ᠠᠯᠳᠠᠷ ᠤᠨ ᠬᠡᠩᠬᠡᠭ – ᠵ ᠂ ᠰᠠᠩᠳᠠᠭᠠ Алдрын хэнхэг – З ᠂ Сандага
263ᠠᠯᠳᠠᠷ ᠤᠨ ᠬᠡᠩᠬᠡᠭ
ᠠᠯᠳᠠᠷ ᠤ᠋ᠨ ᠬᠡᠩᠬᠡᠭ①
ᠵ᠂ ᠰᠠᠩᠲᠠᠭᠠ
( ᠱᠣᠭ ᠥᠭᠦᠯᠡᠯᠭᠡ)
ᠠᠵᠢᠯ ᠳ᠋ᠠᠭᠠᠨ ᠣᠴᠢᠬᠤ ᠪᠠᠷ ᠶᠠᠪᠤᠬᠤ ᠳ᠋ᠠᠭᠠᠨ ᠲᠠᠨᠢᠯ ᠲᠠᠢ ᠲᠠᠭᠠᠷᠠᠯᠳᠤᠨ ᠵᠠᠮ ᠨᠡᠢᠯᠡᠨ ᠠᠯᠬᠤᠪᠠ᠃ ᠪᠢᠳᠡᠨ ᠢ᠋ ᠨᠣᠮ ᠤ᠋ᠨ ᠳᠡᠯᠭᠡᠭᠦᠷ ᠦ᠋ᠨ ᠬᠣᠢᠲᠤ ᠥᠨᠴᠥᠭ ᠢ᠋ᠶ᠋ᠡᠷ ᠲᠣᠭᠣᠷᠢᠲᠠᠯᠠ ᠡᠮᠦᠨᠡ ᠡᠴᠡ ᠭᠠᠷᠴᠤ ᠢᠷᠡᠭᠰᠡᠨ ᠣᠴᠣᠭᠣᠷ ᠬᠥᠮᠦᠨ ᠮᠢᠨᠦ ᠨᠥᠬᠥᠷ ᠢ᠋ ᠬᠠᠷᠠᠮᠠᠭᠴᠠ ᠡᠶᠡᠯᠳᠡᠭᠬᠡᠨ ᠢᠨᠢᠶᠡᠮᠰᠦᠭᠯᠡᠵᠦ ᠲᠣᠯᠣᠭᠠᠢ ᠪᠠᠨ ᠤᠨᠠᠭᠠᠴᠢᠬᠠᠬᠤ ᠰᠢᠬᠠᠨ ᠲᠣᠩᠭᠣᠰᠬᠢᠪᠡ᠃ ᠲᠠᠨᠢᠯ ᠮᠠᠨᠢ ᠬᠠᠷᠢᠭᠤ ᠮᠡᠨᠳᠦᠯᠡᠭᠡᠳ ᠵᠥᠷᠢᠬᠦ ᠳ᠋ᠡᠭᠡᠨ ᠭᠡᠨᠡᠳᠲᠡ ᠲᠦᠰᠬᠢᠲᠡᠯᠡ ᠢᠨᠢᠶᠡᠳᠦ ᠠᠯᠳᠠᠪᠠ᠃
—《 ᠤᠬᠢᠯᠠᠬᠤ ᠶ᠋ᠢ ᠪᠤᠤ ᠠᠰᠠᠭᠤ᠂ ᠢᠨᠢᠶᠡᠬᠦ ᠶ᠋ᠢ ᠠᠰᠠᠭᠤ》 ᠭᠡᠳᠡᠭ ᠪᠢᠵᠡ ᠭᠡᠬᠦ ᠳ᠋ᠦ᠍ ᠲᠡᠷᠡ ᠬᠠᠷᠢᠭᠤ ᠡᠢᠨ ᠥᠭᠦᠯᠡᠷᠦᠨ᠄
— ᠡᠨᠡ ᠴᠦ᠍ ᠨᠠᠳᠠ ᠳ᠋ᠤ᠌ ᠭᠡᠮ ᠬᠢᠭᠡ ᠦᠭᠡᠢ ᠯᠡ ᠳᠡ ᠵᠠᠢᠯᠠᠭᠤᠯ! ᠭᠡᠬᠦ ᠳ᠋ᠡᠭᠡᠨ ᠯᠡ ᠬᠠᠷᠠᠬᠤ ᠪᠦᠷᠢ ᠳ᠋ᠡᠭᠡᠨ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠬᠥᠬᠡ ᠢᠨᠢᠶᠡᠳᠦ ᠬᠦᠷᠳᠡᠭ ᠶᠦᠮ᠃ ᠴᠢ ᠨᠠᠮᠠ ᠶ᠋ᠢ ᠵᠡᠷᠡᠮᠳᠡᠭ ᠬᠥᠮᠦᠨ ᠢ᠋ ᠳᠣᠭᠣᠭᠢᠯᠠᠯᠠ ᠭᠡᠵᠦ ᠡᠭᠳᠡᠭᠦᠴᠡᠵᠦ ᠪᠠᠢᠨᠠ ᠤᠤ? ᠦᠭᠡᠢ ᠬᠦ ᠪᠢ ᠴᠦ᠍ ᠲᠡᠢᠮᠦ ᠡᠷᠡᠭᠡ ᠴᠡᠭᠡᠷ ᠢ᠋ᠶ᠋ᠡᠨ ᠪᠠᠷᠠᠭᠰᠠᠨ ᠴᠠᠪᠳᠠᠭ ᠳᠣᠲᠣᠷᠠ ᠲᠠᠢ ᠬᠥᠮᠦᠨ ᠪᠢᠰᠢ ᠰᠢᠦ! ᠪᠢ ᠶᠡᠬᠡᠳᠡ ᠭᠠᠢᠬᠠᠵᠤ᠄
— ᠲᠡᠭᠡᠭᠡᠳ ᠶᠠᠮᠠᠷ ᠤᠴᠢᠷ ᠲᠠᠢ ᠪᠢᠯᠡ ᠭᠡᠵᠦ ᠠᠰᠠᠭᠤᠪᠠ᠃
— ᠤᠴᠢᠷᠰᠠᠬᠤ ᠪᠠᠷ ᠭᠣᠴᠣ ᠭᠣᠢᠳᠠ ᠶᠠᠭᠤᠮᠠ ᠦᠭᠡᠢ ᠯᠡ ᠳᠡ᠃《 ᠮᠡᠬᠡᠲᠦ ᠮᠡᠬᠡᠨ ᠳ᠋ᠡᠭᠡᠨ》 ᠭᠡᠳᠡᠭ ᠪᠣᠯᠤᠭᠰᠠᠨ ᠶᠤᠮ ᠭᠡᠳ ᠬᠡᠰᠡᠭ ᠴᠢᠮᠡᠭᠡ ᠦᠭᠡᠢ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠦᠷᠭᠦᠯᠵᠢᠯᠡᠭᠦᠯᠦᠨ ᠥᠭᠦᠯᠡᠭᠰᠡᠨ ᠨᠢ᠄
— ᠪᠢ ᠠᠷᠪᠠᠭᠠᠳ ᠵᠢᠯ ᠦ᠋ᠨ ᠡᠮᠦᠨᠡ ᠠᠪᠰᠠᠷᠬᠠᠨ ᠣᠷᠣᠨ ᠲᠣᠭᠠ ᠲᠠᠢ᠂ ᠤᠷᠲᠤ ᠨᠡᠷᠡ ᠲᠡᠢ ᠠᠯᠪᠠᠨ ᠪᠠᠢᠭᠤᠯᠭᠠ ᠳ᠋ᠤ᠌ ᠠᠵᠢᠯᠯᠠᠵᠤ ᠪᠠᠢᠯᠠ᠃ ᠪᠠᠰᠠᠩ ᠭᠠᠷᠠᠭ( ᠭᠠᠷᠠᠭ ᠤ᠋ᠨ ᠲᠠᠪᠤᠨ ᠤ᠋) ᠤᠨ ᠣᠷᠣᠢ ᠠᠵᠢᠯ ᠠ᠋ᠴᠠ ᠪᠠᠨ ᠲᠠᠷᠬᠠᠲᠠᠯᠠ《 ᠪᠦᠬᠦ ᠠᠵᠢᠯᠴᠢᠳ ᠠᠵᠢᠯ ᠤ᠋ᠨ ᠬᠤᠪᠴᠠᠰᠤ ᠲᠠᠢ ᠪᠡᠯᠡᠨ ᠴᠤᠭᠯᠠᠷᠠᠰᠤᠭᠠᠢ᠂ ᠨᠢᠭᠡ ᠴᠦ᠍ ᠬᠥᠮᠦᠨ ᠬᠣᠵᠢᠮᠳᠠᠵᠤ ᠦᠯᠦ ᠪᠣᠯᠤᠨᠠ》 ᠭᠡᠰᠡᠨ ᠵᠠᠷᠯᠠᠯ ᠡᠯᠭᠦᠭᠡ ᠲᠡᠢ ᠬᠠᠷᠠᠭᠳᠠᠨᠠ᠃
ᠮᠠᠷᠭᠠᠰᠢ ᠨᠢ ᠳᠤᠷᠠᠳᠤᠭᠰᠠᠨ ᠴᠠᠭ ᠲᠤ ᠵᠢᠭᠠᠭᠰᠠᠨ ᠭᠠᠵᠠᠷ ᠨᠢ ᠣᠴᠢᠯᠠ᠃ ᠳᠠᠷᠤᠭᠠ ᠮᠠᠨᠢ ᠺᠣᠨᠲ᠋ᠣᠷ ᠤ᠋ᠨ ᠢ᠋ᠶ᠋ᠠᠨ ᠡᠭᠦᠳᠡᠨ ᠳ᠋ᠦ᠍ ᠤᠭᠤᠴᠠ ᠪᠠᠨ ᠡᠭᠦᠷᠦᠨ ᠵᠣᠭᠰᠣᠵᠠᠢ᠃ ᠪᠢᠳᠡ ᠬᠣᠶᠠᠷ ᠲᠠᠢ ᠰᠠᠶᠢ ᠵᠥᠷᠢᠭᠰᠡᠨ ᠤᠭᠴᠤᠭᠤᠷ ᠰᠠᠩᠭᠢᠲᠤᠤ ᠲᠣᠮᠣ ᠴᠠᠭᠠᠨ ᠰᠢᠲᠦ ᠪᠡᠨ ᠢᠷᠠᠯᠵᠠᠭᠤᠯᠤᠨ ᠢᠨᠢᠶᠡᠵᠦ᠂ ᠯᠤᠬᠠᠭᠠᠷ ᠴᠠᠭᠠᠨ ᠬᠦᠵᠦᠭᠦᠦ ᠪᠡᠨ ᠭᠢᠯᠵᠢᠢᠯᠭᠡᠨ ᠶᠠᠮᠠᠷ ᠨᠢᠭᠡᠨ ᠵᠦᠢᠯ ᠶᠠᠷᠢᠬᠤ ᠠᠵᠢ᠃ ᠲᠡᠷᠡ ᠴᠦ᠍ ᠨᠠᠳᠠ ᠶᠠᠮᠠᠷ ᠫᠠᠳ ᠪᠠᠢᠬᠤᠪ᠂ ᠠᠵᠢᠯ ᠤ᠋ᠨ ᠭᠠᠵᠠᠷ ᠤ᠋ᠨ ᠬᠢᠨ ᠮᠠᠨᠢ《 ᠡᠨᠡ ᠵᠢᠯ ᠦ᠋ᠨ ᠥᠷᠭᠡᠨ ᠰᠦᠪᠪᠦᠲᠨᠢᠺ ᠮᠥᠨ ᠴᠦ᠍ ᠶᠡᠬᠡ ᠰᠤᠨᠵᠤ ᠪᠠᠢᠨᠠ ᠳᠠ᠂ ᠦᠷᠡ ᠠᠰᠢᠭ ᠨᠢ ᠶᠠᠭᠤ ᠭᠠᠷᠴᠤ ᠪᠠᠢᠳᠠᠭ ᠪᠣᠯ》᠂《 ᠵᠠ ᠪᠤᠤ ᠮᠡᠳᠡ᠂ ᠣᠨᠴᠠᠭᠠᠢ ᠱᠠᠭᠠᠷᠳᠠᠯᠭᠠ ᠥᠬᠡᠢ ᠶᠠᠭᠤᠮᠠᠨ ᠳ᠋ᠤ᠌ ᠬᠥᠷᠥᠩᠭᠡ ᠥᠷᠥᠵᠦ ᠴᠠᠭ ᠵᠠᠷᠤᠴᠠᠭᠤᠯᠤᠭᠠᠳ ᠪᠠᠢᠬᠤ ᠰᠢᠭ᠋ ᠰᠠᠨᠠᠭᠳᠠᠨᠠ》 ᠭᠡᠬᠦ ᠵᠡᠷᠭᠡ ᠪᠡᠷ ᠰᠢᠪᠡᠷ ᠠᠪᠢᠷ ᠶᠠᠷᠢᠯᠴᠠᠨᠠ᠃
ᠰᠡᠩᠭᠢᠲᠤᠤ ᠭᠡᠨᠡᠳᠲᠡ ᠴᠠᠭ ᠤᠷᠤᠭᠤ ᠪᠠᠨ ᠬᠢᠯᠠᠮᠬᠢᠵᠤ ᠳᠠᠷᠤᠭᠠ ᠥᠭᠡᠳᠡ ᠬᠠᠷᠠᠨ ᠢᠨᠢᠶᠡᠵᠦ᠄《 ᠭᠦᠱᠢ ᠲᠠ ᠮᠢᠨᠢ ᠴᠠᠭ ᠠᠯᠳᠠᠬᠤ ᠨᠢ ᠪᠠᠢᠨᠠ ᠰᠢᠦ! ᠬᠡᠳᠦᠨ ᠮᠢᠨᠦ᠋ᠲ ᠦ᠋ᠨ ᠡᠮᠦᠨᠡ ᠴᠦ᠍ ᠠᠲᠤᠭᠠᠢ ᠬᠥᠳᠡᠯᠬᠦ ᠶᠤᠮᠰᠠᠨ!》 ᠭᠡᠳ ᠡᠢᠰᠢ ᠲᠡᠢᠰᠢ ᠬᠦᠯᠬᠦᠪᠡ᠃ ᠲᠡᠭᠦᠨ ᠲᠡᠢ ᠢᠵᠢᠯᠢ ᠲᠤᠰᠢᠶᠠᠯ ᠤ᠋ᠨ ᠬᠥᠮᠦᠰ《 ᠡᠨᠡ ᠶᠠᠭᠤ ᠴᠦ᠍ ᠪᠣᠢ ᠳᠠ᠂ ᠴᠠᠭ ᠪᠣᠯᠤᠭᠠ ᠦᠭᠡᠢ ᠯᠡ ᠪᠠᠢᠨᠠ》 ᠭᠡᠰᠡᠨ ᠶᠠᠩᠵᠤ ᠲᠠᠢ ᠬᠠᠷᠠᠵᠠᠭᠠᠨᠠ᠃《 ᠲᠦᠷᠦᠭᠦᠴᠢ ᠨᠢ ᠬᠥᠳᠡᠯᠵᠦ ᠪᠠᠢᠪᠠᠯ ᠶᠠᠭᠠᠬᠢᠭᠰᠠᠨ ᠶᠤᠮ ᠳᠠᠷᠤᠭᠠ ᠠ᠋!》 ᠭᠡᠳ ᠰᠡᠩᠭᠢᠲᠤᠤ ᠭᠤᠯᠪᠢᠯᠵᠠᠵᠤ ᠨᠠᠬᠢᠯᠵᠠᠵᠤ ᠪᠠᠢᠨᠠ᠃
ᠳᠠᠷᠤᠭᠠ《 ᠨᠠᠷᠢᠨ ᠪᠦᠷᠢᠳᠬᠡᠭᠡᠳ》 ᠲᠦᠳᠡᠭᠰᠡᠨ ᠴᠦ᠍ ᠦᠭᠡᠢ ᠠᠵᠤ ᠠᠬᠤᠢ ᠶ᠋ᠢᠨ ᠬᠠᠰᠢᠶᠠᠨ ᠳ᠋ᠤ᠌ ᠬᠦᠷᠦᠭᠡᠳ ᠢᠷᠡᠯᠡ᠃《 ᠬᠢᠬᠦ ᠠᠵᠢᠯ ᠲᠣᠪ ᠲᠣᠳᠤᠷᠠᠬᠠᠢ᠂ ᠬᠠᠰᠢᠶᠠ ᠥᠷᠭᠡᠳᠬᠡᠭᠰᠡᠨ ᠲᠡᠢ ᠬᠣᠯᠪᠣᠭᠳᠠᠭᠤᠯᠤᠨ ᠲᠦᠯᠡᠰᠢᠨ ᠦ᠌ ᠮᠣᠳᠣ ᠶ᠋ᠢ ᠰᠠᠬᠢᠭᠤᠯ ᠤ᠋ᠨ ᠭᠡᠷ ᠦ᠋ᠨ ᠰᠠᠯᠬᠢᠨ ᠳᠣᠣᠷᠠ ᠬᠤᠷᠢᠶᠠᠨᠠ》 ᠭᠡᠵᠦ ᠠᠵᠤ ᠠᠬᠤᠢ ᠶ᠋ᠢᠨ ᠳᠠᠷᠤᠭᠠ ᠬᠡᠯᠡᠪᠡ᠃ ᠵᠠ ᠢᠩᠭᠢᠭᠡᠳ ᠯᠡ ᠪᠢᠳᠡ ᠶᠠᠭᠠᠬᠢᠬᠤᠪ ᠠᠵᠢᠯ ᠳ᠋ᠠᠭᠠᠨ ᠣᠷᠣᠯᠠ᠃ ᠨᠠᠷᠢᠨ ᠮᠥᠴᠢᠷ ᠢ᠋ ᠨᠢ ᠬᠡᠦᠬᠡᠳ ᠦ᠋ᠳ ᠴᠢᠷᠦᠭᠡᠳ ᠡᠷᠡᠴᠦᠳ ᠪᠦᠳᠦᠭᠦᠨ ᠮᠣᠳᠣ ᠶ᠋ᠢ ᠳᠠᠮᠨᠠᠵᠤ ᠥᠩᠬᠥᠷᠢᠭᠦᠯᠵᠦ《 ᠨᠢᠭᠡ᠂ ᠬᠣᠶᠠᠷ᠂ ᠭᠤᠷᠪᠠ》 ᠭᠡᠵᠦ ᠳᠠᠭᠤ ᠨᠡᠢᠯᠡᠭᠦᠯᠵᠦ ᠡᠷᠪᠡᠢᠬᠦ ᠳᠡᠷᠪᠡᠢᠬᠦ ᠪᠡᠷ ᠢ᠋ᠶ᠋ᠡᠨ ᠬᠥᠳᠡᠯᠵᠡᠭᠡᠪᠡ᠃
ᠰᠡᠩᠭᠢᠲᠤᠤ ᠭᠡᠳᠡᠭ《 ᠪᠣᠢᠯᠠᠭᠰᠠᠨ ᠪᠦᠷᠭᠦᠳ》 ᠰᠢᠭ ᠰᠠᠢᠬᠠᠨ ᠡᠷᠡ ᠲᠡᠨᠳᠡ ᠣᠴᠢᠵᠤ ᠬᠡᠦᠬᠡᠨ ᠪᠠᠷᠢᠵᠤ ᠠᠪᠴᠤ ᠴᠢᠷᠠᠯᠠᠭᠤᠯᠤᠨ᠂ ᠡᠨᠳᠡ ᠢᠷᠡᠵᠦ ᠡᠷᠡᠭᠲᠡᠢᠴᠦᠳ ᠦ᠋ᠨ ᠠᠵᠢᠯ ᠳ᠋ᠤ᠌ ᠰᠠᠭᠠᠳ ᠪᠣᠯᠵᠤ ᠡᠯᠳᠡᠪ ᠮᠠᠷᠵᠠᠩ ᠦᠭᠡ ᠶᠠᠷᠢᠵᠤ᠂ ᠰᠤᠷᠤᠭᠰᠠᠨ ᠵᠠᠩᠰᠢᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠡᠶᠡ ᠪᠡᠨ ᠣᠲᠣᠷᠯᠠᠨ( ᠬᠠᠢᠷᠠᠯᠠᠨ) ᠰᠡᠭᠦᠳᠡᠷ ᠪᠠᠷᠠᠳᠠᠵᠤ ᠰᠠᠭᠤᠨᠠ᠃
ᠰᠠᠬᠢᠭᠤᠯ ᠡᠪᠦᠭᠡᠨ ᠴᠠᠢ ᠴᠢᠨᠠᠵᠤ᠂ ᠪᠢᠳᠡ ᠲᠦᠷ ᠵᠠᠭᠤᠷᠠ ᠠᠮᠤᠰᠬᠢᠨ ᠬᠠᠯᠠᠭᠤᠨ ᠴᠠᠢ ᠣᠭᠣᠴᠢᠯᠠᠵᠤ᠂ ᠬᠦᠢᠲᠡᠨ ᠴᠠᠢ ᠵᠠᠯᠭᠢᠯᠠᠬᠤ ᠨᠢ ᠵᠠᠯᠭᠢᠯᠠᠵᠤ ᠪᠠᠢᠰᠢᠩ ᠤ᠋ᠨ ᠰᠡᠭᠦᠳᠡᠷ ᠲᠡᠭᠡᠨ ᠰᠠᠭᠤᠵᠠᠭᠠᠪᠠ᠃
ᠰᠡᠩᠭᠢᠲᠤᠤ ᠬᠦᠢᠲᠡᠨ ᠴᠠᠢ ᠴᠠᠢᠷᠠᠲᠠᠯᠠ( ᠴᠣᠨᠳᠣᠢᠲᠠᠯᠠ ᠵᠠᠯᠭᠢᠯᠠᠭᠰᠠᠨ ᠦᠭᠡᠢ᠂ ᠱᠠᠵᠠᠪ ᠲᠠᠲᠠᠪᠬᠢᠵᠤ ᠬᠠᠯᠠᠭᠤᠨ ᠴᠠᠢ ᠶ᠋ᠢ ᠣᠭᠣᠴᠢᠯᠠᠭᠰᠠᠨ ᠦᠭᠡᠢ᠂ ᠬᠠᠮᠤᠭ ᠤ᠋ᠨ ᠲᠡᠷᠢᠭᠦᠨ ᠤᠬᠤᠰᠬᠢᠵᠦ ᠠᠶᠠᠭᠠᠨ ᠤ᠋ ᠲᠣᠮᠣ ᠶ᠋ᠢ ᠰᠢᠭᠦᠷᠡᠵᠦ ᠠᠪᠤᠭᠠᠳ ᠪᠠᠷᠠᠭᠤᠨ᠂ ᠰᠣᠯᠣᠭᠠᠢ ᠭᠠᠷ ᠲᠠᠭᠠᠨ ᠬᠠᠯᠠᠭᠤᠨ ᠬᠦᠢᠲᠡᠨ ᠴᠠᠢ ᠲᠠᠢ ᠬᠣᠶᠠᠷ ᠳᠠᠩᠬᠤ ᠪᠠᠷᠢᠵᠤ ᠵᠡᠷᠭᠡ ᠲᠣᠩᠭᠣᠢᠯᠭᠠᠨ ᠵᠦᠭᠡᠭᠡᠰᠢᠭᠦᠯᠣᠭᠡᠳ ᠣᠯᠠᠨ ᠠ᠋ᠴᠠ ᠣᠨᠴᠠᠭᠠᠢᠷᠠᠵᠤ ᠪᠠᠢᠰᠢᠩ ᠤ᠋ᠨ ᠪᠤᠯᠤᠩ ᠳ᠋ᠤ᠌ ᠣᠴᠢᠵᠤ᠂ ᠴᠠᠭᠠᠰᠤ ᠳᠡᠪᠢᠰᠦᠨ ᠲᠤᠬᠠᠯᠠᠨ ᠰᠠᠭᠤᠪᠠ᠃ ᠲᠡᠭᠡᠬᠦ ᠳ᠋ᠡᠭᠡᠨ ᠴᠠᠭ ᠢ᠋ᠶ᠋ᠠᠨ ᠪᠠᠢᠨ ᠪᠠᠢᠨ ᠬᠠᠷᠠᠵᠤ ᠦᠶᠡ ᠦᠶᠡ ᠴᠢᠮᠡᠭᠡ ᠴᠢᠩᠨᠠᠵᠤ ᠵᠡᠯᠡᠬᠡᠨ( ᠪᠦᠯᠢᠶᠡᠨ) ᠴᠠᠢ ᠪᠠᠨ ᠤᠤᠭᠤᠵᠤ ᠳᠠᠭᠤᠰᠤᠭᠠᠳ ᠰᠡᠮᠡᠷᠬᠡᠨ ᠪᠣᠰᠴᠤ ᠬᠤᠷᠢᠶᠠᠯᠲᠠᠲᠠᠢ ᠲᠦᠯᠡᠭᠡᠨ ᠳᠡᠭᠡᠷᠡ ᠭᠠᠷᠤᠭᠠᠳ ᠵᠣᠭᠰᠣᠴᠢᠬᠠᠯᠠ᠃ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠭᠡᠨᠡᠳᠲᠡ ᠨᠠᠪᠲᠠᠢᠵᠤ ᠲᠣᠭᠣᠰᠢ ᠪᠠᠭᠤᠨ ᠵᠤᠤᠬᠠᠨ ᠴᠢᠨᠡᠭᠡ ᠪᠦᠳᠦᠭᠦᠨ ᠮᠣᠳᠣᠨ ᠤ᠋ ᠳᠡᠷᠭᠡᠳᠡ ᠢᠷᠡᠪᠡ᠃
ᠳᠠᠷᠤᠭᠠ ᠶ᠋ᠢᠨ ᠮᠠᠰᠢᠨ ᠴᠤ᠌ ᠬᠠᠰᠢᠶᠠᠨ ᠤ᠋ ᠬᠠᠭᠠᠯᠭᠠ ᠪᠠᠷ ᠣᠷᠣᠵᠤ ᠢᠷᠡᠪᠡ᠃ ᠮᠠᠨᠢ ᠡᠷᠡ ᠬᠣᠭᠣᠯᠠᠢ ᠪᠠᠨ ᠪᠦᠳᠦᠭᠦᠨ ᠵᠠᠰᠠᠵᠤ᠂ ᠳᠠᠷᠤᠭᠠ ᠶ᠋ᠢ ᠮᠠᠰᠢᠨ ᠠ᠋ᠴᠠ ᠪᠠᠨ ᠭᠠᠷᠤᠮᠠᠭᠴᠠ᠄
— ᠬᠥᠶᠢ ᠲᠠ ᠮᠢᠨᠢ ᠠ᠋ ᠪᠣᠰᠤᠭᠠᠴᠢ᠂ ᠬᠥᠳᠡᠯᠦᠭᠡᠴᠢ᠂ ᠠᠵᠢᠯ ᠶᠠᠭᠠᠬᠢᠭᠠ ᠴᠤ᠌ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠴᠠᠢ ᠭᠦᠵᠡᠭᠡᠯᠡᠵᠦ᠂ ᠳᠡᠮᠡᠢ ᠶᠠᠷᠢᠭᠠᠳ ᠪᠠᠢᠳᠠᠭ ᠶᠠᠭᠠᠬᠢᠭᠰᠠᠨ ᠰᠠᠨᠠᠭᠠ ᠵᠣᠪᠠᠲᠠᠭ ᠦᠭᠡᠢ ᠤᠯᠤᠰ ᠪᠣᠢ? ᠭᠡᠵᠦ ᠣᠷᠢᠯᠠᠳᠠᠭ ᠪᠠᠢᠨᠠ᠃ ᠬᠡᠨ ᠴᠦ᠍ ᠲᠡᠭᠦᠨ ᠤ ᠦᠭᠡᠨ ᠳ᠋ᠦ᠍ ᠣᠷᠣᠵᠤ ᠪᠣᠰᠤᠭᠰᠠᠨ ᠦᠭᠡᠢ᠂ ᠳᠠᠷᠤᠭᠠ ᠴᠤ᠌ ᠳᠥᠭᠥᠭᠡᠳ ᠢᠷᠡᠯᠡ᠃ ᠰᠠᠩᠭᠢᠲᠤᠤ ᠶ᠋ᠢᠨ ᠲᠤᠩᠰᠠᠭ ᠴᠠᠭᠠᠨ ᠴᠢᠷᠠᠢ ᠶᠠᠭᠠᠷᠠᠵᠤ ᠶᠡᠬᠡᠳᠡ ᠬᠢᠯᠢᠩᠨᠡᠨ᠄
— ᠡᠢᠮᠦ ᠶᠠᠩᠵᠤ ᠲᠠᠢ ᠪᠠᠢᠪᠠᠯ ᠠᠵᠢᠯ ᠶᠠᠭᠠᠬᠢᠵᠤ ᠪᠦᠲᠦᠨᠡ ᠭᠡᠵᠦ ᠠᠮᠠᠨ ᠳ᠋ᠠᠭᠠᠨ ᠦᠭᠡᠯᠡᠭᠡᠳ ᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠠᠯᠠᠭᠠ ᠶ᠋ᠢ ᠲᠦᠢ ᠭᠡᠮᠡᠨ ᠨᠤᠯᠮᠤᠵᠤ ᠨᠥᠭᠦᠭᠡ ᠪᠦᠳᠦᠭᠦᠨ ᠮᠣᠳᠣᠨ ᠤ᠋ ᠪᠤᠯᠤᠩ ᠠ᠋ᠴᠠ ᠪᠠᠷᠢᠵᠤ《 ᠢᠱᠢ ᠰᠢᠦ》 ᠭᠡᠳ ᠬᠦᠴᠦᠲᠡᠢ ᠡᠷᠭᠦᠭᠰᠡᠨ ᠢ᠋ᠶ᠋ᠡᠨ《 ᠶᠣ》 ᠭᠡᠵᠦ ᠳᠠᠭᠤ ᠠᠯᠳᠠᠵᠤ ᠰᠥᠬᠥᠷᠡᠵᠦ ᠣᠢᠴᠢᠪᠠ᠃ ᠮᠣᠳᠣ ᠲᠦᠰᠢᠨ ᠠᠷᠠᠢ ᠶᠠᠳᠠᠨ ᠪᠣᠰᠤᠭᠰᠠᠨ ᠢ᠋ᠶ᠋ᠠᠨ ᠳᠠᠭᠤ ᠠᠯᠳᠠᠵᠤ ᠭᠠᠷ ᠢ᠋ᠶ᠋ᠠᠨ ᠡᠪᠦᠳᠦᠭ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠨ ᠳᠠᠷᠤᠭᠠ ᠥᠭᠡᠳᠡ ᠬᠠᠷᠠᠨ ᠢᠷᠪᠠᠢᠬᠤ ᠶ᠋ᠢᠨ ᠶᠡᠬᠡ ᠪᠡᠷ ᠢᠷᠪᠠᠢᠪᠠᠴᠤ ᠢᠨᠢᠶᠡᠵᠦ ᠬᠠᠷᠠᠭᠳᠠᠨᠠ᠃《 ᠪᠠᠭᠠᠰᠢᠯᠠᠨ ᠵᠦᠴᠦᠭᠡᠯᠡᠬᠦ ᠳ᠋ᠡᠭᠡᠨ》 ᠭᠠᠷᠭᠤᠳᠠ ᠠᠪᠢᠶᠠᠰ ᠲᠠᠢ《 ᠭᠣᠢᠳᠠ ᠴᠢᠳᠠᠪᠤᠷᠢ》 ᠪᠠᠨ ᠦᠵᠡᠭᠦᠯᠵᠦ ᠪᠠᠢᠨᠠ ᠭᠡᠵᠦ ᠪᠣᠳᠣᠭᠠᠳ ᠬᠡᠨ ᠴᠦ᠍ ᠠᠩᠵᠢᠶᠠᠷᠠᠭᠰᠠᠨ ᠦᠭᠡᠢ᠃ ᠪᠢᠳᠡ ᠯᠠ ᠠᠵᠢᠯ ᠳ᠋ᠠᠭᠠᠨ ᠣᠷᠣᠯᠠ᠃ ᠳᠠᠷᠤᠭᠠ ᠲᠡᠰᠢᠶᠡ ᠲᠤᠯᠤᠨ ᠵᠣᠭᠰᠣᠨᠠ᠃ ᠰᠡᠩᠭᠢᠲᠤᠤ ᠪᠠᠷᠢᠯᠳᠤᠬᠤ ᠪᠠᠷ ᠪᠠᠢᠭᠠ ᠪᠥᠬᠡ ᠰᠢᠭ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠡᠪᠦᠳᠦᠭ ᠢ᠋ᠶ᠋ᠡᠨ ᠳᠠᠷᠤᠨ ᠬᠥᠯ ᠢ᠋ᠶ᠋ᠡᠨ ᠴᠢᠷᠦᠨ ᠳᠠᠷᠤᠭᠠ ᠤᠷᠤᠭᠤ ᠳᠥᠭᠥᠪᠡ᠃ ᠨᠢᠭᠡ ᠬᠠᠷᠠᠬᠤᠯᠠᠷ ᠨᠢᠭᠤᠷ ᠤ᠋ᠨ ᠬᠥᠯᠥᠰᠥ ᠨᠢ ᠴᠢᠮ ᠴᠢᠮ ᠲᠤᠰᠤᠯᠵᠤ ᠪᠠᠢᠨᠠ᠃ ᠣᠢᠷᠠ ᠶ᠋ᠢᠨ ᠬᠡᠳᠦᠨ ᠰᠠᠷᠠ ᠭᠠᠷᠤᠭᠠ ᠦᠭᠡᠢ᠂ ᠬᠥᠯᠥᠰᠥ ᠪᠡᠨ ᠭᠠᠷᠭᠠᠵᠤ ᠪᠣᠢ ᠲᠡᠭᠦᠨ ᠢ᠋ ᠳᠠᠷᠤᠭᠠ ᠰᠠᠶᠢ ᠯᠠ ᠠᠵᠢᠭᠯᠠᠵᠤ᠄
— ᠨᠢᠷᠤᠭᠤᠨ ᠳ᠋ᠤ᠌ ᠴᠢᠨᠢ ᠶᠠᠭᠤᠮᠠ ᠬᠠᠪᠴᠢᠭᠤᠯᠴᠢᠬᠠᠪᠠ ᠤᠤ? ᠭᠡᠵᠦ ᠠᠰᠠᠭᠤᠯᠠ᠃
— ᠠ᠋ ᠶᠣ ᠶᠣ ᠳᠠᠷᠤᠭᠠ ᠮᠢᠨᠢ! ᠮᠢᠬᠠ ᠲᠠᠰᠤᠷᠠᠭᠰᠠᠨ ᠶᠤᠮ ᠤᠤ? ᠶᠠᠰᠤ ᠬᠤᠭᠤᠷᠠᠭᠰᠠᠨ ᠶᠤᠮ ᠤᠤ? ᠮᠥᠨ ᠴᠦ᠍ ᠶᠡᠬᠡ ᠡᠪᠡᠳᠴᠦ ᠪᠠᠢᠨᠠ ᠭᠡᠳ ᠡᠮᠦᠨᠡ ᠨᠢ ᠴᠠᠭᠠᠷᠢᠭᠯᠠᠨ ᠣᠢᠴᠢᠪᠠ᠃
— ᠶᠠᠭᠤᠨ ᠴᠦ᠍ ᠪᠣᠯᠭᠣᠮᠵᠢ ᠦᠭᠡᠢ ᠶᠦᠮ ᠳᠡ ᠶᠠᠮᠠᠷ ᠬᠡᠦᠬᠡᠳ ᠪᠢᠰᠢ ᠳᠡ!
— ᠪᠢ ᠴᠢᠨᠢ ᠶᠣᠰᠣᠲᠠᠢ ᠠᠵᠢᠯ ᠤ᠋ᠨ ᠬᠡᠩᠬᠡᠭ ᠨᠣᠪᠰᠢ ᠯᠠ ᠳᠠ! ᠲᠠᠷᠠᠨ ᠠ᠋ᠴᠠ ᠯᠠ ᠪᠣᠯᠵᠤ ᠪᠠᠢᠭᠠᠳ ᠡᠨᠡ ᠳᠡ! ᠭᠡᠵᠦ ᠶᠣᠣᠯᠠᠨ ᠮᠤᠰᠬᠢᠷᠠᠪᠠ᠃ ᠳᠠᠷᠤᠭᠠ ᠬᠡᠰᠩ ᠴᠢᠮᠡᠭᠡ ᠦᠭᠡᠢ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠠᠵᠤ ᠠᠬᠤᠢ ᠶ᠋ᠢᠨ ᠳᠠᠷᠤᠭᠠ ᠶ᠋ᠢ ᠳᠠᠭᠤᠳᠠᠵᠤ ᠰᠡᠩᠭᠢᠲᠤᠤ ᠶ᠋ᠢ ᠡᠮᠨᠡᠯᠭᠡ ᠳ᠋ᠦ᠍ ᠦᠵᠡᠭᠦᠯ ᠭᠡᠵᠦ ᠲᠤᠰᠢᠶᠠᠭᠠᠳ ᠶᠠᠪᠤᠭᠠᠳ ᠥᠭᠪᠡ᠃ ᠮᠠᠨ ᠤ᠋ ᠬᠢᠨ ᠦ᠌ ᠨᠢᠭᠡ ᠡᠪᠦᠭᠡᠨ ᠠᠵᠢᠯᠲᠠᠨ ᠰᠡᠩᠭᠢᠲᠤᠤ ᠶ᠋ᠢᠨ ᠳᠡᠷᠭᠡᠳᠡ ᠣᠴᠢᠵᠤ᠄
— ᠶᠠᠮᠠᠷ ᠰᠠᠢᠨ ᠪᠠᠢᠬᠤ ᠪᠣᠢ ᠳᠠ ᠬᠦᠦ ᠮᠢᠨᠢ᠃ ᠡᠭᠦᠷᠢᠳᠡ ᠡᠷᠡᠮᠳᠡᠭ ᠪᠣᠯᠵᠤ ᠮᠡᠳᠡᠨᠡ ᠳᠠ᠃《 ᠠᠵᠢᠯ ᠤ᠋ᠨ ᠬᠡᠩᠬᠡᠭ》 ᠪᠣᠯ ᠠᠷᠠᠢ ᠡᠭᠦᠨ ᠳ᠋ᠡᠭᠡᠨ ᠬᠦᠷᠬᠦ ᠦᠭᠡᠢ ᠰᠠᠨ ᠳᠠ!《 ᠠᠯᠳᠠᠷ ᠤ᠋ᠨ ᠬᠡᠩᠬᠡᠭ》 ᠭᠡᠳᠡᠭ ᠡᠪᠡᠳᠴᠢᠨ ᠳᠠᠭᠠᠭᠠᠮᠵᠢᠷᠠᠬᠤ( ᠬᠦᠨᠳᠦᠷᠡᠬᠦ) ᠪᠡᠷ ᠢ᠋ᠶ᠋ᠡᠨ ᠡᠢᠮᠦ ᠪᠣᠯᠳᠠᠭ ᠪᠠᠢᠨᠠ ᠳᠠ ᠬᠦᠦ ᠮᠢᠨᠢ ᠭᠡᠯᠡ ᠁ ᠮᠢᠨᠦ ᠢᠨᠢᠶᠡᠭᠰᠡᠨ ᠤᠴᠢᠷ ᠡᠢᠮᠦ ᠶᠦᠮ ᠳᠡ ᠭᠡᠪᠡ᠃
– – – –
① ᠭᠣᠷᠢᠯᠠᠨ ᠰᠢᠨᠤᠬᠤ
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠪᠠᠭᠠᠲᠤᠷ
ᠬᠢᠨᠠᠭ᠍ᠴᠢ : ᠰᠠᠷᠠᠨᠠ
2024᠂ 2᠂ 2 ᠦᠨ ᠡᠳᠦᠷ