ᠬᠥᠬᠡ ᠵᠤᠯᠠ – ᠪᠣᠷᠵᠢᠭᠢᠨ ᠸᠠᠩᠵᠠᠯ - < ᠠᠷᠪᠠᠨ ᠬᠣᠶᠠᠷ ᠂ ᠶᠠᠰᠤ ᠮᠢᠬᠠᠨ ᠤ᠋ ᠨᠡᠷᠡᠰ ᠤᠨ ᠪᠦᠯᠦᠭ 1-3 > Хөх зул – Боржигон Ванжал –" Арван хоёр ᠂ яс махны нэрсийн бүлэг 1-3 "
333ᠠᠷᠪᠠᠨ ᠬᠣᠶᠠᠷ ᠂ ᠶᠠᠰᠤ ᠮᠢᠬᠠᠨ ᠤ᠋ ᠨᠡᠷᠡᠰ ᠤᠨ ᠪᠦᠯᠦᠭ 1-3
ᠠᠯᠢᠪᠠ ᠬᠥᠮᠦᠨ ᠠᠮᠢᠲᠠᠨ ᠤ᠋ ᠠᠳᠠᠭ ᠲᠡᠭᠦᠰᠬᠡᠯ ᠰᠢᠪᠲᠤᠷᠠᠭᠠ ᠶ᠋ᠢᠨ ᠶᠠᠰᠤ᠃
ᠠᠬᠤᠷ ᠰᠡᠭᠦᠯ
ᠠᠬᠤᠷ ᠰᠡᠭᠦᠯ
ᠠᠰᠠᠭᠤᠬᠤ ᠨᠢᠷᠤᠭᠤᠨ ᠠ᠋ᠴᠠ ᠵᠠᠯᠭᠠᠯᠳᠤᠨ ᠪᠣᠢ ᠰᠡᠭᠦᠯ ᠦ᠋ᠨ ᠤᠵᠠᠭᠤᠷ ᠃ ᠪᠠᠰᠠ ᠰᠡᠭᠦᠯ ᠦ᠋ᠨ ᠤᠭ ᠭᠡᠳᠡᠭ ᠃ ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤ᠋ᠨ ᠰᠡᠭᠦᠯ ᠦ᠋ᠨ ᠶᠠᠰᠤ ᠬᠠᠮᠤᠭ ᠪᠠᠭᠠ ᠳ᠋ᠠᠭᠠᠨ 9 ᠦᠶᠡ ᠪᠠᠢᠳᠠᠭ ᠃ ᠭᠡᠬᠦ ᠳ᠋ᠦ᠍ ᠲᠡᠷᠡ ᠨᠢᠭᠡ ᠪᠦᠷᠢ ᠶ᠋ᠢᠨ ᠣᠨᠣᠭᠠᠭᠰᠠᠨ ᠨᠡᠷᠡ ᠶ᠋ᠢ ᠣᠯᠤᠭᠠ ᠦᠭᠡᠢ ᠪᠠᠢᠨᠠ ᠃ ᠭᠡᠪᠡᠴᠦ ᠨᠢᠭᠡ ᠪᠦᠯᠦᠭ ᠰᠡᠭᠦᠯ ᠦ᠋ᠨ ᠨᠡᠷᠡ ᠣᠯᠵᠠᠢ ᠃ ᠲᠡᠭᠦᠨ ᠢ᠋ ᠵᠢᠭᠰᠠᠭᠠᠪᠠᠯ : ᠭᠣᠳᠣᠩ ᠰᠡᠭᠦᠯ ᠂ ᠭᠤᠳᠤᠷ ᠰᠡᠭᠦᠯ ᠂ ᠭᠣᠳᠣᠢ ᠰᠡᠭᠦᠯ ᠂ ᠤᠭᠤᠷᠠᠭ ᠰᠡᠭᠦᠯ ( ᠬᠣᠨᠢᠨ ᠰᠡᠭᠦᠯ ᠦ᠋ᠨ ᠡᠷᠲᠡᠭᠡᠷ ᠦ᠋ᠨ ᠡᠮᠦᠨᠡᠬᠡᠨ ᠡᠴᠡ ᠬᠣᠢᠰᠢᠬᠢ ᠬᠡᠰᠡᠭ ) ᠂ ᠰᠢᠷᠪᠠᠩ ᠰᠡᠭᠦᠯ ( ᠰᠡᠭᠦᠯ ᠦ᠋ᠨ ᠦᠵᠦᠭᠦᠷ ᠦ᠋ᠨ ᠬᠤᠷᠤᠭᠤ ᠰᠢᠭ᠋ ᠲᠡᠭᠦᠰᠬᠡᠯ ᠰᠡᠭᠦᠯ ) ᠃
ᠬᠠᠪᠢᠷᠭᠠᠨ ᠶᠠᠰᠤ
ᠰᠡᠭᠡᠷ ᠡᠪᠴᠢᠭᠦᠦ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣᠬᠢ ᠬᠤᠯᠪᠣᠭᠠᠷᠢ ᠪᠣᠯᠤᠭᠰᠠᠨ ᠲᠠᠬᠢᠷ ᠨᠠᠷᠢᠨ ᠶᠠᠰᠤ ᠨᠤᠭᠤᠳ᠃ ᠦᠬᠡᠷ ᠲᠦ᠍ 24 - 26 ᠬᠠᠪᠢᠷᠭᠠ ᠲᠠᠢ ᠃ ᠣᠷᠳᠣᠰ ᠲᠤ᠌ ᠬᠠᠪᠢᠷᠭᠠ ᠶ᠋ᠢ ᠬᠠᠪᠢᠰᠤ ᠭᠡᠨᠡ᠃
ᠬᠠᠪᠢᠷᠭᠠᠨ ᠲᠣᠯᠣᠭᠠᠢ
ᠬᠠᠪᠢᠷᠭᠠᠨ ᠤ᠋ ᠰᠡᠭᠡᠷ ᠦ᠋ᠨ ᠰᠢᠭᠠᠨᠴᠠᠭ ᠂ ᠬᠠᠳᠬᠤᠵᠤ ᠪᠠᠢᠭᠠ ᠳᠣᠪᠣᠭᠣᠷ ᠲᠠᠢ ᠶᠠᠰᠤ ᠃ ᠪᠠᠰᠠ ᠪᠤᠷᠠ ᠭᠡᠳᠡᠭ᠃ ᠠᠯᠲᠠᠨ ᠪᠤᠷᠠ ᠴᠤ᠌ ᠭᠡᠳᠡᠭ᠃
ᠬᠠᠪᠢᠷᠭᠠᠨ ᠪᠡᠶᠡ ᠬᠠᠪᠢᠷᠭᠠᠨ ᠤ᠋ ᠬᠠᠪᠲᠠᠭᠠᠢᠯᠢᠭ᠋ ᠤᠷᠲᠤ ᠶᠠᠰᠤ ᠃
ᠬᠠᠪᠢᠷᠭᠠᠨ ᠮᠥᠭᠡᠷᠰᠦᠯᠢᠭ ᠦᠵᠦᠭᠦᠷ
ᠬᠠᠪᠢᠷᠭᠠᠨ ᠤ᠋ ᠡᠪᠴᠢᠭᠦᠨ ᠳ᠋ᠦ᠍ ᠵᠠᠯᠭᠠᠯᠳᠤᠵᠤ ᠪᠠᠢᠭᠠ ᠦᠵᠦᠭᠦᠷ ᠶᠠᠰᠤ᠃ ᠬᠠᠪᠢᠷᠭᠠᠨ ᠤ᠋ ᠮᠢᠬᠠ ᠲᠠᠢ᠂ ᠮᠢᠬᠠ ᠦᠭᠡᠢ ᠭᠠᠷᠳᠠᠭ ᠢ ᠦᠨᠳᠦᠰᠦᠯᠡᠵᠦ᠂ ᠠᠷᠤᠲᠠᠢ ᠬᠠᠪᠢᠷᠭᠠ᠂ ᠠᠷᠤ ᠦᠭᠡᠢ ᠬᠠᠪᠢᠷᠭᠠ ᠭᠡᠵᠦ ᠬᠣᠶᠠᠷ ᠬᠤᠪᠢᠶᠠᠳᠠᠭ ᠪᠥᠭᠡᠳ ᠪᠣᠭᠣᠨᠢ᠂ ᠠᠯᠳᠠᠷᠠᠭᠠ᠂ ᠥᠨᠳᠥᠷ᠂ ᠰᠦᠪᠡᠷᠭᠡ ᠭᠡᠵᠦ ᠨᠡᠷᠡᠢᠳᠦᠯ ᠢ᠋ᠶ᠋ᠡᠷ ᠨᠢ ᠳᠥᠷᠪᠡ ᠬᠤᠪᠢᠶᠠᠳᠠᠭ᠃
ᠠᠷᠤ ᠦᠭᠡᠢ ᠬᠠᠪᠢᠷᠭᠠ
ᠬᠠᠪᠢᠷᠭᠠ ᠪᠠᠨ ᠰᠡᠭᠡᠷ ᠡᠴᠡ ᠬᠠᠳᠤᠵᠤ ᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠬᠠ ᠪᠠᠨ ᠰᠠᠯᠭᠠᠳᠠᠭ ᠃ ᠭᠡᠬᠦ ᠳ᠋ᠦ᠍ ᠳᠠᠯᠤ ᠨᠠᠭᠠᠯᠳᠤᠭᠰᠠᠨ ᠬᠡᠰᠡᠭ ᠦ᠋ᠨ ᠬᠠᠪᠢᠷᠭᠠ ᠨᠢ ᠠᠷᠤ ᠮᠢᠬᠠ ᠦᠭᠡᠢ ᠭᠠᠷᠳᠠᠭ ᠃ ᠡᠢᠨ ᠬᠦ᠌ ᠡᠭᠦᠨ ᠢ᠋ ᠠᠷᠤ ᠦᠭᠡᠢ ᠬᠠᠪᠢᠷᠭᠠ ᠭᠡᠳᠡᠭ᠃
ᠠᠷᠤᠲᠠᠢ ᠬᠠᠪᠢᠷᠭᠠ
ᠳᠠᠯᠤ ᠪᠠᠨ ᠬᠠᠪᠢᠷᠭᠠ ᠠ᠋ᠴᠠ ᠰᠠᠯᠭᠠᠨ ᠠᠪᠤᠭᠰᠠᠨ 4 ᠥᠨᠳᠥᠷ ᠂ 3 ᠰᠦᠪᠡᠷᠭᠡ ᠂ ᠬᠠᠪᠢᠰᠤ ᠠᠷᠤ ᠳ᠋ᠠᠭᠠᠨ ᠪᠡᠶᠡ ᠮᠢᠬᠠ ᠠᠪᠴᠤ ᠡᠪᠳᠡᠭᠳᠡᠬᠦ ᠦᠭᠡᠢ ᠭᠠᠷᠳᠠᠭ ᠃ ᠡᠢᠨ ᠬᠦ᠌ ᠡᠭᠦᠨ ᠢ᠋ ᠠᠷᠤᠲᠠᠢ ᠬᠠᠪᠢᠷᠭᠠ ᠭᠡᠳᠡᠭ᠃
ᠪᠣᠭᠣᠨᠢ ᠬᠠᠪᠢᠷᠭᠠ
ᠡᠪᠴᠢᠭᠦᠨ ᠪᠦᠳᠦᠷᠬᠡᠢ ᠶ᠋ᠢᠨ ᠬᠣᠶᠠᠷ ᠬᠠᠵᠠᠭᠤ ᠳ᠋ᠤ᠌ ᠬᠠᠤᠠᠬᠤᠷᠯᠠᠵᠤ ᠪᠣᠢ ᠬᠠᠮᠤᠭ ᠠᠩᠬᠠᠨ ᠤ᠋ ᠣᠬᠣᠷ ᠬᠠᠪᠢᠷᠭᠠ᠃ ᠪᠠᠰᠠ ᠥᠨᠥᠴᠢᠨ ᠬᠠᠪᠢᠷᠭᠠ ᠴᠤ᠌ ᠭᠡᠳᠡᠭ᠃
ᠪᠤᠶᠠᠨ ᠬᠠᠪᠢᠷᠭᠠ
ᠪᠣᠭᠣᠨᠢ ᠬᠠᠪᠢᠷᠭᠠ ᠶ᠋ᠢᠨ ᠳᠠᠷᠠᠭᠠᠬᠢ ᠶ᠋ᠢᠨ ᠬᠠᠪᠢᠷᠭᠠ ᠃ ᠪᠠᠰᠠ ᠠᠯᠳᠠᠷᠠᠭᠠ ᠴᠤ᠌ ᠭᠡᠵᠦ ᠬᠡᠯᠡᠳᠡᠭ᠃
ᠳᠥᠷᠪᠡᠨ ᠥᠨᠳᠥᠷ
ᠠᠯᠳᠠᠷᠠᠭᠠ ᠶ᠋ᠢᠨ ᠳᠠᠷᠠᠭᠠ ᠪᠠᠢᠭᠠ ᠠᠷᠤ ᠳ᠋ᠠᠭᠠᠨ ᠮᠢᠬᠠ ᠲᠠᠢ ᠪᠥᠭᠡᠳ 4 ᠤᠷᠲᠤ ᠬᠠᠪᠢᠷᠭᠠ᠃
ᠭᠤᠷᠪᠠᠨ ᠰᠦᠪᠡᠷᠭᠡ
4 ᠥᠨᠳᠥᠷ ᠦ᠋ᠨ ᠳᠠᠷᠠᠭᠠ ᠪᠠᠢᠭᠠ ᠬᠠᠪᠢᠷᠭᠠᠨ ᠤ᠋ ᠮᠥᠭᠡᠷᠰᠦᠯᠢᠭ ( ᠰᠦᠪᠡᠷᠭᠡ ) ᠲᠠᠯᠠ ᠶ᠋ᠢᠨ ᠮᠥᠭᠡᠷᠰᠦ ᠨᠢ ᠤᠷᠲᠤ ᠪᠦᠬᠦᠢ ᠠᠬᠤᠷ ᠨᠠᠷᠢᠨ ᠬᠠᠪᠢᠷᠭᠠ᠃
ᠰᠦᠪᠡᠷᠭᠡᠳᠡᠰᠦ
ᠢᠯᠡᠭᠦᠦ ᠰᠡᠭᠡᠷ ᠲᠡᠢ ᠦᠶᠡ ᠳ᠋ᠦ᠍ ᠭᠠᠷᠬᠤ ᠢᠯᠡᠭᠦᠦ ᠬᠠᠪᠢᠷᠭᠠ᠃ ᠡᠨᠡ ᠵᠠᠪᠠᠯ ᠰᠦᠪᠡᠷᠭᠡ ᠶ᠋ᠢᠨ ᠳᠠᠷᠠᠭᠠ᠂ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ᠂ ᠬᠠᠪᠢᠷᠭᠠ ᠶ᠋ᠢᠨ ᠡᠴᠦᠰ ᠲᠦ᠍ ᠤᠷᠭᠤᠨᠠ᠃
ᠡᠪᠴᠢᠭᠦᠦ ᠶᠠᠰᠤ
ᠴᠡᠭᠡᠵᠢᠨ ᠪᠡᠶᠡ ᠶ᠋ᠢᠨ ᠳᠣᠣᠷᠠᠲᠤ ᠬᠡᠰᠡᠭ ᠪᠦᠲᠦᠭᠡᠵᠦ ᠪᠠᠢᠭᠠ ᠬᠣᠰᠢᠭᠤᠯᠵᠢᠨ ᠶᠠᠰᠤ᠃
ᠡᠪᠴᠢᠭᠦᠨ ᠪᠦᠳᠦᠷᠬᠡᠢ
ᠡᠪᠴᠢᠭᠦᠨ ᠦ᠌ ᠬᠠᠮᠤᠭ ᠡᠮᠦᠨᠡᠬᠢ ᠬᠣᠰᠢᠭᠤᠯᠵᠢᠨ ᠤ᠋ ᠦᠵᠦᠭᠦᠷ ᠶᠠᠰᠤ᠃ ᠬᠡᠷᠪᠡ ᠡᠪᠴᠢᠭᠦᠦ ᠳᠠᠪᠬᠠᠯᠠᠵᠤ ᠵᠣᠴᠢᠨ ᠳᠠᠢᠯᠠᠬᠤ ᠳ᠋ᠤ᠌ ᠬᠦᠷᠪᠡᠯ᠂ ᠡᠷᠬᠡᠪᠰᠢ ᠡᠨᠡ ᠬᠦ᠌ ᠪᠦᠳᠦᠷᠬᠡᠢ ᠶ᠋ᠢ ᠨᠢ ᠠᠪᠴᠤ ᠲᠠᠯᠪᠢᠳᠠᠭ ᠶᠣᠰᠣᠲᠠᠢ᠃
ᠡᠪᠴᠢᠭᠦᠨ ᠬᠤᠷᠤᠭᠤ
ᠡᠪᠴᠢᠭᠦᠨ ᠦ᠌ ᠡᠮᠦᠨᠡᠬᠢ ᠬᠡᠰᠡᠭ ᠦ᠋ᠨ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠬᠠᠵᠠᠭᠤ ᠶ᠋ᠢᠨ ᠬᠠᠪᠢᠷᠭᠠᠨ ᠮᠥᠭᠡᠷᠰᠦᠨ ᠦ᠌ ᠦᠯᠡᠳᠡᠪᠦᠷᠢ ᠪᠣᠯᠬᠤ ᠬᠤᠷᠤᠭᠤᠨ ᠤ᠋ ᠨᠢᠭᠡ ᠦᠶᠡ ᠮᠡᠲᠦ ᠲᠦᠭᠦᠷᠬᠡᠢ ᠶᠠᠰᠤ᠃
ᠡᠪᠴᠢᠭᠦᠨ ᠠᠶᠤᠮᠠᠬᠠᠢ
ᠡᠪᠴᠢᠭᠦᠨ ᠦ᠌ ᠬᠣᠷᠮᠣᠢ ᠲᠠᠯᠠ ᠶ᠋ᠢᠨ ᠲᠥᠪ ᠳᠤᠮᠳᠠ ᠲᠣᠭᠣᠷᠢᠭ ᠬᠠᠯᠪᠠᠭᠠ ᠰᠢᠭ᠋ ᠮᠥᠭᠡᠷᠰᠦ᠃
ᠡᠪᠴᠢᠭᠦᠨ ᠰᠦᠪᠡᠷᠭᠡᠳᠡᠰᠦ
ᠡᠪᠴᠢᠭᠦᠨ ᠦ᠌ ᠠᠶᠤᠮᠠᠬᠠᠢ ᠶ᠋ᠢᠨ ᠬᠣᠶᠠᠷ ᠲᠠᠯᠠ ᠳ᠋ᠤ᠌ ᠰᠦᠪᠡᠷᠭᠡ ᠶ᠋ᠢᠨ ᠦᠯᠡᠳᠡᠪᠦᠷᠢ ᠤᠷᠲᠤ ᠮᠥᠭᠡᠷᠰᠦᠯᠢᠭ ᠬᠤᠷᠤᠭᠤ᠃
ᠬᠠ
ᠳᠠᠯᠤ ᠬᠠᠷᠢᠲᠤ ᠪᠣᠭᠲᠣᠭᠣᠰᠣ 10 ᠬᠠᠪᠢᠷᠭᠠ ᠲᠠᠢ ᠪᠠᠢᠭᠠ ᠬᠡᠰᠡᠭ ᠦ᠋ᠨ ᠨᠡᠷᠡ᠃
ᠲᠠᠯᠤᠨ ᠶᠠᠰᠤ
ᠮᠠᠯ ᠤ᠋ᠨ ᠰᠡᠷᠪᠡᠭᠡ ᠶ᠋ᠢᠨ ᠬᠣᠶᠠᠷ ᠬᠠᠵᠠᠭᠤ ᠳ᠋ᠤ᠌ ᠨᠠᠭᠠᠯᠳᠤᠨ ᠪᠣᠢ ᠬᠠᠪᠲᠠᠭᠠᠢ ᠭᠤᠷᠪᠠᠯᠵᠢᠨᠳᠠᠭᠤ ᠶᠠᠰᠤ᠃
ᠲᠠᠯᠤᠨ ᠮᠠᠶᠠᠭᠠ
ᠲᠠᠯᠤᠨ ᠶᠠᠰᠤᠨ ᠤ᠋ ᠨᠠᠷᠢᠨ ᠦᠵᠦᠭᠦᠷ ᠪᠣᠯᠬᠤ ᠡᠰᠢ ᠰᠢᠭ ᠶᠠᠰᠤ᠃ ᠪᠠᠰᠠ ᠲᠠᠯᠤᠨ ᠬᠦᠵᠦᠭᠦᠦ ᠭᠡᠳᠡᠭ᠃
ᠲᠠᠯᠤᠨ ᠤ᠋ ᠬᠠᠮᠠᠷ
ᠲᠠᠯᠤᠨ ᠤ᠋ ᠬᠠᠪᠲᠠᠭᠠᠢ ᠨᠢᠭᠡ ᠲᠠᠯᠠ ᠳᠡᠭᠡᠷᠡ ᠤᠷᠲᠤ ᠲᠡᠢᠰᠢ ᠪᠡᠨ ᠳᠠᠭᠠᠭᠰᠠᠨ ᠪᠣᠰᠤᠭᠠ ᠶᠠᠰᠤ ᠃ ᠪᠠᠰᠠ ᠨᠢᠷᠤᠭᠤ ᠰᠠᠮᠰᠠ ᠭᠡᠳᠡᠭ᠃
ᠪᠠᠶᠠᠷ ᠮᠠᠩᠨᠠᠢ
ᠲᠠᠯᠤᠨ ᠬᠠᠮᠠᠷ ᠤ᠋ᠨ ᠳᠡᠭᠡᠳᠦ ᠢᠷᠮᠡᠭ ᠨᠢ ᠲᠠᠯᠤᠨ ᠬᠣᠲᠠ ᠤᠷᠤᠭᠤ ᠦᠯᠦ ᠮᠡᠳᠡᠭᠳᠡᠮᠡ ᠬᠠᠨᠠᠨ ᠰᠠᠷᠠᠪᠴᠢᠯᠠᠵᠤ ᠥᠩᠭᠡᠢᠭᠰᠡᠨ ᠢ᠋ ᠪᠠᠶᠠᠷ ᠮᠠᠩᠨᠠᠢ ᠭᠡᠳᠡᠭ ᠂ ᠪᠠᠰᠠ ᠬᠡᠦᠬᠡᠳ ᠦ᠋ᠨ ᠲᠠᠪᠠᠭ ᠴᠤ᠌ ᠭᠡᠳᠡᠭ᠃
ᠲᠠᠯᠤᠨ ᠬᠣᠲᠠ
ᠳᠠᠯᠤ ᠶᠠᠰᠤᠨ ᠬᠠᠮᠠᠷ ᠤ᠋ᠨ ᠬᠠᠵᠠᠭᠤ ᠶ᠋ᠢᠨ ᠥᠷᠭᠡᠨ ᠬᠠᠪᠲᠠᠭᠠᠢ ᠶᠠᠰᠤ᠂ ᠪᠠᠰᠠ ᠭᠤᠷᠪᠠᠯᠵᠢᠨ ᠴᠠᠭᠠᠨ ᠬᠣᠲᠠ ᠭᠡᠳᠡᠭ᠃
ᠲᠠᠯᠤᠨ ᠮᠥᠭᠡᠷᠰᠦ
ᠲᠠᠯᠤᠨ ᠤ᠋ ᠬᠡᠯᠡ ᠶ᠋ᠢᠨ ᠲᠠᠯᠠ ᠳ᠋ᠤ᠌ ᠵᠠᠯᠭᠠᠯᠳᠤᠨ ᠣᠷᠣᠰᠢᠬᠤ ᠮᠥᠭᠡᠷᠰᠦᠯᠢᠭ᠃
ᠲᠠᠯᠤᠨ ᠲᠣᠭᠣᠭᠠ ᠲᠠᠯᠤᠨ ᠶᠠᠰᠤᠨ ᠤ᠋ ᠮᠠᠶᠠᠭᠠ ᠶ᠋ᠢᠨ ᠬᠣᠩᠬᠣᠷ᠃
ᠲᠠᠯᠤᠨ ᠤ᠋ ᠡᠷᠡᠬᠡᠢ
ᠲᠣᠭᠣᠭᠠ ᠶ᠋ᠢᠨ ᠬᠠᠵᠠᠭᠤ ᠳ᠋ᠠᠬᠢ ᠭᠦᠳᠦᠭᠦᠷ ᠶᠠᠰᠤ ᠶ᠋ᠢ ᠲᠠᠯᠤᠨ ᠤ᠋ ᠡᠷᠡᠬᠡᠢ ᠭᠡᠳᠡᠭ᠃
ᠲᠠᠯᠤᠨ ᠤ᠋ ᠭᠤᠤᠷ
ᠲᠠᠯᠤᠨ ᠤ᠋ ᠮᠠᠶᠠᠭᠠ ᠳᠡᠭᠡᠷᠡᠬᠢ ᠨᠦᠬᠡ᠂ ᠪᠠᠰᠠ ᠰᠤᠳᠠᠯ ᠤ᠋ᠨ ᠠᠭᠤᠷᠬᠠᠢ ᠭᠡᠨᠡ᠃
ᠲᠠᠯᠤᠨ ᠤ᠋ ᠬᠠᠷᠢ ᠲᠠᠯᠠ
ᠦᠬᠡᠷ ᠦ᠋ᠨ ᠴᠤᠪᠤᠭᠠ ᠲᠠᠯᠠ ᠶ᠋ᠢ ᠬᠠᠷᠢ ᠲᠠᠯᠠ ᠭᠡᠨᠡ᠃ ᠪᠠᠰᠠ ᠬᠦᠢᠲᠡᠨ ᠲᠠᠯᠠ ᠭᠡᠳᠡᠭ᠃
ᠲᠠᠯᠤᠨ ᠤ᠋ ᠬᠠᠯᠠᠭᠤᠨ ᠲᠠᠯᠠ
ᠬᠦᠢᠲᠡᠨ ᠲᠠᠯᠠ ᠶ᠋ᠢᠨ ᠡᠰᠡᠷᠭᠦ ᠭᠤᠷᠪᠠᠯᠵᠢᠨ ᠬᠣᠲᠠ ᠶ᠋ᠢᠨ ᠳᠣᠲᠣᠷ ᠬᠥᠪᠡᠭᠡ ᠬᠠᠮᠠᠷ ᠳᠣᠣᠭᠤᠷ ᠬᠡᠰᠡᠭ᠃
ᠲᠠᠯᠤᠨ ᠤ᠋ ᠳᠡᠭᠡᠳᠦ ᠥᠨᠴᠥᠭ ᠬᠠᠷᠢ ᠲᠠᠯᠠ ᠶ᠋ᠢᠨ ᠳᠡᠭᠡᠳᠦ ᠦᠵᠦᠭᠦᠷ ᠬᠡᠰᠡᠭ᠃
ᠲᠠᠯᠤᠨ ᠤ᠋ ᠢᠷ
ᠲᠠᠯᠤᠨ ᠤ᠋ ᠰᠤᠭᠤ ( ᠵᠠᠪᠰᠠᠷ ) ᠲᠠᠯᠠ ᠶ᠋ᠢᠨ ᠢᠷᠲᠡᠢ ᠢᠷᠮᠡᠭ ᠃ ᠪᠠᠰᠠ ᠳᠡᠭᠡᠳᠦ ᠦᠵᠦᠭᠦᠷ ᠢ᠋ ᠨᠢ ᠮᠠᠯ ᠤ᠋ᠨ ᠣᠮᠣᠭ ᠭᠡᠨᠡ᠃
ᠲᠠᠯᠤᠨ ᠤ᠋ ᠰᠤᠭᠤ
ᠲᠠᠯᠤᠨ ᠶᠠᠰᠤᠨ ᠤ᠋ ᠬᠠᠮᠠᠷ ᠤ᠋ᠨ ᠬᠠᠵᠠᠭᠤ ᠶ᠋ᠢᠨ ᠨᠠᠷᠢᠨ ᠢᠪᠴᠤᠤ ᠬᠠᠪᠲᠠᠭᠠᠢ᠃ ᠪᠠᠰᠠ ᠠᠳᠤᠭᠤᠨ ᠤ᠋ ᠵᠠᠮ ᠭᠡᠳᠡᠭ᠃
ᠲᠠᠯᠤᠨ ᠤ᠋ ᠴᠤᠪᠤᠭᠠ
ᠲᠠᠯᠤᠨ ᠤ᠋ ᠬᠣᠲᠠ ᠲᠠᠯᠠ ᠶ᠋ᠢᠨ ᠬᠥᠪᠡᠭᠡ ᠶᠠᠰᠤᠨ ᠤ᠋ ᠢᠷᠮᠡᠭ ᠢ᠋ᠶ᠋ᠡᠷ ᠪᠣᠢ ᠭᠣᠪᠢᠯ ᠂ ᠦᠬᠡᠷ ᠦ᠋ᠨ ᠴᠤᠪᠤᠭᠠ ᠴᠤ᠌ ᠭᠡᠳᠡᠭ᠃
ᠲᠠᠯᠤᠨ ᠤ᠋ ᠬᠠᠭᠤᠳᠠᠰᠤ ᠲᠠᠯᠤᠨ ᠤ᠋ ᠳᠣᠲᠣᠷ ᠲᠠᠯᠠ ᠶ᠋ᠢᠨ ᠨᠢᠮᠭᠡᠨ ᠮᠢᠬᠠ᠃
ᠲᠠᠯᠤᠨ ᠤ᠋ ᠣᠮᠣᠭ
ᠲᠠᠯᠤᠨ ᠤ᠋ ᠬᠠᠮᠠᠷ ᠤ᠋ᠨ ᠮᠡᠷᠭᠡᠨ ᠦᠵᠦᠭᠦᠷ᠂ ᠪᠠᠰᠠ ᠬᠥᠮᠦᠨ ᠦ᠌ ᠣᠮᠣᠭ ᠭᠡᠳᠡᠭ᠃
ᠲᠠᠯᠤᠨ ᠤ᠋ ᠬᠡᠯᠡ
ᠲᠠᠯᠤᠨ ᠤ᠋ ᠮᠥᠭᠡᠷᠰᠦ ᠤᠷᠭᠤᠳᠠᠭ ᠲᠠᠯᠠ᠃ ᠪᠠᠰᠠ ᠣᠭᠲᠠᠷᠭᠤᠢ ᠶ᠋ᠢᠨ ᠲᠤᠢᠯ ᠪᠠ ᠳᠠᠯᠤ ᠶ᠋ᠢᠨ ᠬᠣᠷᠮᠣᠷ ᠭᠡᠳᠡᠭ᠃
ᠠᠳᠬᠤᠭᠠᠯ ᠴᠢᠮᠥᠭᠡ
ᠳᠠᠯᠤ ᠠ᠋ᠴᠠ ᠵᠠᠯᠭᠠᠯᠳᠤᠨ ᠪᠣᠢ ᠴᠢᠮᠥᠭᠡᠲᠦ ᠶᠠᠰᠤ᠃ ᠡᠭᠦᠨ ᠦ᠌ ᠨᠡᠷᠡ ᠣᠯᠠᠨ᠃ 《ᠬᠠᠷᠢᠲᠤ ᠴᠢᠮᠥᠭᠡ 》᠂ 《ᠬᠠᠢᠨ ᠴᠢᠮᠥᠭᠡ 》ᠪᠠᠰᠠ 《ᠪᠤᠭᠤᠯᠤᠭ ᠴᠢᠮᠥᠭᠡ 》ᠴᠦ᠍ ᠭᠡᠳᠡᠭ᠃
ᠪᠣᠭᠲᠣ ᠴᠢᠮᠥᠭᠡ
ᠠᠳᠬᠤᠭᠠᠯ ᠴᠢᠮᠥᠭᠡ ᠡᠴᠡ ᠵᠠᠯᠭᠠᠯᠳᠤᠨ ᠪᠣᠢ᠂ ᠭᠤᠷᠪᠠᠳᠤᠭᠠᠷ ᠦᠶᠡ ᠶ᠋ᠢᠨ ᠴᠢᠮᠥᠭᠡᠲᠦ ᠶᠠᠰᠤ᠃ ᠮᠠᠯ ᠳ᠋ᠤ᠌ ᠪᠣᠭᠲᠣᠭᠣᠰᠣ ( ᠪᠣᠭᠲᠣᠰ ) ᠭᠡᠳᠡᠭ᠃ ᠵᠢᠴᠢ ᠱᠤ᠌ ᠶᠠᠰᠤ ( ᠴᠢᠮᠥᠭᠡ ) ᠭᠡᠳᠡᠭ ᠃ ᠡᠨᠡ ᠨᠢ ᠪᠠᠷᠤᠭ ᠬᠥᠮᠦᠨ ᠳᠡᠭᠡᠷᠡ ᠬᠡᠷᠡᠭᠯᠡᠳᠡᠭ ᠪᠠᠢᠵᠤ ᠮᠡᠳᠡᠨᠡ᠃
ᠬᠠᠭᠳᠠ ᠦᠶᠡ
ᠪᠣᠭᠲᠣᠭᠣᠰᠣ ᠪᠣᠯᠤᠨ ᠰᠢᠯᠪᠢᠨ ᠶᠠᠰᠤ ᠶ᠋ᠢᠨ ᠠᠩ ᠳ᠋ᠤ᠌ ᠣᠷᠣᠰᠢᠬᠤ ᠵᠢᠵᠢᠭ ᠵᠢᠵᠢᠭ ᠶᠠᠰᠤ᠃ ᠡᠭᠦᠨ ᠢ᠋ ᠪᠠᠰᠠ ᠬᠠᠭᠳᠠ ᠦᠶᠡ ᠪᠤᠶᠤ ᠰᠢᠪᠡᠨᠦᠷ ᠶᠠᠰᠤ ᠭᠡᠳᠡᠭ᠃ ᠡᠢᠮᠦ ᠵᠢᠵᠢᠭ ᠶᠠᠰᠤ 5 ᠪᠠᠢᠳᠠᠭ᠃ ᠪᠠᠰᠠ ᠲᠠᠮᠤ ᠶ᠋ᠢᠨ 5 ᠶᠠᠰᠤ ᠭᠡᠳᠡᠭ᠃
ᠰᠢᠯᠪᠢ ᠬᠠᠭᠳᠠ ᠦᠶᠡ ᠡᠴᠡ ᠵᠠᠯᠭᠠᠯᠳᠤᠵᠤ ᠪᠣᠢ ᠨᠠᠷᠢᠨ ᠤᠷᠲᠤ ᠶᠠᠰᠤ᠃
ᠪᠡᠷᠪᠡᠬᠡᠢ ᠶᠠᠰᠤ
ᠰᠢᠯᠪᠢᠨ ᠦ᠌ ᠳᠣᠣᠷᠠᠲᠤ ᠦᠵᠦᠭᠦᠷ ᠦ᠋ᠨ ᠠᠷᠤ ᠳ᠋ᠤ᠌ ᠵᠢᠵᠢᠭ ᠬᠣᠶᠠᠷ ᠬᠣᠭᠢᠰᠣ ᠤᠷᠭᠤᠳᠠᠭ ᠦᠶᠡ ᠶ᠋ᠢᠨ ᠶᠠᠰᠤ᠃
ᠰᠠᠭᠯᠠᠭᠠ ᠶᠠᠰᠤ
ᠪᠡᠷᠪᠡᠬᠡᠢ ᠡᠴᠡ ᠵᠠᠯᠭᠠᠵᠤ ᠪᠣᠢ ᠴᠥᠮᠴᠥᠭᠡ ᠶᠠᠰᠤ᠃ ᠪᠠᠰᠠ ᠴᠥᠮᠴᠥᠭᠡ ᠭᠡᠳᠡᠭ᠃
ᠳᠠᠭᠠᠯᠴᠠᠭ ᠶᠠᠰᠤ
ᠰᠠᠭᠯᠠᠭᠠ ᠶᠠᠰᠤ ᠶ᠋ᠢ ᠵᠠᠯᠭᠠᠵᠤ ᠪᠣᠢ ᠲᠠᠪᠠᠭ ᠤ᠋ᠨ ᠵᠢᠵᠢᠭ ᠴᠥᠮᠴᠥᠭᠡ ᠶᠠᠰᠤ᠃
ᠬᠡᠦᠬᠡᠨ ᠬᠣᠭᠢᠰᠣ ᠶ᠋ᠢᠨ ᠶᠠᠰᠤ
ᠳᠠᠭᠠᠯᠴᠠᠭ ᠶᠠᠰᠤᠨ ᠳ᠋ᠤ᠌ ᠵᠠᠯᠭᠠᠵᠤ ᠪᠣᠢ ᠬᠣᠭᠢᠰᠣ ᠶ᠋ᠢᠨ ᠬᠠᠮᠤᠭ ᠰᠡᠭᠦᠯᠴᠢ ᠶᠠᠰᠤ᠃
ᠭᠤᠶᠠ
ᠮᠠᠯ ᠤ᠋ᠨ ᠬᠣᠢᠲᠤ ᠬᠥᠯ ᠢ᠋ ᠭᠤᠶᠠ ᠭᠡᠨᠡ᠃ ᠰᠡᠭᠦᠵᠢ ᠳᠤᠮᠳᠠ ᠴᠢᠮᠥᠭᠡ ᠱᠠᠭᠠᠨᠲᠤ ᠪᠠᠭᠲᠠᠨᠠ᠃
ᠰᠡᠭᠦᠵᠢᠨ ᠶᠠᠰᠤ
ᠰᠡᠭᠦᠵᠢᠨ ᠲᠣᠯᠣᠭᠠᠢ ᠨᠢ ᠳᠤᠤᠬᠠᠨ ᠨᠢᠷᠤᠭᠤ ᠲᠠᠢ ᠵᠠᠯᠭᠠᠯᠳᠤᠨ ᠪᠥᠭᠰᠡᠨ ᠦ᠌ ᠲᠡᠰᠢᠶᠡ ᠪᠡᠶᠡ ᠶ᠋ᠢ ᠪᠦᠲᠦᠭᠡᠭᠰᠡᠨ ᠨᠦᠬᠡᠲᠡᠢ ᠬᠠᠪᠲᠠᠭᠠᠢᠯᠢᠭ ᠶᠠᠰᠤ᠃
ᠰᠡᠭᠦᠵᠢᠨ ᠲᠣᠯᠣᠭᠠᠢ
ᠲᠤᠤᠬᠠᠨ ᠨᠢᠷᠤᠭᠤᠨ ᠳ᠋ᠤ᠌ ᠨᠠᠭᠠᠯᠳᠤᠨ ᠪᠣᠢ ᠬᠠᠮᠤᠭ ᠳᠡᠭᠡᠳᠦ ᠥᠨᠴᠥᠭ᠃
ᠰᠡᠭᠦᠵᠢᠨ ᠨᠦᠬᠡ ᠲᠤᠰ ᠶᠠᠰᠤᠨ ᠤ᠋ ᠳᠤᠮᠳᠠ ᠬᠡᠰᠡᠭ ᠲᠦ᠍ ᠪᠣᠢ ᠨᠦᠬᠡ᠃
ᠥᠭᠡᠵᠡᠭ ᠶᠠᠰᠤ
ᠰᠡᠭᠦᠯ ᠦ᠋ᠨ ᠤᠭ ᠤ᠋ᠨ ᠲᠡᠨᠳᠡ ᠴᠦᠨᠳᠦᠢᠭᠰᠡᠨ ᠰᠡᠭᠦᠵᠢᠨ ᠦ᠌ ᠬᠣᠢᠲᠤ ᠥᠨᠴᠥᠭ ᠶᠠᠰᠤ᠃ ᠪᠠᠰᠠ ᠰᠠᠭᠤᠳᠠᠯ ᠶᠠᠰᠤ ᠭᠡᠳᠡᠭ᠃
ᠳᠤᠮᠳᠠ ᠴᠢᠮᠥᠭᠡ
ᠰᠡᠭᠦᠵᠢᠨ ᠡᠴᠡ ᠵᠠᠯᠭᠠᠯᠳᠤᠨ ᠱᠠᠭᠠᠲᠤ ᠴᠢᠮᠥᠭᠡ ᠲᠡᠢ ᠵᠣᠯᠭᠠᠵᠤ ᠪᠣᠢ ᠶᠠᠰᠤ᠃
ᠴᠢᠮᠦᠭᠡᠨ ᠲᠣᠯᠣᠭᠠᠢ ᠵᠢᠩᠰᠡ ᠮᠡᠲᠦ ᠪᠥᠨᠲᠥᠭᠡᠷ ᠲᠣᠯᠣᠭᠠᠢ ᠲᠠᠢ ᠲᠠᠯᠠ᠃
ᠴᠢᠮᠦᠭᠡᠨ ᠰᠢᠯᠪᠢ
ᠴᠢᠮᠦᠭᠡᠨ ᠬᠦᠵᠦᠭᠦᠦ ᠂ ᠴᠢᠮᠦᠭᠡᠨ ᠦ᠌ ᠳᠤᠮᠳᠠ ᠬᠡᠰᠡᠭ ᠭᠠᠩᠰᠠ ᠶ᠋ᠢᠨ ᠮᠣᠳᠣ ᠰᠢᠭ᠋ ᠤᠷᠲᠤ ᠴᠢᠮᠥᠭᠡᠲᠦ ᠶᠠᠰᠤ᠃
ᠴᠢᠮᠦᠭᠡᠨ ᠦ᠌ ᠰᠢᠯᠪᠢᠨ ᠨᠦᠬᠡ
ᠴᠢᠮᠦᠭᠡᠨ ᠦ᠌ ᠰᠢᠯᠪᠢᠨ ᠬᠡᠰᠡᠭ ᠲᠦ᠍ ᠨᠢᠭᠡᠨ ᠨᠦᠬᠡ ᠪᠠᠢᠳᠠᠭ᠃ ᠲᠣᠰᠣ ᠲᠦᠯᠬᠢᠭᠴᠢ ᠨᠦᠬᠡ ᠭᠡᠳᠡᠭ᠃
ᠱᠠᠭᠠᠨᠲᠤ ᠴᠢᠮᠥᠭᠡ
ᠳᠤᠮᠳᠠ ᠴᠢᠮᠦᠭᠡᠨ ᠡᠴᠡ ᠵᠠᠯᠭᠠᠯᠳᠤᠨ ᠪᠣᠢ ᠪᠥᠭᠡᠳ ᠨᠥᠭᠦᠭᠡ ᠦᠵᠦᠭᠦᠷ ᠲᠡᠭᠡᠨ ᠱᠠᠭᠠ ᠶᠠᠰᠤ ᠪᠦᠬᠦᠢ ᠴᠢᠮᠥᠭᠡᠲᠦ ᠶᠠᠰᠤ᠃ ᠪᠠᠰᠠ ᠬᠣᠢᠲᠤ ᠴᠢᠮᠥᠭᠡ ᠭᠡᠳᠡᠭ᠃
ᠲᠣᠢᠭ ᠶᠠᠰᠤ
ᠳᠤᠮᠳᠠ ᠴᠢᠮᠥᠭᠡ ᠪᠣᠯᠤᠨ ᠱᠠᠭᠠᠲᠤ ᠴᠢᠮᠥᠭᠡ ᠬᠣᠶᠠᠷ ᠤ᠋ᠨ ᠠᠭᠤᠯᠵᠠᠵᠤ ᠪᠣᠢ ᠦᠶᠡ ᠶ᠋ᠢᠨ ᠡᠮᠦᠨᠡ ᠲᠠᠯᠠ ᠳ᠋ᠤ᠌ ᠣᠷᠣᠰᠢᠬᠤ ᠲᠥᠪᠥᠭᠡᠷ ᠶᠠᠰᠤ᠃
ᠪᠣᠷᠪᠢ ᠶᠠᠰᠤ ᠱᠠᠭᠠ ᠶᠠᠰᠤᠨ ᠤ᠋ ᠠᠷᠤ ᠳ᠋ᠤ᠌ ᠲᠠᠬᠢᠷᠯᠠᠵᠤ ᠪᠠᠢᠭᠠ ᠶᠠᠰᠤ᠃
ᠵᠣᠪᠠᠯᠠᠩᠲᠤ ᠦᠶᠡ
ᠱᠠᠭᠠ ᠦᠶᠡ ᠳ᠋ᠡᠬᠢ ᠣᠯᠠᠨ ᠦᠶᠡᠲᠦ ᠴᠥᠮᠴᠥᠭᠡ ᠶᠠᠰᠤ᠃ ᠱᠠᠭᠠ ᠪᠣᠯᠤᠨ ᠰᠢᠯᠪᠢᠨ ᠶᠠᠰᠤᠨ ᠤ᠋ ᠵᠠᠪᠰᠠᠷ ᠲᠤ᠌ ᠣᠷᠣᠰᠢᠬᠤ ᠵᠢᠵᠢᠭ ᠵᠢᠵᠢᠭ 6 ᠶᠠᠰᠤ ᠪᠠᠢᠳᠠᠭ᠃ ᠡᠭᠦᠨ ᠢ᠋ ᠵᠣᠪᠠᠯᠠᠩᠲᠤ 6 ᠶᠠᠰᠤ ᠭᠡᠳᠡᠭ ᠃
ᠰᠢᠯᠪᠢ
ᠱᠠᠭᠠᠲᠤ ᠴᠢᠮᠥᠭᠡ ᠡᠴᠡ ᠵᠠᠯᠭᠠᠯᠳᠤᠨ ᠡᠭᠦᠰᠴᠦ ᠪᠡᠷᠪᠡᠬᠡᠢ ᠦᠶᠡ ᠲᠡᠢ ᠵᠣᠯᠭᠠᠵᠤ ᠪᠣᠢ ᠨᠠᠷᠢᠨ ᠤᠷᠲᠤ ᠴᠢᠮᠥᠭᠡᠲᠦ ᠶᠠᠰᠤ᠃ ᠪᠠᠰᠠ ᠬᠠᠩᠭᠢᠷᠴᠠᠭᠳᠦ ᠰᠢᠯᠪᠢ᠃
ᠪᠡᠷᠪᠡᠬᠡᠢ ᠦᠶᠡ ᠶ᠋ᠢᠨ ᠶᠠᠰᠤ ᠪᠡᠷᠪᠡᠬᠡᠢ ᠦᠶᠡ ᠳ᠋ᠡᠬᠢ ᠵᠢᠵᠢᠭ ᠴᠥᠮᠴᠥᠭᠡ ᠶᠠᠰᠤ᠃
ᠴᠥᠮᠴᠥᠭᠡ ᠶᠠᠰᠤ ᠪᠡᠷᠪᠡᠬᠡᠢ ᠡᠴᠡ ᠳᠠᠭᠠᠯᠴᠠᠭ ᠶᠠᠰᠤ ᠬᠣᠶᠠᠷ ᠤ᠋ᠨ ᠳᠤᠮᠳᠠᠬᠢ ᠴᠥᠮᠴᠥᠭᠡ ᠶᠠᠰᠤ ᠃ ᠳᠠᠭᠠᠯᠴᠠᠭ ᠶᠠᠰᠤ
ᠰᠠᠭᠯᠠᠭᠠ ( ᠴᠥᠮᠴᠥᠭᠡ ) ᠦᠶᠡ ᠡᠴᠡ ᠵᠠᠯᠭᠠᠵᠤ ᠪᠣᠢ ᠣᠯᠠᠨ ᠴᠥᠮᠴᠥᠭᠡᠲᠦ ᠦᠶᠡᠲᠦ ᠶᠠᠰᠤ ᠃ ᠪᠠᠰᠠ ᠥᠰᠥᠭᠡᠢ ᠶᠠᠰᠤ ᠭᠡᠳᠡᠭ᠃
ᠬᠡᠦᠬᠡᠨ ᠬᠣᠭᠢᠰᠣ ᠳᠠᠭᠠᠯᠴᠠᠭ ᠤ᠋ᠨ ᠬᠠᠮᠤᠭ ᠦᠵᠦᠭᠦᠷ ᠦᠶᠡ ᠶᠠᠰᠤ᠃
ᠬᠣᠭᠢᠰᠣ
ᠬᠡᠦᠬᠡᠨ ᠬᠣᠭᠢᠰᠣ ᠶ᠋ᠢᠨ ᠭᠠᠳᠠᠭᠤᠷᠬᠢ ᠡᠪᠡᠷ ᠲᠢᠲᠢᠮ ᠂ ᠮᠣᠷᠢᠨ ᠳ᠋ᠤ᠌ ᠲᠤᠭᠤᠷᠠᠢ ᠭᠡᠵᠦ ᠂ ᠲᠡᠮᠡᠭᠡᠨ ᠳ᠋ᠦ᠍ ᠲᠠᠪᠠᠭᠲᠤ ᠬᠢᠮᠤᠰᠤ ᠭᠡᠳᠡᠭ᠃
ᠠᠭᠠᠷᠴᠠᠭ ᠶᠠᠰᠤ ᠰᠡᠭᠦᠵᠢ ᠤᠮᠠᠳᠠᠭ ᠶᠠᠰᠤᠨ ᠤ᠋ ᠠᠭᠤᠯᠵᠠᠷ᠃
ᠤᠮᠠᠳᠠᠭ ᠶᠠᠰᠤ ᠠᠭᠠᠷᠴᠠᠭ ᠤ᠋ᠨ ᠠᠭᠤᠯᠵᠠᠷ ᠤ᠋ᠨ ᠳᠣᠣᠷᠠᠲᠤ ᠢᠷᠮᠡᠭ ᠶᠠᠰᠤ᠃
ᠮᠥᠴᠢ
ᠠᠯᠠᠭᠰᠠᠨ ᠤ᠋ ᠬᠣᠢᠨᠠ ᠮᠠᠯ ᠤ᠋ᠨ ᠬᠥᠯ ᠨᠢᠭᠡ ᠪᠦᠷᠢ ᠶ᠋ᠢ ᠮᠥᠴᠢ ᠭᠡᠵᠦ ᠨᠡᠷᠡᠯᠡᠳᠡᠭ᠃
ᠮᠣᠵᠢ
ᠮᠥᠴᠢ ᠳ᠋ᠡᠬᠢ ᠲᠣᠮᠣ ᠦᠶᠡ ᠨᠢᠭᠡ ᠪᠦᠷᠢ ᠶ᠋ᠢ ᠮᠣᠵᠢ ᠭᠡᠳᠡᠭ᠃ 《ᠳᠠᠯᠤ ᠬᠠᠷᠢᠲᠤ ᠲᠠᠢ ᠨᠢ ᠬᠣᠶᠠᠷ ᠮᠣᠵᠢ ᠶ᠋ᠢ ᠢᠳᠡᠴᠢᠬᠡᠯᠡ᠃ ᠶᠠᠭᠠᠬᠢᠭᠰᠠᠨ ᠰᠦᠷᠡᠬᠡᠢ ᠶᠦ᠍ᠮ ? 》 ᠭᠡᠰᠡᠨ ᠦᠭᠡ ᠶ᠋ᠢ ᠰᠠᠨᠠᠮᠤ᠃ 《ᠳᠥᠷᠪᠡᠨ ᠮᠥᠴᠢ ᠠᠷᠪᠠᠨ ᠬᠣᠶᠠᠷ ᠮᠣᠵᠢ 》ᠭᠡᠳᠡᠭ ᠢ᠋ᠶ᠋ᠡᠷ ᠦᠵᠡᠪᠡᠯ ᠂ ᠮᠥᠴᠢ ᠳ᠋ᠦ᠍ ᠰᠢᠭᠢᠷᠡ ᠣᠷᠣᠯᠴᠠᠳᠠᠭ ᠦᠭᠡᠢ ᠠᠵᠢ᠃ ᠣᠳᠣ ᠮᠣᠵᠢ ᠨᠢ ᠵᠠᠷᠢᠮ ᠭᠠᠵᠠᠷ ᠮᠥᠴᠢ ᠪᠡᠷ ᠬᠡᠷᠡᠭᠯᠡᠭᠳᠡᠭᠡᠳ 《ᠮᠣᠵᠢ 》ᠭᠡᠳᠡᠭ ᠮᠠᠨᠢ ᠣᠷᠬᠢᠭᠳᠠᠬᠤ ᠳᠡᠭᠡᠷᠡ ᠬᠦᠷᠴᠦ ᠪᠣᠢ᠃ ᠶᠡᠷᠦ ᠨᠢ ᠣᠷᠬᠢᠭᠳᠠᠴᠢᠬᠠᠵᠠᠢ᠃ ᠣᠳᠣ ᠡᠨᠡ ᠦᠭᠡ ᠶ᠋ᠢᠨ ᠰᠢᠯᠵᠢᠭᠰᠡᠨ ᠤᠳᠬᠠ ᠵᠠᠰᠠᠭ ᠵᠠᠬᠢᠷᠭᠠᠨ ᠳ᠋ᠤ᠌ ᠦᠯᠡᠳᠡᠨ ᠬᠣᠴᠣᠷᠴᠠᠢ᠃ ᠲᠤᠬᠠᠢᠯᠠᠪᠠᠯ ᠂ ᠬᠠᠷᠠᠮᠦ᠋ᠷᠡᠨ ᠮᠣᠵᠢ ᠂ ᠬᠢᠷᠢᠨ ᠮᠣᠵᠢ ᠭᠡᠬᠦ ᠮᠡᠲᠦ᠃