ᠣᠬᠢᠯᠠᠭᠰᠠᠨ ᠤ ᠤᠴᠢᠷ – ᠱᠠᠭᠲᠠᠢ ᠶᠢᠨ ᠴᠠᠨᠳᠠ - ᠠᠶᠤᠰᠢ Охилсны очир – Шагтайн цэнд - Аюуши
369ᠣᠬᠢᠯᠠᠭᠰᠠᠨ ᠤ ᠤᠴᠢᠷ
ᠱᠠᠭᠲᠠᠢ ᠶᠢᠨ ᠴᠠᠨᠳᠠ - ᠠᠶᠤᠰᠢ
ᠪᠢ ᠨᠢᠭᠡ ᠤᠳᠠᠭᠠ ᠮᠥᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠶᠠᠪᠤᠵᠤ ᠪᠠᠢᠭᠠᠳ ᠬᠡᠷᠡᠭ ᠲᠤ ᠣᠷᠣᠬᠤ ᠰᠢᠬᠠᠵᠤ ᠦᠩᠬᠦᠯᠴᠡᠭ ᠢ᠋ᠶ᠋ᠡᠨ ᠬᠠᠭᠠᠷᠠᠲᠠᠯᠠ ᠠᠶᠤᠭᠰᠠᠨ ᠶᠤᠮ᠃
ᠡᠨᠡ ᠲᠤᠬᠠᠢ ᠥᠭᠦᠯᠡᠪᠡᠯ᠄ ᠲᠡᠷᠡ ᠨᠢᠭᠡ ᠡᠳᠦᠷ ᠲᠠᠨᠢᠯ ᠤ᠋ᠨ ᠳ᠋ᠠᠭᠠᠨ ᠣᠴᠢᠬᠤ ᠪᠠᠷ ᠠᠦ᠋ᠲ᠋ᠣᠪᠦ᠋ᠰ ᠲᠤ ᠦᠵᠡᠵᠦ ᠠᠯᠳᠠᠵᠤ᠂ ᠦᠰᠦᠷᠵᠦ ᠨᠠᠭᠠᠯᠳᠤᠵᠤ ᠪᠠᠢᠭᠠᠳ ᠣᠷᠣᠴᠢᠬᠠᠯᠠ᠃ ᠲᠡᠭᠡᠭᠡᠳ ᠬᠣᠢᠲᠤ ᠪᠦᠯᠦᠭ ᠲᠦ᠋ᠨᠢ ᠲᠠᠤᠯᠠᠢ ᠰᠢᠭ᠋ ᠬᠢᠷᠤᠵᠤ ᠪᠠᠢᠲᠠᠯᠠ ᠺᠣᠨᠳᠤᠢᠺᠲ᠋ᠣᠷ ᠠᠪᠠᠭᠠᠢ ᠬᠥᠮᠦᠰ ᠲᠤ ᠠᠭᠠᠰᠢᠯᠠᠭᠤᠯᠵᠤ ᠵᠠᠩᠨᠠᠭᠤᠯᠵᠤ ᠮᠠᠭᠤ ᠬᠡᠯᠡᠭᠳᠡᠬᠦ ᠪᠣᠯᠪᠠᠴᠤ ᠦᠯᠦ ᠲᠣᠭᠣᠨ ᠲᠠᠪᠢᠨ ᠮᠥᠩᠭᠥ ᠬᠣᠷᠢᠶᠠᠨ ᠠᠪᠤᠭᠰᠠᠭᠠᠷ ᠮᠢᠨᠦ ᠳᠡᠷᠭᠡᠳᠡ ᠲᠤᠯᠤᠭᠠᠳ ᠢᠷᠡᠯᠡ᠃ ᠤᠷᠢᠳᠤ ᠶᠠᠪᠤᠬᠤ ᠳ᠋ᠤᠨᠢ《 ᠰᠠᠭᠤᠳᠠᠯ ᠣᠯᠵᠤ ᠥᠭᠭᠦᠭᠡᠳ ᠮᠥᠩᠭᠥ ᠪᠡᠨ ᠠᠪ》 ᠭᠡᠵᠦ ᠬᠡᠯᠡᠶᠡ ᠭᠡᠮᠡᠨ ᠪᠣᠳᠣᠵᠤ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠬᠠᠯᠵᠠ ᠲᠤᠯᠭᠠᠷᠠᠮᠠᠭᠴᠠ ᠣᠯᠠᠨ ᠤ᠋ ᠳᠤᠮᠳᠠ ᠡᠯᠳᠡᠪ ᠢ᠋ᠶ᠋ᠡᠷ ᠳᠠᠭᠤᠳᠠᠵᠤ ᠪᠠᠯᠠᠯᠠᠬᠤ ᠪᠠᠢᠬᠤ ᠭᠡᠬᠦ ᠡᠴᠡ ᠶᠠᠰᠤ ᠬᠠᠪᠲᠠᠯᠵᠠᠵᠤ ᠨᠠᠳᠠ ᠳ᠋ᠤ᠌ ᠰᠠᠭᠤᠳᠠᠯ ᠲᠠᠯᠪᠢᠵᠤ ᠥᠭᠭᠦᠭᠰᠡᠨ ᠬᠥᠮᠦᠨ ᠳ᠋ᠦ᠍ ᠬᠠᠯᠲᠤ ᠲᠠᠯᠠᠷᠬᠠᠯ ᠢ᠋ᠶ᠋ᠠᠨ ᠢᠯᠡᠷᠬᠡᠢᠯᠡᠭᠡᠳ ᠪᠤᠰᠢᠭᠤᠬᠠᠨ ᠯᠠ ᠲᠠᠪᠢᠨ ᠮᠥᠩᠭᠥ ᠰᠠᠷᠪᠠᠢᠪᠠ᠃ ᠲᠡᠭᠡᠲᠡᠯᠡ ᠥᠨᠥ ᠺᠣᠨᠳᠤᠢᠺᠲ᠋ᠣᠷ ᠴᠢᠨᠢ ᠤᠴᠢᠷ ᠵᠦᠭ ᠦᠭᠡᠢ ᠤᠬᠢᠯᠠᠵᠤ ᠡᠬᠢᠯᠡᠳᠡᠭ ᠪᠠᠢᠭᠠ᠃ ᠠᠦ᠋ᠲ᠋ᠣᠪᠦ᠋ᠰ ᠳᠣᠲᠣᠷᠠ ᠰᠢᠪᠢᠷ ᠢᠪᠢᠷ ᠬᠢᠭᠰᠡᠨ ᠶᠠᠷᠢᠶᠠ ᠥᠷᠨᠢᠵᠦ᠄
— ᠶᠠᠭᠠᠬᠢᠪᠠ ᠠ᠋᠂ ᠲᠠ ᠶᠠᠭᠤᠨ ᠳ᠋ᠤ᠌ ᠤᠬᠢᠯᠠᠪᠠ ᠭᠡᠵᠦ ᠺᠣᠨᠳᠤᠢᠺᠲ᠋ᠣᠷ ᠢ᠋ ᠰᠢᠯᠭᠠᠪᠠᠯ ᠲᠡᠷᠡ ᠨᠠᠳᠠ ᠤᠷᠤᠭᠤ ᠬᠤᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠵᠢᠭᠠᠭᠠᠳ ᠦᠭᠡ ᠬᠡᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠤᠬᠢᠯᠠᠭᠠᠳ ᠪᠠᠢᠯᠠ᠃ ᠢᠩᠭᠢᠭᠡᠳ ᠶᠠᠮᠠᠷ ᠴᠦ᠍ ᠭᠡᠮ ᠦᠭᠡᠢ ᠪᠠᠢᠵᠤ ᠪᠠᠢᠭᠠᠳ ᠬᠡᠷᠡᠭ ᠲᠤ ᠬᠣᠯᠪᠣᠭᠳᠠᠬᠤ ᠨᠢ ᠲᠡᠷᠡ᠃
ᠪᠢ ᠶᠠᠭᠠᠬᠢᠭᠠ ᠴᠦ᠍ ᠦᠭᠡᠢ ᠭᠡᠵᠦ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠪᠡᠯ ᠬᠥᠮᠦᠨ ᠦ᠌ ᠮᠠᠭᠤ ᠳ᠋ᠤ᠌ ᠳᠤᠷᠠᠲᠠᠢ ᠪᠠᠢᠷᠢ ᠶ᠋ᠢᠨ ᠰᠡᠭᠰᠡᠭᠡᠷ ᠦᠰᠦ ᠲᠡᠢ ᠡᠷᠡ ᠄
— ᠡᠨᠡ ᠺᠣᠨᠳᠤᠢᠺᠲ᠋ᠣᠷ ᠶᠠᠭᠠᠬᠢᠪᠠᠴᠤ ᠵᠦᠭᠡᠷ ᠪᠠᠢᠵᠤ ᠪᠠᠢᠭᠠᠳ ᠥᠪᠡᠷ ᠢ᠋ᠶ᠋ᠡᠨ ᠤᠬᠢᠯᠠᠬᠤ ᠶᠣᠰᠣ ᠦᠭᠡᠢ᠂ ᠨᠠᠭᠠᠳᠤ ᠨᠥᠬᠥᠷ ᠴᠢᠨᠢ ᠮᠥᠩᠭᠥ ᠥᠭ ᠭᠡᠬᠦ ᠪᠡᠷ ᠨᠢ ᠵᠡᠭᠦᠦ ᠬᠠᠳᠬᠤᠭᠰᠠᠨ ᠪᠠᠢᠬᠠ ᠭᠡᠵᠦ ᠬᠠᠰᠬᠢᠷᠬᠤ ᠳ᠋ᠤ᠌ ᠪᠠᠰᠠ ᠨᠢᠭᠡ ᠵᠠᠯᠠᠭᠤ ᠲᠡᠭᠦᠨ ᠢ᠋ ᠳᠠᠮᠵᠢᠨ᠄
— ᠺᠣᠨᠳᠤᠢᠺᠲ᠋ᠣᠷ ᠤ᠋ᠳ ᠵᠡᠭᠦᠦ ᠪᠡᠷ ᠬᠠᠳᠬᠤᠭᠰᠠᠨ ᠲᠡᠳᠦᠢ ᠳ᠋ᠦ᠍ ᠠᠮᠠᠷᠬᠠᠨ ᠤᠬᠢᠯᠠᠬᠤ ᠦᠭᠡᠢ᠂ ᠡᠳᠡ ᠴᠢᠨᠢ ᠵᠡᠭᠦᠦ ᠣᠷᠣᠬᠤ ᠵᠠᠢ ᠦᠭᠡᠢ ᠰᠢᠬᠠᠯᠴᠠᠯᠳᠤᠭᠰᠠᠨ ᠬᠥᠮᠦᠰ ᠳᠤᠮᠳᠠᠭᠤᠷ ᠵᠢᠳᠬᠦᠭᠰᠡᠭᠡᠷ ᠪᠠᠢᠭᠠᠳ ᠪᠡᠬᠢ ᠪᠡᠷ ᠬᠠᠵᠠᠭᠤᠯᠤᠭᠰᠠᠨ ᠴᠦ᠍ ᠠᠵᠢᠷᠠᠬᠤ ᠪᠠᠷ ᠦᠭᠡᠢ ᠪᠣᠯᠤᠭᠰᠠᠨ ᠶᠤᠮ᠃ ᠡᠨᠡ ᠵᠠᠯᠠᠭᠤ ᠨᠢᠭᠡ ᠯᠡ ᠬᠣᠣᠷᠯᠠᠩᠲᠠᠢ ᠵᠦᠢᠯ ᠬᠢᠯᠡ ᠭᠡᠵᠦ ᠨᠤᠲᠠᠯᠠᠯᠠ᠃ ᠺᠣᠨᠳᠤᠢᠺᠲ᠋ᠣᠷ ᠭᠢᠩᠭᠢᠨᠡᠲᠡᠯᠡ ᠤᠬᠢᠯᠠᠨ᠂ ᠡᠭᠦᠨ ᠦ᠌ ᠤᠴᠢᠷ ᠢ᠋ ᠣᠯᠬᠤ ᠭᠡᠵᠦ ᠬᠥᠮᠦᠰ ᠮᠠᠷᠭᠤᠯᠳᠤᠨ ᠪᠢ ᠬᠠᠪᠬᠠᠨ ᠳ᠋ᠤ᠌ ᠣᠷᠣᠭᠰᠠᠨ ᠵᠡᠭᠡᠷᠡ ᠰᠢᠭ ᠪᠤᠷᠳᠦᠯᠵᠢᠨᠡ᠃
— ᠡᠨᠡ ᠵᠠᠯᠠᠭᠤ ᠺᠣᠨᠳᠤᠢᠺᠲ᠋ᠣᠷ ᠢ᠋ ᠴᠦᠩᠬᠦ ᠪᠠᠷᠢᠭᠰᠠᠨ ᠭᠤᠶᠤᠯᠭᠠᠴᠢᠨ ᠭᠡᠵᠦ ᠳᠣᠷᠣᠮᠵᠢᠯᠠᠭᠰᠠᠨ ᠪᠠᠢᠯᠭᠦᠢ ᠭᠡᠵᠦ ᠬᠡᠦᠬᠡᠨ ᠦ᠌ ᠬᠡᠯᠡᠬᠦ ᠳ᠋ᠦ᠍ ᠪᠢ ᠥᠪᠡᠷ ᠢ᠋ ᠪᠡᠨ ᠴᠠᠭᠠᠳᠬᠠᠨ ᠠᠮᠠ ᠴᠦ᠍ ᠠᠩᠭᠠᠢᠭᠠ ᠦᠭᠡᠢ ᠭᠡᠳᠡᠭ ᠢ᠋ᠶ᠋ᠡᠨ ᠠᠨᠳᠠᠭᠠᠢᠯᠠᠬᠤ ᠭᠡᠲᠡᠯᠡ ᠨᠢᠭᠡᠨ ᠡᠷᠡ ᠨᠠᠳᠠ ᠠ᠋ᠴᠠ ᠤᠷᠢᠲᠠᠵᠤ᠄
— ᠦ ᠺᠣᠨᠳᠤᠢᠺᠲ᠋ᠣᠷ ᠤ᠋ᠳ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠦᠭᠡ ᠳᠣᠭᠣᠯᠤᠭᠰᠠᠭᠠᠷ ᠪᠠᠢᠭᠠᠳ ᠪᠦᠷ ᠳᠥᠵᠢᠷᠡᠴᠢᠬᠡᠭᠰᠡᠨ ᠶᠦᠮ᠂ ᠠᠦ᠋ᠲ᠋ᠣᠪᠦ᠋ᠰ ᠬᠦᠯᠢᠶᠡᠭᠰᠡᠨ ᠦ᠌ ᠪᠡᠨ ᠰᠢᠷᠠ ᠶ᠋ᠢ ᠭᠠᠷᠭᠠᠬᠤ ᠭᠡᠰᠡᠨ ᠬᠥᠮᠦᠰ ᠡᠯᠳᠡᠪ ᠶᠠᠩᠵᠤ ᠪᠠᠷ ᠬᠡᠯᠡᠬᠦ ᠶ᠋ᠢ ᠰᠣᠨᠣᠰᠤᠭᠰᠠᠭᠠᠷ ᠬᠢᠷᠢ ᠪᠠᠷᠤᠭ ᠤ᠋ᠨ ᠵᠦᠢᠯ ᠢ᠋ ᠲᠣᠭᠣᠬᠤ ᠪᠠᠨ ᠪᠠᠢᠭᠰᠠᠨ ᠬᠥᠮᠦᠰ᠂ ᠺᠣᠨᠳᠤᠢᠺᠲ᠋ᠣᠷ ᠤᠬᠢᠯᠠᠵᠤ ᠪᠠᠢᠬᠤ ᠶ᠋ᠢ ᠪᠣᠳᠣᠬᠤ ᠳ᠋ᠤ᠌ ᠨᠠᠭᠠᠳᠤ ᠨᠥᠬᠥᠷ ᠴᠢᠨᠢ ᠬᠥᠮᠦᠨ ᠦ᠌ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠮᠠ ᠦᠭᠡᠢ ᠨᠣᠴᠢᠲᠠᠢ ᠵᠦᠢᠯ ᠬᠢᠭᠰᠡᠨ ᠪᠠᠢᠬᠠ᠃ ᠡᠨᠡ ᠡᠲᠡᠭᠡᠳ ᠢ᠋ ᠰᠡᠷᠭᠡᠢᠯᠡᠬᠦ ᠳ᠋ᠦ᠍ ᠠᠪᠠᠴᠢᠪᠠᠯ ᠲᠠᠭᠠᠷᠠᠨᠠ ᠭᠡᠵᠦ ᠬᠡᠯᠡ ᠠᠮᠠ ᠪᠠᠨ ᠪᠢᠯᠢᠬᠦᠳᠡᠵᠠᠢ᠃
ᠠᠦ᠋ᠲ᠋ᠣᠪᠦ᠋ᠰ ᠲᠤ ᠶᠠᠪᠤᠭᠠ ᠬᠥᠮᠦᠨ ᠪᠦᠷᠢ ᠺᠣᠨᠳᠤᠢᠺᠲ᠋ᠣᠷ ᠤᠬᠢᠯᠠᠬᠤ ᠭᠡᠳᠡᠭ ᠲᠡᠮᠡᠭᠡ ᠮᠥᠷᠭᠥᠯᠳᠦᠬᠦ ᠡᠴᠡ ᠬᠣᠪᠣᠷ ᠶᠡᠷᠦ ᠪᠠᠢᠵᠤ ᠪᠣᠯᠤᠮᠠ ᠦᠭᠡᠢ ᠵᠦᠢᠯ ᠭᠡᠳᠡᠭ ᠢ᠋ ᠪᠠᠲᠤᠯᠠᠬᠤ ᠲᠣᠰᠤᠮ ᠮᠢᠨᠦ ᠬᠡᠷᠡᠭ ᠬᠦᠨᠳᠦᠷᠡᠵᠦ ᠪᠠᠢᠯᠠ᠃ ᠲᠡᠭᠡᠲᠡᠯᠡ ᠨᠢᠭᠡ ᠰᠠᠬᠠᠯ ᠲᠠᠢ ᠬᠠᠷᠠ ᠬᠥᠮᠦᠨ ᠨᠠᠳᠠ ᠳ᠋ᠤ᠌ ᠲᠤᠰᠠ ᠪᠣᠯᠪᠠ᠃ ᠲᠡᠷᠡ ᠬᠠᠴᠠᠷ ᠢ᠋ᠶ᠋ᠠᠨ ᠢᠯᠢᠵᠦ᠄
— ᠲᠠ ᠮᠢᠨᠢ ᠨᠠᠭᠠᠳᠤ ᠵᠠᠯᠠᠭᠤ ᠪᠠᠨ ᠪᠢᠲᠡᠭᠡᠢ ᠵᠢᠮᠡᠯᠡ᠂ ᠴᠠᠭᠠᠳᠤ ᠺᠣᠨᠳᠤᠢᠺᠲ᠋ᠣᠷ ᠴᠢᠨᠢ ᠥᠪᠡᠷ ᠢ᠋ᠶ᠋ᠡᠨ ᠪᠤᠷᠤᠭᠤ ᠲᠠᠢ ᠪᠠᠢᠵᠤ ᠮᠠᠭᠠᠳ ᠦᠭᠡᠢ ᠭᠡᠬᠦ ᠳ᠋ᠦ᠍᠂
— ᠶᠠᠭᠠᠬᠢᠭᠠᠳ ᠲᠡᠷᠡ ᠪᠢᠯᠡ ᠭᠡᠵᠦ ᠴᠦᠩᠬᠦ ᠪᠠᠷᠢᠭᠰᠠᠨ ᠰᠢᠷᠠ ᠠᠪᠠᠭᠠᠢ ᠥᠨᠥ ᠬᠥᠮᠦᠨ ᠤᠷᠤᠭᠤ ᠣᠮᠣᠭᠳᠠᠪᠠ᠃ ᠰᠠᠬᠠᠯᠲᠤ ᠡᠷᠡ ᠠᠪᠠᠭᠠᠢ ᠤᠷᠤᠭᠤ ᠬᠢᠯᠠᠮ ᠬᠢᠭᠡᠳ᠄
— ᠶᠠᠭᠠᠬᠢᠭᠠᠳ ᠠ᠋? ᠶᠠᠭᠠᠬᠢᠭᠠᠳ ᠭᠡᠪᠡᠯ ᠤᠯᠤᠰ ᠤ᠋ᠨ ᠠᠦ᠋ᠲ᠋ᠣᠪᠦ᠋ᠰ ᠲᠤ ᠰᠠᠭᠤᠭᠰᠠᠨ ᠤ᠋ ᠲᠥᠯᠥᠭᠡ ᠥᠪᠡᠷ ᠲᠡᠭᠡᠨ ᠠᠪᠬᠤ ᠭᠡᠵᠦ ᠪᠠᠢᠭᠠ ᠶᠤᠮ ᠰᠢᠭ᠋ ᠲᠠᠪᠢᠨ ᠮᠥᠩᠭᠥ ᠰᠠᠯᠤᠯ ᠦᠭᠡᠢ ᠨᠡᠬᠡᠭᠡᠳ ᠴᠠᠭᠠᠨᠠ ᠪᠠᠨ ᠯᠠ ᠨᠦᠮᠵᠢᠭ ᠦᠭᠡᠢ ᠰᠢᠦ᠃ ᠪᠠᠰᠠ ᠲᠡᠭᠡᠭᠡᠳ ᠬᠣᠲᠠ ᠶ᠋ᠢᠨ ᠭᠤᠷᠪᠠᠨ ᠵᠠᠭᠤ ᠭᠠᠷᠤᠢᠬᠠᠨ ᠮᠢᠩᠭᠠᠨ ᠬᠥᠮᠦᠨ ᠢ᠋ ᠨᠡᠷᠡ ᠲᠡᠢ ᠤᠰᠤ ᠲᠠᠢ ᠨᠢ ᠲᠣᠭᠲᠠᠭᠠᠴᠢᠬᠠᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠮᠠᠯ ᠰᠢᠭ᠋ ᠵᠢᠰᠦᠯᠡᠬᠦ ᠶ᠋ᠢ ᠶᠠᠭᠠᠬᠢᠨᠠ ᠭᠡᠵᠦ ᠬᠣᠰᠢᠭᠤ ᠨᠡᠮᠡᠷᠢᠯᠡᠯᠡ᠃ ᠨᠠᠮᠠ ᠶ᠋ᠢ ᠥᠮᠥᠭᠡᠷᠡᠬᠦ ᠬᠥᠮᠦᠨ ᠭᠠᠷᠬᠤ ᠪᠠᠷ ᠪᠢ ᠵᠢᠭᠠᠬᠠᠨ ᠲᠠᠢᠪᠤᠰᠢᠷᠠᠪᠠ᠃ ᠭᠡᠪᠡᠴᠦ ᠪᠢᠳᠡᠨ ᠦ᠌ ᠬᠡᠷᠡᠭᠦᠯ ᠵᠢᠯᠣᠭᠣᠴᠢ ᠶ᠋ᠢᠨ ᠴᠢᠬᠢᠨ ᠳ᠋ᠦ᠍ ᠬᠦᠷᠴᠢᠬᠡᠵᠡᠢ ᠃ ᠠᠦ᠋ᠲ᠋ᠣᠪᠦ᠋ᠰ ᠶᠠᠭ ᠬᠢᠲᠡᠯᠡ ᠲᠤᠷᠮᠤᠰᠤᠯᠠᠭᠠᠳ ᠵᠢᠯᠣᠭᠣᠴᠢ ᠭᠦᠶᠦᠵᠦ ᠢᠷᠡᠨ ᠨᠠᠮᠠ ᠶ᠋ᠢ ᠵᠠᠭᠠᠮᠠᠳᠠᠭᠠᠳ ᠄
— ᠴᠢ ᠶᠠᠭᠠᠬᠢᠭᠠᠳ ᠮᠠᠨ ᠤ᠋ ᠺᠣᠨᠳᠤᠢᠺᠲ᠋ᠣᠷ ᠢ᠋ ᠵᠣᠳᠣᠳᠠᠭ ᠪᠢᠯᠡ? ᠴᠢᠮᠠ ᠶ᠋ᠢ ᠰᠡᠷᠭᠡᠢᠯᠡᠬᠦ ᠳ᠋ᠦ᠍ ᠠᠪᠠᠴᠢᠨᠠ ᠭᠡᠵᠦ ᠴᠢᠷᠪᠡ᠃ ᠪᠢᠳᠠᠷᠠᠭᠤᠨ ᠵᠢᠯᠣᠭᠣᠴᠢ ᠶ᠋ᠢᠨ ᠴᠢᠭᠢᠷᠠᠭ ᠭᠠᠷ ᠲᠤ ᠴᠢᠭᠢᠭ ᠦ᠋ᠨ ᠤᠯᠠᠭᠠᠨ ᠥᠳᠥ ᠰᠢᠭ ᠰᠡᠷᠪᠡᠯᠵᠡᠵᠦ ᠪᠠᠢᠲᠠᠯᠠ ᠤᠬᠢᠯᠠᠵᠤ ᠤᠬᠢᠯᠠᠵᠤ ᠲᠠᠢᠪᠤᠰᠢᠷᠠᠭᠰᠠᠨ ᠴᠦ᠍ ᠶᠤᠮ ᠤᠤ ᠪᠤᠤ ᠮᠡᠳᠡ ᠥᠨᠥ ᠭᠠᠢ ᠲᠠᠢ ᠺᠣᠨᠳᠤᠢᠺᠲ᠋ᠣᠷ ᠨᠢᠯᠪᠤᠰᠤ ᠪᠠᠨ ᠠᠷᠴᠢᠨ ᠪᠠᠢᠵᠤ᠄
— ᠨᠠᠭᠠᠳᠤ ᠬᠥᠮᠦᠨ ᠴᠢᠨᠢ ᠭᠡᠮ ᠦᠭᠡᠢ᠃ ᠨᠠᠳᠠ ᠳ᠋ᠤ᠌ ᠪᠠᠶᠠᠷᠯᠠᠯᠠ ᠭᠡᠵᠦ ᠬᠡᠯᠡᠬᠦ ᠪᠡᠷ ᠨᠢ ᠪᠢ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠤᠶᠠᠷᠠᠭᠠᠳ ᠤᠬᠢᠯᠠᠴᠢᠬᠠᠯᠠ᠃ ᠣᠯᠠᠨ ᠲᠦᠮᠡᠨ ᠳ᠋ᠦ᠍ ᠬᠢᠷᠢ ᠴᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠦᠢᠯᠡᠴᠢᠯᠡᠵᠦ ᠡᠭᠦᠷᠭᠡ ᠪᠡᠨ ᠪᠡᠶᠡᠯᠡᠭᠦᠯᠵᠦ ᠶᠠᠪᠤᠬᠤ ᠳ᠋ᠤ᠌ ᠮᠢᠨᠢ ᠵᠣᠷᠴᠢᠭᠴᠢᠳ ᠶᠤᠮ ᠯᠠ ᠪᠣᠯ ᠠᠭᠠᠰᠢᠯᠠᠵᠤ ᠵᠠᠩᠨᠠᠳᠠᠭ ᠪᠣᠯ ᠡᠨᠡ ᠬᠥᠮᠦᠨ ᠮᠢᠨᠦ ᠬᠥᠳᠡᠯᠮᠦᠷᠢ ᠶ᠋ᠢ ᠬᠦᠨᠳᠦᠯᠡᠨ ᠲᠠᠯᠠᠷᠬᠠᠵᠤ ᠪᠠᠢᠬᠤ ᠳ᠋ᠤ᠌ ᠪᠢ ᠪᠠᠶᠠᠷᠯᠠᠬᠤ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ ᠳᠠ ᠭᠡᠳᠡᠭ ᠪᠠᠢᠭᠠ᠃ ᠳᠡᠷᠭᠡᠳᠡ ᠪᠠᠢᠭᠰᠠᠨ ᠬᠥᠮᠦᠰ ᠮᠠᠯ ᠭᠠᠢᠬᠠᠵᠤ ᠴᠡᠯ ᠬᠥᠬᠥᠷᠡᠪᠡ᠃ ᠬᠠᠷᠢᠨ ᠪᠢ ᠰᠠᠭᠤᠳᠠᠯ ᠲᠠᠯᠪᠢᠵᠤ ᠥᠭᠭᠦᠭᠰᠡᠨ ᠬᠡᠦᠬᠡᠳ ᠲᠤ ᠪᠠᠶᠠᠷᠯᠠᠯᠠ ᠭᠡᠰᠡᠨ ᠢ᠋ ᠡᠨᠡ ᠺᠣᠨᠳᠤᠢᠺᠲ᠋ᠣᠷ ᠥᠪᠡᠷ ᠲᠤᠨᠢ ᠬᠡᠯᠡᠵᠦ ᠭᠡᠵᠦ ᠣᠢᠯᠠᠭᠠᠭᠰᠠᠨ ᠢ᠋ ᠮᠡᠳᠡᠪᠡ᠃ ᠲᠡᠭᠡᠭᠡᠳ《 ᠶᠠᠭᠤᠨ ᠮᠠᠶᠢᠭᠲᠠᠢ ᠶᠤᠮ ᠪᠣᠢ》 ᠭᠡᠵᠦ ᠵᠢᠪᠡᠭᠦᠦ ᠬᠦᠷᠦᠭᠡᠳ ᠤᠯᠠᠮ ᠤᠬᠢᠯᠠᠭ ᠭᠡᠵᠦ ᠪᠣᠳᠣᠨ᠄
— ᠠᠭᠤᠴᠢᠯᠠᠭᠠᠷᠠᠢ᠂ ᠪᠢ ᠲᠠᠨ ᠳ᠋ᠤ᠌ ᠪᠠᠶᠠᠷᠯᠠᠯᠠ ᠭᠡᠵᠦ ᠬᠡᠯᠡᠭᠡ ᠦᠭᠡᠢ᠂ ᠨᠠᠳᠠ ᠳ᠋ᠤ᠌ ᠰᠠᠭᠤᠳᠠᠯ ᠲᠠᠯᠪᠢᠵᠤ ᠥᠭᠭᠦᠭᠰᠡᠨ ᠬᠡᠦᠬᠡᠳ ᠲᠤ ᠬᠡᠯᠡᠭᠰᠡᠨ ᠶᠦᠮ ᠭᠡᠪᠡᠯ ᠺᠣᠨᠳᠤᠢᠺᠲ᠋ᠣᠷ᠄
— ᠵᠠ ᠲᠡᠭᠡᠭᠰᠡᠨ ᠪᠠᠢᠯᠭᠦᠢ ᠳᠡ᠂ ᠪᠠᠶᠠᠷᠯᠠᠯᠠ ᠭᠡᠳᠡᠭ ᠬᠥᠮᠦᠨ ᠲᠠᠭᠠᠷᠠᠯᠳᠤᠳᠠᠭ ᠦᠭᠡᠢ ᠪᠣᠯᠬᠣᠷ ᠪᠢ ᠪᠦᠷ ᠭᠠᠢᠬᠠᠭᠠᠳ ᠪᠠᠢᠭᠰᠠᠨ ᠶᠤᠮ ᠭᠡᠵᠦ ᠢᠨᠢᠶᠡᠵᠦ ᠭᠠᠷᠪᠠ᠃
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠩᠷᠢ ᠡᠵᠢ
ᠬᠢᠨᠠᠭ᠍ᠴᠢ : ᠴᠣᠯᠮᠣᠨᠲᠤᠶᠠᠭᠠ
2024᠂ 2᠂ 28 ᠦ᠌ ᠡᠳᠦᠷ