ᠣᠷᠣᠢ ᠦᠭᠡᠢ ᠰᠦᠮᠡ – ᠬᠣᠷᠢᠨ ᠳᠦᠷᠪᠡ ᠂ ᠲᠤᠯᠤᠮ ᠲᠠᠢ ᠭᠤᠷᠢᠯ ᠢᠶᠠᠷ ᠪᠡᠶᠡ ᠪᠡᠨ ᠰᠣᠯᠢᠪᠠ Оройгүй сүм – Хорин дөрөв ᠂ Туламтай гурилаар биеэ солив - Oroigui sum 24
700ᠬᠣᠷᠢᠨ ᠳᠦᠷᠪᠡ ᠂ ᠲᠤᠯᠤᠮ ᠲᠠᠢ ᠭᠤᠷᠢᠯ ᠢᠶᠠᠷ ᠪᠡᠶᠡ ᠪᠡᠨ ᠰᠣᠯᠢᠪᠠ
ᠦᠭᠡ ᠪᠠᠭᠠ ᠴᠤ᠌ ᠬᠡᠷᠡᠭᠦᠯ ᠦ᠋ᠨ ᠰᠢᠯᠲᠠᠭ
ᠦ ᠪᠠᠭᠠ ᠴᠤ᠌ ᠭᠠᠵᠢᠬᠤ ᠶ᠋ᠢᠨ ᠰᠢᠯᠲᠠᠭ
ᠲᠡᠷᠡ ᠰᠥᠨᠢ ᠰᠠᠨᠵᠢ ᠶ᠋ᠢᠨ ᠨᠣᠢᠷ ᠬᠦᠷᠦᠭᠰᠡᠨ ᠦᠭᠡᠢ᠃ ᠨᠣᠮ ᠬᠠᠶᠠᠯᠴᠠᠭᠰᠠᠨ ᠤ᠋ ᠤᠯᠠᠮ ᠠ᠋ᠴᠠ ᠰᠡᠳᠬᠢᠯ ᠨᠢ ᠶᠡᠬᠡ ᠯᠡ ᠬᠥᠳᠡᠯᠦᠨ ᠳᠣᠭᠳᠣᠯᠵᠤ᠂ ᠵᠢᠷᠦᠬᠡ ᠨᠢ ᠬᠥᠭᠡᠷᠦᠨ᠂ ᠨᠣᠢᠷ ᠬᠤᠯᠵᠢᠵᠠᠢ᠃ ᠡᠳᠦᠷ ᠦ᠋ᠨ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠳᠡᠰ ᠳᠡᠰ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠨᠢᠳᠦᠨ ᠦ᠌ ᠨᠢ ᠡᠮᠦᠨᠡ ᠦᠶᠡ ᠦᠶᠡ ᠠᠮᠢᠯᠠᠨ ᠬᠠᠷᠠᠭᠳᠠᠬᠤ ᠰᠢᠭ᠋ ᠪᠣᠯᠵᠤ ᠨᠣᠢᠷ ᠢ᠋ ᠨᠢ ᠦᠷᠭᠦᠭᠡᠵᠦ ᠪᠠᠢᠯᠠ᠃ ᠬᠡᠳᠦᠨ ᠲᠡᠰᠢ ᠪᠡᠨ ᠬᠠᠷᠠᠨ ᠬᠥᠯᠪᠡᠷᠢᠭᠰᠡᠭᠡᠷ ᠪᠠᠢᠲᠠᠯᠠ ᠰᠥᠨᠢ ᠶᠡᠬᠡ ᠣᠷᠣᠢ ᠪᠣᠯᠴᠢᠬᠠᠵᠠᠢ᠃ ᠬᠣᠢᠮᠣᠷ ᠪᠠᠢᠭᠠ ᠰᠢᠲᠦᠭᠡᠨ ᠦ᠌ ᠡᠮᠦᠨᠡᠬᠢ ᠵᠤᠯᠠ ᠶ᠋ᠢᠨ ᠭᠣᠣᠯ ᠳ᠋ᠤ᠌ ᠠᠰᠠᠭᠰᠠᠨ ᠭᠡᠷᠡᠯ ᠣᠭᠲᠣ ᠬᠥᠳᠡᠯᠭᠡᠭᠡᠨ ᠦᠭᠡᠢ ᠵᠦᠮᠪᠦᠷᠯᠡᠨ ᠲᠣᠭᠲᠠᠭᠰᠠᠨ ᠶᠤᠮ ᠰᠢᠭ᠋ ᠬᠠᠷᠠᠭᠳᠠᠨᠠ᠃ ᠨᠣᠮ ᠬᠠᠶᠠᠯᠴᠠᠵᠤ ᠪᠢᠯᠢᠭ ᠴᠢᠨᠠᠷ ᠤ᠋ᠨ ᠡᠷᠳᠡᠮ ᠰᠤᠷᠤᠭᠰᠠᠨ ᠤ᠋ ᠳᠡᠭᠡᠳᠦ ᠴᠣᠯᠠ ᠬᠡᠷᠬᠡᠮ ᠣᠯᠵᠤ ᠠᠪᠤᠮᠠᠭᠴᠠ ᠪᠠᠨ ᠨᠤᠲᠤᠭ ᠪᠤᠴᠠᠬᠤ ᠪᠠᠷ ᠰᠠᠨᠵᠢ ᠠᠨᠳᠠᠭᠠᠢᠯᠠᠭᠰᠠᠨ ᠪᠢᠯᠡ᠃ ᠣᠳᠣ ᠲᠡᠷᠡ ᠰᠠᠨᠠᠭᠠ ᠪᠠᠨ ᠭᠦᠢᠴᠡᠭᠡᠯᠡ᠃ ᠡᠢᠮᠦ ᠳ᠋ᠦ᠍ ᠲᠤᠩ ᠴᠤ᠌ ᠤᠳᠠᠯ ᠦᠭᠡᠢ ᠨᠤᠲᠤᠭ ᠣᠷᠣᠨ ᠢ᠋ᠶ᠋ᠠᠨ ᠵᠦᠭᠯᠡᠨ ᠪᠤᠴᠠᠬᠤ ᠪᠣᠯᠤᠨᠠ᠃ ᠨᠢᠭᠡᠨ ᠦᠶᠡ ᠮᠤᠯᠲᠤᠷᠠᠲᠠᠯᠠ ᠤᠷᠲᠤ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠪᠠᠷᠠ ᠶ᠋ᠢ ᠨᠢ ᠬᠠᠷᠠᠭᠠ ᠦᠭᠡᠢ ᠨᠤᠲᠤᠭ ᠤᠰᠤ᠂ ᠬᠥᠭᠰᠢᠨ ᠡᠴᠢᠭᠡ ᠡᠬᠡ ᠳ᠋ᠦ᠍ ᠪᠡᠨ ᠵᠣᠯᠭᠠᠨᠠ ᠭᠡᠬᠦ ᠡᠴᠡ ᠲᠡᠭᠦᠨ ᠦ᠌ ᠵᠢᠷᠦᠬᠡ ᠳᠣᠭᠳᠣᠯᠵᠤ ᠪᠥᠭᠡᠮ ᠪᠠᠶᠠᠷ ᠬᠥᠷ ᠳᠡᠭᠳᠡᠵᠦ ᠪᠠᠢᠯᠠ᠃ ᠡᠬᠡ᠂ ᠡᠴᠢᠭᠡ ᠪᠡᠨ ᠶᠠᠮᠠᠷᠬᠠᠤ ᠪᠠᠢᠭᠠ ᠶ᠋ᠢ ᠮᠥᠷᠭᠥᠯᠴᠢᠨ ᠨᠣᠭᠥᠳ ᠡᠴᠡ ᠰᠣᠨᠣᠰᠳᠠᠭ ᠪᠣᠯᠪᠠᠴᠤ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠤᠴᠠᠷᠠᠨ ᠠᠭᠤᠯᠵᠠᠬᠤ ᠶ᠋ᠢᠨ ᠬᠦᠰᠡᠯᠡᠩ ᠬᠢᠵᠠᠭᠠᠷ ᠦᠭᠡᠢ ᠶᠡᠬᠡ ᠠᠵᠢ᠃ ᠠᠷᠪᠠᠨ ᠬᠡᠳᠦᠨ ᠵᠢᠯ ᠦ᠋ᠨ ᠳᠠᠷᠠᠭᠠ ᠪᠠᠷ ᠡᠷᠭᠢᠵᠦ ᠣᠴᠢᠬᠤ ᠳ᠋ᠤ᠌ ᠬᠥᠮᠦᠰ ᠨᠠᠮᠠᠶ᠋ᠢ ᠪᠠᠷᠤᠭ ᠯᠠ ᠲᠠᠨᠢᠬᠤ ᠦᠭᠡᠢ ᠪᠢᠵᠡ ᠳᠡ ᠭᠡᠵᠦ ᠪᠣᠳᠣᠭᠳᠠᠯᠠ᠃ ᠡᠬᠡ᠂ ᠡᠴᠢᠭᠡ ᠨᠢ ᠪᠣᠯ ᠲᠠᠨᠢᠬᠤ ᠶᠣᠰᠣᠲᠠᠢ᠃ ᠡᠬᠡ ᠡᠴᠢᠭᠡ ᠪᠡᠨ ᠴᠦ᠍ ᠬᠦᠦ ᠨᠢ ᠲᠠᠨᠢᠬᠤ ᠤᠴᠢᠷᠲᠠᠢ᠃ ᠵᠢᠵᠢᠭᠬᠡᠨ ᠪᠣᠷᠣ ᠪᠠᠨᠳᠢ ᡀᠠᠰᠠ ᠬᠣᠲᠠᠨ ᠳ᠋ᠤ᠌ ᠠᠩᠬᠠ ᠣᠷᠣᠵᠤ ᠢᠷᠡᠭᠰᠡᠨ ᠪᠢᠯᠡ᠃ ᠣᠳᠣ ᠲᠡᠷᠡ ᠪᠠᠨᠳᠢ ᠦᠭᠡᠢ ᠪᠣᠯᠵᠠᠢ᠃ ᠬᠠᠷᠢᠨ ᠲᠡᠭᠦᠨ ᠡᠴᠡ ᠤᠷᠭᠤᠨ ᠥᠰᠦᠭᠰᠡᠨ ᠬᠠᠩᠬᠠᠭᠠᠷ ᠲᠣᠮᠣ ᠪᠡᠶᠡ ᠲᠡᠢ᠂ ᠬᠠᠯᠵᠠᠨᠳᠠᠭᠤ ᠲᠣᠯᠣᠭᠠᠢ ᠲᠠᠢ᠂ ᠨᠠᠮᠪᠠ ᠲᠠᠢ ᠨᠠᠮᠤᠭᠤᠨ ᠠᠯᠬᠤᠭᠠ ᠲᠠᠢ ᠯᠤᠲᠤ ᠨᠢᠭᠡᠨ ᡀᠠᠷᠠᠮᠪᠠ ᠨᠤᠲᠤᠭ ᠲᠤ᠌ ᠪᠠᠨ ᠡᠷᠭᠢᠵᠦ ᠣᠴᠢᠬᠤ ᠪᠣᠯᠤᠨᠠ᠃ ᠲᠡᠷᠡ ᠪᠦᠷᠢ ᠶ᠋ᠢ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠵᠤ ᠬᠡᠪᠲᠡᠲᠡᠯᠡ ᠭᠠᠳᠠᠭᠠ ᠬᠠᠰᠢᠶᠠ ᠳᠡᠭᠡᠭᠦᠷ ᠬᠡᠨ ᠨᠢᠭᠡᠨ ᠬᠥᠮᠦᠨ ᠰᠡᠮᠬᠡᠨ ᠳᠠᠪᠠᠵᠤ ᠭᠠᠵᠠᠷ ᠲᠤ᠌ ᠳᠠᠪ ᠬᠢᠲᠡᠯᠡ ᠪᠠᠭᠤᠬᠤ ᠴᠢᠮᠡᠭᠡ ᠰᠣᠨᠣᠰᠤᠭᠳᠠᠪᠠ᠃ ᠰᠠᠨᠵᠢ ᠴᠣᠴᠢᠨ ᠥᠨᠳᠡᠢᠵᠦ ᠴᠢᠮᠡᠭᠡ ᠴᠢᠩᠨᠠᠯᠠ᠃ ᠵᠥᠭᠡᠯᠡᠨ ᠠᠯᠬᠤᠭᠠ ᠲᠠᠢ ᠨᠢᠭᠡᠨ ᠬᠥᠮᠦᠨ ᠣᠰᠣᠯᠳᠠᠬᠤ ᠦᠭᠡᠢ ᠯᠡ ᠬᠠᠰᠢᠶᠠ ᠳᠠᠪᠠᠭᠠᠳ ᠡᠭᠦᠳᠡ ᠤᠷᠤᠭᠤ ᠨᠢ ᠴᠢᠭᠯᠡᠨ ᠢᠷᠡᠵᠦ ᠶᠠᠪᠤᠬᠤ ᠰᠢᠭ᠋ ᠰᠠᠨᠠᠭᠳᠠᠯᠠ᠃ ᠲᠡᠭᠡᠲᠡᠯᠡ ᠵᠤᠯᠠ ᠶ᠋ᠢᠨ ᠭᠡᠷᠡᠯ ᠲᠤᠩ ᠦᠯᠦ ᠮᠡᠳᠡᠭ ᠨᠠᠬᠢᠰᠬᠢᠯᠡ᠃ ᠡᠭᠦᠳᠡ ᠰᠠᠮ ᠨᠡᠭᠡᠭᠡᠭᠳᠡᠬᠦ ᠶ᠋ᠢ ᠲᠡᠷᠡᠭᠦᠷ ᠮᠡᠳᠡᠭᠡᠳ ᠰᠠᠨᠵᠢ ᠥᠨᠳᠡᠢᠪᠡ᠃ ᠷᠣᠡᠭ᠌ᠬᠠᠨ ᠢᠶᠠᠷ ᠳᠠᠮᠵᠢᠭᠠᠳ ᠨᠢᠭᠡᠨ ᠬᠥᠮᠦᠨ ᠣᠷᠣᠵᠤ ᠢᠷᠡᠯᠡ᠃ ᠵᠤᠯᠠ ᠶ᠋ᠢᠨ ᠭᠡᠷᠡᠯ ᠳ᠋ᠦ᠍ ᠫᠠᠳ ᠬᠠᠷᠠ ᠴᠢᠷᠠᠢ ᠲᠠᠢ ᠪᠦᠯᠲᠡᠭᠡᠷ ᠨᠢᠳᠦ ᠲᠡᠢ᠂ ᠰᠢᠷᠦᠭᠦᠨ ᠬᠠᠷᠠᠴᠠ ᠲᠠᠢ ᠴᠢᠷᠠᠢ ᠪᠠᠷ ᠨᠢ ᠰᠢᠮᠬᠠᠨ ᠤ᠋ ᠡᠭᠦᠳᠡ ᠪᠡᠷ ᠱᠠᠭᠠᠢᠩᠭᠤᠲᠠ ᠰᠠᠨᠵᠢ ᠲᠡᠭᠦᠨ ᠢ᠋ ᠲᠠᠨᠢᠪᠠ᠃ ᠳᠣᠲᠣᠷᠠ ᠨᠢ ᠡᠪ ᠦᠭᠡᠢ ᠪᠣᠯᠬᠤ ᠰᠢᠭ᠋ ᠳᠠᠪᠠᠲᠠᠯᠠ᠃ ᠫᠠᠭ᠍ᠰᠠᠡᠭ ᠠᠵᠠᠢ᠃ ᠡᠷᠲᠡ ᠤᠷᠢᠳᠤ ᠬᠦᠷᠳᠦᠨ ᠳ᠋ᠦ᠍ ᠵᠣᠳᠣᠯᠳᠤᠵᠤ ᠪᠠᠢᠭᠠᠳ ᠳᠤᠬᠤᠨ ᠳᠡᠭᠡᠷᠡ ᠨᠢ ᠴᠣᠬᠢᠵᠤ ᠰᠠᠨᠵᠢ ᠶ᠋ᠢᠨ ᠦᠯᠡᠳᠡᠭᠡᠭᠰᠡᠨ ᠦᠯᠦ ᠮᠡᠳᠡᠭ ᠰᠣᠷᠪᠢ ᠵᠤᠯᠠ ᠶ᠋ᠢᠨ ᠭᠡᠷᠡᠯ ᠳ᠋ᠦ᠍ ᠭᠢᠯᠠᠰᠬᠢᠨ ᠲᠣᠳᠣᠷᠠᠬᠤ ᠰᠢᠭ᠋ ᠪᠣᠯᠤᠯᠠ᠃《ᠡᠨᠡ ᠣᠳᠣ ᠶᠠᠭᠤ ᠬᠢᠵᠦ ᠶᠠᠪᠤᠭᠠ ᠶᠤᠮ ᠪᠣᠢ? ᠡᠳᠦᠷ ᠠᠳᠬᠠᠭ ᠤ᠋ᠨ ᠬᠤᠷᠠ ᠶ᠋ᠢᠨ ᠲᠤᠬᠠᠢ ᠬᠠᠴᠢᠨ ᠦᠭᠡ ᠰᠢᠪᠡᠨᠡᠭᠡᠳ ᠪᠠᠢᠭᠰᠠᠨ ᠪᠢᠰᠢ ᠤᠤ?》ᠭᠡᠵᠦ ᠰᠠᠨᠵᠢ ᠪᠣᠳᠣᠭᠠᠳ ᠤᠬᠤᠰᠬᠢᠨ ᠪᠣᠰᠤᠯᠠ᠃ ᠫᠠᠭ᠍ᠰᠠᠡᠭ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠠᠩᠭᠠᠵᠤ᠂
- ᠪᠢᠲᠡᠭᠡᠢ ᠠᠶᠤ! ᠬᠡᠪᠲᠡ᠂ ᠬᠡᠪᠲᠡ! ᠪᠢ ᠡᠨᠡᠦᠬᠡᠨ ᠳ᠋ᠦ᠍ ᠰᠠᠭᠤᠭᠠᠳ ᠬᠡᠯᠡᠬᠦ ᠭᠡᠰᠡᠨ ᠶᠠᠭᠤᠮᠠ ᠪᠠᠨ ᠬᠡᠯᠡᠭᠡᠳ ᠭᠠᠷᠤᠨᠠ ᠭᠡᠵᠦ ᠰᠥᠭᠡᠩᠭᠢᠳᠡᠭᠦᠦ ᠪᠡᠷᠰᠡᠭᠦᠦ ᠲᠡᠢ ᠬᠣᠭᠣᠯᠠᠢ ᠪᠠᠷ ᠬᠡᠯᠡᠪᠡ᠃ ᠰᠠᠨᠵᠢ ᠶ᠋ᠢᠨ ᠰᠡᠳᠬᠢᠯ ᠪᠠᠭᠠ ᠵᠡᠷᠭᠡ ᠲᠠᠢᠪᠤᠰᠢᠷᠠᠯᠠ᠃
- ᠪᠢ ᠡᠳᠦᠷ ᠴᠢᠮᠠ ᠳ᠋ᠤ᠌ ᠶᠠᠭᠤ ᠭᠡᠵᠦ ᠬᠡᠯᠡᠭᠰᠡᠨ ᠪᠢᠯᠡ? ᠭᠡᠵᠦ ᠫᠠᠭ᠍ᠰᠠᠡᠭ ᠠᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠬᠠᠷᠢᠭᠤᠯᠬᠤ ᠵᠠᠪ ᠥᠭᠭᠦᠯ ᠦᠭᠡᠢ ᠪᠡᠷ ᠴᠢᠨᠠᠭᠰᠢ ᠦᠷᠭᠦᠯᠵᠢᠯᠡᠭᠦᠯᠦᠨ᠂
- ᠪᠢᠯᠢᠭ ᠦ᠋ᠨ ᠶᠡᠬᠡ ᠬᠠᠯᠠᠭᠤᠨ ᠣᠴᠢ ᠠᠰᠤᠷᠤ ᠠᠳᠬᠠᠭ ᠤ᠋ᠨ ᠵᠥᠭᠡᠯᠡᠨ ᠬᠤᠷᠠ ᠪᠠᠭᠤᠬᠤ ᠶ᠋ᠢ ᠶᠡᠷᠦᠨᠳᠡᠭᠯᠡᠨᠡ! ᠭᠡᠵᠦ ᠪᠢ ᠴᠢᠮᠠ ᠳ᠋ᠤ᠌ ᠬᠡᠯᠡᠭᠰᠡᠨ ᠳᠡ᠃ ᠲᠡᠷᠡ ᠶ᠋ᠢ ᠴᠦ᠍ ᠣᠢᠯᠠᠭᠠᠭᠰᠠᠨ ᠪᠠᠢᠬᠠ᠃ ᠵᠠ ᠲᠡᠭᠡᠬᠦᠯᠡᠷ ᠣᠳᠣ ᠲᠡᠷᠡ ᠠᠲᠠᠭᠠᠨ ᠤ᠋ ᠵᠥᠭᠡᠯᠡᠨ ᠬᠤᠷᠠ ᠴᠢᠮᠠ ᠳᠡᠭᠡᠷᠡ ᠪᠠᠭᠤᠬᠤ ᠭᠡᠵᠦ ᠪᠠᠢᠨᠠ ᠭᠡᠬᠦ ᠳ᠋ᠦ᠍ ᠨᠢ ᠰᠠᠨᠵᠢ ᠴᠣᠴᠢᠵᠤ᠂ ᠶᠡᠬᠡᠳᠡ ᠪᠣᠯᠭᠣᠮᠵᠢᠲᠠᠢ ᠡᠰᠢ ᠲᠡᠰᠢ ᠬᠠᠷᠠᠪᠠ᠃
- ᠡᠰᠢ ᠲᠡᠰᠢ ᠪᠤᠤ ᠬᠠᠷᠠ! ᠥᠨᠥᠳᠥᠷ ᠲᠡᠷᠡ ᠬᠤᠷᠠ ᠪᠠᠭᠤᠬᠤ ᠦᠭᠡᠢ᠃ ᠬᠡᠷᠪᠡ ᠴᠢᠮᠠᠶ᠋ᠢ ᠨᠤᠲᠤᠭ ᠪᠤᠴᠠᠬᠤ ᠰᠤᠷᠠᠭ ᠯᠠ ᠭᠠᠷᠪᠠᠯ ᠲᠡᠷᠡ ᠰᠥᠨᠢ ᠳ᠋ᠦ᠍ ᠪᠠᠨ ᠯᠠ ᠪᠠᠭᠤᠨᠠ! ᠭᠡᠵᠦ ᠫᠠᠭ᠍ᠰᠠᠡᠭ ᠬᠡᠯᠡᠪᠡ᠃ ᠲᠡᠭᠦᠨ ᠢ᠋ ᠰᠠᠨᠵᠢ ᠰᠠᠢᠨ ᠣᠢᠯᠠᠭᠠᠭᠰᠠᠨ ᠦᠭᠡᠢ᠃
- ᠶᠠᠮᠠᠷ ᠬᠤᠷᠠ ᠪᠣᠢ? ᠭᠡᠵᠦ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠠᠰᠠᠭᠤᠬᠤ ᠳ᠋ᠤ᠌᠂
- ᠥᠨᠥᠳᠥᠷ ᠨᠣᠮ ᠬᠠᠶᠠᠯᠴᠠᠭᠰᠠᠨ ᠤ᠋ ᠳᠠᠷᠠᠭᠠ ᠬᠢᠷᠭᠠᠴᠢ ᠨᠤᠭᠤᠳ ᠤ᠋ᠨ ᠬᠣᠭᠣᠷᠣᠨᠳᠣ ᠪᠠᠨ ᠶᠠᠷᠢᠭᠰᠠᠨ ᠶᠠᠭᠤᠮᠠ ᠶ᠋ᠢ ᠪᠢ ᠴᠢᠮᠠ ᠳ᠋ᠤ᠌ ᠬᠡᠯᠡᠬᠦ ᠪᠡᠷ ᠢᠷᠡᠯᠡ᠃ ᠲᠡᠳᠡ ᠯᠢᠨᠰᠠᠷᠠᠢ ᠭᠠᠪᠵᠤ ᠶ᠋ᠢᠨ ᠥᠷᠥᠭᠡᠨ ᠳ᠋ᠦ᠍ ᠵᠥᠪᠯᠡᠯᠳᠦᠵᠦ ᠪᠠᠢᠬᠤ ᠶ᠋ᠢ ᠪᠢ ᠰᠡᠮᠡᠬᠡᠨ ᠰᠣᠨᠣᠰᠤᠭᠰᠠᠨ ᠶᠤᠮ᠃ ᠴᠢᠮᠠ ᠳ᠋ᠤ᠌ ᠬᠡᠲᠦᠷᠬᠡᠢ ᠶᠡᠬᠡ ᠶᠠᠭᠤᠮᠠ ᠵᠢᠭᠠᠵᠤ ᠰᠤᠷᠭᠠᠵᠠᠢ ᠭᠡᠵᠦ ᠲᠡᠳᠡ ᠯᠢᠨᠰᠠᠷᠠᠢ ᠭᠠᠪᠵᠤ ᠯᠦᠨᠳᠥᠭᠵᠤᠨᠠᠢ ᠶ᠋ᠢ ᠵᠢᠮᠡᠯᠡᠵᠦ ᠪᠠᠢᠨᠠ ᠪᠢᠯᠡ᠃ ᠪᠤᠷᠬᠠᠨ ᠱᠠᠵᠢᠨ ᠤ᠋ ᠬᠠᠮᠤᠭ ᠨᠢᠭᠤᠴᠠ ᠶ᠋ᠢ ᠮᠡᠳᠡᠭᠰᠡᠨ ᠬᠥᠮᠦᠨ ᠢ᠋ ᠲᠥᠪᠡᠳ ᠣᠷᠣᠨ ᠠ᠋ᠴᠠ ᠭᠠᠷᠭᠠᠵᠤ ᠪᠣᠯᠬᠤ ᠦᠭᠡᠢ ᠨᠢᠭᠤᠴᠠ ᠬᠠᠤᠯᠢ ᠲᠠᠢ ᠶ᠋ᠢ ᠴᠢ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠣᠢ ᠳᠠ᠃ ᠣᠷᠣᠢ ᠦᠭᠡᠢ ᠡᠷᠳᠡᠮ ᠰᠤᠷᠤᠭᠰᠠᠨ ᠭᠠᠳᠠᠨᠠ ᠶ᠋ᠢᠨ ᠬᠥᠮᠦᠨ ᠳ᠋ᠦ᠍ ᠬᠣᠶᠠᠷ ᠵᠠᠮ ᠪᠠᠢᠳᠠᠭ᠃ ᠨᠢᠭᠡ ᠪᠣᠯ ᠪᠦᠬᠦ ᠨᠠᠰᠤ ᠪᠠᠷ ᠢ᠋ᠶ᠋ᠠᠨ ᡀᠠᠰᠠ ᠳ᠋ᠤ᠌ ᠰᠠᠭᠤᠵᠤ ᠡᠷᠳᠡᠮ ᠢ᠋ᠶ᠋ᠡᠨ ᠡᠷᠭᠢᠭᠡᠳ ᠲᠥᠪᠡᠳ ᠬᠥᠮᠦᠨ ᠳ᠋ᠦ᠍ ᠵᠢᠭᠠᠵᠤ ᠪᠠᠢᠭᠰᠠᠭᠠᠷ ᠶᠠᠰᠤ ᠪᠠᠨ ᠲᠠᠯᠪᠢᠬᠤ᠂ ᠨᠢᠭᠡ ᠪᠣᠯ ᠨᠤᠲᠤᠭ ᠪᠤᠴᠠᠬᠤ ᠶ᠋ᠢᠨ ᠢ᠋ᠶ᠋ᠡᠨ ᠡᠮᠦᠨᠡᠬᠡᠨ ᠲᠥᠪᠡᠳ ᠬᠥᠮᠦᠨ ᠦ᠌ ᠭᠠᠷ ᠲᠤ᠌ ᠶᠠᠰᠤ ᠪᠠᠨ ᠲᠠᠯᠪᠢᠬᠤ᠂ ᠡᠢᠮᠦ ᠯᠡ ᠬᠣᠶᠠᠷᠬᠠᠨ ᠲᠠᠪᠢᠯᠠᠩ ᠲᠠᠢ ᠶᠤᠮ᠃ ᠴᠢ ᠠᠯᠢ ᠶ᠋ᠢ ᠨᠢ ᠰᠣᠩᠭᠣᠵᠤ ᠠᠪᠬᠤ ᠪᠠᠨ ᠥᠪᠡᠷ ᠢ᠋ᠶ᠋ᠡᠨ ᠮᠡᠳᠡ᠃ ᠪᠦᠬᠦ ᠨᠠᠰᠤ ᠪᠠᠷ ᠢ᠋ᠶ᠋ᠠᠨ ᠲᠥᠪᠡᠳ ᠲᠦ᠍ ᠰᠠᠭᠤᠬᠤ ᠪᠠᠷ ᠰᠢᠢᠳᠪᠡᠯ ᠴᠢᠮᠠ ᠳ᠋ᠤ᠌ ᠠᠶᠤᠬᠤ ᠶᠠᠭᠤᠮᠠ ᠪᠠᠢᠬᠤ ᠦᠭᠡᠢ᠃ ᠬᠠᠷᠢᠨ ᠮᠣᠩᠭᠣᠯ ᠭᠠᠵᠠᠷ ᠢ᠋ᠶ᠋ᠠᠨ ᠪᠤᠴᠠᠬᠤ ᠪᠠᠷ ᠵᠠᠪᠳᠤᠪᠠᠯ ᠴᠢᠮᠠᠶ᠋ᠢ ᠶᠠᠪᠤᠬᠤ ᠶ᠋ᠢᠨ ᠴᠢᠨᠢ ᠤᠷᠢᠳᠤ ᠰᠥᠨᠢ ᠶᠠᠭ ᠯᠠ ᠥᠨᠥᠳᠥᠷ ᠮᠢᠨᠦ ᠣᠷᠣᠵᠤ ᠢᠷᠡᠭᠰᠡᠨ ᠰᠢᠭ ᠭᠡᠷ ᠲᠦ᠍ ᠴᠢᠨᠢ ᠣᠷᠣᠵᠤ ᠢᠷᠡᠭᠡᠳ ᠣᠷᠣᠨ ᠳ᠋ᠤ᠌ ᠴᠢᠨᠢ ᠳᠠᠭᠤᠰᠬᠠᠨᠠ᠃ ᠡᠭᠦᠨ ᠢ᠋ ᠯᠡ ᠪᠢ ᠴᠢᠮᠠ ᠳ᠋ᠤ᠌ ᠬᠡᠯᠡᠬᠦ ᠭᠡᠰᠡᠨ ᠶᠦ᠍ᠮ᠃ ᠨᠢᠭᠡᠨ ᠵᠢᠡᠭ᠌ᠳᠠᠭᠠᠨ ᠳ᠋ᠤ᠌ ᠨᠢᠭᠡᠨ ᠦᠶᠡ ᠶ᠋ᠢ ᠡᠯᠡᠭᠡᠭᠰᠡᠨ ᠦ᠌ ᠪᠡᠨ ᠤᠴᠢᠷ ᠡᠭᠦᠨ ᠢ᠋ ᠪᠢ ᠬᠡᠯᠡᠬᠦ ᠦᠭᠡᠢ ᠪᠠᠢᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠴᠢ ᠨᠠᠮᠠᠶ᠋ᠢ ᠮᠠᠭᠤ ᠬᠥᠮᠦᠨ ᠭᠡᠵᠦ ᠪᠣᠳᠣᠳᠠᠭ ᠪᠠᠢᠬᠠ᠃ ᠲᠡᠭᠡᠪᠡᠯ ᠪᠢ ᠥᠪᠡᠷ ᠢ᠋ ᠪᠡᠨ ᠴᠢᠮᠠ ᠳ᠋ᠤ᠌ ᠴᠠᠭᠠᠳᠬᠠᠬᠤ ᠤᠴᠢᠷᠲᠠᠢ᠃ ᠪᠣᠯᠭᠣᠮᠵᠢᠲᠠᠢ ᠪᠠᠢ! ᠭᠡᠵᠦ ᠫᠠᠭ᠍ᠰᠠᠡᠭ ᠬᠡᠯᠡᠭᠡᠳ ᠰᠢᠭᠤᠳᠬᠠᠨ ᠪᠣᠰᠴᠤ ᠭᠠᠳᠠᠭᠰᠢ ᠪᠠᠨ ᠭᠠᠷᠤᠯᠠ᠃ ᠰᠠᠨᠵᠢ ᠶᠠᠭᠠᠬᠢᠬᠤ ᠴᠤ᠌ ᠤᠴᠢᠷ ᠢ᠋ᠶ᠋ᠠᠨ ᠣᠯᠤᠭᠰᠠᠨ ᠦᠭᠡᠢ《ᠬᠦᠢ ᠫᠠᠭ᠍ᠰᠠᠡᠭ》 ᠭᠡᠵᠦ ᠳᠠᠭᠤᠳᠠᠭᠰᠠᠨ ᠴᠢᠨᠢ ᠲᠡᠷᠡ ᠠᠯᠢ ᠬᠡᠳᠦᠢᠨ ᠬᠠᠰᠢᠶᠠ ᠳᠠᠪᠠᠭᠠᠳ ᠬᠠᠷᠠᠩᠭᠤᠢ ᠭᠤᠳᠤᠮᠵᠢ ᠤᠷᠤᠭᠤ ᠵᠢᠪᠦᠨ ᠦᠵᠡᠭᠳᠡᠬᠦ ᠦᠭᠡᠢ ᠪᠣᠯᠪᠠ᠃
ᠰᠡᠳᠬᠢᠯ ᠢ᠋ ᠨᠢ ᠪᠦᠷᠢᠮᠦᠰᠦᠨ ᠬᠢᠮᠤᠷᠠᠭᠤᠯᠤᠭᠰᠠᠨ ᠲᠡᠷᠡ ᠶᠠᠷᠢᠶᠠᠨ ᠠ᠋ᠴᠠ ᠪᠣᠯᠤᠭᠠᠳ ᠰᠠᠨᠵᠢ ᠰᠥᠨᠢᠵᠢᠨ ᠡᠯᠳᠡᠪ ᠢ᠋ ᠪᠣᠳᠣᠯᠠ᠃《ᠨᠣᠮ ᠳ᠋ᠤ᠌ ᠶᠡᠬᠡ ᠰᠠᠢᠵᠢᠷᠠᠭᠰᠠᠨ ᠬᠠᠷᠢ ᠶ᠋ᠢᠨ ᠬᠥᠮᠦᠨ ᠢ᠋ ᠨᠤᠲᠤᠭ ᠲᠤ᠌ ᠨᠢ ᠪᠤᠴᠠᠭᠠᠬᠤ ᠳᠤᠷᠠ ᠦᠭᠡᠢ》 ᠭᠡᠰᠡᠨ ᠳᠠᠮ ᠦᠭᠡ ᠶ᠋ᠢ ᠰᠠᠨᠵᠢ ᠠᠯᠢ ᠬᠡᠳᠦᠢᠨ ᠰᠣᠨᠣᠰᠴᠤ ᠮᠡᠳᠡᠭᠰᠡᠨ ᠪᠠᠢᠯᠠ᠃ ᠲᠡᠭᠦᠪᠡᠷ ᠴᠦ᠍ ᠪᠠᠷᠠᠬᠤ ᠦᠭᠡᠢ ᠶᠠᠭᠠᠬᠢᠵᠤ᠂ ᠶᠠᠮᠠᠷ ᠠᠷᠭᠠ ᠪᠠᠷ ᠲᠡᠢᠮᠦ ᠬᠥᠮᠦᠨ ᠢ᠋ ᠦᠭᠡᠢ ᠬᠢᠳᠡᠭ ᠲᠤᠬᠠᠢ ᠴᠤ᠌ ᠵᠠᠷᠢᠮ ᠨᠢᠭᠡ ᠬᠠᠴᠢᠨ ᠶᠠᠷᠢᠶᠠ ᠶ᠋ᠢ ᠲᠡᠷᠡ ᠤᠷᠢᠳᠤ ᠨᠢ ᠰᠣᠨᠣᠰᠤᠭᠰᠠᠨ ᠪᠠᠢᠵᠠᠢ᠃ ᠭᠡᠪᠡᠴᠦ ᠲᠡᠭᠦᠨ ᠳ᠋ᠦ᠍ ᠢᠲᠡᠭᠡᠳᠡᠭ ᠦᠭᠡᠢ ᠶᠠᠪᠤᠵᠠᠢ᠃ ᠣᠳᠣ ᠪᠣᠯᠬᠣᠷ ᠰᠢᠭᠤᠳ ᠯᠠ ᠥᠪᠡᠷ ᠲᠦ᠍ ᠨᠢ ᠬᠣᠯᠪᠣᠭᠳᠠᠬᠤ ᠬᠡᠷᠡᠭ ᠮᠠᠨᠳᠤᠵᠤ ᠪᠠᠢᠭᠠ ᠨᠢ ᠡᠨᠡ ᠶᠦ᠍ᠮ ᠪᠣᠯᠪᠠ ᠤᠤ ᠭᠡᠵᠦ ᠡᠷᠡᠭᠡᠯᠵᠡᠬᠦ ᠡᠴᠡ ᠥᠭᠡᠷᠡ ᠦᠭᠡᠢ ᠳ᠋ᠦ᠍ ᠬᠦᠷᠴᠡᠢ᠃ ᠶᠠᠮᠠᠷ ᠠᠷᠭᠠ ᠪᠠᠷ ᠰᠠᠨᠵᠢ ᠶ᠋ᠢ ᠦᠭᠡᠢ ᠬᠢᠬᠦ ᠪᠣᠯ ᠭᠡᠳᠡᠭ ᠢ᠋ ᠥᠴᠢᠨᠡᠨ ᠣᠯᠠᠨ ᠬᠤᠪᠢᠯᠪᠤᠷᠢ ᠪᠠᠷ ᠲᠥᠯᠥᠪᠯᠡᠨ ᠪᠣᠳᠣᠪᠠ᠃
-《ᠶᠠᠭᠤᠨ ᠤ᠋ ᠤᠷᠢᠳᠤ ᠨᠠᠮᠠᠶ᠋ᠢ ᠨᠤᠲᠤᠭ ᠪᠤᠴᠠᠬᠤ ᠡᠰᠡᠬᠦ ᠶ᠋ᠢ ᠲᠡᠩᠨᠡᠵᠦ ᠮᠡᠳᠡᠬᠦ ᠪᠠᠢᠬᠠ᠃ ᠬᠡᠨ ᠠᠩᠬᠠ ᠲᠡᠢᠮᠦ ᠦᠭᠡ ᠠᠰᠠᠭᠤᠬᠤ ᠶ᠋ᠢ ᠰᠠᠢᠨ ᠠᠵᠢᠵᠤ ᠪᠣᠯᠭᠣᠮᠵᠢᠯᠠᠬᠤ ᠨᠢ ᠵᠥᠪ》 ᠭᠡᠵᠦ ᠰᠠᠨᠵᠢ ᠪᠣᠳᠣᠯᠠ᠃ 《ᠨᠤᠲᠤᠭ ᠶᠠᠪᠤᠬᠤ ᠶ᠋ᠢ ᠮᠡᠳᠡᠭᠰᠡᠨ ᠦ᠌ ᠪᠡᠨ ᠳᠠᠷᠠᠭᠠ ᠶᠠᠭᠠᠬᠢᠵᠤ ᠦᠭᠡᠢ ᠬᠢᠬᠦ ᠪᠣᠯ! ᠰᠥᠨᠢ ᠤᠨᠲᠠᠵᠤ ᠪᠠᠢᠬᠤ ᠳ᠋ᠤ᠌ ᠥᠨᠥᠳᠥᠷ ᠦ᠋ᠨ ᠫᠠᠭ᠍ᠰᠠᠡᠭ ᠰᠢᠭ᠋ ᠣᠷᠣᠵᠤ ᠢᠷᠡᠭᠡᠳ ᠰᠢᠯᠤᠭᠤᠬᠠᠨ ᠴᠠᠰᠢ ᠬᠠᠷᠠᠭᠤᠯᠬᠤ ᠪᠠᠢᠬᠠ᠃ ᠲᠡᠭᠡᠪᠡᠯ ᠶᠠᠭᠠᠬᠢᠬᠤ ᠪᠣᠢ?》 ᠭᠡᠵᠦ ᠰᠠᠨᠵᠢ ᠪᠣᠳᠣᠯᠠ᠃ 《ᠡᠭᠦᠳᠡᠨ ᠳ᠋ᠦ᠍ ᠪᠡᠨ ᠲᠦᠭᠵᠢᠶᠡ ᠬᠢᠬᠦ ᠤᠤ? ᠲᠦᠭᠵᠢᠶᠡ ᠶ᠋ᠢ ᠰᠤᠭᠤ ᠲᠠᠲᠠᠭᠠᠳ ᠯᠠ ᠣᠷᠣᠵᠤ ᠢᠷᠡᠨᠡ᠃ ᠲᠡᠢᠮᠦ ᠳ᠋ᠦ᠍ ᠪᠡᠨ ᠲᠤᠯᠤᠭᠰᠠᠨ ᠬᠥᠮᠦᠰ ᠶᠠᠭᠤ ᠴᠤ᠌ ᠬᠢᠬᠦ ᠡᠴᠡ ᠪᠤᠴᠠᠬᠤ ᠦᠭᠡᠢ᠃ ᠲᠡᠭᠡᠪᠡᠯ ᠶᠠᠭᠠᠬᠢᠬᠤ ᠪᠣᠢ? ᠰᠡᠮᠬᠡᠨ ᠤᠷᠭᠤᠬᠤ ᠤᠤ? ᠳᠣᠣᠷᠠ ᠨᠢ ᠭᠦᠢᠴᠡᠭᠡᠳ ᠪᠠᠷᠢᠵᠤ ᠠᠪᠬᠤ ᠪᠠᠢᠯᠭᠦᠢ᠃ ᠬᠠᠯᠬᠠ ᠮᠢᠴᠠᠡᠭ ᠳᠤ ᠣᠴᠢᠵᠤ ᠨᠢᠭᠤᠭᠳᠠᠬᠤ ᠤᠤ? ᠪᠠᠰᠠ ᠯᠠ ᠳᠣᠣᠷᠠ ᠪᠠᠨ ᠢᠯᠡᠷᠡᠬᠦ ᠪᠠᠢᠯᠭᠦᠢ》 ᠭᠡᠵᠦ ᠰᠠᠨᠵᠢ ᠲᠠᠯᠠ ᠪᠦᠷᠢ ᠡᠴᠡ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠬᠤ ᠳ᠋ᠤ᠌ ᠭᠠᠷᠬᠤ ᠭᠠᠵᠠᠷ ᠦᠭᠡᠢ ᠮᠡᠲᠦ ᠪᠠᠢᠯᠠ᠃
《ᠨᠠᠮᠠᠶ᠋ᠢ ᠥᠭᠡᠷᠡ ᠶᠠᠮᠠᠷ ᠠᠷᠭᠠ ᠪᠠᠷ ᠦᠭᠡᠢ ᠬᠢᠬᠦ ᠪᠣᠯ? ᠭᠤᠳᠤᠮᠵᠢᠨ ᠳ᠋ᠤ᠌ ᠶᠠᠪᠤᠵᠤ ᠪᠠᠢᠲᠠᠯᠠ ᠳᠡᠭᠡᠷᠡᠮᠴᠢᠨ ᠦ᠌ ᠳᠦᠷᠢ ᠪᠡᠷ ᠳᠠᠭᠠᠷᠢᠨ ᠶᠡᠭᠦᠳᠬᠡᠬᠦ ᠤᠤ? ᠲᠡᠭᠡᠵᠦ ᠮᠡᠳᠡᠬᠦ ᠯᠡ ᠶᠦ᠍ᠮ᠃ ᠡᠰᠡᠪᠡᠯ ᠭᠦᠷᠢᠮ ᠴᠣᠢᠷᠣᠠ ᠶ᠋ᠢᠨ ᠦᠶᠡ ᠪᠡᠷ ᠬᠣᠣᠷ ᠲᠠᠢ ᠲᠠᠷᠠᠭ ᠢᠳᠡᠭᠦᠯᠬᠦ ᠪᠣᠯᠪᠠ ᠤᠤ? ᠲᠡᠷᠡ ᠴᠦ᠍ ᠪᠠᠰᠠ ᠪᠣᠯᠬᠤ ᠯᠠ ᠶᠤᠮ᠃ ᠭᠡᠬᠦ ᠳ᠋ᠦ᠍ ᠪᠡᠨ ᠬᠣᠣᠷᠲᠠᠨ ᠦᠬᠦᠭᠰᠡᠨ ᠢ᠋ ᠬᠡᠨ ᠬᠥᠮᠦᠨ ᠦᠭᠡᠢ ᠮᠡᠳᠡᠵᠦ ᠪᠥᠭᠡᠮ ᠶᠠᠷᠢᠶᠠ ᠳᠡᠭᠳᠡᠬᠦ ᠪᠢᠵᠡ᠃ ᠲᠡᠭᠦᠨ ᠡᠴᠡ ᠰᠡᠪᠳᠡᠭᠡ ᠦᠭᠡᠢ ᠥᠭᠡᠷᠡ ᠨᠠᠷᠢᠨ ᠠᠷᠭᠠ ᠪᠣᠳᠣᠵᠤ ᠣᠯᠬᠤ ᠪᠠᠢᠯᠭᠦᠢ ᠳᠡ》 ᠭᠡᠵᠦ ᠪᠠᠰᠠ ᠪᠣᠳᠣᠯᠠ᠃ ᠶᠡᠭᠦᠳᠬᠡᠨ ᠦᠭᠡᠢ ᠪᠣᠯᠭᠠᠵᠤ ᠪᠣᠯᠬᠤ ᠪᠦᠬᠦ ᠠᠷᠭᠠ ᠶ᠋ᠢ ᠴᠥᠮ ᠢ᠋ ᠵᠢᠭᠰᠠᠭᠠᠨ ᠦᠵᠡᠭᠡᠳ ᠴᠥᠮ ᠦ᠋ᠨ ᠬᠢ ᠨᠢ ᠡᠰᠡᠷᠭᠦ ᠠᠷᠭᠠ ᠰᠢᠷᠬᠡ ᠲᠥᠯᠥᠪᠯᠡᠬᠦ ᠪᠡᠷ ᠰᠢᠢᠳᠪᠡ᠃ ᠬᠠᠮᠤᠭ ᠤ᠋ᠨ ᠡᠬᠢᠯᠡᠭᠡᠳ ᠰᠥᠨᠢ ᠤᠨᠲᠠᠵᠤ ᠪᠠᠢᠬᠤ ᠦᠶᠡ ᠪᠡᠷ ᠭᠡᠷ ᠲᠦ᠍ ᠨᠢ ᠨᠡᠪᠲᠡᠷᠡᠨ ᠣᠷᠣᠵᠤ ᠬᠥᠨᠥᠭᠡᠬᠦ ᠪᠣᠯᠵᠣᠰᠢ ᠦᠭᠡᠢ ᠠᠶᠤᠯ ᠤ᠋ᠨ ᠡᠰᠡᠷᠭᠦ ᠨᠠᠷᠢᠪᠴᠢᠯᠠᠭᠰᠠᠨ ᠠᠷᠭᠠ ᠰᠢᠷᠬᠡ ᠪᠣᠳᠣᠵᠤ ᠵᠣᠬᠢᠶᠠᠬᠤ ᠪᠠᠷ ᠣᠷᠣᠯᠳᠣᠯᠠ᠃ ᠬᠣᠶᠠᠷ ᠭᠤᠷᠪᠠᠨ ᠠᠷᠭᠠ ᠣᠯᠤᠭᠰᠠᠨ ᠠ᠋ᠴᠠ ᠨᠢᠭᠡ ᠶ᠋ᠢ ᠨᠢ ᠰᠢᠯᠢᠵᠦ ᠠᠪᠤᠯᠠ᠃ ᠲᠡᠢᠨ ᠬᠦ᠌ ᠰᠢᠨᠠᠯᠤᠭᠰᠠᠭᠠᠷ ᠪᠠᠢᠭᠠᠳ ᠪᠠᠷᠤᠭ ᠦᠷ ᠴᠦᠷ ᠢ᠋ᠶ᠋ᠡᠷ ᠪᠠᠭᠠᠬᠠᠨ ᠳᠤᠭᠭᠢᠵᠤ ᠤᠨᠲᠠᠬᠤ ᠳ᠋ᠤ᠌ ᠪᠠᠨ ᠶᠠᠳᠠᠵᠤ ᠬᠠᠷᠠ ᠳᠠᠷᠤᠵᠤ ᠵᠡᠭᠦᠳᠦᠯᠡᠨ ᠰᠡᠷᠢᠵᠡᠢ᠃
ᠮᠠᠷᠭᠠᠰᠢ ᠨᠢ ᠨᠤᠲᠤᠭ ᠪᠤᠴᠠᠬᠤ ᠳ᠋ᠤ᠌ ᠬᠡᠷᠡᠭ ᠲᠡᠢ ᠶᠠᠭᠤᠮᠠ ᠪᠠᠨ ᠵᠡᠬᠡᠵᠦ ᠪᠠᠵᠠᠭᠠᠬᠤ ᠪᠠᠷ ᠪᠤᠰᠤᠳ ᠲᠤ᠌ ᠠᠵᠢᠭᠯᠠᠭᠳᠠᠬᠤ ᠦᠭᠡᠢ ᠪᠡᠷ ᠭᠡᠷ ᠲᠦ᠍ ᠪᠡᠨ ᠨᠡᠯᠢᠶᠡᠳ ᠠᠵᠢᠯ ᠠᠮᠵᠢᠭᠤᠯᠵᠠᠢ᠃ ᠲᠡᠷᠡ ᠡᠳᠦᠷ ᠬᠤᠷᠠᠯ ᠨᠣᠮ ᠦᠭᠡᠢ ᠪᠠᠢᠭᠰᠠᠨ ᠢ᠋ ᠳᠠᠯᠢᠮᠳᠠᠭᠤᠯᠤᠨ ᠵᠢᠭᠠᠯ ᠵᠢᠭᠤᠯ ᠬᠡᠷᠡᠭ ᠢ᠋ᠶ᠋ᠡᠨ ᠪᠦᠲᠦᠭᠡᠯᠡ᠃ ᠨᠥᠭᠥᠭᠡᠳᠦᠷ ᠨᠢ ᠰᠠᠨᠵᠢ ᠬᠤᠷᠠᠯ ᠨᠣᠮ ᠳ᠋ᠤ᠌ ᠪᠠᠨ ᠣᠴᠢᠬᠤ ᠪᠠᠷ ᠶᠠᠪᠤᠵᠤ ᠪᠠᠢᠲᠠᠯᠠ ᠪᠠᠷᠠᠪᠡᠡᠭ ᠬᠡᠢᠳ ᠦ᠋ᠨ ᠭᠣᠷᠢᠯᠣᠮ ᠳ᠋ᠤ᠌ ᠣᠷᠣᠬᠤ ᠶ᠋ᠢᠨ ᠡᠮᠦᠨᠡᠬᠡᠨ ᠴᠣᠭ᠍ᠰᠤᠡᠭ ᠤᠭᠲᠤᠨ ᠢᠷᠡᠵᠦ ᠨᠢᠯᠤᠭᠤᠨ ᠢ᠋ᠶ᠋ᠠᠷ ᠢᠨᠢᠶᠡᠮᠰᠦᠭᠯᠡᠨ ᠮᠡᠨᠳᠦ ᠶ᠋ᠢ ᠮᠡᠳᠡᠵᠦ᠂
- ᡀᠠᠷᠠᠮᠪᠠ ᠰᠠᠨᠵᠢᠳᠠᠯᠪᠢᠴᠣᠢᠵᠠᠮᠰᠤ ᠲᠠᠨ ᠤ᠋ ᠠᠮᠤᠭᠤᠯᠠᠩ ᠢ᠋ ᠠᠢᠯᠠᠳᠬᠠᠶᠠ! ᠭᠡᠮᠡᠨ ᠪᠥᠬᠥᠯᠵᠡᠯᠡ᠃
- ᡀᠠᠷᠠᠮᠪᠠ ᠭᠡᠳ ᠪᠠᠢᠬᠤ ᠴᠤ᠌ ᠪᠣᠯᠤᠭᠠ ᠦᠭᠡᠢ ᠶᠦ᠍ᠮ ᠪᠢᠰᠢ ᠤᠤ? ᠭᠡᠵᠦ ᠰᠠᠨᠵᠢ ᠳᠤᠷᠠ ᠦᠭᠡᠢᠴᠡᠬᠦ ᠳ᠋ᠦ᠍ ᠴᠣᠭᠰᠣᠩ ᠬᠤᠳᠠᠯ ᠢ᠋ᠶ᠋ᠠᠷ ᠢᠨᠢᠶᠡᠵᠦ᠂
- ᠪᠣᠯᠤᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ? ᡀᠠᠰᠠ ᠵᠣᠣ ᠪᠠᠷ ᠯᠠ ᠨᠢᠭᠡ ᠶᠠᠷᠢᠵᠤ ᠪᠠᠢᠬᠤ ᠳ᠋ᠤ᠌ ᠵᠢᠡᠭ᠌ᠳᠠᠭᠠᠨ ᠤ᠋ ᠴᠢᠨᠢ ᠨᠥᠬᠥᠷ ᠶᠠᠭᠠᠬᠢᠭᠠᠳ ᠬᠡᠯᠡᠵᠦ ᠪᠣᠯᠳᠠᠭ ᠦᠭᠡᠢ ᠶᠦ᠍ᠮ ᠪᠣᠢ? ᠭᠡᠪᠡ᠃ ᠲᠡᠷᠡ ᠬᠣᠶᠠᠷ ᠬᠡᠢᠳ ᠲᠦ᠍ ᠣᠢᠷᠠᠳᠴᠤ ᠶᠠᠪᠤᠲᠠᠯᠠ ᠴᠣᠭᠰᠣᠩ᠂
- ᡀᠠᠷᠠᠮᠪᠠ ᠴᠣᠯᠠ ᠶ᠋ᠢ ᠬᠦᠷᠲᠡᠵᠦ ᠰᠠᠨᠵᠢᠳᠠᠯᠪᠢᠴᠣᠢᠵᠠᠮᠰᠤ ᠨᠡᠷᠡ ᠡᠷᠭᠦᠮᠵᠢᠯᠡᠭᠳᠡᠭᠰᠡᠨ ᠲᠠ ᠣᠳᠣ ᠪᠤᠷᠬᠠᠨ ᠤ᠋ ᠣᠷᠣᠨ ᠲᠥᠪᠡᠳ ᠭᠠᠵᠠᠷ ᠦᠷᠭᠦᠯᠵᠢᠯᠡᠨ ᠰᠠᠭᠤᠵᠤ ᠲᠥᠪᠡᠳ᠂ ᠲᠠᠩᠭᠤᠳ᠂ ᠲᠠᠪᠤᠨ ᠬᠡᠯᠡ ᠶ᠋ᠢᠨ ᠠᠮᠢᠲᠠᠳ ᠨᠣᠮ ᠵᠢᠭᠠᠨ ᠰᠣᠶᠣᠷᠬᠠᠬᠤ ᠪᠢᠵᠡ ᠳᠡ ᠭᠡᠵᠦ ᠨᠢᠭᠡᠨ ᠵᠢᠡᠭ᠌ᠳᠠᠭᠠᠨ ᠤ᠋ ᠬᠢᠨ ᠴᠢᠨᠢ ᠢᠳᠡᠭᠡᠨ ᠭᠣᠷᠢᠳᠠᠵᠤ ᠪᠠᠢᠭᠠ ᠶ᠋ᠢ ᠬᠡᠯᠡᠬᠦ ᠶᠠᠭᠤᠨ? ᠭᠡᠪᠡ᠃ ᠰᠠᠨᠵᠢ ᠲᠡᠭᠦᠨ ᠦ᠌ ᠦᠭᠡᠨ ᠳ᠋ᠦ᠍ ᠰᠡᠵᠢᠭ ᠲᠥᠷᠥᠵᠦ᠂
- ᠲᠥᠷᠥᠭᠰᠡᠨ ᠨᠤᠲᠤᠭ᠂ ᠲᠥᠷᠥᠭᠦᠯᠦᠭᠰᠡᠨ ᠡᠴᠢᠭᠡ ᠡᠬᠡ ᠪᠡᠨ ᠬᠠᠷᠠᠭᠰᠠᠨ ᠦᠭᠡᠢ ᠪᠦᠬᠦᠯᠢ ᠪᠦᠲᠦᠨ ᠦᠶᠡ ᠥᠩᠭᠡᠷᠡᠯᠡ᠃ ᠡᠷᠳᠡᠮ ᠦ᠋ᠨ ᠮᠥᠷ ᠬᠥᠭᠡᠭᠡᠵᠦ ᠰᠠᠭᠤᠭᠰᠠᠭᠠᠷ ᠶᠡᠬᠡ ᠴᠢᠯᠡᠯᠡ᠃ ᠨᠤᠲᠤᠭ ᠣᠷᠣᠨ ᠲᠥᠷᠥᠯ ᠲᠥᠷᠥᠭᠰᠡᠳ ᠦ᠋ᠨ ᠢ᠋ᠶ᠋ᠡᠨ ᠪᠠᠷᠠ ᠶ᠋ᠢ ᠨᠢᠭᠡᠨ ᠤᠳᠠᠭᠠ ᠳ᠋ᠠᠭᠠᠨ ᠡᠷᠭᠢᠵᠦ ᠬᠠᠷᠠᠭᠠᠳ ᠪᠤᠴᠠᠵᠤ ᠢᠷᠡᠳᠡᠭ ᠶᠦ᠍ᠮ ᠪᠢᠯᠢᠤ ᠳᠠ ᠭᠡᠵᠦ ᠪᠣᠳᠣᠬᠤ ᠶᠤᠮ ᠬᠡᠮᠡᠬᠦ ᠳ᠋ᠦ᠍᠂
- ᠨᠤᠲᠤᠭ ᠶᠠᠪᠤᠬᠤ ᠭᠡᠳᠡᠭ ᠴᠢᠨᠢ ᠪᠤᠷᠤᠭᠤ ᠦᠭᠡᠢ᠃ ᠭᠡᠬᠦ ᠳ᠋ᠦ᠍ ᠪᠡᠨ ᠡᠷᠭᠢᠵᠦ ᠢᠷᠡᠨᠡ ᠪᠢᠵᠡ ᠳᠡ᠃ ᠲᠡᠭᠡᠬᠦ ᠦᠭᠡᠢ ᠪᠣᠯ ᠵᠢᠡᠭ᠌ᠳᠠᠭᠠᠨ ᠤ᠋ ᠬᠢᠨ ᠪᠢᠳᠡ ᠴᠢᠨᠢ ᠥᠨᠥᠴᠢᠷᠡᠨᠡ ᠰᠢᠦ ᠳᠡ ᠭᠡᠵᠦ ᠴᠣᠭᠰᠣᠩ ᠶᠠᠷᠢᠯᠠ᠃ ᠲᠡᠭᠡᠭᠡᠳ ᠰᠦᠮᠡ ᠶ᠋ᠢᠨ ᠡᠭᠦᠳᠡ ᠬᠦᠷᠲᠡᠯᠡ ᠲᠡᠳᠡ ᠳᠠᠭᠤ ᠦᠭᠡᠢ ᠶᠠᠪᠤᠵᠠᠭᠠᠯᠠ᠃ ᠰᠦᠮᠡ ᠳ᠋ᠦ᠍ ᠣᠷᠣᠬᠤ ᠶ᠋ᠢᠨ ᠡᠮᠦᠨᠡ ᠴᠣᠭᠰᠣᠩ᠂
- ᠦᠨᠡᠬᠡᠷ ᠴᠢ ᠨᠤᠲᠤᠭ ᠶᠠᠪᠤᠬᠤ ᠪᠠᠷ ᠰᠢᠢᠳᠦᠭᠡ ᠤᠤ? ᠬᠡᠵᠢᠶᠡ? ᠭᠡᠵᠦ ᠲᠤᠯᠭᠠᠨ ᠠᠰᠠᠭᠤᠵᠠᠢ᠃ ᠲᠡᠷᠡ ᠴᠦ᠍ ᠠᠷᠭᠠ ᠦᠭᠡᠢ ᠯᠡ ᠰᠡᠵᠢᠭ ᠲᠥᠷᠥᠭᠦᠯᠦᠭᠰᠡᠨ ᠠᠰᠠᠭᠤᠯᠲᠠ ᠪᠠᠢᠪᠠ᠃
- ᠤᠳᠠᠬᠤ ᠦᠭᠡᠢ ᠶᠠᠪᠤᠨᠠ᠃ ᠭᠡᠬᠦ ᠳ᠋ᠦ᠍ ᠪᠡᠨ ᠪᠢ ᠡᠷᠭᠢᠵᠦ ᠢᠷᠡᠨᠡ ᠰᠢᠦ ᠳᠡ! ᠭᠡᠵᠦ ᠰᠠᠨᠵᠢ ᠬᠠᠶᠠᠭᠠ ᠪᠠᠨ ᠮᠠᠨᠠᠭᠰᠠᠨ ᠦᠭᠡ ᠬᠡᠯᠡᠪᠡ᠃《ᠫᠠᠭᠰᠠᠩ ᠤ᠋ᠨ ᠬᠡᠯᠡᠳᠡᠭ ᠦᠨᠡᠨ ᠪᠣᠯᠤᠯᠠ᠃ ᠡᠨᠡ ᠴᠣᠭᠰᠣᠩ ᠨᠠᠮᠠᠶ᠋ᠢ ᠨᠤᠲᠤᠭ ᠪᠤᠴᠠᠬᠤ ᠡᠰᠡᠬᠦ ᠶ᠋ᠢ ᠲᠡᠩᠨᠡᠵᠦ ᠶᠠᠪᠤᠨᠠ》 ᠭᠡᠵᠦ ᠰᠠᠨᠵᠢ ᠰᠡᠵᠢᠭᠯᠡᠨ ᠪᠣᠳᠣᠯᠠ᠃
ᠲᠡᠷᠡ ᠰᠥᠨᠢ ᠡᠴᠡ ᠡᠬᠢᠯᠡᠨ ᠪᠣᠯᠭᠣᠮᠵᠢᠲᠠᠢ ᠪᠠᠢᠬᠤ ᠪᠠᠷ ᠰᠠᠨᠵᠢ ᠰᠢᠢᠳᠦᠯᠡ᠃ ᠰᠥᠨᠢᠵᠢᠨ ᠵᠤᠯᠠ ᠲᠠᠢ ᠤᠨᠲᠠᠳᠠᠭ ᠪᠣᠯᠪᠠ᠃ ᠲᠤᠭᠤᠯ ᠤ᠋ᠨ ᠠᠷᠠᠰᠤ ᠪᠠᠷ ᠬᠢᠭᠰᠡᠨ ᠲᠤᠯᠤᠮ ᠲᠠᠢ ᠵᠠᠮᠪᠠᠭᠠ ᠭᠤᠯᠢᠷ ᠢ᠋ᠶ᠋ᠠᠨ ᠳᠦᠭᠦᠷᠭᠡᠵᠦ ᠠᠮᠠ ᠶ᠋ᠢ ᠨᠢ ᠪᠣᠭᠣᠯᠠ᠃ ᠲᠡᠭᠡᠭᠡᠳ ᠬᠥᠨᠵᠢᠯᠡ ᠳᠣᠲᠣᠷᠠ ᠪᠠᠨ ᠬᠢᠵᠦ ᠬᠤᠴᠢᠪᠠ᠃ ᠵᠤᠯᠠ ᠶ᠋ᠢᠨ ᠭᠡᠷᠡᠯ ᠳ᠋ᠦ᠍ ᠶᠠᠭ ᠯᠠ ᠬᠥᠮᠦᠨ ᠤᠨᠲᠠᠵᠤ ᠪᠠᠢᠭᠠ ᠶᠤᠮ ᠰᠢᠭ᠋ ᠬᠠᠷᠠᠭᠳᠠᠬᠤ ᠪᠠᠷ ᠵᠠᠰᠠᠯᠠ᠃ ᠥᠪᠡᠷ ᠢ᠋ᠶ᠋ᠡᠨ ᠰᠢᠲᠦᠭᠡᠨ ᠦ᠌ ᠰᠢᠷᠡᠭᠡᠨ ᠳᠣᠣᠭᠤᠷ ᠣᠷᠣᠵᠤ ᠰᠠᠭᠤᠭᠠ ᠪᠠᠷ ᠢ᠋ᠶ᠋ᠠᠨ ᠤᠨᠲᠠᠬᠤ ᠪᠠᠢᠷᠢ ᠵᠠᠰᠠᠵᠤ᠂ ᠭᠦᠡᠭ᠌ᠭᠠᠷᠪᠠ ᠲᠠᠢ ᠰᠢᠷᠡᠭᠡᠨ ᠦ᠌ ᠤᠷᠢᠳᠤ ᠤᠷᠤᠭᠤ ᠤᠨᠵᠢᠭᠤᠯᠤᠭᠰᠠᠨ ᠴᠠᠮᠪᠠᠨ ᠬᠥᠰᠢᠭᠡᠨ ᠦ᠌ ᠪᠠᠷᠠᠭᠤᠨ ᠥᠨᠴᠥᠭ ᠲᠦ᠍ ᠨᠢ ᠦᠯᠦ ᠮᠡᠳᠡᠭᠳᠡᠬᠦ ᠵᠢᠵᠢᠭᠬᠡᠨ ᠨᠦᠬᠡ ᠭᠠᠷᠭᠠᠯᠠ᠃ ᠠᠩᠬᠠᠨ ᠤ᠋ ᠰᠥᠨᠢ ᠶᠠᠭᠤ ᠴᠤ᠌ ᠪᠣᠯᠤᠭᠰᠠᠨ ᠦᠭᠡᠢ᠃ ᠰᠠᠨᠵᠢ ᠰᠢᠲᠦᠭᠡᠨ ᠦ᠌ ᠪᠡᠨ ᠥᠨᠳᠥᠷ ᠰᠢᠷᠡᠭᠡᠨ ᠳᠣᠣᠭᠤᠷ ᠣᠷᠣᠵᠤ ᠰᠠᠭᠤᠭᠠ ᠪᠠᠷ ᠢ᠋ᠶ᠋ᠠᠨ ᠬᠣᠨᠣᠯᠠ᠃ ᠲᠤᠷᠭᠢᠮ ᠤ᠋ᠨ ᠳᠡᠭᠡᠷᠡᠬᠢ ᠵᠤᠯᠠ ᠶ᠋ᠢᠨ ᠪᠦᠳᠡᠭᠢ ᠭᠡᠷᠡᠯ ᠳ᠋ᠦ᠍ ᠰᠢᠮᠠᠬᠠᠨ ᠳᠣᠲᠣᠷᠠᠬᠢ ᠶᠠᠭᠤᠮᠠ ᠪᠦᠬᠦᠨ ᠢᠯᠭᠠᠭᠳᠠᠬᠤ ᠲᠡᠳᠦᠢ ᠭᠡᠷᠡᠯᠲᠡᠢ ᠬᠠᠷᠠᠭᠳᠠᠨᠠ᠃ ᠴᠠᠮᠪᠠᠨ ᠤᠨᠵᠢᠯᠭᠠᠨ ᠤ᠋ ᠪᠠᠷᠠᠭᠤᠨ ᠳᠡᠭᠡᠳᠦ ᠥᠨᠴᠥᠭ ᠲᠡᠬᠢ ᠦᠯᠦ ᠶᠠᠯᠢᠬᠠᠨ ᠵᠢᠵᠢᠭ ᠨᠦᠬᠡ ᠪᠡᠷ ᠬᠠᠷᠠᠬᠤ ᠳ᠋ᠤ᠌ ᠰᠢᠮᠠᠬᠠᠨ ᠳᠣᠲᠣᠷᠠᠬᠢ ᠶᠠᠭᠤᠮᠠᠰ ᠴᠥᠮ ᠪᠠᠭᠲᠠᠨ ᠦᠵᠡᠭᠳᠡᠵᠦ ᠪᠠᠢᠯᠠ᠃
ᠲᠡᠷᠡᠴᠢᠯᠡᠨ ᠢ᠋ᠶ᠋ᠡᠷ ᠭᠤᠷᠪᠠᠨ ᠰᠥᠨᠢ ᠥᠩᠭᠡᠷᠡᠯᠡ᠃ ᠶᠠᠮᠠᠷ ᠨᠢᠭᠡᠨ ᠠᠶᠤᠯᠲᠠᠢ ᠶᠠᠭᠤᠮᠠ ᠲᠣᠬᠢᠶᠠᠯᠳᠤᠭᠰᠠᠨ ᠦᠭᠡᠢ᠃ ᠰᠠᠨᠵᠢ ᠭᠠᠳᠠᠭᠤᠷ ᠭᠠᠷᠬᠤ ᠳ᠋ᠤ᠌ ᠪᠠᠨ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠶᠠᠪᠤᠬᠤ ᠦᠭᠡᠢ ᠶ᠋ᠢ ᠬᠢᠴᠢᠶᠡᠵᠦ ᠪᠠᠢᠯᠠ᠃ ᠪᠠᠰᠠ ᠱᠣᠭᠠ ᠴᠣᠢᠷᠣᠠ ᠭᠡᠳᠡᠭ ᠥᠷᠯᠥᠭᠡᠨ ᠦ᠌ ᠤᠩᠰᠢᠯᠭᠠ᠂ ᠭᠦᠨᠴᠢᠭ ᠴᠣᠢᠷᠣᠠ ᠭᠡᠳᠡᠭ ᠡᠳᠦᠷ ᠦ᠋ᠨ ᠤᠩᠰᠢᠯᠭᠠ᠂ ᠭᠦᠷᠢᠮ ᠴᠣᠢᠷᠣᠠ ᠭᠡᠳᠡᠭ ᠣᠷᠣᠢ ᠶ᠋ᠢᠨ ᠤᠩᠰᠢᠯᠭᠠ ᠶ᠋ᠢᠨ ᠳᠠᠷᠠᠭᠠ ᠮᠠᠩᠵᠠ᠂ ᠭᠣᠡᠭ᠌ᠵᠠ ᠶ᠋ᠢᠨ ᠠᠯᠢᠨ ᠢ᠋ ᠴᠦ᠍ ᠠᠮᠠᠨ ᠳ᠋ᠤ᠌ ᠪᠠᠨ ᠬᠦᠷᠭᠡᠬᠦ ᠦᠭᠡᠢ ᠪᠠᠢᠯᠠ᠃ ᠲᠡᠷᠡ ᠬᠣᠭᠣᠷᠣᠨᠳᠣ ᠨᠤᠲᠤᠭ ᠪᠤᠴᠠᠬᠤ ᠪᠦᠬᠦ ᠪᠡᠯᠡᠳᠬᠡᠯ ᠢ᠋ ᠬᠢᠵᠦ ᠬᠠᠯᠬᠠ ᠮᠢᠽᠠᠨ ᠤ᠋ ᠨᠢᠭᠡ ᠨᠠᠢᠵᠠ ᠲᠠᠢ ᠪᠠᠨ ᠬᠠᠮᠲᠤᠷᠠᠨ ᠶᠠᠪᠤᠬᠤ ᠪᠠᠷ ᠪᠡᠯᠡᠳᠴᠡᠢ᠃
᠁ ᠳᠥᠷᠪᠡᠳᠡᠬᠢ ᠰᠥᠨᠢ ᠳᠤᠮᠳᠠ ᠪᠠᠨ ᠣᠷᠣᠵᠤ ᠪᠠᠢᠯᠠ᠃ ᠰᠠᠨᠵᠢ ᠶ᠋ᠢᠨ ᠨᠣᠢᠷ ᠶᠡᠬᠡ ᠠᠮᠠᠷᠬᠠᠨ ᠬᠤᠯᠵᠢᠳᠠᠭ ᠪᠣᠯᠤᠭᠠᠳ ᠪᠠᠢᠭᠰᠠᠨ ᠦᠶᠡ ᠪᠢᠯᠡ᠃ ᠬᠡᠨ ᠨᠢᠭᠡᠨ ᠬᠥᠮᠦᠨ ᠬᠠᠰᠢᠶᠠ ᠶ᠋ᠢ ᠨᠢ ᠳᠠᠪᠠᠬᠤ ᠰᠢᠭ᠋ ᠪᠣᠯᠬᠤ ᠳ᠋ᠤ᠌ ᠰᠠᠨᠵᠢ ᠰᠡᠷᠡᠵᠦ ᠴᠢᠮᠡᠭᠡ ᠴᠢᠩᠨᠠᠪᠠ᠃ ᠳᠠᠬᠢᠭᠠᠳ ᠨᠢᠭᠡ ᠬᠥᠮᠦᠨ ᠬᠠᠰᠢᠶᠠ ᠳᠠᠪᠠᠬᠤ ᠰᠢᠭ᠋ ᠪᠣᠯᠤᠯᠠ᠃ ᠵᠢᠭᠠᠬᠠᠨ ᠪᠠᠢᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠭᠤᠷᠪᠠᠳᠠᠬᠢ ᠬᠥᠮᠦᠨ ᠬᠠᠰᠢᠶᠠ ᠳᠠᠪᠠᠨ ᠣᠷᠣᠵᠤ ᠢᠷᠡᠬᠦ ᠰᠢᠭ ᠪᠣᠯᠤᠯᠠ᠃ ᠰᠠᠨᠵᠢ ᠰᠢᠲᠦᠭᠡᠨ ᠳᠣᠣᠭᠤᠷ ᠢ᠋ᠶ᠋ᠠᠨ ᠵᠠᠪᠢᠯᠠᠨ ᠰᠠᠭᠤᠭᠰᠠᠨ ᠴᠢᠭ ᠲᠦ᠍ ᠪᠡᠨ ᠴᠢᠮᠡᠭᠡ ᠴᠢᠩᠨᠠᠵᠤ᠂ ᠪᠠᠷᠠᠭᠤᠨ ᠭᠠᠷ ᠲᠤ᠌ ᠪᠠᠨ ᠭᠤᠷᠪᠠᠨ ᠦᠵᠦᠭᠦᠷ ᠲᠡᠢ ᠵᠡᠰᠦᠮ ᠪᠠᠷᠢᠭᠠᠳ ᠬᠦᠯᠢᠶᠡᠵᠦ ᠰᠠᠭᠤᠯᠠ᠃ ᠬᠠᠰᠢᠶᠠ ᠳᠠᠪᠠᠭᠰᠠᠨ ᠬᠥᠮᠦᠰ ᠰᠡᠮᠡᠭᠡᠷᠬᠡᠨ ᠭᠡᠲᠡᠬᠦ ᠮᠠᠢᠭ ᠢ᠋ᠶ᠋ᠠᠷ ᠶᠠᠪᠤᠵᠠᠭᠠᠵᠤ ᠪᠠᠢᠬᠤ ᠶ᠋ᠢ ᠰᠠᠨᠵᠢ ᠶᠡᠬᠡ ᠯᠡ ᠲᠣᠳᠣ ᠰᠣᠨᠣᠰᠴᠤ᠂ ᠠᠢᠳᠠᠰ ᠨᠢ ᠬᠦᠷᠬᠦ ᠰᠢᠭ ᠪᠣᠯᠤᠯᠠ᠃ ᠬᠠᠭᠠᠯᠭᠠ ᠨᠢ ᠲᠤᠩ ᠠᠶᠠᠷᠬᠠᠨ ᠨᠡᠭᠡᠭᠡᠭᠳᠡᠬᠦ ᠶ᠋ᠢ ᠪᠠᠰᠠ ᠮᠡᠳᠡᠷᠡᠪᠡ᠃ ᠴᠠᠮᠪᠠᠨ ᠤᠨᠵᠢᠯᠭᠠᠨ ᠤ᠋ ᠪᠠᠷᠠᠭᠤᠨ ᠳᠡᠭᠡᠳᠦ ᠬᠡᠰᠡᠭ ᠲᠡᠬᠢ ᠵᠢᠵᠢᠭᠬᠡᠨ ᠨᠦᠬᠡ ᠪᠡᠷ ᠰᠠᠨᠵᠢ ᠠᠵᠢᠭᠯᠠᠵᠤ ᠪᠠᠢᠯᠠ᠃ ᠥᠨᠥᠴᠢᠨ ᠵᠤᠯᠠ ᠶ᠋ᠢᠨ ᠭᠡᠷᠡᠯ ᠳ᠋ᠦ᠍ ᠰᠢᠮᠠᠬᠠᠨ ᠳᠣᠲᠣᠷᠠᠬᠢ ᠪᠦᠳᠡᠭᠢᠬᠡᠨ ᠬᠠᠷᠠᠭᠳᠠᠵᠤ ᠪᠠᠢᠪᠠ᠃ ᠭᠤᠷᠪᠠᠨ ᠬᠥᠮᠦᠨ ᠴᠤᠪᠤᠨ ᠣᠷᠣᠵᠤ ᠢᠷᠡᠯᠡ᠃ ᠰᠠᠨᠵᠢ ᠵᠣᠯ ᠲᠠᠢ ᠯᠠ ᠳᠠᠭᠤ ᠠᠯᠳᠠᠴᠢᠬᠠᠭᠰᠠᠨ ᠦᠭᠡᠢ᠃ ᠤᠴᠢᠷ ᠨᠢ ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠨ ᠳ᠋ᠦ᠍ ᠨᠠᠢᠷᠰᠠᠭ ᠨᠠᠢᠵᠠ ᠴᠣᠭᠰᠣᠩ ᠨᠢ ᠣᠷᠣᠵᠤ ᠢᠷᠡᠵᠡᠢ᠃ ᠲᠡᠭᠦᠨ ᠦ᠌ ᠦᠷᠭᠦᠯᠵᠢ ᠢᠨᠢᠶᠡᠪᠬᠢᠯᠡᠵᠦ ᠶᠠᠪᠤᠳᠠᠭ ᠰᠢᠷᠠᠮᠠᠨ ᠴᠢᠷᠠᠢ ᠨᠢ ᠠᠶᠤᠮᠰᠢᠭᠲᠠᠢ ᠲᠣᠭᠰᠢᠨ ᠪᠠᠢᠳᠠᠯ ᠲᠠᠢ ᠪᠣᠯᠤᠭᠰᠠᠨ ᠬᠠᠷᠠᠭᠳᠠᠪᠠ᠃ ᠬᠠᠴᠢᠨ ᠪᠠᠷᠠᠭᠠᠨ ᠬᠤᠪᠴᠠᠰᠤ ᠡᠮᠦᠰᠦᠭᠡᠳ ᠨᠢᠭᠤᠷ ᠤᠷᠤᠭᠤ ᠪᠠᠨ ᠬᠠᠷᠠ ᠬᠢᠯᠭᠠᠰᠤᠨ ᠰᠠᠩᠭᠠᠰᠪᠠ ᠤᠨᠵᠢᠭᠤᠯᠵᠠᠢ᠃ ᠲᠡᠷᠡ ᠲᠣᠯᠣᠭᠠᠢ ᠶ᠋ᠢ ᠪᠡᠨ ᠭᠡᠳᠡᠷᠭᠦ ᠰᠠᠪᠠᠵᠤ ᠰᠠᠩᠭᠠᠰᠪᠠ ᠶ᠋ᠢ ᠪᠡᠨ ᠳᠤᠬᠤᠨ ᠳᠡᠭᠡᠭᠦᠷ ᠢ᠋ᠶ᠋ᠡᠨ ᠬᠣᠢᠰᠢ ᠨᠢ ᠰᠡᠬᠦᠵᠦ ᠨᠢᠭᠤᠷ ᠢ᠋ᠶ᠋ᠠᠨ ᠢᠯᠡ ᠭᠠᠷᠭᠠᠭᠠ ᠦᠭᠡᠢ ᠪᠣᠯ ᠰᠠᠨᠵᠢ ᠲᠠᠨᠢᠬᠤ ᠦᠭᠡᠢ ᠥᠩᠭᠡᠷᠡᠵᠦ ᠪᠣᠯᠬᠤ ᠠᠵᠠᠢ᠃ ᠤᠷᠲᠤ ᠭᠡᠭᠴᠢ ᠶ᠋ᠢᠨ ᠰᠡᠯᠡᠮᠡ ᠪᠥᠰᠡᠨ ᠡᠴᠡ ᠪᠡᠨ ᠵᠡᠭᠦᠵᠡᠢ᠃ ᠲᠡᠭᠦᠨ ᠦ᠌ ᠪᠡᠨ ᠡᠰᠢᠨ ᠡᠴᠡ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠳᠬᠤᠭᠰᠠᠨ ᠪᠠᠢᠯᠠ᠃ ᠬᠣᠢᠨᠠ ᠠ᠋ᠴᠠ ᠨᠢ ᠳᠠᠭᠠᠵᠤ ᠢᠷᠡᠭᠰᠡᠨ ᠬᠣᠶᠠᠷ ᠬᠥᠮᠦᠨ ᠨᠢ ᠣᠭᠲᠣ ᠲᠠᠨᠢᠬᠤ ᠦᠭᠡᠢ ᠤᠯᠤᠰ ᠪᠠᠢᠯᠠ᠃ ᠲᠡᠷᠡ ᠭᠤᠷᠪᠠ ᠡᠩᠨᠡᠨ ᠵᠣᠭᠰᠣᠯᠠ᠃ ᠲᠡᠭᠡᠮᠡᠭᠴᠡ ᠭᠤᠷᠪᠠᠭᠤᠯᠠ ᠪᠠᠨ ᠠᠮᠠᠨ ᠳᠣᠲᠣᠷᠠ ᠪᠠᠨ ᠮᠠᠨᠢ ᠰᠢᠪᠡᠨᠡᠨ ᠤᠩᠰᠢᠪᠠ᠃ ᠳᠠᠷᠠᠭᠠ ᠨᠢ ᠴᠣᠭᠰᠣᠩ ᠰᠡᠯᠡᠮᠡ ᠪᠡᠨ ᠭᠡᠷ ᠡᠴᠡ ᠨᠢ ᠰᠤᠭᠤᠯᠤᠨ ᠠᠪᠬᠤ ᠶ᠋ᠢ ᠰᠠᠨᠵᠢ ᠵᠤᠯᠠ ᠶ᠋ᠢᠨ ᠪᠦᠳᠡᠭᠢ ᠭᠡᠷᠡᠯ ᠳ᠋ᠦ᠍ ᠲᠣᠳᠣ ᠬᠠᠷᠠᠯᠠ᠃ ᠪᠣᠯᠣᠳ ᠲᠡᠮᠦᠷ ᠢᠯᠳᠦ ᠨᠢ ᠭᠢᠯᠠᠰᠬᠢᠨ ᠬᠠᠷᠠᠭᠳᠠᠬᠤ ᠲᠡᠷᠡ ᠮᠥᠴᠡ ᠳ᠋ᠦ᠍ ᠰᠠᠨᠵᠢ ᠶ᠋ᠢᠨ ᠳᠣᠲᠣᠷᠠ ᠫᠠᠯᠬᠢᠬᠤ ᠰᠢᠭ᠋ ᠪᠣᠯᠤᠯᠠ᠃ ᠴᠣᠭᠰᠣᠩ ᠰᠡᠯᠡᠮᠡ ᠪᠡᠨ ᠪᠠᠷᠠᠭᠤᠨ ᠭᠠᠷ ᠲᠤ᠌ ᠪᠠᠨ ᠡᠷᠭᠦᠵᠦ᠂ ᠰᠠᠨᠵᠢ ᠶ᠋ᠢᠨ ᠣᠷᠣᠨ ᠳᠠᠰᠢ ᠬᠤᠯᠤᠭᠠᠨᠠ ᠳ᠋ᠤ᠌ ᠭᠡᠲᠡᠭᠰᠡᠨ ᠮᠤᠤᠷ ᠰᠢᠭ᠋ ᠰᠠᠮ ᠰᠠᠮ ᠠᠯᠬᠤᠨ ᠣᠢᠷᠠᠳᠴᠤ ᠣᠴᠢᠭᠠᠳ ᠭᠤᠷᠪᠠᠨ ᠤᠳᠠᠭᠠ ᠲᠣᠬᠢᠬᠤ ᠰᠢᠭ᠋ ᠪᠣᠯᠪᠠ᠃ ᠰᠡᠭᠦᠯᠴᠢ ᠶ᠋ᠢᠨ ᠬᠢ ᠳ᠋ᠦ᠍ ᠨᠢ ᠪᠢᠲᠡᠭᠦᠦ ᠲᠦᠩᠰᠢᠬᠦ ᠮᠡᠲᠦ ᠴᠢᠮᠡᠭᠡ ᠭᠠᠷᠤᠯᠠ᠃ ᠴᠣᠭᠰᠣᠩ ᠲᠡᠷᠡ ᠭᠤᠷᠪᠠ ᠳᠠᠬᠢᠨ ᠮᠠᠨᠢ ᠤᠩᠰᠢᠵᠤ᠂ ᠭᠤᠷᠪᠠᠨᠲᠠ ᠵᠠᠯᠪᠠᠷᠢᠯ ᠦᠢᠯᠡᠳᠦᠭᠡᠳ ᠰᠠᠮ ᠰᠠᠮ ᠠᠯᠬᠤᠯᠠᠨ ᠭᠠᠷᠴᠤ ᠶᠠᠪᠤᠵᠠᠭᠠᠯᠠ᠃ ᠪᠦᠬᠦ ᠪᠡᠶᠡ ᠡᠴᠡ ᠨᠢ ᠬᠦᠢᠲᠡᠨ ᠬᠥᠯᠥᠰᠥ ᠭᠠᠷᠴᠤ ᠪᠠᠢᠬᠤ ᠶ᠋ᠢ ᠰᠠᠨᠵᠢ ᠮᠡᠳᠡᠵᠦ᠂ ᠠᠶᠤᠵᠤ ᠲᠡᠪᠡᠳᠡᠨ᠂ ᠪᠡᠶᠡ ᠪᠡᠨ ᠪᠠᠷᠢᠭᠰᠠᠨ ᠬᠦᠯᠢᠶᠡᠭᠰᠡᠨ ᠡᠴᠡ ᠪᠡᠨ ᠰᠠᠢ ᠯᠠ ᠮᠤᠯᠲᠤᠷᠠᠬᠤ ᠰᠢᠭ᠋ ᠪᠣᠯᠵᠠᠢ᠃《ᠬᠠᠮᠤᠭ ᠤ᠋ᠨ ᠰᠠᠢᠨ ᠨᠠᠢᠵᠠ ᠰᠢᠭ᠋ ᠮᠢᠨᠢ ᠨᠠᠭᠠᠯᠳᠤᠵᠤ ᠪᠠᠢᠭᠰᠠᠨ ᠥᠨᠥᠬᠢ ᠴᠣᠭᠰᠣᠩ ᠭᠠᠢᠬᠠᠯ ᠯᠠ ᠨᠠᠮᠠᠶ᠋ᠢ ᠪᠠᠨ ᠬᠥᠨᠥᠭᠡᠬᠦ ᠪᠡᠷ ᠢᠷᠡᠳᠡᠭ ᠪᠠᠢᠨᠠ ᠰᠢᠦ! ᠭᠡᠲᠡᠯᠡ ᠬᠠᠮᠤᠭ ᠤ᠋ᠨ ᠮᠠᠭᠤ ᠨᠠᠢᠵᠠ ᠰᠢᠭ᠋ ᠪᠠᠢᠭᠰᠠᠨ ᠫᠠᠭ᠍ᠰᠠᠡᠭ ᠪᠣᠯᠬᠣᠷ ᠨᠠᠮᠠᠶ᠋ᠢ ᠪᠠᠨ ᠠᠪᠤᠷᠠᠬᠤ ᠭᠡᠵᠦ ᠪᠣᠳᠣᠵᠤ ᠶᠠᠪᠤᠳᠠᠭ ᠪᠠᠢᠨᠠ ᠰᠢᠦ! ᠣᠷᠴᠢᠯᠠᠩ ᠭᠡᠳᠡᠭ ᠡᠢᠮᠦ ᠠᠵᠠᠢ᠃ ᠡᠷᠭᠢᠵᠦ ᠬᠥᠷᠪᠡᠵᠦ ᠪᠠᠢᠳᠠᠭ ᠪᠠᠢᠵᠠᠢ!》 ᠭᠡᠵᠦ ᠰᠠᠨᠵᠢ ᠪᠣᠳᠣᠭᠠᠳ ᠰᠢᠲᠦᠭᠡᠨ ᠦ᠌ ᠰᠢᠷᠡᠭᠡᠨ ᠳᠣᠣᠭᠤᠷ ᠠ᠋ᠴᠠ ᠭᠠᠷᠴᠤ ᠴᠢᠮᠡᠭᠡ ᠴᠢᠩᠨᠠᠪᠠ᠃ ᠢᠷᠡᠭᠰᠡᠨ ᠬᠥᠮᠦᠰ ᠬᠠᠰᠢᠶᠠ ᠳᠠᠪᠠᠭᠠᠳ ᠴᠢᠮᠡᠭᠡ ᠰᠤᠷᠠᠭ ᠦᠭᠡᠢ ᠠᠯᠠᠭᠠ ᠪᠤᠯᠵᠠᠭᠠᠯᠠ᠃
ᠰᠠᠨᠵᠢ ᠪᠣᠯᠭᠣᠮᠵᠢᠲᠠᠢ ᠠᠯᠬᠤᠯᠠᠨ ᠣᠷᠣᠨ ᠤ᠋ ᠪᠠᠨ ᠳᠡᠷᠭᠡᠳᠡ ᠣᠴᠢᠭᠠᠳ ᠬᠥᠨᠵᠢᠯᠡ ᠪᠡᠨ ᠰᠡᠬᠦᠨ ᠦᠵᠡᠪᠡᠯ ᠲᠤᠯᠤᠮ ᠲᠠᠢ ᠵᠠᠮᠪᠠᠭᠠ ᠭᠤᠷᠪᠠᠨ ᠭᠠᠵᠠᠷ ᠢ᠋ᠶ᠋ᠠᠷ ᠬᠠᠭᠠᠰ ᠵᠦᠰᠦᠭᠳᠡᠭᠡᠳ ᠳᠣᠲᠣᠷᠠᠬᠢ ᠭᠤᠯᠢᠷ ᠨᠢ ᠭᠣᠭᠣᠵᠢᠵᠤ ᠪᠠᠢᠬᠤ ᠶ᠋ᠢ ᠣᠯᠵᠤ ᠬᠠᠷᠠᠭᠠᠳ 《ᠪᠢ ᠡᠨᠳᠡ ᠪᠠᠢᠭᠰᠠᠨ ᠪᠣᠯ ᠢᠩᠭᠢᠭᠡᠳ ᠯᠡ ᠭᠤᠷᠪᠠᠨ ᠬᠦᠷᠳᠦ ᠪᠡᠷ ᠢ᠋ᠶ᠋ᠡᠨ ᠳᠡᠰ ᠴᠠᠪᠴᠢᠭᠳᠠᠭᠠᠳ ᠥᠩᠭᠡᠷᠡᠬᠦ ᠪᠠᠢᠵᠠᠢ》 ᠭᠡᠵᠦ ᠪᠣᠳᠣᠭᠠᠳ ᠰᠠᠨᠵᠢ ᠠᠶᠤᠨ ᠵᠢᠬᠡᠭᠦᠳᠡᠰᠦ ᠬᠦᠷᠬᠦ ᠰᠢᠭ ᠪᠣᠯᠤᠯᠠ᠃
ᠲᠡᠷᠡ ᠳᠠᠷᠤᠢ ᠲᠤᠯᠤᠮ ᠲᠠᠢ ᠭᠤᠯᠢᠷ ᠢ᠋ᠶ᠋ᠠᠨ ᠣᠷᠣᠨ ᠳᠣᠲᠣᠷᠠ ᠠ᠋ᠴᠠ ᠪᠠᠨ ᠭᠠᠷᠭᠠᠨ ᠰᠢᠭᠤᠳᠠᠢ ᠳ᠋ᠤ᠌ ᠳᠠᠯᠳᠠ ᠬᠢᠯᠡ᠃《ᠮᠠᠷᠭᠠᠰᠢ ᠥᠷᠯᠥᠭᠡ ᠯᠡ ᠡᠳᠡ ᠨᠠᠷ ᠡᠭᠦᠪᠡᠷ ᠢᠷᠡᠵᠦ ᠰᠢᠨᠵᠢᠯᠡᠨ ᠰᠢᠯᠭᠠᠨᠠ᠃ ᠲᠡᠭᠡᠭᠡᠳ ᠨᠠᠮᠠᠶ᠋ᠢ ᠠᠮᠢᠳᠤ ᠦᠯᠡᠳᠡᠭᠰᠡᠨ ᠢ᠋ ᠮᠡᠳᠡᠪᠡᠯ ᠮᠥᠷᠳᠡᠨ ᠬᠥᠭᠡᠭᠡᠵᠦ ᠡᠬᠢᠯᠡᠨᠡ᠃ ᠡᠢᠮᠦ ᠳ᠋ᠦ᠍ ᠤᠯᠠ ᠮᠥᠷ ᠢ᠋ ᠰᠠᠶᠢᠲᠤᠷ ᠪᠠᠯᠠᠯᠬᠤ ᠨᠢ ᠵᠥᠪ》ᠭᠡᠵᠦ ᠰᠠᠨᠵᠢ ᠪᠣᠳᠣᠭᠠᠳ ᠱᠠᠯᠠᠮᠠᠭᠠᠢᠯᠠᠨ ᠬᠥᠳᠡᠯᠵᠦ ᠪᠦᠬᠦ ᠶᠠᠭᠤᠮᠠ ᠶ᠋ᠢ ᠰᠠᠨᠠᠭᠰᠠᠨ ᠶᠣᠰᠣᠭᠠᠷ ᠢ᠋ᠶ᠋ᠠᠨ ᠶᠠᠩᠵᠤᠯᠠᠪᠠ᠃ ᠲᠡᠭᠡᠭᠡᠳ ᠪᠡᠷᠢᠮᠦᠭ ᠡᠮᠡᠭᠡᠨ ᠦ᠌ ᠵᠠᠬᠢᠵᠤ ᠪᠠᠢᠭᠰᠠᠨ ᠦᠭᠡ ᠶ᠋ᠢ ᠳᠠᠭᠠᠬᠤ ᠪᠠᠷ ᠰᠢᠢᠳᠪᠡ᠃ ᠲᠠᠯᠢᠢᠭᠠᠴᠢ ᠡᠮᠡᠭᠡᠨ ᠦ᠌ ᠦᠯᠡᠳᠡᠭᠡᠭᠰᠡᠨ ᠰᠢᠷᠢᠨ ᠠᠪᠳᠠᠷᠠ ᠳᠣᠲᠣᠷᠠ ᠠ᠋ᠴᠠ ᠲᠡᠭᠦᠨ ᠦ᠌ ᠵᠠᠯᠠᠭᠤ ᠴᠠᠭ ᠲᠤ᠌ ᠪᠠᠨ ᠡᠮᠦᠰᠴᠦ ᠪᠠᠢᠭᠰᠠᠨ ᠰᠢᠮᠨᠠᠨᠼ ᠤ᠋ᠨ ᠬᠤᠪᠴᠠᠰᠤ ᠶ᠋ᠢ ᠭᠠᠷᠭᠠᠵᠤ ᠠᠪᠤᠯᠠ᠃ ᠲᠡᠷᠡ ᠬᠦ᠌ ᠰᠢᠮᠨᠠᠨᠼ ᠤ᠋ᠨ ᠬᠤᠪᠴᠠᠰᠤ ᠶ᠋ᠢ ᠡᠮᠦᠰᠴᠦ ᠭᠡᠯᠦᠩᠮᠠ ᠪᠣᠯᠤᠨ ᠬᠤᠪᠢᠷᠠᠬᠤ ᠪᠠᠷ ᠲᠡᠷᠡ ᠤᠷᠢᠳᠠ ᠠ᠋ᠴᠠ ᠪᠣᠳᠣᠵᠤ ᠣᠯᠤᠭᠰᠠᠨ ᠪᠠᠢᠯᠠ᠃ ᠵᠡᠬᠡᠵᠦ ᠪᠡᠯᠡᠳᠬᠡᠭᠰᠡᠨ ᠪᠤᠰᠤᠳ ᠶᠠᠭᠤᠮᠠ ᠪᠠᠨ ᠠᠪᠤᠭᠠᠳ ᠪᠠᠢᠰᠢᠩ᠂ ᠬᠠᠰᠢᠶᠠ ᠬᠣᠶᠠᠷ ᠢ᠋ᠶ᠋ᠠᠨ ᠠᠯᠢ ᠠᠯᠢ ᠶ᠋ᠢ ᠭᠠᠳᠠᠨᠠ ᠠ᠋ᠴᠠ ᠨᠢ ᠲᠣᠮᠣ ᠴᠣᠣᠵᠢ ᠪᠠᠷ ᠴᠣᠣᠵᠢᠯᠠᠭᠠᠳ ᠨᠢᠭᠡ ᠭᠤᠳᠤᠮᠵᠢᠨ ᠤ᠋ ᠴᠠᠭᠠᠨᠠ ᠰᠢᠪᠠᠷ ᠲᠠᠭᠠᠵᠠᠨ ᠳ᠋ᠤ᠌ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠨᠥᠬᠥᠷ ᠦ᠋ᠨ ᠳ᠋ᠦ᠍ ᠪᠡᠨ ᠰᠠᠨᠵᠢ ᠬᠦᠷᠴᠦ ᠣᠴᠢᠯᠠ᠃ ᠨᠥᠬᠥᠷ ᠨᠢ ᠳᠣᠯᠳᠣᠢ ᠲᠠᠢ ᠪᠠᠳᠢᠷᠴᠢᠨ ᠪᠣᠯᠵᠤ᠂ ᠥᠪᠡᠷ ᠢ᠋ᠶ᠋ᠡᠨ ᠲᠡᠭᠦᠨ ᠢ᠋ ᠳᠠᠭᠠᠭᠰᠠᠨ ᠰᠢᠮᠨᠠᠨᠼ ᠤ᠋ᠨ ᠳᠦᠷᠢ ᠪᠡᠷ ᠰᠠᠨᠵᠢ ᠤᠷᠭᠤᠨ ᠵᠠᠢᠯᠬᠤ ᠪᠠᠷ ᠰᠢᠢᠳᠴᠡᠢ᠃
- ᠬᠥᠮᠦᠨ ᠦ᠌ ᠠᠩᠬᠠᠷᠤᠯ ᠲᠠᠲᠠᠬᠤ ᠦᠭᠡᠢ ᠪᠡᠷ ᠬᠤᠷᠳᠤᠨ ᠬᠣᠯᠠᠳᠠᠵᠤ᠂ ᠬᠡᠨ ᠴᠦ᠍ ᠰᠠᠨᠠᠭᠠ ᠦᠭᠡᠢ ᠵᠠᠮ ᠢ᠋ᠶ᠋ᠠᠷ ᠶᠠᠪᠤᠪᠠᠯ ᠳᠡᠭᠡᠷᠡ ᠪᠠᠢᠬᠠ ᠭᠡᠵᠦ ᠪᠣᠳᠣᠭᠠᠳ ᠦᠢᠴᠦᠦ ᠮᠥᠷᠡᠨ ᠢ᠋ᠶ᠋ᠡᠷ ᠤᠷᠤᠭᠤᠳᠠᠵᠤ ᠬᠡᠰᠡᠭ ᠬᠣᠯᠠᠳᠠᠭᠠᠳ ᠳᠠᠷᠠᠭᠠ ᠨᠢ ᠠᠭᠠᠵᠢᠮ ᠢ᠋ᠶ᠋ᠠᠷ ᠵᠡᠭᠦᠨ ᠬᠣᠢᠰᠢ ᠵᠦᠭᠯᠡᠶᠡ ᠭᠡᠵᠦ ᠪᠣᠳᠣᠯᠠ᠃ ᠦᠢᠴᠦᠦ ᠮᠥᠷᠡᠨ ᠦ᠌ ᠨᠢᠭᠡ ᠨᠤᠭᠤᠯᠠᠨ ᠳ᠋ᠤ᠌ ᠰᠢᠷᠢᠨ ᠵᠠᠪᠢ ᠲᠠᠯᠪᠢᠭᠠᠰᠤᠲᠠᠢ ᠪᠠᠢᠭᠠ᠃ ᠣᠳᠣ ᠲᠦᠷᠭᠡᠯᠡᠬᠦ ᠦᠭᠡᠢ ᠪᠣᠯ ᠦᠷ ᠬᠠᠶᠠᠭᠠᠷᠠᠴᠢᠬᠠᠨᠠ᠃ ᠦᠷ ᠬᠠᠶᠠᠭᠠᠷᠠᠬᠤ ᠠ᠋ᠴᠠ ᠡᠮᠦᠨᠡ ᡀᠠᠰᠠ ᠠ᠋ᠴᠠ ᠨᠡᠯᠢᠶᠡᠳ ᠬᠣᠯᠠᠳᠠᠭᠠᠳ ᠠᠪᠤᠮᠠᠷ ᠪᠠᠢᠨᠠ ᠭᠡᠮᠡᠨ ᠨᠠᠢᠵᠠ ᠨᠢ ᠤᠭᠲᠤᠨ ᠠᠭᠤᠯᠵᠠᠮᠠᠭᠴᠠ ᠰᠠᠨᠵᠢ ᠳ᠋ᠤ᠌ ᠬᠡᠯᠡᠬᠦ ᠳ᠋ᠦ᠍ ᠲᠡᠷᠡ ᠴᠦ᠍ ᠵᠥᠪ ᠶᠦ᠍ᠮ ᠭᠡᠵᠦ ᠵᠥᠪᠰᠢᠶᠡᠷᠡᠵᠡᠢ᠃ ᠦᠨᠡᠬᠡᠷ ᠰᠠᠨᠠᠭᠰᠠᠨ ᠶᠣᠰᠣᠭᠠᠷ ᠢ᠋ᠶ᠋ᠠᠨ ᠪᠣᠯᠵᠤ ᠲᠡᠳᠡ ᠦᠢᠴᠦᠦ ᠮᠥᠷᠡᠨ ᠦ᠌ ᠨᠠᠮᠤᠭᠤᠬᠠᠨ ᠤᠰᠤᠨ ᠳᠡᠭᠡᠭᠦᠷ ᠰᠠᠷᠯᠤᠭ ᠤ᠋ᠨ ᠠᠷᠠᠰᠤᠨ ᠵᠠᠪᠢ ᠪᠠᠷ ᠬᠡᠨ ᠳ᠋ᠦ᠍ ᠴᠦ᠍ ᠮᠡᠳᠡᠭᠳᠡᠬᠦ ᠦᠭᠡᠢ ᠪᠡᠷ ᠰᠥᠨᠢ ᠶ᠋ᠢᠨ ᠲᠦᠨᠡᠷ ᠬᠠᠷᠠᠩᠭᠤᠢ ᠳ᠋ᠤ᠌ ᠬᠤᠴᠢᠭᠳᠠᠨ ᠬᠥᠪᠴᠦ ᠣᠳᠤᠯᠠ᠃ ᠤᠷᠤᠰᠬᠠᠯ ᠤ᠋ᠨ ᠳᠠᠭᠠᠤ ᠪᠣᠯᠬᠣᠷ ᠵᠠᠪᠢ ᠨᠢ ᠠᠶᠠᠨᠳᠠᠭᠠᠨ ᠬᠥᠪᠦᠨ ᠤᠷᠤᠭᠤᠳᠠᠵᠤ ᠪᠠᠢᠯᠠ᠃ ᡀᠠᠰᠠ ᠬᠣᠲᠠ ᠬᠠᠷᠠᠩᠭᠤᠢ ᠳᠤᠮᠳᠠ ᠨᠠᠪᠰᠠᠢᠨ ᠪᠠᠷᠠᠭᠠᠨᠲᠤᠵᠤ᠂ ᠬᠠᠶᠠ ᠨᠢᠭᠡ ᠳᠤᠭᠠᠩ᠂ ᠳ᠋ᠠᠴᠠᠩ ᠤ᠋ᠨ ᠪᠦᠳᠡᠭᠢ ᠵᠤᠯᠠ ᠶ᠋ᠢᠨ ᠭᠡᠷᠡᠯ ᠦᠯᠦ ᠮᠡᠳᠡᠭ ᠶᠣᠯᠲᠣᠢᠭᠰᠠᠭᠠᠷ ᠬᠣᠴᠣᠷᠤᠯᠠ᠃
ᠲᠡᠷᠲᠡᠭᠡ ᠣᠯᠠᠨ ᠵᠢᠯ ᠦ᠋ᠨ ᠡᠮᠦᠨᠡ ᠠᠩᠬᠠ ᠤᠳᠠᠭᠠ ᠡᠨᠡ ᠮᠥᠷᠦᠨ ᠳᠡᠭᠡᠭᠦᠷ ᠮᠥᠨ ᠡᠢᠮᠦ ᠨᠢᠭᠡᠨ ᠵᠠᠪᠢ ᠪᠠᠷ ᠬᠥᠪᠴᠦ ᠶᠠᠪᠤᠭᠰᠠᠨ ᠨᠢ ᠰᠠᠨᠵᠢ ᠶ᠋ᠢᠨ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠯᠠ᠃ ᠲᠥᠪᠡᠳ ᠦ᠋ᠨ ᠠᠷᠢᠭᠤᠨ ᠰᠢᠲᠦᠭᠡᠨ ᠪᠣᠯᠤᠭᠰᠠᠨ ᠭᠠᠵᠠᠷ ᠤᠳ ᠢ᠋ᠶ᠋ᠠᠷ ᠤᠳᠬᠤᠨ ᠬᠡᠦᠬᠡᠨ ᠢ᠋ ᠮᠥᠷᠭᠥᠭᠦᠯᠵᠦ᠂ ᠦᠷᠡ ᠶ᠋ᠢᠨ ᠬᠤᠲᠤᠭ ᠣᠯᠭᠣᠬᠤ ᠳ᠋ᠤ᠌ ᠲᠤᠰᠠ ᠬᠦᠷᠭᠡᠬᠦ ᠪᠡᠷ ᠶᠠᠪᠤᠵᠤ ᠪᠠᠢᠭᠰᠠᠨ ᠲᠡᠷᠡ ᠴᠠᠭ ᠤ᠋ᠨ ᠶᠠᠪᠤᠳᠠᠯ ᠣᠳᠣ ᠴᠤ᠌ ᠮᠠᠷᠲᠠᠭᠳᠠᠭᠠ ᠦᠭᠡᠢ ᠬᠡᠪ ᠢ᠋ᠶ᠋ᠡᠷ ᠪᠠᠢᠯᠠ᠃ ᠤᠳᠬᠤᠨ ᠬᠡᠦᠬᠡᠨ ᠳ᠋ᠦ᠍ ᠬᠠᠷᠢ ᠭᠠᠵᠠᠷ ᠤ᠋ᠨ ᠡᠯᠳᠡᠪ ᠰᠢᠲᠦᠭᠡᠨ ᠦ᠌ ᠠᠯᠢ ᠨᠢ ᠴᠦ᠍ ᠲᠤᠰᠠ ᠪᠣᠯᠤᠭᠰᠠᠨ ᠦᠭᠡᠢ᠃ ᠲᠡᠭᠦᠨ ᠳ᠋ᠦ᠍ ᠦᠷᠡ ᠵᠠᠶᠠᠭᠠᠭᠰᠠᠨ ᠦᠭᠡᠢ᠃ ᠲᠡᠭᠦᠪᠡᠷ ᠴᠦ᠍ ᠪᠠᠷᠠᠭᠰᠠᠨ ᠦᠭᠡᠢ ᠵᠠᠶᠠᠭᠠᠭᠰᠠᠨ ᠨᠥᠬᠥᠷ ᠡᠴᠡ ᠪᠡᠨ ᠬᠣᠶᠠᠷᠳᠠᠬᠢ ᠤᠳᠠᠭᠠ ᠡᠨᠡ ᠭᠠᠵᠠᠷ ᠬᠠᠭᠠᠴᠠᠨ ᠰᠠᠯᠵᠠᠢ᠃ ᠨᠢᠭᠡ ᠨᠢ ᠮᠥᠩᠬᠡ ᠪᠤᠰᠤ ᠶ᠋ᠢ ᠦᠵᠡᠭᠦᠯᠦᠭᠰᠡᠨ᠃ ᠨᠥᠭᠦᠭᠡ ᠨᠢ ᠲᠥᠪᠡᠳ ᠦ᠋ᠨ ᠱᠣᠷᠣᠩ ᠳ᠋ᠤ᠌ ᠣᠷᠣᠵᠤ᠂ ᠴᠡᠷᠢᠭ ᠲᠦ᠍ ᠳᠠᠢᠴᠢᠯᠠᠭᠳᠠᠭᠠᠳ ᠳᠠᠷᠠᠭᠠ ᠨᠢ ᠤᠤᠯ ᠤ᠋ᠨ ᠳᠡᠭᠡᠷᠡᠮᠴᠢᠨ ᠦ᠌ ᠰᠦᠷᠦᠭ ᠲᠦ᠍ ᠨᠡᠢᠯᠡᠵᠦ ᠰᠤᠷᠠᠭ ᠦᠭᠡᠢ ᠠᠯᠠᠭᠠ ᠪᠣᠯᠤᠭᠰᠠᠨ᠃ ᠣᠳᠣ ᠲᠡᠷᠡ ᠵᠣᠪᠠᠯᠠᠩᠲᠤ ᠡᠮᠡᠭᠲᠡᠢ ᠬᠠᠮᠢᠭᠠᠬᠠᠨ ᠭᠠᠵᠠᠷ ᠶᠠᠭᠤᠬᠠᠨ ᠬᠢᠵᠦ ᠶᠠᠪᠤᠳᠠᠭ ᠢ᠋ ᠰᠠᠨᠵᠢ ᠮᠡᠳᠡᠬᠦ ᠪᠡᠨ ᠪᠣᠯᠢᠭᠠᠳ ᠨᠡᠯᠢᠶᠡᠨ ᠬᠡᠳᠦᠨ ᠵᠢᠯ ᠥᠩᠭᠡᠷᠡᠵᠡᠢ᠃
《ᠦᠷᠡ ᠶ᠋ᠢᠨ ᠬᠤᠲᠤᠭ ᠵᠠᠶᠠᠭᠠᠭᠰᠠᠨ ᠦᠭᠡᠢ ᠳ᠋ᠦ᠍ ᠶᠡᠬᠡ ᠯᠡ ᠭᠣᠮᠣᠳᠠᠵᠤ ᠶᠠᠪᠤᠳᠠᠭ ᠲᠡᠷᠡ ᠪᠦᠰᠡᠭᠦᠢ ᠣᠳᠣ ᠬᠠᠮᠢᠭᠠ ᠶᠠᠪᠤᠳᠠᠭ ᠪᠣᠯ ᠳᠠ᠃ ᠤᠤᠯ ᠨᠢ ᡀᠠᠩᠲᠤᠪᠠᠴᠢᠮᠪᠣ ᠶ᠋ᠢᠨ ᠤᠬᠠᠭᠠᠨ ᠰᠤᠳᠤᠯᠤᠭᠰᠠᠨ ᠬᠣᠢᠨᠠ ᠮᠢᠨᠢ᠂ ᠡᠳᠦᠢ ᠦᠶᠡ ᠳ᠋ᠦ᠍ ᠰᠠᠨ ᠪᠣᠯ ᠴᠤ᠌ ᠪᠢ ᠲᠡᠭᠦᠨ ᠳ᠋ᠦ᠍ ᠲᠤᠰᠠ ᠪᠣᠯᠬᠤ ᠶ᠋ᠢ ᠣᠷᠣᠯᠳᠣᠭᠠᠳ ᠦᠵᠡᠪᠡᠯ ᠬᠣᠭᠣᠰᠣᠨ ᠶᠤᠮ ᠪᠣᠯᠬᠤ ᠦᠭᠡᠢ ᠴᠦ᠍ ᠪᠠᠢᠵᠤ ᠮᠡᠳᠡᠬᠦ ᠰᠠᠨ ᠪᠢᠯᠡ᠃ ᠵᠠ ᠲᠡᠷᠡ ᠴᠦ᠍ ᠥᠩᠭᠡᠷᠡᠵᠡᠢ》 ᠭᠡᠵᠦ ᠰᠠᠨᠵᠢ ᠬᠡᠪ ᠭᠡᠨᠡᠳᠲᠡ ᠰᠠᠨᠠᠭᠠᠨ ᠳ᠋ᠤ᠌ ᠨᠢ ᠣᠷᠣᠭᠰᠠᠨ ᠲᠡᠷᠡ ᠨᠢᠭᠡᠨ ᠪᠦᠰᠡᠭᠦᠢ ᠶ᠋ᠢᠨ ᠲᠤᠬᠠᠢ ᠪᠣᠳᠣᠯᠠ᠃ ᠭᠡᠪᠡᠴᠦ ᠣᠳᠣ ᠲᠡᠷᠡ ᠥᠪᠡᠷ ᠢ᠋ᠶ᠋ᠡᠨ ᠪᠡᠷᠢᠮᠦᠭ ᠡᠮᠡᠭᠡᠨ ᠦ᠌ ᠰᠢᠮᠨᠠᠨᠼ ᠬᠤᠪᠴᠠᠰᠤ ᠡᠮᠦᠰᠦᠭᠡᠳ ᠡᠷᠡ ᠮᠥᠷᠲᠡᠯᠡ ᠡᠮᠡ ᠶ᠋ᠢᠨ ᠳᠦᠷᠢ ᠶ᠋ᠢ ᠦᠵᠡᠭᠦᠯᠦᠨ ᠶᠠᠪᠤᠵᠤ ᠪᠠᠢᠨᠠ᠃ ᠪᠤᠷᠬᠠᠨ ᠤ᠋ ᠰᠠᠢᠨ ᠱᠠᠪᠢ ᠪᠣᠯᠵᠤ᠂ ᠶᠡᠬᠡ ᠡᠷᠳᠡᠮ ᠰᠤᠷᠬᠤ ᠪᠠᠷ ᠰᠦᠰᠦᠭᠯᠡᠨ ᠵᠣᠷᠢᠵᠤ ᠢᠷᠡᠭᠰᠡᠨ ᠭᠠᠵᠠᠷ ᠠ᠋ᠴᠠ ᠪᠠᠨ ᠣᠳᠣ ᠵᠢᠰᠦ ᠪᠤᠷᠤᠭᠤᠯᠠᠨ ᠵᠢᠭᠤᠲᠠᠵᠤ ᠶᠠᠪᠤᠨᠠ᠃ ᠦᠢᠴᠦᠦ ᠮᠥᠷᠡᠨ ᠦ᠌ ᠬᠠᠷᠠ ᠪᠠᠷᠠᠭᠠᠨ ᠤᠰᠤ ᠦᠶᠡ ᠦᠶᠡ ᠳᠣᠯᠭᠢᠯᠠᠬᠤ ᠠ᠋ᠴᠠ ᠥᠭᠡᠷᠡ ᠶᠠᠭᠤ ᠴᠤ᠌ ᠰᠣᠨᠣᠰᠤᠭᠳᠠᠬᠤ ᠦᠭᠡᠢ ᠳᠦᠩᠰᠦᠭᠡᠷ ᠰᠥᠨᠢ ᠶ᠋ᠢᠨ ᠳᠦᠯᠡᠢ ᠴᠢᠮᠡᠭᠡ ᠦᠭᠡᠢ ᠳ᠋ᠦ᠍ ᠣᠷᠭᠣᠳᠣᠤᠯ ᠬᠣᠶᠠᠷ ᠥᠴᠦᠬᠡᠨ ᠴᠦ᠍ ᠳᠠᠭᠤ ᠴᠢᠮᠡᠭᠡ ᠭᠠᠷᠭᠠᠬᠤ ᠦᠭᠡᠢ ᠶ᠋ᠢ ᠬᠢᠴᠢᠶᠡᠵᠦ ᠰᠠᠭᠤᠯᠠ᠃ ᠲᠦᠨᠡᠷ ᠬᠠᠷᠠᠩᠭᠤᠢ ᠰᠥᠨᠢ ᠶ᠋ᠢᠨ ᠨᠠᠮ ᠭᠦᠨ ᠳ᠋ᠦ᠍ ᠲᠦᠮᠡᠨ ᠵᠦᠢᠯ ᠦ᠋ᠨ ᠳᠤᠷᠠᠳᠬᠠᠯ ᠠᠮᠢᠯᠠᠨ ᠰᠡᠷᠢᠵᠦ᠂ ᠡᠯᠳᠡᠪ ᠢ᠋ ᠡᠷᠭᠢᠴᠡᠭᠦᠯᠬᠦ ᠡᠴᠡ ᠥᠭᠡᠷᠡ ᠬᠢᠬᠦ ᠶᠠᠭᠤᠮᠠ ᠦᠭᠡᠢ ᠲᠤᠯᠠ ᠰᠠᠨᠵᠢ ᠪᠣᠳᠣᠯ ᠳ᠋ᠤ᠌ ᠳᠠᠷᠤᠭᠳᠠᠯᠠ᠃ ᠥᠪᠡᠷ ᠬᠣᠭᠣᠷᠣᠨᠳᠣ ᠪᠠᠨ ᠶᠠᠷᠢᠬᠤ ᠴᠤ᠌ ᠪᠣᠯᠤᠯᠴᠠᠭᠠ ᠦᠭᠡᠢ ᠲᠡᠷᠡ ᠠᠶᠠᠨ ᠰᠠᠨᠵᠢ ᠶ᠋ᠢᠨ ᠲᠤᠭᠤᠯᠵᠤ ᠥᠩᠭᠡᠷᠡᠭᠦᠯᠦᠭᠰᠡᠨ ᠬᠠᠮᠤᠭ ᠠᠮᠢᠳᠤᠷᠠᠯ ᠤ᠋ᠨ ᠵᠠᠮ ᠢ᠋ ᠨᠢ ᠡᠷᠭᠢᠨ ᠰᠠᠨᠠᠭᠤᠯᠬᠤ ᠭᠡᠰᠡᠨ ᠶᠦ᠍ᠮ ᠰᠢᠭ ᠶᠡᠷᠦ ᠪᠤᠰᠤ ᠶ᠋ᠢᠨ ᠮᠥᠷᠳᠡᠯᠡ ᠶᠡᠷᠦ ᠶ᠋ᠢᠨ ᠠᠵᠠᠢ᠃ ᠱᠠᠪᠢᠯᠠᠨ ᠰᠠᠭᠤᠬᠤ ᠪᠠᠷ ᠠᠩᠬᠠ ᠡᠨᠡ ᠭᠠᠵᠠᠷ ᠢᠷᠡᠭᠰᠡᠨ ᠴᠠᠭ ᠤ᠋ᠨ ᠶᠠᠭᠤᠮᠠ ᠴᠥᠮ ᠯᠡ ᠰᠠᠨᠠᠭᠠᠨ ᠤ᠋ ᠳᠣᠲᠣᠷᠠ ᠢᠯᠡᠬᠡᠨ᠃ ᠯᠦᠨᠳᠥᠭᠵᠤᠨᠠᠢ ᠭᠠᠪᠵᠤ᠂ ᠫᠦᠷᠪᠦᠳᠣᠨᠣᠢ ᠮᠠᠷᠠᠮᠪᠠ ᠠ᠋ᠴᠠ ᠡᠬᠢᠯᠡᠭᠡᠳ ᠨᠢᠭᠡᠨ ᠵᠢᠡᠭ᠌ᠳᠠᠭᠠᠨ ᠤ᠋ ᠬᠢᠨ ᠨᠢ ᠢᠯᠠᠩᠭᠤᠶᠠ ᠴᠣᠭᠰᠣᠩ᠂ ᠫᠠᠭ᠍ᠰᠠᠡᠭ ᠬᠣᠶᠠᠷ ᠤ᠋ᠨ ᠠᠭᠠᠰᠢ ᠠᠷᠠᠨᠰᠢᠨ᠂ ᠬᠥᠮᠦᠨ ᠦ᠌ ᠶᠠᠰᠤᠨ ᠳ᠋ᠤ᠌ ᠰᠢᠨᠤᠵᠤ ᠶᠠᠪᠤᠳᠠᠭ ᠵᠢᠩᠵᠠᠢ ᠯᠠᠮᠠ ᠵᠠᠯᠰᠠᠡᠭ᠂ ᡀᠠᠰᠠ ᠬᠣᠲᠠ ᠶ᠋ᠢᠨ ᠠᠶᠤᠮᠰᠢᠭᠲᠤ ᠱᠣᠷᠣᠩ ᠴᠥᠮ ᠯᠡ ᠳᠠᠷᠠᠭᠠ ᠳᠠᠷᠠᠭᠠ ᠪᠠᠷ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠯᠠ᠃ ᠳᠣᠯᠣᠭᠠᠨ ᠲᠠᠮᠢᠷ ᠰᠤᠯᠠᠳᠠᠭᠰᠠᠨ ᠢ᠋ ᠡᠳᠡᠭᠡᠭᠡᠨᠡ ᠭᠡᠵᠦ ᠲᠦᠮᠡᠨ ᠵᠦᠢᠯ ᠦ᠋ᠨ ᠠᠷᠭᠠ ᠰᠢᠷᠬᠡ ᠬᠢᠭᠡᠳ ᠳᠡᠢᠯᠦᠭᠡ ᠦᠭᠡᠢ ᠯᠠᠮᠠ ᠪᠠᠭᠰᠢ ᠨᠠᠷ ᠤ᠋ᠨ ᠪᠠᠢᠳᠠᠯ ᠢ᠋ ᠣᠳᠣ ᠴᠤ᠌ ᠲᠡᠷᠡ ᠮᠠᠷᠲᠠᠭᠠ ᠦᠭᠡᠢ ᠪᠠᠢᠨᠠ᠃ ᠡᠷᠳᠡᠮᠲᠦ ᠯᠠᠮᠠ ᠨᠠᠷ ᠤ᠋ᠨ ᠭᠦᠨ ᠤᠬᠠᠭᠠᠨ ᠠ᠋ᠴᠠ ᠭᠠᠷᠤᠭᠠ ᠦᠭᠡᠢ ᠶᠠᠭᠤᠮᠠ ᠡᠷᠳᠡᠮ ᠦᠭᠡᠢ ᠰᠢᠮᠨᠠᠨᠼ ᠪᠡᠷᠢᠮᠦᠭ ᠡᠮᠡᠭᠡᠨ ᠬᠡᠷᠬᠢᠨ ᠰᠡᠢᠯᠵᠦ ᠰᠠᠨᠵᠢ ᠶ᠋ᠢ ᠳᠣᠣᠷᠠ ᠨᠢ ᠡᠳᠡᠭᠡᠭᠡᠨ ᠲᠡᠩᠬᠡᠷᠡᠭᠦᠯᠵᠦ ᠠᠪᠤᠭᠰᠠᠨ ᠲᠤᠬᠠᠢ ᠶ᠋ᠢ ᠴᠦ᠍ ᠲᠡᠷᠡ ᠰᠠᠢᠨ ᠰᠠᠨᠠᠵᠤ ᠪᠠᠢᠯᠠ᠃ ᠲᠡᠭᠦᠰᠬᠡᠯ ᠦᠭᠡᠢ ᠡᠷᠳᠡᠮᠲᠦ ᠮᠠᠰᠢ ᠬᠡᠲᠦᠷᠡᠭᠰᠡᠨ᠂ ᠠᠷᠪᠠᠨ ᠪᠡᠷᠬᠡᠲᠦ ᠭᠡᠬᠦᠴᠢᠯᠡᠨ ᠰᠦᠷᠲᠡᠢ ᠯᠤᠲᠤ ᠴᠣᠯᠠ ᠬᠡᠷᠬᠡᠮ ᠲᠡᠢ ᠣᠯᠠᠨ ᠯᠠᠮᠠ ᠨᠠᠷ ᠤ᠋ᠨ ᠣᠷᠣᠩᠨᠠᠬᠤ ᠭᠠᠵᠠᠷ ᠪᠣᠯᠤᠭᠰᠠᠨ ᡀᠠᠰᠠ ᠵᠣᠣ ᠳ᠋ᠤ᠌ ᠨᠢᠭᠦᠯᠲᠦ ᠦᠢᠯᠡᠰ ᠣᠭᠲᠣᠬᠠᠨ ᠴᠤ᠌ ᠭᠠᠷᠤᠮᠠᠷ ᠦᠭᠡᠢ ᠠᠲᠠᠯᠠ ᠡᠳᠦᠷ ᠪᠦᠷᠢ ᠬᠥᠮᠦᠨ ᠦ᠌ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠮᠠ ᠦᠭᠡᠢ ᠶᠠᠭᠤᠮᠠᠰ ᠪᠣᠯᠵᠤ ᠪᠠᠢᠳᠠᠭ ᠢ᠋ ᠣᠳᠣ ᠰᠠᠨᠵᠢ ᠰᠠᠢᠨ ᠮᠡᠳᠡᠵᠦ ᠪᠠᠢᠯᠠ᠃《ᠡᠷᠳᠡᠮ ᠨᠣᠮ ᠶᠡᠬᠡ ᠰᠤᠷᠤᠯᠠ》 ᠭᠡᠰᠡᠨ ᠰᠢᠯᠲᠠᠭ ᠢ᠋ᠶ᠋ᠠᠷ ᠬᠠᠷᠢ ᠭᠠᠵᠠᠷ ᠤ᠋ᠨ ᠬᠥᠮᠦᠨ ᠢ᠋ ᠬᠢᠬᠠᠨ ᠬᠥᠨᠥᠭᠡᠳᠡᠭ ᠪᠤᠰᠤᠷᠮᠠᠭ ᠪᠤᠷᠤᠩᠬᠤᠢ ᠵᠠᠩᠰᠢᠯ ᠪᠢᠴᠢᠭᠳᠡᠭᠡ ᠦᠭᠡᠢ ᠬᠠᠤᠯᠢ ᠪᠣᠯᠤᠨ ᠡᠨᠡ ᠭᠠᠵᠠᠷ ᠨᠣᠶᠠᠯᠠᠵᠤ ᠪᠠᠢᠳᠠᠭ ᠢ᠋ ᠰᠠᠨᠵᠢ ᠣᠳᠣ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠦᠵᠡᠵᠦ ᠠᠮᠰᠠᠯᠠ᠃
ᠶᠠᠭᠤᠮᠠ ᠯᠠ ᠪᠣᠯ ᠮᠠᠯᠠᠭᠠᠢ ᠶ᠋ᠢ ᠪᠡᠨ ᠠᠪᠴᠤ ᠬᠡᠯᠡ ᠪᠡᠨ ᠭᠠᠷᠭᠠᠨ ᠬᠣᠶᠠᠷ ᠡᠷᠡᠬᠡᠢ ᠪᠡᠨ ᠭᠣᠵᠣᠶᠢᠯᠭᠠᠵᠤ᠂ ᠰᠢᠯᠢ ᠪᠡᠨ ᠮᠠᠭᠠᠵᠢᠨ 《ᠬᠦᠱᠣᠣ᠂ ᠬᠦᠱᠣᠣ》 (ᠳᠡᠭᠡᠳᠦᠰ᠂ ᠳᠡᠭᠡᠳᠦᠰ) ᠭᠡᠵᠦ ᠪᠤᠰᠤᠳ ᠤ᠋ᠨ ᠡᠮᠦᠨᠡ ᠪᠥᠬᠥᠯᠵᠡᠨ ᠪᠢᠯᠳᠠᠤᠴᠢᠯᠠᠵᠤ ᠦᠷᠭᠦᠯᠵᠢ ᠲᠣᠯᠢᠭᠠᠨᠠᠨ ᠶᠠᠪᠤᠳᠠᠭ ᠲᠥᠪᠡᠳ ᠬᠥᠮᠦᠰ ᠦ᠋ᠨ ᠳᠣᠲᠣᠷᠠ ᠪᠠᠨ ᠶᠠᠭᠤ ᠪᠣᠳᠣᠵᠤ ᠪᠠᠢᠳᠠᠭ ᠢ᠋ ᠴᠣᠭᠰᠣᠩ ᠪᠣᠳᠢᠫᠠ ᠶ᠋ᠢᠨ ᠲᠥᠷᠬᠦ ᠪᠡᠷ ᠰᠠᠨᠵᠢ ᠲᠥᠰᠦᠭᠡᠯᠡᠨ ᠪᠣᠳᠣᠭᠠᠳ ᠭᠠᠢᠬᠠᠰᠢ ᠲᠥᠷᠥᠵᠦ ᠪᠠᠢᠯᠠ᠃ ᠲᠡᠷᠡ ᠪᠦᠬᠦᠢ ᠯᠡ ᠮᠠᠢᠭ ᠨᠢ ᠵᠠᠷᠢᠮ ᠳ᠋ᠤ᠌ ᠪᠠᠨ ᠠᠶᠢᠬᠤᠪᠲᠤᠷ ᠥᠩᠭᠡᠴᠡ ᠶᠦ᠍ᠮ ᠪᠠᠢᠭᠰᠠᠨ ᠠᠵᠢ᠃ ᠣᠳᠣ ᠲᠡᠳᠡᠨ ᠦ᠌ ᠭᠠᠷ ᠲᠤ᠌ ᠥᠷᠲᠥᠯ ᠦᠭᠡᠢ ᠪᠡᠷ ᠡᠬᠡ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠪᠠᠷᠠ ᠶ᠋ᠢ ᠬᠠᠷᠠᠬᠤ ᠶᠣᠰᠣᠲᠠᠢ᠃ ᠬᠠᠷᠢ ᠶ᠋ᠢᠨ ᠬᠥᠮᠦᠨ ᠡᠴᠡ ᠬᠠᠷᠠᠮᠯᠠᠵᠤ ᠪᠠᠢᠭᠠ ᠲᠡᠷᠡ ᠡᠷᠳᠡᠮ ᠨᠣᠮ ᠤ᠋ᠨ ᠢ᠋ᠶ᠋ᠠᠨ ᠦᠷᠡ ᠰᠢᠮᠡ ᠶ᠋ᠢ ᠨᠤᠲᠤᠭ ᠤ᠋ᠨ ᠬᠢᠨ ᠳ᠋ᠦ᠍ ᠪᠡᠨ ᠬᠦᠷᠭᠡᠵᠦ ᠥᠭᠬᠦ ᠤᠴᠢᠷᠲᠠᠢ᠃ ᠲᠡᠭᠡᠬᠦ ᠦᠭᠡᠢ ᠪᠣᠯ ᠣᠯᠠᠨ ᠵᠢᠯ ᠦ᠋ᠨ ᠲᠤᠷᠰᠢ ᠵᠣᠪᠠᠨ ᠵᠦᠳᠡᠷᠡᠵᠦ ᠨᠣᠮ ᠤ᠋ᠨ ᠮᠥᠷ ᠬᠥᠭᠡᠭᠡᠭᠰᠡᠨ ᠦ᠌ ᠬᠡᠷᠡᠭ ᠶᠠᠭᠤᠬᠠᠨ ᠪᠢᠯᠡ? ᠰᠠᠨᠵᠢ ᠡᠨᠡ ᠪᠦᠬᠦᠨ ᠢ᠋ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠵᠤ ᠰᠥᠨᠢ ᠶ᠋ᠢᠨ ᠵᠢᠬᠡᠭᠦᠨ ᠳ᠋ᠦ᠍ ᠭᠣᠣᠯ ᠤ᠋ᠨ ᠤᠰᠤᠨ ᠠ᠋ᠴᠠ ᠴᠢᠭᠢᠭ ᠠᠪᠬᠤ ᠶ᠋ᠢ ᠮᠡᠳᠡᠷᠡᠵᠦ ᠵᠢᠬᠡᠭᠦᠳᠡᠰᠦ ᠨᠢ ᠬᠦᠷᠬᠦ ᠶ᠋ᠢ ᠠᠩᠵᠠᠭᠠᠷᠠᠭᠰᠠᠨ ᠦᠭᠡᠢ᠃ ᠪᠡᠷᠢᠮᠦᠭ ᠡᠮᠡᠭᠡᠨ ᠦ᠌ ᠬᠤᠪᠴᠠᠰᠤ ᠲᠡᠭᠦᠨ ᠳ᠋ᠦ᠍ ᠳᠠᠪᠴᠢᠳᠠᠨ ᠨᠢᠮᠭᠡᠳᠡᠵᠦ ᠪᠠᠢᠯᠠ᠃ ᠣᠳᠣ ᠪᠠᠷ ᠬᠤᠪᠴᠠᠰᠤ ᠪᠢᠰᠢ ᠬᠠᠷᠢᠨ ᠴᠠᠭ ᠬᠣᠵᠢᠬᠤ ᠨᠢ ᠶᠠᠭᠤᠨ ᠠ᠋ᠴᠠ ᠴᠤ᠌ ᠣᠨᠴᠠᠭᠠᠢ ᠴᠢᠬᠤᠯᠠ ᠪᠠᠢᠯᠠ᠃ ᠬᠣᠶᠠᠷ ᠣᠷᠭᠣᠳᠣᠤᠯ ᠶᠠᠭᠠᠷᠠᠬᠤ ᠶ᠋ᠢᠨ ᠲᠤᠢᠯ ᠳ᠋ᠤ᠌ ᠬᠦᠷᠴᠦ ᠪᠠᠢᠪᠠ᠃