ᠵᠠᠪ ᠭᠤᠸᠠᠢ ᠨᠠᠷ <1> – ᠳ ᠂ ᠰᠡᠩᠭᠡ Зав гуай нар <1> – Д ᠂ Сэнгэ
319ᠵᠠᠪ ᠭᠤᠸᠠᠢ ᠨᠠᠷ
ᠳ ᠂ ᠰᠡᠩᠭᠡ
ᠤᠷᠤᠭᠰᠢᠯᠠᠬᠤ ᠬᠥᠯ ᠳ᠋ᠦ᠍ ᠮᠢᠨᠢ
ᠴᠢᠳᠥᠷ ᠪᠣᠯᠤᠭᠠᠳ
ᠲᠤᠰᠢᠵᠤ ᠪᠠᠢᠨᠠ᠃
ᠤᠨᠳᠤᠷᠬᠤ ᠬᠥᠭᠵᠢᠯ ᠳ᠋ᠦ᠍ ᠮᠢᠨᠢ
ᠰᠠᠭᠠᠳ ᠭᠡᠢᠭᠡᠳ
ᠴᠢᠩᠭᠠᠭᠠᠵᠤ ᠪᠠᠢᠨᠠ᠃
ᠲᠦᠰᠢᠯᠭᠡ ᠣᠯᠪᠣᠭ ᠢ᠋ᠶ᠋ᠠᠨ
ᠰᠢᠷᠡᠭᠡ ᠰᠠᠨᠳᠠᠯᠢ ᠪᠠᠷ
ᠥᠭᠡᠷᠡᠴᠢᠯᠡᠨ ᠰᠣᠯᠢᠵᠤ
ᠲᠦᠰᠢᠮᠡᠯ ᠠᠯᠳᠠᠷ ᠢ᠋ᠶ᠋ᠠᠨ
ᠠᠯᠪᠠᠨ ᠬᠠᠭᠠᠭᠴᠢ ᠪᠠᠷ
ᠬᠤᠪᠢᠷᠠᠭᠠᠨ ᠠᠷᠠᠯᠵᠢᠭᠰᠠᠨ
ᠬᠦᠨᠳᠦ ᠰᠤᠷᠲᠠᠯᠳᠠᠨ ᠢ ᠬᠦᠢᠰᠦ ᠲᠡᠮᠲᠡᠷᠢᠬᠦ
ᠰᠢᠷᠦᠭᠦᠨ ᠲᠡᠢᠨ ᠳ᠋ᠦ᠍
ᠬᠦᠴᠦᠲᠦ ᠵᠡᠪᠰᠡᠭ ᠢ᠋ᠶ᠋ᠡᠨ ᠪᠠᠷᠢᠵᠤ ᠵᠢᠭᠰᠠᠭᠰᠠᠨ
ᠤᠩᠰᠢᠠ᠋ᠴᠢ ᠨᠥᠬᠥᠳ ᠮᠢᠨᠢ ᠂
ᠭᠠᠵᠠᠷ ᠰᠠᠢ ᠦᠭᠡᠢ
ᠮᠡᠷᠭᠡᠰᠢᠯ ᠪᠦᠬᠦᠨ ᠳ᠋ᠦ᠍
ᠬᠠᠯᠳᠠᠪᠤᠷᠢᠲᠤ ᠡᠪᠡᠳᠴᠢᠨ ᠰᠢᠭ
ᠭᠠᠭᠴᠠ ᠬᠣᠶᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ
ᠪᠤᠭᠯᠠᠵᠤ ① ᠪᠠᠢᠭᠠ
ᠬᠦᠨᠳᠦ ᠰᠤᠷᠲᠠᠯᠲᠠᠨ ᠰᠢᠭ᠋
ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠴᠢ ᠶ᠋ᠢᠨ
ᠬᠡᠳᠦᠬᠡᠨ ᠲᠥᠯᠥᠭᠡᠯᠡᠭᠴᠢ ᠶ᠋ᠢ
ᠬᠠᠮᠤᠵᠤ ᠠᠪᠴᠢᠷᠠᠭᠠᠳ
ᠬᠠᠨᠠᠭᠠᠷ ᠠᠭᠤᠳᠠᠮ
ᠮᠣᠩᠭᠣᠯ ᠨᠤᠲᠤᠭ ᠤ᠋ᠨ
ᠨᠢᠭᠡ ᠬᠣᠲᠠᠨ ᠳ᠋ᠤ᠌
ᠪᠥᠭᠡᠮ ᠢ᠋ᠶ᠋ᠡᠷ ᠨᠢ
ᠪᠠᠢᠭᠠ ᠶᠤᠮ ᠰᠢᠭ᠋
ᠨᠢᠭᠡᠳᠬᠡᠵᠦ ᠦᠵᠡᠭᠦᠯᠦᠶᠡ ᠃
ᠪᠦᠯᠲᠡᠢᠲᠡᠯᠡ
ᠴᠢᠷᠴᠦ ᠠᠪᠴᠢᠷᠠᠭᠠᠳ
ᠡᠮᠦᠨᠡ ᠴᠢᠨᠢ ᠵᠣᠭᠰᠣᠭᠠᠶᠠ ᠃
ᠶᠠᠭᠠᠬᠢᠵᠤ ᠰᠢᠢᠳᠬᠡᠬᠦ ᠪᠡᠨ
ᠲᠠ ᠪᠦᠬᠦᠨ
ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠮᠡᠳᠡᠭᠡᠷᠡᠢ ᠃
ᠶᠠᠯᠠᠯᠠᠭᠴᠢ ᠶ᠋ᠢᠨ ᠰᠢᠷᠡᠭᠡᠨ ᠳᠡᠭᠡᠷᠡ
ᠤᠩᠰᠢᠠ᠋ᠴᠢ ᠮᠢᠨᠢ
ᠥᠪᠡᠷ ᠢ᠋ᠶ᠋ᠡᠨ ᠰᠠᠭᠤᠭᠠᠷᠠᠢ ᠃
– – – –
① ᠠᠷᠠᠰᠤᠨ ᠳᠣᠲᠣᠷᠠ ᠪᠢᠲᠡᠭᠦᠦ ᠢᠳᠡᠭᠡᠯᠡᠬᠦ
ᠨᠠᠢᠳᠠᠯᠭᠠᠵᠠᠪ
ᠰᠢᠨᠡᠬᠡᠨ ᠪᠣᠳᠣᠭᠰᠠᠨ
ᠰᠠᠷᠠᠭᠤᠯᠬᠠᠨ ᠲᠠᠰᠤᠯᠭᠠᠨ ᠤ᠋
ᠭᠣᠣᠯ ᠳᠤᠮᠳᠠ
ᠰᠢᠨᠡ ᠲᠠᠯᠪᠢᠭᠰᠠᠨ
ᠲᠣᠮᠣᠬᠠᠨ ᠰᠢᠷᠡᠭᠡᠨ ᠦ᠌
ᠠᠷᠤ ᠲᠠᠯᠠ ᠳ᠋ᠤ᠌
ᠶᠠᠭ ᠴᠤ᠌ ᠦᠭᠡᠢ
ᠵᠥᠭᠡᠯᠡᠪᠴᠢ ᠲᠡᠢ
ᠥᠷᠭᠡᠨ ᠰᠠᠨᠳᠠᠯᠢ ᠳᠡᠭᠡᠷᠡ
ᠶᠠᠮᠪᠠᠲᠠᠢᠬᠠᠨ
ᠰᠠᠭᠤᠵᠤ ᠪᠠᠢᠭᠠ
ᠡᠨᠡ ᠳᠠᠷᠤᠭᠠ
ᠭᠠᠷ ᠲᠠᠭᠠᠨ ᠣᠢᠷᠠ
ᠴᠠᠬᠢᠯᠭᠠᠨ ᠬᠣᠩᠬᠣ
ᠲᠧᠯᠧᠹᠣᠨ ᠤᠲᠠᠰᠤᠨ ᠠ᠋ᠴᠠ ᠡᠬᠢᠯᠡᠭᠡᠳ
ᠭᠠᠳᠠᠭᠠ ᠡᠭᠦᠳᠡᠨ ᠳᠡᠭᠡᠷᠡ
《 ᠰᠣᠢᠯᠲᠠᠲᠠᠢ 》 ᠪᠠᠢᠭᠠ
ᠰᠠᠭᠤᠳᠠᠯ ᠤ᠋ᠨ ᠲᠡᠷᠭᠡ ᠬᠦᠷᠲᠡᠯᠡ
ᠬᠠᠷᠢᠶᠠ ᠭᠠᠵᠠᠷ
ᠬᠡᠯᠲᠡᠰ ᠲᠠᠰᠤᠭ
ᠺᠣᠯᠯᠧᠭᠢ ① ᠺᠣᠮᠢᠰ ᠠ᠋ᠴᠠ ᠡᠬᠢᠯᠡᠭᠡᠳ
ᠬᠠᠮᠤᠭ ᠠᠵᠢᠯ ᠢ ᠨᠢ
ᠬᠤᠪᠢᠶᠠᠵᠤ ᠬᠠᠷᠢᠭᠤᠴᠠᠭᠰᠠᠨ
ᠪᠦᠲᠦᠨ ᠪᠠᠢᠭᠤᠯᠭᠠ ᠬᠦᠷᠲᠡᠯᠡ
ᠰᠢᠭᠤᠷᠬᠠᠢ ᠠᠵᠢᠯᠯᠠᠵᠤ
ᠬᠥᠩᠭᠡᠨ ᠬᠥᠳᠡᠯᠦᠭᠴᠢ
ᠪᠣᠯᠤᠯᠴᠠᠭᠠ ᠪᠦᠬᠦᠨ ᠢ᠋ᠶ᠋ᠡᠷ
ᠰᠢᠭᠤᠳ ᠬᠠᠩᠭᠠᠭᠳᠠᠭᠰᠠᠨ ᠢ
ᠡᠨᠳᠡ ᠳᠤᠷᠠᠳᠤᠭᠠᠳ
ᠬᠡᠷᠡᠭ ᠠᠯᠠᠭᠠ
ᠶᠠᠭᠠᠬᠢᠯᠠ ᠴᠤ᠌ ᠭᠡᠰᠡᠨ
ᠨᠠᠢᠳᠠᠯᠭᠠᠵᠠᠪ ᠭᠤᠸᠠᠢ ᠶ᠋ᠢᠨ
ᠰᠡᠬᠦᠵᠦ ᠰᠠᠯᠬᠢ ᠣᠷᠣᠭᠤᠯᠤᠭᠠ ᠦᠭᠡᠢ
ᠢᠷᠠᠢᠲᠠᠯᠠ ᠦᠷᠦᠭᠰᠡᠨ
ᠵᠤᠵᠠᠭᠠᠨ ᠨᠣᠮ ᠤ᠋ᠳ
ᠰᠢᠯᠦᠨ ᠱᠦᠭᠦᠢ ᠳ᠋ᠦ᠍ ᠬᠠᠷᠠᠭᠳᠠᠨᠠ ᠃
ᠣᠯᠠᠨ ᠬᠥᠮᠦᠨ ᠦ᠌
ᠠᠵᠤ ᠠᠮᠢᠳᠤᠷᠠᠯ
ᠬᠤᠪᠢ ᠵᠠᠶᠠᠭᠠ ᠲᠠᠢ ᠬᠣᠯᠪᠣᠭᠳᠠᠭᠰᠠᠨ
ᠣᠪᠣᠭᠠᠯᠠᠭᠠᠲᠠᠢ ᠡᠷᠭᠦᠳᠡᠯ
ᠭᠣᠮᠣᠳᠠᠯ ᠰᠠᠨᠠᠭᠤᠯᠭᠠ
ᠳᠡᠰ ᠳᠠᠷᠠᠭᠠ ᠪᠠᠷ ᠢ᠋ᠶ᠋ᠠᠨ
ᠭᠠᠯ ᠠ᠋ᠴᠠ ᠠᠶᠤᠳᠠᠭ ᠦᠭᠡᠢ
ᠭᠤᠷᠪᠠᠨ ᠲᠤᠨ ᠤ᠋
ᠲᠡᠮᠦᠷ ᠱᠦᠭᠦᠢ ᠳ᠋ᠦ᠍
ᠭᠠᠷᠬᠤ ᠬᠤᠭᠤᠴᠠᠭᠠ ᠦᠭᠡᠢ
ᠬᠦᠨᠳᠦ ᠶᠠᠯᠠ ᠶ᠋ᠢ
ᠡᠳ᠌ᠯᠡᠭᠰᠡᠭᠡᠷ ᠬᠡᠪᠲᠡᠨᠡ ᠃
ᠤᠲᠠᠰᠤ ᠳᠤᠤᠭᠠᠷᠬᠤ ᠳ᠋ᠤ᠌
ᠮᠠᠨ ᠤ᠋ ᠳᠠᠷᠤᠭᠠ
ᠬᠠᠷᠢᠯᠴᠠᠭᠤᠷ ᠢ ᠠᠪᠤᠯᠠ ᠃
ᠤᠷᠢᠶᠠᠯᠢᠬᠠᠨ ᠳᠠᠭᠤ ᠪᠠᠷ
ᠨᠠᠢᠳᠠᠯᠭᠠᠵᠠᠪ ᠭᠡᠵᠦ
ᠡᠶᠡᠯᠳᠡᠭ ᠬᠡᠯᠡᠯᠡ ᠃
《 ᠶᠠᠭᠠᠬᠢᠯᠠ ᠭᠡᠨᠡ ?
ᠲᠦᠢᠮᠡᠷ ᠭᠠᠷᠤᠯᠠ ᠂
ᠬᠠᠮᠢᠭᠠ ᠲᠡᠷᠡ ᠪᠣᠢ ?
ᠶᠠᠮᠠᠷ ᠬᠠᠷᠢᠭᠤᠴᠠᠯᠭᠠ ᠦᠭᠡᠢ
ᠳᠦᠭᠦᠷᠴᠢᠬᠡᠭᠰᠡᠨ ᠨᠥᠬᠥᠳ ᠪᠣᠢ 》 ᠭᠡᠳ
ᠤᠲᠠᠰᠤ ᠪᠠᠨ ᠰᠢᠲᠠᠯᠠ ᠃
ᠲᠦᠷᠭᠡᠨ ᠵᠠᠭᠤᠷᠠ
ᠣᠷᠣᠯᠠᠭᠴᠢᠳ ᠢ᠋ᠶ᠋ᠠᠨ
ᠳᠠᠭᠤᠳᠠᠵᠤ ᠢᠷᠡᠭᠦᠯᠦᠭᠡᠳ
ᠲᠦᠯᠡᠭᠡᠨ ᠳᠡᠭᠡᠷᠡ ᠭᠠᠷᠤᠭᠰᠠᠨ
ᠲᠦᠢᠮᠡᠷ ᠤᠨᠲᠠᠷᠠᠭᠠᠬᠤ
ᠡᠭᠦᠷᠭᠡ ᠥᠭᠭᠦᠯᠡ ᠃
ᠢᠩᠭᠢᠵᠦ ᠪᠠᠢᠲᠠᠯᠠ
ᠳᠠᠷᠤᠭᠠ ᠶ᠋ᠢᠨ ᠬᠠᠭᠠᠯᠭᠠ ᠶ᠋ᠢ
ᠳᠠᠬᠢᠨ ᠲᠣᠭᠰᠢᠯᠠ ᠃
ᠡᠮᠡᠭᠲᠡᠢᠴᠦᠳ ᠦ᠋ᠨ
ᠵᠥᠪᠯᠡᠯ ᠦ᠋ᠨ ᠳᠠᠷᠤᠭᠠ
ᠣᠷᠣᠭᠠᠳ ᠢᠷᠡᠯᠡ ᠃
ᠵᠢᠯ ᠰᠢᠬᠠᠭᠤ ᠬᠥᠭᠡᠭᠡᠴᠡᠯᠳᠦᠭᠰᠡᠨ
ᠠᠵᠢᠯ ᠢ᠋ᠶ᠋ᠠᠨ
ᠣᠯᠢᠭ ᠪᠣᠯᠭᠠᠵᠤ ᠱᠠᠭᠠᠷᠳᠠᠯᠠ ᠃
ᠵᠢᠷᠮᠦᠰᠦᠨ ᠡᠮᠡᠭᠲᠡᠢ
ᠣᠯᠠᠨ ᠪᠣᠯᠤᠭᠰᠠᠨ ᠤ᠋
ᠪᠠᠷᠢᠮᠲᠠ ᠶ᠋ᠢ ᠲᠣᠭᠠᠴᠢᠯᠠ ᠃
ᠲᠥᠷᠥᠬᠦ ᠲᠠᠰᠤᠭ ᠲᠦᠷᠭᠡᠨ ᠪᠠᠢᠭᠤᠯᠬᠤ
ᠰᠠᠨᠠᠯ ᠭᠠᠷᠭᠠᠯᠠ ᠃
ᠲᠥᠪ ᠦ᠋ᠨ ᠡᠮᠨᠡᠯᠭᠡ ᠳ᠋ᠦ᠍
ᠲᠠᠰᠤᠯᠭᠠ ᠪᠠᠨ ᠴᠤ᠌ ᠭᠡᠰᠡᠨ
ᠲᠥᠬᠥᠭᠡᠷ ᠭᠡᠯᠡ ᠃
ᠨᠠᠢᠳᠠᠯᠭᠠᠵᠠᠪ
ᠡᠮᠨᠡᠯᠭᠡ ᠶ᠋ᠢᠨ ᠬᠡᠯᠲᠡᠰ ᠲᠦ᠍
ᠳᠣᠣᠷᠠ ᠨᠢ ᠤᠲᠠᠰᠤᠳᠠᠯᠠ ᠃
ᠨᠠᠢᠳᠠᠪᠤᠷᠢ ᠲᠡᠰᠦᠷᠡᠭᠦᠯᠦᠭᠰᠡᠨ
ᠲᠡᠨᠳᠡᠬᠢ ᠶ᠋ᠢᠨ ᠳᠠᠷᠤᠭᠠ ᠶ᠋ᠢ
ᠵᠠᠳᠠ ᠵᠠᠩᠨᠠᠯᠠ ᠃
ᠦᠰᠦ ᠨᠢ ᠰᠢᠩᠭᠡᠷᠡᠵᠦ
ᠨᠠᠰᠤ ᠨᠢ ᠲᠣᠭᠲᠠᠭᠰᠠᠨ
ᠡᠨᠡ ᠳᠠᠷᠤᠭᠠ ᠶ᠋ᠢᠨ
ᠥᠭᠦᠯᠡᠵᠦ ᠪᠠᠢᠭᠠ
ᠴᠢᠬᠤᠯᠳᠠᠵᠤ ᠪᠠᠢᠭᠠ ᠳ᠋ᠤ᠌
ᠪᠤᠷᠤᠭᠤ ᠠᠯᠠᠭᠠ ᠃
ᠡᠭᠦᠷᠭᠡ ᠥᠭᠭᠦᠭᠡᠳ
ᠭᠦᠢᠴᠡᠳᠬᠡᠯ ᠢ ᠨᠢ ᠰᠢᠯᠭᠠᠳᠠᠭ ᠦᠭᠡᠢ
ᠭᠡᠮ ᠪᠠᠢᠪᠠᠯ
ᠦᠷᠡ ᠳ᠋ᠦᠩ ᠨᠢ
ᠶᠠᠮᠠᠷ ᠪᠣᠯᠬᠤ ᠶ᠋ᠢ
ᠶᠠᠪᠤᠭᠠᠳ ᠦᠵᠡᠶᠡ
– – – –
① ᠪᠦᠯᠦᠭ ᠬᠥᠮᠦᠰ ᠦ᠋ᠨ
ᠳᠠᠮᠵᠢᠯᠭᠠᠵᠠᠪ
ᠨᠠᠢᠳᠠᠯᠭᠠᠵᠠᠪ ᠪᠦᠬᠦᠨ ᠦ᠌
ᠨᠢᠭᠡᠳᠦᠭᠡᠷ ᠣᠷᠣᠯᠠᠭᠴᠢ ᠨᠢ
ᠳᠠᠮᠵᠢᠯᠭᠠᠵᠠᠪ ᠪᠠᠢᠳᠠᠭ ᠶᠤᠮ ᠃
ᠨᠠᠢᠳᠠᠭᠰᠠᠨ ᠪᠦᠭᠦᠳᠡ ᠶ᠋ᠢ ᠨᠢ
ᠳᠠᠬᠢᠨ ᠨᠠᠢᠳᠠᠭᠠᠳ
ᠴᠠᠭᠠᠰᠢ ᠨᠢ ᠳᠠᠮᠵᠢᠭᠤᠯᠳᠠᠭ ᠶᠤᠮ ᠃
ᠠᠯᠪᠠᠨ ᠭᠠᠵᠠᠷ ᠨᠢ
ᠳᠦᠷᠢᠮ ᠡᠴᠡ
ᠦᠵᠡᠭᠰᠡᠨ ᠴᠦ᠍
ᠠᠪᠳᠠᠭ ᠴᠠᠯᠢᠩ ᠢ ᠨᠢ
ᠬᠦᠰᠦᠨᠦᠭᠲᠦ ᠡᠴᠡ
ᠬᠠᠷᠠᠭᠰᠠᠨ ᠴᠤ᠌
ᠭᠠᠷᠴᠠᠭᠠ ᠦᠭᠡᠢ
ᠴᠢᠬᠤᠯᠠ ᠣᠷᠣᠨ ᠲᠣᠭᠠ
ᠣᠯᠠᠨ ᠪᠠᠢᠳᠠᠭ ᠶᠤᠮ ᠃
ᠭᠠᠢ ᠪᠣᠯᠵᠤ
ᠲᠡᠷᠡ ᠪᠦᠬᠦᠨ ᠢ
ᠳᠠᠮᠵᠢᠯᠭᠠᠵᠠᠪ ᠪᠥᠭᠯᠡᠪᠡᠯ
ᠡᠷᠬᠢᠯᠡᠭᠰᠡᠨ ᠠᠵᠢᠯ ᠠ᠋ᠴᠠ ᠪᠠᠨ
ᠦᠨᠡᠭᠡ ᠰᠢᠭ
ᠪᠤᠯᠲᠠᠭᠠᠳ ᠯᠠ
ᠡᠭᠡᠯᠵᠢᠲᠦ ᠬᠡᠷᠡᠭ ᠦ᠋ᠳ ᠢ
ᠭᠤᠯᠢᠷ ᠰᠢᠭ᠋
ᠳ᠋ᠤᠭᠠᠷᠯᠠᠭᠠᠳ ᠯᠠ
ᠳᠣᠣᠷᠠᠲᠤ ᠠᠵᠢᠯᠲᠠᠨ ᠳ᠋ᠠᠭᠠᠨ
ᠲᠤᠰᠢᠶᠠᠵᠤ
ᠨᠢᠭᠡ ᠵᠠᠢᠯᠠᠭᠤᠯᠤᠨᠠ
ᠳᠡᠭᠡᠳᠦ ᠬᠥᠮᠦᠨ ᠳ᠋ᠡᠭᠡᠨ
《 ᠳᠡᠪᠰᠢᠭᠦᠯᠵᠦ》
ᠨᠢᠭᠡ ᠦᠵᠡᠨᠡ ᠃
ᠥᠪᠡᠷ ᠲᠡᠢ ᠪᠡᠨ
ᠡᠩ ᠵᠡᠷᠭᠡᠴᠡᠮᠡᠷ
ᠨᠢᠭᠡ ᠳ᠋ᠦ᠍ᠨᠢ ᠪᠣᠯ
ᠡᠪᠦᠭᠡᠨ ᠮᠢᠨᠢ
《 ᠠᠷᠭᠠᠯᠠᠭᠠᠴᠢ》 ᠭᠡᠵᠦ
ᠬᠣᠰᠢᠭᠤ ᠴᠣᠷᠪᠣᠢᠨᠠ ᠃
ᠣᠪᠣᠭᠠᠷᠠᠭᠰᠠᠨ ᠠᠵᠢᠯ ᠢ
ᠴᠣᠬᠣᠮ ᠢᠩᠭᠢᠵᠦ
ᠳᠠᠮᠵᠢᠭᠤᠯᠳᠠᠭ ᠠ᠋ᠴᠠ ᠢᠯᠡᠭᠦᠦ
ᠣᠨᠣᠭᠳᠠᠬᠤ ᠬᠠᠷᠢᠭᠤᠴᠠᠯᠭᠠ ᠶ᠋ᠢ
ᠥᠪᠡᠷ ᠡᠴᠡ ᠪᠡᠨ ᠵᠠᠢᠯᠠᠭᠤᠯᠵᠤ
ᠨᠢᠯᠵᠠᠭᠠᠨ ᠢ᠋ᠶ᠋ᠠᠨ ᠬᠤᠪᠢᠶᠠᠷᠢᠯᠠᠨᠠ ᠃
ᠰᠠᠭᠠᠲᠠᠭᠤᠯᠵᠤ
ᠳᠠᠮᠵᠢᠭᠤᠯᠳᠠᠭ ᠦᠭᠡᠢ
ᠭᠠᠭᠴᠠᠬᠠᠨ ᠶᠤᠮ ᠃
ᠰᠠᠷᠠ ᠪᠣᠯᠭᠠᠨ ᠳ᠋ᠤ᠌
ᠬᠣᠶᠠᠷ ᠡᠳᠦᠷ
ᠲᠣᠬᠢᠶᠠᠯᠳᠤᠨᠠ ᠃
ᠬᠠᠷᠢᠨ ᠲᠡᠷᠡ ᠡᠳᠦᠷ
ᠮᠠᠨ ᠤ᠋ ᠳᠠᠮᠵᠢᠯᠭᠠᠵᠠᠪ
ᠢᠨᠢᠶᠡᠭᠰᠡᠭᠡᠷ
ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠨ ᠳ᠋ᠦ᠍
ᠨᠢᠷᠪᠠ ᠤᠷᠤᠭᠤ
ᠥᠪᠡᠷ ᠢ᠋ᠶ᠋ᠡᠨ ᠣᠴᠢᠨᠠ᠃
ᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠦᠰᠦᠭ ᠢ᠋
ᠤᠭᠠᠯᠵᠢᠯᠠᠭᠤᠯᠤᠩᠬᠠᠨ
ᠵᠢᠷᠤᠨᠠ᠃
ᠭᠠᠩᠭᠠᠩ ᠬᠤᠷᠤᠭᠤ ᠪᠠᠨ
ᠴᠡᠴᠡᠷᠡᠭᠦᠯᠦᠩᠭᠡᠨ
ᠲᠣᠭᠠᠯᠠᠨᠠ᠃
ᠡᠪᠦᠷ ᠬᠠᠷᠮᠠᠨ ᠤ᠋ ᠪᠠᠨ
ᠠᠯᠢ ᠨᠠᠢᠳᠠᠪᠤᠷᠢ ᠲᠠᠢ
ᠭᠦᠨᠵᠡᠭᠡᠢ ᠳ᠋ᠦ᠍ᠨᠢ
ᠥᠨᠥᠬᠢ ᠴᠠᠯᠢᠩ ᠢ᠋ᠶ᠋ᠠᠨ
ᠯᠠᠪᠬᠠᠨ ᠰᠢᠭ᠋
ᠬᠢᠵᠦ ᠠᠪᠤᠨᠠ᠃
ᠤᠩᠰᠢᠭᠴᠢ ᠮᠢᠨᠢ
ᠣᠷᠣᠰᠢᠯ ᠢ᠋ᠶ᠋ᠠᠨ ᠲᠡᠭᠦᠰᠬᠡᠶᠡ
ᠳᠡᠮᠵᠢᠯᠠᠭᠠᠵᠠᠪ ᠲᠠᠢ ᠲᠠᠨᠢᠯᠴᠠ᠃
ᠤᠷᠰᠢᠭ ᠪᠣᠯᠤᠭᠰᠠᠨ
ᠲᠦᠢᠮᠡᠷ ᠦ᠋ᠨ ᠲᠤᠬᠠᠢ
ᠡᠭᠦᠷᠭᠡ ᠠᠪᠤᠭᠠᠳ
ᠣᠳᠣ ᠯᠠ ᠳᠥᠩᠭᠡᠵᠦ
ᠠᠯᠪᠠᠨ ᠲᠠᠰᠤᠯᠭᠠᠨ ᠳ᠋ᠠᠭᠠᠨ
ᠣᠷᠣᠵᠤ ᠢᠷᠡᠯᠡ᠃
ᠣᠨᠴᠠ ᠶᠠᠭᠠᠷᠠᠤ
ᠡᠨᠡ ᠬᠡᠷᠡᠭ
ᠲᠡᠪᠡᠳᠡᠭᠦᠯᠦᠭᠰᠡᠨ ᠤᠴᠢᠷ ᠠ᠋ᠴᠠ
ᠲᠡᠷᠡ ᠴᠢᠭ ᠲᠡᠭᠡᠨ
ᠰᠠᠭᠤᠯ ᠦᠭᠡᠢ ᠪᠡᠷ
ᠬᠠᠷᠢᠯᠴᠠᠭᠤᠷ ᠢ᠋ ᠠᠪᠤᠭᠠᠳ
ᠲᠧᠯᠧᠹᠣᠨ ᠠᠫᠫᠠᠷᠠᠲ ① ᠢ᠋ᠶ᠋ᠠᠨ
ᠮᠣᠷᠽ ② ᠤ᠋ᠨ ᠦᠰᠦᠭ ᠰᠢᠭ
ᠪᠠᠯᠪᠠᠵᠤ ᠭᠠᠷᠤᠯᠠ᠃
ᠴᠠᠬᠢᠯᠭᠠᠨ ᠤ᠋ ᠪᠢᠴᠢᠭᠡᠴᠢ ᠪᠡᠷ
ᠤᠷᠢᠳ ᠡᠮᠦᠨᠡ ᠨᠢ
ᠠᠵᠢᠯᠯᠠᠵᠤ ᠪᠠᠢᠭᠰᠠᠨ ᠪᠣᠯ
ᠴᠠᠭᠠᠰᠢ ᠨᠢ ᠳᠠᠮᠵᠢᠭᠤᠯ
—《 ᠲᠦᠢᠮᠡᠷ ᠭᠠᠷᠤᠯᠠ》 ᠭᠡᠳ
ᠴᠣᠬᠢᠵᠤ ᠯᠠ ᠪᠠᠢᠭᠰᠠᠨ ᠶᠤᠮ᠃
ᠳᠠᠩᠴᠤ ᠮᠣᠷᠽ ᠮᠡᠳᠡᠳᠡᠭ ᠦᠭᠡᠢ ᠡᠴᠡ
ᠤᠳᠠᠭᠠᠨ ᠬᠦᠯᠢᠶᠡᠯᠭᠡᠳᠡᠭ
ᠬᠣᠷᠢᠶᠠ ᠶ᠋ᠢ ᠵᠦᠬᠡᠭᠰᠡᠭᠡᠷ
ᠳᠠᠭᠵᠢᠲᠠᠯᠠ ᠴᠡᠴᠡᠷᠡᠨ
ᠨᠢᠭᠡ ᠵᠢᠭᠳᠡ
ᠴᠣᠬᠢᠯᠠᠵᠤ ᠪᠠᠢᠨᠠ᠃
ᠬᠡᠯᠡ ᠨᠢ ᠲᠣᠳᠣ ᠦᠭᠡᠢ
ᠭᠣᠩᠰᠢᠶᠠ ᠳᠠᠭᠤ ᠪᠠᠷ
ᠬᠣᠷᠢᠶᠠ ᠳᠤᠤᠭᠠᠷᠪᠠ ᠪᠣᠯᠤᠯᠲᠠᠢ᠃
ᠬᠡᠷᠡᠯᠳᠦᠬᠦ ᠵᠠᠪ ᠦᠭᠡᠢ
ᠬᠡᠯᠲᠡᠰ ᠦ᠋ᠨ ᠢ᠋ᠶ᠋ᠡᠨ ᠳᠠᠷᠤᠭᠠ ᠳ᠋ᠤ᠌
ᠳᠣᠣᠷᠠ ᠨᠢ ᠬᠣᠯᠪᠣᠭᠤᠯᠵᠤ
ᠲᠦᠢᠮᠡᠷ ᠦ᠋ᠨ ᠠᠶᠤᠯ ᠳᠡᠭᠡᠷᠡ
《 ᠠᠷᠭᠠ ᠬᠡᠮᠵᠢᠶᠡ ᠪᠡᠨ》
ᠰᠢᠭᠤᠷᠬᠠᠢᠬᠠᠨ ᠠᠪ ᠭᠡᠳ
ᠲᠦᠰᠢᠯᠭᠡ ᠲᠡᠢ ᠰᠠᠨᠳᠠᠯᠢ ᠳ᠋ᠠᠭᠠᠨ
ᠲᠡᠮᠵᠢᠯᠠᠭᠠᠵᠠᠪ ᠳᠠᠷᠤᠭᠠ
ᠲᠤᠬᠠᠲᠠᠢᠬᠠᠨ ᠰᠠᠭᠤᠯᠠ᠃
ᠮᠠᠷᠵᠠᠩᠬᠠᠨ ᠴᠢᠬᠠᠷᠠᠭᠰᠠᠭᠠᠷ
ᠲᠠᠰᠤᠯᠭᠠᠨ ᠤ᠋ ᠬᠠᠭᠠᠯᠭᠠ
ᠠᠯᠭᠤᠷ ᠨᠡᠭᠡᠭᠡᠭᠳᠡᠪᠡ᠃
ᠮᠡᠯᠡᠢᠲᠡᠯᠡ ᠢᠨᠢᠶᠡᠭᠰᠡᠭᠡᠷ
ᠮᠠᠷᠭᠠᠰᠢᠵᠠᠪ ᠭᠤᠸᠠᠢ
ᠣᠷᠣᠵᠤ ᠢᠷᠡᠯᠡ᠃
ᠬᠠᠯᠠᠭᠤᠬᠠᠨ ᠵᠤᠨ ᠤ᠋
ᠣᠯᠠᠨ ᠮᠠᠷᠭᠠᠰᠢ ᠶ᠋ᠢ
ᠰᠠᠯᠬᠢ ᠦᠵᠡᠯ ᠦᠭᠡᠢ ᠪᠡᠷ
ᠬᠠᠪᠲᠠᠰᠤᠨ ᠳᠣᠲᠣᠷᠠ
ᠪᠦᠲᠡᠵᠦ ᠦᠬᠦᠲᠡᠯᠡ ᠪᠡᠨ
ᠴᠢᠬᠤᠯᠳᠠᠵᠤ ᠥᠩᠭᠡᠷᠡᠭᠦᠯᠦᠭᠰᠡᠨ
ᠲᠥᠷᠥᠬᠦ ᠲᠠᠰᠤᠭ
ᠲᠦᠷᠭᠡᠨ ᠪᠠᠢᠭᠤᠯᠬᠤ
ᠥᠨᠥ ᠠᠵᠢᠯ
ᠲᠥᠭᠡᠷᠢᠭᠰᠡᠭᠡᠷ ᠶᠠᠪᠤᠭᠠᠳ
ᠵᠠᠢᠯᠠᠬᠤ ᠭᠠᠵᠠᠷ ᠦᠭᠡᠢ
ᠲᠠᠮᠵᠢᠯᠠᠭᠠᠵᠠᠪ ᠳᠡᠭᠡᠷᠡ
ᠦᠢᠮᠡᠵᠦ ᠬᠥᠰᠢᠯᠳᠦᠭᠰᠡᠨ
ᠵᠠᠪ ᠭᠤᠸᠠᠢ ᠨᠠᠷ ᠤ᠋ᠨ
ᠦᠰᠦᠭ ᠲᠠᠮᠠᠭᠠ ᠶ᠋ᠢ ᠨᠢ ᠳᠠᠷᠤᠭᠤᠯᠤᠭᠰᠠᠭᠠᠷ
ᠥᠩᠭᠡᠳᠡᠭᠰᠡᠨ ᠲᠦᠭᠦᠷᠡᠭ ᠰᠢᠭ
ᠥᠩᠭᠡ ᠵᠢᠰᠦ ᠪᠡᠨ
ᠠᠯᠢ ᠬᠡᠳᠦᠢᠨ ᠠᠯᠳᠠᠭᠠᠳ
ᠰᠡᠪᠡᠢᠲᠡᠯᠡ ᠣᠷᠣᠵᠤ ᠢᠷᠡᠬᠦ ᠨᠢ
ᠡᠨᠡ ᠳᠡ
ᠬᠠᠢᠷᠠᠲᠤ ᠤᠩᠰᠢᠭᠴᠢ ᠮᠢᠨᠢ
ᠰᠡᠭᠰᠡᠢᠲᠡᠯᠡ ᠲᠡᠪᠡᠷᠢᠭᠡᠳ
ᠮᠠᠨ ᠤ᠋ ᠲᠠᠮᠵᠢᠯᠠᠭᠠᠵᠠᠪ
ᠣᠳᠣᠬᠠᠨ ᠭᠠᠷᠤᠨᠠ ᠳᠠ᠃
– – – –
① ᠬᠠᠷᠢᠯᠴᠠᠭᠤᠷ ᠤᠲᠠᠰᠤ᠂
② ᠴᠠᠬᠢᠯᠭᠠᠨ ᠤᠯᠠᠮᠵᠢᠯᠠᠭᠤᠷ ᠤ᠋ᠨ ᠳᠣᠬᠢᠶᠠ ᠦᠰᠦᠭ
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠠᠮᠢᠯᠠᠭᠤᠯᠤᠨ ᠬᠠᠭᠠᠯᠤᠭᠰᠠᠨ ᠨᠢ᠄ ᠴᠣᠯᠮᠣᠨᠲᠤᠶᠠᠭᠠ᠂ ᠪᠣᠷᠵᠢᠭᠢᠨ ᠪᠠᠭᠠᠲᠤᠷ
ᠬᠢᠨᠠᠭ᠍ᠴᠢ᠄ ᠴᠣᠯᠮᠣᠨᠲᠤᠶᠠᠭᠠ ᠪᠠᠭ᠍ᠰᠢ
2024᠂ 2᠂ 21