ᠵᠠᠪ ᠭᠤᠸᠠᠢ ᠨᠠᠷ <2> – ᠳ ᠂ ᠰᠡᠩᠭᠡ Зав гуай нар <2> – Д ᠂ Сэнгэ
299 ᠰᠢᠨᠡ ᠡᠬᠡᠨᠡᠷ ᠰᠣᠨᠢᠷᠬᠠᠭᠴᠢ
ᠡᠷᠬᠡ ᠲᠤᠰᠢᠶᠠᠯ ᠨᠡᠮᠡᠭᠳᠡᠭᠡᠳ ᠪᠠᠢᠬᠤ ᠳ᠋ᠤ᠌
ᠡᠬᠡᠨᠡᠷ ᠦ᠋ᠨ ᠴᠢᠷᠠᠢ ᠬᠥᠭᠰᠢᠷᠡᠭᠡᠳ ᠪᠠᠢᠨᠠ᠃
ᠡᠨᠡ ᠶᠠᠪᠤᠳᠠᠯ ᠶᠡᠷᠦ ᠨᠢ ᠲᠤᠰᠠ ᠦᠭᠡᠢ
ᠡᠷᠬᠡᠪᠰᠢ ᠰᠢᠨᠡ ᠶ᠋ᠢ ᠡᠷᠢᠶᠡ ᠭᠡᠵᠦ
ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠵᠤ ᠨᠢᠭᠡᠨᠲᠡ ᠰᠢᠢᠳᠦᠭᠡᠳ
ᠬᠠᠨᠢᠯᠠᠭᠰᠠᠨ ᠡᠬᠡᠨᠡᠷ ᠢ᠋ᠶ᠋ᠡᠨ ᠬᠠᠶᠠᠨ ᠰᠠᠯᠤᠭᠠᠳ
ᠬᠠᠢᠷᠠᠲᠤ ᠬᠦᠦ ᠪᠡᠨ ᠥᠨᠥᠴᠢᠨ ᠣᠷᠬᠢᠭᠠᠳ
ᠬᠠᠪ ᠨᠣᠬᠠᠢ ᠪᠠᠨ ᠵᠣᠯᠪᠢᠩ ᠦᠯᠡᠳᠡᠭᠡᠭᠡᠳ
ᠬᠠᠪᠢᠳᠠᠭᠰᠠᠨ ᠬᠡᠦᠬᠡᠨ ᠲᠡᠢ ᠨᠠᠭᠠᠯᠳᠤᠨ ᠶᠠᠪᠤᠳᠠᠭ
ᠬᠠᠷᠠ ᠬᠥᠮᠦᠨ ᠦ᠌ ᠨᠡᠷᠡ ᠬᠡᠨ ᠪᠢᠯᠡ?
ᠱᠠᠯᠠᠨ ᠤ᠋ ᠭᠠᠰᠠᠯᠠᠩ
ᠠᠭᠤᠯᠠᠨ ᠳ᠋ᠤ᠌ ᠪᠠᠢᠬᠤ ᠳ᠋ᠠᠭᠠᠨ ᠮᠣᠳᠣ ᠂ ᠤᠷᠠᠯᠠᠵᠤ ᠵᠦᠢᠭᠡᠳ ᠱᠠᠯᠠ ᠂ ᠤᠷᠠᠨ ᠭᠣᠶᠣᠮᠰᠣᠭ ᠰᠠᠢᠬᠠᠨ ᠥᠩᠭᠡ ᠶ᠋ᠢᠨ ᠪᠣᠳᠣᠭ ᠭᠢᠯᠪᠠᠮᠠ ᠴᠡᠭᠡᠨ ᠰᠠᠭᠠᠷᠠᠯ ᠦᠵᠡᠰᠬᠦᠯᠡᠩᠲᠦ ᠬᠡᠪ ᠦ᠋ᠨ ᠱᠠᠯᠠ ᠪᠢ᠂ ᠰᠠᠶ᠋ᠢᠬᠠᠨ ᠬᠢᠵᠦ ᠰᠢᠨᠡᠬᠡᠨ ᠪᠣᠳᠣᠭᠰᠠᠨ ᠲᠤᠯᠠ ᠰᠠᠢᠬᠠᠨ ᠭᠡᠵᠦ ᠠᠷᠭᠠ ᠦᠭᠡᠢ ᠃ ᠠᠯᠲᠠᠨ ᠨᠠᠷᠠ ᠴᠣᠩᠬᠣᠨ ᠤ᠋ ᠨᠦᠬᠡ ᠪᠡᠷ ᠡᠳᠦᠷ ᠪᠦᠷᠢ ᠱᠠᠭᠠᠢᠵᠤ ᠠᠷᠢᠭᠤᠨ ᠠᠭᠠᠷ ᠰᠠᠯᠬᠢᠪᠴᠢ ᠶ᠋ᠢᠨ ᠳᠤᠮᠳᠠᠭᠤᠷ ᠴᠠᠭ ᠪᠦᠷᠢ ᠦᠯᠢᠶᠡᠭᠡᠳ ᠰᠡᠳᠬᠢᠯ ᠳ᠋ᠦ᠍ ᠨᠠᠢᠷᠲᠠᠢ ᠰᠠᠨᠠᠭᠠᠨ ᠳ᠋ᠤ᠌ ᠲᠣᠬᠢᠷᠠᠮᠵᠢᠲᠠᠢ ᠪᠣᠯᠪᠠᠴᠤ ᠠᠭᠤᠳᠠᠮ ᠲᠠᠰᠤᠯᠭᠠᠨ ᠤ᠋ ᠨᠠᠮ ᠭᠦᠮ ᠦ᠋ᠨ ᠳᠣᠲᠣᠷᠠ ᠢᠨᠢᠶᠡᠳᠦᠮ ᠦ᠋ᠨ ᠥᠩᠭᠡ ᠪᠡᠷ ᠬᠡᠵᠢᠶᠡ ᠢᠮᠠᠭᠲᠠ ᠳᠡᠭᠡᠪᠦᠷ ᠠᠵᠢᠭᠯᠠᠵᠤ ᠰᠢᠷᠲᠡᠭᠰᠡᠭᠡᠷ ᠪᠠᠢᠭᠠᠳ ᠤᠶᠠᠬᠠᠨ ᠰᠡᠳᠬᠢᠯ ᠤᠢᠳᠬᠠᠷ ᠤ᠋ᠨ ᠲᠤᠢᠯ ᠳ᠋ᠤ᠌ ᠬᠦᠷᠬᠦ ᠳ᠋ᠦ᠍ ᠤᠷᠠᠨ ᠰᠠᠢᠬᠠᠨ ᠢ᠋ ᠬᠦᠰᠡᠵᠦ ᠠᠯᠢᠶᠠ ᠴᠡᠩᠭᠡᠯ ᠢ᠋ ᠡᠷᠢᠭᠰᠡᠭᠡᠷ ᠪᠠᠢᠳᠠᠭ ᠪᠢᠯᠡ ᠃ ᠨᠢᠭᠡᠨ ᠦᠳᠡᠰᠢ ᠤᠳᠠᠲᠠᠯᠠ ᠤᠨᠲᠠᠭᠠᠰᠤᠲᠠᠢ ᠪᠠᠢᠭᠰᠠᠨ ᠴᠣᠣᠵᠢ᠂ ᠵᠠᠪᠰᠢᠶᠠᠨ ᠳ᠋ᠤ᠌ ᠪᠥᠭᠲᠥᠷ ᠨᠢᠷᠤᠭᠤ ᠪᠠᠨ ᠰᠤᠨᠢᠶᠠᠬᠤ ᠳ᠋ᠤ᠌ ᠡᠭᠦᠳᠡᠨ ᠦ᠌ ᠬᠠᠪᠲᠠᠰᠤ ᠪᠠᠶᠠᠷᠯᠠᠭᠰᠠᠨ ᠳᠠᠭᠤ ᠪᠠᠷ ᠵᠢᠩᠭᠢᠨᠡᠲᠡᠯᠡ ᠢᠨᠢᠶᠡᠵᠦ ᠠᠩᠭᠠᠢᠪᠠ᠃ ᠬᠦᠶᠢ᠂ ᠬᠠᠶᠢ ᠭᠡᠬᠦ ᠶᠡᠬᠡ ᠴᠢᠮᠡᠭᠡ ᠳᠣᠷᠭᠢᠶᠠᠨ ᠳ᠋ᠤ᠌ ᠴᠤᠤᠷᠢᠶᠠᠲᠤᠵᠤ ᠲᠦᠷ ᠲᠠᠷ ᠬᠢᠬᠦ ᠬᠥᠯ ᠵᠠ ᠲᠣᠭᠰᠢᠨ ᠴᠢᠮᠡᠭᠡ ᠱᠠᠯᠠ ᠶ᠋ᠢ ᠰᠢᠢᠳᠬᠡᠨᠡ ᠃ ᠬᠠᠲᠠᠭᠤ ᠤᠯᠠᠲᠠᠢ ᠰᠡᠪᠬᠢᠨ ᠭᠤᠲᠤᠯ ᠪᠣᠳᠣᠭ ᠢ᠋ ᠢᠮᠡᠷᠴᠦ᠂ ᠬᠤᠷᠴᠠ ᠦᠵᠦᠭᠦᠷᠲᠦ ᠬᠠᠳᠠᠭᠠᠰᠤᠨ ᠤ᠋ ᠲᠣᠪ ᠥᠩᠭᠡ ᠶ᠋ᠢ ᠰᠢᠯᠪᠤᠯᠤᠨᠠ ᠃ ᠲᠠᠷᠢᠬᠢ ᠦᠭᠡᠢ ᠨᠢᠭᠡ ᠨᠢ ᠳᠡᠰ ᠨᠢᠰ ᠳᠡᠪᠰᠡᠯᠡᠵᠦ ᠂ ᠲᠠᠶᠠᠭ ᠲᠠᠢ ᠨᠢᠭᠡ ᠨᠢ ᠫᠢᠳ ᠫᠠᠳ ᠴᠣᠬᠢᠯᠠᠨᠠ᠃ ᠪᠦᠷ ᠴᠦ᠍ ᠬᠡᠴᠡᠭᠦᠦ ᠪᠦᠳᠦᠭᠦᠯᠢᠭ ᠨᠢ ᠳᠠᠩᠴᠤ ᠠᠢᠬᠤᠪᠲᠤᠷ᠂ ᠬᠡᠳᠦᠨ ᠵᠢᠯ ᠪᠢᠲᠡᠭᠦᠦ ᠬᠠᠮᠠᠷ ᠤ᠋ᠨ ᠨᠢᠰᠦ ᠶ᠋ᠢ ᠰᠠᠶᠢ ᠮᠡᠳᠡᠵᠦ ᠱᠠᠯᠠᠨ ᠳᠡᠭᠡᠷᠡ ᠫᠠᠯ ᠬᠢᠲᠡᠯᠡ ᠨᠤᠯᠮᠤᠪᠠ᠃ ᠱᠠᠯᠢᠭ ᠨᠢᠭᠡ ᠨᠢ ᠰᠠᠮᠤᠷ ᠤ᠋ᠨ ᠶᠠᠰᠤ᠂ ᠰᠢᠬᠢᠷ ᠦ᠋ᠨ ᠴᠠᠭᠠᠰᠤ ᠠᠳᠠ ᠲᠡᠨᠳᠡ ᠲᠠᠷᠢᠶᠠᠨ ᠤ᠋ ᠦᠷᠡ ᠮᠡᠲᠦ ᠰᠠᠴᠤᠯᠠᠨᠠ᠃ ᠪᠤᠰᠤᠳ ᠨᠢ ᠵᠦᠭᠡᠷ ᠯᠡ ᠪᠠᠢᠨᠠ᠃ ᠪᠤᠯᠲᠤ ᠪᠠᠷ ᠢ᠋ᠶ᠋ᠠᠨ ᠭᠠᠢᠭᠤᠢ ᠯᠠ ᠪᠠᠢᠨᠠ᠃ ᠪᠣᠯᠳᠠᠭ ᠦᠭᠡᠢ ᠨᠢᠭᠡ ᠨᠢ ᠡᠢᠮᠦ ᠶᠦᠮ ᠤᠤ᠃ ᠪᠣᠰᠴᠤ ᠨᠢᠭᠡ ᠭᠦᠶᠦᠭᠡᠳ ᠪᠤᠴᠠᠵᠤ ᠨᠢᠭᠡ ᠣᠷᠣᠭᠠᠳ ᠲᠠᠷ ᠲᠣᠷ ᠂ ᠳᠡᠰ ᠨᠢᠰ ᠂ ᠫᠢᠳ ᠫᠠᠳ ᠭᠡᠭᠰᠡᠭᠡᠷ ᠪᠠᠢᠲᠠᠯᠠ ᠲᠠᠨ ᠤ᠋ ᠥᠰᠥᠭᠡᠢ ᠴᠦ᠍ ᠡᠯᠡᠭᠳᠡᠪᠡ ᠮᠢᠨᠦ ᠥᠩᠭᠡ ᠴᠦ᠍ ᠬᠤᠪᠠᠬᠠᠢᠷᠠᠪᠠ ᠃
ᠶᠣ ᠶᠣ ᠂ ᠡᠭᠦᠨ ᠡᠴᠡ ᠬᠣᠢᠰᠢ ᠂ ᠲᠡᠭᠦᠨ ᠡᠴᠡ ᠴᠠᠭᠠᠰᠢ ᠂ ᠡᠭᠦᠨ ᠢ᠋ ᠪᠡᠨ ᠪᠣᠯᠢ! ᠢᠩᠭᠢᠬᠦ ᠪᠡᠨ ᠵᠣᠭᠰᠣ !
ᠮᠣᠳᠣᠴᠢᠨ
ᠮᠣᠳᠣᠴᠢᠨ ᠰᠡᠩᠳᠡᠭ ᠦ᠋ᠨ ᠬᠡᠳᠦᠨ ᠲᠡᠷᠭᠡ ᠨᠢ ᠬᠠᠭᠤᠴᠢᠷᠠᠭᠠᠳ ᠶᠡᠬᠡ ᠮᠠᠭᠤᠳᠠᠵᠠᠢ᠃ ᠨᠢᠭᠡ ᠡᠳᠦᠷ ᠵᠠᠰᠠᠬᠤ ᠭᠡᠵᠦ ᠤᠷᠤᠯᠳᠤᠵᠤ ᠭᠡᠨᠡ᠃ ᠡᠬᠢᠯᠡᠭᠡᠳ ᠨᠢᠭᠡ ᠲᠡᠷᠭᠡᠨ ᠦ᠌ ᠭᠣᠣᠯ ᠬᠢᠶᠡ ᠭᠡᠳ ᠪᠦᠳᠦᠭᠦᠨ ᠰᠠᠢᠬᠠᠨ ᠳ᠋ᠦᠩᠵᠡ ᠶ᠋ᠢ ᠴᠠᠪᠴᠢᠵᠤ ᠭᠠᠷᠤᠯᠠ᠃ ᠡᠳᠦᠷᠵᠢᠨ ᠨᠣᠴᠣᠯᠳᠤᠵᠤ ᠭᠡᠨᠡ᠃ ᠣᠷᠣᠢᠬᠠᠨ ᠬᠢᠷᠢ ᠳ᠋ᠦ᠍ ᠲᠡᠷᠭᠡᠨ ᠦ᠌ ᠭᠣᠣᠯ ᠴᠦ᠍ ᠪᠢᠰᠢ ᠶᠠᠭᠤ ᠴᠦ᠍ ᠪᠢᠰᠢ ᠪᠣᠯᠵᠤ ᠭᠡᠨᠡ᠃ ᠵᠠ ᠲᠡᠭᠡᠪᠡᠯ ᠪᠣᠯᠳᠠᠭ ᠦᠭᠡᠢ ᠡᠨᠡ ᠮᠠᠭᠤ ᠮᠣᠳᠣ ᠪᠠᠷ ᠴᠢᠨᠢ ᠰᠠᠢᠬᠠᠨ ᠰᠦᠬᠡᠨ ᠦ᠌ ᠡᠰᠢ ᠬᠢᠭᠡᠳ ᠠᠪᠤᠶᠠ ᠭᠡᠵᠦ ᠳᠠᠬᠢᠨ ᠴᠠᠪᠴᠢᠪᠠ᠃ ᠪᠦᠷᠦᠩᠬᠡᠢ ᠪᠣᠯᠬᠤ ᠦᠶᠡ ᠳ᠋ᠦ᠍ ᠪᠠᠰᠠ ᠶᠠᠭᠤ ᠴᠦ᠍ ᠪᠢᠰᠢ ᠶᠠᠭᠤᠮᠠ ᠪᠣᠯᠪᠠ᠃ ᠶᠠᠭᠠᠬᠢᠭᠰᠠᠨ ᠠᠢᠬᠤᠪᠲᠤᠷ ᠵᠣᠯᠢᠭ ᠪᠣᠢ᠂ ᠵᠠᠪᠠᠯ ᠨᠢᠭᠡ ᠶᠠᠭᠤᠮᠠ ᠬᠢᠨᠡ ᠳᠡ ᠭᠡᠳ ᠪᠠᠰᠠ ᠯᠠ ᠬᠢᠵᠦ ᠠᠯᠳᠠᠪᠠ ᠭᠡᠨᠡ᠃
ᠭᠡᠲᠡᠯᠡ ᠰᠥᠨᠢ ᠴᠦ᠍ ᠪᠣᠯᠵᠤ ᠶᠠᠭᠤᠮᠠ ᠴᠦ᠍ ᠬᠠᠷᠠᠭᠳᠠᠬᠤ ᠪᠠᠨ ᠪᠠᠢᠵᠠᠢ᠃ ᠲᠡᠭᠡᠬᠦᠯᠡᠷ ᠨᠢ ᠮᠠᠨ ᠤ᠋ ᠬᠥᠮᠦᠨ ᠦ᠌ ᠠᠭᠤᠷ ᠨᠢ ᠬᠦᠷᠴᠦ᠂ ᠵᠠ ᠮᠠᠭᠤ ᠴᠢᠰᠤ ᠶ᠋ᠢ ᠬᠣᠷᠣᠨ ᠳ᠋ᠠᠭᠠᠨ ᠵᠠᠪᠠᠯ ᠨᠢᠭᠡ ᠬᠡᠷᠡᠭᠲᠡᠢ ᠶᠠᠭᠤᠮᠠ ᠬᠢᠶᠡ ᠳᠠ ᠭᠡᠵᠦ ᠪᠣᠳᠣᠭᠠᠳ ᠭᠠᠭᠴᠠᠬᠠᠨ ᠴᠢᠭᠴᠢᠭᠦᠷ ᠬᠢᠵᠦ ᠰᠢᠳᠦ ᠪᠡᠨ ᠴᠢᠭᠴᠢᠯᠡᠬᠦ ᠪᠡᠷ ᠰᠢᠢᠳᠴᠦ ᠪᠠᠢᠲᠠᠯᠠ ᠡᠬᠡᠨᠡᠷ ᠨᠢ᠄
— ᠠ ᠬᠦ᠂ ᠰᠡᠩᠳᠡᠭ ᠠ᠋! ᠣᠷᠣᠢ ᠪᠣᠯᠤᠯᠠ᠂ ᠪᠣᠯᠢᠵᠤ ᠦᠵᠡ ᠳᠡ᠃ ᠴᠢ ᠨᠢᠭᠡ ᠶᠠᠭᠤᠮᠠ ᠬᠢᠭᠰᠡᠭᠡᠷ ᠶᠠᠭᠤᠨ ᠳ᠋ᠤ᠌ ᠢᠩᠭᠢᠵᠦ ᠨᠣᠢᠷ ᠬᠣᠭᠣᠯᠠ ᠦᠭᠡᠢ ᠤᠯᠠᠢᠵᠤ ᠪᠠᠢᠳᠠᠭ ᠶᠤᠮ ᠪᠣᠢ? ᠬᠣᠭᠣᠯᠠ ᠪᠠᠨ ᠢᠳᠡ ᠭᠡᠵᠦ ᠳᠠᠭᠤᠳᠠᠬᠤ ᠳ᠋ᠤᠨᠢ ᠮᠠᠨ ᠤ᠋ ᠰᠡᠩᠳᠡᠭ ᠶᠠᠮᠠᠷ ᠬᠣᠭᠣᠯᠠ ᠪᠣᠢ ᠳᠠ ᠲᠡᠷᠡ ᠴᠢᠨᠢ ᠭᠡᠵᠡᠢ᠃ ᠡᠬᠡᠨᠡᠷ ᠢ᠋ ᠪᠡᠨ ᠪᠦᠬᠦᠯᠢ ᠮᠢᠬᠠ! ᠭᠡᠵᠦ ᠤᠴᠠᠭᠠᠷᠯᠠᠭᠰᠠᠨ ᠮᠠᠶᠢᠭᠲᠠᠢ ᠣᠷᠣᠬᠤ ᠳ᠋ᠤᠨᠢ ᠵᠠ ᠵᠠ ᠶᠠᠭᠠᠬᠢᠮᠤᠢ᠃ ᠰᠢᠲᠦ ᠴᠢᠭᠴᠢᠯᠡᠵᠦ ᠪᠣᠯᠬᠤ ᠬᠣᠭᠣᠯᠠ ᠬᠢᠭᠰᠡᠨ ᠨᠢ ᠪᠣᠯᠵᠤ ᠳᠠ ᠭᠡᠵᠦ ᠪᠠᠶᠠᠷᠯᠠᠭᠰᠠᠭᠠᠷ ᠭᠡᠷ ᠲᠡᠭᠡᠨ ᠣᠷᠣᠵᠤ ᠭᠡᠨᠡ᠃
ᠬᠠᠯᠠᠭᠳᠠᠯ
— ᠴᠢ ᠶᠠᠭᠤᠨ ᠳ᠋ᠤ᠌ ᠲᠠᠩᠳᠠ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠶᠠᠪᠤᠳᠠᠭ ᠪᠢᠯᠡ᠂ ᠡᠬᠡᠨᠡᠷ ᠦ᠋ᠨ ᠴᠢᠨᠢ ᠪᠡᠶᠡ ᠵᠦᠭᠡᠷ ᠤᠤ?
— ᠡᠬᠡᠨᠡᠷ ᠮᠢᠨᠢ ᠰᠠᠯᠴᠢᠬᠠᠭᠰᠠᠨ ᠰᠢᠦ ᠳᠡ᠃
— ᠶᠠᠭᠠᠬᠢᠭᠠᠳ?
— ᠲᠡᠷᠡ ᠴᠢᠨᠢ ᠨᠠᠳᠠ ᠲᠠᠢ ᠰᠠᠭᠤᠭᠰᠠᠨ ᠶᠤᠮ ᠪᠢᠰᠢ᠂ ᠲᠤᠰᠢᠶᠠᠯ᠂ ᠴᠠᠯᠢᠩ ᠬᠣᠶᠠᠷ ᠲᠠᠢ ᠮᠢᠨᠢ ᠰᠠᠭᠤᠭᠰᠠᠨ ᠶᠤᠮ ᠪᠠᠢᠵᠠᠢ᠃
— ᠴᠢ ᠶᠠᠭᠠᠬᠢᠭᠰᠠᠨ ᠭᠡᠵᠦ?
— ᠪᠢ ᠡᠪᠡᠳᠴᠢᠨ ᠦ᠌ ᠤᠴᠢᠷ ᠠᠺᠲ( ᠰᠢᠢᠳᠪᠦᠷᠢ) ᠪᠡᠷ ᠠᠯᠪᠠᠨ ᠠ᠋ᠴᠠ ᠪᠠᠨ ᠬᠠᠯᠠᠭᠳᠠᠬᠤ ᠳ᠋ᠤ᠌ ᠡᠬᠡᠨᠡᠷ ᠪᠠᠰᠠ ᠨᠠᠳᠠ ᠠ᠋ᠴᠠ ᠬᠠᠯᠠᠭᠳᠠᠭᠰᠠᠨ ᠠ᠋᠃
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠪᠣᠷᠵᠢᠬᠢᠨ ᠪᠠᠭᠠᠲᠤᠷ᠂ ᠳᠠᠪᠰᠢᠯᠲᠦ
ᠬᠢᠨᠠᠭ᠍ᠴᠢ : ᠴᠣᠯᠮᠣᠨᠲᠤᠶᠠᠭᠠ
2024᠂ 2᠂ 22 ᠦᠨ ᠡᠳᠦᠷ