ᠭᠤᠷᠪᠠᠨ ᠡᠳᠦᠷ – ᠠ ᠂ ᠰᠡᠮᠪᠡᠯᠬᠥ᠋ᠨᠳᠦᠪ Гурван өдөр – А ᠂ Сэмбэлхүндэв
320ᠭᠤᠷᠪᠠᠨ ᠡᠳᠦᠷ
ᠠ᠂ ᠰᠡᠮᠪᠡᠯᠬᠥ᠋ᠨᠳᠦᠪ
( ᠱᠣᠭ ᠰᠢᠯᠦᠭ ᠭᠤᠷᠪᠠ)
ᠭᠤᠷᠪᠠᠳᠤᠭᠠᠷ ᠰᠠᠷᠠ ᠶ᠋ᠢᠨ ᠳᠣᠯᠣᠭᠠᠨ ᠤ᠋ ᠡᠳᠦᠷ
ᠳ᠋ᠣᠣ ᠶ᠋ᠢ ᠳᠡᠯᠭᠡᠭᠦᠷ ᠲᠤ ᠣᠷᠣᠬᠤ ᠳ᠋ᠤ᠌
ᠳᠣᠲᠣᠨᠣ ᠲᠠᠨᠢᠯ ᠨᠢ ᠲᠠᠭᠠᠷᠠᠯᠳᠤᠭᠠᠳ
— ᠠᠵᠢᠯ ᠳ᠋ᠠᠭᠠᠨ ᠣᠴᠢᠬᠤ ᠨᠢ ᠡᠨᠡ ᠤᠤ? ᠭᠡᠬᠦ ᠳ᠋ᠦ᠍
— ᠠᠩᠵᠠᠭᠠᠢ ᠴᠢᠨᠢ ᠴᠢᠯᠥᠭᠡ ᠲᠡᠢ᠁
ᠪᠠᠶᠠᠷ ᠤ᠋ᠨ ᠦᠶᠡ ᠶ᠋ᠢᠨ ᠠᠵᠢᠯ ᠢ᠋
ᠪᠠᠵᠠᠭᠠᠵᠤ ᠥᠭᠬᠦ ᠡᠴᠡ ᠪᠣᠯᠬᠤ ᠦᠭᠡᠢ
ᠬᠣᠷᠢᠨ ᠬᠡᠳᠦᠨ ᠬᠡᠦᠬᠡᠨ
ᠬᠣᠶᠠᠷ ᠡᠭᠡᠯᠵᠢ ᠪᠡᠷ ᠢᠷᠡᠨᠡ ᠭᠡᠵᠦ
ᠥᠴᠥᠭᠡᠳᠦᠷ ᠣᠷᠣᠢ
ᠥᠨᠥᠬᠢ ᠮᠠᠨᠢ ᠬᠡᠯᠡᠭᠰᠡᠨ
ᠮᠢᠬᠠ᠂ ᠰᠦ᠂ ᠰᠢᠬᠢᠷ
ᠮᠠᠰᠢ ᠶᠡᠬᠡ ᠪᠡᠯᠡᠳᠬᠦ ᠡᠴᠡ
ᠪᠣᠯᠬᠤ ᠦᠭᠡᠢ ᠪᠣᠯᠤᠭᠠᠳ ᠶᠠᠪᠤᠴᠢᠬᠠᠯᠠ
( ᠪᠣᠳᠣᠵᠤ ᠲᠥᠯᠥᠪᠯᠡᠭᠰᠡᠨ ᠢ᠋ᠶ᠋ᠡᠷ ᠪᠣᠯᠪᠠᠯ)
ᠠᠷᠢᠬᠢ ᠳᠠᠷᠠᠰᠤ ᠤᠮᠳᠠᠭᠠᠨ
ᠠᠪᠳᠠᠷᠠ ᠪᠠᠷ ᠠᠪᠬᠤ ᠠ᠋ᠴᠠ
ᠪᠤᠵᠠᠭᠠᠢ ᠲᠠᠷᠭᠤᠨ ᠮᠢᠬᠠ ᠪᠠᠷ
ᠪᠤᠤᠵᠠ ᠴᠢᠮᠬᠢᠬᠦ ᠡᠴᠡ ᠭᠣᠷᠢᠬᠤ ᠦᠭᠡᠢ ᠨᠢ
ᠬᠣᠶᠠᠷ ᠵᠠᠭᠤᠭᠠᠳ ᠢ᠋ ᠴᠢᠮᠬᠢᠬᠦ ᠳ᠋ᠦ᠍
ᠬᠣᠨᠣᠭ ᠤ᠋ᠨ ᠠᠵᠢᠯ ᠭᠠᠷᠤᠨᠠ ᠳᠠ᠃
ᠡᠢᠮᠦ ᠶᠡᠬᠡ ᠠᠵᠢᠯ ᠳ᠋ᠤ᠌
ᠡᠯᠵᠢᠭᠡ ᠰᠢᠭ ᠵᠢᠳᠬᠦᠬᠦ ᠡᠴᠡ ᠭᠡᠬᠦ ᠳ᠋ᠦ᠍ᠨᠢ
ᠬᠠᠨᠢ ᠪᠦᠯᠢ ᠳ᠋ᠡᠭᠡᠨ ᠶᠡᠬᠡ
ᠬᠠᠯᠠᠮᠵᠢᠲᠠᠢ ᠬᠥᠮᠦᠨ ᠪᠠᠢᠨᠠ ᠰᠢᠦ ᠭᠡᠵᠦ
ᠳᠣᠲᠣᠨᠣ ᠶ᠋ᠢᠨ ᠲᠠᠨᠢᠯ ᠨᠥᠬᠥᠷ ᠨᠢ
ᠳᠣᠲᠣᠷᠠ ᠪᠠᠨ ᠳ᠋ᠣᠣ ᠶ᠋ᠢ ᠮᠠᠭᠲᠠᠵᠠᠢ᠃
ᠭᠤᠷᠪᠠᠳᠤᠭᠠᠷ ᠰᠠᠷᠠ ᠶ᠋ᠢᠨ ᠨᠠᠢ᠍ᠮᠠᠨ ᠤ᠋ ᠡᠳᠦᠷ
— ᠢᠮᠠᠭᠠᠨ ᠤ᠋ ᠥᠷᠥᠭᠡᠯ ᠮᠢᠬᠠ ᠴᠢᠨᠢ
ᠶᠠᠭᠠᠬᠢᠭᠠᠳ ᠭᠡᠰᠳᠡᠭ ᠦᠭᠡᠢ ᠡᠳ᠋ ᠪᠣᠢ
ᠬᠥᠮᠦᠨ《 ᠠᠮᠢᠲᠠᠨ》 ᠢᠷᠡᠪᠡᠯ
ᠬᠦᠵᠦᠭᠦᠦ ᠰᠡᠭᠡᠷ ᠡᠴᠡ ᠨᠢ ᠡᠬᠢᠯᠡᠭᠡᠳ
ᠬᠠ ᠭᠤᠶᠠ ᠶ᠋ᠢ ᠨᠢ ᠴᠤ᠌ ᠬᠠᠮᠢᠶᠠ ᠦᠭᠡᠢ
ᠬᠠᠪᠢᠷᠭᠠ ᠰᠦᠪᠡᠷᠭᠡ ᠶ᠋ᠢ ᠨᠢ ᠬᠦᠷᠲᠡᠯᠡ
ᠵᠠᠳᠠ ᠴᠠᠪᠴᠢᠭᠠᠳ ᠴᠢᠨᠠᠭᠠᠷᠠᠢ ᠭᠡᠵᠦ
ᠵᠠᠬᠢᠶᠠᠰᠤ ᠪᠢᠴᠢᠵᠦ ᠣᠷᠬᠢᠭᠠᠳ
ᠥᠷᠯᠥᠭᠡ ᠡᠷᠲᠡ ᠭᠠᠷᠤᠭᠰᠠᠨ ᠳ᠋ᠣᠣ
ᠡᠳᠦᠷ ᠳᠤᠮᠳᠠ ᠥᠩᠭᠡᠷᠡᠵᠦ ᠪᠠᠢᠬᠤ ᠳ᠋ᠤ᠌
ᠨᠢᠭᠡᠨ ᠲᠠᠨᠢᠯ ᠤ᠋ᠨ ᠳ᠋ᠠᠭᠠᠨ ᠣᠴᠢᠬᠤ ᠰᠠᠨ
ᠨᠡᠷᠡᠯᠡᠬᠦ ᠪᠠᠢᠲᠤᠭᠠᠢ ᠨᠡᠬᠡᠭᠰᠡᠭᠡᠷ
ᠠᠶᠠᠭᠠ ᠫᠢᠸᠣ ᠤᠤᠭᠤᠵᠤ ᠰᠠᠭᠤᠬᠤ ᠳ᠋ᠠᠭᠠᠨ
— ᠠᠪᠠᠭᠠᠢ ᠭᠡᠵᠦ ᠠᠪᠠᠭᠠᠢ ᠁
ᠬᠠᠷᠠᠵᠠᠨ ᠤ᠋ ᠤᠰᠤ ᠰᠢᠭ᠋
ᠲᠤᠩᠭᠠᠯᠠᠭ ᠬᠠᠷᠠ ᠨᠢᠳᠦ ᠲᠡᠢ
ᠬᠠᠰ ᠡᠷᠳᠡᠨᠢ ᠰᠢᠭ
ᠲᠤᠶᠠᠭᠠᠷᠠᠭᠰᠠᠨ ᠴᠠᠭᠠᠨ ᠰᠢᠲᠦ ᠲᠡᠢ ᠭᠡᠵᠦ
ᠠᠪᠠᠭᠠᠢ ᠪᠠᠨ ᠮᠠᠭᠲᠠᠵᠤ ᠭᠠᠷᠬᠤ ᠳ᠋ᠤ᠌
ᠠᠢᠯ ᠤ᠋ᠨ ᠡᠵᠡᠭᠲᠡᠢ ᠠᠮᠠ ᠨᠡᠭᠡᠭᠡᠵᠦ
— ᠳ᠋ᠣᠣ ᠴᠢᠨᠢ ᠬᠠᠷᠢᠨ ᠡᠬᠡᠨᠡᠷ ᠢ᠋ᠶ᠋ᠡᠨ
ᠳᠣᠷᠢᠭᠤᠨ ᠮᠠᠭᠲᠠᠳᠠᠭ ᠪᠣᠯᠵᠠᠢ ᠭᠡᠬᠦ ᠳ᠋ᠦ᠍
— ᠥᠨᠥᠳᠥᠷ ᠯᠡ ᠮᠠᠭᠲᠠᠬᠤ ᠦᠭᠡᠢ ᠪᠣᠯ
ᠥᠭᠡᠷᠡ ᠬᠡᠵᠢᠶᠡ ᠮᠠᠭᠲᠠᠬᠤ ᠪᠢᠯᠡ ᠭᠡᠪᠡ᠃
ᠭᠤᠷᠪᠠᠳᠤᠭᠠᠷ ᠰᠠᠷᠠ ᠶ᠋ᠢᠨ ᠶᠢᠰᠦᠨ ᠦ᠌ ᠡᠳᠦᠷ
ᠪᠦᠬᠦ ᠨᠡᠢᠲᠡ ᠶ᠋ᠢᠨ ᠪᠠᠶᠠᠷ ᠢ᠋ᠶ᠋ᠠᠷ ᠴᠤ᠌
ᠪᠦᠲᠦᠨ ᠠᠮᠠᠷᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ
ᠠᠪᠠᠭᠠᠢ ᠶ᠋ᠢᠨ ᠠᠵᠢᠯ ᠳ᠋ᠤ᠌ ᠪᠠᠷᠢᠭᠳᠠᠭᠰᠠᠭᠠᠷ
ᠠᠯᠪᠠᠨ ᠳᠡᠭᠡᠷᠡ ᠴᠤ᠌ ᠣᠴᠢᠭᠰᠠᠨ ᠦᠭᠡᠢ
ᠶᠢᠰᠦᠨ ᠦ ᠡᠳᠦᠷ ᠴᠤ᠌ ᠤᠭ ᠨᠢ
ᠶᠡᠷᠦᠩᠬᠡᠢ ᠳ᠋ᠡᠭᠡᠨ ᠰᠢᠷᠠ ᠲᠠᠢᠯᠳᠠᠭ
ᠭᠡᠯᠡ ᠴᠤ᠌ ᠣᠴᠢᠬᠤ ᠦᠭᠡᠢ ᠪᠣᠯᠬᠣᠷ
ᠭᠡᠷ ᠲᠡᠭᠡᠨ ᠬᠡᠪᠲᠡᠭᠡ ᠪᠢᠵᠡ? ᠭᠡᠬᠦ ᠦᠭᠡᠢ
ᠥᠨᠥᠬᠢ ᠨᠡᠷᠡᠲᠦ ᠶ᠋ᠢ ᠪᠡᠨ
ᠥᠨᠵᠢᠨ ᠤᠤᠭᠤᠵᠠᠢ ᠭᠡᠬᠦ ᠪᠠᠢᠯᠭᠦᠢ᠃
ᠭᠡᠲᠡᠯᠡ ᠪᠢ ᠪᠣᠯᠤᠭᠰᠠᠨ ᠬᠣᠢᠨᠠ
ᠭᠡᠷ ᠦ᠋ᠨ ᠠᠵᠢᠯ ᠳ᠋ᠤ᠌ ᠳᠠᠷᠤᠭᠳᠠᠵᠤ ᠰᠠᠭᠤᠨᠠ
ᠠᠪᠠᠭᠠᠢ ᠬᠠᠷᠢᠨ ᠣᠷᠣᠨ ᠠ᠋ᠴᠠ ᠪᠠᠨ ᠪᠤᠰᠣᠯ ᠥᠬᠡᠢ
ᠠᠮᠤᠷ ᠲᠠᠢᠪᠤᠩ ᠤᠨᠲᠠᠵᠤ ᠪᠠᠢᠭᠠ ᠭᠡᠵᠦ
ᠠᠢᠯ ᠳ᠋ᠠᠭᠠᠨ ᠳ᠋ᠣᠣ ᠁ ᠶᠠᠷᠢᠵᠤ ᠰᠠᠭᠤᠲᠠᠯᠠ
ᠠᠵᠢᠯ ᠠ᠋ᠴᠠ ᠪᠠᠨ ᠠᠪᠠᠭᠠᠢ ᠨᠢ ᠢᠷᠡᠭᠡᠳ
— ᠭᠡᠷ ᠦ᠋ᠨ ᠲᠦᠯᠬᠢᠭᠦᠷ ᠠᠯᠢ ᠭᠡᠪᠡᠯ
《 ᠭᠡᠮ ᠦᠭᠡᠢ》 ᠳ᠋ᠣᠣ ᠤᠬᠤᠰᠬᠢᠯᠡ ᠁
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠩᠷᠢ ᠡᠵᠢ
ᠬᠢᠨᠠᠭ᠍ᠴᠢ : ᠰᠠᠷᠠᠨᠠ
2024᠂ 2᠂ 5 ᠦ᠌ ᠡᠳᠦᠷ