ᠪᠣᠭᠳᠠ ᠬᠠᠨ ᠠᠭᠤᠯᠠ ᠶᠢᠨ ᠮᠠᠭᠲᠠᠭᠠᠯ Богд хан уулын магтаал
462ᠪᠣᠭᠳᠠ ᠬᠠᠨ ᠠᠭᠤᠯᠠ ᠶᠢᠨ ᠮᠠᠭᠲᠠᠭᠠᠯ
ᠠᠭᠤᠳᠠᠮ ᠮᠠᠨ ᠤ᠋ ᠮᠣᠩᠭᠣᠯ ᠤ᠋ᠨ
ᠠᠭᠤᠵᠢᠮ ᠴᠡᠯᠡᠭᠡᠷ ᠨᠤᠲᠤᠭ ᠤ᠋ᠨ
ᠤᠷᠭᠤᠮᠠᠯ ᠪᠦᠬᠦᠨ ᠳᠡᠯᠭᠡᠷᠡᠭᠰᠡᠨ
ᠠᠭᠤᠯᠠ ᠬᠠᠳᠠᠨ ᠤ᠋ ᠳᠣᠲᠣᠷᠠ ᠠ᠋ᠴᠠ
ᠣᠨᠴᠠᠭᠠᠢ ᠰᠢᠨᠵᠢ ᠨᠢ ᠪᠦᠷᠢᠳᠦᠭᠰᠡᠨ
ᠤᠯᠤᠰ ᠭᠦᠷᠦᠨ ᠳ᠋ᠦ᠍ ᠪᠡᠨ ᠠᠯᠳᠠᠷᠲᠠᠢ
ᠠᠭᠤᠯᠠ ᠬᠠᠳᠠ ᠰᠦᠨᠳᠡᠷᠯᠡᠭᠰᠡᠨ
ᠪᠣᠭᠳᠠ ᠠᠭᠤᠯᠠ ᠪᠠᠨ ᠰᠢᠯᠦᠭᠯᠡᠶᠡ᠃
ᠣᠳᠣ ᠴᠠᠭ ᠤ᠋ᠨ ᠦᠶᠡ ᠳ᠋ᠦ᠍
ᠡᠷᠳᠡᠨᠢ ᠶ᠋ᠢᠨ ᠰᠢᠨᠵᠢᠲᠦ ᠪᠣᠭᠳᠠ ᠠᠭᠤᠯᠠ
ᠡᠷᠭᠢᠬᠦ ᠨᠠᠷᠠᠨ ᠤ᠋ ᠭᠡᠷᠡᠯ
ᠲᠦᠷᠭᠡᠨ ᠲᠤᠰᠳᠠᠭ ᠪᠣᠭᠳᠠ ᠠᠭᠤᠯᠠ
ᠡᠭᠡᠯᠵᠢ ᠶ᠋ᠢᠨ ᠴᠠᠭ ᠤ᠋ᠨ ᠡᠷᠡᠮᠪᠡ ᠳ᠋ᠦ᠍
ᠤᠨᠢᠶᠠᠷ ᠲᠠᠲᠠᠭᠰᠠᠨ ᠪᠣᠭᠳᠠ ᠠᠭᠤᠯᠠ
ᠡᠩᠬᠡ ᠬᠣᠯᠠ ᠶ᠋ᠢᠨ ᠭᠠᠵᠠᠷ ᠠ᠋ᠴᠠ
ᠳᠦᠩᠬᠦᠢᠵᠦ ᠬᠠᠷᠠᠭᠳᠠᠬᠤ ᠪᠣᠭᠳᠠ ᠠᠭᠤᠯᠠ
ᠭᠠᠩᠭᠠᠷ ᠬᠦᠢᠲᠡᠨ ᠴᠠᠭ ᠲᠤ
ᠡᠭᠦᠯᠡ ᠮᠠᠨᠠᠨ ᠪᠣᠯᠤᠭᠰᠠᠨ
ᠭᠠᠵᠠᠷ ᠤ᠋ᠨ ᠬᠥᠷᠥᠰᠥ ᠶ᠋ᠢ ᠲᠠᠢᠯᠬᠤ ᠳ᠋ᠤ᠌
ᠬᠤᠷᠠ ᠶ᠋ᠢᠨ ᠡᠭᠦᠯᠡ ᠵᠢᠭᠳᠡᠯᠡᠭᠰᠡᠨ
ᠭᠠᠵᠠᠷ ᠳᠡᠯᠡᠬᠡᠢ ᠶ᠋ᠢᠨ ᠤᠷᠭᠤᠮᠠᠯ
ᠪᠦᠷᠢᠨ ᠲᠡᠭᠦᠰ ᠢᠷᠠᠢᠭᠰᠠᠨ
ᠲᠦᠮᠡᠨ ᠵᠦᠢᠯ ᠦ᠋ᠨ ᠪᠣᠳᠠᠰ
ᠳᠡᠯᠭᠡᠷᠡᠵᠦ ᠭᠠᠷᠤᠭᠰᠠᠨ ᠪᠣᠭᠳᠠ ᠠᠭᠤᠯᠠ
ᠲᠡᠭᠦᠨ ᠡᠴᠡ ᠡᠬᠡ ᠦᠨᠳᠦᠰᠦᠯᠡᠵᠦ
ᠡᠷᠳᠡᠨᠢ ᠶ᠋ᠢᠨ ᠰᠢᠨᠵᠢᠲᠡᠢ ᠪᠣᠭᠳᠠ ᠠᠭᠤᠯᠠ
ᠵᠢᠭᠳᠡᠷᠡᠨ ᠤᠷᠭᠤᠭᠰᠠᠨ ᠮᠣᠳᠣᠨ ᠳ᠋ᠤ᠌ ᠨᠢ
ᠵᠡᠷᠯᠢᠭ ᠬᠥᠷ ᠡᠴᠡ ᠳᠠᠪᠬᠢᠭᠰᠠᠨ
ᠵᠡᠷᠭᠡᠯᠡᠨ ᠬᠠᠷᠠᠭᠳᠠᠬᠤ ᠬᠠᠳᠠᠨ ᠳ᠋ᠤ᠌ ᠨᠢ
ᠵᠢᠭᠦᠷᠲᠡᠨ ᠰᠢᠪᠠᠭᠤ ᠳᠣᠩᠭᠣᠳᠤᠭᠰᠠᠨ
ᠪᠤᠯᠠᠭ ᠤᠰᠤ ᠨᠢ ᠣᠷᠬᠢᠯᠤᠭᠰᠠᠨ
ᠭᠠᠩ ᠭᠠᠴᠢᠭ ᠢ᠋ ᠲᠠᠢᠯᠤᠭᠰᠠᠨ
ᠪᠤᠯᠠᠭᠠ ᠬᠠᠯᠢᠭᠤ ᠲᠣᠭᠯᠠᠭᠠᠳ
ᠠᠭᠤᠯᠠ ᠶ᠋ᠢᠨ ᠴᠢᠮᠡᠭ ᠪᠣᠯᠤᠭᠰᠠᠨ
ᠪᠤᠲᠠ ᠮᠣᠳᠣ ᠨᠢ ᠰᠦᠬᠡᠢᠭᠡᠳ
ᠨᠠᠮᠢᠶᠠ ᠲᠠᠭᠠᠷᠠᠨ ᠭᠠᠩᠬᠤᠭᠰᠠᠨ
ᠪᠤᠭᠤ ᠰᠤᠭᠤ ᠲᠣᠭᠯᠠᠭᠠᠳ
ᠬᠠᠶᠢᠷᠬᠠᠨ ᠠᠭᠤᠯᠠ ᠳ᠋ᠤ᠌ ᠪᠠᠨ ᠴᠢᠮᠡᠭ!
ᠠᠮᠲᠠ ᠰᠢᠮᠡ ᠨᠢ ᠪᠦᠷᠢᠳᠦᠭᠰᠡᠨ
ᠠᠪᠠ ᠲᠠᠢ ᠳᠡᠯᠡᠬᠡᠢ ᠶ᠋ᠢᠨ ᠴᠢᠮᠡᠭ
ᠠᠯᠢᠪᠠ ᠥᠩᠭᠡ ᠶ᠋ᠢᠨ ᠴᠡᠴᠡᠭ ᠲᠡᠢ
ᠨᠠᠷᠠᠰᠤ ᠽᠠᠨᠳᠠᠨ ᠮᠣᠳᠣ
ᠨᠠᠪᠴᠢ ᠲᠠᠭᠠᠷᠠᠨ ᠬᠠᠷᠠᠩᠬᠣᠢᠢᠯᠠᠭᠰᠠᠨ
ᠨᠠᠴᠢᠨ ᠱᠣᠩᠬᠣᠷ ᠰᠢᠪᠠᠭᠤᠳ
ᠡᠬᠡᠰᠢᠭ ᠲᠠᠭᠠᠷᠠᠨ ᠳᠣᠩᠭᠣᠳᠤᠭᠰᠠᠨ
ᠡᠯᠳᠡᠪ ᠥᠩᠭᠡ ᠶ᠋ᠢᠨ ᠮᠣᠳᠣᠨ ᠨᠤᠭᠤᠳ
ᠡᠷᠭᠢᠨ ᠲᠣᠭᠣᠷᠢᠨ ᠴᠢᠮᠡᠭᠯᠡᠭᠰᠡᠨ
ᠡᠷᠪᠡᠯᠵᠡᠨ ᠨᠢᠰᠬᠦ ᠰᠢᠪᠠᠭᠤᠳ
ᠡᠭᠡᠰᠢᠭ ᠲᠠᠭᠠᠷᠠᠨ ᠵᠢᠷᠭᠢᠭᠰᠡᠨ
ᠠᠭᠤᠤ ᠬᠦᠴᠦᠲᠦ ᠠᠷᠢᠶᠠᠲᠠᠨ
ᠠᠯᠠᠭ ᠴᠣᠬᠣᠷ ᠢᠷᠪᠢᠰ
ᠠᠭᠠᠰᠢ ᠶᠡᠬᠡ ᠲᠡᠢ ᠪᠠᠭᠠᠪᠠᠭᠠᠢ
ᠠᠳᠠ ᠲᠠᠢ ᠳᠠᠭᠠᠷᠢᠳᠠᠭ ᠭᠠᠬᠠᠢ
ᠤᠰᠤᠨ ᠳ᠋ᠤ᠌ ᠪᠠᠢᠬᠤ ᠠ᠋ᠴᠠ ᠵᠢᠭᠠᠰᠤ
ᠤᠷᠠᠵᠤ ᠢᠳᠡᠬᠦ ᠡᠴᠡ ᠴᠢᠨᠣᠠ
ᠤᠷᠲᠤ ᠪᠡᠶᠡ ᠲᠡᠢ ᠮᠣᠭᠠᠢ
ᠤᠯᠠᠭᠠᠨ ᠵᠢᠰᠦ ᠲᠡᠢ ᠦᠨᠡᠭᠡ᠃
ᠪᠤᠭᠤᠷᠤᠯ ᠵᠢᠰᠦᠲᠡᠢ ᠡᠴᠡ
ᠪᠣᠳᠣᠩ ᠳ᠋ᠤ᠌ ᠬᠡᠪᠲᠡᠬᠦ ᠲᠠᠤᠯᠠᠢ
ᠮᠠᠩᠨᠠᠢ ᠬᠠᠯᠵᠠᠨ ᠮᠠᠩᠭᠢᠰᠤ
ᠮᠠᠰᠢ ᠴᠠᠭᠠᠨ ᠴᠢᠨᠳᠠᠭᠠ
ᠵᠦᠢᠯ ᠪᠦᠷᠢ ᠶ᠋ᠢᠨ ᠠᠮᠢᠲᠠᠨ
ᠵᠠᠭᠤ ᠮᠢᠩᠭᠠ ᠪᠠᠷ ᠪᠠᠢᠳᠠᠭ ᠤ᠋ᠨ
ᠵᠢᠰᠢᠶᠠ ᠲᠥᠯᠥᠪ ᠨᠢ ᠡᠢᠮᠦ ᠡ᠃
ᠵᠦᠭ ᠪᠦᠬᠦᠨ ᠳ᠋ᠦ᠍ ᠬᠠᠨᠳᠤᠭᠰᠠᠨ
ᠵᠦᠢᠲᠡᠢ ᠰᠠᠢᠬᠠᠨ ᠬᠥᠨᠳᠡᠢ ᠲᠡᠢ
ᠵᠢᠳᠬᠦᠯ ᠭᠠᠪᠢᠶᠠ ᠨᠢ ᠢᠯᠡᠷᠡᠭᠰᠡᠨ
ᠰᠢᠳᠤᠷᠭᠤ ᠣᠯᠠᠨ ᠠᠷᠠᠳ ᠲᠠᠢ
ᠵᠢᠰᠦᠮ ᠦᠷᠡᠵᠢᠯ ᠨᠢ ᠳᠡᠯᠭᠡᠷᠡᠭᠰᠡᠨ
ᠲᠦᠭ ᠲᠦᠮᠡᠨ ᠰᠦᠷᠦᠭ ᠲᠡᠢ
ᠬᠠᠷᠠᠭᠰᠠᠨ ᠬᠥᠨᠳᠡᠢ ᠪᠣᠯᠭᠠᠨ ᠳ᠋ᠤ᠌ ᠨᠢ
ᠬᠠᠷᠠᠭᠤᠯ ᠴᠠᠭᠳᠠᠭᠠ ᠰᠠᠭᠤᠯᠭᠠᠭᠰᠠᠨ᠃
ᠲᠤᠯᠭᠠᠭᠤᠷᠢ ᠲᠥᠷᠥ ᠶ᠋ᠢᠨ ᠲᠥᠪ ᠬᠣᠲᠠ
ᠳᠡᠨᠵᠢ ᠳᠡᠭᠡᠷᠡ ᠨᠢ ᠪᠠᠢᠭᠤᠯᠤᠭᠰᠠᠨ
ᠲᠤᠩᠭᠠᠯᠠᠭ ᠰᠠᠢᠬᠠᠨ
ᠳᠤᠤᠯᠠ ᠶᠢᠨ ᠭᠣᠣᠯ
ᠠᠷᠤ ᠶᠢ ᠳᠠᠭᠠᠷᠢᠨ ᠤᠷᠤᠰᠤᠭᠰᠠᠨ
ᠣᠭᠶᠤ᠂ ᠱᠢᠷᠦ᠂ ᠲᠠᠨᠠ᠂ ᠰᠤᠪᠤᠳ
ᠡᠷᠳᠡᠨᠢ ᠶ᠋ᠢᠨ ᠰᠢᠨᠵᠢ ᠶ᠋ᠢ ᠰᠠᠴᠤᠷᠠᠭᠤᠯᠤᠭᠰᠠᠨ
ᠣᠮᠣᠭ ᠰᠦᠷ ᠨᠢ ᠳᠡᠭᠵᠢᠭᠰᠡᠨ
ᠪᠠᠭᠠᠲᠤᠷ ᠰᠢᠨᠵᠢ ᠶ᠋ᠢ ᠪᠠᠳᠠᠷᠠᠭᠤᠯᠤᠭᠰᠠᠨ
ᠠᠯᠲᠠᠨ ᠨᠡᠭᠦᠷᠡᠰᠦ ᠠᠭᠤᠷᠬᠠᠢ
ᠭᠠᠷᠣᠴᠠ ᠶ᠋ᠢᠨ ᠰᠢᠨᠵᠢ ᠶ᠋ᠢ ᠪᠢᠯᠬᠠᠭᠤᠯᠤᠭᠰᠠᠨ
ᠠᠭᠤᠤ ᠬᠦᠴᠦᠨ ᠲᠡᠭᠦᠯᠳᠡᠷ
ᠪᠥᠬᠡ ᠶ᠋ᠢᠨ ᠰᠢᠨᠵᠢ ᠶ᠋ᠢ ᠪᠦᠷᠢᠳᠦᠭᠦᠯᠦᠭᠰᠡᠨ
ᠨᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠬᠢᠯᠪᠠᠯᠵᠠᠬᠤ
ᠰᠢᠨᠡ ᠰᠢᠨᠡᠬᠡᠨ ᠪᠠᠷᠢᠯᠭᠠ ᠲᠠᠢ
ᠨᠠᠮ ᠵᠠᠰᠠᠭ ᠢ᠋ᠶ᠋ᠠᠨ ᠬᠥᠭᠵᠢᠭᠦᠯᠬᠦ
ᠣᠶᠤᠲᠠᠨ ᠰᠡᠬᠡᠭᠡᠲᠡᠨ ᠮᠡᠷᠭᠡᠳ ᠲᠡᠢ
ᠨᠠᠭᠠᠳᠤᠮ ᠪᠠᠶᠠᠷ ᠢ᠋ᠶ᠋ᠠᠨ ᠬᠢᠳᠡᠭ
ᠠᠭᠤᠳᠠᠮ ᠲᠠᠯᠠᠪᠤᠷ ᠳᠡᠨᠵᠢ ᠲᠡᠢ
ᠨᠠᠪᠴᠢ ᠴᠡᠴᠡᠭ ᠰᠢᠭ ᠵᠢᠭᠰᠠᠳᠠᠭ
ᠲᠦᠮᠡᠨ ᠣᠯᠠᠨ ᠠᠷᠠᠳ ᠲᠠᠢ
ᠵᠢᠭᠰᠠᠭᠰᠠᠨ ᠲᠦᠮᠡᠨ ᠠᠷᠠᠳ ᠤ᠋ᠨ
ᠵᠢᠪᠬᠤᠯᠠᠩ ᠪᠣᠯᠤᠭᠰᠠᠨ ᠤᠳᠤᠷᠢᠳᠤᠭᠴᠢᠳ ᠲᠠᠢ
ᠵᠢᠷᠭᠠᠯᠠᠩᠲᠤ ᠠᠮᠢᠳᠤᠷᠠᠯ ᠤ᠋ᠨ ᠵᠠᠮ ᠢ᠋
ᠵᠢᠭᠠᠵᠤ ᠥᠭᠭᠦᠭᠰᠡᠨ ᠨᠠᠮ ᠲᠠᠢ
ᠥᠷᠭᠡᠨ ᠭᠣᠣᠯ ᠢ᠋ ᠭᠠᠲᠤᠯᠬᠤ ᠳ᠋ᠤ᠌
ᠥᠩᠭᠡ ᠪᠦᠷᠢ ᠶ᠋ᠢᠨ ᠬᠥᠭᠥᠷᠭᠡ ᠲᠡᠢ
ᠡᠪᠦᠯ ᠵᠤᠨ ᠳ᠋ᠤ᠌ ᠪᠠᠨ ᠨᠤᠲᠤᠭᠯᠠᠳᠠᠭ
ᠥᠯᠵᠡᠢᠲᠦ ᠰᠠᠢᠬᠠᠨ ᠣᠷᠣᠨ ᠳᠠ
ᠠᠭᠠᠷ ᠤ᠋ᠨ ᠬᠥᠯᠭᠡ ᠣᠩᠭᠣᠴᠠᠨ ᠤ᠋
ᠠᠷᠪᠢᠨ ᠶᠡᠬᠡ ᠪᠠᠭᠤᠳᠠᠯ ᠲᠠᠢ
ᠠᠷᠠᠳ ᠲᠦᠮᠡᠨ ᠢ᠋ ᠤᠮᠳᠠᠭᠠᠯᠠᠭᠰᠠᠨ
ᠷᠠᠰᠢᠶᠠᠨ ᠤᠰᠤ ᠭᠣᠷᠣᠬᠠ ᠲᠠᠢ᠃
ᠳᠠᠷᠬᠠᠨ ᠪᠣᠭᠳᠠ ᠠᠭᠤᠯᠠ ᠶ᠋ᠢᠨ
ᠳᠠᠭᠠᠭᠠᠮᠠᠢ ᠶᠡᠬᠡ ᠠᠯᠳᠠᠷ ᠨᠢ
ᠳᠠᠶᠠᠭᠠᠷ ᠥᠷᠭᠡᠨ ᠮᠣᠩᠭᠣᠯ ᠤ᠋ᠨ
ᠨᠤᠲᠤᠭ ᠪᠦᠬᠦᠨ ᠳ᠋ᠦ᠍ ᠲᠦᠭᠡᠵᠦ
ᠡᠬᠡ ᠣᠷᠣᠨ ᠨᠤᠲᠤᠭ ᠤ᠋ᠨ
ᠡᠷᠳᠡᠨᠢ ᠴᠢᠮᠡᠭ ᠪᠣᠯᠵᠤ ᠪᠠᠢᠨᠠ᠃
ᠡᠨᠡ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠪᠢᠳᠡᠨ ᠦ᠌
ᠡᠩᠬᠦᠷᠡᠢ ᠬᠠᠢᠷᠠ ᠶ᠋ᠢ ᠪᠤᠯᠢᠶᠠᠵᠤ ᠪᠠᠢᠨᠠ᠃
Богд хан уулын магтаал
Уудам манай
Монголын
Уужим цэлгэр нутгийн.
Ургамал бүхэн дэлгэрсэн
Уул хадны дотроос
Онцгой шинж нь бүрдсэн
Улс гүрэндээ алдартай
Уул хад сүндэрлэсэн
Богд уулаа шүлэглэе.
Одоо цагийн үед
Эрдэнийн шинжит Богд уул
Эргэх нарны гэрэл
Түргэн тусдаг Богд уул
Ээлжийн цагийн эрэмбэд
Униар татсан Богд уул
Энх холын газраас
Дүнхийж харагдах
Богд уул
Гангар хүйтэн цагт
Үүл манан болсон
Газрын хөрсийг тайлахад
Хурын үүл жигдэлсэн
Газар дэлхийн ургамал
Бүрэн төгс ярайсан
Түмэн зүйлийн бодис
Дэлгэрч гарсан Богд уул
Түүнээс эх үндэслэж
Эрдэнийн шинжтэй
Богд уул
Жигдрэн ургасан модонд нь
Зэрлэг гөрөөс давхисан
Зэрэглэн харагдах хаданд нь
Жигүүртэн шувуу донгодсон
Булаг ус нь оргилсон
Ган гачгийг тайлсан
Булга халиу тоглоод
Уулын чимэг болсон
Бут мод нь сүхийгээд
Намиа тааран ганхсан
Буга согоо тоглоод
Хайрхан уулдаа чимгээ!
Амт шим нь бүрдсэн
Аптай дэлхийн чимэг
Аливаа өнгийн цэцэгтэй
Нарс зандан мод
Навч тааран харанхуйлсан
Начин шонхор шувууд
Эгшиг тааран донгодсон
Элдэв өнгийн моднууд
Эргэн тойрон чимэглэсэн
Эрвэлзэн нисэх шувууд
Эгшиг тааран жиргэсэн
Агуу хүчит араатан
Алаг цоохор ирвэс
Ааш ихтэй баавгай
Адтай дайрдаг гахай
Усанд байхаас загас
Урж идэхээс чоно
Урт биетэй могой
Улаан зүстэй үнэг.
Буурал зүстэйгээс
Бутанд хэвтэх туулай
Магнай халзан мангис
Маш цагаан чандага
Зүйл бүрийн амьтан
Зуу мянгаар байдгийн
Жишээ төлөв нь иймээ.
Зүг бүхэнд хандсан
Зүйтэй сайхан хөндийтэй
Зүтгэл гавьяа нь илэрсэн
Шударга олон ардтай
Зүсэм үржил нь дэлгэрсэн
Түг түмэн сүрэгтэй
Харсан хөндий болгонд нь
Харуул цагдаа суулгасан.
Тулгуур төрийн төв хот
Дэнж дээр нь байгуулсан
Тунгалаг сайхан
Туулын гол
Арыг дайран урссан
Оюу, шүр, тана, сувд
Эрдэнийн шинжийг цацруулсан
Омог сүр нь дэгжсэн
Баатар шинжийг бадруулсан
Алтан нүүрс уурхай
Гарцын шинжийг бялхуулсан
Агуу хүчин төгөлдөр
Бөхийн шинжийг бүрдүүлсэн
Нарны гэрэлд гялбалзах
Шинэ шинэхэн барилгатай
Нам засгаа хөгжүүлэх
Оюутан сэхээтэн мэргэдтэй
Наадам баяраа хийдэг
Уудам талбар дэнжтэй
Навч цэцэг шиг жагсдаг
Түмэн олон ардтай
Жагссан түмэн ардын
Жавхлан болсон удирдагчидтай
Жаргалант амьдралын замыг
Зааж өгсөн намтай
Өргөн голыг гатлахад
Өнгө бүрийн гүүртэй
Өвөл зундаа нутагладаг
Өлзийт сайхан орон доо
Агаарын хөлөг онгоцны
Арвин их буудалтай
Ард түмнийг ундаалсан
Рашаан ус горхитой.
Дархан Богд уулын
Даамай их алдар нь
Даяар өргөн
Монголын
Нутаг бүхэнд түгж
Эх орон нутгийн
Эрдэнэ чимэг болж байна.
Энэ монголын ард бидний
Энхрий хайрыг булааж байна.