ᠠᠯᠳᠠᠭᠤᠯ ᠲᠡᠮᠡᠭᠡ – ᠫ ᠂ ᠬᠣᠷᠯᠣ Алдуул тэмээ – П ᠂ Хорол
344ᠠᠯᠳᠠᠭᠤᠯ ᠲᠡᠮᠡᠭᠡ
ᠫ ᠂ ᠬᠣᠷᠯᠣ
( ᠱᠣᠭ ᠥᠭᠦᠯᠡᠯᠭᠡ)
ᠴᠠᠮᠪᠠᠯ ᠣᠷᠣᠢ ᠲᠡᠮᠡᠭᠡ ᠪᠡᠨ ᠭᠡᠷ ᠤᠷᠤᠭᠤ ᠪᠠᠨ ᠲᠠᠭᠤᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠲᠡᠮᠡᠭᠡᠨ ᠳ᠋ᠦ᠍ᠨᠢ ᠢᠷᠡᠵᠦ ᠨᠡᠢᠯᠡᠭᠰᠡᠨ ᠰᠢᠷᠡᠭᠡ ᠪᠦᠬᠦ ᠲᠡᠢ ᠬᠦᠷᠡᠩ ᠳᠡᠢᠯᠦᠭ ᠢ ᠡᠷᠭᠢᠨ ᠲᠣᠭᠣᠷᠢᠨ ᠬᠠᠷᠠᠵᠤ ᠄
— ᠣᠪᠣᠭᠠ ᠬᠦᠴᠦᠲᠡᠢ ᠣᠷᠣᠭᠰᠠᠨ ᠲᠠᠢᠯᠤᠭ ᠶᠤᠮ ᠂ ᠦᠰᠦ ᠵᠢᠰᠦ ᠰᠠᠢᠲᠠᠢ ᠂ ᠨᠣᠣᠰᠣ ᠶᠡᠬᠡᠲᠡᠢ ᠂ ᠠᠴᠢᠶᠠ ᠣᠨᠣᠯᠭᠠ ᠳ᠋ᠤ᠌ ᠨᠣᠮᠣᠬᠠᠨ ᠪᠣᠯᠤᠯᠲᠠᠢ ᠪᠤᠢᠯᠠ ᠪᠤᠷᠠᠨᠲᠠᠭ ᠪᠦᠷᠢᠨ ᠶᠦᠮ ᠭᠡᠵᠦ ᠱᠣᠬᠣᠭᠣᠷᠬᠠᠨ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠲᠡᠭᠦᠨ ᠢ ᠰᠡᠭᠦᠯᠳᠡᠵᠦ ᠬᠣᠴᠣᠷᠤᠭᠠᠳ ᠪᠠᠢᠬᠤ ᠪᠠᠷ ᠨᠢ ᠲᠡᠮᠡᠭᠡᠨ ᠳᠤᠮᠳᠠ ᠪᠠᠨ ᠣᠷᠣᠭᠤᠯᠤᠨ ᠲᠠᠭᠤᠭᠰᠠᠭᠠᠷ ᠭᠡᠷ ᠦ᠋ᠨ ᠭᠠᠳᠠᠭᠠ ᠠᠪᠴᠢᠷᠠᠪᠠ ᠃
ᠮᠢᠳᠤᠭ ᠲᠡᠮᠡᠭᠡ ᠬᠤᠷᠢᠶᠠᠵᠤ ᠶᠠᠪᠤᠭᠠ ᠴᠠᠮᠪᠠᠯ ᠤ᠋ᠨ ᠡᠮᠦᠨᠡ ᠡᠴᠡ ᠤᠭᠲᠤᠨ ᠭᠠᠷᠴᠤ ᠢᠷᠡᠭᠡᠳ ᠄
— ᠡᠨᠡ ᠬᠦᠷᠡᠩ ᠲᠠᠢᠯᠤᠭ ᠴᠢᠨᠢ ᠬᠡᠨ ᠦ᠌ ᠲᠡᠮᠡᠭᠡ ᠪᠣᠢ ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌᠂
— ᠮᠡᠳᠡᠬᠦ ᠦᠭᠡᠢ ᠭᠡᠵᠦ ᠴᠠᠮᠪᠠᠯ ᠲᠣᠯᠣᠭᠠᠢ ᠰᠡᠭᠰᠦᠷᠦᠭᠡᠳ ᠄
— ᠠᠯᠳᠠᠭᠤᠯ ᠲᠡᠮᠡᠭᠡ ᠪᠣᠯᠤᠯᠲᠠᠢ᠂ ᠦᠰᠦ ᠨᠣᠣᠰᠣ ᠨᠢ ᠭᠤᠤᠵᠢᠴᠢᠬᠠᠭᠰᠠᠨ ᠣᠪᠣᠭᠠ ᠯᠠ ᠳᠡᠢᠯᠦᠭ ᠪᠠᠢᠨᠠ ᠭᠡᠵᠦ ᠨᠡᠮᠡᠵᠦ ᠬᠡᠯᠡᠭᠡᠳ ᠨᠢᠳᠦ ᠪᠡᠨ ᠴᠠᠪᠴᠢᠯᠠᠪᠠ᠃
ᠡᠨᠡ ᠴᠠᠪᠴᠢᠯᠭᠠᠨ ᠨᠢ ᠴᠠᠭᠠᠨᠠ ᠪᠠᠨ ᠶᠠᠮᠠᠷ ᠰᠡᠭᠦᠳᠡᠷ ᠪᠦᠷᠦᠯᠵᠡᠵᠦ ᠪᠠᠢᠭᠠ ᠶ᠋ᠢ ᠣᠯᠵᠤ ᠬᠠᠷᠠᠭᠠ ᠦᠭᠡᠢ ᠮᠢᠳᠤᠭ ᠡᠭᠡᠯ ᠴᠠᠭᠠᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠰᠠᠢᠬᠠᠨ ᠳᠡᠢᠯᠦᠭ ᠪᠠᠢᠨᠠ᠂ ᠨᠢᠭᠡᠳᠦᠯ ᠦ᠋ᠨ ᠮᠠᠯ ᠡᠢᠮᠦ ᠯᠡ ᠪᠠᠢᠬᠤ ᠶᠣᠰᠣᠲᠠᠢ᠃ ᠳᠡᠯ ᠦ᠋ᠨ ᠬᠠᠷᠠ ᠳ᠋ᠤ᠌ ᠪᠠᠭᠤᠭᠰᠠᠨ ᠣᠲᠣᠷᠴᠢᠨ ᠤ᠋ ᠲᠡᠮᠡᠭᠡ ᠪᠠᠢᠬᠤ᠂ ᠡᠵᠡᠨ ᠨᠢ ᠡᠷᠢᠭᠡᠳ ᠵᠣᠪᠠᠵᠤ ᠶᠠᠪᠤᠭᠠ ᠳᠠ᠂ ᠠᠯᠳᠠᠴᠢᠬᠠᠬᠤ ᠦᠭᠡᠢ ᠰᠢᠭ ᠬᠠᠷᠠᠵᠤ ᠪᠠᠢᠭᠠᠳ ᠦᠰᠦ ᠨᠣᠣᠰᠣ ᠶ᠋ᠢ ᠨᠢ ᠤᠨᠠᠭᠠᠴᠢᠭᠠᠯ ᠦᠭᠡᠢ ᠪᠦᠷᠢᠨ ᠪᠦᠲᠦᠨ ᠡᠵᠡᠨ ᠳ᠋ᠦ᠍ᠨᠢ ᠲᠤᠰᠢᠶᠠᠴᠢᠬᠠᠬᠤ ᠶᠤᠮ ᠰᠠᠨ᠃ ᠨᠢᠭᠡᠳᠦᠯ᠂ ᠣᠯᠠᠨ ᠳ᠋ᠠᠭᠠᠨ ᠨᠢᠭᠡ ᠠᠳᠬᠤ ᠨᠣᠣᠰᠣ ᠴᠤ᠌ ᠭᠡᠰᠡᠨ ᠠᠰᠢᠭ ᠪᠣᠯᠤᠨᠠ ᠳᠠ ᠭᠡᠵᠦ ᠬᠡᠯᠡᠭᠡᠳ ᠠᠷᠭᠠᠯ ᠬᠣᠷᠮᠣᠢᠯᠠᠵᠤ ᠭᠡᠷ ᠲᠡᠭᠡᠨ ᠣᠷᠣᠪᠠ᠃
ᠲᠡᠷᠡ ᠣᠷᠣᠢ ᠰᠠᠯᠬᠢ ᠦᠭᠡᠢ ᠲᠤᠩᠭᠠᠯᠠᠭ ᠰᠠᠢᠬᠠᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠤᠨᠲᠠᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠲᠡᠭᠷᠢ ᠪᠦᠷᠬᠦᠢᠵᠦ ᠰᠠᠯᠬᠢ ᠰᠡᠷ ᠰᠡᠷ ᠰᠡᠷᠪᠡᠯᠵᠡᠭᠦᠯᠵᠦ ᠪᠠᠢᠯᠠ᠃
ᠴᠠᠮᠪᠠᠯ ᠳᠡᠪᠡᠯ ᠢ᠋ᠶ᠋ᠡᠨ ᠨᠥᠮᠥᠷᠦᠨ ᠭᠠᠳᠠᠭᠠ ᠭᠠᠷᠴᠤ ᠪᠡᠶᠡ ᠵᠠᠰᠠᠬᠤ ᠵᠠᠭᠤᠷᠠ ᠠᠯᠳᠠᠭᠤᠯ ᠤ᠋ᠨ ᠬᠦᠷᠡᠩ ᠲᠡᠮᠡᠭᠡ ᠶ᠋ᠢ ᠪᠥᠭᠡᠷᠡ ᠪᠥᠭᠡᠷᠡ ᠪᠡᠨ ᠨᠡᠢᠯᠡᠭᠦᠯᠦᠨ ᠬᠡᠪᠲᠡᠭᠰᠡᠨ ᠣᠯᠠᠨ ᠲᠡᠮᠡᠭᠡᠨ ᠦ᠌ ᠳᠤᠮᠳᠠ ᠠ᠋ᠴᠠ ᠣᠯᠵᠤ ᠬᠠᠷᠠᠭᠠᠳ ᠰᠡᠳᠬᠢᠯ ᠳ᠋ᠦ᠍ᠨᠢ ᠨᠢᠭᠡ ᠪᠣᠳᠣᠯ ᠣᠷᠣᠵᠤ ᠢᠷᠡᠪᠡ᠃ ᠲᠡᠭᠦᠨ ᠢ ᠪᠡᠨ ᠲᠡᠷᠡ ᠬᠡᠨ ᠳ᠋ᠦ᠍ ᠴᠦ᠍ ᠮᠡᠳᠡᠭᠳᠡᠬᠦ ᠦᠭᠡᠢ ᠰᠠᠨ ᠭᠡᠵᠦ ᠰᠡᠮᠬᠡᠨ ᠠᠯᠬᠤᠭᠰᠠᠭᠠᠷ ᠭᠡᠷ ᠲᠡᠭᠡᠨ ᠣᠷᠣᠵᠤ ᠵᠠᠰᠠᠭᠰᠠᠨ ᠣᠷᠣᠨ ᠳᠡᠭᠡᠷᠡ ᠪᠡᠨ ᠬᠡᠪᠲᠡᠪᠡ᠃
ᠦᠶᠡ ᠦᠶᠡ ᠰᠢᠷᠦᠭᠦᠰᠬᠦ ᠰᠠᠯᠬᠢᠨ ᠤ᠋ ᠠᠶᠠ ᠪᠠᠷ ᠡᠷᠦᠬᠡᠨ ᠦ᠌ ᠣᠭᠣᠰᠣᠷ ᠰᠢᠪᠠᠭᠴᠢᠨ ᠳᠡᠭᠡᠪᠦᠷ ᠬᠥᠪᠦᠯᠵᠡᠬᠦ ᠨᠢ ᠴᠠᠮᠪᠠᠯ ᠤ᠋ᠨ ᠠᠨᠢᠯᠳᠤᠬᠤ ᠨᠢᠳᠦ ᠶ᠋ᠢ ᠪᠠᠢᠨ ᠪᠠᠢᠨ ᠴᠠᠪᠴᠢᠭᠤᠯᠵᠤ ᠪᠠᠢᠪᠠ ᠃ ᠲᠡᠷᠡ ᠬᠤᠴᠢᠯᠭᠠ ᠳᠣᠲᠣᠷᠠ ᠪᠠᠨ ᠡᠷᠭᠢᠯᠳᠦᠨ ᠬᠥᠯᠪᠡᠷᠢᠵᠦ ᠄
— ᠨᠢᠭᠡ ᠲᠡᠮᠡᠭᠡᠨ ᠦ᠌ ᠨᠣᠣᠰᠣ ᠰᠤᠯᠠ ᠣᠯᠵᠤ ᠠᠯᠠᠭᠠᠨ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠨᠠ ᠭᠡᠳᠡᠭ ᠴᠦ᠍ ᠣᠪᠣᠭᠠ ᠣᠯᠵᠠ ᠰᠢᠦ᠃ ᠨᠢᠳᠤᠨᠤᠨ ᠪᠢ ᠪᠠᠰᠠ ᠯᠠ ᠵᠦᠭᠡᠷ ᠣᠯᠵᠠ ᠂ ᠲᠡᠭᠦᠨ ᠢ ᠮᠢᠳᠤᠭ ᠮᠡᠳᠡᠭᠡ ᠦᠭᠡᠢ᠃ ᠡᠭᠦᠨ ᠢ ᠮᠡᠳᠡᠭᠰᠡᠨ ᠴᠦ᠍ ᠭᠡᠰᠡᠨ ᠨᠢᠭᠡ ᠶᠡᠬᠡ ᠶᠠᠭᠤᠮᠠ ᠪᠣᠯᠬᠤ ᠦᠭᠡᠢ ᠪᠠᠢᠬᠠ᠃ ᠢᠩᠭᠢᠭᠡᠳ ᠥᠪᠡᠷ ᠢ᠋ᠶ᠋ᠡᠨ ᠬᠦᠷᠦᠭᠡᠳ ᠢᠷᠡᠵᠦ ᠪᠠᠢᠭᠠ ᠣᠯᠵᠠ ᠶ᠋ᠢ ᠴᠢᠨᠢ ᠬᠡᠯᠡ ᠪᠡᠷ ᠢ᠋ᠶ᠋ᠡᠨ ᠲᠦᠯᠬᠢᠵᠦ ᠪᠣᠯᠬᠤ ᠦᠭᠡᠢ ᠰᠢᠦ ᠳᠡ ᠭᠡᠵᠦ ᠪᠣᠳᠣᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠰᠡᠮᠡᠬᠡᠨ ᠪᠣᠰᠴᠤ ᠪᠦᠰᠡ ᠪᠡᠨ ᠪᠦᠰᠡᠯᠡᠨ ᠴᠢᠮᠡᠭᠡ ᠦᠭᠡᠢᠬᠡᠨ ᠭᠠᠷᠪᠠ᠃
ᠭᠠᠳᠠᠭᠠ ᠲᠠᠰᠤ ᠬᠠᠷᠠᠩᠭᠤᠢ ᠪᠦᠷᠬᠦᠭ ᠳᠤᠮᠳᠠ ᠪᠥᠬᠥᠯᠵᠡᠵᠦ᠂ ᠰᠤᠷᠤᠭᠰᠠᠨ ᠪᠦᠳᠡᠭᠢ ᠳᠤᠮᠳᠠ ᠮᠡᠬᠦᠯᠵᠡᠵᠦ ᠳᠠᠳᠤᠭᠰᠠᠨ ᠬᠥᠮᠦᠨ ᠳ᠋ᠦ᠍ ᠪᠦᠷ ᠴᠦ᠍ ᠲᠠᠭᠠᠯᠠᠮᠵᠢᠲᠠᠢ᠃ ᠴᠠᠮᠪᠠᠯ ᠠᠯᠳᠠᠭᠤᠯ ᠲᠡᠮᠡᠭᠡᠨ ᠦ᠌ ᠳᠡᠷᠭᠡᠳᠡ ᠭᠡᠲᠡᠵᠦ ᠣᠴᠢᠭᠠᠳ ᠭᠤᠤᠵᠢᠭᠰᠠᠨ ᠨᠣᠣᠰᠣ ᠶ᠋ᠢ ᠨᠢ ᠬᠣᠶᠠᠷ ᠭᠠᠷᠳᠠᠨ ᠵᠤᠯᠭᠠᠭᠠᠵᠤ ᠪᠥᠰᠡᠨ ᠳ᠋ᠡᠭᠡᠨ ᠬᠠᠪᠴᠢᠭᠤᠯᠤᠭᠰᠠᠨ ᠬᠣᠷᠮᠣᠢ ᠳ᠋ᠠᠭᠠᠨ ᠲᠦᠨᠲᠦᠢᠲᠡᠯᠡ ᠴᠢᠬᠢᠪᠡ᠃ ᠬᠣᠷᠮᠣᠢ ᠳ᠋ᠠᠭᠠᠨ ᠪᠠᠭᠲᠠᠬᠤ ᠪᠠᠨ ᠪᠣᠯᠢᠬᠤ ᠪᠠᠷ ᠡᠪᠦᠷ ᠲᠡᠭᠡᠨ ᠴᠢᠬᠢᠪᠡ᠃ ᠡᠪᠦᠷ ᠲᠡᠭᠡᠨ ᠪᠠᠭᠲᠠᠬᠤ ᠪᠠᠨ ᠪᠣᠯᠢᠬᠤ ᠪᠠᠷ ᠦᠮᠦᠳᠦᠨ ᠳ᠋ᠡᠭᠡᠨ ᠴᠢᠬᠢᠪᠡ᠃ ᠠᠷᠠᠢ ᠯᠠ ᠠᠮᠠᠨ ᠳ᠋ᠠᠭᠠᠨ ᠬᠢᠭᠰᠡᠨ ᠦᠭᠡᠢ᠃ ᠬᠠᠮᠢᠭᠠᠰᠢ ᠬᠠᠮᠢᠭᠠᠰᠢ ᠪᠠᠨ ᠳᠥᠷᠪᠡᠯᠵᠢᠨ ᠬᠠᠪᠲᠠᠭᠠᠢ ᠴᠢᠬᠢᠮᠡᠯ ( ᠬᠡᠪ ᠦᠯᠢᠭᠡᠷ ) ᠪᠣᠯᠤᠭᠠᠳ ᠪᠠᠢᠭᠠ ᠶ᠋ᠢ ᠨᠢ ᠰᠠᠷᠠ ᠲᠠᠢ ᠰᠥᠨᠢ ᠰᠠᠢᠨ ᠨᠢᠳᠦ ᠲᠡᠢ ᠬᠥᠮᠦᠨ ᠬᠠᠷᠠᠭᠰᠠᠨ ᠪᠣᠯ ᠰᠠᠨᠳᠤᠷᠴᠤ ᠠᠶᠤᠮᠠᠷ ᠮᠠᠨᠤᠤᠬᠠᠢ ᠪᠣᠯᠵᠠᠢ᠃
ᠴᠠᠮᠪᠠᠯ ᠲᠡᠮᠡᠭᠡ ᠨᠦ᠍ᠭᠦᠳ ᠡᠴᠡ ᠴᠦ᠍ ᠢᠴᠢᠭᠰᠡᠨ ᠦᠭᠡᠢ᠂ ᠲᠡᠭᠷᠢ ᠡᠴᠡ ᠴᠦ᠍ ᠪᠤᠯᠲᠠᠭᠰᠠᠨ ᠦᠭᠡᠢ᠂ ᠠᠭᠠᠯᠵᠢ ᠮᠡᠲᠦ ᠠᠷᠪᠠᠯᠵᠠᠨ ᠶᠠᠪᠤᠭᠰᠠᠭᠠᠷ ᠪᠠᠷᠠᠭᠠᠨ ᠤ᠋ ᠪᠠᠨ ᠳᠡᠷᠭᠡᠳᠡ ᠢᠷᠡᠵᠦ ᠨᠣᠣᠰᠣ ᠪᠠᠨ ᠪᠦᠲᠡᠭᠡᠯᠭᠡᠨ ᠳᠣᠣᠭᠤᠷ ᠨᠢ ᠨᠢᠭᠤᠭᠠᠳ ᠭᠡᠷ ᠲᠡᠭᠡᠨ ᠣᠷᠣᠵᠤ ᠠᠭ ᠲᠠᠭ ᠦᠭᠡᠢ ᠤᠨᠲᠠᠵᠠᠢ᠃
ᠥᠷᠯᠥᠭᠡ ᠡᠷᠲᠡ ᠦᠦᠷ ᠢ᠋ᠶ᠋ᠡᠷ ᠮᠣᠷᠢᠨ ᠲᠦᠪᠡᠷᠭᠡᠨ ᠭᠠᠷᠬᠤ ᠳ᠋ᠤ᠌ ᠮᠢᠳᠤᠭ ᠳᠠᠪ ᠬᠢᠨ ᠰᠡᠷᠡᠵᠦ ᠭᠠᠷᠪᠠᠯ ᠮᠣᠷᠢᠲᠠᠢ ᠬᠥᠮᠦᠨ ᠳᠠᠪᠬᠢᠨ ᠢᠷᠡᠵᠦ ᠲᠡᠮᠡᠭᠡᠨ ᠦ᠌ ᠵᠠᠬᠠ ᠳ᠋ᠤ᠌ ᠵᠣᠭᠰᠣᠵᠤ ᠪᠠᠢᠭᠠ ᠬᠦᠷᠡᠩ ᠳᠡᠢᠯᠦᠭ ᠢ᠋ᠶ᠋ᠡᠨ ᠪᠠᠷᠢᠵᠤ ᠠᠪᠤᠭᠠᠳ ᠄
— ᠲᠠ ᠪᠦᠬᠦᠨ ᠳ᠋ᠦ᠍ ᠪᠠᠶᠠᠷᠯᠠᠯᠠ᠂ ᠠᠯᠳᠠᠭᠤᠯ ᠲᠡᠮᠡᠭᠡ ᠶ᠋ᠢ ᠮᠢᠨᠢ ᠠᠶᠠᠲᠠᠢ ᠰᠠᠢᠨ ᠬᠠᠷᠠᠭᠠᠯᠵᠠᠵᠤ ᠪᠠᠢᠭᠰᠠᠨ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠡᠵᠡᠨ ᠲᠡᠮᠡᠭᠡᠴᠢᠨ ᠳ᠋ᠦ᠍ ᠪᠠᠶᠠᠷ ᠬᠦᠷᠭᠡᠭᠡᠷᠡᠢ ᠭᠡᠳ ᠮᠣᠷᠳᠠᠵᠤ ᠲᠡᠮᠡᠭᠡᠨ ᠦ᠌ ᠪᠡᠨ ᠤᠷᠳᠤᠭᠤᠷ ᠭᠠᠷᠬᠤ ᠵᠠᠭᠤᠷᠠ ᠄
— ᠫᠸ ᠂ ᠲᠠᠮᠢᠨ ! ᠲᠠᠨ ᠤ᠋ ᠡᠨᠡ ᠲᠡᠮᠡᠭᠡ ᠴᠢᠨᠢ ᠶᠠᠭᠠᠬᠢᠴᠢᠬᠠᠪᠠ ᠪᠣᠢ ᠭᠡᠵᠦ ᠬᠠᠰᠬᠢᠷᠬᠤ ᠰᠢᠬᠠᠮ ᠬᠡᠯᠡᠪᠡ᠃
ᠮᠢᠳᠤᠭ ᠣᠢᠷᠠᠲᠤᠨ ᠣᠴᠢᠪᠠᠯ ᠬᠠᠮᠤᠭ ᠦᠰᠦ ᠨᠣᠣᠰᠣ ᠡᠪᠦᠳᠦᠭ ᠵᠣᠭᠳᠣᠷ ᠢ ᠨᠢ ᠵᠤᠮᠠᠯᠤᠨ ᠵᠤᠯᠭᠠᠭᠠᠵᠤ ᠠᠪᠤᠭᠰᠠᠨ ᠲᠡᠮᠡᠭᠡ ᠬᠦᠵᠦᠭᠦᠦ ᠪᠡᠨ ᠰᠤᠩᠭᠠᠨ ᠳᠠᠭᠵᠢᠨ ᠬᠡᠪᠲᠡᠬᠦ ᠨᠢ ᠨᠢᠭᠡ ᠬᠠᠷᠠᠬᠤ ᠳ᠋ᠤ᠌ ᠠᠶᠤᠮᠠᠷ᠂ ᠨᠢᠭᠡ ᠬᠠᠷᠠᠬᠤ ᠳ᠋ᠤ᠌ ᠦᠷᠦ ᠡᠪᠡᠳᠦᠮᠡᠷ ᠠᠵᠢ᠃
— ᠡᠨᠡ ᠴᠢᠨᠢ ᠬᠡᠨ ᠦ᠌ ᠲᠡᠮᠡᠭᠡ ᠪᠣᠢ ᠭᠡᠳ ᠨᠢᠭᠡᠨ ᠨᠢᠳᠦ ᠪᠡᠨ ᠠᠷᠴᠢᠨ ᠰᠠᠢᠨ ᠠᠵᠢᠭᠯᠠᠵᠤ ᠬᠠᠷᠠᠪᠠᠯ ᠴᠠᠮᠪᠠᠯ ᠤ᠋ᠨ ᠦᠷᠭᠦᠯᠵᠢ ᠬᠠᠢᠷᠠᠯᠠᠵᠤ ᠶᠠᠪᠤᠳᠠᠭ ᠠᠮᠢᠨ ᠤ᠋ ᠭᠠᠭᠴᠠ ᠬᠦᠷᠡᠩ ᠠᠭᠲᠠ ᠪᠠᠢᠪᠠ᠃
— ᠴᠠᠮᠪᠠᠯ ᠠ᠋ ᠭᠡᠵᠦ ᠮᠢᠳᠤᠭ ᠰᠠᠨᠳᠤᠷᠤᠨ ᠳᠠᠭᠤᠳᠠᠪᠠ᠃
ᠴᠠᠮᠪᠠᠯ ᠳᠡᠪᠡᠯ ᠢ᠋ᠶ᠋ᠡᠨ ᠡᠭᠡᠯᠳᠦᠷᠭᠡᠯᠡᠨ ᠭᠠᠷᠴᠤ ᠢᠷᠡᠭᠡᠳ ᠨᠤᠤᠬᠠ ᠪᠦᠷᠬᠦᠭᠰᠡᠨ ᠨᠢᠳᠦ ᠪᠡᠨ ᠠᠨᠢᠪᠴᠢᠨ ᠨᠣᠣᠰᠣ ᠶ᠋ᠢ ᠨᠢ ᠵᠤᠯᠭᠠᠭᠠᠭᠰᠠᠨ ᠱᠠᠯᠳᠠᠩ ᠲᠡᠮᠡᠭᠡ ᠡᠴᠡ ᠠᠶᠤᠵᠤ ᠭᠡᠳᠡᠷᠭᠦ ᠪᠡᠨ ᠤᠬᠤᠷᠢᠨ ᠶᠠᠪᠤᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠪᠠᠷᠠᠭᠠᠨ ᠳ᠋ᠤ᠌ ᠲᠡᠭᠡᠭᠯᠡᠨ ᠵᠤᠯᠭᠠᠭᠠᠭᠰᠠᠨ ᠨᠣᠣᠰᠣᠨ ᠳᠡᠭᠡᠷᠡ ᠪᠡᠨ ᠬᠠᠯᠲᠤᠷᠢᠵᠤ ᠤᠨᠠᠵᠤ ᠢᠴᠢᠭᠰᠡᠨ ᠨᠢᠬᠤᠷ ᠢ᠋ᠶ᠋ᠠᠨ ᠠᠯᠠᠭᠠ ᠪᠠᠷ ᠢ᠋ᠶ᠋ᠠᠨ ᠲᠠᠭᠯᠠᠪᠠ᠃
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠴᠣᠯᠮᠣᠨᠲᠤᠶᠠᠭᠠ
ᠬᠢᠨᠠᠭ᠍ᠴᠢ : ᠰᠠᠷᠠᠨᠠ
2024᠂ 2᠂ 23 ᠦ᠌ ᠡᠳᠦᠷ