ᠠᠮᠠᠨ ᠬᠦᠵᠦᠬᠦᠨ ᠦ ᠢᠷᠥᠭᠡᠯ Аман хүзүүний ерөөл
430 ᠣᠶᠤᠨ ᠡᠷᠳᠡᠨᠢ ᠶ᠋ᠢᠨ ᠣᠨᠢ ᠲᠠᠢ
ᠰᠦᠯᠵᠢᠮᠡᠯ ᠡᠷᠳᠡᠨᠢ ᠶ᠋ᠢᠨ ᠬᠠᠨᠠ ᠲᠠᠢ
ᠲᠥᠭᠥᠷᠢᠭ ᠡᠷᠳᠡᠨᠢ ᠶ᠋ᠢᠨ ᠲᠣᠭᠣᠨᠣ ᠲᠠᠢ
ᠲᠡᠮᠦᠷ ᠡᠷᠳᠡᠨᠢ ᠶ᠋ᠢᠨ ᠲᠤᠯᠭᠠ ᠲᠠᠢ
ᠲᠦᠮᠡᠨ ᠦ᠌ ᠳᠤᠮᠳᠠ ᠨᠢ
ᠠᠮᠠᠨ ᠬᠦᠵᠦᠭᠦᠦ ᠡᠷᠳᠡᠨᠢ ᠠ᠋᠃
ᠠᠷᠤ ᠠ᠋ᠴᠠ ᠢᠷᠡᠭᠰᠡᠨ ᠠᠮᠠᠨ ᠬᠦᠵᠦᠭᠦᠦ
ᠠᠯᠲᠠ ᠮᠥᠩᠭᠥ ᠪᠡᠷ ᠴᠢᠮᠡᠭᠯᠡᠭᠰᠡᠨ ᠠᠮᠠᠨ ᠬᠦᠵᠦᠭᠦᠦ
ᠥᠪᠥᠷ ᠡᠴᠡ ᠢᠷᠡᠭᠰᠡᠨ ᠠᠮᠠᠨ ᠬᠦᠵᠦᠭᠦᠦ
ᠥᠭᠡᠬᠦ ᠲᠣᠰᠣ ᠪᠠᠷ ᠴᠢᠮᠡᠭᠯᠡᠭᠰᠡᠨ ᠠᠮᠠᠨ ᠬᠦᠵᠦᠭᠦᠦ
ᠡᠷᠲᠡ ᠤᠷᠢᠳᠤ ᠠ᠋ᠴᠠ ᠠᠴᠢᠯᠠᠯ ᠲᠠᠢ ᠠᠮᠠᠨ ᠬᠦᠵᠦᠭᠦᠦ
ᠡᠪᠦᠭᠡ ᠳᠡᠭᠡᠳᠦᠰ ᠡᠴᠡ ᠢᠷᠦᠭᠡᠯ ᠲᠡᠢ ᠠᠮᠠᠨ ᠬᠦᠵᠦᠭᠦᠦ
ᠰᠢᠷᠠᠯᠵᠢᠨ ᠤ᠋ ᠨᠠᠮᠠᠭᠠ ᠶ᠋ᠢ ᠳᠤᠰᠤᠯᠠᠭᠰᠠᠭᠠᠷ ᠠᠮᠠᠨ ᠬᠦᠵᠦᠭᠦᠦ
ᠰᠢᠷᠠ ᠤᠯᠠᠭᠠᠨ ᠢ᠋ ᠡᠮᠦᠰᠦᠭᠦᠯᠦᠭᠰᠡᠭᠡᠷ ᠠᠮᠠᠨ ᠬᠦᠵᠦᠭᠦᠦ
ᠪᠣᠷᠣᠯᠵᠢᠭᠠᠨᠠ ᠶ᠋ᠢᠨ ᠨᠠᠮᠠᠭᠠ ᠶ᠋ᠢ ᠳᠤᠰᠤᠯᠠᠭᠰᠠᠭᠠᠷ ᠠᠮᠠᠨ ᠬᠦᠵᠦᠭᠦᠦ
ᠪᠣᠷᠣ ᠤᠯᠠᠭᠠᠨ ᠢ᠋ ᠡᠳ᠋ᠯᠡᠭᠦᠯᠦᠭᠰᠡᠭᠡᠷ ᠠᠮᠠᠨ ᠬᠦᠵᠦᠭᠦᠦ
ᠲᠤᠭᠤᠯ ᠳᠡᠭᠡᠷᠡ ᠪᠡᠨ
ᠲᠤᠰ ᠬᠤᠷ ᠤ᠋ᠳ ᠢ᠋ ᠢᠳᠡᠭᠦᠯᠦᠭᠰᠡᠨ
ᠲᠤᠰ ᠶᠡᠬᠡ ᠲᠡᠢ ᠠᠮᠠᠨ ᠬᠦᠵᠦᠭᠦᠦ
ᠪᠢᠷᠠᠭᠤ ᠳᠡᠭᠡᠷᠡ ᠪᠡᠨ
ᠪᠤᠯᠠᠭᠠ ᠲᠣᠷᠭᠠ ᠶ᠋ᠢ ᠡᠮᠦᠰᠦᠭᠦᠯᠦᠭᠰᠡᠨ
ᠪᠤᠶᠠᠨ ᠶᠡᠬᠡ ᠲᠡᠢ ᠠᠮᠠᠨ ᠬᠦᠵᠦᠭᠦᠦ
ᠰᠢᠳᠦᠯᠡᠩ ᠳᠡᠭᠡᠷᠡ ᠪᠡᠨ
ᠱ᠌ᠢᠷᠦ ᠰᠤᠪᠤᠳ ᠢ᠋ ᠡᠳ᠋ᠯᠡᠭᠦᠯᠦᠭᠰᠡᠨ
ᠰᠢᠮᠡ ᠪᠡᠨ ᠡᠷᠭᠦᠭᠰᠡᠨ ᠠᠮᠠᠨ ᠬᠦᠵᠦᠭᠦᠦ
ᠠᠷᠪᠠᠨ ᠨᠠᠰᠤᠨ ᠳᠡᠭᠡᠷᠡ ᠪᠡᠨ
ᠠᠭᠤᠳᠠᠮ ᠪᠡᠯᠴᠢᠭᠡᠷ ᠲᠦ᠍ ᠪᠡᠯᠴᠢᠭᠡᠳ
ᠠᠷᠳᠠᠭ ᠬᠣᠷᠣᠯᠠᠭᠰᠠᠨ ᠠᠮᠠᠨ ᠬᠦᠵᠦᠭᠦᠦ
ᠠᠷᠪᠠᠨ ᠨᠢᠭᠡᠨ ᠨᠠᠰᠤᠨ ᠳᠡᠭᠡᠷᠡ ᠪᠡᠨ᠃
ᠠᠷᠠᠭᠠᠨ ᠤ᠋ ᠰᠢᠳᠦ ᠨᠢ ᠰᠡᠢᠬᠦ ᠳ᠋ᠦ᠍
ᠠᠯᠠᠵᠤ ᠢᠳᠡᠭᠰᠡᠨ ᠠᠮᠠᠨ ᠬᠦᠵᠦᠭᠦᠦ
ᠲᠦᠮᠡᠨ ᠰᠦᠷᠦᠭ ᠦ᠋ᠨ ᠳᠤᠮᠳᠠ ᠠ᠋ᠴᠠ
ᠲᠦᠨᠲᠦᠢᠵᠦ ᠭᠠᠷᠤᠭᠰᠠᠨ ᠦᠬᠡᠷ ᠮᠢᠨᠢ
ᠲᠦᠮᠡᠨ ᠭᠠᠵᠠᠷ ᠤ᠋ᠨ ᠦᠵᠦᠭᠦᠷ
ᠲᠥᠷᠥᠯ ᠦᠭᠡᠢ ᠵᠢᠳᠬᠦᠳᠡᠭ ᠠᠮᠠᠨ ᠬᠦᠵᠦᠭᠦᠦ ᠮᠢᠨᠢ
ᠮᠢᠩᠭᠠᠨ ᠰᠦᠷᠦᠭ ᠦ᠋ᠨ ᠳᠤᠮᠳᠠ ᠠ᠋ᠴᠠ
ᠮᠠᠩᠯᠠᠢᠯᠠᠵᠤ ᠭᠠᠷᠤᠭᠰᠠᠨ ᠦᠬᠡᠷ ᠮᠢᠨᠢ
ᠮᠢᠩᠭᠠᠨ ᠭᠠᠵᠠᠷ ᠤ᠋ᠨ ᠦᠵᠦᠭᠦᠷ
ᠮᠢᠲᠠᠷᠠᠯ ᠦᠭᠡᠢ ᠠᠶᠠᠯᠠᠭᠰᠠᠨ ᠠᠮᠠᠨ ᠬᠦᠵᠦᠭᠦᠦ ᠮᠢᠨᠢ
ᠪᠣᠭᠣᠭᠰᠠᠨ ᠭᠠᠵᠠᠷ ᠨᠢ ᠪᠣᠷᠣᠯᠠᠭ ᠲᠤᠭᠤᠯ᠂
ᠪᠣᠷᠣᠯᠠᠭ ᠲᠤᠭᠤᠯ ᠨᠢ ᠥᠰᠦᠭᠡᠳ
ᠪᠤᠮ ᠲᠦᠮᠡ ᠪᠣᠯᠤᠭᠠᠷᠠᠢ᠃
ᠤᠨᠠᠭᠰᠠᠨ ᠭᠠᠵᠠᠷ ᠨᠢ ᠤᠯᠠᠭᠠᠨ ᠲᠤᠭᠤᠯ᠃
ᠤᠯᠠᠭᠠᠨ ᠲᠤᠭᠤᠯ ᠨᠢ ᠥᠰᠦᠭᠡᠳ
ᠣᠯᠠᠨ ᠤ᠋ ᠲᠣᠭᠠᠨ ᠳ᠋ᠤ᠌ ᠬᠦᠷᠦᠭᠡᠳᠦᠢ᠃
ᠴᠣᠬᠢᠭᠰᠠᠨ ᠭᠠᠵᠠᠷ ᠨᠢ ᠴᠣᠬᠣᠷ ᠲᠤᠭᠤᠯ
ᠴᠣᠬᠣᠷ ᠲᠤᠭᠤᠯ ᠨᠢ ᠥᠰᠦᠭᠡᠳ
ᠮᠢᠩᠭᠠ ᠶ᠋ᠢᠨ ᠲᠣᠭᠠᠨ ᠳ᠋ᠤ᠌ ᠬᠦᠷᠦᠭᠡᠳᠦᠢ᠃
ᠠᠯᠠᠭᠰᠠᠨ ᠭᠠᠵᠠᠷ ᠨᠢ ᠠᠯᠠᠭ ᠲᠤᠭᠤᠯ
ᠠᠯᠠᠭ ᠲᠤᠭᠤᠯ ᠨᠢ ᠥᠰᠦᠭᠡᠳ
ᠠᠷᠪᠠᠨ ᠲᠦᠮᠡ ᠪᠣᠯᠲᠤᠭᠠᠢ᠃
ᠬᠦᠷᠡᠩ ᠵᠢᠰᠦ ᠲᠡᠢ ᠨᠢ
ᠬᠥᠨᠳᠡᠢ ᠳᠦᠭᠦᠷᠡᠩ ᠪᠡᠯᠴᠢᠭᠡᠷᠯᠡᠭᠡᠳ
ᠠᠯᠠᠭ ᠵᠢᠰᠦᠲᠡᠢ ᠨᠢ
ᠠᠷᠠᠯ ᠳᠦᠭᠦᠷᠡᠩ ᠰᠢᠷᠠ ᠪᠣᠯᠤᠭᠠᠳ
ᠠᠯᠲᠠ ᠠᠯᠲᠠ ᠡᠪᠡᠷ ᠲᠡᠢ ᠨᠢ
ᠠᠯᠲᠠᠢ ᠶ᠋ᠢᠨ ᠭᠣᠪᠢ ᠳᠦᠭᠦᠷᠦᠭᠡᠳ
ᠳᠡᠯᠢᠮ ᠳᠡᠯᠢᠮ ᠡᠪᠡᠷ ᠲᠡᠢ ᠨᠢ
ᠳᠡᠯᠡᠬᠡᠢ ᠳᠦᠭᠦᠷᠡᠩ ᠥᠰᠦᠭᠡᠳ
ᠨᠠᠭᠤᠷ ᠲᠤ᠌ ᠤᠰᠤᠯᠠᠪᠠᠯ ᠰᠢᠷᠭᠢᠭᠡᠭᠡᠳ
ᠨᠤᠭᠤ ᠳ᠋ᠤ᠌ ᠪᠡᠯᠴᠢᠭᠡᠪᠡᠯ ᠳᠦᠭᠦᠷᠭᠡᠭᠡᠳ
ᠬᠠᠷᠠᠵᠠ ᠳ᠋ᠤ᠌ ᠤᠰᠤᠯᠠᠪᠠᠯ ᠰᠢᠷᠭᠢᠭᠡᠭᠡᠳ
ᠬᠠᠩᠭᠠᠢ ᠭᠣᠪᠢ ᠶ᠋ᠢ ᠳᠦᠭᠦᠷᠭᠡᠭᠡᠳ
ᠲᠣᠭᠠᠯᠠᠭᠠᠳ ᠪᠠᠷᠠᠬᠤ ᠦᠭᠡᠢ
ᠲᠠᠭᠤᠭᠠᠳ ᠭᠦᠢᠴᠡᠬᠦ ᠦᠭᠡᠢ
ᠲᠣᠭᠠ ᠲᠣᠮᠰᠢ ᠦᠭᠡᠢ ᠪᠣᠯᠤᠭᠠᠳ
ᠬᠡᠨ ᠦ᠌ ᠬᠢ ᠪᠣᠢ? ᠭᠡᠪᠡᠯ
ᠲᠡᠭᠦᠨ ᠦ᠌ ᠬᠢ ᠭᠡᠵᠦ
ᠠᠯᠳᠠᠷᠰᠢᠬᠤ ᠪᠣᠯᠲᠤᠭᠠᠢ᠃