ᠣᠷᠣᠢ ᠦᠭᠡᠢ ᠰᠦᠮᠡ – ᠬᠣᠷᠢᠨ ᠵᠢᠷᠭᠤᠭᠠ ᠂ ᠠᠮᠢ ᠨᠠᠭᠠᠨᠠ ᠲᠠᠮᠤ ᠴᠠᠭᠠᠨᠠ Оройгүй сүм – Хорин зургаа ᠂ Амь наана там цаана - Oroigui sum 26
670ᠬᠣᠷᠢᠨ ᠵᠢᠷᠭᠤᠭᠠ ᠂ ᠠᠮᠢ ᠨᠠᠭᠠᠨᠠ ᠲᠠᠮᠤ ᠴᠠᠭᠠᠨᠠ
ᠪᠢᠯᠢᠭ ᠲᠡᠢ ᠡᠴᠡ ᠪᠡᠬᠡ ᠬᠠᠷᠠ
ᠠᠮᠲᠠᠲᠠᠢ ᠠ᠋ᠴᠠ ᠠᠷᠢᠬᠢ ᠬᠠᠷᠠ
ᠪᠠᠶᠠᠨᠰᠦᠢ᠍ᠮᠪᠦᠷ ᠠᠭᠤᠯᠠ ᠶ᠋ᠢᠨ ᠪᠠᠷᠠ ᠶᠡᠬᠡ ᠯᠡ ᠠᠯᠤᠰ ᠲᠤ᠌ ᠬᠠᠷᠠᠭᠳᠠᠵᠤ ᠪᠠᠢᠯᠠ᠃ ᠬᠣᠶᠠᠷ ᠲᠡᠨᠦᠭᠦᠯᠴᠢᠨ ᠲᠡᠷᠲᠡᠭᠡ ᠳ᠋ᠦ᠍ ᠴᠡᠩᠬᠡᠷᠯᠡᠨ ᠪᠦᠷᠦᠯᠵᠡᠬᠦ ᠶᠡᠬᠡ ᠠᠭᠤᠯᠠᠰ ᠢ᠋ᠶ᠋ᠠᠷ ᠴᠢᠭ ᠢ᠋ᠶ᠋ᠡᠨ ᠪᠠᠷᠢᠵᠤ ᠵᠡᠭᠦᠨ ᠬᠣᠢᠰᠢ ᠵᠦᠭᠯᠡᠨ ᠶᠠᠪᠤᠭᠰᠠᠭᠠᠷ ᠯᠠ ᠪᠠᠢᠯᠠ᠃ ᠣᠳᠣ ᠪᠠᠷ ᠠᠯᠢᠪᠠ ᠠᠶᠤᠯ ᠦᠭᠡᠢ᠂ ᠠᠮᠢ ᠨᠠᠰᠤᠨ ᠳ᠋ᠤ᠌ ᠬᠠᠷᠰᠢᠯᠠᠭᠰᠠᠨ ᠶᠠᠭᠤᠮᠠ ᠦᠭᠡᠢ᠂ ᠪᠦᠷᠢᠨ ᠪᠦᠲᠦᠨ ᠶᠠᠪᠤᠵᠠᠭᠠᠵᠤ ᠪᠠᠢᠪᠠ᠃ ᠰᠠᠨᠵᠢ ᠶ᠋ᠢᠨ ᠪᠡᠶᠡ ᠠᠶᠠᠨ ᠵᠠᠮ ᠤ᠋ᠨ ᠭᠠᠷ ᠳᠠᠭᠠᠭᠠᠬᠤ ᠦᠭᠡᠢ ᠨᠡᠯᠢᠶᠡᠳ ᠰᠤᠯᠠᠷᠠᠵᠠᠢ᠃ ᠥᠯᠵᠡᠢᠲᠦ ᠪᠠᠳᠢᠷᠴᠢᠨ ᠪᠣᠯᠬᠣᠷ ᠶᠠᠪᠤᠬᠤ ᠲᠣᠰᠤᠮ ᠢ᠋ᠶ᠋ᠠᠨ ᠪᠡᠶᠡ ᠨᠢ ᠬᠥᠩᠭᠡᠷᠡᠵᠦ᠂ ᠰᠡᠳᠬᠢᠯ ᠨᠢ ᠰᠡᠷᠭᠦᠵᠦ ᠪᠠᠶᠠᠷ ᠬᠥᠷ ᠲᠡᠢ ᠪᠣᠯᠤᠨᠠ᠃ ᠪᠣᠮᠠᠨ ᠣᠷᠣᠶᠢᠲᠤ ᠶ᠋ᠢᠨ ᠠᠭᠤᠯᠠᠨ ᠳ᠋ᠤ᠌ ᠶᠠᠪᠤᠵᠤ ᠪᠠᠢᠬᠤ ᠳ᠋ᠤ᠌ ᠰᠠᠨᠵᠢ ᠭᠠᠵᠠᠷ ᠤ᠋ᠨ ᠰᠦᠷ ᠲᠦ᠍ ᠳᠠᠷᠤᠭᠳᠠᠵᠤ ᠲᠣᠯᠣᠭᠠᠢ ᠨᠢ ᠡᠷᠭᠢᠨ᠂ ᠪᠥᠭᠡᠯᠵᠢᠰᠦ ᠴᠢᠳᠬᠤᠵᠤ᠂ ᠶᠠᠳᠠᠷᠠᠨ ᠲᠤᠢᠯᠳᠠᠵᠠᠢ᠃ ᠥᠯᠵᠡᠢᠲᠦ ᠪᠣᠯᠬᠣᠷ ᠶᠠᠭᠤ ᠴᠤ᠌ ᠪᠣᠯᠤᠭᠠ ᠦᠭᠡᠢ ᠮᠡᠲᠦ ᠠᠯᠬᠤᠯᠠᠵᠤ ᠪᠠᠢᠯᠠ᠃
- ᠵᠠ ᠯᠠᠮᠠᠪᠤᠭᠠᠢ ᠮᠢᠨᠢ! ᠭᠦᠷᠢᠮ ᠨᠣᠮ ᠢ᠋ᠶ᠋ᠠᠨ ᠤᠩᠰᠢᠵᠤ ᠰᠤᠷᠤᠭᠰᠠᠨ ᠡᠷᠳᠡᠮ ᠢ᠋ᠶ᠋ᠡᠨ ᠭᠠᠷᠭᠠᠵᠤ ᠦᠵᠡ! ᠪᠤᠰᠤᠳ ᠢ᠋ ᠪᠢᠰᠢ ᠭᠡᠬᠦ ᠳ᠋ᠦ᠍ ᠥᠪᠡᠷ ᠢ᠋ ᠪᠡᠨ ᠠᠪᠤᠷᠠᠬᠤ᠂ ᠡᠷᠳᠡᠮ ᠰᠤᠷᠤᠭᠠ ᠪᠢᠵᠡ ᠳᠡ ᠭᠡᠵᠦ ᠥᠯᠵᠡᠢᠲᠦ ᠶᠥᠭᠡᠳᠡᠬᠦ᠂ ᠠᠰᠠᠭᠤᠬᠤ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣ ᠬᠡᠯᠡᠯᠡ᠃ ᠰᠠᠨᠵᠢ ᠶᠠᠮᠠᠷ ᠴᠤ᠌ ᠨᠣᠮ ᠤᠩᠰᠢᠭᠠᠳ ᠨᠡᠮᠡᠷᠢ ᠦᠭᠡᠢ ᠶ᠋ᠢ ᠥᠪᠡᠷ ᠢ᠋ᠶ᠋ᠡᠨ ᠮᠡᠳᠡᠵᠦ ᠪᠠᠢᠯᠠ᠃ ᠥᠯᠵᠡᠢᠲᠦ ᠶ᠋ᠢᠨ ᠦᠭᠡ ᠭᠠᠰᠢᠭᠤᠨ ᠪᠥᠭᠡᠳ ᠦᠨᠡᠨ᠃
- ᠡᠢᠮᠦ ᠶᠠᠭᠤᠮᠠᠨ ᠳ᠋ᠤ᠌ ᠬᠡᠷᠡᠭ ᠪᠣᠯᠳᠠᠭ ᠨᠣᠮ ᠰᠤᠷᠤᠭᠠ ᠦᠭᠡᠢ ᠭᠡᠵᠦ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠭᠰᠡᠨ ᠴᠢᠨᠢ ᠥᠯᠵᠡᠢᠲᠦ ᠳ᠋ᠦ᠍ ᠶᠡᠬᠡ ᠲᠠᠭᠠᠯᠠᠭᠳᠠᠵᠠᠢ᠃ ᠵᠠᠯᠢᠬᠠᠢ ᠨᠢᠳᠦ ᠪᠡᠷ ᠢᠨᠢᠶᠡᠪᠬᠢᠯᠡᠭᠰᠡᠨ ᠢ᠋ᠶ᠋ᠡᠨ᠂
- ᠵᠠ ᠲᠡᠢᠮᠦ ᠯᠡ ᠪᠠᠢᠭᠠ ᠶᠤᠮ ᠰᠢᠦ ᠳᠡ᠃ ᠠᠮᠢᠳᠤᠷᠠᠯ ᠠᠬᠤᠢ ᠳ᠋ᠤ᠌ ᠬᠡᠷᠡᠭ ᠪᠣᠯᠬᠤ ᠦᠭᠡᠢ ᠡᠷᠳᠡᠮ ᠢ᠋ᠶ᠋ᠡᠷ ᠶᠠᠭᠤ ᠶ᠋ᠢ ᠪᠡᠨ ᠬᠢᠨᠡ᠃ ᠪᠢ ᠢᠩᠭᠢᠵᠦ ᠯᠡ ᠪᠣᠳᠣᠳᠠᠭ ᠪᠣᠯᠤᠭᠰᠠᠨ ᠬᠥᠮᠦᠨ ᠪᠠᠭᠠ ᠵᠠᠯᠠᠭᠤ ᠳ᠋ᠤ᠌ ᠪᠠᠨ ᠴᠤ᠌ ᠯᠠᠮᠠ ᠪᠠᠭᠰᠢ᠂ ᠪᠤᠷᠬᠠᠨ ᠰᠢᠲᠦᠭᠡᠨ ᠳ᠋ᠦ᠍ ᠰᠦᠰᠦᠭᠯᠡᠵᠦ ᠯᠡ ᠶᠠᠪᠤᠯᠠ᠃ ᠪᠤᠷᠬᠠᠨ ᠤ᠋ ᠠᠷᠢᠭᠤᠨ ᠣᠷᠣᠨ ᠭᠡᠭᠳᠡᠭᠰᠡᠨ ᠤᠲᠠᠢ᠂ ᠭᠦᠮᠪᠦᠮ᠂ ᡀᠠᠰᠠ ᠵᠣᠣ ᠪᠠᠷ ᠭᠡᠷᠦᠨ ᠲᠡᠨᠦᠭᠦᠯᠴᠢᠯᠡᠵᠦ ᠥᠩᠭᠡᠷᠡᠭᠡᠭᠰᠡᠨ ᠡᠨᠡ ᠵᠢᠯ ᠦ᠋ᠳ ᠲᠦ᠍ ᠭᠠᠭᠴᠠᠬᠠᠨ ᠯᠠ ᠶᠠᠭᠤᠮᠠ ᠤᠬᠠᠭᠠᠷᠠᠭᠰᠠᠨ᠃ ᠲᠡᠷᠡ ᠮᠢᠨᠢ ᠶᠠᠭᠤ ᠪᠣᠢ ᠭᠡᠪᠡᠯ 《ᠪᠤᠷᠬᠠᠨ ᠤ᠋ ᠭᠦᠨ ᠤᠬᠠᠭᠠᠨ ᠠ᠋ᠴᠠ ᠠᠷᠠᠳ ᠤ᠋ᠨ ᠬᠠᠷᠠ ᠤᠬᠠᠭᠠᠨ ᠳᠡᠭᠡᠷᠡ》ᠶᠦ᠍ᠮ ᠪᠠᠢᠨᠠ ᠭᠡᠳᠡᠭ ᠢ᠋ ᠯᠡ ᠮᠡᠳᠡᠭᠰᠡᠨ᠃ ᠬᠡᠴᠢᠨᠡᠨ ᠣᠯᠠᠨ ᠠᠪᠤ ᠶ᠋ᠢᠨ ᠬᠦᠦ ᠰᠦᠮᠡ ᠳᠤᠭᠠᠩ ᠳ᠋ᠤ᠌ ᠱᠠᠪᠢᠯᠠᠨ ᠰᠠᠭᠤᠵᠤ᠂ ᠬᠡᠴᠢᠨᠡᠨ ᠣᠯᠠᠨ ᠵᠢᠩ ᠰᠢᠷᠠ ᠲᠣᠰᠣ ᠪᠠᠷ ᠵᠤᠯᠠ ᠪᠠᠷᠢᠵᠤ᠂ ᠬᠡᠴᠢᠨᠡᠨ ᠣᠯᠠᠨ ᠣᠯᠪᠣᠭ ᠡᠯᠡᠭᠡᠵᠦ ᠪᠠᠢᠭᠠ ᠶ᠋ᠢ ᠬᠠᠷᠠᠬᠤ ᠪᠦᠷᠢ ᠳ᠋ᠦ᠍ ᠯᠡ ᠳᠣᠲᠣᠷᠠ ᠠᠶᠠᠭᠦᠢ ᠪᠣᠯᠬᠤ ᠶᠤᠮ᠃ ᠭᠡᠬᠦ ᠳ᠋ᠦ᠍ ᠪᠡᠨ ᠡᠢᠮᠦ ᠶᠠᠭᠤᠮᠠ ᠶ᠋ᠢ ᠪᠢ ᠬᠡᠨ ᠳ᠋ᠦ᠍ ᠴᠦ᠍ ᠶᠠᠷᠢᠳᠠᠭ ᠦᠭᠡᠢ᠃ ᠠᠯᠳᠠᠰ ᠨᠢᠭᠦᠯ ᠪᠣᠯᠤᠨᠠ ᠭᠡᠯᠴᠡᠭᠡᠳ ᠠᠳᠠ ᠦᠵᠡᠬᠦ ᠨᠢ ᠲᠦᠪᠡᠭᠲᠡᠢ᠃ ᠬᠠᠷᠢᠨ ᠰᠠᠨᠵᠢ ᡀᠠᠷᠠᠮᠪᠠ ᠴᠢᠮᠠ ᠳ᠋ᠤ᠌ ᠪᠣᠯ ᠣᠯᠠᠨ ᠬᠣᠨᠣᠭ ᠡᠪᠦᠷ ᠲᠦᠷᠡᠢ ᠳ᠋ᠦ᠍ ᠪᠡᠨ ᠣᠷᠣᠵᠤ ᠢᠵᠢᠯ ᠳᠠᠰᠤᠯ ᠪᠣᠯᠴᠢᠬᠠᠭᠰᠠᠨ ᠳ᠋ᠤ᠌ ᠪᠠᠨ ᠯᠠ ᠢᠯᠠᠨ ᠳᠠᠯᠠᠨ ᠦᠭᠡᠢ ᠶᠠᠷᠢᠵᠤ ᠪᠠᠢᠨᠠ᠃ ᠡᠨᠡ ᠶ᠋ᠢ ᠮᠢᠨᠢ ᠴᠢ ᠶᠠᠮᠠᠷ ᠠᠳᠠ ᠱᠤ᠌ ᠦᠵᠡᠬᠦ ᠶᠦ᠍ᠮ ᠤᠤ᠂ ᠪᠤᠰᠤᠳ ᠲᠤ᠌ ᠲᠠᠷᠬᠠᠭᠠᠬᠤ ᠪᠢᠰᠢ ᠭᠡᠵᠦ ᠥᠯᠵᠡᠢᠲᠦ ᠬᠡᠯᠡᠭᠡᠳ ᠬᠠᠪᠴᠢᠭ ᠡᠭᠦᠷᠭᠡ ᠳᠣᠲᠣᠷᠠ ᠠ᠋ᠴᠠ ᠪᠠᠨ ᠵᠢᠵᠢᠭᠬᠡᠨ ᠪᠣᠶᠢᠯᠠᠡᠭ ᠭᠠᠷᠭᠠᠵᠤ ᠢᠷᠡᠪᠡ᠃ ᠲᠡᠷᠡ ᠳᠣᠲᠣᠷᠠ ᠠ᠋ᠴᠠ ᠪᠠᠨ ᠵᠢᠵᠢᠭᠬᠡᠨ ᠬᠠᠨᠠᠭᠤᠷ ᠣᠯᠵᠤ ᠠᠪᠤᠭᠠᠳ᠂
- ᠠᠯᠢ ᠪᠣᠢ᠂ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠲᠣᠬᠣᠢ ᠶ᠋ᠢ ᠢᠯᠡ ᠭᠠᠷᠭᠠᠭᠠᠳ ᠢᠷᠡ ! ᠭᠡᠵᠦ ᠱᠠᠭᠠᠷᠳᠠᠪᠠ᠃ ᠰᠠᠨᠵᠢ ᠲᠣᠬᠣᠢ ᠶ᠋ᠢ ᠪᠡᠨ ᠢᠯᠡ ᠭᠠᠷᠭᠠᠪᠠᠯ ᠥᠯᠵᠡᠢᠲᠦ ᠭᠠᠷ ᠤ᠋ᠨ ᠬᠢᠨᠢ ᠲᠣᠬᠣᠢ ᠶ᠋ᠢᠨ ᠬᠠᠴᠠᠷ ᠲᠤᠰᠢᠶᠠ ᠨᠢᠭᠡᠨ ᠰᠤᠳᠠᠰᠤ ᠶ᠋ᠢ ᠴᠠᠰ ᠬᠢᠲᠡᠯᠡ ᠬᠠᠨᠠᠪᠠ᠃ ᠴᠢᠰᠤ ᠣᠯᠣᠭᠣᠶᠢᠳᠠᠨ ᠭᠠᠷᠤᠯᠠ᠃ ᠥᠯᠵᠡᠢᠲᠦ ᠠᠮᠠᠨ ᠳᠣᠲᠣᠷᠠ ᠪᠠᠨ ᠲᠣᠭᠠᠯᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠨᠥᠭᠥᠭᠡᠬᠢ ᠬᠠᠨᠠᠭᠰᠠᠨ ᠭᠠᠵᠠᠷ ᠢ᠋ ᠭᠠᠭᠴᠠᠬᠠᠨ ᠳᠠᠷᠤᠵᠤ ᠴᠢᠰᠤ ᠶ᠋ᠢ ᠲᠣᠭᠲᠠᠭᠠᠪᠠ᠃
- ᠣᠳᠣ ᠵᠦᠭᠡᠷ ᠪᠣᠯᠤᠨᠠ᠃ ᠪᠠᠯᠭᠣᠬᠠᠨ ᠬᠠᠷᠠ ᠠᠷᠢᠬᠢ ᠬᠣᠢᠨᠠ ᠠ᠋ᠴᠠ ᠨᠢ ᠤᠤᠭᠤᠴᠢᠬᠠᠪᠠᠯ ᠴᠤ᠌ ᠪᠦᠷ ᠰᠠᠢᠨ ᠪᠣᠯᠤᠨᠠ᠃ ᠳᠠᠩᠴᠤ ᠪᠢᠳᠡ ᠬᠣᠶᠠᠷ ᠰᠢᠭ᠋ ᠲᠡᠨᠦᠭᠦᠯᠴᠢᠨ ᠳ᠋ᠦ᠍ ᠬᠡᠨ ᠠᠷᠢᠬᠢ ᠰᠥᠩᠨᠡᠬᠦ ᠪᠢᠯᠡ ᠳᠠ ᠭᠡᠵᠦ ᠥᠯᠵᠡᠢᠲᠦ ᠦᠭᠡᠯᠡᠵᠦ ᠪᠢᠯᠡ᠃ ᠴᠢᠰᠤ ᠶ᠋ᠢ ᠲᠡᠢᠨ ᠬᠦ᠌ ᠬᠠᠨᠠᠭᠰᠠᠨ ᠠ᠋ᠴᠠ ᠬᠣᠢᠰᠢ ᠤᠤᠯ ᠤ᠋ᠨ ᠰᠦᠷ ᠲᠦ᠍ ᠳᠠᠷᠤᠭᠳᠠᠨ ᠵᠣᠪᠠᠬᠤ ᠨᠢ ᠪᠠᠭᠠᠰᠴᠤ ᠰᠠᠨᠵᠢ ᠶ᠋ᠢᠨ ᠵᠣᠪᠠᠯᠠᠩ ᠨᠠᠮᠳᠠᠵᠤ ᠪᠢᠯᠡ᠃ ᠠᠮᠢᠳᠤᠷᠠᠯ ᠤ᠋ᠨ ᠨᠠᠷᠢᠨ ᠠᠷᠭᠠ ᠤᠬᠠᠭᠠᠨ ᠲᠠᠢ ᠥᠯᠵᠡᠢᠲᠦ ᠪᠠᠳᠢᠷᠴᠢᠨ ᠢ᠋ ᠪᠢᠰᠢᠷᠡᠨ ᠬᠦᠨᠳᠦᠯᠡᠬᠦ ᠰᠡᠳᠬᠢᠯ ᠰᠠᠨᠵᠢ ᠳ᠋ᠤ᠌ ᠠᠶᠠᠨᠳᠠᠭᠠᠨ ᠪᠣᠢ ᠪᠣᠯᠪᠠ᠃
《ᠪᠡᠷᠢᠮᠦᠭ ᠡᠮᠡᠭᠡᠨ ᠲᠡᠢ ᠶᠡᠬᠡ ᠲᠥᠰᠲᠡᠢ ᠬᠥᠮᠦᠨ ᠶᠦ᠍ᠮ ᠳᠡ᠃ ᠪᠠᠳᠢᠷᠴᠢᠯᠠᠨ ᠶᠠᠪᠤᠭᠰᠠᠭᠠᠷ ᠪᠠᠢᠭᠠᠳ ᠯᠠ ᠡᠢᠮᠦ ᠪᠡᠷᠬᠡ ᠬᠥᠮᠦᠨ ᠪᠣᠯᠤᠭᠠ ᠪᠢᠵᠡ ᠳᠡ᠃ ᠭᠠᠰᠢᠭᠤᠨ ᠮᠥᠷᠲᠡᠯᠡ ᠶᠠᠭ ᠯᠠ ᠦᠨᠡᠨ ᠶᠠᠭᠤᠮᠠ ᠶᠠᠷᠢᠭᠠᠳ ᠪᠠᠢᠨᠠ》 ᠭᠡᠵᠦ ᠰᠠᠨᠵᠢ ᠲᠡᠭᠦᠨ ᠦ᠌ ᠲᠤᠬᠠᠢ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠵᠤ ᠪᠠᠢᠪᠠ᠃ ᠬᠣᠶᠠᠷ ᠲᠡᠨᠦᠭᠦᠯᠴᠢᠨ ᠨᠢᠭᠡᠨ ᠱᠠᠩᠳᠠᠨ ᠤ᠋ ᠬᠥᠪᠡᠭᠡᠨ ᠳ᠋ᠦ᠍ ᠢᠷᠡᠵᠦ ᠲᠦᠷ ᠲᠤᠬᠠᠯᠠᠨ ᠰᠠᠭᠤᠬᠤ ᠪᠠᠷ ᠡᠭᠦᠷᠭᠡ ᠪᠡᠨ ᠠᠪᠴᠤ᠂ ᠲᠣᠭᠣᠭᠠ ᠰᠢᠨᠠᠭᠠ ᠪᠠᠨ ᠪᠡᠯᠡᠳᠬᠡᠵᠦ ᠡᠬᠢᠯᠡᠲᠡᠯᠡ᠂
- ᠡᠨᠡᠦᠬᠡᠨ ᠵᠡᠭᠦᠨ ᠲᠠᠯᠠ ᠳ᠋ᠤ᠌ ᠠᠨᠢᠭ ᠭᠣᠮᠪᠣ ᠭᠡᠳᠡᠭ ᠡᠮᠡᠭᠲᠡᠢᠴᠦᠳ ᠦ᠋ᠨ ᠰᠦᠮᠡ ᠪᠠᠢᠳᠠᠭ ᠶᠤᠮ᠃ ᠮᠥᠨ ᠴᠦ᠍ ᠬᠥᠭ ᠦ᠋ᠨ ᠭᠠᠵᠠᠷ ᠳᠠ! ᠭᠡᠵᠦ ᠭᠡᠨᠡᠳᠲᠡ ᠥᠯᠵᠡᠢᠲᠦ ᠶᠠᠷᠢᠪᠠ᠃ ᠲᠡᠷᠡ ᠦᠭᠡ ᠶ᠋ᠢ ᠰᠣᠨᠣᠰᠤᠮᠠᠭᠴᠠ ᠰᠠᠨᠵᠢ ᠴᠣᠴᠢᠬᠤ ᠰᠢᠭ᠋ ᠪᠣᠯᠵᠤ ᠪᠡᠷᠢᠮᠦᠭ ᠡᠮᠡᠭᠡᠨ ᠦ᠌ ᠵᠠᠬᠢᠶᠠᠰᠤ ᠶ᠋ᠢ ᠭᠡᠨᠡᠳᠲᠡ ᠰᠠᠨᠠᠯᠠ᠃ ᠲᠡᠭᠡᠮᠡᠭᠴᠡ ᠡᠭᠦᠷᠭᠡ ᠪᠡᠨ ᠳᠠᠬᠢᠨ ᠪᠣᠭᠣᠵᠤ ᠡᠬᠢᠯᠡᠬᠦ ᠳ᠋ᠦ᠍ ᠨᠢ ᠥᠯᠵᠡᠢᠲᠦ ᠭᠠᠢᠬᠠᠵᠤ᠂
- ᠡᠪᠡᠳᠴᠢᠨ ᠲᠤᠰᠪᠠ ᠤᠤ? ᠳᠥᠩᠭᠡᠵᠢ ᠪᠠᠭᠤᠳᠠᠯᠯᠠᠬᠤ ᠪᠠᠷ ᠵᠡᠬᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠪᠣᠯᠢᠭᠠᠳ ᠤᠨᠠᠬᠤ ᠴᠢᠨᠢ! ᠡᠮᠡᠭᠲᠡᠢᠴᠦᠳ ᠦ᠋ᠨ ᠰᠦᠮᠡ ᠭᠡᠬᠦ ᠪᠡᠷ ᠠᠶᠤᠪᠠ ᠤᠤ? ᠲᠡᠳᠡᠨ ᠦ᠌ ᠦᠨᠦᠷ ᠴᠦ᠍ ᠬᠦᠷᠬᠦ ᠪᠡᠷ ᠦᠭᠡᠢ ᠬᠣᠯᠠ ᠪᠠᠢᠬᠤ ᠳ᠋ᠤ᠌ ᠶᠠᠭᠤᠨ ᠳ᠋ᠤ᠌ ᠨᠢ ᠯᠠᠮᠠᠪᠤᠭᠠᠢ ᠳ᠋ᠤ᠌ ᠠᠯᠳᠠᠰ ᠨᠢᠭᠦᠯ ᠪᠣᠯᠬᠤ ᠪᠣᠢ ᠳᠠ! ᠭᠡᠵᠦ ᠱᠣᠭᠯᠠᠬᠤ ᠮᠠᠶ᠋ᠢᠭᠲᠠᠢ ᠬᠡᠯᠡᠬᠦ ᠳ᠋ᠦ᠍ ᠰᠠᠨᠵᠢ᠂
- ᠠᠨᠢᠭ ᠭᠣᠮᠪᠣ ᠳ᠋ᠤ᠌ ᠣᠴᠢᠵᠤ ᠮᠥᠷᠭᠥᠯ ᠦᠢᠯᠡᠳᠦᠶᠡ! ᠭᠡᠪᠡ᠃ ᠥᠯᠵᠡᠢᠲᠦ ᠲᠠᠴᠢᠭᠢᠨᠠᠲᠠᠯᠠ ᠢᠨᠢᠶᠡᠵᠦ᠂
- ᠶᠠᠭᠤ ᠭᠡᠰᠡᠨ ᠦᠭᠡ ᠪᠣᠢ? ᠨᠢᠭᠦᠯ ᠠᠯᠳᠠᠰ ᠭᠡᠵᠦ ᠪᠠᠢᠳᠠᠭ ᠶᠤᠮ ᠪᠣᠯ ᠲᠡᠷᠡ ᠴᠢᠨᠢ ᠪᠣᠯᠤᠨᠠ ᠪᠢᠵᠡ ᠳᠡ᠃ ᠲᠡᠭᠡᠭᠡᠳ ᠴᠦ᠍ ᠲᠣᠯᠣᠭᠠᠢ ᠬᠠᠭᠠᠯᠴᠢᠬᠠᠬᠤ ᠭᠡᠳ ᠪᠠᠢᠳᠠᠭ ᠬᠡᠴᠡᠭᠦᠦ ᠭᠠᠵᠠᠷ! ᠭᠡᠪᠡ᠃
- ᠶᠠᠭᠠᠬᠢᠭᠠᠳ ᠲᠣᠯᠣᠭᠠᠢ ᠬᠠᠭᠠᠯᠴᠢᠬᠠᠬᠤ ᠭᠡᠳᠡᠭ ᠶᠦ᠍ᠮ ᠪᠣᠢ?
- ᠶᠠᠭᠠᠬᠢᠬᠤ ᠶᠠᠭᠤ ᠪᠠᠢᠬᠤ ᠪᠣᠢ? ᠲᠠᠩᠳᠠ ᠬᠡᠦᠬᠡᠨ ᠨᠥᠬᠥᠳ ᠱᠠᠪᠢᠯᠠᠨ ᠰᠠᠭᠤᠳᠠᠭ ᠪᠣᠯᠬᠣᠷ ᠡᠷᠡ ᠬᠥᠮᠦᠨ ᠬᠠᠷᠠᠭᠳᠠᠪᠠᠯ ᠴᠢᠯᠠᠭᠤ ᠪᠠᠷ ᠨᠡᠭᠦᠯᠭᠡᠭᠡᠳ ᠨᠢᠭᠤᠷ ᠨᠢᠳᠦ ᠦᠭᠡᠢ ᠪᠣᠯᠭᠠᠴᠢᠬᠠᠬᠤ ᠭᠡᠳ ᠪᠠᠢᠳᠠᠭ ᠶᠤᠮ᠃ ᠡᠪᠦᠭᠡᠨ ᠴᠢᠨᠢ ᠵᠠᠯᠠᠭᠤ ᠳ᠋ᠤ᠌ ᠪᠠᠨ ᠰᠠᠪᠠᠭᠠ ᠦᠭᠡᠢᠷᠬᠡᠵᠦ ᠡᠭᠦᠪᠡᠷ ᠬᠥᠯᠳᠡᠬᠦ ᠭᠡᠳ ᠦᠵᠡᠭᠰᠡᠨ ᠬᠥᠮᠦᠨ᠃ ᠪᠠᠯᠠᠯᠤᠭᠤᠯᠬᠤ ᠰᠢᠬᠠᠭᠰᠠᠨ ᠶᠤᠮ ᠳ᠋ᠠᠭ᠃ ᠵᠠᠯᠠᠭᠤ ᠳ᠋ᠤ᠌ ᠪᠠᠨ ᠪᠠᠷᠠᠭᠠ ᠦᠭᠡᠢ ᠶᠠᠭᠤᠮᠠ ᠶ᠋ᠢ ᠣᠳᠣ ᠥᠲᠡᠯᠦᠭᠰᠡᠨ ᠬᠣᠢᠨᠠ ᠪᠠᠨ ᠶᠠᠭᠤ ᠬᠢᠬᠦ ᠪᠣᠢ? ᠲᠠᠷᠠᠭ ᠤ᠋ᠨ ᠢ᠋ᠶ᠋ᠠᠨ ᠰᠠᠪᠠᠨ ᠠ᠋ᠴᠠ ᠰᠠᠯᠴᠢᠬᠠᠵᠤ ᠮᠠᠭᠠᠳ ᠦᠭᠡᠢ! ᠭᠡᠵᠦ ᠥᠯᠵᠡᠢᠲᠦ ᠨᠡᠯᠢᠶᠡᠳ ᠵᠠᠯᠬᠠᠭᠰᠠᠨ ᠪᠠᠢᠷᠢᠲᠠᠢ ᠶᠠᠷᠢᠬᠤ ᠶ᠋ᠢ ᠰᠣᠨᠣᠰᠴᠤ ᠰᠠᠨᠵᠢ ᠶ᠋ᠢᠨ ᠢᠨᠢᠶᠡᠳᠦ ᠬᠦᠷᠦᠭᠰᠡᠨ ᠪᠣᠯᠪᠠᠴᠤ ᠲᠡᠷᠡ ᠬᠡᠢᠳ ᠲᠦ᠍ ᠣᠴᠢᠬᠤ ᠪᠠᠷ ᠪᠣᠰᠤᠯᠠ᠃
- ᠦᠭᠡᠢ ᠴᠢ ᠬᠠᠮᠢᠭᠠ ᠣᠴᠢᠬᠤ ᠨᠢ ᠪᠣᠢ? ᠬᠥᠮᠦᠨ ᠤᠴᠢᠷ ᠢ᠋ ᠨᠢ ᠬᠡᠯᠡᠭᠡᠳ ᠪᠠᠢᠬᠤ ᠳ᠋ᠤ᠌ ᠲᠣᠭᠣᠬᠤ ᠦᠭᠡᠢ ᠶᠠᠪᠤᠵᠤ ᠪᠠᠢᠵᠤ ᠲᠠᠷᠢᠬᠢ ᠪᠠᠨ ᠬᠠᠭᠠ ᠴᠣᠬᠢᠭᠤᠯᠴᠢᠬᠠᠪᠠᠯ ᠶᠠᠮᠠᠷ ᠰᠠᠢᠨ ᠪᠣᠢ? ᠭᠡᠵᠦ ᠥᠯᠵᠡᠢᠲᠦ ᠬᠣᠷᠢᠭᠯᠠᠪᠠ᠃ ᠰᠠᠨᠵᠢ ᠰᠢᠯᠤᠭᠤᠳᠠᠭᠰᠠᠨ ᠬᠥᠮᠦᠨ ᠦ᠌ ᠶᠣᠰᠣᠭᠠᠷ ᠲᠣᠯᠣᠭᠠᠢ ᠵᠠᠢᠯᠵᠤ᠂
- ᠦᠭᠡᠢ᠂ ᠦᠭᠡᠢ᠃ ᠠᠨᠢᠭ ᠭᠣᠮᠪᠣ ᠭᠡᠳᠡᠭ ᠲᠦ᠍ ᠪᠢ ᠵᠠᠪᠠᠯ ᠣᠴᠢᠬᠤ ᠤᠴᠢᠷᠲᠠᠢ᠃ ᠡᠷᠭᠦᠯ ᠪᠠᠷᠢᠴᠠ ᠡᠷᠭᠦᠨᠡ ᠭᠡᠰᠡᠨ ᠳ᠋ᠦ᠍᠂
- ᠡᠷᠭᠦᠬᠦ ᠶᠠᠭᠤᠮᠠ ᠴᠢᠮᠠ ᠳ᠋ᠤ᠌ ᠶᠠᠭᠤ ᠪᠠᠢᠪᠠ ᠭᠡᠵᠦ ᠳᠡ? ᠭᠡᠵᠦ ᠥᠯᠵᠡᠢᠲᠦ ᠡᠷᠡᠭᠡᠯᠵᠡᠯᠡ᠃ ᠰᠠᠨᠵᠢ ᠲᠡᠭᠦᠨ ᠢ᠋ ᠢᠳᠬᠠᠵᠤ᠂
- ᠡᠷᠭᠦᠬᠦ ᠶᠠᠭᠤᠮᠠ ᠪᠠᠢᠭᠠ ᠨᠢ ᠦᠨᠡᠨ᠃ ᠭᠡᠬᠦ ᠳ᠋ᠦ᠍ ᠪᠡᠨ ᠪᠡᠷᠢᠮᠦᠭ ᠡᠮᠡᠭᠡᠨ ᠭᠡᠵᠦ ᠪᠠᠷᠤᠭ ᠯᠠ ᠮᠢᠨᠦ ᠡᠮᠡᠭᠡ ᠡᠵᠢ ᠪᠣᠯᠤᠭᠰᠠᠨ ᠠᠴᠢᠲᠠᠢ ᠬᠥᠮᠦᠨ ᠪᠠᠢᠭᠰᠠᠨ ᠶᠤᠮ᠃ ᠲᠡᠷᠡ ᠡᠨᠡ ᠠᠨᠢᠭ ᠭᠣᠮᠪᠣ ᠭᠡᠳᠡᠭ ᠲᠦ᠍ ᠱᠠᠪᠢᠯᠠᠨ ᠰᠠᠭᠤᠵᠤ ᠵᠠᠯᠠᠭᠤ ᠨᠠᠰᠤ ᠪᠠᠨ ᠥᠩᠭᠡᠷᠡᠭᠡᠭᠰᠡᠨ ᠭᠡᠳᠡᠭ᠃ ᠨᠠᠰᠤᠨ ᠬᠤᠲᠤᠭ ᠪᠣᠯᠬᠤ ᠶ᠋ᠢᠨ ᠢ᠋ᠶ᠋ᠡᠨ ᠡᠮᠦᠨᠡ ᠨᠠᠳᠠ ᠳ᠋ᠤ᠌ ᠭᠠᠭᠴᠠᠬᠠᠨ ᠶᠠᠭᠤᠮᠠ ᠵᠠᠬᠢᠭᠰᠠᠨ᠃ ᠲᠡᠭᠦᠨ ᠢ᠋ ᠨᠢ ᠪᠢ ᠪᠡᠶᠡᠯᠡᠭᠦᠯᠬᠦ ᠦᠭᠡᠢ ᠪᠣᠯ ᠶᠣᠰᠣᠲᠠᠢ ᠨᠢᠭᠦᠯ ᠭᠡᠳᠡᠭ ᠲᠡᠷᠡ ᠪᠣᠯᠤᠨᠠ᠃ ᠶᠠᠪᠤᠶᠠ᠃ ᠲᠠ ᠨᠠᠳᠠ ᠳ᠋ᠤ᠌ ᠲᠡᠷᠡ ᠬᠡᠢᠳ ᠢ᠋ ᠵᠢᠭᠠᠭᠠᠳ ᠥᠭᠭᠦᠭᠡᠴᠢ! ᠭᠡᠵᠦ ᠱᠠᠭᠠᠷᠳᠠᠪᠠ᠃
- ᠠ ᠪᠡᠷᠢᠮᠦᠭ ᠡᠮᠡᠭᠡᠨ ᠤᠤ? ᠮᠡᠳᠡᠨᠡ ᠮᠡᠳᠡᠨᠡ᠃ ᠲᠡᠢᠮᠦ ᠬᠥᠮᠦᠨ ᠪᠠᠢᠭᠰᠠᠨ᠃ ᠤᠯᠠᠭᠠᠨ ᠭᠠᠯᠵᠠᠭᠤ ᠠᠪᠠᠭᠠᠢ ᠪᠠᠢᠭᠰᠠᠨ ᠶᠤᠮ ᠳᠠ᠃ ᠬᠡᠯᠡ ᠨᠢ ᠲᠣᠩᠭᠣᠷᠠᠭ ᠰᠢᠭ᠋ ᠯᠡ ᠬᠤᠷᠴᠠ ᠪᠣᠯᠬᠣᠷ ᠲᠡᠭᠦᠨ ᠢ᠋ ᠦᠵᠡᠳᠡᠭ ᠦᠭᠡᠢ ᠪᠠᠢᠯᠠ᠃ ᠵᠠ ᠳᠡᠷᠡᠨ ᠦ᠌ ᠵᠠᠬᠢᠶᠠᠰᠤ ᠪᠠᠢᠭᠠ ᠶᠤᠮ ᠪᠣᠯ ᠣᠳᠣ ᠣᠴᠢᠬᠤ ᠠ᠋ᠴᠠ ᠪᠢᠰᠢ ᠳᠡ᠃ ᠲᠡᠭᠦᠨ ᠡᠴᠡ ᠠᠬᠠ ᠨᠢ ᠡᠨᠡ ᠤᠷᠤᠭᠤ ᠵᠦᠭᠯᠡᠬᠦ ᠡᠴᠡ ᠴᠦ᠍ ᠬᠠᠰᠢᠷᠠᠭᠰᠠᠨ ᠬᠥᠮᠦᠨ ᠭᠡᠵᠦ ᠥᠯᠵᠡᠢᠲᠦ ᠶᠠᠷᠢᠭᠠᠳ ᠮᠥᠨ ᠯᠡ ᠶᠠᠪᠤᠬᠤ ᠪᠠᠷ ᠪᠣᠯᠵᠤ ᠶᠠᠭᠤᠮᠠ ᠪᠠᠨ ᠬᠤᠮᠬᠢᠪᠠ᠃
- ᠡᠨᠡᠦᠬᠡᠨ ᠵᠡᠭᠦᠨ ᠬᠥᠪᠡᠭᠡᠨ ᠦ᠌ ᠴᠠᠭᠠᠨᠠ ᠠᠭᠤᠯᠠ ᠶ᠋ᠢᠨ ᠡᠩᠭᠡᠷ ᠲᠦ᠍᠂ ᠥᠭᠰᠥᠭᠦᠦ ᠭᠠᠵᠠᠷ ᠪᠠᠢᠳᠠᠭ ᠰᠢᠭ᠋ ᠰᠠᠨᠠᠭᠳᠠᠨᠠ᠃ ᠰᠢᠮᠨᠠᠨᠼ ᠤ᠋ᠨ ᠰᠠᠬᠢᠯ ᠬᠦᠷᠲᠡᠭᠰᠡᠨ ᠬᠡᠦᠬᠡᠨ ᠨᠥᠬᠥᠳ ᠢ᠋ᠶ᠋ᠡᠷ ᠳᠦᠭᠦᠷᠡᠩ ᠭᠠᠵᠠᠷ᠃ ᠨᠢᠭᠡ ᠴᠤ᠌ ᠡᠷᠡ ᠬᠥᠮᠦᠨ ᠪᠠᠢᠬᠤ ᠦᠭᠡᠢ᠃ ᠡᠷᠡ ᠬᠥᠮᠦᠨ ᠢ᠋ ᠬᠡᠢᠳ ᠦ᠋ᠨ ᠢ᠋ᠶ᠋ᠡᠨ ᠭᠣᠷᠢᠯᠣᠮ ᠳ᠋ᠤ᠌ ᠴᠤ᠌ ᠣᠷᠣᠭᠤᠯᠬᠤ ᠳᠤᠷᠠ ᠦᠭᠡᠢ᠂ ᠬᠡᠴᠡᠭᠦᠦ ᠠᠮᠢᠲᠠᠳ ᠳᠠ! ᠭᠡᠵᠦ ᠥᠯᠵᠡᠢᠲᠦ ᠦᠭᠡᠯᠡᠭᠰᠡᠭᠡᠷ ᠶᠠᠪᠤᠯᠠ᠃
- ᠨᠡᠯᠢᠶᠡᠳ ᠶᠠᠪᠤᠵᠤ ᠨᠢᠭᠡᠨ ᠶᠡᠬᠡ ᠬᠥᠪᠡᠭᠡ ᠶ᠋ᠢ ᠳᠠᠪᠠᠮᠠᠭᠴᠠ ᠠᠭᠤᠯᠠ ᠶ᠋ᠢᠨ ᠡᠩᠭᠡᠷ ᠲᠦ᠍ ᠪᠦᠷᠭᠦᠳ ᠦ᠋ᠨ ᠡᠭᠦᠷ ᠰᠢᠭ ᠶᠠᠭᠤᠮᠠ ᠬᠠᠷᠠᠭᠳᠠᠯᠠ᠃ ᠥᠯᠵᠡᠢᠲᠦ ᠲᠡᠭᠦᠨ ᠢ᠋ ᠵᠢᠭᠠᠵᠤ᠂
- ᠠᠨᠢᠭ ᠭᠣᠮᠪᠣ ᠭᠡᠳᠡᠭ ᠴᠢᠨᠢ ᠲᠡᠷᠡ ᠪᠠᠢᠨᠠ᠃ ᠴᠢᠮᠠᠶ᠋ᠢ ᠴᠤ᠌ ᠶᠠᠭᠠᠬᠢᠬᠤ ᠪᠣᠢ᠂ ᠰᠢᠮᠨᠠᠨᠼ ᠪᠠᠢᠨᠠ ᠭᠡᠳ ᠯᠡ ᠣᠷᠣᠭᠤᠯᠵᠤ ᠣᠷᠬᠢᠨᠠ᠃ ᠨᠠᠮᠠᠶ᠋ᠢ ᠴᠤ᠌ ᠡᠭᠦᠳᠡᠨ ᠳᠡᠭᠡᠷᠡ ᠡᠴᠡ ᠪᠠᠨ ᠯᠠ ᠦᠯᠳᠡᠨ ᠬᠥᠭᠡᠭᠡᠨᠡ ᠪᠢᠵᠡ ᠳᠡ᠃ ᠠᠶᠠᠭᠦᠢ ᠪᠣᠯ ᠳᠡᠭᠡᠷᠡ ᠦᠶᠡ ᠳ᠋ᠦ᠍ ᠬᠥᠭᠯᠡᠵᠦ ᠶᠠᠪᠤᠭᠰᠠᠨ ᠢ᠋ ᠮᠢᠨᠢ ᠮᠡᠳᠡᠳᠡᠭ ᠴᠢᠪᠠᠭᠠᠨᠴᠠ ᠳᠠᠭᠠᠷᠢᠯᠳᠤᠭᠠᠳ ᠲᠠᠨᠢᠵᠤ ᠣᠷᠬᠢᠪᠠᠯ ᠨᠠᠮᠠᠶ᠋ᠢ ᠪᠠᠨ ᠶᠠᠭᠤᠮᠠ ᠦᠯᠡᠳᠡᠭᠡᠬᠦ ᠦᠭᠡᠢ ᠳᠡ! ᠭᠡᠵᠦ ᠥᠯᠵᠡᠢᠲᠦ ᠰᠠᠨᠠᠭᠠ ᠵᠣᠪᠠᠬᠤ ᠳ᠋ᠤ᠌ ᠨᠢ᠂
- ᠵᠣᠪᠠᠭᠠᠳ ᠶᠠᠭᠤ ᠪᠠᠨ ᠬᠢᠬᠦ ᠪᠣᠢ? ᠪᠢ ᠲᠠᠨ ᠢ᠋ ᠥᠮᠥᠭᠡᠷᠡᠨᠡ᠃ ᠵᠥᠪᠬᠡᠨ ᠡᠷᠭᠦᠯ ᠪᠠᠷᠢᠴᠠ ᠲᠡᠳᠦᠢᠬᠡᠨ ᠢ᠋ ᠥᠭᠭᠦᠭᠡᠳ ᠭᠠᠷᠬᠤ ᠲᠡᠳᠦᠢ ᠳ᠋ᠦ᠍ ᠭᠠᠢᠭᠤᠢ ᠪᠢᠵᠡ ᠳᠡ! ᠭᠡᠵᠦ ᠰᠠᠨᠵᠢ ᠠᠷᠭᠠᠳᠠᠪᠠ᠃
- ᠠ ᠠᠮᠠᠷ ᠦᠭᠡᠢ ᠰᠢᠦ! ᠡᠷᠭᠦᠯ ᠪᠠᠷᠢᠴᠠ ᠥᠭᠭᠦᠭᠡᠳ ᠭᠠᠷᠬᠤ ᠬᠣᠭᠣᠷᠣᠨᠳᠣ ᠶᠠᠭᠤ ᠪᠣᠯᠤᠨᠠ ᠭᠡᠵᠦ ᠰᠠᠨᠠᠨᠠ᠃ ᠲᠡᠭᠡᠭᠡᠳ ᠴᠦ᠍ ᠴᠢ ᠪᠣᠯ ᠰᠢᠮᠨᠠᠨᠼ ᠭᠡᠳᠡᠭ ᠢ᠋ᠶ᠋ᠡᠨ ᠰᠠᠢᠨ ᠨᠢᠭᠤᠵᠤ ᠪᠠᠢᠬᠤ ᠤᠴᠢᠷᠲᠠᠢ᠃ ᠣᠯᠠᠨ ᠦᠭᠡ ᠶᠠᠷᠢᠪᠠᠯ ᠳᠠᠭᠤ ᠪᠠᠷ ᠢ᠋ᠶ᠋ᠠᠨ ᠲᠠᠨᠢᠭᠳᠠᠴᠢᠬᠠᠨᠠ ᠰᠢᠦ᠃ ᠪᠠᠢᠩᠭᠤ ᠰᠢᠪᠡᠨᠡᠨ ᠶᠠᠷᠢᠵᠤ ᠪᠠᠢ᠃ ᠬᠣᠭᠣᠯᠠᠢ ᠴᠢᠨᠢ ᠪᠡᠷᠰᠡᠭᠦᠲᠦᠵᠦ᠂ ᠲᠠᠭ ᠪᠣᠯᠴᠢᠬᠠᠭᠰᠠᠨ ᠶᠤᠮ ᠭᠡᠳᠡᠭ ᠢ᠋ ᠪᠢᠲᠡᠭᠡᠢ ᠮᠠᠷᠲᠠ! ᠭᠡᠵᠦ ᠥᠯᠵᠡᠢᠲᠦ ᠬᠠᠷᠢᠭᠤ ᠰᠤᠷᠭᠠᠮᠵᠢᠯᠠᠯᠠ᠃ ᠲᠡᠷᠡ ᠬᠣᠶᠠᠷ ᠬᠡᠰᠡᠭ ᠵᠠᠭᠤᠷᠠ ᠳᠠᠭᠤ ᠦᠭᠡᠢ ᠶᠠᠪᠤᠵᠠᠭᠠᠯᠠ᠃ ᠲᠡᠭᠡᠲᠡᠯᠡ ᠨᠢᠭᠡᠨ ᠬᠠᠭᠤᠷᠠᠢ ᠵᠢᠯᠠᠭᠠ ᠳᠠᠭᠠᠷᠢᠯᠳᠤᠪᠠ᠃ ᠥᠯᠵᠡᠢᠲᠦ᠂
- ᠵᠠ ᠬᠡᠷᠪᠡ ᠨᠠᠮᠠᠶ᠋ᠢ ᠡᠳᠡ ᠨᠠᠷ ᠠᠳᠠ ᠱᠣ ᠦᠵᠡᠭᠡᠳ ᠬᠥᠭᠡᠭᠡᠨ ᠵᠠᠢᠯᠠᠭᠤᠯᠪᠠᠯ ᠪᠢ ᠴᠢᠮᠠᠶ᠋ᠢ ᠡᠨᠡ ᠵᠢᠯᠭᠠᠨ ᠳ᠋ᠤ᠌ ᠬᠣᠷᠭᠣᠳᠠᠵᠤ ᠰᠠᠭᠤᠭᠠᠳ ᠬᠦᠯᠢᠶᠡᠨᠡ᠃ ᠴᠢ ᠬᠡᠷᠡᠭ ᠢ᠋ᠶ᠋ᠡᠨ ᠪᠦᠲᠦᠭᠡᠭᠡᠳ ᠨᠠᠰᠢ ᠪᠠᠨ ᠢᠷᠡᠭᠡᠷᠡᠢ! ᠭᠡᠵᠦ ᠵᠠᠬᠢᠯᠠ᠃ ᠰᠠᠨᠵᠢ ᠲᠡᠭᠦᠨ ᠢ᠋ ᠳᠣᠲᠣᠷᠠ ᠪᠠᠨ ᠥᠷᠦᠪᠳᠦᠵᠦ᠂ ᠬᠣᠭᠣᠯᠠᠢ ᠨᠢ ᠵᠠᠩᠭᠢᠷᠠᠵᠤ ᠢᠷᠡᠭᠰᠡᠨ ᠢ᠋ᠶ᠋ᠡᠨ
- ᠭᠠᠢᠭᠤᠢ ᠪᠢᠵᠡ ᠳᠡ᠂ ᠠᠬᠠ ᠮᠢᠨᠢ! ᠭᠡᠵᠦ ᠠᠷᠠᠢᠬᠢᠨ ᠬᠡᠯᠡᠪᠡ᠃
- ᠡᠷᠭᠦᠯ ᠥᠭᠭᠦᠨᠡ! ᠭᠡᠵᠦ ᠯᠡ ᠬᠡᠯᠡᠭᠡᠷᠡᠢ᠃ ᠲᠡᠭᠡᠪᠡᠯ ᠯᠡ ᠭᠠᠢᠭᠤᠢ ᠪᠠᠢᠳᠠᠭ ᠶᠤᠮ᠃ ᠡᠷᠭᠦᠯ ᠪᠠᠷᠢᠴᠠ ᠶ᠋ᠢ ᠠᠪᠤᠮᠠᠭᠴᠠ ᠯᠠ ᠬᠥᠭᠡᠭᠡᠨᠡ ᠰᠢᠦ! ᠭᠡᠵᠦ ᠰᠠᠨᠠᠭᠤᠯᠤᠭᠠᠳ ᠥᠯᠵᠡᠢᠲᠦ ᠲᠦᠷᠦᠭᠦᠯᠡᠨ ᠶᠠᠪᠤᠯᠠ᠃
᠁ ᠬᠡᠢᠳ ᠲᠦ᠍ ᠣᠢᠷᠠᠳᠤᠨ ᠣᠴᠢᠬᠤ ᠦᠶᠡ ᠳ᠋ᠦ᠍ ᠦᠰᠦ ᠪᠡᠨ ᠬᠤᠰᠤᠵᠤ᠂ ᠰᠢᠷᠠ ᠬᠤᠪᠴᠠᠰᠤ ᠡᠮᠦᠰᠦᠭᠰᠡᠨ ᠬᠥᠭᠰᠢᠨ᠂ ᠵᠠᠯᠠᠭᠤ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠭᠡᠯᠦᠩᠮᠠ ᠨᠤᠭᠤᠳ ᠲᠡᠷᠡ ᠬᠣᠶᠠᠷ ᠢ᠋ ᠭᠠᠢᠬᠠᠭᠰᠠᠨ ᠨᠢᠳᠦ ᠪᠡᠷ ᠰᠢᠷᠳᠡᠵᠦ᠂ ᠪᠣᠯᠭᠣᠮᠵᠢᠯᠠᠨ ᠬᠦᠷᠢᠶᠡᠯᠡᠬᠦ ᠮᠠᠶᠢᠭᠲᠠᠢ ᠪᠣᠯᠵᠤ ᠡᠬᠢᠯᠡᠪᠡ᠃ ᠰᠢᠷᠠ ᠬᠤᠪᠴᠠᠰᠤ ᠡᠮᠦᠰᠴᠦ᠂ ᠦᠰᠦ ᠪᠡᠨ ᠬᠤᠰᠤᠭᠤᠯᠵᠤ᠂ ᠡᠯᠳᠡᠪ ᠡᠭᠡᠮᠦᠭ ᠪᠥᠭᠡᠵᠢ ᠡᠴᠡ ᠪᠡᠨ ᠰᠠᠯᠤᠭᠰᠠᠨ ᠲᠡᠳᠡᠨ ᠢ᠋ ᠬᠠᠷᠠᠬᠤ ᠳ᠋ᠤ᠌ ᠡᠮᠡ ᠬᠥᠮᠦᠰ ᠭᠡᠵᠦ ᠢᠯᠭᠠᠬᠤ ᠳ᠋ᠤ᠌ ᠪᠡᠷᠬᠡ ᠪᠠᠢᠯᠠ᠃ 《ᠦᠰᠦ ᠪᠠᠨ ᠯᠠ ᠬᠤᠰᠤᠴᠢᠬᠠᠪᠠᠯ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠬᠥᠮᠦᠨ ᠴᠢᠨᠢ ᠢᠯᠭᠠᠭᠳᠠᠳᠠᠭ ᠦᠭᠡᠢ ᠶᠦ᠍ᠮ ᠤᠤ ᠳᠠ?!》 ᠭᠡᠵᠦ ᠰᠠᠨᠵᠢ ᠳᠣᠲᠣᠷᠠ ᠪᠠᠨ ᠭᠠᠢᠬᠠᠰᠬᠢᠨ ᠪᠣᠳᠣᠯᠠ᠃ ᠬᠡᠢᠳ ᠦ᠋ᠨ ᠭᠣᠷᠢᠯᠣᠮ ᠳ᠋ᠤ᠌ ᠣᠷᠣᠵᠤ ᠨᠡᠯᠢᠶᠡᠳ ᠶᠠᠪᠤᠲᠠᠯᠠ ᠭᠤᠷᠪᠠ ᠳᠥᠷᠪᠡᠨ ᠭᠡᠯᠦᠩᠮᠠ ᠴᠢᠭᠢᠷᠠᠭ ᠪᠦᠳᠦᠭᠦᠨ ᠪᠡᠶᠡ ᠪᠡᠨ ᠭᠠᠢᠬᠠᠭᠤᠯᠬᠤ ᠮᠡᠲᠦ ᠬᠥᠨᠳᠡᠯᠢᠳᠦᠨ ᠵᠣᠭᠰᠣᠵᠤ ᠵᠠᠮ ᠢ᠋ ᠲᠠᠭᠯᠠᠭᠠᠳ᠂
- ᠬᠠᠮᠢᠭᠠ ᠣᠴᠢᠬᠤ ᠨᠢ ᠪᠣᠢ? ᠪᠤᠴᠠ! ᠭᠡᠵᠦ ᠲᠥᠪᠡᠳ ᠢ᠋ᠶ᠋ᠡᠷ ᠴᠢᠩᠭᠠ ᠴᠢᠩᠭᠠ᠂ ᠵᠡᠷᠭᠡ ᠵᠡᠷᠭᠡ ᠱᠠᠭᠠᠷᠳᠠᠯᠠ᠃ ᠳᠠᠭᠤ ᠶ᠋ᠢ ᠨᠢ ᠰᠣᠨᠣᠰᠬᠤ ᠳ᠋ᠤ᠌ ᠯᠠ ᠰᠠᠶ᠋ᠢ ᠲᠡᠳᠡᠨ ᠢ᠋ ᠡᠮᠡᠭᠲᠡᠢᠴᠦᠳ ᠭᠡᠵᠦ ᠲᠠᠨᠢᠬᠤ ᠪᠠᠷ ᠪᠠᠢᠯᠠ᠃ ᠤᠶᠠᠩᠭᠠᠯᠢᠭ ᠰᠢᠩᠭᠡᠨ ᠳᠠᠭᠤ ᠨᠢ ᠰᠣᠳᠣᠨ ᠠᠵᠠᠢ᠃
- ᠡᠨᠡ ᠰᠢᠮᠨᠠᠨᠼ ᠲᠤ᠌ ᠪᠢ ᠭᠠᠵᠠᠷᠴᠢᠯᠠᠵᠤ ᠶᠠᠪᠤᠨᠠ᠃ ᠠᠨᠢᠭ ᠭᠣᠮᠪᠣ ᠳ᠋ᠤ᠌ ᠡᠷᠭᠦᠯ ᠪᠠᠷᠢᠴᠠ ᠡᠷᠭᠦᠬᠦ ᠪᠡᠷ ᠵᠣᠷᠢᠵᠤ ᠢᠷᠡᠯᠡ᠃ ᠬᠣᠭᠣᠯᠠᠢ ᠨᠢ ᠪᠡᠷᠰᠡᠭᠦᠲᠦᠵᠦ᠂ ᠳᠠᠭᠤ ᠨᠢ ᠭᠠᠷᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠬᠥᠭᠡᠷᠦᠬᠦᠢ ᠵᠣᠪᠠᠯᠠᠩᠲᠠᠨ! ᠡᠭᠦᠨ ᠳ᠋ᠦ᠍ ᠪᠢ ᠭᠠᠵᠠᠷᠴᠢᠯᠠᠵᠤ᠂ ᠪᠠᠰᠠ ᠬᠡᠯᠡᠨ ᠦ᠌ ᠨᠢ ᠣᠷᠣᠨ ᠳ᠋ᠤ᠌ ᠬᠡᠯᠡ ᠪᠣᠯᠵᠤ ᠶᠠᠪᠤᠨᠠ᠃ ᠣᠷᠣᠭᠤᠯᠤᠭᠠᠴᠢ ᠳᠠ᠂ ᠪᠢᠳᠡᠨ ᠢ᠋ ᠪᠡᠨ! ᠭᠡᠵᠦ ᠥᠯᠵᠡᠢᠲᠦ ᠲᠠᠢᠯᠪᠤᠷᠢᠯᠠᠨ ᠭᠤᠶᠤᠯᠠ᠃
- ᠶᠠᠮᠠᠷ ᠡᠷᠭᠦᠯ ᠪᠠᠷᠢᠴᠠ ᠲᠠᠢ ᠪᠣᠢ? ᠭᠡᠵᠦ ᠪᠠᠢᠴᠠᠭᠠᠪᠠ᠃
- ᠪᠠᠭᠠ ᠰᠢᠭ᠋ ᠁ ᠭᠡᠰᠡᠨ ᠢ᠋ᠶ᠋ᠡᠨ ᠥᠯᠵᠡᠢᠲᠦ ᠰᠠᠨᠵᠢ ᠳ᠋ᠤ᠌ ᠬᠠᠨᠳᠤᠨ ᠮᠣᠩᠭᠣᠯ ᠢ᠋ᠶ᠋ᠠᠷ 《ᠶᠠᠭᠤ ᠥᠭᠬᠦ ᠭᠡᠳ ᠪᠠᠢᠭᠠ ᠶᠤᠮ ᠪᠣᠢ?》 ᠭᠡᠵᠦ ᠰᠢᠪᠡᠨᠡᠨ ᠠᠰᠠᠭᠤᠬᠤ ᠳ᠋ᠤ᠌ ᠨᠥᠭᠥᠭᠡᠳᠡᠬᠢ ᠨᠢ 《ᠠᠯᠲᠠ!》 ᠭᠡᠵᠦ ᠬᠡᠯᠡᠵᠦ ᠣᠷᠬᠢᠯᠠ᠃ 《ᠠᠯᠲᠠ ᠭᠡᠨᠡ ᠤᠤ? ᠪᠢ ᠪᠤᠷᠤᠭᠤ ᠲᠣᠭᠣᠯᠤᠭᠠ ᠤᠤ? ᠬᠣᠯᠠ ᠵᠠᠮ ᠳ᠋ᠤ᠌ ᠥᠯᠪᠡᠷᠴᠦ ᠦᠬᠦᠬᠦ ᠭᠡᠵᠦ ᠶᠠᠪᠤᠭᠠ ᠮᠥᠷᠲᠡᠯᠡ ᠡᠨᠡ ᠮᠠᠭᠤᠰᠠᠢᠨ ᠬᠡᠦᠬᠡᠨ ᠨᠥᠬᠥᠳ ᠲᠦ᠍ ᠠᠯᠲᠠ ᠡᠷᠭᠦᠭᠡᠳ ᠪᠠᠢᠬᠤ ᠳ᠋ᠤ᠌ ᠪᠠᠨ ᠶᠠᠭᠠᠬᠢᠳᠠᠭ ᠵᠣᠯᠢᠭ ᠪᠣᠢ?》 ᠭᠡᠵᠦ ᠥᠯᠵᠡᠢᠲᠦ ᠬᠠᠷᠠᠮᠰᠠᠨ ᠪᠣᠳᠣᠯᠠ᠃
- ᠶᠠᠭᠤ ᠥᠭᠬᠦ ᠶᠦ᠍ᠮ ᠪᠣᠢ? ᠭᠡᠵᠦ ᠬᠡᠦᠬᠡᠨ ᠨᠥᠬᠥᠳ ᠱᠠᠭᠠᠷᠳᠠᠪᠠ᠃
- ᠠᠯᠲᠠ! ᠭᠡᠳ ᠯᠡ ᠰᠠᠨᠳᠤᠷᠬᠤ ᠳ᠋ᠤ᠌ ᠪᠠᠨ ᠥᠯᠵᠡᠢᠲᠦ ᠬᠡᠯᠡᠵᠦ ᠣᠷᠬᠢᠪᠠ᠃ ᠲᠡᠭᠡᠲᠡᠯᠡ ᠰᠢᠮᠨᠠᠨᠼ ᠨᠠᠷ ᠬᠣᠭᠣᠷᠣᠨᠳᠣ ᠪᠠᠨ ᠰᠢᠪᠠᠷ ᠠᠪᠢᠷ ᠶᠠᠷᠢᠯᠴᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠂
- ᠬᠣᠶᠠᠭᠤᠯᠠ ᠪᠠᠨ ᠠᠯᠲᠠ ᠡᠷᠭᠦᠬᠦ ᠶᠦ᠍ᠮ ᠤᠤ? ᠭᠡᠪᠡ ᠃
- ᠡᠨᠡ ᠯᠡ ᠠᠯᠲᠠ ᠡᠷᠭᠦᠨᠡ᠃ ᠨᠠᠳᠠ ᠶᠠᠭᠤᠮᠠ ᠪᠠᠢᠬᠤ ᠦᠭᠡᠢ! ᠭᠡᠵᠦ ᠥᠯᠵᠡᠢᠲᠦ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠯᠡ᠃ ᠲᠡᠭᠡᠭᠰᠡᠨ ᠴᠢᠨᠢ ᠬᠣᠶᠠᠷ ᠭᠤᠷᠪᠠᠨ ᠪᠣᠯᠢᠶᠠ ᠡᠮᠡᠭᠲᠡᠢ ᠥᠯᠵᠡᠢᠲᠦ ᠶ᠋ᠢ ᠰᠠᠨᠵᠢ ᠠ᠋ᠴᠠ ᠲᠤᠰᠠᠭᠠᠷᠯᠠᠭᠠᠳ ᠵᠠᠮ ᠤ᠋ᠨ ᠬᠠᠵᠠᠭᠤ ᠳ᠋ᠠᠬᠢ ᠴᠢᠯᠠᠭᠤ ᠵᠢᠭᠠᠵᠤ᠂
- ᠡᠨᠳᠡ ᠰᠠᠭᠤᠭᠠᠳ ᠬᠦᠯᠢᠶᠡᠵᠦ ᠪᠠᠢ! ᠭᠡᠪᠡ᠃ ᠰᠠᠨᠵᠢ ᠶ᠋ᠢ ᠪᠣᠯᠬᠣᠷ ᠲᠡᠷᠡ ᠭᠠᠵᠠᠷ ᠨᠢ ᠵᠣᠭᠰᠣᠭᠠᠭᠠᠳ 《ᠰᠢᠷᠡᠭᠡᠲᠦ ᠡᠴᠡ ᠠᠰᠠᠭᠤᠨᠠ》 ᠭᠡᠵᠦ ᠬᠡᠯᠡᠭᠡᠳ ᠨᠢᠭᠡ ᠨᠢ ᠶᠠᠪᠤᠭᠠᠳ ᠥᠭᠪᠡ᠃ ᠰᠣᠬᠣᠷ᠂ ᠳᠣᠭᠣᠯᠠᠩ᠂ ᠲᠠᠬᠢᠷ ᠳᠤᠲᠠᠭᠤ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠵᠣᠪᠠᠯᠠᠩ ᠳ᠋ᠤ᠌ ᠢᠳᠡᠭᠳᠡᠭᠰᠡᠨ ᠬᠡᠦᠬᠡᠨ ᠨᠥᠬᠥᠳ ᠰᠦᠮᠡ ᠶ᠋ᠢᠨ ᠬᠠᠰᠢᠶᠠᠨ ᠳ᠋ᠤ᠌ ᠡᠨᠳᠡ ᠲᠡᠨᠳᠡ ᠦᠭᠡᠢ ᠭᠤᠨᠢᠭᠯᠠᠨ ᠶᠠᠪᠤᠵᠠᠭᠠᠵᠤ ᠪᠠᠢᠭᠠ ᠶ᠋ᠢ ᠰᠠᠨᠵᠢ ᠬᠠᠷᠠᠯᠠ᠃ ᠵᠠᠷᠢᠮ ᠨᠢ ᠬᠦᠷᠳᠦ ᠡᠷᠭᠢᠭᠦᠯᠦᠨ ᠨᠠᠢᠭᠤᠨ ᠶᠠᠪᠤᠨᠠ᠃ ᠵᠠᠷᠢᠮ ᠨᠢ ᠰᠤᠪᠤᠷᠭᠠ ᠨᠠᠯᠠᠨ ᠰᠠᠭᠤᠨᠠ᠃ ᠵᠠᠷᠢᠮ ᠨᠢ ᠰᠦᠮᠡ ᠶ᠋ᠢᠨ ᠡᠭᠦᠳᠡᠨ ᠳ᠋ᠡᠬᠢ ᠪᠠᠨᠵᠠᠨ ᠲᠠᠪᠴᠠᠩ ᠳᠡᠭᠡᠷᠡ ᠲᠣᠭᠠ ᠲᠣᠮᠰᠢ ᠦᠭᠡᠢ ᠤᠳᠠᠭᠠ ᠰᠤᠨᠵᠤ ᠮᠥᠷᠭᠥᠭᠰᠡᠭᠡᠷ ᠪᠠᠢᠨᠠ᠃ 《ᠶᠡᠷᠦ ᠶ᠋ᠢᠨ ᠬᠡᠢᠳ ᠢ᠋ ᠪᠣᠳᠣᠪᠠᠯ᠂ ᠠᠷᠠᠢ ᠴᠡᠪᠡᠷᠬᠡᠨ ᠦᠵᠡᠮᠵᠢᠲᠡᠢ ᠶᠦ᠍ᠮ ᠤᠤ ᠳᠠ! ᠡᠮᠡᠭᠲᠡᠢᠴᠦᠳ ᠪᠣᠯᠬᠣᠷ ᠠᠷᠭᠠ ᠦᠭᠡᠢ ᠪᠢᠵᠡ ᠳᠡ!》 ᠭᠡᠵᠦ ᠰᠠᠨᠵᠢ ᠪᠣᠳᠣᠵᠤ ᠵᠣᠭᠰᠣᠯᠠ᠃
ᠨᠡᠯᠢᠶᠡᠳ ᠤᠳᠠᠭᠰᠠᠨ ᠤ᠋ ᠳᠠᠷᠠᠭᠠ ᠨᠢᠭᠡ ᠭᠡᠯᠦᠩᠮᠠ ᠢᠷᠡᠵᠦ 《ᠰᠢᠷᠡᠭᠡᠲᠦ ᠵᠥᠪᠰᠢᠶᠡᠷᠡᠬᠦ ᠦᠭᠡᠢ ᠪᠠᠢᠨᠠ᠃ ᠥᠴᠥᠭᠡᠳᠦᠷ ᠡᠴᠡ ᠡᠬᠢᠯᠡᠭᠡᠳ 49 ᠬᠣᠨᠣᠭ ᠤ᠋ᠨ ᠲᠤᠷᠰᠢ ᠮᠠᠨ ᠤ᠋ ᠭᠣᠷᠢᠯᠣᠮ ᠳ᠋ᠤ᠌ ᠡᠷᠡ ᠬᠥᠮᠦᠨ ᠣᠷᠣᠭᠤᠯᠬᠤ ᠶ᠋ᠢ ᠬᠣᠷᠢᠭᠯᠠᠭᠰᠠᠨ!》 ᠭᠡᠵᠦ ᠬᠡᠯᠡᠪᠡ᠃ 《ᠪᠡᠷᠢᠮᠦᠭ ᠡᠮᠡᠭᠡᠨ ᠦ᠌ ᠵᠠᠬᠢᠶᠠᠰᠤ ᠶ᠋ᠢ ᠪᠡᠶᠡᠯᠡᠭᠦᠯᠬᠦ ᠦᠭᠡᠢ ᠶᠠᠪᠤᠬᠤ ᠭᠡᠵᠦ ᠤᠤ ᠳᠠ᠃ ᠶᠠᠭᠠᠬᠢᠵᠤ ᠪᠣᠯᠬᠤ ᠪᠣᠢ? ᠭᠤᠶᠤᠬᠤ ᠬᠡᠷᠡᠭᠲᠡᠢ》 ᠭᠡᠵᠦ ᠰᠠᠨᠵᠢ ᠥᠪᠡᠷᠲᠡᠭᠡᠨ ᠲᠤᠰᠢᠶᠠᠪᠠ᠃
- ᠰᠢᠷᠡᠭᠡᠲᠦ ᠯᠠᠮᠠ ᠳ᠋ᠤ᠌ ᠬᠡᠯᠡᠵᠦ ᠥᠭᠭᠦᠭᠡᠴᠢ! ᠭᠡᠵᠦ ᠬᠡᠯᠡᠬᠦ ᠭᠡᠰᠡᠨ ᠢ᠋ᠶ᠋ᠡᠨ ᠬᠣᠭᠣᠯᠠᠢ ᠨᠢ ᠪᠡᠷᠰᠡᠭᠦᠲᠦᠭᠰᠡᠨ ᠭᠡᠭᠴᠢ ᠪᠡᠨ ᠭᠡᠨᠡᠳᠲᠡ ᠰᠠᠨᠠᠭᠠᠳ ᠰᠠᠨᠵᠢ ᠥᠯᠵᠡᠢᠲᠦ ᠳ᠋ᠦ᠍ ᠣᠴᠢᠵᠤ᠂
- ᠪᠡᠷᠢᠮᠦᠭ ᠡᠮᠡᠭᠡᠨ ᠢ᠋ ᠰᠠᠨᠠᠵᠤ ᠪᠠᠢᠨᠠ ᠤᠤ? ᠲᠡᠷᠡ ᠥᠭᠡᠳᠡ ᠪᠣᠯᠤᠭᠰᠠᠨ᠃ ᠲᠡᠭᠦᠨ ᠦ᠌ ᠵᠠᠬᠢᠶᠠᠰᠤ ᠪᠠᠷ ᠪᠢ ᠢᠷᠡᠯᠡ᠃ ᠪᠢ ᠰᠢᠷᠡᠭᠡᠲᠦ ᠯᠠᠮᠠ ᠲᠠᠢ ᠠᠭᠤᠯᠵᠠᠮᠠᠷ ᠪᠠᠢᠨᠠ᠃ ᠨᠠᠮᠠᠶ᠋ᠢ ᠣᠷᠣᠭᠤᠯᠤᠭᠠᠴᠢ! ᠭᠡᠵᠦ ᠬᠡᠯᠡᠬᠦ ᠶ᠋ᠢ ᠰᠢᠪᠡᠨᠡᠨ ᠭᠤᠶᠤᠬᠤ ᠳ᠋ᠤ᠌ ᠥᠯᠵᠡᠢᠲᠦ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠲᠡᠭᠦᠨ ᠢ᠋ ᠳᠠᠮᠵᠢᠭᠤᠯᠪᠠ᠃
- ᠪᠡᠷᠢᠮᠦᠭ ᠭᠡᠨᠡ ? ᠭᠡᠵᠦ ᠬᠡᠦᠬᠡᠨ ᠨᠦᠭᠦᠳ ᠯᠠᠪᠯᠠᠪᠠ᠃
- ᠲᠡᠢᠮᠦ ᠠ᠋᠃ ᠪᠡᠷᠢᠮᠦᠭ᠃ ᠬᠡᠳᠦᠨ ᠵᠢᠯ ᠦ᠋ᠨ ᠡᠮᠦᠨᠡ ᠲᠠᠨ ᠤ᠋ ᠬᠡᠢᠳ ᠲᠦ᠍ ᠱᠠᠪᠢᠯᠠᠨ ᠰᠠᠭᠤᠵᠤ ᠪᠠᠢᠭᠰᠠᠨ! ᠡᠨᠡ ᠦᠭᠡ ᠶ᠋ᠢ ᠳᠠᠮᠵᠢᠭᠤᠯᠤᠨ ᠬᠡᠯᠡᠬᠦ ᠪᠡᠷ ᠨᠢᠭᠡ ᠵᠠᠯᠠᠭᠤᠬᠠᠨ ᠰᠢᠮᠨᠠᠨᠼ ᠭᠦᠶᠦᠵᠦ ᠣᠳᠤᠯᠠ᠃ ᠲᠤᠩ ᠶᠡᠬᠡ ᠤᠳᠠᠯ ᠦᠭᠡᠢ ᠲᠡᠷᠡ ᠡᠷᠭᠢᠵᠦ ᠢᠷᠡᠭᠡᠳ᠂
- ᠤᠷᠤᠭᠤᠯ! ᠭᠡᠵᠦ ᠪᠠᠢᠨᠠ! ᠭᠡᠪᠡ᠃ ᠰᠠᠨᠵᠢ᠂ ᠥᠯᠵᠡᠢᠲᠦ ᠬᠣᠶᠠᠭᠤᠯᠠ ᠤᠬᠤᠰᠬᠢᠭᠰᠡᠨ ᠴᠢᠨᠢ ᠥᠯᠵᠡᠢᠲᠦ ᠶ᠋ᠢ ᠬᠡᠦᠬᠡᠨ ᠨᠥᠬᠥᠳ ᠬᠣᠷᠢᠭᠯᠠᠵᠤ ᠨᠥᠭᠥᠭᠡᠬᠢ ᠴᠢᠯᠠᠭᠤᠨ ᠳᠡᠭᠡᠷᠡ ᠨᠢ ᠪᠤᠴᠠᠭᠠᠨ ᠰᠠᠭᠤᠯᠭᠠᠯᠠ᠃ ᠰᠠᠨᠵᠢ ᠲᠡᠢᠨ ᠬᠦ᠌ ᠵᠥᠪᠰᠢᠶᠡᠷᠡᠭᠰᠡᠨ ᠶᠣᠰᠣᠭᠠᠷ ᠳᠤᠭᠠᠩ ᠳ᠋ᠤ᠌ ᠣᠷᠣᠵᠤ ᠰᠢᠷᠡᠭᠡᠲᠦ ᠯᠠᠮᠠ ᠶ᠋ᠢᠨ ᠡᠮᠦᠨᠡ ᠣᠴᠢᠪᠠ᠃ ᠮᠢᠬᠠᠯᠢᠭ ᠪᠦᠳᠦᠭᠦᠨ ᠪᠡᠶᠡ ᠲᠡᠢ ᠪᠠᠳᠠᠷᠢᠭᠤᠨ ᠡᠮᠡᠭᠲᠡᠢ ᠠᠵᠢ᠃ ᠭᠡᠪᠡᠴᠦ ᠰᠢᠷᠠ ᠬᠤᠪᠴᠠᠰᠤ ᠬᠤᠰᠤᠮᠠᠯ ᠲᠣᠯᠣᠭᠠᠢ ᠪᠠᠷ ᠢ᠋ᠶ᠋ᠠᠨ ᠡᠷᠡ ᠬᠥᠮᠦᠨ ᠡᠴᠡ ᠢᠯᠭᠠᠭᠳᠠᠬᠤ ᠦᠭᠡᠢ ᠪᠠᠢᠯᠠ᠃ ᠶᠠᠭ ᠯᠠ ᠯᠠᠮᠠ ᠮᠡᠲᠦ ᠵᠠᠪᠢᠯᠠᠨ ᠰᠠᠭᠤᠵᠠᠢ᠃ ᠡᠮᠡ ᠬᠥᠮᠦᠨ ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠢᠨᠢᠶᠡᠳᠦ ᠲᠡᠢ ᠠᠵᠢ᠃
- ᠥᠭᠯᠢᠭᠡ ᠶ᠋ᠢᠨ ᠡᠵᠡᠨ ᠶᠠᠮᠠᠷ ᠬᠡᠷᠡᠭ ᠢ᠋ᠶ᠋ᠡᠷ ᠶᠠᠪᠤᠨᠠ? ᠭᠡᠵᠦ ᠣᠭᠲᠣ ᠰᠠᠨᠠᠮᠰᠠᠷ ᠦᠭᠡᠢ ᠠᠰᠠᠭᠤᠯᠲᠠ ᠰᠢᠷᠡᠭᠡᠲᠦ ᠭᠡᠯᠦᠩ ᠯᠠᠮᠠ ᠲᠠᠯᠪᠢᠬᠤ ᠳ᠋ᠤ᠌ ᠨᠢ ᠰᠠᠨᠵᠢ ᠴᠣᠴᠢᠵᠤ ᠲᠡᠪᠡᠳᠡᠵᠦ᠂
- ᠣᠮ ᠮᠠᠨᠢ ᠪᠠᠳ ᠮᠢ ᠬᠣᠮ ! ᠲᠠᠯᠢᠢᠭᠠᠴᠢ ᠪᠡᠷᠢᠮᠦᠭ ᠡᠮᠡᠭᠡᠨ ᠦ᠌ ᠭᠡᠷᠢᠶᠡᠰᠦ ᠶᠣᠰᠣᠭᠠᠷ ᠠᠨᠢᠭ ᠭᠣᠮᠪᠣ ᠬᠡᠢᠳ ᠲᠦ᠍ ᠥᠴᠦᠬᠡᠨ ᠠᠯᠲᠠ ᠡᠷᠭᠦᠬᠦ ᠪᠡᠷ ᠢᠷᠡᠯᠡ! ᠭᠡᠵᠦ ᠰᠢᠪᠡᠨᠡᠨ ᠬᠡᠯᠡᠭᠰᠡᠨ ᠴᠢᠨᠢ ᠰᠢᠷᠡᠭᠡᠲᠦ ᠭᠡᠯᠦᠩᠮᠠ᠂
- ᠶᠠᠭᠤ ᠶᠠᠷᠢᠭᠠᠳ ᠪᠠᠢᠨᠠ᠃ ᠪᠢ ᠰᠣᠨᠣᠰᠤᠭᠰᠠᠨ ᠦᠭᠡᠢ ᠭᠡᠪᠡ᠃
- ᠡᠨᠡ ᠰᠢᠮᠨᠠᠨᠼ ᠤ᠋ᠨ ᠬᠣᠭᠣᠯᠠᠢ ᠰᠥᠭᠡᠵᠡᠢ᠃ ᠲᠡᠭᠡᠭᠡᠳ ᠰᠢᠪᠡᠭᠡᠨᠡᠵᠦ ᠶᠠᠷᠢᠳᠠᠭ ᠶᠤᠮ ᠪᠠᠢᠨᠠ ᠭᠡᠵᠦ ᠭᠡᠪᠬᠦᠢ ᠪᠣᠯᠤᠯᠲᠠᠢ ᠪᠠᠷᠢᠶᠠ ᠪᠠᠷᠢᠭᠰᠠᠨ ᠥᠭᠡᠷᠡ ᠨᠢᠭᠡ ᠭᠡᠯᠦᠩᠮᠠ ᠲᠠᠢᠯᠪᠤᠷᠢᠯᠠᠭᠠᠳ ᠰᠠᠨᠵᠢ ᠶ᠋ᠢᠨ ᠬᠡᠯᠡᠭᠰᠡᠨ ᠢ᠋ ᠳᠠᠪᠲᠠᠪᠠ᠃
- ᠪᠡᠷᠢᠮᠦᠭ ᠰᠢᠮᠨᠠᠨᠼ ᠢ᠋ ᠮᠡᠳᠡᠨᠡ᠃ ᠬᠥᠭᠡᠷᠦᠬᠦᠢ ᠰᠠᠢᠬᠠᠨ ᠰᠡᠳᠬᠢᠯ ᠲᠡᠢ ᠰᠢᠮᠨᠠᠨᠼ ᠪᠠᠢᠭᠰᠠᠨ ᠶᠤᠮ ᠭᠡᠵᠦ ᠰᠢᠷᠡᠭᠡᠲᠦ ᠬᠡᠯᠡᠪᠡ᠃ ᠲᠡᠷᠡᠬᠡᠨ ᠭᠱᠠᠨ ᠳ᠋ᠤ᠌ ᠰᠠᠨᠵᠢ ᠰᠢᠷᠡᠭᠡᠲᠦ ᠶ᠋ᠢᠨ ᠡᠮᠦᠨᠡ ᠰᠥᠭᠥᠳᠴᠦ ᠬᠣᠶᠠᠷ ᠭᠠᠷ ᠳᠡᠭᠡᠷᠡ ᠪᠡᠨ ᠬᠠᠳᠠᠭ ᠡᠷᠭᠦᠨ ᠪᠠᠷᠢᠪᠠ᠃ ᠬᠠᠳᠠᠭ ᠳᠡᠭᠡᠷᠡ ᠽᠦᠨ ᠠᠯᠲᠠᠨ ᠤ᠋ ᠲᠠᠯᠠ ᠭᠢᠯᠲᠠᠭᠠᠨᠠᠵᠤ ᠪᠠᠢᠬᠤ ᠶ᠋ᠢ ᠬᠠᠷᠠᠭᠠᠳ ᠰᠢᠷᠡᠭᠡᠲᠦ ᠦᠯᠦ ᠮᠡᠳᠡᠭ ᠪᠥᠬᠥᠢᠵᠦ ᠲᠡᠭᠦᠨ ᠢ᠋ ᠬᠣᠶᠠᠷ ᠭᠠᠷᠳᠠᠨ ᠠᠪᠤᠮᠠᠭᠴᠠ ᠬᠠᠵᠠᠭᠤ ᠲᠠᠯᠠ ᠶ᠋ᠢᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠲᠠᠯᠪᠢᠯᠠ᠃ ᠲᠡᠭᠡᠭᠡᠳ ᠰᠠᠨᠵᠢ ᠶ᠋ᠢᠨ ᠳᠤᠬᠤᠨ ᠳ᠋ᠤ᠌ ᠠᠳᠢᠰᠯᠠᠵᠤ᠂ ᠮᠣᠳᠣᠨ ᠤ᠋ ᠦᠷᠡ ᠬᠡᠯᠬᠢᠵᠦ ᠬᠢᠭᠰᠡᠨ ᠡᠷᠢᠭᠡ ᠨᠢᠭᠡ ᠶ᠋ᠢ ᠥᠭᠪᠡ᠃ ᠰᠠᠨᠵᠢ ᠠᠳᠢᠰ ᠠᠪᠤᠨ ᠲᠡᠷᠡ ᠡᠷᠢᠭᠡ ᠶ᠋ᠢ ᠡᠪᠦᠷᠲᠦᠯᠡᠭᠡᠳ ᠪᠣᠰᠬᠤ ᠳ᠋ᠤ᠌ ᠰᠢᠷᠡᠭᠡᠲᠦ ᠭᠡᠯᠦᠩᠮᠠ ᠭᠠᠷᠭᠠ ᠭᠡᠰᠡᠨ ᠳᠣᠬᠢᠶᠠ ᠶ᠋ᠢ ᠭᠡᠪᠬᠦᠢ ᠭᠡᠯᠦᠩᠮᠠ ᠳ᠋ᠤ᠌ ᠦᠭᠭᠦᠯᠡ᠃ 《ᠡᠮᠡ ᠬᠥᠮᠦᠨ ᠡᠴᠡ ᠠᠩᠬᠠ ᠤᠳᠠᠭᠠ ᠠᠳᠢᠰ ᠠᠪᠤᠪᠠ᠂ ᠬᠥᠭᠡᠷᠦᠬᠦᠢ᠃ ᠡᠢᠮᠦ ᠶᠠᠭᠤᠮᠠ ᠲᠣᠬᠢᠶᠠᠯᠳᠤᠨᠠ ᠭᠡᠵᠦ ᡀᠠᠷᠠᠮᠪᠠ ᠪᠣᠯᠲᠠᠯᠠ ᠪᠠᠨ ᠪᠣᠳᠣᠵᠤ ᠶᠠᠪᠤᠭᠰᠠᠨ ᠦᠭᠡᠢ ᠳᠡ᠃ ᠬᠡᠢᠮᠣᠷᠢ ᠳ᠋ᠤ᠌ ᠮᠠᠭᠤ ᠪᠣᠯᠤᠨᠠ ᠭᠡᠵᠦ ᠯᠠᠮᠠ ᠪᠠᠭᠰᠢ ᠪᠠᠢᠩᠭᠤ ᠠᠢᠯᠠᠳᠴᠤ᠂ ᠡᠮᠡ ᠰᠦᠪᠡᠲᠡᠨ ᠡᠴᠡ ᠴᠡᠭᠡᠷᠯᠡᠭᠦᠯᠦᠭᠰᠡᠭᠡᠷ ᠡᠳᠦᠢ ᠶᠢ ᠬᠦᠷᠦᠭᠰᠡᠨ ᠪᠢᠰᠢ ᠪᠢᠯᠢᠤ?》 ᠭᠡᠵᠦ ᠰᠠᠨᠵᠢ ᠪᠣᠳᠣᠯᠠ᠃
《ᠡᠨᠡ ᠽᠦᠨ ᠠᠯᠲᠠᠨ ᠤ᠋ ᠲᠠᠯᠠ ᠠᠯᠠᠭᠠ ᠪᠠᠢᠨᠠ᠃ ᠰᠢᠨᠤᠯᠲᠤ ᠡᠨᠡᠬᠦ ᠰᠢᠮᠨᠠᠨᠼ ᠥᠪᠡᠷ ᠢ᠋ᠶ᠋ᠡᠨ ᠠᠪᠤᠭᠰᠠᠨ ᠪᠠᠢᠵᠤ ᠲᠠᠭᠠᠷᠠᠨᠠ᠃ ᠪᠠᠰᠠ ᠲᠡᠭᠡᠭᠡᠳ ᠠᠯᠬᠤᠭᠠ ᠭᠢᠰᠬᠢᠭᠡ ᠨᠢ ᠨᠢᠭᠡ ᠯᠡ ᠪᠢᠰᠢ! ᠳᠠᠭᠠᠭᠤᠯᠢ ᠶ᠋ᠢ ᠨᠢ ᠰᠢᠯᠭᠠ!》 ᠭᠡᠬᠦ ᠦᠭᠡᠰ ᠢ᠋ ᠰᠢᠷᠡᠭᠡᠲᠦ ᠭᠡᠯᠦᠩᠮᠠ ᠭᠡᠪᠬᠦᠢ ᠳ᠋ᠦ᠍ ᠪᠡᠨ ᠬᠡᠯᠡᠬᠦ ᠶ᠋ᠢ ᠰᠠᠨᠵᠢ ᠴᠢᠬᠢᠨ ᠦ᠌ ᠦᠵᠦᠭᠦᠷ ᠢ᠋ᠶ᠋ᠡᠷ ᠪᠦᠳᠡᠭᠢ ᠰᠣᠨᠣᠰᠤᠯᠠ᠃
ᠬᠡᠷᠡᠭ ᠪᠢᠰᠢ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠰᠠᠨᠵᠢ ᠮᠡᠳᠡᠭᠡᠳ ᠲᠦᠷᠭᠡᠬᠡᠨ ᠰᠢᠭ ᠭᠠᠷᠤᠯᠠ᠃ ᠲᠡᠭᠡᠲᠡᠯᠡ ᠪᠠᠬᠠᠨ ᠭᠡᠯᠦᠩᠮᠠ ᠴᠤᠭᠯᠠᠷᠠᠵᠤ ᠥᠯᠵᠡᠢᠲᠦ ᠶ᠋ᠢ ᠬᠦᠷᠢᠶᠡᠯᠡᠵᠦ ᠪᠠᠢᠭᠠ ᠬᠠᠷᠠᠭᠳᠠᠪᠠ᠃ ᠰᠠᠨᠵᠢ ᠶᠠᠭᠠᠷᠠᠨ ᠠᠯᠬᠤᠯᠠᠵᠤ ᠥᠯᠵᠡᠢᠲᠦ ᠤᠷᠤᠭᠤ ᠬᠦᠷᠴᠦ ᠣᠴᠢᠭᠰᠠᠨ ᠴᠢᠨᠢ ᠨᠢᠭᠡ ᠪᠦᠳᠦᠭᠦᠨ ᠲᠠᠷᠭᠤᠨ ᠭᠡᠯᠦᠩᠮᠠ ᠥᠯᠵᠡᠢᠲᠦ ᠶ᠋ᠢᠨ ᠵᠠᠬᠠᠨ ᠠ᠋ᠴᠠ ᠪᠠᠳᠠᠷᠢᠭᠤᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠳᠬᠤᠵᠤ ᠠᠪᠤᠭᠠᠳ᠂
- ᠡᠨᠡ ᠭᠠᠢᠬᠠᠯ ᠮᠥᠨ ᠪᠠᠢᠨᠠ᠃ ᠳᠣᠯᠣᠭᠠᠨ ᠵᠢᠯ ᠦ᠋ᠨ ᠡᠮᠦᠨᠡ ᠨᠠᠮᠠᠶ᠋ᠢ ᠰᠢᠮᠨᠠᠨᠼ ᠤ᠋ᠨ ᠰᠠᠬᠢᠯ ᠢ᠋ ᠮᠢᠨᠢ ᠵᠣᠯ ᠲᠠᠢ ᠯᠠ ᠡᠪᠳᠡᠭᠦᠯᠴᠢᠬᠡᠭᠡ ᠦᠭᠡᠢ᠂ ᠲᠦᠮᠡᠨ ᠦ᠌ ᠰᠢᠪᠰᠢᠭ ᠪᠣᠯᠭᠠᠭᠰᠠᠨ ᠭᠠᠢᠬᠠᠯ ᠡᠨᠡ ᠶᠠᠪᠤᠵᠤ ᠪᠠᠢᠨᠠ! ᠣᠳᠣ ᠴᠢᠮᠠ ᠠ᠋ᠴᠠ ᠥᠰᠢᠶᠡ ᠠᠪᠤᠨᠠ ᠳᠠ! ᠭᠡᠵᠦ ᠬᠠᠰᠬᠢᠷᠤᠭᠠᠳ ᠥᠯᠵᠡᠢᠲᠦ ᠶ᠋ᠢᠨ ᠳᠠᠯᠤ ᠮᠥᠷᠥ ᠤᠷᠤᠭᠤ ᠴᠣᠬᠢᠭᠠᠳ ᠠᠪᠤᠯᠠ᠃
- ᠬᠧᠺ᠂ ᠬᠧᠺ ᠬᠧᠺ! ᠭᠡᠵᠦ ᠬᠡᠦᠬᠡᠨ ᠨᠥᠬᠥᠳ ᠬᠠᠰᠬᠢᠷᠤᠯᠳᠤᠯᠠ᠃ ᠲᠡᠭᠡᠭᠡᠳ ᠥᠯᠵᠡᠢᠲᠦ ᠶ᠋ᠢ ᠪᠦᠰᠡᠯᠡᠨ ᠠᠪᠴᠤ ᠴᠣᠬᠢᠬᠤ ᠨᠢ ᠴᠣᠬᠢᠵᠤ᠂ ᠢᠰᠬᠦᠯᠬᠦ ᠨᠢ ᠢᠰᠬᠦᠯᠵᠦ ᠪᠥᠭᠡᠮ ᠵᠣᠳᠣᠭᠠᠨ ᠡᠭᠦᠰᠦᠯᠡ᠃ ᠰᠠᠨᠵᠢ ᠥᠯᠵᠡᠢᠲᠦ ᠶ᠋ᠢ ᠥᠮᠥᠭᠡᠷᠡᠬᠦ ᠰᠠᠨᠠᠭᠠ ᠲᠠᠢ ᠬᠠᠰᠬᠢᠷᠬᠤ ᠭᠡᠰᠡᠨ ᠪᠣᠯᠪᠠᠴᠤ ᠳᠠᠭᠤ ᠭᠠᠷᠭᠠᠵᠤ ᠪᠣᠯᠬᠤ ᠦᠭᠡᠢ ᠪᠡᠨ ᠭᠡᠨᠡᠳᠲᠡ ᠰᠠᠨᠠᠵᠤ ᠠᠮᠠ ᠪᠠᠨ ᠪᠠᠷᠢᠭᠠᠳ ᠳᠡᠮᠡᠢ ᠯᠡ ᠭᠦᠶᠦᠨ ᠬᠦᠷᠴᠦ ᠤᠯᠠᠢᠷᠠᠭᠰᠠᠨ ᠭᠡᠯᠦᠩᠮᠠ ᠨᠤᠭᠤᠳ ᠢ᠋ ᠬᠣᠢᠰᠢ ᠨᠢ ᠪᠣᠯᠭᠠᠬᠤ ᠶ᠋ᠢ ᠣᠷᠣᠯᠳᠣᠪᠠ᠃《ᠰᠢᠮᠨᠠᠨᠼ ᠴᠢ ᠶᠠᠭᠤ ᠪᠣᠢ? ᠬᠣᠢᠰᠢ ᠪᠠᠨ ᠪᠣᠯ! ᠪᠢᠳᠡ ᠡᠨᠡ ᠨᠢᠭᠦᠯᠲᠡᠨ ᠢ᠋ ᠭᠡᠰᠬᠡᠨᠡ!》 ᠭᠡᠵᠦ ᠲᠡᠳᠡ ᠤᠯᠠᠢᠷᠠᠨ ᠬᠠᠰᠬᠢᠷᠤᠯᠳᠤᠵᠤ ᠥᠯᠵᠡᠢᠲᠦ ᠶ᠋ᠢ ᠬᠥᠪᠰᠢᠬᠦ ᠪᠡᠨ ᠦᠷᠭᠦᠯᠵᠢᠯᠡᠭᠦᠯᠪᠡ᠃ ᠬᠥᠭᠡᠷᠦᠬᠦᠢ ᠥᠯᠵᠡᠢᠲᠦ ᠣᠯᠠᠨ ᠬᠥᠮᠦᠨ ᠦ᠌ ᠬᠥᠯ᠂ ᠭᠠᠷ ᠤ᠋ᠨ ᠨᠦᠳᠦᠭᠦᠷ ᠪᠣᠯᠵᠤ ᠲᠣᠯᠣᠭᠠᠢ ᠪᠠᠨ ᠪᠠᠷᠢᠨ ᠨᠡᠰᠢ ᠴᠠᠰᠢ ᠪᠥᠭᠲᠥᠩᠨᠡᠵᠦ ᠪᠠᠢᠯᠠ᠃ ᠲᠡᠭᠡᠲᠡᠯᠡ ᠠᠩᠬᠠ ᠲᠡᠭᠦᠨ ᠢ᠋ ᠵᠣᠳᠣᠬᠤ ᠶ᠋ᠢ ᠤᠷᠢᠶᠠᠯᠠᠭᠰᠠᠨ ᠲᠠᠷᠭᠤᠨ ᠡᠬᠡᠨᠡᠷ ᠥᠯᠵᠡᠢᠲᠦ ᠶ᠋ᠢᠨ ᠳᠣᠯᠳᠣᠢ ᠶ᠋ᠢ ᠪᠤᠯᠢᠶᠠᠨ ᠠᠪᠴᠤ ᠲᠣᠯᠣᠭᠠᠢ ᠳᠤᠮᠳᠠᠭᠤᠷ ᠨᠢ ᠶᠠᠩ ᠬᠢᠲᠡᠯᠡ ᠴᠣᠬᠢᠪᠠ᠃ ᠥᠯᠵᠡᠢᠲᠦ ᠤᠬᠠᠭᠠᠨ ᠪᠠᠯᠠᠷᠳᠠᠨ ᠭᠠᠵᠠᠷ ᠣᠢᠴᠢᠬᠤ ᠶ᠋ᠢ ᠬᠠᠷᠠᠭᠠᠳ ᠰᠠᠨᠵᠢ ᠲᠡᠰᠴᠦ ᠴᠢᠳᠠᠭᠰᠠᠨ ᠦᠭᠡᠢ᠂ ᠨᠥᠭᠥᠭᠡᠬᠢ ᠵᠣᠳᠣᠭᠠᠴᠢ ᠭᠡᠯᠦᠩᠮᠡ ᠨᠤᠭᠤᠳ ᠤ᠋ᠨ ᠳᠤᠮᠳᠠᠭᠤᠷ ᠬᠠᠮᠤᠭ ᠬᠦᠴᠦ ᠪᠡᠨ ᠭᠠᠷᠭᠠᠨ ᠬᠠᠭᠠ ᠵᠦᠰᠦᠵᠦ ᠣᠷᠣᠭᠠᠳ ᠥᠯᠵᠡᠢᠲᠦ ᠶ᠋ᠢ ᠥᠨᠳᠡᠢᠯᠭᠡᠨ ᠡᠪᠦᠳᠦᠭ ᠳᠡᠭᠡᠷᠡ ᠪᠡᠨ ᠲᠣᠯᠣᠭᠠᠢ ᠶ᠋ᠢ ᠨᠢ ᠲᠦᠰᠢᠭᠦᠯᠦᠯᠡ᠃ ᠳᠡᠷᠡᠨ ᠦ᠌ ᠨᠢᠳᠦ ᠨᠢ ᠬᠠᠴᠢᠨ ᠡᠪ ᠦᠭᠡᠢ ᠪᠡᠷ ᠡᠷᠭᠢᠯᠳᠦᠨ ᠠᠮᠢ ᠨᠢ ᠭᠠᠷᠤᠯᠠ᠃ ᠰᠠᠨᠵᠢ ᠪᠡᠶᠡ ᠪᠡᠨ ᠪᠠᠷᠢᠵᠤ ᠴᠢᠳᠠᠭᠰᠠᠨ ᠦᠭᠡᠢ᠄
- ᠠᠯᠠᠴᠢᠬᠠᠯᠠ ᠰᠢᠦ ᠳᠡ᠂ ᠱᠤᠯᠤᠮ ᠨᠤᠭᠤᠳ ᠮᠢᠨᠢ! ᠭᠡᠳ ᠪᠠᠢᠳᠠᠭ ᠪᠦᠬᠦ ᠬᠣᠭᠣᠯᠠᠢ ᠪᠠᠷ ᠢ᠋ᠶ᠋ᠠᠨ ᠬᠠᠰᠬᠢᠷᠴᠢᠬᠠᠯᠠ᠃
ᠤᠯᠠᠩᠭᠠᠰᠤᠭᠰᠠᠨ ᠭᠡᠯᠦᠩᠮᠠ ᠨᠤᠭᠤᠳ ᠲᠡᠷᠡ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠠᠯᠮᠠᠢᠷᠠᠬᠤ ᠮᠡᠲᠦ ᠲᠦᠷ ᠴᠢᠮᠡᠭᠡ ᠦᠭᠡᠢ ᠪᠣᠯᠪᠠ᠃ ᠲᠡᠭᠡᠲᠡᠯᠡ ᠲᠦᠷᠦᠭᠦᠴᠢ ᠶ᠋ᠢᠨ ᠲᠠᠷᠭᠤᠨ ᠡᠮᠡ ᠯᠠᠮᠠ᠂
-《ᠬᠠᠷᠠᠭᠠᠴᠢ! ᠡᠷᠡ ᠬᠥᠮᠦᠨ ᠪᠠᠢᠨᠠ ᠰᠢᠦ ᠳᠡ! ᠰᠢᠮᠨᠠᠨᠼ ᠤ᠋ᠨ ᠬᠤᠪᠴᠠᠰᠤ ᠤᠭᠯᠠᠭᠰᠠᠨ ᠡᠷᠡ ᠬᠥᠮᠦᠨ ᠪᠠᠢᠨᠠ!》 ᠭᠡᠵᠦ ᠬᠠᠰᠬᠢᠷᠤᠯᠠ᠃ ᠪᠤᠰᠤᠳ ᠨᠢ
- ᠲᠡᠢᠮᠦ ᠪᠠᠢᠨᠠ᠃ ᠡᠭᠦᠨ ᠢ᠋ ᠪᠠᠰᠠ ᠠᠯᠠᠵᠠᠭᠠᠶᠠ! ᠭᠡᠵᠦ ᠬᠠᠰᠬᠢᠷᠤᠯᠳᠤᠭᠠᠳ ᠰᠠᠨᠵᠢ ᠤᠷᠤᠭᠤ ᠳᠠᠭᠠᠷᠢᠨ ᠣᠷᠣᠵᠤ ᠢᠷᠡᠪᠡ᠃ ᠰᠠᠨᠵᠢ ᠲᠡᠳᠡᠨ ᠢ᠋ ᠥᠯᠵᠡᠢᠲᠦ ᠶ᠋ᠢᠨ ᠳᠣᠯᠳᠣᠢ᠂ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠲᠠᠶᠠᠭ ᠬᠣᠶᠠᠷ ᠢ᠋ᠶ᠋ᠠᠷ ᠬᠣᠣᠰᠯᠠᠭᠤᠯᠤᠨ ᠡᠷᠭᠢᠭᠦᠯᠦᠨ ᠬᠥᠭᠡᠭᠡᠬᠦ ᠪᠡᠷ ᠡᠰᠡᠷᠭᠦᠴᠡᠵᠦ ᠭᠠᠷᠤᠯᠠ᠃ ᠲᠠᠶᠠᠭ ᠨᠢ ᠬᠤᠭᠤᠷᠠᠪᠠ᠃ ᠳᠠᠷᠠᠭᠠ ᠨᠢ ᠳᠣᠯᠳᠣᠢ ᠨᠢ ᠪᠠᠰᠠ ᠬᠤᠭᠤᠷᠤᠯᠠ᠃ ᠲᠡᠭᠡᠮᠡᠭᠴᠡ ᠤᠯᠠᠩᠭᠠᠰᠤᠭᠰᠠᠨ ᠡᠬᠡᠨᠡᠷ ᠦ᠋ᠳ ᠰᠠᠨᠵᠢ ᠤᠷᠤᠭᠤ ᠳᠠᠭᠠᠷᠢᠨ ᠣᠷᠣᠵᠤ ᠢᠷᠡᠯᠡ᠃ ᠨᠦᠳᠦᠬᠦ ᠨᠢ ᠨᠦᠳᠦᠵᠦ᠂ ᠵᠤᠯᠭᠠᠭᠠᠬᠤ ᠨᠢ ᠵᠤᠯᠭᠠᠭᠠᠵᠤ᠂ ᠢᠰᠬᠦᠯᠬᠦ ᠨᠢ ᠢᠰᠬᠦᠯᠵᠦ ᠪᠠᠢᠯᠠ᠃ ᠰᠠᠨᠵᠢ ᠦᠵᠡᠯᠴᠡᠭᠰᠡᠭᠡᠷ ᠪᠠᠢᠪᠠ᠃ ᠲᠡᠭᠡᠲᠡᠯᠡ᠂
- ᠪᠣᠯᠢᠵᠠᠭᠠ ᠲᠠ ᠨᠠᠷ! ᠶᠠᠭᠠᠬᠢᠭᠠᠳ ᠬᠥᠮᠦᠨ ᠵᠣᠳᠣᠭᠠᠳ ᠪᠠᠢᠭᠠ ᠶᠤᠮ ᠪᠣᠢ? ᠭᠡᠵᠦ ᠬᠡᠨ ᠨᠢᠭᠡᠨ ᠡᠷᠡᠭᠲᠡᠢ ᠬᠥᠮᠦᠨ ᠪᠦᠳᠦᠭᠦᠨ ᠳᠠᠭᠤ ᠪᠠᠷ ᠵᠠᠩᠳᠤᠷᠬᠤ ᠰᠣᠨᠣᠰᠤᠭᠳᠠᠪᠠ᠃ ᠬᠡᠦᠬᠡᠨ ᠦ᠋ᠳ ᠲᠡᠭᠦᠨ ᠢ᠋ ᠠᠩᠵᠠᠭᠠᠷᠠᠬᠤ ᠦᠭᠡᠢ ᠭᠠᠭᠴᠠᠬᠦ ᠰᠠᠨᠵᠢ ᠶ᠋ᠢ ᠯᠡ ᠨᠦᠳᠦᠬᠦ ᠪᠡᠷ ᠤᠯᠠᠢᠷᠠᠵᠤ ᠪᠠᠢᠯᠠ᠃ ᠭᠡᠲᠡᠯᠡ ᠫᠤᠤ ᠶ᠋ᠢᠨ ᠳᠠᠭᠤ ᠭᠠᠷᠬᠤ ᠳ᠋ᠤ᠌ ᠨᠢ ᠡᠬᠡᠨᠡᠷ ᠦ᠋ᠳ ᠰᠠᠶ᠋ᠢ ᠴᠣᠴᠢᠵᠤ ᠵᠣᠳᠣᠭᠠᠨ ᠤ᠋ ᠪᠠᠨ ᠰᠢᠨᠤᠯ ᠠ᠋ᠴᠠ ᠲᠦᠷ ᠰᠠᠯᠤᠯᠠ᠃ ᠰᠢᠷ ᠲᠡᠢ ᠫᠤᠤ ᠡᠭᠦᠷᠦᠭᠰᠡᠨ ᠬᠡᠳᠦᠨ ᠮᠣᠷᠢ ᠲᠠᠢ ᠬᠥᠮᠦᠨ ᠲᠡᠳᠡᠨ ᠢ᠋ ᠪᠦᠰᠡᠯᠡᠵᠡᠢ᠃ ᠰᠠᠨᠵᠢ ᠥᠨᠳᠡᠢᠨ ᠬᠠᠷᠠᠪᠠᠯ ᠲᠡᠳᠡᠨ ᠦ᠌ ᠳᠣᠲᠣᠷᠠ ᠬᠠᠭᠤᠷᠮᠠᠴᠢ ᠪᠠᠷ ᠢᠨᠢᠶᠡᠪᠬᠢᠯᠡᠭᠰᠡᠨ ᠴᠣᠭᠰᠣᠩ ᠵᠣᠭᠰᠣᠵᠤ ᠪᠠᠢᠬᠤ ᠲᠠᠢ ᠬᠠᠷᠠᠴᠠ ᠨᠢ ᠲᠤᠯᠭᠠᠷᠠᠯᠠ᠃ ᠴᠣᠴᠢᠬᠤ ᠳ᠋ᠤ᠌ ᠪᠠᠨ ᠳᠡᠯᠳᠡᠰ ᠬᠢᠯᠡ᠃
- ᠲᠡᠷᠡ ᠵᠣᠭᠰᠣᠵᠤ ᠪᠠᠢᠭᠠ ᠨᠢ ᠮᠥᠨ ᠪᠠᠢᠨᠠ! ᠭᠡᠵᠦ ᠴᠣᠭᠰᠣᠩ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠠᠨᠵᠢ ᠤᠷᠤᠭᠤ ᠵᠢᠭᠠᠭᠰᠠᠨ ᠢ᠋ᠶ᠋ᠠᠨ᠂
- ᡀᠠᠷᠠᠮᠪᠠ ᠰᠠᠨᠵᠢᠳᠠᠯᠪᠢᠴᠣᠢᠵᠠᠮᠰᠤ ᠠᠮᠤᠭᠤᠯᠠᠩ ᠮᠣᠷᠢᠯᠠᠵᠤ ᠶᠠᠪᠤᠨᠠ ᠤᠤ? ᠭᠡᠵᠦ ᠳᠣᠭᠣᠭᠢᠲᠠᠢ ᠪᠠᠷ ᠮᠡᠨᠳᠦᠯᠡᠪᠡ᠃ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠲᠠᠴᠢᠭᠢᠨᠠᠲᠠᠯᠠ ᠢᠨᠢᠶᠡᠯᠳᠦᠵᠦ᠂
- ᠬᠠ ᠬᠠ ᠬᠠ᠃ ᠲᠡᠭᠦᠨ ᠢ᠋ ᠬᠠᠷᠠᠭᠠᠴᠢ ᠳᠠ ᠮᠢᠨᠢ ! ᡀᠠᠷᠠᠮᠪᠠ ᠬᠥᠮᠦᠨ ᠰᠢᠮᠨᠠᠨᠼ ᠬᠤᠪᠴᠠᠰᠤ ᠲᠠᠢ ᠶᠠᠪᠤᠵᠤ ᠪᠠᠢᠬᠤ ᠶ᠋ᠢ ᠬᠠᠷᠠᠨᠠ ᠭᠡᠵᠦ ᠰᠠᠨᠠᠭᠰᠠᠨ ᠦᠭᠡᠢ ᠭᠡᠵᠦ ᠴᠣᠭᠰᠣᠩ ᠳᠣᠭᠣᠭᠢᠯᠠᠵᠤ ᠪᠠᠢᠬᠤ ᠶ᠋ᠢ ᠰᠣᠨᠣᠰᠤᠭᠠᠳ ᠰᠠᠨᠵᠢ ᠶ᠋ᠢᠨ ᠠᠭᠤᠷ ᠨᠢ ᠬᠦᠷᠦᠯᠡ᠃ ᠲᠡᠭᠡᠲᠡᠯᠡ ᠨᠥᠭᠥᠭᠡᠬᠢ ᠫᠤᠤ ᠲᠠᠢ ᠬᠥᠮᠦᠰ ᠤᠬᠤᠰᠬᠢᠨ ᠪᠠᠭᠤᠵᠤ ᠢᠷᠡᠭᠡᠳ ᠰᠠᠨᠵᠢ ᠶ᠋ᠢ ᠪᠠᠷᠢᠨ ᠠᠪᠴᠤ ᠬᠦᠯᠢᠪᠡ᠃ ᠲᠡᠭᠡᠭᠡᠳ ᠬᠥᠲᠥᠯᠭᠡᠭᠡ ᠮᠣᠷᠢᠨ ᠳᠡᠭᠡᠷᠡ ᠪᠡᠨ ᠰᠠᠭᠤᠯᠭᠠᠵᠤ ᠮᠣᠷᠢᠨ ᠤ᠋ ᠭᠡᠳᠡᠰᠦᠨ ᠳᠣᠣᠭᠤᠷ ᠰᠠᠨᠵᠢ ᠶ᠋ᠢᠨ ᠬᠣᠶᠠᠷ ᠬᠥᠯ ᠢ᠋ ᠬᠣᠯᠪᠣᠨ ᠬᠦᠯᠢᠯᠡ᠃ ᠪᠠᠷᠢᠭᠳᠠᠵᠤ ᠰᠦᠢᠷᠡᠯ ᠳ᠋ᠦ᠍ ᠣᠷᠣᠭᠰᠠᠨ ᠨᠢ ᠢᠯᠡ ᠪᠣᠯᠤᠯᠠ᠃
- ᠲᠠ ᠮᠢᠨᠢ ᠠ᠋᠂ ᠪᠢ ᠡᠨᠡ ᠡᠮᠡᠰ ᠲᠦ᠍ ᠠᠯᠠᠭᠳᠠᠭᠰᠠᠨ ᠨᠥᠬᠥᠷ ᠢ᠋ᠶ᠋ᠡᠨ ᠣᠷᠣᠰᠢᠭᠤᠯᠤᠭᠠᠳ ᠶᠠᠪᠤᠬᠤ ᠶᠤᠮᠰᠠᠨ! ᠭᠡᠵᠦ ᠰᠠᠨᠵᠢ ᠭᠤᠶᠤᠯᠠ᠃
- ᠪᠢᠲᠡᠭᠡᠢ ᠴᠠᠯᠴᠢ ! ᠳᠡᠷᠡᠨ ᠦ᠌ ᠦᠬᠦᠳᠡᠯ ᠢ᠋ ᠭᠡᠯᠦᠩᠮᠠ ᠨᠠᠷ ᠰᠢᠪᠠᠭᠤᠨ ᠳ᠋ᠤ᠌ ᠬᠠᠶᠠᠭᠠᠳ ᠥᠭᠴᠢᠬᠡᠨᠡ᠃ ᠬᠠᠷᠢᠨ ᠴᠢᠮᠠᠶ᠋ᠢ ᠪᠣᠯ ᠪᠢᠳᠡ ᡀᠠᠰᠠ ᠵᠣᠣ ᠶ᠋ᠢᠨ ᠳᠡᠰ ᠨᠤᠭᠤᠳ ᠲᠤ᠌ ᠬᠦᠷᠭᠡᠵᠦ ᠥᠭᠭᠦᠨᠡ! ᠭᠡᠵᠦ ᠴᠠᠭᠳᠠᠭᠠ ᠨᠠᠷ ᠵᠠᠨᠣᠯᠲᠠᠢᠶᠠ ᠬᠡᠯᠡᠭᠡᠳ ᠴᠠᠰᠢ ᠬᠥᠳᠡᠯᠵᠡᠭᠡᠯᠡ᠃ ᠬᠥᠭᠡᠷᠦᠬᠦᠢ ᠥᠯᠵᠡᠢᠲᠦ ᠶ᠋ᠢᠨ ᠪᠡᠶᠡ ᠠᠨᠢᠭ ᠭᠣᠮᠪᠣ ᠬᠡᠢᠳ ᠦ᠋ᠨ ᠰᠢᠷᠠ ᠰᠢᠷᠤᠢᠨ ᠳᠡᠭᠡᠷᠡ ᠪᠠᠷᠠᠭᠠᠨᠲᠤᠭᠰᠠᠭᠠᠷ ᠬᠣᠴᠣᠷᠬᠤ ᠳ᠋ᠤ᠌ ᠰᠠᠨᠵᠢ ᠰᠡᠭᠦᠷᠡᠰᠦ ᠠᠯᠳᠠᠵᠤ᠂
- ᠴᠣᠭᠰᠣᠩ᠂ ᠴᠢ ᠨᠢᠭᠡ ᠵᠢᠡᠭ᠌ᠳᠠᠭᠠᠨ ᠤ᠋ ᠮᠢᠨᠢ ᠬᠥᠮᠦᠨ ᠪᠠᠢᠨᠠ᠃ ᠬᠥᠭᠡᠷᠦᠬᠦᠢ ᠲᠡᠷᠡ ᠪᠠᠳᠢᠷᠴᠢᠨ ᠢ᠋ ᠬᠥᠮᠦᠨ ᠶᠣᠰᠣᠭᠠᠷ ᠣᠷᠣᠰᠢᠭᠤᠯᠬᠤ ᠳ᠋ᠤ᠌ ᠲᠤᠰᠠᠯᠠᠭᠠᠴᠢ ! ᠭᠡᠵᠦ ᠭᠤᠶᠤᠭᠰᠠᠨ ᠴᠢᠨᠢ᠂
- ᠨᠢᠭᠡ ᠵᠢᠡᠭ᠌ᠳᠠᠭᠠᠨ ᠳ᠋ᠤ᠌ ᠪᠠᠢᠭᠰᠠᠨ ᠨᠢ ᠦᠨᠡᠨ᠃ ᠭᠡᠪᠡᠴᠦ ᠴᠢᠮᠠ ᠠ᠋ᠴᠠ ᠪᠣᠯᠵᠤ ᠪᠢ ᠥᠪᠡᠷ ᠦ᠋ᠨ ᠬᠠᠷᠠ ᠲᠣᠯᠣᠭᠠᠢ ᠶ᠋ᠢ ᠠᠯᠳᠠᠬᠤ ᠳ᠋ᠤ᠌ ᠬᠦᠷᠴᠦ ᠪᠠᠢᠨᠠ᠃ ᠴᠢᠮᠠᠶ᠋ᠢ ᠯᠠᠨᠴᠢᠰᠠ ᠳ᠋ᠤ᠌ ᠪᠦᠷᠢᠨ ᠲᠤᠰᠢᠶᠠᠵᠤ ᠪᠠᠢᠵᠤ ᠰᠠᠶᠢ ᠶᠠᠰᠤ ᠠᠮᠠᠷᠠᠨᠠ᠃ ᠣᠳᠣ ᠴᠢ ᠪᠣᠯ ᠮᠢᠨᠦ ᠨᠥᠬᠥᠷ ᠴᠦ᠍ ᠪᠢᠰᠢ᠂ ᠵᠢᠡᠭ᠌ᠳᠠᠭᠠᠨ ᠤ᠋ ᠬᠢ ᠴᠦ᠍ ᠪᠢᠰᠢ᠃ ᠬᠠᠷᠢᠨ ᠳᠠᠢᠰᠤᠨ! ᠭᠡᠵᠦ ᠴᠣᠭᠰᠣᠩ ᠬᠡᠯᠡᠭᠡᠳ ᠮᠣᠷᠢᠨ ᠳ᠋ᠤ᠌ ᠪᠠᠨ ᠲᠠᠰᠢᠭᠤᠷ ᠦᠭᠭᠦᠯᠡ᠃ ᠲᠡᠳᠡ ᠮᠣᠷᠢᠨ ᠤ᠋ ᠬᠠᠷᠠ ᠬᠤᠷᠳᠤ ᠪᠠᠷ ᠠᠨᠢᠭ ᠭᠣᠮᠪᠣ ᠬᠡᠢᠳ ᠡᠴᠡ ᠬᠣᠯᠠᠳᠠᠨ ᠣᠳᠤᠯᠠ᠃ ᠰᠠᠨᠵᠢ ᠶ᠋ᠢᠨ ᠮᠣᠷᠢᠨ ᠤ᠋ ᠴᠤᠯᠪᠤᠭᠤᠷ ᠢ᠋ ᠴᠠᠭᠳᠠᠭᠠ ᠨᠠᠷ ᠪᠠᠷᠢᠵᠠᠢ᠃ ᠬᠣᠷᠸᠠ ᠶ᠋ᠢᠨ ᠡᠨᠡᠷᠢᠯ ᠦᠭᠡᠢ ᠭᠠᠰᠢᠭᠤᠨ ᠶᠠᠪᠤᠳᠠᠯ ᠢ᠋ ᠡᠢᠨ ᠬᠦ᠌ ᠰᠠᠨᠵᠢ ᠠᠩᠬᠠ ᠤᠳᠠᠭᠠ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠮᠡᠳᠡᠷᠡᠵᠦ ᠮᠠᠰᠢ ᠶᠡᠬᠡ ᠭᠣᠳᠣᠯᠠ᠃ ᠡᠢᠮᠦ ᠶᠠᠭᠤᠮᠠ ᠪᠣᠯᠤᠭᠰᠠᠨ ᠤ᠋ ᠳᠠᠷᠠᠭᠠ ᠪᠠᠷ ᠠᠮᠢᠳᠤ ᠶᠠᠪᠤᠬᠤ ᠴᠤ᠌ ᠰᠣᠨᠢᠷᠬᠠᠯ ᠦᠭᠡᠢ ᠰᠢᠭ ᠰᠠᠨᠠᠭᠳᠠᠵᠠᠢ᠃ ᠲᠡᠳᠡ ᠵᠣᠭᠰᠣᠭᠠ ᠵᠠᠢ ᠦᠭᠡᠢ ᠳᠠᠪᠬᠢᠭᠤᠯᠤᠭᠰᠠᠭᠠᠷ ᠪᠠᠢᠭᠠᠳ ᠰᠥᠨᠢ ᠶ᠋ᠢᠨ ᠬᠠᠷᠠᠩᠭᠤᠢ ᠨᠥᠮᠥᠷᠬᠦ ᠬᠦᠷᠲᠡᠯᠡ ᠶᠡᠬᠡ ᠯᠡ ᠬᠣᠯᠠᠳᠠᠯᠠ᠃ ᠨᠢᠭᠡᠨ ᠶᠡᠬᠡ ᠬᠠᠪᠴᠢᠯ ᠳ᠋ᠤ᠌ ᠣᠷᠣᠵᠤ ᠣᠴᠢᠯᠠ᠃
- ᠵᠠ ᠡᠨᠳᠡ ᠲᠦᠷ ᠬᠣᠨᠣᠭᠯᠠᠵᠤ᠂ ᠨᠢᠳᠦᠨ ᠦ᠌ ᠪᠡᠨ ᠬᠣᠣᠷ ᠢ᠋ ᠭᠠᠷᠭᠠᠭᠠᠳ ᠶᠠᠪᠤᠶᠠ! ᠭᠡᠵᠡᠭᠡᠯᠡ᠃ ᠰᠠᠨᠵᠢ ᠶ᠋ᠢ ᠮᠣᠷᠢᠨ ᠳᠡᠭᠡᠷᠡ ᠨᠢ ᠬᠦᠯᠢᠶᠡ ᠲᠡᠢ ᠴᠢᠭ ᠢ᠋ᠶ᠋ᠡᠷ ᠨᠢ ᠪᠠᠢᠯᠭᠠᠯᠠ᠃ ᠴᠠᠭᠳᠠᠭᠠ ᠨᠠᠷ ᠭᠤᠷᠪᠠᠨ ᠴᠢᠯᠠᠭᠤ ᠲᠤᠯᠵᠤ ᠴᠠᠢ ᠴᠢᠨᠠᠵᠠᠭᠠᠵᠤ ᠪᠠᠢᠯᠠ᠃ ᠶᠠᠭ ᠴᠠᠢ ᠪᠠᠨ ᠪᠣᠯᠭᠣᠭᠠᠳ ᠠᠶᠠᠭᠠᠯᠠᠨ ᠤᠤᠭᠤᠬᠤ ᠪᠠᠷ ᠲᠡᠳᠡ ᠰᠠᠭᠤᠵᠠᠭᠠᠯᠠ᠃ ᠲᠡᠭᠡᠲᠡᠯᠡ ᠡᠨᠳᠡ ᠲᠡᠨᠳᠡ ᠡᠴᠡ ᠫᠤᠤ ᠶ᠋ᠢᠨ ᠳᠠᠭᠤᠨ ᠭᠠᠷᠴᠤ ᠪᠠᠬᠠᠨ ᠳᠡᠭᠡᠷᠡᠮᠴᠢᠳ ᠳᠣᠪᠲᠣᠯᠤᠨ ᠣᠷᠣᠵᠤ ᠢᠷᠡᠯᠡ᠃
- ᠫᠤᠤ ᠨᠤᠭᠤᠳ ᠢ᠋ ᠨᠢ ᠬᠤᠷᠢᠶᠠᠭᠠᠳ ᠠᠪ! ᠭᠡᠵᠦ ᠬᠡᠨ ᠨᠢᠭᠡᠨ ᠬᠥᠮᠦᠨ ᠳᠡᠭᠡᠷᠡᠮᠴᠢᠳ ᠲᠦ᠍ ᠲᠤᠰᠢᠶᠠᠬᠤ ᠨᠢ ᠰᠣᠨᠣᠰᠤᠭᠳᠠᠪᠠ᠃ ᠰᠠᠨᠵᠢ ᠶ᠋ᠢᠨ ᠴᠢᠬᠢᠨ ᠦ᠌ ᠬᠠᠵᠠᠭᠤ ᠪᠠᠷ ᠰᠤᠮᠤ ᠱᠦᠩᠭᠢᠨᠡᠨ ᠥᠩᠭᠡᠷᠡᠵᠦ ᠪᠠᠢᠯᠠ᠃ ᠵᠡᠷᠯᠢᠭ ᠰᠤᠮᠤᠨ ᠳ᠋ᠤ᠌ ᠠᠯᠠᠭᠳᠠᠴᠢᠬᠠᠬᠤ ᠪᠣᠢ ᠭᠡᠵᠦ ᠰᠠᠨᠵᠢ ᠳᠣᠲᠣᠷᠠ ᠪᠠᠨ ᠶᠡᠬᠡ ᠯᠡ ᠡᠮᠢᠶᠡᠵᠦ ᠪᠠᠢᠪᠠ᠃ ᠳᠡᠭᠡᠷᠡᠮᠴᠢᠳ ᠴᠠᠭᠳᠠᠭᠠ ᠨᠠᠷ ᠥᠪᠡᠷ ᠬᠣᠭᠣᠷᠣᠨᠳᠣ ᠪᠠᠨ ᠫᠣᠳᠠᠯᠴᠠᠵᠣ ᠮᠣᠷᠢᠳ ᠢᠨᠴᠠᠭᠠᠯᠳᠤᠨ᠂ ᠡᠮᠡᠭᠡᠯ ᠦ᠋ᠨ ᠳᠥᠷᠥᠭᠡ ᠬᠠᠷᠰᠢᠯᠳᠤᠵᠤ᠂ ᠬᠥᠮᠦᠰ ᠬᠠᠷᠢᠶᠠᠯ ᠵᠦᠬᠡᠯ ᠣᠷᠬᠢᠵᠤ ᠠᠢᠬᠤᠪᠲᠤᠷ ᠱᠤᠤᠭᠢᠶᠠᠨ ᠳᠡᠭᠳᠡᠯᠡ᠃ ᠬᠥᠮᠦᠰ ᠶᠣᠣᠯᠠᠬᠤ ᠰᠣᠨᠣᠰᠤᠭᠳᠠᠯᠠ᠃ ᠲᠡᠷᠡ ᠳᠣᠲᠣᠷᠠ ᠴᠣᠭᠰᠣᠩ ᠤ᠋ᠨ ᠳᠠᠭᠤ ᠭᠠᠷᠴᠤ ᠪᠠᠢᠯᠠ᠃ ᠰᠤᠮᠤᠨ ᠳ᠋ᠤ᠌ ᠣᠨᠣᠭᠳᠠᠴᠢᠬᠠᠬᠤ ᠦᠭᠡᠢ ᠶ᠋ᠢᠨ ᠲᠤᠯᠠᠳᠠ ᠰᠠᠨᠵᠢ ᠮᠣᠷᠢᠨ ᠤ᠋ ᠳᠡᠯ ᠤᠷᠤᠭᠤ ᠪᠥᠬᠥᠢᠵᠦ ᠪᠠᠢᠯᠠ᠃ ᠲᠡᠭᠡᠲᠡᠯᠡ ᠮᠣᠷᠢ ᠨᠢ ᠰᠤᠮᠤᠨ ᠳ᠋ᠤ᠌ ᠬᠠᠢᠷᠠᠭᠤᠯᠤᠭᠰᠠᠨ ᠪᠣᠯᠤᠯᠲᠠᠢ ᠴᠣᠴᠢᠨ ᠴᠣᠪᠬᠣᠴᠢᠵᠤ ᠵᠡᠭᠡᠰᠣᠷᠡᠨ ᠵᠢᠭᠤᠲᠠᠯᠠ᠃
- ᠨᠢᠭᠡ ᠮᠣᠷᠢ ᠲᠠᠢ ᠬᠥᠮᠦᠨ ᠵᠢᠭᠤᠲᠠᠯᠠ᠃ ᠬᠥᠭᠡᠭᠡᠳ ᠪᠠᠷᠢᠭᠠᠳ ᠠᠪ! ᠭᠡᠵᠦ ᠳᠡᠭᠡᠷᠡᠮᠴᠢᠳ ᠬᠠᠰᠬᠢᠷᠤᠯᠳᠤᠯᠠ᠃ ᠰᠠᠨᠵᠢ ᠶ᠋ᠢᠨ ᠠᠷᠤ ᠠ᠋ᠴᠠ ᠥᠭᠡᠷᠡ ᠨᠢᠭᠡ ᠮᠣᠷᠢ ᠲᠠᠢ ᠬᠥᠮᠦᠨ ᠨᠡᠬᠡᠨ ᠬᠥᠭᠡᠭᠡᠵᠦ ᠳᠣᠣᠷᠠ ᠨᠢ ᠭᠦᠢᠴᠡᠨ ᠢᠷᠡᠯᠡ᠃ ᠠᠶᠤᠯ ᠠ᠋ᠴᠠ ᠴᠣᠴᠢᠨ ᠰᠦᠷᠳᠡᠭᠡᠳ᠂
- ᠠᠮᠢ ᠠᠪᠤᠷᠠᠭᠠᠷᠠᠢ! ᠭᠡᠵᠦ ᠰᠠᠨᠵᠢ ᠠᠶᠤᠭᠰᠠᠨ ᠳ᠋ᠤ᠌ ᠪᠠᠨ ᠮᠣᠩᠭᠣᠯ ᠢ᠋ᠶ᠋ᠠᠷ ᠬᠠᠰᠬᠢᠷᠴᠤ ᠣᠷᠬᠢᠯᠠ᠃
- ᠬᠦᠢ ᠡᠨᠡ ᠴᠢᠨᠢ ᠮᠣᠩᠭᠣᠯ ᠬᠥᠮᠦᠨ ᠤᠤ ᠳᠠ? ᠭᠡᠵᠦ ᠬᠠᠷᠠᠩᠭᠤᠢ ᠳᠤᠮᠳᠠ ᠠ᠋ᠴᠠ ᠠᠢᠬᠤᠪᠲᠤᠷ ᠲᠠᠨᠢᠯ ᠳᠠᠭᠤ ᠰᠣᠨᠣᠰᠤᠭᠳᠠᠪᠠ᠃ 《ᠶᠠᠭᠠᠬᠢᠭᠰᠠᠨ ᠲᠠᠨᠢᠯ ᠳᠠᠭᠤ ᠪᠣᠢ? ᠡᠨᠡ ᠴᠢᠨᠢ ᠬᠡᠨ ᠶᠦ᠍ᠮ ᠪᠣᠯ ᠠ᠋》 ᠭᠡᠰᠡᠨ ᠪᠣᠳᠣᠯ ᠰᠠᠨᠵᠢ ᠶ᠋ᠢᠨ ᠰᠠᠨᠠᠭᠠᠨ ᠳ᠋ᠤ᠌ ᠭᠱᠠᠨ ᠵᠠᠭᠤᠷᠠ ᠭᠢᠯᠠᠰᠬᠢᠨ ᠣᠷᠣᠵᠤ ᠢᠷᠡᠭᠡᠳ ᠲᠡᠷᠡᠬᠡᠨ ᠮᠥᠴᠢᠳ ᠬᠠᠷᠢᠭᠤ ᠨᠢ ᠣᠯᠳᠠᠵᠤ᠂
- ᠪᠥᠬᠡᠮᠠᠩᠯᠠᠢ ᠭᠤᠸᠠᠢ ᠤᠤ? ᠭᠡᠵᠦ ᠰᠠᠨᠵᠢ ᠬᠠᠰᠬᠢᠷᠪᠠ᠃ - ᠬᠦᠢ ᠲᠡᠢᠮᠦ ᠪᠠᠢᠨᠠ᠃ ᠴᠢ ᠬᠡᠨ ᠪᠣᠢ? ᠭᠡᠵᠦ ᠬᠠᠷᠢᠭᠤ ᠬᠠᠰᠬᠢᠷᠬᠤ ᠨᠢ ᠪᠥᠬᠡᠮᠠᠩᠯᠠᠢ ᠶ᠋ᠢᠨ ᠳᠠᠭᠤ ᠶᠠᠭ ᠮᠥᠨ ᠪᠠᠢᠯᠠ᠃ ᠰᠠᠨᠵᠢ ᠠᠮᠢ ᠨᠠᠭᠠᠨᠠ᠂ ᠲᠠᠮᠤ ᠴᠠᠭᠠᠨᠠ ᠶᠠᠪᠤᠬᠤ ᠳ᠋ᠤ᠌ ᠪᠥᠬᠡᠮᠠᠩᠯᠠᠢ ᠲᠠᠢ ᠢᠩᠭᠢᠵᠦ ᠠᠭᠤᠯᠵᠠᠭᠰᠠᠨ ᠳ᠋ᠤ᠌ ᠪᠠᠨ ᠠᠰᠤᠷᠤ ᠶᠡᠬᠡ ᠭᠠᠢᠬᠠᠬᠤ᠂ ᠪᠠᠶᠠᠷᠯᠠᠬᠤ ᠬᠣᠣᠰᠯᠠᠪᠠ᠃ ᠲᠡᠷᠡᠬᠡᠨ ᠭᠱᠠᠨ ᠳ᠋ᠤ᠌ ᠰᠠᠨᠵᠢ ᠶ᠋ᠢᠨ ᠮᠣᠷᠢ ᠶ᠋ᠢ ᠬᠡᠨ ᠨᠢᠭᠡ ᠬᠥᠮᠦᠨ ᠴᠤᠯᠪᠤᠭᠤᠷᠳᠠᠨ ᠠᠪᠴᠤ ᠵᠣᠭᠰᠣᠭᠠᠭᠠᠳ ᠴᠢᠩᠭᠠ ᠳᠠᠭᠤ ᠪᠠᠷ᠂
- ᠴᠢ ᠬᠡᠨ ᠪᠣᠢ? ᠭᠡᠵᠦ ᠮᠣᠩᠭᠣᠯ ᠢ᠋ᠶ᠋ᠠᠷ ᠠᠰᠠᠭᠤᠯᠠ᠃
- ᠪᠢ ᠰᠠᠨᠵᠢ ᠪᠠᠢᠨᠠ᠃ ᠪᠡᠷᠡᠪᠠᠡᠭ ᠬᠡᠢᠳ ᠦ᠋ᠨ ᠱᠠᠪᠢ᠃ ᠲᠠ ᠪᠥᠬᠡᠮᠠᠩᠯᠠᠢ ᠭᠤᠸᠠᠢ ᠤᠤ? ᠭᠡᠵᠦ ᠰᠠᠨᠵᠢ ᠠᠰᠠᠭᠤᠯᠠ᠃
- ᠠ᠋ ᠰᠠᠨᠵᠢ ᠶᠤᠮ ᠤᠤ? ᠶᠠᠭᠠᠬᠢᠭᠰᠠᠨ ᠬᠠᠴᠢᠨ ᠲᠣᠬᠢᠶᠠᠯᠳᠤᠯ ᠪᠣᠢ? ᠪᠢ ᠪᠥᠬᠡᠮᠠᠩᠯᠠᠢ ᠪᠠᠢᠨᠠ ᠭᠡᠳ ᠲᠡᠷᠡ ᠬᠥᠮᠦᠨ ᠰᠠᠨᠵᠢ ᠶᠢ ᠮᠣᠷᠢᠨ ᠳᠡᠭᠡᠷᠡ ᠡᠴᠡ ᠨᠢ ᠲᠡᠪᠡᠷᠢᠬᠦ ᠶ᠋ᠢ ᠵᠠᠪᠳᠤᠭᠰᠠᠨ ᠢ᠋ᠶ᠋ᠠᠨ᠂
- ᠦᠭᠡᠢ ᠴᠢ ᠴᠢᠨᠢ ᠬᠦᠯᠢᠭᠲᠡᠢ ᠶᠦ᠍ᠮ ᠤᠤ? ᠭᠡᠪᠡ᠃
- ᠪᠢ ᠮᠣᠷᠢᠨ ᠳᠡᠭᠡᠷᠡ ᠪᠡᠨ ᠬᠦᠯᠢᠭᠳᠡᠭᠡᠳ ᠶᠠᠪᠤᠵᠤ ᠪᠠᠢᠨᠠ᠃ ᡀᠠᠰᠠ ᠵᠣᠣ ᠠ᠋ᠴᠠ ᠤᠷᠭᠤᠵᠤ ᠶᠠᠪᠤᠭᠠᠳ ᠡᠳᠡᠨ ᠳ᠋ᠦ᠍ ᠪᠠᠷᠢᠭᠳᠠᠯᠠ᠃ ᠨᠠᠮᠠᠶ᠋ᠢ ᠪᠤᠴᠠᠭᠠᠵᠤ ᠯᠠᠨᠴᠢᠰᠠ ᠳ᠋ᠤ᠌ ᠲᠤᠰᠢᠶᠠᠬᠤ ᠪᠠᠷ ᠶᠠᠪᠤᠵᠤ ᠪᠠᠢᠨᠠ! ᠭᠡᠵᠦ ᠰᠠᠨᠵᠢ ᠤᠴᠢᠷᠯᠠᠪᠠ᠃ ᠲᠡᠷᠡ ᠦᠭᠡᠨ ᠳ᠋ᠦ᠍ ᠲᠡᠳᠡ ᠢᠲᠡᠭᠡᠭᠰᠡᠨ ᠦᠭᠡᠢ ᠪᠣᠯᠤᠯᠲᠠᠢ᠂
- ᠯᠠᠨᠴᠢᠰᠠ ᠭᠡᠨᠡ? ᠲᠡᠷᠡ ᠲᠠᠮᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠶᠠᠭᠤ ᠭᠡᠵᠦ ᠴᠢᠮᠠᠶ᠋ᠢ ᠠᠪᠠᠴᠢᠬᠤ ᠨᠢ ᠪᠣᠢ? ᠮᠥᠨ ᠭᠣᠷᠢᠳᠠᠪᠠ ᠠ᠋᠂ ᠡᠨᠡ ᠮᠠᠭᠤ ᠦᠬᠡᠷ ᠲᠠᠩᠭᠤᠳ ᠤᠳ! ᠭᠡᠵᠦ ᠪᠥᠬᠡᠮᠠᠩᠯᠠᠢ ᠰᠢᠲᠦ ᠵᠠᠭᠤᠨ ᠬᠡᠯᠡᠭᠡᠳ ᠰᠠᠨᠵᠢ ᠶ᠋ᠢᠨ ᠬᠦᠯᠢᠭ ᠢ᠋ ᠬᠢᠲᠤᠭᠠ ᠪᠠᠷ ᠢ᠋ᠶ᠋ᠠᠨ ᠲᠠᠰᠤ ᠲᠡᠳᠡᠨ ᠬᠠᠶᠠᠯᠠ᠃ ᠪᠥᠬᠡᠮᠠᠩᠯᠠᠢ᠂
- ᠪᠢᠳᠡ ᠡᠨᠡ ᠬᠡᠳᠦ ᠶ᠋ᠢᠨ ᠫᠤᠤ ᠳ᠋ᠤ᠌ ᠨᠢ ᠰᠢᠨᠤᠵᠤ ᠪᠠᠢᠯᠠ᠃ ᠲᠡᠭᠡᠭᠡᠳ ᠡᠨᠳᠡ ᠤᠲᠤᠵᠤ ᠰᠠᠭᠤᠭᠰᠠᠨ ᠶᠤᠮ᠃ ᠰᠠᠢᠨ ᠫᠤᠤ ᠲᠠᠢ ᠶᠤᠮ ᠪᠢᠯᠡ᠃ ᠠᠬᠠ ᠴᠢᠨᠢ ᠲᠥᠪᠡᠳ ᠦ᠋ᠨ ᠴᠡᠷᠢᠭ ᠡᠴᠡ ᠤᠷᠭᠤᠵᠤ ᠠᠭᠤᠯᠠ ᠶ᠋ᠢᠨ ᠳᠡᠭᠡᠷᠡᠮᠴᠢᠨ ᠪᠣᠯᠤᠭᠰᠠᠭᠠᠷ ᠣᠯᠠᠨ ᠵᠢᠯ ᠥᠩᠭᠡᠷᠡᠯᠡ᠃ ᠲᠥᠪᠡᠳ ᠡᠬᠡᠨᠡᠷ ᠠᠪᠤᠭᠰᠠᠨ ᠭᠡᠵᠦ ᠶᠠᠷᠢᠬᠤ ᠳ᠋ᠤ᠌ ᠰᠠᠨᠵᠢ ᠭᠠᠢᠬᠠᠵᠤ᠂
- ᠤᠳᠬᠤᠨ ᠡᠭᠡᠴᠢ ᠶᠠᠭᠠᠬᠢᠭᠰᠠᠨ ᠪᠣᠢ? ᠭᠡᠪᠡᠯ ᠪᠥᠬᠡᠮᠠᠩᠯᠠᠢ᠂
- ᠵᠠ ᠲᠡᠷᠡ ᠶᠠᠭᠠᠬᠢᠬᠤ ᠪᠣᠢ᠃ ᠦᠷᠡ ᠦᠭᠡᠢ ᠠᠮᠢᠲᠠᠨ᠃ ᠨᠤᠲᠤᠭ ᠪᠤᠴᠠᠭᠠ ᠪᠢᠵᠡ᠃ ᠬᠠᠷᠢᠨ ᠴᠢ ᠶᠠᠭᠠᠬᠢᠭᠠᠳ ᠣᠷᠭᠣᠭᠠᠳ ᠪᠠᠷᠢᠭᠳᠠᠭᠠᠳ ᠶᠠᠪᠤᠵᠤ ᠪᠠᠢᠳᠠᠭ ᠪᠢᠯᠡ? ᠭᠡᠬᠦ ᠳ᠋ᠦ᠍ ᠨᠢ ᠰᠠᠨᠵᠢ ᠥᠪᠡᠷ ᠦ᠋ᠨ ᠪᠦᠬᠦᠢ ᠯᠡ ᠤᠴᠢᠷ ᠢ᠋ ᠲᠡᠭᠦᠨ ᠳ᠋ᠦ᠍ ᠶᠠᠷᠢᠪᠠ᠃ ᠲᠡᠷᠡ ᠬᠣᠭᠣᠷᠣᠨᠳᠣ ᠳᠡᠭᠡᠷᠡᠮᠴᠢᠨ ᠨᠥᠬᠥᠳ ᠨᠢ ᠣᠯᠵᠠᠨ ᠤ᠋ ᠫᠤᠤ ᠪᠠᠨ ᠴᠤᠭᠯᠠᠭᠤᠯᠤᠨ ᠢᠷᠡᠪᠡ᠃ ᠪᠠᠬᠠ ᠨᠢ ᠬᠠᠨᠤᠭᠰᠠᠨ ᠳᠠᠭᠤ ᠪᠠᠷ ᠬᠡᠨ ᠨᠢᠭᠡ ᠨᠢ ᠪᠡᠶᠡᠰᠪᠡ᠃
- ᠬᠡᠳᠦᠨ ᠰᠠᠢᠨ ᠫᠤᠤ ᠲᠠᠢ ᠪᠣᠯᠤᠯᠠ᠃ ᠡᠵᠡᠳ ᠨᠢ ᠴᠥᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠱᠠᠮᠪᠠᠯ ᠳ᠋ᠤ᠌ ᠶᠠᠪᠤᠴᠢᠬᠠᠯᠠ᠃ ᠥᠪᠡᠷᠰᠡᠳ ᠦ᠋ᠨ ᠨᠢ ᠯᠡ ᠬᠣᠬᠢ ᠭᠡᠵᠦ ᠨᠢᠭᠡ ᠳᠡᠭᠡᠷᠡᠮᠴᠢᠨ ᠪᠠᠬᠠᠳᠤᠬᠤ ᠮᠡᠲᠦ ᠶᠠᠷᠢᠯᠠ᠃
᠁ ᠪᠥᠬᠡᠮᠠᠩᠯᠠᠢ ᠳᠡᠭᠡᠷᠡᠮᠴᠢᠨ ᠨᠥᠬᠥᠳ ᠦ᠋ᠨ ᠢ᠋ᠶ᠋ᠡᠨ ᠬᠠᠮᠲᠤ ᠰᠠᠨᠵᠢ ᠶ᠋ᠢ ᠨᠤᠲᠤᠭ ᠤᠷᠤᠭᠤ ᠨᠢ ᠨᠡᠯᠢᠶᠡᠳ ᠳᠥᠬᠥᠭᠦᠯᠵᠦ ᠥᠭᠬᠦ᠂ ᠶᠠᠳᠠᠬᠤ ᠳ᠋ᠤ᠌ ᠪᠠᠨ ᠬᠠᠷᠠᠯᠠᠭ ᠲᠠᠭ ᠤ᠋ᠨ ᠨᠢᠷᠤᠭᠤ ᠬᠦᠷᠭᠡᠬᠦ ᠪᠡᠷ ᠠᠮᠠᠯᠠᠪᠠ᠃ ᠡᠢᠨ ᠬᠦ᠌ ᠰᠠᠨᠵᠢ ᠨᠤᠲᠤᠭ ᠤ᠋ᠨ ᠪᠠᠷᠠ ᠬᠠᠷᠠᠬᠤ ᠪᠣᠯᠤᠭᠰᠠᠨ ᠳ᠋ᠤ᠌ ᠪᠠᠨ ᠠᠮᠢᠳᠤᠷᠠᠯ ᠤ᠋ᠨ ᠵᠠᠮ ᠳ᠋ᠤ᠌ ᠦᠵᠡᠭᠰᠡᠨ ᠬᠠᠮᠤᠭ ᠤ᠋ᠨ ᠲᠣᠮᠣ ᠵᠣᠯ ᠪᠠᠶᠠᠷ ᠢ ᠡᠳ᠋ᠯᠡᠪᠡ᠃ ᠲᠡᠷᠡ ᠰᠥᠨᠢ ᠳ᠋ᠦ᠍ ᠪᠡᠨ ᠲᠡᠳᠡ ᠵᠠᠮ ᠪᠤᠷᠤᠭᠤᠯᠠᠨ ᠵᠣᠭᠰᠣᠭᠠ ᠵᠠᠢ ᠦᠭᠡᠢ ᠶᠠᠪᠤᠵᠠᠭᠠᠵᠤ ᠦᠷ ᠴᠠᠢᠬᠤ ᠬᠦᠷᠲᠡᠯᠡ ᠨᠡᠯᠢᠶᠡᠳ ᠬᠣᠯᠠᠳᠴᠠᠢ᠃ ᠮᠥᠷ ᠮᠥᠰᠬᠢᠨ ᠬᠥᠭᠡᠭᠡᠬᠦ ᠳ᠋ᠦ᠍ ᠣᠭᠲᠣᠬᠠᠨ ᠴᠤ᠌ ᠰᠡᠵᠢᠭᠯᠡᠭᠳᠡᠬᠦ ᠦᠭᠡᠢ ᠵᠠᠮ ᠪᠣᠯᠤᠭᠠᠳ ᠠᠷᠭᠠ ᠶ᠋ᠢ ᠭᠠᠭᠴᠠᠬᠦ ᠳᠡᠭᠡᠷᠡᠮᠴᠢᠨ ᠦ᠋ᠳ ᠯᠡ ᠮᠡᠳᠡᠳᠡᠭ ᠶᠣᠰᠣᠭᠠᠷ ᠢ᠋ᠶ᠋ᠠᠨ ᠲᠡᠳᠡ ᠰᠥᠨᠢ ᠶ᠋ᠢᠨ ᠬᠠᠷᠠᠩᠭᠤᠢ ᠳ᠋ᠤ᠌ ᠴᠤ᠌ ᠡᠳᠦᠷ ᠶᠦ᠍ᠮ ᠰᠢᠭ ᠪᠠᠷᠢᠮᠵᠢᠶᠠ ᠶ᠋ᠢ ᠪᠡᠨ ᠣᠯᠵᠤ ᠶᠠᠪᠤᠯᠠ᠃ ᠪᠥᠬᠡᠮᠠᠩᠯᠠᠢ ᠡᠮᠡᠭᠡᠯ ᠦ᠋ᠨ ᠢ᠋ᠶ᠋ᠡᠨ ᠳᠤᠬᠤᠮᠠᠨ ᠳᠣᠣᠷᠠ ᠠ᠋ᠴᠠ ᠪᠠᠷᠤᠭ ᠲᠦᠭᠦᠬᠡᠢ ᠰᠢᠬᠠᠮ ᠮᠢᠬᠠ ᠭᠠᠷᠭᠠᠵᠤ ᠰᠠᠨᠵᠢ ᠳ᠋ᠤ᠌ ᠮᠣᠷᠢᠨ ᠤ᠋ ᠶᠠᠪᠤᠳᠠᠯ ᠳᠤᠮᠳᠠ ᠥᠭᠭᠦᠯᠡ᠃ ᠠᠳᠤᠭᠤᠨ ᠤ᠋ ᠬᠥᠯᠥᠰᠥ ᠬᠠᠩᠬᠤᠯᠤᠨ ᠪᠥᠭᠡᠯᠵᠢᠰᠦ ᠴᠢᠳᠬᠤᠮᠠᠷ ᠪᠣᠯᠪᠠᠴᠤ ᠥᠯᠥᠰᠦᠭᠰᠡᠨ ᠦ᠌ ᠡᠷᠬᠡᠨ ᠳ᠋ᠦ᠍ ᠰᠠᠨᠵᠢ ᠲᠡᠭᠦᠨ ᠢ᠋ ᠮᠣᠷᠢᠨ ᠭᠦᠶᠦᠳᠡᠯ ᠳᠤᠮᠳᠠ ᠬᠡᠳᠦ ᠬᠡᠳᠦ ᠵᠤᠯᠭᠠᠭᠠᠨ ᠵᠠᠵᠢᠯᠠᠯ ᠦᠭᠡᠢ ᠵᠠᠯᠭᠢᠯᠠ᠃