ᠲᠦᠷᠡᠢᠪᠴᠢᠲᠦ ᠲᠦᠳᠦᠪ - ᠡ᠊ ᠂ ᠣᠶᠤᠨ Түрийвчит Түдэв - Э ᠂ Оюун
313ᠲᠦᠷᠡᠢᠪᠴᠢᠲᠦ ᠲᠦᠳᠦᠪ
ᠡ᠊ · ᠣᠶᠤᠨ
ᠥᠷᠯᠥᠭᠡᠨ ᠦ᠌ ᠲᠤᠩᠭᠠᠯᠠᠭ ᠲᠩᠷᠢ ᠳ᠋ᠦ᠍ ᠨᠠᠷᠠᠨ ᠮᠦᠰᠢᠶᠡᠨ ᠮᠠᠨᠳᠤᠵᠤ᠂ ᠠᠯᠪᠠᠨ ᠠᠵᠢᠯ ᠦᠢᠯᠡᠳᠪᠦᠷᠢ ᠵᠠᠪᠤᠳ᠋ ① ᠲᠠᠭᠠᠨ ᠡᠷᠲᠡᠯᠡᠨ ᠣᠴᠢᠬᠤ ᠬᠥᠮᠦᠰ ᠢ᠋ ᠤᠶᠠᠬᠠᠨ ᠡᠶᠡᠯᠳᠡᠭ ᠢ᠋ᠶ᠋ᠡᠷ ᠤᠭᠲᠤᠨᠠ᠃
ᠭᠡᠲᠡᠯᠡ ᠲᠦᠷᠡᠢᠪᠴᠢ ᠪᠠᠷᠢᠭᠰᠠᠨ ᠲᠦᠳᠦᠪ ᠭᠤᠸᠠᠢ ᠠᠵᠢᠯ ᠳ᠋ᠠᠭᠠᠨ ᠣᠴᠢᠬᠤ ᠪᠠᠷ ᠭᠠᠷᠤᠭᠰᠠᠨ ᠴᠢᠨᠢ ᠨᠠᠷᠠᠨ ᠡᠭᠦᠯᠡᠨ ᠴᠠᠭᠠᠨᠠ ᠨᠢᠭᠤᠭᠳᠠᠨ ᠠᠭᠤᠷᠰᠠᠵᠤ ᠰᠠᠯᠬᠢ ᠪᠠᠯᠪᠠᠵᠤ᠂ ᠠᠭᠠᠰᠢ ᠨᠢ ᠬᠥᠳᠡᠯᠦᠨ ᠲᠦᠳᠦᠪ ᠦ᠋ᠨ ᠲᠦᠷᠡᠢᠪᠴᠢ ᠮᠠᠯᠠᠭᠠᠢ ᠶ᠋ᠢ ᠡᠰᠡᠯᠡ ᠡᠭᠡᠭᠡ ᠲᠡᠢ ᠨᠢ ᠠᠪᠴᠤ ᠬᠠᠶᠠᠭᠰᠠᠨ ᠦᠭᠡᠢ ᠳ᠋ᠦ᠍ ᠲᠦᠳᠦᠪ᠄《 ᠬᠥᠶᠢ ᠡᠨᠡ ᠰᠠᠯᠬᠢ ᠴᠢᠨᠢ ᠵᠠᠪ ᠦᠭᠡᠢ ᠶᠠᠳᠠᠵᠤ ᠶᠠᠪᠤᠬᠤ ᠳ᠋ᠤ᠌ ᠪᠠᠰᠠ ᠶᠠᠭᠤ ᠪᠣᠢ ᠳᠠ》 ᠭᠡᠰᠡᠨ ᠳ᠋ᠦ᠍᠂ ᠰᠠᠯᠬᠢ ᠤᠯᠠᠮ ᠠᠳᠠᠷᠠᠭᠰᠠᠨ ᠮᠡᠲᠦ ᠳᠠᠬᠢᠨ ᠮᠠᠯᠠᠭᠠᠢ ᠶ᠋ᠢ ᠨᠢ ᠠᠪᠴᠤ ᠬᠠᠶᠠᠬᠤ ᠳ᠋ᠤ᠌ ᠲᠦᠳᠦᠪ᠄《 ᠠ᠋ ᠴᠠᠪᠠᠰᠤ ᠠ᠋ ᠴᠠᠪᠠᠰᠤ᠂ ᠪᠢ ᠪᠠᠰᠠ ᠵᠠᠪ ᠦᠭᠡᠢ ᠪᠠᠢᠨᠠ ᠳᠠ ᠶᠠᠭᠠᠬᠢᠶᠠ ᠳᠠ》 ᠭᠡᠳ ᠠᠭᠠᠬᠢᠯᠠᠨ ᠤᠭᠤᠬᠢᠯᠠᠨ ᠮᠠᠯᠠᠭᠠᠢ ᠶᠠᠭᠤ ᠪᠠᠨ ᠪᠠᠷᠢᠵᠤ ᠠᠪᠤᠭᠠᠳ ᠶᠠᠪᠤᠲᠠᠯᠠ ᠨᠥᠭᠦᠭᠡ ᠨᠢᠭᠡᠨ ᠠᠯᠪᠠᠨ ᠭᠠᠵᠠᠷ ᠤ᠋ᠨ ᠮᠥᠩᠭᠥ ᠨᠡᠬᠡᠭᠴᠢ ᠨᠢᠷᠪᠠ ᠭᠤᠸᠠᠢ ᠲᠥᠳᠦᠬᠡᠨ ᠶᠠᠪᠤᠵᠤ ᠪᠠᠢᠬᠤ ᠨᠢ ᠬᠠᠷᠠᠭᠳᠠᠪᠠ᠃ ᠮᠠᠨᠢ ᠲᠦᠳᠦᠪ ᠲᠦᠷᠡᠢᠪᠴᠢ ᠪᠡᠨ ᠪᠠᠷᠢᠭᠰᠠᠭᠠᠷ ᠲᠡᠷᠡ ᠬᠦ᠌ ᠨᠢᠷᠪᠠ ᠶ᠋ᠢ ᠲᠣᠭᠣᠷᠢᠨ ᠭᠠᠷᠬᠤ ᠭᠡᠲᠡᠯᠡ ᠲᠠᠭᠠᠷᠠᠯᠳᠤᠭᠠᠳ᠂ ᠮᠤᠯᠲᠤᠷᠠᠬᠤ ᠭᠡᠲᠡᠯᠡ ᠪᠠᠷᠢᠭᠳᠠᠭᠠᠳ ᠶᠠᠭᠠᠬᠢᠬᠤ ᠴᠤ᠌ ᠠᠷᠭᠠ ᠦᠭᠡᠢ ᠬᠠᠯᠵᠠ ᠤᠴᠠᠷᠠᠬᠤ ᠳ᠋ᠤ᠌ ᠲᠦᠳᠦᠪ᠄《 ᠵᠠ ᠠᠰᠢᠭᠦᠢ ᠴᠢ ᠲᠠᠭᠠᠷᠠᠯᠳᠤᠪᠠ ᠤᠤ? ᠪᠢ ᠥᠨᠥ ᠵᠦᠢᠯ ᠢ᠋ ᠴᠢᠨᠢ ᠪᠦᠲᠦᠭᠡᠬᠦ ᠭᠡᠬᠦ ᠳ᠋ᠦ᠍ ᠶᠡᠷᠦ ᠵᠠᠪ ᠪᠣᠯᠳᠠᠭ ᠪᠢᠰᠢ᠂ ᠠᠵᠢᠯ ᠭᠡᠳᠡᠭ ᠪᠠᠰᠠ ᠭᠣᠣᠯ ᠠ᠋ᠴᠠ ᠭᠦᠨ᠂ ᠠᠭᠤᠯᠠᠨ ᠠ᠋ᠴᠠ ᠥᠨᠳᠥᠷ ᠪᠠᠢᠨᠠ ᠬᠦ᠂ ᠵᠠ ᠪᠢ ᠣᠳᠣ ᠮᠠᠷᠭᠠᠰᠢ ᠲᠤᠩ ᠵᠠᠪᠠᠯ ᠰᠢᠦ ᠳᠡ》 ᠭᠡᠳ ᠨᠢᠭᠡ ᠶ᠋ᠢ ᠨᠢ ᠠᠰᠢᠭᠦᠢ ᠠᠷᠭᠠᠯᠠᠯᠠ ᠭᠡᠵᠦ ᠴᠠᠭᠠᠰᠢ ᠶᠠᠪᠤᠲᠠᠯᠠ ᠪᠠᠰᠠ ᠨᠢᠭᠡᠨ ᠠᠯᠪᠠᠨ ᠭᠠᠵᠠᠷ ᠤ᠋ᠨ ᠰᠣᠨᠢᠨ ᠤ᠋ ᠮᠠᠲ᠋ᠧᠷᠢᠶᠠᠯ ᠨᠡᠬᠡᠭᠴᠢ ᠬᠥᠮᠦᠨ ᠲᠡᠷᠡ ᠲᠡᠨᠳᠡ ᠶᠠᠪᠤᠭᠠ ᠨᠢ ᠳᠠᠯᠠᠯᠵᠤ ᠪᠣᠢ ᠮᠡᠲᠦ ᠬᠠᠷᠠᠭᠳᠠᠬᠤ ᠳ᠋ᠤ᠌ ᠮᠠᠨᠢ ᠲᠦᠳᠦᠪ ᠲᠦᠷᠡᠢᠪᠴᠢ ᠪᠡᠷ ᠢ᠋ᠶ᠋ᠡᠨ ᠰᠠᠵᠢᠨ《 ᠵᠠ ᠠᠰᠢᠭᠦᠢ ᠴᠢ ᠶᠠᠪᠤᠭᠠ ᠤᠤ᠂ ᠵᠠᠪ ᠦᠭᠡᠢ ᠨᠠᠳᠠ ᠳ᠋ᠤ᠌ ᠪᠢᠲᠡᠭᠡᠢ ᠨᠠᠢᠳᠠᠭᠠᠷᠠᠢ᠂ ᠥᠭᠡᠷᠡ ᠬᠥᠮᠦᠨ ᠢ᠋ᠶ᠋ᠡᠷ ᠬᠢᠯᠭᠡᠭᠡᠷᠡᠢ᠂ ᠦᠭᠡᠢ? ᠵᠠ ᠲᠡᠭᠡᠪᠡᠯ ᠪᠢ ᠣᠳᠣ ᠮᠠᠷᠭᠠᠰᠢ ᠲᠤᠩ ᠵᠠᠪᠠᠯ ᠠ?》 ᠭᠡᠳ ᠪᠠᠰᠠ ᠨᠢᠭᠡᠨ ᠦ᠌ ᠠᠮᠠ ᠶ᠋ᠢ ᠬᠠᠭᠠᠵᠤ ᠳᠥᠩᠭᠡᠭᠡᠳ ᠶᠠᠪᠤᠲᠠᠯᠠ ᠮᠠᠷᠭᠠᠰᠢ ᠣᠯᠠᠨᠲᠠᠢ ᠵᠠᠪ ᠦᠭᠡᠢ ᠬᠥᠮᠦᠨ ᠳ᠋ᠦ᠍ ᠮᠠᠷᠲᠠᠬᠤ ᠭᠡᠳᠡᠭ ᠨᠢ ᠶᠡᠬᠡ ᠶᠠᠭᠤᠮᠠ ᠪᠣᠯᠬᠣᠷ ᠠᠵᠢᠯ ᠱᠠᠭᠠᠷᠳᠠᠬᠤ ᠤᠯᠤᠰ ᠦᠢ ᠲᠦᠮᠡ ᠶᠦᠮ ᠠ᠋᠃
ᠵᠠ ᠣᠳᠣ ᠴᠤ᠌ ᠡᠨᠡ ᠬᠣᠶᠠᠷ ᠠ᠋ᠴᠠ ᠥᠭᠡᠷᠡ᠂ ᠶᠠᠭᠤᠮᠠ ᠨᠡᠬᠡᠬᠦ ᠬᠥᠮᠦᠨ ᠴᠦ᠍ ᠶᠠᠭᠤ ᠪᠢᠯᠡ ᠭᠡᠵᠦ ᠪᠣᠳᠣᠬᠤ ᠶ᠋ᠢᠨ ᠵᠠᠪᠳᠤᠯ ᠦᠭᠡᠢ ᠳᠤᠭᠤᠢᠯᠠᠩ ᠤ᠋ᠨ ᠨᠢᠭᠡᠨ ᠰᠤᠷᠤᠭᠴᠢ ᠨᠢ《 ᠪᠠᠭᠰᠢ ᠠ᠋᠂ ᠬᠥᠲᠥᠯᠪᠦᠷᠢ ᠶᠠᠭᠠᠬᠢᠯᠠ》 ᠭᠡᠬᠦ ᠳ᠋ᠦ᠍᠂ ᠲᠦᠷᠡᠢᠪᠴᠢᠲᠦ ᠲᠦᠳᠦᠪ ᠲᠦᠷᠡᠢᠪᠴᠢ ᠪᠡᠨ ᠵᠢᠭᠠᠵᠤ᠄《 ᠵᠠ ᠠᠰᠢᠭᠦᠢ ᠴᠢ ᠮᠢᠨᠢ ᠤᠤ? ᠪᠠᠭᠰᠢ ᠴᠢᠨᠢ ᠵᠠᠪ ᠶᠡᠷᠦ ᠪᠠᠢᠳᠠᠭ ᠦᠭᠡᠢ᠂ ᠡᠭᠦᠨ ᠢ᠋ᠶ᠋ᠡᠷ ᠳᠦᠭᠦᠷᠡᠩ ᠠᠵᠢᠯ᠂ ᠶᠡᠷᠦ ᠪᠠᠷᠠᠬᠤ ᠦᠭᠡᠢ ᠨᠢ ᠪᠣᠯᠤᠯᠲᠠᠢ᠂ ᠵᠠ ᠪᠢ ᠣᠳᠣ ᠮᠠᠷᠭᠠᠰᠢ ᠲᠤᠩ ᠵᠠᠪᠠᠯ ᠠ᠋》 ᠭᠡᠳ ᠬᠤᠳᠠᠯ ᠬᠡᠯᠡᠬᠦ ᠳ᠋ᠡᠭᠡᠨ ᠬᠡᠯᠡᠬᠦ ᠦᠭᠡ ᠣᠯᠵᠤ ᠶᠠᠳᠠᠵᠤ ᠰᠢᠯᠲᠠᠭᠠᠨ ᠡᠷᠢᠭᠰᠡᠭᠡᠷ ᠪᠠᠢᠲᠠᠯᠠ ᠪᠦᠬᠦ ᠪᠡᠶᠡ ᠶ᠋ᠢᠨ ᠬᠥᠯᠥᠰᠥ ᠠᠰᠬᠠᠷᠠᠬᠤ ᠲᠤᠯᠠ ᠰᠤᠷᠤᠭᠴᠢ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠰᠠᠨᠠᠭᠠ ᠠᠯᠲᠠᠨ ᠬᠠᠷᠠᠵᠤ《 ᠶᠣᠬᠣ᠂ ᠵᠠ ᠣᠳᠣ ᠴᠤ᠌ ᠥᠭᠡᠷᠡ ᠶᠠᠭᠤ ᠴᠤ᠌ ᠦᠭᠡᠢ ᠪᠢᠯᠡ ᠤᠤ》 ᠭᠡᠳ ᠳᠤᠬᠤᠨ ᠤ᠋ ᠬᠥᠯᠥᠰᠥ ᠶ᠋ᠢ ᠠᠷᠴᠢᠭᠠᠳ ᠳᠥᠩᠭᠡᠵᠦ ᠶᠠᠪᠤᠬᠤ ᠭᠡᠲᠡᠯᠡ ᠬᠣᠷᠢᠨ ᠤ᠋ ᠳᠠᠷᠤᠭᠠ ᠲᠠᠭᠠᠷᠠᠯᠳᠤᠭᠠᠳ《 ᠠᠨᠧᠻᠲ᠋( ᠪᠡᠶᠡ ᠶ᠋ᠢᠨ ᠪᠠᠢᠴᠠᠭᠠᠯᠲᠠ) ᠪᠦᠷᠢᠳᠬᠡᠯ ᠢ᠋ ᠳᠠᠭᠤᠰᠬᠠᠭᠰᠠᠨ ᠤᠤ》 ᠭᠡᠲᠡᠯᠡ ᠲᠦᠷᠡᠢᠪᠴᠢ ᠲᠦᠳᠦᠪ ᠲᠦᠷᠡᠢᠪᠴᠢ ᠪᠡᠨ ᠵᠢᠭᠠᠵᠤ《 ᠵᠠ ᠠᠰᠢᠭᠦᠢ ᠲᠠ ᠤᠤ᠂ ᠪᠢ ᠶᠡᠷᠦ ᠵᠠᠪ ᠭᠠᠷᠤᠭᠰᠠᠨ ᠦᠭᠡᠢ᠂ ᠣᠳᠣ ᠡᠨᠡ ᠲᠦᠷᠡᠢᠪᠴᠢ ᠶ᠋ᠢᠨ ᠳᠣᠲᠣᠷᠠ ᠪᠣᠢ᠂ ᠪᠢ ᠠᠯᠪᠠᠨ ᠳᠡᠭᠡᠷᠡ ᠪᠡᠨ ᠰᠠᠭᠤᠵᠤ ᠪᠠᠢᠭᠠᠳ ᠯᠠ ᠭᠠᠷᠭᠠᠭᠠᠳ ᠥᠭᠭᠦᠶᠡ》 ᠭᠡᠳ ᠳᠥᠷᠪᠡᠳᠡᠬᠢ ᠬᠥᠮᠦᠨ ᠢ᠋ ᠳᠥᠩᠭᠡᠭᠡᠳ ᠠᠭᠠᠬᠢᠯᠠᠨ ᠤᠭᠤᠬᠢᠯᠠᠨ《 ᠥᠭᠡᠷᠡ ᠶᠠᠮᠠᠷ ᠠᠵᠢᠯ ᠨᠡᠬᠡᠭᠳᠡᠬᠦ ᠪᠢᠯᠡ》 ᠭᠡᠳ ᠠᠶᠤᠵᠤ ᠠᠶᠤᠵᠤ ᠬᠤᠯᠠᠭᠠᠢ ᠬᠢᠭᠰᠡᠨ ᠬᠥᠮᠦᠨ ᠡᠴᠡ ᠳᠣᠣᠷᠠ ᠭᠥᠯᠢᠯᠵᠡᠨ ᠶᠠᠪᠤᠭᠰᠠᠭᠠᠷ ᠠᠵᠢᠯ ᠢ᠋ ᠬᠣᠢᠰᠢᠯᠠᠭᠤᠯᠤᠨ ᠵᠠᠪ ᠦᠭᠡᠢ ᠭᠡᠵᠦ ᠬᠤᠳᠠᠯ ᠶᠠᠷᠢᠭᠰᠠᠭᠠᠷ ᠬᠥᠳᠡᠯᠮᠦᠷᠢ ᠶ᠋ᠢᠨ ᠴᠠᠭ ᠠ᠋ᠴᠠ ᠶᠠᠭ ᠬᠣᠶᠠᠷ ᠢ᠋ ᠵᠠᠪᠰᠢᠴᠢᠬᠠᠵᠠᠢ᠃
《 ᠵᠠ ᠳᠦᠭᠦᠷᠴᠡᠢ》 ᠭᠡᠳ ᠺᠣᠨᠲ᠋ᠣᠷ ᠤ᠋ᠨ ᠡᠭᠦᠳᠡᠨ ᠳ᠋ᠦ᠍ ᠣᠴᠢᠪᠠᠯ10—20 ᠬᠥᠮᠦᠰ ᠠᠷᠵᠠᠢᠨ ᠪᠠᠷᠵᠠᠢᠨ ᠪᠠᠢᠬᠤ ᠶ᠋ᠢ ᠬᠠᠷᠠᠪᠠᠯ ᠴᠠᠭ ᠤ᠋ᠨ ᠮᠡᠳᠡᠭᠡ᠂ ᠠᠵᠢᠯᠴᠢᠳ ᠤ᠋ᠨ ᠪᠦᠷᠢᠳᠬᠡᠯ᠂ ᠳᠤᠭᠤᠢᠯᠠᠩ ᠤ᠋ᠨ ᠬᠥᠲᠥᠯᠪᠦᠷᠢ᠂ ᠵᠠᠪᠰᠠᠷ ᠤ᠋ᠨ ᠮᠥᠩᠭᠥ᠂ ᠮᠠᠰᠢᠨ ᠰᠡᠯᠪᠢᠭ ᠭᠡᠰᠡᠨ ᠬᠥᠮᠦᠰ ᠪᠠᠢᠨᠠ᠃ ᠡᠭᠦᠳᠡᠨ ᠳᠡᠭᠡᠷᠡ ᠣᠴᠢᠲᠠᠯᠠ ᠨᠢᠭᠡᠨ ᠠᠯᠪᠠᠨ ᠭᠠᠵᠠᠷ ᠤ᠋ᠨ ᠵᠠᠷᠤᠯᠭᠠ ᠢᠷᠡᠨ《 ᠥᠨᠥᠳᠥᠷ ᠬᠤᠷᠠᠯ ᠲᠠᠢ ᠶᠤᠮᠰᠠᠨ᠂ ᠭᠠᠷ ᠤ᠋ᠨ ᠦᠰᠦᠭ ᠵᠢᠷᠤᠨᠠ ᠤᠤ》 ᠭᠡᠬᠦ ᠳ᠋ᠦ᠍ ᠳᠠᠷᠤᠭᠠ ᠮᠠᠷᠤᠭᠠ ᠪᠢᠰᠢ ᠶᠦᠮ᠂ ᠡᠨᠡ ᠮᠠᠭᠤ ᠪᠠᠰᠠ ᠶᠠᠭᠤ ᠭᠡᠳ ᠪᠠᠢᠭᠠ ᠶᠤᠮ ᠭᠡᠵᠦ ᠠᠭᠤᠷ ᠣᠮᠣᠭ ᠨᠢ ᠪᠤᠴᠠᠯᠵᠤ᠂《 ᠶᠠᠭᠤ? ᠵᠠᠪ ᠦᠭᠡᠢ᠂ ᠵᠠᠪ ᠦᠭᠡᠢ》 ᠭᠡᠲᠡᠯᠡ ᠵᠠᠷᠤᠯᠭᠠ ᠬᠦᠦ ᠮᠡᠯᠡᠷᠡᠨ ᠭᠠᠢᠬᠠᠵᠤ ᠵᠣᠭᠰᠣᠨᠠ᠃
ᠪᠤᠰᠤᠳ ᠱᠠᠭᠠᠷᠳᠠᠭᠴᠢᠳ《 ᠰᠠᠢᠨ ᠤᠤ》 ᠭᠡᠰᠡᠨ ᠳ᠋ᠦ᠍ ᠬᠠᠷᠢᠨ 《 ᠵᠠᠪ ᠦᠭᠡᠢ ᠭᠡᠵᠦ ᠪᠠᠢᠨᠠ ᠰᠢᠦ᠂ ᠪᠢ ᠵᠠᠪ ᠦᠭᠡᠢ》 ᠭᠡᠵᠡᠢ᠃ ᠭᠡᠲᠡᠯᠡ ᠲᠡᠳᠡᠭᠡᠷ ᠬᠥᠮᠦᠰ《 ᠵᠠ ᠣᠯᠠᠨ ᠵᠠᠪ ᠦᠭᠡᠢ ᠶ᠋ᠢ ᠰᠣᠨᠣᠰᠴᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠯᠠ᠂ ᠪᠢᠳᠡ ᠣᠨᠳᠣᠣ ᠠᠷᠭᠠ ᠶ᠋ᠢ ᠬᠠᠢᠨᠠ》 ᠭᠡᠲᠡᠯᠡ ᠲᠦᠷᠡᠢᠪᠴᠢᠲᠦ ᠲᠦᠳᠦᠪ ᠲᠦᠷᠡᠢᠪᠴᠢ ᠪᠡᠨ ᠠᠭᠤᠳᠠᠯᠤᠭᠰᠠᠨ ᠴᠢᠨᠢ《 ᠬᠡᠳᠦᠨ ᠰᠠᠷᠠ ᠶ᠋ᠢᠨ ᠡᠮᠦᠨᠡ ᠥᠭᠭᠦᠭᠰᠡᠨ ᠪᠢᠴᠢᠭ ᠮᠢᠨᠢ ᠡᠨᠡ ᠪᠠᠢᠨᠠ᠂ ᠬᠡᠴᠢᠨᠡᠭᠡᠨ ᠬᠣᠨᠣᠭ ᠤ᠋ᠨ ᠡᠮᠦᠨᠡ ᠥᠭᠭᠦᠭᠰᠡᠨ ᠨᠡᠬᠡᠮᠵᠢᠯᠡᠯ ᠮᠢᠨᠢ ᠡᠨᠡ ᠪᠠᠢᠨᠠ᠂ ᠡᠨᠡ ᠬᠥᠮᠦᠨ ᠢ᠋ ᠠᠷᠭᠧ ② ᠶ᠋ᠢᠨ ᠡᠷᠬᠢᠯᠡᠭᠴᠢ ᠪᠣᠯᠭᠠᠪᠠᠯ ᠶᠠᠭᠤᠮᠠ ᠶ᠋ᠢ ᠮᠥᠨ ᠰᠠᠢᠨ ᠬᠠᠳᠠᠭᠠᠯᠠᠬᠤ ᠪᠠᠢᠭᠠ ᠳᠠ》 ᠭᠡᠯᠴᠡᠵᠡᠢ᠃ ᠭᠡᠲᠡᠯᠡ ᠲᠦᠷᠡᠢᠪᠴᠢᠲᠦ ᠳᠦᠳᠦᠪ ᠠᠵᠢᠯ ᠬᠢᠬᠦ ᠭᠡᠰᠡᠨ ᠴᠢᠨᠢ ᠡᠨᠳᠡ ᠡᠴᠡ ᠤᠲᠠᠰᠤᠳᠠᠭᠠᠳ ᠲᠡᠨᠳᠡ ᠡᠴᠡ ᠬᠣᠩᠬᠣᠳᠠᠭᠠᠳ᠂ ᠡᠢᠮᠦ ᠴᠦ᠍ ᠬᠥᠮᠦᠨ ᠢᠷᠡᠵᠦ ᠲᠡᠢᠮᠦ ᠴᠦ᠍ ᠶᠠᠭᠤᠮᠠ ᠨᠡᠬᠡᠬᠦ᠂ ᠲᠡᠢᠮᠦ ᠴᠦ᠍ ᠬᠥᠮᠦᠨ ᠢᠷᠡᠵᠦ ᠡᠢᠮᠦ ᠴᠦ᠍ ᠵᠦᠢᠯ ᠢ᠋ ᠨᠡᠬᠡᠬᠦ ᠳ᠋ᠦ᠍《 ᠵᠠ ᠠᠰᠢᠭᠦᠢ ᠲᠠ ᠤᠤ᠂ ᠵᠠᠪ ᠶᠡᠷᠦ ᠪᠣᠯᠤᠭᠰᠠᠨ ᠦᠭᠡᠢ》 ᠭᠡᠳᠡᠭ ᠬᠡᠳᠦᠨ ᠦᠭᠡ ᠶ᠋ᠢ ᠬᠥᠮᠦᠨ ᠪᠦᠷᠢ ᠳ᠋ᠦ᠍ ᠬᠡᠯᠡᠭᠰᠡᠭᠡᠷ ᠪᠠᠢᠲᠠᠯᠠ ᠬᠥᠳᠡᠯᠮᠦᠷᠢ ᠶ᠋ᠢᠨ ᠠᠯᠲᠠᠨ ᠴᠠᠭ ᠨᠢ ᠬᠤᠳᠠᠯ ᠬᠡᠯᠡᠭᠴᠢ ᠶ᠋ᠢᠨ ᠵᠣᠪᠠᠭᠤᠷᠢᠲᠤ ᠴᠠᠭ ᠪᠣᠯᠤᠨ ᠥᠩᠭᠡᠷᠡᠪᠡ᠃ ᠲᠦᠷᠡᠢᠪᠴᠢᠲᠦ ᠲᠦᠳᠦᠪ《 ᠵᠠ ᠶᠠᠭᠠᠬᠢᠬᠤ ᠪᠣᠢ ᠪᠦᠬᠦ ᠬᠡᠷᠡᠭ ᠢ᠋ᠶ᠋ᠡᠨ ᠮᠠᠷᠭᠠᠰᠢ ᠳᠠᠭᠤᠰᠬᠠᠶᠠ》 ᠭᠡᠲᠡᠯᠡ ᠮᠠᠷᠭᠠᠰᠢ ᠨᠢ ᠥᠨᠥ ᠠᠵᠢᠯ ᠱᠠᠭᠠᠷᠳᠠᠭᠴᠢᠳ《 ᠵᠠ ᠠᠰᠢᠭᠦᠢ ᠴᠢ ᠮᠢᠨᠢ ᠤᠤ? ᠵᠠᠪ ᠭᠡᠳᠡᠭ ᠪᠠᠢᠳᠠᠭ ᠦᠭᠡᠢ᠂ ᠣᠳᠣ ᠯᠠ ᠶᠣᠰᠣᠲᠠᠢ ᠮᠠᠷᠭᠠᠰᠢ》 ᠭᠡᠭᠰᠡᠭᠡᠷ ᠪᠠᠢᠲᠠᠯᠠ ᠬᠥᠮᠦᠨ ᠪᠦᠷᠢ ᠳ᠋ᠦ᠍ ᠬᠦᠨᠳᠦ ᠪᠡᠨ ᠪᠠᠷᠠᠵᠤ ᠡᠴᠦᠰ ᠲᠤ ᠬᠥᠳᠡᠯᠮᠦᠷᠢ ᠶ᠋ᠢᠨ ᠴᠠᠭ ᠢ᠋ ᠵᠥᠪ ᠢ᠋ᠶ᠋ᠡᠷ ᠠᠰᠢᠭᠯᠠᠭᠰᠠᠨ ᠦᠭᠡᠢ ᠡᠴᠡ ᠪᠣᠯᠵᠤ ᠥᠪᠡᠷ ᠢ᠋ᠶ᠋ᠡᠨ ᠥᠪᠡᠷ ᠡᠴᠡ ᠪᠡᠨ ᠢᠴᠢᠬᠦ ᠴᠠᠭ ᠪᠣᠯᠵᠠᠢ᠃
ᠳᠠᠷᠠᠭᠠ ᠡᠳᠦᠷ ᠠᠯᠪᠠᠨ ᠳᠡᠭᠡᠷᠡ ᠡᠴᠡ ᠬᠠᠷᠢᠬᠤ ᠵᠠᠭᠤᠷᠠ ᠮᠥᠨ4—5 ᠬᠥᠮᠦᠨ ᠶᠠᠭᠤᠮᠠ ᠱᠠᠭᠠᠷᠳᠠᠭᠰᠠᠨ ᠳ᠋ᠤ᠌《 ᠮᠠᠷᠭᠠᠰᠢ》 ᠭᠡᠭᠰᠡᠭᠡᠷ ᠪᠠᠢᠭᠠᠳ ᠭᠡᠷ ᠲᠤ ᠪᠡᠨ ᠬᠠᠷᠢᠬᠤ ᠠ᠋ᠴᠠ3 ᠴᠠᠭ ᠢ᠋ ᠬᠣᠵᠢᠮᠳᠠᠨ ᠭᠡᠷ ᠲᠡᠭᠡᠨ ᠠᠷᠠᠢ ᠭᠡᠵᠦ ᠢᠷᠡᠯᠡ᠃ ᠣᠳᠣ ᠴᠤ᠌ ᠠᠮᠠᠷᠠᠶᠠ ᠭᠡᠲᠡᠯᠡ《 ᠢᠷᠡᠳᠡᠭ ᠴᠠᠭ ᠲᠤ ᠢᠷᠡᠳᠡᠭ ᠦᠭᠡᠢ᠂ ᠡᠮᠡ ᠡᠷᠭᠢᠭᠦᠯᠵᠦ ᠶᠠᠪᠤᠳᠠᠭ ᠵᠣᠯᠢᠭ ᠤᠤ᠂ ᠰᠠᠯᠤᠨᠠ ᠴᠢᠮᠠ ᠠ᠋ᠴᠠ》 ᠭᠡᠵᠦ ᠵᠡᠭᠦᠳᠦᠨ ᠳ᠋ᠦ᠍ ᠪᠣᠯᠪᠠᠴᠤ ᠦᠵᠡᠭᠳᠡᠬᠦ᠂ ᠵᠦᠭᠡᠷ ᠰᠠᠭᠤᠬᠤ ᠳ᠋ᠤ᠌ ᠴᠤ᠌ ᠪᠣᠳᠣᠭᠳᠠᠬᠤ ᠵᠢᠷᠦᠬᠡᠨ ᠦ᠌ ᠬᠠᠢᠷᠠᠲᠠᠢ ᠡᠬᠡᠨᠡᠷ ᠨᠢ ᠬᠦᠷᠲᠡᠯᠡ ᠱᠠᠭᠠᠷᠳᠠᠨ ᠠᠭᠠᠰᠢᠯᠠᠬᠤ ᠳ᠋ᠤ᠌ ᠮᠠᠨᠢ ᠲᠦᠳᠦᠪ《 ᠢᠰᠢ ᠳᠤᠯᠮᠠ ᠮᠢᠨᠢ ᠠᠰᠢᠭᠦᠢ ᠴᠢ ᠤᠤ᠂ ᠵᠠᠪ ᠦᠭᠡᠢ ᠶᠡᠷᠦ ᠵᠠᠪ ᠦᠭᠡᠢ》 ᠭᠡᠬᠦ ᠳ᠋ᠦ᠍ ᠡᠬᠡᠨᠡᠷ ᠨᠢ《 ᠲᠣᠭᠯᠠᠵᠤ ᠪᠠᠢᠨᠠ》 ᠭᠡᠵᠦ ᠪᠣᠳᠣᠨ ᠤᠯᠠᠮ ᠶᠡᠬᠡ ᠪᠡᠷ ᠠᠭᠤᠷᠰᠠᠵᠤ《 ᠶᠠᠭᠤ? ᠴᠢ ᠪᠠᠰᠠ ᠲᠡᠨᠦᠵᠦ ᠬᠡᠰᠦᠵᠦ ᠶᠠᠪᠤᠭᠠᠳ ᠨᠠᠮᠠ ᠶ᠋ᠢ ᠳᠣᠷᠣᠮᠵᠢᠯᠠᠨᠠ ᠤᠤ? ᠣᠳᠣᠬᠠᠨ ᠴᠢᠮᠠ ᠠ᠋ᠴᠠ ᠰᠠᠯᠤᠨᠠ》 ᠭᠡᠬᠦ ᠳ᠋ᠦ᠍ ᠲᠦᠳᠦᠪ《 ᠵᠠᠪ ᠦᠭᠡᠢ ᠬᠣᠩᠭᠣᠷ ᠮᠢᠨᠢ᠂ ᠵᠠᠪ ᠦᠭᠡᠢ᠂ ᠰᠠᠯᠬᠤ ᠴᠤ᠌ ᠵᠠᠪ ᠠᠯᠠᠭᠠ ᠳᠠ》 ᠭᠡᠲᠡᠯᠡ ᠡᠬᠡᠨᠡᠷ ᠨᠢ ᠤᠯᠠᠮ ᠬᠢᠯᠢᠩᠨᠡᠨ ᠡᠭᠦᠳᠡ ᠶ᠋ᠢ ᠳᠡᠰ ᠬᠢᠲᠡᠯᠡ ᠬᠠᠶᠠᠭᠠᠳ ᠶᠠᠪᠤᠬᠤ ᠳ᠋ᠤ᠌ ᠬᠦᠷᠲᠡᠯᠡ《 ᠶᠣ᠂ ᠶᠣ᠂ ᠵᠠᠪ ᠦᠭᠡᠢ ᠶᠠᠳᠠᠵᠤ ᠪᠠᠢᠬᠤ ᠳ᠋ᠤ᠌ ᠡᠭᠦᠳᠡ ᠪᠡᠨ ᠶᠠᠭᠠᠬᠢᠭᠰᠠᠨ ᠴᠢᠮᠡᠭᠡ ᠲᠡᠢ ᠬᠠᠭᠠᠬᠤ ᠶᠤᠮ ᠪᠣᠢ ᠳᠠ》 ᠭᠡᠳ ᠯᠠᠭ ᠬᠢᠨ ᠰᠠᠭᠤᠵᠠᠢ᠃
- - - -
① ᠪᠦᠲᠦᠭᠡᠭᠳᠡᠬᠦᠨ ᠪᠣᠯᠪᠠᠰᠤᠷᠠᠭᠤᠯᠬᠤ ᠭᠠᠵᠠᠷ
② ᠬᠠᠭᠤᠴᠢᠨ ᠳᠠᠩᠰᠠ ᠬᠠᠷᠠ ᠶ᠋ᠢᠨ ᠭᠠᠵᠠᠷ
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠳᠠᠪᠰᠢᠯᠲᠦ
ᠬᠢᠨᠠᠭ᠍ᠴᠢ : ᠲᠤᠭ᠍ᠴᠢ ᠰᠠᠷᠠᠨᠠ
2023᠂12᠂21 ᠦ᠌ ᠡᠳᠦᠷ