ᠨᠠᠩᠰᠤᠯᠮᠠ ᠶᠢ ᠰᠤᠯᠠᠯᠠᠬᠤ ᠲᠡᠮᠡᠴᠡᠯ – ᠰ ᠂ ᠫᠦᠷᠪᠦ Нансулмааг суллах тэмцэл – С ᠂ Пүрэв
426ᠨᠠᠩᠰᠤᠯᠮᠠ ᠶᠢ ᠰᠤᠯᠠᠯᠠᠬᠤ ᠲᠡᠮᠡᠴᠡᠯ
ᠰ᠂ ᠫᠦᠷᠪᠦ
( ᠬᠣᠱᠣᠩ ᠥᠭᠦᠯᠡᠯᠭᠡ)
ᠠᠮᠠᠷᠠᠯᠲᠠ ᠪᠦᠬᠦᠨ ᠥᠪᠡᠷ ᠥᠪᠡᠷ ᠦ᠋ᠨ ᠳᠤᠷᠠᠲᠠᠢ ᠠᠮᠠᠷᠠᠭᠴᠢ᠂ ᠥᠪᠡᠷ ᠦ᠋ᠨ ᠱᠣᠭ ᠬᠣᠱᠣᠩ ᠶᠠᠷᠢᠶᠠ᠂ ᠠᠳᠠᠯ ᠶᠠᠪᠤᠳᠠᠯ᠂ ᠢᠨᠢᠶᠡᠳᠦ ᠨᠠᠷᠭᠢᠶᠠᠨ ᠲᠠᠢ ᠪᠠᠢᠳᠠᠭ᠃ ᠨᠠᠷᠠᠰᠤᠲᠤ ᠴᠤ᠌ ᠪᠠᠰᠠ ᠲᠡᠢᠮᠦ᠃ ᠲᠡᠷᠡ ᠵᠢᠯ ᠪᠢᠳᠡᠨ ᠦ᠌ ᠲᠠᠷᠭᠤᠨ ᠲᠤᠷᠠᠩᠬᠠᠢ᠂ ᠵᠢᠷᠭᠤᠭᠠᠨ ᠳᠣᠬᠢ ᠡᠷᠡ᠂ ᠵᠢᠷᠤᠭ ᠰᠢᠭ᠋ ᠭᠠᠭᠴᠠ ᠬᠡᠦᠬᠡᠨ᠂ ᠪᠣᠲᠣᠭᠣᠨ ᠤ᠋ ᠲᠤᠬᠠᠢ ᠰᠢᠨᠡᠬᠡᠨ ᠳᠠᠭᠤᠤ ᠶ᠋ᠢ ᠳᠤᠷᠠᠯᠠᠯ ᠤ᠋ᠨ ᠳᠠᠭᠤᠤ ᠮᠡᠲᠦ ᠰᠦᠵᠢᠷᠡᠨ ᠳᠠᠭᠤᠯᠵᠤ᠂ ᠴᠡᠨ ᠴᠠᠨ ᠤ᠋ ᠪᠣᠷᠣᠭᠠ ᠲᠩᠷᠢ ᠡᠴᠡ ᠳᠤᠰᠤᠯᠠᠭᠤᠯᠤᠭᠰᠠᠭᠠᠷ ᠨᠠᠷᠠᠰᠤᠲᠤ ᠳ᠋ᠤ᠌ ᠲᠠᠯᠪᠢᠭᠠᠳ ᠪᠠᠭᠤᠴᠢᠬᠠᠯᠠ᠃ ᠲᠡᠭᠦᠨ ᠢ᠋ ᠪᠡᠨ ᠨᠠᠰᠤᠨ ᠤ᠋ ᠵᠢᠷᠭᠠᠯ ᠭᠡᠵᠦ ᠰᠠᠨᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠨᠢᠭᠤᠭᠠᠳ ᠶᠠᠭᠠᠬᠢᠬᠤᠪ᠃ ᠪᠦᠲᠦᠨ ᠵᠢᠯ ᠪᠡᠶᠡ ᠪᠡᠶᠡ ᠪᠡᠨ ᠤᠲᠠᠰᠤ ᠪᠠᠷ ᠳᠠᠭᠤᠳᠠᠵᠤ ᠠᠯᠪᠠᠨ ᠭᠠᠵᠠᠷ ᠠᠷᠠᠭᠠᠳᠠᠵᠤ᠂ ᠳᠠᠷᠤᠭᠠ ᠨᠠᠷ ᠢ᠋ᠶ᠋ᠠᠨ ᠭᠣᠶᠣᠵᠤ᠂ ᠡᠴᠦᠰ ᠲᠤᠨᠢ ᠡᠭᠡᠯᠵᠢ ᠶᠢᠨ ᠠᠮᠠᠷᠠᠯᠲᠠ ᠪᠠᠨ ᠪᠦᠭᠦᠳᠡ ᠬᠠᠮᠲᠤ ᠠᠪᠤᠵᠠᠭᠠᠨ ᠠᠮᠠᠷᠠᠬᠤ ᠡᠷᠬᠡ ᠶᠢᠨ ᠪᠢᠴᠢᠭ ᠰᠠᠯᠭᠠᠭᠰᠠᠨ ᠤᠯᠤᠰ ᠴᠢᠨᠢ ᠪᠠᠶᠠᠷᠯᠠᠬᠤ ᠨᠢ ᠵᠥᠪ ᠪᠢᠵᠡ? ᠵᠥᠪ ᠰᠢᠦ ᠳᠡ᠃
ᠠᠮᠠᠷᠠᠯᠲᠠ ᠶ᠋ᠢᠨ ᠭᠣᠣᠯ ᠬᠠᠭᠠᠯᠭᠠᠨ ᠳᠡᠭᠡᠷᠡ ᠲᠠᠷᠭᠤᠯᠠᠵᠤ ᠲᠣᠰᠢᠢᠭᠰᠠᠨ ᠬᠡᠳᠦᠨ ᠭᠣᠯᠢᠭᠠᠷ ᠬᠦᠷᠡᠩ ᠵᠠᠯᠠᠭᠤ ᠵᠡᠷᠭᠡᠯᠡᠨ ᠵᠣᠭᠰᠣᠵᠤ ᠠᠦ᠋ᠲ᠋ᠣᠪᠦ᠋ᠰ ᠡᠴᠡ ᠪᠠᠭᠤᠵᠠᠭᠠᠬᠤ ᠪᠢᠳᠡᠨ ᠢ᠋ ᠬᠠᠷᠠᠨ ᠭᠠᠷ ᠬᠤᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠴᠡᠭᠡᠷ ᠦᠭᠡᠢ ᠵᠢᠭᠠᠵᠤ ᠴᠢᠩᠭᠠ ᠴᠢᠩᠭᠠ ᠬᠥᠬᠥᠷᠡᠯᠳᠦᠨᠡ᠃
ᠪᠢᠳᠡ ᠠᠮᠠᠷᠠᠭᠴᠢᠳ ᠤ᠋ᠨ ᠤᠯᠠᠮᠵᠢᠯᠠᠯ ᠢ᠋ ᠡᠪᠳᠡᠭᠰᠡᠨ ᠦᠭᠡᠢ᠂ ᠥᠷᠥᠭᠡ ᠪᠠᠢᠷᠢ ᠲᠠᠢ ᠪᠣᠯᠵᠤ ᠠᠪᠤᠭᠠᠳ《 ᠴᠸᠮᠤᠳᠠ( ᠠᠶᠠᠨ ᠤ᠋ ᠬᠠᠢᠷᠴᠠᠭ) ᠤ᠋ᠨ ᠪᠠᠶᠠᠷ》 ᠭᠡᠳᠡᠭ ᠦ᠋ᠨ ᠶᠣᠰᠣ ᠪᠠᠷ ᠡᠬᠢᠯᠡᠵᠡᠢ᠃ ᠪᠣᠷᠣᠭᠠᠨ ᠲᠠᠢ ᠳ᠋ᠤ᠌ ᠲᠡᠷᠡ ᠨᠢ ᠴᠦ᠍ ᠵᠦᠭᠡᠷ ᠶᠦᠮ ᠰᠢᠭ᠃ ᠭᠡᠮ ᠨᠢ ᠤᠮᠠᠭᠠᠷ ᠵᠢᠵᠢᠭ ᠥᠷᠥᠭᠡᠨ ᠳ᠋ᠦ᠍ ᠤᠲᠤᠭᠠ ᠰᠤᠭᠤᠨᠠᠭᠯᠠᠵᠤ᠂ ᠬᠡᠳᠦ ᠬᠡᠳᠦᠨ ᠬᠣᠭᠣᠰᠣᠨ ᠯᠣᠩᠬᠣ ᠪᠠᠨ ᠨᠢᠭᠡᠨ ᠪᠣᠯᠭᠣᠮᠵᠢ ᠦᠭᠡᠢ ᠡᠲᠡᠭᠡᠳ ᠦ᠋ᠨ ᠬᠠᠨᠴᠤᠢ ᠬᠣᠷᠮᠣᠢ ᠳ᠋ᠤ᠌ ᠥᠷᠭᠡᠨ ᠱᠠᠯᠠ ᠳᠡᠭᠡᠷᠡ ᠭᠠᠰᠠᠯᠠᠩ ᠲᠠᠢ ᠤᠨᠠᠪᠠ᠃ ᠪᠢᠳᠡᠨ ᠳᠠᠭᠤ ᠴᠢᠩᠭᠠᠷᠠᠵᠤ᠂ ᠠᠯᠢᠶᠠ ᠬᠣᠱᠣᠩ ᠶᠠᠷᠢᠶᠠ ᠭᠠᠯ ᠰᠢᠭ᠋ ᠳᠦᠷᠡᠯᠵᠡᠨ ᠪᠠᠢᠲᠠᠯᠠ ᠨᠢᠭᠡ ᠶᠡᠬᠡ ᠪᠣᠯᠭᠣᠮᠵᠢ ᠲᠠᠢ ᠬᠥᠮᠦᠨ ᠬᠠᠭᠠᠯᠭᠠ ᠲᠣᠭᠰᠢᠪᠠ᠃ ᠤᠷᠲᠤ ᠦᠰᠦᠲᠡᠢ᠂ ᠥᠨᠳᠥᠷ ᠬᠦᠵᠦᠭᠦᠦ ᠲᠡᠢ ᠴᠠᠭᠠᠨ ᠵᠠᠯᠠᠭᠤ ᠣᠷᠣᠵᠤ ᠢᠷᠡᠨ ᠡᠭᠦᠳᠡᠨ ᠳ᠋ᠦ᠍ ᠵᠣᠭᠰᠣᠭᠠᠳ᠄
— ᠴᠸᠮᠤᠲᠠ ᠶ᠋ᠢᠨ ᠪᠠᠶᠠᠷ ᠢ᠋ᠶ᠋ᠠᠨ ᠬᠢᠵᠦ ᠪᠠᠢᠨᠠ ᠤᠤ ᠭᠡᠵᠦ ᠪᠠᠬᠠᠲᠤᠬᠤ ᠠᠶᠠᠰ ᠲᠠᠢ ᠠᠰᠠᠭᠤᠪᠠ᠃
ᠪᠢ ᠲᠡᠭᠦᠨ ᠢ᠋ ᠲᠦᠷᠦᠭᠦᠬᠡᠨ ᠪᠣᠷᠣᠭᠠᠨ ᠳᠤᠮᠳᠠ ᠪᠢᠳᠡᠨ ᠢ᠋ ᠤᠭᠲᠤᠨ ᠵᠣᠭᠰᠣᠭᠰᠠᠨ ᠮᠥᠨᠥᠬᠢ《 ᠰᠠᠢᠬᠠᠨ ᠰᠡᠳᠬᠢᠯᠲᠦ》 ᠬᠥᠮᠦᠰ ᠦ᠋ᠨ ᠨᠢᠭᠡ ᠨᠢ ᠮᠥᠨ ᠭᠡᠳᠡᠭ ᠢ᠋ ᠬᠠᠷᠠᠭᠠᠳ ᠯᠠ ᠲᠠᠨᠢᠪᠠ᠃ ᠲᠡᠭᠦᠨ ᠦ᠌ ᠵᠠᠯᠢᠬᠠᠢ ᠬᠣᠷᠣᠨ ᠬᠣᠶᠠᠷ ᠨᠢᠳᠦ ᠬᠡᠳᠦᠨᠲᠡ ᠭᠢᠯᠠᠯᠵᠠᠨ ᠬᠠᠷᠠᠴᠠ ᠨᠢ ᠮᠠᠨ ᠤ᠋ ᠭᠠᠭᠴᠠ ᠬᠡᠦᠬᠡᠨ ᠦ᠌ ᠬᠠᠰ ᠴᠠᠭᠠᠨ ᠴᠢᠷᠠᠢ ᠳᠡᠭᠡᠷᠡ ᠬᠠᠯᠲᠤᠴᠢᠨᠠ᠃ ᠢᠷᠠᠭᠤ ᠨᠠᠢᠷᠠᠭᠴᠢ ᠵᠠᠯᠠᠭᠤ ᠮᠠᠨᠢ᠄
— ᠲᠡᠭᠡᠭᠰᠡᠨ ᠯᠡ ᠪᠣᠯᠵᠤ ᠪᠠᠢᠨᠠ ᠭᠡᠭᠰᠡᠭᠡᠷ ᠲᠠᠮᠠᠬᠢ ᠪᠠᠨ ᠰᠣᠷᠣᠨ ᠤᠲᠤᠭᠠ ᠶ᠋ᠢ ᠨᠢ ᠬᠠᠮᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠦᠯᠢᠶᠡᠬᠦ ᠳ᠋ᠦ᠍ ᠳᠡᠭᠡᠳᠦ ᠤᠷᠤᠭᠤᠯ ᠤ᠋ᠨ ᠬᠡᠳᠦᠨ ᠰᠡᠷᠪᠡᠭᠡᠷ ᠰᠠᠬᠠᠯ ᠳ᠋ᠤᠨᠢ ᠵᠢᠭᠤᠷᠠᠯᠳᠤᠨ ᠰᠠᠪᠰᠠᠨᠠ᠃ ᠭᠠᠳᠠᠨᠠ ᠠ᠋ᠴᠠ ᠣᠷᠣᠵᠤ ᠢᠷᠡᠭᠰᠡᠨ ᠵᠠᠯᠠᠭᠤ ᠪᠢᠳᠡᠨ ᠦ᠌ ᠬᠡᠰᠢᠭ ᠢ᠋ ᠬᠦᠷᠲᠡᠭᠡᠳ ᠨᠢᠳᠦ ᠨᠢ ᠵᠠᠯᠢᠲᠠᠢ ᠪᠠᠷ ᠡᠷᠭᠢᠯᠳᠦᠨ᠄
— ᠲᠠ ᠨᠠᠷ ᠢᠩᠭᠢᠵᠦ ᠰᠠᠭᠤᠬᠤ ᠳ᠋ᠠᠭᠠᠨ ᠬᠤᠪᠴᠠᠰᠤᠨ ᠤ᠋ ᠱᠦᠭᠦᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠭᠠᠯᠭᠠ ᠶ᠋ᠢ ᠨᠡᠭᠡᠭᠡᠴᠢᠬᠡ᠂ ᠲᠡᠭᠡᠪᠡᠯ ᠴᠣᠣᠵᠢᠨ ᠤ᠋ ᠨᠦᠬᠡ ᠪᠡᠷ ᠶᠠᠭᠤᠮᠠ ᠬᠠᠷᠠᠭᠳᠠᠬᠤ ᠦᠭᠡᠢ᠂ ᠠᠩᠸᠨ᠋ᠲ ( ᠲᠥᠯᠥᠭᠡᠯᠡᠭᠴᠢ) ᠶ᠋ᠢᠨ ᠬᠢ ᠬᠣᠢᠲᠤ ᠳᠡᠨᠵᠢ ᠳᠡᠭᠡᠷᠡ ᠪᠣᠢ᠂ ᠰᠥᠨᠢ ᠣᠴᠢᠭᠠᠳ ᠶᠠᠭᠤᠮᠠ ᠠᠪᠤᠭᠰᠠᠨ ᠴᠤ᠌ ᠪᠣᠯᠤᠨᠠ᠃ ᠲᠡᠳᠡᠨ ᠳ᠋ᠦ᠍ ᠪᠢ ᠲᠠ ᠨᠠᠷ ᠢ᠋ ᠵᠠᠬᠢᠨᠠ᠃ ᠬᠠᠷᠢᠨ ᠲᠠ ᠨᠠᠷ ᠠ᠋ᠴᠠ ᠨᠢᠭᠡ ᠶᠠᠭᠤᠮᠠ ᠭᠤᠶᠤᠬᠤ ᠭᠡᠰᠡᠨ ᠶᠦᠮ᠂ ᠨᠩᠰᠤᠯᠮᠠ ᠪᠠᠨ ᠥᠭᠭᠦᠭᠡᠴᠢ᠂ ᠬᠥᠵᠥᠷᠳᠡᠵᠦ ᠪᠠᠢᠭᠠᠳ ᠠᠪᠤᠭᠠᠳ ᠢᠷᠡᠨᠡ ᠭᠡᠪᠡ᠃ ᠪᠢᠳᠡ ᠪᠦᠬᠦᠨ ᠦ᠌ ᠠᠮᠢ ᠰᠢᠭ᠋ ᠭᠠᠭᠴᠠ ᠬᠡᠦᠬᠡᠨ ᠮᠠᠨᠢ ᠪᠥᠭᠡᠷᠡ ᠤᠷᠤᠭᠤ ᠬᠠᠯᠠᠭᠤ ᠣᠷᠭᠢᠭᠤᠯᠤᠨ ᠰᠢᠭᠢᠳᠦᠯᠡ᠃ ᠢᠷᠠᠭᠤ ᠨᠠᠢᠷᠠᠭᠴᠢ ᠮᠠᠨᠢ ᠢᠨᠢᠶᠡᠬᠦ ᠢᠷᠪᠠᠢᠬᠤ ᠬᠣᠶᠠᠷ ᠤ᠋ᠨ ᠵᠠᠪᠰᠠᠷ ᠤᠷᠤᠭᠤᠯ ᠬᠥᠳᠡᠯᠭᠡᠭᠰᠡᠨ ᠢ᠋ᠶ᠋ᠡᠨ᠄
— ᠢᠷᠡᠭᠡᠳ ᠤᠳᠠᠭᠠ ᠦᠭᠡᠢ ᠤᠤ ᠭᠡᠵᠦ ᠪᠠᠢᠨᠠ᠃
— ᠤᠳᠠᠭᠰᠠᠨ ᠠ᠋᠂ ᠤᠳᠠᠭᠰᠠᠨ᠂ ᠭᠤᠷᠪᠠᠨ ᠨᠩᠰᠤᠯᠮᠠ ᠪᠠᠢᠭᠰᠠᠨ ᠴᠢᠨᠢ ᠥᠴᠥᠭᠡᠳᠦᠷ ᠪᠤᠴᠠᠴᠢᠬᠠᠯᠠ ᠭᠡᠰᠡᠨ ᠢ᠋ᠶ᠋ᠡᠨ ᠣᠷᠣᠨ ᠤ᠋ ᠬᠥᠯ ᠳᠡᠭᠡᠷᠡ ᠰᠠᠨᠳᠠᠢᠯᠠᠭᠠᠳ ᠰᠠᠭᠤᠴᠢᠬᠠᠪᠠ᠂ ᠭᠠᠷᠬᠤ ᠶᠠᠩᠵᠤ ᠠᠯᠠᠭᠠ᠃
— ᠰᠠᠢᠬᠠᠨ ᠨᠠᠩᠰᠤᠯᠮᠠ ᠤᠤ?
— ᠶᠣᠰᠣᠲᠠᠢ ᠭᠤᠩᠬᠠᠵᠤ ᠥᠭᠭᠦᠨᠡ᠃
ᠪᠢᠳᠡ ᠬᠡᠳᠦ ᠨᠢᠳᠦ ᠪᠡᠨ ᠪᠦᠯᠲᠡᠷᠡᠲᠡᠯᠡ ᠢᠨᠢᠶᠡᠯᠳᠦᠪᠡ᠃
— ᠨᠡᠭᠡᠷᠡᠨ ᠥᠭᠭᠦᠴᠢᠬᠡ ᠯᠡ ᠳᠡ ᠭᠠᠭᠴᠠᠬᠠᠨ ᠴᠠᠭ᠃ ᠶᠦᠨᠳᠡᠩ ᠨᠢ ᠠᠮᠠᠯᠠᠭᠰᠠᠨ ᠳ᠋ᠠᠭᠠᠨ ᠬᠦᠷᠳᠡᠭ ᠭᠡᠭᠡ ᠰᠢᠦ ᠭᠡᠭᠰᠡᠭᠡᠷ ᠭᠠᠷ ᠢ᠋ᠶ᠋ᠠᠨ ᠰᠠᠯᠠᠭᠠᠪᠴᠢᠯᠠᠨ ᠡᠪᠦᠳᠦᠭ ᠳᠤᠭᠤᠢᠯᠳᠤᠪᠠ᠃
— ᠶᠠᠳᠠᠬᠤ ᠳ᠋ᠠᠭᠠᠨ ᠬᠣᠷᠤᠯᠮᠠ ᠣᠯᠳᠠᠬᠤ ᠶᠤᠮ᠂ ᠨᠢᠭᠡ ᠬᠣᠷᠯᠤᠮᠠ ᠥᠩᠭᠡᠷᠡᠭᠰᠡᠨ ᠵᠢᠯ ᠪᠠᠢᠭᠰᠠᠨ ᠶᠤᠮ᠂ ᠵᠢᠩᠬᠢᠨᠢ ᠬᠣᠷᠯᠤᠮᠠ ᠭᠡᠭᠰᠡᠭᠡᠷ ᠰᠠᠨᠠᠭᠠᠰᠢᠷᠠᠨ ᠬᠤᠷᠤᠭᠤ ᠪᠠᠨ ᠬᠠᠪᠰᠤᠨ ᠳᠤᠤᠭᠠᠷᠭᠠᠭᠰᠠᠨ ᠢ᠋ᠶ᠋ᠠᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠪᠣᠢ ᠲᠠᠮᠠᠬᠢᠨ ᠠ᠋ᠴᠠ ᠨᠢᠭᠡ ᠶ᠋ᠢ ᠴᠡᠮᠴᠡᠭᠡᠷᠬᠡᠨ ᠠᠪᠴᠤ ᠠᠰᠠᠭᠠᠪᠠ᠃
— ᠮᠠᠨ ᠤ᠋ ᠡᠨᠡ ᠴᠦ᠍ ᠨᠠᠩᠰᠤᠯᠮᠠ ᠪᠢᠰᠢ ᠳᠡ ᠭᠡᠵᠦ ᠪᠢ ᠬᠡᠯᠡᠯᠡ᠃
— ᠪᠦᠭᠦᠳᠡ ᠠᠳᠠᠯᠢᠬᠠᠨ᠂ ᠬᠤᠳᠠᠯ ᠭᠡᠪᠡᠯ ᠭᠠᠷᠭᠠᠭᠠᠳ ᠭᠠᠭᠴᠠᠭᠠᠷ ᠢ᠋ ᠨᠢ ᠶᠠᠪᠤᠭᠤᠯᠤᠭᠠᠳ ᠦᠵᠡ᠂ ᠬᠣᠩᠭᠢᠯ ᠤ᠋ᠨ ᠲᠡᠷᠡ ᠴᠣᠩᠬᠣ ᠬᠦᠷᠴᠢᠬᠡᠭᠡᠳ ᠯᠡ ᠡᠷᠭᠢᠭᠡᠳ ᠢᠷᠡᠬᠦ ᠳ᠋ᠦ᠍ ᠬᠦᠷᠦᠯᠴᠡᠭᠡ ᠲᠡᠢ ᠭᠡᠮᠡᠨ ᠵᠠᠯᠠᠭᠤ ᠬᠦᠵᠦᠭᠦᠦ ᠤᠯᠠᠢᠯᠭᠠᠨ ᠮᠡᠳᠬᠡᠪᠡ( ᠵᠢᠳᠬᠦᠬᠦ)᠃
— ᠨᠡᠭᠡᠷᠡᠨ ᠲᠡᠭᠡᠶᠡ᠂ ᠠᠢ ᠪᠣᠯᠬᠤ ᠦᠭᠡᠢ ᠭᠡᠵᠦ ᠪᠢᠳᠡ ᠬᠡᠳᠦ ᠮᠠᠷᠭᠤᠨ ᠱᠤᠤᠭᠢᠵᠤ ᠡᠴᠦᠰ ᠲᠦ ᠮᠠᠨ ᠤ᠋《 ᠭᠷᠥ᠋ᠫ( ᠠᠩᠭᠢ) ᠶ᠋ᠢᠨ》 ᠳᠠᠷᠤᠭᠠ ᠪᠣᠯᠬᠤ ᠢᠷᠠᠭᠤ ᠨᠠᠢᠷᠠᠭᠴᠢ ᠶ᠋ᠢᠨ ᠰᠢᠢᠳᠪᠦᠷᠢ ᠪᠡᠷ ᠲᠤᠰᠢᠶᠠᠵᠤ ᠦᠵᠡᠬᠦ ᠪᠡᠷ ᠪᠣᠯᠪᠠ᠃ ᠬᠡᠦᠬᠡᠨ ᠮᠠᠨᠢ ᠬᠥᠭᠡᠷᠦᠬᠦᠢ ᠬᠣᠩᠭᠢᠯ ᠤ᠋ᠨ ᠴᠠᠭᠠᠳᠤ ᠪᠦᠯᠦᠭ ᠦ᠋ᠨ ᠴᠣᠩᠬᠣ ᠤᠷᠤᠭᠤ ᠠᠶᠤᠵᠤ ᠢᠴᠢᠭᠰᠡᠭᠡᠷ ᠴᠢᠭᠯᠡᠨ᠂ ᠠᠷᠤ ᠠ᠋ᠴᠠ ᠨᠢ ᠰᠢᠨᠡ ᠲᠠᠨᠢᠯ《 ᠶᠥᠨᠳᠡᠩ》 ᠮᠠᠨᠢ ᠵᠢᠷᠭᠠᠯ ᠲᠠᠢ ᠬᠥᠮᠦᠨ ᠰᠢᠭ ᠳᠡᠪᠬᠡᠯᠵᠡᠭᠰᠡᠭᠡᠷ ᠭᠠᠷᠪᠠ᠃ ᠪᠢᠳᠡ ᠬᠠᠭᠠᠯᠭᠠ ᠪᠠᠷ ᠪᠦᠯᠲᠡᠯᠵᠡ ᠠᠷᠤ ᠠ᠋ᠴᠠ ᠨᠢ ᠬᠠᠷᠠᠵᠠᠭᠠᠯᠠ᠃ ᠭᠡᠨᠡᠳᠲᠡ ᠨᠢᠭᠡ ᠮᠠᠭᠤ ᠥᠷᠥᠭᠡᠨ ᠦ᠌ ᠬᠠᠭᠠᠯᠭᠠ ᠨᠡᠭᠡᠭᠡᠭᠳᠡᠨ ᠶᠥᠨᠳᠡᠩ ᠬᠡᠦᠬᠡᠨ ᠦ᠌ ᠮᠠᠨᠢ ᠳᠠᠭᠤ ᠶ᠋ᠢ ᠬᠠᠲᠠᠭᠠᠨ( ᠴᠤᠤᠷᠢᠶᠠᠲᠤᠭᠤᠯᠤᠨ) ᠰᠠᠷᠪᠠᠯᠵᠠᠭᠤᠯᠤᠭᠰᠠᠭᠠᠷ ᠲᠡᠪᠡᠷᠢᠭᠡᠳ ᠣᠷᠣᠴᠢᠬᠠᠬᠤ ᠨᠢ ᠲᠡᠷᠡ᠃ ᠵᠢᠷᠭᠤᠭᠠᠨ ᠮᠤᠨᠳᠠᠭ ᠡᠷᠡ ᠪᠢᠳᠡ ᠨᠢᠭᠡᠨ ᠵᠡᠷᠭᠡ ᠤᠤᠬᠠᠢᠯᠠᠨ ᠳᠠᠪᠬᠢᠵᠤ ᠬᠦᠷᠪᠡ᠃ ᠲᠡᠳᠡ ᠬᠠᠭᠠᠯᠭᠠ ᠪᠠᠨ ᠠᠯᠢ ᠬᠡᠳᠦᠢᠨ ᠦ᠌ ᠲᠦᠭᠵᠢᠵᠦ ᠠᠮᠵᠢᠵᠠᠢ᠃ ᠪᠠᠯᠪᠠᠭᠠᠳ ᠪᠠᠯᠪᠠᠭᠠᠳ ᠨᠡᠮᠡᠷᠢ ᠪᠠᠢᠭᠰᠠᠨ ᠦᠭᠡᠢ᠃
— ᠨᠠᠭᠠᠳᠤ ᠬᠥᠵᠥᠷ ᠴᠢᠨᠢ ᠴᠢᠨᠦᠬᠢ ᠰᠢᠦ᠃
— ᠦᠭᠡᠢ ᠠ᠋᠂ ᠪᠢ ᠲᠣᠭᠯᠠᠬᠤ ᠦᠭᠡᠢ᠃
— ᠲᠣᠭᠯᠠᠬᠤ ᠯᠠ ᠪᠣᠯᠤᠨᠠ ᠳᠠ᠃
— ᠬᠠᠮᠲᠤ ᠢᠷᠡᠭᠰᠡᠨ ᠶᠥᠨᠳᠡᠩ ᠦ᠋ᠳ ᠴᠢᠨᠢ ᠶᠠᠭᠤ ᠬᠢᠳᠡᠭ ᠤᠯᠤᠰ ᠪᠣᠢ ᠪᠦᠭᠦᠳᠡ ᠶ᠋ᠢ ᠨᠢ ᠬᠡᠯᠡ ᠨᠠᠶᠠ! ᠬᠡᠯᠡᠪᠡᠯ ᠭᠤᠷᠪᠠᠨ ᠲᠣᠭᠯᠠᠯᠲᠠ ᠶ᠋ᠢᠨ ᠳᠠᠷᠠᠭᠠ ᠰᠤᠯᠠᠯᠠᠨ ᠲᠠᠯᠪᠢᠬᠤ ᠪᠣᠯᠤᠨᠠ᠃
ᠬᠡᠦᠬᠡᠨ ᠮᠠᠨᠢ ᠠᠢᠳᠠᠰᠤᠲᠤ ᠨᠠᠮᠬᠠᠨ ᠳᠠᠭᠤ ᠪᠠᠷ ᠶᠠᠷᠢᠬᠤ ᠨᠢ ᠬᠣᠭᠣᠯᠠᠢ ᠳᠡᠭᠡᠷᠡ ᠨᠢ ᠨᠢᠯᠪᠤᠰᠤ ᠴᠡᠴᠡᠯᠵᠡᠭᠡᠳ ᠪᠠᠢᠬᠤ ᠰᠢᠭ᠋ ᠰᠠᠨᠠᠭᠳᠠᠨ ᠳᠣᠲᠣᠷᠠ ᠤᠯᠠᠮ ᠴᠤ᠌ ᠡᠪ ᠦᠭᠡᠢ ᠪᠣᠯᠤᠯᠠ᠃
— ᠨᠢᠭᠡ ᠨᠢ ᠢᠷᠠᠭᠤ ᠨᠠᠢᠷᠠᠭᠴᠢ᠂ ᠬᠣᠶᠠᠷ ᠨᠢ ᠰᠤᠷᠪᠤᠯᠵᠢᠯᠠᠭᠴᠢ᠂ ᠪᠠᠰᠠ ᠨᠢᠭᠡ ᠨᠢ ᠵᠦᠴᠦᠭᠡ ᠶ᠋ᠢᠨ ᠵᠣᠬᠢᠶᠠᠯᠴᠢ᠂ ᠨᠥᠭᠦᠭᠡ ᠬᠣᠶᠠᠷ ᠨᠢ ᠵᠢᠷᠤᠭᠠᠴᠢ ᠭᠡᠲᠡᠯᠡ ᠲᠡᠳᠡ ᠪᠡᠶᠡᠰᠦᠨ ᠬᠥᠬᠥᠷᠡᠯᠳᠦᠵᠦ᠄
— ᠤᠴᠢᠷ ᠮᠡᠳᠡᠬᠦ ᠤᠯᠤᠰ ᠪᠠᠢᠨᠠ᠂ ᠵᠠ ᠲᠠᠷᠢᠬᠢ ᠪᠠᠨ ᠪᠠᠷᠢᠬᠤ ᠤᠤ? ᠲᠠᠯᠠᠴᠠᠬᠤ ᠤᠤ? ᠭᠡᠵᠦ ᠳᠤᠭᠤᠯᠳᠠᠪᠠ᠃
— ᠨᠠᠭᠠᠳᠤ ᠬᠠᠭᠠᠯᠭᠠ ᠪᠠᠨ ᠣᠩᠭᠣᠢᠯᠭᠠ᠂ ᠣᠩᠭᠤᠢᠯᠠᠭᠠᠬᠤ ᠦᠭᠡᠢ ᠪᠣᠯ ᠡᠪᠳᠡᠯᠡ ᠭᠡᠵᠦ ᠨᠢᠭᠡ ᠰᠦᠷᠳᠡᠭᠦᠯᠪᠡ᠃
— ᠡᠢᠮᠦ ᠶᠠᠭᠤᠮᠠ ᠪᠢᠰᠢᠭᠦᠢ ᠯᠡ ᠦᠵᠡᠭᠰᠡᠨ ᠬᠠᠭᠠᠯᠭᠠ ᠭᠡᠵᠦ ᠨᠢᠭᠡ ᠵᠤᠩᠭᠢᠨᠠᠭᠰᠠᠨ ᠳᠠᠭᠤ ᠲᠠᠢ ᠨᠥᠬᠥᠷ ᠦᠯᠦ ᠲᠣᠭᠣᠪᠠ᠃
— ᠲᠡᠭᠡᠪᠡᠯ ᠠᠮᠠᠷᠠᠯᠲᠠ ᠶ᠋ᠢᠨ ᠵᠥᠪᠯᠡᠯ ᠦ᠋ᠨ ᠳᠠᠷᠤᠭᠠ ᠳ᠋ᠤ᠌ ᠬᠡᠯᠡᠶᠡ ᠭᠡᠵᠦ ᠪᠠᠰᠠ ᠨᠢᠭᠡ ᠮᠠᠨᠢ ᠮᠡᠷᠭᠡᠨ ᠰᠠᠨᠠᠭᠠ ᠰᠡᠳᠦᠬᠦ ᠶ᠋ᠢ ᠨᠥᠭᠦᠭᠡ ᠤᠷᠲᠤ ᠴᠢᠬᠢᠳᠡᠨ ᠨᠦ᠍ᠭᠦᠳ ᠰᠣᠨᠣᠰᠴᠤ ᠠᠮᠵᠢᠵᠠᠢ᠃
— ᠠᠮᠠᠷᠬᠠᠴᠢᠳ ᠪᠡᠶᠡ ᠪᠡᠶᠡ ᠳ᠋ᠡᠭᠡᠨ ᠬᠠᠢᠷᠠ ᠲᠠᠢ ᠪᠠᠢᠳᠠᠭ ᠶᠤᠮ ᠰᠢᠦ ᠭᠡᠪᠡ᠃ ᠬᠠᠭᠠᠯᠭᠠᠨ ᠳ᠋ᠤᠨᠢ ᠬᠣᠰᠢᠭᠤ ᠪᠠᠨ ᠣᠢᠷᠠᠳᠤᠭᠤᠯᠵᠤ ᠪᠠᠢᠭᠠᠳ᠄
— ᠶᠥᠨᠳᠡᠩ ᠦ᠋ᠳ ᠠ᠋᠂ ᠰᠢᠯ ᠠᠷᠢᠬᠢ ᠥᠭᠭᠦᠶᠡ᠂ ᠨᠠᠩᠰᠤᠯᠮᠠ ᠶ᠋ᠢ ᠰᠤᠯᠠᠯᠠ ᠭᠡᠪᠡ᠃
— ᠭᠠᠭᠴᠠ ᠰᠢᠯ ᠶᠠᠭᠤᠮᠠ ᠪᠠᠷ ᠶᠠᠭᠠᠬᠢᠬᠤ ᠴᠤ᠌ ᠪᠢᠯᠡ ᠳᠠ᠃
— ᠲᠡᠭᠡᠪᠡᠯ ᠬᠣᠶᠠᠷ᠃
— ᠪᠢᠳᠡ ᠨᠠᠢ᠍ᠮᠠᠭᠤᠯᠠ ᠪᠠᠢᠨᠠ᠂ ᠳᠥᠷᠪᠡ ᠶ᠋ᠢ ᠲᠠ ᠨᠠᠷ ᠥᠨᠥᠳᠥᠷ ᠢᠷᠡᠭᠰᠡᠨ ᠶᠠᠭᠤᠮᠠ ᠲᠠᠢ ᠪᠠᠢᠬᠤ ᠶᠣᠰᠣᠲᠠᠢ᠃
— ᠨᠠᠩᠰᠤᠯᠮᠠ ᠴᠤ᠌ ᠭᠡᠵᠦ ᠨᠠᠩᠰᠤᠯᠮᠠ ᠶᠤᠮ ᠠ᠋ ᠭᠡᠵᠦ ᠲᠡᠳᠡᠨ ᠦ᠌ ᠨᠢᠭᠡ ᠪᠠᠬᠠᠳᠤᠬᠤ ᠶ᠋ᠢ ᠰᠣᠨᠣᠰᠤᠭᠠᠳ ᠮᠢᠨᠦ ᠠᠭᠤᠷ ᠬᠦᠷᠪᠡ᠃ ᠪᠢᠳᠡ ᠤᠴᠢᠷ ᠢ᠋ᠶ᠋ᠠᠨ ᠣᠯᠵᠤ ᠴᠥᠬᠥᠨ ᠬᠣᠩᠭᠢᠯ ᠳ᠋ᠤ᠌ ᠬᠣᠯᠬᠢᠵᠤ ᠪᠠᠢᠯᠠ᠃
— ᠳᠤᠩᠰᠢᠭᠤᠯ ᠳ᠋ᠤ᠌ ᠪᠢᠴᠢᠨᠡ ᠰᠢᠦ ᠭᠡᠵᠦ ᠪᠢ ᠬᠠᠭᠠᠯᠭᠠ ᠶ᠋ᠢ ᠨᠢ ᠳᠡᠯᠲᠦᠨ ᠬᠠᠰᠬᠢᠷᠪᠠ᠃
— ᠠᠰᠢᠭᠦᠢ᠂ ᠰᠣᠨᠢᠨ ᠳ᠋ᠤ᠌ ᠨᠡᠷᠡ ᠪᠡᠨ ᠲᠠᠯᠪᠢᠭᠤᠯᠵᠤ ᠭᠢᠯᠠᠢᠬᠤ ᠨᠢ᠃ ᠲᠡᠭᠡᠪᠡᠯ ᠴᠦ᠍ ᠲᠡᠷᠡ ᠰᠣᠨᠢᠨ ᠢ᠋ ᠴᠢᠨᠢ ᠵᠠᠬᠢᠶᠠᠯᠠᠨᠠ ᠰᠢᠦ ᠭᠡᠵᠦ ᠪᠠᠢᠨᠠ᠃
— ᠮᠠᠭᠤ ᠰᠠᠢᠨ ᠪᠠᠯᠭᠠᠨ ᠨᠤᠭᠤᠳ ᠠ᠋! ᠭᠡᠵᠦ ᠪᠢ ᠬᠠᠮᠤᠭ ᠮᠠᠭᠤ ᠦᠭᠡ ᠪᠡᠨ ᠬᠡᠯᠡᠪᠡ᠃
— ᠲᠡᠷᠡ ᠴᠦ᠍ ᠳᠡᠮᠡᠢ ᠰᠢᠦ᠂ ᠲᠤᠭᠯᠠᠭᠠᠮᠠ ᠬᠠᠲᠠᠭᠤᠳᠠᠨᠠ᠃ ᠡᠨᠳᠡ ᠵᠥᠪᠬᠡᠨ ᠶᠥᠨᠳᠡᠩ ᠨᠠᠩᠰᠤᠯᠮᠠ ᠪᠠᠢᠳᠠᠭ ᠭᠠᠵᠠᠷ ᠭᠡᠵᠦ ᠨᠢᠭᠡ ᠨᠢ ᠲᠣᠭᠰᠢᠷᠠᠬᠤ ᠠᠶᠠᠲᠠᠢ ᠬᠡᠯᠡᠪᠡ᠃
— ᠳᠥᠷᠪᠡᠨ ᠰᠢᠯ ᠠᠷᠢᠬᠢ ᠠᠪᠴᠤ ᠭᠤᠳᠤᠷ!
— ᠠᠷᠢᠬᠢ ᠪᠠᠨ ᠴᠣᠩᠬᠣ ᠪᠠᠷ ᠠᠪᠤᠭᠠᠳ ᠢᠷᠡ᠂ ᠵᠡᠭᠦᠨ ᠲᠠᠯᠠ ᠠ᠋ᠴᠠ ᠭᠤᠷᠪᠠᠳᠠᠬᠢ ᠨᠢ ᠰᠢᠦ᠃ ᠭᠠᠳᠠᠭᠤᠷ ᠲᠣᠭᠣᠷᠢᠭᠠᠳ ᠢᠷᠡᠭᠡᠷᠡᠢ᠃
ᠳᠥᠷᠪᠡᠨ ᠰᠢᠯ ᠠᠷᠢᠬᠢ ᠬᠡᠣᠳᠠᠢ ᠳ᠋ᠤ᠌ ᠬᠢᠵᠦ ᠪᠠᠷᠢᠭᠰᠠᠭᠠᠷ ᠪᠣᠷᠣᠭᠠᠨ ᠳᠤᠮᠳᠠᠭᠤᠷ ᠳᠠᠭᠤᠴᠢᠵᠤ ᠣᠴᠢᠪᠠ᠃ ᠬᠡᠦᠬᠡᠨ ᠢ᠋ ᠮᠠᠨᠢ ᠲᠥᠪᠭᠡᠭᠡᠷ ᠳᠥᠷᠪᠡᠯᠵᠢᠨ ᠬᠣᠶᠠᠷ ᠡᠷᠡ ᠳᠤᠮᠳᠠ ᠪᠠᠨ ᠬᠠᠰᠢᠵᠤ ᠰᠠᠭᠤᠭᠠᠳ ᠭᠠᠷ ᠲᠤᠨᠢ ᠦᠩᠭᠡᠭᠳᠡᠵᠦ ᠬᠠᠭᠤᠴᠢᠷᠠᠭᠰᠠᠨ ᠮᠠᠭᠤ ᠬᠥᠵᠥᠷ ᠦ᠋ᠨ ᠲᠠᠮᠲᠤᠭ ᠪᠠᠷᠢᠭᠤᠯᠵᠠᠢ᠃ ᠨᠥᠭᠦᠭᠡ ᠭᠠᠢᠬᠠᠯ ᠶᠥᠨᠳᠡᠩ ᠦ᠋ᠳ ᠠᠷᠢᠬᠢ ᠶ᠋ᠢ ᠮᠠᠨᠢ ᠠᠪᠴᠢᠬᠠᠭᠠᠳ ᠴᠠᠭ ᠤ᠋ᠨ ᠳᠠᠷᠠᠭᠠ ᠨᠠᠩᠰᠣᠯᠮᠠ ᠶ᠋ᠢ ᠰᠤᠯᠠᠯᠠᠨᠠ᠂ ᠲᠡᠷᠡ ᠬᠦᠷᠲᠡᠯᠡ ᠪᠢᠲᠡᠭᠡᠢ ᠣᠢᠮᠡᠭᠥᠯᠤᠭᠡᠷᠡᠢ ᠭᠡᠮᠡᠨ ᠭᠤᠶᠤᠪᠠ᠃
— ᠠᠮᠠᠷᠠᠯᠲᠠ ᠭᠡᠵᠢ! ᠭᠡᠮᠡᠨ ᠨᠢᠭᠡ ᠮᠠᠨᠢ ᠰᠠᠨᠠᠭᠠ ᠠᠯᠳᠠᠪᠠ᠃
ᠨᠠᠩᠰᠤᠯᠮᠠ ᠶ᠋ᠢᠨ ᠡᠷᠬᠡ ᠴᠢᠯᠥᠭᠡᠨ ᠦ᠌ ᠲᠥᠯᠥᠭᠡ ᠲᠡᠮᠡᠴᠡᠭᠰᠡᠨ ᠪᠢᠳᠡᠨ ᠦ᠌ ᠲᠡᠮᠡᠴᠡᠯ ᠲᠡᠷᠡ ᠣᠷᠣᠢᠵᠢᠨ ᠦᠷᠭᠦᠯᠵᠢᠯᠡᠵᠦ᠂ ᠪᠢᠳᠡ ᠠᠮᠠᠷᠠᠯᠲᠠ ᠶ᠋ᠢᠨ ᠪᠠᠢᠷᠢ ᠶ᠋ᠢ ᠲᠣᠭᠣᠷᠢᠵᠤ ᠭᠠᠷᠴᠤ ᠣᠷᠣᠵᠤ ᠭᠦᠶᠦᠯᠳᠦᠭᠰᠡᠭᠡᠷ ᠤᠰᠤᠨ ᠭᠦᠵᠡᠭᠡ ᠪᠣᠯᠲᠠᠯᠠ ᠨᠣᠷᠤᠭᠰᠠᠨ ᠪᠥᠭᠡᠳ ᠢᠯᠠᠯᠲᠠ ᠪᠠᠢᠭᠤᠯᠵᠤ ᠴᠢᠳᠠᠭᠰᠠᠨ ᠦᠭᠡᠢ᠂ ᠠᠵᠠ ᠪᠠᠷ ᠣᠷᠣᠢ ᠶ᠋ᠢᠨ ᠬᠣᠭᠣᠯᠠᠨ ᠤ᠋ ᠴᠠᠭ ᠪᠣᠯᠵᠤ ᠮᠤᠬᠤᠷ ᠭᠠᠴᠢᠯᠠᠩ ᠠ᠋ᠴᠠ ᠪᠢᠳᠡᠨ ᠢ᠋ ᠠᠪᠤᠷᠠᠭᠰᠠᠨ ᠪᠥᠭᠡᠳ ᠨᠠᠩᠰᠤᠯᠮᠠ ᠮᠠᠨᠢ ᠪᠢᠳᠡᠨ ᠳ᠋ᠦ᠍᠄
— ᠲᠠ ᠨᠠᠷ ᠰᠢᠭ᠋ ᠥᠭᠡᠳᠡ ᠦᠭᠡᠢ ᠡᠷᠡᠰ ᠢ᠋ᠶ᠋ᠡᠷ ᠬᠣᠷᠸᠠ ᠳᠦᠭᠦᠷᠦᠭᠰᠡᠨ ᠪᠣᠯ ᠶᠠᠭᠠᠬᠢᠨᠠ ᠭᠡᠮᠡᠨ ᠮᠠᠨ ᠤ᠋ ᠪᠠᠨ ᠨᠢᠭᠤᠷ ᠢ᠋ ᠤᠯᠠᠢᠯᠭᠠᠨ ᠵᠢᠮᠡᠯᠡᠪᠡ᠃ ᠦᠨᠡᠨ ᠰᠢᠦ ᠳᠡ᠂ ᠵᠢᠷᠭᠤᠭᠠ ᠶ᠋ᠢᠨ ᠵᠢᠷᠭᠤᠭᠠᠨ ᠡᠷᠡ ᠬᠥᠮᠦᠨ ᠢᠩᠭᠢᠵᠦ ᠭᠡᠨᠡᠳᠡᠨᠡ ᠭᠡᠵᠦ ᠪᠠᠢᠬᠤ ᠤᠤ?
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠪᠠᠭᠠᠲᠤᠷ
ᠬᠢᠨᠠᠭ᠍ᠴᠢ : ᠲᠤᠭ᠍ᠴᠢ ᠰᠠᠷᠠᠨᠠ
2024᠂1᠂ 5 ᠦ᠌ ᠡᠳᠦᠷ