ᠦᠲᠦᠷᠮᠡ ᠶ᠋ᠢᠨ ᠢᠷᠥᠭᠡᠯ Үтрмийн ерөөл
327ᠦᠲᠦᠷᠮᠡ ᠶ᠋ᠢᠨ ᠢᠷᠥᠭᠡᠯ
ᠪᠤᠮᠠᠨ ᠵᠢᠯ ᠦ᠋ᠨ
ᠪᠤᠯᠠᠭᠠᠨ ᠰᠠᠷᠠ ᠶ᠋ᠢᠨ
ᠲᠦᠮᠡᠨ ᠵᠢᠯ ᠦ᠋ᠨ
ᠲᠣᠷᠭᠠᠨ ᠰᠠᠷᠠ ᠶ᠋ᠢᠨ
ᠲᠦᠭᠡᠮᠡᠯ ᠥᠯᠵᠡᠢ ᠪᠦᠷᠢᠳᠦᠭᠰᠡᠨ
ᠲᠦᠪᠰᠢᠨ ᠰᠠᠢᠨ ᠡᠳᠦᠷ ᠠ᠋!
ᠲᠡᠷᠭᠡᠯ ᠰᠠᠷᠠᠨ ᠮᠡᠲᠦ ᠳᠦᠭᠦᠷᠡᠭ
ᠲᠣᠯᠢ ᠰᠢᠯᠢᠨ ᠮᠡᠲᠦ ᠭᠥᠯᠢᠭᠡᠷ
ᠲᠠᠯᠠ ᠮᠡᠲᠦ ᠠᠭᠤᠳᠠᠮ ᠦᠲᠦᠷᠮᠡ ᠳᠤ ᠪᠠᠨ
ᠬᠥᠨᠳᠡᠢ ᠬᠣᠭᠣᠯᠠᠢ ᠶ᠋ᠢ ᠪᠦᠴᠢᠨ ᠤᠷᠭᠤᠵᠤ
ᠬᠥᠬᠡ ᠦᠬᠡᠷ ᠦ᠋ᠨ ᠬᠦᠵᠦᠭᠦᠨ ᠴᠢᠨᠡᠭᠡ ᠤᠷᠭᠤᠵᠤ
ᠠᠭᠤᠯᠠ ᠲᠠᠯᠠ ᠶ᠋ᠢ ᠬᠤᠴᠢᠨ ᠤᠷᠭᠤᠵᠤ
ᠤᠯᠠᠭᠠᠨ ᠦᠬᠡᠷ ᠦ᠋ᠨ ᠴᠢᠨᠡᠭᠡ ᠤᠷᠭᠤᠵᠤ
ᠬᠠᠩᠭᠠᠢ ᠭᠣᠪᠢ ᠶ᠋ᠢ ᠢᠯᠭᠠᠯ ᠦᠭᠡᠢ ᠤᠷᠭᠤᠵᠤ
ᠬᠠᠮᠤᠭ ᠪᠦᠭᠦᠳᠡ ᠶ᠋ᠢ ᠭᠠᠢᠬᠠᠲᠠᠯᠠ ᠤᠷᠭᠤᠵᠤ
ᠬᠤᠯᠤᠰᠤ ᠠᠳᠠᠯᠢ ᠬᠤᠷᠳᠤᠨ ᠤᠷᠭᠤᠵᠤ
ᠬᠤᠮᠠᠬᠢ ᠠᠳᠠᠯᠢ ᠠᠷᠪᠢᠵᠢᠨ ᠳᠡᠯᠭᠡᠷᠡᠵᠦ
ᠬᠥᠮᠦᠨ ᠪᠦᠬᠦᠨ ᠢ᠋ ᠭᠠᠢᠬᠠᠲᠠᠯᠠ ᠤᠷᠭᠤᠭᠰᠠᠨ
ᠲᠠᠪᠤᠨ ᠵᠦᠢᠯ ᠦ᠋ᠨ ᠲᠠᠷᠢᠶᠠᠨ ᠤ᠋ ᠥᠷᠥᠭᠡ
ᠲᠠᠩᠰᠤᠭ ᠡᠯᠪᠡᠭ ᠬᠤᠷᠢᠶᠠᠵᠤ
ᠲᠠᠢᠪᠤᠩ ᠰᠠᠢᠬᠠᠨ ᠦᠲᠦᠷᠮᠡᠳᠡᠭᠡᠳ
ᠲᠠᠪᠠᠲᠠᠢ ᠴᠡᠩᠭᠡᠯ ᠢ᠋ ᠦᠢᠯᠡᠳᠦᠨ ᠪᠦᠬᠦᠢ ᠳ᠋ᠦ᠍
ᠲᠠᠷᠢᠶᠠᠨ ᠤ᠋ ᠠᠵᠢᠯ ᠤ᠋ᠨ ᠦᠢᠯᠡᠴᠢᠨ ᠪᠣᠯᠤᠭᠰᠠᠨ
ᠲᠷᠠᠺᠲ᠋ᠣᠷ ᠺᠣᠮᠪᠠᠶᠢᠨ ᠠ᠋ᠴᠠ ᠠᠪᠬᠠᠭᠤᠯᠤᠭᠠᠳ
ᠲᠠᠷᠮᠠᠭᠤᠷ ᠰᠢᠭᠰᠢᠭᠦᠷ ᠲᠡᠭᠦᠨ ᠢ᠋ ᠪᠡᠨ
ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤ᠋ᠨ ᠢ᠋ᠶ᠋ᠠᠨ ᠬᠡᠰᠢᠭ
ᠲᠠᠷᠠᠭ ᠰᠦ ᠪᠡᠷ ᠮᠢᠯᠢᠶᠠᠶᠠ᠃
ᠠᠭᠠᠷ ᠬᠤᠷᠮᠤᠰᠲᠠ ᠶ᠋ᠢᠨ ᠣᠷᠣᠨ ᠠ᠋ᠴᠠ ᠪᠠᠭᠤᠭᠰᠠᠨ
ᠠᠭᠠᠳᠠᠷ ᠬᠤᠷᠠ ᠶ᠋ᠢᠨ ᠴᠢᠭᠢᠭ ᠢ᠋ᠶ᠋ᠡᠷ ᠤᠷᠭᠤᠭᠰᠠᠨ
ᠠᠰᠤᠷᠤ ᠣᠯᠠᠨ ᠱᠠᠩ᠂ ᠪᠤᠬᠠ ᠪᠠᠷ ᠨᠢ
ᠤᠷᠤᠰᠤᠭᠰᠠᠨ ᠠᠤᠭᠠ ᠮᠥᠷᠡᠨ ᠦ᠌ ᠤᠰᠤ ᠪᠠᠷ ᠲᠡᠵᠢᠭᠡᠯᠭᠡᠭᠰᠡᠨ
ᠠᠷᠪᠠᠢ ᠪᠤᠭᠤᠳᠠᠢ ᠠᠯᠢᠪᠠ ᠪᠦᠭᠦᠳᠡ
ᠠᠮᠲᠠᠲᠤ ᠲᠠᠷᠢᠶᠠ ᠲᠡᠭᠦᠨ ᠢ᠋ ᠪᠡᠨ
ᠠᠳᠤᠭᠤ ᠮᠠᠯ ᠤ᠋ᠨ ᠢ᠋ᠶ᠋ᠠᠨ ᠪᠤᠶᠠᠨ
ᠠᠢᠷᠠᠭ ᠰᠠᠷᠠᠬᠤᠳ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠮᠢᠯᠢᠶᠠᠶᠠ᠃
ᠡᠯᠳᠡᠪ ᠲᠠᠩᠰᠤᠭ ᠤ᠋ᠨ ᠦᠢᠯᠡᠴᠢᠨ ᠨᠢ ᠪᠣᠯᠤᠭᠰᠠᠨ
ᠡᠨᠡ ᠮᠣᠩᠭᠣᠯ ᠤ᠋ᠨ ᠦᠢᠯᠡᠳᠪᠦᠷᠢᠴᠢᠨ ᠠᠷᠠᠳ
ᠡᠭᠡᠷᠡᠮᠡ ᠲᠠᠯᠠ ᠶ᠋ᠢᠨ ᠲᠠᠷᠢᠶᠠᠯᠠᠩᠴᠢᠨ
ᠡᠷᠬᠢᠮ ᠣᠯᠠᠨ ᠲᠠ ᠨᠠᠷ ᠢ᠋ ᠪᠣᠯᠪᠠᠰᠤ
ᠡᠯᠪᠡᠷᠢᠯᠲᠦ ᠨᠠᠮ ᠵᠠᠰᠠᠭ ᠠ᠋ᠴᠠ ᠲᠠᠨᠢ ᠦᠨᠡᠯᠡᠭᠡᠳ
ᠦᠷᠡ ᠪᠦᠲᠦᠭᠡᠯ ᠨᠢ ᠥᠨᠳᠥᠷ ᠭᠡᠵᠦ
ᠦᠢᠯᠡᠰ ᠶᠠᠪᠤᠳᠠᠯ ᠨᠢ ᠥᠭᠡᠳᠡᠷᠡᠭ ᠭᠡᠵᠦ
ᠦᠨᠡᠨᠴᠢ ᠵᠢᠳᠬᠦᠯ ᠨᠢ ᠶᠡᠬᠡ ᠭᠡᠵᠦ
ᠦᠨᠡᠮᠯᠡᠬᠦ ᠣᠳᠣᠨ ᠠ᠋ᠴᠠ ᠡᠬᠢᠯᠡᠭᠡᠳ
ᠡᠭᠦᠷᠢᠳᠡ ᠳᠠᠭᠤᠷᠢᠰᠬᠠᠬᠤ ᠠᠯᠳᠠᠷ ᠱᠠᠩᠨᠠᠭᠰᠠᠨ ᠢ᠋
ᠦᠭᠡᠰ ᠦ᠋ᠨ ᠰᠠᠢᠨ ᠳᠡᠭᠡᠳᠦ ᠪᠡᠷ ᠮᠢᠯᠢᠶᠠᠶᠠ᠃
ᠵᠢᠯ ᠢᠷᠡᠬᠦ ᠳᠣᠳᠣᠮ ᠵᠢᠷᠭᠠᠭᠤᠯᠵᠤ
ᠣᠨ ᠢᠷᠡᠬᠦ ᠳᠣᠳᠣᠮ ᠤᠨᠳᠤᠷᠤᠭᠤᠯᠵᠤ
ᠤᠯᠠᠮ ᠢᠯᠡᠭᠦᠦ ᠤᠷᠭᠤᠴᠠ ᠬᠤᠷᠢᠶᠠᠬᠤ ᠶ᠋ᠢ
ᠣᠯᠠᠨ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠪᠡᠯᠭᠡᠳᠡᠵᠦ
ᠦᠷᠡ ᠲᠠᠷᠢᠶᠠᠨ ᠤ᠋ ᠥᠯᠵᠡᠢ ᠣᠷᠣᠰᠢᠭᠰᠠᠨ
ᠦᠲᠦᠷᠮᠡ ᠴᠠᠩ ᠢᠶᠠᠨ ᠮᠠᠭᠲᠠᠨ ᠢᠷᠦᠭᠡᠵᠦ
ᠰᠠᠨᠠᠭᠰᠠᠨ ᠪᠣᠯᠭᠠᠨ ᠨᠢ ᠰᠡᠳᠬᠢᠯᠴᠢᠯᠡᠨ ᠪᠦᠲᠦᠵᠦ
ᠰᠠᠢᠬᠠᠨ ᠪᠦᠬᠦᠨ ᠨᠢ ᠳᠡᠯᠭᠡᠷᠡᠨ ᠵᠢᠷᠭᠠᠬᠤ ᠶ᠋ᠢᠨ
ᠰᠠᠢᠬᠠᠨ ᠪᠢᠯᠢᠭ ᠢ᠋ ᠳᠡᠭᠡᠭᠰᠢ ᠨᠢ ᠳᠡᠪᠰᠢᠭᠦᠯᠦᠨ ᠠᠢᠯᠠᠳᠬᠠᠶᠠ᠃
Үтрмийн ерөөл
Буман жилийн
Булган сарын
Түмэн жилийн
Торгон сарын
Түгээмэл өлзий бүрдэгсэн
Түвшин сайн өдөр өө
Тэргэл саран мэт дүгрэг
Толь шилэн мэт гөлгөр
Тал мэт уудам үтрэмдээ
Хөндий хоолойг бүчин ургаж
Хөх үхрийн хүзүүн чинээ ургаж
Уул талыг хучин ургаж
Улаан үхрийн чинээ ургаж
Хангай говийг ялгалгүй ургаж
Хамаг бүгдийг гайхтал ургаж
Хулс адил хурдан ургаж
Хумх адил арвижин дэлгэрч
Хүн бүхнийг гайхтал ургасан
Таван зүйлийн тарианы үрээ
Тансаг элбэг хурааж
Тайван сайхан үтрэмдээд
Тавтай цэнгэлийг үйлдэн бүхийд
Тарианы ажлын үйлчин болсон
Трактор комбайнаас авахуулаад
Тармуур шигшүүр түүнийгээ
Таван хошуу малынхаа хишиг
Тараг сүүгээр мялаая.
Агаар хурмастын орноос буусан
Аадар хурын чийгээр ургасан
Асар олон шан, бухаар нь урссан
Аугаа мөрний усаар тэжээлгэсэн
Арвай буудай алив бүгд
Амтат тариа түүнийгээ
Адуу малынхаа буян
Айраг сархдаараа мялаая.
Элдэв тансгийн үйлчин нь болсон
Энэ монголын үйлдвэрчин ард
Ээрэм талын тариаланчин
Эрхэм олон та нарыг болбоос
Элбэрэлт нам засгаас тань үнэлээд
Үр бүтээл нь өндөр гэж
Үйлс явдал нь өөдрөг гэж
Үнэнч зүтгэл нь их гэж
Үнэмлэх одонгоос эхлээд
Үүрд дуурсгах алдар шагнасныг
Үгсийн сайн дээдээр мялаая.
Жил ирэх тутам жаргуулж
Он ирэх тутам ундруулж
Улам илүү ургац хураахыг
Олон бүгдээрээ бэлэгдэж
Үр тарианы өлзий оршсон
Үтрэм цангаа магтан өрөөж
Санасан болгон нь сэтгэлчлэн бүтэж
Сайхан бүхэн нь дэлгэрэн жаргахын
Сайхан билгийг дээш нь
Дэвшүүлэн айлтгая.