ᠴᠠᠭᠠᠨ ᠰᠠᠷᠠ ᠪᠠ ᠬᠠᠷᠠ ᠨᠢᠯᠪᠤᠰᠤ-ᠳ ᠨᠠᠴᠤᠭᠳᠣᠷᠵᠢЦагаан сар ба хар нулимс- Д.Нацагдорж
698ᠴᠠᠭᠠᠨ ᠰᠠᠷᠠ ᠪᠠ ᠬᠠᠷᠠ ᠨᠢᠯᠪᠤᠰᠤ
ᠳ ∙ ᠨᠠᠴᠤᠭᠳᠣᠷᠵᠢ
..... ᠳ᠋ᠤᠭᠠᠷ ᠣᠨ ᠤ᠋ ᠬᠠᠭᠤᠴᠢᠨ ᠤᠯᠠᠷᠢᠯ ᠤ᠋ᠨ ᠠᠷᠪᠠᠨ ᠬᠣᠶᠠᠷ ᠰᠠᠷᠠ ᠶ᠋ᠢᠨ ᠭᠤᠴᠢᠨ ᠤ᠋ ᠡᠳᠦᠷ ᠲᠩᠷᠢ ᠴᠡᠯᠮᠡᠭ᠂ ᠨᠠᠷᠠ ᠰᠢᠷᠠᠯᠠᠨ ᠲᠤᠰᠤᠭᠰᠠᠨ ᠦᠨᠡᠬᠡᠷ ᠨᠢᠭᠡ ᠰᠠᠢᠬᠠᠨ ᠡᠳᠦᠷ ᠪᠠᠢᠪᠠ᠃ ᠬᠣᠢᠲᠤ ᠠᠭᠤᠯᠠ ᠶ᠋ᠢᠨ ᠡᠩᠭᠡᠷ ᠢ᠋ᠶ᠋ᠡᠷ ᠲᠤᠩ ᠴᠠᠭᠠᠨ ᠴᠠᠰᠤ ᠭᠢᠯᠲᠠᠭᠠᠨᠠᠨ᠂ ᠲᠡᠭᠦᠨ ᠦ᠌ ᠵᠠᠬᠠ ᠰᠡᠵᠢᠭᠦᠷ ᠨᠢ ᠰᠡᠮᠡᠷᠡᠵᠦ ᠣᠷᠣᠵᠤ ᠶᠠᠳᠠᠭᠰᠠᠨ ᠡᠴᠡᠩᠬᠡᠢ ᠲᠤᠷᠠᠩᠬᠠᠢ ᠦᠬᠡᠷ ᠮᠠᠯ ᠤ᠋ᠳ ᠬᠥᠯ ᠳᠡᠭᠡᠷᠡ ᠭᠠᠷᠴᠤ᠂ ᠡᠭᠦᠪᠡᠷ ᠲᠡᠭᠦᠪᠡᠷ ᠰᠡᠭᠦᠯ ᠢ᠋ᠶ᠋ᠡᠨ ᠰᠢᠷᠪᠢᠨ ᠶᠠᠪᠤᠵᠠᠭᠠᠳᠠᠭ ᠨᠢ ᠰᠠᠨᠠᠭᠳᠠᠵᠤ᠂ ᠲᠡᠰᠬᠢᠮᠡ ᠬᠦᠢᠲᠡᠨ ᠦ᠌ ᠢᠯᠴᠢ ᠬᠠᠷᠢᠭᠠᠳ᠂ ᠬᠠᠪᠤᠷ ᠤ᠋ᠨ ᠰᠠᠢᠬᠠᠨ ᠤᠯᠠᠷᠢᠯ ᠢᠷᠡᠵᠦ ᠪᠠᠢᠭᠠ ᠨᠢ ᠮᠡᠳᠡᠭᠳᠡᠨ᠂ ᠬᠡᠳᠦᠢ ᠪᠡᠷ ᠲᠠᠭᠠᠯᠠᠮᠵᠢᠲᠠᠢ ᠰᠠᠢᠬᠠᠨ ᠠᠪᠠᠴᠤ᠂ ᠮᠠᠯᠴᠢᠨ ᠠᠷᠠᠳ ᠤ᠋ᠨ ᠪᠦᠰᠡᠭᠦᠢ ᠴᠠᠷᠮᠠ᠂ ᠳᠠᠭᠳᠤᠩ ᠤ᠋ᠨ ᠬᠠᠶᠠᠭᠠᠨ ᠳ᠋ᠤ᠌ ᠵᠣᠭᠰᠣᠵᠤ᠂ ᠰᠡᠳᠬᠢᠯ ᠳ᠋ᠦ᠍ ᠶᠡᠬᠡ ᠯᠡ ᠭᠤᠨᠢᠬᠠᠷᠠᠯᠲᠠᠢ ᠪᠠᠷ ᠡᠯᠳᠡᠪ ᠵᠦᠢᠯ ᠢ᠋ ᠪᠣᠳᠣᠮᠠᠭᠯᠠᠨ ᠤᠷᠲᠤ ᠤᠷᠲᠤ ᠰᠡᠭᠦᠷᠡᠰᠦ ᠠᠯᠳᠠᠨᠠ᠃
ᠶᠠᠭᠤ ᠭᠡᠪᠡᠯ᠂ ᠴᠠᠷᠮᠠ ᠶ᠋ᠢᠨ ᠨᠤᠲᠤᠭ ᠭᠤᠷᠪᠠᠨ ᠰᠠᠢᠬᠠᠨ ᠤ᠋ ᠥᠪᠥᠷ ᠲᠦ᠍ ᠪᠥᠯᠥᠭᠡ᠃ ᠭᠡᠷ ᠶᠠᠳᠠᠭᠤ ᠲᠤᠯᠠ᠂ ᠡᠴᠢᠭᠡ ᠡᠬᠡ ᠨᠢ ᠲᠡᠭᠦᠨ ᠢ᠋ ᠬᠣᠲᠠ ᠳ᠋ᠤ᠌ ᠢᠯᠡᠭᠡᠵᠦ᠂ ᠳᠠᠭᠳᠤᠩ ᠬᠢ ᠶ᠋ᠢᠨ ᠳ᠋ᠦ᠍ ᠵᠠᠷᠤᠴᠠᠯᠠᠭᠤᠯᠤᠨ ᠰᠠᠭᠤᠯᠭᠠᠭᠰᠠᠭᠠᠷ᠂ ᠭᠤᠷᠪᠠᠨ ᠵᠢᠯ ᠦ᠋ᠨ ᠨᠢᠭᠤᠷ ᠦᠵᠡᠵᠦ ᠪᠠᠢᠭᠠ ᠨᠢ ᠡᠨᠡ᠃
ᠳᠠᠭᠳᠤᠩ ᠤ᠋ᠨ ᠠᠵᠢᠯ ᠤ᠋ᠨ ᠶᠡᠬᠡ ᠶ᠋ᠢ ᠬᠡᠯᠡᠬᠦ ᠤᠤ᠂ ᠲᠡᠭᠦᠨ ᠦ᠌ ᠡᠬᠡᠨᠡᠷ ᠦ᠋ᠨ ᠴᠢᠩᠭᠠ ᠶ᠋ᠢ ᠬᠡᠯᠡᠬᠦ ᠤᠤ᠂ ᠢᠷᠡᠭᠰᠡᠨ ᠡᠴᠡ ᠬᠣᠢᠰᠢ ᠬᠡᠳᠦᠨ ᠵᠢᠯ ᠦ᠋ᠨ ᠳᠣᠲᠣᠷᠠ ᠶᠡᠷᠦ ᠴᠤ᠌ ᠠᠮᠠᠷᠠᠭᠰᠠᠨ ᠦᠭᠡᠢ᠂ ᠪᠡᠶᠡ ᠰᠡᠳᠬᠢᠯ ᠦ᠋ᠨ ᠵᠣᠪᠠᠯᠠᠩ ᠢ᠋ ᠴᠠᠳᠲᠠᠯᠠ ᠦᠵᠡᠵᠡᠢ᠃ ᠡᠨᠡ ᠵᠠᠪᠰᠠᠷ ᠳᠠᠭᠳᠤᠩ ᠤ᠋ᠨ ᠡᠬᠡᠨᠡᠷ ᠦ᠋ᠨ ᠲᠠᠷᠭᠤᠯᠠᠭᠰᠠᠨ᠂ ᠴᠠᠷᠮᠠ ᠶ᠋ᠢᠨ ᠲᠤᠷᠠᠭᠰᠠᠨ ᠬᠣᠶᠠᠷ ᠶᠠᠭ ᠲᠡᠩᠴᠡᠨᠡ᠃ ᠢᠯᠠᠩᠭᠤᠶᠠ ᠣᠢᠷᠠ ᠡᠴᠡ ᠴᠠᠭᠠᠨ ᠰᠠᠷᠠ ᠪᠣᠯᠤᠨᠠ ᠭᠡᠮᠡᠨ ᠠᠩᠬᠠᠨ ᠤ᠋ ᠬᠡᠳᠦᠨ ᠰᠥᠨᠢ ᠪᠠᠩᠰᠢ ᠬᠢᠵᠦ ᠨᠣᠢᠷ ᠦᠭᠡᠢ ᠬᠣᠨᠣᠪᠠ᠃ ᠳᠠᠷᠠᠭᠠᠬᠢ ᠬᠡᠳᠦᠨ ᠰᠥᠨᠢ ᠶᠠᠭᠤᠮᠠ ᠣᠶᠣᠵᠤ ᠦᠷ ᠴᠠᠢᠯᠭᠠᠪᠠ᠃ ᠥᠨᠥ ᠡᠳᠦᠷ ᠦᠷᠭᠡᠯᠡᠨ ᠨᠣᠢᠷᠮᠤᠭᠯᠠᠵᠤ᠂ ᠪᠦᠬᠦᠢ ᠪᠡᠶᠡ ᠵᠦᠳᠡᠷᠡᠨ ᠭᠠᠯᠢᠷᠠᠪᠠᠴᠤ᠂ ᠤᠷᠢᠳᠤ ᠨᠤᠲᠤᠭ ᠲᠤ᠌ ᠪᠠᠢᠬᠤ ᠳ᠋ᠠᠭᠠᠨ ᠡᠢᠮᠦ ᠨᠢᠭᠡ ᠰᠠᠢᠬᠠᠨ ᠨᠠᠷᠠ ᠲᠣᠰᠴᠤ᠂ ᠠᠭᠤᠯᠠ ᠲᠠᠯᠠ ᠶ᠋ᠢᠨ ᠴᠠᠰᠤ ᠬᠠᠢᠯᠤᠭᠰᠠᠨ ᠬᠠᠪᠤᠷ ᠤ᠋ᠨ ᠰᠠᠢᠬᠠᠨ ᠡᠳᠦᠷ ᠭᠡᠷ ᠦ᠋ᠨ ᠬᠠᠶᠠᠭᠠᠨ ᠳ᠋ᠠᠭᠠᠨ ᠰᠠᠭᠤᠵᠤ᠂ ᠰᠠᠶᠢ ᠲᠥᠷᠥᠭᠰᠡᠨ ᠬᠡᠳᠦᠨ ᠬᠤᠷᠠᠭᠠ᠂ ᠢᠰᠢᠭᠡ ᠲᠡᠢ ᠪᠡᠨ ᠨᠠᠭᠠᠳᠤᠨ ᠲᠣᠭᠯᠠᠵᠤ ᠪᠠᠢᠭᠰᠠᠨ ᠨᠢ ᠭᠡᠨᠡᠳᠲᠡ ᠰᠠᠨᠠᠭᠳᠠᠵᠤ᠂ ᠭᠡᠷ ᠣᠷᠣᠨ ᠡᠴᠢᠭᠡ ᠡᠬᠡ᠂ ᠬᠥᠳᠡᠭᠡ ᠨᠤᠲᠤᠭ ᠶᠤᠭᠠᠨ ᠮᠥᠷᠥᠭᠡᠳᠦᠨ ᠤᠢᠳᠬᠠᠷᠯᠠᠵᠤ᠂ ᠰᠡᠳᠬᠢᠯ ᠨᠢ ᠬᠥᠳᠡᠯᠦᠨ ᠪᠠᠢᠭᠠ ᠨᠢ ᠡᠨᠡ ᠠᠵᠤᠭᠤ᠃
ᠭᠡᠲᠡᠯᠡ ᠳᠠᠭᠳᠤᠩ ᠤ᠋ᠨ ᠡᠬᠡᠨᠡᠷ ᠵᠢᠷᠭᠤᠭᠠᠨ ᠬᠠᠨᠠ ᠲᠠᠢ ᠲᠣᠮᠣ ᠭᠡᠭᠴᠢ ᠶ᠋ᠢᠨ ᠴᠠᠭᠠᠨ ᠭᠡᠷ ᠡᠴᠡ ᠭᠠᠷᠴᠤ ᠢᠷᠡᠭᠡᠳ᠂ ᠶᠡᠬᠡ ᠯᠡ ᠬᠦᠢᠲᠡᠨ ᠢ᠋ᠶ᠋ᠡᠷ ᠭᠢᠯᠤᠢᠨ ᠬᠠᠷᠠᠵᠤ᠂ ᠠᠶᠠ ᠦᠭᠡᠢ ᠪᠡᠷ ᠵᠠᠩᠳᠤᠷᠤᠨ« ᠴᠢ ᠶᠠᠭᠠᠬᠢᠭᠰᠠᠨ ᠬᠠᠷᠠ ᠵᠣᠯᠢᠭ ᠪᠣᠢ? ᠣᠯᠪᠣᠭ ᠬᠡᠪᠢᠰᠦᠨ ᠦ᠌ ᠰᠢᠷᠣᠢ᠂ ᠲᠣᠭᠣᠰᠣ ᠶ᠋ᠢ ᠭᠦᠪᠢᠭᠡᠳ ᠢᠷᠡ ᠭᠡᠬᠦ ᠳ᠋ᠦ᠍ ᠡᠨᠳᠡ ᠶᠠᠭᠤ ᠶ᠋ᠢ ᠪᠡᠨ ᠬᠢᠭᠰᠡᠨ ᠮᠠᠭᠤ ᠮᠣᠨᠳᠢ ᠪᠣᠢ? ᠬᠠᠰᠢᠶᠠᠨ ᠤ᠋ ᠬᠣᠭ ᠠᠷᠢᠯᠭᠠᠭᠰᠠᠨ ᠴᠢᠨᠢ ᠡᠨᠡ ᠤᠤ? ᠮᠠᠷᠭᠠᠰᠢ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠨᠢᠭᠡᠨ ᠭᠡᠭᠴᠢ ᠶ᠋ᠢ ᠮᠡᠳᠡᠵᠦ ᠪᠠᠢᠨᠠ ᠤᠤ᠂ ᠦᠭᠡᠢ ᠪᠠᠢᠨᠠ ᠤᠤ ᠮᠠᠯ ᠴᠢ» ᠭᠡᠳ ᠲᠤᠤᠵᠤᠤ ᠪᠠᠷ ᠨᠢᠷᠤᠭᠤᠨ ᠳᠤᠮᠳᠠ ᠨᠢᠭᠡ ᠴᠣᠬᠢᠵᠤ ᠠᠪᠤᠭᠠᠳ᠂ ᠠᠭᠤᠷᠯᠠᠨ ᠵᠣᠭᠰᠣᠬᠤ ᠳ᠋ᠤ᠌ ᠴᠠᠷᠮᠠ ᠡᠰᠡᠷᠭᠦᠴᠡᠬᠦ ᠠᠷᠭᠠ ᠦᠭᠡᠢ ᠲᠤᠯᠠ᠂ «ᠲᠣᠯᠣᠭᠠᠢ ᠡᠪᠡᠳᠦᠭᠡᠳ ᠰᠠᠯᠬᠢᠨ ᠳ᠋ᠤ᠌ ᠵᠣᠭᠰᠣᠭᠰᠠᠨ ᠪᠢᠯᠡ᠂ ᠠᠪᠠᠭᠠᠢ ᠮᠢᠨᠢ» ᠭᠡᠳ ᠬᠠᠵᠠᠭᠤ ᠳ᠋ᠤ᠌ ᠪᠦᠬᠦᠢ ᠲᠣᠮᠣ ᠬᠡᠪᠢᠰ ᠢ᠋ ᠠᠪᠴᠤ᠂ ᠳᠠᠭᠠᠭᠠᠵᠤ ᠶᠠᠳᠠᠨ᠂ ᠴᠠᠰᠤᠨ ᠳᠡᠭᠡᠷᠡ ᠰᠡᠭᠰᠦᠷᠦᠨᠡ᠃ ᠡᠨᠡ ᠦᠶᠡ ᠳ᠋ᠦ᠍ ᠨᠢᠳᠤᠨᠤᠨ ᠵᠢᠯ ᠦ᠋ᠨ ᠪᠠᠷᠢᠭᠤᠯᠤᠭᠰᠠᠨ ᠲᠠᠪᠤᠨ ᠵᠠᠩ ᠤ᠋ᠨ ᠣᠷᠣᠰ ᠪᠠᠢᠰᠢᠩ ᠤ᠋ᠨ ᠴᠣᠩᠬᠣ ᠪᠠᠷ ᠳᠠᠭᠳᠤᠩ ᠤ᠋ᠨ ᠥᠬᠢᠨ ᠮᠢᠳᠤᠭᠮᠠ ᠭᠡᠵᠢᠭᠡ ᠦᠰᠦ ᠪᠡᠨ ᠰᠠᠮᠨᠠᠨ᠂ ᠨᠢᠭᠤᠷ ᠲᠤ᠌ ᠪᠠᠨ ᠣᠤᠠ ᠡᠩᠭᠡᠰᠬᠡ ᠳᠦᠷᠭᠢᠨ ᠪᠠᠰᠠᠬᠦ ᠰᠢᠨᠡ ᠬᠢᠭᠰᠡᠨ ᠪᠣᠷᠣ ᠨᠣᠭᠣᠭᠠᠨ ᠲᠣᠷᠭᠠᠨ ᠳᠡᠪᠡᠯ ᠢ᠋ᠶ᠋ᠡᠨ ᠲᠠᠭᠠᠷᠠᠭᠤᠯᠤᠨ ᠡᠮᠦᠰᠴᠦ ᠪᠠᠢᠬᠤ ᠨᠢ ᠦᠵᠡᠭᠳᠡᠨᠡ᠃ ᠪᠠᠢᠰᠢᠩ ᠤ᠋ᠨ ᠳᠣᠲᠣᠷᠠ ᠢᠰᠬᠡᠷᠦᠨ ᠳᠠᠭᠤᠯᠠᠵᠤ ᠡᠰᠢ ᠲᠡᠰᠢ ᠰᠡᠯᠡᠭᠦᠴᠡᠬᠦ ᠪᠥᠭᠡᠳ ᠴᠣᠩᠬᠣᠨ ᠤ᠋ ᠪᠢᠴᠢᠬᠠᠨ ᠰᠠᠯᠬᠢᠪᠴᠢ ᠶ᠋ᠢ ᠨᠡᠭᠡᠭᠡᠵᠦ᠂ ᠴᠠᠷᠮᠠ ᠶ᠋ᠢ ᠳᠠᠭᠤᠳᠠᠨ᠄
«ᠵᠠᠯᠠᠭᠤ ᠠᠢᠯᠴᠢᠨ ᠡᠷᠡᠴᠦᠳ ᠢᠷᠡᠪᠡᠯ ᠵᠡᠭᠦᠨ ᠲᠠᠰᠤᠯᠭᠠᠨ ᠳ᠋ᠤ᠌ ᠤᠷᠤᠭᠤᠯ» ᠭᠡᠮᠡᠨ ᠪᠠᠰᠠ ᠲᠤᠰᠢᠶᠠᠯ ᠭᠠᠷᠭᠠᠨᠠ᠃ ᠴᠠᠷᠮᠠ᠂ ᠮᠢᠳᠣᠭᠮᠠ ᠶ᠋ᠢᠨ ᠲᠣᠷᠭᠠᠨ ᠳᠡᠪᠡᠯ ᠦ᠋ᠨ ᠥᠩᠭᠡᠨ ᠳ᠋ᠦ᠍ ᠭᠢᠯᠪᠠᠬᠤ ᠳ᠋ᠠᠭᠠᠨ ᠥᠪᠡᠷ ᠦ᠋ᠨ ᠮᠠᠭᠤ ᠤᠷᠠᠩᠬᠠᠢ ᠳᠠᠪᠤᠤ ᠳᠡᠪᠡᠯ ᠤᠷᠤᠭᠤ ᠪᠠᠨ ᠨᠢᠭᠡ ᠬᠠᠷᠠᠭᠠᠳ᠂ ᠮᠢᠳᠣᠭᠮᠠ ᠶ᠋ᠢᠨ ᠲᠠᠩᠬᠢᠯᠵᠠᠭᠤᠷ ᠪᠠᠢᠳᠠᠯ ᠢ᠋ ᠥᠪᠡᠷ ᠦ᠋ᠨ ᠡᠨᠡᠯᠦᠯᠲᠡ ᠪᠠᠢᠳᠠᠯ ᠲᠠᠢ ᠪᠠᠷ ᠬᠠᠷᠰᠢᠭᠤᠯᠤᠨ ᠪᠣᠳᠣᠵᠤ᠂ ᠨᠢᠳᠦᠨ ᠦ᠌ ᠪᠡᠨ ᠨᠢᠯᠪᠤᠰᠤ ᠶ᠋ᠢ ᠭᠢᠯᠲᠦᠭᠡᠨᠡᠭᠦᠯᠦᠭᠰᠡᠭᠡᠷ ᠭᠡᠳᠡᠷᠭᠦ ᠣᠳᠴᠤ ᠪᠠᠰᠠ ᠣᠯᠪᠣᠭ ᠵᠢᠷᠢᠮ ᠦ᠋ᠨ ᠲᠣᠭᠣᠰᠣ ᠰᠢᠷᠣᠢ ᠶ᠋ᠢ ᠭᠦᠪᠢᠵᠦ ᠱᠦᠭᠦᠷᠳᠡᠬᠦ ᠶ᠋ᠢᠨ ᠬᠠᠮᠲᠤ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠡᠳᠦᠷ ᠮᠠᠨ ᠤ᠋ ᠭᠡᠷ ᠦ᠋ᠨ ᠡᠵᠡᠳ ᠴᠥᠮ ᠰᠠᠢᠬᠠᠨ ᠲᠣᠷᠭᠠ ᠳᠤᠷᠳᠤᠩ ᠳᠡᠪᠡᠯ᠂ ᠪᠤᠭᠤ ᠮᠢᠨᠵᠢᠨ ᠮᠠᠯᠠᠭᠠᠢ ᠬᠢᠵᠦ ᠡᠮᠦᠰᠴᠡᠭᠡᠨᠡ᠃
ᠡᠯᠳᠡᠪ ᠵᠦᠢᠯ ᠦ᠋ᠨ ᠠᠮᠲᠠᠲᠤ ᠢᠳᠡᠭᠡ ᠪᠠ ᠠᠷᠢᠬᠢ ᠳᠠᠷᠠᠰᠤ ᠶ᠋ᠢ ᠲᠥᠬᠥᠭᠡᠷᠦᠨ ᠢᠳᠡᠵᠦ ᠤᠤᠭᠤᠵᠠᠭᠠᠬᠤ ᠨᠢ ᠶᠠᠮᠠᠷ ᠶᠡᠬᠡ ᠵᠢᠷᠭᠠᠯ ᠪᠣᠢ? ᠲᠡᠢᠨ ᠠᠲᠠᠯᠠ ᠪᠢ ᠶᠠᠭᠤᠨ ᠳ᠋ᠤ᠌ ᠢᠩᠭᠢᠵᠦ ᠨᠣᠢᠷ ᠳᠤᠲᠠᠭᠤ᠂ ᠤᠷᠠᠩᠬᠠᠢ ᠳᠡᠪᠡᠯ ᠲᠡᠢ᠂ ᠡᠨᠡᠯᠦᠨ ᠰᠢᠨᠠᠯᠤᠨ ᠶᠠᠪᠤᠨᠠ ᠭᠡᠵᠦ ᠪᠣᠳᠣᠪᠠᠴᠤ᠂ ᠨᠠᠷᠢᠨ ᠤᠴᠢᠷ ᠢ᠋ ᠣᠯᠵᠤ ᠡᠰᠡ ᠮᠡᠳᠡᠨ ᠭᠠᠭᠴᠠᠬᠦ ᠮᠢᠳᠤᠭᠮᠠ ᠬᠠᠭᠤᠴᠢᠨ ᠳᠡᠪᠡᠯ ᠡᠴᠡ ᠪᠡᠨ ᠨᠢᠭᠡ ᠶ᠋ᠢ ᠨᠠᠳᠠ ᠳ᠋ᠤ᠌ ᠡᠮᠦᠰᠦᠭᠦᠯᠬᠦ ᠪᠢᠵᠡ ᠭᠡᠮᠡᠨ ᠭᠣᠷᠢᠳᠠᠨᠠ᠃ ᠳᠡᠪᠢᠰᠬᠡᠷ ᠦ᠋ᠳ ᠢ᠋ ᠴᠡᠪᠡᠷᠯᠡᠵᠦ ᠳᠠᠭᠤᠰᠤᠭᠠᠳ᠂ ᠪᠠᠢᠰᠢᠩ ᠤ᠋ᠨ ᠡᠮᠦᠨᠡᠬᠢ ᠬᠣᠭ ᠢ᠋ ᠠᠷᠤᠭ ᠲᠤ᠌ ᠠᠭᠤᠯᠵᠤ ᠡᠭᠦᠷᠦᠨ᠂ ᠬᠠᠰᠢᠶᠠᠨ ᠤ᠋ ᠬᠠᠭᠠᠯᠭᠠᠨ ᠳ᠋ᠤ᠌ ᠬᠦᠷᠲᠡᠯᠡ᠂ ᠭᠠᠳᠠᠨᠠ ᠡᠴᠡ ᠫᠦᠰᠡᠨ ᠦ᠌ ᠬᠢᠲᠠᠳ ᠤ᠋ᠳ ᠴᠠᠭᠠᠨ ᠸᠠᠳᠠᠩ ᠲᠠᠢ ᠪᠣᠣᠪᠣ ᠪᠣᠯᠤᠨ ᠪᠡᠯᠡᠭ ᠦ᠋ᠨ ᠵᠦᠢᠯᠡᠰ ᠢ᠋ ᠠᠪᠴᠤ ᠢᠷᠡᠨᠡ᠃ ᠵᠥᠷᠢᠵᠦ ᠭᠠᠷᠬᠤ ᠳ᠋ᠤ᠌ ᠨᠢ ᠲᠡᠳᠡᠭᠡᠷ ᠬᠢᠲᠠᠳ ᠤ᠋ᠳ᠄ «ᠠᠢ ᠲᠠᠨ ᠤ᠋ ᠰᠣᠬᠣᠷᠠᠭᠰᠠᠨ᠂ ᠨᠠᠷᠢᠨ ᠶᠠᠭᠤᠮᠠᠨ ᠳᠡᠭᠡᠷᠡ ᠶᠠᠭᠤᠨ ᠳ᠋ᠤ᠌ ᠬᠣᠭ ᠪᠤᠷᠲᠠᠭ ᠭᠣᠭᠣᠵᠢᠭᠤᠯᠤᠭᠰᠠᠨ ᠪᠠᠢᠨᠠ! ᠠᠢ ᠮᠠᠩᠭᠤᠤ ᠵᠣᠯᠢᠭ ᠠ» ᠭᠡᠵᠦ ᠪᠠᠰᠠ ᠵᠠᠩᠳᠤᠷᠤᠨ ᠬᠠᠷᠢᠶᠠᠨᠠ᠃ ᠠᠶᠠ᠂ ᠴᠠᠷᠮᠠ ᠶ᠋ᠢ ᠨᠣᠶᠠᠯᠠᠬᠤ ᠬᠥᠮᠦᠨ ᠶᠠᠭᠠᠬᠢᠭᠰᠠᠨ ᠣᠯᠠᠨ ᠪᠢᠯᠡ᠃ ᠬᠣᠭ ᠢ᠋ ᠭᠠᠳᠠᠨᠠ ᠠᠰᠬᠠᠭᠠᠳ ᠢᠷᠡᠪᠡᠯ᠂ ᠮᠢᠳᠤᠭᠮᠠ ᠪᠠᠰᠠ ᠳᠠᠭᠤᠳᠠᠵᠤ᠄ « ᠨᠢᠭᠤᠷ ᠤ᠋ᠨ ᠤᠰᠤ ᠠᠰᠬᠠ» ᠭᠡᠨᠡ᠃
ᠦᠳᠡ ᠥᠩᠭᠡᠷᠡᠭᠰᠡᠨ ᠦ᠌ ᠬᠣᠢᠨᠠ ᠲᠦᠯᠡᠭᠡ ᠬᠢᠷᠥᠭᠡᠳᠡᠬᠦ ᠬᠡᠷᠡᠭᠲᠡᠢ ᠪᠣᠯᠪᠠ᠃ ᠭᠠᠭᠴᠠᠭᠠᠷ ᠶᠠᠳᠠᠵᠤ ᠪᠠᠢᠲᠠᠯᠠ᠂ ᠪᠠᠷᠠᠭᠤᠨ ᠬᠠᠮᠠᠷ ᠤ᠋ᠨ ᠠᠢᠯ ᠳ᠋ᠤ᠌ ᠮᠣᠷᠢ ᠤᠰᠤᠯᠠᠳᠠᠭ ᠵᠠᠯᠠᠭᠤ ᠬᠥᠪᠡᠭᠦᠨ ᠴᠦᠯᠲᠦᠮ ᠬᠠᠰᠢᠶᠠᠨ ᠤ᠋ ᠵᠠᠪᠰᠠᠷ ᠢ᠋ᠶ᠋ᠠᠷ ᠲᠡᠭᠦᠨ ᠢ᠋ ᠳᠠᠭᠤᠳᠠᠪᠠ᠃ ᠴᠦᠯᠲᠦᠮ᠂ ᠴᠠᠷᠮᠠ ᠡᠨᠡ ᠬᠣᠶᠠᠷ ᠠᠢᠯ ᠤ᠋ᠨ ᠵᠠᠷᠤᠴᠠ ᠪᠣᠯᠤᠭᠰᠠᠨ ᠤ᠋ ᠭᠠᠪᠢᠶᠠ ᠪᠠᠷ ᠳᠣᠲᠣᠨᠣ ᠲᠠᠨᠢᠯᠴᠠᠵᠤ ᠠᠮᠠᠷᠠᠭᠯᠠᠭᠰᠠᠨ ᠪᠣᠯᠪᠠᠴᠤ᠂ ᠭᠡᠷ ᠦ᠋ᠨ ᠡᠵᠡᠳ᠂ ᠳᠣᠣᠷᠠᠲᠤ ᠬᠥᠮᠦᠰ ᠵᠢᠷᠭᠠᠯ ᠮᠡᠳᠡᠳᠡᠭ ᠦᠭᠡᠢ᠂ ᠶᠠᠳᠠᠭᠤ ᠬᠥᠮᠦᠨ ᠳ᠋ᠦ᠍ ᠢᠨᠠᠭ ᠪᠠᠢᠳᠠᠭ ᠦᠭᠡᠢ ᠭᠡᠵᠦ ᠲᠡᠷᠡ ᠬᠣᠶᠠᠷ ᠢ᠋ ᠡᠯᠡᠭᠯᠡᠨ ᠨᠠᠭᠠᠳᠬᠤ ᠪᠠ ᠱᠣᠭᠣᠪᠲᠣᠷᠯᠠᠨ ᠵᠠᠩᠨᠠᠵᠤ᠂ ᠤᠴᠠᠷᠠᠭᠤᠯᠳᠠᠭ ᠦᠭᠡᠢ ᠪᠥᠯᠥᠭᠡ᠃
ᠲᠡᠭᠦᠨ ᠡᠴᠡ ᠰᠠᠨᠠᠮᠰᠠᠷ ᠦᠭᠡᠢ ᠬᠠᠭᠠᠯᠭᠠᠨ ᠤ᠋ ᠳᠡᠷᠭᠡᠳᠡ ᠲᠤᠰ ᠬᠥᠮᠦᠨ ᠢᠷᠡᠬᠦ ᠳ᠋ᠦ᠍ ᠮᠢᠳᠤᠭᠮᠠ ᠴᠣᠩᠬᠣ ᠪᠠᠷ ᠥᠪᠡᠷ ᠦ᠋ᠨ ᠬᠠᠨᠢᠯᠠᠭᠰᠠᠨ ᠨᠢᠭᠡ ᠵᠠᠯᠠᠭᠤ ᠡᠷᠡ ᠶ᠋ᠢ ᠲᠠᠨᠢᠭᠠᠳ᠂ ᠬᠤᠷᠳᠤᠯᠠᠨ ᠭᠠᠷᠴᠤ᠂ ᠲᠡᠭᠦᠨ ᠢ᠋ ᠣᠷᠣᠭᠤᠯᠤᠨ ᠬᠠᠮᠲᠤ ᠪᠠᠷ ᠬᠥᠲᠥᠯᠦᠯᠴᠡᠨ᠂ ᠢᠨᠢᠶᠡᠯᠳᠦᠨ ᠬᠥᠬᠥᠷᠡᠯᠳᠦᠨ ᠬᠣᠢᠲᠤ ᠪᠠᠢᠰᠢᠩ ᠤ᠋ᠨ ᠵᠦᠭ ᠣᠳᠬᠤ ᠶ᠋ᠢᠨ ᠵᠠᠭᠤᠷᠠ ᠴᠠᠷᠮᠠ ᠶ᠋ᠢ ᠦᠵᠡᠭᠡᠳ᠄ « ᠶᠠᠭᠠᠬᠢᠵᠤ ᠪᠠᠢᠭᠠ ᠴᠢᠨᠢ ᠡᠨᠡ ᠪᠣᠢ?» ᠭᠡᠵᠦ ᠱᠣᠭᠣᠪᠲᠣᠷᠯᠠᠨ ᠬᠡᠯᠡᠭᠡᠳ ᠣᠳᠬᠤ ᠳᠠᠭᠤ ᠶ᠋ᠢ ᠳᠠᠭᠳᠤᠩ ᠤ᠋ᠨ ᠡᠬᠡᠨᠡᠷ ᠰᠣᠨᠣᠰᠤᠭᠰᠠᠨ ᠳᠠᠷᠤᠢ᠂ ᠭᠡᠷ ᠦ᠋ᠨ ᠡᠭᠦᠳᠡ ᠶ᠋ᠢ ᠴᠢᠩᠭᠠ ᠬᠠᠶᠠᠨ ᠭᠠᠷᠴᠤ ᠢᠷᠡᠭᠡᠳ᠄ 《ᠴᠢ ᠶᠠᠭᠠᠬᠢᠭᠰᠠᠨ ᠵᠣᠯᠢᠭ ᠪᠣᠢ᠂ ᠲᠦᠯᠡᠭᠡ ᠪᠡᠨ ᠬᠢᠷᠥᠭᠡᠳᠡᠬᠦ ᠦᠭᠡᠢ᠂ ᠶᠠᠭᠠᠬᠢᠭᠰᠠᠨ ᠮᠣᠨᠳᠢ ᠪᠣᠢ》 ᠭᠡᠵᠦ ᠵᠠᠩᠳᠤᠷᠤᠨᠠ᠃ ᠡᠭᠦᠨ ᠳ᠋ᠦ᠍ ᠴᠠᠷᠮᠠ ᠨᠢᠭᠡ ᠤᠬᠠᠭᠠᠨ ᠣᠯᠵᠤ ᠄ 《ᠪᠢ ᠭᠠᠭᠴᠠᠭᠠᠷ ᠬᠢᠷᠥᠭᠡᠳᠡᠬᠦ ᠳ᠋ᠦ᠍ ᠤᠳᠠᠭᠠᠨ ᠪᠥᠭᠡᠳ ᠥᠭᠡᠷᠡ ᠠᠵᠢᠯ ᠰᠠᠭᠠᠳᠬᠤ ᠲᠤᠯᠠ ᠴᠦᠯᠲᠦᠮ ᠢ᠋ ᠲᠤᠰᠠᠯᠠᠯᠴᠠᠬᠤ ᠶ᠋ᠢ ᠭᠤᠶᠤᠭᠰᠠᠨ ᠪᠢᠯᠡ》ᠭᠡᠬᠦ ᠳ᠋ᠦ᠍ ᠳᠠᠭᠳᠤᠩ ᠤ᠋ᠨ ᠡᠬᠡᠨᠡᠷ ᠠᠷᠭᠠ ᠦᠭᠡᠢ ᠠᠵᠢᠯ ᠢ᠋ᠶ᠋ᠠᠨ ᠪᠣᠳᠣᠵᠤ ᠄ 《ᠲᠡᠭᠡᠪᠡᠯ ᠲᠠ ᠬᠣᠶᠠᠭᠤᠯᠠ ᠪᠣᠰᠢᠭᠣ ᠬᠢᠷᠥᠭᠡᠳᠡᠬᠦ ᠦᠭᠡᠢ ᠶᠠᠭᠠᠬᠢᠭᠰᠠᠨ ᠶᠤᠮ ᠪᠣᠢ》 ᠭᠡᠳ ᠭᠡᠷ ᠲᠦ᠍ ᠣᠷᠣᠪᠠ᠃ ᠵᠠᠪᠰᠢᠶᠠᠨ ᠢ᠋ᠶ᠋ᠠᠷ ᠴᠦᠯᠲᠦᠮ᠂ ᠳᠠᠭᠳᠤᠩ ᠤ᠋ᠨ ᠠᠯᠲᠠᠨ ᠪᠣᠱᠣᠭᠠ ᠶ᠋ᠢ ᠠᠯᠬᠤᠨ ᠣᠷᠣᠵᠤ ᠢᠷᠡᠭᠡᠳ᠂ ᠴᠠᠷᠮᠠ ᠶ᠋ᠢᠨ ᠬᠠᠮᠲᠤ ᠲᠦᠯᠡᠭᠡ ᠬᠢᠷᠥᠭᠡᠳᠡᠨᠡ᠃
ᠦᠳᠡᠰᠢ ᠶ᠋ᠢᠨ ᠨᠠᠷᠠᠨ ᠰᠢᠩᠭᠡᠬᠦ ᠦᠶᠡ ᠪᠣᠯᠤᠭᠠᠳ ᠡᠳᠦᠷ ᠦ᠋ᠨ ᠰᠠᠢᠬᠠᠨ ᠠᠭᠠᠷ ᠥᠭᠡᠷᠡᠴᠢᠯᠡᠭᠳᠡᠵᠦ᠂ ᠰᠡᠪᠰᠡᠭᠡᠷ ᠴᠠᠰᠤ ᠬᠡᠰᠡᠭ ᠬᠡᠰᠡᠭ ᠢ᠋ᠶ᠋ᠡᠷ ᠬᠠᠶᠠᠯᠠᠬᠤ ᠶ᠋ᠢᠨ ᠳᠤᠮᠳᠠ ᠴᠦᠯᠲᠦᠮ᠂ ᠴᠠᠷᠮᠠ ᠬᠣᠶᠠᠷ ᠲᠦᠯᠡᠭᠡ ᠬᠢᠷᠥᠭᠡᠳᠡᠬᠦ ᠳᠠᠭᠤ ᠬᠢᠬᠤᠨᠠᠨ ᠴᠢᠬᠠᠨᠠᠬᠤ ᠨᠢ ᠬᠠᠯᠠᠭᠤᠨ ᠪᠠᠢᠰᠢᠩ ᠤ᠋ᠨ ᠳᠣᠲᠣᠷᠠ ᠮᠢᠳᠤᠭᠮᠠ ᠵᠠᠯᠠᠭᠤ ᠡᠷᠡ ᠶ᠋ᠢᠨ ᠬᠠᠮᠲᠤ ᠨᠠᠭᠠᠳᠬᠤ ᠱᠠᠩᠵᠠᠨ ᠤ᠋ ᠠᠶᠠᠯᠭᠤ ᠯᠤᠭᠠ ᠬᠤᠳᠬᠤᠯᠳᠤᠬᠤ ᠳ᠋ᠤ᠌ ᠬᠡᠳᠦᠢ ᠪᠡᠷ ᠤᠢᠳᠬᠠᠷᠲᠠᠢ ᠪᠣᠯᠪᠠᠴᠤ᠂ ᠬᠦᠢᠲᠡᠨ ᠳ᠋ᠦ᠍ ᠴᠢᠮᠴᠢᠩᠨᠡᠭᠰᠡᠨ ᠬᠤᠷᠤᠭᠤ ᠶ᠋ᠢ ᠪᠡᠨ ᠬᠠᠶᠠ ᠨᠢᠭᠡ ᠠᠮᠠᠨ ᠳ᠋ᠠᠭᠠᠨ ᠬᠢᠵᠦ 《ᠠᠬᠤ》ᠭᠡᠵᠦ ᠠᠮᠢᠰᠬᠤᠭᠠᠳᠠᠨ ᠳᠤᠯᠠᠭᠠᠴᠠᠭᠤᠯᠵᠤ ᠬᠣᠶᠠᠷ ᠰᠡᠳᠬᠢᠯ ᠦ᠋ᠨ ᠦᠭᠡᠰ ᠢ᠋ ᠶᠠᠷᠢᠯᠴᠠᠨ᠂ ᠵᠣᠪᠠᠯᠠᠩ ᠤ᠋ᠨ ᠭᠦᠨ ᠢ᠋ ᠨᠢᠭᠡ᠂ ᠬᠣᠶᠠᠷ ᠨᠠᠭᠠᠳᠤᠮ ᠲᠣᠬᠣᠭᠤ ᠪᠠᠷ ᠬᠠᠭᠤᠷᠤᠨ ᠥᠩᠭᠡᠷᠡᠭᠦᠯᠬᠦ ᠨᠢ ᠶᠠᠭᠤᠲᠠᠢ ᠠᠶᠠᠲᠠᠢ ᠪᠢᠯᠡ᠃ ᠴᠠᠷᠮᠠ᠂ ᠭᠡᠷ ᠦ᠋ᠨ ᠡᠵᠡᠳ ᠭᠣᠶᠣ ᠬᠤᠪᠴᠠᠰᠤ ᠦᠢᠯᠡᠳᠴᠦ ᠪᠠᠢᠭᠠ ᠪᠠ ᠡᠯᠳᠡᠪ ᠵᠦᠢᠯ ᠦ᠋ᠨ ᠠᠮᠲᠠᠲᠤ ᠢᠳᠡᠭᠡ ᠪᠡᠯᠡᠳᠬᠡᠵᠦ ᠪᠠᠢᠭᠠ ᠶ᠋ᠢ ᠲᠣᠭᠠᠴᠢᠨ᠂ ᠥᠪᠡᠷ ᠦ᠋ᠨ ᠪᠠᠢᠳᠠᠯ ᠢ᠋ ᠶᠠᠷᠢᠬᠤ ᠳ᠋ᠤ᠌ ᠴᠦᠯᠲᠦᠮ ᠮᠥᠨ ᠥᠪᠡᠷ ᠦ᠋ᠨ ᠡᠵᠡᠳ᠂ ᠵᠢᠷᠣᠭᠠ ᠮᠣᠷᠢ ᠵᠡᠷᠭᠡ ᠶ᠋ᠢ ᠬᠥᠳᠡᠭᠡᠨ ᠡᠴᠡ ᠠᠪᠴᠢᠷᠠᠭᠤᠯᠤᠭᠰᠠᠨ ᠢ᠋ ᠶᠠᠷᠢᠬᠤ ᠶ᠋ᠢᠨ ᠬᠠᠮᠲᠤ ᠬᠠᠮᠢᠭᠠ ᠡᠴᠡ ᠣᠯᠤᠭᠰᠠᠨ ᠢ᠋ ᠮᠡᠳᠡᠬᠦ ᠦᠭᠡᠢ ᠡᠪᠦᠷ ᠡᠴᠡ ᠪᠡᠨ ᠨᠢᠭᠡ ᠤᠯᠴᠠᠭᠠᠷ ᠳᠤᠷᠳᠤᠩ ᠠᠯᠴᠢᠭᠤᠷ ᠭᠠᠷᠭᠠᠵᠤ ᠥᠭᠬᠦ ᠳ᠋ᠦ᠍ ᠨᠢ ᠴᠠᠷᠮᠠ ᠶ᠋ᠢᠨ ᠳᠣᠲᠣᠷᠠ ᠮᠢᠳᠣᠭᠮᠠ ᠶ᠋ᠢᠨ ᠲᠣᠷᠭᠠᠨ ᠳᠡᠪᠡᠯ ᠢ᠋ ᠡᠮᠦᠰᠦᠭᠰᠡᠨ ᠡᠴᠡ ᠢᠯᠡᠭᠦᠦ ᠰᠠᠢᠬᠠᠨ ᠰᠠᠨᠠᠭᠳᠠᠵᠤ ᠠᠪᠠᠢ᠃ ᠴᠠᠷᠮᠠ᠂ ᠴᠦᠯᠲᠦᠮ ᠬᠣᠶᠠᠷ ᠴᠠᠭᠠᠨ ᠰᠠᠷᠠ ᠪᠣᠯᠬᠤ ᠳ᠋ᠤ᠌ ᠠᠵᠢᠯ ᠶᠡᠬᠡ ᠪᠣᠯᠳᠠᠭ ᠪᠠ ᠬᠠᠷᠢᠯᠴᠠᠨ ᠤᠴᠠᠷᠠᠯᠳᠤᠬᠤ ᠳ᠋ᠤ᠌ ᠭᠡᠷ ᠦ᠋ᠨ ᠡᠵᠡᠳ ᠠᠭᠠᠰᠢᠯᠠᠨ ᠵᠠᠩᠨᠠᠳᠠᠭ ᠤ᠋ᠨ ᠲᠤᠬᠠᠢ ᠬᠡᠳᠦᠨ ᠤᠢᠳᠬᠠᠷ ᠲᠠᠢ ᠦᠭᠡᠰ ᠶᠠᠷᠢᠯᠴᠠᠬᠤ ᠶ᠋ᠢᠨ ᠵᠠᠭᠤᠷᠠ ᠲᠦᠯᠡᠭᠡ ᠬᠢᠷᠥᠭᠡᠳᠡᠵᠦ ᠳᠠᠭᠤᠰᠪᠠ᠃
ᠨᠢᠭᠡᠨᠲᠡ ᠦᠳᠡᠰᠢ ᠪᠣᠯᠤᠭᠰᠠᠨ ᠲᠤᠯᠠ᠂ ᠣᠳᠣ ᠭᠡᠷ ᠦ᠋ᠨ ᠠᠵᠢᠯ ᠬᠢᠬᠦ ᠬᠡᠷᠡᠭᠲᠡᠢ ᠪᠣᠯᠪᠠ᠃ ᠴᠠᠷᠮᠠ᠂ ᠴᠦᠯᠲᠦᠮ ᠡᠴᠡ ᠰᠠᠯᠤᠨ ᠭᠡᠷ ᠲᠦ᠍ ᠣᠷᠣᠪᠠᠯ ᠪᠤᠷᠬᠠᠨ ᠤ᠋ ᠡᠮᠦᠨᠡ ᠣᠨᠢ ᠲᠤᠯᠲᠠᠯᠠ ᠪᠣᠣᠪᠣ ᠥᠷᠥᠵᠦ᠂ ᠲᠠᠬᠢᠯ ᠳᠠᠬᠢᠭᠠᠳ᠂ ᠲᠤᠯᠭᠠᠨ ᠤ᠋ ᠪᠠᠷᠠᠭᠤᠨ ᠵᠡᠭᠦᠨ ᠡᠲᠡᠭᠡᠳ ᠲᠦ᠍ ᠬᠡᠳᠦ ᠬᠡᠳᠦᠨ ᠵᠦᠢᠯ ᠦ᠋ᠨ ᠲᠠᠪᠠᠭ ᠲᠠᠢ ᠢᠳᠡᠭᠡᠨ ᠨᠦ᠍ᠭᠦᠳ ᠪᠠ ᠤᠭᠤᠴᠠ ᠮᠢᠬᠠ᠂ ᠪᠠᠩᠰᠢ ᠪᠤᠤᠵᠠ ᠶ᠋ᠢ ᠬᠠᠭᠤᠴᠢᠨ ᠶᠣᠰᠣᠭᠠᠷ ᠲᠠᠯᠪᠢᠵᠠᠢ᠃ ᠡᠳᠡᠨ ᠢ᠋ ᠦᠵᠡᠪᠡᠯ᠂ ᠴᠥᠮ ᠴᠠᠷᠮᠠ ᠶ᠋ᠢᠨ ᠬᠢᠭᠰᠡᠨ ᠪᠠ ᠪᠣᠯᠭᠣᠭᠰᠠᠨ ᠢᠳᠡᠭᠡ ᠮᠥᠨ᠃ ᠭᠡᠷ ᠦ᠋ᠨ ᠡᠵᠡᠳ ᠰᠢᠨᠡ ᠬᠤᠪᠴᠠᠰᠤ ᠡᠮᠦᠰᠦᠭᠡᠳ᠂ ᠪᠢᠲᠡᠭᠦᠯᠦᠨᠡ ᠭᠡᠵᠦ ᠪᠠᠶᠠᠷ ᠵᠢᠪᠬᠤᠯᠠᠩᠲᠠᠢ ᠪᠠᠷ ᠬᠥᠳᠡᠯᠵᠡᠭᠡᠨᠡ᠃ ᠴᠠᠷᠮᠠ ᠭᠠᠯ ᠲᠣᠭᠣᠭᠠ ᠲᠠᠢ ᠬᠤᠷᠢᠮᠯᠠᠨᠠ᠃ ᠴᠠᠷᠮᠠ ᠳ᠋ᠤ᠌ ᠮᠢᠳᠤᠭᠮᠠ ᠨᠢᠭᠡ ᠬᠠᠭᠤᠴᠢᠷᠠᠭᠰᠠᠨ ᠴᠢᠰᠴᠡᠦ ᠳᠡᠪᠡᠯ ᠢ᠋ᠶ᠋ᠡᠨ ᠠᠪᠴᠢᠷᠠᠵᠤ ᠡᠮᠦᠰᠲᠦᠭᠡᠢ ᠭᠡᠰᠡᠨ ᠪᠣᠯᠪᠠᠴᠤ᠂ ᠴᠠᠷᠮᠠ ᠮᠠᠷᠭᠠᠰᠢ ᠡᠮᠦᠰᠦᠨᠡ ᠭᠡᠵᠦ ᠰᠠᠭᠠᠷᠮᠠᠭᠯᠠᠨ ᠬᠡᠯᠡᠵᠦ᠂ ᠬᠣᠢᠰᠢ ᠲᠠᠯᠪᠢᠭᠠᠳ᠂ ᠬᠠᠷᠢᠨ ᠴᠦᠯᠲᠦᠮ ᠦ᠋ᠨ ᠥᠭᠭᠦᠭᠰᠡᠨ ᠠᠯᠴᠢᠭᠤᠷ ᠢ᠋ ᠭᠠᠷᠭᠠᠨ᠂ ᠬᠠᠶᠠ ᠨᠢᠭᠡ ᠨᠢᠭᠤᠷ ᠢ᠋ᠶ᠋ᠠᠨ ᠠᠷᠴᠢᠵᠤ ᠪᠠᠢᠬᠤ ᠶ᠋ᠢ ᠳᠠᠭᠳᠤᠩ ᠤ᠋ᠨ ᠡᠬᠡᠨᠡᠷ ᠬᠠᠷᠠᠭᠠᠳ᠄ « ᠴᠢ ᠡᠭᠦᠨ ᠢ᠋ ᠬᠠᠮᠢᠭᠠ ᠡᠴᠡ ᠣᠯᠪᠠ᠃ ᠪᠣᠳᠣᠪᠠᠯ ᠪᠡᠯᠡᠭ ᠳᠣᠲᠣᠷᠠ ᠡᠴᠡ ᠬᠤᠯᠠᠭᠠᠢ ᠬᠢᠭᠰᠡᠨ ᠪᠢᠵᠡ» ᠭᠡᠵᠦ ᠵᠠᠩᠨᠠᠨᠠ᠃ ᠡᠭᠦᠨ ᠳ᠋ᠦ᠍ ᠴᠠᠷᠮᠠ ᠬᠤᠯᠠᠭᠠᠢ ᠬᠢᠭᠰᠡᠨ ᠭᠡᠵᠦ ᠬᠤᠳᠠᠯ ᠬᠡᠯᠡᠬᠦ ᠳ᠋ᠦ᠍ ᠬᠡᠴᠡᠭᠦᠦ᠂ ᠴᠦᠯᠲᠦᠮ ᠥᠭᠭᠦᠭᠰᠡᠨ ᠭᠡᠵᠦ ᠦᠨᠡᠨ ᠢ᠋ ᠬᠡᠯᠡᠬᠦ ᠳ᠋ᠦ᠍ ᠪᠠᠰᠠ ᠵᠢᠮᠡᠯᠡᠯᠲᠡᠢ ᠤᠴᠢᠷ᠂ ᠲᠣᠪ ᠳᠠᠭᠤ ᠦᠭᠡᠢ ᠰᠠᠭᠤᠨ᠂ ᠶᠠᠭᠠᠬᠢᠭᠰᠠᠨ ᠪᠡᠷᠬᠡᠲᠡᠢ ᠪᠢᠯᠡ ᠭᠡᠵᠦ ᠡᠯᠳᠡᠪ ᠢ᠋ ᠪᠣᠳᠣᠨᠠ᠃ ᠡᠨᠡ ᠣᠷᠣᠢ ᠭᠡᠷ ᠦ᠋ᠨ ᠡᠵᠡᠳ ᠶᠣᠰᠣᠯᠠᠬᠤ ᠴᠠᠭᠠᠯᠠᠬᠤ ᠶ᠋ᠢᠨ ᠬᠠᠮᠲᠤ ᠭᠠᠳᠠᠨᠠ ᠡᠴᠡ ᠵᠣᠴᠢᠳ ᠭᠡᠢᠴᠢᠳ ᠢᠷᠡᠬᠦ ᠨᠢ ᠲᠣᠭᠠ ᠦᠭᠡᠢ ᠣᠯᠠᠨ᠃
ᠲᠡᠳᠡᠨ ᠦ᠌ ᠢᠳᠡᠬᠦ ᠤᠤᠭᠤᠬᠤ᠂ ᠢᠨᠢᠶᠡᠯᠳᠦᠬᠦ ᠪᠠᠶᠠᠰᠤᠯᠳᠤᠬᠤ ᠨᠢ ᠭᠡᠷ ᠬᠠᠭᠠᠷᠠᠮᠠᠷ᠂ ᠭᠠᠭᠴᠠᠬᠦ ᠴᠠᠷᠮᠠ ᠵᠤᠤᠬᠠᠨ ᠤ᠋ ᠬᠠᠵᠠᠭᠤ ᠳ᠋ᠤ᠌ ᠬᠥᠯᠥᠷᠡᠨ ᠰᠠᠭᠤᠵᠤ᠂ ᠭᠥᠯᠢᠷᠡᠨ ᠬᠠᠷᠠᠵᠤ ᠰᠡᠭᠦᠷᠡᠰᠦ ᠠᠯᠳᠠᠨᠠ᠃ ᠰᠥᠨᠢ ᠤᠨᠲᠠᠭᠰᠠᠨ ᠥᠬᠡᠢ᠂ ᠮᠠᠷᠭᠠᠰᠢ ᠶ᠋ᠢᠨ ᠴᠠᠢ ᠬᠣᠭᠣᠯᠠ ᠶ᠋ᠢ ᠪᠡᠯᠡᠳᠬᠡᠨᠡ᠃ ᠭᠡᠷ ᠡᠴᠡ ᠵᠤᠭᠠᠴᠠᠨ ᠣᠳᠬᠤ ᠡᠵᠡᠳ ᠦ᠋ᠨ ᠬᠡᠷᠡᠭᠯᠡᠬᠦ ᠵᠦᠢᠯ ᠢ᠋ ᠪᠡᠯᠡᠳᠬᠡᠵᠦ᠂ ᠭᠠᠳᠠᠨᠠ ᠡᠴᠡ ᠢᠷᠡᠬᠦ ᠭᠡᠢᠴᠢ ᠶ᠋ᠢ ᠬᠦᠨᠳᠦᠯᠡᠨ ᠵᠣᠴᠢᠯᠠᠭᠰᠠᠭᠠᠷ ᠨᠢᠭᠡ ᠡᠳᠦᠷ ᠢ᠋ ᠠᠷᠠᠢ ᠭᠡᠵᠦ ᠥᠩᠭᠡᠷᠡᠭᠦᠯᠪᠡᠴᠦ ᠦᠳᠡᠰᠢ ᠶ᠋ᠢᠨ ᠴᠠᠭ ᠨᠠᠷᠭᠢᠶᠠᠨ ᠳᠠᠷᠭᠢᠶᠠᠨ ᠪᠣᠯᠵᠤ ᠠᠷᠢᠬᠢ ᠳᠠᠷᠠᠰᠤ᠂ ᠬᠤᠭᠤᠷ ᠬᠥᠭᠵᠢᠮ ᠦᠷᠭᠦᠯᠵᠢᠯᠡᠬᠦ ᠶ᠋ᠢᠨ ᠳᠣᠲᠣᠷᠠ ᠡᠭᠦᠨ ᠦ᠌ ᠪᠥᠭᠡᠯᠵᠢᠰᠦ ᠶ᠋ᠢ ᠠᠰᠬᠠᠵᠤ᠂ ᠲᠡᠭᠦᠨ ᠦ᠌ ᠣᠷᠣ ᠳᠡᠷᠡ ᠶ᠋ᠢ ᠵᠠᠰᠠᠭᠰᠠᠭᠠᠷ ᠪᠠᠰᠠ ᠨᠢᠭᠡ ᠰᠥᠨᠢ ᠪᠣᠯᠪᠠ᠃ ᠡᠨᠡ ᠮᠡᠲᠦ ᠶ᠋ᠢᠨ ᠪᠠᠢᠳᠠᠯ ᠵᠠᠯᠭᠠᠮᠵᠢᠯᠠᠨ ᠬᠡᠳᠦᠨ ᠡᠳᠦᠷ ᠪᠣᠯᠬᠤ ᠳ᠋ᠤ᠌ ᠴᠠᠷᠮᠠ ᠬᠡᠳᠦᠢ ᠪᠡᠷ ᠶᠠᠳᠠᠷᠠᠵᠤ ᠵᠦᠳᠡᠷᠡᠪᠡᠴᠦ᠂ ᠭᠤᠨᠢᠬᠠᠷᠠᠨ ᠰᠠᠭᠤᠬᠤ ᠡᠴᠡ ᠥᠭᠡᠷᠡ ᠶᠠᠭᠤᠨ᠃
ᠬᠠᠶᠠ ᠨᠢᠭᠡ ᠤᠳᠠᠭᠠ ᠬᠠᠰᠢᠶᠠᠨ ᠤ᠋ ᠵᠠᠪᠰᠠᠷ ᠢ᠋ᠶ᠋ᠠᠷ ᠴᠦᠯᠲᠦᠮ ᠲᠡᠢ ᠶᠠᠷᠢᠵᠤ ᠰᠡᠳᠬᠢᠯ ᠢ᠋ ᠪᠢᠴᠢᠬᠠᠨ ᠬᠠᠭᠤᠷᠤᠨᠠ᠃ ᠡᠨᠡ ᠮᠡᠲᠦ ᠪᠡᠷ ᠬᠣᠶᠠᠷ ᠵᠢᠯ ᠥᠩᠭᠡᠷᠡᠭᠰᠡᠨ ᠦ᠌ ᠬᠣᠢᠨᠠ ᠪᠠᠰᠠ ᠨᠢᠭᠡ ᠴᠠᠭᠠᠨ ᠰᠠᠷᠠ ᠰᠢᠬᠠᠵᠤ ᠪᠠᠢᠬᠤ ᠳ᠋ᠤ᠌ ᠶᠠᠮᠠᠷ ᠰᠢᠯᠲᠠᠭᠠᠨ ᠢ᠋ ᠮᠡᠳᠡᠬᠦ ᠦᠭᠡᠢ ᠳᠠᠭᠳᠤᠩ ᠤ᠋ᠨ ᠬᠢ ᠬᠣᠲᠠ ᠳ᠋ᠤ᠌ ᠰᠠᠭᠤᠬᠤ ᠶ᠋ᠢ ᠪᠣᠯᠢᠪᠠ ᠭᠡᠵᠦ ᠬᠥᠳᠡᠭᠡ ᠭᠠᠷᠬᠤ ᠶ᠋ᠢ ᠪᠡᠯᠡᠳᠬᠡᠨ᠂ ᠳᠠᠭᠳᠤᠩ ᠤ᠋ᠨ ᠡᠬᠡᠨᠡᠷ ᠴᠠᠷᠮᠠ ᠮᠥᠨ ᠬᠥᠳᠡᠭᠡ ᠳᠠᠭᠠᠭᠤᠯᠤᠨ ᠠᠪᠠᠴᠢᠨᠠ ᠭᠡᠵᠦ ᠪᠠᠢᠬᠤ ᠶ᠋ᠢᠨ ᠦᠶᠡ ᠨᠢᠭᠡ ᠡᠳᠦᠷ ᠴᠦᠯᠲᠦᠮ ᠬᠦᠷᠴᠦ ᠬᠡᠯᠡᠵᠦ᠄ « ᠣᠳᠣ ᠴᠢ ᠮᠢᠨᠦ ᠬᠠᠮᠲᠤ ᠶᠠᠪᠤᠵᠤ ᠠᠵᠤ ᠲᠥᠷᠥ» ᠭᠡᠰᠡᠨ ᠳ᠋ᠦ᠍ ᠴᠠᠷᠮᠠ ᠴᠣᠬᠣᠮ ᠤᠴᠢᠷ ᠢ᠋ ᠰᠠᠢᠨ ᠢ᠋ᠶ᠋ᠠᠷ ᠮᠡᠳᠡᠭᠰᠡᠨ ᠦᠭᠡᠢ ᠪᠣᠯᠪᠠᠴᠤ ᠡᠨᠡ ᠬᠣᠶᠠᠷ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ᠂ ᠳᠠᠷᠤᠢ ᠪᠠᠶᠠᠷᠯᠠᠵᠤ ᠵᠢᠭᠠᠯ ᠵᠢᠭᠤᠯ ᠶᠠᠭᠤᠮᠠ ᠪᠠᠨ ᠪᠣᠭᠣᠵᠤ᠂ ᠴᠦᠯᠲᠦᠮ ᠦ᠋ᠨ ᠭᠡᠷ ᠲᠦ᠍ ᠣᠴᠢᠪᠠ᠃ ᠳᠠᠭᠳᠤᠩ ᠤ᠋ᠨ ᠡᠬᠡᠨᠡᠷ ᠨᠢᠭᠡ ᠵᠠᠩᠳᠤᠷᠴᠤ ᠬᠡᠳᠦ ᠬᠠᠷᠢᠶᠠᠭᠠᠳ ᠠᠷᠭᠠ ᠦᠭᠡᠢ ᠬᠣᠴᠣᠷᠪᠠ᠃ ᠴᠦᠯᠲᠦᠮ ᠦ᠋ᠨ ᠭᠡᠷ ᠬᠡᠳᠦᠢ ᠬᠠᠷᠠ ᠪᠣᠯᠤᠭᠠᠳ ᠴᠣᠭᠣᠷᠠᠬᠠᠢ ᠪᠣᠯᠪᠠᠴᠤ᠂ ᠳᠠᠭᠳᠤᠩ ᠤ᠋ᠨ ᠵᠢᠷᠭᠤᠭᠠᠨ ᠬᠠᠨᠠ ᠲᠠᠢ ᠴᠠᠭᠠᠨ ᠭᠡᠷ ᠦ᠋ᠨ ᠬᠠᠲᠠᠪᠴᠢᠨ ᠳ᠋ᠤ᠌ ᠬᠡᠪᠲᠡᠭᠰᠡᠨ ᠡᠴᠡ ᠲᠦᠮᠡᠨ ᠬᠤᠪᠢ ᠵᠢᠷᠭᠠᠯ ᠲᠠᠢ ᠪᠣᠯᠤᠭᠠᠳ᠂ ᠰᠠᠨᠠᠭᠠᠨ ᠤ᠋ ᠳᠤᠷᠠ ᠪᠠᠷ ᠪᠣᠰᠴᠤ ᠰᠠᠭᠤᠨ᠂ ᠬᠢᠳᠡᠭ ᠢ᠋ᠶ᠋ᠡᠨ ᠬᠢᠵᠦ᠂ ᠠᠮᠠᠷᠠᠳᠠᠭ ᠴᠠᠭ ᠲᠠᠭᠠᠨ ᠠᠮᠠᠷᠠᠨ᠂ ᠬᠠᠭᠤᠴᠢᠨ ᠠᠮᠠᠷᠠᠭ ᠴᠦᠯᠲᠦᠮ ᠦ᠋ᠨ ᠬᠠᠮᠲᠤ ᠠᠮᠢᠳᠤᠷᠠᠨ ᠰᠠᠭᠤᠵᠤ ᠪᠠᠢᠲᠠᠯᠠ ᠤᠳᠠᠯ ᠦᠭᠡᠢ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠨᠢᠭᠡᠨ ᠪᠣᠯᠪᠠ᠃
ᠴᠠᠷᠮᠠ ᠬᠣᠲᠠ ᠳ᠋ᠤ᠌ ᠢᠷᠡᠭᠰᠡᠨ ᠡᠴᠡ ᠠᠪᠤᠭᠠᠳ ᠡᠳᠦᠭᠡ ᠬᠦᠷᠲᠡᠯᠡ ᠪᠢᠲᠡᠭᠦᠨ ᠦ᠌ ᠣᠷᠣᠢ ᠡᠢᠨᠬᠦᠦ ᠠᠮᠤᠭᠤᠯᠠᠩ ᠢ᠋ᠶ᠋ᠠᠷ ᠤᠨᠲᠠᠵᠤ ᠪᠠᠢᠭᠰᠠᠨ ᠨᠢ ᠶᠡᠷᠦ ᠦᠭᠡᠢ ᠪᠥᠯᠥᠭᠡ᠃ ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠡᠷᠲᠡ ᠪᠣᠰᠴᠤ ᠲᠣᠷᠭᠠ ᠳᠤᠷᠳᠤᠩ ᠮᠢᠨᠵᠢ ᠪᠤᠯᠠᠭᠠ ᠪᠤᠰᠤ ᠪᠣᠯᠪᠠᠴᠤ ᠥᠩᠭᠡ ᠲᠡᠢ ᠪᠦᠲᠦᠨ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠴᠡᠭᠡᠨᠡ᠃