ᠲᠠᠷᠯᠠᠨ ᠴᠣᠬᠣᠷ ᠲᠠᠷᠭᠤᠨ ᠠᠯᠠᠭ ᠬᠣᠶᠠᠷ – ᠰ ᠂ ᠣᠶᠣᠨ Тарлан цоохор тарган алаг хоёр – С ᠂ Оюун
288ᠲᠠᠷᠯᠠᠨ ᠴᠣᠬᠣᠷ ᠂ ᠲᠠᠷᠭᠤᠨ ᠠᠯᠠᠭ ᠬᠣᠶᠠᠷ
ᠰ ᠂ ᠣᠶᠤᠨ
( ᠱᠣᠭ ᠰᠢᠯᠦᠭ)
ᠨᠢᠭᠡ
ᠨᠠᠮᠤᠷ ᠤ᠋ᠨ ᠰᠠᠷᠠ ᠶ᠋ᠢᠨ ᠰᠡᠬᠦᠯᠭᠡᠨ ᠢ᠋ᠶ᠋ᠡᠷ
ᠮᠠᠯ ᠵᠠᠭᠠᠵᠠᠯᠠᠵᠤ ① ᠡᠬᠢᠯᠡᠵᠡᠢ
ᠨᠠᠷᠢᠨ ᠮᠡᠷᠭᠡᠵᠢᠯ ᠦ᠋ᠨ ᠮᠡᠳᠡᠯᠲᠡᠨ ᠨᠦ᠍ᠭᠦᠳ
ᠨᠠᠭᠠᠰᠢ ᠴᠠᠭᠠᠰᠢ ᠬᠥᠯᠬᠦᠯᠡ᠃
ᠡᠪᠡᠰᠦ ᠵᠠᠵᠢᠯᠬᠤ ᠰᠢᠳᠦ ᠦᠭᠡᠢ
ᠥᠲᠡᠯᠡ ᠬᠥᠭᠰᠢᠨ ᠢ᠋ ᠨᠢ ᠢᠯᠭᠠᠯᠠ
ᠡᠪᠦᠯ ᠥᠳᠥᠬᠦ ᠪᠢᠳ ᠦᠭᠡᠢ
ᠡᠪᠡᠳᠴᠢᠨ ᠲᠡᠢ ᠳᠣᠷᠣᠢ ᠶ᠋ᠢ ᠨᠢ ᠰᠠᠯᠭᠠᠯᠠ᠃
ᠦᠬᠡᠷ ᠮᠠᠯᠯᠠᠭᠴᠢ ᠲᠡᠷᠡ ᠭᠤᠸᠠᠢ
ᠦᠨᠢᠶᠡ ᠨᠢᠭᠡ ᠶ᠋ᠢ ᠴᠣᠬᠢᠭᠤᠯᠤᠯᠠ
ᠡᠪᠦᠯ ᠦ᠋ᠨ ᠢᠳᠡᠰᠢ ᠲᠡᠢ ᠪᠣᠯᠤᠭᠰᠠᠨ ᠳ᠋ᠠᠭᠠᠨ
ᠰᠠᠨᠠᠭᠠ ᠠᠮᠠᠷᠠᠨ ᠴᠣᠬᠣᠭᠤᠯᠤᠯᠠ᠃
ᠬᠣᠶᠠᠷ
ᠠᠭᠴᠢᠭᠠ ᠪᠠᠭᠴᠠᠭᠠ ᠪᠣᠯᠠᠬᠠᠢᠬᠰᠠᠨ
ᠠᠷᠠᠰᠤ ᠨᠢ ᠢᠵᠠᠷᠠᠲᠠᠯᠠ ᠪᠠᠯᠬᠠᠢᠭᠰᠠᠨ
ᠠᠷᠠᠭᠠ ᠰᠢᠳᠦ ᠨᠢ ᠵᠠᠯᠠᠭᠤᠬᠠᠨ
ᠠᠯᠠᠭ ᠦᠨᠢᠶᠡ ᠬᠠᠮᠢᠭᠠ ᠣᠴᠢᠴᠢᠬᠠᠪᠠ?
ᠬᠣᠩᠭᠣᠷ ᠨᠠᠮᠤᠷ ᠢ᠋ᠶ᠋ᠠᠷ ᠵᠠᠭᠠᠵᠠᠯᠠᠭᠰᠠᠨ
ᠬᠣᠭᠣᠯᠠᠨ ᠳ᠋ᠤ᠌ ᠲᠣᠬᠣᠭᠠᠨ ᠳ᠋ᠤ᠌ ᠫᠠᠢᠵᠠᠯᠠᠭᠰᠠᠨ
ᠲᠠᠷᠭᠤᠨ ᠴᠣᠬᠣᠷ ᠤ᠋ᠨ ᠵᠣᠯᠢᠶᠠᠰᠤᠨ ᠳ᠋ᠤ᠌
ᠲᠠᠯᠢᠢᠭᠴᠢ ᠪᠣᠯᠭᠠᠨ ᠵᠠᠵᠣᠯᠠᠭᠰᠠᠨ!
ᠬᠦᠢᠲᠡᠨ ᠡᠢᠮᠦ ᠶᠠᠷᠢᠶᠠ
ᠠᠮᠠ ᠳᠠᠮᠵᠢᠨ ᠰᠠᠳᠠᠷᠠᠪᠠ
ᠬᠣᠢᠲᠤᠨ ᠬᠠᠪᠤᠷ ᠤ᠋ᠨ ᠬᠢᠨᠢ ᠦᠶᠡ ᠳ᠋ᠦ᠍
ᠭᠡᠮ ᠪᠤᠷᠤᠭᠤᠲᠠᠨ ᠨᠢ ᠲᠣᠳᠣᠷᠠᠪᠠ᠃
ᠭᠤᠷᠪᠠ
ᠵᠠᠭᠠᠵᠠ ᠭᠡᠮᠡᠨ ᠴᠣᠬᠣᠭᠤᠯᠤᠭᠰᠠᠨ
ᠲᠡᠷᠯᠡᠨ ᠴᠣᠬᠣᠷ ᠦᠨᠢᠶᠡ ᠶ᠋ᠢ
ᠵᠠᠯᠢ ᠶ᠋ᠢᠨ ᠡᠵᠡᠨ《 ᠲᠡᠷᠡ ᠭᠤᠸᠠᠢ》
ᠲᠠᠷᠭᠤᠨ ᠠᠯᠠᠭ ᠢ᠋ᠶ᠋ᠠᠷ ᠰᠣᠯᠢᠵᠤ
ᠡᠪᠦᠯ ᠦ᠋ᠨ ᠭᠦᠨᠴᠡᠭ ② ᠪᠣᠯᠭᠠᠭᠰᠠᠨ
ᠬᠠᠶᠠᠭᠠ ᠬᠣᠷᠮᠣᠢ ᠨᠢ ᠰᠡᠬᠦᠭᠳᠡᠵᠦ ᠭᠡᠨᠡ
ᠥᠭᠡᠳᠡ ᠦᠭᠡᠢ ᠲᠡᠢᠮᠦ ᠡᠲᠡᠭᠡᠳ ᠴᠣ
ᠬᠠᠶᠠ ᠪᠠᠰᠠ ᠲᠠᠭᠠᠷᠳᠠᠭ ᠯᠠ ᠭᠡᠨᠡ᠃
– – – –
① ᠮᠠᠯ ᠤᠨ ᠶᠠᠳᠠᠷ ᠳᠣᠷᠣᠢ ᠶᠢ ᠢᠯᠭᠠᠵᠤ ᠡᠪᠦᠯ ᠦᠨ ᠢᠳᠡᠰᠢᠨ ᠳᠦ ᠥᠭᠬᠦ
② ᠯᠠᠮᠠ ᠨᠠᠷ ᠤᠨ ᠦᠳᠡ ᠶᠢᠨ ᠬᠣᠭᠣᠯᠠ
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ
ᠬᠢᠨᠠᠭ᠍ᠴᠢ : ᠲᠤᠭ᠍ᠴᠢ ᠰᠠᠷᠠᠨᠠ
2023᠂12᠂26 ᠦ᠌ ᠡᠳᠦᠷ