᠢᠷᠡᠬᠦ ᠪᠡᠷ ᠲᠠᠯᠪᠢᠴᠢᠬᠠᠨᠠ ᠪᠢᠵᠡ ᠭᠡᠯᠡ᠃ ᠪᠢ ᠢᠮᠠᠭᠠ ᠰᠠᠮᠨᠠᠨᠠ ᠭᠡᠬᠦ ᠡᠴᠡ ᠦᠰᠦᠲᠡᠢ ᠲᠣᠯᠣᠭᠠᠢ ᠠᠷᠵᠠᠢᠵᠤ ᠳᠣᠲᠣᠷᠠ ᠪᠠᠨ ᠳᠤᠷᠠ ᠦᠭᠡᠢ ᠪᠠᠢᠭᠰᠠᠨ ᠲᠤᠯᠠ᠄
— ᠶᠠᠮᠠᠷ ᠰᠠᠮ ᠢ᠋ᠶ᠋ᠠᠷ ᠰᠠᠮᠨᠠᠬᠤ ᠶᠤᠮ ᠪᠣᠢ ᠭᠡᠪᠡ᠃ ᠢᠮᠠᠭᠠᠨ ᠤ᠋ ᠰᠠᠮ ᠭᠡᠵᠦ ᠲᠡᠷᠡ ᠵᠢᠯ ᠮᠣᠳᠣᠨ ᠪᠠᠷᠢᠭᠤᠯ ᠲᠠᠢ᠂ ᠦᠵᠦᠭᠦᠷ ᠢ᠋ ᠨᠢ ᠮᠠᠬᠢᠢᠯᠭᠠᠭᠰᠠᠨ ᠣᠯᠠᠨ ᠰᠠᠪᠬᠠ ᠤᠷᠲᠤ ᠨᠠᠷᠢᠨ ᠲᠡᠮᠦᠷ ᠪᠦᠬᠦᠢ ᠰᠠᠮ ᠭᠠᠷᠤᠭᠰᠠᠨ ᠪᠢᠯᠡ᠃ ᠡᠵᠢ ᠲᠡᠭᠦᠨ ᠢ᠋ ᠨᠢᠭᠡ ᠶᠡᠬᠡ ᠣᠨᠴᠠᠯᠠᠬᠤ ᠦᠭᠡᠢ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠮᠣᠳᠣᠨ ᠰᠠᠮ ᠢ᠋ᠶ᠋ᠠᠷ ᠰᠠᠮᠨᠠᠬᠤ ᠪᠥᠭᠡᠳ ᠲᠡᠭᠦᠨ ᠢ᠋ ᠪᠡᠨ ᠪᠢᠳᠡᠨ ᠳ᠋ᠦ᠍ ᠥᠭᠳᠡᠭ ᠦᠭᠡᠢ ᠪᠠᠢᠭᠰᠠᠨ ᠶᠤᠮ᠃ ᠠᠪᠤ ᠬᠠᠨᠠᠨ ᠤ᠋ ᠲᠣᠯᠣᠭᠠᠢ ᠳ᠋ᠠᠬᠢ ᠠᠴᠠᠨ ᠠ᠋ᠴᠠ ᠮᠥᠩᠭᠥᠨ ᠬᠠᠵᠠᠭᠠᠷ ᠠᠪᠬᠤ ᠳ᠋ᠠᠭᠠᠨ ᠮᠢᠨᠦ ᠳᠤᠷᠠ ᠦᠭᠡᠢᠴᠡᠭᠰᠡᠨ ᠥᠩᠭᠡ ᠶ᠋ᠢ ᠠᠩᠵᠠᠭᠠᠷᠠᠭᠰᠠᠨ ᠶᠠᠩᠵᠤ ᠦᠭᠡᠢ᠄
— ᠲᠡᠮᠦᠷ ᠰᠠᠮ ᠭᠠᠳᠠᠭᠠ ᠪᠠᠷᠠᠭᠠᠨ ᠳᠡᠭᠡᠷᠡ ᠪᠣᠢ᠁ ᠭᠡᠳ ᠭᠠᠷᠪᠠ᠃ ᠲᠡᠷᠡ ᠡᠳᠦᠷ ᠠᠪᠤ ᠪᠠᠭ ᠤ᠋ᠨ ᠬᠤᠷᠠᠯ ᠵᠠᠷᠯᠠᠬᠤ ᠠᠵᠢᠯ ᠲᠠᠢ ᠪᠠᠢᠵᠠᠢ᠃ ᠮᠠᠨ ᠤ᠋ ᠬᠣᠲᠠ ᠶ᠋ᠢᠨ ᠬᠢᠨ ᠠᠷᠪᠠᠭᠠᠳ ᠢᠮᠠᠭᠠ ᠠᠪᠴᠤ ᠬᠣᠴᠣᠷᠤᠭᠰᠠᠨ ᠲᠤᠯᠠ ᠤᠢᠳᠬᠤ ᠶᠠᠭᠤᠮᠠ ᠦᠭᠡᠢ ᠬᠠᠨᠢ ᠲᠠᠢ ᠪᠠᠢᠯᠠ᠃ ᠠᠰᠢᠭᠦᠢ ᠮᠢᠨᠦ ᠬᠤᠪᠤ( ᠬᠤᠯᠤᠭᠠᠷ) ᠶᠠᠭᠠᠨ ᠰᠡᠷᠬᠡ ᠶ᠋ᠢᠨ ᠳᠡᠷᠭᠡᠳᠡ ᠲᠡᠩᠰᠡᠮᠡ ᠡᠭᠡᠴᠢ ᠴᠠᠭᠠᠨ ᠢᠮᠠᠭᠠ ᠪᠠᠨ ᠰᠠᠮᠨᠠᠵᠤ ᠬᠠᠷᠠᠭᠳᠠᠬᠤ ᠳ᠋ᠤ᠌ ᠬᠥᠯ ᠬᠥᠩᠭᠡᠷᠡᠬᠦ ᠰᠢᠭ ᠪᠣᠯᠪᠠ᠃ ᠬᠣᠲᠠᠨ ᠳ᠋ᠤ᠌ ᠦᠯᠡᠳᠡᠭᠰᠡᠨ ᠢᠮᠠᠭᠠᠳ ᠮᠠᠢᠯᠠᠯᠳᠤᠨ ᠳᠠᠭᠤ ᠱᠣᠣ ᠪᠣᠯᠪᠠ᠂ ᠶᠠᠭᠠᠨ ᠰᠡᠷᠬᠡ ᠮᠠᠨᠢ ᠨᠠᠳᠠ ᠤᠷᠤᠭᠤ ᠮᠠᠭᠤᠬᠠᠢ ᠬᠠᠷᠠᠭᠠᠳ ᠮᠥᠷᠭᠥᠬᠦ ᠨᠢ ᠬᠣᠯᠠ ᠦᠭᠡᠢ ᠲᠤᠷᠭᠢᠪᠠ᠃ ᠠᠷᠭᠠ ᠴᠤ᠌ ᠦᠭᠡᠢ ᠶᠦᠮ ᠪᠠᠢᠨᠠ ᠳᠠ᠂ ᠨᠢᠷᠤᠭᠤᠨ ᠳ᠋ᠠᠭᠠᠨ ᠬᠠᠷᠭᠠᠨᠠ ᠰᠢᠪᠠᠭ ᠤ᠋ᠨ ᠮᠥᠴᠢᠷ ᠡᠴᠡ ᠥᠭᠡᠷᠡ ᠶᠠᠭᠤᠮᠠ ᠬᠦᠷᠭᠡᠵᠦ ᠦᠵᠡᠭᠡ ᠦᠭᠡᠢ ᠠᠮᠢᠲᠠᠨ ᠭᠠᠢᠬᠠᠵᠤ ᠦᠷᠭᠦᠬᠦ ᠨᠢ ᠬᠢᠷᠢ ᠪᠢᠵᠡ᠃ ᠪᠢ ᠲᠡᠩᠰᠡᠮᠡ ᠡᠭᠡᠴᠢ ᠤᠷᠤᠭᠤ ᠨᠢᠳᠦ ᠪᠤᠯᠤᠩᠳᠠᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠢᠷᠡᠭᠰᠡᠨ ᠢ᠋ ᠮᠡᠳᠡᠭᠦᠯᠬᠦ ᠰᠠᠨᠠᠭᠠ ᠲᠠᠢ ᠪᠢᠴᠢᠬᠠᠨ ᠬᠣᠭᠣᠯᠠᠢ ᠵᠠᠰᠠᠵᠤ᠂ ᠰᠡᠷᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠣᠰᠢᠭᠤ ᠶ᠋ᠢ ᠢᠯᠪᠢᠨ᠂ ᠬᠦᠵᠦᠭᠦᠦ ᠬᠠᠪᠢ ᠠ᠋ᠴᠠ ᠨᠢ ᠰᠠᠮᠨᠠᠵᠤ ᠡᠬᠢᠯᠡᠪᠡ᠃ ᠲᠡᠮᠦᠷ ᠰᠠᠮ ᠨᠣᠣᠯᠤᠷ ᠲᠤ ᠨᠢ ᠬᠦᠷᠬᠦ ᠡᠴᠡ ᠨᠠᠭᠠᠨᠠ ᠰᠢᠷᠢᠯᠳᠦᠭᠰᠡᠨ ᠬᠢᠯᠭᠠᠰᠤ ᠶ᠋ᠢ ᠨᠢ ᠲᠡᠳᠡᠨ ᠵᠣᠯᠭᠠᠬᠤ ᠲᠤᠯᠠ ᠶᠠᠭᠠᠨ ᠰᠡᠷᠬᠡ ᠤᠴᠢᠷ ᠦᠭᠡᠢ ᠮᠠᠢᠯᠠᠵᠤ᠂ ᠪᠡᠶᠡ ᠵᠠᠢᠯᠠᠨ ᠬᠥᠯ ᠢ᠋ ᠮᠢᠨᠢ ᠴᠠᠢᠷᠠᠲᠠᠯᠠ ᠭᠢᠰᠬᠢᠪᠡ᠃ ᠪᠢ ᠠᠭᠤᠷ ᠲᠠᠭᠠᠨ《 ᠵᠣᠯᠢᠭ ᠤ᠋ᠨ ᠭᠣᠳᠣᠷᠣᠩ ᠪᠣᠢ!》 ᠭᠡᠵᠦ ᠤᠬᠢᠯᠠᠩᠨᠠᠨ ᠪᠠᠷᠬᠢᠷᠠᠵᠤ ᠦᠰᠦᠨ ᠳᠡᠭᠡᠷᠡ ᠡᠴᠡ ᠨᠢ ᠲᠠᠲᠠᠵᠤ ᠠᠪᠤᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠲᠡᠩᠰᠡᠮᠡ ᠡᠭᠡᠴᠢ ᠶ᠋ᠢ ᠬᠠᠷᠠᠭᠠᠳ ᠢᠴᠡᠵᠦ ᠨᠡᠷᠡᠯᠬᠡᠬᠦ ᠳ᠋ᠡᠭᠡᠨ ᠳᠠᠭᠤ ᠦᠭᠡᠢ ᠪᠣᠯᠪᠠ᠃ ᠲᠡᠷᠡ ᠪᠡᠷ ᠮᠢᠨᠦ ᠰᠠᠨᠳᠤᠷᠴᠤ ᠪᠠᠢᠭᠠ ᠶ᠋ᠢ ᠠᠵᠢᠭᠰᠠᠨ ᠪᠣᠯᠤᠯᠲᠠᠢ ᠳᠡᠷᠭᠡᠳᠡ ᠬᠦᠷᠴᠦ ᠢᠷᠡᠭᠰᠡᠨ ᠢ᠋ᠶ᠋ᠡᠨ《 ᠬᠦᠢ! ᠵᠢᠭᠠᠯ ᠮᠢᠨᠢ ᠬᠠᠷᠠᠭᠠᠴᠢ᠂ ᠲᠡᠭᠡᠳᠡᠭ ᠦᠭᠡᠢ ᠶᠦᠮ》 ᠭᠡᠵᠦ ᠬᠠᠴᠠᠷ ᠢ᠋ ᠮᠢᠨᠢ ᠢᠯᠢᠭᠰᠡᠨ ᠢ᠋ᠶ᠋ᠡᠨ ᠢᠩᠭᠢᠵᠦ ᠰᠠᠮᠨᠠᠳᠠᠭ ᠶᠤᠮ᠂ ᠴᠢ ᠬᠠᠷᠠᠭᠠᠴᠢ! ᠭᠡᠳ ᠲᠤᠩ ᠴᠠᠭᠠᠨ ᠰᠢᠳᠦ ᠭᠠᠷᠭᠠᠨ ᠢᠨᠢᠶᠡᠮᠰᠦᠭᠯᠡᠵᠦ᠂ ᠰᠡᠷᠬᠡ ᠶ᠋ᠢᠨ ᠦᠰᠦ ᠶ᠋ᠢ ᠠᠶᠠᠲᠠᠢᠬᠠᠨ ᠢᠷᠠᠭᠠᠳ ᠪᠠᠭᠠ ᠪᠠᠭᠠ ᠪᠠᠷ ᠨᠢ ᠰᠠᠮᠨᠠᠬᠤ ᠳ᠋ᠤ᠌ ᠰᠠᠮ ᠤ᠋ᠨ ᠰᠢᠳᠦᠨ ᠳ᠋ᠦ᠍ ᠮᠢᠨᠳᠠᠰᠤᠨ ᠴᠠᠭᠠᠨ ᠨᠣᠣᠯᠤᠷ ᠲᠣᠣᠷᠬᠠᠨᠠ ᠪᠠᠨ ᠠᠷᠪᠢᠵᠢᠵᠤ ᠢᠷᠡᠪᠡ᠃ ᠢᠩᠭᠢᠭᠡᠳ ᠪᠢ ᠢᠮᠠᠭᠠ ᠪᠠᠨ ᠤᠷᠠᠯᠠᠭᠤᠯᠬᠤ ᠦᠭᠡᠢ ᠶ᠋ᠢ ᠶᠡᠬᠡ ᠯᠡ ᠬᠢᠴᠢᠶᠡᠨ ᠰᠠᠮᠨᠠᠵᠤ ᠪᠡᠯᠡ᠃ ᠬᠠᠴᠠᠷ ᠮᠢᠨᠢ ᠦᠶᠡ ᠦᠶᠡ ᠬᠠᠯᠠᠭᠤᠨ ᠣᠷᠬᠢᠬᠤ ᠰᠢᠭ᠋ ᠪᠣᠯᠤᠨᠠ᠂ ᠲᠡᠩᠰᠡᠮᠡ ᠡᠭᠡᠴᠢ ᠶᠠᠭᠠᠬᠢᠭᠰᠠᠨ ᠵᠥᠭᠡᠯᠡᠨ ᠰᠠᠢᠬᠠᠨ ᠭᠠᠷ ᠲᠠᠢ ᠶᠤᠮ ᠪᠣᠢ? ᠨᠢᠭᠡ ᠯᠡ ᠡᠳᠦᠷ ᠠᠢᠯ ᠤ᠋ᠨ ᠪᠡᠷᠢ ᠪᠣᠯᠤᠭᠠᠳ ᠶᠠᠪᠤᠴᠢᠬᠠᠨᠠ ᠳᠠ ᠭᠡᠵᠦ ᠪᠣᠳᠣᠬᠤ ᠠ᠋ᠴᠠ ᠰᠡᠳᠬᠢᠯ ᠳ᠋ᠦ᠍ ᠪᠢᠴᠢᠬᠠᠨ ᠭᠤᠨᠢᠭ ᠲᠥᠷᠥᠨᠡ᠃ ᠶᠠᠭᠠᠬᠢᠭᠠᠳ ᠴᠤ᠌ ᠶᠤᠮ ᠪᠣᠢ᠂ ᠲᠡᠭᠡᠬᠦ ᠳ᠋ᠦ᠍ ᠪᠢ ᠪᠤᠰᠢᠭᠤᠬᠠᠨ ᠲᠣᠮᠣ ᠪᠣᠯᠬᠤ ᠶᠤᠮ ᠰᠠᠨ ᠭᠡᠵᠦ ᠤᠢᠳᠬᠠᠷᠲᠠᠢᠬᠠᠨ ᠪᠣᠳᠣᠵᠠᠢ᠃ ᠲᠡᠩᠰᠡᠮᠡ ᠡᠭᠡᠴᠢ ᠶ᠋ᠢ ᠬᠠᠪᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠡᠳᠦᠨ ᠭᠣᠣᠯ ᠳ᠋ᠤ᠌ ᠯᠠ ᠬᠠᠮᠤᠭ ᠤ᠋ᠨ ᠴᠢᠷᠠᠢᠯᠠᠭ ᠨᠢ ᠭᠡᠵᠦ ᠠᠪᠠᠭᠠᠢᠴᠤᠤᠯ ᠶᠠᠷᠢᠬᠤ ᠪᠥᠭᠡᠳ ᠲᠡᠷᠡ ᠳᠡᠷᠡᠨ ᠦ᠌ ᠬᠦᠦ ᠭᠤᠶᠤᠭᠠᠳ ᠪᠦᠲᠦᠭᠰᠡᠨ ᠦᠭᠡᠢ ᠭᠡᠨᠡ ᠭᠡᠵᠦ ᠶᠠᠷᠢᠬᠤ ᠶ᠋ᠢ ᠰᠠᠮ ᠰᠣᠨᠣᠰᠤᠭᠰᠠᠨ ᠲᠤᠯᠠ ᠲᠡᠢᠨ ᠬᠦ᠌ ᠪᠣᠳᠣᠭᠳᠠᠭᠰᠠᠨ ᠴᠤ᠌ ᠪᠠᠢᠵᠤ ᠪᠣᠯᠬᠤ ᠶᠤᠮ᠃ ᠲᠡᠷᠡ ᠡᠳᠦᠷ ᠲᠡᠩᠰᠡᠮᠡ ᠡᠭᠡᠴᠢ ᠶ᠋ᠢᠨ ᠳᠡᠷᠭᠡᠳᠡ ᠪᠣᠯᠤᠭᠠᠳ ᠲᠡᠷᠡ ᠤᠤ ᠡᠴᠡᠵᠦ ᠶᠠᠳᠠᠷᠠᠬᠤ ᠶ᠋ᠢ ᠠᠩᠵᠠᠶᠠᠷᠠᠭᠰᠠᠨ ᠦᠭᠡᠢ ᠶᠠᠭᠠᠨ ᠰᠡᠷᠬᠡ ᠶ᠋ᠢ ᠰᠠᠮᠨᠠᠵᠤ ᠪᠠᠷᠠᠪᠠ᠃ ᠬᠣᠶᠠᠭᠤᠯᠠ ᠪᠠᠨ ᠣᠷᠣᠯᠳᠣᠨᠠ ᠰᠢᠦ᠂ ᠵᠠᠩᠵᠤᠨ ᠠ᠋! ᠭᠡᠵᠦ ᠬᠡᠯᠡᠭᠰᠡᠨ ᠳ᠋ᠦ᠍ᠨᠢ ᠣᠩᠭᠢᠷᠠᠵᠤ ᠨᠢᠰᠤᠬᠠᠢ ᠵᠢᠭᠠᠯ ᠪᠢᠰᠢ ᠭᠡᠳᠡᠭ ᠢ᠋ᠶ᠋ᠡᠨ ᠦᠵᠡᠭᠦᠯᠬᠦ ᠶᠦᠮ ᠰᠢᠦ ᠭᠡᠵᠦ ᠮᠡᠷᠡᠢᠵᠦ ᠪᠢᠯᠡ᠃ ᠲᠡᠭᠡᠭᠡᠳ ᠴᠦ᠍ ᠲᠡᠷᠡ ᠤᠤ ᠨᠢᠭᠡ ᠬᠡᠰᠡᠭ ᠤᠯᠠᠢᠷᠠᠵᠤ ᠮᠠᠬᠠᠷᠠᠭᠠᠳ ᠪᠦᠬᠦᠨ ᠢ᠋ ᠮᠠᠷᠲᠠᠵᠠᠢ᠃ ᠰᠠᠷᠮᠠᠢ ᡀᠦᠨᠳᠦᠪ ᠪᠢᠳᠡᠨ ᠳᠡᠭᠡᠷᠡ ᠢᠷᠡᠭᠡᠳ ᠲᠡᠩᠰᠡᠮᠡ ᠡᠭᠡᠴᠢ ᠪᠡᠷ ᠲᠣᠭᠯᠠᠭᠠᠮ ᠱᠣᠭᠯᠠᠭᠠᠮ ᠬᠢᠬᠦ ᠶ᠋ᠢ ᠴᠤ᠌ ᠠᠩᠬᠠᠨ ᠳ᠋ᠠᠭᠠᠨ ᠮᠡᠳᠡᠭᠰᠡᠨ ᠦᠭᠡᠢ᠃
— ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠡᠦᠬᠡᠳ ᠢᠳᠡᠪᠬᠢᠲᠡᠢ ᠪᠠᠢᠬᠤ ᠶᠣᠰᠣᠲᠠᠢ᠂ ᠵᠦᠢᠲᠡᠢ ᠰᠠᠢᠨ ᠪᠠᠢᠨᠠ ᠭᠡᠬᠦ ᠴᠠᠷᠭᠢᠶᠠᠲᠤᠬᠤ ᠳᠠᠭᠤ ᠪᠠᠷ ᠨᠢ ᠡᠷᠭᠢᠵᠦ ᠬᠠᠷᠠᠪᠠᠯ ᡀᠦᠨᠳᠦᠪ ᠭᠤᠸᠠᠢ ᠮᠢᠨᠦ ᠲᠤᠬᠠᠢ ᠶᠠᠷᠢᠭᠰᠠᠨ ᠪᠣᠯᠤᠯᠲᠠᠢ《 ᠰᠠᠮᠨᠠ᠂ ᠰᠠᠮᠨᠠ》 ᠭᠡᠵᠦ ᠨᠠᠳᠠ ᠳ᠋ᠤ᠌ ᠲᠣᠯᠣᠭᠠᠢ ᠳᠣᠬᠢᠨ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠲᠡᠩᠰᠡᠮᠡ ᠡᠭᠡᠴᠢ ᠤᠷᠤᠭᠤ ᠬᠠᠷᠠᠭᠠᠳ᠄
— ᠲᠠᠨ ᠤ᠋ ᠬᠣᠲᠠ ᠶ᠋ᠢᠨ ᠬᠢᠨ ᠰᠠᠢᠨ ᠪᠠᠢᠨᠠ᠃ ᠣᠳᠣ ᠡᠬᠡ ᠣᠷᠣᠨ ᠤ᠋ ᠪᠠᠨ ᠪᠣᠯ ᠨᠥᠭᠡᠴᠡ ᠪᠣᠯᠤᠯᠴᠠᠭᠠ ᠶ᠋ᠢ ᠳᠡᠭᠡᠳᠦ ᠬᠡᠮᠵᠢᠶᠡ ᠪᠡᠷ ᠠᠰᠢᠭᠯᠠᠬᠤ ᠬᠡᠷᠡᠭᠲᠡᠢ ᠭᠡᠵᠦ ᠵᠠᠰᠠᠭ ᠠ᠋ᠴᠠ ᠭᠠᠷᠭᠠᠭᠰᠠᠨ ᠵᠢᠭᠠᠯᠲᠠ ᠪᠡᠯᠡᠬᠡᠨ ᠪᠠᠢᠵᠤ ᠪᠠᠢᠨᠠ᠂ ᠲᠠ ᠨᠠᠷ ᠢᠩᠭᠢᠵᠦ ᠬᠣᠰᠢᠭᠤᠴᠢᠯᠠᠬᠤ ᠶᠣᠰᠣᠲᠠᠢ ᠭᠡᠬᠦᠴᠢᠯᠡᠨ ᠤᠬᠠᠭᠤᠯᠵᠤ ᠪᠠᠢᠪᠠ᠃ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠳᠠᠭᠤ ᠪᠠᠨ ᠠᠶᠠᠷ ᠪᠣᠯᠭᠠᠨ ᠪᠠᠬᠠᠨ ᠶᠠᠭᠤᠮᠠ ᠰᠢᠪᠡᠨᠡᠬᠦ ᠳ᠋ᠦ᠍ᠨᠢ ᠲᠡᠩᠰᠡᠮᠡ ᠡᠭᠡᠴᠢ ᠶ᠋ᠢᠨ ᠴᠢᠷᠠᠢ ᠬᠣᠪᠢᠰᠬᠢᠨ ᠤᠯᠠᠢᠵᠤ᠄
— ᠶᠠᠭᠠᠬᠢᠭᠰᠠᠨ ᠪᠠᠯᠠᠢ ᠶᠤᠮ ᠪᠣᠢ᠂ ᠡᠪᠦᠭᠡᠷᠡᠭᠰᠡᠨ ᠢ᠋ᠶ᠋ᠡᠨ ᠮᠡᠳᠡᠬᠦ ᠦᠭᠡᠢ ᠢᠴᠢᠬᠦ ᠳ᠋ᠦ᠍ ᠶᠠᠭᠠᠬᠢᠳᠠᠭ ᠶᠤᠮ ᠭᠡᠪᠡ᠃ ᠭᠡᠲᠡᠯᠡ ᡀᠦᠨᠳᠦᠪ ᠭᠤᠸᠠᠢ ᠲᠡᠷᠡ ᠦᠭᠡᠨ ᠡᠴᠡ ᠶᠡᠷᠦ ᠬᠤᠷᠠᠭ ᠠᠪᠤᠭᠰᠠᠨ ᠶᠠᠩᠵᠤ ᠦᠭᠡᠢ ᠲᠠᠴᠢᠭᠢᠨᠠᠲᠠᠯᠠ ᠬᠥᠬᠥᠷᠡᠭᠰᠡᠨ ᠢ᠋ᠶ᠋ᠡᠨ᠄
— ᠠᠬᠠ ᠴᠢᠨᠢ ᠲᠣᠭᠯᠠᠭᠰᠠᠨ ᠶᠤᠮ᠂ ᠶᠠᠭᠠᠬᠢᠯᠠ ᠭᠡᠵᠦ ᠳᠡ᠃ ᠣᠳᠣ ᠬᠡᠪᠲᠠᠭᠡ ᠬᠣᠨᠢ ᠪᠣᠰᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠭᠡᠮᠡᠨ ᠬᠠᠴᠢᠨ ᠦᠭᠡ ᠬᠡᠯᠡᠭᠡᠳ ᠮᠢᠨᠦ ᠳᠡᠷᠭᠡᠳᠡ ᠢᠷᠡᠵᠦ᠄
— ᠠᠯᠢᠪ ᠬᠦ ᠰᠠᠮ ᠢ᠋ᠶ᠋ᠠᠨ ᠥᠭᠭᠦᠭᠡᠳ ᠣᠷᠭᠢ᠂ ᠢᠩᠭᠢᠳᠡᠭ ᠶᠦᠮ ᠠᠷᠭᠠ ᠲᠠᠲᠠᠯᠭᠠ ᠴᠢᠨᠢ ᠪᠠᠰᠠ ᠯᠠ ᠪᠣᠯᠤᠭᠠ ᠦᠭᠡᠢ ᠪᠠᠢᠨᠠ᠂ ᠮᠡᠳᠡᠵᠦ ᠪᠠᠢᠨᠠ ᠤᠤ᠂ ᠨᠣᠮ ᠵᠢᠭᠠᠪᠤᠷᠢ ᠪᠠᠷ ᠪᠣᠯ ᠭᠡᠰᠡᠨ ᠢ᠋ᠶ᠋ᠡᠨ ᠮᠢᠨᠦ ᠰᠠᠮ ᠢ᠋ ᠠᠪᠴᠤ ᠬᠣᠪ ᠰᠡᠷᠬᠡ ᠶ᠋ᠢ ᠬᠠᠰᠢᠶᠠ ᠤᠷᠤᠭᠤ ᠰᠢᠬᠠᠰᠬᠢᠵᠦ ᠪᠠᠢᠭᠠᠳ ᠲᠦᠷᠭᠡᠨ ᠲᠦᠷᠭᠡᠨ ᠰᠠᠮᠨᠠᠵᠤ ᠦᠰᠦ ᠳᠠᠭᠠᠬᠢᠨ ᠠ᠋ᠴᠠ ᠨᠢ ᠰᠠᠮ ᠤ᠋ᠨ ᠢ᠋ᠶ᠋ᠠᠨ ᠰᠢᠳᠦ ᠶ᠋ᠢ ᠠᠪᠬᠤ ᠭᠡᠵᠦ ᠬᠠᠮᠢᠶᠠ ᠦᠭᠡᠢ ᠲᠠᠲᠠᠪᠠᠯ ᠶᠠᠭᠠᠨ ᠰᠡᠷᠬᠡ ᠬᠦᠰᠡᠶᠡ ᠳᠦᠭᠦᠷᠡᠩ ᠣᠷᠢᠯᠠᠵᠤ ᠭᠠᠷᠪᠠ᠂ ᡀᠦᠨᠳᠦᠪ ᠭᠤᠸᠠᠢ ᠶ᠋ᠢᠨ ᠴᠢᠷᠠᠢ ᠪᠠᠰᠠ ᠬᠠᠴᠢᠨ ᠪᠣᠯᠵᠠᠢ᠃ ᠪᠢ ᠪᠦᠷ ᠵᠣᠪᠠᠵᠤ ᠣᠷᠬᠢᠪᠠ᠂ ᠬᠠᠷᠢᠨ ᠲᠡᠩᠰᠡᠮᠡ ᠡᠭᠡᠴᠢ ᠡᠯᠡᠭ ᠮᠠᠳ ᠦᠭᠡᠢ ᠬᠥᠬᠥᠷᠡᠵᠦ ᠬᠠᠷᠠᠭᠳᠠᠪᠠ᠃ ᡀᠦᠨᠳᠦᠪ ᠭᠤᠸᠠᠢ ᠶ᠋ᠢ ᠳᠣᠭᠣᠭᠢᠯᠠᠭᠰᠠᠨ ᠨᠢ ᠢᠯᠡᠳᠲᠡ ᠪᠠᠢᠪᠠ᠃
— ᠤᠭ ᠨᠢ ᠪᠣᠯᠪᠠᠯ ᠢᠩᠭᠢᠵᠦ ᠰᠠᠮᠨᠠᠬᠤ ᠶᠣᠰᠣᠲᠠᠢ ᠭᠡᠵᠦ ᠬᠡᠯᠡᠭᠡᠳ ᡀᠦᠨᠳᠦᠪ ᠭᠤᠸᠠᠢ ᠮᠢᠨᠦ ᠢᠮᠠᠭᠠ ᠶ᠋ᠢ ᠣᠷᠬᠢᠨ ᠪᠣᠰᠪᠠ᠃ ᠲᠡᠩᠰᠡᠮᠡ ᠡᠭᠡᠴᠢ ᠭᠠᠭᠴᠠ ᠢᠴᠢᠭᠡᠶᠡ ᠭᠡᠰᠡᠨ ᠪᠠᠢᠷᠢᠲᠠᠢ ᠲᠠ ᠴᠢᠨᠢ ᠲᠠᠨᠢᠭᠤᠯᠭᠠ ᠬᠢᠬᠦ ᠪᠡᠨ ᠴᠤ᠌ ᠠᠯᠲᠠ ᠳᠠ ᠵᠠᠢᠯᠠᠭᠤᠯ ᠦᠭᠡ ᠶᠠᠷᠢᠬᠤ ᠪᠠᠷ ᠢ᠋ᠶ᠋ᠠᠨ ᠤᠯᠤᠰ ᠳᠥᠷᠪᠡᠭᠡᠳ ᠰᠠᠮ ᠪᠠᠷᠢᠬᠤ ᠪᠠᠷ ᠢ᠋ᠶ᠋ᠠᠨ ᠢᠮᠠᠭᠠ ᠵᠢᠭᠰᠢᠭᠡᠳ ᠭᠡᠵᠦ ᠬᠡᠯᠡᠪᠡ᠃ ᠪᠢ ᠡᠨᠡ ᠦᠭᠡᠨ ᠡᠴᠡ ᠠᠶᠤᠬᠤ ᠰᠢᠭ᠋ ᠪᠣᠯᠵᠤ ᠲᠡᠩᠰᠡᠮᠡ ᠡᠭᠡᠴᠢ ᠶᠠᠭᠠᠬᠢᠭᠰᠠᠨ ᠵᠢᠷᠦᠬᠡ ᠲᠡᠢ ᠶᠦᠮ ᠪᠣᠢ᠂ ᠨᠠᠮᠠ ᠶ᠋ᠢ ᠮᠠᠭᠤᠯᠠᠭᠰᠠᠨ ᠭᠡᠳ ᠪᠠᠭ ᠤ᠋ᠨ ᠳᠠᠷᠤᠭᠠ ᠳ᠋ᠤ᠌ ᠬᠡᠯᠡᠪᠡᠯ ᠶᠠᠭᠠᠬᠢᠨᠠ ᠭᠡᠵᠦ ᠪᠣᠳᠣᠭᠠᠳ ᠲᠡᠩᠰᠡᠮᠡ ᠶ᠋ᠢᠨ ᠲᠥᠯᠥᠭᠡᠨ ᠡᠴᠡ ᠰᠠᠨᠠᠭᠠ ᠵᠣᠪᠠᠪᠠ᠃ ᠲᠡᠭᠡᠬᠦ ᠳ᠋ᠦ᠍ ᡀᠦᠨᠳᠦᠪ ᠭᠤᠸᠠᠢ ᠲᠣᠭᠣᠭᠰᠠᠨ ᠶᠠᠩᠵᠤ ᠦᠭᠡᠢ᠄
— ᠶᠠᠭᠤ ᠭᠡᠨᠡ ᠬᠦ ! ᠭᠡᠳ ᠮᠠᠭᠠᠰᠠᠢᠨ ③ ᠨᠢᠭᠡ ᠢᠨᠢᠶᠡᠬᠦ ᠳ᠋ᠦ᠍ ᠶᠠᠭᠠᠬᠢᠭᠰᠠᠨ ᠠᠭᠠᠯᠢ ᠦᠭᠡᠢ ᠶᠦᠮ ᠪᠣᠢ! ᠭᠡᠬᠦ ᠪᠣᠳᠣᠯ ᠭᠡᠨᠡᠳᠲᠡ ᠲᠥᠷᠥᠵᠦ ᠠᠭᠤᠷ ᠬᠦᠷᠪᠡ᠃ ᠲᠡᠩᠰᠡᠮᠡ ᠡᠭᠡᠴᠢ ᠰᠡᠭᠦᠯ ᠳ᠋ᠦ᠍ ᠨᠠᠳᠠ ᠬᠠᠮᠲᠤ ᠬᠠᠷᠢᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠡᠨᠡ ᠰᠠᠷᠮᠠᠢ ᠥᠲᠡᠯᠵᠦ ᠦᠬᠦᠬᠦ ᠭᠡᠵᠦ ᠪᠠᠢᠵᠤ ᠶᠣᠰᠣᠲᠠᠢ ᠪᠠᠯᠠᠢ ᠬᠥᠮᠦᠨ ᠰᠢᠦ ᠭᠡᠵᠦ ᠠᠮᠠᠨ ᠳ᠋ᠠᠭᠠᠨ ᠥᠭᠡᠯᠡᠬᠦ ᠳ᠋ᠦ᠍ ᠲᠡᠩᠰᠡᠮᠡ ᠶ᠋ᠢ ᠬᠠᠷᠠᠮᠨᠠᠬᠤ ᠰᠡᠳᠬᠢᠯ ᠲᠥᠷᠥᠵᠦ ᠪᠢᠯᠡ᠃ ᠲᠡᠷᠡ ᠡᠳᠦᠷ ᠪᠢ ᠶᠠᠭᠤᠨ ᠬᠣᠷᠣᠰᠤᠭᠰᠠᠨ ᠶᠤᠮ ᠪᠢᠯᠡ᠂《 ᠦᠬᠦᠭᠰᠡᠨ ᠰᠠᠷᠮᠠᠢ᠂ ᠢᠯᠭᠢᠨ ᠰᠠᠷᠮᠠᠢ᠂ ᠲᠠᠷᠠᠭ ᠤ᠋ᠨ ᠬᠣᠶᠠᠷ ᠦᠨᠢᠶᠡ ᠲᠡᠢ᠂ ᠲᠠᠷᠪᠠᠭᠠᠨ ᠤ᠋ ᠭᠠᠭᠴᠠᠬᠠᠨ ᠮᠣᠷᠢ ᠲᠠᠢ᠂ ᠠ᠋ ᠬᠡᠩᠬᠡᠭ! ᠬᠡᠩᠬᠡᠭ》 ᠭᠡᠮᠡᠨ ᠬᠤᠷᠠᠭᠠ ᠬᠠᠷᠢᠭᠤᠯᠵᠤ ᠳ᠋ᠠᠭᠠᠨ ᠬᠠᠰᠬᠢᠷᠴᠤ ᠶᠠᠪᠤᠵᠠᠢ᠃ ᠲᠡᠩᠰᠡᠮᠡ ᠳ᠋ᠦ᠍ ᠰᠠᠨᠠᠭᠠᠷᠬᠠᠨ ᠦᠭᠡ ᠬᠠᠶᠠᠭᠠᠳ ᠦᠵᠡᠭᠰᠡᠨ ᠨᠢ ᠪᠣᠯᠤᠭᠠᠳ ᠪᠢ ᠲᠡᠢᠨ ᠬᠦ᠌ ᠬᠣᠷᠣᠰᠤᠭᠰᠠᠨ ᠪᠠᠢᠵᠠᠢ᠂ ᠡᠷᠡ ᠬᠥᠮᠦᠨ ᠦ᠌ ᠰᠠᠨᠠᠭᠠᠨ ᠳ᠋ᠤ᠌ ᠡᠭᠡᠮᠡᠯ ᠬᠠᠵᠠᠭᠠᠷ ᠲᠠᠢ ᠮᠣᠷᠢ ᠪᠠᠭᠲᠠᠨᠠ ᠭᠡᠭᠴᠢ ᠪᠡᠷ ᠵᠠᠯᠠᠭᠤ ᠥᠬᠢᠨ ᠳ᠋ᠦ᠍ ᠦᠭᠡ ᠬᠠᠶᠠᠬᠤ ᠨᠢ ᠲᠡᠭᠦᠨ ᠳ᠋ᠦ᠍ ᠬᠡᠴᠢᠨᠡᠭᠡᠨ ᠵᠤᠭᠠ ᠲᠠᠢ ᠪᠠᠢᠳᠠᠭ ᠢ᠋ ᠨᠢ ᠪᠢᠴᠢᠬᠠᠨ ᠬᠦᠦ ᠪᠢ ᠶᠠᠭᠠᠬᠢᠨ ᠮᠡᠳᠡᠬᠦ ᠪᠢᠯᠡ᠃
ᠮᠠᠷᠭᠠᠰᠢ ᠨᠢ ᠮᠠᠨ ᠤ᠋ ᠬᠣᠲᠠ ᠳ᠋ᠤ᠌ ᠪᠠᠭ ᠤ᠋ᠨ ᠬᠤᠷᠠᠯ ᠪᠣᠯᠪᠠ᠃ ᠬᠥᠮᠦᠰ ᠶᠡᠬᠡ ᠴᠤᠭᠯᠠᠭᠰᠠᠨ ᠲᠤᠯᠠ ᠠᠢᠯ ᠤ᠋ᠳ ᠭᠠᠳᠠᠨᠠ ᠪᠠᠨ ᠭᠠᠯ ᠲᠦᠯᠡᠵᠦ ᠴᠠᠢ ᠴᠢᠨᠠᠨᠠ᠃ ᠳ᠋ᠠᠭᠳᠠᠨ ᠭᠤᠸᠠᠢ( ᠲᠡᠩᠰᠡᠮᠡ ᠶ᠋ᠢᠨ ᠠᠪᠤ) ᠶ᠋ᠢᠨ ᠬᠢ ᠣᠷᠣᠭᠰᠠᠨ ᠤᠯᠤᠰ ᠲᠤ ᠠᠢᠷᠠᠭ ᠰᠥᠩᠨᠡᠨᠡ᠂ ᠪᠠᠭ ᠬᠤᠷᠠᠯᠳᠤᠭᠤᠯᠬᠤ ᠭᠡᠵᠦ ᠰᠤᠮᠤᠨ ᠠ᠋ᠴᠠ ᠶᠠᠮᠠᠷ ᠳᠠᠷᠤᠭᠠ ᠨᠢ ᠢᠷᠡᠬᠦ ᠪᠣᠯ᠂ ᠵᠡᠭᠦᠳᠡᠭ ᠴᠦᠩᠬᠦ( ᠪᠣᠭᠴᠣ)᠂ ᠡᠩᠭᠡᠷ ᠦ᠋ᠨ ᠦᠵᠦᠭ ᠲᠠᠢ ᠯᠠ ᠬᠥᠮᠦᠨ ᠪᠠᠢᠨᠠ ᠪᠠᠢᠬᠠ ᠭᠡᠵᠦ ᠶᠡᠬᠡᠳᠡ ᠰᠣᠨᠢᠷᠬᠠᠵᠤ ᠪᠠᠢᠭᠰᠠᠨ ᠬᠢᠭᠡᠳ ᠦᠬᠡᠷ ᠦ᠋ᠨ ᠬᠣᠰᠢᠭᠤ ᠡᠷᠭᠢᠭᠦᠯᠦᠭᠡᠳ ᠢᠷᠡᠲᠡᠯᠡ ᠮᠠᠨ ᠤ᠋ ᠬᠣᠲᠠ ᠶ᠋ᠢᠨ ᠬᠡᠦᠬᠡᠳ ᠦ᠋ᠳ᠄
— ᠰᠤᠮᠤ ᠶ᠋ᠢᠨ ᠲᠥᠯᠥᠭᠡᠯᠡᠭᠴᠢ ᠢᠷᠡᠭᠰᠡᠨ᠂ ᠳ᠋ᠠᠭᠳᠠᠨ ᠭᠤᠸᠠᠢ ᠶ᠋ᠢᠨ ᠢᠯᠡᠭᠦᠦ ᠭᠡᠷ ᠲᠤ ᠤᠨᠲᠠᠵᠤ ᠪᠠᠢᠭᠠ ᠭᠡᠵᠦ ᠬᠡᠯᠡᠪᠡ᠃ ᠪᠢ ᠣᠴᠢᠭᠠᠳ ᠬᠠᠲᠠᠪᠴᠢ ᠪᠠᠷ ᠰᠡᠮᠡᠷᠬᠡᠨ ᠱᠠᠭᠠᠢᠪᠠᠯ ᠰᠢᠷᠠ ᠲᠣᠷᠭᠠᠨ ᠥᠮᠥᠳᠥ᠂ ᠰᠡᠪᠬᠢᠨ ᠭᠤᠲᠤᠯ ᠲᠠᠢ ᠳᠡᠭᠵᠢᠨ ᠡᠷᠡ ᠭᠢᠯᠠᠭᠠᠷ ᠬᠦᠷᠡᠩ ᠴᠦᠩᠬᠦ ᠳᠡᠷᠡᠯᠡᠭᠡᠳ ᠮᠥᠳᠳᠥ ᠰᠡᠷᠡᠬᠦ ᠶᠠᠩᠵᠤ ᠦᠭᠡᠢ ᠨᠣᠢᠷᠰᠤᠵᠤ ᠪᠠᠢᠨᠠ᠃ ᠠᠷᠠᠳ ᠤ᠋ᠳ ᠪᠠᠷᠤᠭ ᠪᠦᠭᠦᠳᠡ ᠴᠤᠭᠯᠠᠷᠠᠵᠤ ᠭᠦᠢᠴᠡᠭᠰᠡᠨ ᠪᠣᠯᠤᠯᠲᠠᠢ᠂ ᠶᠡᠷᠦ ᠨᠢ ᠴᠦ᠍ ᠤᠷᠢᠳᠤ ᠤᠷᠢᠳᠤ ᠠ᠋ᠴᠠ ᠪᠠᠨ ᠣᠯᠠᠨ ᠬᠥᠮᠦᠨ ᠢᠷᠡᠭᠰᠡᠨ ᠪᠠᠢᠯᠠ᠃ ᠦᠳᠡ ᠬᠡᠪᠡᠢᠵᠦ ᠠᠭᠤᠯᠠ ᠶ᠋ᠢᠨ ᠰᠡᠭᠦᠳᠡᠷ ᠲᠣᠩᠭᠣᠢᠭᠰᠠᠨ ᠭᠡᠪᠡᠴᠦ ᠬᠤᠷᠠᠯ ᠡᠬᠢᠯᠡᠭᠡ ᠦᠭᠡᠢ ᠯᠡ ᠪᠠᠢᠯᠠ᠃ ᠬᠥᠮᠦᠰ ᠴᠠᠭ ᠨᠥᠭᠴᠢᠭᠡᠵᠦ ᠶᠠᠳᠠᠨ ᠪᠤᠰᠢᠭᠤᠬᠠᠨ ᠬᠤᠷᠠᠯᠳᠤᠭᠠᠳ ᠡᠷᠲᠡᠬᠡᠨ ᠲᠠᠷᠬᠠᠬᠤ ᠶᠤᠮᠰᠠᠨ ᠭᠡᠵᠦ ᠰᠢᠪᠢᠷ ᠠᠪᠢᠷ ᠭᠢᠯᠳᠦᠨᠡ᠃
— ᠰᠤᠮᠤ ᠠ᠋ᠴᠠ ᠬᠡᠨ ᠢᠷᠡᠭᠡ ᠪᠣᠢ?
— ᠰᠤᠮᠤ ᠶ᠋ᠢᠨ ᠨᠠᠷᠢᠨ ᠪᠢᠴᠢᠭ᠂ ᠨᠥᠭᠦᠭᠡ ᠤᠰᠤᠲᠤ ᠶ᠋ᠢᠨ ᠡᠬᠢ ᠶ᠋ᠢᠨ ᠬᠣᠮᠣᠣᠯ ᠲᠦᠳᠦᠪ ᠦ᠋ᠨ ᠬᠦᠦ ᠨᠣᠭᠣᠭᠠᠨ ᠷᠠᠳᠨᠠ᠃
— ᠦᠭᠡᠢ ᠶᠡᠷᠦ᠂ ᠢᠩᠭᠢᠭᠰᠡᠭᠡᠷ ᠰᠥᠨᠢ ᠪᠣᠯᠭᠠᠬᠤ ᠨᠢ! ᠭᠡᠬᠦᠴᠢᠯᠡᠨ ᠭᠡᠷ ᠦ᠋ᠨ ᠰᠡᠭᠦᠳᠡᠷ ᠲᠤ ᠰᠠᠭᠤᠭᠠ ᠬᠡᠳᠦᠨ ᠬᠥᠮᠦᠨ ᠬᠦᠦᠷᠨᠢᠯᠳᠦᠨᠡ᠃ ᠭᠡᠲᠡᠯᠡ ᠪᠠᠭ ᠤ᠋ᠨ ᠳᠠᠷᠤᠭᠠ ᠶᠠᠷᠢᠵᠤ ᠬᠡᠯᠡᠯᠴᠡᠬᠦ ᠶᠠᠭᠤᠮᠠ ᠪᠠᠨ ᠡᠷᠲᠡᠬᠡᠨ ᠡᠬᠢᠯᠡᠶᠡ᠂ ᠲᠥᠯᠥᠭᠡᠯᠡᠭᠴᠢ ᠶ᠋ᠢᠨ ᠰᠡᠷᠡᠬᠦ ᠶ᠋ᠢ ᠠᠯᠢ ᠶ᠋ᠢ ᠨᠢ ᠪᠣᠯᠭᠠᠨ ᠬᠦᠯᠢᠶᠡᠬᠦ ᠪᠣᠢ ᠭᠡᠰᠡᠨ ᠪᠣᠯᠤᠯᠲᠠᠢ᠂
— ᠬᠤᠷᠠᠯ ᠤ᠋ᠨ ᠬᠢᠨ ᠨᠠᠭᠠᠰᠢ ᠪᠠᠨ ᠪᠣᠯᠤᠭᠠᠷᠠᠢ ᠭᠡᠵᠦ ᠮᠠᠨ ᠤ᠋ ᠭᠡᠷ ᠦ᠋ᠨ ᠤᠷᠲᠤ ᠲᠠᠯᠠ ᠶ᠋ᠢᠨ ᠵᠦᠯᠭᠡᠨ ᠳᠡᠭᠡᠷᠡ ᠣᠴᠢᠭᠠᠳ ᠬᠠᠰᠬᠢᠷᠤᠨᠠ᠃ ᠬᠥᠮᠦᠰ ᠳᠤᠤᠷᠠᠬᠠᠨᠡ ᠢᠷᠡᠵᠦ ᠱᠠᠭᠠᠢ ᠰᠢᠭ᠋ ᠪᠥᠭᠡᠮᠨᠡᠷᠡᠪᠡ᠃ ᠪᠠᠭ ᠤ᠋ᠨ ᠳᠠᠷᠤᠭᠠ ᠳ᠋ᠠᠭᠳᠠᠨ ᠭᠤᠸᠠᠢ ᠶ᠋ᠢᠨ ᠢᠯᠡᠭᠦᠦ ᠭᠡᠷ ᠤᠷᠤᠭᠤ ᠭᠢᠯᠠᠯᠵᠠᠨ ᠬᠠᠷᠠᠨᠠ᠂ ᠲᠡᠷᠡ ᠪᠡᠷ ᠬᠡᠨ ᠨᠢᠭᠡ ᠬᠥᠮᠦᠨ ᠢ᠋ ᠦᠭᠡᠢᠯᠡᠵᠦ ᠪᠠᠢᠭᠠ ᠪᠣᠯᠤᠯᠲᠠᠢ᠂ ᠭᠡᠪᠡᠴᠦ ᠮᠠᠯᠠᠭᠠᠢ ᠪᠠᠨ ᠠᠪᠴᠤ ᠭᠠᠵᠠᠷ ᠲᠠᠯᠪᠢᠭᠰᠠᠨ ᠢ᠋ᠶ᠋ᠠᠨ᠄
— ᠨᠥᠬᠥᠳ ᠠ᠋᠂ ᠥᠨᠥᠳᠥᠷ ᠪᠢᠳᠡ ᠪᠠᠭ ᠤ᠋ᠨ ᠬᠤᠷᠠᠯ ᠢ᠋ᠶ᠋ᠠᠷ ᠹᠷᠳᠲ ᠲᠤ ᠶᠠᠪᠤᠭᠤᠯᠬᠤ ᠪᠡᠯᠡᠭ ᠦ᠋ᠨ ᠲᠤᠬᠠᠢ ᠨᠢᠭᠡᠨ ᠲᠣᠮᠣ ᠠᠵᠢᠯ ᠶᠠᠷᠢᠯᠴᠠᠬᠤ ᠪᠠᠢᠭᠠ᠂ ᠤᠯᠠᠭᠠᠨ ᠠᠷᠮᠠᠢ ᠶ᠋ᠢᠨ ᠢᠯᠠᠯᠲᠠ ᠶ᠋ᠢ ᠲᠦᠷᠭᠡᠳᠬᠦ᠂ ᠤᠯᠠᠢᠷᠠᠭᠰᠠᠨ ᠶᠠᠷᠭᠠᠴᠢᠳ ᠢ᠋ ᠰᠥᠨᠥᠭᠡᠬᠦ ᠶ᠋ᠢᠨ ᠲᠤᠯᠠᠳᠠ ᠡᠳ᠋ ᠠᠭᠤᠷᠠᠰᠤ ᠪᠣᠯᠤᠨ ᠠᠭᠲᠠ ᠮᠣᠷᠢᠳ ᠢ᠋ᠶ᠋ᠠᠨ ᠲᠤᠰᠠᠯᠠᠬᠤ ᠶᠡᠬᠡ ᠠᠵᠢᠯ ᠮᠠᠨ ᠤ᠋ ᠣᠷᠣᠨ ᠳᠠᠶᠠᠭᠠᠷ ᠥᠷᠨᠢᠵᠦ ᠪᠠᠢᠨᠠ ᠭᠡᠳ ᠬᠥᠮᠦᠰ ᠢ᠋ ᠲᠣᠭᠣᠷᠢᠭᠤᠯᠤᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠤᠷᠢᠳ ᠢ᠋ᠶ᠋ᠠᠷ ᠡᠳᠡᠨ ᠳ᠋ᠦ᠍ ᠰᠤᠮᠤ ᠶ᠋ᠢᠨ ᠲᠥᠯᠥᠭᠡᠯᠡᠭᠴᠢ ᠶ᠋ᠢᠨ ᠲᠠᠨᠢᠭᠤᠯᠭᠠ ④ ᠶ᠋ᠢ ᠳᠣᠭᠣᠯᠭᠠᠬᠤ ᠶᠤᠮᠰᠠᠨ ᠭᠡᠵᠦ ᠪᠣᠳᠣᠭᠰᠠᠨ ᠶᠠᠩᠵᠤ ᠲᠠᠢ ᠨᠥᠭᠦᠭᠡ ᠢᠯᠡᠭᠦᠦ ᠭᠡᠷ ᠤᠷᠤᠭᠤ ᠬᠠᠷᠠᠭᠠ ᠴᠢᠭᠯᠡᠭᠦᠯᠪᠡ᠃ ᠭᠡᠪᠡᠴᠦ ᠬᠡᠨ ᠨᠢᠭᠡ ᠬᠥᠮᠦᠨ ᠳ᠋ᠦ᠍ ᠬᠠᠨᠳᠤᠨ ᠣᠴᠢᠭᠠᠳ ᠢᠷᠡ ᠭᠡᠵᠦ ᠬᠡᠯᠡᠭᠰᠡᠨ ᠦᠭᠡᠢ᠂ ᠭᠡᠲᠡᠯᠡ ᠪᠢ ᠪᠠᠭ ᠤ᠋ᠨ ᠳᠠᠷᠤᠭᠠ ᠶ᠋ᠢᠨ ᠲᠥᠯᠥᠭᠡᠨᠡ ᠰᠠᠨᠠᠭᠠ ᠵᠣᠪᠠᠭᠰᠠᠨ ᠴᠤ᠌ ᠭᠡᠬᠦ ᠳ᠋ᠦ᠍ ᠬᠠᠮᠢᠭᠠᠰᠢ ᠶᠤᠮ ᠪᠣᠢ᠂ ᠶᠠᠭᠤ ᠴᠦ᠍ ᠭᠡᠰᠡᠨ ᠳ᠋ᠠᠭᠳᠠᠨ ᠭᠤᠸᠠᠢ ᠶ᠋ᠢᠨ ᠢᠯᠡᠭᠦᠦ ᠭᠡᠷ ᠤᠷᠤᠭᠤ ᠭᠦᠶᠦᠭᠰᠡᠨ ᠢ᠋ᠶ᠋ᠡᠨ ᠥᠪᠡᠷ ᠢ᠋ᠶ᠋ᠡᠨ ᠮᠡᠳᠡᠭᠰᠡᠨ ᠦᠭᠡᠢ᠃ ᠡᠰᠡᠪᠡᠯ ᠪᠢ ᠲᠡᠷᠡ ᠭᠡᠷ ᠡᠴᠡ ᠲᠡᠩᠰᠡᠮᠡ ᠡᠭᠡᠴᠢ ᠶ᠋ᠢ ᠢᠷᠡᠬᠦ ᠪᠡᠷ ᠨᠢ ᠭᠦᠶᠦᠴᠢᠬᠡᠭᠰᠡᠨ ᠴᠦ᠍ ᠶᠦᠮ ᠤᠤ ᠪᠤᠤ ᠮᠡᠳᠡ ᠠ᠋᠂ ᠪᠢ ᠲᠡᠩᠰᠡᠮᠡ ᠡᠭᠡᠴᠢ ᠡᠴᠡ ᠡᠮᠢᠶᠡᠳᠡᠭ ᠬᠢᠷᠢᠨᠡ ᠲᠣᠮᠣ ᠡᠷᠡ ᠪᠣᠯᠵᠤ ᠬᠠᠷᠠᠭᠳᠠᠬᠤ ᠶ᠋ᠢ ᠪᠠᠰᠠ ᠬᠦ᠌ ᠬᠦᠰᠡᠳᠡᠭ ᠪᠠᠢᠭᠰᠠᠨ ᠶᠤᠮ᠃ ᠡᠢᠨ ᠬᠦ᠌ ᠭᠦᠶᠦᠭᠰᠡᠨ ᠳ᠋ᠡᠭᠡᠨ ᠵᠣᠪᠠᠬᠤ ᠰᠢᠭ᠋ ᠪᠣᠯᠪᠠ᠃ ᠭᠡᠬᠦ ᠳ᠋ᠡᠭᠡᠨ ᠡᠷᠭᠢᠯ ᠲᠡᠢ ᠨᠢ ᠪᠢᠰᠢ᠂ ᠭᠡᠷ ᠦ᠋ᠨ ᠰᠡᠭᠦᠳᠡᠷ ᠲᠤ ᠰᠠᠭᠤᠭᠠ ᠲᠡᠩᠰᠡᠮᠡ ᠡᠭᠡᠴᠢ ᠳᠡᠭᠡᠷᠡ ᠣᠴᠢᠭᠠᠳ᠄
— ᠰᠤᠮᠤ ᠶ᠋ᠢᠨ ᠲᠥᠯᠥᠭᠡᠯᠡᠭᠴᠢ ᠰᠡᠷᠡᠭᠰᠡᠨ ᠤᠤ? ᠭᠡᠵᠦ ᠠᠵᠢᠯ ᠢ᠋ᠶ᠋ᠠᠷ ᠶᠠᠪᠤᠭᠠ ᠬᠥᠮᠦᠨ ᠦ᠌ ᠳᠦᠷᠢ ᠭᠠᠷᠭᠠᠨ ᠰᠠᠭᠤᠵᠤ ᠣᠷᠬᠢᠪᠠ᠃
— ᠰᠡᠷᠡᠭᠰᠡᠨ᠂ ᠰᠡᠷᠡᠭᠰᠡᠨ! ᠰᠠᠶᠢ ᠳᠠᠭᠤᠳᠠᠬᠤ ᠪᠠᠷ ᠨᠢ ᠬᠤᠯᠤᠨ ᠳ᠋ᠤ᠌ ᠠᠢᠷᠠᠭ ᠬᠢᠭᠡᠳ ᠣᠷᠣᠭᠤᠯᠵᠤ ᠥᠭᠭᠦᠯᠡ᠂ ᠵᠠᠩᠴᠠᠨ ᠴᠢ ᠨᠠᠭᠠᠰᠢ ᠪᠠᠨ ᠰᠠᠭᠤ ᠭᠡᠳ ᠮᠢᠨᠦ ᠭᠠᠷ ᠠ᠋ᠴᠠ ᠲᠠᠲᠠᠪᠠ᠃ ᠪᠢ ᠨᠡᠷᠡᠯᠬᠡᠵᠦ᠄
— ᠨᠠᠮᠠ ᠶ᠋ᠢ ᠬᠠᠷᠠᠭᠠᠳ ᠢᠷᠡ ᠭᠡᠰᠡᠨ᠂ ᠪᠢ ᠬᠠᠲᠠᠪᠴᠢ ᠪᠠᠷ ᠨᠢ ᠱᠠᠭᠠᠢᠶᠠ ᠭᠡᠳ ᠲᠡᠭᠦᠨ ᠦ᠌ ᠭᠠᠷ ᠢ᠋ ᠲᠠᠯᠪᠢᠭᠤᠯᠪᠠ᠃ ᠰᠤᠮᠤ ᠶ᠋ᠢᠨ ᠲᠥᠯᠥᠭᠡᠯᠡᠭᠴᠢ —① ᠣᠢᠯᠠᠭᠤᠯᠲᠠ ᠮᠡᠳᠡᠭᠡᠯᠡᠬᠦ ᠶᠠᠷᠢᠶᠠ ᠲᠠᠨᠢᠯᠴᠠᠭᠤᠯᠭᠠ ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠪᠣᠷᠵᠢᠭᠢᠨ ᠪᠠᠭᠠᠲᠤᠷ
ᠬᠤᠯᠤ ᠲᠠᠢ ᠠᠢᠷᠠᠭ ᠠ᠋ᠴᠠ ᠭᠦᠳ ᠭᠦᠳ ᠬᠢᠯᠭᠡᠨ ᠬᠡᠳᠦ ᠪᠠᠯᠭᠤᠭᠰᠠᠨ ᠢ᠋ᠶ᠋ᠠᠨ ᠬᠣᠣᠷᠲᠠᠢ ᠬᠠᠷᠠᠨᠳᠠ ᠪᠠᠷ ᠶᠠᠭᠤᠮᠠ ᠪᠢᠴᠢᠵᠦ ᠬᠠᠷᠠᠭᠳᠠᠪᠠ᠃ ᠬᠡᠯᠡᠬᠦ ᠦᠭᠡ ᠪᠡᠨ ᠪᠢᠴᠢᠵᠦ ᠰᠠᠭᠤᠭᠠ ᠶᠤᠮ ᠪᠣᠯᠪᠠ ᠤᠤ? ᠪᠠᠭ ᠤ᠋ᠨ ᠬᠤᠷᠠᠯ ᠳᠡᠭᠡᠷᠡ ᠣᠴᠢᠭᠠᠳ ᠶᠠᠭ ᠯᠠ ᠲᠡᠷᠡ ᠳᠡᠪᠲᠡᠷ ᠢ᠋ᠶ᠋ᠡᠨ ᠬᠠᠷᠠᠵᠤ ᠬᠠᠭᠤᠳᠠᠰᠤ ᠶ᠋ᠢ ᠡᠷᠭᠢᠭᠦᠯᠦᠨ ᠥᠨᠳᠥᠷ ᠳᠠᠭᠤ ᠪᠠᠷ ᠬᠡᠳᠦᠨ ᠴᠥᠭᠡᠨ ᠶᠠᠭᠤᠮᠠ ᠶᠠᠷᠢᠪᠠ᠃ ᠰᠤᠮᠤ ᠶ᠋ᠢᠨ ᠲᠥᠯᠥᠭᠡᠯᠡᠭᠴᠢ ᠶ᠋ᠢᠨ ᠬᠡᠯᠡᠭᠰᠡᠨ ᠶᠡᠬᠡ ᠪᠣᠭᠣᠨᠢ ᠶᠡᠷᠦᠩᠬᠡᠢ ᠪᠠᠢᠭᠰᠠᠨ ᠪᠣᠯᠤᠭᠠᠳ ᠴᠦ᠍ ᠲᠡᠷᠡ ᠤᠤ? ᠳᠠᠷᠠᠭᠠ ᠨᠢ ᠪᠣᠰᠴᠤ ᠶᠠᠷᠢᠬᠤ ᠬᠥᠮᠦᠨ ᠣᠯᠳᠠᠬᠤ ᠦᠭᠡᠢ ᠪᠡᠶᠡ ᠪᠡᠶᠡ ᠶ᠋ᠢᠨ ᠢ᠋ᠶ᠋ᠡᠨ ᠠᠮᠠ ᠶ᠋ᠢ ᠬᠠᠷᠠᠨ ᠬᠥᠭᠵᠢᠶᠡᠨ ᠠᠨᠢᠷ ᠦᠭᠡᠢ ᠪᠣᠯᠪᠠ᠃
— ᠪᠡᠯᠡᠭᠯᠡᠬᠦ ᠵᠦᠢᠯ ᠢ᠋ᠶ᠋ᠡᠨ ᠣᠳᠣ ᠬᠥᠮᠦᠨ ᠪᠦᠷᠢ ᠢᠩᠭᠢᠭᠡᠳ ᠪᠢᠴᠢᠭᠦᠯᠦᠨᠡ ᠰᠢᠦ ᠭᠡᠵᠦ ᠪᠠᠭ ᠤ᠋ᠨ ᠳᠠᠷᠤᠭᠠ ᠬᠡᠯᠡᠪᠡ᠃
— ᠬᠥᠷᠥᠩᠭᠡ ᠴᠢᠨᠡᠭᠡ( ᠬᠢᠷᠢ ᠴᠢᠳᠠᠯ) ᠬᠠᠷᠠᠬᠤ ᠶᠤᠮ ᠤᠤ? ᠭᠡᠵᠦ ᠨᠢᠭᠡ ᠨᠢ ᠠᠰᠠᠭᠤᠪᠠ᠃
— ᠡᠨᠡ ᠳᠡᠭᠡᠷᠡ ᠬᠥᠷᠥᠩᠭᠡ ᠴᠢᠨᠡᠭᠡᠨ ᠦ᠌ ᠪᠠᠢᠳᠠᠯ ᠡᠷᠬᠡᠪᠰᠢ ᠬᠠᠷᠠᠭᠠᠯᠵᠠᠨᠠ᠃ ᠲᠡᠭᠡᠬᠦ ᠳ᠋ᠡᠭᠡᠨ ᠶᠠᠭᠤ ᠪᠠᠨ ᠪᠡᠯᠡᠭᠯᠡᠬᠦ ᠨᠢ ᠮᠠᠯᠴᠢᠨ ᠠᠷᠠᠳ ᠤ᠋ᠨ ᠥᠪᠡᠷ ᠦ᠋ᠨ ᠰᠠᠢᠨ ᠳᠤᠷᠠ ᠶ᠋ᠢᠨ ᠬᠡᠷᠡᠭ! ᠭᠡᠵᠦ ᠬᠠᠷᠢᠭᠤᠯᠪᠠ᠃
— ᠶᠠᠳᠠᠭᠤ ᠨᠢ ᠪᠠᠶᠠᠨ ᠠ᠋ᠴᠠ ᠪᠠᠨ ᠶᠡᠬᠡ ᠶ᠋ᠢ ᠪᠡᠯᠡᠭᠯᠡᠵᠦ ᠪᠣᠯᠬᠤ ᠤᠤ? ᠭᠡᠰᠡᠨ ᠠᠰᠠᠭᠤᠯᠲᠠ ᠭᠠᠷᠪᠠ᠃ ᠰᠤᠮᠤ ᠶ᠋ᠢᠨ ᠲᠥᠯᠥᠭᠡᠯᠡᠭᠴᠢ ᠮᠠᠭᠤᠬᠠᠢ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠄
— ᠡᠭᠦᠨ ᠢ᠋ ᠶᠠᠮᠠᠷ ᠤᠬᠠᠮᠰᠠᠷ ᠦᠭᠡᠢ ᠡᠲᠡᠭᠡᠳ ᠨᠢ ᠠᠰᠠᠭᠤᠵᠤ ᠪᠠᠢᠨᠠ᠂ ᠰᠠᠢᠨ ᠳᠤᠷᠠ ᠶ᠋ᠢᠨ ᠬᠡᠷᠡᠭ ᠭᠡᠭᠰᠡᠭᠡᠷ ᠪᠠᠢᠲᠠᠯᠠ᠃ ᠪᠢᠲᠡᠭᠡᠢ ᠬᠤᠷᠠᠯ ᠤᠶᠠᠭᠠᠳ ᠪᠠᠢ! ᠥᠭᠭᠦ ᠵᠦᠢᠯ ᠢ᠋ᠶ᠋ᠡᠨ ᠪᠢᠴᠢᠭᠦᠯ ᠭᠡᠵᠦ ᠵᠠᠩᠳᠤᠷᠪᠠ᠃ ᠭᠡᠲᠡᠯᠡ ᠬᠡᠨ ᠨᠢᠭᠡ ᠨᠢ᠄
— ᠤᠴᠢᠷ ᠲᠠᠨᠢᠭᠤᠯᠭᠠ ᠪᠠᠨ ᠣᠯᠢᠭᠲᠠᠢᠬᠠᠨ ᠬᠢᠴᠢᠬᠡᠳᠡᠭ ᠪᠣᠯᠤᠭᠠᠰᠠᠢ᠂ ᠬᠠᠷᠢᠨ ᠬᠡᠨ ᠨᠢ ᠬᠡᠨ ᠢ᠋ ᠪᠡᠨ ᠵᠢᠮᠡᠯᠡᠬᠦ ᠪᠣᠯᠵᠤ ᠪᠠᠢᠨᠠ ᠪᠣᠢ᠂ ᠪᠢᠳᠡ ᠹᠷᠣᠨᠲ ᠲᠤ ᠲᠤᠰᠠᠯᠠᠬᠤ ᠠᠭᠲᠠ ᠪᠠᠨ ᠬᠥᠲᠥᠯᠦᠭᠡᠳ ᠢᠷᠡᠭᠰᠡᠨ ᠤᠯᠤᠰ ᠰᠢᠦ ᠭᠡᠵᠦ ᠰᠠᠭᠤᠳᠠᠯ ᠠ᠋ᠴᠠ ᠪᠠᠨ ᠬᠠᠰᠬᠢᠷᠪᠠᠰᠤ ᠲᠥᠯᠥᠭᠡᠯᠡᠭᠴᠢ ᠶ᠋ᠢᠨ ᠨᠢᠳᠦ ᠣᠷᠣᠢ ᠳᠡᠭᠡᠷᠡ ᠪᠡᠨ ᠭᠠᠷᠴᠤ᠄
— ᠶᠠᠷᠢᠭᠠᠳ ᠪᠠᠢᠬᠤ ᠳ᠋ᠤ᠌ ᠣᠢᠯᠠᠭᠠᠳᠠᠭ ᠦᠭᠡᠢ ᠶᠠᠭᠠᠬᠢᠭᠰᠠᠨ ᠤᠯᠤᠰ ᠤ᠋ᠳ ᠪᠣᠢ᠂ ᠲᠡᠷᠡ ᠬᠡᠨ ᠭᠡᠭᠴᠢ ᠶᠠᠮᠠᠷ ᠹᠧᠣᠳᠠᠯ ᠨᠢ ᠲᠡᠷᠰᠯᠡᠭᠡᠳ ᠪᠠᠢᠨᠠ᠂ ᠪᠣᠰᠤᠭᠠᠳ ᠢᠷᠡ ᠭᠡᠵᠦ ᠲᠡᠰᠬᠡᠯ ᠦᠭᠡᠢ ᠤᠨᠲᠤᠭᠤᠴᠠᠪᠠ᠃ ᠬᠡᠨ ᠴᠦ᠍ ᠪᠣᠰᠤᠭᠰᠠᠨ ᠦᠭᠡᠢ ᠬᠡᠰᠡᠭ ᠵᠠᠭᠤᠷᠠ ᠨᠠᠮ ᠭᠦᠮ ᠪᠣᠯᠪᠠ᠃ ᠲᠡᠳᠡ ᠰᠤᠮᠤ ᠶ᠋ᠢᠨ ᠨᠠᠷᠢᠨ ᠪᠢᠴᠢᠭ ᠦ᠋ᠨ ᠳᠠᠷᠤᠭᠠ ᠠ᠋ᠴᠠ ᠠᠶᠤᠵᠠᠢ᠂ ᠭᠡᠲᠡᠯᠡ ᠰᠠᠷᠮᠠᠢ ᡀᠦᠨᠳᠦᠪ ᠪᠣᠰᠴᠤ ᠢᠷᠡᠯᠡ᠃ ᠪᠢᠳᠡ ᠬᠥᠮᠦᠰ ᠦ᠋ᠨ ᠠᠷᠤ ᠳ᠋ᠤ᠌ ᠨᠣᠭᠣᠭᠠ ᠪᠠᠷ ᠤᠷᠤᠯᠳᠤᠨ ᠶᠠᠷᠢᠶᠠ ᠴᠢᠩᠨᠠᠵᠤ ᠰᠠᠭᠤᠪᠠ᠃ ᠲᠡᠷᠡ ᠪᠡᠷ ᠬᠥᠮᠥᠰᠬᠡ ᠵᠠᠩᠭᠢᠳᠤᠨ ᠬᠥᠬᠡ ᠳᠠᠯᠢᠩᠪᠤᠨ ᠲᠡᠷᠯᠢᠭ ᠦ᠋ᠨ ᠢ᠋ᠶ᠋ᠡᠨ ᠬᠣᠷᠮᠣᠢ ᠶ᠋ᠢ ᠵᠠᠰᠠᠵᠤ᠂ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠨ ᠬᠥᠳᠡᠯᠭᠡᠭᠰᠡᠨ ᠢ᠋ᠶ᠋ᠡᠨ᠄
— ᠪᠢᠳᠡᠨ ᠦ᠌ ᠳᠣᠲᠣᠷᠠ ᠹᠧᠣᠳᠠᠯ ᠢ᠋ᠶ᠋ᠠᠷ ᠳᠠᠭᠤᠳᠠᠭᠯᠠᠬᠤ( ᠤᠷᠢᠶᠠᠯᠠᠬᠤ) ᠬᠥᠮᠦᠨ ᠠᠯᠠᠭᠠ᠂ ᠮᠠᠯᠴᠢᠨ ᠠᠷᠠᠳ ᠤ᠋ᠳ ᠪᠠᠭ ᠤ᠋ᠨ ᠢ᠋ᠶ᠋ᠠᠨ ᠬᠤᠷᠠᠯ ᠬᠢᠵᠦ ᠪᠠᠢᠨᠠ᠃ ᠠᠷᠠᠳ ᠤ᠋ᠨ ᠬᠤᠪᠢ ᠳ᠋ᠤ᠌ ᠴᠦ᠍᠂ ᠠᠬᠠᠯᠠᠬᠤ ᠤᠬᠠᠭᠤᠯᠤᠭᠴᠢ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠴᠦ᠍ ᠬᠡᠯᠡᠬᠦ ᠦᠭᠡ ᠪᠠᠢᠨᠠ ᠭᠡᠬᠦ ᠳ᠋ᠦ᠍ ᠰᠤᠮᠤ ᠶ᠋ᠢᠨ ᠲᠥᠯᠥᠭᠡᠯᠡᠭᠴᠢ ᠦᠭᠡ ᠶ᠋ᠢ ᠨᠢ ᠲᠠᠰᠤᠯᠤᠨ᠄
— ᠵᠥᠪ ᠣᠢᠯᠠᠭᠠᠬᠤ ᠬᠡᠷᠡᠭᠲᠡᠢ᠂ ᠨᠥᠬᠥᠷ ᠲᠠ ᠰᠠᠭᠤ᠂ ᠬᠤᠷᠠᠯ ᠪᠢᠲᠡᠭᠡᠢ ᠤᠳᠠᠭᠠᠰᠢᠷᠠᠭᠤᠯᠤᠭᠠᠳ ᠪᠠᠢ ᠭᠡᠵᠦ ᠵᠠᠩᠳᠤᠷᠤᠭᠰᠠᠨ ᠪᠣᠯᠪᠠᠴᠤ《 ᠬᠤᠷᠠᠯ ᠴᠤᠭᠯᠠᠭᠠᠨ ᠳᠡᠭᠡᠷᠡ ᠴᠢᠯᠥᠭᠡ ᠲᠡᠢ ᠦᠭᠡ ᠬᠡᠯᠡᠬᠦ ᠦᠨᠳᠦᠰᠦᠨ ᠬᠠᠤᠯᠢ ᠪᠠᠷ ᠣᠯᠭᠣᠭᠳᠠᠭᠰᠠᠨ ᠡᠷᠬᠡ ᠶ᠋ᠢ ᠬᠡᠨ ᠴᠦ᠍ ᠬᠣᠷᠢᠭᠯᠠᠬᠤ ᠶᠣᠰᠣ ᠦᠭᠡᠢ》 ᠭᠡᠬᠦ ᠳ᠋ᠦ᠍ ᠲᠥᠯᠥᠭᠡᠯᠡᠭᠴᠢ ᠶᠠᠭᠤ ᠴᠦ᠍ ᠬᠡᠯᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ ᠠᠮᠠ ᠲᠠᠭᠯᠠᠭᠤᠯᠪᠠ᠃ ᡀᠦᠨᠳᠦᠪ ᠪᠠᠬᠠ ᠨᠢ ᠬᠠᠨᠤᠭᠰᠠᠨ ᠪᠠᠢᠷᠢᠲᠠᠢ᠄
— ᠴᠢ ᠬᠡᠨ ᠪᠣᠯᠤᠭᠠᠳ ᠠᠷᠠᠳ ᠤ᠋ᠳ ᠤᠷᠤᠭᠤ ᠠᠭᠰᠤᠷᠴᠤ ᠪᠠᠢᠨᠠ᠂ ᠰᠥᠨᠢᠵᠢᠨ ᠢ᠋ᠶ᠋ᠡᠨ ᠠᠷᠢᠬᠢᠳᠠᠵᠤ᠂ ᠥᠨᠵᠢᠨ ᠢ᠋ᠶ᠋ᠡᠨ ᠤᠨᠲᠠᠵᠤ ᠠᠷᠠᠳ ᠤ᠋ᠨ ᠬᠤᠷᠠᠯ ᠰᠠᠭᠠᠲᠤᠭᠤᠯᠴᠢᠬᠠᠭᠠᠳ ᠠᠳᠠᠭ ᠰᠡᠭᠦᠯ ᠳ᠋ᠦ᠍ᠨᠢ ᠠᠮᠠ ᠬᠡᠯᠡ ᠪᠡᠷ ᠲᠣᠷᠣᠮᠵᠢᠯᠠᠨᠠ ᠪᠠᠰᠠ᠂ ᠴᠢᠮᠠ ᠶ᠋ᠢ ᠭᠡᠰᠬᠡᠳᠡᠭ( ᠴᠡᠭᠡᠷᠯᠡᠭᠦᠯᠳᠡᠭ) ᠭᠠᠵᠠᠷ ᠬᠠᠤᠯᠢ ᠴᠠᠭᠠᠵᠠ ᠪᠠᠢᠳᠠᠭ ᠶᠤᠮ ᠰᠢᠦ᠃ ᠴᠢᠨᠦ ᠲᠠᠨᠢᠭᠤᠯᠭᠠ ᠴᠢᠨᠢ ᠬᠠᠮᠢᠭᠠ ᠨᠢ ᠪᠠᠢᠨᠠ ᠡᠨᠡ ᠤᠤ? ᠭᠡᠳ ᠤᠷᠤᠰᠬᠠᠵᠤ ᠭᠠᠷᠪᠠ᠃ ᡀᠦᠨᠳᠦᠪ ᠭᠤᠸᠠᠢ ᠡᠢᠮᠦ ᠵᠣᠷᠢᠭᠲᠠᠢ ᠬᠡᠯᠡᠮᠡᠭᠡᠢ ᠤᠷᠠᠨ ᠴᠡᠴᠡᠨ ᠭᠡᠵᠦ ᠪᠢ ᠣᠭᠲᠣ ᠰᠠᠨᠠᠭᠰᠠᠨ ᠦᠭᠡᠢ ᠪᠢᠯᠡ᠂ ᠬᠥᠮᠦᠰ ᠨᠠᠮ ᠭᠦᠮ ᠪᠣᠯᠵᠠᠢ᠃ ᠪᠠᠭ ᠤ᠋ᠨ ᠳᠠᠷᠤᠭᠠ᠂ ᠪᠠᠰᠠ ᠰᠤᠮᠤ ᠶ᠋ᠢᠨ ᠲᠥᠯᠥᠭᠡᠯᠡᠭᠴᠢ ᠬᠣᠶᠠᠷ ᠴᠦ᠍ ᠠᠮᠠ ᠤᠷᠤᠭᠤ ᠨᠢ ᠬᠠᠷᠠᠭᠠᠳ ᠬᠥᠯᠥᠷᠡᠵᠡᠢ᠃ ᠰᠠᠷᠮᠠᠢ ᡀᠦᠨᠳᠦᠪ ᠭᠤᠸᠠᠢ ᠶ᠋ᠢᠨ ᠪᠢᠯᠠᠭᠤ ᠬᠠᠯᠠᠭᠤᠨ ᠴᠦ᠍ ᠲᠡᠷᠡ ᠤᠤ᠂ ᠳᠠᠭᠤ ᠨᠢ ᠴᠢᠩᠭᠠᠷᠠᠵᠤ᠂ ᠤᠯᠠᠭᠠᠨ ᠠᠷᠮᠠᠢ ᠶ᠋ᠢᠨ ᠢᠯᠠᠯᠲᠠ᠂ ᠭᠢᠲ᠋ᠯᠧᠷ ᠦ᠋ᠨ ᠢᠯᠠᠭᠳᠠᠯ ᠤ᠋ᠨ ᠲᠤᠬᠠᠢ ᠶᠠᠷᠢᠬᠤ ᠳ᠋ᠠᠭᠠᠨ《 ᠦᠨᠡᠨ》 ᠰᠣᠨᠢᠨ ᠤ᠋ ᠲᠡᠳᠦᠢ ᠰᠠᠷᠠ ᠶ᠋ᠢᠨ ᠲᠡᠳᠦᠢ ᠶ᠋ᠢᠨ ᠡᠳᠦᠷ ᠦ᠋ᠨ ᠳᠥᠲᠥᠭᠡᠷ ᠲᠤ ᠢᠩᠭᠢᠵᠦ ᠮᠡᠳᠡᠭᠡᠯᠡᠭᠰᠡᠨ ᠪᠠᠢᠨᠠ ᠭᠡᠬᠦᠴᠢᠯᠡᠨ ᠤᠷᠤᠰᠬᠠᠵᠤ ᠭᠠᠷᠤᠯᠠ᠃ ᠪᠢ ᠥᠴᠥᠭᠡᠳᠦᠷᠬᠡᠨ ᠡᠨᠡ ᠬᠥᠮᠦᠨ ᠳ᠋ᠦ᠍ ᠵᠢᠪᠡᠭᠦᠴᠡᠵᠦ《 ᠢᠯᠭᠢᠨ ᠰᠠᠷᠮᠠᠢ》 ᠭᠡᠵᠦ ᠬᠠᠷᠢᠶᠠᠵᠤ ᠶᠠᠪᠤᠭᠰᠠᠨ ᠪᠣᠯ ᠣᠳᠣ ᠪᠢᠰᠢᠷᠡᠬᠦ ᠰᠡᠳᠬᠢᠯ ᠤᠯᠠᠮ ᠤᠯᠠᠮ ᠲᠥᠷᠥᠬᠦ ᠪᠣᠯᠪᠠ᠂ ᠡᠭᠦᠨ ᠦ᠌ ᠪᠡᠨ ᠡᠴᠦᠰ ᠲᠤ ᡀᠦᠨᠳᠦᠪ ᠭᠤᠸᠠᠢ᠄
— ᠡᠨᠡ ᠶᠡᠬᠡ ᠢᠯᠠᠯᠲᠠ ᠶ᠋ᠢ ᠶᠡᠬᠡ ᠯᠧᠨᠢᠨ ᠦ᠌ ᠲᠤᠭ ᠵᠣᠷᠢᠭᠵᠢᠭᠤᠯᠵᠤ ᠶᠡᠬᠡ ᠯᠧᠨᠢᠨ ᠺᠷᠧᠮᠯᠢ ᠰᠢᠷᠳᠡᠨ ᠬᠠᠷᠠᠵᠤ ᠪᠠᠢᠨᠠ ᠭᠡᠰᠡᠨ ᠢ᠋ᠶ᠋ᠡᠨ ᠤᠯᠤᠰ ᠤ᠋ᠨ ᠬᠡᠮᠵᠢᠶᠡᠨ ᠳᠡᠭᠡᠷᠡ ᠬᠡᠨ ᠬᠡᠨ ᠬᠡᠷᠬᠢᠨ ᠶᠠᠭᠤ ᠪᠡᠯᠡᠭᠯᠡᠵᠦ ᠪᠠᠢᠭᠠ ᠲᠤᠬᠠᠢ ᠰᠣᠨᠢᠨ ᠠ᠋ᠴᠠ ᠤᠩᠰᠢᠭᠰᠠᠨ ᠢ᠋ᠶ᠋ᠠᠨ ᠶᠠᠷᠢᠭᠠᠳ ᠪᠢ ᠠᠬᠠ ᠵᠥᠪᠯᠡᠯᠲᠦ ᠶ᠋ᠢᠨ ᠠᠷᠠᠳ ᠲᠦᠮᠡᠨ ᠳ᠋ᠦ᠍ ᠵᠣᠷᠢᠭᠤᠯᠤᠨ ᠵᠠᠭᠤᠨ ᠲᠠᠷᠪᠠᠭᠠᠨ ᠤ᠋ ᠠᠷᠠᠰᠤ᠂ ᠠᠭᠲᠠ ᠮᠣᠷᠢ ᠨᠢᠭᠡ ᠶ᠋ᠢ ᠬᠠᠮᠲᠤ ᠪᠡᠯᠡᠭᠯᠡᠬᠦ ᠪᠡᠨ ᠠᠷᠠᠳ ᠤ᠋ᠨ ᠬᠤᠷᠠᠯ ᠤ᠋ᠨ ᠡᠮᠦᠨᠡ ᠢᠯᠡᠷᠬᠡᠢᠯᠡᠵᠦ ᠪᠠᠢᠨᠠ ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠨᠢᠭᠡ ᠬᠥᠮᠦᠨ ᠤᠷᠢᠶᠠ ᠬᠠᠰᠬᠢᠷᠴᠤ ᠪᠤᠰᠤᠳ ᠨᠢ ᠠᠯᠠᠭᠠ ᠲᠠᠰᠢᠵᠤ ᠪᠢᠯᠡ᠃ ᠲᠡᠷᠡ ᠬᠤᠷᠠᠯ ᠳᠡᠭᠡᠷᠡ ᠬᠡᠨ ᠬᠡᠴᠢᠨᠡᠭᠡᠨ ᠶᠠᠭᠤ ᠪᠡᠯᠡᠭᠯᠡᠭᠰᠡᠨ᠂ ᠳ᠋ᠠᠭᠳᠠᠨ ᠭᠤᠸᠠᠢ ᠠᠷᠪᠠᠨ ᠮᠣᠷᠢ᠂ ᠴᠡᠪᠡᠯᠮᠠ ᠭᠤᠸᠠᠢ ᠬᠣᠶᠠᠷ ᠠᠯᠲᠠᠨ ᠪᠥᠭᠡᠵᠢ᠂ ᠳ᠋ᠠᠴᠢᠨ ᠭᠤᠸᠠᠢ ᠲᠣᠷᠭᠠᠨ ᠬᠠᠨᠲᠠᠭᠠᠰᠤ ᠭᠡᠬᠦᠴᠢᠯᠡᠨ ᠪᠡᠯᠡᠭᠯᠡᠵᠦ ᠪᠠᠰᠠ ᠣᠯᠠᠨ ᠬᠥᠮᠦᠨ ᠪᠣᠰᠴᠤ ᠦᠨᠡᠨ ᠰᠡᠳᠬᠢᠯ ᠡᠴᠡ ᠪᠡᠨ ᠦᠭᠡ ᠬᠡᠯᠡᠭᠰᠡᠨ ᠢ᠋ ᠡᠨᠳᠡ ᠥᠭᠦᠯᠡᠭᠰᠡᠨ ᠦᠭᠡᠢ᠃ ᠰᠠᠷᠮᠠᠢ ᡀᠦᠨᠳᠦᠪ ᠦ᠋ᠨ ᠲᠤᠬᠠᠢ ᠭᠡᠪᠡᠯ ᠪᠠᠷᠤᠭ ᠪᠦᠬᠦ ᠯᠡ ᠵᠢᠯ ᠦ᠋ᠨ ᠢ᠋ᠶ᠋ᠡᠨ ᠣᠯᠤᠭᠰᠠᠨ ᠡᠩ ᠦ᠋ᠨ ᠣᠯᠵᠠ ᠶ᠋ᠢ ᠤᠨᠤᠭᠠᠨ ᠤ᠋ ᠪᠠᠨ ᠮᠣᠷᠢ ᠲᠠᠢ ᠪᠡᠯᠡᠭᠯᠡᠭᠡᠳ ᠲᠡᠭᠦᠨ ᠢ᠋ ᠶᠠᠪᠠᠭᠠᠷᠠᠬᠤ ᠰᠢᠬᠠᠮ ᠦᠯᠡᠳᠡᠨᠡ ᠭᠡᠵᠦ ᠬᠥᠮᠦᠰ ᠣᠭᠲᠣ ᠪᠣᠳᠣᠭᠠ ᠦᠭᠡᠢ ᠪᠢᠵᠡ᠂ ᠮᠢᠨᠦ ᠤᠷᠢᠲᠠᠢ ᠰᠠᠭᠤᠬᠤ ᠬᠣᠶᠠᠷ ᠬᠥᠮᠦᠨ ᠦ᠌ ᠰᠢᠪᠡᠨᠡᠭᠰᠡᠨ ᠨᠢ᠄
— ᠶᠠᠭᠤ ᠪᠡᠯᠡᠭᠯᠡᠶᠡ ᠳᠡ᠂ ᠰᠠᠷᠮᠠᠢ ᠶᠣᠰᠣᠲᠠᠢ ᠨᠢᠭᠡ ᠣᠷᠣᠢ ᠤᠷᠤᠭᠤ ᠣᠷᠣᠲᠠᠯᠠ ᠤᠬᠠᠭᠤᠯᠪᠠ ᠪᠠᠢᠨᠠ᠃ ᠨᠣᠭᠣᠭᠠᠨ ᠷᠠᠳᠨᠠ ᠠ᠋ᠴᠠ ᠢᠯᠡᠭᠦᠦ ᠨᠠᠷᠢᠨ ᠪᠢᠴᠢᠭ ᠶᠦᠮ ᠪᠠᠢᠨᠠ᠂ ᠤᠯᠴᠠᠩ( ᠨᠢᠯᠪᠤᠰᠤ ᠭᠣᠭᠣᠵᠢᠮᠠᠲᠠᠭᠠᠢ) ᠴᠠᠭᠠᠨ ᠮᠣᠷᠢ ᠪᠠᠨ ᠥᠭᠬᠦ ᠨᠢ ᠶᠦᠮ ᠤᠤ ᠥᠭᠡᠷᠡ ᠮᠣᠷᠢ ᠦᠭᠡᠢ ᠪᠠᠢᠬᠠ ᠠ᠋᠃
— ᠰᠢᠳᠦᠯᠡᠩ ᠦᠷᠢᠶᠡ ᠪᠣᠢ᠃ ᠠᠮᠢᠲᠠᠨ ᠠᠬᠠ ᠳᠡᠭᠦᠦ ᠨᠠᠷ ᠪᠠᠢᠬᠤ ᠳ᠋ᠤ᠌ ᠬᠥᠯ ᠳᠡᠭᠦᠵᠢᠯᠡᠬᠦ ᠶᠠᠭᠤᠮᠠ ᠶᠠᠭᠤᠨ ᠳ᠋ᠤ᠌ ᠲᠠᠰᠤᠷᠠᠬᠤ ᠪᠣᠢ᠂ ᠲᠡᠭᠡᠭᠡᠳ ᠰᠠᠷᠮᠠᠢ ᠰᠢᠭ᠋ ᠤᠬᠠᠭᠤᠯᠤᠭᠴᠢ ᠬᠥᠮᠦᠨ ᠳ᠋ᠦ᠍! ᠭᠡᠪᠡ᠃ ᡀᠦᠨᠳᠦᠪ ᠭᠤᠸᠠᠢ ᠶ᠋ᠢ ᠡᠢᠨ ᠮᠠᠭᠲᠠᠵᠤ ᠪᠠᠢᠬᠤ ᠶ᠋ᠢ ᠪᠢ ᠠᠩᠬᠠ ᠰᠣᠨᠣᠰᠴᠤ《 ᠤᠬᠠᠭᠤᠯᠤᠭᠴᠢ》 ᠭᠡᠳᠡᠭ ᠴᠢᠨᠢ ᠲᠣᠮᠣ ᠬᠥᠮᠦᠨ ᠶᠦᠮ ᠪᠠᠢᠨᠠ ᠭᠡᠵᠦ ᠪᠣᠳᠣᠪᠠ᠃ ᠤᠴᠢᠷ ᠨᠢ ᠤᠬᠠᠭᠤᠯᠤᠭᠴᠢ ᠬᠥᠮᠦᠨ ᠳ᠋ᠦ᠍ ᠤᠨᠤᠭᠠ ᠣᠯᠳᠠᠨᠠ ᠭᠡᠵᠦ ᠲᠡᠳᠡ ᠶᠠᠷᠢᠪᠠ᠃ ᡀᠦᠨᠳᠦᠪ ᠭᠤᠸᠠᠢ ᠳᠠᠷᠠᠭᠠᠬᠠᠨ ᠠᠩᠭᠢ ᠶ᠋ᠢᠨ ᠢ᠋ᠶ᠋ᠡᠨ ᠤᠯᠴᠠᠩ ᠴᠠᠭᠠᠨ ᠢ᠋ ᠮᠠᠯᠢᠩᠳᠠᠭᠤᠯᠬᠤ( ᠬᠢᠵᠢᠭ ᠦ᠋ᠨ ᠪᠠᠢᠴᠠᠭᠠᠯᠲᠠ) ᠪᠠᠷ ᠰᠢᠷᠠᠭᠴᠢ ᠭᠡᠭᠦᠦ ᠪᠡᠨ ᠣᠨᠣᠴᠢᠬᠠᠭᠰᠠᠨ ᠬᠥᠲᠥᠯᠵᠦ ᠶᠠᠪᠤᠵᠤ ᠪᠢᠯᠡ᠃ ᠲᠡᠷᠡ ᠮᠣᠷᠢ ᠨᠢᠯᠪᠤᠰᠤ ᠨᠢ ᠭᠣᠭᠣᠵᠢᠳᠠᠭ ᠠ᠋ᠴᠠ ᠤᠯᠴᠠᠩ ᠨᠡᠷᠡ ᠠᠪᠤᠭᠰᠠᠨ ᠮᠥᠷᠲᠡᠭᠡᠨ ᠮᠠᠯᠢᠨ ᠢ᠋ᠶ᠋ᠠᠨ ᠲᠠᠵᠢ ᠦᠭᠡᠢ ᠲᠣᠭᠲᠠᠭᠠᠭᠰᠠᠨ ᠶᠤᠮ ᠭᠡᠳᠡᠭ᠃ ᠮᠢᠨᠦ ᠤᠯᠴᠠᠩ ᠴᠠᠭᠠᠨ ᠪᠧᠷᠯᠢᠨ ᠣᠷᠣᠭᠰᠠᠨ ᠴᠦ᠍ ᠶᠤᠮ ᠤᠤ ᠬᠡᠨ ᠮᠡᠳᠡᠬᠦ ᠪᠣᠢ᠃ ᠶᠠᠭᠤ ᠴᠦ᠍ ᠭᠡᠰᠡᠨ ᠡᠵᠡᠨ ᠦ᠌ ᠪᠡᠨ ᠠᠮᠢ ᠶ᠋ᠢ ᠬᠡᠳᠦᠨ ᠤᠳᠠᠭᠠ ᠠᠪᠤᠷᠠᠭᠰᠠᠨ ᠪᠠᠢᠬᠤ ᠶᠣᠰᠣᠲᠠᠢ᠃ ᠳᠠᠯᠤ ᠤᠷᠤᠭᠤ ᠨᠢ ᠠᠯᠠᠭᠠᠳᠠᠬᠤ ᠪᠠᠷ ᠬᠡᠪᠲᠡᠴᠢᠬᠡᠳᠡᠭ ᠰᠤᠷᠭᠠᠭᠤᠯᠢ ᠲᠠᠢ ᠪᠠᠢᠭᠰᠠᠨ ᠶᠤᠮ ᠰᠢᠦ ᠭᠡᠵᠦ ᠶᠠᠷᠢᠬᠤ ᠶᠡᠬᠡ ᠯᠡ ᠳᠤᠷᠠᠲᠠᠢ ᠭᠡᠳᠡᠭ᠃
ᠳᠡᠭᠡᠷᠡ ᠥᠭᠦᠯᠡᠭᠰᠡᠨ ᠵᠦᠢᠯ ᠪᠣᠯ ᠲᠡᠢᠨ ᠡᠬᠢᠯᠡᠭᠰᠡᠨ ᠡᠬᠢᠨ ᠦ᠌ ᠵᠢᠯ ᠦ᠋ᠨ ᠨᠢᠭᠡᠨ ᠳᠤᠷᠠᠳᠬᠠᠯ ᠪᠢᠯᠡ᠃ ᠰᠠᠨᠠᠭᠠᠨ ᠠ᠋ᠴᠠ ᠵᠣᠬᠢᠶᠠᠭᠰᠠᠨ ᠦᠭᠡᠢ ᠭᠡᠳᠡᠭ ᠢ᠋ ᠡᠴᠦᠰ ᠲᠤ ᠬᠡᠯᠡᠶᠡ᠃1949 ᠣᠨ ᠤ᠋ ᠨᠠᠮᠤᠷ ᠠᠮᠠᠷᠠᠯᠲᠠ ᠶ᠋ᠢᠨ ᠴᠢᠯᠥᠭᠡ ᠪᠡᠷ ᠬᠠᠷᠢᠭᠠᠳ ᠪᠤᠴᠠᠵᠤ ᠶᠠᠪᠤᠲᠠᠯᠠ ᠤᠷᠢᠳᠤ ᠠ᠋ᠴᠠ ᠰᠠᠭᠠᠷᠠᠯ ᠮᠣᠷᠢᠲᠠᠢ ᠫᠤᠤ ᠡᠭᠦᠷᠦᠭᠰᠡᠨ ᠬᠥᠮᠦᠨ ᠭᠠᠷᠴᠤ ᠢᠷᠡᠭᠰᠡᠨ ᠨᠢ ᡀᠦᠨᠳᠦᠪ ᠪᠠᠢᠵᠤ ᠪᠢᠯᠡ᠃ ᠡᠨᠡ ᠡᠷᠡ ᠶᠠᠭᠠᠬᠢᠭᠠᠳ ᠴᠦ᠍ ᠶᠤᠮ ᠪᠣᠢ ᠲᠣᠷᠭᠠᠨ ᠲᠡᠷᠯᠢᠭ ᠡᠮᠦᠰᠴᠦ ᠴᠣ ᠰᠢᠨᠡ ᠺᠠᠷᠪᠢᠨ ᠫᠤᠤ ᠡᠭᠦᠷᠦᠭᠡᠳ ᠰᠤᠮᠤᠨ ᠠ᠋ᠴᠠ ᠨᠠᠳᠠ ᠳ᠋ᠤ᠌ ᠨᠡᠷᠡ ᠴᠣᠬᠣᠵᠤ ᠥᠭᠭᠦᠭᠰᠡᠨ ᠶᠦᠮ ᠭᠡᠵᠦ ᠲᠡᠷᠡ ᠪᠡᠷ ᠪᠠᠬᠠᠷᠬᠠᠨ ᠥᠭᠦᠯᠡᠭᠡᠳ ᠮᠢᠨᠦ ᠲᠣᠮᠣ ᠪᠣᠯᠤᠭᠰᠠᠨ ᠢ᠋ ᠭᠠᠢᠬᠠᠵᠤ ᠡᠷᠳᠡᠮᠲᠡᠨ ᠪᠣᠯᠤᠶᠠ ᠭᠡᠪᠡᠯ ᠯᠧᠨᠢᠨ ᠦ᠌ ᠰᠤᠷᠭᠠᠭᠤᠯᠢ ᠶ᠋ᠢ ᠰᠠᠢᠨ ᠰᠤᠳᠤᠯᠬᠤ ᠬᠡᠷᠡᠭᠲᠡᠢ ᠭᠡᠬᠦᠴᠢᠯᠡᠨ ᠮᠣᠷᠢᠨ ᠤ᠋ ᠨᠢᠷᠤᠭᠤᠨ ᠳᠡᠭᠡᠷᠡ ᠵᠥᠷᠢᠭᠡᠳ ᠥᠩᠭᠡᠷᠡᠬᠦ ᠶ᠋ᠢᠨ ᠬᠣᠭᠣᠷᠣᠨᠳᠣ ᠵᠥᠩᠳᠡᠭᠡᠨ ᠨᠣᠮ ᠵᠥᠪᠯᠡᠭᠰᠡᠨ ᠶᠦᠮ᠃ ᠡᠭᠦᠨ ᠡᠴᠡ ᠬᠣᠢᠰᠢ ᠠᠭᠤᠯᠵᠠᠯ ᠦᠭᠡᠢ ᠶᠠᠪᠤᠭᠰᠠᠭᠠᠷ ᠬᠣᠷᠢᠨ ᠵᠢᠯ ᠦ᠋ᠨ ᠳᠠᠷᠠᠭᠠ ᠪᠤᠶᠤ ᠨᠢᠳᠤᠨᠤᠨ ᠲᠠᠭᠠᠷᠠᠯᠳᠤᠪᠠ᠃ ᠨᠢᠭᠤᠷ ᠲᠤᠨᠢ ᠦᠷᠴᠢᠯᠡᠭᠡ᠂ ᠦᠰᠦᠨ ᠳ᠋ᠦ᠍ᠨᠢ ᠴᠠᠭᠠᠨ ᠰᠠᠭᠤᠭᠰᠠᠨ ᠠᠳᠢᠭᠠᠷ ᠡᠪᠦᠭᠡᠨ ᠪᠣᠯᠤᠭᠰᠠᠨ ᠪᠠᠢᠪᠠ᠃ ᠨᠠᠳᠠ ᠲᠠᠢ ᠠᠭᠤᠯᠵᠠᠩᠭᠤᠲᠠ᠄
— ᠬᠦᠦ ᠮᠢᠨᠢ ᠬᠣᠢᠨᠠ ᠲᠡᠭᠦᠰᠦᠭᠡᠳ ᠢᠷᠡᠭᠰᠡᠨ ᠭᠡᠯᠡ ᠤᠤ? ᠭᠡᠵᠦ ᠠᠰᠠᠭᠤᠭᠠᠳ᠂ ᠵᠠ ᠡᠷᠳᠡᠮ ᠯᠧᠨᠢᠨᠢᠰᠮ ᠪᠣᠯᠤᠯᠠ ᠪᠢᠵᠡ ᠳᠡ! ᠶᠠᠷᠢᠬᠤ ᠶᠠᠭᠤ ᠪᠠᠢᠬᠤ ᠪᠣᠢ ᠭᠡᠵᠦ ᠬᠡᠯᠡᠭᠰᠡᠨ ᠪᠢᠯᠡ᠃
ᠮᠠᠨ ᠤ᠋ ᠨᠤᠲᠤᠭ ᠤ᠋ᠨ ᠰᠠᠷᠮᠠᠢ ᡀᠦᠨᠳᠦᠪ ᠡᠢᠮᠦ ᠯᠡ ᠬᠥᠮᠦᠨ ᠳᠡ᠂ ᠶᠡᠷᠦ ᠨᠢ ᠰᠡᠳᠬᠢᠯ ᠢ᠋ᠶ᠋ᠡᠷ ᠵᠠᠯᠠᠭᠤ᠂ ᠪᠠᠶᠠᠨ ᠶᠠᠪᠤᠳᠠᠭ ᠬᠥᠮᠦᠨ ᠰᠢᠦ᠃
– – – –
① ᠰᠣᠪᠢᠶᠠᠳ ᠰᠤᠪᠢᠶᠠᠲ᠋ᠰᠺᠢ ᠰᠤᠼᠢᠶᠠᠯᠢᠰᠲ᠋ᠢᠴᠸᠰᠺᠢ ᠪᠦᠭᠦᠳᠡ ᠨᠠᠢᠷᠠᠮᠳᠠᠬᠤ ᠬᠣᠯᠪᠣᠭᠠᠨ ᠤ᠋ ᠤᠯᠤᠰ ( ᠵᠥᠪᠯᠡᠯᠲᠦ ᠬᠣᠯᠪᠣᠭᠠᠲᠤ ᠤᠯᠤᠰ )
② ᠥᠪᠡᠷ ᠢ᠋ ᠪᠡᠨ ᠬᠠᠮᠠᠭᠠᠯᠠᠬᠤ ᠰᠠᠢᠨ ᠳᠤᠷᠠ ᠶ᠋ᠢᠨ ᠮᠣᠷᠢᠲᠤ ᠣᠲ᠋ᠷᠢᠶᠠᠳ᠋
③ ᠪᠤᠰᠤᠳ ᠲᠤ ᠲᠠᠭᠠᠲᠠᠢ ᠡᠰᠡᠬᠦ ᠢ ᠬᠠᠢᠬᠤᠷᠬᠤ ᠦᠭᠡᠢ ᠢᠨᠢᠶᠡᠮᠰᠦᠭ᠍ᠯᠡᠬᠦ
④ ᠣᠢᠯᠠᠭᠤᠯᠤᠨ ᠮᠡᠳᠡᠭᠦᠯᠬᠦ ᠶᠠᠷᠢᠶᠠ ᠲᠠᠨᠢᠯᠴᠠᠭᠤᠯᠭᠠ
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ᠂ ᠪᠣᠷᠵᠢᠭᠢᠨ ᠪᠠᠭᠠᠲᠤᠷ᠂ ᠠᠯᠲᠠᠨᠴᠢᠮᠡᠭ᠂ ᠳᠠᠪᠰᠢᠯᠲᠦ᠂ ᠴᠣᠯᠮᠣᠨᠲᠤᠶᠠᠭᠠ
ᠬᠢᠨᠠᠭ᠍ᠴᠢ : ᠣᠳᠣᠨᠬᠤᠸᠠᠷ ᠂ ᠲᠤᠭᠴᠢ ᠰᠠᠷᠠᠨᠠ
2024᠂ 3᠂ 10 ᠤ ᠡᠳᠦᠷ