ᠣᠷᠣᠢ ᠦᠭᠡᠢ ᠰᠦᠮᠡ – ᠬᠣᠷᠢᠨ ᠳᠣᠯᠣᠭᠠ ᠂ ᠬᠠᠮᠪᠤ ᠶᠢᠨ ᠰᠢᠷᠡᠭᠡᠨᠡ ᠡᠷᠭᠦᠮᠵᠢᠯᠡᠪᠡ Оройгүй сүм – Хорин долоо ᠂ Хамбын ширээнэ өргөмжлөв - Oroigui sum 27
615ᠬᠣᠷᠢᠨ ᠳᠣᠯᠣᠭᠠ ᠂ ᠬᠠᠮᠪᠤ ᠶᠢᠨ ᠰᠢᠷᠡᠭᠡᠨᠡ ᠡᠷᠭᠦᠮᠵᠢᠯᠡᠪᠡ
ᠡᠯᠢᠭᠡ ᠨᠢ ᠬᠠᠷᠠ ᠴᠤ᠌ ᠰᠥᠰᠥ ᠨᠢ ᠨᠣᠭᠣᠭᠠᠨ
ᠤᠰᠤ ᠨᠢ ᠬᠠᠷᠠ ᠴᠤ᠌ ᠵᠠᠮᠠᠭ ᠨᠢ ᠨᠣᠭᠣᠭᠠᠨ
ᠬᠠᠶᠠᠡᠭ᠌ᠬᠢᠷᠸᠠ ᠪᠤᠶᠤ ᠮᠣᠷᠢᠨ ᠲᠣᠯᠣᠭᠠᠢᠲᠤ ᠭᠡᠳᠡᠭ ᠪᠤᠷᠬᠠᠨ ᠤ᠋ ᠠᠯᠲᠠᠳᠠᠮᠠᠯ ᠬᠥᠷᠥᠭ ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠨ ᠳ᠋ᠦ᠍ ᠬᠠᠩᠪᠤ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠲᠣᠰᠤᠯᠠ᠃ ᠭᠤᠷᠪᠠᠨ ᠲᠡᠰᠢ ᠬᠠᠷᠠᠭᠰᠠᠨ ᠭᠤᠷᠪᠠᠨ ᠲᠡᠷᠢᠭᠦᠨ ᠲᠡᠢ ᠠᠭᠠᠳ ᠲᠡᠳᠡᠭᠡᠷ ᠨᠢ ᠬᠣᠣᠷᠲᠠᠨ ᠢ᠋ ᠨᠣᠮᠣᠬᠠᠳᠬᠠᠬᠤ ᠶ᠋ᠢᠨ ᠤᠴᠢᠷ ᠰᠣᠶᠣᠭᠠ ᠪᠠᠨ ᠢᠷᠵᠠᠢᠯᠭᠠᠵᠤ᠂ ᠴᠠᠬᠢᠯᠭᠠᠨ ᠭᠢᠯᠪᠠᠬᠤ ᠮᠡᠲᠦ ᠬᠢᠯᠢᠩ ᠢ᠋ᠶ᠋ᠡᠷ ᠬᠥᠮᠥᠰᠬᠡ ᠪᠡᠨ ᠳᠦᠷᠪᠦᠢᠯᠭᠡᠭᠰᠡᠨ᠂ ᠭᠤᠷᠪᠠᠯᠠᠭᠰᠠᠨ ᠮᠡᠯᠮᠡᠢ ᠲᠡᠢ᠂ ᠲᠢᠲᠢᠮ ᠦ᠋ᠨ ᠳᠡᠭᠡᠭᠦᠷ ᠲᠠᠪᠤᠨ ᠬᠣᠬᠢᠮᠠᠢ ᠴᠢᠮᠡᠭ ᠲᠡᠢ᠂ ᠵᠢᠷᠭᠤᠭᠠᠨ ᠮᠣᠳᠣᠷ ᠤ᠋ᠨ ᠪᠠᠷᠠᠭᠤᠨ ᠳ᠋ᠤ᠌ ᠸᠴᠢᠷ᠂ ᠬᠠᠲᠠᠮᠠᠭᠠᠢ᠂ ᠢᠯᠳᠦ᠂ ᠵᠡᠭᠦᠨ ᠳ᠋ᠦ᠍ ᠨᠢ ᠭᠠᠯ᠂ ᠬᠠᠳᠬᠤᠭᠤᠷ᠂ ᠪᠤᠭᠤᠯᠠᠭᠠ ᠪᠠᠷᠢᠵᠤ᠂ ᠵᠡᠭᠦᠨ ᠪᠣᠢᠪᠣᠭ ᠤᠳ ᠢ᠋ ᠰᠤᠩᠭᠠᠨ ᠵᠢᠭᠢᠵᠦ᠂ ᠪᠠᠷᠠᠭᠤᠨ ᠢ᠋ ᠬᠠᠭᠠᠰ ᠵᠢᠭᠢᠨ ᠬᠤᠮᠢᠵᠤ ᠭᠠᠵᠠᠷ ᠳᠡᠪᠢᠰᠬᠦ ᠮᠡᠲᠦ ᠵᠣᠭᠰᠣᠭᠠᠳ ᠬᠣᠭᠣᠷᠣᠨᠳᠣ ᠪᠠᠨ ᠰᠦᠯᠵᠢᠯᠳᠦᠨ ᠲᠣᠯᠣᠭᠠᠢ ᠶ᠋ᠢ ᠴᠣᠩᠨᠣᠢᠯᠭᠠᠭᠰᠠᠨ ᠨᠠᠢ᠍ᠮᠠᠨ ᠮᠣᠭᠠᠢ ᠶ᠋ᠢ ᠭᠢᠰᠬᠢᠨ ᠣᠷᠣᠰᠢᠭᠰᠠᠨ᠂ ᠯᠠᠭᠱᠠᠨ ᠳ᠋ᠤ᠌ ᠪᠠᠨ ᠭᠠᠬᠠᠢ ᠶ᠋ᠢᠨ ᠠᠷᠠᠰᠤ ᠶ᠋ᠢ ᠭᠣᠣᠯ ᠢ᠋ᠶ᠋ᠠᠷ ᠨᠢ ᠵᠠᠩᠭᠢᠳᠤᠨ ᠨᠥᠮᠥᠷᠴᠦ᠂ ᠳᠣᠲᠣᠷᠠ ᠡᠷᠬᠡᠲᠡᠨ ᠢ᠋ᠶ᠋ᠡᠷ ᠬᠣᠯᠪᠣᠵᠤ ᠬᠢᠭᠰᠡᠨ ᠡᠷᠢᠭᠡ ᠵᠢ ᠵᠡᠭᠦᠭᠰᠡᠨ᠂ ᠲᠡᠷᠢᠭᠦᠨ ᠳᠡᠭᠡᠭᠦᠷ ᠨᠢ ᠲᠠᠳᠠᠷᠯᠠᠭᠰᠠᠨ ᠲᠠᠪᠤᠨ ᠤᠯᠠᠭᠠᠨ ᠭᠠᠯ ᠤ᠋ᠨ ᠲᠥᠯᠥᠨ ᠳᠡᠭᠡᠷᠡ ᠡᠴᠡ ᠭᠤᠷᠪᠠᠨ ᠮᠣᠷᠢᠨ ᠲᠣᠯᠣᠭᠠᠢ ᠡᠮᠦᠨᠡ ᠵᠦᠭ ᠢ᠋ ᠬᠠᠷᠠᠨ ᠴᠤᠬᠤᠢᠭᠰᠠᠨ᠂ ᠦᠨᠡᠯᠡᠰᠢ ᠦᠭᠡᠢ ᠡᠷᠳᠡᠨᠢ ᠰᠢᠭᠢᠳᠬᠡᠨ ᠴᠢᠮᠡᠭᠰᠡᠨ ᠡᠭᠡᠮᠦᠭ᠂ ᠬᠣᠭᠣᠯᠠᠢ ᠶ᠋ᠢᠨ ᠴᠢᠮᠡᠭ᠂ ᠮᠣᠳᠣᠷ᠂ ᠪᠣᠢᠪᠣᠭ ᠤ᠋ᠨ ᠪᠠᠭᠤᠪᠴᠢ᠂ ᠪᠥᠭᠡᠵᠢ᠂ ᠰᠤᠭᠤᠪᠴᠢᠯᠠᠭᠤᠷ᠂ ᠬᠣᠭᠣᠯᠠᠢᠪᠴᠢ ᠵᠡᠷᠭᠡ ᠪᠡᠷ ᠪᠢᠨᠳᠡᠷᠯᠡᠭᠰᠡᠨ ᠡᠢᠮᠦ ᠨᠢᠭᠡᠨ ᠬᠥᠷᠥᠭ ᠢ᠋ ᠬᠠᠶᠠᠡᠭ᠌ᠬᠢᠷᠸᠠ ᠪᠤᠷᠬᠠᠨ ᠭᠡᠳᠡᠭ ᠠᠵᠢ᠃ ᠮᠠᠯᠴᠢᠳ ᠤ᠋ᠨ ᠰᠢᠲᠦᠬᠦ ᠳᠤᠷᠠᠲᠠᠢ ᠲᠡᠷᠡ ᠪᠤᠷᠬᠠᠨ ᠢ᠋ ᠬᠠᠮᠪᠤ ᠯᠠᠮᠠ ᠰᠠᠨᠵᠢᠳᠠᠯᠪᠢᠴᠣᠢᠵᠠᠮᠰᠤ ᠬᠠᠮᠪᠤ ᠶᠢᠨ ᠢ᠋ᠶ᠋ᠡᠨ ᠰᠢᠷᠡᠭᠡᠨ ᠳ᠋ᠦ᠍ ᠵᠠᠯᠠᠷᠠᠬᠤ ᠶ᠋ᠢᠨ ᠡᠮᠦᠨᠡᠬᠢ ᠮᠥᠴᠡ ᠳ᠋ᠦ᠍ ᠬᠠᠷᠠᠭᠰᠠᠨ ᠳ᠋ᠤ᠌ ᠪᠠᠨ ᠰᠡᠳᠬᠢᠯ ᠨᠢ ᠬᠠᠴᠢᠨ ᠥᠭᠡᠷᠡᠴᠢᠯᠡᠭᠳᠡᠯᠡ᠃ ᠲᠥᠪᠡᠳ ᠦ᠋ᠨ ᠥᠨᠳᠥᠷ ᠠᠭᠤᠯᠠᠰ᠂ ᠬᠥᠬᠡᠨᠠᠭᠤᠷ ᠤ᠋ᠨ ᠥᠷᠭᠡᠨ ᠬᠥᠨᠳᠡᠢ᠂ ᠠᠯᠠᠱᠠ ᠶ᠋ᠢᠨ ᠡᠯᠡᠰᠦᠨ ᠴᠦᠯ᠂ ᠬᠣᠪᠣᠭᠰᠠᠢᠷ ᠤ᠋ᠨ ᠬᠤᠵᠢᠷᠲᠤ ᠴᠠᠢᠳᠠᠮ ᠢ᠋ ᠲᠤᠭᠤᠯᠤᠨ ᠡᠬᠡ ᠨᠤᠲᠤᠭ ᠶᠤᠭᠠᠨ ᠵᠣᠷᠢᠨ ᠶᠠᠪᠤᠬᠤ ᠶ᠋ᠢᠨ ᠵᠠᠪᠰᠠᠷ ᠣᠷᠣᠨ ᠬᠡᠢᠳ ᠦ᠋ᠨ ᠰᠠᠭᠤᠭᠠ ᠠᠮᠢᠳᠤᠷᠠᠯ ᠠ᠋ᠴᠠ ᠳᠠᠢᠵᠢᠵᠤ᠂ ᠮᠣᠷᠢᠨ ᠳᠡᠯ ᠳᠡᠭᠡᠭᠦᠷ ᠶᠠᠪᠤᠬᠤ ᠶ᠋ᠢᠨ ᠠᠮᠲᠠ ᠠᠪᠤᠭᠰᠠᠨ ᠪᠣᠯᠬᠣᠷ ᠬᠠᠮᠪᠤ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠮᠣᠷᠢᠨ ᠲᠣᠯᠣᠭᠠᠢᠲᠤ ᠪᠤᠷᠬᠠᠨ ᠬᠢᠮᠤᠷᠠᠯ ᠲᠥᠷᠥᠭᠦᠯᠵᠡᠢ᠃《ᠨᠢᠭᠡᠨᠲᠡ ᠯᠡ ᠪᠦᠬᠦ ᠨᠠᠰᠤ ᠪᠠᠷ ᠢ᠋ᠶ᠋ᠠᠨ ᠡᠨᠡ ᠰᠢᠷᠡᠭᠡᠨ ᠳᠡᠭᠡᠷᠡ ᠨᠢᠭᠡᠨ ᠬᠡᠪ ᠢ᠋ᠶ᠋ᠡᠷ ᠵᠠᠪᠢᠯᠠᠨ ᠰᠠᠭᠤᠵᠤ᠂ ᠤᠷᠢᠳᠤ ᠨᠢᠭᠡᠨᠲᠡ ᠴᠡᠭᠡᠵᠢᠯᠡᠭᠰᠡᠨ ᠨᠣᠮ ᠢ᠋ᠶ᠋ᠠᠨ ᠡᠳᠦᠷ ᠪᠦᠷᠢ ᠳᠠᠪᠲᠠᠨ ᠳᠠᠪᠲᠠᠨ ᠤᠩᠰᠢᠬᠤ ᠠᠵᠢᠯ ᠢ᠋ᠶ᠋ᠠᠷ ᠬᠣᠷᠸᠠ ᠶ᠋ᠢ ᠡᠯᠡᠭᠡᠬᠦ ᠪᠣᠯᠤᠨᠠ ᠳᠠ》ᠭᠡᠵᠦ ᠰᠠᠨᠵᠢᠳᠠᠯᠪᠢᠴᠣᠢᠵᠠᠮᠰᠤ ᡀᠠᠷᠠᠮᠪᠠ ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠦ᠋ᠨ ᠬᠠᠮᠪᠤ ᠶᠢᠨ ᠰᠠᠭᠤᠳᠠᠯ ᠳ᠋ᠤ᠌ ᠰᠠᠭᠤᠬᠤ ᠳ᠋ᠤ᠌ ᠪᠠᠨ ᠪᠣᠳᠣᠯᠠ᠃ ᠲᠡᠭᠦᠨ ᠦ᠌ ᠡᠢᠮᠦᠷᠬᠦ ᠶᠠᠭᠤᠮᠠ ᠪᠣᠳᠣᠵᠤ ᠪᠠᠢᠭᠠ ᠶ᠋ᠢ ᠬᠡᠨ ᠴᠦ᠍ ᠳᠠᠭᠠᠵᠤ ᠮᠡᠳᠡᠬᠦ ᠦᠭᠡᠢ ᠨᠢ ᠯᠠᠪᠲᠠᠢ ᠶᠤᠮ᠃ ᠲᠥᠷᠥᠭᠰᠡᠨ ᠨᠤᠲᠤᠭ ᠲᠤ᠌ ᠪᠠᠨ ᠡᠷᠭᠢᠵᠦ ᠢᠷᠡᠭᠰᠡᠨ ᠢ᠋ ᠨᠢ ᠮᠡᠳᠡᠮᠡᠭᠴᠡ ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠦ᠋ᠨ ᠲᠣᠮᠣ ᠲᠣᠯᠣᠭᠠᠢ ᠯᠠᠮᠠ ᠨᠠᠷ ᠲᠡᠭᠦᠨ ᠢ᠋ ᠬᠦᠷᠢᠶᠡᠯᠡᠨ ᠠᠪᠴᠤ ᠬᠠᠮᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠠᠯᠪᠠᠨ ᠳ᠋ᠤ᠌ ᠡᠷᠭᠦᠮᠵᠢᠯᠡᠨ ᠵᠠᠯᠠᠬᠤ ᠪᠠᠷ ᠢᠳᠬᠠᠨ ᠵᠥᠪᠰᠢᠶᠡᠷᠡᠭᠦᠯᠵᠡᠢ᠃ ᠲᠥᠪᠡᠳ ᠦ᠋ᠨ ᡀᠠᠰᠠ ᠵᠣᠣ ᠶ᠋ᠢᠨ ᠭᠠᠵᠠᠷ ᠣᠯᠠᠨ ᠵᠢᠯ ᠰᠠᠭᠤᠵᠤ ᠪᠤᠷᠬᠠᠨ ᠤ᠋ ᠨᠣᠮ ᠳ᠋ᠤ᠌ ᠴᠣᠭᠣᠷᠠᠨ ᡀᠠᠷᠠᠮᠪᠠ ᠶ᠋ᠢᠨ ᠵᠡᠷᠭᠡ ᠳ᠋ᠦ᠍ ᠬᠦᠷᠦᠭᠰᠡᠨ ᠲᠡᠢᠮᠦ ᠬᠥᠮᠦᠨ ᠲᠡᠷᠡ ᠨᠤᠲᠤᠭ ᠲᠤ᠌ ᠥᠭᠡᠷᠡ ᠪᠠᠢᠭᠰᠠᠨ ᠦᠭᠡᠢ ᠪᠣᠯᠬᠣᠷ ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠦ᠋ᠨ ᠯᠠᠮᠠ ᠨᠠᠷ ᠰᠠᠨᠵᠢ ᠵᠢ ᠢᠷᠡᠭᠰᠡᠨ ᠳ᠋ᠦ᠍ ᠶᠡᠬᠡᠳᠡ ᠣᠯᠵᠠᠭᠤᠷᠬᠠᠵᠠᠢ᠃ ᠣᠳᠣ ᠲᠡᠭᠦᠨ ᠦ᠌ ᠨᠣᠮ ᠤ᠋ᠨ ᠨᠡᠷᠡ ᠨᠢ ᠰᠠᠨᠵᠢᠳᠠᠯᠪᠢᠴᠣᠢᠵᠠᠮᠰᠤ ᠪᠣᠯᠠᠢ᠃ ᠨᠣᠮ ᠤ᠋ᠨ ᠳᠠᠯᠠᠢ ᠪᠣᠯᠤᠭᠰᠠᠨ ᠡᠷᠳᠡᠮᠲᠦ ᠲᠡᠷᠡ ᠬᠥᠮᠦᠨ ᠢ᠋ ᠡᠷᠭᠦᠮᠵᠢᠯᠡᠨ ᠵᠠᠯᠠᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠤᠤᠯ ᠤ᠋ᠨ ᠪᠥᠭᠯᠡᠭᠦᠦ ᠠᠮᠠᠨ ᠳ᠋ᠤ᠌ ᠰᠢᠭᠢᠳᠦᠨ ᠰᠠᠭᠤᠷᠢᠰᠢᠭᠰᠠᠨ ᠪᠢᠴᠢᠬᠠᠨ ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠦ᠋ᠨ ᠨᠡᠷᠡ ᠠᠯᠳᠠᠷ ᠴᠤ᠌ ᠣᠯᠠᠨ ᠲᠦᠮᠡᠨ ᠳ᠋ᠦ᠍ ᠤᠯᠠᠮ ᠰᠠᠢᠨ ᠢ᠋ᠶ᠋ᠠᠷ ᠬᠡᠯᠡᠭᠳᠡᠬᠦ ᠤᠴᠢᠷᠲᠠᠢ ᠪᠠᠢᠯᠠ᠃
ᠰᠦᠮᠡ ᠪᠡᠷ ᠫᠢᠭ ᠳᠦᠭᠦᠷᠡᠩ ᠬᠥᠮᠦᠨ ᠴᠤᠭᠯᠠᠷᠠᠵᠠᠢ᠃ ᠤᠪᠠᠰᠢ ᠬᠤᠸᠠᠷᠠᠭ ᠨᠤᠭᠤᠳ ᠠ᠋ᠴᠠ ᠡᠬᠢᠯᠡᠭᠡᠳ ᠭᠡᠴᠣᠯ ᠭᠡᠯᠦᠩ᠂ ᠰᠢᠷᠡᠭᠡᠲᠦ᠂ ᠱᠠᠪᠷᠤᠩ ᠬᠦᠷᠲᠡᠯᠡ ᠪᠤᠷᠬᠠᠨ ᠤ᠋ ᠱᠠᠪᠢ ᠨᠠᠷ᠂ ᠲᠡᠷᠡᠴᠢᠯᠡᠨ ᠥᠭᠯᠢᠭᠡ ᠶ᠋ᠢᠨ ᠡᠵᠡᠳ ᠮᠥᠷᠭᠥᠯᠴᠢᠳ ᠪᠠᠭᠰᠢᠷᠠᠨ ᠴᠤᠭᠯᠠᠷᠠᠵᠤ ᠰᠦᠮᠡ ᠶ᠋ᠢᠨ ᠳᠣᠲᠣᠷᠠ ᠲᠥᠭᠡ ᠵᠠᠢ ᠴᠤ᠌ ᠦᠯᠡᠳᠡᠭᠡᠯ ᠦᠭᠡᠢ ᠪᠦᠷᠬᠦᠨ ᠵᠣᠭᠰᠣᠯᠴᠠᠵᠠᠢ᠃ ᠳᠤᠭᠠᠩ ᠳ᠋ᠤ᠌ ᠠᠯᠪᠠᠨ ᠬᠠᠭᠠᠬᠤ ᠶᠣᠰᠣᠲᠠᠢ ᠬᠡᠷᠭᠡᠮᠲᠡᠨ ᠨᠥᠬᠥᠳ ᠪᠦᠷᠢᠨ ᠡᠮᠦᠰᠬᠡᠯ ᠤᠳ ᠢᠶᠠᠨ ᠠᠭᠰᠠᠭᠠᠳ ᠵᠣᠭᠰᠣᠵᠤ ᠪᠠᠢᠯᠠ᠃ ᠰᠢᠷᠡᠭᠡᠲᠦ ᠯᠠᠮᠠ ᠴᠣᠷᠵᠢ᠂ ᠱᠠᠡᠭ᠌ᠵᠠᠪ᠂ ᠵᠠᠰᠠᠭ ᠯᠠᠮᠠ᠂ ᠳᠠ ᠯᠠᠮᠠ᠂ ᠨᠠᠡᠭ᠌ᠰᠣ ᠯᠠᠮᠠ᠂ ᠭᠡᠪᠬᠦᠢ᠂ ᠤᠮᠵᠠᠳ᠂ ᠨᠢᠷᠪᠠ ᠨᠠᠷ ᠳᠡᠰ ᠳᠡᠰ ᠢ᠋ᠶ᠋ᠡᠷ ᠪᠠᠢᠷᠢ ᠪᠠᠨ ᠡᠵᠡᠯᠡᠪᠡ᠃ ᠤᠯᠠᠭᠠᠨ᠂ ᠰᠢᠷᠠ ᠬᠠᠳᠠᠭ᠂ ᠳᠣᠯᠣᠭᠠᠨ ᠠᠯᠲᠠ ᠣᠷᠬᠢᠮᠵᠢ ᠪᠠᠨ ᠰᠠᠪᠰᠠᠭᠤᠯᠤᠨ᠂ ᠵᠢᠩᠵᠠᠢ ᠯᠠᠮᠠ ᠪᠠᠨ ᠳᠠᠭᠠᠭᠤᠯᠤᠭᠰᠠᠨ ᠭᠡᠴᠣᠯ᠂ ᠤᠯᠠᠭᠠᠨ ᠡᠮᠵᠢᠶᠡᠷᠢᠲᠦ ᠰᠢᠷᠠ ᠳ᠋ᠤᠭᠤᠭ ᠢ᠋ᠶ᠋ᠠᠨ ᠨᠥᠮᠥᠷᠴᠦ ᠭᠢᠷᠬᠠ ᠪᠦᠰᠡ ᠪᠦᠰᠡᠯᠡᠨ᠂ ᠱᠠᠮᠲᠠᠪ᠂ ᠣᠷᠬᠢᠮᠵᠢ ᠪᠠᠨ ᠮᠥᠷᠥᠯᠡᠭᠰᠡᠨ ᠭᠡᠯᠦᠩ ᠦ᠋ᠳ ᠡᠩᠨᠡᠭᠡ ᠪᠡᠷ ᠢ᠋ᠶ᠋ᠡᠨ ᠢᠷᠠᠢᠨᠠ᠃ ᠲᠡᠷᠡᠴᠢᠯᠡᠨ ᠰᠢᠷᠡᠭᠡᠲᠦ ᠯᠠᠮᠠ ᠶ᠋ᠢᠨ ᠲᠤᠰᠠᠯᠠᠬᠤ ᠯᠠᠴᠠᠪᠠ᠂ ᠵᠢᠲ᠋ᠪᠦ ᠬᠣᠶᠠᠷ ᠲᠠᠬᠢᠯᠴᠢ᠂ ᠭᠦᠦᠷᠡᠮᠪᠡ᠂ ᠳᠤᠭᠠᠩᠴᠢ᠂ ᠮᠢᠭᠷᠠᠮᠪᠠ᠂ ᠵᠢᠮᠡ ᠯᠠᠮᠠ᠂ ᠰᠣᠢᠪᠣᠡᠭ᠂ ᠭᠡᠢᠭ᠂ ᠵᠢᠩᠵᠠᠢ ᠯᠠᠮᠠ ᠨᠠᠷ ᠡᠭᠦᠪᠡᠷ ᠲᠡᠭᠦᠪᠡᠷ ᠦᠵᠡᠭᠳᠡᠨᠡ᠃
ᠴᠥᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠯᠡ ᠰᠠᠨᠵᠢᠳᠠᠯᠪᠢᠴᠣᠢᠵᠠᠮᠰᠤ ᠬᠠᠮᠪᠤ ᠶᠢᠨ ᠵᠦᠭ ᠪᠢᠰᠢᠷᠡᠯ᠂ ᠢᠲᠡᠭᠡᠯ ᠰᠣᠨᠢᠭᠤᠴᠢᠯᠠᠯ ᠳᠦᠭᠦᠷᠡᠩ ᠨᠢᠳᠦ ᠪᠡᠷ ᠬᠠᠷᠠᠵᠠᠭᠠᠵᠤ ᠪᠠᠢᠯᠠ᠃
ᠬᠠᠷᠠᠩᠭᠠ ᠶ᠋ᠢᠨ ᠬᠤᠷᠠᠯ ᠢ᠋ᠶ᠋ᠠᠷ ᠥᠷᠯᠥᠭᠡᠨ ᠦ᠌ ᠤᠩᠰᠢᠯᠭᠠ ᠡᠬᠢᠯᠡᠨᠡ ᠭᠡᠳᠡᠭ ᠢ᠋ ᠰᠠᠨᠠᠬᠤ ᠳ᠋ᠤ᠌ ᠰᠠᠨᠵᠢ ᠳ᠋ᠤ᠌ ᠣᠯᠠᠨ ᠣᠯᠠᠨ ᠵᠢᠯ ᠳᠠᠪᠲᠠᠭᠰᠠᠭᠠᠷ ᠪᠠᠢᠭᠠᠳ ᠥᠩᠭᠡ ᠦᠭᠡᠢ ᠪᠣᠯᠴᠢᠬᠠᠭᠰᠠᠨ ᠪᠣᠱᠣᠭᠠᠨ ᠤ᠋ ᠮᠣᠳᠣ ᠶᠤᠮ ᠤᠤ ᠡᠰᠡᠪᠡᠯ ᠵᠠᠵᠢᠯᠤᠭᠰᠠᠭᠠᠷ ᠪᠠᠢᠲᠠᠯᠠ ᠠᠮᠲᠠ ᠦᠭᠡᠢ ᠪᠣᠯᠴᠢᠬᠠᠭᠰᠠᠨ ᠰᠢᠷᠮᠦᠰᠦ ᠲᠡᠢ ᠪᠣᠷᠴᠠ ᠰᠢᠭ᠋ ᠰᠣᠨᠢᠨ ᠦᠭᠡᠢ ᠰᠠᠨᠠᠭᠳᠠᠯᠠ᠃ ᠬᠠᠷᠠᠩᠭᠠ ᠶ᠋ᠢᠨ ᠬᠤᠷᠠᠯ ᠤ᠋ᠨ ᠳᠠᠷᠠᠭᠠ ᠲᠦᠢ ᠡᠷᠭᠦᠨᠡ᠂ ᠷᠠᠰᠢᠶᠠᠨ ᠲᠠᠷᠨᠢᠳᠠᠨᠠ᠂ ᠮᠠᠩᠵᠠ ᠵᠣᠭᠣᠭᠯᠠᠨᠠ᠃ ᠡᠳᠦᠷ ᠳᠤᠮᠳᠠ ᠮᠠᠭᠲᠠᠭᠠᠯ ᠤ᠋ᠨ ᠬᠤᠷᠠᠯ ᠬᠢᠨᠡ᠃ ᠪᠤᠷᠬᠠᠳ ᠤ᠋ᠨ ᠦᠢᠯᠡ ᠶᠠᠪᠤᠳᠠᠯ ᠢ᠋ ᠮᠠᠭᠲᠠᠨ ᠤᠩᠰᠢᠬᠤ ᠲᠡᠷᠡ ᠬᠤᠷᠠᠯ ᠤ᠋ᠨ ᠳᠠᠷᠠᠭᠠ ᠣᠷᠣᠢ ᠶ᠋ᠢᠨ ᠡᠭᠡᠯᠵᠢᠨ ᠳ᠋ᠦ᠍ ᠦᠬᠦᠭᠰᠡᠨ ᠠᠮᠢᠳᠤ ᠶᠢᠨ ᠢᠷᠦᠭᠡᠯ ᠦ᠋ᠨ ᠬᠤᠷᠠᠯ ᠬᠢᠨᠡ᠃ ᠡᠢᠮᠦ ᠯᠡ ᠠᠵᠢᠯ ᠢ᠋ᠶ᠋ᠠᠷ ᠡᠳᠦᠷ ᠬᠣᠨᠣᠭ᠂ ᠵᠢᠯ ᠰᠠᠷᠠ᠂ ᠵᠠ ᠲᠡᠭᠡᠭᠡᠳ ᠪᠦᠲᠦᠨ ᠠᠮᠢᠳᠤᠷᠠᠯ ᠥᠩᠭᠡᠷᠡᠨᠡ᠃ ᠬᠤᠷᠠᠯ ᠨᠢᠭᠡᠨ ᠠᠶᠠᠯᠭᠤ ᠪᠠᠷ ᠪᠦᠪᠳᠦᠨᠡᠨ ᠬᠤᠷᠠᠨᠠ᠃ ᠮᠠᠨᠢ ᠲᠠᠲᠠᠬᠤ᠂ ᠤᠮᠵᠠᠳ ᠤ᠋ᠨ ᠲᠤᠨᠵᠢᠷᠳᠠᠬᠤ ᠳᠠᠭᠤᠨ ᠠ᠋ᠴᠠ ᠥᠭᠡᠷᠡ ᠨᠢᠭᠡ ᠶᠡᠬᠡ ᠰᠣᠳᠣᠨ ᠳᠠᠭᠤ ᠠᠪᠢᠶᠠ ᠭᠠᠷᠬᠤ ᠦᠭᠡᠢ᠃ ᠬᠡᠩᠭᠡᠷᠭᠡ᠂ ᠳ᠋ᠢᠩᠱᠠᠭ᠂ ᠭᠠᠩᠯᠢᠩ᠂ ᠰᠡᠯᠨᠢᠨ᠂ ᠴᠠᠩ᠂ ᠮᠢᠭᠠᠨ᠂ ᠯᠢᠩᠪᠦ᠂ ᠵᠥᠷᠢᠭᠦᠦ ᠂ ᠱᠦᠭᠯᠦ᠂ ᠲᠣᠡᠭ᠌ᠷᠠᠭᠠ᠂ ᠪᠢᠰᠬᠢᠭᠦᠷ᠂ ᠲᠤᠩ ᠪᠦᠷᠢᠶᠡ᠂ ᠦᠬᠡᠷ ᠪᠦᠷᠢᠶᠡᠨ ᠦ᠌ ᠳᠠᠭᠤ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠬᠤᠷᠠᠯ᠂ ᠶᠣᠰᠣᠯᠠᠯ ᠤ᠋ᠨ ᠦᠶᠡ ᠪᠡᠷ ᠳᠤᠭᠤᠯᠳᠠᠬᠤ ᠪᠣᠯᠪᠠᠴᠤ ᠲᠡᠷᠡ ᠪᠦᠬᠦᠨ ᠴᠥᠮ ᠯᠡ ᠮᠢᠭᠷᠠᠮᠪᠠ ᠶ᠋ᠢᠨ ᠵᠢᠭᠠᠯᠲᠠ ᠠ᠋ᠴᠠ ᠭᠠᠵᠢᠬᠤ ᠶᠣᠰᠣ ᠦᠭᠡᠢ᠃ ᠪᠠᠰᠠ ᠯᠠ ᠨᠢᠭᠡᠨ ᠬᠡᠪ ᠲᠦ᠍ ᠮᠦᠡᠭᠬᠡᠳᠡ ᠲᠣᠭᠲᠠᠭᠠᠭᠰᠠᠨ ᠵᠠᠢᠭ ᠶᠣᠰᠣ ᠶ᠋ᠢ ᠳᠠᠭᠠᠨᠠ᠃ ᠲᠡᠭᠡᠬᠦ ᠪᠡᠷ ᠢ᠋ᠶ᠋ᠡᠨ ᠯᠠᠮᠠ ᠨᠠᠷ ᠤ᠋ᠨ ᠨᠢᠭᠡᠨ ᠠᠶᠠᠯᠭᠤ ᠪᠠᠷ ᠪᠦᠪᠳᠦᠨᠡᠨ ᠤᠩᠰᠢᠬᠤ ᠮᠠᠢᠭ ᠠ᠋ᠴᠠ ᠢᠯᠭᠠᠭᠠ ᠶᠠᠭᠤᠨ ᠪᠠᠢᠬᠤ ᠪᠣᠢ? ᠨᠣᠬᠠᠢ ᠬᠤᠴᠠᠬᠤ ᠶ᠋ᠢ ᠲᠣᠡᠭ᠌ᠷᠠᠬᠠ ᠪᠠᠷ᠂ ᠰᠢᠪᠠᠭᠤ ᠵᠢᠷᠭᠢᠬᠦ ᠶ᠋ᠢ ᠵᠥᠷᠢᠭᠦᠦ ᠪᠡᠷ᠂ ᠯᠤᠤ ᠬᠦᠷᠬᠢᠷᠡᠬᠦ ᠶ᠋ᠢ ᠦᠬᠡᠷ ᠪᠦᠷᠢᠶᠡ ᠪᠡᠷ ᠳᠠᠭᠤᠷᠢᠶᠠᠯᠭᠠᠨᠠ᠃ ᠭᠡᠪᠡᠴᠦ ᠲᠡᠷᠡ ᠪᠦᠬᠦᠨ ᠨᠢᠭᠡ ᠯᠡ ᠥᠩᠭᠡ ᠠᠶᠠᠰ ᠲᠠᠢ ᠪᠠᠢᠬᠤ ᠤᠴᠢᠷ ᠲᠠᠢ᠃ ᠡᠭᠦᠨ ᠢ᠋ ᡀᠠᠷᠠᠮᠪᠠ ᠴᠥᠮ ᠢ᠋ ᠴᠡᠭᠡᠵᠢ ᠪᠡᠷ ᠮᠡᠳᠡᠵᠦ ᠪᠠᠢᠯᠠ᠃ ᠵᠢᠩᠵᠠᠢ ᠯᠠᠮᠠ ᠶ᠋ᠢᠨ ᠲᠤᠰᠯᠠᠬᠤ ᠬᠢᠵᠦ ᠪᠠᠢᠬᠤ ᠳ᠋ᠤ᠌ ᠪᠠᠨ ᠪᠠᠷᠡᠪᠠᠡᠭ ᠬᠡᠢᠳ ᠲᠦ᠍ ᠡᠭᠦᠨ ᠢ᠋ ᠮᠡᠳᠡᠬᠦ ᠶ᠋ᠢᠨ ᠴᠠᠭᠠᠨᠠ ᠮᠡᠳᠡᠵᠦ᠂ ᠰᠤᠷᠬᠤ ᠶ᠋ᠢᠨ ᠴᠠᠭᠠᠨᠠ ᠰᠤᠷᠴᠠᠢ᠃
ᠪᠠᠨᠳᠢ ᠪᠠᠢᠬᠤ ᠳ᠋ᠤ᠌ ᠪᠠᠨ ᠱᠠᠪᠢᠯᠠᠨ ᠰᠠᠭᠤᠵᠤ ᠪᠠᠢᠭᠰᠠᠨ ᠡᠨᠡᠬᠦ ᠳ᠋ᠠᠴᠠᠩ ᠤ᠋ᠨ ᠳᠣᠲᠣᠷᠠᠬᠢ ᠶᠠᠭᠤᠮᠠᠰ ᠢ᠋ ᠰᠠᠨᠵᠢ ᡀᠠᠷᠠᠮᠪᠠ ᠡᠷᠭᠢᠨ ᠲᠣᠭᠣᠷᠢᠨ ᠠᠵᠢᠨ ᠬᠠᠷᠠᠯᠠ᠃《ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠯᠡ ᠬᠠᠭᠤᠴᠢᠨ ᠶᠠᠩᠵᠤᠨ ᠳ᠋ᠤ᠌ ᠪᠠᠨ ᠪᠠᠢᠬᠤ ᠰᠢᠭ᠋ ᠪᠣᠢ ᠳᠠ? ᠨᠡᠮᠡᠭᠳᠡᠭᠰᠡᠨ ᠶᠠᠭᠤᠮᠠ ᠠᠯᠠᠭᠠ᠃ ᠬᠠᠷᠢᠨ ᠤᠲᠤᠭᠠ ᠲᠣᠭᠣᠰᠣ ᠨᠢ ᠨᠡᠯᠢᠶᠡᠳ ᠵᠤᠵᠠᠭᠠᠷᠠᠵᠠᠢ᠃ ᠨᠢᠭᠡ ᠰᠠᠢᠬᠠᠨ ᠰᠦᠮᠡ ᠪᠠᠷᠢᠬᠤ ᠴᠠᠭ ᠪᠣᠯᠤᠭᠰᠠᠨ ᠶᠤᠮ ᠪᠠᠢᠨᠠ ᠳᠠ》ᠭᠡᠵᠦ ᠰᠠᠨᠵᠢᠳᠠᠯᠪᠢᠴᠣᠢᠵᠠᠮᠰᠤᠲᠠᠨ ᠳᠣᠲᠣᠷᠠ ᠪᠠᠨ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠯᠠ᠃ ᠲᠡᠭᠡᠲᠡᠯᠡ ᠥᠪᠡᠷ ᠦ᠋ᠨ ᠬᠢ ᠨᠢ ᠪᠠᠭᠠ ᠳ᠋ᠤ᠌ ᠪᠠᠨ ᠱᠠᠪᠢᠯᠠᠨ ᠰᠠᠭᠤᠵᠤ ᠪᠠᠢᠭᠰᠠᠨ ᠵᠠᠪᠳᠤᠩ ᠨᠢᠳᠦᠨ ᠦ᠌ ᠪᠤᠯᠤᠩ ᠳ᠋ᠤ᠌ ᠬᠠᠷᠠᠭᠳᠠᠯᠠ᠃ ᠴᠣᠴᠢᠬᠤ ᠰᠢᠭ᠋ ᠪᠣᠯᠵᠤ ᠵᠠᠪᠳᠤᠩ ᠢ᠋ᠶ᠋ᠠᠨ ᠠᠵᠢᠭᠯᠠᠪᠠ᠃ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠢᠯᠠ᠃ ᠳᠡᠭᠡᠷᠡ ᠨᠢ ᠰᠠᠭᠤᠭᠠ ᠪᠢᠴᠢᠬᠠᠨ ᠪᠣᠷᠣ ᠪᠠᠨᠳᠢ ᠨᠢᠳᠦ ᠪᠡᠨ ᠪᠦᠯᠲᠡᠭᠡᠨᠡᠭᠦᠯᠦᠨ ᠵᠣᠭᠰᠣᠵᠤ ᠪᠠᠢᠬᠤ ᠶ᠋ᠢ ᠬᠠᠷᠠᠪᠠ᠃ ᠰᠡᠳᠬᠢᠯ ᠨᠢ ᠤᠶᠠᠷᠠᠵᠤ ᠬᠣᠭᠣᠯᠠᠢ ᠨᠢ ᠵᠠᠩᠭᠢᠷᠠᠯᠠ᠃ ᠲᠡᠷᠡ ᠯᠠ ᠵᠠᠪᠳᠤᠩ ᠳᠡᠭᠡᠷᠡ ᠡᠴᠡ ᠠᠯᠤᠰ ᠭᠠᠵᠠᠷ ᠰᠤᠷᠬᠤ ᠪᠠᠷ ᠣᠳᠴᠤ ᠪᠢᠯᠡ᠃ ᠣᠳᠣ ᠲᠡᠭᠦᠨ ᠢ᠋ ᠵᠠᠯᠭᠠᠮᠵᠢᠯᠠᠬᠤ ᠪᠠᠷ ᠪᠠᠰᠠ ᠯᠠ ᠨᠢᠭᠡ ᠠᠮᠢᠲᠠᠨ ᠤ᠋ ᠦᠷᠡ ᠰᠢᠷᠠ ᠪᠠᠷᠢᠨᠲᠠᠭ ᠡᠮᠦᠰᠦᠭᠡᠳ ᠵᠣᠭᠰᠣᠵᠤ ᠪᠠᠢᠭᠠ ᠠᠵᠢ᠃ ᠬᠣᠷᠸᠠ ᠭᠡᠳᠡᠭ ᠶᠡᠬᠡ ᠤᠷᠤᠰᠬᠠᠯ ᠠᠵᠢ᠃ ᠨᠢᠭᠡ ᠨᠢ ᠨᠥᠭᠦᠭᠡ ᠶ᠋ᠢ ᠵᠠᠯᠭᠠᠨ ᠤᠷᠤᠰᠤᠨᠠ᠃ ᠨᠢᠭᠡ ᠨᠢ ᠨᠥᠭᠦᠭᠡ ᠶ᠋ᠢ ᠬᠠᠯᠠᠨ ᠦᠷᠭᠦᠯᠵᠢᠯᠡᠨᠡ᠃ ᠲᠡᠭᠦᠨ ᠦ᠌ ᠲᠠᠪᠴᠠᠩ ᠳ᠋ᠤ᠌ ᠰᠠᠪᠠ ᠶᠢᠷᠲᠢᠨᠴᠦ ᠮᠥᠩᠬᠡ ᠶ᠋ᠢᠨ ᠮᠠᠨᠴᠤᠢ ᠪᠣᠯᠤᠨ ᠨᠢᠭᠡ ᠶ᠋ᠢ ᠦᠳᠡᠵᠦ᠂ ᠨᠥᠭᠦᠭᠡ ᠶ᠋ᠢ ᠲᠤᠰᠤᠨᠠ᠃
ᠬᠠᠮᠪᠤ ᠯᠠᠮᠠ ᠳ᠋ᠤ᠌ ᠡᠨᠡ ᠪᠠᠰᠠ ᠯᠠ ᠮᠡᠳᠡᠭᠡᠵᠢ ᠶ᠋ᠢᠨ ᠵᠦᠢᠯ᠃ ᠨᠣᠮ ᠤ᠋ᠨ ᠦᠭᠡ ᠶ᠋ᠢ ᠬᠡᠳᠦᠨ ᠲᠦᠮᠡᠨ ᠤᠳᠠᠭᠠ ᠳᠠᠪᠲᠠᠨ ᠳᠠᠪᠲᠠᠭᠰᠠᠭᠠᠷ ᠨᠢᠭᠡᠨ ᠯᠠᠮᠠ ᠶ᠋ᠢᠨ ᠪᠡᠶᠡ ᠭᠦᠢᠴᠡᠬᠦ ᠦᠭᠡᠢ ᠪᠣᠯᠬᠤ ᠳ᠋ᠤ᠌ ᠲᠡᠭᠦᠨ ᠦ᠌ ᠱᠠᠪᠢ ᠦᠷᠭᠦᠯᠵᠢᠯᠡᠭᠦᠯᠦᠨ ᠮᠥᠨᠥᠬᠢ ᠨᠣᠮ ᠢ᠋ ᠨᠢ ᠦᠭᠡ ᠦᠰᠦᠭ ᠠᠯᠳᠠᠯ ᠦᠭᠡᠢ ᠳᠠᠪᠲᠠᠨ ᠠᠢᠯᠠᠳᠣᠭᠰᠠᠭᠠᠷ ᠮᠥᠨ ᠯᠡ ᠨᠠᠰᠤᠨ ᠤ᠋ ᠲᠤᠢᠯ ᠢ᠋ ᠦᠵᠡᠵᠦ ᠪᠡᠶᠡ ᠶ᠋ᠢ ᠪᠠᠷᠠᠨᠠ᠃ ᠪᠤᠷᠬᠠᠨ ᠤ᠋ ᠠᠢᠯᠠᠳᠤᠭᠰᠠᠨ ᠪᠦᠬᠦᠨ ᠬᠡᠨ ᠴᠦ᠍ ᠬᠠᠯᠳᠠᠰᠢ ᠦᠭᠡᠢ᠂ ᠬᠡᠨ ᠴᠦ᠍ ᠵᠠᠰᠠᠰᠢ ᠦᠭᠡᠢ ᠳᠠᠷᠬᠠᠨ ᠲᠤᠯᠠ ᠬᠣᠶᠠᠷ ᠮᠢᠩᠭᠠᠭᠠᠳ ᠣᠨ ᠤ᠋ ᠲᠡᠷᠲᠡᠭᠡ ᠤᠩᠰᠢᠵᠤ ᠪᠠᠢᠭᠰᠠᠨ ᠤᠩᠰᠢᠯᠭᠠ ᠥᠨᠥᠳᠥᠷ ᠴᠦ᠍ ᠬᠡᠪ ᠢ᠋ᠶ᠋ᠡᠷ ᠃ ᠪᠠᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠵᠠᠪᠳᠤᠩ ᠠ᠋ᠴᠠ ᠬᠠᠷᠠᠴᠠ ᠪᠠᠨ ᠵᠠᠢᠯᠠᠭᠤᠯᠬᠤ ᠭᠡᠲᠡᠯᠡ ᠪᠣᠨᠲᠣᠭᠣᠷ ᠪᠠᠨᠳᠢ ᠶ᠋ᠢᠨ ᠴᠠᠭᠠᠳᠤ ᠲᠠᠯᠠ ᠳ᠋ᠤ᠌ ᠲᠥᠷᠥᠭᠰᠡᠨ ᠡᠴᠢᠭᠡ ᠰᠠᠢᠨᠴᠣᠭᠲᠤ ᠶ᠋ᠢᠨ ᠪᠢᠰᠢᠷᠡᠨ ᠰᠦᠰᠦᠭᠯᠡᠬᠦ ᠴᠢᠷᠠᠢ ᠶ᠋ᠢ ᠣᠯᠵᠤ ᠬᠠᠷᠠᠭᠠᠳ ᠬᠠᠮᠪᠤ ᠯᠠᠮᠠ ᠰᠠᠨᠵᠢᠳᠠᠯᠪᠢᠴᠣᠢᠵᠠᠮᠰᠤ ᠬᠡᠷᠳ᠋ᠬᠢᠨ ᠴᠣᠴᠢᠬᠤ ᠰᠢᠭ᠋ ᠪᠣᠯᠤᠯᠠ᠃ ᠬᠥᠭᠡᠷᠦᠬᠦᠢ ᠡᠴᠢᠭᠡ ᠨᠢ ᠪᠠᠶᠠᠷ ᠪᠠᠬᠠᠷᠬᠠᠯ᠂ ᠢᠲᠡᠭᠡᠯ ᠰᠦᠰᠢᠭ ᠬᠣᠶᠠᠷ ᠬᠣᠣᠰᠯᠠᠭᠰᠠᠨ ᠨᠢᠳᠦ ᠪᠡᠷ ᠦᠷᠡ ᠪᠣᠯᠤᠭᠰᠠᠨ ᠰᠠᠨᠵᠢ ᠪᠠᠨ ᠪᠢᠰᠢᠷᠡᠨ ᠰᠢᠷᠳᠡᠭᠡᠳ ᠪᠠᠷᠠᠭᠤᠨ ᠭᠠᠷ ᠲᠤ᠌ ᠪᠠᠨ ᠭᠬᠢᠷ ᠲᠠᠭ ᠪᠣᠯᠤᠭᠰᠠᠨ ᠮᠠᠯᠠᠭᠠᠢ ᠪᠠᠨ ᠪᠠᠵᠠᠯᠠᠨ ᠪᠥᠭᠴᠥᠢᠨ ᠵᠣᠭᠰᠣᠵᠤ ᠪᠠᠢᠭᠠ ᠬᠠᠷᠠᠭᠳᠠᠪᠠ᠃《ᠵᠠᠢᠯᠠᠭᠤᠯ ᠳᠠ! ᠮᠠᠭᠤ ᠡᠴᠢᠭᠡ ᠮᠢᠨᠢ ᠦᠷᠡ ᠨᠠᠮᠠᠢ ᠪᠠᠨ ᠡᠳᠦᠢ ᠥᠨᠳᠥᠷ ᠲᠠᠪᠴᠠᠩ ᠳ᠋ᠤ᠌ ᠭᠠᠷᠴᠤ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠴᠣᠷ ᠤ᠋ᠨ ᠭᠠᠭᠴᠠ ᠬᠡᠢᠳ ᠦ᠋ᠨ ᠬᠠᠮᠪᠤ ᠯᠠᠮᠠ ᠪᠣᠯᠤᠭᠠᠳ ᠪᠠᠢᠭᠠ ᠡᠨᠡ ᠮᠥᠴᠡ ᠶ᠋ᠢ ᠦᠵᠡᠨᠡ ᠭᠡᠵᠦ ᠪᠣᠳᠣᠭᠠ ᠦᠭᠡᠢ ᠯᠡ ᠶᠠᠪᠤᠭᠰᠠᠨ ᠪᠢᠵᠡ ᠳᠡ᠃ ᠣᠳᠣ ᠲᠡᠭᠡᠭᠡᠳ ᠬᠦᠦ ᠪᠡᠨ ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠦ᠋ᠨ ᠲᠡᠷᠢᠭᠦᠨ ᠬᠠᠮᠪᠤ ᠶᠢᠨ ᠰᠠᠭᠤᠳᠠᠯ ᠳ᠋ᠤ᠌ ᠰᠠᠭᠤᠵᠤ ᠪᠠᠢᠭᠠ ᠡᠨᠡᠬᠡᠨ ᠦᠶᠡ ᠳ᠋ᠦ᠍ ᠶᠠᠭᠤ ᠪᠣᠳᠣᠵᠤ ᠵᠣᠭᠰᠣᠳᠠᠭ ᠪᠣᠯ ᠳᠠ? ᠰᠦᠰᠢᠭ ᠪᠢᠰᠢᠷᠡᠯ ᠳᠦᠭᠦᠷᠡᠩ ᠴᠡᠭᠡᠵᠢᠨ ᠳ᠋ᠦ᠍ ᠨᠢ ᠪᠠᠶᠠᠷ ᠬᠥᠷ ᠣᠪᠣᠯᠵᠠᠵᠤ ᠪᠠᠢᠳᠠᠭ ᠪᠣᠯᠪᠠ ᠤᠤ? ᠡᠰᠡᠪᠡᠯ ᠠᠶᠤᠨ ᠪᠥᠱᠥᠭᠦᠷᠬᠡᠵᠦ ᠵᠣᠭᠰᠣᠭᠠ ᠶᠤᠮ ᠤᠤ? ᠶᠡᠬᠡᠰ ᠳᠡᠭᠡᠳᠦᠰ ᠦ᠋ᠨ ᠰᠡᠩᠲᠡᠢ ᠳ᠋ᠦ᠍ ᠵᠠᠯᠠᠷᠠᠭᠰᠠᠨ ᠬᠦᠦ ᠳ᠋ᠦ᠍ ᠪᠡᠨ ᠣᠢᠷᠠ ᠴᠤ᠌ ᠣᠴᠢᠬᠤ ᠠ᠋ᠴᠠ ᠪᠣᠯᠭᠣᠮᠵᠢᠯᠠᠵᠤ ᠪᠠᠢᠭᠠ ᠶᠤᠮ ᠤᠤ?》 ᠭᠡᠵᠦ ᠰᠠᠨᠵᠢ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠯᠠ᠃ ᠲᠡᠭᠡᠲᠡᠯᠡ ᠡᠵᠢ ᠨᠢ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠯᠠ《ᠲᠥᠷᠥᠭᠦᠯᠦᠭᠰᠡᠨ ᠬᠦᠦ ᠶᠢᠨ ᠢ᠋ᠶ᠋ᠡᠨ ᠢᠳᠢ ᠰᠢᠳᠢ ᠶ᠋ᠢ ᠦᠵᠡᠵᠦ ᠴᠢᠳᠠᠯ ᠦᠭᠡᠢ ᠶᠢᠷᠲᠢᠨᠴᠦ ᠶᠢᠨ ᠮᠥᠩᠬᠡ ᠪᠤᠰᠤ ᠶ᠋ᠢ ᠦᠵᠡᠭᠦᠯᠦᠭᠰᠡᠨ ᠨᠢ ᠬᠡᠴᠢᠨᠡᠨ ᠬᠠᠯᠠᠭ ᠪᠢᠯᠡ! ᠬᠥᠭᠡᠷᠦᠬᠦᠢ ᠡᠵᠢ ᠮᠢᠨᠢ ᠡᠨᠡ ᠮᠥᠴᠡ ᠶ᠋ᠢ ᠦᠵᠡᠭᠰᠡᠨ ᠪᠣᠯ ᠬᠦᠦ ᠲᠥᠷᠥᠭᠦᠯᠵᠦ ᠵᠣᠪᠠᠭᠰᠠᠨ ᠢ᠋ᠶ᠋ᠠᠨ ᠮᠠᠷᠲᠠᠩᠨᠠᠨ ᠰᠡᠳᠬᠢᠯ ᠨᠢ ᠳᠡᠪᠲᠦᠬᠦ ᠪᠠᠢᠭᠰᠠᠨ ᠪᠣᠯᠪᠠ ᠤᠤ? ᠨᠠᠮᠠᠢ ᠪᠠᠨ ᠡᠷᠳᠡᠮ ᠲᠡᠢ ᠯᠠᠮᠠ ᠪᠣᠯᠤᠭᠠᠰᠠᠢ ᠭᠡᠰᠡᠨ ᠭᠠᠭᠴᠠ ᠬᠦᠰᠡᠯ ᠢ᠋ᠶ᠋ᠡᠷ ᠯᠡ ᠡᠬᠡ᠂ ᠡᠴᠢᠭᠡ ᠮᠢᠨᠢ ᠠᠵᠤ ᠲᠥᠷᠥᠵᠦ ᠪᠠᠢᠯᠠ᠃ ᠣᠳᠣ ᠲᠡᠭᠡᠭᠡᠳ ᠪᠢ ᠭᠡᠳᠡᠭ ᠬᠥᠮᠦᠨ ᠡᠷᠳᠡᠮ ᠦ᠋ᠨ ᠣᠷᠣᠢ ᠳ᠋ᠤ᠌ ᠣᠢᠷᠠᠳᠤᠯᠠ᠃ ᠭᠡᠪᠡᠴᠦ ᠶᠠᠳᠠᠭᠤ ᠡᠴᠢᠭᠡ ᠡᠬᠡ ᠳ᠋ᠦ᠍ ᠮᠢᠨᠢ ᠳᠡᠷᠡᠨ ᠡᠴᠡ ᠶᠠᠭᠤ ᠬᠠᠯᠳᠠᠬᠤ ᠪᠢᠯᠡ᠃ ᠡᠬᠡ ᠮᠢᠨᠢ ᠶᠠᠭᠤᠨ ᠤ᠋ ᠴᠤ᠌ ᠢᠳᠢ ᠰᠢᠳᠢ ᠶ᠋ᠢ ᠦᠵᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ᠃ ᠡᠴᠢᠭᠡ ᠳ᠋ᠦ᠍ ᠮᠢᠨᠢ ᠮᠢᠨᠦ ᠬᠠᠮᠪᠤ ᠶ᠋ᠢᠨ ᠰᠠᠭᠤᠳᠠᠯ ᠶᠠᠭᠤ ᠥᠭᠬᠦ ᠰᠠᠨ ᠪᠢᠯᠡ᠃ ᠲᠦᠯᠡᠭᠡ ᠶ᠋ᠢ ᠨᠢ ᠪᠡᠯᠡᠳᠬᠡᠭᠡᠳ᠂ ᠠᠷᠭᠠᠯ ᠢ᠋ ᠨᠢ ᠲᠡᠭᠦᠭᠡᠳ ᠥᠭᠬᠦ ᠤᠤ?ᠮᠠᠯ ᠢ᠋ ᠨᠢ ᠠᠳᠣᠭᠣᠯᠣᠭᠠᠳ᠂ ᠭᠡᠷ ᠢ᠋ ᠨᠢ ᠪᠠᠷᠢᠭᠠᠳ ᠥᠭᠬᠦ ᠤᠤ? ᠦᠭᠡᠢ ᠰᠢᠦ ᠳᠡ᠃ ᠬᠠᠮᠪᠤ ᠶ᠋ᠢᠨ ᠰᠢᠷᠡᠭᠡᠨ ᠳ᠋ᠦ᠍ ᠰᠠᠭᠤᠭᠰᠠᠭᠠᠷ ᠯᠠ ᠰᠢᠷᠠ ᠵᠠᠩᠴᠢᠨ ᠳ᠋ᠤ᠌ ᠪᠠᠨ ᠬᠣᠯᠭᠠᠰᠠᠭᠠᠷ ᠯᠠ ᠡᠨᠡ ᠬᠣᠷᠸᠠ ᠶ᠋ᠢ ᠳᠠᠭᠤᠰᠬᠠᠨᠠ᠃ ᠪᠠᠢᠮᠠᠭᠠᠢ ᠲᠣᠮᠣ ᠰᠦᠮᠡ ᠶ᠋ᠢᠨ ᠬᠠᠮᠪᠤ ᠯᠠᠮᠠ ᠶ᠋ᠢ ᠲᠡᠳᠡ ᠨᠠᠷ ᠲᠡᠢᠮᠦ ᠠᠮᠠᠷᠬᠠᠨ ᠳᠤᠷᠠ ᠪᠠᠷ ᠨᠢ ᠲᠠᠯᠪᠢᠬᠤ ᠤᠤ ᠳᠠ?》ᠭᠡᠵᠦ ᠰᠠᠨᠵᠢ ᠪᠣᠳᠣᠭᠠᠳ ᠡᠬᠢᠨ ᠦ᠌ ᠵᠠᠪᠳᠤᠩ ᠳᠠᠭᠠᠤ ᠴᠤᠪᠤᠷᠠᠨ ᠵᠣᠭᠰᠣᠵᠤ ᠪᠠᠢᠭᠠ ᠲᠣᠮᠣ ᠲᠣᠯᠣᠭᠠᠢ ᠯᠠᠮᠠ ᠨᠠᠷ ᠢ᠋ ᠠᠵᠢᠭᠯᠠᠨ ᠬᠠᠷᠠᠯᠠ᠃ ᠭᠠᠤᠯᠢ᠂ ᠵᠡᠰ ᠢ᠋ᠶ᠋ᠡᠷ ᠴᠢᠳᠬᠤᠵᠤ ᠬᠢᠭᠰᠡᠨ ᠮᠡᠲᠦ ᠭᠢᠯᠲᠠᠭᠠᠷ ᠬᠠᠯᠵᠠᠨ ᠲᠣᠯᠣᠭᠠᠢ ᠲᠠᠢ᠂ ᠪᠦᠳᠦᠭᠦᠨ ᠨᠤᠭᠤᠯᠤᠭᠠ᠂ ᠭᠦᠨ ᠦᠷᠴᠢᠯᠡᠭᠡᠨ ᠳ᠋ᠦ᠍ ᠬᠡᠷᠦᠭᠳᠡᠭᠰᠡᠨ ᠰᠢᠷᠠᠮᠠᠩ ᠥᠩᠭᠡ ᠲᠡᠢ ᠱᠠᠯᠬᠠᠭᠠᠷ ᠬᠠᠴᠠᠷ ᠲᠠᠢ ᠭᠡᠯᠦᠩ᠂ ᠭᠡᠴᠦᠯ᠂ ᠭᠠᠪᠵᠤ᠂ ᠤᠮᠵᠠᠳ᠂ ᠭᠡᠪᠬᠦᠢ ᠨᠠᠷ ᠤ᠋ᠨ ᠴᠢᠷᠠᠢ ᠳ᠋ᠤ᠌ ᠠᠮᠤᠷᠯᠢᠩᠭᠤᠢ᠂ ᠲᠣᠭᠣᠮᠰᠣᠷ ᠦᠭᠡᠢ ᠶ᠋ᠢᠨ ᠰᠢᠨᠵᠢ ᠪᠦᠷᠢᠨ ᠲᠡᠭᠦᠯᠳᠡᠷ ᠬᠤᠷᠠᠯᠳᠤᠵᠠᠢ᠃
ᠰᠠᠨᠵᠢ ᡀᠠᠷᠠᠮᠪᠠ ᠶ᠋ᠢ ᠬᠥᠮᠦᠨ ᠪᠦᠷᠢ ᠠᠵᠢᠨ ᠬᠠᠷᠠᠵᠤ ᠪᠠᠢᠭᠠ ᠶ᠋ᠢ ᠰᠠᠨᠠᠮᠠᠭᠴᠠ ᠲᠡᠷᠡ ᠬᠠᠮᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠰᠠᠭᠤᠳᠠᠯ ᠳ᠋ᠤ᠌ ᠠᠶᠠᠷᠬᠠᠨ ᠰᠢᠭᠢᠳᠦᠨ ᠳᠣᠭᠣᠭᠰᠢᠯᠠᠪᠠ ᠃ ᠲᠡᠭᠦᠨ ᠳ᠋ᠦ᠍ ᠬᠣᠶᠠᠷ ᠰᠣᠢᠪᠣᠡᠭ ᠲᠤᠰᠯᠠᠬᠤ ᠮᠡᠲᠦ ᠳᠦᠷᠢ ᠦᠵᠡᠭᠦᠯᠦᠯᠡ᠃ ᠬᠠᠮᠪᠤ ᠵᠢ ᠰᠠᠭᠤᠮᠠᠭᠴᠠ ᠯᠠᠮᠠ ᠨᠠᠷ ᠳᠣᠣᠷᠠ ᠪᠦᠷᠢ ᠶ᠋ᠢᠨ ᠵᠠᠪᠳᠤᠩ ᠳ᠋ᠤ᠌ ᠪᠣᠷᠪᠢ ᠪᠠᠨ ᠪᠣᠬᠢᠷᠤᠨ ᠵᠠᠪᠢᠯᠠᠵᠠᠭᠠᠯᠠ᠃ ᠰᠦᠰᠦᠭᠲᠡᠨ ᠦ᠋ᠳ ᠱᠠᠯᠠᠨ ᠳᠡᠭᠡᠷᠡ ᠬᠣᠶᠠᠷ ᠡᠪᠦᠳᠦᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠲᠦᠭ ᠬᠢᠨ ᠰᠥᠭᠥᠳᠴᠡᠭᠡᠯᠡ ᠃ ᠰᠦᠮᠡ ᠳ᠋ᠦ᠍ ᠲᠠᠭ ᠴᠢᠮᠡᠭᠡ ᠦᠭᠡᠢ ᠪᠣᠯᠤᠯᠠ᠃ ᠬᠡᠪ ᠭᠡᠨᠡᠳᠲᠡ ᠲᠥᠭᠡᠷᠢᠭᠰᠡᠨ ᠵᠥᠭᠡᠢ ᠣᠷᠣᠵᠤ ᠢᠷᠡᠭᠡᠳ ᠰᠦᠮᠡ ᠳ᠋ᠦ᠍ ᠳᠦᠩᠭᠢᠨᠡᠨ ᠨᠢᠰᠴᠦ ᠡᠬᠢᠯᠡᠪᠡ᠃ ᠯᠠᠮᠠ ᠨᠠᠷ ᠰᠡᠵᠢᠭᠯᠡᠪᠡ᠃ ᠭᠠᠭᠴᠠᠬᠦ ᠡᠴᠢᠭᠡ ᠰᠠᠢᠨᠴᠣᠭᠲᠣ ᠲᠡᠷᠡ ᠬᠦ᠌ ᠵᠥᠭᠡᠢ ᠳ᠋ᠦ᠍ ᠶᠡᠬᠡ ᠯᠡ ᠲᠠᠯᠠ ᠥᠭᠴᠦ ᠪᠠᠶᠠᠷᠯᠠᠬᠤ ᠮᠡᠲᠦ ᠪᠣᠯᠬᠤ ᠶ᠋ᠢ ᠰᠠᠨᠵᠢ ᠠᠵᠢᠭᠯᠠᠨ ᠬᠠᠷᠠᠯᠠ᠃ ᠵᠥᠭᠡᠢ ᠭᠡᠷ ᠲᠦ᠍ ᠣᠷᠣᠪᠠᠯ ᠵᠤᠨᠰᠢᠯᠭᠠ ᠰᠠᠢᠨ ᠭᠡᠳᠡᠭ᠃
᠁ ᠡᠷᠲᠡ ᠤᠷᠢᠳᠤ ᠴᠠᠭ ᠲᠤ᠌ ᠬᠠᠨ ᠭᠠᠷᠤᠳᠢ ᠰᠢᠪᠠᠭᠤ ᠳᠡᠯᠡᠬᠡᠢ ᠳᠡᠭᠡᠷᠡ ᠶᠠᠮᠠᠷ ᠠᠮᠢᠲᠠᠨ ᠤ᠋ ᠮᠢᠬᠠ ᠬᠠᠮᠤᠭ ᠤ᠋ᠨ ᠠᠮᠲᠠ ᠲᠠᠢ ᠪᠣᠯᠬᠤ ᠶ᠋ᠢ ᠮᠡᠳᠡᠭᠦᠯᠬᠦ ᠪᠡᠷ ᠬᠠᠷᠢᠶᠠᠴᠠᠢ᠂ ᠵᠥᠭᠡᠢ ᠬᠣᠶᠠᠷ ᠢ᠋ ᠶᠠᠪᠤᠭᠤᠯᠵᠠᠢ᠃ ᠵᠥᠭᠡᠢ ᠠᠮᠢᠲᠠᠨ ᠪᠣᠯᠭᠠᠨ ᠢ᠋ ᠬᠠᠳᠬᠤᠵᠤ ᠠᠮᠲᠠᠯᠠᠭᠰᠠᠭᠠᠷ ᠶᠠᠪᠤᠭᠠᠳ ᠬᠥᠮᠦᠨ ᠦ᠌ ᠮᠢᠬᠠ ᠬᠠᠮᠤᠭ ᠤ᠋ᠨ ᠠᠮᠲᠠᠲᠠᠢ ᠶ᠋ᠢ ᠮᠡᠳᠡᠵᠡᠢ᠃ ᠬᠠᠷᠢᠶᠠᠴᠠᠢ ᠵᠥᠭᠡᠢ ᠲᠡᠢ ᠳᠠᠭᠠᠷᠢᠯᠳᠤᠭᠠᠳ᠂
- ᠬᠡᠨ ᠦ᠌ ᠮᠢᠬᠠ ᠠᠮᠲᠠᠲᠠᠢ ᠭᠡᠵᠦ ᠬᠡᠯᠡᠬᠦ ᠪᠡᠷ ᠶᠠᠪᠤᠨᠠ? ᠭᠡᠵᠦ ᠵᠥᠭᠡᠢ ᠡᠴᠡ ᠬᠠᠷᠢᠶᠠᠴᠠᠢ ᠠᠰᠠᠭᠤᠬᠤ ᠳ᠋ᠤ᠌᠂
- ᠬᠥᠮᠦᠨ ᠦ᠌ ᠬᠢ! ᠭᠡᠵᠦ ᠬᠠᠷᠢᠭᠤᠯᠵᠠᠢ ᠃ ᠬᠠᠷᠢᠶᠠᠴᠠᠢ ᠬᠥᠮᠦᠨ ᠢ᠋ ᠠᠪᠤᠷᠠᠬᠤ ᠶ᠋ᠢᠨ ᠲᠤᠯᠠᠳᠠ ᠵᠠᠯᠢ ᠬᠡᠷᠡᠭᠯᠡᠨ᠂
- ᠬᠤᠳᠠᠯ ᠪᠠᠢᠯᠭᠦᠢ᠃ ᠦᠨᠡᠨ ᠰᠠᠨ ᠪᠣᠯ ᠴᠢ ᠬᠡᠯᠡ ᠪᠡᠨ ᠬᠠᠷᠠᠭᠤᠯ ᠭᠡᠬᠦ ᠳ᠋ᠦ᠍ ᠵᠥᠭᠡᠢ ᠬᠡᠯᠡ ᠪᠡᠨ ᠤᠷᠲᠤ ᠰᠤᠩᠭᠠᠨ ᠬᠠᠷᠠᠭᠤᠯᠬᠤ ᠳ᠋ᠤ᠌ ᠨᠢ ᠬᠠᠷᠢᠶᠠᠴᠠᠢ ᠲᠡᠷᠡ ᠬᠡᠯᠡ ᠶ᠋ᠢ ᠰᠤᠭᠤᠯᠤᠨ ᠬᠠᠶᠠᠵᠠᠢ᠃ ᠲᠡᠭᠡᠭᠡᠳ ᠬᠡᠯᠡ ᠦᠭᠡᠢ ᠶ᠋ᠢᠨ ᠡᠷᠬᠡ ᠪᠡᠷ ᠵᠥᠭᠡᠢ ᠬᠡᠢ ᠳᠡᠮᠡᠢ ᠯᠡ ᠪᠦᠪᠲᠦᠨᠡᠨ ᠳᠦᠩᠭᠢᠨᠡᠯᠳᠦᠳᠡᠭ ᠪᠣᠯᠵᠠᠢ᠃ ᠬᠠᠷᠢᠶᠠᠴᠠᠢ᠂ ᠵᠥᠭᠡᠢ ᠬᠣᠶᠠᠷ ᠬᠠᠨ ᠭᠠᠷᠤᠳᠢ ᠳ᠋ᠤ᠌ ᠣᠴᠢᠬᠤ ᠳ᠋ᠤ᠌ ᠵᠥᠭᠡᠢ ᠶᠠᠭᠤ ᠴᠤ᠌ ᠣᠢᠯᠠᠭᠠᠭᠳᠠᠬᠤ ᠦᠭᠡᠢ ᠳᠦᠩᠭᠢᠨᠡᠨ ᠡᠷᠭᠢᠯᠳᠦᠭᠰᠡᠭᠡᠷ ᠪᠠᠢᠵᠤ᠃ ᠬᠠᠨ ᠭᠠᠷᠤᠳᠢ ᠤᠴᠢᠷ ᠢ᠋ ᠤᠬᠠᠭᠠᠷᠠᠬᠤ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠨᠢ ᠬᠠᠷᠢᠶᠠᠴᠠᠢ᠂
- ᠬᠥᠮᠦᠨ ᠦ᠌ ᠮᠢᠬᠠ ᠬᠠᠮᠤᠭ ᠤ᠋ᠨ ᠮᠠᠭᠤᠬᠠᠢ᠂ ᠮᠣᠭᠠᠢ ᠶ᠋ᠢᠨ ᠮᠢᠬᠠ ᠬᠠᠮᠤᠭ ᠤ᠋ᠨ ᠠᠮᠲᠠᠲᠠᠢ ᠪᠠᠢᠨᠠ ᠭᠡᠨᠡ! ᠭᠡᠵᠦ ᠵᠠᠭᠤᠴᠢᠯᠠᠨ ᠬᠡᠯᠡᠵᠡᠢ᠃ ᠬᠠᠨ ᠭᠠᠷᠤᠳᠢ ᠲᠡᠭᠦᠨ ᠡᠴᠡ ᠬᠣᠢᠰᠢ ᠮᠣᠭᠠᠢ ᠶ᠋ᠢᠨ ᠮᠢᠬᠠ ᠢᠳᠡᠳᠡᠭ ᠪᠣᠯᠵᠠᠢ᠃ ᠬᠠᠷᠢᠶᠠᠴᠠᠢ ᠪᠣᠯᠬᠣᠷ ᠬᠥᠮᠦᠨ ᠢ᠋ ᠬᠠᠨ ᠭᠠᠷᠤᠳᠢ ᠠ᠋ᠴᠠ ᠠᠪᠤᠷᠠᠭᠰᠠᠨ ᠤ᠋ ᠪᠠᠨ ᠠᠴᠢ ᠶ᠋ᠢ ᠰᠠᠨᠠᠵᠤ ᠬᠥᠮᠦᠨ ᠦ᠌ ᠤᠷᠳᠤᠭᠤᠷ ᠡᠮᠦᠨᠡᠭᠦᠷ ᠭᠡᠷᠦᠨ ᠨᠢᠰᠳᠡᠭ ᠪᠣᠯᠵᠠᠢ᠃
ᠦᠯᠢᠭᠡᠷ ᠲᠦ᠍ ᠢᠩᠭᠢᠵᠦ ᠭᠠᠷᠳᠠᠭ ᠶᠤᠮ᠃ ᠬᠠᠨ ᠭᠠᠷᠤᠳᠢ ᠰᠢᠪᠠᠭᠤ ᠶ᠋ᠢ ᠡᠷᠢᠶᠡᠨ ᠮᠣᠭᠠᠢ ᠵᠠᠭᠤᠭᠰᠠᠨ ᠢ᠋ᠶ᠋ᠠᠷ ᠵᠢᠷᠤᠳᠠᠭ ᠶᠣᠰᠣᠨ ᠲᠡᠢᠨ ᠬᠦ᠌ ᠭᠠᠷᠴᠠᠢ᠃ ᠲᠡᠭᠦᠨ ᠢ᠋ ᠰᠠᠨᠠᠵᠤ ᠯᠠᠮᠠ ᠨᠠᠷ ᠳᠤᠭᠠᠩ ᠳ᠋ᠤ᠌ ᠣᠷᠣᠭᠰᠠᠨ ᠵᠥᠭᠡᠢ ᠶ᠋ᠢᠨ ᠳᠦᠩᠭᠢᠨᠡᠨ ᠨᠢᠰᠬᠦ ᠡᠴᠡ ᠴᠡᠭᠡᠷᠯᠡᠵᠦ ᠪᠠᠢᠭᠰᠠᠨ ᠬᠡᠷᠡᠭ ᠠᠵᠢ᠃《ᠬᠠᠮᠪᠤ ᠶ᠋ᠢ ᠰᠢᠨᠡ ᠪᠡᠷ ᠵᠠᠯᠠᠬᠤ ᠳ᠋ᠤ᠌ ᠰᠦᠮᠡ ᠳ᠋ᠦ᠍ ᠵᠥᠭᠡᠢ ᠣᠷᠣᠵᠤ ᠢᠷᠡᠳᠡᠭ ᠨᠢ ᠶᠠᠭᠤ ᠪᠢᠯᠡ》 ᠭᠡᠵᠦ ᠳᠡᠮᠴᠢᠭ ᠭᠠᠪᠵᠤ᠂ ᠳᠡᠴᠢᠨ ᠤᠮᠵᠠᠳ᠂ ᠳᠡᠮᠪᠡᠷᠢᠯ ᠭᠡᠰᠬᠦᠢ ᠭᠤᠷᠪᠠ ᠨᠢᠭᠡᠨ ᠵᠡᠷᠭᠡ ᠰᠡᠵᠢᠭᠯᠡᠨ ᠪᠣᠳᠣᠵᠠᠢ᠃
《ᠬᠦᠦ ᠶ᠋ᠢ ᠮᠠᠨᠢ ᠬᠠᠮᠪᠤ ᠶ᠋ᠢᠨ ᠰᠢᠷᠡᠭᠡᠨ ᠳ᠋ᠦ᠍ ᠡᠷᠭᠦᠮᠵᠢᠯᠡᠭᠳᠡᠬᠦ ᠳ᠋ᠦ᠍ ᠵᠥᠭᠡᠢ ᠣᠷᠣᠵᠤ ᠢᠷᠡᠳᠡᠭ ᠨᠢ ᠪᠤᠶᠠᠨ ᠵᠥᠩᠨᠡᠭᠰᠡᠨ ᠰᠠᠢᠨ ᠵᠦᠩ ᠪᠣᠯᠤᠯᠠ 》ᠭᠡᠵᠦ ᠰᠠᠨᠵᠢ ᠶ᠋ᠢᠨ ᠡᠴᠢᠭᠡ ᠰᠠᠢᠨᠴᠣᠭᠲᠣ ᠪᠠᠶᠠᠷᠯᠠᠪᠠ᠃ ᠦᠨᠡᠬᠡᠷ ᠮᠠᠯᠴᠢᠨ ᠬᠥᠮᠦᠨ ᠵᠥᠭᠡᠢ ᠶ᠋ᠢ ᠥᠭᠭᠢᠶᠡᠮᠦᠷ ᠵᠤᠨ ᠪᠣᠯᠬᠤ᠂ ᠪᠠᠯ ᠤ᠋ᠨ ᠬᠤᠷᠠ ᠪᠠᠭᠤᠬᠤ ᠶ᠋ᠢᠨ ᠳᠣᠬᠢᠶᠠ ᠭᠡᠵᠦ ᠪᠠᠶᠠᠷᠯᠠᠨ ᠪᠡᠯᠭᠡᠰᠢᠶᠡᠳᠡᠭ ᠪᠠᠢᠯᠠ᠃ ᠲᠡᠷᠡ ᠯᠠ ᠵᠠᠩᠰᠢᠯ ᠠ᠋ᠴᠠ ᠰᠠᠢᠨᠴᠣᠭᠲᠣ ᠭᠠᠵᠢᠭᠰᠠᠨ ᠦᠭᠡᠢ᠃ ᠲᠡᠷᠡ ᠯᠠ ᠶᠣᠰᠣᠭᠠᠷ ᠢ᠋ᠶ᠋ᠠᠨ ᠪᠣᠳᠣᠵᠤ ᠪᠠᠢᠯᠠ᠃
ᠰᠠᠨᠵᠢᠳᠠᠯᠪᠢᠴᠣᠢᠵᠠᠮᠰᠤ ᡀᠠᠷᠠᠮᠪᠠ ᠶ᠋ᠢᠨ ᠭᠠᠷ ᠲᠤ᠌ ᠬᠦᠰᠦᠮᠳᠦᠭ ᠰᠤᠳᠤᠷ ᠪᠠᠷᠢᠭᠤᠯᠪᠠ᠃ ᠲᠡᠭᠦᠪᠡᠷ ᠢ᠋ᠶ᠋ᠡᠨ ᠯᠠᠮᠠ ᠨᠠᠷ ᠪᠣᠯᠤᠭᠠᠳ ᠰᠦᠰᠦᠭᠲᠡᠨ ᠳ᠋ᠦ᠍ ᠠᠳᠢᠰ ᠥᠭᠬᠦ ᠤᠴᠢᠷᠲᠠᠢ᠃ ᠡᠬᠢᠯᠡᠭᠡᠳ ᠯᠠᠮᠠ ᠨᠠᠷ ᠠᠳᠢᠰ ᠠᠪᠤᠯᠠ᠃ ᠳᠠᠷᠠᠭᠠ ᠨᠢ ᠰᠦᠰᠦᠭᠲᠡᠨ ᠦ᠋ᠳ ᠦ᠋ᠨ ᠤᠷᠲᠤ ᠴᠤᠪᠤᠭᠠ ᠥᠩᠭᠡᠷᠡᠯᠡ᠃ ᠲᠡᠭᠡᠲᠡᠯᠡ ᠡᠴᠢᠭᠡ ᠰᠠᠢᠨᠴᠣᠭᠲᠣ ᠪᠤᠭᠤᠷᠤᠯ ᠲᠣᠯᠣᠭᠠᠢ ᠶ᠋ᠢ ᠪᠡᠨ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠡᠮᠦᠨᠡ ᠪᠥᠬᠥᠢᠨ ᠠᠳᠢᠰ ᠭᠣᠷᠢᠯᠠᠨ ᠢᠷᠡᠯᠡ᠃《ᠡᠴᠢᠭᠡ ᠳ᠋ᠦ᠍ ᠪᠡᠨ ᠠᠳᠢᠰ ᠥᠭᠬᠦ ᠭᠡᠵᠦ ᠤᠤ ᠳᠠ?》 ᠭᠡᠰᠡᠨ ᠪᠣᠳᠣᠯ ᠰᠠᠨᠵᠢ ᠶ᠋ᠢᠨ ᠣᠶᠤᠨ ᠳ᠋ᠤ᠌ ᠴᠠᠬᠢᠯᠭᠠᠨ ᠠᠳᠠᠯᠢ ᠬᠠᠷᠪᠤᠨ ᠣᠷᠣᠵᠤ ᠢᠷᠡᠯᠡ᠃《ᠪᠢ ᠬᠡᠳᠦᠢᠪᠡᠷ ᠬᠠᠮᠪᠤ ᠯᠠᠮᠠ ᠴᠤ᠌ ᠭᠡᠰᠡᠨ ᠲᠥᠷᠥᠭᠰᠡᠨ ᠡᠴᠢᠭᠡ ᠪᠡᠨ ᠶᠠᠭᠠᠬᠢᠵᠤ ᠠᠳᠢᠰᠯᠠᠬᠤ ᠶᠤᠮ ᠪᠢᠯᠡ!》ᠭᠡᠵᠦ ᠲᠡᠷᠡ ᠡᠷᠡᠭᠡᠯᠵᠡᠨ ᠪᠣᠳᠣᠯᠠ᠃ ᠡᠢᠮᠦ ᠲᠣᠬᠢᠶᠠᠯᠳᠤᠯ ᠪᠣᠯᠤᠨᠠ ᠭᠡᠵᠦ ᠤᠷᠢᠳᠤ ᠡᠮᠦᠨᠡ ᠣᠭᠲᠣᠬᠠᠨ ᠴᠤ᠌ ᠲᠡᠷᠡ ᠪᠣᠳᠣᠵᠤ ᠶᠠᠪᠤᠭᠰᠠᠨ ᠦᠭᠡᠢ᠃ ᠡᠴᠢᠭᠡ ᠨᠢ ᠪᠥᠨᠲᠥᠭᠡᠷ ᠪᠤᠭᠤᠷᠤᠯ ᠲᠣᠯᠣᠭᠠᠢ ᠶ᠋ᠢ ᠪᠡᠨ ᠪᠥᠬᠥᠢᠯᠭᠡᠨ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠠᠳᠢᠰ ᠬᠠᠢᠷᠠᠯᠠᠬᠤ ᠶ᠋ᠢ ᠬᠦᠯᠢᠶᠡᠭᠰᠡᠭᠡᠷ ᠪᠠᠢᠯᠠ᠃ ᠠᠷᠭᠠ ᠪᠠᠨ ᠪᠠᠷᠠᠭᠰᠠᠨ ᠰᠠᠨᠵᠢ ᠰᠡᠮᠬᠡᠨ᠂
- ᠠᠪᠤ ᠮᠢᠨᠢ ᠥᠩᠭᠡᠷᠡᠵᠦ ᠬᠠᠢᠷᠠᠯᠠ! ᠪᠢ ᠶᠠᠭᠠᠬᠢᠵᠤ ᠡᠴᠢᠭᠡ ᠲᠠᠨ ᠳ᠋ᠤ᠌ ᠪᠠᠨ ᠠᠳᠢᠰ ᠥᠭᠬᠦ ᠪᠢᠯᠡ ᠭᠡᠵᠦ ᠰᠠᠨᠵᠢ ᠰᠢᠪᠡᠨᠡᠨ ᠬᠡᠯᠡᠪᠡ᠃ ᠲᠡᠭᠦᠨ ᠢ᠋ ᠰᠣᠨᠣᠰᠤᠮᠠᠭᠴᠠ ᠡᠴᠢᠭᠡ ᠨᠢ ᠭᠠᠢᠬᠠᠭᠰᠠᠨ ᠨᠢᠳᠦ ᠪᠡᠷ ᠬᠦᠦ ᠶᠢᠨ ᠢ᠋ᠶ᠋ᠡᠨ ᠥᠭᠡᠳᠡ ᠡᠴᠡ ᠦᠯᠡᠢᠨ ᠬᠠᠷᠠᠯᠠ᠃《ᠠᠪᠤ ᠲᠠ ᠶᠠᠭᠠᠬᠢᠬᠤ ᠨᠢ ᠪᠣᠢ? ᠥᠩᠭᠡᠷᠡᠭᠡᠴᠢ᠃ ᠪᠢ ᠲᠠᠨ ᠳ᠋ᠤ᠌ ᠠᠳᠢᠰ ᠥᠭᠴᠦ ᠶᠠᠭᠠᠬᠢᠵᠤ ᠪᠣᠯᠬᠤ ᠪᠣᠢ?》 ᠭᠡᠵᠦ ᠰᠠᠨᠵᠢ ᠳᠠᠬᠢᠨ ᠰᠢᠪᠡᠭᠡᠨᠡᠯᠡ᠃
- ᠶᠠᠭᠤ ᠭᠡᠨᠡ ? ᠨᠠᠳᠠ ᠳ᠋ᠤ᠌ ᠶᠠᠭᠠᠬᠢᠭᠠᠳ ᠠᠳᠢᠰ ᠥᠭᠬᠦ ᠦᠭᠡᠢ ᠭᠡᠵᠦ? ᠴᠢ ᠣᠳᠣ ᠮᠢᠨᠦ ᠬᠦᠦ ᠪᠢᠰᠢ ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠦ᠋ᠨ ᠬᠠᠮᠪᠤ ᠯᠠᠮᠠ ᠰᠢᠦ ᠳᠡ! ᠪᠢ ᠬᠦᠦ ᠡᠴᠡ ᠪᠡᠨ ᠪᠢᠰᠢ ᠬᠠᠮᠪᠤ ᠯᠠᠮᠠ ᠠ᠋ᠴᠠ ᠠᠳᠢᠰ ᠭᠤᠶᠤᠵᠤ ᠪᠠᠢᠨᠠ! ᠭᠡᠵᠦ ᠡᠴᠢᠭᠡ ᠨᠢ ᠪᠠᠷᠤᠭ ᠯᠠ ᠶᠡᠬᠡᠩᠬᠢ ᠬᠥᠮᠦᠰ ᠳᠤᠭᠤᠯᠳᠠᠬᠤ ᠪᠠᠷ ᠬᠡᠯᠡᠵᠦ ᠱᠠᠭᠠᠷᠳᠠᠬᠤ ᠳ᠋ᠤ᠌ ᠲᠡᠭᠦᠨ ᠦ᠌ ᠳᠠᠭᠤᠨ ᠳ᠋ᠤ᠌ ᠡᠷᠡᠰ ᠰᠢᠢᠳᠮᠡᠭᠡᠢ ᠥᠩᠭᠡ ᠢᠯᠡᠷᠬᠡᠢ ᠪᠠᠢᠯᠠ᠃ᠣᠯᠠᠨ ᠮᠥᠷᠭᠥᠯᠴᠢᠳ ᠭᠠᠢᠬᠠᠨ ᠬᠦᠯᠢᠶᠡᠵᠡᠭᠡᠵᠦ ᠪᠠᠢᠯᠠ᠃ ᠡᠴᠢᠭᠡ ᠨᠢ ᠬᠦᠦ ᠡᠴᠡ ᠪᠡᠨ ᠠᠳᠢᠰ ᠭᠣᠷᠢᠳᠠᠨ ᠲᠣᠯᠣᠭᠠᠢ ᠨᠢ ᠪᠥᠩᠵᠢᠭᠡᠨᠡᠨ ᠦᠯᠦ ᠮᠡᠳᠡᠭ ᠰᠠᠯᠭᠠᠨᠠᠨ ᠴᠡᠴᠡᠷᠡᠬᠦ ᠶ᠋ᠢ ᠰᠠᠨᠵᠢ ᠠᠵᠢᠭᠯᠠᠭᠠᠳ᠂ ᠲᠡᠰᠴᠦ ᠴᠢᠳᠠᠭᠰᠠᠨ ᠦᠭᠡᠢ᠂ ᠦᠷᠦ ᠡᠪᠡᠳᠬᠦ ᠰᠡᠳᠬᠢᠯ ᠨᠢ ᠲᠠᠢᠯᠵᠤ᠂ ᠨᠢᠳᠦ ᠪᠡᠨ ᠠᠨᠢᠨ ᠭᠦᠰᠦᠮᠲᠦᠭ ᠰᠤᠳᠤᠷ ᠢ᠋ᠶ᠋ᠠᠷ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠲᠡᠷᠢᠭᠦᠨ ᠳᠡᠭᠡᠷᠡ ᠭᠤᠷᠪᠠᠨᠲᠠ ᠠᠳᠢᠰᠯᠠᠪᠠ᠃ ᠡᠴᠢᠭᠡ ᠨᠢ ᠰᠡᠳᠬᠢᠯ ᠬᠠᠨᠵᠤ᠂ ᠬᠢᠵᠠᠭᠠᠷ ᠦᠭᠡᠢ ᠪᠠᠶᠠᠷᠯᠠᠨ ᠬᠥᠭᠡᠷᠴᠦ᠂ ᠢᠨᠢᠶᠡᠮᠰᠦᠭᠯᠡᠯ᠂ ᠨᠢᠯᠪᠤᠰᠤ ᠬᠣᠶᠠᠷ ᠬᠣᠣᠰᠯᠠᠨ ᠳᠦᠭᠦᠷᠦᠭᠰᠡᠨ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠬᠦᠦ ᠪᠡᠨ ᠲᠠᠯᠠᠷᠬᠠᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠪᠥᠭᠲᠥᠷ ᠨᠢᠷᠤᠭᠤ ᠨᠢ ᠡᠭᠴᠡᠯᠡᠨ ᠤᠯᠠᠮ ᠴᠤ᠌ ᠭᠤᠸᠠᠯᠢᠭ ᠪᠣᠯᠬᠤ ᠰᠢᠭ᠋ ᠬᠠᠷᠠᠭᠳᠠᠯᠠ᠃ ᠲᠡᠭᠡᠭᠡᠳ ᠤᠷᠢ ᠵᠠᠯᠠᠭᠤ ᠬᠥᠮᠦᠨ ᠰᠢᠭ ᠱᠠᠯᠠᠮᠠᠭ ᠵᠣᠯᠪᠣᠭᠠ ᠲᠠᠢ ᠪᠣᠯᠵᠤ᠂ ᠪᠤᠭᠤᠷᠤᠯ ᠲᠣᠯᠣᠭᠠᠢ ᠶ᠋ᠢ ᠪᠡᠨ ᠥᠨᠳᠥᠷ ᠲᠦ᠍ ᠡᠷᠭᠦᠨ᠂ ᠰᠢᠲᠦᠭᠡᠨ ᠦ᠌ ᠪᠣᠯᠤᠨ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠡᠮᠦᠨᠡᠭᠦᠷ ᠵᠢᠪᠬᠤᠭᠠᠯᠢᠭ ᠠᠯᠬᠤᠨ ᠥᠩᠭᠡᠷᠡᠯᠡ᠃
《ᠪᠢ ᠪᠢᠰᠢ ᠡᠨᠡ ᠯᠡ ᠬᠡᠢᠳ ᠦ᠋ᠨ ᠬᠠᠮᠪᠤ ᠯᠠᠮᠠ ᠯᠠ ᠡᠴᠢᠭᠡ ᠲᠠᠨ ᠳ᠋ᠤ᠌ ᠠᠳᠢᠰ ᠥᠭᠭᠦᠯᠡ᠃ ᠲᠠ ᠴᠦ᠍ ᠡᠭᠦᠨ ᠢ᠋ ᠬᠦᠰᠡᠭᠰᠡᠨ᠃ ᠲᠡᠷᠡ ᠯᠠ ᠶᠣᠰᠣᠭᠠᠷ ᠲᠠᠨ ᠢ᠋ ᠪᠣᠯᠭᠣᠭᠠᠯᠠ᠂ ᠠᠯᠳᠠᠰ ᠢ᠋ ᠨᠢᠭᠦᠯᠡᠰᠲᠦᠭᠡᠢ !》 ᠭᠡᠵᠦ ᠰᠠᠨᠵᠢ ᠳᠣᠲᠣᠷᠠ ᠪᠠᠨ ᠪᠣᠳᠣᠯᠠ᠃
ᠬᠣᠵᠢᠮ ᠡᠨᠡ ᠲᠤᠬᠠᠢ ᠡᠴᠢᠭᠡ ᠡᠴᠡ ᠪᠡᠨ ᠡᠢᠮᠦ ᠦᠭᠡ ᠰᠣᠨᠣᠰᠴᠤ ᠪᠢᠯᠡ᠃ 《ᠡᠴᠢᠭᠡ ᠳ᠋ᠦ᠍ ᠪᠡᠨ ᠬᠦᠦ ᠨᠢ ᠠᠳᠢᠰ ᠥᠭᠬᠦ ᠨᠢᠭᠦᠯ ᠠᠯᠳᠠᠰ ᠪᠣᠯᠤᠨᠠ ᠭᠡᠵᠦ ᠶᠡᠬᠡ ᠵᠣᠪᠠᠭᠰᠠᠨ ᠶᠤᠮ》 ᠭᠡᠵᠦ ᠰᠠᠨᠵᠢ ᠶ᠋ᠢᠨ ᠬᠡᠯᠡᠭᠰᠡᠨ ᠳ᠋ᠦ᠍ ᠠᠪᠤ ᠨᠢ《ᠠᠳᠢᠰ ᠥᠭᠭᠦᠭᠡ ᠦᠭᠡᠢ ᠪᠣᠯ ᠪᠢ ᠠᠢᠬᠤᠪᠲᠤᠷ ᠶᠡᠬᠡ ᠭᠣᠮᠣᠳᠠᠬᠤ ᠪᠠᠢᠭᠰᠠᠨ᠃ ᠮᠢᠨᠦ ᠮᠢᠬᠠ ᠶᠠᠰᠤᠨ ᠤ᠋ ᠲᠠᠰᠤᠷᠬᠠᠢ ᠬᠦᠦ ᠮᠢᠨᠢ ᠪᠤᠷᠬᠠᠨ ᠤ᠋ ᠬᠤᠲᠤᠭ ᠢ᠋ ᠣᠯᠵᠤ ᠬᠠᠮᠪᠤ ᠶ᠋ᠢᠨ ᠰᠢᠷᠡᠭᠡᠨ ᠳ᠋ᠦ᠍ ᠵᠠᠯᠠᠷᠠᠭᠠᠳ ᠪᠠᠢᠬᠤ ᠳ᠋ᠤ᠌ ᠡᠴᠢᠭᠡ ᠦᠷᠡ ᠶ᠋ᠢᠨ ᠶᠣᠰᠣ ᠬᠠᠮᠢᠶᠠ ᠦᠭᠡᠢ ᠬᠡᠷᠡᠭ᠃ ᡀᠠᠰᠠ ᠵᠣᠣ ᠠ᠋ᠴᠠ ᠢᠷᠡᠭᠰᠡᠨ ᡀᠠᠷᠠᠮᠪᠠ ᠠ᠋ᠴᠠ ᠠᠳᠢᠰ ᠠᠪᠤᠭᠰᠠᠨ ᠮᠢᠨᠢ ᠬᠤᠪᠢ ᠵᠠᠶᠠᠭᠠ᠃ ᠬᠦᠦ ᠡᠴᠡ ᠪᠡᠨ ᠠᠳᠢᠰ ᠠᠪᠤᠭᠰᠠᠨ ᠡᠴᠢᠭᠡ ᠪᠠᠢᠭᠠ ᠦᠭᠡᠢ ᠪᠣᠯ ᠶᠠᠳᠠᠭᠤ ᠲᠡᠨᠡᠭ ᠰᠠᠢᠨᠴᠣᠭᠲᠣ ᠬᠦᠦ ᠡᠴᠡ ᠪᠡᠨ ᠠᠳᠢᠰ ᠠᠪᠤᠭᠰᠠᠨ ᠠᠩᠬᠠᠨ ᠤ᠋ ᠡᠴᠢᠭᠡ ᠪᠣᠯᠤᠭ ᠭᠡᠵᠦ ᠪᠣᠳᠣᠭᠠᠳ ᠠᠪᠤ ᠨᠢ ᠲᠤᠩ ᠶᠡᠬᠡ ᠪᠠᠶᠠᠷᠯᠠᠵᠤ ᠪᠢᠯᠡ》 ᠭᠡᠮᠡᠨ ᠶᠠᠷᠢᠵᠠᠢ᠃ ᠡᠴᠢᠭᠡ ᠥᠪᠡᠷ ᠦ᠋ᠨ ᠬᠢ ᠪᠡᠷ ᠢ᠋ᠶ᠋ᠡᠨ ᠪᠣᠳᠣᠵᠤ᠂ ᠲᠡᠭᠦᠨ ᠢ᠋ ᠪᠠᠨ ᠯᠠ ᠵᠥᠪ ᠭᠡᠵᠦ ᠲᠣᠭᠠᠴᠠᠳᠠᠭ ᠠᠵᠢ᠃ ᠬᠦᠦ ᠪᠠᠰᠠ ᠯᠠ ᠥᠪᠡᠷ ᠦ᠋ᠨ ᠬᠢ ᠪᠡᠷ ᠢ᠋ᠶ᠋ᠡᠨ ᠪᠣᠳᠣᠨᠠ᠃ ᠣᠴᠢᠵᠤ ᠣᠴᠢᠵᠤ ᠲᠥᠷᠥᠭᠰᠡᠨ ᠡᠴᠢᠭᠡ ᠳ᠋ᠦ᠍ ᠪᠡᠨ ᠠᠳᠢᠰ ᠲᠠᠯᠪᠢᠭᠰᠠᠨ ᠨᠢ ᠲᠡᠭᠦᠨ ᠳ᠋ᠦ᠍ ᠢᠴᠢᠡᠭ᠌ᠭᠦᠷᠢᠲᠠᠢ᠂ ᠪᠠᠰᠠ ᠠᠯᠳᠠᠰ ᠪᠣᠯᠤᠮᠠᠷ ᠡᠪ ᠦᠭᠡᠢ ᠵᠦᠢᠯ ᠮᠡᠲᠦ ᠰᠠᠨᠠᠭᠳᠠᠵᠠᠢ᠃《ᠡᠴᠢᠭᠡ ᠶ᠋ᠢ ᠪᠡᠨ ᠠᠳᠢᠰᠯᠠᠭᠠᠳ ᠪᠠᠢᠬᠤ ᠲᠡᠢᠮᠦ ᠥᠨᠳᠥᠷ ᠳᠡᠭᠡᠳᠦᠰ ᠭᠡᠵᠦ ᠬᠠᠮᠢᠭᠠ ᠲᠥᠷᠥᠭᠰᠡᠨ ᠪᠢᠯᠡ᠃ ᠰᠠᠨᠵᠢᠳᠠᠯᠪᠢᠴᠣᠢᠵᠠᠮᠰᠤ ᠭᠡᠭᠴᠢ ᠨᠢᠭᠡᠨ ᠰᠢᠨᠡᠬᠡᠨ ᠡᠷᠭᠦᠮᠵᠢᠯᠡᠭᠳᠡᠭᠰᠡᠨ ᠬᠠᠮᠪᠤ ᠯᠠᠮᠠ ᠳ᠋ᠤ᠌ ᠢᠳᠢ ᠰᠢᠳᠢ ᠲᠡᠢ᠂ ᠶᠡᠷᠦ ᠪᠤᠰᠤ ᠶ᠋ᠢᠨ ᠶᠠᠭᠤᠮᠠ ᠶᠠᠭᠤᠬᠠᠨ ᠪᠠᠢᠬᠤ ᠪᠢᠯᠡ? ᠶᠠᠭᠤ ᠴᠤ᠌ ᠪᠠᠢᠬᠤ ᠦᠭᠡᠢ᠃ ᠪᠠᠢᠭᠠ ᠶᠠᠭᠤᠮᠠ ᠨᠢ ᠭᠡᠪᠡᠯ ᠴᠡᠭᠡᠵᠢ ᠪᠡᠨ ᠪᠡᠲᠡᠭᠢᠷᠡᠲᠡᠯᠡ ᠦᠰᠦᠭᠴᠢᠯᠡᠨ ᠲᠣᠭᠲᠠᠭᠠᠭᠰᠠᠨ ᠪᠠᠬᠠᠨ ᠨᠣᠮ᠂ ᠪᠠᠷᠠᠮᠢᠳ ᠠ᠋ᠴᠠ ᠡᠬᠢᠯᠡᠭᠡᠳ ᠮᠠᠳᠢᠶᠠᠮᠤᠭᠠᠮᠠ᠂ ᠠᠪᠢᠳᠠᠷᠮᠠ᠂ ᠸᠢᠨᠠᠢ᠂ ᠲᠠᠷᠨᠢ ᠶᠢᠨ ᠶᠣᠰᠣ᠂ ᠸᠢᠱᠨᠦ ᠶ᠋ᠢᠨ ᠢᠯᠭᠠᠯ ᠢ᠋ ᠬᠦᠷᠲᠡᠯᠡ ᠮᠡᠳᠡᠨᠡ᠃ ᠬᠠᠢᠪᠢ ᠵᠢᠮᠨᠧᠢ ᠶ᠋ᠢᠨ ᠲᠠᠢᠭ ᠭᠡᠳᠡᠭ ᠣᠷᠴᠢᠯᠠᠩ ᠤ᠋ᠨ ᠶᠠᠪᠤᠳᠠᠯ ᠠ᠋ᠴᠠ ᠡᠬᠢᠯᠡᠭᠡᠳ ᠨᠠᠢ᠍ᠮᠠᠨ ᠮᠢᠩᠭᠠᠨ ᠮᠥᠷ ᠲᠦ᠍ ᠪᠤᠷᠬᠠᠳ ᠤ᠋ᠨ ᠮᠠᠭᠲᠠᠭᠠᠯ ᠵᠠᠳᠠᠮᠪᠠ ᠰᠤᠳᠤᠷ᠂ ᠠᠷᠪᠠᠰᠠᠯ ᠭᠡᠳᠡᠭ ᠭᠤᠷᠪᠠᠨ ᠴᠠᠭ ᠤ᠋ᠨ ᠮᠢᠩᠭᠠᠨ ᠪᠤᠷᠬᠠᠳ ᠤ᠋ᠨ ᠵᠠᠩ ᠦᠢᠯᠡ᠂ ᠬᠠᠷᠠ ᠴᠠᠭᠠᠨ ᠭᠦᠷᠢᠮ ᠦ᠋ᠨ ᠨᠣᠮ᠂ ᠬᠠᠷᠢᠶᠠᠯ ᠵᠦᠬᠡᠯ ᠦ᠋ᠨ ᠰᠤᠨᠳᠤᠢ ᠰᠤᠳᠤᠷ ᠢ᠋ ᠬᠦᠷᠲᠡᠯᠡ ᠰᠠᠨᠵᠢᠳᠠᠯᠪᠢᠴᠣᠢᠵᠠᠮᠰᠤ ᠭᠡᠭᠳᠡᠭᠰᠡᠨ ᠬᠠᠮᠪᠤ ᠮᠢᠨᠦ ᠪᠡᠶᠡ ᠴᠥᠮ ᠢ᠋ ᠴᠡᠭᠡᠵᠢ ᠪᠡᠷ ᠮᠡᠳᠡᠨᠡ᠃ ᠭᠡᠪᠡᠴᠦ ᠲᠡᠷᠡ ᠪᠦᠬᠦᠨ ᠬᠥᠭᠡᠷᠦᠬᠦᠢ ᠡᠬᠡ ᠶ᠋ᠢ ᠮᠢᠨᠢ ᠳᠠᠬᠢᠨ ᠠᠮᠢᠯᠠᠭᠤᠯᠵᠤ᠂ ᠬᠥᠭᠰᠢᠨ ᠡᠴᠢᠭᠡ ᠶ᠋ᠢ ᠮᠢᠨᠢ ᠪᠠᠶᠠᠨ ᠴᠢᠨᠡᠭᠡᠯᠢᠭ ᠪᠣᠯᠭᠠᠵᠤ ᠴᠢᠳᠠᠬᠤ ᠤᠤ ᠳᠠ? ᠶᠠᠭᠠᠬᠢᠭᠠᠳ ᠴᠤ᠌ ᠦᠭᠡᠢ ᠳᠡ》 ᠭᠡᠵᠦ ᠰᠠᠨᠵᠢ ᡀᠠᠷᠠᠮᠪᠠ ᠪᠣᠳᠣᠵᠤ ᠰᠠᠭᠤᠯᠠ᠃ ᠲᠡᠭᠦᠨ ᠦ᠌ ᠪᠣᠳᠣᠯ ᠬᠣᠯᠠ ᠶ᠋ᠢᠨ ᠶᠠᠭᠤᠮᠠᠨ ᠳ᠋ᠤ᠌ ᠪᠡᠯᠴᠢᠵᠦ᠂ ᠬᠠᠷᠠᠴᠠ ᠨᠢ ᠥᠭᠡᠷᠡᠴᠢᠯᠡᠭᠳᠡᠭᠰᠡᠨ ᠢ᠋ ᠲᠡᠷᠢᠭᠦᠨ ᠰᠢᠷᠡᠭᠡᠲᠦ ᠯᠠᠮᠠ ᠠᠵᠢᠵᠤ ᠮᠡᠳᠡᠭᠡᠳ ᠭᠦᠨ ᠤᠬᠠᠭᠠᠨ ᠤ᠋ ᠳᠠᠯᠠᠢ ᠳ᠋ᠤ᠌ ᠵᠢᠪᠵᠡᠢ ᠭᠡᠵᠦ ᠣᠢᠯᠠᠭᠠᠪᠠ᠃
ᠰᠠᠨᠵᠢ ᠪᠣᠢᠵᠢ ᠵᠦᠭᠰᠢ ᠮᠧᠳᠤᠭᠳᠠᠨ᠂
ᠷᠢᠷᠠᠪ ᠯᠢᠨᠰᠢ ᠨᠢᠲᠡ ᠵᠠᠮᠪᠠᠳᠢ
ᠰᠠᠨᠵᠧᠢ ᠰᠢᠩᠳᠤ ᠮᠢᠭᠯᠠ ᠫᠦᠯᠪᠧᠭ᠂
ᠲᠣᠭᠣᠨ ᠨᠠᠮᠳᠠᠭ ᠰᠢᠩᠯᠠᠵᠣᠲ ᠪᠠᠷᠱᠤᠭ! ᠭᠡᠵᠦ ᠰᠦᠮᠡ ᠳᠦᠭᠦᠷᠡᠩ ᠰᠠᠭᠤᠭᠰᠠᠨ ᠯᠠᠮᠠ᠂ ᠬᠤᠸᠠᠷᠠᠭ ᠤ᠋ᠳ ᠳᠦᠩᠭᠢᠨᠡᠯᠳᠦᠨ ᠨᠢᠭᠡᠨ ᠳᠠᠭᠤ ᠪᠠᠷ ᠤᠩᠰᠢᠯᠠ᠃《ᠭᠠᠵᠠᠷ ᠳᠡᠯᠡᠬᠡᠢ ᠪᠣᠯᠤᠨ ᠰᠦᠮᠪᠦᠷ ᠠᠭᠤᠯᠠ ᠲᠡᠷᠢᠭᠦᠲᠡᠨ ᠢ᠋ ᠪᠦᠲᠦᠭᠡᠨ ᠬᠦᠵᠢᠰ ᠢ᠋ᠶ᠋ᠡᠷ ᠰᠦᠷᠴᠢᠵᠦ᠂ ᠣᠭᠲᠠᠷᠭᠤᠢ ᠶ᠋ᠢ ᠨᠠᠷᠠᠨ ᠰᠠᠷᠠᠨ ᠢ᠋ᠶ᠋ᠠᠷ ᠴᠢᠮᠡᠭᠰᠡᠨ ᠪᠤᠷᠬᠠᠨ ᠳ᠋ᠤ᠌ ᠠᠴᠢ ᠮᠠᠨᠳᠠᠯ ᠡᠷᠭᠦᠶᠡ!》ᠭᠡᠵᠦ ᠡᠨᠡᠬᠦ ᠱᠠᠳ ᠰᠢᠯᠦᠭ ᠢ᠋ᠶ᠋ᠡᠷ ᠮᠥᠷᠭᠥᠯ ᠡᠬᠢᠯᠡᠵᠡᠢ᠃ ᠭᠡᠪᠡᠴᠦ ᠡᠢᠮᠦ ᠶᠠᠭᠤᠮᠠ ᠬᠡᠯᠡᠵᠦ ᠪᠠᠢᠨᠠ ᠭᠡᠳᠡᠭ ᠢ᠋ ᠰᠦᠰᠦᠭᠲᠡᠨ ᠨᠦ᠍ᠭᠦᠳ ᠪᠠᠢᠲᠤᠭᠠᠢ ᠯᠠᠮᠠ ᠨᠠᠷ ᠤ᠋ᠨ ᠶᠡᠬᠡᠩᠬᠢ ᠨᠢ ᠤᠬᠠᠭᠠᠷᠠᠵᠤ ᠮᠡᠳᠡᠬᠦ ᠦᠭᠡᠢ᠃ ᠭᠠᠭᠴᠠᠬᠦ ᠲᠣᠮᠣ ᠲᠣᠯᠣᠭᠠᠢ ᠯᠠᠮᠠ ᠨᠠᠷ ᠯᠠ ᠮᠡᠳᠡᠨᠡ᠃ ᠲᠥᠪᠡᠳ ᠢ᠋ᠶ᠋ᠡᠷ ᠶᠦ᠍ᠮ ᠤᠤ ᠰᠠᠨᠰᠺᠢᠲ ᠢ᠋ᠶ᠋ᠠᠷ ᠦᠢᠯᠡᠳᠬᠦ ᠪᠤᠷᠬᠠᠨ ᠤ᠋ ᠨᠣᠮ ᠤ᠋ᠨ ᠤᠩᠰᠢᠯᠭᠠ ᠶ᠋ᠢ ᠮᠣᠩᠭᠣᠯ ᠢ᠋ᠶ᠋ᠠᠷ ᠣᠷᠴᠢᠭᠤᠯᠵᠤ ᠲᠠᠶᠢᠯᠪᠤᠷᠢᠯᠠᠳᠠᠭ ᠯᠠᠮᠠ ᠪᠠᠭᠰᠢ ᠪᠠᠷᠤᠭ ᠦᠭᠡᠢ᠃ ᠦᠯᠦ ᠣᠢᠯᠠᠭᠠᠭᠳᠠᠬᠤ ᠬᠠᠷᠢ ᠣᠷᠣᠨ ᠤ᠋ ᠬᠡᠯᠡ ᠪᠡᠷ ᠤᠩᠰᠢᠭᠰᠠᠨ ᠨᠣᠮ ᠤ᠋ᠨ ᠭᠦᠨ ᠤᠳᠬᠠ ᠪᠠᠶᠢᠲᠤᠭᠠᠢ ᠡᠭᠡᠯ ᠦᠭᠡᠰ ᠦ᠋ᠨ ᠨᠢ ᠰᠠᠨᠠᠭᠠ ᠶ᠋ᠢ ᠴᠦ᠍ ᠭᠠᠳᠠᠷᠯᠠᠬᠤ ᠦᠭᠡᠢ ᠪᠣᠯᠬᠣᠷ ᠭᠠᠭᠴᠠᠬᠦ ᠮᠤᠬᠤᠷ ᠢ᠋ᠶ᠋ᠠᠷ ᠰᠦᠰᠦᠭᠯᠡᠨ ᠪᠢᠰᠢᠷᠡᠨᠡ᠃ ᠡᠢᠨ ᠬᠦ᠌ ᠪᠠᠢᠳᠠᠯ ᠢ᠋ᠶ᠋ᠠᠷ ᠣᠯᠠᠨ ᠦᠶᠡ ᠶ᠋ᠢ ᠡᠯᠡᠭᠡᠨ ᠮᠥᠷᠭᠥᠯ ᠦᠢᠯᠡᠳᠦᠭᠰᠡᠭᠡᠷ ᠥᠨᠥ ᠶ᠋ᠢ ᠬᠦᠷᠴᠡᠢ᠃
ᠮᠠᠭᠲᠠᠭᠠᠯ ᠤ᠋ᠨ ᠬᠤᠷᠠᠯ ᠥᠷᠯᠥᠭᠡᠭᠦᠷ ᠬᠤᠷᠠᠵᠤ ᠡᠢᠨ ᠬᠦ᠌ ᠳᠠᠭᠤᠰᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠲᠦᠢ ᠡᠷᠭᠦᠬᠦ ᠪᠡᠷ ᠤᠮᠵᠠᠳ ᠳ᠋ᠸᠴᠢᠨ᠂ ᠬᠣᠶᠠᠷ ᠳᠠᠬᠢᠯᠴᠢᠨ ᠬᠠᠮᠲᠤ ᠪᠠᠷ ᠲᠣᠯᠢ ᠪᠤᠮᠪᠠ ᠪᠠᠷᠢᠭᠰᠠᠭᠠᠷ ᠰᠦᠮᠡ ᠶ᠋ᠢᠨ ᠭᠣᠣᠯ ᠳᠤᠮᠳᠠ ᠬᠦᠷᠴᠦ ᠢᠷᠡᠪᠡ.ᠣᠯᠠᠨ ᠵᠢᠯ ᠵᠦᠯᠭᠦᠭᠳᠡᠭᠰᠡᠨ ᠬᠦᠷᠡᠯ ᠲᠣᠯᠢ ᠶ᠋ᠢᠨ ᠥᠩᠭᠡ ᠨᠢ ᠰᠢᠯ ᠡᠴᠡ ᠢᠯᠭᠠᠭᠳᠠᠬᠤ ᠦᠭᠡᠢ ᠭᠢᠯᠠᠯᠵᠠᠵᠤ ᠪᠠᠢᠪᠠ᠃ ᠲᠣᠯᠢ ᠶ᠋ᠢ ᠬᠦᠨᠳᠦᠳᠬᠡᠯᠲᠡᠢ ᠪᠡᠷ ᠳᠡᠭᠡᠳᠦᠯᠡᠨ ᠪᠠᠷᠢᠵᠤ᠂ ᠯᠠᠮᠠ ᠨᠠᠷ ᠲᠩᠷᠢ ᠶ᠋ᠢᠨ ᠮᠠᠭᠲᠠᠭᠠᠯ ᠤᠩᠰᠢᠵᠤ᠂ ᠰᠸᠯᠨᠢᠡᠭ ᠂ ᠬᠡᠩᠭᠡᠷᠭᠡ ᠴᠣᠬᠢᠨ ᠲᠩᠷᠢ ᠡᠵᠡᠩᠨᠡᠭᠰᠡᠨ ᠪᠤᠷᠬᠠᠳ ᠲᠤ᠌ ᠮᠠᠭᠲᠠᠭᠠᠯ ᠡᠷᠭᠦᠪᠡ᠃ ᠬᠣᠶᠠᠷ ᠲᠠᠬᠢᠯᠴᠢ ᠪᠤᠮᠪᠠ ᠲᠠᠢ ᠷᠠᠰᠢᠶᠠᠨ ᠠ᠋ᠴᠠ ᠲᠣᠯᠢ ᠤᠷᠤᠭᠤ ᠳᠤᠰᠤᠭᠠᠬᠤ ᠳ᠋ᠤ᠌ ᠤᠮᠵᠠᠳ ᠥᠩᠭᠡ ᠥᠩᠭᠡ ᠶ᠋ᠢᠨ ᠬᠠᠳᠠᠭ ᠬᠣᠯᠪᠣᠭᠰᠠᠨ ᠠᠯᠴᠢᠭᠤᠷ ᠢ᠋ᠶ᠋ᠠᠷ ᠲᠣᠯᠢ ᠶ᠋ᠢ ᠠᠷᠴᠢᠯᠠ᠃ ᠡᠢᠮᠦ ᠦᠢᠯᠡᠳᠦᠯ ᠢ᠋ᠶ᠋ᠡᠷ ᠲᠦᠢ ᠡᠷᠭᠦᠨ ᠳᠠᠭᠤᠰᠪᠠ᠃ ᠬᠤᠷᠮᠤᠰᠲᠠ ᠶ᠋ᠢᠨ ᠡᠷᠬᠡ ᠪᠠᠷᠢᠭᠰᠠᠨ ᠭᠤᠴᠢᠨ ᠭᠤᠷᠪᠠᠨ ᠲᠩᠷᠢ ᠭᠡᠭᠴᠢ ᠳ᠋ᠦ᠍ ᠮᠠᠭᠲᠠᠭᠠᠯ ᠡᠷᠭᠦᠵᠦ ᠪᠠᠢᠭᠠ ᠨᠢ ᠡᠨᠡ ᠶᠦ᠍ᠮ ᠃ ᠲᠣᠯᠢ ᠨᠢ ᠲᠩᠷᠢ ᠶ᠋ᠢ ᠪᠡᠯᠭᠡᠳᠡᠭᠰᠡᠨ ᠤᠳᠬᠠ ᠲᠠᠢ ᠠᠵᠢ᠃ ᠭᠡᠪᠡᠴᠦ ᠭᠡᠭᠡᠨ ᠲᠣᠯᠢ ᠭᠡᠵᠦ ᠪᠠᠰᠠ ᠡᠢᠮᠦᠷᠬᠦ ᠲᠣᠯᠢ ᠶ᠋ᠢ ᠡᠷᠯᠢᠭ ᠨᠣᠮᠣᠨ ᠬᠠᠭᠠᠨ ᠪᠤᠶᠤ ᠲᠠᠮᠤ ᠶ᠋ᠢᠨ ᠣᠷᠣᠨ ᠤ᠋ ᠡᠵᠡᠨ ᠭᠠᠷ ᠲᠤ᠌ ᠪᠠᠨ ᠪᠠᠷᠢᠵᠤ ᠬᠥᠮᠦᠨ ᠲᠣᠯᠣᠭᠠᠢᠲᠠᠨ ᠤ᠋ ᠬᠢᠭᠰᠡᠨ ᠨᠢᠭᠦᠯ ᠪᠤᠶᠠᠨ ᠢ᠋ ᠲᠡᠷᠡᠭᠦᠨ ᠳ᠋ᠦ᠍ ᠪᠡᠨ ᠬᠠᠷᠠᠵᠤ ᠦᠨᠡᠨ ᠬᠤᠳᠠᠯ ᠢ᠋ ᠢᠯᠭᠠᠷᠠᠭᠤᠯᠳᠠᠭ ᠭᠡᠵᠦ ᠱᠠᠰᠢᠨ ᠤ᠋ ᠰᠤᠷᠭᠠᠯ ᠪᠠᠢᠳᠠᠭ ᠪᠢᠯᠡ᠃ ᠲᠩᠷᠢ ᠶ᠋ᠢᠨ ᠲᠣᠯᠢ᠂ ᠲᠠᠮᠤ ᠶ᠋ᠢᠨ ᠲᠣᠯᠢ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣ ᠶᠢᠷᠲᠢᠨᠴᠦ᠂ ᠲᠩᠷᠢ᠂ ᠪᠤᠷᠬᠠᠳ᠂ ᠬᠥᠮᠦᠨ ᠬᠢᠭᠡᠳ ᠬᠡᠯᠡ ᠦᠭᠡᠢ ᠠᠳᠤᠭᠤᠰᠤ᠂ ᠪᠢᠷᠢᠳ᠂ ᠲᠠᠮᠤ ᠶ᠋ᠢᠨ ᠠᠮᠢᠲᠠᠳ ᠣᠷᠣᠰᠢᠨ ᠰᠠᠭᠤᠳᠠᠭ ᠮᠡᠲᠦ ᠪᠡᠷ ᠪᠤᠷᠬᠠᠨ ᠨᠣᠮᠯᠠᠵᠠᠢ᠃