ᠤᠯᠠᠭᠠᠨᠪᠠᠭᠠᠲᠤᠷ ᠤᠨ ᠮᠠᠭᠲᠠᠭᠠᠯ Улаанбаатарын магтаал
315ᠤᠯᠠᠭᠠᠨᠪᠠᠭᠠᠲᠤᠷ ᠤᠨ ᠮᠠᠭᠲᠠᠭᠠᠯ
ᠮᠥᠩᠭᠥᠨ ᠲᠤᠤᠯᠠ ᠶᠢ ᠡᠮᠵᠢᠭᠰᠡᠨ
ᠭᠠᠩᠭᠠᠩ ᠬᠣᠲᠠ ᠪᠠᠨ ᠮᠠᠭᠲᠠᠶᠠ
ᠮᠥᠷᠡᠨ ᠭᠣᠣᠯ ᠤ᠋ᠨ ᠣᠨᠳᠣᠷᠣᠭᠠ ᠰᠢᠭ᠋
ᠲᠡᠭᠦᠨ ᠦ᠌ ᠬᠥᠭᠵᠢᠯ ᠢ᠋ ᠪᠠᠬᠠᠳᠤᠶᠠ᠃
ᠦᠶᠡ ᠶ᠋ᠢᠨ ᠦᠶᠡ ᠳ᠋ᠦ᠍ ᠳᠦᠩᠬᠦᠢᠭᠰᠡᠨ
ᠪᠣᠭᠳᠠ ᠠᠭᠤᠯᠠ ᠶ᠋ᠢᠨ ᠠᠷᠤ ᠳ᠋ᠤ᠌
ᠦᠷᠡ ᠶ᠋ᠢᠨ ᠦᠷᠡ ᠳ᠋ᠦ᠍ ᠰᠦᠨᠳᠡᠷᠯᠡᠬᠦ
ᠤᠯᠠᠭᠠᠨᠪᠠᠭᠠᠲᠤᠷ ᠬᠣᠲᠠ ᠮᠢᠨᠢ
ᠥᠨᠳᠥᠷ ᠪᠠᠷᠢᠯᠭᠠ ᠨᠢ ᠵᠢᠭᠳᠡᠷᠡᠭᠰᠡᠨ
ᠥᠷᠭᠡᠨ ᠰᠠᠢᠬᠠᠨ ᠴᠢᠯᠥᠭᠡᠲᠡᠢ
ᠵᠠᠭᠤᠨ ᠲᠦᠮᠡ ᠪᠡᠷ ᠵᠢᠷᠢᠢᠭᠰᠡᠨ
ᠵᠤᠯᠵᠠᠭᠠᠨ ᠨᠣᠭᠣᠭᠠᠨ ᠮᠣᠳᠣ ᠲᠠᠢ
ᠠᠯᠠᠭ ᠴᠡᠴᠡᠭ ᠨᠠᠢᠭᠤᠭᠰᠠᠨ
ᠠᠩᠬᠢᠯᠤᠮᠠ ᠰᠠᠢᠬᠠᠨ ᠦᠨᠦᠷ ᠲᠡᠢ
ᠠᠵᠢᠯᠴᠢ ᠲᠦᠮᠡᠨ ᠢ᠋ᠶ᠋ᠡᠨ ᠪᠠᠶᠠᠰᠤᠭᠤᠯᠤᠭᠰᠠᠨ
ᠠᠮᠠᠷᠠᠯᠲᠠ ᠴᠡᠩᠭᠡᠭᠡᠨ ᠦ᠌ ᠭᠠᠵᠠᠷ ᠲᠠᠢ
ᠮᠢᠩᠭᠠᠨ ᠪᠡᠭᠡᠷᠢ ᠶ᠋ᠢ ᠲᠣᠪᠴᠢᠯᠠᠳᠠᠭ
ᠬᠤᠷᠳᠤᠨ ᠬᠥᠯᠭᠡ ᠶ᠋ᠢᠨ ᠵᠣᠭᠰᠣᠭᠠᠯ ᠲᠠᠢ
ᠲᠦᠮᠡᠨ ᠦᠶᠡ ᠳ᠋ᠦ᠍ ᠮᠥᠩᠬᠡᠷᠡᠬᠦ
ᠲᠡᠦᠬᠡ ᠱᠠᠰᠲᠢᠷ ᠶᠡᠬᠡ ᠲᠡᠢ
ᠰᠢᠯ ᠲᠣᠯᠢ ᠰᠢᠭ᠋ ᠭᠢᠯᠠᠯᠵᠠᠭᠰᠠᠨ
ᠮᠠᠰᠢᠨ ᠲᠧᠭᠨᠢᠭ ᠵᠥᠷᠢᠯᠳᠦᠭᠰᠡᠨ
ᠰᠢᠷᠬᠡᠭ ᠳᠠᠷᠠᠭᠠᠯᠠᠨ ᠵᠣᠬᠢᠴᠠᠭᠰᠠᠨ
ᠭᠡᠷᠡᠯ ᠦ᠋ᠨ ᠳᠣᠬᠢᠶᠠ ᠰᠣᠯᠢᠯᠴᠠᠭᠰᠠᠨ
ᠠᠽᠢᠶᠠ ᠲᠢᠪ ᠦ᠋ᠨ ᠴᠡᠭᠡᠵᠢᠨ ᠳ᠋ᠦ᠍
ᠣᠳᠣ ᠪᠣᠯᠵᠤ ᠢᠷᠠᠢᠭᠰᠠᠨ
ᠠᠷᠪᠢᠨ ᠳᠡᠯᠡᠬᠡᠢ ᠶ᠋ᠢᠨ ᠬᠠᠮᠢᠭᠠ ᠴᠤ᠌
ᠲᠣᠳᠣ ᠨᠡᠷᠡ ᠨᠢ ᠳᠠᠭᠤᠷᠢᠰᠤᠭᠰᠠᠨ
ᠠᠭᠤᠵᠢᠮ ᠰᠡᠳᠬᠢᠯᠲᠦ ᠲᠦᠮᠡᠨ ᠦ᠌
ᠢᠲᠡᠭᠡᠯ ᠵᠣᠷᠢᠭ ᠢ᠋ ᠪᠠᠳᠠᠷᠠᠭᠠᠭᠰᠠᠨ
ᠤᠯᠠᠭᠠᠨᠪᠠᠭᠠᠲᠤᠷ ᠬᠣᠲᠠ ᠮᠢᠨᠢ
ᠰᠡᠳᠬᠢᠯ ᠵᠢᠷᠦᠬᠡᠨ ᠳ᠋ᠦ᠍ ᠤᠶᠠᠭᠠ ᠲᠠᠢ᠃
ᠰᠦᠨ ᠴᠠᠭᠠᠨ ᠰᠡᠳᠬᠢᠯᠲᠦ
ᠵᠥᠪᠯᠡᠯᠲᠦ ᠶᠡᠬᠡ ᠭᠦᠷᠦᠨ ᠲᠡᠢ
ᠠᠬᠠᠨ ᠲᠡᠭᠦᠰ ᠦ᠋ᠨ ᠬᠣᠯᠪᠣᠭᠠ ᠲᠠᠢ
ᠰᠦᠮᠪᠦᠷ ᠥᠩᠭᠡᠲᠦ ᠴᠠᠮᠬᠠᠭ
ᠬᠥᠬᠡ ᠲᠩᠷᠢ ᠶ᠋ᠢ ᠮᠥᠷᠦᠯᠡᠭᠡᠰᠦᠲᠡᠢ
ᠤᠬᠠᠭᠠᠨᠲᠤ ᠵᠠᠩᠵᠤᠨ ᠰᠦᠬᠡ ᠶ᠋ᠢᠨ
ᠠᠭᠤᠵᠢᠮ ᠴᠡᠯᠡᠭᠡᠷ ᠲᠠᠯᠠᠪᠠᠢ ᠲᠠᠢ
ᠬᠥᠮᠦᠨ ᠦ᠌ ᠵᠢᠷᠭᠠᠯᠠᠩᠲᠤ ᠢᠷᠡᠭᠡᠳᠦᠢ
ᠬᠡᠦᠬᠡᠳ ᠪᠠᠭᠠᠴᠤᠳ ᠪᠠᠶᠠᠰᠤᠭᠠ ᠲᠠᠢ
ᠬᠥᠯᠭᠡ ᠶ᠋ᠢᠨ ᠬᠤᠷᠳᠤ ᠪᠠᠷ ᠳᠡᠭᠦᠯᠢᠭᠰᠡᠨ
ᠬᠦᠰᠡᠯ ᠪᠦᠬᠦᠨ ᠲᠡᠮᠡᠦᠯᠦᠭᠡ ᠲᠡᠢ
ᠡᠢᠮᠦ ᠰᠠᠢᠬᠠᠨ ᠭᠦᠷᠦᠨ ᠦ᠌
ᠶᠡᠬᠡ ᠬᠥᠭᠵᠢᠯ ᠦ᠋ᠨ ᠲᠥᠪ᠃
ᠤᠯᠠᠭᠠᠨᠪᠠᠭᠠᠲᠤᠷ ᠬᠣᠲᠠ ᠪᠠᠨ
ᠮᠠᠭᠲᠠᠭᠠᠳ ᠮᠠᠭᠲᠠᠭᠠᠳ ᠳᠠᠭᠤᠰᠤᠰᠢ ᠦᠭᠡᠢ
ᠤᠯᠤᠰ ᠮᠣᠩᠭᠣᠯ ᠣᠷᠣᠨ ᠢ᠋ᠶ᠋ᠠᠨ
ᠪᠠᠬᠠᠳᠤᠭᠠᠳ ᠪᠠᠬᠠᠳᠤᠭᠠᠳ ᠪᠠᠷᠠᠰᠢ ᠦᠭᠡᠢ᠃
Улаанбаатарын магтаал
Мөнгөн Туулыг эмжсэн
Ганган хотоо магтъя
Мөрөн голын ундраа шиг
Түүний хөгжлийг бахадъя.
Үеийн үед дүнхийсэн
Богд уулын ард
Үрийн үрд сүндэрлэх
Улаанбаатар хот минь
Өндөр барилга нь жигдэрсэн
Өргөн сайхан чөлөөтэй
Зуун түмээр жирийсэн
Зулзаган ногоон модтой
Алаг цэцэг найгасан
Анхилам сайхан үнэртэй
Ажилч түмнээ баясуулсан
Амралт цэнгээний газартай
Мянган бээрийг товчилдог
Хурдан хөлгийн зогсоолтой
Түмэн үед мөнхрөх
Түүх шастир ихтэй
Шил толь шиг гялалзсан
Машин техник зөрөлдсөн
Ширхэг дараалан зохицсон
Гэрлийн дохио солилцсон
Ази тивийн цээжинд
Од болж ярайсан
Арвин дэлхийн хаана ч
Тод нэр нь дуурссан
Уужим сэтгэлт түмний
Итгэл зоригийг бадраасан
Улаанбаатар хот минь
Сэтгэл зүрхэнд уяатай.
Сүүн цагаан сэтгэлт
Зөвлөлт их гүрэнтэй
Ахан дүүсийн холбоотой
Сүмбэр өнгөт цамхаг
Хөх тэнгэрийг мөрлөөстэй
Ухаант жанжин
Сүхийн
Уужим цэлгэр талбайтай
Хүний жаргалант ирээдүй
Хүүхэд багачууд баясаатай
Хөлгийн хурдаар дүүлсэн
Хүсэл бүхэн тэмүүлээтэй
Ийм сайхан гүрний
Их хөгжлийн төв.
Улаанбаатар хотоо
Магтаад магтаад дуусашгүй
Улс монгол орноо
Бахдаад бахдаад баршгүй.