ᠮᠠᠩᠭᠠ ᠳ᠋ᠣᠣ ᠶ᠋ᠢᠨ ᠡᠴᠦᠰ ᠦᠨ ᠵᠡᠭᠦᠳᠦ - ᠪ ᠂ ᠷᠢᠨᠴᠢᠨ Мангадын эцсийн зүүд - Б ᠂ Ренчин
591ᠮᠠᠩᠭᠠ ᠳ᠋ᠣᠣ ᠶ᠋ᠢᠨ ᠡᠴᠦᠰ ᠦ᠋ᠨ ᠵᠡᠭᠦᠳᠦ
ᠪ᠂ ᠷᠢᠨᠴᠢᠨ
( ᠬᠣᠱᠣᠩ ᠥᠭᠦᠯᠡᠯᠭᠡ)
ᠥᠭᠦᠯᠡᠬᠦ ᠢᠨᠤ᠄ ᠤᠷᠢᠳᠤ ᠴᠠᠭ ᠤ᠋ᠨ ᠨᠣᠮ ᠤ᠋ᠨ ᠳᠠ ᠬᠦᠷᠢᠶᠡ᠂ ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡ᠂ ᠨᠡᠢᠰᠯᠡᠯ ᠬᠦᠷᠢᠶᠡ᠂ ᠳᠡ ᠬᠦᠷᠢᠶᠡ ᠪᠤᠶᠤ ᠲᠥᠪᠡᠳ ᠨᠣᠮ ᠰᠤᠳᠤᠷ ᠲᠤ ᠬᠦᠷᠢᠶᠡ ᠴᠸᠨᠮᠤ᠂ ᠡᠸᠦ᠋ᠷᠦᠫᠡ ᠵᠦᠭ ᠦ᠋ᠨ ᠭᠠᠵᠠᠷ ᠵᠦᠢ ᠶ᠋ᠢᠨ ᠪᠢᠴᠢᠭ ᠵᠢᠷᠤᠭ ᠲᠤ ᠤᠷᠭᠠ ᠭᠡᠳᠡᠭ ᠬᠣᠲᠠ᠂ ᠣᠳᠣ ᠪᠠᠢᠳᠠᠯ ᠮᠠᠰᠢ ᠥᠭᠡᠷᠡ᠂ ᠦᠨᠡᠬᠡᠷ ᠲᠠᠨᠢᠬᠤᠶᠠ ᠪᠡᠷᠬᠡ ᠪᠣᠯᠵᠠᠢ᠃
ᠬᠠᠭᠤᠴᠢᠴᠤᠤᠯ ᠤ᠋ᠨ ᠴᠡᠭᠡᠵᠢᠨ ᠳ᠋ᠦ᠍ ᠵᠡᠭᠦᠨ ᠬᠦᠷᠢᠶᠡᠨ ᠦ᠌ ᠭᠤᠴᠢᠨ ᠳ᠋ᠤ᠌ ᠠᠢᠮᠠᠭ ᠤ᠋ᠨ ᠨᠡᠷᠡ᠂ ᠨᠢᠭᠡᠳ ᠨᠢᠭᠡ ᠦᠭᠡᠢ ᠬᠠᠳᠠᠭᠠᠰᠤ ᠲᠠᠢ ᠪᠣᠯᠪᠠᠴᠤ ᠴᠣᠬᠣᠮ ᠬᠠᠮᠢᠭᠠ ᠬᠠᠮᠢᠭᠠ ᠪᠠᠢᠬᠰᠠᠨ ᠢ ᠲᠡᠷᠡ ᠲᠡᠷᠡ ᠭᠡᠮᠡᠨ ᠵᠢᠭᠠᠵᠤ ᠥᠭᠬᠦ ᠬᠥᠮᠦᠨ ᠡᠳᠦᠷ ᠦ᠋ᠨ ᠣᠳᠣᠨ ᠠ᠋ᠴᠠ ᠬᠣᠪᠣᠷ ᠪᠣᠢ᠃ ᠣᠳᠣ ᠶ᠋ᠢᠨ ᠤᠯᠠᠭᠠᠨᠪᠠᠭᠠᠲᠤᠷ ᠤ᠋ᠨ ᠰᠠᠢᠬᠠ ᠴᠠᠷᠳᠠᠭᠰᠠᠨ ᠭᠤᠳᠤᠮᠵᠢ ᠪᠠᠷ ᠶᠠᠪᠤᠬᠤ ᠳ᠋ᠠᠭᠠᠨ ᠡᠨᠳᠡ ᠤᠷᠢᠳᠤ ᠨᠢ ᠶᠠᠭᠤ ᠪᠠᠢᠯᠠ? ᠰᠢᠷᠠ ᠤᠷᠲᠤ ᠡᠨᠡ ᠬᠠᠪᠢ ᠳ᠋ᠤ᠌ ᠪᠠᠢᠯᠠ ᠤᠤ? ᠭᠡᠮᠡᠨ ᠳᠡᠮᠢ ᠯᠡ ᠭᠠᠢᠬᠠᠬᠤ ᠠ᠋ᠴᠠ ᠴᠤᠬᠤᠮᠯᠠᠨ ᠮᠡᠳᠡᠬᠦ ᠲᠠᠨᠢᠬᠤ ᠲᠡᠮᠳᠡᠭ ᠦᠭᠡᠢ ᠪᠣᠯᠵᠠᠢ᠃ ᠵᠡᠭᠦᠨ ᠵᠦᠭ᠂ ᠤᠷᠢᠳᠤ ᠴᠠᠭ ᠤ᠋ᠨ ᠬᠤᠭᠤᠷᠴᠢ ᠬᠥᠮᠦᠨ ᠦ᠌ ᠬᠤᠭᠤᠷᠳᠠᠨ ᠳᠠᠭᠤᠯᠠᠳᠠᠭ ᠢ᠋ᠶ᠋ᠠᠷ᠄
ᠮᠠᠨ ᠤ᠋ ᠬᠦᠷᠢᠶᠡᠨ ᠦ᠌ ᠵᠡᠭᠦᠨᠲᠡᠢ
ᠮᠠᠨᠵᠤ ᠶ᠋ᠢᠨ ᠬᠦᠷᠢᠶᠡᠨ ᠦ᠌ ᠪᠠᠷᠠᠭᠤᠨᠲᠠᠢ ᠪᠠᠢᠳᠠᠭ
ᠮᠠᠬᠤᠸᠠᠷ ᠲᠣᠯᠣᠭᠠᠢ ᠶ᠋ᠢᠨ ᠬᠠᠪᠢ ᠪᠠᠷ ᠴᠤ᠌ ᠭᠡᠰᠡᠨ ᠪᠠᠲᠤ ᠬᠦᠩ ᠭᠡᠵᠦ ᠠᠷᠤ ᠮᠣᠩᠭᠣᠯ ᠳ᠋ᠤ᠌ ᠠᠯᠳᠠᠷᠲᠠᠢ ᠭᠢᠨᠳᠠᠨ ᠤ᠋ ᠬᠥᠮᠦᠨ ᠳᠠᠪᠠᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠥᠨᠳᠥᠷ ᠱᠣᠪᠬᠣ ᠬᠠᠰᠢᠶᠠ ᠲᠠᠢ᠂ ᠲᠠᠯᠠ ᠨᠢ ᠭᠠᠵᠠᠷ ᠳᠣᠣᠷᠠ ᠠ᠋ᠴᠠ ᠴᠤᠬᠤᠢᠭᠰᠠᠨ ᠲᠠᠯᠠ ᠨᠢ ᠭᠠᠵᠠᠷ ᠤᠬᠤᠵᠤ ᠪᠠᠷᠢᠭᠰᠠᠨ᠂ ᠨᠠᠷᠠ ᠰᠠᠯᠬᠢ ᠣᠭᠲᠣ ᠣᠷᠣᠳᠠᠭ ᠦᠭᠡᠢ ᠮᠠᠰᠢ ᠦᠮᠡᠬᠡᠢ ᠴᠢᠭᠢᠭ ᠲᠡᠢ ᠰᠢᠪᠡᠷ ᠪᠠᠢᠰᠢᠩ ᠴᠣᠬᠣᠮ ᠬᠠᠮᠢᠭᠠ ᠪᠠᠢᠭᠰᠠᠨ ᠢ᠋ ᠴᠤ᠌ ᠮᠡᠳᠡᠬᠦ ᠶ᠋ᠢᠨ ᠠᠷᠭᠠ ᠦᠭᠡᠢ ᠪᠣᠯᠵᠤ ᠳᠠᠪᠬᠤᠷ ᠠᠰᠠᠷ ᠪᠠᠢᠰᠢᠩ ᠤ᠋ᠳ ᠬᠠᠨᠠᠷᠠᠨ ᠭᠤᠳᠤᠮᠵᠢᠯᠠᠵᠠᠢ᠃
ᠵᠢᠷᠭᠠᠯᠲᠠᠢ ᠡᠨᠡ ᠴᠠᠭ ᠤ᠋ᠨ ᠨᠠᠰᠤᠲᠠᠨ ᠥᠲᠡᠭᠦᠰ ᠵᠣᠪᠠᠯᠠᠩᠲᠠᠢ ᠲᠡᠷᠡ ᠪᠡᠷᠬᠡ ᠴᠠᠭ ᠤ᠋ᠨ ᠭᠠᠰᠠᠯᠠᠩ ᠢ᠋ ᠬᠡᠳᠦᠢᠨ ᠮᠠᠷᠲᠠᠵᠤ ᠠᠮᠪᠠᠰ ᠤ᠋ᠨ ᠶᠠᠮᠤᠨ ᠤ᠋ ᠪᠠᠲᠤ ᠬᠦᠩ ᠱᠠᠪᠢ ᠶᠠᠮᠤᠨ ᠤ᠋ ᠱᠣᠷᠣᠩ᠂ ᠴᠠᠭᠠᠵᠠ ᠪᠠᠷ ᠠᠪᠠᠴᠢᠳᠠᠭ ᠰᠢᠷᠠ ᠬᠠᠳᠠ ᠭᠡᠬᠦ ᠵᠡᠷᠭᠡ ᠶ᠋ᠢ ᠴᠥᠮ ᠮᠠᠷᠲᠠᠵᠠᠢ᠃ ᠲᠡᠷᠡ ᠪᠦᠭᠦᠳᠡ ᠶ᠋ᠢ ᠠᠨᠳᠠᠬᠤ ᠦᠭᠡᠢ᠂ ᠠᠨᠳᠠᠬᠤ ᠦᠭᠡᠢ ᠳ᠋ᠡᠭᠡᠨ ᠪᠠᠰᠠ ᠤᠴᠢᠷ ᠦᠭᠡᠢ ᠠᠨᠳᠠᠬᠤ ᠦᠭᠡᠢ ᠨᠢᠭᠡ ᠬᠥᠮᠦᠨ ᠪᠠᠢᠵᠠᠢ᠃ ᠮᠣᠭᠠᠢ ᠶ᠋ᠢᠨ ᠡᠷᠢᠶᠡᠨ ᠭᠠᠳᠠᠨᠠ ᠪᠠᠨ᠂ ᠬᠥᠮᠦᠨ ᠦ᠌ ᠡᠷᠢᠶᠡᠨ ᠳᠣᠲᠣᠷᠠ ᠪᠠᠨ ᠭᠡᠵᠦ ᠲᠡᠷᠡ ᠬᠥᠮᠦᠨ ᠦ᠌ ᠲᠡᠭᠡᠵᠦ ᠠᠨᠳᠠᠬᠤ ᠦᠭᠡᠢ ᠶ᠋ᠢ ᠬᠡᠨ ᠮᠡᠳᠡᠬᠦ ᠠᠵᠢ᠃
ᠣᠷᠣᠢ ᠴᠡᠩᠭᠡᠯᠲᠦ ᠶ᠋ᠢᠨ ᠬᠣᠷᠢᠶᠠᠨ ᠤ᠋ ᠨᠢᠭᠡ ᠳᠡᠯᠭᠡᠭᠦᠷ ᠦ᠋ᠨ ᠡᠭᠦᠳᠡᠨ ᠳ᠋ᠦ᠍ ᠡᠪᠦᠯ ᠴᠠᠭ ᠢᠮᠠᠭᠠᠨ ᠳᠠᠬᠤ ᠲᠠᠢ᠂ ᠵᠤᠨ ᠴᠠᠭ ᠲᠡᠭᠷᠢ ᠪᠦᠷᠬᠦᠭ ᠪᠣᠯ ᠲᠡᠷᠰᠡᠬᠡᠷ ᠶᠣᠷᠣᠭ ᠴᠤᠪᠠ ᠲᠠᠢ᠂ ᠨᠢᠭᠡ ᠮᠠᠨᠠᠭᠠᠴᠢ ᠥᠨᠵᠢᠭᠡᠳ ᠰᠠᠭᠤᠳᠠᠭ ᠪᠠᠢᠵᠠᠢ᠃ ᠭᠠᠭᠴᠠ ᠪᠡᠶᠡ ᠲᠡᠷᠡ ᠡᠪᠦᠭᠡᠨ ᠮᠠᠨᠠᠭᠠᠴᠢ ᠶ᠋ᠢ ᠲᠠᠨᠢᠵᠤ ᠮᠡᠳᠡᠬᠦ ᠬᠥᠮᠦᠨ ᠴᠤ᠌ ᠪᠠᠷᠤᠭ ᠦᠵᠡᠭᠳᠡᠬᠦ ᠦᠭᠡᠢ᠂ ᠡᠪᠦᠭᠡᠨ ᠬᠠᠯᠴᠠᠭᠠᠢ ᠯᠤᠤᠪᠤᠵᠠ᠂ ᠵᠤᠨ ᠣᠷᠣᠰ ᠶᠠᠩᠵᠤ ᠶ᠋ᠢᠨ ᠳᠡᠰ ᠭᠠᠩᠳᠠᠵᠤ ᠥᠩᠭᠡ ᠠᠯᠳᠠᠭᠰᠠᠨ ᠬᠠᠭᠤᠴᠢᠨ ᠮᠠᠯᠠᠭᠠᠢ ᠶ᠋ᠢᠨ ᠰᠠᠷᠠᠪᠴᠢ ᠪᠠᠷ ᠨᠢᠭᠤᠷ ᠢ᠋ᠶ᠋ᠠᠨ ᠬᠠᠮᠠᠷ ᠲᠠᠭᠠ ᠬᠦᠷᠲᠡᠯᠡ ᠳᠠᠯᠳᠠᠯᠠᠨ᠂ ᠦᠷᠭᠡᠯᠡᠭᠰᠡᠨ ᠦᠭᠡᠢ ᠬᠣᠶᠠᠷ ᠨᠢ ᠮᠡᠳᠡᠭᠳᠡᠬᠦ ᠦᠭᠡᠢ ᠰᠠᠭᠤᠳᠠᠭ ᠪᠢᠯᠡ᠃
ᠵᠦᠴᠦᠭᠡ ᠶ᠋ᠢᠨ ᠬᠦᠷᠢᠶᠡᠯᠡᠩ ᠳ᠋ᠦ᠍ ᠵᠦᠴᠦᠭᠡ ᠦᠵᠡᠭᠡᠳ ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠲᠠᠯᠠᠪᠠᠢ ᠪᠠᠷ ᠡᠷᠭᠢᠨ ᠲᠣᠭᠣᠷᠢᠵᠤ᠂ ᠳᠡᠯᠭᠡᠭᠦᠷ ᠦ᠋ᠨ ᠳᠡᠷᠭᠡᠳᠡᠭᠦᠷ ᠭᠠᠷᠬᠤ ᠳ᠋ᠠᠭᠠᠨ ᠦᠳᠡᠰᠢ ᠶ᠋ᠢᠨ ᠰᠥᠨᠢ ᠪᠡᠷ ᠬᠡᠯᠡᠯᠴᠡᠵᠦ ᠪᠠᠷᠠᠰᠢ ᠦᠭᠡᠢ ᠢᠨᠠᠭ ᠰᠡᠳᠭᠢᠯ ᠦ᠋ᠨ ᠦᠭᠡ ᠴᠡᠭᠡᠵᠢ ᠳᠦᠭᠦᠷᠡᠩ ᠵᠠᠯᠠᠭᠤ ᠬᠥᠮᠦᠰ ᠨᠢᠭᠡ ᠨᠢᠭᠡᠨ ᠦ᠌ ᠪᠡᠨ ᠲᠣᠬᠣᠢ ᠳᠥᠰᠢᠨ ᠰᠤᠭᠤᠳᠠᠵᠤ ᠮᠥᠷ ᠵᠡᠷᠭᠡᠴᠡᠨ ᠶᠠᠪᠤᠬᠤ ᠶ᠋ᠢᠨ ᠲᠠᠭᠠᠲᠠᠢ ᠳ᠋ᠤ᠌ ᠠᠪᠲᠠᠭᠳᠠᠨ ᠳᠡᠯᠭᠡᠭᠦᠷ ᠦ᠋ᠨ ᠡᠭᠦᠳᠡᠨ ᠲᠦᠰᠢᠶᠡ ᠴᠠᠬᠢᠯᠭᠠᠨ ᠭᠡᠷᠡᠯ ᠦ᠋ᠨ ᠲᠥᠭᠥᠷᠢᠭ ᠬᠦᠷᠢᠶᠡᠨ ᠦ᠌ ᠵᠠᠬᠠ ᠳ᠋ᠤ᠌ ᠵᠣᠭᠰᠣᠰᠬᠢᠨ ᠨᠠᠮ ᠳᠠᠭᠤ ᠪᠠᠷ ᠦᠭᠡ ᠬᠡᠯᠡᠯᠴᠡᠨ ᠵᠣᠭᠰᠣᠬᠤ ᠳᠤᠷᠠᠲᠠᠢ ᠪᠠᠢᠳᠠᠭ ᠪᠢᠯᠡ᠃ ᠡᠪᠦᠭᠡᠨ ᠮᠠᠨᠠᠭᠠᠴᠢ ᠬᠤᠯᠠᠭᠠᠢ ᠳᠡᠭᠡᠷᠡᠮ ᠦ᠋ᠨ ᠬᠥᠮᠦᠨ ᠪᠤᠰᠤ ᠠᠮᠠᠷᠠᠭ ᠰᠡᠳᠬᠢᠯᠲᠦ ᠵᠠᠯᠠᠭᠤᠰ ᠭᠡᠵᠦ ᠮᠡᠳᠡᠪᠡᠴᠦ ᠲᠤᠭᠤᠷᠭᠠ ᠳ᠋ᠤ᠌ ᠲᠦᠰᠢᠭᠦᠯᠦᠭᠰᠡᠨ ᠪᠠᠨᠲᠠᠩ ᠤ᠋ᠨ ᠢ᠋ᠶ᠋ᠠᠨ ᠲᠡᠨᠳᠡ ᠡᠴᠡ ᠰᠥᠭᠡᠩᠭᠢ ᠬᠣᠭᠣᠯᠠᠢ ᠪᠠᠷ ᠬᠠᠰᠬᠢᠷᠳᠠᠭ ᠪᠠᠢᠵᠤ ᠪᠢᠯᠡ᠃
— ᠶᠠᠭᠤᠨ ᠤ᠋ ᠬᠥᠮᠦᠨ ᠪᠣᠢ? ᠪᠢᠲᠡᠭᠡᠢ ᠲᠡᠨᠳᠡ ᠵᠣᠭᠰᠣ᠂ ᠫᠤᠤᠳᠠᠯᠠ ᠭᠡᠵᠦ ᠭᠡᠨᠡᠳᠲᠡ ᠶᠢᠷᠲᠢᠨᠴᠦ ᠳ᠋ᠦ᠍ ᠬᠣᠶᠠᠷ ᠪᠠᠶᠠᠨ ᠠ᠋ᠴᠠ ᠪᠠᠨ ᠥᠭᠡᠷᠡ ᠶᠠᠭᠤᠮᠠ ᠪᠠᠢᠬᠤ ᠦᠭᠡᠢ ᠮᠡᠲᠦ ᠦᠳᠡᠰᠢ ᠶ᠋ᠢᠨ ᠬᠠᠷᠠᠩᠭᠤᠢ ᠳ᠋ᠤ᠌ ᠬᠠᠭᠠᠴᠠᠨ ᠰᠠᠯᠬᠤ ᠶ᠋ᠢ ᠦᠯᠦ ᠲᠦᠪᠳᠡᠨ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠬᠣᠶᠠᠷ ᠵᠠᠯᠠᠭᠤ ᠬᠥᠮᠦᠨ ᠦ᠌ ᠰᠣᠴᠢᠨ ᠡᠮᠢᠶᠡᠵᠦ ᠶᠠᠭᠠᠷᠠᠨ ᠵᠠᠢᠯᠠᠬᠤ ᠳ᠋ᠤ᠌ ᠮᠠᠨᠠᠭᠠᠴᠢ ᠲᠠᠪᠠ ᠨᠢ ᠬᠠᠨᠵᠤ᠂ ᠮᠡᠩᠭᠡᠷ ᠳᠦᠭᠦᠷᠦᠭᠰᠡᠨ ᠠᠭᠤᠰᠬᠢ ᠪᠡᠨ ᠬᠡᠷᠴᠢᠭᠡᠨᠡᠭᠦᠯᠥᠨ᠄
— ᠬᠡ ᠬᠡ ᠬᠡ! ᠭᠡᠵᠦ ᠬᠦᠢᠲᠡᠨ ᠢ᠋ᠶ᠋ᠡᠷ ᠢᠨᠢᠶᠡᠬᠦ ᠨᠢ ᠰᠢᠷᠠ ᠰᠢᠪᠠᠭᠤᠨ ᠤ᠋ ᠢᠨᠢᠶᠡᠬᠦ ᠠᠳᠠᠯᠢ ᠮᠠᠭᠤᠬᠠᠢ ᠪᠥᠭᠡᠳ ᠢᠨᠢᠶᠡᠭᠰᠡᠭᠡᠷ ᠬᠠᠨᠢᠶᠠᠵᠤ ᠴᠠᠷ ᠮᠡᠩᠭᠡᠷ ᠲᠡᠭᠡᠨ ᠬᠠᠬᠠᠵᠤ ᠴᠡᠴᠡᠨ᠂ ᠨᠤᠯᠮᠤᠵᠤ ᠨᠤᠯᠮᠤᠵᠤ᠂ ᠬᠠᠨᠢᠶᠠᠵᠤ᠂ ᠨᠠᠰᠤᠨ ᠤ᠋ ᠵᠠᠯᠠᠭᠤ ᠠ᠋ᠴᠠ ᠣᠳᠣ ᠬᠦᠷᠲᠡᠯᠡ ᠭᠤᠲᠤᠯ ᠤ᠋ᠨ ᠲᠦᠷᠡᠢᠨ ᠡᠴᠡ ᠬᠣᠯᠠᠳᠠᠭᠤᠯᠤᠨ ᠰᠠᠯᠭᠠᠳᠠᠭ ᠦᠭᠡᠢ ᠠᠭᠠᠳ ᠵᠢᠷ ᠦ᠋ᠨ ᠬᠥᠮᠦᠨ ᠦ᠌ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠮᠠ ᠦᠭᠡᠢ ᠶᠠᠭᠤᠮᠠ ᠦᠵᠡᠭᠰᠡᠨ ᠭᠠᠩᠰᠠ ᠪᠠᠨ ᠰᠢᠭᠦᠷᠡᠵᠦ ᠭᠠᠯᠵᠠᠭᠤ ᠤᠯᠠᠭᠠᠨ ᠲᠠᠮᠠᠬᠢ ᠪᠠᠨ ᠨᠡᠷᠡᠭᠡᠳ᠂ ᠫᠤᠤ ᠪᠠᠨ ᠲᠡᠪᠡᠷᠢᠨ᠂ ᠤᠲᠤᠭᠠ ᠰᠠᠪᠰᠠᠭᠤᠯᠵᠤ᠂ ᠰᠤᠷᠮᠠᠭᠠᠢ ᠬᠣᠣᠷ ᠲᠤᠨᠢ ᠬᠠᠨᠢᠶᠠᠳᠤ ᠳᠠᠷᠤᠭᠳᠠᠵᠤ᠂ ᠡᠪᠦᠷ ᠡᠴᠡ ᠪᠡᠨ ᠲᠠᠮᠠᠬᠢᠨ ᠤ᠋ ᠬᠥᠭᠡᠷᠭᠡ ᠰᠢᠭ ᠬᠠᠪᠴᠢᠭ ᠶᠠᠭᠤᠮᠠ ᠭᠠᠷᠭᠠᠭᠠᠳ᠂ ᠭᠣᠳ ᠬᠢᠲᠡᠯᠡ ᠣᠴᠢᠭᠠᠳ ᠮᠣᠳᠣᠨ ᠪᠠᠨᠲᠠᠩ ᠳᠡᠭᠡᠷᠡ ᠪᠡᠨ ᠲᠣᠬᠢᠲᠠᠢᠬᠠᠨ ᠰᠠᠭᠤᠵᠤ ᠦᠦᠷ ᠦ᠋ᠨ ᠰᠦᠨᠢ ᠪᠡᠷ ᠦᠷᠭᠡᠯᠡᠩᠭᠡᠨ ᠤᠨᠲᠠᠳᠠᠭ ᠪᠢᠯᠡ᠃
ᠥᠷᠯᠥᠭᠡ ᠭᠡᠷ ᠲᠡᠭᠡᠨ ᠬᠠᠷᠢᠭᠠᠳ ᠠᠮᠠᠨ ᠳ᠋ᠠᠭᠠᠨ ᠤᠰᠤ ᠪᠠᠯᠭᠤᠵᠤ ᠰᠠᠪᠤᠩ ᠬᠡᠷᠡᠭᠯᠡᠯ ᠦᠭᠡᠢ᠂ ᠨᠢᠭᠡ ᠪᠠᠯᠭᠤ ᠤᠰᠤ ᠪᠠᠷ ᠨᠢᠭᠤᠷ ᠢ᠋ᠶ᠋ᠠᠨ ᠤᠬᠢᠶᠠᠴᠢᠬᠠᠨ ᠰᠢᠭ᠋ ᠪᠣᠯᠵᠤ ᠲᠤᠭᠤᠭᠠ ᠶ᠋ᠢᠨ ᠪᠠᠷᠢᠭᠤᠯ ᠰᠢᠭ᠋ ᠬᠠᠷᠠ ᠠᠯᠴᠢᠭᠤᠷ ᠢ᠋ᠶ᠋ᠠᠷ ᠬᠠᠢᠰᠢ ᠬᠡᠷᠡᠭ ᠠᠷᠴᠢᠬᠤᠢᠴᠠᠨ ᠪᠣᠯᠳᠠᠭ ᠲᠡᠷᠡ ᠡᠪᠦᠭᠡᠨ ᠦ᠌ ᠭᠠᠷ ᠢ᠋ ᠨᠢ ᠬᠠᠷᠠᠪᠠᠯ᠂ ᠣᠯᠠᠨ ᠵᠢᠯ ᠦ᠋ᠨ ᠬᠬᠢᠷ ᠲᠣᠭᠣᠰᠣ᠂ ᠰᠢᠷᠠ ᠦᠰᠦᠨ ᠦ᠌ ᠰᠦᠪᠡ ᠪᠦᠬᠦᠨ ᠳ᠋ᠦ᠍ ᠰᠢᠭᠡᠳᠥᠭᠡᠳ᠂ ᠨᠢᠭᠤᠷ ᠤ᠋ᠨ ᠠᠷᠠᠰᠤ ᠲᠦᠮᠡᠨ ᠵᠡᠭᠦᠦ ᠰᠢᠪᠡᠭᠰᠡᠨ ᠠᠳᠠᠯᠢ᠂ ᠬᠥᠮᠦᠰᠬᠡᠨ ᠳᠣᠣᠷᠠ ᠪᠠᠨ ᠲᠥᠪᠥᠭᠡᠷ ᠶᠠᠰᠤ ᠲᠠᠢ ᠢᠪᠴᠤᠤ ᠮᠠᠩᠨᠠᠢ ᠶ᠋ᠢᠨ ᠦᠷᠴᠢᠯᠡᠭᠡ ᠨᠢ ᠵᠢᠷᠤᠭᠠᠴᠢ ᠬᠥᠮᠦᠨ ᠪᠢᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠵᠢᠷᠤᠭᠰᠠᠨ ᠰᠢᠭ᠋ ᠬᠬᠢᠷ ᠲᠣᠭᠣᠰᠣ ᠲᠣᠳᠣᠷᠠᠨ ᠵᠤᠷᠠᠢᠵᠤ ᠨᠠᠰᠤ ᠨᠡᠯᠢᠶᠡᠳ ᠳᠡᠭᠡᠷᠡ ᠭᠠᠷᠪᠠᠴᠤ ᠣᠪᠣᠷ ᠨᠢ ᠪᠦᠷ ᠴᠤ᠌ ᠶᠡᠬᠡ᠂ ᠬᠠᠮᠠᠷ ᠤ᠋ᠨ ᠦᠵᠦᠭᠦᠷ ᠤᠯᠠᠭᠠᠨ᠂ ᠵᠤᠯᠠᠢ ᠬᠣᠵᠢᠭᠢᠷ᠂ ᠨᠢᠭᠤᠷ ᠦᠷᠴᠢᠬᠡᠷ᠂ ᠥᠩᠭᠡ ᠳᠡᠷᠡᠰᠦᠨ ᠦ᠌ ᠰᠢᠨᠤᠯ ᠳ᠋ᠤ᠌ ᠡᠯᠡᠭᠳᠡᠭᠰᠡᠨ ᠰᠢᠨᠵᠢ ᠪᠦᠷᠢᠨ ᠲᠡᠭᠦᠰ᠃
ᠵᠠᠯᠠᠭᠤ ᠳ᠋ᠠᠭᠠᠨ ᠨᠡᠯᠢᠶᠡᠳ ᠴᠤ᠌ ᠱᠤᠤᠭᠢᠭᠤᠯᠵᠤ᠂ ᠱᠠᠪᠢ ᠶ᠋ᠢᠨ ᠨᠡᠷᠡ ᠲᠡᠢ ᠪᠢᠴᠢᠭᠡᠴᠢ ᠪᠠᠢᠭᠠᠳ᠂ ᠮᠠᠩᠭᠠ ᠬᠣᠴᠢ ᠲᠠᠢ ᠬᠠᠷᠭᠢᠰ ᠲᠦᠰᠢᠮᠡᠯ ᠶᠠᠪᠤᠭᠰᠠᠨ ᠢ᠋ ᠨᠢ ᠣᠳᠣ ᠦᠵᠡᠭᠡᠳ ᠬᠡᠨ ᠲᠠᠨᠢᠬᠤ ᠪᠢᠯᠡ? ᠨᠠᠢᠮᠠᠭᠠ ᠬᠣᠲᠠ ᠳ᠋ᠤ᠌ ᠨᠠᠷᠭᠢᠵᠤ ᠶᠠᠪᠤᠭᠰᠠ ᠬᠤᠬᠡᠨ ᠦ᠌ ᠨᠢᠭᠡ ᠵᠠᠷᠢᠮ ᠨᠢ ᠠᠯᠢ ᠬᠡᠳᠦᠢᠨ ᠳᠠᠯᠠᠨ ᠳᠠᠪᠬᠤᠷ ᠲᠤ ᠭᠠᠷᠴᠤ᠂ ᠦᠯᠡᠳᠡᠭᠰᠡᠨ ᠭᠠᠭᠴᠠ ᠨᠢᠭᠡ ᠨᠢ ᠵᠠᠯᠠᠭᠤ ᠳ᠋ᠠᠭᠠᠨ ᠰᠠᠯᠬᠢ ᠰᠠᠷᠠ᠂ ᠡᠭᠦᠯᠡ ᠪᠤᠷᠤᠭᠠᠨ ᠤ ᠶᠠᠪᠤᠳᠠᠯ ᠬᠢᠵᠦ ᠶᠠᠪᠤᠭᠰᠠᠨ ᠭᠠᠩᠭᠠᠩ ᠲᠦᠰᠢᠮᠡᠯ ᠢ᠋ ᠣᠳᠣ ᠡᠨᠡ ᠳᠡᠯᠭᠡᠭᠦᠷ ᠦ᠋ᠨ ᠮᠠᠨᠠᠭᠠᠴᠢ ᠪᠣᠯᠤᠭᠠᠳ ᠬᠤᠬᠡᠨ ᠲᠡᠪᠡᠷᠢᠳᠡᠭ ᠴᠠᠭ ᠨᠢ ᠬᠡᠳᠦᠢᠨ ᠦᠩᠭᠡᠷᠡᠵᠤ ᠭᠤᠴᠢᠨ ᠵᠢᠯ ᠳᠤᠤᠭᠠᠷᠤᠭᠠ ᠦᠭᠡᠢ ᠬᠠᠭᠤᠴᠢᠨ ᠪᠢᠷᠳᠠᠩ ᠫᠤᠤ ᠲᠡᠪᠡᠷᠢᠨ ᠳᠡᠯᠭᠡᠭᠦᠷ ᠦ᠋ᠨ ᠡᠭᠦᠳᠡᠨ ᠳ᠋ᠦ᠍ ᠦᠷᠭᠡᠯᠡᠨ ᠬᠣᠨᠣᠳᠠᠭ ᠢ᠋ ᠶᠠᠭᠠᠬᠢᠨ ᠮᠡᠳᠡᠬᠦ ᠠᠵᠢ᠃
ᠡᠳᠦᠷ ᠭᠤᠳᠤᠮᠵᠢᠨ ᠳ᠋ᠤ᠌ ᠬᠦᠷᠢᠶᠡ ᠨᠠᠢᠮᠠᠭᠠ ᠬᠣᠲᠠ ᠶ᠋ᠢᠨ ᠭᠠᠭᠴᠠ ᠨᠢᠭᠡ ᠴᠢᠪᠠᠭᠠᠨᠴᠠ ᠲᠠᠭᠠᠷᠠᠯᠳᠤᠭᠰᠠᠨ ᠴᠤ᠌ ᠬᠣᠷᠢᠭᠠᠳ ᠨᠠᠰᠤᠨ ᠳ᠋ᠠᠭᠠᠨ ᠬᠣᠷᠸᠠ ᠶ᠋ᠢᠨ ᠵᠢᠷᠭᠠᠯ ᠡᠳ᠋ᠯᠡᠵᠦ ᠶᠠᠪᠤᠭᠰᠠᠨ ᠬᠥᠮᠦᠨ ᠮᠢᠨᠢ ᠭᠡᠵᠦ ᠲᠡᠷᠡ ᠬᠤᠷᠴᠢᠭᠠᠷ ᠡᠪᠦᠭᠡᠨ ᠢ᠋ ᠴᠦ᠍ ᠲᠠᠨᠢᠬᠤ ᠦᠭᠡᠢ᠂ ᠲᠠᠨᠢᠯᠠ ᠴᠤ᠌ ᠭᠡᠰᠡᠨ ᠰᠡᠳᠬᠢᠯ ᠦ᠋ᠨ ᠭᠠᠯ ᠤᠨᠲᠠᠷᠠᠵᠤ᠂ ᠣᠷᠣᠬᠤ ᠭᠠᠷᠬᠤ ᠳᠤᠷᠠᠰᠬᠠᠯ ᠤ᠋ᠨ ᠬᠦᠢᠲᠡᠨ ᠬᠥᠬᠡ ᠦᠨᠡᠰᠦ ᠪᠣᠯᠤᠭᠰᠠᠨ ᠲᠤᠯᠠ ᠠᠯᠢ ᠯᠠ ᠵᠠᠯᠠᠭᠤ ᠳ᠋ᠠᠭᠠᠨ ᠲᠠᠭᠠᠷᠠᠯᠳᠤᠵᠤ ᠶᠠᠪᠤᠭᠰᠠᠨ ᠶᠠᠭᠤᠮᠠ ᠲᠠᠢ᠂ ᠥᠲᠡᠯᠵᠦ ᠴᠢᠪᠠᠭᠠᠨᠴᠠ ᠪᠣᠯᠤᠭᠰᠠᠨ ᠬᠣᠢᠨᠠ ᠪᠠᠨ ᠭᠤᠳᠤᠮᠵᠢᠨ ᠳ᠋ᠤ᠌ ᠰᠢᠲᠦ ᠦᠭᠡᠢ ᠠᠮᠠ ᠪᠠᠨ ᠠᠩᠭᠠᠯᠵᠠᠵᠤ ᠶᠠᠪᠤᠬᠤ ᠪᠣᠢ ᠭᠡᠵᠦ ᠲᠠᠨᠢᠭᠰᠠᠨ ᠴᠤ᠌ ᠦᠭᠡ ᠳᠠᠭᠤ ᠦᠭᠡᠢ᠂ ᠭᠠᠭᠴᠠ ᠬᠦ᠌ ᠳᠣᠲᠣᠷᠠ ᠪᠠᠨ ᠪᠣᠳᠣᠬᠤ ᠳ᠋ᠠᠭᠠᠨ ᠡᠨᠡ ᠬᠥᠭᠡᠷᠦᠬᠦᠢ ᠡᠢᠮᠦ ᠪᠣᠯᠤᠭᠠᠳ ᠶᠠᠪᠤᠬᠤ ᠶ᠋ᠢ ᠦᠵᠡᠬᠦ ᠳ᠋ᠦ᠍ ᠪᠢ ᠴᠤ᠌ ᠪᠠᠰᠠ ᠬᠥᠮᠦᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠶᠠᠭᠤᠨ ᠥᠭᠡᠳᠡ ᠲᠡᠢ ᠶᠠᠭᠤᠮᠠ ᠦᠵᠡᠭᠳᠡᠬᠦ ᠠᠵᠢ ᠭᠡᠵᠦ ᠪᠣᠳᠣᠨ ᠥᠩᠭᠡᠷᠡᠬᠦ ᠪᠢᠯᠡ᠃
ᠮᠠᠨᠠᠭᠠᠴᠢ ᠡᠪᠦᠭᠡᠨ᠂ ᠣᠷᠣᠢ ᠮᠠᠨᠠᠭᠠᠨ ᠳ᠋ᠤ᠌ ᠭᠠᠷᠬᠤ ᠪᠦᠷᠢ ᠦᠨᠦᠷ ᠲᠡᠢ ᠤᠰᠤᠨ ᠤ᠋ ᠨᠢᠭᠡ ᠪᠢᠴᠢᠬᠠᠨ ᠬᠠᠪᠲᠠᠭᠠᠢ ᠳᠤᠭᠤᠢ ᠰᠢᠯ ᠳ᠋ᠦ᠍ ᠠᠷᠢᠬᠢ ᠬᠢᠵᠦ ᠡᠪᠦᠷᠲᠦᠯᠡᠭᠡᠳ ᠡᠪᠦᠯ ᠪᠣᠯ ᠳᠠᠬᠤ᠂ ᠵᠤᠨ ᠪᠣᠯ ᠴᠤᠪᠠ ᠪᠠᠨ ᠬᠡᠳᠦᠷᠡᠭᠡᠳ ᠮᠠᠭᠤ ᠪᠢᠷᠳᠠᠩ ᠫᠤᠤ ᠪᠠᠨ ᠪᠠᠷᠢᠨ ᠳᠡᠯᠭᠡᠭᠦᠷ ᠦ᠋ᠨ ᠡᠭᠦᠳᠡᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠪᠠᠢᠳᠠᠭ ᠮᠣᠳᠣᠨ ᠪᠠᠨᠲᠠᠩ ᠳᠡᠭᠡᠷᠡ ᠰᠠᠭᠤᠭᠠᠳ ᠬᠥᠮᠦᠨ ᠠᠮᠢᠲᠠᠨ ᠤ᠋ ᠬᠥᠯ ᠴᠥᠭᠡᠨ ᠪᠣᠯᠤᠭᠰᠠᠨ ᠬᠣᠢᠨᠠ ᠡᠪᠦᠷ ᠡᠴᠡ ᠪᠡᠨ ᠲᠡᠷᠡ ᠰᠢᠯ ᠲᠡᠢ ᠠᠷᠢᠬᠢ ᠪᠠᠨ ᠭᠠᠷᠭᠠᠵᠤ ᠤᠤᠭᠤᠴᠢᠬᠠᠭᠠᠳ ᠪᠦᠷ ᠰᠠᠨᠠᠭᠠ ᠠᠮᠠᠷ ᠦᠷᠭᠡᠯᠡᠩᠭᠡᠨ ᠤᠨᠲᠠᠳᠠᠭ ᠪᠠᠢᠯᠠ᠃ ᠲᠡᠷᠡ ᠣᠷᠣᠢ ᠲᠡᠭᠷᠢ ᠪᠠᠬᠠᠨ ᠪᠦᠷᠬᠦᠭ ᠲᠡᠩᠬᠡᠭᠡ ᠠᠯᠳᠠᠷᠠᠭᠰᠠᠨ ᠰᠢᠨᠵᠢ ᠲᠡᠢ ᠲᠤᠯᠠ ᠭᠡᠷ ᠡᠴᠡ ᠭᠠᠷᠬᠤ ᠶ᠋ᠢᠨ ᠡᠮᠦᠨᠡ ᠳᠤᠮᠳᠠᠭᠤᠷ ᠠᠶᠠᠭᠠ ᠠᠷᠢᠬᠢ ᠪᠠᠯᠭᠤᠭᠠᠳ ᠳᠡᠯᠭᠡᠭᠦᠷ ᠦ᠋ᠨ ᠡᠭᠦᠳᠡᠨ ᠳ᠋ᠦ᠍ ᠬᠦᠷᠴᠦ ᠢᠷᠡᠨ ᠣᠯᠠᠨ ᠵᠢᠯ ᠡᠯᠡᠭᠳᠡᠲᠡᠯᠡ ᠰᠠᠭᠤᠭᠰᠠᠨ ᠲᠦᠰᠢᠯᠭᠡᠲᠦ ᠪᠠᠨᠲᠠᠩ ᠳᠡᠭᠡᠷᠡ ᠪᠡᠨ ᠰᠠᠭᠤᠭᠠᠳ᠂ ᠪᠡᠶᠡ ᠪᠠᠵᠠᠭᠠᠬᠤ ᠦᠭᠡᠢ᠂ ᠭᠠᠷ ᠬᠥᠯ ᠴᠢᠮᠦᠭᠡᠨ ᠳᠣᠲᠣᠷᠠ ᠲᠤᠭᠤᠯᠭᠠ ᠴᠢᠳᠬᠤᠭᠰᠠᠨ ᠠᠳᠠᠯᠢ ᠡᠷᠭᠦᠵᠦ ᠳᠠᠭᠠᠭᠠᠭᠳᠠᠬᠤ ᠦᠭᠡᠢ ᠪᠢᠷᠳᠠᠩ ᠫᠤᠤ ᠴᠤ᠌ ᠦᠬᠡᠷ ᠫᠤᠤ ᠰᠢᠭ᠋ ᠬᠦᠨᠳᠦ ᠪᠣᠯᠤᠭᠰᠠᠨ ᠮᠡᠲᠦ ᠵᠢᠷᠦᠬᠡ ᠪᠠᠰᠠ ᠨᠢᠭᠡ ᠬᠠᠴᠢᠨ ᠳᠡᠯᠡᠰᠦᠭᠡᠳ ᠪᠠᠢᠬᠤ ᠰᠢᠭ᠋᠂ ᠢᠩᠭᠢᠭᠡᠳ ᠯᠡ ᠦᠬᠦᠳᠡᠭ ᠴᠠᠭ ᠢᠷᠡᠬᠦ ᠨᠢ ᠡᠨᠡ ᠤᠤ ? ᠭᠡᠵᠦ ᠪᠣᠳᠣᠭᠠᠳ ᠮᠠᠭᠤ ᠬᠠᠷᠠ ᠣᠪᠣᠬᠠᠢ ᠳ᠋ᠠᠭᠠᠨ ᠳᠠᠪᠬᠤᠷ ᠰᠢᠷᠠ ᠢᠰᠡᠭᠡᠢ ᠭᠤᠲᠤᠰᠤᠨ ᠳ᠋ᠤ᠌ ᠨᠢᠭᠡ ᠲᠦᠮᠡᠨ ᠲᠥᠭᠥᠷᠢᠭ ᠬᠠᠪᠴᠢᠭᠤᠯᠤᠭᠠᠰᠤᠲᠠᠢ ᠶ᠋ᠢ ᠰᠠᠨᠠᠭᠠᠳ ᠡᠨᠡ ᠰᠥᠨᠢ ᠢᠩᠭᠢᠭᠡᠳ ᠦᠬᠦᠪᠡᠯ ᠲᠡᠷᠡ ᠮᠥᠩᠭᠥ ᠶᠣᠰᠣᠲᠠᠢ ᠬᠠᠷᠠ ᠨᠣᠬᠠᠢ ᠶ᠋ᠢᠨ ᠢᠳᠡᠰᠢ ᠪᠣᠯᠤᠨᠠ ᠳᠠ ᠡᠬᠡᠨᠡᠷ ᠬᠡᠦᠬᠡᠳ ᠦᠭᠡᠢ ᠪᠣᠯᠤᠭᠰᠠᠨ᠂ ᠨᠥᠬᠥᠷ ᠬᠠᠨᠢ ᠦᠭᠡᠢ ᠪᠣᠯᠤᠭᠰᠠᠨ᠂ ᠤᠷᠤᠭ ᠡᠯᠢᠭᠡ ᠦᠭᠡᠢ ᠪᠣᠯᠤᠭᠰᠠᠨ ᠭᠤᠨᠢ ᠪᠡᠶᠡ ᠲᠣᠯᠣᠭᠠᠢ ᠪᠢ ᠡᠪᠡᠰᠦᠨ ᠳᠡᠭᠡᠷᠡ ᠬᠡᠪᠲᠡᠭᠰᠡᠨ ᠨᠣᠬᠠᠢ ᠰᠢᠭ᠋ ᠮᠥᠩᠭᠥᠨ ᠳᠡᠭᠡᠷᠡ ᠪᠡᠨ ᠨᠢᠭᠡ ᠰᠥᠨᠢ ᠬᠡᠪᠲᠡᠵᠦ ᠬᠣᠨᠣᠭᠠᠳ ᠡᠨᠡ ᠳᠡᠯᠭᠡᠭᠦᠷ ᠦ᠋ᠨ ᠬᠠᠭᠠᠯᠭᠠᠨ ᠳ᠋ᠤ᠌ ᠵᠢᠪᠡᠷᠬᠡᠢ ᠪᠢᠷᠳᠠᠩ ᠢ᠋ᠶ᠋ᠠᠨ ᠲᠡᠪᠡᠷᠢᠭᠡᠳ ᠦᠬᠦᠬᠦ ᠡᠭᠡᠯᠵᠢ ᠲᠠᠭᠠᠷᠠᠬᠤ ᠨᠢ ᠠ᠋ ᠭᠡᠵᠦ ᠭᠣᠨᠢᠷᠬᠠᠨ ᠪᠣᠳᠣᠭᠠᠳ ᠭᠤᠳᠤᠮᠵᠢᠨ ᠳ᠋ᠤ᠌ ᠠᠮᠢᠲᠠᠨ ᠬᠥᠯ ᠴᠢᠮᠡᠭᠡ ᠦᠭᠡᠢ ᠨᠠᠮ ᠭᠦᠮ ᠪᠣᠯᠤᠭᠰᠠᠨ ᠳ᠋ᠤ᠌ ᠡᠪᠦᠷ ᠡᠴᠡ ᠪᠡᠨ ᠥᠨᠥᠬᠢ ᠬᠠᠪᠲᠠᠭᠠᠢ ᠬᠥᠭᠡᠷᠭᠡ ᠰᠢᠭ ᠰᠢᠯ ᠲᠡᠢ ᠠᠷᠢᠬᠢ ᠪᠠᠨ ᠭᠠᠷᠭᠠᠵᠤ ᠬᠡᠳᠦ ᠣᠭᠣᠴᠢᠵᠤ᠂ ᠦᠯᠡᠳᠡᠭᠰᠡᠨ ᠳᠤᠰᠤᠯ ᠢ᠋ ᠨᠢ ᠰᠢᠮᠡᠵᠦ ᠳᠣᠯᠢᠶᠠᠭᠠᠳ᠂ ᠰᠢᠯ ᠢ᠋ᠶ᠋ᠡᠨ ᠡᠪᠦᠷᠲᠦᠯᠡᠵᠦ ᠬᠣᠳᠣᠭᠣᠳᠣ ᠬᠠᠯᠠᠭᠤ ᠣᠷᠬᠢᠨ ᠪᠡᠶᠡ ᠴᠦ᠍ ᠠᠶᠠᠲᠠᠢᠬᠠᠨ ᠪᠣᠯᠤᠭᠰᠠᠨ ᠮᠡᠲᠦ ᠰᠠᠨᠠᠭᠳᠠᠵᠤ ᠪᠢᠷᠳᠠᠩ ᠫᠤᠤ ᠪᠠᠨ ᠬᠠᠵᠠᠭᠤ ᠳ᠋ᠠᠭᠠᠨ ᠲᠦᠰᠢᠭᠦᠯᠦᠨ ᠳᠠᠬᠤ ᠪᠠᠨ ᠠᠶᠠᠲᠠᠢᠬᠠᠨ ᠨᠥᠮᠥᠷᠦᠭᠡᠳ ᠪᠠᠨᠲᠠᠩ ᠳᠡᠭᠡᠷᠡ ᠡᠪᠲᠡᠢᠬᠡᠨ ᠰᠠᠭᠤᠵᠤ ᠨᠢᠭᠡ ᠮᠡᠳᠡᠬᠦᠨᠡ ᠦᠷᠭᠡᠯᠡᠨ ᠵᠡᠭᠦᠳᠦᠯᠡᠵᠡᠢ᠃
ᠵᠡᠭᠦᠳᠦᠨ ᠳ᠋ᠡᠭᠡᠨ ᠭᠤᠲᠤᠮ ᠢ᠋ᠶ᠋ᠠᠷ ᠤᠷᠤᠭᠰᠢ ᠪᠠᠨ ᠬᠠᠷᠠᠪᠠᠰᠤ ᠨᠢᠭᠡ ᠣᠯᠠᠨ ᠶᠠᠭᠤᠮᠠ ᠬᠠᠷᠠᠯᠠᠨ ᠬᠣᠢᠰᠢ ᠪᠠᠨ ᠳᠠᠯᠠᠨ ᠳᠠᠪᠬᠤᠷ ᠤ᠋ᠨ ᠡᠩᠭᠡᠷ ᠲᠡᠢᠰᠢ ᠴᠤᠪᠤᠵᠤ ᠶᠠᠪᠤᠨᠠ᠃ ᠣᠯᠠᠨ ᠠᠮᠢᠲᠠᠨ ᠤ᠋ ᠬᠥᠯ ᠦ᠋ᠨ ᠴᠢᠮᠡᠭᠡ ᠭᠠᠪᠠ ᠭᠢᠨᠵᠢ ᠶ᠋ᠢᠨ ᠬᠠᠩᠭᠢᠷ ᠵᠢᠩᠭᠢᠷ ᠳᠤᠤᠭᠠᠷᠬᠤ ᠴᠢᠮᠡᠭᠡ ᠴᠦ᠍ ᠭᠠᠷᠴᠤ ᠪᠠᠢᠬᠤ ᠰᠢᠭ᠋ ᠃
—ᠡᠨᠡ ᠶᠠᠭᠤᠨ ᠵᠢᠭᠰᠠᠭᠠᠯ ᠬᠠᠷᠠᠩᠭᠤᠢ ᠰᠥᠨᠢ ᠴᠤᠪᠤᠳᠠᠭ ᠪᠢᠯᠡ ᠭᠡᠵᠦ ᠨᠢᠳᠦ ᠪᠡᠨ ᠠᠷᠴᠢᠨ ᠬᠠᠷᠠᠲᠠᠯᠠ ᠳᠣᠲᠣᠷᠠ ᠫᠠᠯ ᠬᠢᠵᠦ ᠬᠢᠷᠳ᠋ᠬᠢᠨ ᠴᠣᠴᠢᠯᠠ᠃
ᠪᠠᠳᠠᠷᠠᠭᠤᠯᠲᠤ ᠲᠥᠷᠥ ᠬᠠᠭᠠᠨ ᠤ᠋ ᠦᠶᠡ ᠳ᠋ᠦ᠍ ᠠᠩᠬᠠ ᠲᠦᠰᠢᠮᠡᠯ ᠦ᠋ᠨ ᠵᠡᠷᠭᠡ ᠳ᠋ᠦ᠍ ᠳᠠᠪᠰᠢᠵᠤ ᠭᠠᠪᠢᠶᠠ ᠪᠠᠢᠭᠤᠯᠬᠤ ᠳ᠋ᠤᠨᠢ ᠠᠮᠢ ᠦᠷᠡᠭᠳᠡᠭᠰᠡᠨ ᠲᠠᠪᠤᠨ ᠮᠠᠯᠴᠢᠨ ᠭᠡᠵᠢᠭᠡ ᠶ᠋ᠢᠨ ᠬᠢᠨᠢ ᠦᠰᠦ ᠰᠢᠷᠠᠯᠳᠤᠨ ᠭᠠᠷ ᠲᠠᠭᠠᠨ ᠭᠠᠪᠠ ᠲᠠᠢ᠂ ᠬᠥᠯ ᠳ᠋ᠡᠭᠡᠨ ᠲᠤᠰᠢᠶᠠ ᠲᠠᠢ᠂ ᠬᠦᠩ ᠦ᠋ᠨ ᠴᠢᠭᠢᠭ ᠲᠡᠢ ᠦᠮᠡᠬᠡᠢ ᠱᠣᠷᠣᠩ ᠳ᠋ᠤ᠌ ᠰᠢᠷᠬᠠᠨ ᠤ᠋ ᠬᠠᠯᠠᠭᠤᠨ ᠠ᠋ᠴᠠ ᠦᠬᠦᠭᠰᠡᠨ ᠴᠠᠭ ᠤ᠋ᠨ ᠪᠠᠢᠳᠠᠯ ᠨᠢᠭᠡ ᠥᠭᠡᠷᠡ ᠪᠣᠯᠤᠭᠰᠠᠨ ᠦᠭᠡᠢ᠂ ᠱᠠᠬᠠᠢᠳᠠᠭᠤᠯᠤᠭᠰᠠᠨ ᠬᠠᠴᠠᠷ ᠢ᠋ᠶ᠋ᠠᠨ ᠬᠣᠷᠮᠣᠢ ᠶ᠋ᠢᠨ ᠲᠠᠰᠤᠷᠬᠠᠢ ᠪᠠᠷ ᠪᠣᠭᠣᠵᠤ᠂ ᠭᠢᠨᠳᠠᠨ ᠳ᠋ᠤ᠌ ᠢᠯᠵᠠᠷᠠᠭᠰᠠᠨ ᠲᠠᠮᠲᠤᠭ ᠪᠣᠯᠤᠭᠰᠠᠨ ᠳᠡᠪᠡᠯ ᠦ᠋ᠨ ᠴᠣᠭᠣᠷᠬᠠᠢ ᠪᠠᠷ ᠬᠣᠩᠭᠣᠨ ᠤ᠋ ᠬᠢᠨᠢ ᠮᠢᠬᠠ ᠤᠨᠵᠢᠨ ᠰᠠᠨᠵᠢᠨ ᠬᠥᠯ ᠢ᠋ᠶ᠋ᠡᠨ ᠴᠢᠷᠦᠨ ᠥᠩᠭᠡᠷᠡᠬᠦ ᠳ᠋ᠦ᠍ ᠲᠦᠮᠡᠨ ᠬᠢᠯᠢᠰ ᠬᠡᠷᠡᠭ ᠲᠦ᠍ ᠦᠬᠦᠭᠦᠯᠦᠭᠰᠡᠨ ᠲᠡᠳᠡᠨ ᠢ᠋ᠶ᠋ᠡᠨ ᠬᠠᠷᠠᠬᠤ ᠳ᠋ᠤ᠌ ᠮᠠᠨᠠᠭᠠᠴᠢ ᠶ᠋ᠢᠨ ᠳᠣᠲᠣᠷᠠ ᠠᠷᠵᠢᠰᠬᠢᠬᠥ ᠰᠢᠭ ᠪᠣᠯᠪᠠ᠃
ᠲᠡᠷᠡ ᠲᠠᠪᠤ ᠶ᠋ᠢᠨ ᠬᠥᠯ ᠡᠴᠡ ᠵᠡᠭᠦᠭᠰᠡᠨ ᠲᠡᠮᠦᠷ ᠲᠤᠰᠢᠶᠠ᠂ ᠭᠢᠯᠠᠰ ᠭᠢᠯᠠᠰ ᠭᠡᠵᠦ ᠬᠠᠩᠭᠢᠷ ᠵᠢᠩᠭᠢᠷ ᠳᠤᠤᠭᠠᠷᠬᠤ ᠠᠳᠠᠯᠢ᠂ ᠬᠣᠢᠨᠠ ᠠ᠋ᠴᠠ ᠨᠢ ᠤᠷᠠᠩᠬᠠᠢ ᠨᠣᠣᠷᠬᠠᠢ ᠬᠤᠪᠴᠠᠰᠤ ᠲᠠᠢ ᠮᠠᠢᠵᠢᠭ ᠭᠤᠲᠤᠯ ᠲᠠᠢ᠂ ᠡᠴᠡᠵᠦ ᠲᠤᠷᠠᠵᠤ ᠨᠠᠢ᠍ᠮᠠᠨ ᠴᠢᠮᠦᠭᠡᠨ ᠳ᠋ᠡᠭᠡᠨ ᠬᠡᠯᠬᠢᠭᠰᠡᠨ ᠬᠡᠳᠦᠨ ᠴᠢᠪᠠᠭᠠᠨᠴᠠ᠂ ᠦᠰᠦ ᠨᠢ ᠰᠡᠷᠡᠯᠳᠥᠭᠰᠡᠨ ᠬᠡᠳᠦᠨ ᠠᠪᠠᠭᠠᠢ᠂ ᠨᠢᠴᠦᠭᠦᠨ ᠱᠠᠯᠳᠠᠩ ᠬᠡᠳᠦᠨ ᠬᠡᠦᠬᠡᠳ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠨ ᠨᠢᠭᠡ ᠠᠪᠠᠭᠠᠢ ᠶ᠋ᠢᠨ ᠰᠢᠷᠭᠢᠵᠦ ᠦᠷᠴᠡᠢᠭᠰᠡᠨ ᠬᠥᠬᠥᠨ ᠡᠴᠡ ᠥᠲᠡᠯᠦᠭᠰᠡᠨ ᠬᠥᠮᠦᠨ ᠰᠢᠭ ᠦᠷᠴᠢᠯᠡᠭᠡᠲᠦᠭᠰᠡᠨ᠂ ᠠᠷᠠᠰᠤ ᠨᠢ ᠠᠲᠤᠷᠢᠶᠠ ᠪᠣᠯᠤᠨ ᠤᠨᠵᠢᠢᠭᠰᠠᠨ ᠬᠡᠯᠬᠢᠶᠡ ᠶᠠᠰᠤ ᠰᠢᠭ᠋ ᠲᠤᠷᠠᠩᠬᠠᠢ ᠬᠡᠦᠬᠡᠳ ᠣᠮᠣᠭᠣᠯᠳᠠᠭᠰᠠᠨ ᠬᠥᠬᠡ ᠤᠷᠤᠭᠤᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠢᠮᠡᠨ ᠰᠢᠮᠡᠨ ᠳᠠᠭᠤ ᠦᠭᠡᠢ ᠤᠬᠢᠯᠠᠬᠤ ᠰᠢᠭ᠋ ᠢᠷᠪᠠᠢᠵᠤ᠂ ᠡᠬᠡ ᠶ᠋ᠢ ᠬᠦᠵᠦᠭᠦᠳᠡᠨ᠂ ᠮᠠᠨᠠᠭᠠᠴᠢ ᠶ᠋ᠢᠨ ᠬᠠᠵᠠᠭᠤ ᠪᠠᠷ ᠥᠩᠭᠡᠷᠡᠬᠦ ᠳ᠋ᠦ᠍ ᠬᠤᠷᠴᠢᠭᠠᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠢᠭᠠᠨ ᠤᠷᠤᠭᠤᠯ ᠨᠢ ᠴᠢᠮᠡᠭᠡ ᠦᠭᠡᠢ ᠬᠥᠳᠡᠯᠦᠯᠡ᠃ ᠬᠣᠢᠨᠠ ᠠ᠋ᠴᠠ ᠨᠢ ᠬᠠᠵᠠᠭᠠᠨᠠᠵᠤ ᠶᠠᠪᠤᠭᠰᠠᠨ ᠨᠢᠭᠡ ᠡᠮᠡᠭᠡᠨ ᠰᠢᠷᠣᠢ ᠰᠢᠭᠦᠷᠡᠵᠦ ᠮᠠᠨᠠᠭᠠᠴᠢ ᠶ᠋ᠢᠨ ᠨᠢᠭᠤᠷ ᠥᠭᠡᠳᠡ ᠴᠠᠴᠤᠬᠤ ᠳ᠋ᠤ᠌ ᠨᠢᠳᠦ ᠪᠡᠨ ᠠᠨᠢᠲᠠᠯᠠ ᠳᠠᠬᠤᠨ ᠳᠡᠭᠡᠷᠡ ᠨᠢ ᠱᠠᠷ ᠬᠢᠵᠦ ᠲᠣᠰᠤᠭᠠᠳ ᠤᠬᠤᠰᠬᠢᠨ ᠪᠣᠰᠴᠤ ᠵᠠᠢᠯᠠᠬᠤ ᠭᠡᠲᠡᠯᠡ ᠪᠡᠶᠡ ᠪᠠᠨᠲᠠᠩ ᠳ᠋ᠤ᠌ ᠨᠠᠭᠠᠯᠳᠤᠵᠤ᠂ ᠪᠠᠨᠲᠠᠩ ᠭᠠᠵᠠᠷ ᠨᠠᠭᠠᠯᠳᠤᠭᠰᠠᠨ ᠰᠢᠭ᠋ ᠬᠥᠳᠡᠯᠬᠦ ᠶ᠋ᠢᠨ ᠠᠷᠭᠠ ᠦᠭᠡᠢ ᠂ ᠲᠡᠷᠡ ᠪᠦᠭᠦᠳᠡ ᠶ᠋ᠢᠨ ᠵᠢᠰᠦ ᠴᠢᠷᠠᠢ ᠴᠥᠮ ᠲᠠᠨᠢᠬᠤ ᠬᠥᠮᠦᠨ ᠠᠵᠢ᠃ ᠲᠡᠷᠢᠭᠦᠯᠡᠵᠦ ᠶᠠᠪᠤᠭᠰᠠᠨ ᠲᠠᠪᠤ ᠶ᠋ᠢᠨ ᠠᠷᠤ ᠭᠡᠷ ᠦ᠋ᠨ ᠬᠥᠮᠦᠨ᠂ ᠠᠮᠢᠳᠤᠷᠠᠯ ᠳᠠᠭᠠᠨ ᠠᠯᠳᠠᠵᠤ ᠂ ᠵᠢᠲᠡᠷ ᠦ᠋ᠨ ᠭᠦᠦᠷ ᠳᠣᠣᠷᠠ ᠣᠰᠤᠭᠤᠵᠤ ᠦᠬᠦᠭᠰᠡᠨ ᠠᠮᠢᠲᠠᠨ ᠶᠠᠪᠤᠨᠠᠮ᠃
ᠥᠨᠥ ᠣᠷᠣᠢ ᠳᠡᠩᠳᠡᠭᠦᠦ ᠪᠠᠯᠭᠤᠭᠠᠳ ᠨᠢᠳᠦᠨ ᠳ᠋ᠦ᠍ ᠡᠢᠮᠦ ᠠᠶᠠᠭᠦᠢ ᠶᠠᠭᠤᠮᠠ ᠦᠵᠡᠭᠳᠡᠪᠡ ᠤᠤ ᠭᠡᠵᠦ ᠠᠶᠤᠵᠤ ᠢᠴᠢᠬᠦ ᠰᠡᠳᠬᠢᠯ ᠲᠥᠷᠥᠵᠦ ᠨᠢᠳᠦ ᠪᠡᠨ ᠠᠨᠢᠭᠰᠠᠨ ᠴᠤ᠌ ᠴᠤᠪᠤᠵᠤ ᠶᠠᠪᠤᠭᠠ ᠣᠯᠠᠨ ᠦᠵᠡᠭᠳᠡᠵᠦ ᠳᠣᠭᠣᠭᠰᠢ ᠪᠠᠨ ᠬᠠᠷᠠᠭᠰᠠᠨ ᠴᠤ᠌ ᠤᠷᠳᠤᠭᠤᠷ ᠨᠢ ᠴᠤᠪᠤᠵᠤ ᠶᠠᠪᠤᠭᠠ ᠰᠢᠭ᠋ ᠬᠠᠷᠠᠭᠳᠠᠭᠠᠳ ᠪᠤᠷᠤᠭᠤ ᠬᠠᠷᠠᠭᠰᠠᠨ ᠴᠤ᠌ ᠬᠠᠷᠠᠭᠳᠠᠭᠠᠳ ᠵᠠᠢᠯᠠᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠃
ᠬᠢᠯᠢᠰ ᠬᠡᠷᠡᠭ ᠬᠦᠯᠢᠶᠡᠳᠡᠭ ᠦᠭᠡᠢ ᠬᠥᠮᠦᠰ ᠢ᠋ ᠤᠯᠠᠢᠯᠭᠠᠳᠠᠭ ᠰᠦᠷᠡᠬᠡᠢ ᠪᠠᠢᠴᠠᠭᠠᠭᠴᠢ ᠲᠦᠰᠢᠮᠡᠯ ᠦ᠋ᠨ ᠨᠡᠷᠡ ᠣᠯᠬᠤ ᠭᠡᠵᠦ ᠥᠪᠡᠷ ᠢ᠋ᠶ᠋ᠡᠨ ᠲᠠᠰᠢᠭᠤᠷᠳᠠᠨ ᠨᠦᠳᠦᠵᠦ ᠄
— ᠲᠥᠷᠥ ᠳ᠋ᠦ᠍ ᠲᠡᠷᠰᠯᠡᠭᠰᠡᠨ ᠴᠢᠨᠦ ᠵᠣᠷᠢᠭ ᠲᠡᠮᠦᠷ ᠮᠡᠲᠦ ᠬᠠᠲᠠᠭᠤ ᠪᠣᠯᠪᠠᠴᠤ ᠬᠠᠤᠯᠢ ᠬᠢᠰᠠ ᠮᠡᠲᠦ ᠬᠠᠢᠯᠠᠭᠤᠯᠤᠨ ᠤᠷᠤᠰᠬᠠᠵᠤ ᠴᠢᠳᠠᠨᠠ᠃ ᠬᠡᠷᠡᠭ ᠢ᠋ᠶ᠋ᠡᠨ ᠬᠦᠯᠢᠶᠡ ᠬᠡᠯᠡ ᠂ ᠬᠡᠯᠡ ᠂ ᠬᠡᠯᠡ ! ᠭᠡᠵᠦ ᠭᠡᠮ ᠬᠢᠭᠡ ᠦᠭᠡᠢ ᠶ᠋ᠢ ᠨᠢ ᠮᠡᠳᠡᠪᠡᠴᠦ ᠡᠷᠡᠭᠦᠦ ᠰᠢᠭᠦᠯᠲᠡ ᠪᠡᠷ ᠮᠢᠬᠠ ᠴᠢᠰᠤ ᠶ᠋ᠢ ᠨᠢ ᠤᠷᠤᠰᠬᠠᠵᠤ᠂ ᠲᠦᠮᠡᠨ ᠬᠢᠯᠢᠰ ᠬᠡᠷᠡᠭ ᠬᠦᠯᠢᠶᠡᠯᠭᠡᠨ ᠨᠣᠶᠠᠳ ᠳᠡᠭᠡᠳᠦᠰ ᠦ᠋ᠨ ᠡᠮᠦᠨᠡ ᠨᠢᠭᠤᠷ ᠲᠠᠢ ᠪᠣᠯᠵᠤ ᠪᠠᠢᠬᠤ ᠳ᠋ᠤ᠌ ᠰᠠᠢᠬᠠᠨ ᠪᠠᠢᠳᠠᠭ ᠰᠠᠨ᠃ ᠭᠠᠭᠴᠠ ᠰᠤᠭᠤ ᠦᠰᠦᠷᠦᠨ ᠮᠠᠨᠳᠤᠬᠤ ᠶ᠋ᠢᠨ ᠦᠶᠡᠰ ᠮᠠᠨᠵᠤ ᠲᠠᠢᠴᠢᠩ ᠤᠯᠤᠰ ᠤ᠋ᠨ ᠲᠥᠷᠥ ᠰᠥᠨᠥᠵᠦ᠂ ᠣᠯᠠᠨᠠ ᠡᠷᠭᠦᠭᠳᠡᠭᠰᠡᠨ ᠦ᠌ ᠦᠶᠡ ᠳ᠋ᠦ᠍ ᠳᠠᠬᠢᠨ ᠥᠨᠥᠬᠢ ᠡᠴᠡ ᠪᠡᠨ ᠡᠬᠢᠯᠡᠵᠦ᠂ ᠴᠤᠤᠲᠠᠢ ᠠᠷᠨᠠᠨ ᠲᠠᠪᠤᠨ ᠤ᠋ ᠴᠠᠭᠳᠠᠭᠠ ᠶ᠋ᠢᠨ ᠳᠠᠪᠲᠠᠳᠠᠭ ᠦᠭᠡᠢ ᠵᠣᠷᠢᠭᠲᠠᠨ ᠢ᠋ ᠳᠠᠪᠠᠵᠤ ᠳᠤᠷᠠᠲᠠᠢ ᠬᠡᠷᠡᠭ ᠬᠦᠯᠢᠶᠡᠯᠭᠡᠨ᠂ ᠵᠡᠷᠭᠡ ᠬᠡᠷᠬᠢᠮ ᠦ᠋ᠨ ᠲᠤᠯᠠᠳᠠ ᠬᠦᠷᠬᠦ ᠶ᠋ᠢᠨ ᠳᠠᠪᠠᠭᠠᠨ ᠳᠡᠭᠡᠷᠡ ᠠᠷᠠᠳ ᠤ᠋ᠨ ᠬᠤᠪᠢᠰᠬᠠᠯ ᠡᠭᠦᠰᠴᠦ ᠤᠷᠢᠳᠤ ᠶ᠋ᠢᠨ ᠮᠠᠨᠳᠤᠬᠤ ᠠᠷᠭᠠ ᠬᠦᠴᠦᠨ ᠦᠭᠡᠢ ᠪᠣᠯᠵᠤ᠂ ᠠᠮᠢᠳᠤ ᠬᠣᠷᠢᠭᠳᠠᠯ ᠤ᠋ᠨ ᠭᠡᠷᠡᠴᠢ ᠪᠣᠯᠤᠭᠰᠠᠨ ᠠ᠋ᠴᠠ ᠦᠬᠦᠭᠰᠡᠨ ᠶᠠᠯᠠᠲᠠᠨ ᠢ᠋ ᠳᠡᠷᠡᠯᠡᠭᠰᠡᠨ ᠨᠢ ᠳᠡᠭᠡᠷᠡ ᠭᠡᠵᠦ ᠭᠠᠷ ᠬᠦᠷᠦᠭᠰᠡᠨ ᠬᠥᠮᠦᠨ ᠢ᠋ᠶ᠋ᠡᠨ ᠬᠣᠷᠣᠭᠠᠵᠤ᠂ ᠠᠯᠤᠰ ᠬᠢᠵᠠᠭᠠᠷ ᠤᠷᠭᠤᠨ ᠵᠠᠢᠯᠠᠭᠠᠳ ᠂ ᠭᠡᠷᠡᠴᠢ ᠲᠠᠲᠠᠵᠤ ᠂ ᠳᠠᠭᠠᠭᠤᠯᠢ ᠬᠢᠬᠦ ᠬᠠᠷᠭᠢᠰ ᠹᠧᠣᠳᠠᠯ ᠲᠦᠰᠢᠮᠡᠳ ᠢ᠋ ᠣᠷᠣ ᠰᠤᠷᠠᠭ ᠦᠭᠡᠢ ᠪᠣᠯᠤᠭᠰᠠᠨ ᠬᠣᠢᠨᠠ ᠳᠠᠬᠢᠨ ᠬᠣᠲᠠ ᠣᠷᠣᠵᠤ ᠢᠷᠡᠭᠡᠳ ᠡᠨᠡ ᠳᠡᠯᠭᠡᠭᠦᠷ ᠦ᠋ᠨ ᠮᠠᠨᠠᠭᠠᠴᠢ ᠂ ᠭᠤᠨᠢ ᠪᠡᠶᠡ ᠭᠣᠵᠣᠩ ᠲᠣᠯᠣᠭᠠᠢ ᠶᠠᠳᠠᠭᠤ ᠬᠥᠮᠦᠨ ᠦ᠌ ᠳᠦᠷᠢ ᠪᠡᠷ ᠬᠠᠷᠠ ᠠᠮᠢ ᠪᠠᠨ ᠬᠠᠭᠠᠴᠠᠢᠯᠠᠵᠤ ᠶᠠᠪᠤᠭᠰᠠᠨ ᠪᠦᠬᠦ ᠶᠠᠪᠤᠳᠠᠯ ᠨᠢ ᠬᠠᠷᠠᠩᠭᠤᠢ ᠰᠥᠨᠢ ᠠᠭᠱᠠᠨ ᠵᠠᠭᠤᠷᠠ ᠭᠢᠯᠠᠰᠬᠢᠬᠦ ᠴᠠᠬᠢᠯᠭᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠣᠷᠴᠢᠨ ᠲᠣᠭᠣᠷᠢᠨ ᠤ᠋ ᠬᠠᠮᠤᠭ ᠶᠠᠭᠤᠮᠠ ᠦᠵᠡᠭᠳᠡᠳᠡᠭ ᠲᠡᠢ ᠠᠳᠠᠯᠢ ᠮᠠᠨᠠᠭᠠᠴᠢ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠲᠣᠪ ᠲᠣᠳᠣᠷᠬᠠᠢ ᠤᠷᠭᠤᠵᠠᠢ᠃
ᠰᠦᠷᠲᠡᠢ ᠵᠢᠭᠰᠠᠭᠠᠯ ᠡᠮᠦᠨᠡᠭᠦᠷ ᠨᠢ ᠴᠤᠪᠤᠭᠰᠠᠭᠠᠷ᠂ ᠴᠥᠮ ᠥᠪᠡᠷ ᠲᠤᠨᠢ ᠣᠷᠣᠭᠤᠯᠵᠤ ᠵᠣᠳᠣᠭᠤᠯᠤᠭᠰᠠᠨ ᠴᠢᠰᠤ ᠨᠥᠵᠢ ᠪᠡᠨ ᠴᠤᠪᠤᠷᠠᠭᠤᠯᠤᠭᠰᠠᠨ ᠬᠥᠮᠦᠨ ᠪᠠᠲᠤ ᠬᠦᠩ ᠳ᠋ᠦ᠍ ᠦᠬᠦᠭᠰᠡᠨ ᠬᠥᠮᠦᠨ ᠰᠢᠷᠠ ᠬᠠᠳᠠ ᠳ᠋ᠤ᠌ ᠫᠤᠤᠳᠠᠭᠤᠯᠤᠭᠰᠠᠨ ᠬᠥᠮᠦᠨ ᠴᠤᠪᠤᠵᠤ᠂ ᠨᠢᠭᠡ ᠬᠠᠷᠠᠲᠠᠯᠠ ᠮᠠᠨᠠᠭᠠᠴᠢ ᠶ᠋ᠢᠨ ᠲᠥᠷᠥᠭᠰᠡᠨ ᠡᠬᠡ ᠨᠢ ᠬᠦᠦ ᠶ᠋ᠢᠨ ᠶᠣᠰᠣᠨ ᠪᠤᠰᠤ ᠠ᠋ᠴᠠ ᠵᠢᠭᠰᠢᠨ ᠢᠴᠢᠭᠰᠡᠨ ᠰᠢᠨᠵᠢᠲᠡᠢ ᠂ ᠲᠡᠷᠡ ᠣᠯᠠᠨ ᠤ᠋ ᠳᠤᠮᠳᠠ ᠪᠤᠷᠤᠭᠤ ᠬᠠᠷᠠᠨ᠂ ᠵᠢᠷᠭᠤᠭᠠᠲᠠᠢ ᠲᠠᠶᠠᠭ ᠢ᠋ᠶ᠋ᠠᠨ ᠲᠤᠭ ᠲᠤᠭ ᠲᠤᠯᠵᠤ ᠬᠥᠯ ᠢ᠋ᠶ᠋ᠡᠨ ᠴᠢᠷᠦᠨ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠲᠠᠶᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠦᠦ ᠶ᠋ᠢᠨ ᠥᠭᠡᠳᠡ ᠡᠴᠡ ᠴᠢᠴᠢᠨ ᠮᠠᠭᠤᠬᠠᠢ ᠬᠠᠷᠠᠭᠠᠳ ᠥᠩᠭᠡᠷᠡᠬᠦ ᠰᠢᠭ ᠪᠣᠯᠤᠯᠠ᠃
ᠪᠢᠳᠡ ᠬᠡᠪᠲᠦ ᠶᠣᠰᠣᠨ ᠤ᠋ ᠦᠶᠡ ᠳ᠋ᠦ᠍ ᠴᠢᠮᠠ ᠳ᠋ᠤ᠌ ᠲᠠᠮᠤᠯᠠᠭᠤᠯᠵᠤ᠂ ᠬᠢᠯᠢᠰ ᠢ᠋ᠶ᠋ᠡᠷ ᠪᠠᠲᠤ ᠬᠦᠩ ᠳ᠋ᠦ᠍ ᠳᠥᠩᠭᠡᠯᠡᠭᠡᠰᠦᠲᠡᠢ ᠦᠬᠦᠭᠰᠡᠨ ᠭᠡᠵᠦ ᠨᠢᠭᠡ ᠡᠪᠦᠭᠡᠨ ᠬᠠᠨᠢᠶᠠᠨ ᠬᠠᠨᠢᠶᠠᠭᠰᠠᠭᠠᠷ ᠮᠠᠨᠠᠭᠠᠴᠢ ᠶ᠋ᠢᠨ ᠬᠠᠵᠠᠭᠤ ᠪᠠᠷ ᠥᠩᠭᠡᠷᠡᠨ ᠭᠠᠷᠬᠤ ᠳ᠋ᠠᠭᠠᠨ ᠮᠠᠩᠭᠠ ᠳ᠋ᠣᠣ ᠂ ᠮᠠᠨ ᠢ᠋ ᠲᠠᠨᠢᠵᠤ ᠪᠠᠢᠨᠠ ᠤᠤ ᠭᠡᠵᠦ ᠮᠡᠩᠭᠡᠷ ᠢ᠋ᠶ᠋ᠡᠨ ᠬᠡᠷᠴᠢᠭᠢᠨᠡᠭᠦᠯᠦᠨ ᠥᠩᠭᠡᠷᠡᠯᠡ᠃ ᠬᠦᠷᠳᠦᠨ ᠳᠣᠣᠷᠠ ᠦᠬᠦᠭᠰᠡᠨ ᠴᠢᠪᠠᠭᠠᠨᠴᠠ ᠨᠢ ᠪᠤᠷᠤᠭᠤ ᠬᠠᠷᠠᠵᠤ ᠂ ᠬᠣᠶᠠᠷ ᠠᠴᠢ ᠪᠠᠨ ᠳᠠᠭᠠᠭᠤᠯᠤᠨ ᠭᠠᠷᠬᠤ ᠳ᠋ᠤ᠌ ᠄
—ᠨᠠᠮᠠ ᠶ᠋ᠢ ᠵᠢᠭᠰᠢᠨ᠂ ᠪᠤᠷᠤᠭᠤ ᠬᠠᠷᠠᠵᠤ ᠶᠠᠪᠤᠬᠤ ᠲᠠᠨᠢ ᠲᠦᠮᠡᠨ ᠵᠥᠪ ᠭᠡᠵᠦ ᠮᠠᠨᠠᠭᠠᠴᠢ ᠦᠨᠡᠰᠦᠨ ᠬᠥᠬᠡ ᠤᠷᠤᠭᠤᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠢᠪᠡᠨᠡᠨ ᠬᠥᠳᠡᠯᠬᠦ ᠲᠡᠩᠬᠡᠭᠡ ᠦᠭᠡᠢ᠂ ᠵᠠᠢᠯᠠᠬᠤ ᠭᠠᠵᠠᠷ ᠦᠭᠡᠢ ᠮᠣᠳᠣᠨ ᠪᠠᠨᠲᠠᠩ ᠳᠡᠭᠡᠷᠡ ᠪᠡᠨ ᠬᠠᠳᠠᠭᠠᠰᠤᠲᠠᠢ ᠶᠤᠮ ᠰᠢᠭ᠋ ᠰᠠᠭᠤᠵᠤ ᠠᠷᠢᠬᠢ ᠨᠢ ᠬᠡᠳᠦᠢᠨ ᠭᠠᠷᠴᠤ᠂ ᠤᠬᠠᠭᠠᠨ ᠰᠣᠯᠢᠶᠠ ᠲᠠᠢ ᠬᠥᠮᠦᠨ ᠦ᠌ ᠭᠠᠯᠵᠠᠭᠤ ᠨᠢᠳᠦ ᠪᠡᠷ ᠡᠮᠦᠨᠡᠭᠦᠷ ᠨᠢ ᠥᠩᠭᠡᠷᠡᠭᠴᠢ ᠣᠯᠠᠨ ᠤ᠋ ᠵᠦᠭ ᠰᠢᠷᠲᠡᠨ ᠬᠠᠷᠠᠲᠠᠯᠠ ᠄
— ᠣᠯᠠᠨᠠ ᠡᠷᠭᠦᠭᠳᠡᠭᠰᠡᠨ ᠦ᠌ ᠦᠶᠡ ᠶ᠋ᠢᠨ ᠬᠥᠮᠦᠨ ᠰᠢᠦ ᠪᠢᠳᠡ ᠭᠡᠵᠦ ᠶᠢᠰᠦᠨ ᠡᠷᠡᠭᠦᠦ ᠲᠤᠭᠤᠯᠤᠭᠰᠠᠨ ᠨᠢᠭᠡᠨ ᠮᠠᠯᠴᠢ ᠡᠷᠡ ᠂ ᠪᠡᠶᠡ ᠶ᠋ᠢᠨ ᠲᠥᠷᠥᠭᠰᠡᠨ ᠪᠠᠢᠳᠠᠯ ᠴᠢᠭᠢᠷᠠᠭ ᠪᠣᠯᠪᠠᠴᠤ ᠭᠢᠨᠳᠠᠨ ᠳ᠋ᠤ᠌ ᠢᠯᠵᠠᠷᠠᠭᠰᠠᠨ ᠤᠷᠠᠩᠬᠠᠢ ᠬᠤᠪᠴᠠᠰᠤᠨ ᠤ᠋ ᠴᠣᠭᠣᠷᠬᠠᠢ ᠪᠠᠷ ᠡᠷᠡᠭᠦᠦ ᠳ᠋ᠦ᠍ ᠡᠪᠳᠡᠯᠡᠭᠦᠯᠦᠭᠰᠡᠨ ᠪᠠᠭᠠᠲᠤᠷ ᠬᠦᠳᠡᠷ ᠪᠠᠶᠠᠨ ᠠ᠋ᠴᠠ ᠴᠢᠰᠤ ᠢᠳᠡᠭᠡ ᠴᠤᠪᠤᠷᠠᠭᠤᠯᠤᠨ ᠥᠩᠭᠡᠷᠡᠬᠦ ᠳ᠋ᠦ᠍ ᠮᠠᠨᠠᠭᠠᠴᠢ ᠶ᠋ᠢᠨ ᠪᠦᠬᠦ ᠰᠢᠷᠠ ᠦᠰᠦᠨ ᠦ᠌ ᠰᠦᠪᠡ ᠡᠴᠡ ᠬᠦᠢᠲᠡᠨ ᠬᠥᠯᠥᠰᠥ ᠭᠠᠷᠬᠤ ᠰᠢᠭ᠋ ᠪᠣᠯᠵᠤ ᠬᠥᠳᠡᠯᠦᠶᠡ ᠬᠥᠳᠡᠯᠵᠦ ᠪᠣᠯᠬᠤ ᠦᠭᠡᠢ ᠂ ᠳᠡᠮᠡᠢ ᠯᠡ ᠄
— ᠳᠠᠷᠤᠭᠠ ᠠ᠋ ᠂ ᠬᠣᠷᠰᠢᠶᠠᠨ ᠤ᠋ ᠳᠠᠷᠤᠭᠠ ᠠ᠋ ᠂ ᠡᠳᠡᠨᠥᠰ ᠢ᠋ ᠵᠠᠢᠯᠠᠭᠤᠯ ! ᠬᠥᠶᠢ ᠳᠠᠷᠤᠭᠠ ᠠ᠋ ! ᠭᠡᠵᠦ ᠬᠠᠰᠬᠢᠷᠪᠠᠴᠤ ᠲᠡᠷᠡ ᠣᠯᠠᠨ ᠬᠢᠯᠢᠰ ᠶᠠᠯᠠ ᠳ᠋ᠤ᠌ ᠤᠨᠠᠭᠰᠠᠨ ᠬᠥᠮᠦᠨ ᠡᠴᠡ ᠣᠨᠳᠣᠣ ᠬᠥᠮᠦᠨ ᠭᠤᠳᠤᠮᠵᠢᠨ ᠳ᠋ᠤ᠌ ᠦᠵᠡᠭᠳᠡᠬᠦ ᠦᠭᠡᠢ᠂ ᠠᠶᠤᠮᠰᠢᠭᠲᠤ ᠴᠤᠪᠤᠭᠠ ᠦᠷᠭᠦᠯᠵᠢᠯᠡᠭᠰᠡᠭᠡᠷ ᠰᠡᠭᠦᠯ ᠨᠢ ᠬᠠᠷᠠᠭᠳᠠᠬᠤ ᠦᠭᠡᠢ᠂ ᠬᠠᠰᠬᠢᠷᠤᠭᠰᠠᠭᠠᠷ ᠮᠠᠨᠠᠭᠠᠴᠢ ᠶ᠋ᠢᠨ ᠬᠣᠭᠣᠯᠠᠢ ᠰᠦᠭᠡᠭᠡᠵᠤ᠂ ᠠᠶᠤᠵᠤ ᠰᠠᠨᠳᠤᠷᠤᠭᠰᠠᠨ ᠨᠢᠳᠦ ᠪᠦᠯᠲᠡᠢᠨ ᠳᠤᠬᠤᠨ ᠠ᠋ᠴᠠ ᠨᠢ ᠱᠣᠷᠪᠣᠭ ᠬᠥᠯᠥᠰᠥ ᠨᠢᠳᠦᠨ ᠳ᠋ᠦ᠍ᠨᠢ ᠣᠷᠣᠵᠤ ᠬᠣᠷᠣᠰᠬᠠᠪᠠᠴᠤ ᠭᠠᠷ ᠢ᠋ᠶ᠋ᠠᠨ ᠡᠷᠭᠦᠨ ᠳᠠᠭᠠᠭᠠᠬᠤ ᠦᠭᠡᠢ᠂ ᠳᠡᠮᠡᠢ ᠯᠡ ᠠᠨᠢᠵᠤ ᠬᠠᠷᠠᠵᠤ ᠰᠠᠭᠤᠲᠠᠯᠠ ᠭᠠᠮᠢᠩ ᠤ᠋ᠨ ᠦᠶᠡ ᠶ᠋ᠢᠨ ᠬᠢᠨ ᠴᠤᠪᠤᠵᠤ ᠭᠠᠷᠪᠠ᠃ ᠵᠠᠷᠢᠮ ᠬᠥᠮᠦᠨ ᠴᠣᠬᠢᠭᠰᠠᠨ ᠢ᠋ᠶ᠋ᠠᠨ ᠲᠠᠨᠢᠵᠤ ᠪᠠᠢᠨᠠ ᠤᠤ ᠭᠡᠰᠡᠨ ᠶᠦᠮ ᠰᠢᠭ ᠬᠥᠬᠡ ᠨᠢᠴᠠ ᠪᠣᠯᠤᠭᠰᠠᠨ ᠨᠢᠭᠤᠷ ᠢ᠋ᠶ᠋ᠠᠨ ᠵᠢᠭᠠᠵᠤ ᠥᠩᠭᠡᠷᠡᠨ᠂ ᠵᠠᠷᠢᠮ ᠨᠢ ᠦᠭᠡ ᠳᠠᠭᠤᠨ ᠦᠭᠡᠢ ᠭᠠᠯᠵᠠᠭᠤ ᠬᠥᠮᠦᠨ ᠦ᠌ ᠨᠢᠳᠦ ᠰᠢᠭ ᠠᠶᠤᠮᠠᠷ ᠬᠤᠷᠴᠠ ᠬᠠᠷᠠᠴᠠ ᠲᠠᠢ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠮᠠᠨᠠᠭᠠᠴᠢ ᠶ᠋ᠢ ᠰᠢᠷᠳᠡᠨ ᠰᠢᠷᠬᠠ ᠪᠣᠯᠤᠭᠰᠠᠨ ᠬᠡᠩᠬᠦᠳᠡᠭ ᠢ᠋ᠶ᠋ᠡᠨ ᠯᠣᠰ ᠯᠣᠰ ᠰᠢᠬᠠᠨ ᠥᠩᠭᠡᠷᠡᠪᠡ᠃
— ᠪᠠᠷᠤᠨ(1) ᠵᠠᠩᠵᠤᠨ ᠤ᠋ ᠦᠶᠡ ᠳ᠋ᠦ᠍ ᠪᠢᠳᠡᠨ ᠢ᠋ ᠬᠣᠪᠯᠠᠵᠤ ᠬᠢᠭᠡ ᠦᠭᠡᠢ ᠬᠡᠷᠡᠭ ᠲᠤ ᠲᠦᠮᠡᠨ ᠬᠢᠯᠢᠰ ᠢ᠋ᠶ᠋ᠡᠷ ᠰᠢᠢᠳᠬᠡᠭᠦᠯᠦᠭᠰᠡᠨ ᠰᠢᠦ ᠳᠡ᠃ ᠮᠠᠩᠭᠤᠰ ᠴᠢ ᠭᠡᠵᠦ ᠰᠢᠯᠢᠨ ᠬᠦᠵᠦᠭᠦᠦ ᠪᠡᠷ ᠢ᠋ᠶ᠋ᠡᠨ ᠲᠣᠯᠣᠭᠠᠢ ᠪᠠᠨ ᠬᠠᠭᠠ ᠫᠤᠤᠳᠠᠭᠤᠯᠴᠢᠬᠠᠭᠰᠠᠨ ᠬᠣᠶᠠᠷ ᠭᠠᠷ ᠨᠢ ᠠᠷᠤ ᠳ᠋ᠠᠭᠠᠨ ᠬᠦᠯᠢᠶᠡᠰᠦᠲᠡᠢ ᠬᠡᠰᠡᠭ ᠬᠥᠮᠦᠨ ᠴᠤᠪᠤᠨ ᠥᠩᠭᠡᠷᠡᠵᠦ᠄
— ᠡᠭᠦᠨ ᠢ᠋ ᠲᠠᠨᠢᠵᠤ ᠪᠠᠢᠨᠠ ᠤᠤ? ᠲᠦᠷᠡᠢ ᠳ᠋ᠦ᠍ ᠴᠢᠨᠢ ᠪᠠᠢᠭᠠ ᠴᠢᠨᠦ ᠭᠠᠩᠰᠠᠨ ᠤ᠋ ᠲᠡᠮᠳᠡᠭ ᠭᠡᠵᠦ ᠨᠢᠭᠡ ᠵᠠᠯᠠᠭᠤ ᠡᠷᠡ ᠬᠤᠢᠬᠠ ᠪᠠᠨ ᠬᠠᠭᠠ ᠴᠣᠬᠢᠭᠤᠯᠤᠭᠰᠠᠨ ᠰᠢᠷᠬᠠ ᠪᠠᠨ ᠵᠢᠭᠠᠨ᠂ ᠰᠢᠳᠦ ᠦᠭᠡᠢ ᠠᠮᠠ ᠪᠠᠨ ᠠᠩᠭᠠᠢᠬᠤ ᠳ᠋ᠤᠨᠢ ᠡᠷᠡᠭᠦᠦ ᠰᠢᠭᠦᠯᠲᠡ ᠲᠤᠯᠭᠠᠵᠤ ᠰᠢᠲᠦ ᠶ᠋ᠢ ᠨᠢ ᠪᠣᠯᠭᠣ ᠴᠣᠬᠢᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠭᠠᠳ᠂ ᠮᠠᠨᠠᠭᠠᠴᠢ ᠶ᠋ᠢᠨ ᠵᠤᠯᠠᠢ ᠬᠣᠵᠢᠭᠢᠷ ᠪᠣᠯᠪᠠᠴᠤ ᠰᠢᠯᠢᠨ ᠬᠦᠵᠦᠭᠦᠦ᠂ ᠬᠤᠯᠠᠭᠠᠢ ᠭᠡᠵᠢᠭᠡ ᠶ᠋ᠢᠨ ᠦᠰᠦ ᠨᠢ ᠠᠷᠵᠠᠰ ᠬᠢᠬᠦ ᠰᠢᠭ ᠪᠣᠯᠤᠯᠠ᠃ ᠴᠡᠭᠡᠵᠢᠨ ᠪᠡᠶᠡ ᠨᠢ ᠨᠢᠴᠦᠭᠦᠨ᠂ ᠳᠠᠯᠤ ᠨᠢᠷᠤᠭᠤᠨ ᠠ᠋ᠴᠠ ᠨᠢ ᠫᠤᠤ ᠶ᠋ᠢᠨ ᠰᠦᠮᠪᠦ ᠳ᠋ᠦ᠍ ᠬᠠᠭᠠ ᠴᠣᠬᠢᠭᠤᠯᠤᠭᠰᠠᠨ᠂ ᠠᠩᠭᠠᠢᠨ ᠬᠠᠪᠤᠳᠤᠭᠰᠠᠨ ᠰᠢᠷᠬᠠᠨ ᠠ᠋ᠴᠠ ᠴᠢᠰᠤ ᠴᠤᠪᠤᠷᠠᠭᠰᠠᠨ᠂ ᠤᠯᠠᠢᠰᠬᠠᠭᠰᠠᠨ ᠲᠡᠮᠦᠷ ᠢ᠋ᠶ᠋ᠡᠷ ᠬᠠᠭᠠᠷᠢᠭᠤᠯᠤᠭᠰᠠᠨ ᠬᠡᠩᠬᠦᠳᠡᠭ ᠲᠡᠢ ᠬᠥᠮᠦᠰ ᠦ᠋ᠨ ᠳᠤᠮᠳᠠ ᠪᠠᠷᠤᠨ ᠤ᠋ ᠱᠣᠷᠣᠩ ᠳ᠋ᠤ᠌ ᠮᠠᠩᠭᠠ ᠳ᠋ᠣᠣ ᠲᠠᠢᠵᠢ ᠳ᠋ᠤ᠌ ᠪᠠᠢᠴᠠᠭᠠᠯᠭᠠᠵᠤ ᠴᠡᠪᠡᠷ ᠪᠡᠶᠡ ᠪᠡᠨ ᠪᠤᠵᠠᠷᠯᠠᠭᠤᠯᠤᠭᠰᠠᠨ᠂ ᠬᠥᠬᠥ ᠪᠡᠨ ᠣᠭᠲᠤᠯᠭᠤᠯᠤᠭᠰᠠᠨ ᠡᠮᠡᠭᠲᠡᠢᠴᠦᠳ ᠦᠰᠦ ᠪᠡᠨ ᠰᠠᠭᠰᠠᠢᠯᠭᠠᠨ ᠴᠢᠰᠤ ᠪᠠᠨ ᠴᠤᠪᠤᠭᠤᠯᠤᠨ ᠥᠩᠭᠡᠷᠡᠵᠦ ᠬᠠᠮᠤᠭ ᠤ᠋ᠨ ᠰᠡᠭᠦᠯ ᠳ᠋ᠦ᠍ ᠪᠠᠷᠣᠨ ᠤ᠋ ᠪᠠᠢᠴᠠᠭᠠᠭᠴᠢ ᠵᠤᠯᠠᠢ ᠳ᠋ᠠᠭᠠᠨ ᠬᠣᠲᠣᠭᠣᠷ ᠬᠠᠪᠴᠢᠭ ᠭᠠᠪᠠᠯᠠ ᠲᠠᠢ ᠭᠡᠳᠡᠭ ᠣᠹᠢᠼᠧᠷ ᠮᠠᠨᠠᠭᠠᠴᠢ ᠶ᠋ᠢᠨ ᠬᠠᠵᠠᠭᠤ ᠪᠠᠷ ᠥᠩᠭᠡᠷᠡᠨ ᠭᠠᠷᠬᠤ ᠳ᠋ᠠᠭᠠᠨ ᠬᠠᠷᠠ ᠠᠷᠢᠬᠢᠨ ᠤ᠋ ᠦᠨᠦᠷ ᠬᠠᠩᠬᠤᠯᠤᠨ᠄
— ᠠ ᠴᠢ ᠡᠨᠳᠡ ᠰᠠᠭᠤᠨᠠ ᠤᠤ? ᠶᠠᠭᠠᠬᠢᠵᠤ ᠪᠣᠯᠤᠨᠠ᠂ ᠲᠠᠨ ᠤ᠋ ᠪᠠ ᠮᠠᠨ ᠤ᠋ ᠠᠵᠢᠯ ᠬᠠᠮᠲᠤ ᠬᠢᠭᠰᠡᠨ ᠬᠠᠮᠲᠤ ᠶᠠᠪᠤᠨᠠ ᠬᠡᠷᠡᠺ ( ᠬᠡᠷᠡᠭ) ᠲᠡᠭᠡᠨ! ᠬᠠ᠂ ᠬᠠ᠂ ᠬᠠ! ᠮᠥᠩᠭᠥ᠂ ᠠᠷᠢᠬᠢ᠂ ᠬᠡᠦᠬᠡᠨ ᠣᠨᠳᠣᠣ ᠶᠠᠭᠤ ᠴᠤ᠌ ᠬᠡᠷᠡᠭ ᠦᠭᠡᠢ ᠪᠠᠢᠭᠰᠠᠨ᠂ ᠠ ᠣᠳᠣ ᠪᠣᠰᠢᠭᠣ ᠶᠠᠪᠤᠨᠠ ᠬᠡᠷᠡᠺ ᠬᠡᠷᠡᠭ ᠲᠡᠭᠡᠨ! ᠬᠠ᠂ ᠬᠠ᠂ ᠬᠠ᠂ ᠬᠡᠯᠡ᠂ ᠬᠡᠯᠡ᠂ ᠬᠡᠯᠡ᠂ ᠭᠠᠯ᠂ ᠭᠠᠯ᠂ ᠭᠠᠯ! ᠬᠠ᠂ ᠬᠠ᠂ ᠬᠠ! ᠭᠡᠵᠦ ᠬᠦᠢᠲᠡᠨ ᠢ᠋ᠶ᠋ᠡᠷ ᠢᠨᠢᠶᠡᠵᠦ ᠥᠩᠭᠡᠷᠡᠬᠦ ᠳ᠋ᠦ᠍ᠨᠢ ᠮᠠᠨᠠᠭᠠᠴᠢ ᠶ᠋ᠢᠨ ᠶᠠᠰᠤᠨ ᠤ᠋ ᠬᠢᠨᠢ ᠬᠥᠯᠥᠰᠥ ᠭᠠᠷᠴᠤ ᠨᠢᠳᠦ ᠪᠡᠨ ᠠᠨᠢᠭᠠᠳ ᠬᠡᠴᠢᠨᠡᠭᠡᠨ ᠪᠣᠯᠵᠤ ᠨᠢᠭᠡ ᠬᠠᠷᠠᠬᠤ ᠳ᠋ᠤᠨᠢ ᠭᠠᠰᠢᠭᠤᠳᠠᠯ ᠤ᠋ᠨ ᠬᠥᠭᠵᠢᠮ ᠤᠯᠠᠭᠠᠨ ᠬᠠᠷᠠ ᠳᠠᠪᠤᠤ ᠪᠠᠷ ᠴᠢᠮᠡᠭᠰᠡᠨ ᠲᠡᠷᠭᠡᠨ ᠳᠡᠭᠡᠷᠡ ᠠᠪᠰᠠ ᠲᠠᠯᠪᠢᠵᠤ᠂ ᠳᠡᠯᠭᠡᠭᠦᠷ ᠦ᠋ᠨ ᠬᠥᠮᠦᠨ ᠬᠠᠨᠴᠤᠢ ᠳ᠋ᠠᠭᠠᠨ ᠪᠡᠯᠪᠡᠰᠦᠷᠡᠯ ᠦ᠋ᠨ ᠤᠯᠠᠭᠠᠨ ᠬᠠᠷᠠ ᠳᠠᠪᠤᠤ ᠤᠶᠠᠵᠤ ᠲᠣᠯᠣᠭᠠᠢ ᠪᠥᠬᠥᠢᠨ ᠠᠢᠰᠤᠢ᠂ ᠬᠠᠷᠠᠲᠠᠯᠠ ᠠᠪᠰᠠᠨ ᠳ᠋ᠤ᠌ ᠥᠪᠡᠷ ᠦ᠋ᠨ ᠪᠡᠶᠡ ᠬᠡᠪᠲᠡᠵᠦ ᠪᠠᠢᠪᠠ᠃ ᠤᠲᠤᠭᠠ ᠵᠢᠩᠰᠡ᠂ ᠴᠠᠯᠢᠩ ᠫᠦᠩᠯᠦ᠂ ᠨᠡᠷᠡ ᠭᠠᠪᠢᠶᠠᠨ ᠤ᠋ ᠬᠣᠢᠨᠠ ᠠ᠋ᠴᠠ ᠪᠠᠳᠠᠷᠠᠭᠤᠯᠲᠤ ᠲᠥᠷᠥ᠂ ᠬᠡᠪᠲᠦ ᠶᠣᠰᠣ᠂ ᠣᠯᠠᠨᠠ ᠡᠷᠭᠦᠭᠳᠡᠭᠰᠡᠨ ᠦ᠌ ᠦᠶᠡ᠂ ᠭᠠᠮᠢᠩ ᠪᠠᠷᠣᠨ ᠤ᠋ ᠦᠶᠡ ᠳ᠋ᠦ᠍ ᠠᠮᠢᠲᠠᠨ ᠢ᠋ ᠬᠢᠯᠢᠰ ᠢ᠋ᠶ᠋ᠡᠷ ᠬᠡᠷᠡᠭ ᠲᠤ ᠬᠢᠵᠦ ᠲᠡᠮᠦᠯᠡᠨ ᠦᠬᠦᠭᠦᠯᠦᠭᠰᠡᠨ ᠬᠥᠮᠦᠨ ᠢ᠋ᠶ᠋ᠡᠨ ᠰᠡᠪ ᠰᠠᠶᠢᠬᠠᠨ ᠤᠷᠳᠤᠭᠤᠷ ᠴᠤᠪᠤᠨ ᠥᠩᠭᠡᠷᠡᠬᠦ ᠳ᠋ᠦ᠍ ᠣᠷᠣᠢᠲᠠᠪᠠᠴᠦ ᠭᠡᠮᠰᠢᠬᠦ ᠰᠡᠳᠬᠢᠯ ᠲᠥᠷᠥᠬᠦ ᠮᠡᠲᠦ ᠭᠤᠳᠤᠷᠠᠨ ᠭᠠᠰᠢᠭᠤᠳᠠᠬᠤ ᠠ᠋ᠴᠠ ᠥᠪᠡᠷ ᠦ᠋ᠨ ᠪᠡᠶᠡ ᠶ᠋ᠢ ᠦᠬᠦᠭᠡᠳ ᠣᠷᠣᠰᠢᠭᠤᠯᠵᠤ ᠶᠠᠪᠤᠬᠤ ᠶ᠋ᠢ ᠦᠵᠡᠬᠦ ᠨᠢ ᠪᠦᠷ ᠴᠦ᠍ ᠠᠶᠤᠮᠠᠷ ᠰᠠᠨᠠᠭᠳᠠᠵᠤ᠂ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠬᠡᠭᠦᠷ ᠣᠷᠣᠰᠢᠭᠤᠯᠬᠤ ᠭᠠᠵᠠᠷ ᠳᠠᠭᠠᠯᠳᠤᠨ ᠬᠦᠷᠴᠡᠢ᠃ ᠠᠪᠰᠠ ᠬᠢᠬᠦ ᠨᠦᠬᠡᠨ ᠦ᠌ ᠡᠮᠦᠨᠡ ᠣᠴᠢᠭᠠᠳ ᠵᠢᠷᠦᠬᠡ ᠨᠢ ᠬᠦᠩᠷᠢ ᠶ᠋ᠢᠨ ᠬᠡᠩᠭᠡᠷᠭᠡ ᠰᠢᠭ ᠬᠡᠩᠬᠦᠳᠡᠭ ᠳᠣᠲᠣᠷᠠ ᠲᠦᠩ ᠲᠦᠩ ᠴᠣᠬᠢᠵᠤ ᠪᠠᠢᠬᠤ ᠮᠡᠲᠦ ᠡᠷᠭᠢᠨ ᠲᠣᠭᠣᠷᠢᠨ ᠬᠠᠷᠠᠲᠠᠯᠠ᠂ ᠬᠣᠷᠰᠢᠶᠠᠨ ᠤ᠋ ᠠᠯᠪᠠᠨ ᠬᠠᠭᠠᠭᠴᠢᠳ ᠤ᠋ᠨ ᠴᠠᠭᠠᠭᠤᠷ ᠥᠨᠥᠬᠢ ᠲᠦᠷᠦᠭᠦᠨ ᠴᠤᠪᠤᠵᠤ ᠥᠩᠭᠡᠷᠡᠭᠰᠡᠨ ᠬᠢᠯᠢᠰ ᠦᠬᠦᠭᠰᠡᠨ ᠤᠯᠤᠰ ᠠᠵᠤ ᠠᠮᠢᠳᠤᠷᠠᠯ ᠢ᠋ᠶ᠋ᠠᠨ ᠠᠯᠳᠠᠵᠤ ᠵᠣᠪᠠᠨ ᠦᠬᠦᠭᠰᠡᠨ ᠲᠡᠳᠡᠨ ᠦ᠌ ᠠᠷᠤ ᠭᠡᠷ ᠦ᠋ᠨ ᠬᠥᠮᠦᠨ ᠬᠡᠳᠦᠨ ᠳᠠᠪᠬᠤᠷ ᠪᠦᠰᠡᠯᠡᠨ ᠲᠣᠭᠣᠷᠢᠵᠤ ᠵᠣᠭᠰᠣᠵᠤ ᠪᠠᠢᠭᠠ ᠨᠢ ᠬᠠᠷᠠᠭᠳᠠᠯᠠ᠃
— ᠮᠠᠨ ᠤ᠋ ᠬᠣᠷᠰᠢᠶᠠᠨ ᠳ᠋ᠤ᠌ ᠣᠯᠠᠨ ᠵᠢᠯ ᠮᠠᠨᠠᠭᠠᠴᠢ ᠬᠢᠵᠦ ᠪᠠᠢᠭᠰᠠᠨ ᠰᠢᠳᠤᠷᠭᠤ ᠲᠣᠮᠣᠭᠠ ᠲᠠᠢ ᠨᠥᠬᠥᠷ ᠳ᠋ᠣᠣ ᠨᠠᠰᠤᠨ ᠡᠴᠦᠰ ᠪᠣᠯᠤᠭᠰᠠᠨ ᠳ᠋ᠤ᠌ ᠬᠠᠮᠲᠤ ᠠᠯᠪᠠ ᠬᠠᠭᠠᠵᠤ ᠪᠠᠢᠭᠰᠠᠨ ᠠᠵᠢᠯᠴᠢᠨ ᠠᠯᠪᠠᠨ ᠬᠠᠭᠠᠭᠴᠢ ᠪᠢᠳᠡ ᠭᠠᠰᠢᠭᠤᠳᠠᠨ ᠶᠣᠰᠣᠯᠠᠵᠤ᠂ ᠰᠢᠳᠤᠷᠭᠤ ᠵᠢᠳᠬᠦᠯ ᠲᠡᠢ ᠶ᠋ᠢ ᠲᠡᠮᠳᠡᠭᠯᠡᠨ ᠳᠤᠷᠠᠰᠴᠤ ᠪᠠᠢᠨᠠ ᠭᠡᠵᠦ ᠳᠡᠯᠭᠡᠭᠦᠷ ᠦ᠋ᠨ ᠨᠢᠭᠡ ᠠᠯᠪᠠᠨ ᠬᠠᠭᠠᠭᠴᠢ ᠶ᠋ᠢ ᠠᠪᠰᠠᠨ ᠤ᠋ ᠡᠮᠦᠨᠡ ᠵᠣᠭᠰᠣᠨ ᠦᠭᠡ ᠬᠡᠯᠡᠬᠦ ᠳ᠋ᠦ᠍ ᠲᠡᠷᠡ ᠠᠯᠪᠠᠨ ᠬᠠᠭᠠᠭᠴᠢᠳ ᠤ᠋ᠨ ᠴᠠᠭᠠᠨᠠ ᠬᠢᠯᠢᠰ ᠬᠡᠷᠡᠭ ᠲᠤ ᠤᠨᠠᠭᠠᠵᠤ᠂ ᠡᠷᠡᠭᠦᠦ ᠰᠢᠭᠦᠯᠲᠡ ᠲᠤᠯᠭᠠᠵᠤ ᠵᠣᠪᠠᠭᠠᠨ ᠦᠬᠦᠭᠦᠯᠦᠭᠰᠡᠨ ᠮᠠᠩᠭᠠ ᠳ᠋ᠣᠣ ᠶ᠋ᠢᠨ ᠥᠪᠡᠷ ᠦ᠋ᠨ ᠭᠠᠷ ᠢ᠋ᠶ᠋ᠠᠷ ᠫᠤᠤᠳᠠᠨ ᠠᠯᠠᠭᠰᠠᠨ ᠭᠡᠮ ᠵᠠᠮ ᠦᠭᠡᠢ ᠣᠯᠠᠨ ᠤ᠋ ᠴᠠᠭᠠᠨᠠ ᠠ᠋ᠴᠠ ᠪᠠᠷᠣᠨ ᠤ᠋ ᠵᠠᠨᠳᠠᠯᠴᠢᠨ ᠰᠢᠫᠡᠢᠯᠤ᠋ ᠶ᠋ᠢᠨ ᠬᠠ᠂ ᠬᠠ᠂ ᠬᠠ! ᠪᠢ ᠪᠠ ᠴᠢ ᠬᠠᠮᠲᠤ ᠠᠵᠢᠯ ᠬᠢᠭᠰᠡᠨ᠂ ᠬᠠᠮᠲᠤ ᠡᠨᠳᠡ ᠬᠡᠪᠲᠡᠨᠡ᠂ ᠬᠠ᠂ ᠬᠠ᠂ ᠬᠠ! ᠭᠡᠵᠦ ᠬᠦᠢᠲᠡᠨ ᠢ᠋ᠶ᠋ᠡᠷ ᠢᠨᠢᠶᠡᠬᠦ ᠶ᠋ᠢ ᠨᠢ ᠰᠣᠨᠣᠰᠤᠭᠠᠳ ᠬᠠᠮᠤᠭ ᠪᠡᠶᠡ ᠨᠢ ᠠᠷᠵᠠᠰᠬᠢᠵᠦ᠄
— ᠪᠢ ᠰᠢᠳᠤᠷᠭᠤ ᠬᠥᠮᠦᠨ ᠪᠢᠰᠢ ᠠ᠋᠂ ᠪᠢ ᠣᠯᠠᠨ ᠬᠥᠮᠦᠨ ᠦ᠌ ᠮᠢᠬᠠ ᠴᠢᠰᠤ ᠢᠳᠡᠭᠰᠡᠨ ᠮᠠᠩᠭᠠ ᠳ᠋ᠣᠣ ᠭᠡᠳᠡᠭ ᠲᠦᠰᠢᠮᠡᠯ ᠠ᠋! ᠭᠡᠵᠦ ᠢᠴᠢᠬᠦ ᠨᠢᠯᠪᠤᠰᠤ ᠨᠢᠳᠦᠨ ᠡᠴᠡ ᠨᠢ ᠭᠣᠭᠣᠵᠢᠨ᠂ ᠬᠠᠷᠠᠴᠠ ᠨᠢ ᠬᠠᠢᠯᠤᠭᠰᠠᠨ ᠲᠤᠭᠤᠯᠭᠠ ᠮᠡᠲᠦ ᠲᠦᠯᠡᠵᠦ᠂ ᠪᠢ ᠰᠢᠳᠤᠷ᠊᠁ ᠭᠡᠳ ᠮᠡᠩᠭᠡᠷ ᠲᠡᠢ ᠴᠡᠭᠡᠵᠢ ᠨᠢ ᠬᠡᠷᠴᠢᠬᠡᠨᠡᠨ ᠣᠢᠴᠢᠬᠤ ᠳ᠋ᠤ᠌᠄
— ᠮᠠᠨᠠᠭᠠᠴᠢ ᠭᠤᠸᠠᠢ᠂ ᠲᠠ ᠶᠠᠭᠠᠬᠢᠪᠠ ᠠ᠋? ᠭᠡᠳ ᠬᠠᠵᠠᠭᠤ ᠠ᠋ᠴᠠ ᠨᠢ ᠨᠢᠭᠡ ᠬᠥᠮᠦᠨ ᠥᠨᠥ ᠮᠣᠳᠣᠨ ᠪᠠᠨᠲᠠᠩ ᠳᠡᠭᠡᠷᠡ ᠨᠢ ᠠᠶᠠᠷᠬᠠᠨ ᠲᠦᠰᠢᠵᠦ ᠰᠠᠭᠤᠯᠭᠠᠬᠤ ᠰᠢᠭ᠋ ᠪᠣᠯᠬᠤ ᠶ᠋ᠢ ᠮᠡᠳᠡᠭᠡᠳ ᠤᠬᠠᠭᠠᠨ ᠪᠠᠯᠠᠷᠳᠠᠨ ᠠᠮᠢᠰᠬᠤᠯ ᠨᠢ ᠲᠠᠰᠤᠷᠠᠵᠠᠢ᠃
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠩᠷᠢ ᠡᠵᠢ᠂ ᠠᠯᠲᠠᠨᠵᠢ᠂ ᠴᠤᠯᠮᠤᠨᠲᠤᠶᠠᠭᠠ
ᠬᠢᠨᠠᠭ᠍ᠴᠢ : ᠴᠤᠯᠮᠤᠨᠲᠤᠶᠠᠭᠠ
2024᠂ 1 ᠰᠠᠷᠠ ᠳ᠋ᠤ᠌