ᠣᠷᠣᠢ ᠦᠭᠡᠢ ᠰᠦᠮᠡ – ᠬᠣᠷᠢᠨ ᠲᠠᠪᠤ ᠂ ᠲᠥᠷᠥᠯ ᠠᠷᠠᠯᠵᠢᠭ᠍ᠰᠠᠨ ᠮᠦᠷᠭᠦᠯᠴᠢᠳ Оройгүй сүм – Хорин тав ᠂ Төрөл арилжсан мөргөлчид - Oroigui sum 25
881ᠬᠣᠷᠢᠨ ᠲᠠᠪᠤ᠂ ᠲᠥᠷᠥᠯ ᠠᠷᠠᠯᠵᠢᠭᠰᠠᠨ ᠮᠥᠷᠭᠥᠯᠴᠢᠳ
ᠥᠲᠡᠯᠬᠦ ᠳ᠋ᠦ᠍ ᠡᠷᠭᠦᠬᠦ ᠶ᠋ᠢᠨ ᠲᠤᠰᠠ
ᠦᠬᠦᠬᠦ ᠳ᠋ᠦ᠍ ᠶᠠᠰᠤ ᠪᠠᠷᠢᠬᠤ ᠶ᠋ᠢᠨ ᠲᠤᠰᠠ
ᠲᠡᠨᠦᠭᠦᠯᠴᠢᠨ ᠬᠣᠶᠠᠷ ᠵᠠᠭᠵᠢᠰᠬᠢᠨ ᠴᠣᠴᠢᠯᠠ᠃ ᠭᠠᠵᠠᠷ ᠱᠠᠭᠠᠢᠨ ᠪᠥᠭᠲᠥᠭᠡᠨᠡᠵᠦ ᠶᠠᠪᠤᠭᠰᠠᠭᠠᠷ ᠰᠠᠶᠢ ᠯᠠ ᠨᠢᠭᠡ ᠲᠣᠯᠣᠭᠠᠢ ᠶ᠋ᠢ ᠪᠡᠨ ᠥᠨᠳᠡᠢᠯᠭᠡᠨ ᠡᠷᠭᠢᠨ ᠲᠣᠭᠣᠷᠢᠨ ᠢ᠋ ᠠᠵᠢᠨ ᠬᠠᠷᠠᠵᠤ᠂ ᠲᠦᠷ ᠠᠮᠤᠰᠬᠢᠨ ᠵᠣᠭᠰᠣᠯᠠ᠃ ᠭᠡᠲᠡᠯᠡ ᠬᠡᠳᠦᠬᠡᠨ ᠮᠥᠴᠡ ᠶ᠋ᠢᠨ ᠡᠮᠦᠨᠡ ᠣᠭᠲᠣ ᠥᠭᠡᠷᠡ ᠪᠠᠢᠭᠰᠠᠨ ᠣᠷᠴᠢᠯᠠᠩ ᠬᠣᠷᠸᠠ ᠶ᠋ᠢᠨ ᠥᠩᠭᠡ ᠭᠡᠨᠡᠳᠲᠡ ᠬᠤᠪᠢᠷᠠᠴᠢᠬᠠᠭᠰᠠᠨ ᠶᠤᠮ ᠰᠢᠭ᠋ ᠰᠠᠨᠠᠭᠳᠠᠵᠠᠢ᠃ ᠶᠠᠭᠤᠮᠠ ᠪᠦᠬᠦᠨ ᠦ᠌ ᠥᠩᠭᠡ ᠭᠠᠭᠴᠠᠬᠦ ᠴᠢᠰᠤᠨ ᠤᠯᠠᠭᠠᠨ ᠢ᠋ᠶ᠋ᠠᠷ ᠭᠡᠨᠡᠳᠲᠡ ᠪᠤᠳᠤᠭᠳᠠᠴᠢᠬᠠᠭᠰᠠᠨ ᠶᠤᠮ ᠰᠢᠭ᠋ ᠰᠠᠨᠠᠭᠳᠠᠭᠰᠠᠨ ᠨᠢ ᠲᠡᠷᠡ ᠬᠣᠶᠠᠷ ᠲᠡᠨᠦᠭᠦᠯᠴᠢᠳ ᠦ᠋ᠨ ᠠᠢᠳᠠᠰ ᠢ᠋ ᠲᠥᠷᠥᠭᠦᠯᠵᠡᠢ᠃ ᠮᠠᠷᠰᠠᠩᠯᡁᠨ ᠬᠡᠢᠳ ᠦ᠋ᠨ ᠰᠢᠪᠡᠷ ᠲᠠᠭᠠᠵᠠ ᠨᠤᠭᠤᠳ ᠴᠢᠰ ᠤᠯᠠᠭᠠᠨ ᠬᠠᠷᠠᠭᠳᠠᠯᠠ᠃ ᠡᠮᠦᠨᠡᠬᠡᠨ ᠲᠠᠯᠠ ᠳ᠋ᠤ᠌ ᠨᠢ ᠶᠠᠪᠤᠭᠠ ᠬᠡᠳᠦᠨ ᠬᠣᠨᠢ ᠪᠠᠰᠠ ᠯᠠ ᠤᠯᠠᠭᠠᠨ ᠥᠩᠭᠡᠲᠡᠢ ᠪᠠᠢᠪᠠ᠃ ᠲᠡᠳᠡ ᠭᠠᠢᠬᠠᠨ ᠠᠶᠤᠵᠤ ᠨᠢᠳᠦ ᠪᠡᠨ ᠠᠨᠢᠴᠠᠭᠠᠯᠠ᠃ ᠬᠡᠰᠡᠭ ᠵᠠᠭᠤᠷᠠ ᠴᠢᠮᠡᠭᠡ ᠴᠢᠩᠨᠠᠬᠤ ᠮᠡᠲᠦ ᠵᠣᠭᠰᠣᠭᠠᠳ ᠨᠢᠳᠦ ᠪᠡᠨ ᠨᠡᠬᠡᠵᠡᠭᠡᠯᠡ᠃ ᠶᠠᠭᠤᠮᠠ ᠪᠦᠭᠦᠳᠡ ᠤᠯᠠᠭᠠᠨ ᠢ᠋ᠶ᠋ᠠᠷ ᠡᠷᠭᠢᠯᠳᠦᠭᠰᠡᠨ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠠᠵᠠᠢ᠃ ᠮᠠᠷᠰᠠᠩᠯᡁᠨ ᠬᠡᠢᠳ ᠦ᠋ᠨ ᠭᠣᠣᠯ ᠳᠤᠭᠠᠩ ᠤ᠋ᠨ ᠠᠯᠲᠠᠨ ᠭᠠᠨᠵᠢᠷᠠ ᠬᠦᠷᠲᠡᠯᠡ ᠤᠯᠠᠢᠴᠢᠬᠠᠭᠰᠠᠨ ᠶᠤᠮ ᠰᠢᠭ᠋ ᠬᠠᠷᠠᠭᠳᠠᠪᠠ᠃ 《ᠪᠢᠳᠡ ᠬᠣᠶᠠᠷ ᠣᠯᠠᠨ ᠬᠣᠨᠣᠭ ᠠᠶᠤᠵᠤ ᠲᠡᠪᠡᠳᠡᠵᠦ᠂ ᠴᠣᠴᠢᠵᠤ ᠪᠣᠰᠬᠠᠵᠤ᠂ ᠮᠥᠷᠳᠡᠭᠳᠡᠬᠦ ᠡᠴᠡ ᠪᠣᠯᠭᠣᠮᠵᠢᠯᠠᠨ ᠶᠠᠪᠤᠭᠰᠠᠭᠠᠷ ᠪᠠᠢᠭᠠᠳ ᠡᠴᠦᠰ ᠲᠦ᠍ ᠨᠢ ᠤᠬᠠᠭᠠᠨ ᠪᠠᠯᠠᠢᠷᠠᠳᠣᠵᠣ ᠭᠠᠵᠢᠭᠤ ᠰᠣᠯᠢᠭᠤ ᠶᠠᠭᠤᠮᠠ ᠦᠵᠡᠬᠦ ᠳ᠋ᠦ᠍ ᠬᠦᠷᠦᠭᠰᠡᠨ ᠪᠢᠰᠢ ᠪᠠᠢᠭᠠ》 ᠭᠡᠵᠦ ᠰᠠᠨᠵᠢ ᠭᠠᠢᠬᠠᠨ ᠪᠣᠳᠣᠭᠠᠳ ᠪᠡᠶᠡ ᠪᠡᠨ ᠪᠠᠵᠠᠯᠠᠵᠤ ᠦᠵᠡᠪᠡ᠃ ᠮᠡᠳᠡᠭᠡ ᠲᠡᠢ ᠠᠵᠠᠢ᠃ ᠳᠡᠭᠡᠭᠰᠢ ᠪᠡᠨ ᠥᠯᠢᠢᠵᠦ ᠣᠭᠲᠠᠷᠭᠤᠢ ᠶ᠋ᠢ ᠠᠵᠢᠨ ᠬᠠᠷᠠᠪᠠᠰᠤ ᠲᠡᠷᠡ ᠯᠠ ᠭᠠᠭᠴᠠᠬᠦ ᠷᠠᠰᠢᠶᠠᠷ ᠮᠡᠲᠦ ᠨᠣᠮᠢᠨ ᠬᠥᠬᠡ ᠥᠩᠭᠡ ᠲᠡᠢ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠢᠯᠠ᠃ ᠮᠠᠷᠰᠠᠩᠯᡁᠨ ᠬᠡᠢᠳ ᠢ᠋ ᠬᠦᠷᠢᠶᠡᠯᠡᠩ ᠣᠷᠣᠰᠢᠬᠤ ᠬᠠᠨᠠᠨ ᠬᠠᠳᠠ ᠨᠤᠭᠤᠳ ᠪᠣᠯᠬᠣᠷ ᠰᠢᠩᠬᠤᠨ ᠤᠯᠠᠭᠠᠨ ᠥᠩᠭᠡ ᠪᠡᠷ ᠬᠡᠷᠡᠯᠳᠦᠬᠦ ᠮᠡᠲᠦ ᠬᠠᠴᠢᠨ ᠬᠠᠷᠠᠭᠳᠠᠯᠠ᠃
- ᠶᠠᠭᠠᠬᠢᠭᠰᠠᠨ ᠠᠶᠤᠮᠠᠷ ᠴᠢᠰᠤᠨ ᠤᠯᠠᠭᠠᠨ ᠥᠩᠭᠡᠲᠡᠢ ᠭᠠᠵᠠᠷ ᠪᠣᠢ? ᠭᠡᠵᠦ ᠰᠠᠨᠵᠢ ᠠᠮᠠᠨ ᠳᠣᠲᠣᠷᠠ ᠪᠠᠨ ᠰᠢᠪᠡᠨᠡᠨ ᠠᠰᠠᠭᠤᠬᠤ ᠳ᠋ᠤ᠌ ᠳᠠᠭᠠᠭᠤᠯᠢ ᠨᠥᠬᠥᠷ ᠨᠢ᠂
- ᠡᠨᠳᠡ ᠶᠡᠷᠦ ᠨᠢ ᠡᠢᠮᠦ ᠶᠠᠭᠤᠮᠠ ᠲᠣᠬᠢᠶᠠᠯᠳᠤᠳᠠᠭ ᠭᠠᠵᠠᠷ᠃ ᠲᠤᠩ ᠤᠳᠠᠬᠤ ᠦᠭᠡᠢ ᠣᠭᠲᠣ ᠥᠭᠡᠷᠡ ᠥᠩᠭᠡ ᠲᠡᠢ ᠪᠣᠯᠤᠨᠠ᠃ ᠪᠢᠲᠡᠭᠡᠢ ᠵᠣᠪᠠ! ᠭᠡᠵᠦ ᠰᠤᠷᠭᠠᠮᠵᠢᠯᠠᠪᠠ᠃
- ᠠᠶᠤᠮᠠᠷ ᠶᠤᠮ! ᠭᠡᠵᠦ ᠰᠠᠨᠵᠢ ᠰᠢᠪᠡᠭᠡᠨᠡᠪᠡ᠃
- ᠡᠨᠳᠡ ᠴᠢᠨᠢ ᠵᠢᠰᠦ ᠪᠡᠨ ᠬᠤᠪᠢᠯᠭᠠᠭᠰᠠᠨ ᠪᠠᠯᠳᠣᠷᠵᠢ ᡀᠠ ᠣᠷᠣᠰᠢᠭᠤᠯᠤᠭᠰᠠᠨ ᠭᠠᠵᠠᠷ ᠰᠢᠦ ᠳᠡ! ᠭᠡᠵᠦ ᠨᠥᠬᠥᠷ ᠨᠢ ᠰᠠᠨᠠᠭᠤᠯᠤᠯᠠ᠃
ᠲᠡᠷᠡ ᠨᠡᠷᠡ ᠶ᠋ᠢ ᠰᠣᠨᠣᠰᠤᠮᠠᠭᠴᠠ ᠰᠠᠨᠵᠢ ᠶ᠋ᠢᠨ ᠰᠠᠨᠠᠭᠠᠨ ᠳ᠋ᠤ᠌ ᠡᠷᠲᠡᠨ ᠦ᠌ ᠨᠢᠭᠡᠨ ᠠᠶᠤᠮᠰᠢᠭᠲᠤ ᠳᠣᠮᠣᠭ ᠣᠷᠣᠵᠤ ᠢᠷᠡᠯᠡ᠃ ᠲᠥᠪᠡᠳ ᠣᠷᠣᠨ ᠳ᠋ᠤ᠌ ᠪᠤᠷᠬᠠᠨ ᠤ᠋ ᠱᠠᠵᠢᠨ ᠳᠡᠯᠭᠡᠷᠡᠵᠦ ᠡᠬᠢᠯᠡᠬᠦ ᠴᠠᠭ ᠲᠤ᠌ ᠳ᠋ᠠᠷᠮᠠ ᠬᠠᠭᠠᠨ ᠲᠥᠷᠥ ᠪᠠᠷᠢᠵᠤ᠂ ᠱᠠᠰᠢᠨ ᠢ᠋ ᠳᠡᠯᠭᠡᠷᠡᠭᠦᠯᠬᠦ ᠶ᠋ᠢ ᠴᠠᠭᠠᠷᠭᠤᠯᠠᠵᠤ ᠪᠠᠢᠵᠠᠢ᠃ ᠯᠠᠮᠠ ᠨᠠᠷ ᠳ᠋ᠠᠷᠮᠠ ᠬᠠᠭᠠᠨ ᠢ᠋ ᠯᠠᠨᠳᠠᠷᠮᠠ ᠪᠤᠶᠤ ᠳ᠋ᠠᠷᠮᠠ ᠮᠠᠯ ᠭᠡᠰᠡᠨ ᠬᠣᠴᠢ ᠥᠭᠴᠦ ᠬᠠᠷᠢᠶᠠᠯ ᠵᠦᠬᠡᠯ ᠵᠠᠨᠤᠯᠬᠢᠯᠡᠯ ᠢ᠋ᠶ᠋ᠡᠷ ᠲᠡᠭᠦᠨ ᠢ᠋ ᠮᠣᠬᠣᠭᠠᠬᠤ ᠶ᠋ᠢ ᠣᠷᠣᠯᠳᠣᠵᠠᠢ᠃ ᠭᠡᠪᠡᠴᠦ ᠳ᠋ᠠᠷᠮᠠ ᠬᠠᠭᠠᠨ ᠱᠠᠰᠢᠨ ᠢ᠋ ᠡᠰᠡᠷᠭᠦᠴᠡᠭᠰᠡᠨ ᠬᠡᠪ ᠢ᠋ᠶ᠋ᠡᠷ ᠪᠠᠢᠵᠠᠢ᠃ ᠲᠡᠭᠦᠨ ᠢ᠋ ᠮᠡᠳᠡᠭᠡᠳ ᠳᠠᠶᠠᠨ ᠬᠢᠵᠦ ᠰᠠᠭᠤᠭᠰᠠᠨ ᠪᠠᠯᠳᠣᠷᠵᠢ ᠭᠡᠭᠴᠢ ᠯᠠᠮᠠ ᠱᠠᠰᠢᠨ ᠤ᠋ ᠳᠠᠢᠰᠣᠨ ᠯᠠᠨᠳᠠᠷᠮᠠ ᠶ᠋ᠢ ᠦᠭᠡᠢ ᠬᠢᠵᠦ ᠪᠤᠶᠠᠨ ᠦᠢᠯᠡᠳᠬᠦ ᠰᠠᠨᠠᠭᠠ ᠠᠭᠤᠯᠵᠤ ᠣᠯᠠᠨ ᠬᠣᠨᠣᠭ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠭᠰᠠᠭᠠᠷ ᠨᠠᠷᠢᠨ ᠠᠷᠭᠠ ᠣᠯᠵᠠᠢ᠃ ᠪᠠᠯᠳᠣᠷᠵᠢ ᠲᠡᠢᠨ ᠬᠦ᠌ ᠴᠠᠭᠠᠨ ᠮᠣᠷᠢ ᠪᠠᠨ ᠬᠦ ᠪᠡᠷ ᠪᠣᠳᠣᠵᠤ ᠬᠠᠷᠠ ᠪᠣᠯᠭᠠᠭᠠᠳ᠂ ᠴᠠᠭᠠᠨ ᠳᠣᠲᠣᠷ ᠲᠠᠢ ᠬᠠᠷᠠ ᠳᠡᠪᠡᠯ ᠬᠢᠯᠭᠡᠨ ᠡᠮᠦᠰᠦᠭᠡᠳ ᠬᠠᠭᠠᠨ ᠤ᠋ ᠪᠠᠨ ᠠᠮᠢ ᠨᠠᠰᠤᠨ ᠳ᠋ᠤ᠌ ᠬᠠᠯᠳᠠᠬᠤ ᠪᠠᠷ ᠶᠠᠪᠤᠵᠠᠢ᠃ ᠲᠡᠢᠨ ᠬᠦ᠌ ᠬᠠᠭᠠᠨ ᠢ᠋ ᠬᠣᠣᠷᠯᠠᠭᠠᠳ ᠵᠢᠭᠤᠲᠠᠵᠠᠢ᠃ ᠨᠢᠭᠡᠨ ᠬᠥᠪᠡᠭᠡ ᠳᠠᠪᠠᠮᠠᠭᠴᠠ ᠮᠣᠷᠢ ᠪᠠᠨ ᠤᠰᠤᠨ ᠳ᠋ᠤ᠌ ᠤᠨᠠᠭᠠᠵᠤ ᠤᠬᠢᠶᠠᠭᠠᠳ ᠴᠠᠭᠠᠨ ᠵᠢᠰᠦ ᠶ᠋ᠢ ᠭᠠᠷᠭᠠᠵᠤ᠂ ᠥᠪᠡᠷ ᠢ᠋ᠶ᠋ᠡᠨ ᠳᠡᠪᠡᠯ ᠢ᠋ᠶ᠋ᠡᠨ ᠡᠷᠭᠢᠭᠦᠯᠵᠦ ᠡᠮᠦᠰᠦᠭᠰᠡᠨ ᠠᠵᠠᠢ᠃ ᠲᠡᠢᠨ ᠬᠦ᠌ ᠬᠠᠷᠠ ᠮᠣᠷᠢ ᠲᠠᠢ ᠬᠠᠷᠠ ᠳᠡᠪᠡᠯ ᠲᠡᠢ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠴᠠᠭᠠᠨ ᠮᠣᠷᠢ ᠲᠠᠢ᠂ ᠴᠠᠭᠠᠨ ᠳᠡᠪᠡᠯ ᠲᠡᠢ ᠪᠣᠯᠤᠨ ᠬᠤᠪᠢᠷᠠᠭᠰᠠᠨ ᠨᠢ ᠲᠡᠭᠦᠨ ᠢ᠋ ᠮᠥᠷᠳᠡᠨ ᠬᠥᠭᠡᠭᠡᠵᠦ ᠶᠠᠪᠤᠭᠰᠠᠨ ᠬᠥᠮᠦᠰ ᠢ᠋ ᠲᠥᠭᠡᠷᠢᠭᠳᠡᠭᠦᠯᠵᠦ ᠡᠨᠡ ᠮᠡᠬᠡ ᠪᠡᠷ ᠢ᠋ᠶ᠋ᠡᠨ ᠠᠮᠢ ᠭᠠᠷᠴᠤ ᠴᠢᠳᠠᠵᠠᠢ᠃ ᠪᠤᠷᠬᠠᠨ ᠱᠠᠵᠢᠨ ᠳ᠋ᠤ᠌ ᠲᠤᠰᠠ ᠬᠦᠷᠭᠡᠭᠰᠡᠨ ᠭᠡᠵᠦ ᠦᠵᠡᠭᠡᠳ ᠪᠠᠯᠳᠣᠷᠵᠢ ᠶ᠋ᠢ ᠡᠨᠡᠬᠦ ᠮᠠᠷᠰᠠᠩᠯᡁᠨ ᠬᠡᠢᠳ ᠲᠦ᠍ ᠶᠣᠰᠣ ᠲᠥᠷᠥ ᠲᠡᠢ ᠪᠤᠩᠬᠤᠯᠠᠭᠰᠠᠨ ᠭᠡᠳᠡᠭ ᠳᠣᠮᠣᠭ ᠲᠠᠢ ᠶᠤᠮ ᠰᠠᠨᠵᠠᠢ᠃
ᠭᠠᠰᠢᠭᠤᠨ ᠰᠤᠷᠭᠠᠮᠵᠢ ᠲᠠᠢ ᠳᠣᠮᠣᠭ ᠲᠤ᠌ ᠡᠨᠡ ᠲᠡᠦᠬᠡ ᠶ᠋ᠢ ᠡᠷᠭᠢᠨ ᠰᠠᠨᠠᠬᠤ ᠵᠠᠭᠤᠷᠠ ᠰᠠᠨᠵᠢ ᠶ᠋ᠢᠨ ᠰᠡᠳᠬᠢᠯ ᠪᠠᠭᠠ ᠵᠡᠷᠭᠡ ᠲᠥᠭᠡᠷᠢᠭᠳᠡᠵᠦ᠂ ᠶᠠᠭᠤᠮᠠ ᠪᠦᠬᠦᠨ ᠦ᠌ ᠥᠩᠭᠡ ᠤᠯᠠᠢᠷᠠᠨ ᠬᠤᠪᠢᠷᠠᠭᠰᠠᠨ ᠰᠦᠷᠲᠦ ᠦᠵᠡᠭᠳᠡᠯ ᠡᠴᠡ ᠪᠢᠰᠢᠭᠦᠷᠬᠡᠭᠰᠡᠨ ᠢ᠋ᠶ᠋ᠡᠨ ᠪᠠᠭᠠ ᠪᠣᠯᠪᠠᠴᠤ ᠰᠠᠷᠨᠢᠭᠠᠭᠠᠯᠠ᠃
ᠨᠡᠯᠢᠶᠡᠳ ᠶᠠᠪᠤᠭᠠᠳ ᠳᠠᠬᠢᠨ ᠠᠮᠤᠰᠬᠢᠵᠦ ᠡᠷᠭᠢᠨ ᠲᠣᠭᠣᠷᠢᠨ ᠢ᠋ ᠠᠵᠢᠪᠠᠯ ᠨᠥᠭᠥᠭᠡᠬᠢ ᠠᠶᠤᠮᠰᠢᠭᠲᠠᠢ ᠴᠢᠰᠤᠨ ᠤᠯᠠᠭᠠᠨ ᠥᠩᠭᠡ ᠨᠢᠭᠡᠨᠲᠡ ᠠᠯᠠᠭᠠ ᠪᠣᠯᠤᠨ ᠥᠭᠡᠷᠡᠴᠢᠯᠡᠭᠳᠡᠵᠦ ᠶᠠᠭᠤᠮᠠ ᠪᠦᠬᠦᠨ ᠬᠡᠪ ᠦ᠋ᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠠᠷᠠᠭᠳᠠᠬᠤ ᠪᠣᠯᠴᠢᠬᠠᠭᠰᠠᠨ ᠪᠠᠢᠯᠠ. 《ᠦᠭᠡᠢ ᠡᠨᠡ ᠶᠠᠭᠤᠲᠠᠢ ᠵᠢᠭᠲᠡᠢ ᠪᠢᠯᠡ? ᠨᠠᠳᠠ ᠳ᠋ᠤ᠌ ᠶᠠᠮᠠᠷ ᠨᠢᠭᠡᠨ ᠮᠠᠭᠤ ᠢᠷᠣᠠ ᠲᠠᠨᠢᠭᠳᠠᠪᠠ ᠤᠤ?》 ᠭᠡᠵᠦ ᠰᠠᠨᠵᠢ ᠳᠣᠲᠣᠷᠠ ᠪᠠᠨ ᠪᠣᠳᠣᠭᠠᠳ ᠡᠷᠭᠢᠨ ᠲᠣᠭᠣᠷᠢᠨ ᠢ᠋ ᠳᠠᠬᠢᠨ ᠰᠠᠢᠲᠣᠷ ᠠᠵᠢᠪᠠᠯ ᠮᠠᠷᠰᠠᠩᠯᡁᠨ ᠬᠡᠢᠳ ᠢ᠋ ᠬᠦᠷᠢᠶᠡᠯᠡᠭᠰᠡᠨ ᠡᠯᠢᠭᠡᠨ ᠤᠯᠠᠭᠠᠨ ᠬᠠᠳᠠ ᠨᠤᠭᠤᠳ ᠤ᠋ᠨ ᠡᠩᠭᠡᠷ ᠳᠡᠭᠡᠷᠡ ᠡᠴᠡ ᠣᠷᠣᠢ ᠶ᠋ᠢᠨ ᠤᠯᠠᠭᠠᠨ ᠨᠠᠷᠠᠨ ᠤ᠋ ᠰᠡᠭᠦᠯᠴᠢ ᠶ᠋ᠢᠨ ᠲᠤᠶᠠᠭᠠ ᠬᠢᠯᠠᠪᠬᠢᠨ ᠦᠭᠡᠢ ᠪᠣᠯᠵᠤ ᠪᠠᠢᠬᠤ ᠬᠠᠷᠠᠭᠳᠠᠯᠠ᠃
- ᠠᠢ ᠬᠥᠭᠡᠷᠦᠬᠦᠢ! ᠠᠶᠤᠭᠰᠠᠨ ᠬᠥᠮᠦᠨ ᠠᠳᠤᠭᠤ ᠬᠥᠭᠡᠭᠡᠨᠡ ᠭᠡᠭᠴᠢ ᠪᠡᠷ ᠣᠷᠣᠢ ᠶ᠋ᠢᠨ ᠤᠯᠠᠭᠠᠨ ᠨᠠᠷᠠᠨ ᠤ᠋ ᠰᠢᠷᠭᠠᠯ ᠲᠤᠶᠠᠭᠠᠨ ᠳ᠋ᠤ᠌ ᠡᠨᠡ ᠡᠯᠢᠭᠡᠨ ᠬᠠᠳᠠ ᠴᠢᠰ ᠤᠯᠠᠭᠠᠨ ᠥᠩᠭᠡ ᠲᠡᠢ ᠬᠠᠷᠠᠭᠳᠠᠵᠤ ᠠᠶᠤᠯᠭᠠᠭᠰᠠᠨ ᠪᠠᠢᠵᠤ ᠰᠢᠦ! ᠭᠡᠵᠦ ᠰᠠᠨᠵᠢ ᠠᠮᠠᠨ ᠳ᠋ᠤ᠌ ᠪᠠᠨ ᠥᠭᠡᠯᠡᠨ ᠰᠡᠳᠬᠢᠯ ᠲᠠᠢᠪᠣᠰᠢᠷᠠᠭᠰᠠᠨ ᠶᠠᠩᠵᠤ ᠲᠠᠢ ᠬᠡᠯᠡᠬᠦ ᠳ᠋ᠦ᠍᠂
- ᠮᠠᠷᠰᠠᠩᠯᡁᠨ ᠭᠡᠳᠡᠭ ᠴᠢᠨᠢ ᠲᠥᠪᠡᠳ ᠢ᠋ᠶ᠋ᠡᠷ ᠤᠯᠠᠭᠠᠨ ᡀᠠ ᠭᠡᠰᠡᠨ ᠦᠭᠡ ᠶ᠋ᠢ ᠮᠠᠷᠲᠠᠪᠠ ᠤᠤ? ᠡᠷᠭᠢᠨ ᠲᠣᠭᠣᠷᠢᠨ ᠪᠠᠢᠭᠠ ᠬᠠᠳᠠ ᠨᠤᠭᠤᠳ ᠨᠢ ᠰᠢᠷᠣᠢ ᠨᠢ ᠴᠦ᠍ ᠭᠡᠰᠡᠨ ᠵᠤᠰᠤᠨ ᠤᠯᠠᠭᠠᠨ ᠥᠩᠭᠡ ᠲᠡᠢ ᠭᠠᠵᠠᠷ ᠪᠠᠢᠭᠠ ᠶᠤᠮ᠃ ᠴᠢᠰ ᠤᠯᠠᠭᠠᠨ ᠬᠠᠳᠠ ᠲᠠᠢ ᠪᠣᠯᠬᠣᠷ ᠨᠢ ᠮᠠᠷᠰᠠᠩᠯᡁᠨ ᠭᠡᠵᠦ ᠨᠡᠷᠡᠯᠡᠭᠡ ᠪᠢᠵᠡ᠃ ᠣᠷᠣᠢ ᠶ᠋ᠢᠨ ᠵᠢᠷᠭᠠᠬᠤ ᠨᠠᠷᠠᠨ ᠤ᠋ ᠲᠤᠶᠠᠭᠠ ᠲᠠᠢ ᠨᠡᠢᠯᠡᠭᠡᠳ ᠪᠦᠬᠦ ᠶᠠᠭᠤᠮᠠ ᠤᠯᠠᠭᠠᠨ ᠢ᠋ᠶ᠋ᠠᠷ ᠡᠷᠭᠢᠨ ᠬᠤᠪᠢᠷᠠᠭᠰᠠᠨ ᠮᠡᠲᠦ ᠡᠢᠮᠦ ᠠᠶᠤᠮᠠᠷ ᠥᠩᠭᠡ ᠬᠠᠶᠠ ᠭᠠᠷᠳᠠᠭ ᠭᠠᠵᠠᠷ ᠳᠠ ᠡᠨᠡ᠃ ᠡᠢᠮᠦ ᠶᠠᠭᠤᠮᠠᠨ ᠳ᠋ᠤ᠌ ᠵᠣᠪᠠᠬᠤ ᠬᠡᠷᠡᠭ ᠦᠭᠡᠢ᠃ ᠪᠢᠳᠡᠨ ᠳ᠋ᠦ᠍ ᠡᠭᠦᠨ ᠡᠴᠡ ᠴᠦ᠍ ᠠᠶᠤᠮᠠᠷ ᠶᠠᠭᠤᠮᠠ ᠲᠣᠬᠢᠶᠠᠯᠳᠤᠬᠤ ᠦᠭᠡᠢ ᠭᠡᠬᠦ ᠭᠠᠵᠠᠷ ᠦᠭᠡᠢ᠃ ᠡᠢᠮᠦ ᠳ᠋ᠦ᠍ ᠰᠡᠳᠬᠢᠯ ᠢ᠋ᠶ᠋ᠡᠨ ᠪᠡᠷᠢ! ᠣᠷᠣᠨ ᠬᠡᠢᠳ ᠲᠦ᠍ ᠰᠠᠭᠤᠭᠰᠠᠭᠠᠷ ᠪᠠᠢᠭᠠᠳ ᠴᠢ ᠶᠡᠬᠡ ᠠᠶᠤᠮᠠᠲᠠᠭᠠᠢ ᠪᠣᠯᠤᠭᠰᠠᠨ ᠬᠥᠮᠦᠨ ᠪᠠᠢᠨᠠ ᠭᠡᠵᠦ ᠨᠥᠬᠥᠷ ᠨᠢ ᠶᠠᠷᠢᠪᠠ᠃
ᠲᠡᠨᠦᠭᠦᠯᠴᠢᠨ ᠬᠣᠶᠠᠷ ᠢ᠋ ᠭᠠᠳᠠᠨᠠ ᠠ᠋ᠴᠠ ᠨᠢ ᠬᠠᠷᠠᠬᠤ ᠳ᠋ᠤ᠌ ᠥᠷᠥᠪᠳᠦᠯᠲᠡᠢ ᠪᠠᠢᠯᠠ᠃ ᠨᠢᠭᠡ ᠨᠢ ᠶᠠᠰᠤ ᠠᠷᠠᠰᠤ ᠪᠣᠯᠤᠭᠰᠠᠨ ᠲᠤᠷᠠᠩᠬᠠᠢ ᠪᠡᠶᠡ ᠲᠡᠢ᠂ ᠬᠠᠪᠴᠢᠭ ᠡᠭᠦᠷᠭᠡ ᠡᠭᠦᠷᠴᠢ᠂ ᠳᠣᠯᠳᠣᠢ ᠪᠠᠷᠢᠭᠰᠠᠨ ᠬᠠᠲᠠᠩᠭᠢᠷ ᠲᠤᠷᠠᠩᠬᠠᠢ ᠬᠢᠵᠢᠶᠡᠯᠢ ᠨᠠᠰᠤᠨ ᠤ᠋ ᠡᠷᠡ᠂ ᠨᠥᠭᠦᠭᠡ ᠨᠢ ᠰᠢᠮᠨᠠᠨᠼ ᠤ᠋ᠨ ᠬᠤᠪᠴᠠᠰᠤ ᠡᠮᠦᠰᠦᠭᠰᠡᠨ ᠪᠥᠭᠡᠳ ᠭᠠᠵᠠᠷ ᠱᠠᠭᠠᠢᠵᠤ ᠪᠦᠭᠲᠦᠢᠭᠰᠡᠨ ᠠᠮᠢᠲᠠᠨ ᠠᠵᠠᠢ᠃ ᠨᠢᠷᠤᠭᠤ ᠪᠠᠷ ᠳᠤᠮᠳᠠ ᠵᠡᠷᠭᠡ ᠪᠣᠯᠬᠣᠷ ᠰᠠᠨᠵᠢ ᠶ᠋ᠢ ᠬᠡᠨ ᠴᠦ᠍ ᠬᠠᠷᠠᠭᠠᠳ ᠰᠢᠮᠨᠠᠨᠼ ᠯᠠ ᠭᠡᠵᠦ ᠪᠣᠳᠣᠬᠤ ᠪᠠᠷ ᠪᠠᠢᠯᠠ᠃ ᠬᠠᠷᠢᠨ ᠴᠢᠷᠠᠢ ᠶ᠋ᠢ ᠨᠢ ᠰᠠᠢᠨ ᠠᠵᠢᠭᠯᠠᠬᠤ ᠶᠤᠮ ᠪᠣᠯ ᠡᠷᠡ ᠬᠥᠮᠦᠨ ᠭᠡᠳᠡᠭ ᠢ᠋ ᠮᠡᠳᠡᠬᠦ ᠳ᠋ᠦ᠍ ᠬᠢᠯᠪᠠᠷᠬᠠᠨ ᠶᠤᠮ ᠰᠠᠨᠵᠢ᠃
- ᠦᠭᠡᠢ ᠴᠢᠨᠦ ᠨᠠᠭᠠᠳᠤ ᠤᠷᠤᠭᠤᠯ ᠳᠡᠭᠡᠭᠦᠷ ᠴᠢᠨᠢ ᠭᠠᠭᠴᠠ ᠨᠢᠭᠡ ᠰᠠᠬᠠᠯ ᠰᠢᠭ᠋ ᠶᠠᠭᠤᠮᠠ ᠰᠥᠷᠪᠡᠢᠭᠡᠳ ᠭᠠᠷᠤᠭᠠᠳ ᠢᠷᠡᠵᠡᠢ! ᠣᠳᠣ ᠯᠠ ᠬᠡᠷᠡᠭ ᠪᠢᠰᠢ ᠪᠣᠯᠤᠨᠠ ᠰᠢᠦ! ᠡᠨᠡ ᠲᠥᠪᠡᠳ ᠦ᠋ᠳ ᠦ᠋ᠨ ᠬᠠᠷᠠᠲᠠᠢ ᠶ᠋ᠢ ᠬᠡᠯᠡᠬᠦ ᠤᠤ? ᠭᠡᠵᠦ ᠭᠡᠨᠡᠳᠲᠡ ᠨᠠᠢᠵᠠ ᠶ᠋ᠢ ᠪᠡᠨ ᠰᠠᠨᠠᠭᠤᠯᠬᠤ ᠳ᠋ᠤ᠌ ᠰᠠᠨᠵᠢ ᠤᠨᠲᠤᠭᠤᠴᠠᠨ ᠰᠣᠴᠢᠯᠠ᠃
- ᠨᠡᠭᠡᠷᠡᠨ ᠤᠤ? ᠭᠡᠵᠦ ᠭᠠᠢᠬᠠᠨ ᠠᠰᠠᠭᠤᠬᠤ ᠳ᠋ᠤ᠌ ᠨᠠᠢᠵᠠ ᠨᠢ᠄
- ᠱᠦᠷᠪᠦᠢᠭᠡᠳ ᠶᠡᠬᠡ ᠲᠣᠳᠣ ᠪᠠᠢᠨᠠ᠃ ᠴᠢᠮᠠ ᠳ᠋ᠤ᠌ ᠴᠢᠮᠬᠢᠭᠦᠷ ᠪᠣᠢ ᠤᠤ? ᠵᠤᠯᠭᠠᠭᠠᠵᠤ ᠬᠠᠶᠠᠪᠠᠯ ᠲᠠᠭᠠᠷᠠᠨᠠ᠃ ᠶᠡᠷᠦ ᠨᠢ ᠲᠡᠭᠡᠭᠡᠳ ᠬᠥᠮᠦᠨ ᠦ᠌ ᠥᠭᠡᠳᠡ ᠡᠴᠡ ᠡᠭᠴᠡᠯᠡᠨ ᠬᠠᠷᠠᠭᠠᠳ ᠪᠠᠢᠬᠤ ᠬᠡᠷᠡᠭ ᠦᠭᠡᠢ᠃ ᠲᠠᠨᠢᠭᠳᠠᠨᠠ ᠰᠢᠦ! ᠭᠡᠵᠦ ᠰᠠᠨᠠᠭᠤᠯᠪᠠ᠃ ᠰᠠᠨᠵᠢ ᠦᠨᠡᠬᠡᠷ ᠲᠡᠢᠮᠦ ᠪᠣᠯᠬᠤ ᠮᠠᠭᠠᠳ ᠭᠡᠳᠡᠭ ᠲᠦ᠍ ᠢᠲᠡᠭᠡᠭᠰᠡᠨ ᠲᠤᠯᠠ᠂
- ᠴᠢᠮᠬᠢᠭᠦᠷ ᠨᠠᠳᠠ ᠳ᠋ᠤ᠌ ᠪᠣᠢ ᠪᠣᠢ! ᠡᠨᠡᠦᠬᠡᠨ ᠳ᠋ᠦ᠍ ᠰᠠᠭᠤᠭᠠᠳ ᠵᠤᠯᠭᠠᠭᠠᠯᠭᠠᠬᠤ ᠤᠤ ᠭᠡᠰᠡᠨ ᠳ᠋ᠦ᠍ ᠨᠠᠢᠵᠠ ᠨᠢ᠂
- ᠪᠣᠯᠬᠤ ᠦᠭᠡᠢ᠃ ᠰᠢᠮᠨᠠᠨᠼ ᠤ᠋ᠨ ᠰᠠᠬᠠᠯ ᠵᠤᠯᠭᠠᠭᠠᠵᠤ ᠰᠠᠭᠤᠭᠠ ᠳᠤᠯᠳᠤᠢᠴᠢᠨ ᠢ᠋ ᠬᠠᠷᠠᠪᠠᠯ ᠪᠦᠬᠦ ᠲᠡᠢ ᠮᠣᠷᠢ ᠦᠵᠡᠭᠰᠡᠨ ᠶᠦ᠍ᠮ ᠰᠢᠭ ᠭᠠᠢᠬᠠᠵᠠᠭᠠᠵᠤ ᠰᠦᠢᠳ ᠪᠣᠯᠤᠨᠠ᠃ ᠰᠥᠨᠢ ᠪᠣᠯᠬᠤ ᠪᠠᠷ ᠶᠤᠮ ᠤᠤ ᠡᠰᠡᠪᠡᠯ ᠬᠥᠮᠦᠨ ᠦᠭᠡᠢ ᠵᠡᠯᠢᠭᠦᠳ ᠭᠠᠵᠠᠷ ᠣᠴᠢᠵᠤ ᠪᠠᠢᠭᠠᠳ ᠨᠠᠭᠠᠳᠤᠬᠢ ᠬᠡᠳᠦ ᠶ᠋ᠢ ᠴᠢᠨᠢ ᠵᠤᠯᠭᠠᠭᠠᠶᠠ᠃ ᠶᠠᠮᠠᠷ ᠴᠤ᠌ ᠪᠠᠢᠭᠰᠠᠨ ᠮᠠᠷᠰᠠᠩᠯᡁᠨ ᠳ᠋ᠤ᠌ ᠯᠠ ᠬᠣᠨᠣᠭᠯᠠᠬᠤ ᠪᠠᠨ ᠪᠣᠯᠢᠶᠠ᠃ ᠪᠢ ᠤᠷᠢᠳᠤ ᠨᠢ ᠴᠢᠨᠦ ᠨᠠᠭᠠᠳᠤ ᠬᠡᠳᠦᠨ ᠰᠥᠷᠪᠡᠭᠡᠷ ᠢ᠋ ᠠᠵᠢᠭᠯᠠᠬᠤ ᠮᠢᠨᠢ ᠶᠠᠭᠠᠬᠢᠯᠠ ᠭᠡᠵᠦ ᠪᠣᠯᠭᠣᠮᠵᠢᠲᠠᠢ ᠶᠠᠷᠢᠪᠠ᠃
ᠲᠡᠳᠡ ᠡᠢᠨ ᠬᠦ᠌ ᠮᠠᠷᠰᠠᠩᠯᡁᠨ ᠬᠡᠢᠳ ᠢ᠋ᠶ᠋ᠡᠷ ᠣᠷᠣᠬᠤ ᠦᠭᠡᠢ ᠥᠩᠭᠡᠷᠡᠨ ᠶᠠᠪᠤᠬᠤ ᠪᠠᠷ ᠰᠢᠢᠳᠦᠯᠡ᠃ ᠰᠥᠨᠢ ᠶ᠋ᠢᠨ ᠬᠠᠷᠠᠩᠭᠤᠢ ᠨᠥᠮᠥᠷᠬᠦ ᠬᠦᠷᠲᠡᠯᠡ ᠲᠡᠳᠡ ᠶᠠᠪᠤᠵᠠᠭᠠᠯᠠ᠃ ᠲᠡᠭᠡᠭᠡᠳ ᠨᠢᠭᠡᠨ ᠶᠡᠬᠡ ᠰᠦᠷᠯᠢᠭ ᠬᠠᠳᠠᠨ ᠤ᠋ ᠨᠥᠮᠥᠷᠢ ᠳ᠋ᠦ᠍ ᠣᠷᠣᠵᠤ ᠲᠡᠳᠡ ᠬᠡᠭᠡᠷᠡ ᠬᠣᠨᠣᠭᠯᠠᠬᠤ ᠪᠠᠷ ᠰᠢᠢᠳᠴᠡᠢ᠃ ᠴᠠᠭ ᠳᠤᠯᠠᠭᠠᠨ ᠲᠤᠯᠠ ᠬᠡᠭᠡᠷᠡ ᠬᠣᠨᠣᠬᠤ ᠳ᠋ᠤ᠌ ᠲᠣᠬᠢᠷᠠᠮᠵᠢᠲᠠᠢ ᠪᠠᠢᠯᠠ᠃ ᠰᠥᠨᠢ ᠶ᠋ᠢᠨ ᠴᠠᠭ ᠢ᠋ᠶ᠋ᠠᠷ ᠠᠭᠤᠯᠠᠨ ᠳ᠋ᠤ᠌ ᠭᠠᠯ ᠭᠠᠷᠬᠤ ᠠᠶᠤᠯ ᠲᠠᠢ ᠲᠤᠯᠠ ᠲᠡᠳᠡ ᠬᠠᠭᠤᠷᠠᠢ ᠶᠠᠭᠤᠮᠠ ᠢᠳᠡᠵᠦ ᠭᠣᠣᠯ ᠢ᠋ᠶ᠋ᠠᠨ ᠵᠣᠭᠣᠯᠠ᠃ ᠠᠭᠤᠯᠠᠨ ᠳ᠋ᠤ᠌ ᠥᠴᠦᠬᠡᠨ ᠲᠡᠳᠦᠢ ᠭᠠᠯ ᠬᠠᠷᠠᠭᠳᠠᠪᠠᠯ ᠳᠡᠭᠡᠷᠡᠮᠴᠢᠨ ᠨᠥᠬᠥᠳ ᠪᠠᠷᠢᠮᠵᠢᠶᠠ ᠠᠪᠴᠤ ᠰᠢᠩᠰᠢᠯᠡᠨ ᠢᠷᠡᠳᠡᠭ ᠨᠢ ᠲᠥᠪᠡᠳ ᠭᠠᠵᠠᠷ ᠤ᠋ᠨ ᠪᠠᠷᠤᠭ ᠨᠡᠢᠲᠡᠯᠢᠭ ᠪᠣᠯᠤᠭᠰᠠᠨ ᠵᠠᠩᠰᠢᠯ ᠶᠤᠮ᠃
- ᠵᠠ ᠴᠢᠪᠠᠭᠠᠨᠴᠠ ᠮᠢᠨᠢ ᠬᠠᠵᠠᠭᠤ ᠪᠠᠷ ᠬᠡᠪᠲᠡ! ᠭᠡᠵᠦ ᠨᠠᠢᠵᠠ ᠨᠢ ᠱᠣᠭᠯᠠᠬᠤ ᠳ᠋ᠤ᠌ ᠰᠠᠨᠵᠢ ᠬᠢ ᠬᠢ ᠢᠨᠢᠶᠡᠵᠦ᠂
- ᠴᠢᠪᠠᠭᠠᠨᠴᠠ ᠪᠣᠯᠵᠤ ᠳᠠᠩᠴᠢ ᠰᠤᠷᠬᠤ ᠦᠭᠡᠢ ᠨᠢ ᠠ᠋! ᠭᠡᠪᠡ᠃
ᠰᠤᠷᠤᠭᠠᠳ ᠴᠤ᠌ ᠶᠠᠭᠠᠬᠢᠬᠤ ᠶᠤᠮ ᠪᠢᠯᠡ᠃ ᠨᠤᠲᠤᠭ ᠣᠷᠣᠨ ᠤ᠋ ᠪᠠᠷᠠ ᠬᠠᠷᠠᠬᠤ ᠬᠦᠷᠲᠡᠯᠡ ᠴᠢᠪᠠᠭᠠᠨᠴᠠ ᠶ᠋ᠢᠨ ᠳᠦᠷᠢ ᠶ᠋ᠢ ᠦᠵᠡᠭᠦᠯᠵᠦ ᠶᠠᠪᠤᠪᠠᠯ ᠪᠣᠯᠤᠭᠠ᠃ ᠶᠡᠷᠦ ᠨᠢ ᠲᠡᠭᠡᠭᠡᠳ ᠬᠥᠮᠦᠨ ᠠᠮᠢᠲᠠᠨ ᠣᠢᠷᠠ ᠦᠵᠡᠭᠳᠡᠵᠦ ᠪᠠᠢᠬᠤ ᠴᠠᠭ ᠲᠤ᠌ ᠶᠠᠭᠤᠮᠠ ᠶᠠᠷᠢᠬᠤ ᠬᠡᠷᠡᠭ ᠦᠭᠡᠢ᠃ ᠳᠠᠭᠤ ᠴᠢᠨᠢ ᠴᠢᠪᠠᠭᠠᠨᠴᠠ ᠶ᠋ᠢᠨ ᠬᠢ ᠡᠴᠡ ᠣᠭᠲᠣ ᠥᠭᠡᠷᠡ ᠶᠦ᠍ᠮ᠃ ᠳᠠᠭᠤ ᠪᠠᠷ ᠢ᠋ᠶ᠋ᠠᠨ ᠲᠠᠨᠢᠭᠳᠠᠴᠢᠬᠠᠬᠤ ᠭᠡᠳ ᠪᠠᠢᠬᠤ ᠶᠤᠮ ᠭᠡᠵᠦ ᠨᠠᠢᠵᠠ ᠨᠢ ᠰᠠᠨᠠᠭᠤᠯᠪᠠ᠃ ᠰᠠᠨᠵᠢ ᠲᠡᠭᠦᠨ ᠢ᠋ ᠵᠥᠪᠰᠢᠶᠡᠷᠡᠵᠦ ᠪᠠᠢᠯᠠ᠃ ᠦᠨᠡᠬᠡᠷ ᠴᠢᠪᠠᠭᠠᠨᠴᠠ ᠶ᠋ᠢᠨ ᠳᠠᠭᠤ ᠭᠠᠷᠭᠠᠬᠤ ᠭᠡᠵᠦ ᠬᠢᠴᠢᠶᠡᠭᠡᠳ ᠬᠢᠴᠢᠶᠡᠭᠡᠳ ᠨᠡᠮᠡᠷᠢ ᠦᠭᠡᠢ ᠪᠠᠢᠭᠠ ᠶ᠋ᠢ ᠲᠡᠷᠡ ᠬᠡᠳᠦ ᠬᠡᠳᠦᠨ ᠤᠳᠠᠭᠠ ᠠᠵᠢᠭᠯᠠᠭᠰᠠᠨ ᠶᠤᠮ᠃
- ᠢᠨᠢᠶᠡᠳᠦ ᠲᠡᠢ ᠬᠡᠷᠡᠭ ᠰᠢᠦ! ᡀᠠᠷᠠᠮᠪᠠ ᠶ᠋ᠢᠨ ᠳᠡᠮᠵᠢᠶᠡ ᠪᠠᠷᠢᠴᠢᠬᠠᠭᠠᠳ ᠰᠢᠮᠨᠠᠨᠼ ᠪᠣᠯᠤᠭᠠᠳ ᠢᠩᠭᠢᠵᠦ ᠶᠠᠪᠤᠬᠤ ᠭᠡᠳᠡᠭ! ᠭᠡᠵᠦ ᠰᠠᠨᠵᠢ ᠭᠠᠢᠬᠠᠬᠤ ᠠᠶᠠᠰ ᠭᠠᠷᠭᠠᠬᠤ ᠳ᠋ᠤ᠌᠂
- ᠲᠡᠷᠡ ᠪᠠᠢᠳᠠᠭ ᠯᠠ ᠶᠣᠰᠣ᠃ ᠡᠷᠡ ᠬᠥᠮᠦᠨ ᠳᠣᠯᠣᠭᠠ ᠳᠣᠣᠷᠠᠲᠤᠵᠤ᠂ ᠨᠠᠢ᠍ᠮᠠ ᠰᠡᠬᠡᠳᠡᠭ ᠶᠦ᠍ᠮ᠃ ᠲᠥᠪᠡᠳ᠂ ᠲᠠᠩᠭᠤᠳ ᠤ᠋ᠨ ᠭᠠᠷ ᠲᠤ᠌ ᠯᠠ ᠪᠠᠷᠢᠭᠳᠠᠬᠤ ᠦᠭᠡᠢ ᠡᠨᠡ ᠨᠤᠲᠤᠭ ᠠ᠋ᠴᠠ ᠭᠠᠷᠴᠤ ᠴᠢᠳᠠᠪᠠᠯ ᠪᠣᠯᠤᠯᠠ᠃ ᠭᠡᠷ ᠣᠷᠣᠨ ᠳ᠋ᠤ᠌ ᠪᠠᠨ ᠡᠷᠭᠢᠵᠦ ᠣᠴᠢᠬᠤ ᠳ᠋ᠤ᠌ ᠴᠢᠨᠢ ᠴᠢᠮᠠᠶ᠋ᠢ ᠰᠠᠢᠬᠠᠨ ᠴᠠᠭᠠᠨ ᠰᠡᠳᠬᠢᠯ ᠲᠡᠢ ᠮᠣᠩᠭᠣᠯ ᠠᠬᠠ ᠳᠡᠣᠭᠦᠰ ᠤᠭᠲᠤᠵᠤ ᠠᠪᠤᠭᠠᠳ ᠴᠠᠭᠠᠨ ᠢᠰᠡᠭᠡᠢ ᠳᠡᠭᠡᠷᠡ ᠪᠡᠨ ᠲᠣᠰᠴᠤ ᠪᠠᠭᠤᠯᠭᠠᠭᠠᠳ ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠲᠦ᠍ ᠬᠠᠩᠪᠤ ᠯᠠᠮᠠ ᠪᠠᠷ ᠵᠠᠯᠠᠨᠠ ᠳᠠ! ᠲᠡᠷᠡ ᠴᠠᠭ ᠲᠤ᠌ ᠬᠥᠭᠰᠢᠨ ᠮᠠᠭᠤ ᠠᠬᠠ ᠶ᠋ᠢ ᠪᠡᠨ ᠪᠠᠯᠢᠩᠴᠢ ᠪᠠᠷ ᠠᠪᠤᠭᠠᠷᠠᠢ ᠳᠠ᠃ ᠠᠬᠠ ᠨᠢ ᠪᠠᠯᠢᠩ᠂ ᠱᠠᠯᠰᠠᠢ ᠬᠢᠬᠦ ᠳ᠋ᠦ᠍ ᠪᠡᠨ ᠭᠠᠷ ᠤ᠋ᠨ ᠳᠦᠢᠲᠡᠢ ᠶᠦ᠍ᠮ ᠭᠡᠵᠦ ᠨᠠᠢᠵᠠ ᠨᠢ ᠰᠠᠨᠵᠢ ᠶ᠋ᠢᠨ ᠪᠠᠷᠤᠭ ᠴᠢᠬᠢᠨ ᠳᠡᠭᠡᠷᠡ ᠨᠢ ᠰᠢᠪᠡᠨᠡᠨ ᠶᠠᠷᠢᠬᠤ ᠳ᠋ᠤ᠌ ᠰᠡᠳᠬᠢᠯ ᠨᠢ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠬᠠᠢᠯᠠᠨ ᠤᠶᠠᠷᠠᠪᠠ᠃
《ᠬᠥᠭᠡᠷᠦᠬᠦᠢ ᠡᠨᠡ ᠶᠠᠳᠠᠷᠠᠭᠰᠠᠨ ᠡᠷᠡ ᠳ᠋ᠦ᠍ ᠪᠢ ᠲᠤᠰᠠ ᠬᠦᠷᠭᠡᠬᠦ ᠶᠣᠰᠣᠲᠠᠢ᠃ ᠶᠠᠳᠠᠷᠠᠭᠰᠠᠨ ᠴᠠᠭ ᠲᠤ᠌ ᠶᠠᠳᠠᠷᠠᠭᠰᠠᠨ ᠬᠥᠮᠦᠨ ᠯᠡ ᠲᠤᠰᠠ ᠪᠣᠯᠳᠠᠭ ᠶᠤᠮ ᠪᠠᠢᠨᠠ》 ᠭᠡᠵᠦ ᠰᠠᠨᠵᠢ ᠳᠣᠲᠣᠷᠠ ᠪᠠᠨ ᠪᠣᠳᠣᠵᠤ ᠪᠠᠢᠯᠠ᠃ ᠰᠠᠨᠵᠢ ᠶ᠋ᠢᠨ ᠳᠠᠭᠠᠭᠤᠯᠤᠨ ᠭᠠᠷᠤᠭᠰᠠᠨ ᠲᠡᠷᠡ ᠨᠠᠢᠵᠠ ᠨᠢ ᠬᠠᠷᠠ ᠠᠵᠢᠷᠭᠠ ᠶ᠋ᠢᠨ ᠨᠢᠷᠤᠭᠤ᠂ ᠪᠤᠷᠬᠠᠨ ᠪᠤᠤᠳᠠᠢ ᠠᠭᠤᠯᠠ ᠪᠠᠷ ᠨᠤᠲᠤᠭ ᠲᠠᠢ ᠡᠭᠡᠯ ᠨᠢᠭᠡᠨ ᠡᠷᠡ ᠪᠠᠢᠵᠠᠢ᠃ ᠬᠡᠢᠳ ᠲᠦ᠍ ᠱᠠᠪᠢᠯᠠᠨ ᠰᠠᠭᠤᠵᠤ ᠯᠠᠮᠠ ᠪᠠᠭᠰᠢ ᠨᠢ ᠲᠡᠭᠦᠨ ᠢ᠋ ᠳᠠᠭᠠᠭᠤᠯᠤᠨ ᠤᠲᠠᠢ᠂ ᠭᠦᠮᠪᠦᠮ᠂ ᡀᠠᠰᠠ ᠵᠣᠣ ᠪᠠᠷ ᠮᠥᠷᠭᠥᠯ ᠬᠢᠬᠦ ᠪᠡᠷ ᠶᠠᠪᠤᠵᠠᠢ᠃ ᠭᠡᠪᠡᠴᠦ ᠲᠥᠪᠡᠳ ᠦ᠋ᠨ ᠥᠨᠳᠥᠷ ᠠᠭᠤᠯᠠᠨ ᠳ᠋ᠤ᠌ ᠳᠡᠭᠡᠷᠡᠮᠴᠢᠨ ᠨᠥᠬᠥᠳ ᠲᠡᠢ ᠳᠠᠭᠠᠷᠢᠯᠳᠤᠭᠠᠳ ᠪᠠᠭᠰᠢ ᠯᠠᠮᠠ ᠨᠢ ᠲᠡᠳᠡᠨ ᠢ᠋ ᠡᠰᠡᠷᠭᠦᠴᠡᠭᠰᠡᠨ ᠦ᠌ ᠤᠴᠢᠷ ᠭᠣᠯᠣᠣᠭ ᠣᠮᠣᠭ ᠤ᠋ᠨ ᠬᠢᠨ ᠳ᠋ᠦ᠍ ᠪᠠᠷᠢᠭᠳᠠᠵᠤ ᠲᠠᠮᠤᠯᠠᠭᠳᠠᠭᠠᠳ ᠡᠴᠦᠰ ᠲᠡᠭᠡᠨ ᠠᠭᠤᠯᠠ ᠶ᠋ᠢᠨ ᠭᠣᠣᠯ ᠤ᠋ᠨ ᠭᠦᠨ ᠴᠦᠩᠬᠦᠯ ᠳ᠋ᠦ᠍ ᠰᠢᠳᠡᠭᠦᠯᠴᠢᠬᠡᠵᠡᠢ᠃ ᠲᠡᠭᠦᠨ ᠡᠴᠡ ᠪᠣᠯᠵᠤ ᠬᠥᠮᠦᠨ ᠦ᠌ ᠭᠠᠵᠠᠷ᠂ ᠭᠦᠨ ᠦ᠌ ᠨᠤᠲᠤᠭ ᠲᠤ᠌ ᠭᠠᠪ ᠭᠠᠭᠴᠠᠭᠠᠷ ᠬᠠᠶᠠᠭᠳᠠᠭᠰᠠᠨ ᠪᠢᠴᠢᠬᠠᠨ ᠬᠤᠸᠠᠷᠠᠭ ᠥᠯᠵᠡᠢᠲᠦ ᠬᠤᠪᠢ ᠵᠠᠶᠠᠭᠠ ᠪᠠᠨ ᠥᠪᠡᠷ ᠢ᠋ᠶ᠋ᠡᠨ ᠰᠢᠢᠳᠬᠦ ᠡᠴᠡ ᠠᠷᠭᠠ ᠦᠭᠡᠢ ᠳ᠋ᠦ᠍ ᠬᠦᠷᠦᠭᠰᠡᠨ ᠶᠤᠮᠰᠠᠨᠵᠠᠢ᠃
ᠲᠥᠪᠡᠳ ᠣᠷᠣᠨ ᠢ᠋ᠶ᠋ᠠᠷ ᠣᠯᠠᠨ ᠵᠢᠯ ᠲᠡᠨᠦᠭᠦᠴᠢᠯᠡᠨ᠂ ᠳᠣᠯᠳᠣᠢ ᠲᠠᠢ ᠪᠠᠳᠢᠷᠴᠢ ᠶ᠋ᠢᠨ ᠳᠦᠷᠢ ᠪᠡᠷ ᠥᠴᠢᠨᠡᠨ ᠬᠤᠭᠤᠴᠠᠭᠠ ᠶ᠋ᠢ ᠥᠩᠭᠡᠷᠡᠭᠡᠵᠡᠢ᠃ ᠲᠥᠷᠥᠭᠰᠡᠨ ᠨᠤᠲᠤᠭ ᠠ᠋ᠴᠠ ᠦᠨᠡᠲᠡᠢ ᠶᠠᠭᠤᠮᠠ ᠦᠭᠡᠢ ᠶ᠋ᠢ ᠡᠨᠡ ᠵᠠᠪᠰᠠᠷ ᠶᠠᠰᠤ ᠮᠢᠬᠠ ᠪᠠᠷ ᠢ᠋ᠶ᠋ᠠᠨ ᠮᠡᠳᠡᠷᠡᠵᠡᠢ᠃ ᠲᠡᠭᠡᠭᠡᠳ ᠰᠠᠨᠵᠢ ᠶ᠋ᠢᠨ ᠬᠠᠨᠢ ᠪᠠᠷᠠ ᠪᠣᠯᠵᠤ ᠨᠤᠲᠤᠭ ᠪᠠᠷᠠᠭᠠᠳᠠᠬᠤ ᠵᠠᠮ ᠳ᠋ᠤ᠌ ᠭᠠᠷᠤᠭᠰᠠᠨ ᠨᠢ ᠡᠨᠡ᠃ ᠰᠠᠨᠵᠢ ᠲᠡᠷᠡ ᠬᠣᠶᠠᠷ ᠶᠠᠭᠠᠬᠢᠵᠤ ᠲᠠᠨᠢᠯᠴᠠᠭᠰᠠᠨ ᠪᠣᠢ ᠭᠡᠪᠡᠯ ᡀᠠᠰᠠ ᠬᠣᠲᠠ ᠶ᠋ᠢᠨ ᠭᠤᠳᠤᠮᠵᠢᠨ ᠳ᠋ᠤ᠌ ᠪᠢᠯᠡ᠃
ᠳ᠋ᠦᠩᠵᠦᠪ ᠵᠠᠯᠠᠬᠤ ᠶᠣᠰᠣᠯᠠᠯ ᠪᠣᠯᠵᠤ ᠪᠠᠢᠭᠰᠠᠨ ᠶᠤᠮ᠃ ᠵᠢᠯ ᠪᠦᠷᠢ ᠶ᠋ᠢᠨ ᠡᠬᠢᠨ ᠰᠠᠷᠠ ᠶ᠋ᠢᠨ ᠬᠣᠷᠢᠨ ᠳᠥᠷᠪᠡᠨ ᠳ᠋ᠦ᠍ ᠳ᠋ᠦᠩᠵᠦᠪ ᠵᠠᠯᠠᠨᠠ ᠭᠡᠵᠦ ᠬᠣᠶᠠᠷ ᠲᠣᠮᠣ ᠰᠤᠷ ᠪᠡᠯᠡᠳᠬᠡᠨ ᠰᠢᠲᠠᠭᠠᠵᠤ ᠳᠠᠷᠠᠭᠠ ᠨᠢ ᠯᠠᠨᠳᠠᠷᠮᠠ ᠬᠠᠭᠠᠨ ᠢ᠋ ᠣᠷᠣᠰᠢᠭᠤᠯᠤᠭᠰᠠᠨ ᠠᠭᠤᠯᠠ ᠶ᠋ᠢᠨ ᠵᠦᠭ ᠦᠬᠡᠷ ᠫᠤᠤ ᠪᠠᠷ ᠫᠤᠤᠳᠠᠳᠠᠭ ᠲᠡᠷᠡ ᠶᠣᠰᠣᠯᠠᠯ ᠤ᠋ᠨ ᠦᠶᠡ ᠳ᠋ᠦ᠍ ᠨᠢᠭᠡ ᠬᠡᠰᠡᠭ ᠮᠥᠷᠭᠥᠯᠴᠢᠳ ᠰᠤᠷ ᠤ᠋ᠨ ᠦᠨᠡᠰᠦ ᠣᠯᠵᠤ ᠠᠪᠬᠤ ᠶ᠋ᠢᠨ ᠲᠥᠯᠥᠭᠡ ᠨᠥᠭᠦᠭᠡ ᠵᠠᠷᠢᠮ ᠨᠢ ᠦᠬᠡᠷ ᠫᠤᠤ ᠶ᠋ᠢᠨ ᠰᠤᠮᠤ ᠶ᠋ᠢ ᠲᠤᠰᠤᠭᠰᠠᠨ ᠭᠠᠵᠠᠷ ᠠ᠋ᠴᠠ ᠨᠢ ᠣᠯᠵᠤ ᠡᠷᠭᠢᠭᠦᠯᠦᠨ ᠠᠪᠴᠢᠷᠠᠵᠤ ᠥᠭᠬᠦ᠂ ᠲᠡᠭᠡᠭᠰᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠦᠲᠦᠨ ᠵᠢᠯ ᠦ᠋ᠨ ᠲᠤᠷᠰᠢ ᠠᠯᠪᠠ ᠭᠤᠪᠴᠢᠭᠤᠷ ᠠ᠋ᠴᠠ ᠴᠢᠯᠥᠭᠡᠯᠡᠭᠳᠡᠬᠦ ᠶ᠋ᠢᠨ ᠲᠥᠯᠥᠭᠡ ᠵᠢᠳᠬᠦᠳᠡᠭ ᠠᠵᠠᠢ᠃ ᠥᠯᠵᠡᠢᠲᠦ ᠲᠡᠢᠮᠦ ᠬᠡᠷᠡᠭ ᠢ᠋ᠶ᠋ᠡᠷ ᠰᠤᠷ ᠤ᠋ᠨ ᠦᠯᠡᠳᠡᠭᠳᠡᠯ ᠪᠤᠯᠢᠶᠠᠯᠳᠤᠨ ᠵᠣᠳᠣᠯᠳᠤᠵᠤ ᠪᠠᠢᠵᠠᠢ᠃ ᠬᠠᠮᠤᠭ ᠮᠡᠬᠡ ᠪᠡᠨ ᠰᠢᠪᠬᠠᠨ ᠵᠣᠳᠣᠯᠳᠤᠵᠠᠢ᠃
ᠭᠡᠪᠡᠴᠦ ᠲᠡᠭᠦᠨ ᠳ᠋ᠦ᠍ ᠶᠠᠭᠤ ᠴᠤ᠌ ᠣᠯᠳᠠᠭᠰᠠᠨ ᠦᠭᠡᠢ᠃ ᠰᠤᠷ ᠤ᠋ᠨ ᠬᠤᠪᠴᠠᠰᠤᠨ ᠤ᠋ ᠪᠢᠴᠢᠬᠠᠨ ᠲᠠᠰᠤᠷᠬᠠᠢ ᠣᠯᠵᠤ ᠠᠪᠤᠭᠰᠠᠨ ᠢ᠋ ᠨᠢ ᠥᠭᠡᠷᠡ ᠨᠢᠭᠡ ᠮᠥᠷᠭᠥᠯᠴᠢᠨ ᠪᠤᠯᠢᠶᠠᠨ ᠠᠪᠴᠤ ᠥᠯᠵᠡᠢᠲᠦ ᠶ᠋ᠢ ᠨᠠᠷᠮᠠᠢᠲᠠᠯᠠ ᠨᠢ ᠳᠡᠯᠡᠰᠦᠭᠰᠡᠨ ᠳ᠋ᠦ᠍ ᠲᠡᠷᠡ ᠰᠤᠷ ᠤ᠋ᠨ ᠭᠠᠯ ᠪᠠᠢᠭᠰᠠᠨ ᠦᠨᠡᠰᠦᠨ ᠳᠡᠭᠡᠷᠡ ᠨᠢᠭᠤᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠠᠳᠬᠤᠨ ᠣᠢᠴᠢᠴᠢᠬᠠᠭᠠᠳ ᠬᠣᠷᠣᠰᠤᠨ ᠪᠠᠴᠢᠮᠳᠠᠭᠰᠠᠨ ᠠ᠋ᠴᠠ ᠪᠣᠯᠵᠤ ᠤᠬᠢᠯᠠᠵᠤ ᠰᠠᠭᠤᠬᠤ ᠦᠶᠡ ᠳ᠋ᠦ᠍ ᠨᠢ ᠰᠠᠨᠵᠢ ᠲᠡᠭᠦᠨ ᠢ᠋ ᠥᠷᠥᠪᠳᠦᠵᠦ ᠲᠡᠳᠡᠨ ᠪᠣᠰᠬᠠᠬᠤ ᠳ᠋ᠤ᠌ ᠥᠯᠵᠡᠢᠲᠦ᠂
- ᠮᠠᠭᠤᠰᠠᠢᠨ ᠵᠡᠷᠯᠢᠭ ᠲᠠᠩᠭᠤᠳ ᠤᠳ ᠲᠠᠢ ᠨᠢᠭᠡ ᠶ᠋ᠢ ᠪᠡᠨ ᠦᠵᠡᠬᠦ ᠮᠢᠨᠢ ᠭᠡᠵᠦ ᠮᠣᠩᠭᠣᠯ ᠢ᠋ᠶ᠋ᠠᠷ ᠵᠠᠨᠤᠯᠬᠢᠯᠠᠬᠤ ᠳ᠋ᠤ᠌ ᠰᠠᠨᠵᠢ ᠲᠡᠭᠦᠨ ᠢ᠋ ᠰᠠᠶᠢ ᠯᠠ ᠮᠣᠩᠭᠣᠯ ᠬᠥᠮᠦᠨ ᠶᠦ᠍ᠮ ᠪᠠᠢᠨᠠ ᠭᠡᠵᠦ ᠮᠡᠳᠡᠭᠡᠳ ᠭᠠᠷ ᠠ᠋ᠴᠠ ᠨᠢ ᠬᠥᠲᠥᠯᠦᠨ ᠶᠠᠪᠤᠵᠤ ᠣᠯᠠᠨ ᠤ᠋ ᠬᠥᠯ ᠡᠴᠡ ᠵᠠᠢᠯᠠᠭᠣᠯᠣᠭᠠᠳ᠂
- ᠰᠤᠷ ᠤ᠋ᠨ ᠦᠯᠡᠳᠡᠭᠳᠡᠯ ᠢ᠋ᠶ᠋ᠡᠷ ᠶᠠᠭᠤ ᠪᠠᠨ ᠬᠢᠬᠦ ᠨᠢ ᠪᠣᠢ ᠳᠠ? ᠭᠡᠵᠦ ᠮᠣᠩᠭᠣᠯ ᠢ᠋ᠶ᠋ᠠᠷ ᠠᠰᠠᠭᠤᠵᠠᠢ᠃ ᠲᠡᠷᠡ ᠰᠠᠨᠵᠢ ᠶ᠋ᠢ ᠮᠣᠩᠭᠣᠯ ᠬᠥᠮᠦᠨ ᠭᠡᠵᠦ ᠮᠡᠳᠡᠮᠡᠭᠴᠡ ᠤᠯᠠᠮ ᠴᠤ᠌ ᠰᠡᠳᠬᠢᠯ ᠢ᠋ᠶ᠋ᠡᠷ ᠤᠨᠠᠨ ᠡᠬᠡᠷ ᠲᠡᠳᠡᠨ ᠤᠬᠢᠯᠠᠵᠤ᠂
- ᠬᠠᠯᠬᠠ ᠮᠢᠴᠠᠡᠭ ᠦ᠋ᠨ ᠪᠠᠯᠳᠠᠨ ᠯᠠᠮᠠ ᠭᠤᠶᠤᠭᠰᠠᠨ ᠶᠤᠮ᠃ ᠰᠤᠷ ᠤ᠋ᠨ ᠦᠯᠡᠳᠡᠭᠳᠡᠯ ᠣᠯᠵᠤ ᠢᠷᠡᠪᠡᠯ ᠶᠡᠬᠡ ᠱᠠᠩ ᠥᠭᠭᠦᠨᠡ ᠭᠡᠰᠡᠨ ᠶᠦ᠍ᠮ ᠁ ᠭᠡᠵᠦ ᠦᠭᠡ ᠪᠡᠨ ᠲᠠᠰᠤᠯᠤᠨ ᠴᠤᠪᠤᠭᠤᠯᠤᠨ ᠶᠠᠷᠢᠪᠠ᠃ ᠰᠠᠨᠵᠢ ᠲᠡᠭᠦᠨ ᠢ᠋ ᠥᠷᠥᠪᠳᠦᠵᠦ᠂
- ᠵᠠ ᠶᠠᠭᠠᠬᠢᠬᠤ ᠪᠣᠢ᠂ ᠨᠤᠲᠤᠭ ᠤ᠋ᠨ ᠬᠥᠮᠦᠨ ᠶᠦ᠍ᠮ ᠪᠠᠢᠨᠠ᠃ ᠪᠢ ᠴᠢᠮᠠ ᠳ᠋ᠤ᠌ ᠣᠯᠵᠠ ᠪᠠᠨ ᠥᠭᠭᠦᠶᠡ! ᠭᠡᠵᠦ ᠬᠡᠯᠡᠭᠡᠳ ᠣᠷᠬᠢᠮᠵᠢᠨ ᠤ᠋ ᠪᠠᠨ ᠳᠣᠣᠭᠤᠷ ᠨᠢᠭᠤᠭᠰᠠᠨ ᠲᠦᠯᠡᠩᠬᠡᠢ ᠳ᠋ᠦᠩᠵᠦᠪ ᠦ᠋ᠨ ᠨᠢᠭᠡ ᠬᠡᠯᠲᠡᠷᠬᠡᠢ ᠶ᠋ᠢ ᠭᠠᠷᠭᠠᠵᠤ ᠢᠷᠡᠭᠡᠳ ᠲᠡᠭᠦᠨ ᠳ᠋ᠦ᠍ ᠥᠭᠴᠡᠢ᠃
- ᠳ᠋ᠦᠩᠵᠦᠪ ᠵᠠᠯᠠᠬᠤ ᠳ᠋ᠤ᠌ ᠯᠠᠮᠠ ᠪᠠᠭᠰᠢ ᠳ᠋ᠤ᠌ ᠪᠠᠨ ᠲᠤᠰᠠᠯᠠᠵᠤ ᠪᠠᠢᠬᠤ ᠵᠠᠭᠤᠷᠠ ᠣᠯᠵᠤ ᠠᠪᠤᠭᠰᠠᠨ ᠶᠤᠮ᠃ ᠵᠠ ᠶᠠᠭᠠᠬᠢᠬᠤ ᠪᠣᠢ᠂ ᠨᠤᠲᠤᠭ ᠤ᠋ᠨ ᠬᠥᠮᠦᠨ ᠪᠠᠢᠨᠠ᠃ ᠲᠠᠨ ᠳ᠋ᠤ᠌ ᠥᠭᠴᠢᠬᠡᠶᠡ ᠭᠡᠵᠦ ᠰᠠᠨᠵᠢ ᠲᠡᠭᠦᠨ ᠳ᠋ᠦ᠍ ᠬᠡᠯᠡᠬᠦ ᠳ᠋ᠦ᠍ ᠥᠯᠵᠡᠢᠲᠦ ᠠᠰᠤᠷᠤ ᠶᠡᠬᠡ ᠪᠠᠶᠠᠷᠯᠠᠵᠤ᠂ ᠬᠡᠦᠬᠡᠳ ᠮᠡᠲᠦ ᠢᠨᠢᠶᠡᠮᠰᠦᠭᠯᠡᠨ᠂ ᠲᠦᠯᠡᠩᠬᠡᠢ ᠳ᠋ᠦᠩᠵᠦᠪ ᠦ᠋ᠨ ᠲᠠᠰᠤᠷᠬᠠᠢ ᠶ᠋ᠢ ᠨᠠᠨᠳᠢᠩᠨᠠᠨ ᠬᠣᠶᠠᠷ ᠭᠠᠷᠳᠠᠨ ᠲᠣᠰᠴᠤ ᠠᠪᠬᠤ ᠳ᠋ᠤ᠌ ᠨᠢ ᠰᠠᠨᠵᠢ ᠳ᠋ᠤ᠌ ᠬᠥᠭᠡᠷᠦᠬᠦᠢ ᠲᠡᠷᠡ ᠰᠦᠰᠦᠭᠲᠡᠨ ᠢ᠋ ᠦᠷᠦ ᠡᠪᠡᠳᠬᠦ ᠰᠡᠳᠬᠢᠯ ᠲᠥᠷᠥᠵᠦ ᠪᠢᠯᠡ᠃ ᠰᠦᠵᠢᠭ ᠭᠡᠳᠡᠭ ᠶᠠᠮᠠᠷ ᠶᠡᠬᠡ ᠬᠦᠴᠦ ᠪᠡᠷ ᠬᠥᠮᠦᠨ ᠢ᠋ ᠠᠳᠬᠤᠵᠤ ᠪᠠᠢᠳᠠᠭ ᠨᠢ ᠡᠨᠡ ᠮᠡᠲᠦ ᠥᠴᠦᠬᠡᠨ ᠵᠦᠢᠯ ᠳᠡᠭᠡᠷᠡ ᠴᠦ᠍ ᠢᠯᠡᠷᠬᠡᠢ ᠬᠠᠷᠠᠭᠳᠠᠨᠠ᠃ ᠳ᠋ᠦᠩᠵᠦᠪ ᠭᠡᠳᠡᠭ ᠨᠢ ᠶᠡᠷᠦ ᠶ᠋ᠢᠨ ᠯᠡ ᠨᠢᠭᠡᠨ ᠰᠤᠷ ᠪᠥᠭᠡᠳ ᠱᠠᠰᠢᠨ ᠤ᠋ ᠳᠠᠢᠰᠤᠨ ᠢ᠋ ᠳᠠᠷᠤᠬᠤ ᠶ᠋ᠢᠨ ᠪᠡᠯᠭᠡᠳᠡᠯ ᠪᠣᠯᠭᠠᠵᠤ ᠬᠡᠳᠦᠬᠡᠨ ᠬᠣᠨᠣᠭ ᠤ᠋ᠨ ᠡᠮᠦᠨᠡ ᠭᠠᠷ ᠤ᠋ᠨ ᠳᠦᠢᠲᠡᠢ ᠯᠠᠮᠠ ᠨᠠᠷ ᠴᠠᠭᠠᠰᠤ᠂ ᠭᠤᠯᠢᠷ᠂ ᠰᠢᠷᠠ ᠲᠣᠰᠣ ᠲᠡᠷᠢᠭᠦᠲᠡᠨ ᠢ᠋ᠶ᠋ᠡᠷ ᠪᠦᠲᠦᠭᠡᠨ ᠦᠢᠯᠡᠳᠴᠦ ᠬᠤᠪᠴᠠᠰᠤ ᠵᠡᠷᠭᠡ ᠶ᠋ᠢ ᠨᠢ ᠡᠯᠳᠡᠪ ᠳᠠᠪᠤᠤ ᠱᠠᠪᠤᠤᠨ ᠤ᠋ ᠥᠭᠡᠳᠡᠰᠦ ᠪᠡᠷ ᠣᠷᠣᠯᠠᠭᠤᠯᠤᠨ ᠬᠢᠭᠰᠡᠨ ᠰᠦᠭ ᠳᠦᠷᠰᠦ ᠪᠢᠯᠡ᠃ ᠲᠡᠭᠦᠨ ᠢ᠋ ᠵᠥᠭᠡᠯᠭᠡ ᠲᠠᠷᠨᠢ ᠶ᠋ᠢᠨ ᠨᠣᠮ ᠢ᠋ᠶ᠋ᠠᠷ ᠪᠠᠬᠠᠨ ᠲᠠᠷᠨᠢᠳᠠᠵᠤ ᠪᠠᠢᠭᠠᠳ ᠭᠠᠯ ᠤᠷᠤᠭᠤ ᠬᠠᠶᠠᠨ ᠰᠢᠲᠠᠭᠠᠭᠰᠠᠨ ᠬᠡᠷᠡᠭ᠃ ᠰᠢᠲᠠᠭᠰᠠᠨ ᠦᠨᠡᠰᠦ᠂ ᠬᠣᠭ ᠢ᠋ ᠨᠢ ᠮᠥᠷᠭᠥᠯᠴᠢᠳ ᠪᠤᠯᠢᠶᠠᠯᠳᠤᠨ ᠠᠪᠬᠤ ᠳ᠋ᠤ᠌ ᠪᠠᠨ ᠡᠯᠳᠡᠪ ᠮᠠᠭᠤ ᠶᠠᠭᠤᠮᠠᠨ ᠠ᠋ᠴᠠ᠂ ᠭᠠᠢ ᠵᠡᠳᠬᠡᠷ ᠡᠴᠡ ᠪᠡᠶᠡ ᠪᠡᠨ ᠬᠠᠮᠠᠭᠠᠯᠠᠬᠤ ᠤᠪᠠᠳᠢᠰ ᠲᠠᠢ ᠪᠣᠯᠤᠨᠠ ᠭᠡᠵᠦ ᠢᠲᠡᠭᠡᠳᠡᠭ ᠪᠠᠢᠯᠠ᠃ ᠬᠣᠭᠣᠰᠣᠨ ᠴᠢᠨᠠᠷ ᠤ᠋ᠨ ᠵᠦᠢᠯ ᠪᠣᠯᠪᠠᠴᠤ ᠰᠡᠳᠬᠢᠯ ᠦ᠋ᠨ ᠨᠢᠰᠸᠠᠨᠢᠰ ᠢ᠋ ᠦᠯᠳᠡᠨ ᠬᠥᠭᠡᠭᠡᠬᠦ ᠳ᠋ᠦ᠍ ᠬᠡᠷᠡᠭ ᠪᠣᠯᠤᠨᠠ ᠭᠡᠳᠡᠭ ᠢ᠋ᠶ᠋ᠡᠷ ᠡᠢᠨ ᠬᠦ᠌ ᠰᠦᠰᠦᠭᠲᠡᠨ ᠳ᠋ᠦ᠍ ᠦᠶᠡ ᠵᠠᠯᠭᠠᠮᠵᠢᠯᠠᠨ ᠢᠲᠡᠭᠡᠭᠳᠡᠭᠰᠡᠨ ᠲᠤᠬᠠᠢ ᠶ᠋ᠢ ᠰᠠᠨᠵᠢ ᠰᠠᠢᠨ ᠮᠡᠳᠡᠵᠦ ᠪᠠᠢᠯᠠ᠃ ᠭᠡᠪᠡᠴᠦ ᠥᠪᠡᠷ ᠢ᠋ᠶ᠋ᠡᠨ ᠶᠠᠭᠠᠬᠢᠭᠠᠳ ᠲᠡᠭᠦᠨ ᠦ᠌ ᠦᠯᠡᠳᠡᠭᠳᠡᠯ ᠡᠴᠡ ᠰᠡᠮᠬᠡᠨ ᠠᠪᠴᠤ ᠣᠷᠬᠢᠮᠵᠢ ᠳ᠋ᠤ᠌ ᠪᠠᠨ ᠨᠢᠭᠤᠭᠰᠠᠨ ᠪᠢᠯᠡ? ᠰᠦᠵᠢᠭ ᠡᠴᠡ ᠡᠭᠦᠳᠦᠭᠰᠡᠨ ᠬᠡᠷᠡᠭᠴᠡᠭᠡ ᠶᠡᠬᠡ ᠪᠣᠯᠬᠣᠷ ᠬᠡᠨ ᠨᠢᠭᠡᠨ ᠡᠲᠡᠭᠡᠳ ᠦ᠋ᠨ ᠬᠦᠰᠡᠯ ᠳ᠋ᠦ᠍ ᠬᠠᠷᠢᠭᠤ ᠡᠷᠭᠦᠬᠦ ᠭᠡᠰᠡᠨ ᠡᠴᠡ ᠭᠠᠷᠴᠠᠭᠠ ᠦᠭᠡᠢ᠃ ᠰᠦᠵᠢᠭᠲᠡᠨ ᠬᠥᠮᠦᠨ ᠦ᠌ ᠬᠡᠷᠡᠭᠴᠡᠭᠡ᠂ ᠲᠥᠭᠡᠷᠢᠭᠳᠡᠯ ᠨᠢ ᠵᠠᠷᠢᠮ ᠳ᠋ᠤ᠌ ᠪᠠᠨ ᠤᠳᠬᠠ ᠦᠭᠡᠢ ᠳᠡᠮᠡᠢ ᠶᠠᠭᠤᠮᠠ ᠶ᠋ᠢ ᠴᠦ᠍ ᠠᠷᠢᠭᠤᠨ ᠰᠢᠲᠦᠭᠡᠨ ᠦ᠌ ᠳᠡᠭᠡᠳᠦ ᠳ᠋ᠦ᠍ ᠠᠪᠠᠴᠢᠨ ᠳᠡᠪᠰᠢᠭᠦᠯᠵᠦ ᠴᠢᠳᠠᠨᠠ᠃ ᠰᠡᠵᠢᠭ ᠢ᠋ᠶ᠋ᠡᠷ ᠡᠪᠡᠳᠴᠦ᠂ ᠰᠦᠵᠢᠭ ᠢ᠋ᠶ᠋ᠡᠷ ᠡᠳᠡᠭᠡᠨᠡ ᠭᠡᠳᠡᠭ ᠶᠠᠷᠢᠶᠠ ᠡᠢᠮᠦ ᠯᠡ ᠤᠴᠢᠷᠲᠠᠢ ᠪᠣᠯᠤᠨᠠ᠃ ᠡᠨᠡ ᠪᠦᠬᠦᠨ ᠢ᠋ ᠰᠠᠨᠵᠢ ᠰᠥᠨᠢ ᠳᠦᠯᠢ ᠶ᠋ᠢᠨ ᠬᠠᠷᠠᠩᠭᠤᠢ ᠳ᠋ᠤ᠌ ᠰᠦᠵᠢᠭᠲᠦ ᠳᠤᠯᠳᠤᠢᠴᠢ ᠲᠠᠢ ᠵᠡᠷᠭᠡᠴᠡᠭᠡᠳ ᠡᠵᠡᠭᠦᠢ ᠬᠡᠭᠡᠷᠡ ᠬᠠᠳᠠᠨ ᠤ᠋ ᠨᠥᠮᠥᠷᠢ ᠬᠣᠷᠭᠣᠳᠠᠨ ᠬᠡᠪᠲᠡᠵᠦ ᠪᠠᠢᠬᠤ ᠳ᠋ᠤ᠌ ᠪᠠᠨ ᠡᠷᠭᠢᠴᠡᠭᠦᠯᠦᠨ ᠳᠤᠷᠠᠰᠴᠠᠢ᠃ ᠪᠤᠷᠬᠠᠨ ᠤ᠋ ᠨᠣᠮ ᠤ᠋ᠨ ᠲᠤᠬᠠᠢ ᠳ᠋ᠤ᠌ 《ᠠ》 ᠦᠰᠦᠭ ᠴᠦ᠍ ᠦᠭᠡᠢ ᠡᠨᠡᠬᠦ ᠰᠦᠵᠢᠭᠲᠡᠨ᠂ ᠲᠡᠷᠡ ᠨᠣᠮ ᠢ᠋ ᠪᠦᠬᠦᠢ ᠯᠡ ᠨᠠᠰᠤ ᠪᠠᠷ ᠢ᠋ᠶ᠋ᠠᠨ ᠦᠵᠡᠵᠦ ᠣᠷᠣᠢ ᠨᠢ ᠴᠣᠭᠣᠷᠠᠭᠠᠳ ᡀᠠᠷᠠᠮᠪᠠ ᠶ᠋ᠢᠨ ᠴᠣᠯᠠ ᠳ᠋ᠤ᠌ ᠬᠦᠷᠦᠭᠰᠡᠨ ᠰᠠᠨᠵᠢ ᠬᠣᠶᠠᠷ ᠤ᠋ᠨ ᠲᠤᠬᠠᠢ ᠳ᠋ᠤ᠌ ᠪᠣᠯ ᠶᠠᠭ ᠡᠨᠡ ᠦᠶᠡ ᠳ᠋ᠦ᠍ ᠶᠠᠮᠠᠷ ᠴᠤ᠌ ᠢᠯᠭᠠᠭᠠ ᠠᠯᠠᠭᠠ ᠪᠥᠭᠡᠳ ᠭᠠᠭᠴᠠᠬᠦ ᠠᠮᠢᠳᠤ ᠶᠠᠪᠤᠬᠤ ᠶ᠋ᠢᠨ ᠠᠭᠠᠷ ᠨᠢ ᠯᠡ ᠨᠢᠭᠡᠨ ᠠᠳᠠᠯᠢ ᠪᠠᠢᠭᠠ ᠶ᠋ᠢ ᠰᠠᠨᠵᠢ ᠤᠬᠠᠭᠠᠷᠠᠵᠤ ᠪᠠᠢᠯᠠ᠃ ᡀᠠᠰᠠ ᠠ᠋ᠴᠠ ᠤᠷᠭᠤᠵᠤ ᠭᠠᠷᠤᠭᠰᠠᠨ ᠠ᠋ᠴᠠ ᠬᠣᠢᠰᠢᠬᠢ ᠬᠡᠴᠡᠭᠦᠦ ᠲᠦᠭᠰᠢᠭᠦᠷᠢᠲᠡᠢ ᠡᠳᠦᠷ ᠦ᠋ᠳ ᠲᠦ᠍ ᠰᠠᠨᠵᠢ ᠶ᠋ᠢᠨ ᠶᠡᠬᠡ ᠡᠷᠳᠡᠮ ᠡᠴᠡ ᠬᠡᠷᠡᠭ ᠪᠣᠯᠤᠭᠰᠠᠨ ᠶᠠᠭᠤᠮᠠ ᠨᠢᠭᠡᠬᠡᠨ ᠴᠦ᠍ ᠪᠠᠢᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠬᠠᠷᠠᠩᠭᠤᠢ ᠴᠡᠭᠡᠵᠢ ᠲᠡᠢ᠂ ᠰᠦᠵᠢᠭᠲᠡᠨ ᠥᠯᠵᠡᠢᠲᠦ ᠶ᠋ᠢᠨ ᠠᠮᠢᠳᠤᠷᠠᠯ ᠤ᠋ᠨ ᠠᠤᠭᠠ ᠶᠡᠬᠡ ᠤᠬᠠᠭᠠᠨ᠂ ᠲᠤᠷᠰᠢᠯᠭᠠ ᠨᠢ ᠲᠡᠭᠦᠨ ᠳ᠋ᠦ᠍ ᠨᠡᠩ ᠴᠦ᠍ ᠬᠡᠷᠡᠭ ᠪᠣᠯᠵᠤ ᠪᠠᠢᠯᠠ᠃ ᠨᠠᠢ᠍ᠮᠠᠨ ᠮᠢᠩᠭᠠᠨ ᠮᠥᠷ ᠲᠦ᠍ 《ᠵᠠᠳᠠᠮᠪᠠ》 ᠰᠤᠳᠤᠷ ᠢ᠋ ᠴᠡᠭᠡᠵᠢ ᠪᠡᠷ ᠤᠩᠰᠢᠪᠠᠴᠤ ᠬᠡᠭᠡᠷᠡ ᠶ᠋ᠢᠨ ᠲᠦᠳᠡᠭ ᠭᠠᠯ ᠥᠪᠡᠷ ᠢ᠋ᠶ᠋ᠡᠨ ᠠᠰᠠᠬᠤ ᠦᠭᠡᠢ ᠪᠣᠯᠬᠤ ᠨᠢ ᠲᠣᠳᠣᠷᠬᠠᠢ ᠠᠵᠢ᠃
- ᠦᠳᠡ ᠳᠤᠮᠳᠠ ᠶᠠᠭ ᠵᠢᠩ ᠦᠳᠡ ᠶ᠋ᠢᠨ ᠬᠠᠯᠠᠭᠤᠨ ᠳ᠋ᠤ᠌ ᠭᠠᠯ ᠢ᠋ᠶ᠋ᠠᠨ ᠠᠰᠠᠭᠠᠵᠤ ᠴᠠᠢ ᠶ᠋ᠢ ᠪᠡᠨ ᠤᠤᠭᠤᠵᠤ ᠪᠠᠢᠶᠠ᠃ ᠲᠡᠭᠡᠪᠡᠯ ᠤᠲᠤᠭᠠ ᠨᠢ ᠠᠯᠤᠰ ᠠ᠋ᠴᠠ ᠣᠭᠲᠣ ᠬᠠᠷᠠᠭᠳᠠᠳᠠᠭ ᠦᠭᠡᠢ ᠶᠦ᠍ᠮ᠃
- ᠤᠯᠠᠭᠠᠨ ᠱᠠᠯᠠ ᠶ᠋ᠢᠨ ᠬᠥᠨᠳᠡᠢ ᠪᠡᠷ ᠲᠤᠭᠤᠯᠬᠤ ᠳ᠋ᠤ᠌ ᠪᠠᠨ ᠭᠤᠲᠤᠯ ᠢ᠋ᠶ᠋ᠠᠨ ᠡᠷᠭᠢᠭᠦᠯᠵᠦ ᠡᠮᠦᠰᠦᠭᠡᠳ ᠶᠠᠪᠤᠶᠠ᠃ ᠲᠡᠭᠡᠪᠡᠯ ᠢᠷᠡᠭᠰᠡᠨ ᠨᠢ ᠶᠠᠪᠤᠭᠰᠠᠨ᠂ ᠶᠠᠪᠤᠭᠰᠠᠨ ᠨᠢ ᠢᠷᠡᠭᠰᠡᠨ ᠪᠣᠯᠵᠤ ᠮᠥᠷ ᠮᠠᠨᠢ ᠮᠥᠷᠳᠡᠭᠴᠢ ᠶ᠋ᠢ ᠠᠶᠠᠨᠳᠠᠭᠠᠨ ᠲᠥᠭᠡᠷᠢᠭᠦᠯᠦᠨᠡ᠃
- ᠬᠥᠬᠡ ᠨᠠᠭᠤᠷ ᠤ᠋ᠨ ᠥᠭᠡᠯᠡᠳ ᠦ᠋ᠳ ᠡᠴᠡ ᠬᠡᠦᠬᠡᠳ ᠲᠣᠭᠯᠠᠳᠠᠭ ᠱᠠᠭᠠᠢ ᠣᠯᠵᠤ ᠠᠪᠤᠶᠠ᠃ ᠬᠣᠭᠣᠯᠠ ᠦᠭᠡᠢ ᠥᠯᠥᠰᠬᠦ ᠳ᠋ᠦ᠍ ᠬᠦᠷᠪᠡᠯ ᠡᠳᠦᠷ ᠪᠦᠷᠢ ᠨᠢᠭᠡ ᠱᠠᠭᠠᠢ ᠬᠥᠯᠬᠢᠭᠡᠳ ᠶᠠᠪᠤᠬᠤ ᠳ᠋ᠤ᠌ ᠴᠤ᠌ ᠠᠮᠢ ᠠᠪᠴᠤ ᠭᠠᠷᠤᠨᠠ᠃
ᠳᠡᠭᠡᠷᠡᠮᠴᠢᠨ ᠳ᠋ᠦ᠍ ᠲᠣᠨᠣᠭᠳᠠᠯᠠ ᠴᠤ᠌ ᠭᠡᠰᠡᠨ ᠱᠠᠭᠠᠢ ᠶ᠋ᠢ ᠲᠣᠭᠣᠵᠤ ᠠᠪᠬᠤ ᠬᠥᠮᠦᠨ ᠪᠠᠢᠬᠤ ᠦᠭᠡᠢ᠃ ᠬᠡᠦᠬᠡᠳ ᠦ᠋ᠨ ᠲᠣᠭᠯᠠᠭᠠᠮ ᠯᠠ ᠭᠡᠵᠦ ᠪᠣᠳᠣᠨᠠ! ᠭᠡᠮᠡᠨ ᠥᠯᠵᠡᠢᠲᠦ ᠰᠠᠨᠵᠢ ᠳ᠋ᠤ᠌ ᠠᠮᠢᠳᠤᠷᠠᠯ ᠤ᠋ᠨ ᠤᠬᠠᠭᠠᠨ ᠵᠢᠭᠠᠵᠤ ᠪᠠᠢᠯᠠ᠃ ᠦᠨᠡᠬᠡᠷ ᠡᠢᠮᠦ ᠶᠠᠭᠤᠮᠠ ᠶ᠋ᠢ ᠰᠠᠨᠵᠢ ᠬᠡᠳᠦᠨ ᠲᠦᠮᠡᠨ ᠨᠣᠮ ᠠ᠋ᠴᠠ ᠠᠯᠢᠨ ᠠ᠋ᠴᠠ ᠴᠤ᠌ ᠣᠯᠵᠤ ᠤᠩᠰᠢᠭᠠ ᠦᠭᠡᠢ ᠪᠢᠯᠡ᠃ ᠦᠨᠡᠬᠡᠷ ᠦᠳᠡ ᠳᠤᠮᠳᠠ ᠶ᠋ᠢᠨ ᠬᠠᠯᠠᠭᠤᠨ ᠳ᠋ᠤ᠌ ᠬᠡᠭᠡᠷᠡ ᠭᠠᠯ ᠲᠦᠯᠡᠬᠦ ᠳ᠋ᠦ᠍ ᠠᠯᠤᠰ ᠠ᠋ᠴᠠ ᠤᠲᠤᠭᠠ ᠨᠢ ᠣᠭᠲᠣ ᠬᠠᠷᠠᠭᠳᠠᠳᠠᠭ ᠦᠭᠡᠢ ᠨᠢ ᠦᠨᠡᠨ ᠪᠠᠢᠯᠠ᠃ ᠴᠡᠩᠬᠡᠷ ᠤᠨᠢᠶᠠᠷ ᠲᠠᠲᠠᠭᠰᠠᠨ ᠵᠢᠩ ᠦᠳᠡ ᠶ᠋ᠢᠨ ᠬᠠᠯᠠᠭᠤᠨ ᠳ᠋ᠤ᠌᠂ ᠭᠠᠯ ᠲᠦᠯᠡᠬᠦ ᠳ᠋ᠦ᠍ ᠤᠲᠤᠭᠠ ᠴᠤ᠌ ᠪᠠᠷᠤᠭ ᠭᠠᠷᠳᠠᠭ ᠦᠭᠡᠢ ᠪᠣᠯᠬᠤ ᠶ᠋ᠢ ᠲᠡᠭᠡᠵᠦ ᠮᠡᠳᠡᠪᠡ᠃ ᠠᠮᠢᠳᠤᠷᠠᠯ᠂ ᠨᠣᠮ ᠤ᠋ᠨ ᠵᠥᠷᠢᠶᠡ ᠶ᠋ᠢ ᠴᠦ᠍ ᠤᠬᠠᠭᠠᠷᠠᠪᠠ᠃
- ᠣᠷᠣᠨ ᠬᠡᠢᠳ ᠲᠦ᠍ ᠱᠠᠪᠢᠯᠠᠨ ᠰᠠᠭᠤᠭᠰᠠᠭᠠᠷ ᠪᠠᠢᠭᠠᠳ ᠪᠡᠭᠡᠷᠡᠭ ᠪᠣᠯᠴᠢᠬᠠᠵᠠᠢ᠃
- ᠣᠷᠣᠨ ᠬᠡᠢᠳ ᠲᠦ᠍ ᠱᠠᠪᠢᠯᠠᠨ ᠰᠠᠭᠤᠭᠰᠠᠭᠠᠷ ᠪᠠᠢᠭᠠᠳ ᠠᠶᠤᠮᠠᠲᠠᠭᠠᠢ ᠪᠣᠯᠴᠢᠬᠠᠵᠠᠢ᠃
- ᠣᠷᠣᠨ ᠬᠡᠢᠳ ᠲᠦ᠍ ᠱᠠᠪᠢᠯᠠᠨ ᠰᠠᠭᠤᠭᠰᠠᠭᠠᠷ ᠪᠠᠢᠭᠠᠳ ᠬᠠᠷᠠᠭᠠ ᠴᠢᠨᠢ ᠮᠠᠭᠤᠳᠠᠵᠤ᠂ ᠬᠠᠮᠠᠷ ᠴᠢᠨᠢ ᠪᠢᠲᠡᠭᠦᠷᠡᠵᠦ᠂ ᠪᠡᠶᠡ ᠴᠢᠨᠢ ᠬᠥᠰᠢᠴᠢᠬᠡᠵᠡᠢ! ᠭᠡᠬᠦᠴᠢᠯᠡᠨ ᠥᠯᠵᠡᠢᠲᠦ ᠪᠠᠳᠢᠷᠴᠢᠨ ᠦᠶᠡ ᠦᠶᠡ ᠰᠠᠨᠵᠢ ᠳ᠋ᠤ᠌ ᠰᠠᠨᠠᠭᠤᠯᠵᠤ ᠶᠠᠪᠤᠪᠠ᠃ ᠦᠨᠡᠬᠡᠷ ᠯᠡ ᠲᠡᠢᠮᠦ ᠪᠠᠢᠯᠠ᠃ ᠦᠭᠡ ᠭᠠᠰᠢᠭᠤᠨ ᠴᠤ᠌ ᠭᠡᠰᠡᠨ ᠦᠢᠯᠡ ᠬᠡᠷᠡᠭ ᠲᠦ᠍ ᠲᠤᠰᠠᠲᠠᠢ ᠭᠡᠭᠴᠢ ᠶ᠋ᠢ ᠰᠠᠨᠠᠵᠤ ᠰᠠᠨᠵᠢ ᠲᠡᠭᠦᠨ ᠲᠡᠢ ᠡᠪᠯᠡᠷᠡᠨ ᠵᠥᠪᠰᠢᠶᠡᠷᠡᠵᠦ ᠶᠠᠪᠤᠯᠠ᠃ ᠰᠥᠨᠢ ᠶ᠋ᠢᠨ ᠴᠠᠭ ᠢ᠋ᠶ᠋ᠠᠷ ᠰᠠᠨᠵᠢ ᠴᠡᠴᠡᠷᠡᠨ ᠵᠢᠩᠳᠡᠵᠦ ᠪᠠᠢᠬᠤ ᠳ᠋ᠤ᠌ ᠥᠯᠵᠡᠢᠲᠦ ᠬᠡᠩᠬᠦᠳᠡᠭ ᠢ᠋ᠶ᠋ᠡᠨ ᠢᠷᠡᠵᠦ᠂ ᠲᠣᠯᠣᠭᠠᠢ ᠶ᠋ᠢᠨ ᠡᠴᠡ ᠪᠡᠨ ᠠᠭᠤᠷ ᠰᠠᠪᠰᠠᠭᠤᠯᠤᠨ ᠤᠨᠲᠠᠵᠤ ᠪᠠᠢᠬᠤ ᠶ᠋ᠢ ᠣᠯᠠᠨᠲᠠ ᠠᠵᠢᠭᠯᠠᠪᠠ᠃ ᠡᠷᠭᠢᠨ ᠲᠣᠭᠣᠷᠢᠨ ᠳ᠋ᠤ᠌ ᠲᠣᠷᠣᠢᠬᠤ ᠪᠠᠷᠠ ᠦᠵᠡᠭᠳᠡᠬᠦ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠥᠯᠵᠡᠢᠲᠦ 《ᠡᠨᠡᠦᠬᠡᠨ ᠳ᠋ᠦ᠍ ᠨᠢᠭᠡ ᠬᠡᠢᠳ ᠪᠠᠢᠬᠤ ᠪᠣᠯᠤᠯᠲᠠᠢ᠃ ᠤᠲᠤᠭᠠ ᠨᠢ ᠦᠨᠦᠷᠳᠡᠵᠦ᠂ ᠨᠣᠬᠠᠢ ᠶ᠋ᠢᠨ ᠳᠠᠭᠤ ᠭᠠᠷᠴᠤ ᠪᠠᠢᠨᠠ》 ᠭᠡᠳᠡᠭ ᠪᠠᠢᠯᠠ᠃ ᠰᠠᠨᠵᠢ ᠲᠡᠷᠡ ᠬᠦ᠌ ᠤᠲᠤᠭᠠᠨ ᠤ᠋ ᠦᠨᠦᠷ ᠢ᠋ ᠮᠡᠳᠡᠷᠡᠬᠦ ᠪᠠᠢᠲᠣᠭᠠᠢ᠂ ᠨᠣᠬᠠᠢ ᠶ᠋ᠢᠨ ᠳᠠᠭᠤ ᠶ᠋ᠢ ᠴᠦ᠍ ᠰᠣᠨᠣᠰᠳᠠᠭ ᠦᠭᠡᠢ ᠪᠠᠢᠯᠠ᠃ ᠭᠡᠪᠡᠴᠦ ᠬᠥᠪᠡᠭᠡ ᠳᠠᠪᠠᠮᠠᠭᠴᠠ ᠡᠮᠦᠨᠡ ᠨᠢ ᠶᠠᠮᠠᠷ ᠨᠢᠭᠡᠨ ᠬᠡᠢᠳ ᠪᠠᠢᠵᠤ ᠯᠠ ᠳᠠᠭᠠᠷᠠᠳᠠᠭ ᠰᠠᠨ᠃ ᠡᠨᠡ ᠪᠦᠬᠦᠨ ᠠᠮᠢᠳᠤᠷᠠᠯ ᠤ᠋ᠨ ᠬᠠᠷᠠ ᠤᠬᠠᠭᠠᠨ ᠶᠤᠮ᠃ ᠭᠡᠪᠡᠴᠦ ᠰᠠᠨᠵᠢ ᠳ᠋ᠤ᠌ ᠪᠣᠯ ᠥᠴᠦᠬᠡᠨ ᠴᠦ᠍ ᠭᠠᠳᠠᠷᠯᠠᠬᠤ ᠪᠠᠷ ᠦᠭᠡᠢ ᠬᠠᠷᠢ ᠬᠣᠯᠠ ᠶ᠋ᠢᠨ ᠵᠦᠢᠯ ᠠᠵᠠᠢ᠃
᠁ ᠥᠷᠯᠥᠭᠡ ᠦᠦᠷ ᠬᠠᠶᠠᠭᠠᠷᠠᠮᠠᠭᠴᠠ ᠥᠯᠵᠡᠢᠲᠦ ᠰᠠᠷᠠᠨ ᠥᠨᠳᠡᠢᠯᠡ᠃ ᠲᠤᠩᠭᠠᠯᠠᠭ ᠰᠠᠢᠬᠠᠨ ᠥᠷᠯᠥᠭᠡ ᠪᠠᠢᠪᠠ᠃ ᠭᠡᠪᠡᠴᠦ ᠥᠯᠵᠡᠢᠲᠦ ᠳ᠋ᠦ᠍ ᠲᠡᠷᠡ ᠰᠠᠢᠬᠠᠨ ᠥᠷᠯᠥᠭᠡ ᠨᠢᠭᠡ ᠶᠡᠬᠡ ᠲᠠᠭᠠᠰᠢᠶᠠᠭᠳᠠᠭᠰᠠᠨ ᠦᠭᠡᠢ᠃
- ᠣᠷᠣᠢᠬᠠᠨ ᠳᠠᠭᠤ ᠴᠠᠬᠢᠯᠭᠠᠨ ᠲᠠᠢ ᠪᠣᠷᠣᠭᠠ ᠠᠰᠬᠠᠬᠤ ᠨᠢ ᠪᠣᠯᠤᠯᠲᠠᠢ᠃ ᠬᠣᠶᠠᠭᠤᠯᠠ ᠪᠠᠨ ᠶᠠᠭᠤᠨ ᠳ᠋ᠤ᠌ ᠣᠴᠢᠵᠤ ᠬᠣᠷᠭᠣᠳᠠᠳᠠᠭ ᠶᠤᠮ ᠪᠢᠯᠡ ᠳᠠ᠃ ᠬᠠᠳᠠᠨ ᠤ᠋ ᠢᠷᠣᠭᠠᠷ ᠠ᠋ᠴᠠ ᠭᠠᠷᠤᠯ ᠦᠭᠡᠢ ᠪᠣᠯᠬᠤ ᠦᠭᠡᠢ ᠭᠡᠳ ᠰᠤᠨᠢᠶᠠᠬᠤ ᠳ᠋ᠤ᠌ ᠨᠢ᠂
- ᠠᠭᠤᠢ ᠶᠤᠮ ᠤᠤ᠂ ᠮᠣᠳᠣᠨ ᠤ᠋ ᠢᠷᠣᠭᠠᠯ ᠳ᠋ᠤ᠌ ᠣᠴᠢᠵᠤ ᠬᠣᠷᠭᠣᠳᠠᠭᠰᠠᠨ ᠨᠢ ᠳᠡᠭᠡᠷᠡ ᠪᠠᠢᠬᠠ ᠠ᠋! ᠭᠡᠵᠦ ᠰᠠᠨᠵᠢ ᠬᠡᠯᠡᠲᠡᠯᠡ ᠥᠯᠵᠡᠢᠲᠦ ᠲᠠᠴᠢᠭᠢᠨᠠᠲᠠᠯᠠ ᠢᠨᠢᠶᠡᠵᠦ᠂
- ᠬᠣᠷᠭᠣᠳᠠᠬᠤ ᠶᠠᠭᠤᠮᠠ ᠪᠠᠨ ᠮᠥᠨ ᠣᠯᠵᠤ ᠶᠠᠳᠠᠪᠠ ᠠ᠋? ᠳᠠᠭᠤ ᠴᠠᠬᠢᠯᠭᠠᠨ ᠲᠠᠢ ᠪᠣᠷᠣᠭᠠᠨ ᠤ᠋ ᠦᠶᠡ ᠳ᠋ᠦ᠍ ᠬᠠᠳᠠ ᠪᠠᠷᠠᠳᠠᠪᠠᠯ ᠨᠢᠷᠭᠡᠭᠦᠯᠬᠦ ᠶ᠋ᠢᠨ ᠯᠡ ᠴᠣᠨᠳᠣᠩ᠃ ᠮᠣᠳᠣ ᠴᠤ᠌ ᠭᠡᠰᠡᠨ ᠳᠡ ᠴᠠᠬᠢᠯᠭᠠᠨ ᠭᠡᠳᠡᠭ ᠴᠦ᠍ ᠲᠡᠢᠮᠦ ᠶᠠᠭᠤᠮᠠ ᠶ᠋ᠢ ᠠᠨᠳᠠᠳᠠᠭ ᠦᠭᠡᠢ ᠡᠳ᠋! ᠭᠡᠵᠦ ᠰᠠᠨᠠᠭᠤᠯᠪᠠ᠃
- ᠲᠡᠷᠡ ᠬᠣᠶᠠᠷ ᠪᠣᠰᠴᠤ ᠬᠤᠪᠴᠠᠰᠤ ᠬᠤᠨᠠᠷ ᠢ᠋ᠶ᠋ᠠᠨ ᠵᠠᠰᠠᠪᠠ᠃
- ᠠᠯᠢ ᠪᠣᠢ᠂ ᠨᠡᠰᠢ ᠪᠡᠨ! ᠭᠡᠷᠡᠯ ᠦ᠋ᠨ ᠡᠰᠡᠷᠭᠦ ᠡᠨᠡ ᠬᠠᠳᠠ ᠨᠠᠯᠠᠭᠠᠳ ᠰᠠᠭᠤᠵᠤ ᠪᠠᠢ! ᠭᠡᠵᠦ ᠥᠯᠵᠡᠢᠲᠦ ᠶ᠋ᠢ ᠬᠡᠯᠡᠬᠦ ᠳ᠋ᠦ᠍ ᠰᠠᠨᠵᠢ ᠭᠠᠢᠬᠠᠵᠤ᠂
- ᠶᠠᠭᠠᠬᠢᠬᠤ ᠶᠤᠮ ᠪᠣᠢ? ᠭᠡᠵᠦ ᠳᠤᠷᠠ ᠦᠭᠡᠢᠴᠡᠭᠰᠡᠨ ᠴᠢᠨᠢ᠂
- ᠶᠠᠭᠠᠬᠢᠬᠤ ᠶᠠᠭᠤ ᠪᠠᠢᠬᠤ ᠪᠣᠢ? ᠨᠠᠭᠠᠳᠤ ᠬᠡᠳᠦᠨ ᠱᠥᠷᠪᠥᠭᠡᠷ ᠰᠠᠬᠠᠯ ᠢ᠋ ᠴᠢᠨᠢ ᠰᠤᠭᠤᠯᠵᠤ ᠬᠠᠶᠠᠬᠤ ᠦᠭᠡᠢ ᠪᠣᠯ ᠴᠢᠮᠠᠶ᠋ᠢ ᠰᠢᠮᠨᠠᠨᠼ ᠤ᠋ᠨ ᠬᠤᠪᠴᠠᠰᠤ ᠡᠮᠦᠰᠦᠭᠰᠡᠨ ᠡᠷᠡ ᠬᠥᠮᠦᠨ! ᠭᠡᠳᠡᠭ ᠢ᠋ ᠨᠠᠭᠠᠳᠤ ᠵᠠᠬᠠ ᠶ᠋ᠢᠨ ᠴᠢᠪᠠᠭᠠᠨᠴᠠ ᠯᠠ ᠮᠡᠳᠡᠭᠡᠳ ᠠᠪᠤᠨᠠ! ᠭᠡᠵᠦ ᠥᠯᠵᠡᠢᠲᠦ ᠳᠣᠭᠣᠭᠢᠯᠠᠭᠠᠳ ᠴᠢᠮᠬᠢᠭᠦᠷ ᠠᠪᠴᠤ ᠤᠷᠤᠭᠤᠯ ᠳᠡᠭᠡᠷᠡᠬᠢ ᠬᠡᠳᠦᠨ ᠰᠥᠷᠪᠡᠭᠡᠷ ᠦᠰᠦ ᠶ᠋ᠢ ᠨᠢ ᠵᠤᠯᠭᠠᠭᠠᠨ ᠬᠠᠶᠠᠯᠠ᠃ ᠡᠪᠡᠳᠴᠦ ᠨᠢᠳᠦᠨ ᠡᠴᠡ ᠨᠢ ᠨᠢᠯᠪᠤᠰᠤ ᠭᠠᠷᠬᠤ ᠳ᠋ᠤ᠌ ᠥᠯᠵᠡᠢᠲᠦ ᠲᠠᠢᠳᠬᠤᠷᠠᠭᠤᠯᠵᠤ᠂
- ᠲᠠᠩᠭᠤᠳ ᠤᠳ ᠲᠤ᠌ ᠪᠠᠷᠢᠭᠳᠠᠵᠤ ᠲᠠᠷᠴᠢᠯᠠᠭᠰᠠᠨ ᠠ᠋ᠴᠠ ᠭᠠᠭᠴᠠ ᠨᠢᠭᠡ ᠴᠢᠰ ᠴᠢᠰ ᠬᠢᠯᠭᠡᠨ ᠡᠪᠡᠳᠬᠦ ᠲᠡᠳᠦᠢ ᠥᠩᠭᠡᠷᠡᠭᠰᠡᠨ ᠨᠢ ᠳᠡᠭᠡᠷᠡ ᠪᠠᠢᠯᠭᠦᠢ ! ᠬᠡᠪ᠃
ᠢᠩᠭᠢᠭᠡᠳ ᠲᠡᠳᠡ ᠴᠠᠭᠠᠰᠢᠬᠢ ᠵᠠᠮ ᠳ᠋ᠤ᠌ ᠪᠠᠨ ᠣᠷᠣᠯᠠ᠃ ᠥᠯᠵᠡᠢᠲᠦ ᠡᠨᠡ ᠬᠠᠪᠢ ᠪᠠᠷ ᠨᠠᠰᠢ ᠴᠠᠰᠢ ᠣᠯᠠᠨᠲᠠ ᠭᠡᠷᠦᠨ ᠶᠠᠪᠤᠭᠰᠠᠨ ᠬᠥᠮᠦᠨ ᠪᠣᠯᠬᠣᠷ ᠢ᠋ᠶ᠋ᠠᠨ ᠭᠠᠵᠠᠷ ᠮᠡᠳᠡᠬᠦ ᠦᠭᠡᠢ ᠶ᠋ᠢᠨ ᠵᠣᠪᠠᠯᠠᠩ ᠠᠯᠠᠭᠠ ᠪᠠᠢᠯᠠ᠃ ᠪᠠᠰᠠ ᠴᠤ᠌ ᠲᠥᠪᠡᠳ ᠬᠡᠯᠡ ᠪᠡᠷ ᠨᠡᠯᠢᠶᠡᠳ ᠦᠭᠡᠢ ᠰᠠᠢᠨ ᠶᠠᠷᠢᠨᠠ᠃ ᠰᠠᠨᠵᠢ ᠲᠡᠭᠦᠨ ᠡᠴᠡ ᠢᠯᠡᠭᠦᠦ ᠶᠠᠷᠢᠬᠤ ᠪᠣᠯᠪᠠᠴᠤ ᠳᠠᠭᠤᠨ ᠤ᠋ ᠥᠩᠭᠡ ᠪᠡᠨ ᠲᠠᠨᠢᠭᠤᠯᠬᠤ ᠠ᠋ᠴᠠ ᠠᠶᠤᠵᠤ᠂ ᠳᠤᠤᠭᠠᠷᠴᠤ ᠴᠢᠳᠠᠳᠠᠭ ᠦᠭᠡᠢ ᠪᠠᠢᠯᠠ᠃ ᠥᠯᠵᠡᠢᠲᠦ ᠪᠣᠯᠬᠣᠷ ᠰᠠᠨᠵᠢ ᠶ᠋ᠢ ᠵᠠᠷᠢᠮ ᠳ᠋ᠤ᠌ ᠪᠠᠨ ᠡᠮᠡᠭᠡᠨ ᠢ᠋ᠶ᠋ᠡᠨ ᠪᠣᠯᠭᠠᠵᠤ᠂ ᠵᠠᠷᠢᠮ ᠳ᠋ᠤ᠌ ᠪᠠᠨ ᠳᠡᠭᠦᠦ ᠪᠡᠨ ᠪᠣᠯᠭᠠᠵᠤ ᠶᠠᠩᠵᠤ ᠪᠦᠷᠢ ᠪᠡᠷ ᠶᠠᠷᠢᠨᠠ᠃ ᠵᠢᠰᠦ ᠪᠡᠨ ᠬᠤᠪᠢᠷᠠᠭᠠᠨ᠂ ᠪᠠᠷᠤᠭ ᠲᠥᠷᠥᠯ ᠠᠷᠠᠯᠵᠢᠭᠰᠠᠨ ᠮᠡᠲᠦ ᠪᠡᠷ ᠡᠨᠡ ᠬᠣᠶᠠᠷ ᠲᠡᠨᠦᠭᠦᠯᠴᠢᠨ ᠤᠤᠯ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠵᠦᠭ ᠲᠡᠮᠡᠦᠯᠦᠨ ᠡᠳᠦᠷ ᠡᠴᠡ ᠡᠳᠦᠷ ᠲᠦ᠍ ᠣᠢᠷᠠᠲᠣᠵᠣ ᠶᠠᠪᠤᠯᠠ᠃ ᠪᠦᠬᠦᠨ ᠦ᠌ ᠨᠢᠳᠦᠨ ᠡᠴᠡ ᠪᠤᠷᠤᠭᠤᠯᠠᠨ ᠶᠠᠪᠤᠭᠠ ᠠᠶᠠᠨ ᠤ᠋ ᠡᠨᠡ ᠲᠦᠭᠰᠢᠭᠦᠷᠢᠲᠡᠢ ᠵᠠᠮ ᠨᠢ ᡀᠠᠷᠠᠮᠪᠠ ᠰᠠᠨᠵᠢ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠠᠮᠢᠳᠤᠷᠠᠯ ᠤ᠋ᠨ ᠶᠡᠬᠡ ᠰᠤᠷᠭᠠᠭᠤᠯᠢ ᠪᠣᠯᠵᠤ᠂ ᠪᠤᠷᠬᠠᠨ ᠤ᠋ ᠨᠣᠮ᠂ ᠬᠥᠮᠦᠨ ᠦ᠌ ᠬᠤᠪᠢ ᠲᠠᠪᠢᠯᠠᠩ ᠤ᠋ᠨ ᠬᠣᠭᠣᠷᠣᠨᠳᠣ ᠶ᠋ᠢᠨ ᠢᠯᠭᠠᠭᠠ ᠶ᠋ᠢ ᠠᠢᠬᠤᠪᠲᠤᠷ ᠲᠣᠳᠣᠷᠬᠠᠢ ᠣᠢᠯᠠᠭᠠᠭᠤᠯᠵᠤ ᠦᠭᠭᠦᠯᠡ᠃
《ᠶᠠᠭᠠᠬᠢᠬᠤ ᠪᠠᠷ ᠢ᠋ᠶ᠋ᠠᠨ ᠲᠡᠳᠡ ᠨᠠᠮᠠᠶ᠋ᠢ ᠦᠭᠡᠢ ᠬᠢᠬᠦ ᠭᠡᠵᠦ ᠰᠢᠢᠳᠳᠡᠭ ᠪᠠᠢᠨᠠ? ᠪᠤᠷᠬᠠᠨ ᠤ᠋ ᠨᠣᠮ ᠰᠠᠢᠨ ᠰᠤᠷᠤᠭᠰᠠᠨ ᠭᠡᠵᠦ ᠤᠤ᠃ ᠲᠡᠭᠡᠪᠡᠯ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠪᠤᠷᠬᠠᠨ ᠤ᠋ ᠨᠣᠮ ᠢ᠋ ᠰᠠᠢᠨ ᠰᠤᠷᠬᠤ ᠶ᠋ᠢ ᠶᠠᠭᠠᠬᠢᠭᠠᠳ ᠡᠳᠦᠷ ᠪᠦᠷᠢ ᠱᠠᠭᠠᠷᠳᠠᠳᠠᠭ ᠪᠢᠯᠡ᠃ ᠪᠤᠷᠬᠠᠨ ᠤ᠋ ᠨᠣᠮ ᠢ᠋ ᠰᠠᠢᠨ ᠰᠤᠷᠤᠭᠠᠳ ᠠᠯᠤᠰ ᠭᠠᠵᠠᠷ ᠠᠪᠠᠴᠢᠵᠤ ᠲᠦᠭᠡᠭᠡᠬᠦ ᠨᠢ ᠲᠡᠳᠡᠨ ᠦ᠌ ᠬᠢ ᠪᠡᠷ ᠪᠤᠶᠠᠨ ᠬᠢᠵᠦ ᠪᠠᠢᠭᠠ ᠬᠡᠷᠡᠭ ᠪᠢᠰᠢ ᠭᠡᠵᠦ ᠤᠤ? ᠬᠠᠷᠢ ᠣᠷᠣᠨ ᠤ᠋ ᠬᠥᠮᠦᠨ ᠳ᠋ᠦ᠍ ᠬᠠᠯᠳᠠᠭᠠᠵᠤ ᠯᠠ ᠪᠠᠢᠪᠠᠯ ᠪᠤᠷᠬᠠᠨ ᠤ᠋ ᠪᠠᠨ ᠱᠠᠪᠢ ᠶ᠋ᠢ ᠣᠯᠠᠰᠢᠷᠠᠭᠤᠯᠵᠤ᠂ ᠨᠣᠮ ᠢ᠋ ᠨᠢ ᠬᠣᠯᠠ ᠲᠦᠭᠡᠭᠡᠵᠦ ᠲᠡᠢᠨ ᠬᠦ᠌ ᠪᠤᠶᠠᠨ ᠦᠢᠯᠡᠳᠴᠦ ᠪᠠᠢᠭᠠ ᠬᠡᠷᠡᠭ ᠪᠢᠰᠢ ᠶᠦ᠍ᠮ ᠤᠤ? ᠠᠯᠢ ᠠᠯᠢ ᠨᠢ ᠪᠢᠰᠢ ᠪᠣᠯᠵᠤ ᠲᠠᠭᠠᠷᠠᠯᠠ᠃ ᠳᠡᠭᠡᠭᠡ ᠦᠭᠡᠢ ᠪᠣᠯ ᠡᠳᠡᠨ ᠨᠠᠮᠠᠶ᠋ᠢ ᠶᠠᠭᠠᠬᠢᠭᠠᠳ ᠶᠡᠭᠦᠳᠬᠡᠨ ᠦᠭᠡᠢ ᠬᠢᠬᠦ ᠪᠣᠯᠪᠠ᠃ ᠮᠢᠨᠦ ᠣᠯᠠᠨ ᠵᠢᠯ ᠰᠦᠰᠦᠭᠯᠡᠨ ᠨᠣᠮ ᠰᠤᠷᠤᠭᠰᠠᠨ ᠮᠢᠨᠢ ᠡᠢᠮᠦ ᠳᠡᠮᠡᠢ ᠲᠡᠭᠦᠰᠬᠡᠯ ᠳ᠋ᠦ᠍ ᠬᠦᠷᠭᠡᠬᠦ ᠪᠠᠢᠭᠰᠠᠨ ᠶᠤᠮ ᠤᠤ⁈ ᠭᠡᠰᠡᠨ ᠪᠣᠳᠣᠯ ᠰᠠᠨᠵᠢ ᠶ᠋ᠢᠨ ᠲᠣᠯᠣᠭᠠᠢ ᠳ᠋ᠤ᠌ ᠡᠷᠭᠢᠯᠳᠦᠵᠦ ᠰᠠᠯᠬᠤ ᠦᠭᠡᠢ ᠳᠠᠭᠠᠯᠳᠤᠵᠤ ᠪᠠᠢᠯᠠ᠃ ᠬᠠᠷᠢᠭᠤᠯᠬᠤ ᠬᠠᠷᠢᠭᠤ ᠨᠢ ᠣᠯᠳᠠᠵᠤ ᠥᠭᠬᠦ ᠦᠭᠡᠢ ᠵᠣᠪᠠᠭᠠᠨᠠ᠃ ᠭᠡᠪᠡᠴᠦ ᠡᠢᠮᠦ ᠶᠠᠪᠤᠳᠠᠯ ᠨᠢᠭᠡᠨᠲᠡ ᠪᠣᠳᠠᠲᠠᠢ ᠪᠠᠷ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠪᠦᠷᠢᠨ ᠣᠢᠯᠠᠭᠠᠪᠠ᠃