ᠬᠣᠶᠠᠷ ᠪᠤᠬᠠ – ᠳ ᠂ ᠴᠢᠮᠡᠳᠳᠣᠷᠵᠢ Хоёр бух – Д ᠂ Чимэддорж
341ᠬᠣᠶᠠᠷ ᠪᠤᠬᠠ
ᠳ · ᠴᠢᠮᠡᠳᠳᠣᠷᠵᠢ
( ᠶᠣᠭᠲᠠ ᠦᠯᠢᠭᠡᠷ)
ᠡᠵᠡᠨ ᠨᠢᠭᠡᠲᠡᠢ
ᠤᠭᠰᠠᠭᠠ ᠰᠠᠢᠲᠠᠢ
ᠬᠣᠶᠠᠷ ᠪᠤᠬᠠ ᠨᠢᠭᠡ ᠡᠳᠦᠷ
ᠡᠵᠡᠭᠦᠢ ᠬᠡᠭᠡᠷᠡ ᠳ᠋ᠦ᠍
ᠤᠰᠤᠨ ᠤ᠋ ᠳᠡᠷᠭᠡᠳᠡ
ᠬᠣᠭᠣᠷᠣᠨᠳᠣ ᠪᠠᠨ ᠮᠠᠷᠭᠤᠯᠳᠤᠵᠤ ᠭᠡᠨᠡ
ᠬᠣᠭᠣᠷᠣᠨᠳᠣ ᠪᠠᠨ ᠮᠥᠷᠭᠥᠯᠳᠦᠵᠦ ᠭᠡᠨᠡ
— ᠴᠢᠳᠠᠯ ᠶᠡᠬᠡᠲᠡᠢ
ᠦᠷᠡ ᠰᠠᠢᠲᠠᠢ ᠭᠡᠵᠦ
ᠨᠢᠭᠡ ᠨᠢ ᠶᠡᠬᠡ ᠪᠠᠷᠳᠠᠮᠨᠠᠵᠤ ᠭᠡᠨᠡ
— ᠴᠢᠮᠠ ᠠ᠋ᠴᠠ ᠢᠯᠡᠭᠦᠦ
ᠡᠭᠦᠯᠳᠡᠷ ᠰᠠᠢᠲᠠᠢ ᠭᠡᠵᠦ
ᠨᠥᠭᠦᠭᠡ ᠨᠢ ᠪᠠᠰᠠ ᠣᠮᠤᠭᠷᠠᠬᠠᠵᠤ ᠭᠡᠨᠡ
ᠮᠠᠷᠭᠤᠭᠠᠳ ᠡᠪᠯᠡᠭᠰᠡᠨ ᠦᠭᠡᠢ
ᠶᠠᠷᠢᠭᠠᠳ ᠲᠠᠭᠠᠷᠠᠭᠰᠠᠨ ᠦᠭᠡᠢ
ᠮᠠᠨ ᠤ᠋ ᠬᠣᠶᠠᠷ ᠵᠥᠷᠢᠯᠳᠦᠵᠦ ᠭᠡᠨᠡ
ᠮᠠᠩᠯᠠᠢ ᠲᠤᠯᠭᠠᠨ ᠦᠵᠡᠯᠴᠡᠵᠦ ᠭᠡᠨᠡ
ᠬᠣᠭᠣᠷᠣᠨᠳᠣ ᠪᠠᠨ ᠮᠠᠷᠭᠤᠯᠳᠤᠭᠰᠠᠭᠠᠷ
ᠬᠣᠶᠠᠭᠤᠯᠠ ᠪᠠᠨ ᠮᠥᠷᠭᠥᠯᠳᠦᠭᠰᠡᠭᠡᠷ
ᠬᠣᠨᠣᠭ ᠬᠤᠭᠤᠴᠠᠭᠠ ᠶ᠋ᠢ ᠮᠠᠷᠲᠠᠵᠤ ᠭᠡᠨᠡ
ᠨᠢᠭᠡ ᠨᠢᠭᠡ ᠶ᠋ᠢ ᠪᠡᠨ ᠳᠡᠢᠯᠬᠦ ᠭᠡᠵᠦ
ᠨᠢᠵᠢᠭᠢᠨᠡᠨ ᠳᠠᠢᠳᠤᠵᠤ ᠪᠠᠢᠬᠤ ᠳ᠋ᠤ᠌
ᠨᠡᠢᠯᠡᠭᠦᠯᠭᠡ ᠶᠢᠨ ᠴᠠᠭ ᠴᠦ᠍ ᠰᠢᠪᠲᠤᠷᠠᠵᠤ ᠭᠡᠨᠡ
ᠬᠣᠵᠢᠩᠲᠤ ᠬᠣᠶᠠᠷ ᠪᠤᠬᠠ ᠯᠠ
ᠬᠣᠭᠣᠷᠣᠨᠳᠣ ᠪᠠᠨ ᠲᠠᠴᠢᠭᠢᠨᠠᠭᠰᠠᠭᠠᠷ
ᠬᠣᠭᠣᠰᠣᠨ ᠴᠠᠭ ᠥᠩᠭᠡᠷᠡᠭᠡᠵᠦ
ᠬᠣᠢᠲᠤᠨ ᠲᠥᠯ ᠦᠭᠡᠢ ᠬᠣᠴᠣᠷᠴᠤ ᠭᠡᠨᠡ
ᠠᠲᠠᠭᠠ ᠵᠢᠲᠥᠭᠡ ᠬᠥᠭᠡᠭᠡᠴᠡᠯᠳᠦᠨ
ᠠᠮᠢᠨ ᠬᠤᠪᠢ ᠳ᠋ᠠᠭᠠᠨ ᠬᠠᠷᠭᠤᠯᠳᠤᠭᠠᠳ
ᠠᠵᠢᠯ ᠤ᠋ᠨ ᠴᠠᠭ ᠢ᠋ ᠠᠯᠳᠠᠳᠠᠭ
ᠵᠠᠷᠢᠮ ᠨᠢ ᠪᠦᠲᠦᠯ ᠦᠭᠡᠢ ᠶᠠᠪᠤᠳᠠᠯᠲᠠᠨ
ᠵᠠᠪᠠᠯ ᠡᠭᠦᠨ ᠢ᠋ ᠪᠣᠳᠤᠭᠤᠰᠢᠲᠠᠢ᠃
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠳᠤᠯᠠᠭᠠᠨ
ᠬᠢᠨᠠᠭ᠍ᠴᠢ : ᠰᠠᠷᠠᠨᠠ
2024᠂ 3᠂ 1 ᠦ᠌ ᠡᠳᠦᠷ