ᠬᠦᠷᠡᠩ ᠴᠢᠷᠠᠢᠲᠦ ᠡᠷᠡ – ᠱᠠᠭᠲᠠᠢ ᠶᠢᠨ ᠴᠠᠨᠳᠠ - ᠠᠶᠤᠰᠢ Хүрэн царайт эр – Шагтайн цэнд - Аюуши
427ᠬᠦᠷᠡᠩ ᠴᠢᠷᠠᠢᠲᠦ ᠡᠷᠡ
ᠨᠠᠮᠠ ᠶ᠋ᠢ ᠥᠷᠯᠥᠭᠡ ᠠᠵᠢᠯ ᠳ᠋ᠠᠭᠠᠨ ᠢᠷᠡᠬᠦ ᠳ᠋ᠦ᠍ ᠮᠠᠨ ᠤ᠋ ᠬᠢᠨ ᠡᠴᠡ ᠨᠢᠭᠡ ᠴᠦ᠍ ᠬᠥᠮᠦᠨ ᠪᠠᠢᠭᠰᠠᠨ ᠦᠭᠡᠢ᠃
— ᠵᠠ ᠳᠠ ᠮᠠᠨ ᠤ᠋ ᠬᠢᠨ ᠮᠥᠳᠳᠥ ᠢᠷᠡᠬᠦ ᠦᠭᠡᠢ ᠠ᠋᠂ ᠬᠡᠵᠢᠶᠡ ᠯᠡ ᠪᠢᠯᠡ ᠳᠠ᠂ ᠬᠡᠷᠪᠡ ᠮᠠᠨ ᠤ᠋ ᠨᠥᠬᠥᠷ ᠠᠵᠢᠯ ᠤ᠋ᠨ ᠴᠢᠨᠢ ᠴᠠᠭ ᠵᠥᠩᠳᠡᠭᠡᠨ ᠥᠩᠭᠡᠷᠡᠴᠢᠬᠡᠯᠡ ᠶᠠᠪᠤ ᠭᠡᠵᠦ ᠰᠢᠬᠠᠵᠤ ᠱᠠᠭᠠᠷᠳᠠᠯᠭᠠ ᠦᠭᠡᠢ ᠪᠣᠯ ᠪᠢ ᠴᠦ᠍ ᠭᠡᠰᠡᠨ ᠭᠡᠷ ᠲᠡᠭᠡᠨ ᠴᠠᠢ ᠪᠠᠨ ᠤᠤᠭᠤᠵᠤ ᠰᠠᠭᠤᠬᠤ ᠦᠭᠡᠢ ᠤᠤ ᠭᠡᠮᠡᠨ ᠪᠣᠳᠣᠭᠰᠠᠭᠠᠷ ᠴᠣᠩᠬᠣ ᠪᠠᠷ ᠬᠠᠷᠠᠪᠠᠯ ᠮᠠᠨ ᠤ᠋ ᠭᠤᠸᠠᠩᠵᠠᠨ ᠤ᠋ ᠡᠭᠦᠳᠡᠨ ᠳᠡᠭᠡᠷᠡ ᠬᠣᠶᠠᠷ ᠬᠥᠮᠦᠨ ᠴᠠᠭ ᠤ᠋ᠨ ᠬᠤᠪᠢᠶᠠᠷᠢ ᠬᠠᠷᠠᠨ ᠵᠣᠭᠰᠣᠵᠤ ᠪᠠᠢᠯᠠ᠃ ᠨᠢᠭᠡ ᠨᠢ ᠳᠠᠪᠵᠢᠭᠢᠨᠠᠭᠰᠠᠨ ᠲᠤᠷᠠᠩᠬᠠᠢ ᠡᠪᠦᠭᠡᠨ᠂ ᠨᠥᠭᠦᠭᠡ ᠨᠢ ᠬᠦᠷᠡᠩ ᠪᠣᠷᠣ ᠴᠢᠷᠠᠢ ᠲᠠᠢ ᠬᠦᠳᠡᠷ ᠡᠷᠡ ᠪᠠᠢᠯᠠ᠃ ᠲᠡᠷᠡ ᠬᠣᠶᠠᠷ ᠢ᠋ ᠬᠠᠷᠠᠭᠠᠳ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠬᠥᠬᠡ ᠢᠨᠢᠶᠡᠳᠦ ᠬᠦᠷᠴᠦ᠄
— ᠦᠭᠡᠢ ᠶᠡᠷᠦ᠂ ᠴᠠᠭ ᠤ᠋ᠨ ᠬᠤᠪᠢᠶᠠᠷᠢ ᠬᠠᠷᠠᠭᠠᠳ ᠶᠡᠬᠡ ᠠᠮᠢᠲᠠᠳ ᠪᠠᠢᠬᠤ ᠨᠢ ᠠ᠋᠂ ᠲᠠ ᠨᠠᠷ ᠴᠤ᠌ ᠨᠡᠯᠢᠶᠡᠳ ᠵᠣᠭᠰᠣᠬᠤ ᠪᠠᠢᠯᠭᠦᠢ ᠳᠡ ᠭᠡᠵᠦ ᠪᠣᠳᠣᠵᠤ ᠪᠠᠢᠲᠠᠯᠠ ᠡᠪᠦᠭᠡᠨ ᠨᠢ ᠴᠣᠩᠬᠣᠨ ᠤ᠋ ᠴᠠᠭᠠᠨᠠ ᠠ᠋ᠴᠠ᠄
— ᠣᠩᠭᠣᠢᠬᠤ ᠪᠣᠯᠵᠤ ᠪᠠᠢᠨᠠ ᠤᠤ ᠭᠡᠵᠦ ᠬᠠᠰᠬᠢᠷᠤᠯᠠ᠃ ᠪᠢ ᠢᠨᠢᠶᠡᠳᠦ ᠪᠡᠨ ᠪᠠᠷᠢᠵᠤ ᠶᠠᠳᠠᠨ᠄
— ᠣᠳᠣᠬᠠᠨ ᠭᠡᠵᠦ ᠶᠣᠵᠣᠲᠠᠢᠬᠠᠨ ᠬᠡᠯᠡᠭᠡᠳ ᠴᠣᠩᠬᠣᠨ ᠠ᠋ᠴᠠ ᠬᠣᠯᠠᠳᠠᠭᠠᠳ ᠬᠠᠭᠠᠰ ᠴᠠᠭ ᠬᠢᠷᠢ ᠪᠣᠯᠵᠤ ᠪᠠᠢᠲᠠᠯᠠ ᠲᠣᠭᠣᠭᠠᠴᠢ ᠫᠠᠭᠮᠠ᠂ ᠬᠣᠭᠣᠯᠠ ᠠᠶᠠᠭᠠᠯᠠᠭᠴᠢ ᠰᠦᠷᠦᠩ ᠨᠠᠷ ᠬᠦᠷᠴᠦ ᠢᠷᠡᠪᠡ᠃ ᠲᠡᠭᠡᠭᠡᠳ ᠫᠠᠭᠮᠠ ᠥᠴᠥᠭᠡᠳᠦᠷ ᠦ᠋ᠨ ᠮᠢᠬᠠᠨ ᠬᠠᠭᠤᠷᠭᠠᠨ ᠤ᠋ ᠪᠠᠨ ᠦᠯᠡᠳᠡᠭᠳᠡᠯ ᠢ᠋ ᠬᠠᠯᠠᠭᠠᠵᠤ ᠪᠠᠢᠬᠤ ᠬᠣᠭᠣᠷᠣᠨᠳᠣ ᠪᠢᠳᠡ ᠵᠠᠬᠢᠶᠠ ᠬᠣᠭᠣᠯᠠ ᠭᠡᠳᠡᠭ ᠳᠡᠭᠡᠷᠡ ᠨᠡᠷᠡ ᠶ᠋ᠢ ᠨᠢ ᠪᠢᠴᠢᠴᠢᠬᠡᠭᠡᠳ ᠲᠠᠰᠤᠯᠪᠤᠷᠢ( ᠪᠢᠯᠧᠲ) ᠪᠢᠴᠢᠭᠴᠢ ᠶ᠋ᠢᠨ ᠢᠷᠡᠬᠦ ᠶ᠋ᠢ ᠬᠦᠯᠢᠶᠡᠨ ᠭᠠᠩᠭᠠᠷ ᠭᠤᠩᠭᠠᠷ ᠶᠠᠷᠢᠯᠴᠠᠨ ᠰᠠᠭᠤᠲᠠᠯᠠ ᠴᠣᠩᠬᠣ ᠨᠢᠵᠢᠭᠢᠨᠡᠲᠡᠯᠡ ᠴᠣᠬᠢᠯᠠ᠃ ᠣᠷᠣᠵᠤ ᠢᠷᠡᠬᠦ ᠳ᠋ᠦ᠍ᠨᠢ ᠬᠣᠭᠣᠯᠠᠨ ᠤ᠋ ᠬᠢᠨᠢ ᠬᠡᠮᠵᠢᠶᠡ ᠶ᠋ᠢ ᠬᠣᠷᠣᠭᠳᠠᠭᠤᠯᠬᠤ ᠶ᠋ᠢᠨ ᠲᠤᠯᠠᠳᠠ ᠨᠢᠳᠦᠯᠡᠵᠦ ᠠᠪᠬᠤ ᠪᠠᠷ ᠴᠣᠩᠬᠣᠨ ᠳ᠋ᠤ᠌ ᠣᠢᠷᠠᠲᠤᠯᠠ᠄
— ᠣᠩᠭᠣᠢᠬᠤ ᠴᠠᠭ ᠠ᠋ᠴᠠ ᠴᠢᠨᠢ ᠳᠠᠷᠤᠢ ᠴᠠᠭ ᠥᠩᠭᠡᠷᠡᠯᠡ᠂ ᠶᠠᠭᠠᠬᠢᠭᠠᠳ ᠣᠩᠭᠣᠢᠳᠠᠭ ᠦᠭᠡᠢ ᠶᠦᠮ ᠪᠣᠢ ᠭᠡᠵᠦ ᠬᠥᠮᠦᠰ ᠱᠤᠤᠭᠢᠯᠳᠤᠨᠠ᠃ ᠬᠠᠷᠠᠪᠠᠯ ᠨᠥᠭᠦᠭᠡ ᠥᠷᠯᠥᠭᠡ ᠶ᠋ᠢᠨ ᠬᠣᠶᠠᠷ ᠳᠡᠭᠡᠷᠡ ᠠᠷᠪᠠᠭᠠᠳ ᠬᠥᠮᠦᠨ ᠨᠡᠮᠡᠭᠳᠡᠴᠢᠬᠡᠭᠰᠡᠨ ᠪᠠᠢᠪᠠ᠃ ᠲᠡᠳᠡ ᠳᠤᠷᠠ ᠪᠦᠷᠢ ᠳ᠋ᠡᠭᠡᠨ ᠯᠡ ᠨᠢᠭᠡ ᠶ᠋ᠢ ᠬᠡᠯᠡᠬᠦ ᠠᠵᠢ᠂ ᠵᠥᠪᠬᠡᠨ ᠬᠦᠷᠡᠩ ᠴᠢᠷᠠᠢᠲᠤ ᠢᠳᠡᠷ ᠡᠷᠡ ᠯᠡ ᠳᠠᠭᠤ ᠱᠣᠣ ᠦᠭᠡᠢ ᠵᠣᠭᠰᠣᠵᠤ ᠪᠠᠢᠪᠠ᠃ ᠪᠢᠳᠡ᠄
— ᠡᠨᠡ ᠨᠢ ᠲᠣᠮᠣ ᠠᠮᠢᠲᠠᠨ ᠶᠤᠮ᠂ ᠲᠡᠷᠡ ᠨᠢ ᠵᠤᠵᠠᠭᠠᠨ ᠤᠷᠤᠭᠤᠯ ᠲᠠᠢ ᠠᠲᠠᠯᠠ ᠵᠢᠭᠠᠬᠠᠨ ᠠᠩᠭᠠᠢᠬᠤ ᠶᠤᠮ᠃ ᠬᠠᠷᠢᠨ ᠲᠡᠷᠡ ᠪᠣᠷᠣ ᠴᠢᠷᠠᠢᠲᠤ ᠰᠦᠷᠡᠬᠡᠢ ᠲᠣᠮᠣᠭᠠ ᠲᠠᠢ ᠳᠠᠷᠤᠤ ᠵᠠᠯᠠᠭᠤ ᠪᠠᠢᠨᠠ᠃ ᠬᠡᠷᠪᠡ ᠬᠥᠮᠦᠨ ᠲᠡᠢ ᠰᠠᠭᠤᠭᠠ ᠦᠭᠡᠢ ᠪᠣᠯ ᠨᠥᠬᠥᠷ ᠢ᠋ᠶ᠋ᠡᠨ ᠪᠣᠯᠭᠠᠬᠤ ᠳ᠋ᠤ᠌ ᠵᠦᠭᠡᠷ ᠯᠡ ᠵᠠᠯᠠᠭᠤ ᠠᠵᠢ ᠭᠡᠵᠦ ᠶᠠᠷᠢᠯᠴᠠᠨ ᠪᠠᠢᠯᠠ᠃ ᠭᠠᠳᠠᠭᠠ ᠬᠦᠯᠢᠶᠡᠭᠴᠢᠳ ᠢ᠋ ᠥᠭᠦᠯᠡᠯ ᠲᠠᠯᠪᠢᠵᠤ ᠬᠠᠰᠬᠢᠷᠤᠭᠠᠳ ᠪᠠᠢᠬᠤ ᠪᠠᠷ ᠨᠢ ᠬᠣᠭᠣᠯᠠ ᠠᠶᠠᠭᠠᠯᠠᠭᠴᠢ᠄
— ᠵᠢᠭᠠᠬᠠᠨ ᠴᠢᠮᠡᠭᠡ ᠪᠡᠨ ᠨᠠᠮᠳᠠᠭᠠᠴᠢ᠂ ᠨᠠᠭᠠᠳᠤ ᠴᠠᠭᠠᠨ ᠴᠤᠪᠠ ᠲᠠᠢ ᠪᠣᠷᠣ ᠴᠢᠷᠠᠢ ᠲᠠᠢ ᠵᠠᠯᠠᠭᠤ ᠠ᠋ᠴᠠ ᠦᠯᠢᠭᠡᠷ ᠠᠪᠤᠭᠠᠴᠢ ᠭᠡᠵᠦ ᠤᠬᠠᠭᠤᠯᠤᠭᠰᠠᠨ ᠪᠣᠯᠪᠠᠴᠤ ᠨᠡᠮᠡᠷᠢ ᠪᠣᠯᠤᠭᠰᠠᠨ ᠦᠭᠡᠢ᠂ ᠪᠦᠷ ᠭᠠᠭᠠᠷᠠᠯᠠ( ᠨᠡᠮᠡᠭᠳᠡᠯᠡ)᠃ ᠰᠡᠭᠦᠯ ᠳ᠋ᠡᠭᠡᠨ ᠬᠡᠳᠦᠢᠪᠡᠷ ᠲᠷᠧᠰᠲ ᠦ᠋ᠨ ᠳᠠᠷᠤᠭᠠ ᠶ᠋ᠢᠨ ᠺᠣᠨᠲ᠋ᠣᠷ ᠮᠠᠨ ᠤ᠋ ᠭᠤᠸᠠᠩᠵᠡᠨ ᠡᠴᠡ ᠭᠤᠴᠢ ᠭᠠᠷᠤᠢ ᠺᠢᠯᠣᠮᠧᠲ᠋ᠷ ᠪᠠᠢᠳᠠᠭ ᠪᠣᠯᠪᠠᠴᠤ ᠡᠨᠡ ᠳᠠᠭᠤ ᠬᠦᠷᠴᠦ ᠮᠠᠭᠠᠳ ᠦᠭᠡᠢ ᠨᠢ ᠭᠡᠵᠦ ᠪᠣᠳᠣᠭᠠᠳ ᠬᠠᠭᠠᠯᠭᠠ ᠣᠩᠭᠣᠢᠯᠭᠠᠪᠠ᠃
ᠬᠥᠮᠦᠰ ᠣᠷᠣᠵᠤ ᠢᠷᠡᠩᠭᠦᠲᠡ ᠥᠭᠦᠯᠡᠯ ᠭᠠᠷᠭᠠᠭᠰᠠᠨ ᠪᠣᠯᠪᠠᠴᠤ ᠺᠠᠰᠰ( ᠮᠥᠩᠭᠥ ᠬᠤᠷᠢᠶᠠᠭᠴᠢ) ᠶ᠋ᠢᠨ ᠳᠡᠷᠭᠡᠳᠡ ᠳ᠋ᠤᠭᠠᠷᠯᠠᠨ ᠨᠠᠮ ᠵᠢᠮ ᠬᠡᠰᠡᠭ ᠵᠣᠭᠰᠣᠯᠠ᠂ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠲᠦᠳᠡᠯ ᠦᠭᠡᠢ᠄
— ᠲᠠᠰᠤᠯᠪᠤᠷᠢ ᠪᠢᠴᠢᠳᠡᠭ ᠬᠥᠮᠦᠨ ᠪᠠᠰᠠ ᠬᠠᠮᠢᠭᠠ ᠣᠴᠢᠭᠰᠠᠨ ᠪᠣᠢ ᠭᠡᠵᠦ ᠱᠤᠤᠭᠢᠯᠳᠤᠵᠤ ᠭᠠᠷᠪᠠ᠃
— ᠮᠡᠳᠡᠬᠦ ᠦᠭᠡᠢ ᠯᠡ ᠳᠡ᠂ ᠰᠠᠶᠢᠬᠠᠨ ᠯᠠ ᠡᠨᠳᠡ ᠣᠪᠣᠢᠭᠠᠳ ᠰᠠᠭᠤᠵᠤ ᠪᠠᠢᠭᠰᠠᠨ ᠭᠡᠵᠦ ᠪᠢᠳᠡ ᠬᠠᠮᠲᠤ ᠠᠵᠢᠯᠯᠠᠳᠠᠭ ᠬᠥᠮᠦᠨ ᠢ᠋ᠶ᠋ᠡᠨ ᠨᠥᠬᠥᠷ ᠦ᠋ᠨ ᠶᠣᠰᠣ ᠪᠠᠷ ᠬᠠᠮᠠᠭᠠᠯᠠᠯᠠ᠃
— ᠶᠠᠭᠠᠬᠢᠭᠠᠳ ᠠᠵᠢᠯ ᠤ᠋ᠨ ᠢ᠋ᠶ᠋ᠠᠨ ᠪᠠᠢᠷᠢᠨ ᠳ᠋ᠤ᠌ ᠪᠠᠢᠳᠠᠭ ᠦᠭᠡᠢ ᠶᠦᠮ ᠪᠣᠢ?
— ᠡᠢᠮᠦ ᠦᠢᠯᠡᠴᠢᠯᠡᠭᠡ ᠬᠠᠮᠢᠭᠠ ᠨᠢ ᠪᠠᠢᠭᠰᠠᠨ ᠶᠤᠮ ᠭᠡᠵᠦ ᠲᠡᠳᠡ ᠰᠢᠬᠠᠵᠤ ᠱᠠᠭᠠᠷᠳᠠᠵᠤ ᠭᠠᠷᠤᠯᠠ᠃ ᠬᠠᠷᠢᠨ ᠨᠥᠭᠦᠭᠡ ᠬᠦᠷᠡᠩ ᠴᠢᠷᠠᠢᠲᠤ ᠯᠠ ᠳᠠᠭᠤ ᠱᠣᠣ ᠦᠭᠡᠢ ᠵᠣᠭᠰᠣᠬᠤ ᠠᠵᠢ᠃ ᠭᠡᠬᠦ ᠳ᠋ᠡᠭᠡᠨ ᠬᠣᠶᠠᠷ ᠬᠠᠴᠠᠷ ᠨᠢ ᠨᠡᠯᠢᠶᠡᠳ ᠤᠯᠠᠢᠵᠤ ᠪᠥᠮᠪᠥᠢᠭᠰᠡᠨ ᠪᠠᠢᠯᠠ᠃ ᠪᠢᠳᠡ ᠲᠡᠷᠡ ᠨᠥᠬᠥᠷ ᠤᠷᠤᠭᠤ ᠵᠢᠭᠠᠵᠤ᠄
— ᠲᠠ ᠨᠠᠷ ᠡᠨᠡ ᠬᠥᠮᠦᠨ ᠰᠢᠭ ᠳᠠᠭᠤ ᠱᠣᠣ ᠦᠭᠡᠢ ᠵᠣᠭᠰᠣᠵᠤ ᠪᠣᠯᠬᠤ ᠦᠭᠡᠢ ᠤᠤ? ᠭᠡᠪᠡᠯ ᠪᠤᠰᠤᠳ ᠨᠢ ᠲᠡᠷᠡ ᠥᠭᠡᠳᠡ ᠮᠠᠭᠤᠬᠠᠢ ᠬᠠᠷᠠᠪᠠ᠃ ᠦᠯᠠᠴᠢᠯᠡᠭᠦᠯᠦᠭᠴᠢᠳ ᠦ᠋ᠨ ᠰᠢᠬᠠᠵᠤ ᠱᠠᠭᠠᠷᠳᠠᠬᠤ ᠳᠠᠭᠤ ᠲᠡᠰᠬᠦ ᠳ᠋ᠦ᠍ ᠪᠡᠷᠬᠡ ᠪᠣᠯᠤᠭᠰᠠᠨ ᠲᠤᠯᠠ ᠪᠢᠳᠡ ᠠᠷᠭᠠ ᠪᠤᠰᠤ ᠲᠠᠰᠤᠯᠪᠤᠷᠢ ᠪᠢᠴᠢᠭᠴᠢ ᠶ᠋ᠢᠨ ᠭᠡᠷ ᠥᠭᠡᠳᠡ ᠤᠲᠠᠰᠤᠳᠠᠪᠠᠯ᠄
— ᠦᠭᠡᠢ ᠶᠡᠷᠦ᠂ ᠲᠠ ᠨᠠᠷ ᠴᠤ᠌ ᠪᠠᠰᠠ ᠣᠷᠣᠢᠲᠠᠳᠠᠭ ᠰᠢᠦ ᠳᠡ᠂ ᠪᠢ ᠭᠠᠭᠴᠠ ᠥᠷᠯᠥᠭᠡ ᠲᠣᠬᠢᠲᠠᠢᠬᠠᠨ ᠤᠮᠳᠠ ᠬᠣᠭᠣᠯᠠ ᠪᠠᠨ ᠤᠤᠭᠤᠵᠤ ᠢᠳᠡᠭᠡᠳ ᠣᠴᠢᠵᠤ ᠪᠣᠯᠳᠠᠭ ᠦᠭᠡᠢ ᠪᠠᠢᠭᠠ ᠳᠠ ᠭᠡᠵᠦ ᠨᠡᠯᠢᠶᠡᠳ ᠠᠭᠤᠷᠲᠠᠢᠬᠠᠨ ᠳᠤᠤᠭᠠᠷᠤᠭᠰᠠᠨ ᠪᠣᠯᠪᠠᠴᠤ ᠤᠴᠢᠷ ᠪᠠᠢᠳᠠᠯ ᠢ᠋ ᠰᠣᠨᠣᠰᠤᠭᠠᠳ ᠳᠠᠷᠤᠢᠬᠠᠨ ᠢᠷᠡᠯᠡ᠃ ᠬᠥᠮᠦᠰ ᠦ᠋ᠨ ᠳᠠᠭᠤ ᠨᠢᠭᠡ ᠨᠠᠮᠳᠠᠭᠰᠠᠨ ᠢ᠋ᠶ᠋ᠠᠨ ᠳᠠᠬᠢᠭᠠᠳ ᠯᠠ ᠭᠠᠷᠴᠤ ᠡᠬᠢᠯᠡᠪᠡ᠃ ᠬᠣᠭᠣᠯᠠ ᠠᠶᠠᠭᠠᠯᠠᠭᠴᠢ ᠠᠯᠠᠭᠠ ᠪᠣᠯᠴᠢᠬᠠᠵᠠᠢ᠂ ᠳᠡᠯᠭᠡᠭᠦᠷ ᠤᠷᠤᠭᠤ ᠶᠠᠪᠤᠭᠰᠠᠨ ᠰᠤᠷᠠᠭ ᠲᠠᠢ᠂ ᠪᠢᠳᠡ ᠬᠦᠷᠲᠡᠯᠡ ᠰᠠᠨᠳᠤᠷᠴᠤ ᠡᠷᠢᠯ ᠰᠤᠷᠠᠯ ᠪᠣᠯᠤᠭᠰᠠᠨ ᠪᠣᠯᠪᠠᠴᠤ ᠠᠮᠵᠢᠯᠲᠠ ᠣᠯᠤᠭᠠ ᠦᠭᠡᠢ᠃
ᠤᠳᠠᠲᠠᠯᠠ ᠬᠦᠯᠢᠶᠡᠭᠰᠡᠨ ᠬᠥᠮᠦᠰ᠄
— ᠠᠷᠠᠢ ᠳᠡᠩᠳᠡᠭᠦᠦ ᠪᠠᠢᠨᠠ᠃
— ᠬᠥᠮᠦᠨ ᠳ᠋ᠦ᠍ ᠢᠩᠭᠢᠵᠦ ᠦᠢᠯᠡᠴᠢᠯᠡᠵᠦ ᠪᠣᠯᠳᠠᠭ ᠶᠤᠮ ᠤᠤ ᠭᠡᠵᠦ ᠡᠯᠳᠡᠪ ᠳᠣᠯᠣᠭᠠᠨ ᠶᠠᠭᠤᠮᠠ ᠬᠡᠯᠡᠨᠡ᠃ ᠭᠠᠭᠴᠠ ᠬᠦ᠌ ᠨᠥᠭᠦᠭᠡ ᠬᠦᠷᠡᠩ ᠴᠢᠷᠠᠢᠲᠤ ᠯᠠ ᠳᠠᠭᠤ ᠦᠭᠡᠢ ᠪᠠᠢᠪᠠ᠃ ᠭᠡᠬᠦ ᠳ᠋ᠡᠭᠡᠨ ᠬᠦᠷᠡᠩ ᠴᠢᠷᠠᠢ ᠨᠢ ᠴᠢᠪᠠᠭᠠ ᠰᠢᠭ᠋ ᠤᠯᠠᠭᠠᠨ ᠪᠣᠯᠴᠢᠬᠠᠭᠠᠳ ᠬᠣᠶᠠᠷ ᠬᠠᠴᠠᠷ ᠨᠢ ᠬᠠᠭᠠᠷᠠᠬᠤ ᠪᠠᠨ ᠰᠢᠬᠠᠭᠰᠠᠨ ᠪᠥᠮᠪᠥᠯᠢᠭ ᠰᠢᠭ ᠲᠥᠮᠪᠥᠢᠭᠰᠡᠨ ᠪᠠᠢᠬᠤ ᠨᠢ ᠰᠦᠷᠲᠡᠢ᠃ ᠠᠯᠢ ᠬᠡᠳᠦᠢᠨᠡ ᠪᠠᠭᠠ ᠦᠳᠡ ᠪᠣᠯᠵᠠᠢ᠃
— ᠶᠠᠭᠠᠬᠢᠳᠠᠭ ᠪᠢᠯᠡ ᠬᠡᠯᠡᠴᠡᠵᠦ ᠪᠠᠢᠲᠠᠯᠠ ᠬᠠᠷᠢᠨ ᠨᠥᠭᠦᠭᠡ ᠤᠷᠢᠯᠠᠭᠠᠳ ᠪᠠᠢᠭᠰᠠᠨ ᠬᠥᠮᠦᠰ ᠮᠠᠨᠢ ᠨᠢᠭᠡ ᠨᠢᠭᠡ ᠪᠡᠷ ᠢ᠋ᠶ᠋ᠡᠨ ᠨᠠᠮ ᠵᠢᠮ ᠪᠣᠯᠤᠭᠰᠠᠭᠠᠷ ᠨᠢᠭᠡ ᠴᠦ᠍ ᠬᠥᠮᠦᠨ ᠳᠤᠤᠭᠠᠷᠬᠤ ᠪᠠᠨ ᠪᠠᠢᠪᠠ᠃ ᠪᠦᠭᠦᠳᠡ ᠶ᠋ᠢᠨ ᠬᠢᠨᠢ ᠲᠡᠩᠬᠡᠭᠡ ᠠᠯᠳᠠᠷᠠᠵᠤ ᠬᠣᠭᠣᠯᠠᠢ ᠨᠢ ᠭᠠᠷᠬᠤ ᠪᠠᠨ ᠪᠠᠢᠭᠰᠠᠨ ᠪᠣᠯᠤᠯᠲᠠᠢ᠃ ᠡᠨᠡ ᠤᠴᠢᠷ ᠪᠢᠳᠡ ᠴᠦ᠍ ᠲᠠᠢᠪᠤᠰᠢᠷᠠᠯᠠ᠃ ᠰᠢᠬᠠᠵᠤ ᠱᠠᠭᠠᠷᠳᠠᠬᠤ ᠬᠥᠮᠦᠨ ᠦᠭᠡᠢ ᠪᠣᠯᠤᠭᠰᠠᠨ ᠲᠤᠯᠠ ᠳᠠᠬᠢᠭᠠᠳ ᠯᠠ ᠬᠡᠳᠦᠭᠦᠯᠡ ᠪᠡᠨ ᠪᠥᠭᠡᠮᠨᠡᠷᠡᠵᠦ ᠰᠠᠭᠤᠭᠠᠳ ᠰᠡᠳᠬᠢᠯ ᠠᠮᠠᠷ ᠡᠨᠡ ᠲᠡᠷᠡ ᠶ᠋ᠢ ᠶᠠᠷᠢᠯᠴᠠᠵᠤ ᠪᠠᠢᠲᠠᠯᠠ᠂
— ᠡᠢᠮᠦ ᠶᠠᠭᠤᠮᠠ ᠬᠠᠮᠢᠭᠠ ᠪᠠᠢᠭᠰᠠᠨ ᠶᠤᠮ ᠪᠣᠢ ᠭᠡᠰᠡᠨ ᠲᠩᠷᠢ ᠶ᠋ᠢᠨ ᠳᠠᠭᠤ ᠰᠢᠭ᠋ ᠰᠦᠷᠡᠬᠡᠢ ᠳᠠᠭᠤ ᠭᠠᠷᠬᠤ ᠳ᠋ᠤ᠌ ᠣᠪᠣᠰᠬᠢᠨ ᠴᠣᠴᠢᠯᠠ᠃ ᠲᠦᠳᠡᠬᠡᠨ ᠬᠠᠷᠠᠪᠠᠯ ᠥᠨᠥ ᠲᠦᠷᠦᠭᠦᠨ ᠡᠴᠡ ᠬᠣᠢᠰᠢ ᠳᠠᠭᠤ ᠦᠭᠡᠢ ᠪᠠᠢᠭᠰᠠᠨ ᠬᠥᠮᠦᠨ ᠮᠠᠨᠢ ᠬᠠᠰᠬᠢᠷᠴᠤ ᠪᠤᠰᠤᠳ ᠨᠢ ᠲᠡᠭᠦᠨ ᠥᠭᠡᠳᠡ《 ᠣᠪᠣᠭᠠ ᠳᠠ》 ᠭᠡᠰᠡᠨ ᠪᠠᠢᠷᠢᠲᠠᠢ( ᠪᠠᠢᠳᠠᠯ ᠲᠠᠢ) ᠬᠠᠷᠠᠵᠤ ᠪᠠᠢᠪᠠ᠃ ᠲᠡᠭᠡᠲᠡᠯᠡ ᠳᠡᠷᠭᠡᠳᠡ ᠨᠢ ᠪᠠᠢᠭᠰᠠᠨ ᠬᠠᠲᠠᠩᠭᠢᠷ ᠡᠪᠦᠭᠡᠨ ᠥᠨᠥᠬᠢ ᠶ᠋ᠢ ᠴᠢᠨᠢ ᠬᠦᠵᠦᠭᠦᠳᠡᠨ ᠠᠪᠴᠤ᠄
— ᠲᠠ ᠮᠢᠨᠢ ᠠ᠋ ᠃ ᠮᠠᠨ ᠤ᠋ ᠬᠦᠦ ᠬᠡᠯᠡ ᠳ᠋ᠦ᠍ ᠣᠷᠣᠴᠢᠬᠠᠯᠠ᠃ ᠡᠭᠦᠨ ᠢ᠋ ᠴᠢᠨᠢ ᠡᠮᠴᠢᠯᠡᠭᠡ ᠦᠭᠡᠢ ᠭᠡᠰᠡᠨ ᠶᠦᠮ ᠪᠠᠢᠬᠤ ᠦᠭᠡᠢ ᠤᠤ ᠭᠡᠮᠡᠨ ᠨᠢᠯᠪᠤᠰᠤ ᠪᠥᠮᠪᠥᠷᠢᠭᠦᠯᠵᠦ ᠭᠠᠷᠪᠠ᠃ ᠭᠠᠳᠠᠨᠠ ᠠ᠋ᠴᠠ ᠣᠷᠣᠵᠤ ᠢᠷᠡᠭᠰᠡᠨ ᠬᠡᠷᠡᠭ ᠲᠤ ᠳᠤᠷᠠᠲᠠᠢ ᠪᠠᠢᠷᠢ ᠶ᠋ᠢᠨ ᠨᠢᠭᠡ ᠨᠥᠬᠥᠷ ᠥᠨᠥ ᠬᠦᠷᠡᠩ ᠴᠢᠷᠠᠢᠲᠤ ᠠ᠋ᠴᠠ᠄
— ᠲᠠ ᠶᠠᠭᠠᠬᠢᠭᠠᠳ ᠬᠡᠯᠡ ᠳ᠋ᠦ᠍ ᠣᠷᠣᠴᠢᠬᠠᠪᠠ? ᠭᠡᠪᠡᠯ ᠵᠠᠯᠠᠭᠤ ᠥᠪᠡᠷ ᠲᠡᠭᠡᠨ ᠢᠲᠡᠭᠡᠬᠦ ᠦᠭᠡᠢ ᠪᠠᠢᠷᠢᠲᠠᠢ ᠡᠷᠡᠦ ᠪᠡᠨ ᠪᠡᠷᠢᠯᠡᠨ ᠦᠵᠡᠭᠰᠡᠨ ᠢ᠋ᠶ᠋ᠡᠨ᠄
— ᠮᠡᠳᠡᠬᠦ ᠦᠭᠡᠢ! ᠳᠤᠤᠭᠠᠷᠬᠤ ᠦᠭᠡᠢ ᠪᠠᠢᠵᠤ ᠯᠠ ᠴᠢᠳᠠᠭᠰᠠᠨ ᠦᠭᠡᠢ ᠭᠡᠳᠡᠭ ᠪᠠᠢᠭᠠ᠃
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠠᠯᠲᠠᠨᠴᠢᠮᠡᠭ
ᠬᠢᠨᠠᠭ᠍ᠴᠢ : ᠴᠣᠯᠮᠣᠨᠲᠤᠶᠠᠭᠠ
2024᠂ 2᠂ 28 ᠦ᠌ ᠡᠳᠦᠷ