ᠴᠢᠬᠤᠯᠠ ᠬᠥᠮᠦᠰ - ᠪ ᠂ ᠰᠣᠰᠣᠷᠪᠠᠷᠠᠮ Чухал хүмүүс - Б ᠂ Сосорбарам
250ᠴᠢᠬᠤᠯᠠ ᠬᠥᠮᠦᠰ
ᠪ᠂ ᠰᠣᠰᠣᠷᠪᠠᠷᠠᠮ
( ᠱᠣᠭ ᠦᠭᠦᠯᠯᠡᠭᠡ)
ᠣᠷᠣᠨ ᠲᠣᠭᠠ ᠴᠣᠮᠬᠠᠳᠬᠠᠵᠤ ᠨᠢᠭᠡ ᠬᠥᠮᠦᠨ ᠢ᠋ ᠮᠠᠯ ᠠᠵᠤ ᠠᠬᠤᠢ ᠳ᠋ᠤ᠌ ᠰᠢᠯᠵᠢᠭᠦᠯᠦᠨ ᠠᠵᠢᠯᠯᠠᠭᠤᠯᠬᠤ ᠪᠣᠯᠵᠠᠢ᠃ ᠪᠠᠢᠭᠤᠯᠭᠠ ᠶ᠋ᠢᠨ ᠳᠠᠷᠤᠭᠠ ᠨᠢᠲᠡ ᠪᠣᠯᠪᠠᠰᠤᠨ ᠬᠦᠴᠦᠨ ᠦ᠌ ᠬᠡᠯᠲᠡᠰ ᠦ᠋ᠨ ᠡᠷᠬᠢᠯᠡᠭᠴᠢ ᠲᠡᠮᠦᠷᠴᠢᠳᠦᠷ ᠬᠣᠶᠠᠷ ᠡᠨᠡ ᠲᠤᠬᠠᠢ ᠶᠠᠷᠢᠯᠴᠠᠵᠤ ᠰᠠᠭᠤᠨᠠ᠃
— ᠵᠠ ᠳᠠᠷᠤᠭᠠ ᠮᠢᠨᠢ ᠡᠢᠮᠦ ᠬᠠᠲᠠᠭᠤ ᠠᠰᠠᠭᠤᠳᠠᠯ ᠢ᠋ ᠴᠢᠨᠢ ᠶᠠᠭᠠᠬᠢᠵᠤ ᠰᠢᠢᠳᠳᠡᠭ ᠬᠡᠷᠡᠭ ᠪᠣᠢ ᠭᠡᠵᠦ ᠳᠠᠷᠤᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠥᠭᠡᠳᠡ ᠡᠴᠡ ᠥᠷᠭᠡᠰᠦ ᠰᠢᠭ ᠨᠢᠳᠦ ᠪᠡᠷ ᠰᠢᠷᠳᠡᠬᠦ ᠳ᠋ᠦ᠍ ᠨᠢᠲᠡ ᠶ᠋ᠢᠨ ᠲᠡᠷᠡ ᠲᠡᠢ ᠲᠡᠷᠡ ᠦᠭᠡᠢ ᠰᠢᠩᠭᠡᠷᠡᠵᠦ ᠶᠠᠪᠤᠭᠠ ᠵᠤᠯᠠᠢ ᠶ᠋ᠢᠨ ᠦᠰᠦᠨ ᠡᠴᠡ ᠲᠤᠭ ᠦᠰᠦ ᠵᠤᠯᠭᠠᠷᠠᠴᠢᠬᠠᠬᠤ ᠰᠢᠭ᠋ ᠪᠣᠯᠪᠠ᠃
— ᠬᠠᠷᠢᠨ ᠠ᠋! ᠭᠡᠵᠦ ᠨᠢᠲᠡ ᠬᠠᠷᠠᠨᠳᠠ ᠪᠠᠷ ᠰᠢᠷᠡᠭᠡ ᠲᠣᠭᠰᠢᠵᠤ ᠰᠠᠭᠤᠬᠤ ᠵᠠᠭᠤᠷᠠ ᠪᠠᠨ《 ᠠ᠂ ᠴᠢ ᠯᠡ ᠭᠡᠵᠦ ᠬᠡᠨ ᠢ᠋ ᠶᠠᠪᠤᠭᠤᠯᠬᠤ ᠪᠠᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠬᠠ》 ᠭᠡᠵᠦ ᠪᠣᠳᠣᠨ ᠲᠡᠭᠦᠨ ᠦ᠌ ᠬᠠᠷᠠᠴᠠ ᠠ᠋ᠴᠠ ᠳᠠᠯᠳᠢᠷᠠᠬᠤ ᠳ᠋ᠠᠭᠠᠨ ᠡᠨᠡ ᠡᠪ ᠦᠭᠡᠢ ᠬᠠᠷᠠᠴᠠ ᠲᠠᠢ ᠠᠩᠬᠠ ᠬᠡᠳᠦᠢ ᠳ᠋ᠦ᠍ ᠤᠴᠠᠷᠠᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠪᠠ᠃
ᠨᠢᠲᠡ ᠬᠡᠳᠦᠨ ᠵᠢᠯ ᠦ᠋ᠨ ᠡᠮᠦᠨᠡ ᠨᠢᠭᠡᠨ ᠨᠢᠭᠡᠳᠦᠯ ᠳ᠋ᠦ᠍ ᠣᠴᠢᠵᠤ ᠬᠣᠨᠣᠨ ᠥᠨᠵᠢᠨ ᠨᠠᠢᠷᠯᠠᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠠᠩᠬᠠ ᠤᠳᠠᠭᠠ《 ᠲᠤᠭᠤᠰᠢᠯᠠᠭᠤᠯᠤᠭᠠᠳ》 ᠠᠪᠤᠭᠰᠠᠨ ᠶᠤᠮᠰᠠᠨᠵᠠᠢ᠃
ᠬᠣᠵᠢᠮ ᠢ᠋ᠶ᠋ᠠᠨ ᠬᠣᠲᠠ ᠣᠷᠣᠵᠤ ᠢᠷᠡᠭᠰᠡᠨ ᠬᠣᠢᠨᠠ ᠨᠢ ᠠᠷᠭᠠ ᠦᠭᠡᠢ ᠶ᠋ᠢᠨ ᠡᠷᠬᠡᠨ ᠳ᠋ᠦ᠍ ᠲᠤᠯᠭᠠᠭᠳᠠᠨ ᠲᠡᠭᠦᠨ ᠢ᠋ ᠡᠨᠡ ᠴᠢᠬᠤᠯᠠ ᠣᠷᠣᠨ ᠲᠣᠭᠠᠨ ᠳᠡᠭᠡᠷᠡ ᠪᠡᠨ ᠠᠪᠴᠤ ᠠᠵᠢᠯᠯᠠᠭᠤᠯᠤᠭᠰᠠᠨ ᠠ᠋ᠴᠠ ᠪᠦᠷ ᠴᠢᠳᠦᠷᠯᠡᠭᠦᠯᠴᠢᠬᠡᠭᠰᠡᠨ ᠬᠡᠷᠡᠭ ᠪᠠᠢᠵᠠᠢ᠃
ᠡᠨᠡ ᠵᠣᠯᠢᠭ ᠴᠢᠨᠢ ᠰᠠᠨᠠᠭᠠᠨ ᠳ᠋ᠠᠭᠠᠨ ᠲᠣᠬᠢᠷᠠᠬᠤ ᠦᠭᠡᠢ ᠬᠥᠮᠦᠨ ᠢ᠋《 ᠮᠥᠰᠥᠨ ᠳᠡᠭᠡᠷᠡ ᠴᠢᠯᠠᠭᠤ ᠰᠢᠳᠡᠭᠰᠡᠨ ᠠᠳᠠᠯᠢ ᠭᠤᠯᠠᠰᠴᠢᠬᠠᠬᠤ ᠬᠥᠮᠦᠨ ᠳᠡ》 ᠭᠡᠵᠦ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠨᠢᠲᠡ᠄
— ᠴᠢ ᠮᠢᠨᠢ ᠰᠢᠢᠳᠴᠦ ᠦᠵᠡ ᠭᠡᠬᠦ ᠳ᠋ᠦ᠍ ᠲᠡᠮᠦᠷᠴᠢᠳᠦᠷ ᠦᠨᠡᠭᠡᠨ ᠦ᠌ ᠬᠢ ᠰᠢᠭ ᠵᠢᠬᠢᠭᠠᠷ ᠨᠢᠳᠦ ᠪᠡᠨ ᠤᠯᠠᠮ ᠵᠢᠷᠳᠠᠭᠠᠢᠯᠠᠨ ᠢᠨᠢᠶᠡᠵᠦ᠄
— ᠢᠰᠢ ᠳᠠᠷᠤᠭᠠ ᠮᠢᠨᠢ᠂ ᠲᠠ ᠨᠠᠳᠠ ᠳ᠋ᠤ᠌ ᠶᠠᠭᠠᠬᠢᠭᠰᠠᠨ ᠬᠠᠲᠠᠭᠤ ᠠᠭᠠᠷᠤᠤᠯ ᠮᠡᠷᠡᠭᠦᠯᠦᠨᠡ ᠪᠣᠢ ᠭᠡᠵᠦ ᠪᠣᠳᠣᠯᠬᠢᠯᠠᠭᠰᠠᠨ ᠳᠦᠷᠢ ᠦᠵᠡᠭᠦᠯᠦᠭᠰᠡᠨ ᠢ᠋ᠶ᠋ᠡᠨ᠄
— ᠳᠣᠷᠵᠢ ᠭᠡᠪᠡ᠃
— ᠣᠳᠣ ᠮᠠᠨ ᠤ᠋ ᠣᠷᠣᠯᠠᠭᠴᠢ ᠤᠤ?
— ᠲᠡᠭᠡᠪᠡᠯ ᠲᠣᠨᠲᠣᠭ᠃
— ᠶᠡᠷᠦᠩᠬᠡᠢ ᠨᠢᠭᠲᠠᠯᠠᠨ ᠪᠣᠳᠣᠬᠤ ᠤᠤ?
— ᠵᠠ ᠲᠡᠭᠡᠪᠡᠯ ᠳᠤᠯᠮᠠ᠃
— ᠲᠣᠭᠠᠴᠠᠭᠠᠨ ᠤ᠋ ᠨᠢᠭᠲᠠᠯᠠᠨ ᠪᠣᠳᠣᠬᠤ ᠤᠤ?
— ᠲᠤᠯᠭᠠᠷ᠃
— ᠡᠪᠯᠡᠯ ᠦ᠋ᠨ ᠬᠣᠷᠢᠶᠠᠨ ᠳᠠᠷᠤᠭᠠ ᠤᠤ?
— ᠲᠡᠭᠡᠭᠡᠳ ᠬᠡᠨ ᠪᠠᠢᠬᠤ ᠶᠤᠮ ᠪᠣᠢ?
— ᠴᠢ ᠶᠡᠷᠦ ᠨᠢ ᠲᠣᠭᠯᠠᠵᠤ ᠪᠠᠢᠨᠠ ᠤᠤ? ᠶᠠᠭᠠᠬᠢᠵᠤ ᠪᠠᠢᠨᠠ ᠭᠡᠳ ᠳᠠᠷᠤᠭᠠ ᠠᠭᠤᠷᠯᠠᠭᠰᠠᠨ ᠳᠦᠷᠢ ᠦᠵᠡᠭᠦᠯᠪᠡ᠃
— ᠬᠠᠮᠢᠭᠠ ᠠ᠋ᠴᠠ ᠳᠠ ᠳᠠᠷᠤᠭᠠ ᠮᠢᠨᠢ᠂ ᠪᠢ ᠬᠡᠳᠦᠨ ᠵᠢᠯ ᠪᠣᠯᠬᠤ ᠳ᠋ᠠᠭᠠᠨ ᠲᠠᠨ ᠢ᠋ ᠢᠩᠭᠢᠵᠦ ᠤᠷᠢᠶᠠᠯᠠᠵᠤ( ᠰᠢᠬᠠᠮᠳᠠᠭᠤᠯᠵᠤ) ᠪᠠᠢᠬᠤ ᠶ᠋ᠢ ᠦᠵᠡᠭᠡ ᠦᠭᠡᠢ ᠶᠦᠮ ᠪᠠᠢᠨᠠ ᠭᠡᠳ ᠲᠡᠮᠦᠷᠴᠢᠳᠦᠷ ᠨᠢᠲᠡ ᠶ᠋ᠢ ᠪᠠᠰᠠ ᠯᠠ ᠡᠭᠴᠡᠯᠡᠨ ᠰᠢᠷᠳᠡᠪᠡ᠃ ᠨᠢᠲᠡ《 ᠵᠠ ᠪᠠᠢᠵᠠ᠂ ᠪᠡᠷᠰᠡ① ᠰᠢᠭ ᠱᠠᠯᠠᠳᠠᠭ ᠡᠨᠡ ᠴᠢᠳᠬᠥᠷ ᠡᠴᠡ ᠴᠢᠨᠢ ᠶᠠᠭᠠᠬᠢᠵᠤ ᠰᠠᠯᠤᠶᠠ ᠳᠠ᠂ ᠴᠢ ᠴᠢᠭ ᠤᠤᠯ ᠰᠠᠨᠠᠭᠠ ᠪᠠᠨ ᠨᠠᠳᠠ ᠪᠠᠷ ᠯᠠ ᠭᠠᠷᠭᠠᠭᠤᠯᠬᠤ ᠭᠡᠳ ᠪᠠᠢᠨᠠ ᠳᠠ》 ᠭᠡᠵᠦ ᠪᠣᠳᠣᠭᠠᠳ ᠬᠡᠰᠡᠭ ᠰᠢᠷᠡᠭᠡ ᠲᠣᠭᠰᠢᠵᠤ ᠰᠠᠭᠤᠨᠠ᠃
— ᠲᠡᠮᠦᠷᠬᠦᠦ ᠭᠡᠳᠡᠭ ᠴᠢᠨᠢ ᠶᠠᠭᠤ ᠰᠠᠨ ᠪᠢᠯᠡ ᠭᠡᠵᠦ ᠠᠰᠠᠭᠤᠪᠠ᠃
— ᠲᠡᠮᠦᠷᠴᠢᠳᠦᠷ ᠦ᠋ᠨ ᠵᠠᠭᠠᠲᠤᠨᠠᠭᠰᠠᠨ ᠭᠠᠵᠠᠷ ᠢ᠋ ᠮᠠᠭᠠᠵᠢᠭᠰᠠᠨ ᠮᠡᠲᠦ ᠪᠣᠯᠤᠭᠰᠠᠨ ᠪᠣᠯᠪᠠᠴᠤ ᠲᠡᠷᠡ ᠰᠠᠨᠠᠭᠠ ᠪᠠᠨ ᠰᠢᠭᠤᠳ ᠢᠯᠡᠴᠢᠯᠡᠬᠦ ᠦᠭᠡᠢ ᠲᠣᠭᠣᠷᠢᠭᠤ ᠵᠠᠮ ᠢ᠋ᠶ᠋ᠠᠷ ᠴᠢᠳᠥᠷᠯᠡᠵᠦ ᠠᠪᠬᠤ ᠶ᠋ᠢᠨ ᠲᠤᠯᠠᠳᠠ᠄
— ᠨᠠᠷᠢᠨ ᠮᠡᠷᠭᠡᠵᠢᠯ ᠦ᠋ᠨ ᠵᠠᠰᠠᠪᠤᠷᠢᠴᠢᠨ ᠰᠢᠦ ᠳᠡ᠂ ᠲᠠ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ ᠭᠡᠵᠢ ᠤᠤ?
— ᠮᠡᠳᠡᠵᠦ ᠯᠠ ᠪᠠᠢᠨᠠ᠂ ᠬᠠᠷᠢᠨ ᠲᠡᠷᠡ ᠴᠢᠨᠢ ᠬᠢᠷᠢ ᠠᠵᠢᠯᠯᠠᠵᠤ ᠪᠠᠢᠨᠠ ᠤᠤ?
— ᠰᠠᠢᠨ ᠨᠢ ᠴᠣ ᠰᠠᠢᠨ ᠯᠠ ᠳᠠ᠂ ᠲᠡᠭᠡᠬᠦ ᠳ᠋ᠦ᠍ ᠲᠧᠭᠨᠢᠭ᠂ ᠲᠣᠨᠣᠭ ᠲᠥᠬᠥᠭᠡᠷᠦᠮᠵᠢ ᠮᠠᠨᠢ ᠰᠢᠨᠡ ᠰᠢᠦ ᠳᠡ᠃
— ᠲᠡᠭᠡᠭᠡᠳ ᠶᠠᠭᠠᠬᠢᠬᠤᠪ?
— ᠬᠠᠷᠢᠨ ᠨᠢ ᠠ᠋᠃
— ᠵᠠ ᠲᠡᠭᠡᠪᠡᠯ ᠴᠢ ᠳᠤᠷᠠ ᠦᠭᠡᠢ᠃
— ᠦᠭᠡᠢ ᠶᠠᠭᠤ ᠯᠠ ᠳᠠ ᠳᠠᠷᠤᠭᠠ ᠠ᠋᠂ ᠦᠨᠡᠨ ᠳ᠋ᠡᠭᠡᠨ ᠴᠦ᠍ ᠨᠢᠭᠡ ᠶᠡᠬᠡ ᠬᠢᠭᠡᠳ ᠪᠠᠢᠭᠠ ᠶᠠᠭᠤᠮᠠ ᠦᠭᠡᠢ ᠯᠡ ᠬᠥᠮᠦᠨ ᠳᠡ᠃
— ᠲᠡᠭᠡᠪᠡᠯ ᠣᠳᠣᠬᠠᠨ ᠳ᠋ᠠᠭᠠᠨ ᠲᠡᠭᠦᠨ ᠢ᠋ ᠴᠢᠨᠢ ᠶᠠᠪᠤᠭᠤᠯᠴᠢᠬᠠᠪᠠᠯ ᠶᠠᠭᠠᠬᠢᠭᠰᠠᠨ ᠶᠤᠮ ᠪᠣᠢ?
— ᠲᠡᠭᠡᠭᠡᠳ ᠡᠷᠭᠢᠵᠦ ᠠᠪᠬᠤ ᠬᠡᠷᠡᠭ ᠤᠤ?
— ᠦᠭᠡᠢ ᠠ᠋᠂ ᠦᠭᠡᠢ᠂ ᠬᠡᠷᠡᠭᠴᠡᠭᠡ ᠭᠠᠷᠪᠠᠯ ᠥᠭᠡᠷᠡ ᠬᠥᠮᠦᠨ ᠠᠪᠴᠤ ᠪᠣᠯᠬᠤ ᠰᠢᠦ ᠳᠡ᠃
— ᠮᠠᠨ ᠤ᠋ ᠬᠢᠨ ᠭᠡᠵᠦ ᠬᠡᠨ?
— ᠢᠨᠵᠧᠨᠧᠷ᠂ ᠦᠢᠯᠡᠳᠪᠦᠷᠢᠴᠢᠨ ᠦ᠌ ᠬᠣᠷᠢᠶᠠᠨ ᠳᠠᠷᠤᠭᠠ᠃
— ᠵᠠ ᠵᠠ ᠪᠢ ᠲᠡᠳᠡᠨ ᠦ᠌ ᠴᠢᠨᠢ ᠶᠠᠷᠢᠶᠠ᠃
ᠵᠠ ᠲᠡᠢᠮᠦ ᠪᠣᠯ ᠶᠠᠭᠠᠬᠢᠬᠤᠪ ᠭᠡᠵᠦ ᠳᠤᠷᠠᠮᠵᠢᠬᠠᠨ ᠮᠡᠲᠦ ᠬᠠᠭᠠᠯᠭᠠ ᠣᠩᠭᠣᠢᠯᠭᠠᠭᠰᠠᠨ ᠢ᠋ᠶ᠋ᠠᠨ᠄
— ᠲᠤᠰᠢᠶᠠᠯ ᠲᠥᠯᠥᠪᠯᠡᠴᠢᠬᠡᠬᠦ ᠤᠤ ᠭᠡᠵᠦ ᠰᠢᠭᠤᠳ ᠠᠰᠠᠭᠤᠪᠠ᠃
— ᠲᠡᠭᠡ ᠳᠧ᠃
ᠲᠡᠮᠦᠷᠴᠢᠳᠦᠷ ᠬᠠᠭᠠᠯᠭᠠ ᠠᠶᠠᠷᠬᠠᠨ ᠬᠠᠭᠠᠵᠤ ᠰᠡᠳᠬᠢᠯ ᠬᠠᠨᠤᠭᠰᠠᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠥᠷᠥᠭᠡ ᠪᠡᠨ ᠣᠩᠭᠣᠢᠯᠭᠠᠭᠠᠳ《 ᠥᠪᠡᠷ ᠦ᠋ᠨ ᠴᠢᠨᠢ ᠭᠠᠷ ᠢ᠋ᠶ᠋ᠠᠷ᠁》 ᠭᠡᠵᠦ ᠰᠢᠪᠡᠨᠡᠭᠰᠡᠭᠡᠷ ᠰᠢᠷᠡᠭᠡᠨ ᠳ᠋ᠡᠭᠡᠨ ᠲᠤᠬᠠᠯᠠᠨ ᠰᠠᠭᠤᠪᠠ᠃
ᠬᠡᠳᠦᠨ ᠵᠢᠯ ᠦ᠋ᠨ ᠡᠮᠦᠨᠡ ᠲᠡᠮᠦᠷᠴᠢᠳᠦᠷ ᠢ᠋ ᠪᠣᠯᠪᠠᠰᠤᠨ ᠬᠦᠴᠦᠨ ᠦ᠌ ᠬᠠᠯᠭᠠᠳᠠᠢ ᠬᠥᠮᠦᠨ᠂ ᠮᠣᠳᠣᠨ ᠤ᠋ ᠦᠷᠦᠪᠲᠦᠯ ᠰᠢᠭ ᠠᠭᠠᠵᠢᠭᠤᠬᠠᠨ ᠮᠡᠷᠡᠴᠢᠬᠡᠵᠦ ᠮᠡᠳᠡᠬᠦ ᠬᠥᠮᠦᠨ ᠪᠠᠢᠭᠠ ᠶᠤᠮ ᠭᠡᠵᠦ ᠰᠢᠭᠦᠮᠵᠢᠯᠡᠭᠰᠡᠨ ᠬᠥᠮᠦᠨ ᠪᠣᠯ ᠲᠡᠮᠦᠷᠬᠦᠦ ᠠᠵᠢ᠃ ᠲᠡᠷᠡ ᠶᠠᠪᠤᠳᠠᠯ ᠢ᠋ ᠣᠳᠣ ᠲᠡᠮᠦᠷᠴᠢᠳᠦᠷ ᠡᠴᠡ ᠪᠤᠰᠤᠳ ᠨᠢ ᠨᠢᠭᠡᠨᠲᠡ ᠮᠠᠷᠲᠠᠭᠰᠠᠨ ᠪᠠᠢᠪᠠ᠃ ᠬᠡᠳᠦ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠬᠥᠮᠦᠰ ᠤᠯᠠᠭᠠᠨ ᠪᠤᠯᠤᠩ ᠳ᠋ᠤ᠌ ᠴᠤᠭᠯᠠᠪᠠ᠃ ᠲᠡᠮᠦᠷᠴᠢᠳᠦᠷ ᠬᠣᠭᠣᠯᠠᠢ ᠵᠠᠰᠠᠵᠤ᠄
— ᠳᠡᠭᠡᠳᠦ ᠭᠠᠵᠠᠷ ᠤ᠋ᠨ ᠰᠢᠢᠳᠪᠦᠷᠢ ᠶᠣᠰᠣ ᠪᠠᠷ ᠨᠠᠷᠢᠨ ᠮᠡᠷᠭᠡᠵᠢᠯ ᠦ᠋ᠨ ᠵᠠᠰᠠᠪᠤᠷᠢᠴᠢᠨ ᠲᠡᠮᠦᠷᠬᠦᠦ ᠶ᠋ᠢ ᠮᠠᠯ ᠠᠵᠤ ᠠᠬᠤᠢ ᠳ᠋ᠤ᠌ ᠰᠢᠯᠵᠢᠭᠦᠯᠦᠨ ᠠᠵᠢᠯᠯᠠᠭᠤᠯᠬᠤ ᠪᠠᠷ ᠪᠣᠯᠤᠯᠠ ᠭᠡᠵᠦ ᠮᠡᠳᠡᠭᠳᠡᠪᠡ᠃
— ᠲᠧᠭᠨᠢᠭ ᠲᠥᠬᠥᠭᠡᠷᠦᠮᠵᠢ ᠣᠯᠠᠨ ᠲᠠᠢ ᠮᠠᠨ ᠤ᠋ ᠬᠢ ᠰᠢᠭ ᠭᠠᠵᠠᠷ ᠳᠤ ᠨᠠᠷᠢᠨ ᠮᠡᠷᠭᠡᠵᠢᠯ ᠦ᠋ᠨ ᠵᠠᠰᠠᠪᠤᠷᠢᠴᠢ ᠬᠡᠷᠡᠭ ᠦᠭᠡᠢ ᠭᠡᠵᠢ ᠤᠤ ᠭᠡᠮᠡᠨ ᠨᠢᠭᠡᠨ ᠬᠥᠮᠦᠨ ᠠᠰᠠᠭᠤᠪᠠ᠃
ᠲᠡᠮᠦᠷᠴᠢᠳᠦᠷ᠄
— ᠣᠳᠣ ᠮᠡᠳᠡᠬᠦ ᠦᠭᠡᠢ ᠲᠡᠭᠡᠵᠦ ᠦᠵᠡᠭᠰᠡᠨ ᠶᠦᠮ ᠪᠠᠢᠯᠭᠦᠢ ᠭᠡᠪᠡ᠃
ᠣᠴᠢᠵᠤ ᠣᠴᠢᠵᠤ ᠶᠠᠭᠠᠬᠢᠭᠠᠳ ᠵᠠᠪᠠᠯ ᠲᠡᠮᠦᠷᠬᠦᠦ ᠶ᠋ᠢ ᠶᠠᠪᠤᠭᠤᠯ ᠭᠡᠰᠡᠨ ᠬᠡᠷᠡᠭ ᠪᠣᠢ ᠭᠡᠵᠦ ᠪᠠᠰᠠ ᠨᠢᠭᠡ ᠬᠥᠮᠦᠨ ᠠᠰᠠᠭᠤᠪᠠ᠃
— ᠥᠭᠡᠷᠡ ᠠᠷᠭᠠ ᠠᠯᠠᠭᠠ᠂ ᠲᠠᠩᠳᠠ ᠴᠢᠬᠤᠯᠠ ᠬᠥᠮᠦᠰ ᠪᠠᠢᠨᠠ ᠰᠢᠦ ᠳᠡ ᠭᠡᠵᠦ ᠲᠡᠮᠦᠷᠴᠢᠳᠦᠷ ᠬᠠᠷᠢᠭᠤᠯᠪᠠ᠃
ᠲᠡᠭᠡᠲᠡᠯᠡ ᠤᠳᠠᠬᠤ ᠦᠭᠡᠢ ᠲᠡᠳᠬᠦᠪᠦᠷᠢ ᠳ᠋ᠦ᠍ ᠭᠠᠷᠬᠤ ᠲᠤᠷᠢᠭ ᠭᠡᠳᠡᠭ ᠬᠥᠭᠰᠢᠨ ᠪᠣᠰᠤᠭᠠᠳ᠄
— ᠦᠭᠡᠢ ᠠ᠋᠂ ᠬᠡᠦᠬᠡᠳ᠂ ᠮᠠᠨ ᠤ᠋ ᠳ᠋ᠤ᠌ ᠴᠢᠨᠢ ᠮᠠᠯ ᠠᠵᠤ ᠠᠬᠤᠢ ᠶ᠋ᠢᠨ ᠮᠡᠷᠭᠡᠵᠢᠯᠲᠡᠨ ᠨᠢᠭᠡ ᠪᠠᠢᠳᠠᠭ ᠶᠤᠮ ᠰᠢᠦ ᠳᠡ ᠭᠡᠪᠡ᠃
— ᠬᠡᠨ ᠪᠣᠢ?
— ᠬᠡᠨ ᠪᠣᠢ ᠭᠡᠵᠦ ᠬᠥᠮᠦᠰ ᠥᠨᠳᠡᠯᠵᠡᠪᠡ᠃
— ᠡᠨᠡ ᠪᠣᠯᠪᠠᠰᠤᠨ ᠬᠦᠴᠦᠨ ᠲᠡᠮᠦᠷᠴᠢᠳᠦᠷ ᠴᠢᠨᠢ ᠥᠪᠡᠷ ᠢ᠋ᠶ᠋ᠡᠨ ᠨᠢᠭᠡᠳᠦᠯ ᠦ᠋ᠨ ᠵᠣᠣᠲ᠋ᠧᠭᠨᠢᠭᠴᠢ ᠪᠠᠢᠭᠰᠠᠨ ᠬᠥᠮᠦᠨ ᠰᠢᠦ ᠳᠡ ᠭᠡᠵᠦ ᠲᠤᠷᠢᠭ ᠡᠪᠦᠭᠡᠨ ᠬᠡᠯᠡᠪᠡ᠃
ᠬᠣᠵᠢᠮ ᠰᠣᠨᠣᠰᠪᠠᠯ ᠲᠡᠷᠡ ᠠᠯᠪᠠᠨ ᠪᠠᠢᠭᠤᠯᠭᠠ ᠶ᠋ᠢᠨ ᠲᠤᠷᠢᠭ ᠭᠤᠸᠠᠢ ᠠ᠋ᠴᠠ ᠪᠤᠰᠤᠳ《 ᠴᠢᠬᠤᠯᠠ ᠬᠥᠮᠦᠰ》 ᠪᠠᠭᠤᠷᠢ ᠰᠠᠭᠤᠷᠢ ᠪᠠᠨ ᠬᠠᠳᠠᠭᠠᠯᠠᠭᠰᠠᠨ ᠬᠡᠪ ᠢ᠋ᠶ᠋ᠡᠷ ᠭᠡᠯᠴᠡᠨᠡ᠃
- - - -
① ᠮᠤᠩᠭᠤᠯ ᠰᠢᠲᠠᠷ ᠤᠨ ᠬᠦᠴᠦᠲᠦ ᠬᠥᠯᠥᠭ
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠳᠠᠪᠰᠢᠯᠲᠦ
ᠬᠢᠨᠠᠭ᠍ᠴᠢ : ᠰᠠᠷᠠᠨᠠ
2024᠂ 1᠂ 25 ᠤ ᠡᠳᠦᠷ