ᠬᠠᠷᠠᠮᠰᠠᠯ ᠤᠨ ᠲᠤᠤᠯᠢ - ᠫ ᠂ ᠫᠦᠷᠪᠦᠰᠦ᠋ᠷᠦᠩ Харамслын тууль - П ᠂ Пүрэвсүрэн
318 ᠫ᠊᠂ ᠫᠥᠷᠪᠥᠰᠥ᠋ᠷᠦᠩ
ᠠᠨᠳᠠ ᠶ᠋ᠢᠨ ᠮᠢᠨᠢ ᠠᠮᠢᠳᠤᠷᠠᠯ
ᠠᠯᠬᠤᠮ ᠠᠯᠬᠤᠮ ᠢ᠋ᠶ᠋ᠠᠷ ᠳᠡᠪᠵᠢᠭᠰᠡᠨ ᠶᠦᠮ᠃
ᠠᠭᠠᠰᠢ ᠠᠷᠠᠨᠰᠢᠨ ᠨᠢ ᠴᠦ᠍ ᠪᠠᠰᠠ
ᠠᠭᠠᠵᠢᠮ ᠠᠭᠠᠵᠢᠮ ᠢ᠋ᠶ᠋ᠠᠷ ᠳᠡᠭᠡᠭᠰᠢᠯᠡᠭᠰᠡᠨ ᠶᠦᠮ᠃
ᠪᠡᠶᠡ ᠪᠡᠶᠡ ᠪᠡᠨ ᠬᠠᠷᠠᠩᠭᠤᠲᠠ ᠪᠢᠳᠡ
ᠪᠠᠷᠢᠯᠳᠤᠬᠤ ᠪᠥᠬᠡ ᠰᠢᠭ ᠪᠣᠯᠳᠠᠭ ᠰᠠᠨ᠃
ᠬᠠᠮᠢᠭᠠ ᠬᠣᠯᠠ ᠠ᠋ᠴᠠ ᠨᠢᠭᠡ ᠶ᠋ᠢ ᠪᠡᠨ ᠳᠠᠭᠤᠳᠠᠵᠤ
ᠬᠠᠷᠠᠢᠵᠤ ᠣᠴᠢᠭᠠᠳ ᠲᠡᠪᠡᠷᠢᠯᠳᠦᠳᠡᠭ ᠶᠦᠮ᠃
ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠲᠡᠭᠦᠰᠦᠭᠰᠡᠨ ᠡᠴᠡ ᠬᠣᠢᠰᠢ
ᠲᠠᠪᠠᠲᠠᠢ ᠴᠤ᠌ ᠠᠭᠤᠯᠵᠠᠯᠳᠤᠬᠤ ᠪᠠᠨ ᠪᠣᠯᠢᠯᠠ᠃
ᠰᠠᠢᠬᠠᠨ ᠵᠠᠪᠰᠢᠶᠠᠨ ᠢᠶᠠᠷ ᠲᠠᠭᠠᠷᠠᠯᠳᠤᠪᠠᠯ
《 ᠰᠠᠢᠨ ᠤᠤ 》 ᠲᠠᠢ ᠯᠠ ᠵᠦᠷᠢᠳᠡᠭ ᠪᠣᠯᠣᠯᠠ᠃
ᠠᠨᠳᠠ ᠶ᠋ᠢᠨ ᠮᠢᠨᠢ ᠬᠠᠷᠠᠴᠠ ᠲᠡᠭᠡᠬᠦ ᠳ᠋ᠦ᠍
ᠠᠵᠢᠯᠴᠢᠨ ᠮᠢᠨᠦᠬᠢ ᠲᠡᠢ ᠴᠠᠴᠠᠤ ᠪᠠᠢᠯᠠ᠃
ᠡᠷᠬᠢᠮ ᠨᠥᠬᠥᠷ ᠦ᠋ᠨ ᠨᠢᠭᠤᠷ ᠲᠤ ᠪᠠᠰᠠ
ᠡᠶᠡᠯᠳᠡᠭᠬᠡᠨ ᠮᠦᠰᠢᠶᠡᠯ ᠦᠯᠡᠳᠡᠭᠰᠡᠨ ᠪᠠᠢᠯᠠ᠃
ᠲᠠᠰᠤᠭ ᠤ᠋ᠨ ᠳᠠᠷᠤᠭᠠ ᠪᠣᠯᠤᠭᠰᠠᠨ ᠠ᠋ᠴᠠ
ᠳᠠᠬᠢᠭᠠᠳ ᠨᠢᠭᠡ ᠲᠠᠭᠠᠷᠠᠯᠳᠤᠯᠠ᠃
ᠲᠠᠨᠢᠳᠠᠭ ᠨᠥᠬᠥᠷ ᠦ᠋ᠨ ᠶᠣᠰᠣ ᠪᠠᠷ ᠲᠡᠷᠡ
ᠲᠣᠯᠣᠭᠠᠢ ᠳᠣᠬᠢᠭᠠᠳ ᠥᠩᠭᠡᠷᠡᠯᠡ᠃
ᠠᠢᠯ ᠳ᠋ᠤ᠌ ᠰᠡᠭᠦᠯ ᠳ᠋ᠦ᠍ᠨᠢ ᠠᠭᠤᠯᠵᠠᠯᠠ
ᠠᠨᠳᠠ ᠮᠢᠨᠢ ᠨᠠᠮᠠ ᠶ᠋ᠢ ᠬᠠᠷᠠᠭᠰᠠᠨ ᠦᠭᠡᠢ᠃
ᠠᠮᠢᠲᠠᠨ ᠬᠥᠮᠦᠨ ᠲᠡᠢ ᠰᠦᠵᠢᠷᠬᠡᠯ ᠦᠭᠡᠢ
ᠠᠳᠠᠭᠠᠷ ᠰᠢᠷᠳᠡᠭᠰᠡᠭᠡᠷ ᠪᠠᠢᠭᠠᠳ ᠭᠠᠷᠤᠯᠠ᠃
ᠬᠡᠯᠲᠡᠰ ᠦ᠋ᠨ ᠳᠠᠷᠤᠭᠠ ᠪᠠᠷ ᠳᠠᠪᠰᠢᠭᠰᠠᠨ ᠭᠡᠵᠦ
ᠬᠡᠨ ᠨᠢᠭᠡᠨ ᠡᠴᠡ ᠬᠣᠵᠢᠮ ᠰᠣᠨᠣᠰᠤᠯᠠ᠃
《 ᠠᠯᠤᠰ ᠬᠠᠷᠠᠳᠠᠭ ᠪᠣᠯᠤᠭᠰᠠᠨ》 ᠭᠡᠵᠦ
ᠠᠨᠳᠠ ᠶ᠋ᠢ ᠮᠢᠨᠢ ᠤᠯᠤᠰ ᠱᠣᠣᠯᠠᠨᠠ᠃
ᠰᠠᠢᠬᠠᠨ ᠢᠨᠢᠶᠡᠮᠰᠦᠭᠯᠡᠯ ᠢ᠋ᠶ᠋ᠡᠨ ᠲᠡᠷᠡ
ᠰᠠᠬᠠᠯ ᠲᠠᠢ ᠪᠠᠨ ᠬᠠᠮᠲᠤ ᠬᠤᠰᠤᠵᠤ
ᠶᠠᠮᠠᠷ ᠴᠠᠭ ᠲᠤ ᠬᠥᠭᠡᠷᠦᠬᠦᠢ ᠮᠢᠨᠢ
ᠢᠷᠪᠠᠢᠵᠤ ᠶᠠᠪᠤᠬᠤ ᠪᠣᠯᠤᠯᠠ᠃
ᠬᠠᠶᠠ ᠨᠢᠭᠡ ᠲᠠᠭᠠᠷᠠᠯᠳᠤᠬᠤ ᠳ᠋ᠤ᠌
ᠬᠠᠷᠠᠴᠠ ᠨᠢ ᠡᠭᠦᠯᠡᠨ ᠴᠢᠨᠠᠳᠤ ᠴᠢᠭᠯᠡᠵᠦ
ᠬᠠᠵᠠᠭᠤ ᠪᠠᠷ ᠨᠢ ᠥᠩᠭᠡᠷᠡᠭᠰᠡᠨ ᠨᠠᠳᠠ ᠳ᠋ᠤ᠌
ᠬᠠᠮᠠᠷ ᠤ᠋ᠨ ᠨᠦᠬᠡ ᠨᠢ ᠯᠡ ᠬᠠᠷᠠᠭᠳᠠᠬᠤ ᠪᠣᠯᠤᠯᠠ᠃
ᠡᠴᠦᠰ ᠲᠡᠭᠡᠨ ᠪᠦᠷ ᠳᠡᠭᠡᠭᠰᠢ ᠪᠡᠨ ᠰᠢᠷᠳᠡᠵᠦ
ᠡᠷᠡᠦ ᠨᠢ ᠬᠠᠮᠠᠷ ᠤ᠋ᠨ ᠨᠦᠬᠡ ᠪᠡᠨ ᠬᠠᠭᠠᠵᠤ
《 ᠰᠠᠢᠨ ᠨᠥᠬᠥᠷ》 ᠦ᠋ᠨ ᠬᠠᠭᠤᠴᠢᠨ ᠴᠢᠷᠠᠢ ᠠ᠋ᠴᠠ
ᠰᠠᠢᠲᠤᠷ ᠬᠤᠰᠤᠭᠰᠠᠨ ᠬᠣᠭᠣᠯᠠᠢ ᠨᠢ ᠴᠦ᠍ ᠦᠵᠡᠭᠳᠡᠨᠡ᠃
ᠲᠡᠭᠡᠲᠡᠯᠡ ᠰᠠᠶᠢᠬᠠᠨ ᠭᠠᠢ ᠳᠠᠭᠠᠷᠢᠵᠤ
ᠲᠡᠷᠡ ᠮᠢᠨᠢ ᠨᠢᠭᠡᠨᠲᠡ《 ᠣᠢᠴᠢᠵᠤ》
ᠡᠷᠡᠭᠦᠯ ᠰᠠᠢᠬᠠᠨ ᠪᠡᠶᠡ ᠪᠡᠨ ᠪᠡᠷᠲᠡᠭᠡᠵᠦ
ᠡᠮᠨᠡᠯᠭᠡ ᠳ᠋ᠦ᠍ ᠣᠴᠢᠭᠰᠠᠨ ᠰᠤᠷᠠᠭ ᠲᠠᠢ᠃
ᠣᠷᠣᠨ ᠬᠣᠲᠠ ᠪᠠᠨ ᠪᠢᠳᠡ ᠪᠦᠬᠦᠨ ᠦ᠌
ᠣᠢᠵᠢᠭᠤᠯᠬᠤ ᠪᠠᠷ ᠤᠬᠤᠭᠰᠠᠨ ᠨᠦᠬᠡ ᠶ᠋ᠢ
ᠲᠩᠷᠢ ᠰᠢᠷᠳᠡᠵᠦ ᠶᠠᠪᠤᠭᠠᠳ ᠵᠠᠢᠯᠠᠭᠤᠯ ①
ᠲᠡᠷᠡ ᠮᠢᠨᠢ ᠬᠠᠷᠠᠯ ᠦᠭᠡᠢ《 ᠬᠢᠰᠭᠡᠴᠡᠭᠡᠵᠠᠢ》
ᠬᠤᠭᠤᠷᠠᠭᠰᠠᠨ ᠬᠥᠯ ᠨᠢ ᠡᠮᠨᠡᠯᠭᠡ ᠶ᠋ᠢᠨ ᠬᠦᠴᠦᠨ ᠳ᠋ᠦ᠍
ᠬᠠᠭᠤᠴᠢᠨ ᠰᠢᠭ᠋ ᠢ᠋ᠶ᠋ᠡᠨ ᠡᠳᠡᠭᠡᠨᠡ ᠠ᠋ ᠡᠳᠡᠭᠡᠨᠡ᠃
ᠲᠩᠷᠢ ᠲᠠᠩᠳᠠ ᠰᠢᠷᠳᠡᠬᠦ ᠪᠣᠯᠤᠭᠰᠠᠨ
ᠲᠡᠷᠡ ᠡᠪᠡᠳᠴᠢᠨ ᠯᠡ ᠬᠠᠮᠲᠤ ᠡᠲᠡᠭᠡᠰᠡᠢ᠃
- - - -
① ᠥᠷᠥᠪᠳᠦᠩᠬᠦᠢ ᠠᠶᠠᠯᠭᠠ ᠦᠭᠡ
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠩᠷᠢ ᠡᠵᠢ
ᠬᠢᠨᠠᠭ᠍ᠴᠢ : ᠳᠠᠪᠰᠢᠯᠲᠤ
2023᠂12᠂ 28 ᠦ᠌ ᠡᠳᠦᠷ