ᠨᠢᠳᠦ ᠲᠠᠢ ᠭᠤᠲᠤᠯ – ᠱᠠᠭᠲᠠᠢ ᠶᠢᠨ ᠴᠠᠨᠳᠠ - ᠠᠶᠤᠰᠢ Нүдтэй гутал – Шагтайн цэнд - Аюуши
293ᠨᠢᠳᠦ ᠲᠠᠢ ᠭᠤᠲᠤᠯ
ᠱᠠᠭᠲᠠᠢ ᠶ᠋ᠢᠨ ᠴᠠᠨᠲᠠ - ᠠᠶᠤᠰᠢ
ᠡᠬᠡᠨᠡᠷ ᠠᠪᠬᠤ ᠠ᠋ᠴᠠ ᠡᠮᠦᠨᠡ ᠪᠢ ᠠᠬᠠᠷ ᠱᠠᠬᠠᠷ ᠵᠣᠪᠠᠯᠠᠩ ᠮᠡᠳᠡᠳᠡᠭ ᠦᠭᠡᠢ ᠪᠠᠢᠵᠠᠢ᠃ ᠭᠡᠲᠡᠯᠡ ᠪᠢ ᠨᠢᠭᠡ ᠬᠡᠦᠬᠡᠨ ᠳ᠋ᠦ᠍ ᠰᠡᠳᠬᠢᠯ ᠲᠡᠢ ᠪᠣᠯᠤᠯᠠ᠃
ᠨᠢᠭᠡ ᠤᠳᠠᠭᠠ ᠪᠢᠳᠡ ᠬᠣᠶᠠᠷ ᠶᠡᠬᠡ ᠯᠡ ᠠᠮᠢᠨᠴᠢᠯᠠᠨ ᠶᠠᠷᠢᠯᠴᠠᠯᠠ᠃
— ᠴᠢ ᠨᠠᠳᠠ ᠳ᠋ᠤ᠌ ᠬᠠᠢᠷᠠᠲᠠᠢ ᠤᠤ ᠭᠡᠵᠦ ᠮᠢᠨᠦ ᠬᠣᠩᠭᠣᠷ ᠠᠰᠠᠭᠤᠵᠤ ᠪᠠᠢᠨᠠ᠃
— ᠪᠢ ᠴᠢᠨᠦᠬᠢ ᠪᠡᠨ ᠲᠥᠯᠥᠭᠡ ᠬᠣᠶᠠᠷ ᠵᠡᠭᠡᠷᠳᠡ ᠪᠡᠷ ᠳᠡᠯᠡᠬᠡᠢ ᠲᠣᠭᠣᠷᠢᠭᠰᠠᠨ ᠴᠤ᠌ ᠪᠡᠯᠡᠨ ᠭᠡᠪᠡ᠃
— ᠲᠡᠢᠮᠦ ᠯᠡ ᠪᠣᠯ ᠭᠦᠢᠴᠡᠬᠦ ᠨᠢ ᠲᠡᠷᠡ ᠭᠡᠵᠦ ᠲᠡᠷᠡ ᠮᠢᠨᠢ ᠬᠡᠯᠡᠯᠡ᠃
ᠤᠳᠠᠯ ᠦᠭᠡᠢ ᠪᠢᠳᠡ ᠬᠣᠶᠠᠷ ᠭᠡᠷᠯᠡᠪᠡ᠃ ᠨᠢᠭᠡ ᠥᠷᠥᠭᠡ ᠠᠶᠠᠲᠠᠢᠬᠠᠨ ᠪᠠᠢᠷᠢᠨ ᠳ᠋ᠤ᠌ ᠣᠷᠣᠯᠠ᠃ ᠥᠷᠭᠡᠨ ᠣᠷᠣ ᠲᠠᠢ᠂ ᠵᠢᠷᠤᠭᠲᠤ ᠷᠠᠳᠢᠣ᠋ ᠲᠠᠢ ᠣᠶᠤᠲᠠᠨ ᠪᠢᠳᠡᠨ ᠳ᠋ᠡᠭᠡᠨ ᠲᠣᠪ ᠬᠢᠭᠰᠡᠨ ᠠᠢᠯ ᠪᠣᠯᠪᠠ᠃ ᠨᠠᠳᠠ ᠳ᠋ᠤ᠌ ᠡᠪᠯᠢᠭᠬᠡᠨ ᠠᠭᠠᠰᠢ ᠲᠠᠢ ᠴᠡᠪᠡᠷᠴᠢ ᠨᠢᠮᠪᠠᠢ ᠭᠡᠷᠭᠡᠢ ᠵᠠᠶᠠᠭᠠᠵᠠᠢ᠃ ᠪᠦᠬᠦ ᠶᠠᠭᠤᠮᠠ ᠰᠠᠢᠨ ᠰᠠᠢᠬᠠᠨ ᠪᠠᠢᠯᠠ᠃ ᠭᠡᠲᠡᠯᠡ ᠨᠢᠭᠡ ᠤᠳᠠᠭᠠ ᠲᠡᠷᠡ ᠮᠢᠨᠢ᠄
— ᠮᠠᠨ ᠤ᠋ ᠠᠩᠭᠢ ᠶ᠋ᠢᠨ ᠪᠦᠬᠦ ᠥᠬᠢᠳ ᠦ᠋ᠳ ᠴᠠᠬᠢᠯᠭᠠᠨ ᠲᠣᠪᠴᠢ ᠲᠠᠢ ᠭᠤᠲᠤᠯ ᠡᠮᠦᠰᠳᠡᠭ ᠪᠣᠯᠵᠠᠢ᠂ ᠪᠢ ᠯᠡ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠵᠠᠬᠠ ᠶ᠋ᠢᠨ ᠭᠠᠭᠴᠠ ᠤᠯᠢᠶᠠᠰᠤ ᠰᠢᠭ᠋ ᠰᠣᠨᠳᠣᠭᠣᠢ ᠶᠠᠪᠤᠬᠤ ᠪᠣᠯᠤᠯᠠ ᠭᠡᠵᠦ ᠭᠣᠮᠣᠳᠠᠯᠠ᠃ ᠪᠡᠶᠡ ᠪᠡᠶᠡ ᠪᠡᠨ ᠠᠯᠪᠠ ᠰᠢᠭ᠋ ᠳᠠᠭᠤᠷᠢᠶᠠᠳᠠᠭ ᠨᠢ ᠬᠡᠦᠬᠡᠨ ᠨᠣᠭᠥᠳ ᠦ᠋ᠨ ᠵᠠᠩ ᠬᠣᠢᠨᠠ ᠳᠠ᠃ ᠪᠢ ᠰᠠᠷᠠ ᠶ᠋ᠢᠨ ᠢ᠋ᠶ᠋ᠡᠨ ᠰᠲ᠋ᠢᠫᠧᠨᠳ᠋ ( ᠰᠤᠷᠤᠯᠭᠠ ᠶ᠋ᠢᠨ ᠲᠡᠳᠬᠦᠮᠵᠢ) ᠶ᠋ᠢ ᠡᠪᠦᠷᠲᠦᠯᠡᠵᠦ ᠭᠤᠲᠤᠯ ᠤ᠋ᠨ ᠡᠷᠢᠯ ᠳ᠋ᠦ᠍ ᠭᠠᠷᠪᠠ᠃ ᠳᠡᠯᠭᠡᠭᠦᠷ ᠡᠴᠡ ᠡᠰᠡ ᠣᠯᠤᠭᠠᠳ ᠵᠠᠬᠠ ᠳᠡᠭᠡᠷᠡ ᠣᠴᠢᠪᠠᠯ ᠭᠤᠲᠤᠯ ᠪᠠᠷᠢᠭᠰᠠᠨ ᠲᠠᠷᠴᠢᠬᠡᠷ ᠬᠥᠬᠡ ᠬᠠᠷᠠᠬᠦᠦ400 ᠭᠡᠳ ᠵᠣᠭᠰᠣᠵᠤ ᠪᠠᠢᠪᠠ᠃ ᠡᠩᠭᠡᠷ ᠢ᠋ᠶ᠋ᠡᠨ ᠲᠡᠮᠲᠡᠷᠢᠵᠦ ᠰᠠᠨᠠᠭᠠ ᠠᠯᠲᠠᠨ ᠪᠠᠢᠲᠠᠯᠠ ᠲᠠᠨᠢᠳᠠᠭ ᠬᠥᠮᠦᠨ ᠲᠠᠭᠠᠷᠠᠯᠳᠤᠵᠤ ᠭᠣᠣᠯ ᠳ᠋ᠤ᠌ ᠣᠷᠣᠪᠠ᠃
ᠭᠡᠷᠭᠡᠢ ᠮᠢᠨᠢ ᠦᠶᠡᠷᠬᠡᠳᠡᠭ ᠬᠡᠦᠬᠡᠨ ᠨᠦ᠍ᠭᠦᠳ ᠲᠡᠢ ᠪᠡᠨ ᠭᠤᠲᠤᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠤᠰᠤᠨ ᠤ᠋ ᠬᠣᠶᠠᠷ ᠳᠤᠰᠤᠯ ᠰᠢᠭ᠋ ᠢᠵᠢᠯᠢ ᠪᠣᠯᠤᠯᠠ᠃
ᠬᠡᠳᠦ ᠬᠣᠨᠣᠭ ᠥᠩᠭᠡᠷᠡᠪᠡ᠃ ᠲᠡᠭᠡᠭᠰᠡᠨ ᠬᠠᠢᠷᠠᠲᠤ ᠮᠢᠨᠢ ᠨᠢᠭᠡ ᠡᠳᠦᠷ ᠪᠠᠰᠠ ᠯᠠ᠄
— ᠨᠠᠢᠵᠠ ᠨᠢ ᠬᠢᠴᠢᠶᠡᠯ ᠳ᠋ᠡᠭᠡᠨ ᠶᠠᠪᠤᠬᠤ ᠠ᠋ᠴᠠ ᠢᠴᠢᠭᠡᠳ ᠪᠠᠢᠨᠠ᠃ ᠨᠣᠷᠵᠢᠨ᠂ ᠬᠠᠨᠳᠠ᠂ ᠲᠤᠯᠭᠠᠷ ᠪᠦᠭᠦᠳᠡ ᠯᠡ ᠤᠭᠠᠯᠵᠠ ᠲᠠᠢ ᠭᠤᠲᠤᠯ ᠡᠮᠦᠰᠳᠡᠭ ᠪᠣᠯᠵᠤ ᠪᠢ ᠶᠠᠭᠠᠬᠢᠵᠤ ᠡᠢᠮᠦ ᠭᠤᠲᠤᠯ ᠲᠠᠢ ᠣᠴᠢᠬᠤ ᠪᠣᠢ ᠭᠡᠳᠡᠭ ᠪᠠᠢᠨᠠ᠃
ᠪᠢᠳᠡ ᠬᠣᠶᠠᠷ ᠶᠠᠷᠢᠯᠴᠠᠭᠠᠳ ᠲᠧᠯᠸᠢᠰ ᠢ᠋ᠶ᠋ᠡᠷ ᠵᠠᠷᠯᠠᠯᠠ᠃ ᠭᠡᠷᠭᠡᠢ ᠮᠠᠨᠢ ᠴᠣ ᠬᠢᠴᠢᠶᠡᠯ ᠳ᠋ᠦ᠍ ᠰᠡᠳᠬᠢᠯ ᠠᠮᠠᠷ ᠶᠠᠪᠤᠬᠤ ᠪᠣᠯᠪᠠ᠃ ᠭᠡᠪᠡᠴᠦ ᠡᠭᠦᠨ ᠦ᠌ ᠳᠠᠷᠠᠭᠠ ᠮᠠᠨ ᠤ᠋ ᠬᠢ ᠥᠷᠭᠡᠨ ᠣᠷᠣ ᠪᠠᠨ ᠭᠤᠲᠤᠯ ᠢ᠋ᠶ᠋ᠠᠷ ᠥᠭᠭᠦᠯᠡ᠃ ᠮᠠᠨ ᠤ᠋ ᠭᠡᠷᠭᠡᠢ ᠮᠠᠶᠢᠭ ᠤ᠋ᠨ ᠭᠤᠲᠤᠯ ᠢ᠋ᠶ᠋ᠠᠷ ᠭᠤᠶᠤᠵᠤ ᠶᠠᠪᠤᠳᠠᠭ ᠢ᠋ ᠬᠥᠮᠦᠰ ᠠᠨᠳᠠᠬᠤ ᠦᠭᠡᠢ ᠪᠣᠯᠪᠠᠴᠤ ᠪᠢᠳᠡ ᠬᠣᠶᠠᠷ ᠤ᠋ᠨ ᠬᠡᠪᠲᠡᠬᠦ ᠣᠷᠣ ᠦᠭᠡᠢ ᠶ᠋ᠢ ᠲᠡᠳᠡ ᠦᠯᠦ ᠮᠡᠳᠡᠨᠡ᠃
ᠨᠢᠭᠡ ᠡᠳᠦᠷ ᠪᠢ ᠳᠠᠪᠲᠠᠯᠭᠠ ᠳ᠋ᠤ᠌ ᠰᠠᠭᠤᠴᠢᠬᠠᠭᠠᠳ ᠬᠦᠷᠴᠦ ᠢᠷᠡᠲᠡᠯᠡ ᠬᠠᠢᠷᠠᠲᠤ ᠮᠢᠨᠢ ᠤᠬᠢᠯᠠᠵᠤ ᠰᠠᠭᠤᠪᠠ᠃ ᠥᠰᠥᠭᠡᠢ ᠦᠭᠡᠢ ᠭᠤᠲᠤᠯ ᠤ᠋ᠨ ᠣᠷᠣᠨ ᠳ᠋ᠤ᠌ ᠬᠡᠦᠬᠡᠨ ᠨᠣᠭᠥᠳ ᠦᠳᠡᠭᠡᠰᠦᠲᠡᠢ ᠭᠤᠲᠤᠯ ᠡᠮᠦᠰᠳᠡᠭ ᠪᠣᠯᠤᠭᠰᠠᠨ ᠭᠡᠨᠡ᠃
— ᠵᠠ ᠪᠢᠲᠡᠭᠡᠢ ᠤᠬᠢᠯᠠ ᠳᠠ ᠬᠣᠩᠭᠣᠷ ᠮᠢᠨᠢ᠃ ᠮᠥᠩᠭᠥ ᠯᠡ ᠵᠢᠭᠡᠯᠡᠬᠦ ᠬᠥᠮᠦᠨ ᠣᠯᠬᠤ ᠠ᠋ᠴᠠ ᠭᠡᠵᠦ ᠠᠷᠭᠠᠲᠠᠯᠠ᠃
— ᠬᠠᠨᠳᠠ ᠪᠠᠢᠷᠢ ᠪᠠᠨ ᠭᠤᠲᠤᠯ ᠢ᠋ᠶ᠋ᠠᠷ ᠰᠣᠯᠢᠭᠰᠠᠨ ᠭᠡᠨᠡ ᠭᠡᠵᠦ ᠭᠡᠷᠭᠡᠢ ᠮᠠᠨᠢ ᠬᠢᠩᠭᠢᠨᠡᠪᠡ᠃ ᠪᠢ ᠡᠨᠡ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠴᠢᠷᠠᠢ ᠪᠠᠨ ᠪᠠᠷᠤᠢᠯᠭᠠᠭᠰᠠᠨ ᠪᠣᠯᠪᠠᠴᠤ《 ᠬᠣᠶᠠᠷ ᠵᠡᠭᠡᠷᠳᠡ ᠪᠡᠷ ᠢ᠋ᠶ᠋ᠡᠨ ᠳᠡᠯᠡᠬᠡᠢ ᠲᠣᠭᠣᠷᠢᠨᠠ》 ᠭᠡᠰᠡᠨ ᠢ᠋ᠶ᠋ᠡᠨ ᠰᠠᠨᠠᠵᠤ ᠬᠡᠯᠡ ᠪᠡᠨ ᠬᠠᠵᠠᠯᠠ᠃
ᠬᠣᠶᠠᠭᠤᠯᠠ ᠨᠢᠭᠡ ᠠᠢᠯ ᠤ᠋ᠨ ᠢᠯᠡᠭᠦᠦ ᠥᠷᠥᠭᠡᠨ ᠳ᠋ᠦ᠍ ᠬᠣᠷᠭᠣᠳᠠᠬᠤ ᠪᠣᠯᠪᠠ᠃ ᠲᠡᠭᠡᠭᠡᠳ ᠲᠡᠷᠡ ᠨᠢᠭᠡ ᠡᠳᠦᠷ ᠪᠢᠳᠡ ᠬᠣᠶᠠᠷ ᠭᠤᠳᠤᠮᠵᠢᠨ ᠳ᠋ᠤ᠌ ᠰᠤᠭᠤᠳᠠᠯᠴᠠᠩᠬᠠᠨ ᠠᠯᠬᠤᠵᠤ ᠶᠠᠪᠤᠲᠠᠯᠠ ᠳᠡᠷᠭᠡᠳᠡᠭᠦᠷ ᠨᠢᠭᠡ ᠵᠣᠯᠢᠭ ᠤ᠋ᠨ ᠬᠡᠦᠬᠡᠨ ᠥᠩᠭᠡᠷᠡᠯᠡ᠃ ᠡᠬᠡᠨᠡᠷ ᠮᠠᠨᠢ ᠲᠡᠭᠦᠨ ᠦ᠌ ᠭᠤᠲᠤᠯ ᠢ᠋ ᠬᠠᠷᠠᠭᠠᠳ᠄
— ᠶᠡᠷᠦ ᠳ᠋ᠡᠭᠡᠨ ᠠᠮᠢᠳᠤ ᠶᠠᠪᠤᠭᠰᠠᠨ ᠤ᠋ ᠬᠡᠷᠡᠭ ᠠᠯᠠᠭᠠ ᠭᠡᠵᠦ ᠰᠡᠭᠦᠷᠡᠰᠦ ᠠᠯᠳᠠᠯᠠ᠃
— ᠶᠠᠭᠠᠬᠢᠪᠠ? ᠭᠡᠪᠡᠯ᠂
— ᠬᠠᠷᠠᠭᠠᠴᠢ! ᠴᠣᠬᠣᠷ ᠭᠤᠲᠤᠯ ᠭᠠᠷᠴᠢᠬᠠᠵᠠᠢ᠃ ᠪᠤᠰᠢᠭᠤᠬᠠᠨ ᠬᠠᠷᠢᠶᠠ᠂ ᠡᠢᠮᠦ《 ᠬᠣᠴᠣᠷᠤᠭᠳᠠᠭᠰᠠᠨ》 ᠭᠤᠲᠤᠯ ᠲᠠᠢ ᠶᠠᠪᠤᠭᠠ ᠶ᠋ᠢ ᠮᠢᠨᠢ ᠬᠡᠦᠬᠡᠨ ᠨᠦ᠍ᠭᠦᠳ ᠬᠠᠷᠠᠴᠢᠬᠠᠪᠠᠯ ᠱᠣᠣᠯᠠᠨᠠ ᠭᠡᠳᠡᠭ ᠪᠠᠢᠨᠠ᠃
ᠰᠢᠪᠠᠷ ᠦᠰᠦᠷᠦᠭᠡᠳ ᠴᠣᠬᠣᠷᠳᠠᠭᠤᠯᠴᠢᠬᠠᠭᠰᠠᠨ ᠭᠤᠲᠤᠯ ᠦᠵᠡᠭᠡᠳ ᠭᠡᠨᠡᠳᠡᠵᠦ ᠪᠠᠢᠭᠠ ᠭᠡᠷᠭᠡᠢ ᠪᠡᠨ ᠬᠠᠷᠠᠭᠠᠳ ᠦᠷᠦ ᠡᠪᠡᠳᠦᠮᠡᠷ ᠴᠦ᠍ ᠶᠦᠮ ᠰᠢᠭ ᠪᠣᠯᠵᠤ ᠵᠢᠭᠠᠬᠠᠨ ᠳᠠᠭᠠᠵᠢᠩᠨᠠᠮᠠᠷ ᠰᠠᠨᠠᠭᠳᠠᠪᠠ᠃
— ᠬᠡᠩ᠁ ᠲᠡᠢᠮᠦ ᠪᠠᠢᠨᠠ᠃ ᠭᠡᠪᠡᠴᠦ ᠡᠨᠡ ᠮᠠᠶᠢᠭ ᠴᠢᠨᠢ ᠬᠠᠭᠤᠴᠢᠷᠠᠭᠰᠠᠨ ᠪᠠᠢᠬᠠ᠂ ᠬᠠᠷᠢᠨ ᠨᠢᠳᠦ ᠲᠡᠢ ᠭᠤᠲᠤᠯ ᠵᠠᠬᠢᠶᠠᠯᠠᠭᠠ ᠪᠠᠷ ᠬᠢᠵᠦ ᠪᠠᠢᠭᠠ ᠭᠡᠨᠡ ᠯᠡ ᠭᠡᠪᠡ᠃
— ᠶᠠᠭᠤ?᠁ ᠨᠢᠳᠦ ᠲᠡᠢ ᠭᠤᠲᠤᠯ ᠠ᠋?
— ᠲᠡᠢᠮᠦ ᠠ᠋᠂ ᠬᠣᠩᠰᠢᠶᠠᠷ ᠳᠡᠭᠡᠷᠡ ᠪᠡᠨ ᠲᠣᠮᠣ ᠨᠢᠳᠦ ᠲᠡᠢ ᠭᠤᠲᠤᠯ ᠭᠡᠵᠦ ᠪᠢ ᠬᠡᠨᠡᠭ ᠦᠭᠡᠢ ᠵᠠᠯᠠᠯᠠ᠃
— ᠫᠧᠢ ᠁ ᠲᠡᠭᠡᠪᠡᠯ ᠵᠠᠬᠢᠶᠠᠯᠠᠬᠤ ᠶᠤᠮᠰᠠᠨ᠃
— ᠭᠡᠪᠡᠴᠦ ᠲᠡᠭᠦᠨ ᠢ᠋ ᠬᠢᠬᠦ ᠳ᠋ᠦ᠍ ᠬᠥᠮᠦᠨ ᠦ᠌ ᠨᠢᠳᠦ ᠣᠷᠣᠳᠠᠭ ᠶᠤᠮ ᠭᠡᠨᠡ᠃
— ᠠᠷᠠᠢ ᠬᠤᠳᠠᠯ ᠪᠠᠢᠯᠭᠦᠢ ᠭᠡᠳ ᠮᠢᠨᠦ ᠬᠣᠩᠭᠣᠷ ᠪᠣᠳᠣᠯ ᠳ᠋ᠤ᠌ ᠣᠷᠣᠯᠠ᠃《 ᠣᠳᠣ ᠯᠠ ᠨᠢᠭᠡ》 ᠭᠡᠵᠦ ᠪᠢ ᠪᠤᠳᠤᠲᠠᠯᠠ ᠭᠡᠷᠭᠡᠢ ᠮᠢᠨᠢ ᠴᠥᠬᠥᠷᠡᠭᠰᠡᠨ ᠳᠠᠭᠤ ᠪᠠᠷ᠄
— ᠠᠯᠢ ᠵᠡᠷᠭᠡ ᠡᠪᠡᠳᠬᠦ ᠪᠣᠯ᠁ ᠬᠣᠶᠠᠭᠤᠯᠠ ᠪᠠᠨ ᠣᠴᠢᠭᠠᠳ ᠦᠵᠡᠬᠦ ᠤᠤ? ᠭᠡᠳᠡᠭ ᠪᠠᠢᠨᠠ ᠰᠢᠦ ᠲᠠ ᠮᠢᠨᠢ᠃
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠪᠣᠷᠵᠢᠭᠢᠨ ᠪᠠᠭᠠᠲᠤᠷ
ᠬᠢᠨᠠᠭ᠍ᠴᠢ : ᠴᠣᠯᠮᠣᠨᠲᠤᠶᠠᠭᠠ
2024᠂ 2᠂ 27 ᠦ᠌ ᠡᠳᠦᠷ