ᠰᠢᠷᠠᠭᠴᠢᠨ- ᠴ ᠂ ᠯᠣᠳᠤᠶ᠋ᠢᠳᠠᠮᠪᠠ ᠶ᠋ᠢᠨ ᠦᠭᠦᠯᠡᠯᠭᠡ-ᠪᠠᠢᠭᠠᠯᠢ ᠵᠢ ᠬᠠᠮᠠᠭᠠᠯᠠᠬᠤШаргачин-Ч.Лодойдамба-өгүүллэг-Байгаль хамгаалах
961ᠰᠢᠷᠠᠭᠴᠢᠨ -ᠣᠷᠠᠯᠢᠭ ᠤᠨ ᠭᠢᠴᠢᠶᠡᠯ ᠳᠤ
ᠰᠢᠷᠠᠭᠴᠢᠨ
ᠴ ᠂ ᠯᠣᠳᠤᠢᠳᠠᠮᠪᠠ
ᠬᠠᠪᠤᠷ ᠤ᠋ᠨ ᠬᠤᠷᠴᠠ ᠨᠠᠷᠠ ᠨᠡᠯᠢᠶᠡᠳ ᠳᠡᠭᠡᠷᠡ ᠮᠠᠨᠳᠤᠭᠠᠳ ᠣᠢᠷᠠ ᠣᠷᠴᠢᠮ ᠢ᠋ ᠬᠥᠬᠡᠮᠳᠦᠭ ᠮᠠᠨᠠᠨ ᠪᠦᠷᠬᠦᠵᠦ ᠥᠷᠭᠡᠨ ᠲᠠᠯᠠ ᠳ᠋ᠤ᠌ ᠪᠠᠢᠭᠠ ᠶᠠᠭᠤᠮᠠᠰ ᠴᠥᠮ ᠵᠡᠷᠭᠡᠯᠭᠡᠨ ᠮᠡᠲᠦ ᠵᠢᠷᠪᠢᠯᠵᠡᠵᠦ ᠪᠠᠢᠯᠠ᠃
ᠴᠠᠢᠳᠠᠮ ᠬᠥᠨᠳᠡᠢ ᠶ᠋ᠢᠨ ᠵᠡᠭᠦᠨ ᠵᠠᠬᠠ ᠨᠢ ᠪᠣᠯᠤᠭᠰᠠᠨ ᠬᠡᠰᠡᠭ ᠳᠠᠷᠠᠰᠤ ᠤᠷᠤᠭᠤ ᠡᠬᠡ ᠡᠴᠡ ᠭᠠᠷᠤᠭᠠᠳ ᠬᠡᠳᠦᠬᠡᠨ ᠬᠣᠨᠣᠭᠰᠠᠨ ᠴᠠᠢᠪᠤᠷ ᠴᠠᠭᠠᠨ ᠢᠨᠵᠠᠭᠠ ᠳᠠᠭᠠᠭᠤᠯᠤᠭᠰᠠᠨ ᠰᠢᠷᠠᠭᠴᠢᠨ ᠣᠷᠣᠵᠤ ᠢᠷᠡᠯᠡ᠃
ᠢᠨᠵᠠᠭᠠ ᠨᠢ ᠲᠣᠩᠭᠣᠴᠢᠨ ᠲᠣᠭᠯᠠᠵᠤ ᠣᠷᠴᠢᠨ ᠲᠣᠭᠣᠷᠢᠨ ᠳ᠋ᠤ᠌ ᠥᠪᠡᠷ ᠡᠴᠡ ᠨᠢ ᠥᠭᠡᠷᠡ ᠶᠠᠭᠤᠮᠠ ᠦᠭᠡᠢ ᠮᠡᠲᠦ ᠪᠦᠬᠦᠨ ᠢ᠋ ᠮᠠᠷᠲᠠᠨ ᠶᠠᠪᠤᠬᠤ ᠳ᠋ᠤ᠌ ᠨᠢ ᠡᠬᠡ ᠨᠢ ᠲᠠᠯᠠ ᠪᠦᠷᠢ ᠰᠡᠷᠪᠡᠯᠵᠡᠨ ᠥᠴᠦᠬᠡᠨ ᠴᠢᠮᠡᠭᠡ ᠶ᠋ᠢ ᠴᠤ᠌ ᠰᠡᠷᠡᠮᠵᠢᠯᠡᠨ ᠴᠢᠩᠨᠠᠵᠤ ᠨᠢᠳᠦᠨ ᠳ᠋ᠦ᠍ ᠨᠢ ᠲᠤᠷᠠᠭᠰᠠᠨ ᠪᠦᠬᠦᠨ ᠢ᠋《 ᠶᠠᠭᠤ ᠪᠣᠢ! ᠶᠠᠭᠠᠬᠢᠬᠤ ᠭᠡᠵᠦ ᠪᠠᠢᠨᠠ!》ᠭᠡᠰᠡᠨ ᠪᠣᠯᠤᠯᠲᠠᠢ ᠨᠠᠷᠢᠪᠴᠢᠯᠠᠨ ᠠᠵᠢᠭᠯᠠᠵᠤ ᠶᠠᠪᠤᠨᠠ᠃
ᠤᠭᠤᠷᠠᠭ ᠨᠢ ᠳᠠᠭᠤᠰᠤᠭᠠ ᠦᠭᠡᠢ ᠥᠶᠥᠭ ᠰᠦᠨ ᠳ᠋ᠦ᠍ ᠪᠡᠨ ᠭᠡᠳᠡᠰᠦ ᠨᠢ ᠴᠠᠳᠤᠭᠰᠠ ᠠ᠋ᠴᠠ ᠴᠤ᠌ ᠶᠤᠮ ᠤᠤ? ᠨᠢᠯᠬᠠ ᠪᠡᠶᠡ ᠨᠢ ᠲᠣᠭᠯᠠᠭᠠᠮ ᠳ᠋ᠤ᠌ ᠪᠠᠨ ᠶᠠᠳᠠᠷᠠᠭᠰᠠᠨ ᠠ᠋ᠴᠠ ᠴᠤ᠌ ᠶᠤᠮ ᠤᠤ? ᠠᠯᠢ ᠵᠠᠭᠤ ᠵᠠᠭᠤᠨ ᠵᠢᠯ ᠢ᠋ᠶ᠋ᠡᠷ ᠦᠷᠭᠦᠯᠵᠢᠯᠡᠭᠰᠡᠨ ᠬᠠᠲᠠᠭᠤ ᠠᠮᠢᠳᠤᠷᠠᠯ ᠤ᠋ᠨ ᠰᠤᠷᠭᠠᠯ ᠴᠤ᠌ ᠶᠤᠮ ᠤᠤ? ᠪᠤᠤ ᠮᠡᠳᠡ᠂ ᠶᠠᠭᠤ ᠴᠤ᠌ ᠭᠡᠰᠡᠨ ᠳᠡᠷᠡᠰᠦᠨ ᠳ᠋ᠦ᠍ ᠣᠷᠣᠭᠰᠠᠨ ᠤ᠋ ᠳᠠᠷᠠᠭᠠ ᠤᠳᠠᠯ ᠦᠭᠡᠢ ᠢᠨᠵᠠᠭᠠ ᠨᠢ ᠨᠢᠭᠤᠭᠳᠠᠨ ᠤᠨᠲᠠᠪᠠ᠃
ᠶᠡᠷᠦ ᠨᠢ ᠰᠢᠷᠠᠭᠴᠢᠨ ᠡᠳᠦᠷ ᠦ᠋ᠨ ᠴᠠᠭ ᠲᠤ᠌ ᠨᠢᠯᠬᠠ ᠢᠨᠵᠠᠭᠠ ᠪᠠᠨ ᠪᠤᠲᠠ ᠪᠤᠶᠤ ᠳᠡᠷᠡᠰᠦᠨ ᠳ᠋ᠦ᠍ ᠬᠢᠷᠤᠭᠯᠠᠵᠤ ᠨᠢᠭᠤᠭᠠᠳ ᠥᠪᠡᠷ ᠢ᠋ᠶ᠋ᠡᠨ ᠰᠢᠨᠡᠬᠡᠨ ᠤᠷᠭᠤᠭᠰᠠᠨ ᠨᠣᠭᠣᠭᠠ ᠴᠢᠮᠬᠢᠯᠡᠨ ᠢᠳᠡᠳᠡᠭ᠃ ᠡᠨᠡ ᠦᠶᠡ ᠳ᠋ᠦ᠍ ᠶᠠᠮᠠᠷ ᠨᠢᠭᠡᠨ ᠠᠶᠤᠯ ᠢᠷᠡᠪᠡᠯ ᠬᠤᠷᠳᠤᠨ ᠬᠥᠯ ᠦ᠋ᠨ ᠬᠦᠴᠦ ᠪᠡᠷ ᠳᠠᠭᠠᠭᠤᠯᠤᠨ ᠵᠢᠭᠤᠲᠠᠵᠤ ᠲᠥᠭᠡᠷᠢᠭᠦᠯᠦᠨ ᠡᠷᠭᠢᠵᠦ ᠢᠷᠡᠵᠦ ᠤᠨᠲᠠᠵᠤ ᠬᠣᠴᠣᠷᠤᠭᠰᠠᠨ ᠦᠷᠡ ᠳ᠋ᠦ᠍ ᠪᠡᠨ ᠠᠶᠤᠯ ᠢ᠋ ᠵᠠᠢᠯᠠᠭᠤᠯᠤᠭᠰᠠᠨ ᠪᠠᠶᠠᠷᠲᠤ ᠠᠭᠤᠯᠵᠠᠯᠲᠠ ᠪᠠᠷ᠂ ᠴᠡᠴᠡᠭᠯᠡᠭᠰᠡᠨ ᠠᠮᠢᠳᠤᠷᠠᠯ ᠢ᠋ᠶ᠋ᠠᠷ ᠠᠮᠢᠯᠠᠭᠳᠠᠭᠰᠠᠨ ᠰᠦ ᠪᠡᠨ ᠥᠭᠳᠡᠭ᠃ ᠢᠨᠵᠠᠭᠠ ᠪᠠᠨ ᠨᠢᠭᠤᠭᠰᠠᠨ ᠤ᠋ ᠳᠠᠷᠠᠭᠠ ᠰᠢᠷᠠᠭᠴᠢᠨ ᠵᠦᠭ ᠪᠦᠷᠢ ᠭᠤᠸᠠ ᠴᠢᠬᠢ ᠪᠡᠨ ᠰᠣᠭᠣᠲᠣᠭᠣᠨᠠᠭᠤᠯᠤᠨ ᠳᠡᠭᠡᠷᠡ ᠳᠡᠭᠡᠷᠡ ᠦᠰᠦᠷᠦᠨ ᠲᠣᠭᠯᠠᠳᠠᠭ᠃
ᠡᠨᠡ ᠦᠶᠡ ᠳ᠋ᠦ᠍ ᠨᠢ ᠲᠡᠭᠦᠨ ᠢ᠋ ᠪᠥᠵᠢᠭᠴᠢᠨ ᠬᠥᠮᠦᠨ ᠬᠠᠷᠠᠪᠠᠯ ᠤᠷᠠᠨ ᠬᠥᠳᠡᠯᠭᠡᠭᠡᠨ ᠦ᠌ ᠬᠤᠷᠠᠮᠳᠤᠯ ᠪᠣᠯᠤᠭᠰᠠᠨ ᠭᠣᠶᠣᠮᠰᠣᠭ ᠬᠥᠳᠡᠯᠦᠯ ᠢ᠋ ᠲᠤᠰᠬᠠᠨ ᠠᠪᠬᠤ ᠨᠢ ᠳᠠᠮᠵᠢᠭ ᠦᠭᠡᠢ ᠪᠢᠯᠡ᠃
ᠨᠥᠭᠦᠭᠡ ᠰᠢᠷᠠᠭᠴᠢᠨ ᠴᠣᠪᠬᠣᠷᠠᠨ ᠬᠠᠷᠠᠢᠯᠠᠨ ᠳᠡᠭᠳᠡᠵᠦ ᠬᠡᠰᠡᠭ ᠲᠣᠭᠯᠠᠭᠠᠳ ᠬᠤᠷᠴᠠ ᠦᠨᠦᠷ ᠨᠢ ᠬᠠᠮᠠᠷ ᠤᠷᠤᠭᠤ ᠴᠣᠷᠭᠢᠭᠰᠠᠨ ᠰᠣᠶᠣᠭᠠᠯᠠᠵᠤ ᠪᠠᠢᠭᠠ ᠨᠢᠯᠬᠠ ᠳᠠᠭᠠᠨᠠ ᠶ᠋ᠢ ᠠᠮᠲᠠᠷᠬᠠᠨ ᠢᠳᠡᠪᠡ᠃
ᠭᠡᠲᠡᠯᠡ ᠰᠢᠷᠠᠭᠴᠢᠨ ᠤ᠋ ᠬᠠᠵᠠᠭᠤ ᠪᠠᠷ ᠭᠠᠷᠤᠭᠰᠠᠨ ᠵᠠᠮ ᠢ᠋ᠶ᠋ᠠᠷ ᠵᠢᠯᠣᠭᠣᠴᠢ ᠠ᠋ᠴᠠ ᠭᠠᠳᠠᠨᠠ ᠭᠤᠷᠪᠠᠨ ᠵᠤᠭᠠᠯᠠᠭᠴᠢ ᠰᠠᠭᠤᠭᠰᠠᠨ ᠮᠠᠰᠢᠨ ᠲᠣᠭᠣᠰᠣ ᠮᠠᠨᠠᠷᠠᠭᠤᠯᠤᠨ ᠳᠠᠪᠬᠢᠵᠤ ᠢᠷᠡᠯᠡ᠃
ᠬᠤᠷᠳᠤᠯᠠᠨ ᠶᠠᠪᠤᠭᠠ ᠮᠠᠰᠢᠨ ᠳᠣᠲᠣᠷᠠ ᠠᠷᠢᠬᠢᠨ ᠤ᠋ ᠡᠬᠡᠭᠦᠨ ᠦᠨᠦᠷ᠂ ᠲᠠᠮᠠᠬᠢᠨ ᠤ᠋ ᠭᠠᠰᠢᠭᠤᠨ ᠤᠲᠤᠭᠠ ᠲᠠᠢ ᠬᠣᠯᠢᠯᠳᠤᠨ ᠬᠠᠩᠬᠤᠯᠵᠤ᠂ ᠵᠢᠯᠣᠭᠣᠴᠢ ᠶ᠋ᠢᠨ ᠠᠷᠤ ᠲᠠᠯᠠ ᠳ᠋ᠤ᠌ ᠰᠠᠭᠤᠭᠰᠠᠨ ᠬᠥᠮᠦᠨ ᠡᠴᠡ ᠪᠤᠰᠤᠳ ᠨᠢ ᠨᠡᠯᠢᠶᠡᠳ ᠰᠣᠭᠲᠣᠭᠰᠠᠨ ᠲᠤᠯᠠ ᠨᠢᠳᠦ ᠨᠢ ᠴᠢᠭᠯᠡᠭᠰᠡᠨ ᠶᠠᠭᠤᠮᠠ ᠦᠭᠡᠢ ᠭᠥᠯᠢᠯᠵᠡᠨ ᠡᠷᠡᠭᠡᠯᠵᠡᠵᠦ ᠲᠣᠯᠣᠭᠠᠢ ᠨᠢ ᠮᠣᠲ᠋ᠣᠷ ᠤ᠋ᠨ ᠵᠢᠭᠳᠡ ᠠᠵᠢᠯᠯᠠᠭᠠ ᠲᠠᠢ ᠴᠣᠬᠢᠯᠲᠠ ᠨᠡᠢᠯᠡᠭᠦᠯᠬᠦ ᠭᠡᠰᠡᠨ ᠶᠦᠮ ᠰᠢᠭ ᠬᠠᠶᠠᠯᠠᠨ ᠭᠠᠩᠬᠤᠵᠤ ᠶᠠᠪᠤᠯᠠ᠃
ᠬᠡᠷᠪᠡ ᠵᠢᠯᠣᠭᠣᠴᠢ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠰᠠᠭᠤᠭᠴᠢ ᠲᠠᠮᠠᠬᠢ ᠪᠠᠨ ᠨᠣᠴᠣᠭᠠᠬᠤ ᠬᠡᠷᠡᠭ ᠭᠠᠷᠤᠭᠠ ᠦᠭᠡᠢ ᠪᠣᠯ ᠰᠢᠷᠠᠭᠴᠢᠨ ᠡᠬᠡ ᠦᠷᠡ ᠬᠣᠶᠠᠷ ᠭᠠᠰᠢᠭᠤᠨ ᠵᠣᠪᠠᠯᠠᠩ ᠳ᠋ᠤ᠌ ᠤᠴᠠᠷᠠᠯ ᠦᠭᠡᠢ ᠥᠩᠭᠡᠷᠡᠭᠴᠢ ᠪᠣᠯᠬᠤ ᠪᠠᠢᠭᠰᠠᠨ ᠪᠢᠯᠡ᠃ ᠭᠡᠲᠡᠯᠡ ᠲᠠᠮᠠᠬᠢ ᠪᠠᠨ ᠨᠣᠴᠣᠭᠠᠯᠭᠠᠬᠤ ᠭᠡᠵᠦ ᠵᠢᠯᠣᠭᠣᠴᠢ ᠤᠷᠤᠭᠤ ᠡᠭᠴᠡᠯᠡᠨ ᠬᠠᠷᠠᠭᠰᠠᠨ ᠨᠢᠳᠦᠨ ᠦ᠌ ᠨᠢ ᠦᠵᠦᠭᠦᠷ ᠲᠦ᠍᠂ ᠲᠠᠯᠠ ᠳ᠋ᠤ᠌ ᠢᠳᠡᠵᠦ ᠪᠠᠢᠭᠠ ᠭᠠᠭᠴᠠ ᠰᠢᠷᠠᠭᠴᠢᠨ ᠬᠠᠷᠠᠭᠳᠠᠪᠠ᠃
《ᠵᠡᠭᠡᠷᠡ!》 ᠭᠡᠵᠦ ᠬᠠᠰᠬᠢᠷᠬᠤ ᠳ᠋ᠤ᠌ ᠶᠠᠭ ᠬᠣᠢᠨᠠ ᠨᠢ ᠰᠠᠭᠤᠭᠴᠢ ᠤᠬᠤᠰᠬᠢᠨ᠄
《ᠬᠠᠮᠢᠭᠠ?》 ᠭᠡᠵᠦ ᠬᠠᠷᠢᠭᠤ ᠬᠠᠰᠬᠢᠷᠤᠭᠠᠳ ᠨᠣᠢᠷᠮᠤᠭ ᠨᠢᠳᠦ ᠪᠡᠷ ᠲᠠᠯᠠ ᠪᠦᠬᠦᠨ ᠤᠷᠤᠭᠤ ᠪᠠᠨ ᠬᠠᠷᠠᠯᠠ᠃
《ᠢᠨᠵᠠᠭᠠ ᠲᠠᠢ ᠰᠢᠷᠠᠭᠴᠢᠨ ᠪᠣᠯᠤᠯᠲᠠᠢ᠃ ᠲᠡᠭᠡᠭᠡᠳ ᠡᠳᠦᠢ ᠳ᠋ᠦ᠍ ᠴᠠᠭᠠᠵᠠᠯᠠᠭᠰᠠᠨ ᠰᠢᠦ ᠳᠡ 》ᠭᠡᠵᠦ ᠵᠢᠯᠣᠭᠣᠴᠢ ᠶ᠋ᠢᠨ ᠠᠷᠤ ᠳ᠋ᠤ᠌ ᠰᠠᠭᠤᠭᠴᠢ ᠬᠡᠯᠡᠪᠡ᠃
《ᠵᠤᠭᠠᠯᠠᠵᠤ ᠶᠠᠪᠤᠭᠠ ᠪᠢᠳᠡᠨ ᠳ᠋ᠦ᠍ ᠶᠠᠮᠠᠷ ᠬᠠᠮᠢᠶᠠ ᠲᠠᠢ ᠶᠤᠮ ᠪᠣᠢ᠃ ᠫᠤᠤᠳᠠᠵᠤ ᠯᠠ ᠪᠠᠢᠪᠠᠯ ᠪᠠᠷᠠᠪᠠ᠃ ᠵᠠ ᠪᠡᠯᠡᠳᠬᠡᠭᠡᠷᠡᠢ 》ᠭᠡᠵᠦ ᠵᠢᠯᠣᠭᠣᠴᠢ ᠨᠢ ᠬᠡᠯᠡᠭᠡᠳ ᠮᠠᠰᠢᠨ ᠢ᠋ᠶ᠋ᠠᠨ ᠡᠷᠭᠢᠭᠦᠯᠵᠦ ᠴᠢᠮᠡᠭᠡᠨ ᠡᠴᠡ ᠴᠣᠴᠢᠨ ᠰᠡᠷᠡᠮᠵᠢᠯᠡᠭᠰᠡᠨ ᠰᠢᠷᠠᠭᠴᠢᠨ ᠤ᠋ ᠵᠦᠭ ᠬᠤᠷᠳᠤᠯᠠᠨ ᠳᠠᠪᠬᠢᠯᠠ᠃
《ᠬᠠᠤᠯᠢ ᠪᠡᠶᠡᠯᠡᠭᠦᠯᠬᠦ ᠶ᠋ᠢᠨ ᠲᠤᠯᠠᠳᠠ ᠭᠠᠷᠤᠭᠰᠠᠨ ᠬᠠᠤᠯᠢ ᠶ᠋ᠢ ᠬᠠᠷᠢᠨ ᠪᠡᠶᠡᠯᠡᠭᠦᠯᠬᠦ ᠦᠭᠡᠢ ᠪᠣᠯ ᠬᠠᠷᠢᠭᠤᠴᠠᠯᠭᠠ ᠪᠠᠢᠳᠠᠭ ᠰᠢᠦ ᠳᠡ》 ᠭᠡᠵᠦ ᠵᠢᠯᠣᠭᠣᠴᠢ ᠶ᠋ᠢᠨ ᠠᠷᠤ ᠳ᠋ᠤ᠌ ᠰᠠᠭᠤᠭᠴᠢ ᠬᠡᠯᠡᠭᠰᠡᠨ ᠳ᠋ᠦ᠍
《ᠵᠠ ᠡᠨᠡ ᠴᠢᠨᠢ ᠬᠠᠤᠯᠢ ᠬᠠᠮᠠᠭᠠᠯᠠᠭᠴᠢ ᠭᠠᠷᠪᠠ ᠪᠣᠯᠤᠯᠲᠠᠢ》 ᠭᠡᠵᠦ ᠵᠢᠯᠣᠭᠣᠴᠢ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠰᠠᠭᠤᠭᠴᠢ ᠬᠡᠯᠡᠭᠡᠳ ᠶᠡᠬᠡ ᠬᠥᠭᠵᠢᠯᠲᠡᠢ ᠢᠨᠢᠶᠡᠭᠰᠡᠨ ᠢ᠋ᠶ᠋ᠡᠨ᠃
《ᠵᠠ ᠬᠥᠭᠡᠭᠡᠭᠡᠳ》 ᠭᠡᠵᠦ ᠬᠡᠯᠡᠪᠡ᠃ ᠠᠭᠤᠯᠠ ᠲᠠᠯᠠ ᠳ᠋ᠤ᠌ ᠨᠢ ᠢᠨᠵᠠᠭᠠ ᠨᠢ ᠤᠨᠲᠠᠵᠤ ᠪᠠᠢᠭᠠ ᠲᠤᠯᠠ ᠢᠷᠡᠵᠦ ᠪᠠᠢᠭᠠ ᠠᠶᠤᠯ ᠢ᠋ ᠬᠣᠯᠠᠳᠤᠭᠤᠯᠤᠨ ᠵᠠᠢᠯᠠᠭᠤᠯᠬᠤ ᠭᠡᠵᠦ ᠰᠢᠷᠠᠭᠴᠢᠨ ᠥᠷᠭᠡᠨ ᠴᠠᠭᠠᠨ ᠲᠠᠯᠠ ᠤᠷᠤᠭᠤ ᠳᠡᠭᠳᠡᠨ ᠦᠰᠦᠷᠴᠦ ᠭᠤᠸᠠ ᠴᠢᠬᠢ ᠪᠡᠨ ᠪᠣᠰᠬᠠᠨ ᠰᠣᠯᠪᠢᠵᠤ ᠴᠣᠢᠯᠠᠨ ᠳᠠᠪᠬᠢᠪᠠ᠃
ᠴᠣᠩᠬᠣ ᠪᠠᠷ ᠨᠢ ᠫᠤᠤ ᠨᠤᠭᠤᠳ ᠱᠣᠷᠣᠯᠵᠠᠨ ᠭᠠᠷᠤᠭᠰᠠᠨ ᠮᠠᠰᠢᠨ᠂ ᠵᠡᠭᠡᠷᠡ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠪᠠᠢᠳᠠᠭ ᠬᠤᠷᠳᠤ ᠪᠠᠷ ᠳᠣᠪᠲᠣᠯᠤᠨ ᠢᠷᠡᠯᠡ᠃
ᠬᠤᠷᠳᠤᠨ ᠬᠥᠯ ᠳ᠋ᠡᠭᠡᠨ ᠭᠦᠨ ᠢᠲᠡᠭᠡᠭᠰᠡᠨ ᠰᠢᠷᠠᠭᠴᠢᠨ ᠳᠡᠭᠦᠯᠢᠵᠦ ᠳᠥᠷᠪᠡᠨ ᠬᠥᠯ ᠨᠢ ᠭᠠᠵᠠᠷ ᠬᠦᠷᠴᠦ ᠪᠠᠢᠭᠠ ᠡᠰᠡᠬᠦ ᠨᠢ ᠦᠯᠦ ᠮᠡᠳᠡᠭᠳᠡᠨ ᠬᠤᠷᠳᠤᠯᠠᠪᠠ᠃ ᠭᠡᠪᠡᠴᠦ ᠡᠨᠡ ᠤᠳᠠᠭᠠ ᠲᠡᠭᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠡᠴᠦᠰ ᠲᠡᠭᠡᠨ ᠡᠴᠡᠳᠡᠭ ᠪᠤᠯᠴᠢᠩ ᠰᠢᠷᠪᠥᠰᠥ ᠲᠡᠢ ᠠᠮᠢᠲᠠᠨ ᠬᠥᠭᠡᠭᠡᠵᠦ ᠪᠠᠢᠭᠠ ᠪᠢᠰᠢ ᠡᠴᠡᠬᠦ ᠴᠤᠴᠠᠬᠤ ᠶ᠋ᠢ ᠦᠯᠦ ᠮᠡᠳᠡᠬᠦ ᠬᠤᠷᠳᠤᠨ ᠬᠦᠯᠦᠭ ᠤᠨᠤᠵᠤ ᠪᠤᠳᠠᠭᠠᠨ ᠰᠤᠮᠤ ᠪᠠᠷ ᠵᠡᠪᠰᠡᠭᠯᠡᠭᠡᠳ ᠭᠦᠢᠴᠡᠭᠳᠡᠬᠦ ᠦᠭᠡᠢ ᠵᠣᠪᠠᠭᠠᠨ ᠵᠢᠭᠤᠲᠠᠵᠤ ᠪᠠᠢᠭᠠ ᠵᠡᠭᠡᠷᠡ ᠶ᠋ᠢ ᠶᠠᠭᠤ ᠪᠣᠯᠤᠭᠰᠠᠨ ᠴᠤ᠌ ᠠᠯᠠᠬᠤ ᠠᠩᠭᠢ ᠶ᠋ᠢᠨ ᠰᠢᠨᠤᠯ ᠣᠷᠬᠢᠯᠠᠭᠰᠠᠨ ᠳᠠᠢᠰᠤᠨ ᠮᠥᠷᠳᠡᠵᠦ ᠶᠠᠪᠤᠭᠠ ᠲᠤᠯᠠ ᠬᠡᠳᠦᠢ ᠬᠦᠴᠦ ᠲᠠᠯᠪᠢᠨ ᠬᠤᠷᠳᠤᠯᠠᠪᠠᠴᠤ ᠬᠣᠯᠠᠳᠠᠵᠤ ᠬᠣᠴᠣᠷᠬᠤ ᠦᠭᠡᠢ ᠬᠠᠷᠢᠨ ᠤᠯᠠᠮ ᠣᠢᠷᠠᠲᠤᠪᠠ᠃
ᠫᠤᠤ ᠵᠣᠭᠰᠣᠯᠲᠠ ᠦᠭᠡᠢ ᠰᠢᠬᠠᠮ ᠨᠢᠵᠢᠭᠢᠨᠡᠵᠦ ᠮᠠᠰᠢᠨ ᠤ᠋ ᠳᠣᠬᠢᠶᠠ ᠴᠢᠮᠡᠭᠡ ᠦᠷᠭᠦᠯᠵᠢᠯᠡᠨ ᠳᠤᠤᠭᠠᠷᠴᠤ ᠰᠢᠷᠠᠭᠴᠢᠨ ᠤ᠋ ᠦᠰᠦᠷᠦᠨ ᠴᠣᠢᠯᠠᠬᠤ ᠨᠢ ᠬᠣᠪᠣᠷᠳᠠᠨ ᠴᠡᠯᠮᠡᠭ ᠨᠢᠳᠦ ᠨᠢ ᠪᠦᠯᠲᠡᠭᠡᠨᠡᠨ ᠮᠠᠨᠠᠨᠲᠤᠵᠤ ᠪᠣᠰᠤᠭᠠ ᠴᠢᠬᠢ ᠨᠢ ᠠᠯᠭᠤᠷ ᠢ᠋ᠶ᠋ᠠᠷ ᠬᠣᠢᠰᠢ ᠪᠠᠨ ᠪᠠᠭᠤᠵᠤ ᠪᠠᠢᠯᠠ᠃ ᠮᠠᠰᠢᠨ ᠳᠣᠲᠣᠷᠠ ᠠ᠋ᠴᠠ 《ᠬᠠᠷᠠ ᠪᠠᠷᠮᠠ ᠴᠢᠨᠢ ᠣᠨᠣᠭᠳᠠᠬᠤ ᠦᠭᠡᠢ ᠨᠢ. ᠶᠣᠣ ᠶᠣᠣ ᠶᠠᠮᠠᠷ ᠶᠡᠬᠡ ᠳᠣᠩᠰᠣᠯᠳᠠᠭ ᠶᠤᠮ ᠪᠣᠢ᠃ ᠲᠣᠯᠣᠭᠠᠢ ᠬᠠᠭᠠᠯᠠᠴᠢᠬᠠ ᠨᠢ᠂ ᠠᠯᠢ ᠪᠣᠢ ᠰᠤᠮᠤ ᠠᠪᠤᠭᠠᠳ ᠠᠯᠢ᠃ ᠡᠮᠦᠨᠡ ᠨᠢ ᠪᠠᠷᠢᠵᠤ ᠪᠠᠢᠭᠠᠳ ᠮᠤᠯᠲᠤᠯᠵᠤ ᠣᠷᠭᠢ᠃ ᠠ ᠮᠣᠨᠳᠢ ᠠ᠋ᠴᠠ ᠪᠣᠯᠵᠤ ᠭᠠᠷ ᠢ᠋ᠶ᠋ᠠᠨ ᠰᠢᠯᠪᠤᠯᠵᠤ ᠣᠷᠬᠢᠯᠠ᠃ ᠴᠢᠮᠠᠢ ᠤᠤ ᠳᠠ》 ᠭᠡᠬᠦ ᠵᠡᠷᠭᠡ ᠳᠠᠭᠤ ᠰᠣᠨᠣᠰᠤᠭᠳᠠᠵᠤ ᠪᠠᠢᠯᠠ᠃
ᠭᠠᠭᠴᠠ ᠬᠦ᠌ ᠵᠢᠯᠣᠭᠣᠴᠢ ᠶ᠋ᠢᠨ ᠠᠷᠤ ᠳ᠋ᠤ᠌ ᠬᠥᠳᠡᠯᠦᠯ ᠦᠭᠡᠢ ᠰᠠᠭᠤᠭᠠᠳ ᠬᠥᠮᠥᠭᠡᠢ ᠪᠡᠨ ᠵᠠᠭᠤᠨ ᠰᠠᠯᠬᠢᠨ ᠳ᠋ᠤ᠌ ᠪᠠᠭᠠ ᠵᠡᠷᠭᠡ ᠭᠠᠩᠳᠠᠭᠰᠠᠨ ᠨᠢᠭᠤᠷ ᠢ᠋ᠶ᠋ᠠᠨ ᠪᠠᠷᠤᠢᠯᠭᠠᠨ᠂ ᠪᠠᠷᠢᠵᠤ ᠶᠠᠳᠠᠭᠰᠠᠨ ᠵᠠᠨᠤᠯᠬᠢᠯᠡᠯ ᠨᠢᠳᠦᠨ ᠳ᠋ᠦ᠍ ᠨᠢ ᠲᠤᠶᠠᠭᠠᠷᠠᠭᠰᠠᠨ ᠨᠢᠭᠡ ᠬᠥᠮᠦᠨ ᠳᠤᠤᠭᠠᠷᠤᠯ ᠦᠭᠡᠢ 《ᠲᠣᠯᠣᠭᠠᠢ ᠶ᠋ᠢ ᠪᠡᠨ ᠴᠣᠬᠢᠬᠤ ᠭᠠᠷ ᠢ᠋ᠶ᠋ᠠᠨ ᠰᠢᠯᠪᠤᠯᠠᠬᠤ ᠴᠢᠨᠢ ᠶᠠᠭᠤ ᠴᠤ᠌ ᠪᠢᠰᠢ᠃ ᠬᠠᠷᠢᠨ ᠭᠡᠮ ᠦᠭᠡᠢ ᠠᠮᠢᠲᠠᠨ ᠤ᠋ ᠠᠮᠢᠳᠤᠷᠠᠯ ᠢ᠋ᠶ᠋ᠠᠷ ᠬᠠᠤᠯᠢ ᠵᠥᠷᠢᠴᠡᠵᠦ ᠲᠣᠭᠯᠠᠨ ᠡᠷᠬᠢᠯᠡᠬᠦ ᠴᠢᠨᠢ ᠯᠡ ᠳᠡᠩᠳᠡᠵᠦ ᠪᠠᠢᠨᠠ 》ᠭᠡᠵᠦ ᠰᠡᠳᠬᠢᠯ ᠳ᠋ᠦ᠍ ᠪᠡᠨ ᠳᠠᠬᠢᠨ ᠳᠠᠬᠢᠨ ᠰᠢᠪᠡᠨᠡᠨ ᠶᠠᠪᠤᠵᠠᠢ᠃
ᠦᠨᠡᠨ ᠳ᠋ᠡᠭᠡᠨ ᠬᠥᠭᠡᠭᠡᠭᠴᠢᠳ ᠲᠦ᠍ ᠡᠨᠡ ᠶᠠᠪᠤᠳᠠᠯ ᠪᠣᠭᠣᠨᠢ ᠬᠤᠭᠤᠴᠠᠭᠠᠨ ᠤ᠋ ᠬᠥᠭᠵᠢᠯᠲᠡᠢ ᠲᠣᠬᠢᠶᠠᠯ ᠪᠠᠢᠭᠰᠠᠨ ᠪᠣᠯ ᠰᠢᠷᠠᠭᠴᠢᠨ ᠳ᠋ᠤ᠌ ᠬᠣᠶᠠᠷ ᠠᠮᠠ ᠶ᠋ᠢᠨ ᠲᠥᠯᠥᠭᠡ ᠬᠢᠵᠦ ᠪᠠᠢᠭᠠ ᠰᠢᠷᠦᠭᠦᠨ ᠲᠡᠮᠡᠴᠡᠯ ᠪᠠᠢᠵᠠᠢ᠃ ᠰᠢᠷᠠᠭᠴᠢᠨ ᠠᠭᠤᠯᠠ ᠤᠷᠤᠭᠤ ᠵᠢᠭᠤᠲᠠᠭᠰᠠᠨ ᠪᠣᠯ ᠡᠳᠦᠢ ᠳ᠋ᠦ᠍ ᠮᠥᠷᠳᠡᠭᠴᠢ ᠡᠴᠡ ᠪᠡᠨ ᠰᠠᠯᠵᠤ᠂ ᠬᠥᠰᠢᠭᠰᠡᠨ ᠪᠤᠯᠴᠢᠩ ᠢ᠋ ᠪᠡᠨ ᠠᠮᠠᠷᠠᠭᠤᠯᠤᠭᠠᠳ ᠬᠢᠷᠤᠭᠰᠠᠨ ᠦᠷᠡ ᠤᠷᠤᠭᠤ ᠪᠠᠨ ᠬᠡᠯᠲᠦᠷᠢᠨ ᠶᠠᠪᠤᠵᠤ ᠪᠣᠯᠬᠤ ᠰᠠᠨ ᠪᠢᠯᠡ᠃ ᠭᠡᠲᠡᠯᠡ ᠰᠢᠷᠠᠭᠴᠢᠨ ᠬᠥᠭᠡᠬᠦ ᠲᠣᠰᠤᠮ ᠵᠠᠬᠠ ᠬᠢᠵᠠᠭᠠᠷ ᠨᠢ ᠦᠯᠦ ᠮᠡᠳᠡᠭᠳᠡᠬᠦ ᠥᠷᠭᠡᠨ ᠲᠠᠯᠠ ᠶ᠋ᠢᠨ ᠭᠦᠨ ᠤᠷᠤᠭᠤ ᠲᠡᠮᠡᠦᠯᠵᠦ ᠪᠠᠢᠪᠠ᠃ ᠬᠡᠴᠢᠨᠡᠨ ᠺᠢᠯᠣᠮᠧᠲ᠋ᠷ ᠬᠥᠭᠡᠭᠡᠭᠰᠡᠨ ᠢ᠋ ᠬᠡᠨ ᠴᠦ᠍ ᠬᠡᠮᠵᠢᠭᠰᠡᠨ ᠦᠭᠡᠢ᠃ ᠬᠡᠳᠦ ᠳᠠᠬᠢᠨ ᠫᠤᠤᠳᠠᠭᠰᠠᠨ ᠢ᠋ ᠬᠡᠨ ᠴᠦ᠍ ᠲᠣᠭᠠᠯᠠᠭᠰᠠᠨ ᠦᠭᠡᠢ᠃ ᠡᠴᠦᠰ ᠲᠡᠭᠡᠨ ᠰᠢᠷᠠᠭᠴᠢᠨ ᠬᠣᠶᠠᠷ ᠴᠢᠬᠢ ᠪᠡᠨ ᠰᠢᠯᠢᠨ ᠳ᠋ᠦ᠍ ᠪᠡᠨ ᠨᠠᠭᠠᠵᠤ ᠠᠮᠠ ᠪᠠᠨ ᠠᠩᠭᠠᠢᠨ ᠪᠣᠭᠣᠨᠢᠬᠠᠨ ᠰᠡᠭᠦᠯ ᠢ᠋ᠶ᠋ᠡᠨ ᠬᠠᠪᠴᠢᠨ ᠲᠠᠪᠠᠯᠠᠨ ᠤᠷᠤᠰᠬᠤ ᠵᠢᠭᠳᠡ ᠬᠥᠳᠡᠯᠭᠡᠭᠡᠨ ᠢ᠋ᠶ᠋ᠡᠨ ᠠᠯᠳᠠᠵᠤ᠂ ᠥᠨᠳᠡᠭᠡᠨᠡᠨ ᠴᠣᠭᠭᠢᠬᠤ ᠪᠤᠶᠤ ᠵᠠᠷᠢᠮ ᠳ᠋ᠤ᠌ ᠪᠠᠨ ᠪᠦᠷ ᠱᠣᠭᠰᠢᠳᠠᠭ ᠪᠣᠯᠪᠠ᠃ ᠪᠤᠳᠠᠭᠠᠨ ᠰᠤᠮᠤ ᠴᠠᠢᠷᠠᠨ ᠡᠬᠢᠯᠡᠵᠦ ᠪᠠᠢᠭᠠ ᠪᠥᠭᠰᠡ ᠶ᠋ᠢ ᠨᠢ ᠰᠡᠢᠴᠢᠨ ᠤᠨᠤᠭᠠᠳ ᠬᠤᠸᠠ ᠶᠠᠭᠠᠨ ᠴᠢᠰᠤ ᠬᠣᠩᠭᠠ ᠶ᠋ᠢ ᠨᠢ ᠳᠠᠭᠠᠵᠤ ᠤᠷᠤᠰᠤᠨ ᠡᠬᠢᠯᠡᠪᠡ᠃ ᠭᠡᠪᠡᠴᠦ ᠰᠢᠷᠠᠭᠴᠢᠨ ᠰᠡᠭᠦᠯᠴᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠦᠴᠦ ᠶ᠋ᠢ ᠳᠠᠢᠴᠢᠯᠠᠨ ᠬᠠᠷᠠᠢᠭᠰᠠᠭᠠᠷ ᠪᠠᠢᠪᠠ᠃ ᠠᠮᠢᠳᠤᠷᠠᠯ ᠳ᠋ᠤ᠌ ᠪᠠᠨ ᠬᠡᠳᠦ ᠬᠡᠳᠦᠨ ᠢᠨᠵᠠᠭᠠ ᠶ᠋ᠢ ᠪᠣᠢᠵᠢᠭᠤᠯᠤᠨ ᠲᠣᠷᠨᠢᠭᠤᠯᠵᠤ ᠲᠦᠮᠡᠨ ᠪᠡᠷᠬᠡᠰᠢᠶᠡᠯ ᠮᠢᠩᠭᠠᠨ ᠰᠠᠭᠠᠳ ᠢ᠋ ᠳᠠᠪᠠᠵᠤ ᠭᠠᠷᠤᠭᠰᠠᠨ ᠡᠨᠡ ᠰᠢᠷᠠᠭᠴᠢᠨ ᠬᠥᠭᠡᠭᠡᠭᠰᠡᠨ ᠳᠠᠢᠰᠤᠨ ᠢ᠋ ᠬᠤᠷᠳᠤᠨ ᠬᠥᠯ ᠦ᠋ᠨ ᠢ᠋ᠶ᠋ᠡᠨ ᠬᠦᠴᠦ ᠪᠡᠷ ᠵᠠᠢᠯᠠᠭᠤᠯᠤᠭᠠᠳ ᠤᠨᠲᠠᠭᠰᠠᠨ ᠦᠷᠡ ᠳ᠋ᠦ᠍ ᠪᠡᠨ ᠡᠷᠭᠢᠨ ᠣᠴᠢᠵᠤ ᠪᠠᠢᠭᠰᠠᠨ ᠤᠳᠠᠭᠠ ᠣᠯᠠᠨᠲᠠ ᠨᠢ ᠡᠷᠡᠭᠡᠯᠵᠡᠭᠡ ᠦᠭᠡᠢ᠃ ᠤᠴᠢᠷ ᠨᠢ ᠵᠡᠭᠡᠷᠡ ᠶᠠᠮᠠᠷ ᠴᠤ᠌ ᠠᠮᠢᠲᠠᠨ ᠳ᠋ᠤ᠌ ᠥᠴᠦᠬᠡᠨ ᠴᠦ᠍ ᠬᠣᠣᠷ ᠬᠦᠷᠭᠡᠭᠡᠳᠡᠭ ᠦᠭᠡᠢ ᠪᠣᠯᠪᠠᠴᠤ᠂ ᠲᠡᠭᠦᠨ ᠦ᠌ ᠳᠠᠢᠰᠤᠨ ᠮᠤᠩᠳᠠᠬᠤ ᠪᠢᠰᠢ ᠳᠡ᠃
《ᠰᠤᠮᠤ ᠪᠠᠢᠨᠠ ᠤᠤ?》 ᠭᠡᠵᠦ ᠬᠠᠰᠬᠢᠷᠬᠤ ᠳᠠᠭᠤ ᠮᠠᠰᠢᠨ ᠳᠣᠲᠣᠷᠠ ᠠ᠋ᠴᠠ ᠬᠡᠳᠦ ᠳᠠᠬᠢᠨ ᠰᠣᠨᠣᠰᠤᠭᠳᠠᠭᠰᠠᠨ ᠢ᠋ᠶ᠋ᠠᠨ ᠬᠡᠰᠡᠭ ᠴᠢᠮᠡᠭᠡ ᠦᠭᠡᠢ ᠪᠣᠯᠤᠭᠠᠳ ᠴᠣᠩᠬᠣ ᠪᠠᠷ ᠠᠷᠵᠠᠢᠨ ᠭᠠᠷᠤᠭᠰᠠᠨ ᠫᠤᠤ ᠨᠤᠭᠤᠳ ᠢ᠋ᠶ᠋ᠠᠨ ᠲᠠᠲᠠᠵᠤ ᠠᠪᠤᠭᠠᠳ ᠬᠥᠯ ᠤᠷᠤᠭᠤ ᠪᠠᠨ ᠬᠠᠶᠠᠵᠠᠭᠠᠪᠠ᠃
《ᠵᠠ ᠣᠳᠣ ᠶᠠᠭᠠᠬᠢᠳᠠᠭ ᠪᠢᠯᠡ 》ᠭᠡᠵᠦ ᠨᠥᠭᠦᠭᠡ ᠵᠢᠯᠣᠭᠣᠴᠢ ᠶ᠋ᠢᠨ ᠳᠡᠷᠭᠡᠳᠡ ᠰᠠᠭᠤᠭᠴᠢ ᠬᠣᠭᠣᠰᠣᠨ ᠫᠤᠤ ᠪᠡᠨ ᠬᠠᠵᠠᠭᠤ ᠲᠠᠰᠢ ᠪᠠᠨ ᠬᠠᠶᠠᠬᠤ ᠵᠠᠭᠤᠷᠠ ᠬᠡᠯᠡᠪᠡ᠃
《ᠮᠠᠭᠤ ᠵᠣᠯᠢᠭ ᠢ᠋ ᠳᠠᠭᠠᠷᠢᠭᠤᠯᠵᠤ ᠤᠷᠭᠢᠶᠠ 》ᠭᠡᠵᠦ ᠵᠢᠯᠣᠭᠣᠴᠢ ᠬᠡᠯᠡᠭᠡᠳ ᠬᠤᠷᠳᠤ ᠪᠠᠨ ᠨᠡᠮᠡᠯᠡ᠃
ᠠᠮᠢᠳᠤ ᠭᠠᠷᠴᠤ ᠢᠨᠵᠠᠭᠠ ᠳ᠋ᠤ᠌ ᠪᠠᠨ ᠡᠷᠭᠢᠨ ᠣᠴᠢᠭᠠᠳ ᠢᠵᠠᠷᠠᠵᠤ ᠴᠢᠨᠦᠷᠡᠭᠰᠡᠨ ᠳᠠᠯᠠᠩ ᠢ᠋ᠶ᠋ᠠᠨ ᠬᠥᠬᠥᠭᠦᠯᠵᠦ ᠤᠴᠠᠷᠠᠯ ᠢ᠋ᠶ᠋ᠠᠷ ᠭᠡᠷᠡᠯᠲᠦᠭᠰᠡᠨ ᠬᠠᠢᠷᠠ ᠪᠠᠷ ᠢᠨᠵᠠᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠭᠣᠳᠣᠭᠣᠨᠠᠨ ᠲᠣᠭᠯᠠᠵᠤ ᠪᠠᠢᠭᠠ ᠵᠢᠵᠢᠭᠬᠡᠨ ᠰᠡᠭᠦᠯ ᠢ᠋ ᠦᠨᠦᠷᠯᠡᠬᠦ ᠬᠦᠰᠡᠯ ᠶᠡᠬᠡ ᠪᠣᠯᠪᠠᠴᠤ ᠬᠥᠰᠢᠵᠦ ᠵᠠᠩᠭᠢᠷᠠᠭᠰᠠᠨ ᠬᠥᠯ ᠨᠢ ᠤᠷᠤᠭᠰᠢ ᠪᠠᠨ ᠬᠥᠳᠡᠯᠬᠦ ᠦᠭᠡᠢ ᠪᠣᠯᠤᠭᠠᠳ ᠪᠦᠬᠦ ᠪᠡᠶᠡ ᠨᠢ ᠰᠠᠯᠭᠠᠨᠠᠨ ᠠᠮᠢᠰᠬᠤᠯ ᠨᠢ ᠴᠡᠭᠡᠵᠢᠨ ᠳ᠋ᠦ᠍ ᠪᠡᠨ ᠪᠠᠭᠠᠳᠠᠬᠤ ᠦᠭᠡᠢ ᠣᠪᠣᠯᠵᠠᠨ ᠰᠠᠢᠬᠠᠨ ᠦᠵᠡᠰᠬᠦᠯᠡᠩ ᠪᠣᠯᠤᠨ ᠰᠡᠷᠪᠡᠯᠵᠡᠵᠦ ᠪᠠᠢᠭᠰᠠᠨ ᠬᠣᠶᠠᠷ ᠴᠢᠬᠢ ᠨᠢ ᠳᠠᠷᠤᠭᠠᠰᠤ ᠪᠣᠯᠤᠨ ᠳᠡᠯᠳᠡᠭᠡᠨᠡᠭᠡᠳ ᠡᠴᠦᠰ ᠦ᠋ᠨ ᠡᠴᠦᠰ ᠲᠦ᠍ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠰᠥᠭᠥᠳᠦᠨ ᠰᠢᠷᠭᠤᠴᠢᠵᠤ ᠬᠡᠪᠲᠡᠯᠡ᠃
ᠮᠠᠰᠢᠨ ᠵᠣᠭᠰᠣᠵᠤ ᠬᠡᠳᠦᠬᠡᠨ ᠴᠠᠭ ᠵᠢᠭᠤᠲᠠᠵᠤ ᠵᠣᠪᠠᠭᠠᠭᠰᠠᠨ ᠵᠥᠷᠢᠭᠦᠳ ᠮᠠᠭᠤ ᠰᠢᠷᠠᠭᠴᠢᠨ ᠠᠮᠢᠳᠤ ᠪᠠᠷ ᠢ᠋ᠶ᠋ᠠᠨ ᠭᠠᠷᠴᠤ ᠣᠷᠣᠬᠤ ᠪᠣᠯᠤᠭᠰᠠᠨ ᠳ᠋ᠤ᠌ ᠪᠠᠶᠠᠷᠯᠠᠭᠰᠠᠨ ᠬᠣᠶᠠᠷ ᠢᠨᠢᠶᠡᠯᠳᠦᠨ ᠭᠠᠷᠴᠤ ᠢᠷᠡᠯᠡ᠃ ᠬᠡᠷᠪᠡ ᠰᠤᠪᠠᠢ ᠰᠢᠷᠠᠭᠴᠢᠨ ᠪᠤᠶᠤ ᠣᠭᠣᠨᠣ ᠪᠠᠢᠭᠰᠠᠨ ᠪᠣᠯ ᠬᠥᠰᠢᠵᠦ ᠨᠤᠭᠤᠷᠠᠭᠠᠳ ᠮᠣᠳᠣ ᠪᠣᠯᠤᠭᠰᠠᠨ ᠬᠥᠯ ᠢ᠋ᠶ᠋ᠡᠨ ᠬᠦᠴᠦᠯᠡᠨ ᠲᠡᠨᠢᠢᠯᠭᠡᠵᠦ ᠪᠣᠰᠤᠭᠠᠳ ᠵᠢᠭᠤᠲᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠭᠰᠠᠨ ᠪᠢᠵᠡ ᠃ ᠭᠡᠪᠡᠴᠦ ᠡᠨᠡ ᠰᠢᠷᠠᠭᠴᠢᠨ ᠲᠡᠢᠮᠦ ᠪᠢᠰᠢ ᠪᠣᠯᠬᠣᠷ ᠤᠬᠤᠰᠬᠢᠨ ᠪᠣᠰᠤᠭᠠᠳ ᠮᠠᠨᠠᠷᠠᠨ ᠬᠥᠬᠡᠷᠡᠵᠦ ᠪᠠᠢᠭᠠ ᠨᠢᠳᠦ ᠪᠡᠨ ᠪᠦᠯᠲᠡᠭᠡᠨᠡᠭᠦᠯᠦᠨ ᠱᠣᠭᠰᠢᠪᠠ᠃ ᠲᠡᠳᠡ ᠶᠠᠪᠠᠭᠠᠯᠠᠨ ᠬᠥᠭᠡᠭᠡᠭᠰᠡᠨ ᠪᠣᠯᠪᠠᠴᠤ ᠪᠠᠷᠢᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠭᠦᠢᠴᠡᠭᠳᠡᠬᠦ ᠦᠭᠡᠢ ᠪᠠᠢᠭᠠ ᠳ᠋ᠤ᠌ ᠨᠢ ᠠᠭᠤᠷᠯᠠᠨ ᠪᠤᠬᠢᠨᠢᠳᠤᠵᠤ ᠲᠣᠮᠣ ᠲᠣᠮᠣ ᠴᠢᠯᠠᠭᠤ ᠪᠠᠷ ᠰᠢᠳᠡᠭᠰᠡᠨ ᠪᠣᠯᠪᠠᠴᠤ ᠤᠨᠤᠭᠰᠠᠨ ᠦᠭᠡᠢ᠃ ᠲᠡᠭᠡᠭᠡᠳ ᠲᠡᠳᠡ ᠬᠠᠷᠢᠶᠠᠯ ᠲᠠᠯᠪᠢᠨ ᠪᠤᠴᠠᠵᠤ ᠮᠠᠰᠢᠨ ᠳ᠋ᠤ᠌ ᠪᠠᠨ ᠰᠠᠭᠤᠭᠠᠳ ᠳᠠᠬᠢᠨ ᠬᠥᠭᠡᠭᠡᠪᠡ᠃
ᠰᠢᠷᠠᠭᠴᠢᠨ ᠳᠠᠬᠢᠨ ᠰᠢᠷᠭᠤᠨ ᠰᠥᠭᠥᠳᠦᠨ ᠬᠡᠪᠲᠡᠪᠡ᠃ ᠮᠠᠰᠢᠨ ᠲᠡᠭᠦᠨ ᠦ᠌ ᠳᠡᠭᠡᠭᠦᠷ ᠥᠩᠭᠡᠷᠡᠬᠦ ᠳ᠋ᠦ᠍ ᠪᠡᠨ ᠥᠷᠥᠭᠡᠰᠦᠨ ᠳᠤᠭᠤᠢ ᠪᠠᠷ ᠢ᠋ᠶ᠋ᠠᠨ ᠳᠠᠭᠠᠷᠢᠯᠠ᠃ ᠮᠠᠰᠢᠨ ᠡᠷᠭᠢᠵᠦ ᠵᠣᠭᠰᠣᠬᠤ ᠳ᠋ᠤ᠌ ᠲᠡᠭᠦᠨ ᠡᠴᠡ ᠠᠩᠴᠢᠨ ᠭᠦᠢᠴᠡᠭᠳᠡᠳᠡᠭ ᠦᠭᠡᠢ ᠰᠢᠷᠠᠭᠴᠢᠨ ᠢ᠋ ᠪᠣᠰᠬᠤ ᠴᠢᠳᠠᠯ ᠦᠭᠡᠢ ᠪᠣᠯᠭᠠᠭᠰᠠᠨ ᠳ᠋ᠤ᠌ ᠪᠠᠨ ᠪᠠᠶᠠᠷᠯᠠᠨ ᠢᠨᠢᠶᠡᠯᠳᠦᠵᠦ ᠬᠥᠭᠵᠢᠯ ᠪᠣᠯᠤᠨ ᠭᠠᠷᠴᠤ ᠢᠷᠡᠯᠡ᠃ ᠲᠡᠷᠡᠢᠨ ᠬᠡᠪᠲᠡᠭᠰᠡᠨ ᠪᠥᠭᠡᠳ ᠪᠦᠬᠦ ᠪᠡᠶᠡ ᠨᠢ ᠦᠬᠦᠯ ᠦ᠋ᠨ ᠡᠮᠦᠨᠡᠬᠢ ᠴᠡᠴᠡᠷᠡᠯᠲᠡ ᠪᠡᠷ ᠲᠠᠲᠠᠩᠨᠠᠵᠤ ᠪᠠᠢᠭᠠ ᠰᠢᠷᠠᠭᠴᠢᠨ ᠡᠴᠦᠰ ᠦ᠋ᠨ ᠬᠦᠴᠦ ᠪᠡᠨ ᠳᠠᠢᠴᠢᠯᠠᠨ ᠢᠨᠵᠠᠭᠠ ᠪᠠᠨ ᠨᠢᠭᠤᠭᠰᠠᠨ ᠵᠦᠭ ᠤᠷᠤᠭᠤ ᠠᠮᠢᠳᠤᠷᠠᠯ ᠤ᠋ᠨ ᠣᠴᠢ ᠣᠷᠬᠢᠨ ᠬᠠᠶᠠᠵᠤ ᠪᠠᠢᠭᠠ ᠨᠢᠳᠦ ᠪᠡᠷ ᠬᠠᠷᠠᠯᠠ᠃
《ᠭᠦᠢᠴᠡᠭᠳᠡᠬᠦ ᠦᠭᠡᠢ ᠣᠨᠣᠭᠳᠠᠬᠤ ᠦᠭᠡᠢ ᠪᠠᠢᠬᠤ ᠴᠢᠨᠢ ᠶᠠᠭᠠᠬᠢᠪᠠ?》 ᠭᠡᠵᠦ ᠨᠢᠭᠡ ᠨᠢ ᠬᠡᠯᠡᠭᠡᠳ ᠨᠥᠭᠦᠭᠡ ᠨᠢᠭᠡ ᠨᠢ ᠰᠢᠷᠠᠭᠴᠢᠨ ᠤ᠋ ᠳᠡᠷᠭᠡᠳᠡ ᠲᠠᠰᠢᠶᠠ ᠶ᠋ᠢ ᠪᠡᠨ ᠲᠤᠯᠵᠤ ᠬᠠᠩᠬᠠᠯᠵᠠᠨ ᠵᠣᠭᠰᠣᠬᠤ ᠳ᠋ᠤ᠌ ᠰᠢᠷᠠᠭᠴᠢᠨ ᠳᠠᠬᠢᠨ ᠥᠨᠳᠡᠢᠵᠦ ᠢᠨᠵᠠᠭᠠ ᠨᠢ ᠠᠮᠤᠭᠤᠯᠠᠩ ᠰᠠᠢᠬᠠᠨ ᠤᠨᠲᠠᠵᠤ ᠪᠠᠢᠭᠠ ᠵᠦᠭ ᠤᠷᠤᠭᠤ ᠳᠠᠬᠢᠨ ᠬᠠᠷᠠᠬᠤ ᠭᠡᠲᠡᠯᠡ ᠬᠦᠨᠳᠦ ᠲᠡᠮᠦᠷ ᠡᠷᠭᠢᠭᠦᠯᠦᠭᠦᠷ ᠲᠣᠯᠣᠭᠠᠢ ᠤᠷᠤᠭᠤ ᠨᠢ ᠳᠡᠰ ᠬᠢᠲᠡᠯᠡ ᠪᠠᠭᠤᠵᠤ᠂ ᠡᠴᠦᠰ ᠦ᠋ᠨ ᠠᠮᠢᠰᠬᠤᠯ ᠨᠢ ᠲᠠᠰᠤᠷᠠᠪᠠ᠃ ᠵᠢᠯᠣᠭᠣᠴᠢ ᠨᠢᠳᠦ ᠤᠷᠤᠭᠤ ᠨᠢ ᠡᠷᠭᠢᠭᠦᠯᠦᠭᠦᠷ ᠦ᠋ᠨ ᠦᠵᠦᠭᠦᠷ ᠢ᠋ᠶ᠋ᠡᠷ ᠬᠠᠳᠬᠤᠵᠤ ᠦᠵᠡᠭᠰᠡᠨ ᠢ᠋ᠶ᠋ᠡᠨ᠄
《ᠲᠠᠯᠢᠢᠭᠴᠢ ᠪᠣᠯᠵᠠᠢ 》ᠭᠡᠳ ᠡᠪᠦᠷ ᠡᠴᠡ ᠪᠡᠨ ᠬᠢᠮᠠ ᠭᠠᠷᠭᠠᠵᠤ ᠵᠤᠯᠭᠠᠭᠠᠨ ᠢᠳᠡᠯᠡ᠃
ᠰᠢᠷᠠᠭᠴᠢᠨ ᠤ᠋ ᠴᠢᠨᠦᠷᠡᠭᠰᠡᠨ ᠳᠠᠯᠠᠩ ᠤ᠋ᠨ ᠬᠣᠶᠠᠷ ᠬᠥᠬᠥ ᠨᠢ ᠵᠢᠭᠤᠲᠠᠬᠤ ᠶ᠋ᠢᠨ ᠡᠮᠦᠨᠡ ᠰᠡᠷᠪᠡᠯᠵᠡᠨ ᠰᠣᠭᠣᠲᠣᠭᠣᠨᠠᠵᠤ ᠪᠠᠢᠭᠰᠠᠨ ᠬᠣᠶᠠᠷ ᠴᠢᠬᠢ ᠰᠢᠭ ᠨᠢ ᠪᠣᠰᠴᠤ ᠰᠡᠷᠡᠢᠭᠡᠳ ᠲᠡᠭᠦᠨ ᠡᠴᠡ ᠰᠢᠬᠠᠭᠳᠠᠨ ᠭᠠᠷᠴᠤ ᠪᠠᠢᠭᠠ ᠴᠠᠭᠠᠨ ᠰᠢᠷᠭᠠᠯ ᠰᠦ ᠨᠢ ᠡᠯᠡᠰᠦᠷᠬᠡᠭ ᠬᠥᠷᠥᠰᠥᠨ ᠳ᠋ᠦ᠍ ᠰᠢᠩᠭᠡᠨ ᠣᠷᠣᠵᠤ ᠪᠣᠷᠣᠯᠠᠭᠤᠯᠤᠨ ᠪᠠᠢᠯᠠ᠃ ᠵᠢᠯᠣᠭᠣᠴᠢ ᠶ᠋ᠢᠨ ᠳᠡᠷᠭᠡᠳᠡ ᠰᠠᠭᠤᠭᠴᠢ ᠬᠥᠳᠡᠯᠦᠯ ᠦᠭᠡᠢ ᠬᠡᠪᠲᠡᠵᠦ ᠪᠠᠢᠭᠠ ᠰᠢᠷᠠᠭᠴᠢᠨ ᠢ᠋ ᠢᠰᠬᠦᠯᠦᠨ ᠬᠥᠷᠪᠡᠭᠦᠯᠦᠭᠰᠡᠨ ᠢ᠋ᠶ᠋ᠡᠨ᠂
《ᠵᠠ ᠶᠠᠪᠤᠶᠠ᠃ ᠲᠤᠷᠠᠩᠬᠠᠢ ᠬᠥᠬᠥᠭᠦᠯ ᠰᠢᠷᠠᠭᠴᠢᠨ ᠢ᠋ᠶ᠋ᠠᠷ ᠶᠠᠭᠤ ᠬᠢᠬᠦ ᠶᠦᠮ᠃ ᠲᠠᠷᠭᠤᠨ ᠰᠠᠨ ᠪᠣᠯ ᠤᠨᠤᠭᠠ ᠵᠠᠶᠠᠭᠠ ᠶ᠋ᠢ ᠨᠢ ᠴᠢᠨᠠᠵᠤ ᠥᠭᠡᠬᠦ ᠡᠮᠬᠦᠬᠦ ᠶᠤᠮᠰᠠᠨ᠃ ᠴᠢᠮᠠ ᠳ᠋ᠤ᠌ ᠶᠠᠭᠤᠮᠠ ᠦᠯᠡᠳᠡᠭᠰᠡᠨ ᠤᠤ?》ᠭᠡᠬᠦ ᠳ᠋ᠦ᠍ ᠨᠢ ᠨᠥᠭᠦᠭᠡ ᠨᠢ᠄
《ᠬᠠᠭᠠᠰ ᠰᠢᠯ ᠶᠠᠭᠤᠮᠠ ᠦᠯᠡᠳᠡᠭᠰᠡᠨ》 ᠭᠡᠳ ᠶᠠᠭᠠᠨ ᠴᠢᠰᠤ ᠰᠢᠭᠦᠷᠴᠤ ᠪᠠᠢᠭᠠ ᠰᠢᠷᠠᠭᠴᠢᠨ ᠤᠷᠤᠭᠤ ᠠᠵᠢᠭᠯᠠᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠮᠥᠨ ᠳᠣᠬᠢ ᠫᠤᠤᠳᠠᠵᠤ ᠰᠢᠦ ᠭᠡᠳ ᠪᠠᠷᠳᠠᠮ ᠭᠡᠭᠴᠢ ᠨᠢ ᠢᠨᠢᠶᠡᠮᠰᠦᠭᠯᠡᠪᠡ᠃ ᠲᠡᠭᠡᠭᠡᠳ ᠲᠡᠳᠡ ᠮᠠᠰᠢᠨ ᠳ᠋ᠤ᠌ ᠪᠠᠨ ᠰᠠᠭᠤᠵᠤ ᠶᠠᠪᠤᠬᠤ ᠳ᠋ᠤ᠌ ᠪᠠᠨ ᠵᠢᠯᠣᠭᠣᠴᠢ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠰᠠᠭᠤᠭᠴᠢ᠄
《ᠶᠠᠷᠢᠬᠤ ᠰᠣᠨᠢᠨ ᠲᠠᠢ ᠪᠣᠯᠤᠯᠠ》 ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍《ᠬᠠᠤᠯᠢ ᠵᠥᠷᠢᠴᠡᠭᠰᠡᠨ ᠲᠠ ᠨᠠᠷ ᠲᠠᠢ ᠶᠠᠷᠢᠬᠤ ᠶᠠᠭᠤᠮᠠ ᠨᠠᠳᠠ ᠪᠦᠷ ᠴᠦ᠍ ᠶᠡᠬᠡ ᠪᠣᠢ》 ᠭᠡᠵᠦ ᠵᠢᠯᠣᠭᠣᠴᠢ ᠶ᠋ᠢᠨ ᠠᠷᠤ ᠲᠠᠯᠠ ᠳ᠋ᠤ᠌ ᠰᠠᠭᠤᠭᠴᠢ ᠪᠣᠳᠣᠵᠠᠢ᠃
ᠮᠠᠰᠢᠨ ᠲᠣᠭᠣᠰᠣ ᠲᠠᠲᠠᠭᠤᠯᠤᠨ ᠬᠤᠷᠳᠤᠯᠠᠵᠤ ᠳᠠᠯᠳᠠ ᠣᠷᠣᠯᠠ᠃ ᠳᠡᠭᠡᠷᠡ ᠮᠠᠨᠳᠤᠭᠰᠠᠨ ᠨᠠᠷᠠᠨ ᠤ᠋ ᠭᠡᠷᠡᠯ ᠰᠢᠷᠠᠭᠴᠢᠨ ᠤ᠋ ᠳᠡᠭᠡᠷᠡ ᠡᠴᠡ ᠵᠢᠩᠨᠡᠨ ᠶᠠᠮᠠᠷ ᠴᠤ᠌ ᠠᠨᠢᠷ ᠴᠢᠮᠡᠭᠡ ᠦᠭᠡᠢ ᠥᠷᠭᠡᠨ ᠲᠠᠯᠠ ᠮᠡᠯᠲᠡᠢᠨ ᠲᠩᠷᠢ ᠶ᠋ᠢᠨ ᠬᠠᠶᠠᠭᠠᠨ ᠠ᠋ᠴᠠ ᠲᠣᠮᠣ ᠭᠡᠭᠴᠢ ᠶ᠋ᠢᠨ ᠬᠠᠷᠠ ᠳᠡᠰ ᠠᠯᠭᠤᠷ ᠳᠡᠪᠢᠭᠰᠡᠭᠡᠷ ᠤᠯᠠᠮ ᠲᠣᠳᠣᠷᠠᠨ ᠭᠠᠷᠴᠤ ᠢᠷᠡᠯᠡ᠃