ᠱᠣᠭᠯᠠᠯ ᠤᠨ ᠨᠠᠢ᠍ᠮᠠᠨ ᠮᠥᠷᠲᠦ ᠰᠢᠯᠦᠭ ᠤᠳ– ᠱ ᠂ ᠰᠦᠷᠦᠩᠵᠠᠪ Шоглолын найман мөрт шүлгүүд – Ш ᠂ Сүрэнжав
446ᠱᠣᠭᠯᠠᠯ ᠤᠨ ᠨᠠᠢ᠍ᠮᠠᠨ ᠮᠥᠷᠲᠦ ᠰᠢᠯᠦᠭ
ᠱ᠂ ᠰᠦᠷᠦᠩᠵᠠᠪ
ᠪᠤᠰᠤᠳ ᠤ᠋ᠨ ᠨᠥᠬᠥᠷ ᠢ᠋ ᠪᠤᠯᠢᠶᠠᠬᠤ ᠭᠡᠵᠦ
ᠪᠤᠵᠠᠭᠠᠢᠷᠠᠵᠤ ᠲᠡᠭᠦᠨ ᠡᠴᠡ ᠳᠠᠪᠠᠬᠤ ᠭᠡᠵᠦ
ᠪᠤᠯᠬᠠᠢ ᠡᠪᠦᠷᠯᠡᠭᠰᠡᠨ ᠪᠦᠰᠡᠭᠦᠢ ᠬᠥᠮᠦᠨ
ᠵᠤᠯᠭᠤᠢ ᠪᠥᠭᠡᠳ ᠢᠯᠳᠠᠮ ᠪᠠᠢᠳᠠᠭ᠃
ᠡᠬᠡᠨᠡᠷ ᠲᠤᠨᠢ ᠪᠠᠢᠬᠤ ᠦᠭᠡᠢ ᠰᠠᠢᠬᠠᠨ ᠠᠭᠠᠰᠢ ᠶ᠋ᠢ
ᠡᠬᠢᠨ ᠬᠢᠷᠢ ᠳ᠋ᠡᠭᠡᠨ ᠭᠠᠷᠭᠠᠵᠤ ᠴᠢᠳᠠᠳᠠᠭ᠃
ᠡᠷᠪᠡᠬᠡᠢ ᠰᠠᠭᠤᠯᠭᠠᠳᠠᠭ ᠴᠡᠴᠡᠭ ᠦ᠋ᠨ ᠠᠳᠠᠯᠢ
ᠡᠷᠪᠡᠬᠡᠢ ᠨᠢᠳᠦᠨ ᠬᠥᠨᠵᠢᠯᠡ ᠪᠡᠨ ᠳᠡᠯᠭᠡᠳᠡᠭ
※ ※ ※
ᠳᠠᠯᠳᠠᠭᠤᠷ ᠶᠠᠪᠤᠳᠠᠯ ᠲᠠᠢ ᠬᠣᠶᠠᠷ ᠤ᠋ᠨ ᠰᠡᠳᠬᠢᠯ
ᠳᠠᠷᠠᠰᠤ ᠰᠢᠭ᠋ ᠪᠣᠯᠤᠭᠠᠳ ᠮᠠᠩᠰᠢᠭᠤᠷᠠᠵᠤ ᠪᠠᠢᠳᠠᠭ᠃
ᠨᠠᠭᠤᠷ ᠤ᠋ᠨ ᠲᠠᠯᠮᠢᠶᠠ ① ᠰᠢᠭ ᠨᠢᠳᠦᠨ ᠦ᠌ ᠬᠢᠨᠢ ᠬᠠᠷᠠᠴᠠ ᠳ᠋ᠤ᠌
ᠨᠣᠢᠷ ᠦᠭᠡᠢ ᠰᠥᠨᠢ ᠶ᠋ᠢᠨ ᠮᠠᠨᠠᠨ ᠬᠣᠷᠢᠳᠠᠭ᠃
ᠴᠠᠭᠳᠠᠭᠠ ᠶ᠋ᠢᠨ ᠬᠢᠨᠠᠯᠲᠠ ᠳ᠋ᠤ᠌ ᠪᠠᠢᠭᠠ ᠬᠥᠮᠦᠨ ᠰᠢᠭ
ᠭᠢᠰᠬᠢᠬᠦ ᠪᠦᠷᠢ ᠨᠢ ᠬᠡᠮᠵᠢᠶᠡ ᠰᠡᠷᠡᠮᠵᠢ ᠲᠡᠢ ᠴᠦ᠍
ᠴᠠᠳᠢᠭ ᠢ᠋ᠶ᠋ᠠᠨ ᠠᠯᠳᠠᠵᠤ ᠲᠠᠪᠠᠷᠠᠬᠤ ᠦᠶᠡ ᠳ᠋ᠡᠭᠡᠨ
ᠭᠡᠷ ᠢ᠋ᠶ᠋ᠡᠨ ᠰᠦᠢᠳᠬᠡᠵᠦ ᠨᠡᠷᠡ ᠪᠡᠨ ᠪᠠᠯᠠᠯᠠᠳᠠᠭ ᠠ᠋᠃
ᠠᠲᠠᠭᠠᠷᠬᠠᠯ
ᠳᠠᠪᠴᠢᠭᠤ ᠴᠡᠭᠡᠵᠢᠨ ᠳ᠋ᠦ᠍ ᠳᠦᠷᠡᠯᠵᠡᠭᠰᠡᠨ ᠪᠢᠴᠢᠬᠠᠨ ᠲᠦᠢᠮᠦᠷ
ᠠᠲᠠᠭᠠᠷᠬᠠᠯ
ᠳᠠᠯᠳᠠ ᠶ᠋ᠢᠨ ᠬᠠᠷᠠ ᠮᠠᠯᠠᠭᠠᠢ ᠲᠠᠢ ᠡᠮᠡᠭᠡᠨ ᠱᠤᠯᠤᠮ᠃
ᠠᠲᠠᠭᠠᠷᠬᠠᠯ ᠢ᠋ ᠠᠮᠲᠠᠯᠠᠪᠠᠯ
ᠭᠠᠰᠢᠭᠤᠨ ᠠ᠋ᠴᠠ ᠭᠠᠰᠢᠭᠤᠨ ᠪᠢᠰᠢ
ᠠᠲᠠᠭᠠᠷᠬᠠᠯ ᠢ᠋ ᠠᠳᠬᠤᠪᠠᠯ
ᠭᠠᠷ ᠵᠦᠰᠦᠬᠦ ᠬᠢᠲᠤᠭᠠ
※ ※ ※
ᠬᠡᠲᠦᠷᠬᠡᠢ ᠣᠮᠣᠭ ᠪᠠᠷᠳᠠᠮ ᠭᠡᠭᠴᠢ
ᠭᠠᠯᠵᠠᠭᠤᠷᠠᠭᠰᠠᠨ ᠠᠷᠰᠯᠠᠨ ᠤ᠋ ᠵᠠᠪᠠᠵᠢᠨ ᠠ᠋ᠴᠠ ᠰᠠᠭᠠᠭᠰᠠᠨ ᠬᠥᠭᠡᠰᠦ
ᠬᠡᠲᠦᠷᠬᠡᠢ ᠨᠣᠮᠣᠢ ᠳᠣᠷᠣᠢ ᠭᠡᠭᠴᠢ
ᠭᠠᠢᠬᠠᠷᠠᠭᠰᠠᠨ ᠬᠥᠬᠡ ᠠᠭᠤᠯᠠᠰ ᠤ᠋ᠨ ᠰᠢᠯᠢ ᠳ᠋ᠦ᠍ ᠵᠡᠭᠦᠷᠮᠡᠭᠯᠡᠭᠰᠡᠨ ᠡᠪᠡᠰᠦ
ᠬᠡᠲᠦᠷᠬᠡᠢ ᠡᠷᠬᠢᠮᠰᠦᠭ ᠨᠣᠶᠠᠷᠠᠬᠠᠬᠤ ᠭᠡᠭᠴᠢ
ᠢᠮᠠᠭᠲᠠ ᠳᠡᠭᠡᠷᠡ ᠡᠴᠡ ᠥᠩᠭᠡᠢᠭᠴᠢ ᠬᠠᠳᠠᠨ ᠴᠣᠬᠢᠶᠠ ②
ᠬᠡᠲᠦᠷᠬᠡᠢ ᠡᠮᠡᠰᠡᠭ ᠰᠠᠮᠠᠭᠤᠨ ᠭᠡᠭᠴᠢ
ᠶᠠᠮᠠᠷ ᠴᠦ᠍ ᠴᠡᠴᠡᠭ ᠡᠴᠡ ᠡᠷᠢᠶᠡᠯᠡᠯ ᠦᠭᠡᠢ ᠪᠢᠯᠠᠭᠤᠷᠠᠭ᠌ᠴᠢ ᠡᠷᠪᠡᠬᠡᠢ
ᠬᠡᠲᠦᠷᠬᠡᠢ ᠭᠠᠰᠢᠭᠤᠨ ᠤᠮᠳᠠᠭᠠᠨ ᠳ᠋ᠤ᠌ ᠠᠪᠲᠠᠨᠠ ᠭᠡᠭᠴᠢ
ᠬᠤᠳᠳᠤᠭ ᠤ᠋ᠨ ᠠᠰᠬᠠᠷ ③ ᠡᠴᠡ ᠴᠦ᠍ ᠴᠡᠭᠡᠷᠯᠡᠯ ᠦᠭᠡᠢ ᠰᠤᠷᠤᠭᠴᠢ ᠦᠬᠡᠷ
ᠬᠡᠲᠦᠷᠬᠡᠢ ᠭᠠᠭᠴᠠ ᠪᠡᠶᠡ ᠪᠡᠨ ᠰᠢᠲᠦᠨᠡ ᠭᠡᠭᠴᠢ
ᠬᠤᠯᠠᠨ ᠤ᠋ ᠲᠣᠭᠣᠰᠣ ᠶ᠋ᠢ ᠴᠦ᠍《 ᠮᠢᠨᠦᠬᠢ》 ᠭᠡᠮᠡᠨ ᠰᠡᠭᠦᠯ ᠢ᠋ᠶ᠋ᠡᠨ ᠡᠷᠭᠦᠭᠴᠢ ᠡᠯᠵᠢᠭᠡ᠃
– – – –
① ᠨᠠᠭᠤᠷ ᠤᠨ ᠤᠰᠤᠨ ᠤ ᠵᠥᠭᠡᠯᠡᠨ ᠲᠣᠭᠲᠠᠭᠤᠨ ᠪᠠᠢᠳᠠᠯ
② ᠣᠨᠴᠠᠭᠠᠢ ᠲᠣᠭᠲᠠᠭᠰᠠᠨ ᠥᠨᠳᠥᠷ ᠬᠠᠳᠠ
③ ᠬᠤᠳᠳᠤᠭ ᠤᠨ ᠣᠩᠭᠣᠴᠠ ᠠᠴᠠ ᠬᠠᠯᠢᠭ᠌ᠰᠠᠨ ᠱᠠᠯᠪᠠᠭᠠᠰᠤ
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠩᠷᠢ ᠡᠵᠢ
ᠬᠢᠨᠠᠭ᠍ᠴᠢ : ᠴᠣᠯᠮᠣᠨᠲᠤᠶᠠᠭᠠ
2024᠂ 2᠂ 21 ᠦ᠌ ᠡᠳᠦᠷ