ᠳᠠᠮᠵᠢᠭᠤᠯᠬᠤ ᠰᠲ᠋ᠠᠨᠼ - ᠴ ᠂ ᠴᠢᠮᠡᠳ Дамжуулах станц- Ч ᠂ Чимэд
261 ᠴ᠂ ᠴᠢᠮᠡᠳ
(ᠱᠣᠭ ᠥᠭᠦᠯᠡᠯᠭᠡ )
ᠳᠠᠷᠤᠭᠠ ᠶ᠋ᠢᠨ ᠠᠵᠢᠯ ᠠ᠋ᠴᠠ ᠰᠠᠢᠬᠠᠨ ᠠᠵᠢᠯ ᠠᠯᠠᠭᠠ ᠭᠡᠵᠦ ᠳ᠋ᠠᠯᡁᠠᠵᠠᠪ ᠭᠤᠸᠠᠢ ᠢᠲᠡᠭᠡᠵᠡᠢ᠃ ᠭᠡᠪᠡᠴᠦ ᠡᠨᠡ ᠥᠭᠦᠯᠡᠯᠭᠡ ᠳ᠋ᠦ᠍ ᠲᠡᠷᠡ ᠢᠲᠡᠭᠡᠯ ᠪᠠᠲᠤᠵᠢᠭᠰᠠᠨ ᠲᠤᠬᠠᠢ ᠪᠢᠰᠢ ᠬᠠᠷᠢᠨ ᠠᠯᠳᠠᠭᠳᠠᠵᠤ ᠡᠬᠢᠯᠡᠭᠰᠡᠨ ᠲᠤᠬᠠᠢ ᠥᠭᠦᠯᠡᠬᠦ ᠶᠦᠮ ᠃
ᠤᠷᠢᠳᠤ ᠪᠣᠯ ᠶᠠᠮᠠᠷ ᠨᠢᠭᠡᠨ ᠠᠰᠠᠭᠤᠳᠠᠯ ᠰᠢᠢᠳᠬᠦ ᠲᠤᠩ ᠬᠢᠯᠪᠠᠷ ᠪᠠᠢᠵᠤ ᠂ ᠳᠣᠣᠷᠠ ᠪᠠᠢᠭᠠ ᠬᠡᠳᠦᠨ ᠬᠡᠯᠲᠡᠰ ᠦ᠋ᠨ ᠳᠠᠷᠤᠭᠠ ᠵᠢᠭᠠᠪᠤᠷᠢᠯᠠᠭᠴᠢ᠂ ᠪᠠᠢᠴᠠᠭᠠᠭᠠᠴᠢ ᠨᠠᠷ ᠠᠰᠠᠭᠤᠳᠠᠯ ᠢ᠋ ᠪᠣᠯᠪᠠᠰᠤᠷᠠᠭᠤᠯᠤᠭᠠᠳ ᠥᠭᠭᠦᠨᠡ ᠃ ᠲᠡᠷᠡ ᠪᠣᠯᠪᠠᠰᠤᠷᠠᠭᠤᠯᠤᠭᠰᠠᠨ ᠵᠦᠢᠯ ᠢ᠋ ᠨᠢ ᠬᠠᠷᠢᠶᠠᠯᠠᠭᠰᠠᠨ ᠶᠠᠮᠤᠨ ᠤ᠋ ᠰᠠᠢᠳ ᠨᠠᠷ ᠲᠤ᠌ ᠳᠠᠮᠵᠢᠭᠤᠯᠤᠭᠠᠳ ᠥᠭᠭᠦᠨᠡ ᠃ ᠵᠢᠴᠢ ᠲᠡᠮᠳᠡᠭᠯᠡᠬᠦ ᠳ᠋ᠦ᠍ ᠲᠡᠷᠡ ᠭᠠᠵᠠᠷ ᠤ᠋ᠨ ᠰᠠᠢᠳ ᠨᠢ ᠪᠠᠰᠠ ᠯᠠ ᠳ᠋ᠠᠯᡁᠠᠵᠠᠪ ᠭᠤᠸᠠᠢ ᠰᠢᠭ᠋ ᠬᠥᠮᠦᠨ ᠪᠠᠢᠭᠰᠠᠨ ᠪᠣᠯᠬᠣᠷ ᠢᠶ᠋ᠠᠨ ᠶᠠᠮᠠᠷ ᠨᠢᠭᠡᠨ ᠠᠰᠠᠭᠤᠳᠠᠯ ᠲᠠᠯᠪᠢᠬᠤ ᠳ᠋ᠤ᠌ ᠂
— ᠵᠠ ᠂ ᠳᠠ ᠶᠠᠭᠤ ᠴᠤ᠌ ᠭᠡᠰᠡᠨ ᠨᠠᠭᠠᠳᠤ ᠵᠦᠢᠯ ᠢ᠋ᠶ᠋ᠡᠨ ᠣᠷᠬᠢᠴᠢᠬᠠ ᠃ ᠪᠢᠳᠡ ᠡᠭᠦᠨ ᠢ᠋ᠶ᠋ᠡᠷ ᠶᠠᠷᠢᠯᠴᠠᠵᠤ ᠪᠠᠢᠵᠤ ᠪᠣᠯᠤᠶᠠ ᠭᠡᠳᠡᠭ ᠰᠠᠨ ᠃ ᠲᠡᠭᠡᠭᠡᠳ ᠬᠡᠳᠦᠨ ᠮᠢᠨᠦ᠋ᠲ ᠪᠣᠯᠤᠭᠰᠠᠨ ᠤ᠋ ᠳᠠᠷᠠᠭᠠ ᠰᠠᠢᠳ ᠤ᠋ᠨ ᠤᠷᠲᠤ ᠰᠠᠭᠠᠷᠠᠯ ᠮᠠᠰᠢᠨ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠤ᠋ᠨ ᠣᠷᠳᠣᠨ ᠤᠷᠤᠭᠤ ᠬᠦᠩᠭᠢᠨᠡᠨ ᠬᠦᠷᠴᠦ ᠪᠠᠢᠭᠠ ᠨᠢ ᠴᠣᠩᠬᠣ ᠪᠠᠷ ᠬᠠᠷᠠᠭᠳᠠᠳᠠᠭ ᠰᠠᠨ᠃ ᠲᠡᠷᠡ ᠪᠣᠯ ᠰᠠᠶᠢ ᠶ᠋ᠢᠨ ᠲᠠᠯᠪᠢᠭᠰᠠᠨ ᠠᠰᠠᠭᠤᠳᠠᠯ 《 ᠪᠣᠯᠪᠠᠰᠤᠷᠠᠵᠤ》 ᠪᠠᠢᠭᠠ ᠶ᠋ᠢᠨ ᠲᠡᠮᠳᠡᠭ ᠪᠢᠯᠡ᠃ ᠡᠢᠮᠦᠷᠬᠦᠦ ᠪᠠᠢᠳᠠᠯ ᠢ ᠬᠠᠷᠠᠭᠠᠳ ᠳ᠋ᠠᠯᡁᠠᠵᠠᠪ 《 ᠢᠩᠭᠢᠵᠦ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠢ᠋ᠶ᠋ᠠᠷ ᠬᠠᠮᠤᠭ ᠴᠢᠬᠤᠯᠠ ᠠᠰᠠᠭᠤᠳᠠᠯ ᠰᠢᠢᠳᠪᠦᠷᠢᠯᠡᠭᠦᠯᠦᠭᠡᠳ ᠪᠠᠢᠬᠤ ᠶᠤᠮ ᠪᠣᠯ ᠪᠢ ᠴᠦ᠍ ᠭᠡᠰᠡᠨ ᠰᠠᠢᠳ ᠬᠢᠵᠦ ᠳᠦᠩᠭᠡᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ ᠃ ᠶᠡᠷᠦ ᠨᠢ ᠬᠠᠮᠲᠤ ᠶ᠋ᠢᠨ ᠤᠳᠤᠷᠢᠳᠤᠯᠭᠠ ᠭᠡᠳᠡᠭ ᠴᠢᠨᠢ ᠲᠤᠩ ᠠᠰᠢᠭᠲᠠᠢ ᠲᠤᠰᠠᠲᠠᠢ ᠵᠦᠢᠯ ᠪᠠᠢᠨᠠ ᠂ ᠬᠡᠷᠪᠡ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠤᠭ ᠠᠰᠠᠭᠤᠳᠠᠯ ᠢ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠰᠢᠢᠳᠪᠦᠷᠢᠯᠡ ᠭᠡᠰᠡᠨ ᠴᠦ᠍ ᠰᠠᠢᠳ ᠬᠥᠮᠦᠨ ᠴᠦ᠍ ᠶᠠᠭᠠᠬᠢᠬᠤ ᠪᠣᠢ ᠳᠠ ᠺᠣᠯᠯᠧᠭᠢ( ᠵᠣᠬᠢᠶᠠᠨ ᠪᠠᠢᠭᠤᠯᠤᠯᠲᠠ ) ᠂ ᠵᠥᠪᠯᠡᠯ ᠢ᠋ᠶ᠋ᠡᠷ ᠰᠢᠢᠳᠪᠦᠷᠢᠯᠡᠵᠦ ᠣᠷᠬᠢᠨᠠ 》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠣᠳᠣᠳᠠᠭ ᠪᠠᠢᠪᠠ᠃
ᠳ᠋ᠠᠯᡁᠠᠵᠠᠪ ᠭᠤᠸᠠᠢ ᠬᠡᠳᠦᠢᠨ ᠡᠴᠡ ᠬᠠᠰᠢᠷ ᠳᠣᠬᠢ ᠨᠢᠷᠤᠭᠤ ᠲᠠᠢ ᠬᠥᠮᠦᠨ ᠭᠡᠳᠡᠭ ᠨᠡᠷᠡ ᠲᠡᠢ ᠰᠠᠨᠵᠠᠢ᠃ ᠡᠨᠡ ᠨᠡᠷᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠦᠴᠦ ᠪᠡᠷ ᠣᠯᠠᠨ ᠴᠤ᠌ ᠠᠯᠪᠠᠨ ᠭᠠᠵᠠᠷ ᠲᠣᠯᠣᠭᠠᠢᠯᠠᠵᠤ ᠦᠵᠡᠯᠡ ᠃ ᠵᠢᠱ᠌ᠢᠶᠡᠯᠡᠪᠡᠯ ᠄ ᠬᠠᠷᠢᠶᠠ ᠭᠠᠵᠠᠷ ᠤ᠋ᠨ ᠣᠯᠠᠨ ᠬᠡᠯᠲᠡᠰ᠂ ᠪᠠᠢᠭᠤᠯᠭᠠ ᠶ᠋ᠢᠨ ᠳᠠᠷᠤᠭᠠ ᠨᠢ ᠶᠠᠪᠤᠭᠰᠠᠨ ᠶᠤᠮ᠃ ᠨᠢᠭᠡ ᠶ᠋ᠢᠨ ᠬᠢᠨᠢ ᠠᠵᠢᠯ ᠢ᠋ ᠳᠡᠢᠯᠬᠦ ᠦᠭᠡᠢ ᠪᠣᠯ ᠨᠥᠭᠦᠭᠡ ᠬᠡᠯᠲᠡᠰ ᠢ᠋ ᠨᠢ ᠠᠪᠳᠠᠭ ᠪᠠᠢᠵᠤ᠂ ᠡᠮᠡᠭᠲᠡᠢᠴᠦᠳ ᠦ᠋ᠨ ᠵᠥᠪᠯᠡᠯ ᠡᠴᠡ ᠪᠤᠰᠤᠳ ᠣᠯᠠᠨ ᠨᠡᠢᠲᠡ ᠶ᠋ᠢᠨ ᠪᠠᠢᠭᠤᠯᠭᠠ ᠶ᠋ᠢ ᠴᠤ᠌ ᠴᠥᠮ ᠢ᠋ ᠨᠢ ᠡᠭᠡᠯᠵᠢ ᠳᠠᠷᠠᠭᠠ ᠪᠠᠷ ᠳᠠᠷᠤᠭᠠᠯᠠᠵᠤ ᠶᠠᠪᠤᠯᠠ ᠃ ᠨᠢᠭᠡ ᠵᠢᠯ ᠨᠤᠷᠠᠭᠠᠴᠢᠬᠠᠭᠠᠳ ᠠᠰᠠᠭᠤᠳᠠᠯ ᠳᠡᠭᠳᠡᠬᠦ ᠲᠡᠢ ᠵᠡᠷᠭᠡ ᠄
— ᠶᠠᠭᠠᠬᠢᠬᠤ ᠪᠣᠢ ᠪᠣᠯᠪᠠᠰᠤᠷᠠᠯ ᠦᠭᠡᠢ ᠴᠦ᠍ ᠭᠡᠰᠡᠨ ᠲᠤᠷᠰᠢᠯᠭᠠ ᠲᠠᠢ ᠬᠥᠮᠦᠨ ᠶᠦᠮ ᠂ ᠵᠠᠢᠯᠠᠭᠤᠯ ᠥᠭᠡᠷᠡ ᠠᠵᠢᠯ ᠳ᠋ᠤ᠌ ᠲᠠᠯᠪᠢᠬᠤ ᠠ᠋ᠴᠠ ᠪᠢᠰᠢ ᠳᠡ ᠃ ᠰᠠᠩᠬᠦᠦ ᠶ᠋ᠢᠨ ᠬᠡᠯᠲᠡᠰ ᠦ᠋ᠨ ᠳᠠᠷᠤᠭᠠ ᠪᠠᠷ ᠲᠣᠮᠢᠯᠠᠬᠤ ᠤᠤ ᠳᠠ ? ᠭᠡᠵᠦ ᠰᠠᠢᠳ ᠨᠢ ᠠᠰᠠᠭᠤᠬᠤ ᠳ᠋ᠤ᠌ ᠂
— ᠤᠷᠵᠢᠨᠤᠨ ᠬᠢᠵᠦ ᠳᠡᠢᠯᠦᠭᠡ ᠦᠭᠡᠢ ᠰᠢᠦ ᠳᠡ ᠭᠡᠵᠦ ᠨᠥᠬᠥᠳ ᠨᠢ ᠬᠠᠷᠢᠭᠤᠯᠪᠠ᠃ ᠰᠠᠢᠳ ᠪᠦᠬᠦ ᠬᠡᠯᠲᠡᠰ ᠢ᠋ ᠨᠡᠷᠡᠯᠡᠭᠰᠡᠨ ᠪᠣᠯᠪᠠᠴᠤ ᠴᠥᠮ ᠢ᠋ ᠨᠢ ᠤᠷᠢᠳ ᠡᠮᠦᠨᠡ ᠬᠢᠵᠦ ᠳᠡᠢᠯᠦᠭᠡ ᠦᠭᠡᠢ ᠪᠠᠢᠪᠠ᠃ 《 ᠬᠠᠮᠢᠭᠠᠰᠢ ᠨᠢ ᠰᠢᠩᠭᠡᠭᠡᠶᠡ ᠳᠡ 》 ᠭᠡᠵᠦ ᠶᠠᠷᠢᠶᠠ ᠪᠣᠯᠵᠤ ᠪᠠᠢᠬᠤ ᠬᠣᠭᠣᠷᠣᠨᠳᠣ ᠳ᠋ᠠᠯᡁᠠᠵᠠᠪ ᠤ᠋ᠨ ᠠᠵᠢᠯᠯᠠᠳᠠᠭ ᠬᠠᠷᠢᠶᠠ ᠭᠠᠵᠠᠷ ᠤ᠋ᠨ ᠳᠠᠷᠤᠭᠠ ᠂ ᠶᠠᠮᠤᠨ ᠤ᠋ ᠨᠥᠭᠦᠭᠡ ᠨᠢᠭᠡ ᠬᠠᠷᠢᠶᠠ ᠭᠠᠵᠠᠷ ᠤ᠋ᠨ ᠳᠠᠷᠤᠭᠠ ᠪᠠᠷ ᠲᠣᠮᠢᠯᠠᠭᠳᠠᠬᠤ ᠪᠣᠯᠵᠤ 《 ᠰᠣᠬᠣᠷᠠᠭᠰᠠᠨ ᠪᠢᠰᠢ ᠵᠠᠪᠰᠢᠨᠠ 》 ᠭᠡᠳᠡᠭ ᠭᠡᠭᠴᠢ ᠪᠡᠷ ᠠᠵᠢᠯ ᠦᠭᠡᠢᠳᠡᠬᠦ ᠰᠢᠬᠠᠵᠤ ᠪᠠᠢᠭᠰᠠᠨ ᠳ᠋ᠠᠯᡁᠠᠵᠠᠪ ᠮᠠᠨᠢ ᠳᠠᠷᠤᠭᠠ ᠪᠣᠯᠤᠭᠠᠳ ᠠᠪᠴᠠᠢ᠃ ᠰᠣᠨᠢᠷᠬᠠᠯᠲᠠᠢ ᠨᠢ ᠶᠠᠭᠤ ᠪᠣᠢ ? ᠭᠡᠪᠡᠯ ᠳᠠᠷᠤᠭᠠ ᠪᠣᠯᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠠᠵᠢᠯ ᠨᠢ ᠶᠡᠬᠡ ᠯᠡ ᠬᠥᠩᠭᠡᠷᠡᠵᠦ ᠲᠣᠳᠣᠷᠬᠠᠢ ᠳᠠᠭᠠᠭᠠᠯᠭᠠᠪᠤᠷᠢ ᠪᠠᠭᠠᠳᠠᠵᠤ ᠂ ᠬᠠᠶᠠ ᠨᠢᠭᠡ ᠪᠣᠯᠪᠠᠰᠤᠷᠠᠭᠤᠯ ᠭᠡᠰᠡᠨ ᠶᠠᠭᠤᠮᠠ ᠭᠠᠷᠪᠠᠯ ᠳᠣᠣᠷᠠᠲᠤ ᠬᠥᠮᠦᠰ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠯᠡ ᠪᠡᠯᠡᠨ ᠬᠢᠯᠭᠡᠭᠡᠳ ᠰᠠᠨᠠᠭᠠ ᠠᠮᠠᠷ ᠰᠠᠭᠤᠳᠠᠭ ᠪᠣᠯᠪᠠ ᠃ 《 ᠳᠣᠣᠷᠠ ᠪᠠᠨ ᠬᠡᠳᠦᠨ ᠱᠠᠭ ᠭᠡᠰᠡᠨ ᠬᠥᠮᠦᠨ ᠲᠡᠢ ᠪᠣᠯ ᠴᠤ᠌ ᠡᠨᠡ ᠵᠡᠷᠭᠡ ᠶ᠋ᠢᠨ ᠭᠠᠵᠠᠷ ᠪᠠᠢᠲᠤᠭᠠᠢ ᠶᠠᠮᠤᠨ ᠴᠤ᠌ ᠲᠣᠯᠣᠭᠠᠢᠯᠠᠬᠤ ᠳ᠋ᠤ᠌ ᠪᠡᠯᠡᠨ ᠪᠠᠢᠨᠠ 》 ᠭᠡᠵᠦ ᠳ᠋ᠠᠯᡁᠠᠵᠠᠪ ᠳᠣᠲᠣᠷᠠ ᠪᠠᠨ ᠪᠣᠳᠣᠳᠠᠭ ᠪᠣᠯᠤᠭᠰᠠᠨ ᠪᠢᠯᠡ᠃
ᠭᠡᠪᠡᠴᠦ ᠪᠢ ᠡᠨᠡ ᠥᠭᠦᠯᠡᠭᠡ ᠳ᠋ᠦ᠍ ᠲᠡᠭᠦᠨ ᠦ᠌ ᠡᠢᠮᠦ ᠢᠲᠡᠭᠡᠯ ᠨᠢ ᠪᠠᠲᠤᠵᠢᠭᠰᠠᠨ ᠲᠤᠬᠠᠢ ᠪᠢᠰᠢ ᠬᠠᠷᠢᠨ ᠠᠯᠳᠠᠭᠳᠠᠭᠰᠠᠨ ᠲᠤᠬᠠᠢ ᠶᠠᠷᠢᠨᠠ ᠭᠡᠰᠡᠨ ᠰᠢᠦ ᠳᠡ᠃
ᠨᠢᠭᠡ ᠡᠳᠦᠷ 《 ᠠᠵᠢᠯ ᠢ᠋ᠶ᠋ᠠᠨ ᠮᠡᠳᠡᠳᠡᠭ ᠦᠭᠡᠢ 》 ᠭᠡᠳ ᠬᠠᠭᠤᠴᠢᠨ ᠰᠠᠢᠳ ᠨᠢ ᠬᠠᠯᠠᠭᠳᠠᠪᠠ᠃ ᠰᠢᠨᠡ ᠰᠠᠢᠳ ᠨᠢ ᠡᠬᠢᠯᠡᠭᠡᠳ ᠦᠭᠭᠦᠭᠰᠡᠨ ᠳᠠᠭᠠᠭᠠᠯᠭᠠᠪᠤᠷᠢ ᠶ᠋ᠢ ᠳ᠋ᠠᠯᡁᠠᠵᠠᠪ ᠭᠤᠸᠠᠢ ᠮᠥᠨ ᠯᠡ ᠬᠡᠯᠲᠡᠰ ᠦ᠋ᠨ ᠢ᠋ᠶ᠋ᠡᠨ ᠳᠠᠷᠤᠭᠠ ᠨᠠᠷ ᠢ᠋ᠶ᠋ᠠᠷ ᠬᠢᠯᠭᠡᠭᠡᠳ ᠣᠴᠢᠵᠤ ᠭᠡᠨᠡ ᠃
— ᠵᠠ ᠳ᠋ᠠᠯᡁᠠᠵᠠᠪ ᠭᠤᠸᠠᠢ ᠪᠡᠯᠡᠨ ᠪᠣᠯᠴᠢᠬᠠᠭᠰᠠᠨ ᠤᠤ ? ᠶᠠᠭᠤᠨ ᠬᠤᠷᠳᠤᠨ ᠶᠤᠮ ᠪᠣᠢ ᠭᠡᠵᠦ ᠰᠠᠢᠳ ᠠᠰᠠᠭᠤᠯᠠ ᠃
ᠪᠡᠯᠡᠨ ᠪᠡᠯᠡᠨ ᠰᠠᠢᠳ ᠠ᠋ ᠂ ᠪᠢᠳᠡ ᠭᠡᠳᠡᠭ ᠤᠯᠤᠰ ᠴᠢᠨᠢ ᠬᠡᠳᠦᠨ ᠣᠷᠣᠢ ᠨᠣᠢᠷ ᠦᠭᠡᠢ ᠬᠣᠭᠣᠯᠠ ᠦᠭᠡᠢ ᠰᠠᠭᠤᠭᠰᠠᠨ ᠤ᠋ ᠬᠦᠴᠦᠨ ᠳ᠋ᠦ᠍ ᠯᠡ ᠪᠠᠷᠠᠯᠠ ᠰᠢᠦ ᠳᠡ ᠃ ᠤᠤᠯ ᠨᠢ ᠨᠡᠭᠡᠷᠡᠨ ᠴᠦ᠍ ᠣᠯᠠᠨ ᠬᠥᠮᠦᠨ ᠢᠯᠡᠭᠦᠦ ᠴᠠᠭ ᠢ᠋ᠶ᠋ᠠᠷ ᠰᠠᠭᠤᠵᠤ ᠪᠣᠯᠪᠠᠰᠤᠷᠠᠭᠤᠯᠤᠭᠰᠠᠨ ᠵᠦᠢᠯ ᠪᠠᠢᠭᠰᠠᠨ ᠪᠥᠭᠡᠳ ᠭᠡᠮ ᠨᠢ ᠳ᠋ᠠᠯᡁᠠᠵᠠᠪ ᠭᠤᠸᠠᠢ ᠲᠡᠭᠦᠨ ᠳ᠋ᠦ᠍ ᠣᠷᠣᠯᠴᠠᠭᠠ ᠦᠭᠡᠢ ᠶᠦᠮ ᠪᠠᠢᠵᠠᠢ ᠃
ᠰᠠᠢᠳ ᠪᠡᠯᠡᠳᠬᠡᠵᠦ ᠣᠴᠢᠭᠰᠠᠨ ᠵᠦᠢᠯ ᠢ᠋ ᠨᠢ ᠤᠩᠰᠢᠵᠤ ᠵᠢᠷᠤᠭᠠᠳ ᠦᠶᠡ ᠦᠶᠡ ᠲᠣᠳᠣᠷᠠᠭᠤᠯᠤᠨ ᠠᠰᠠᠭᠤᠵᠤ ᠡᠬᠢᠯᠡᠪᠡ ᠃ ᠳ᠋ᠠᠯᡁᠠᠵᠠᠪ ᠠᠰᠠᠭᠤᠳᠠᠯ ᠢ᠋ ᠰᠠᠢᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠭᠰᠠᠨ ᠤᠴᠢᠷ ᠬᠠᠷᠢᠭᠤᠯᠬᠤ ᠴᠤ᠌ ᠦᠭᠡᠢ ᠳᠡᠮᠡᠢ ᠯᠡ ᠡᠭᠡᠷᠡᠨ ᠲᠦᠭᠳᠡᠷᠡᠵᠦ ᠬᠡᠢ ᠠᠩᠭᠠᠯᠵᠠᠬᠤ ᠠ᠋ᠴᠠ ᠴᠠᠭᠠᠰᠢ ᠭᠠᠷᠤᠭᠰᠠᠨ ᠦᠭᠡᠢ ᠃ ᠲᠠ ᠪᠢᠳᠡ ᠬᠣᠶᠠᠷ ᠪᠡᠶᠡ ᠪᠡᠶᠡ ᠪᠡᠨ ᠰᠣᠨᠢᠷᠬᠠᠨ ᠠᠩᠭᠠᠯᠵᠠᠨ ᠰᠠᠭᠤᠭᠰᠠᠨ ᠳ᠋ᠤ᠌ ᠣᠷᠣᠪᠠᠯ ᠪᠣᠯᠪᠠᠰᠤᠷᠠᠭᠤᠯᠤᠭᠰᠠᠨ ᠤᠯᠤᠰ ᠢ᠋ᠶ᠋ᠠᠨ ᠢᠷᠡᠭᠦᠯᠦᠭᠰᠡᠨ ᠨᠢ ᠳᠡᠭᠡᠷᠡ ᠶᠦᠮ ᠪᠢᠰᠢ ᠤᠤ ? ᠭᠡᠪᠡ ᠃
— ᠲᠡᠷᠡ ᠡᠳᠦᠷ ᠡᠴᠡ ᠬᠣᠢᠰᠢ ᠳ᠋ᠠᠯᡁᠠᠵᠠᠪ ᠭᠤᠸᠠᠢ ᠲᠤᠩ ᠳᠣᠬᠢ ᠦᠭᠡᠢ ᠪᠣᠯᠵᠤ 《 ᠶᠠᠭᠠᠬᠢᠶᠠ ᠳᠠ 》 ᠭᠡᠳᠡᠭ ᠠᠰᠠᠭᠤᠳᠠᠯ ᠳ᠋ᠤ᠌ ᠦᠶᠡ ᠦᠶᠡ ᠰᠡᠳᠬᠢᠯ ᠨᠢ ᠵᠣᠪᠠᠵᠤ ᠡᠬᠢᠯᠡᠪᠡ ᠃ ᠬᠠᠶᠠ ᠴᠢᠬᠤᠯᠠ ᠠᠰᠠᠭᠤᠳᠠᠯ ᠭᠠᠷᠤᠭᠠᠳ ᠰᠠᠢᠳ ᠤᠷᠤᠭᠤ ᠤᠲᠠᠰᠤᠳᠠᠭ ᠪᠠᠢᠵᠠᠢ ᠃ ᠰᠢᠨᠡ ᠰᠠᠢᠳ 《 ᠪᠡᠳᠡ ᠡᠭᠦᠨ ᠢ᠋ᠶ᠋ᠡᠨ ᠶᠠᠷᠢᠯᠴᠠᠶᠠ 》 ᠭᠡᠳᠡᠭ ᠠᠪᠤᠷᠠᠯ ᠲᠠᠢ ᠬᠠᠷᠢᠭᠤ ᠥᠭᠳᠡᠭ ᠦᠭᠡᠢ ᠭᠡᠨᠡ ᠃
— ᠡᠨᠡ ᠮᠡᠲᠦ ᠶ᠋ᠢᠨ ᠠᠰᠠᠭᠤᠳᠠᠯ ᠢ᠋ ᠲᠠ ᠥᠪᠡᠷ ᠢ᠋ᠶ᠋ᠡᠨ ᠰᠢᠢᠳᠴᠦ ᠪᠠᠢ ᠯᠠ ᠳᠠ ᠂ ᠲᠠᠨ ᠤ᠋ ᠭᠠᠵᠠᠷ ᠬᠠᠮᠤᠭ ᠮᠥᠩᠭᠥᠨ ᠵᠠᠷᠤᠳᠠᠯ ᠨᠢ ᠴᠦ᠍ ᠪᠠᠢᠭᠠ ᠃ ᠶᠠᠭᠠᠬᠢᠬᠤ ᠡᠢᠨᠬᠦ ᠮᠠᠲᠠᠯ ᠨᠢ ᠴᠦ᠍ ᠪᠠᠢᠭᠠ ᠰᠢᠦ ᠳᠡ ᠭᠡᠵᠦ ᠬᠡᠳᠦᠨ ᠤᠳᠠᠭᠠ ᠬᠠᠷᠢᠭᠤᠯᠵᠠᠢ ᠃ 《 ᠮᠥᠩᠭᠥ ᠴᠦ᠍ ᠶᠠᠭᠠᠬᠢᠬᠤ ᠪᠣᠢ ᠂ ᠮᠠᠲᠠᠯ ᠴᠤ᠌ ᠪᠣᠢ᠃ ᠲᠡᠭᠡᠬᠦ ᠳ᠋ᠡᠭᠡᠨ ᠡᠴᠦᠰ ᠦ᠋ᠨ ᠪᠦᠯᠦᠭ ᠲᠦ᠍ ᠬᠡᠨ ᠬᠠᠷᠢᠭᠤᠴᠠᠬᠤ ᠪᠣᠢ ? ᠰᠠᠢᠳ ᠤ᠋ᠨ ᠲᠤᠰᠢᠶᠠᠯ ᠂ ᠵᠢᠭᠠᠪᠤᠷᠢ ᠂ ᠠᠳᠠᠭᠯᠠᠵᠤ ᠠᠮᠠᠨ ᠰᠢᠢᠳᠪᠦᠷᠢ ᠦᠭᠡᠢ ᠪᠢ ᠶᠠᠭᠠᠬᠢᠵᠤ ᠲᠣᠯᠣᠭᠠᠢ ᠮᠡᠳᠡᠵᠦ ᠤᠯᠤᠰ ᠤ᠋ᠨ ᠥᠴᠢᠨᠡᠨ ᠲᠥᠴᠢᠨᠡᠨ ᠬᠥᠷᠥᠩᠭᠡ ᠵᠠᠷᠤᠴᠠᠭᠤᠯᠬᠤ ᠪᠢᠯᠡ 》 ᠭᠡᠵᠦ ᠳ᠋ᠠᠯᡁᠠᠵᠠᠪ ᠤᠤᠯ ᠠᠰᠠᠭᠤᠳᠠᠯ ᠢ᠋ ᠳᠠᠷᠤᠬᠤ ᠠ᠋ᠴᠠ ᠥᠭᠡᠷᠡ ᠠᠷᠭᠠ ᠦᠭᠡᠢ ᠪᠣᠯᠳᠠᠭ ᠪᠠᠢᠯᠠ ᠃ ᠭᠡᠲᠡᠯᠡ ᠳ᠋ᠠᠯᡁᠠᠯᠵᠠᠪ ᠤ᠋ᠨ ᠲᠤᠬᠠᠢ ᠣᠯᠠᠨ ᠵᠢᠯ ᠦᠷᠭᠦᠯᠵᠢᠯᠡᠭᠰᠡᠨ ᠰᠢᠭᠦᠮᠵᠢᠯᠡᠯ ᠳᠡᠭᠡᠷᠡ ᠡᠦᠲᠦ ᠪᠠᠰᠠ ᠴᠢᠬᠤᠯᠠ ᠠᠵᠢᠯ ᠳᠠᠷᠤᠭᠳᠠᠭᠤᠯᠤᠭᠰᠠᠨ ᠂ ᠪᠣᠭᠣᠭᠳᠠᠭᠤᠯᠤᠭᠰᠠᠨ ᠭᠡᠳᠡᠭ ᠰᠢᠭᠦᠮᠵᠢᠯᠡᠯ ᠨᠡᠮᠡᠭᠳᠡᠨ ᠥᠷᠨᠢᠳᠡᠭ ᠪᠣᠯᠤᠯᠠ ᠃ ᠳᠣᠣᠷᠠᠲᠤ ᠠᠵᠢᠯᠲᠠᠨ ᠨᠢ ᠬᠣᠭᠣᠷᠣᠨᠳᠣ ᠪᠠᠨ ᠶᠠᠷᠢᠯᠴᠠᠬᠤ ᠳ᠋ᠠᠭᠠᠨ ᠴᠤ᠌
— ᠮᠠᠨᠢ 《 ᠳᠠᠮᠵᠢᠭᠤᠯᠬᠤ ᠰᠲ᠋ᠠᠨᠼ》 ᠠᠳᠠᠭᠯᠠᠵᠤ ᠠᠰᠠᠭᠤᠳᠠᠯ ᠳᠠᠮᠵᠢᠭᠤᠯᠬᠤ ᠪᠠᠨ ᠴᠤ᠌ ᠪᠠᠢᠭᠰᠠᠨ ᠶᠤᠮ ᠪᠠᠢᠬᠠ ᠳᠠ ᠭᠡᠬᠦ ᠳ᠋ᠦ᠍ ᠵᠠᠷᠢᠮ ᠨᠢ ᠄
— ᠳᠠᠮᠵᠢᠭᠤᠯᠬᠤ ᠨᠢ ᠴᠦ᠍ ᠠᠵᠢᠯᠯᠠᠭᠠᠳ ᠯᠠ ᠪᠠᠢᠭᠠ ᠪᠠᠢᠬᠠ᠃ ᠬᠠᠷᠢᠨ 《 ᠬᠦᠯᠢᠶᠡᠨ ᠠᠪᠬᠤ ᠰᠲ᠋ᠠᠨᠼ ᠥᠪᠡᠷ ᠦ᠋ᠨ ᠬᠢᠨᠢ ᠠᠵᠢᠯ ᠢ᠋ ᠥᠪᠡᠷ ᠢ᠋ᠶ᠋ᠡᠷ ᠨᠢ ᠬᠢᠯᠭᠡᠬᠦ ᠭᠡᠳ ᠬᠦᠯᠢᠶᠡᠵᠦ ᠠᠪᠬᠤ ᠦᠭᠡᠢ ᠪᠠᠢᠭᠠ ᠶᠤᠮ ᠪᠠᠢᠯᠭᠦᠢ 》 ᠭᠡᠳᠡᠭ ᠪᠠᠢᠪᠠ᠃ ᠡᠨᠡ ᠶᠠᠩᠵᠤ ᠪᠠᠷ ᠦᠷᠭᠦᠯᠵᠢᠯᠡᠪᠡᠯ ᠮᠥᠨ ᠮᠠᠭᠤ ᠪᠠᠨ ᠳᠠᠭᠤᠳᠠᠭᠤᠯᠵᠤ ᠬᠠᠯᠠᠭᠳᠠᠬᠤ ᠨᠢ ᠭᠡᠳᠡᠭ ᠳ᠋ᠠᠯᡁᠠᠵᠠᠪ ᠲᠤ᠌ ᠠᠷᠭᠠ ᠦᠭᠡᠢ ᠲᠣᠳᠣᠷᠬᠠᠢ ᠪᠣᠯᠵᠠᠢ ᠃ ᠲᠡᠭᠡᠭᠡᠳ ᠨᠢᠭᠡ ᠡᠳᠦᠷ ᠳ᠋ᠠᠯᡁᠠᠵᠠᠪ ᠡᠭᠦᠳᠡ ᠪᠡᠨ ᠲᠦᠭᠵᠢᠭᠡᠳ ᠡᠷᠭᠦᠳᠡᠯ ᠪᠢᠴᠢᠵᠦ ᠡᠬᠢᠯᠡᠪᠡ ᠃《 ᠠᠵᠢᠯ ᠳ᠋ᠠᠭᠠᠨ ᠲᠡᠩᠴᠡᠬᠦ ᠦᠭᠡᠢ ᠨᠢ ᠂ ᠴᠢᠯᠥᠭᠡᠯᠡᠭᠡᠳ ᠠᠯᠢ 》 ᠭᠡᠵᠦ ᠪᠢᠴᠢᠭᠰᠡᠨ ᠭᠡᠨᠡ ᠃ ᠡᠨᠡ ᠪᠣᠯ ᠰᠡᠭᠦᠯ ᠦ᠋ᠨ ᠬᠡᠳᠦᠨ ᠵᠢᠯ ᠳ᠋ᠦ᠍ ᠠᠩᠬᠠ ᠤᠳᠠᠭᠠ ᠳᠣᠣᠷᠠᠲᠤ ᠬᠥᠮᠦᠨ ᠢ᠋ᠶ᠋ᠡᠨ ᠣᠷᠣᠭᠤᠯᠤᠯ ᠦᠭᠡᠢ ᠪᠡᠶᠡ ᠪᠡᠨ ᠳᠠᠭᠠᠵᠤ ᠪᠢᠴᠢᠭᠰᠡᠨ ᠵᠦᠢᠯ ᠪᠠᠢᠯᠠ᠃ ᠡᠢᠨ ᠬᠦ ᠳᠠᠷᠤᠭᠠ ᠬᠥᠮᠦᠨ ᠳ᠋ᠦ᠍ ᠴᠦ᠍ ᠬᠢᠬᠦ ᠠᠵᠢᠯ ᠪᠠᠢᠳᠠᠭ ᠶᠤᠮ ᠭᠡᠳᠡᠭ ᠢ᠋ ᠳ᠋ᠠᠯᡁᠠᠵᠠᠪ ᠣᠢᠯᠠᠭᠠᠵᠠᠢ ᠃ ᠬᠠᠷᠢᠨ ᠳ᠋ᠠᠯᡁᠠᠵᠠᠪ ᠰᠢᠭ᠋ ᠠᠵᠢᠯᠯᠠᠵᠤ ᠢᠷᠡᠭᠰᠡᠨ ᠪᠤᠰᠤᠳ ᠳᠠᠷᠤᠭᠠ ᠨᠠᠷ ᠲᠡᠷᠡ ᠪᠦᠷᠢ ᠶ᠋ᠢ ᠣᠢᠯᠠᠭᠠᠵᠤ ᠴᠢᠳᠠᠭᠠ ᠪᠣᠯᠪᠠ ᠤᠤ ?
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠴᠣᠯᠮᠣᠨᠲᠤᠶᠠᠭᠠ
ᠬᠢᠨᠠᠭ᠍ᠴᠢ : ᠰᠠᠷᠠᠨᠠ
2024᠂ 2᠂ 28 ᠦ᠌ ᠡᠳᠦᠷ