ᠬᠥᠮᠦᠨ ᠦ ᠪᠣᠳᠣᠯ – ᠣ᠂ ᠴᠠᠨᠳᠤᠰᠥ᠋ᠷᠦᠩ Хүний бодол – О ᠂ Цандсүрэн
269ᠬᠥᠮᠦᠨ ᠦ ᠪᠣᠳᠣᠯ
( ᠱᠣᠭ ᠥᠭᠦᠯᠡᠯᠭᠡ)
ᠣ · ᠴᠠᠨᠲᠤᠰᠦᠷᠤᠩ
ᠮᠢᠨᠦ ᠪᠡᠶᠡ ᠨᠡᠢᠰᠯᠡᠯ ᠦ᠋ᠨ ᠨᠢᠭᠡᠨ ᠪᠠᠢᠭᠤᠯᠭᠠ ᠳ᠋ᠤ᠌ ᠴᠡᠪᠡᠷᠯᠡᠭᠴᠢ ᠶ᠋ᠢᠨ ᠠᠵᠢᠯ ᠲᠠᠢ᠃ ᠳᠥᠷᠪᠡᠨ ᠴᠠᠭ ᠤ᠋ᠨ ᠡᠷᠭᠢᠯᠲᠡ ᠳ᠋ᠦ᠍ ᠴᠡᠩᠬᠡᠷ ᠬᠠᠯᠠᠲ( ᠠᠵᠢᠯ ᠤ᠋ᠨ ᠬᠤᠪᠴᠠᠰᠤ) ᠠ᠋ᠴᠠ ᠰᠠᠯᠳᠠᠭ ᠦᠭᠡᠢ᠂ ᠠᠮᠢᠳᠤᠷᠠᠯ ᠤ᠋ᠨ ᠢ᠋ᠶ᠋ᠠᠨ ᠶᠡᠬᠡᠩᠬᠢ ᠶ᠋ᠢ ᠱᠦᠭᠦᠷ ᠪᠠᠷᠢᠵᠤ ᠥᠩᠭᠡᠷᠡᠭᠰᠡᠨ᠂ ᠪᠢ ᠴᠢᠨᠢ ᠴᠡᠪᠡᠷᠯᠡᠭᠴᠢ ᠶ᠋ᠢᠨ ᠢ᠋ᠶ᠋ᠡᠨ ᠠᠵᠢᠯ ᠳ᠋ᠤ᠌ ᠪᠦᠷ ᠨᠢᠭᠡ ᠶᠠᠰᠤᠨ( ᠮᠥᠨ ᠴᠢᠨᠠᠷ) ᠠ᠋ᠴᠠ ᠪᠠᠨ ᠳᠤᠷᠠᠲᠠᠢ ᠬᠥᠮᠦᠨ ᠳᠡ᠃ ᠭᠡᠬᠦ ᠳ᠋ᠡᠭᠡᠨ ᠪᠢ ᠨᠣᠮ ᠤᠩᠰᠢᠳᠠᠭ᠂ ᠬᠥᠭᠵᠢᠵᠦ ᠨᠠᠷᠭᠢᠪᠠᠯ ᠠᠷᠠᠳ ᠤ᠋ᠨ ᠳᠠᠭᠤᠨ ᠠ᠋ᠴᠠ ᠬᠠᠲᠠᠭᠠᠭᠠᠳ ᠥᠭᠭᠦᠨᠡ ᠰᠢᠦ᠃ ᠵᠠ ᠡᠨᠡ ᠮᠡᠲᠦ ᠴᠦ᠍ ᠶᠠᠭᠠᠬᠢᠬᠤᠪ᠂ ᠥᠨᠥᠳᠥᠷ ᠵᠢᠭᠠᠬᠠᠨ ᠰᠡᠳᠬᠢᠯ ᠠᠮᠠᠷᠠᠭᠠᠳ ᠪᠠᠢᠨᠠ᠂ ᠶᠠᠭᠠᠬᠢᠭᠰᠠᠨ ᠰᠠᠢᠬᠠᠨ ᠡᠳᠦᠷ ᠪᠣᠢ᠂ ᠮᠣᠳᠣᠨ ᠤ᠋ ᠰᠢᠷᠭᠠᠯ ᠨᠠᠪᠴᠢᠰ ᠤ᠋ᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠬᠥᠬᠡ ᠲᠩᠷᠢ ᠮᠡᠯᠲᠡᠢᠭᠡᠳ᠂ ᠴᠣᠩᠬᠣ ᠪᠠᠷ ᠬᠠᠷᠠᠭᠳᠠᠬᠤ ᠪᠠᠢᠰᠢᠩ ᠤ᠋ᠨ ᠣᠷᠣᠢ ᠳᠡᠭᠡᠭᠦᠷ ᠬᠤᠷᠠᠭᠠᠨ ᠴᠠᠭᠠᠨ ᠡᠭᠦᠯᠡᠰ ᠨᠡᠭᠦᠭᠡᠳ ᠯᠡ᠁ ᠨᠠᠮᠤᠷ ᠠ᠋ ᠭᠡᠵᠦ᠁ ᠡᠢᠮᠦ ᠯᠡ ᠪᠠᠢᠳᠠᠭ ᠪᠠᠢᠵᠠᠢ ᠬᠥᠭᠡᠷᠦᠬᠦᠢ᠃
ᠪᠢ ᠭᠡᠳᠡᠭ ᠬᠥᠮᠦᠨ ᠳᠥᠷᠪᠡᠨ ᠰᠠᠷᠠ ᠶ᠋ᠢᠨ ᠲᠤᠷᠰᠢ ᠳᠠᠪᠬᠤᠷ ᠪᠠᠢᠰᠢᠩ ᠤ᠋ᠨ ᠥᠷᠥᠭᠡ ᠪᠦᠬᠦᠨ ᠢ᠋ ᠴᠡᠪᠡᠷᠯᠡᠵᠦ ᠪᠠᠢᠯᠠ ᠰᠢᠦ ᠳᠡ᠃ ᠮᠠᠨ ᠤ᠋ ᠳᠠᠷᠤᠭᠠ ᠮᠢᠨᠦ ᠬᠠᠮᠠᠷ ᠳᠡᠭᠡᠭᠦᠷ ᠲᠠᠩᠳᠠ ᠪᠤᠷᠵᠢᠢᠳᠠᠭ ᠬᠥᠯᠥᠰᠥ ᠶ᠋ᠢ ᠬᠠᠷᠠᠵᠤ《 ᠬᠥᠭᠡᠷᠦᠬᠦᠢ ᠮᠠᠭᠤ ᠰᠠᠨᠳᠠᠷ ᠭᠤᠸᠠᠢ᠁》 ᠭᠡᠵᠦ ᠦᠷᠦ ᠡᠪᠡᠳᠦᠭᠰᠡᠨ ᠶᠠᠩᠵᠤ ᠲᠠᠢ ᠬᠡᠯᠡᠳᠡᠭ ᠶᠦᠮ᠃ ᠤᠤᠯ ᠨᠢ ᠮᠠᠨ ᠤ᠋ ᠪᠠᠢᠭᠤᠯᠭᠠ ᠬᠣᠶᠠᠷ ᠴᠡᠪᠡᠷᠯᠡᠭᠴᠢ ᠲᠡᠢ᠂ ᠫᠦᠵᠡᠢ ᠭᠡᠵᠦ ᠨᠢᠭᠡ ᠶᠣᠰᠣᠲᠠᠢ《 ᠪᠣᠰᠤᠭᠠ ᠣᠷᠣᠯᠠᠩ》 ᠪᠣᠢ᠃ ᠲᠡᠷᠡ ᠬᠡᠦᠬᠡᠨ ᠤᠤᠯ ᠨᠢ ᠨᠠᠳᠠ ᠲᠠᠢ ᠴᠣᠭ ᠴᠡᠪᠡᠷᠯᠡᠭᠴᠢ ᠬᠢᠳᠡᠭ ᠤᠬᠠᠭᠠᠨ ᠲᠠᠢ᠃ ᠤᠬᠠᠭᠠᠨ ᠲᠠᠢ ᠭᠡᠰᠡᠨ ᠡᠴᠡ ᠲᠡᠷᠡ ᠮᠠᠨᠢ《 ᠡᠷᠡᠭᠦᠯ ᠭᠠᠯᠵᠠᠭᠤ》 ᠠᠮᠢᠲᠠᠨ᠂ ᠬᠥᠮᠦᠨ ᠲᠡᠢ ᠬᠡᠷᠡᠯᠳᠦᠬᠦ ᠪᠡᠷ ᠪᠣᠯ ᠬᠣᠶᠠᠷ ᠵᠠᠪᠠᠵᠢ ᠪᠠᠷ ᠨᠢ ᠥᠳᠬᠡᠨ ᠴᠠᠭᠠᠨ ᠬᠥᠭᠡᠰᠦ ᠴᠠᠬᠠᠷᠠᠭᠠᠳ ᠨᠢᠳᠦ ᠨᠢ ᠤᠯᠠᠭᠠᠨ ᠢ᠋ᠶ᠋ᠠᠷ ᠡᠷᠭᠢᠯᠳᠦᠭᠡᠳ ᠢᠷᠡᠨᠡ᠃ ᠳᠥᠩᠭᠡᠵᠦ ᠴᠡᠪᠡᠷᠯᠡᠭᠴᠢ ᠪᠡᠷ ᠣᠷᠣᠭᠰᠠᠨ ᠡᠳᠦᠷ ᠢ᠋ᠶ᠋ᠡᠨ ᠲᠡᠷᠡ ᠬᠡᠦᠬᠡᠨ ᠠᠵᠢᠯ ᠤ᠋ᠨ ᠫᠷᠤᠫᠥ᠋ᠰᠺ( ᠨᠡᠪᠲᠡᠷᠡᠬᠦ ᠦᠨᠡᠮᠯᠡᠬᠦ) ᠠᠪᠬᠤ ᠪᠣᠯᠪᠠ ᠳᠠ᠃ ᠲᠡᠭᠡᠭᠰᠡᠨ ᠴᠢᠨᠢ᠄
— ᠪᠢ ᠵᠠᠯᠠᠭᠤ ᠬᠥᠮᠦᠨ᠂《 ᠴᠡᠪᠡᠷᠯᠡᠭᠴᠢ》 ᠭᠡᠰᠡᠨ ᠦᠨᠡᠮᠯᠡᠬᠦ ᠲᠡᠢ ᠶᠠᠪᠤᠬᠤ ᠠ᠋ᠴᠠ ᠢᠴᠢᠵᠦ ᠪᠠᠢᠨᠠ᠂ ᠵᠦᠭᠡᠷ ᠯᠡ《 ᠠᠴᠢᠯᠴᠢᠨ》 ᠭᠡᠰᠡᠨ ᠦᠨᠡᠮᠯᠡᠬᠦ ᠠᠪᠤᠨᠠ ᠭᠡᠵᠦ ᠶᠠᠷᠢᠯᠠ ᠰᠢᠦ᠃ ᠴᠡᠪᠡᠷᠯᠡᠭᠴᠢ ᠶ᠋ᠢᠨ ᠠᠵᠢᠯ ᠢ᠋ ᠪᠠᠰᠤᠮᠵᠢᠯᠠᠬᠤ ᠪᠠᠷ ᠠᠭᠤᠷ ᠬᠦᠷᠦᠭᠡᠳ ᠶᠠᠪᠤᠴᠢᠬᠠᠯᠠ᠃
— ᠴᠡᠪᠡᠷᠯᠡᠭᠴᠢ ᠭᠡᠳᠡᠭ ᠰᠠᠢᠬᠠᠨ ᠠᠵᠢᠯ ᠥᠬᠢᠨ ᠮᠢᠨᠢ᠃ ᠰᠠᠢᠨ ᠬᠢᠪᠡᠯ ᠠᠯᠳᠠᠷ ᠨᠡᠷᠡ ᠴᠢᠨᠢ ᠮᠠᠨᠳᠤᠨᠠ ᠭᠡᠴᠢᠬᠡᠯᠡ᠃ ᠲᠡᠭᠡᠭᠰᠡᠨ ᠴᠢᠨᠢ ᠫᠦᠵᠡᠢ ᠲᠣᠯᠣᠭᠠᠢ ᠪᠠᠨ ᠰᠡᠩᠰᠤᠴᠢᠨ᠄
— ᠦᠭᠡᠢ ᠶᠡᠷᠦ ᠠ᠋᠂ ᠪᠦᠷ ᠴᠢᠰ ᠬᠢᠭᠰᠡᠨ ᠬᠥᠭᠰᠢᠨ ᠰᠢᠪ ᠳᠡ᠂ ᠬᠡᠯᠡᠵᠦ ᠪᠠᠢᠭᠠ ᠦᠭᠡ ᠶ᠋ᠢ ᠨᠢ ᠳᠤᠭᠤᠯᠪᠠ ᠤᠤ? ᠲᠠ ᠮᠢᠨᠢ ᠬᠢ᠂ ᠬᠢ᠂ ᠬᠢ! ᠲᠠ ᠪᠢᠳᠡ ᠬᠣᠶᠠᠷ ᠤ᠋ᠨ ᠴᠡᠪᠡᠷᠯᠡᠭᠴᠢ ᠬᠢᠭᠡᠳ ᠨᠡᠷᠡ ᠪᠡᠨ ᠮᠠᠨᠳᠤᠭᠤᠯᠬᠤ ᠨᠢ ᠴᠦ᠍ ᠭᠠᠢᠭᠤᠢ ᠬᠡᠪᠲᠡᠨᠡ ᠳᠡ᠃ ᠠᠵᠢᠯ ᠬᠢᠭᠰᠡᠨ ᠨᠡᠷᠡ ᠵᠡᠭᠦᠭᠡᠳ ᠬᠡᠳᠦᠨ ᠲᠥᠭᠥᠷᠢᠭ ᠠᠪᠬᠤ ᠨᠢ ᠴᠢᠬᠤᠯᠠ᠃ ᠶᠣᠬᠣ᠂ ᠶᠣᠬᠣ᠂ ᠶᠣᠬᠣ ᠡᠯᠢᠭᠡ ᠠᠪᠤᠭᠠᠳ ᠬᠠᠶᠠᠴᠢᠬᠠᠯᠠ ᠭᠡᠮᠡᠨ ᠪᠠᠬᠠᠨ ᠬᠥᠬᠥᠷᠡᠭᠰᠡᠨ ᠶᠦᠮ ᠳ᠋ᠠᠭ᠃
ᠬᠡᠳᠦᠢ ᠳ᠋ᠦ᠍ ᠪᠢᠯᠡ᠂ ᠪᠠᠢᠵᠠ ᠬᠦ᠂ ᠥᠩᠭᠡᠷᠡᠳᠡᠭ ᠵᠤᠨ ᠶᠤᠮ ᠪᠠᠢᠨᠠ᠃ ᠬᠣᠭ ᠴᠡᠪᠡᠷᠯᠡᠵᠦ ᠶᠠᠪᠤᠭᠰᠠᠨ ᠴᠢᠨᠢ ᠭᠡᠨᠡᠳᠲᠡ ᠡᠪᠦᠳᠦᠭ ᠦ᠋ᠨ ᠨᠢᠳᠦ ᠪᠡᠷ ᠬᠠᠳᠬᠤᠭᠠᠳ ᠪᠢ ᠤᠷᠢ ᠳᠠᠭᠤ ᠲᠠᠯᠪᠢᠭᠠᠳ ᠰᠠᠭᠤᠴᠢᠬᠠᠯᠠ᠃ ᠫᠦᠵᠡᠢ ᠨᠠᠮᠠ ᠶ᠋ᠢ ᠡᠯᠡᠭᠯᠡᠵᠦ ᠡᠪᠦᠳᠦᠭ ᠢ᠋ᠶ᠋ᠡᠨ ᠳᠠᠷᠤᠨ ᠬᠠᠵᠠᠭᠠᠨᠠᠵᠤ᠄
— ᠰᠠᠨᠳᠠᠷ ᠭᠤᠸᠠᠢ ᠬᠥᠳᠡᠯᠮᠦᠷᠢ ᠪᠡᠷ ᠢ᠋ᠶ᠋ᠡᠨ ᠠᠯᠳᠠᠷ ᠨᠡᠷᠡ ᠪᠡᠨ ᠮᠠᠨᠳᠤᠭᠤᠯᠵᠤ ᠪᠠᠢᠨᠠ ᠭᠡᠳ ᠯᠡ ᠴᠠᠭᠠᠨᠠ ᠪᠠᠨ ᠨᠢᠭᠡ ᠳᠠᠭᠠᠵᠢᠩᠲᠠᠢ ᠬᠥᠬᠥᠷᠡᠪᠡ ᠰᠢᠦ᠃ ᠭᠣᠣᠯ ᠲᠠᠰᠤᠷᠠᠲᠠᠯᠠ ᠡᠪᠡᠳᠴᠦ ᠪᠠᠢᠭᠰᠠᠨ ᠪᠣᠯᠬᠣᠷ ᠲᠡᠭᠦᠨ ᠦ᠌ ᠶᠠᠭᠤ ᠬᠡᠯᠡᠭᠰᠡᠨ ᠢ᠋ ᠬᠡᠰᠡᠭ ᠵᠠᠭᠤᠷᠠ ᠴᠢᠩᠨᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠡᠪᠡᠳᠴᠢᠨ ᠨᠠᠮᠳᠠᠬᠤ ᠪᠠᠷ ᠨᠢ᠄
— ᠪᠢ ᠴᠢᠮᠠ ᠰᠢᠭ᠋ ᠥᠬᠢᠨ ᠲᠡᠢ᠂ ᠴᠢ ᠶᠠᠭᠠᠬᠢᠭᠰᠠᠨ ᠬᠠᠴᠢᠨ ᠬᠡᠦᠬᠡᠨ ᠪᠣᠢ? ᠤᠯᠤᠰ ᠤ᠋ᠨ ᠮᠥᠩᠭᠥ ᠭᠥᠷᠳᠡᠴᠢᠬᠡᠭᠡᠳ ᠶᠠᠭᠤ ᠴᠦ᠍ ᠬᠢᠬᠦ ᠦᠭᠡᠢ ᠠᠩᠭᠠᠯᠵᠠᠭᠠᠳ ᠭᠦᠶᠦᠵᠦ ᠶᠠᠪᠤᠳᠠᠭ᠂ ᠬᠥᠭᠰᠢᠨ ᠨᠠᠮᠠ ᠶ᠋ᠢ ᠵᠠᠬᠢᠷᠬᠤ ᠠ᠋ᠴᠠ ᠢᠴᠢᠬᠦ ᠦᠭᠡᠢ ᠪᠠᠢᠨᠠ ᠤᠤ? ᠡᠨᠡ ᠴᠢᠨᠢ ᠠᠵᠢᠯ ᠬᠢᠬᠦ ᠦᠭᠡᠢ ᠬᠥᠮᠦᠨ ᠢ᠋ ᠲᠡᠵᠢᠭᠡᠵᠦ ᠪᠠᠢᠳᠠᠭ ᠭᠠᠵᠠᠷ ᠪᠢᠰᠢ ᠭᠡᠳ ᠲᠠᠯᠪᠢᠴᠢᠬᠠᠭᠰᠠᠨ ᠴᠢᠨᠢ ᠨᠥᠭᠦᠭᠡ ᠬᠡᠦᠬᠡᠨ ᠬᠠᠮᠠᠷ ᠨᠢ ᠰᠢᠷᠲᠡᠰᠬᠢᠭᠡᠳ᠄
— ᠬᠥᠭᠰᠢᠨ ᠵᠥᠨᠥᠭ ᠴᠢ ᠶᠠᠭᠤ ᠭᠡᠨᠡ᠂ ᠴᠢᠮᠠ ᠶ᠋ᠢ ᠪᠣᠳᠣᠪᠠᠯ ᠪᠢ ᠶᠠᠭᠤ ᠴᠦ᠍ ᠬᠢᠭᠰᠡᠨ ᠴᠢᠳᠠᠨᠠ᠂ ᠬᠤᠯᠠᠭᠠᠢ ᠴᠤ᠌ ᠬᠢᠭᠰᠡᠨ ᠳᠥᠩᠭᠡᠨᠡ᠂ ᠴᠢᠮᠠ ᠶ᠋ᠢ ᠭᠦᠳᠬᠡᠭᠰᠡᠨ ᠴᠦ᠍ ᠴᠢᠳᠠᠨᠠ᠃ ᠬᠠᠷᠢᠨ ᠪᠠᠷᠠᠳᠠᠬᠤ ᠨᠢ ᠪᠢᠰᠢ ᠴᠢᠳᠠᠨᠠ ᠳᠠ ᠴᠢᠳᠠᠨᠠ᠃ ᠨᠠᠳᠠ ᠳ᠋ᠤ᠌ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠲᠠᠨᠢᠯ ᠪᠠᠢᠨᠠ᠂ ᠶᠠᠮᠠᠷ ᠴᠢᠮᠠ ᠪᠠᠷ ᠲᠡᠵᠢᠭᠡᠯᠭᠡᠵᠦ ᠪᠠᠢᠭᠠ ᠪᠢᠰᠢ᠂ ᠶᠣᠰᠣᠲᠠᠢ ᠭᠠᠢ ᠦᠭᠡᠢ ᠪᠠᠢᠯᠭᠦᠢ ᠭᠡᠳ ᠬᠠᠨᠴᠤᠢ ᠪᠠᠨ ᠰᠤᠭᠤ ᠪᠠᠨ ᠬᠦᠷᠲᠡᠯᠡ ᠰᠢᠮᠠᠯᠠᠭᠠᠳ ᠴᠠᠮ ᠬᠠᠷᠠᠢᠵᠤ ᠭᠠᠷᠯᠠᠪᠠ ᠰᠢᠦ᠃ ᠨᠠᠳᠠ ᠲᠠᠢ ᠭᠡᠷᠡᠯᠲᠦᠭᠰᠡᠨ ᠡᠴᠡ ᠬᠣᠢᠰᠢ ᠭᠤᠷᠪᠠ ᠬᠣᠨᠣᠭ ᠠᠵᠢᠯ ᠫᠢᠯᠴᠢᠬᠠᠯᠡ᠃ ᠳᠠᠷᠤᠭᠠ ᠮᠠᠨᠢ ᠨᠢᠭᠡ ᠥᠷᠯᠥᠭᠡ᠄
— ᠰᠠᠨᠳᠠᠷ ᠭᠤᠸᠠᠢ ᠪᠡᠶᠡ ᠴᠢᠨᠢ ᠰᠠᠢᠨ ᠤᠤ? ᠭᠡᠵᠦ ᠪᠠᠢᠨᠠ᠃
— ᠰᠠᠢᠨ ᠰᠠᠢᠨ᠂ ᠨᠥᠭᠦᠭᠡ ᠫᠦᠵᠡᠢ ᠴᠢᠨᠢ ᠢᠷᠡᠳᠡᠭ ᠦᠭᠡᠢ ᠰᠢᠦ ᠭᠡᠪᠡ᠃ ᠳᠠᠷᠤᠭᠠ ᠵᠢᠭᠠᠬᠠᠨ ᠪᠣᠳᠣᠯᠬᠢᠯᠠᠰᠬᠢᠬᠰᠠᠨ ᠢ᠋ᠶ᠋ᠠᠨ᠄
— ᠴᠠᠭᠠᠳᠤᠬᠢ ᠴᠢᠨᠢ ᠨᠢᠭᠡ ᠪᠣᠯ ᠥᠪᠡᠷ ᠢ᠋ᠶ᠋ᠡᠨ ᠡᠪᠡᠳᠴᠢᠨ ᠲᠡᠢ᠂ ᠡᠰᠡᠪᠡᠯ ᠬᠡᠦᠬᠡᠳ ᠦ᠋ᠨ ᠪᠡᠶᠡ ᠮᠠᠭᠤ ᠭᠡᠨᠡ ᠪᠢᠵᠡ ᠳᠡ᠂ ᠢᠷᠡᠲᠡᠯᠡ ᠨᠢ ᠲᠠ ᠴᠡᠪᠡᠷᠯᠡᠵᠦ ᠪᠠᠢᠭᠠᠷᠠᠢ ᠭᠡᠯᠡ᠃ ᠪᠢ ᠶᠠᠭᠠᠬᠢᠬᠤᠪ᠂ ᠱᠠᠲᠤ ᠪᠠᠷ ᠥᠭᠰᠥᠵᠦ ᠤᠷᠤᠭᠤᠳᠠᠨ ᠮᠠᠭᠠᠵᠢᠩᠨᠠᠵᠤ ᠡᠳᠦᠷᠵᠢᠨ ᠬᠣᠭ ᠰᠢᠷᠣᠢ ᠴᠡᠪᠡᠷᠯᠡᠬᠦ ᠪᠣᠯᠤᠯᠠ᠃ ᠡᠨᠡ ᠫᠦᠵᠡᠢ ᠶ᠋ᠢᠨ ᠲᠤᠬᠠᠢ ᠳᠠᠷᠤᠭᠠ ᠳ᠋ᠠᠭᠠᠨ ᠬᠡᠯᠡᠶᠡ ᠪᠠᠢᠵᠠ ᠭᠡᠵᠦ ᠰᠢᠢᠳᠴᠦ ᠪᠠᠢᠲᠠᠯᠠ ᠬᠡᠷᠡᠭ ᠮᠠᠨᠳᠤᠯᠠ᠃ ᠮᠠᠨ ᠤ᠋ ᠳᠠᠷᠤᠭᠠ ᠤᠤᠯ ᠨᠢ ᠡᠨᠡ ᠬᠡᠷᠡᠭ ᠶᠠᠪᠤᠳᠠᠯ ᠤ᠋ᠨ ᠲᠤᠬᠠᠢ ᠭᠠᠳᠠᠨᠠ ᠶ᠋ᠢᠨ ᠬᠥᠮᠦᠨ ᠳ᠋ᠦ᠍ ᠬᠡᠯᠡᠬᠦ ᠱᠠᠭᠠᠷᠳᠠᠯᠭᠠ ᠥᠬᠡᠢ ᠭᠡᠰᠡᠨ᠃ ᠪᠢ ᠶᠠᠭᠠᠬᠢᠯᠠ ᠭᠡᠵᠦ ᠬᠡᠯᠡᠬᠦᠪ᠂ ᠬᠡᠯᠡᠮᠡᠷ ᠰᠠᠨᠠᠭᠳᠠᠭᠰᠠᠨ ᠴᠤ᠌ ᠬᠡᠯᠡ ᠪᠡᠨ ᠬᠠᠵᠠᠭᠠᠳ ᠴᠤ᠌ ᠥᠩᠭᠡᠷᠡᠨᠡ᠃ ᠪᠢᠳᠡ ᠴᠢᠨᠢ ᠪᠦᠭᠴᠢᠮ ᠬᠠᠯᠠᠭᠠᠳ ᠡᠳᠦᠷ ᠬᠤᠷᠠᠯᠳᠤᠯᠠ᠃ ᠳᠠᠷᠤᠭᠠ ᠪᠠᠷᠠᠭᠤᠨ ᠭᠠᠷ ᠲᠠᠭᠠᠨ ᠤᠷᠠᠩᠬᠠᠢ ᠫᠠᠰᠫᠣᠷᠲ ᠪᠠᠷᠠᠴᠢᠬᠠᠭᠰᠠᠨ ᠬᠠᠷᠠᠭᠳᠠᠨᠠ᠃ ᠲᠡᠭᠡᠭᠰᠡᠨ ᠴᠢᠨᠢ ᠴᠡᠪᠡᠷᠯᠡᠭᠴᠢ ᠫᠦᠵᠡᠢ ᠠᠵᠢᠯᠲᠠᠨ ᠤ᠋ ᠫᠠᠰᠫᠣᠷᠲ( ᠪᠡᠶᠡ ᠶ᠋ᠢᠨ ᠦᠨᠡᠮᠯᠡᠬᠦ) ᠶ᠋ᠢ ᠰᠠᠨᠠᠭᠠ ᠲᠠᠢ ᠪᠠᠷ ᠬᠤᠯᠠᠭᠠᠢᠯᠠᠨ ᠠᠪᠴᠤ ᠤᠷᠠᠵᠤ ᠬᠠᠶᠠᠭᠰᠠᠨ ᠪᠠᠢᠨᠠ᠃ ᠡᠨᠡ ᠬᠡᠷᠡᠭ ᠢ᠋ ᠬᠠᠮᠲᠤ ᠣᠯᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠡᠯᠡᠯᠴᠡᠵᠦ ᠠᠷᠭᠠ ᠬᠡᠮᠵᠢᠶᠡ ᠠᠪᠤᠨᠠ ᠭᠡᠳ ᠫᠠᠰᠫᠣᠷᠲ ᠪᠣᠯᠤᠨ ᠴᠢᠬᠤᠯᠠ ᠪᠠᠷᠢᠮᠲᠠ ᠪᠢᠴᠢᠭ ᠢ᠋ ᠬᠤᠯᠠᠭᠠᠢᠯᠠᠭᠰᠠᠨ ᠬᠥᠮᠦᠨ ᠳ᠋ᠦ᠍ ᠬᠦᠯᠢᠶᠡᠯᠭᠡᠬᠦ ᠲᠤᠬᠠᠢ《 ᠬᠠᠤᠯᠢ ᠶ᠋ᠢᠨ ᠵᠦᠢᠯ ᠠᠩᠭᠢ》 ᠶ᠋ᠢ ᠤᠩᠰᠢᠵᠤ ᠥᠭᠭᠦᠯᠡ ᠰᠢᠦ᠃ ᠡᠬᠢᠯᠡᠭᠡᠳ ᠪᠢ ᠴᠢᠬᠢᠨ ᠳ᠋ᠡᠭᠡᠨ ᠢᠲᠡᠭᠡᠬᠦ ᠦᠭᠡᠢ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠭᠠᠷᠴᠠᠭᠠ ᠦᠭᠡᠢ ᠦᠨᠡᠨ ᠪᠣᠯᠤᠭᠠᠳ ᠶᠠᠪᠤᠴᠢᠬᠠᠯᠠ ᠰᠢᠦ᠃ ᠲᠡᠭᠡᠬᠦᠯᠡᠷ ᠨᠢ ᠪᠢ ᠪᠣᠰᠴᠤ᠄
— ᠵᠠ ᠨᠥᠬᠥᠷ ᠫᠦᠵᠡᠢ ᠪᠣᠯ ᠬᠤᠳᠠᠯ ᠬᠡᠯᠡᠵᠦ ᠠᠵᠢᠯ ᠲᠠᠰᠤᠯᠳᠠᠭ᠂ ᠬᠥᠮᠦᠨ ᠲᠡᠢ ᠵᠣᠳᠣᠯᠳᠤᠭᠠᠳ ᠨᠢᠳᠦ ᠠᠮᠠ ᠨᠢ ᠬᠥᠬᠡ ᠪᠤᠯᠤᠤ ᠪᠣᠯᠴᠢᠬᠠᠭᠠᠳ ᠢᠷᠡᠵᠦ ᠪᠠᠢᠭᠰᠠᠨ ᠤᠳᠠᠭᠠ ᠴᠦ᠍ ᠪᠣᠢ᠂ ᠨᠠᠮᠠ ᠶ᠋ᠢ ᠬᠦᠷᠲᠡᠯᠡ ᠠᠵᠢᠯ ᠲᠠᠰᠤᠯᠤᠯᠠ ᠭᠡᠵᠦ ᠱᠠᠯ ᠬᠤᠳᠠᠯ ᠬᠦᠷᠲᠡᠵᠦ ᠪᠠᠢᠭᠰᠠᠨ᠃ ᠶᠡᠷᠦ ᠨᠢ ᠬᠡᠨ ᠢ᠋ ᠬᠦᠷᠲᠡᠯᠡ ᠶᠠᠭᠤ ᠴᠦ᠍ ᠭᠡᠵᠦ ᠬᠤᠳᠠᠯ ᠬᠦᠷᠲᠡᠬᠦ ᠡᠴᠡ ᠪᠤᠴᠠᠬᠤ ᠦᠭᠡᠢ᠂ ᠪᠢ ᠪᠣᠯ ᠳᠣᠲᠣᠷᠠ ᠪᠠᠨ ᠠᠶᠤᠵᠤ ᠶᠠᠪᠤᠳᠠᠭ᠃ ᠫᠦᠵᠡᠢ ᠪᠣᠯᠪᠠᠯ ᠴᠡᠪᠡᠷᠯᠡᠭᠴᠢ ᠶ᠋ᠢᠨ ᠠᠵᠢᠯ ᠳ᠋ᠤ᠌ ᠮᠠᠰᠢ ᠳᠤᠷᠠ ᠦᠭᠡᠢ᠂ ᠲᠡᠭᠡᠬᠦᠯᠡᠷ ᠡᠢᠮᠦ ᠬᠥᠮᠦᠨ ᠢ᠋ ᠲᠡᠵᠢᠭᠡᠵᠦ ᠪᠠᠢᠬᠤ ᠬᠡᠷᠡᠭ ᠦᠭᠡᠢ ᠭᠡᠵᠦ ᠰᠠᠨᠠᠵᠤ ᠪᠠᠢᠨᠠ᠃ ᠮᠠᠨ ᠤ᠋ ᠬᠢᠨ ᠡᠴᠡ ᠬᠡᠦᠬᠡᠨ ᠨᠦ᠍ᠭᠦᠳ ᠦ᠋ᠨ ᠣ ᠡᠩᠭᠡᠰᠬᠡ ᠫᠢᠶᠠᠰᠠ ᠲᠣᠭᠯᠠᠭᠤᠯᠤᠭᠴᠢ ᠶ᠋ᠢᠨ ᠵᠡᠭᠦᠦ ᠭᠡᠬᠦ ᠮᠡᠲᠦᠴᠢᠯᠡᠨ ᠠᠬᠠᠷ ᠱᠠᠬᠠᠷ ᠮᠥᠷᠳᠡᠯᠡ ᠵᠢᠪᠡᠭᠦᠨ ᠬᠥᠭᠡᠷᠦᠬᠦᠨ ᠶᠠᠭᠤᠮᠠ ᠠᠯᠠᠭᠠ ᠪᠣᠯᠤᠭᠠᠳ ᠪᠠᠢᠯᠠ ᠰᠢᠦ᠃ ᠬᠠᠷᠢᠨ ᠥᠨᠥᠳᠥᠷ ᠡᠵᠡᠨ ᠢ᠋ ᠨᠢ ᠣᠯᠪᠠ ᠪᠣᠯᠤᠯᠲᠠᠢ᠂ ᠳᠠᠷᠤᠭᠠ ᠲᠠ ᠰᠠᠶᠢ ᠬᠠᠤᠯᠢ ᠳᠦᠷᠢᠮ ᠡᠴᠡ ᠤᠩᠰᠢᠵᠤ ᠥᠭᠭᠦᠯᠡ᠃ ᠨᠠᠭᠠᠳᠤᠬᠢ ᠶ᠋ᠢᠨ ᠴᠢᠨᠢ ᠦᠢᠯᠡᠳᠦᠭᠰᠡᠨ ᠬᠡᠷᠡᠭ ᠬᠠᠤᠯᠢ ᠶ᠋ᠢᠨ ᠵᠦᠢᠯ ᠠᠩᠭᠢ ᠳ᠋ᠤ᠌ ᠶᠠᠪ ᠴᠠᠪ ᠲᠣᠬᠢᠷᠠᠵᠤ ᠪᠠᠢᠨᠠ ᠭᠡᠰᠡᠨ ᠴᠢᠨᠢ ᠳᠠᠷᠤᠭᠠ ᠨᠠᠳᠠ ᠤᠷᠤᠭᠤ ᠶᠣᠣᠵᠠ ᠦᠭᠡᠢ ᠬᠠᠷᠠᠯᠠ ᠰᠢᠦ᠃ ᠮᠠᠨ ᠤ᠋ ᠳᠠᠷᠤᠭᠠ ᠶ᠋ᠢᠨ ᠥᠷᠦᠪᠴᠢ ᠨᠢᠩᠵᠢᠨ ᠰᠡᠳᠬᠢᠯ ᠨᠢ ᠬᠥᠳᠡᠯᠵᠦ ᠣᠯᠠᠨ ᠬᠡᠦᠬᠡᠳ ᠲᠡᠢ ᠡᠬᠡ ᠬᠥᠮᠦᠨ ᠰᠢᠭᠦᠬᠦ ᠳ᠋ᠦ᠍ ᠥᠭᠭᠦᠭᠡᠳ ᠴᠦ᠍ ᠶᠠᠭᠠᠬᠢᠬᠤᠪ ᠭᠡᠳ ᠲᠤᠰᠢᠶᠠᠯ ᠢ᠋ᠶ᠋ᠠᠷ ᠲᠣᠭᠲᠠᠭᠠᠵᠤ ᠠᠵᠢᠯ ᠠ᠋ᠴᠠ ᠬᠥᠭᠡᠭᠡᠬᠦ ᠶ᠋ᠢ ᠰᠠᠨᠠᠭᠤᠯᠤᠰᠬᠢᠭᠡᠳ ᠥᠩᠭᠡᠷᠡᠭᠰᠡᠨ ᠪᠠᠢᠨᠠ᠃ ᠲᠡᠭᠦᠨ ᠡᠴᠡ ᠬᠣᠢᠰᠢ ᠭᠤᠷᠪᠠ ᠬᠣᠨᠣᠭ ᠬᠢᠷᠢᠲᠡᠢ ᠣᠪᠣᠭᠠ ᠪᠠᠢᠭᠰᠠᠨ ᠢ᠋ᠶ᠋ᠠᠨ《 ᠬᠡᠦᠬᠡᠳ ᠡᠪᠡᠳᠴᠢᠨ ᠲᠡᠢ》᠂《 ᠥᠪᠡᠷ ᠦ᠋ᠨ ᠪᠡᠶᠡ ᠡᠪᠡᠳᠴᠢᠨ ᠲᠡᠢ》 ᠡᠰᠡᠪᠡᠯ《 ᠬᠡᠦᠬᠡᠳ ᠬᠠᠷᠠᠬᠤ ᠬᠥᠮᠦᠨ ᠦᠭᠡᠢ》 ᠭᠡᠵᠦ ᠲᠦᠮᠡᠨ ᠶᠠᠩᠵᠤ ᠰᠢᠯᠲᠠᠭ ᠲᠣᠭᠠᠴᠢᠭᠠᠳ ᠭᠤᠷᠪᠠᠨ ᠰᠠᠷᠠ ᠠᠵᠢᠯ ᠬᠢᠭᠰᠡᠨ ᠦᠭᠡᠢ᠃ ᠨᠢᠭᠡ ᠡᠳᠦᠷ ᠳᠠᠷᠤᠭᠠ ᠲᠡᠭᠦᠨ ᠢ᠋ ᠵᠠᠩᠨᠠᠵᠤ ᠪᠠᠢᠯᠠ᠂ ᠪᠢ ᠱᠠᠯᠠ ᠴᠡᠪᠡᠷᠯᠡᠵᠦ ᠪᠠᠢᠬᠤ ᠳ᠋ᠠᠭᠠᠨ《 ᠴᠢ ᠨᠠᠮᠠ ᠶ᠋ᠢ ᠨᠠᠪᠰᠠᠭᠠᠷ ᠴᠡᠪᠡᠷᠯᠡᠭᠴᠢ》 ᠭᠡᠵᠦ ᠵᠠᠩᠨᠠᠳᠠᠭ ᠪᠢᠯᠡ ᠤᠤ᠂ ᠣᠳᠣ ᠳᠠᠷᠤᠭᠠ ᠴᠢᠮᠠ ᠶ᠋ᠢ ᠬᠠᠰᠢᠷᠠᠭᠠᠵᠤ ᠥᠭᠭᠦᠨᠡ ᠬᠦ ᠭᠡᠵᠦ ᠪᠣᠳᠣᠪᠠ ᠰᠢᠦ᠃ ᠳᠠᠷᠤᠭᠠ ᠶ᠋ᠢᠨ ᠥᠷᠥᠭᠡᠨ ᠡᠴᠡ ᠭᠠᠷᠴᠤ ᠢᠷᠡᠭᠡᠳ ᠬᠥᠭᠡᠷᠦᠬᠦᠢ ᠮᠠᠭᠤ ᠳᠠᠷᠤᠭᠠ ᠶ᠋ᠢ ᠮᠢᠨᠢ ᠡᠯᠳᠡᠪ ᠢ᠋ᠶ᠋ᠡᠷ ᠭᠦᠳᠬᠡᠵᠦ ᠵᠠᠩᠨᠠᠭᠠᠳ ᠲᠡᠷᠡ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠰᠤᠷᠠᠭ ᠲᠠᠰᠤᠷᠠᠪᠠ᠃
ᠪᠢ ᠳᠠᠷᠤᠭᠠ ᠳ᠋ᠠᠭᠠᠨ ᠲᠡᠭᠦᠨ ᠦ᠌ ᠬᠡᠯᠡᠭᠰᠡᠨ ᠦᠭᠡ ᠶ᠋ᠢ ᠬᠡᠯᠡᠶᠡ ᠶᠣ᠌ ᠪᠠᠢᠶᠠ ᠶᠣ᠌ ᠭᠡᠵᠦ ᠪᠣᠳᠣᠭᠠᠳ ᠪᠠᠢᠭᠠ᠃ ᠲᠡᠭᠦᠨ ᠡᠴᠡ ᠬᠣᠢᠰᠢ ᠨᠡᠯᠢᠶᠡᠳ ᠬᠤᠭᠤᠴᠠᠭᠠ ᠥᠩᠭᠡᠷᠡᠯᠡ᠃ ᠫᠦᠵᠡᠢ ᠰᠢᠭ ᠭᠠᠢᠬᠠᠯ ᠪᠤᠰᠤᠳ ᠭᠠᠵᠠᠷ ᠪᠠᠢᠳᠠᠭ ᠪᠣᠯᠪᠠ ᠤᠤ᠂ ᠵᠠ ᠵᠣᠯᠢᠭ ᠬᠠᠭᠤᠬᠠᠢ ᠲᠡᠢᠮᠦ ᠶᠠᠭᠤᠮᠠ ᠳ᠋ᠤ᠌ ᠰᠢᠷᠭᠤᠬᠤ ᠭᠠᠵᠠᠷ ᠣᠯᠳᠠᠬᠤ ᠦᠭᠡᠢ《 ᠲᠣᠬᠢᠷᠠᠭᠰᠠᠨ ᠰᠠᠭᠤᠳᠠᠯ》 ᠳ᠋ᠤᠨᠢ ᠶᠠᠪᠤᠭᠤᠯᠪᠠᠯ ᠵᠣᠬᠢᠨᠠ᠂ ᠥᠨᠥ ᠥᠷᠯᠥᠭᠡ ᠳᠠᠷᠤᠭᠠ ᠮᠠᠨᠢ᠄
— ᠫᠦᠵᠡᠢ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠨᠢᠭᠡ ᠬᠥᠮᠦᠨ ᠣᠯᠵᠤ ᠠᠪᠬᠤ ᠠ᠋ᠴᠠ ᠪᠢᠰᠢ ᠳᠡ ᠭᠡᠵᠦ ᠳᠤᠤᠭᠠᠷᠤᠯᠠ ᠰᠢᠦ᠃ ᠵᠠ ᠶᠠᠭᠠᠬᠢᠮᠤᠢ ᠪᠣᠯᠬᠤ ᠨᠢ ᠲᠡᠷᠡ᠃ ᠡᠨᠡ ᠵᠦᠢᠯ ᠢ᠋ ᠪᠢ ᠵᠢᠵᠢᠭᠦᠷ ᠦ᠋ᠨ ᠢ᠋ᠶ᠋ᠡᠨ ᠳᠡᠷᠭᠡᠳᠡ ᠲᠦᠷ ᠠᠮᠤᠰᠬᠢᠬᠦ ᠳ᠋ᠡᠭᠡᠨ ᠯᠡ ᠪᠣᠳᠣᠵᠤ ᠪᠠᠢᠭᠠ ᠬᠡᠷᠡᠭ᠂ ᠬᠥᠮᠦᠨ ᠳ᠋ᠦ᠍ ᠪᠢᠲᠡᠭᠡᠢ ᠶᠠᠷᠢᠭᠠᠳ ᠪᠠᠢᠭᠠᠷᠠᠢ ᠭᠡᠵᠦ ᠳᠠᠷᠤᠭᠠ ᠨᠠᠳᠠ ᠳ᠋ᠤ᠌ ᠵᠣᠷᠢᠭᠤᠳᠠ ᠬᠡᠯᠡᠭᠰᠡᠨ ᠶᠦᠮ ᠰᠢᠦ ᠳᠡ᠂ ᠮᠠᠷᠭᠠᠰᠢ ᠠ᠋ᠴᠠ ᠴᠡᠪᠡᠷᠯᠡᠭᠴᠢ ᠢᠷᠡᠪᠡᠯ ᠮᠢᠨᠦ ᠰᠠᠨᠠᠭᠠ ᠰᠡᠳᠬᠢᠯ ᠠᠮᠠᠷᠠᠨᠠ᠃ ᠪᠢ ᠬᠡᠨ ᠳ᠋ᠦ᠍ ᠴᠦ᠍ ᠬᠡᠯᠡᠬᠦ ᠦᠭᠡᠢ᠂ ᠳᠣᠲᠣᠷᠠ ᠪᠠᠨ ᠬᠠᠳᠠᠭᠠᠯᠠᠵᠤ ᠶᠠᠪᠤᠨᠠ᠂ ᠭᠦᠢᠴᠡᠭᠡ᠃
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠪᠣᠷᠵᠢᠭᠢᠨ ᠪᠠᠭᠠᠲᠤᠷ
ᠬᠢᠨᠠᠭ᠍ᠴᠢ : ᠰᠠᠷᠠᠨᠠ
2024᠂ 2᠂ 28 ᠦ᠌ ᠡᠳᠦᠷ