ᠲᠡᠬᠡᠬᠦᠳᠡᠢ ᠢᠮᠠᠭᠠᠳᠠᠢ ᠬᠣᠶᠠᠷ ᠤᠨ ᠦᠯᠢᠭᠡᠷТэгэхтэй ямаатай хоёрын үлгэр
710ᠲᠡᠬᠡᠬᠦᠳᠡᠢ ᠢᠮᠠᠭᠠᠳᠠᠢ ᠬᠣᠶᠠᠷ ᠤᠨ ᠦᠯᠢᠭᠡᠷ
ᠡᠷᠲᠡ ᠤᠷᠢᠳᠤ ᠴᠠᠭ ᠲᠤ ᠶᠠᠩᠭᠢᠷ ᠤᠨ ᠬᠣᠶᠠᠷ ᠢᠰᠢᠭᠡ ᠲᠡᠬᠡᠬᠦᠳᠡᠢ ᠢᠮᠠᠭᠠᠳᠠᠢ ᠬᠣᠶᠠᠷ ᠪᠠᠢᠵᠠᠢ ᠭᠡᠨᠡ᠃ ᠢᠰᠢᠭᠡᠳ ᠡᠪᠡᠰᠦᠨ ᠦ ᠰᠤᠷ ᠢ ᠢᠳᠡᠵᠦ ᠤᠰᠤᠨ ᠤ ᠲᠤᠩᠭᠠᠯᠠᠭ ᠢ ᠤᠤᠭᠤᠵᠤ᠂ ᠬᠠᠳᠠ ᠬᠢᠰᠠᠭᠠᠨ ᠳᠡᠭᠡᠭᠦᠷ ᠳᠤᠷᠠ ᠪᠠᠷ ᠢᠶᠠᠨ ᠬᠠᠷᠠᠢᠨ ᠳᠡᠭᠦᠯᠢᠨ ᠶᠠᠪᠤᠳᠠᠭ ᠶᠤᠮ ᠰᠠᠨᠵᠠᠢ᠃
ᠭᠡᠲᠡᠯᠡ ᠨᠢᠭᠡ ᠡᠳᠦᠷ ᠠᠮᠤᠭᠤᠯᠠᠩ ᠲᠠᠢᠪᠤᠩ ᠲᠡᠷᠡ ᠨᠤᠲᠤᠭ ᠲᠤ ᠮᠢᠬᠠᠴᠢᠨ ᠢᠷᠪᠢᠰ ᠢᠷᠠᠵᠠᠢ ᠭᠡᠨᠡ᠃ ᠬᠠᠷᠢᠨ ᠢᠷᠪᠢᠰ ᠦᠨ ᠢᠳᠡᠭ᠌ᠰᠡᠨ ᠲᠡᠬᠡ ᠶᠢᠨ ᠲᠣᠯᠣᠭᠠᠢ ᠶᠢ ᠦᠵᠡᠭᠡᠳ ᠢᠮᠠᠭᠠᠳᠠᠢ ᠡᠭᠦᠨ ᠰᠢᠭ ᠪᠢᠳᠡ ᠬᠣᠶᠠᠷ ᠢ ᠢᠷᠪᠢᠰ ᠪᠠᠷᠢᠨᠠ ᠳ᠋ᠠ ᠭᠡᠵᠦ ᠤᠬᠢᠯᠠᠩᠨᠠᠭ᠍ᠰᠠᠨ ᠲᠡᠳᠦᠢ ᠦᠭᠡᠢ ᠳᠦ ᠪᠡᠨ《ᠪᠠᠷᠢᠲᠠᠯᠠ ᠨᠢ ᠵᠠᠢ ᠴᠤ᠌ ᠪᠣᠢ ᠵᠠᠢ ᠴᠤ᠌ ᠪᠣᠢ᠂ ᠨᠢᠭᠡ ᠤᠬᠠᠭᠠᠨ ᠰᠡᠢᠯᠦᠶᠡ》 ᠭᠡᠵᠦ《ᠬᠣᠶᠠᠭᠤᠯᠠ ᠪᠠᠨ ᠬᠣᠢᠯᠤᠭ ᠤᠨ ᠰᠥᠷᠦᠭ ᠳᠣᠲᠣᠷᠠ ᠶᠠᠪᠤᠶᠠ᠂ ᠢᠷᠪᠢᠰ ᠢᠷᠠᠪᠠᠯ ᠬᠣᠢᠯᠤᠭ ᠤᠨ ᠰᠥᠷᠦᠭ ᠦᠷᠭᠦᠵᠦ ᠨᠢᠰᠦᠨᠡ ᠲᠡᠭᠡᠬᠦ ᠳᠦ ᠪᠢᠳᠡ ᠬᠠᠮᠢᠭᠠ ᠠᠴᠠ ᠮᠢᠬᠠᠴᠢᠨ ᠠᠢᠰᠤᠢ ᠶᠢ ᠮᠡᠳᠡᠭᠡᠳ ᠵᠢᠭᠤᠲᠠᠵᠤ ᠠᠮᠵᠢᠨᠠ》 ᠭᠡᠵᠦ ᠭᠡᠨᠡ᠃ ᠲᠡᠭᠡᠭᠡᠳ ᠢᠰᠢᠭᠡᠳ ᠬᠣᠢᠯᠤᠭ ᠤᠨ ᠰᠥᠷᠦᠭ ᠳᠤᠮᠳᠠ ᠶᠠᠪᠤᠬᠤ ᠪᠣᠯᠵᠠᠢ᠃ ᠢᠷᠪᠢᠰ ᠲᠡᠳᠡᠨ ᠢ ᠦᠵᠡᠭᠡᠳ ᠡᠨᠡ ᠬᠣᠶᠠᠷ ᠢ ᠪᠠᠷᠢᠵᠤ ᠢᠳᠡᠶᠡ ᠭᠡᠵᠦ ᠰᠢᠯᠦᠰᠦ ᠪᠡᠨ ᠵᠠᠯᠭᠢᠨ ᠤᠷᠤᠭᠤᠯ ᠠᠮᠠ ᠪᠠᠨ ᠳᠣᠯᠢᠶᠠᠭᠠᠳ ᠰᠡᠭᠦᠯ ᠢᠶᠡᠨ ᠭᠣᠳᠣᠭᠤᠨᠠᠭᠤᠯᠤᠨ ᠭᠠᠵᠠᠷ ᠬᠡᠳᠦ ᠴᠣᠬᠢᠭᠠᠳ ᠭᠡᠲᠡᠵᠡᠢ ᠭᠡᠨᠡ᠃ ᠭᠡᠲᠡ ᠭᠡᠲᠡᠭ᠌ᠰᠡᠭᠡᠷ ᠳᠥᠬᠥᠲᠡᠯᠡ ᠬᠣᠢᠯᠤᠭ ᠦᠷᠭᠦᠨ ᠨᠢᠰᠴᠦ ᠢᠰᠢᠭᠡᠳ ᠴᠠᠬᠢᠯᠭᠠᠨ ᠮᠡᠲᠦ ᠴᠠᠬᠢᠯᠤᠨ ᠠᠷᠢᠯᠵᠠᠢ ᠭᠡᠨᠡ᠃ ᠠᠬᠢᠭᠠᠳ ᠯᠡ ᠭᠡᠲᠡᠵᠦ ᠳᠥᠬᠥᠬᠦ ᠳᠦ ᠬᠣᠢᠯᠤᠭ ᠦᠷᠭᠦᠵᠦ ᠢᠰᠢᠭᠡᠳ ᠠᠬᠢᠭᠠᠳ ᠯᠡ ᠴᠠᠬᠢᠯᠤᠨ ᠣᠳᠴᠠᠢ᠃ ᠢᠷᠪᠢᠰ《ᠬᠠᠢᠷᠠᠨ ᠬᠣᠭᠣᠯᠠ ᠬᠠᠢᠷᠠᠨ ᠬᠣᠭᠣᠯᠠ᠂ ᠲᠠ ᠨᠠᠷ ᠢ ᠪᠠᠷᠢᠬᠤ ᠦᠭᠡᠢ ᠪᠣᠯ ᠪᠢ ᠶᠠᠭᠤᠨ ᠤ ᠬᠦᠦ ᠪᠣᠯᠬᠤ ᠪᠣᠯ》 ᠭᠡᠵᠦ ᠰᠢᠵᠠᠭᠤᠷ ᠵᠠᠭᠤᠭᠠᠳ ᠢᠰᠢᠭᠡᠳ ᠢ ᠮᠥᠷ ᠳᠠᠷᠤᠨ ᠬᠥᠭᠡᠭᠡᠵᠦ ᠭᠡᠨᠡ᠃ ᠲᠡᠢᠨ ᠬᠦ᠌ ᠰᠥᠨᠢᠵᠢᠨ ᠬᠥᠭᠡᠭᠡᠴᠡᠯᠳᠦᠭᠡᠳ ᠪᠠᠷᠢᠵᠤ ᠴᠢᠳᠠᠭ᠍ᠰᠠᠨ ᠦᠭᠡᠢ᠃
ᠥᠷᠯᠥᠭᠡ ᠨᠠᠷᠠ ᠮᠠᠨᠳᠤᠬᠤ ᠳᠤ ᠣᠯᠠᠨᠲᠠ ᠢᠷᠪᠢᠰ ᠲᠦ ᠦᠷᠭᠦᠭᠡᠯᠡᠭ᠌ᠳᠡᠭ᠌ᠰᠡᠨ ᠬᠣᠢᠯᠤᠭ ᠤᠳ ᠠᠯᠤᠰ ᠲᠤ ᠨᠢᠰᠦᠨ ᠣᠳᠴᠤ ᠲᠡᠬᠡᠬᠦᠳᠡᠢ ᠢᠮᠠᠭᠠᠳᠠᠢ ᠬᠣᠶᠠᠷ ᠦᠯᠡᠳᠡᠵᠡᠢ᠃ᠢᠮᠠᠭᠠᠳᠠᠢ《ᠬᠣᠢᠯᠤᠭ ᠤᠳ ᠣᠷᠬᠢᠭᠠᠳ ᠶᠠᠪᠤᠴᠢᠬᠠᠯᠠ᠂ ᠣᠳᠣ ᠪᠢᠳᠡ ᠬᠣᠶᠠᠷ ᠢ ᠮᠢᠬᠠᠴᠢᠨ ᠪᠠᠷᠢᠨᠠ ᠳ᠋ᠠ》 ᠭᠡᠵᠦ ᠤᠬᠢᠯᠠᠩᠨᠠᠬᠤ ᠳᠤ ᠨᠢ ᠲᠡᠬᠡᠬᠦᠳᠡᠢ《ᠪᠠᠷᠢᠲᠠᠯᠠ ᠨᠢ ᠵᠠᠢ ᠴᠤ᠌ ᠪᠣᠢ᠂ᠵᠠᠢ ᠴᠤ᠌ ᠪᠣᠢ》 ᠭᠡᠳ 《ᠬᠣᠶᠠᠭᠤᠯᠠ ᠪᠠᠨ ᠤᠬᠠᠭᠠᠨ ᠰᠡᠢᠯᠦᠶᠡ᠂ ᠣᠯᠠᠨ ᠲᠠᠷᠪᠠᠭᠠᠨ ᠳᠤᠮᠳᠠ ᠣᠴᠢᠵᠤ ᠤᠨᠲᠠᠵᠤ ᠠᠮᠠᠷᠠᠶᠠ᠂ ᠢᠷᠪᠢᠰ ᠢᠷᠠᠪᠠᠯ ᠲᠠᠷᠪᠠᠭᠠ ᠬᠣᠰᠭᠢᠷᠠᠨᠠ》 ᠭᠡᠵᠦ ᠭᠡᠨᠡ᠂ ᠲᠡᠭᠡᠭᠡᠳ ᠢᠰᠢᠭᠡᠳ ᠣᠯᠠᠨ ᠲᠠᠷᠪᠠᠭᠠᠨ ᠳᠤᠮᠳᠠ ᠣᠴᠢᠵᠤ ᠤᠨᠲᠠᠵᠠᠢ᠃ ᠢᠷᠪᠢᠰ ᠲᠡᠳᠡᠨ ᠢ ᠠᠭᠤᠯᠠ ᠶᠢᠨ ᠪᠡᠯ ᠳᠦ ᠤᠨᠲᠠᠬᠤ ᠶᠢ ᠦᠵᠡᠮᠡᠭ᠌ᠴᠡ《ᠡᠨᠡ ᠮᠠᠭᠤ ᠬᠣᠶᠠᠷ ᠬᠤᠤᠬᠠᠢ ᠶᠢ ᠣᠳᠣ ᠯᠡ ᠨᠢᠭᠡ ᠪᠠᠷᠢᠨᠠ ᠳ᠋ᠠ》 ᠭᠡᠳ ᠰᠢᠯᠦᠰᠦ ᠪᠡᠨ ᠵᠠᠯᠭᠢᠨ ᠱᠣᠷᠤᠩ ᠠᠴᠠ ᠪᠠᠭᠤᠵᠤ ᠭᠡᠲᠡᠭ᠌ᠰᠡᠭᠡᠷ ᠳᠥᠬᠥᠲᠡᠯᠡ ᠣᠯᠠᠨ ᠲᠠᠷᠪᠠᠭᠠ ᠬᠣᠰᠬᠢᠷᠠᠵᠤ ᠤᠨᠲᠠᠵᠤ ᠬᠡᠪᠲᠡᠭ᠌ᠰᠡᠨ ᠬᠣᠶᠠᠷ ᠢᠰᠢᠭᠡ ᠦᠰᠦᠷᠦᠨ ᠪᠣᠰᠴᠤ ᠴᠠᠬᠢᠯᠭᠠᠨ ᠮᠡᠲᠦ ᠴᠠᠬᠢᠯᠤᠨ ᠣᠳᠴᠠᠢ ᠭᠡᠨᠡ᠃ ᠢᠷᠪᠢᠰ《ᠬᠠᠢᠷᠠᠨ ᠬᠣᠭᠣᠯᠠ ᠬᠠᠢᠷᠠᠨ ᠬᠣᠭᠣᠯᠠ ᠮᠢᠨᠢ》 ᠭᠡᠵᠦ ᠠᠮᠠ ᠪᠠᠨ ᠪᠠᠷᠢᠭᠠᠳ ᠬᠣᠴᠣᠷᠴᠠᠢ ᠭᠡᠨᠡ᠃ ᠢᠮᠠᠭᠠᠳᠠᠢ ᠠᠭᠤᠯᠠᠰ ᠤᠨ ᠬᠢᠷᠠ ᠳᠤ ᠭᠠᠷᠤᠭᠠᠳ 《ᠬᠣᠶᠠᠭᠤᠯᠠ ᠪᠠᠨ ᠣᠳᠣ ᠶᠠᠭᠠᠬᠢᠬᠤ ᠪᠣᠢ》 ᠭᠡᠪᠡᠯ ᠲᠡᠬᠡᠬᠦᠳᠡᠢ ᠬᠠᠲᠠᠵᠤ ᠬᠤᠭᠤᠷᠠᠭᠠᠳ ᠦᠵᠦᠭᠦᠷ ᠨᠢ ᠶᠣᠷᠳᠤᠢᠭ᠍ᠰᠠᠨ ᠮᠣᠳᠣᠨ ᠤ ᠳᠡᠷᠭᠡᠳᠡ ᠢᠷᠡᠭᠡᠳ《ᠬᠣᠶᠠᠭᠤᠯᠠ ᠪᠠᠨ ᠡᠨᠳᠡ ᠥᠨᠵᠢᠨᠡ ᠳ᠋ᠠ》 ᠭᠡᠬᠦ ᠳᠦ ᠢᠮᠠᠭᠠᠳᠠᠢ《ᠢᠷᠪᠢᠰ ᠢᠷᠡᠵᠦ ᠴᠣᠬᠢᠶᠠᠨ ᠳᠡᠭᠡᠷᠡ ᠡᠴᠡ ᠦᠰᠦᠷᠦᠭᠡᠳ ᠪᠠᠷᠢᠬᠤ ᠪᠢᠰᠢ ᠦᠦ》 ᠭᠡᠵᠦ ᠭᠡᠨᠡ᠃《ᠪᠠᠷᠢᠲᠠᠯᠠ ᠨᠢ ᠵᠠᠢ ᠴᠤ᠌ ᠪᠣᠢ ᠵᠠᠢ ᠴᠤ᠌ ᠪᠣᠢ᠂ ᠢᠷᠪᠢᠰ ᠦᠰᠦᠷᠬᠦ ᠲᠠᠢ ᠯᠡ ᠵᠡᠷᠭᠡ ᠡᠨᠡ ᠮᠣᠳᠣᠨ ᠤ ᠴᠠᠭᠠᠲᠤ ᠢᠷᠤᠭᠠᠯ ᠳᠤ ᠦᠰᠦᠷᠳᠡᠭ ᠶᠤᠮ ᠰᠢᠦ ᠳ᠋ᠠ》 ᠭᠡᠵᠦ ᠭᠡᠨᠡ᠃ ᠲᠡᠭᠡᠭᠡᠳ ᠬᠣᠶᠠᠷ ᠢᠰᠢᠭᠡ ᠬᠠᠲᠠᠭ᠍ᠰᠠᠨ ᠮᠣᠳᠣᠨ ᠤ ᠤᠢᠷᠠᠯᠴᠠᠭᠠ ᠢᠳᠡᠰᠢᠯᠡᠨ ᠪᠠᠢᠵᠠᠢ᠃ ᠢᠷᠪᠢᠰ ᠭᠡᠴᠡ ᠪᠡᠷ ᠴᠣᠬᠢᠶᠠᠨ ᠳᠡᠭᠡᠷᠡ ᠭᠠᠷᠴᠤ ᠢᠷᠡᠭᠡᠳ ᠮᠣᠳᠣᠨ ᠤ ᠬᠠᠪᠢᠴᠠᠭᠠ ᠪᠠᠷ ᠢᠳᠡᠰᠢᠯᠡᠵᠦ ᠶᠠᠪᠤᠭᠠ ᠲᠡᠳᠡᠨ ᠢ ᠬᠠᠷᠠᠭᠠᠳ《ᠬᠣᠶᠠᠷ ᠮᠠᠭᠤ ᠬᠤᠤᠬᠠᠢ ᠶᠢ ᠣᠳᠣ ᠯᠡ ᠪᠠᠷᠢᠬᠤ ᠦᠭᠡᠢ ᠪᠣᠯ ᠪᠢ ᠶᠠᠭᠤᠨ ᠤ ᠬᠦᠦ ᠪᠣᠯᠬᠤ ᠪᠣᠯ ᠳ᠋ᠠ》 ᠭᠡᠳ ᠲᠡᠳᠡᠨ ᠤᠷᠤᠭᠤ ᠦᠰᠦᠷᠲᠡᠯᠡ ᠢᠰᠢᠭᠡᠳ ᠮᠣᠳᠣᠨ ᠤ ᠢᠷᠤᠭᠠᠯ ᠳᠤ ᠢᠷᠡᠵᠦ᠂ ᠲᠡᠷᠡ ᠮᠢᠬᠠᠴᠢᠨ ᠬᠠᠲᠠᠭ᠍ᠰᠠᠨ ᠮᠣᠳᠣᠨ ᠤ ᠦᠵᠦᠭᠦᠷ ᠲᠦ ᠱᠣᠷᠤᠯᠠᠭ᠍ᠳᠠᠨ ᠦᠬᠦᠵᠡᠢ ᠭᠡᠨᠡ᠃ ᠡᠢᠨ ᠬᠦ᠌ ᠲᠡᠬᠡᠬᠦᠳᠡᠢ ᠢᠮᠠᠭᠠᠳᠠᠢ ᠬᠣᠶᠠᠷ ᠳᠠᠢᠰᠤᠨ ᠢᠶᠠᠨ ᠳᠠᠷᠤᠵᠤ ᠡᠪᠡᠰᠦᠨ ᠦ ᠰᠣᠷᠭᠣᠭ ᠢ ᠢᠳᠡᠵᠦ ᠤᠰᠤᠨ ᠤ ᠲᠤᠩᠭᠠᠯᠠᠭ ᠢ ᠤᠤᠭᠤᠵᠤ ᠠᠮᠤᠷ ᠰᠠᠢᠬᠠᠨ ᠵᠢᠷᠭᠠᠵᠠᠢ ᠭᠡᠨᠡ᠃
ᠦᠰᠦᠭ ᠬᠠᠳᠠᠭ᠍ᠰᠠᠨ ᠨᠢ᠄ ᠮᠥᠩᠭᠦᠨᠴᠡᠴᠡᠭ
ᠦᠰᠦᠭ ᠠᠮᠢᠯᠠᠭᠤᠯᠤᠭ᠍ᠰᠠᠨ ᠨᠢ᠄ ᠮᠥᠩᠭᠦᠨᠴᠡᠴᠡᠭ
ᠬᠢᠨᠠᠭ᠍ᠴᠢ ᠪᠠᠭ᠍ᠰᠢ᠄ ᠮᠥᠴᠢᠷ