ᠬᠥᠬᠡ ᠵᠤᠯᠠ – ᠪᠣᠷᠵᠢᠭᠢᠨ ᠸᠠᠩᠵᠠᠯ - < ᠠᠷᠪᠠᠨ ᠨᠢᠭᠡ ᠂ ᠤᠯᠠᠭᠠᠨ ᠢᠳᠡᠭᠡᠨ ᠦ ᠪᠦᠯᠦᠭ 3 > Хөх зул – Боржигон Ванжал –" Арван нэг ᠂ Улаан идээний бүлэг 3 "
403 ᠮᠠᠨ ᠤ᠋ ᠣᠷᠣᠨᠠ ᠬᠣᠨᠢᠨ ᠰᠢᠭᠦᠰᠦ ᠶ᠋ᠢ ᠪᠦᠬᠦᠯᠢ ᠪᠡᠷ ᠢᠳᠡᠬᠦ ᠂ ᠮᠥᠴᠢᠯᠡᠨ ᠢᠳᠡᠬᠦ ᠂ ᠰᠢᠷᠠᠵᠤ ᠢᠳᠡᠬᠦ ᠡᠴᠡ ᠭᠠᠳᠠᠨᠠ ᠬᠣᠨᠢᠨ ᠤ᠋ ᠡᠯᠡ ᠡᠷᠬᠡᠲᠡᠨ ᠦ᠌ ᠠᠳᠠᠯᠢ ᠪᠤᠰᠤ ᠠᠮᠲᠠ ᠰᠢᠮᠲᠡ ᠬᠢᠭᠡᠳ ᠦᠢᠯᠡᠳᠦᠯ ᠢ᠋ ᠠᠰᠢᠭᠯᠠᠵᠤ ᠶᠠᠩᠵᠤ ᠪᠦᠷᠢ ᠪᠡᠷ ᠬᠤᠪᠢᠯᠭᠠᠵᠤ ᠢᠳᠡᠳᠡᠭ ᠪᠣᠯᠠᠢ᠃ ᠡᠭᠦᠨ ᠳ᠋ᠦ᠍ ᠭᠠᠵᠠᠷ ᠣᠷᠣᠨ ᠤ᠋ ᠵᠠᠩ ᠳᠠᠳᠬᠠᠯ ᠠᠨᠤ ᠠᠳᠠᠯᠢ ᠦᠭᠡᠢ ᠡᠴᠡ ᠲᠡᠭᠦᠨ ᠢ᠋ ᠪᠣᠯᠪᠠᠰᠤᠷᠠᠭᠤᠯᠵᠤ ᠢᠳᠡᠬᠦ ᠠᠷᠭᠠ ᠨᠢ ᠮᠥᠨ ᠴᠦ᠍ ᠠᠳᠠᠯᠢ ᠦᠭᠡᠢ ᠪᠣᠯᠠᠢ᠃
ᠬᠡᠷᠴᠢᠭᠰᠡᠨ ᠬᠣᠨᠢᠨ ᠮᠢᠬᠠ
ᠶᠠᠰᠤ ᠮᠢᠬᠠ ᠲᠠᠢ ᠨᠢ ᠨᠢᠭᠡ ᠯᠠᠩ ᠤ᠋ᠨ ᠬᠡᠮᠵᠢᠶᠡ ᠲᠡᠢ ᠬᠡᠷᠴᠢᠵᠦ ᠮᠢᠬᠠᠨ ᠤ᠋ ᠡᠵᠡᠯᠡᠬᠦᠨ ᠲᠡᠢ ᠲᠡᠩᠴᠡᠬᠦ ᠬᠦᠢᠲᠡᠨ ᠤᠰᠤᠨ ᠳ᠋ᠤ᠌ ᠬᠢᠵᠦ ᠂ ᠳᠡᠭᠡᠷᠡ ᠨᠢ 1 ᠵᠢᠩ ᠤᠰᠤ ᠪᠦᠷᠢ ᠳ᠋ᠦ᠍ 2 ᠴᠢᠨ ᠳᠠᠪᠤᠰᠤ ᠂ 1 ᠴᠢᠨ ᠪᠦᠲᠦᠨ ᠬᠤᠸᠠᠵᠤᠤ ᠂ 1 ᠴᠢᠨ ᠭ᠍ᠨ ᠂ 3 ᠹᠦᠨ ᠰᠣᠩᠭᠢᠨᠠ ᠂ 3 ᠹᠦᠨ ᠰᠠᠷᠢᠮᠰᠠᠭ ᠢ᠋ ᠲᠤᠰ ᠪᠦᠷᠢ ᠲᠣᠬᠢᠷᠠᠭᠤᠯᠵᠤ 2 - 3 ᠴᠠᠭ ᠴᠢᠨᠠᠭᠠᠳ ᠭᠠᠷᠭᠠᠨᠠ᠃ ᠡᠭᠦᠨ ᠢ᠋ ᠬᠡᠷᠴᠢᠭᠰᠡᠨ ᠬᠣᠨᠢᠨ ᠮᠢᠬᠠ ᠭᠡᠨᠡ᠃
ᠬᠡᠯᠬᠢᠵᠦ ᠰᠢᠷᠠᠭᠰᠠᠨ ᠬᠣᠨᠢᠨ ᠮᠢᠬᠠ
ᠬᠥᠯᠳᠡᠭᠦᠦ ᠮᠢᠬᠠ ᠪᠠᠨ ᠨᠢᠮᠭᠡᠪᠲᠦᠷ ᠬᠣᠶᠠᠷ ᠢᠮᠠᠬᠤ ᠤᠷᠲᠤ ᠳᠥᠷᠪᠡᠯᠵᠢᠨ ᠬᠡᠷᠴᠢᠭᠡᠳ ᠂ ᠲᠠᠪᠤᠨ ᠠᠮᠲᠠᠲᠠᠨ ᠢ᠋ ᠲᠠᠭᠠᠷᠠᠭᠤᠯᠵᠤ ᠨᠠᠢᠷᠠᠭᠤᠯᠤᠨ ᠲᠡᠷᠡ ᠬᠦ᠌ ᠮᠢᠬᠠᠨ ᠳ᠋ᠠᠭᠠᠨ ᠲᠦᠷᠬᠢᠵᠦ ᠬᠣᠶᠠᠷ ᠴᠠᠭ ᠬᠢᠷᠢ ᠲᠠᠯᠪᠢᠨ ᠰᠢᠩᠭᠡᠭᠡᠭᠡᠳ ᠰᠢᠷᠠ ᠲᠣᠰᠣ ᠲᠦᠷᠬᠢᠭᠰᠡᠨ ᠬᠠᠪᠲᠠᠭᠠᠢ ᠲᠣᠭᠣᠭᠠᠨ ᠳᠡᠭᠡᠷᠡ ᠲᠡᠮᠦᠷ ᠱᠣᠷᠣ ᠳ᠋ᠤ᠌ ᠠᠷᠪᠠ ᠠᠷᠪᠠ ᠪᠠᠷ ᠬᠡᠯᠬᠢᠨ ᠰᠢᠷᠠᠨᠠ᠃ ᠬᠡᠵᠢᠶᠡ ᠮᠢᠬᠠᠨ ᠤ᠋ ᠥᠩᠭᠡ ᠨᠢ ᠴᠠᠭᠠᠨ ᠰᠢᠷᠠᠪᠲᠤᠷ ᠪᠣᠯᠤᠭᠰᠠᠨ ᠤ᠋ ᠬᠣᠢᠨᠠ ᠠᠪᠴᠤ ᠳᠠᠪᠰᠢᠯᠠᠨᠠ᠃ ᠡᠭᠦᠨ ᠢ᠋ ᠬᠡᠯᠬᠢᠵᠦ ᠰᠢᠷᠠᠭᠰᠠᠨ ᠬᠣᠨᠢᠨ ᠮᠢᠬᠠ ᠭᠡᠨᠡ᠃
ᠬᠠᠩᠨᠠᠭᠰᠠᠨ ᠬᠣᠨᠢᠨ ᠮᠢᠬᠠ
ᠬᠣᠨᠢᠨ ᠮᠢᠬᠠ ᠪᠠᠨ ᠨᠠᠷᠢᠯᠢᠭ ᠳᠠᠪᠲᠠᠨ ᠬᠡᠷᠴᠢᠵᠦ ᠂ ᠨᠢᠭᠡ ᠵᠢᠩ ᠮᠢᠬᠠ ᠳ᠋ᠤ᠌ ᠳᠠᠪᠤᠰᠤ ᠪᠣᠯᠤᠨ ᠲᠠᠪᠤᠨ ᠠᠮᠲᠠᠲᠠᠨ ᠂ ᠪᠠᠰᠠ ᠨᠢᠭᠡ ᠥᠨᠳᠡᠭᠡ ᠂ ᠨᠢᠭᠡ ᠯᠠᠩ ᠪᠣᠳᠣᠨᠴᠢᠷ ᠤ᠋ᠨ ᠭᠤᠯᠢᠷ ᠢ᠋ ᠬᠠᠮᠲᠤ ᠳ᠋ᠤᠨᠢ ᠬᠢᠵᠦ ᠨᠠᠢᠷᠠᠭᠤᠯᠤᠭᠠᠳ ᠂ ᠰᠢᠷᠠ ᠲᠣᠰᠣ ᠲᠦᠷᠬᠢᠭᠰᠡᠨ ᠬᠠᠪᠲᠠᠭᠠᠢ ᠲᠣᠭᠣᠭᠠᠨ ᠳᠡᠭᠡᠷᠡ ᠪᠡᠨ ᠬᠠᠩᠨᠠᠵᠤ ᠳᠠᠪᠰᠢᠯᠠᠨᠠ ᠃ ᠡᠭᠦᠨ ᠢ᠋ ᠬᠠᠩᠨᠠᠭᠰᠠᠨ ᠬᠣᠨᠢᠨ ᠮᠢᠬᠠ ᠭᠡᠨᠡ᠃
ᠴᠠᠭᠠᠨ ᠨᠣᠭᠣᠭᠠᠨ ᠤ᠋ ᠣᠷᠢᠶᠠᠮᠠᠭᠲᠤ ᠬᠣᠨᠢᠨ ᠮᠢᠬᠠ
ᠮᠢᠬᠠ ᠪᠠᠨ ᠨᠠᠷᠢᠯᠢᠭ ᠳᠠᠪᠲᠠᠨ ᠬᠡᠷᠴᠢᠭᠡᠳ ᠳᠠᠪᠤᠰᠤ ᠂ ᠲᠠᠪᠤᠨ ᠠᠮᠲᠠᠲᠠᠨ ᠢ᠋ ᠨᠠᠢᠷᠠᠭᠤᠯᠵᠤ ᠳᠠᠭᠠᠷᠠᠭᠤᠯᠤᠭᠰᠠᠨ ᠤ᠋ ᠳᠠᠷᠠᠭᠠ ᠂ ᠴᠠᠭᠠᠨ ᠨᠣᠭᠣᠭᠠᠨ ᠤ᠋ ᠨᠠᠪᠴᠢ ᠶ᠋ᠢ ᠪᠤᠴᠠᠯᠤᠭᠰᠠᠨ ᠤᠰᠤᠨ ᠳ᠋ᠤ᠌ ᠴᠠᠭᠠᠨ ᠡᠰᠢ ᠶ᠋ᠢ ᠨᠢ ᠵᠥᠭᠡᠯᠡᠷᠡᠲᠡᠯᠡ ᠬᠢᠵᠦ ᠂ ᠨᠢᠭᠡᠨ ᠢᠮᠠᠬᠤ ᠬᠠᠭᠠᠰ ᠲᠠᠰᠢᠭᠤ ᠬᠡᠷᠴᠢᠭᠡᠳ ᠳᠣᠲᠣᠷᠠ ᠨᠢ ᠹᠦᠨ ᠬᠠᠭᠠᠰ ᠮᠢᠬᠠ ᠬᠢᠵᠦ ᠣᠷᠢᠶᠠᠭᠠᠳ ᠫᠢᠯᠠ ᠳ᠋ᠤ᠌ ᠵᠡᠷᠭᠡᠴᠡᠭᠦᠯᠦᠨ ᠥᠷᠥᠵᠦ ᠵᠢᠩᠨᠡᠭᠦᠷ ᠲᠦ᠍ 15 ᠮᠢᠨᠦ᠋ᠲ ᠪᠣᠯᠭᠠᠭᠠᠳ ᠭᠠᠷᠭᠠᠨᠠ ᠃ ᠡᠭᠦᠨ ᠢ᠋ ᠴᠠᠭᠠᠨ ᠨᠣᠭᠣᠭᠠᠨ ᠤ᠋ ᠣᠷᠢᠶᠠᠮᠠᠭᠲᠤ ᠬᠣᠨᠢᠨ ᠮᠢᠬᠠ ᠭᠡᠨᠡ᠃
ᠬᠣᠨᠢᠨ ᠡᠪᠴᠢᠭᠦᠨ ᠮᠢᠬᠠ ᠡᠪᠴᠢᠭᠦᠦ ᠪᠡᠨ ᠬᠠᠳᠠᠭᠠᠯᠠᠭᠠᠳ ᠥᠭᠡᠯᠵᠢᠨ ᠰᠠᠷᠠ （ᠯᠠ ᠰᠠᠷᠠ ) ᠶ᠋ᠢᠨ 23 ᠂ 24 ᠳ᠋ᠦ᠍ ᠴᠢᠨᠠᠵᠤ ᠢᠳᠡᠳᠡᠭ ᠃ ᠬᠦᠢᠲᠡᠨ ᠤᠰᠤᠨ ᠳ᠋ᠤ᠌ ᠪᠠᠭᠠ ᠴᠠᠭᠠ ᠪᠤᠶᠤ ᠰᠦ ᠂ 5 ᠯᠠᠩ ᠱᠦᠭᠦᠮᠡᠯ ᠂ ᠵᠢᠩ ᠴᠢᠪᠠᠭᠠ ᠲᠠᠢ ᠬᠠᠮᠲᠤ ᠡᠪᠴᠢᠭᠦᠦ ᠪᠡᠨ ᠬᠢᠵᠦ ᠴᠢᠨᠠᠵᠤ ᠪᠣᠯᠭᠣᠭᠠᠳ ᠳᠠᠪᠰᠢᠯᠠᠨᠠ᠃ ᠡᠭᠦᠨ ᠢ᠋ ᠬᠣᠨᠢᠨ ᠡᠪᠴᠢᠭᠦᠨ ᠮᠢᠬᠠ ᠬᠡᠮᠡᠨᠡ᠃
ᠦᠩᠬᠦᠯᠴᠡᠭ ᠦ᠋ᠨ ᠮᠢᠬᠠ
ᠦᠩᠬᠦᠯᠴᠡᠭ ᠢ᠋ ᠪᠦᠲᠦᠨ ᠢ᠋ᠶ᠋ᠡᠷ ᠣᠭᠲᠣᠯᠤᠨ ᠠᠪᠴᠤ ᠥᠪᠳᠡᠯ ᠴᠥᠪᠥᠳᠡᠯ ᠥᠭᠡᠬᠦ ᠮᠢᠬᠠ ᠶ᠋ᠢ ᠳᠦᠭᠦᠷᠲᠡᠯᠡ ᠴᠢᠬᠢᠵᠦ ᠠᠮᠠ ᠶ᠋ᠢ ᠨᠢ ᠤᠲᠠᠰᠤ ᠪᠠᠷ ᠣᠶᠣᠵᠤ ᠪᠢᠲᠡᠭᠦᠯᠡᠭᠡᠳ ᠴᠢᠨᠠᠵᠤ ᠢᠳᠡᠨᠡ ᠃ ᠡᠭᠦᠨ ᠢ᠋ ᠦᠩᠬᠦᠯᠴᠡᠭ ᠮᠢᠬᠠ ᠭᠡᠨᠡ᠃
ᠴᠢᠬᠢᠮᠡᠯ ᠠᠪᠢᠯᠢᠭ ᠮᠢᠬᠠ
ᠠᠪᠢᠯᠢᠭ ( ᠠᠪᠢᠰᠤ - ᠬᠣᠰ ) ᠢ᠋ ᠬᠣᠶᠠᠷ ᠲᠣᠬᠣᠢ ᠤᠷᠲᠤ ᠣᠭᠲᠣᠯᠤᠨ ᠠᠪᠴᠤ ᠲᠤᠭᠤᠷᠠᠬᠠᠢ ᠶ᠋ᠢ ᠨᠢ ᠡᠷᠭᠢᠭᠦᠯᠴᠢᠭᠡᠳ ᠰᠠᠢᠨ ᠰᠠᠷᠬᠢᠨᠠᠭ ᠪᠠ ᠴᠣᠷᠣᠢ ᠶ᠋ᠢᠨ ᠮᠢᠬᠠ ᠶ᠋ᠢ ᠰᠤᠷᠯᠠᠨ ᠪᠣᠷᠴᠠᠯᠠᠵᠤ ᠠᠪᠢᠯᠢᠭ ᠲᠤ᠌ ᠴᠢᠬᠢᠵᠦ ᠪᠣᠷᠳᠣᠭᠰᠠᠨ ᠢ᠋ ᠴᠢᠬᠢᠮᠡᠯ ᠠᠪᠢᠯᠢᠭ ᠮᠢᠬᠠ ᠭᠡᠨᠡ᠃
ᠪᠥᠭᠡᠷᠡ ᠵᠢᠷᠦᠬᠡᠨ ᠦ᠌ ᠬᠣᠨᠳᠣᠭ
ᠶᠡᠬᠡ ᠂ ᠪᠠᠭᠠ ᠮᠠᠯ ᠤ᠋ᠨ ᠪᠥᠭᠡᠷᠡ ᠵᠢᠷᠦᠬᠡ ᠶ᠋ᠢ ᠬᠠᠮᠢᠶᠠ ᠦᠭᠡᠢ ᠨᠠᠷᠢᠨ ᠬᠡᠷᠴᠢᠨ ᠂ ᠵᠢᠭᠠᠬᠠᠨ ᠥᠭᠡᠬᠦ ᠬᠢᠵᠦ ᠂ ᠲᠡᠭᠦᠨ ᠦ᠌ ᠳᠡᠭᠡᠷᠡ ᠰᠢᠩᠼᠠ᠂ ᠫᠣᠸᠠᠷᠢ ᠂ ᠽᠠᠳᠢ ᠂ ᠴᠠᠭᠠᠨ ᠰᠦᠭᠮᠧᠯ ᠂ ᠰᠸᠪᠤᠷᠤ ᠵᠡᠷᠭᠡ ᠶ᠋ᠢ ᠬᠤᠪᠢ ᠲᠡᠭᠰᠢ ᠨᠠᠢᠷᠠᠭᠤᠯᠤᠭᠰᠠᠨ ᠲᠠᠯᠬᠠ ᠠ᠋ᠴᠠ ᠪᠠᠭᠠ ᠵᠡᠷᠭᠡ ᠬᠢᠵᠦ ᠠᠮᠲᠠ ᠣᠷᠣᠭᠤᠯᠬᠤ ᠶ᠋ᠢᠨ ᠬᠠᠮᠲᠤ ᠰᠣᠩᠭᠢᠨᠠ ᠳᠠᠪᠤᠰᠤ ᠶ᠋ᠢ ᠪᠤᠤᠰᠠ ᠳ᠋ᠤ᠌ ᠬᠢᠬᠦ ᠠᠳᠠᠯᠢ ᠲᠠᠭᠠᠷᠠᠭᠤᠯᠵᠤ ᠨᠠᠢᠷᠠᠭᠤᠯᠤᠭᠠᠳ ᠰᠠᠭᠠᠭ ᠤ᠋ᠨ ᠭᠤᠯᠢᠷ ᠢ᠋ᠶ᠋ᠠᠷ ᠠᠷᠠᠰᠤ ᠬᠢᠵᠦ ᠬᠣᠨᠳᠣᠭ ᠪᠣᠯᠭᠠᠨ ᠪᠠᠷᠢᠭᠠᠳ ᠪᠣᠯᠭᠣᠪᠠᠯ ᠪᠥᠭᠡᠷᠡ ᠵᠢᠷᠦᠬᠡᠨ ᠦ᠌ ᠬᠣᠨᠳᠣᠭ ᠭᠡᠳᠡᠭ ᠪᠣᠯᠤᠨᠠ᠃ ᠬᠣᠨᠢᠨ ᠤ᠋ ᠬᠣᠨᠳᠣᠭ ᠨᠢ ᠬᠦᠢᠲᠡᠨ ᠬᠡᠢ ᠳ᠋ᠦ᠍ ᠰᠠᠢᠨ᠂ ᠦᠬᠡᠷ ᠢᠮᠠᠭᠠ ᠶ᠋ᠢᠨ ᠬᠢᠨᠢ ᠬᠠᠯᠠᠭᠠᠪᠠᠯ ᠬᠡᠢ ᠳ᠋ᠦ᠍ ᠰᠠᠢᠨ᠃
ᠬᠠᠷᠠᠴᠢᠨ ᠨᠤᠲᠤᠭ ᠤ᠋ᠨ ᠮᠢᠬᠠᠨ ᠢᠳᠡᠭᠡᠨ ᠄
ᠪᠦᠷᠢᠨ ᠬᠣᠨᠢᠨ ᠰᠢᠷᠡᠭᠡ
ᠬᠣᠨᠢᠨ ᠤ᠋ ᠪᠦᠬᠦᠯᠢ ᠮᠢᠬᠠ ᠂ ᠲᠠᠪᠤᠨ ᠴᠤᠯᠤ ᠂ ᠲᠣᠯᠣᠭᠠᠢ ᠰᠢᠭᠢᠷᠡ ᠂ ᠭᠡᠳᠡᠰᠦ ᠭᠦᠵᠡᠭᠡ ᠰᠡᠯᠲᠡ ᠪᠡᠷ 12 ᠳᠠᠪᠰᠢ ᠂ 4 ᠠᠶᠠᠭᠠ ᠂ ᠡᠰᠡᠬᠦᠯᠡ 8 ᠠᠶᠠᠭᠠ ᠪᠠᠷ ᠪᠦᠷᠢᠯᠳᠦᠭᠰᠡᠨ ᠨᠢᠭᠡᠨ ᠰᠢᠷᠡᠭᠡ ᠶ᠋ᠢᠨ ᠳᠠᠢᠯᠠᠯᠭᠠ ᠬᠢᠨᠡ ᠃ ᠭᠡᠬᠦ ᠳ᠋ᠡᠭᠡᠨ ᠡᠳᠡᠭᠡᠷ ᠢ᠋ᠶ᠋ᠡᠷ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠦᠨᠦᠷ ᠠᠮᠲᠠᠲᠠᠢ ᠪᠣᠯᠭᠠᠨ ᠬᠠᠭᠤᠷᠤᠨ ᠬᠠᠭᠠᠷᠢᠵᠤ ᠪᠣᠯᠤᠭᠰᠠᠨ ᠢ᠋ ᠪᠦᠷᠢᠨ ᠬᠣᠨᠢᠨ ᠰᠢᠷᠡᠭᠡ ᠭᠡᠨᠡ ( ᠬᠣᠨᠢᠨ ᠡᠯᠢᠭᠡ ᠂ ᠬᠣᠨᠢᠨ ᠲᠣᠯᠣᠭᠠᠢ ᠶ᠋ᠢᠨ ᠮᠢᠬᠠᠨ ᠴᠠᠷᠴᠠᠮᠠᠯ ᠂ ᠬᠣᠨᠢᠨ ᠬᠡᠷᠴᠢᠮ ᠂ ᠭᠤᠷᠪᠠᠨ ᠴᠤᠯᠤ ᠶ᠋ᠢᠨ ᠬᠠᠭᠤᠷᠤᠯᠭᠠ ᠂ ᠬᠠᠭᠤᠷᠤᠮᠠᠯ ᠭᠦᠵᠡᠭᠡ ᠂ ᠬᠠᠭᠤᠷᠤᠮᠠᠯ ᠭᠡᠳᠡᠰᠦ ᠂ ᠬᠣᠨᠢᠨ ᠴᠢᠬᠢ ᠂ ᠡᠷᠡᠦ ᠂ ᠲᠠᠩᠨᠠᠢ ᠶ᠋ᠢᠨ ᠬᠠᠭᠠᠷᠢᠮᠠ ᠂ ᠬᠣᠨᠢᠨ ᠰᠡᠭᠦᠯ ᠦ᠋ᠨ ᠬᠠᠭᠠᠷᠢᠮᠠ ᠂ ᠬᠣᠨᠢᠨ ᠬᠠᠪᠢᠷᠭᠠ ᠂ ᠬᠣᠨᠢᠨ ᠠᠭᠤᠰᠬᠢ ᠶ᠋ᠢᠨ ᠪᠥᠮᠪᠥᠭᠡ ᠂ ᠬᠣᠨᠢᠨ ᠤᠭᠤᠴᠠᠨ ᠬᠠᠭᠠᠷᠢᠮᠠᠯ ᠵᠡᠷᠭᠡ 12 ) ᠃
ᠬᠣᠨᠢᠨ ᠡᠯᠢᠭᠡᠨ ᠲᠡᠪᠰᠢ
ᠪᠣᠯᠭᠣᠭᠰᠠᠨ ᠡᠯᠢᠭᠡ ᠪᠡᠨ ᠬᠠᠪᠢᠰᠤᠯᠠᠨ ᠬᠡᠷᠴᠢᠭᠡᠳ ᠂ ᠳᠠᠪᠤᠰᠤᠲᠠᠢ ᠤᠰᠤᠨ ᠳ᠋ᠤ᠌ ᠰᠠᠷᠢᠮᠰᠠᠭ ᠤ᠋ᠨ ᠨᠤᠨᠲᠠᠭ ᠢ᠋ᠶ᠋ᠠᠷ ᠬᠦᠢᠲᠡᠨ ᠢ᠋ᠶ᠋ᠡᠷ ᠲᠠᠯᠪᠢᠬᠤ ᠶ᠋ᠢ ᠡᠯᠢᠭᠡᠨ ᠲᠠᠪᠰᠢ ᠭᠡᠨᠡ ᠃
ᠬᠣᠨᠢᠨ ᠲᠠᠷᠢᠬᠢᠨ ᠳᠠᠪᠰᠢ
ᠴᠢᠨᠠᠵᠤ ᠪᠣᠯᠭᠣᠭᠰᠠᠨ ᠲᠠᠷᠢᠬᠢ ᠪᠠᠨ ᠳᠠᠪᠰᠢ ᠳ᠋ᠤ᠌ ᠠᠭᠤᠯᠵᠤ ᠰᠠᠷᠢᠮᠰᠠᠭ ᠤ᠋ᠨ ᠨᠤᠨᠲᠠᠭ ᠢ᠋ ᠰᠦᠷᠴᠢᠨ ᠲᠠᠯᠪᠢᠬᠤ ᠶ᠋ᠢ ᠲᠠᠷᠢᠬᠢᠨ ᠲᠠᠪᠰᠢ ᠭᠡᠨᠡ ᠃
ᠬᠣᠨᠢᠨ ᠲᠣᠯᠣᠭᠠᠢ ᠶ᠋ᠢᠨ ᠮᠢᠬᠠᠨ ᠴᠠᠷᠴᠠᠮᠠᠯ
ᠴᠢᠨᠠᠭᠰᠠᠨ ᠬᠣᠨᠢᠨ ᠲᠣᠯᠣᠭᠠᠢ ᠶ᠋ᠢᠨ ᠮᠢᠬᠠ ᠠᠷᠠᠰᠤ ᠶ᠋ᠢ ᠬᠠᠭᠤᠯᠤᠨ ᠠᠪᠴᠤ ᠳᠠᠬᠢᠨ ᠴᠢᠨᠠᠵᠤ ᠰᠢᠯᠵᠠᠷᠠᠭᠤᠯᠤᠭᠰᠠᠨ ᠤ᠋ ᠳᠠᠷᠠᠭᠠ ᠰᠠᠪᠠ ᠳ᠋ᠤ᠌ ᠬᠢᠵᠦ ᠴᠠᠷᠴᠠᠭᠤᠯᠤᠭᠠᠳ ᠦᠨᠦᠷ ᠠᠮᠲᠠ ᠬᠠᠴᠢᠷᠯᠠᠵᠤ ᠬᠡᠰᠡᠭᠯᠡᠨ ᠬᠡᠷᠴᠢᠵᠦ ᠲᠠᠯᠪᠢᠬᠤ ᠶ᠋ᠢ ᠬᠣᠨᠢᠨ ᠲᠣᠯᠣᠭᠠᠢ ᠮᠢᠬᠠᠨ ᠴᠠᠷᠴᠠᠮᠠᠯ ᠭᠡᠳᠡᠭ᠃
ᠬᠣᠨᠢᠨ ᠮᠢᠬᠠᠨ ᠬᠡᠷᠴᠢᠮ
ᠪᠣᠯᠭᠣᠭᠰᠠᠨ ᠬᠣᠨᠢᠨ ᠮᠢᠬᠠ ᠶ᠋ᠢ ᠬᠥᠷᠥᠭᠡᠭᠡᠳ ᠬᠠᠪᠢᠰᠤᠯᠠᠨ ᠬᠡᠷᠴᠢᠵᠦ ᠲᠠᠯᠪᠢᠬᠤ ᠶ᠋ᠢ ᠬᠣᠨᠢᠨ ᠮᠢᠬᠠᠨ ᠬᠡᠷᠴᠢᠮ ᠭᠡᠨᠡ᠃
ᠭᠤᠷᠪᠠᠨ ᠴᠤᠯᠤ ᠶ᠋ᠢᠨ ᠬᠠᠭᠤᠷᠤᠯᠭᠠ
ᠵᠢᠷᠦᠬᠡ ᠂ ᠪᠥᠭᠡᠷᠡ ᠂ ᠬᠡᠯᠡ ᠭᠤᠷᠪᠠ ᠶ᠋ᠢ ᠬᠡᠰᠡᠭᠯᠡᠨ ᠬᠡᠷᠴᠢᠭᠡᠳ ᠬᠠᠭᠤᠷᠴᠤ ᠰᠢᠩᠭᠡᠨ ᠭᠤᠯᠢᠷ ᠪᠤᠶᠤ ᠴᠠᠷᠳᠠᠭᠤᠯ ᠢ᠋ ᠰᠢᠩᠭᠡᠯᠡᠵᠦ ᠦᠨᠦᠷ ᠠᠮᠲᠠᠲᠠᠨ ᠬᠢᠵᠦ ᠬᠤᠳᠬᠤᠨ ᠭᠠᠷᠭᠠᠭᠠᠳ ᠳᠠᠪᠰᠢ ᠳ᠋ᠤ᠌ ᠠᠭᠤᠯᠤᠭᠰᠠᠨ ᠢ᠋ ᠭᠤᠷᠪᠠᠨ ᠴᠤᠯᠤ ᠶ᠋ᠢᠨ ᠬᠠᠭᠤᠷᠤᠯᠭᠠ ᠭᠡᠨᠡ᠃
ᠬᠠᠭᠤᠷᠤᠮᠠᠯ ᠭᠦᠵᠡᠭᠡ
ᠱᠠᠯᠵᠠᠷᠠᠲᠠᠯᠠ ᠴᠢᠨᠠᠭᠰᠠᠨ ᠬᠣᠨᠢᠨ ᠭᠦᠵᠡᠭᠡ ᠪᠡᠨ ᠨᠠᠷᠢᠨ ᠤᠷᠲᠤᠯᠵᠢᠨ ᠬᠡᠷᠴᠢᠵᠦ ᠴᠠᠷᠳᠠᠭᠤᠯ ᠲᠠᠢ ᠬᠠᠭᠤᠷᠴᠤ ᠲᠡᠪᠰᠢᠯᠡᠭᠰᠡᠨ ᠢ᠋ ᠬᠠᠭᠤᠷᠤᠮᠠᠯ ᠭᠦᠵᠡᠭᠡ ᠭᠡᠨᠡ᠃
ᠬᠠᠭᠤᠷᠤᠮᠠᠯ ᠭᠡᠳᠡᠰᠦ
ᠪᠣᠯᠭᠣᠭᠰᠠᠨ ᠬᠣᠰ ᠢ᠋ᠶ᠋ᠠᠨ ᠬᠡᠷᠴᠢᠵᠦ ᠴᠠᠷᠳᠠᠭᠤᠯ ᠲᠠᠢ ᠬᠠᠭᠤᠷᠤᠭᠠᠳ ᠲᠡᠪᠰᠢᠯᠡᠭᠰᠡᠨ ᠢ᠋ ᠬᠠᠭᠤᠷᠤᠮᠠᠯ ᠭᠡᠳᠡᠰᠦ ᠭᠡᠳᠡᠭ ᠃
ᠬᠣᠨᠢᠨ ᠴᠢᠬᠢ ᠡᠷᠡᠦ ᠲᠠᠩᠨᠠᠢ ᠶ᠋ᠢᠨ ᠬᠠᠭᠤᠷᠤᠮᠠᠯ
ᠴᠢᠨᠠᠵᠤ ᠪᠣᠯᠭᠣᠭᠰᠠᠨ ᠴᠢᠬᠢ ᠡᠷᠡᠦ ᠲᠠᠩᠨᠠᠢ ᠶ᠋ᠢ ᠨᠠᠷᠢᠯᠢᠭ ᠬᠡᠷᠴᠢᠵᠦ ᠬᠠᠭᠤᠷᠤᠭᠰᠠᠨ ᠢ᠋ ᠬᠣᠨᠢᠨ ᠴᠢᠬᠢ ᠡᠷᠡᠦ ᠲᠠᠩᠨᠠᠢ ᠶ᠋ᠢᠨ ᠬᠠᠭᠤᠷᠤᠮᠠᠯ ᠭᠡᠨᠡ᠃
ᠬᠠᠭᠠᠷᠢᠮᠠᠯ ᠰᠡᠭᠦᠯ
ᠬᠠᠪᠢᠰᠤᠯᠠᠨ ᠬᠡᠷᠴᠢᠭᠰᠡᠨ ᠬᠣᠨᠢᠨ ᠰᠡᠭᠦᠯ ᠢ᠋ ᠵᠢᠭᠤᠷᠠᠵᠤ ᠪᠡᠯᠡᠳᠬᠡᠭᠰᠡᠨ ᠰᠢᠩᠭᠡᠨ ᠭᠤᠯᠢᠷ ᠪᠤᠶᠤ ᠴᠠᠷᠳᠠᠭᠤᠯ ᠳ᠋ᠤ᠌ ᠲᠥᠷᠥᠵᠦ ᠠᠪᠤᠭᠠᠳ ᠪᠤᠴᠠᠯᠤᠮᠠ ᠲᠣᠰᠣᠨ ᠳ᠋ᠤ᠌ ᠬᠢᠵᠦ ᠪᠣᠯᠭᠣᠭᠠᠳ ᠭᠠᠷᠭᠠᠵᠤ ᠳᠡᠭᠡᠷᠡ ᠨᠢ ᠴᠠᠭᠠᠨ ᠰᠢᠬᠢᠷ ᠰᠠᠴᠤᠵᠤ ᠲᠡᠪᠰᠢᠯᠡᠭᠰᠡᠨ ᠢ᠋ ᠬᠠᠭᠠᠷᠢᠮᠠᠯ ᠰᠡᠭᠦᠯ ᠭᠡᠳᠡᠭ᠃
ᠬᠠᠭᠠᠷᠢᠮᠠᠯ ᠬᠣᠨᠢᠨ ᠬᠠᠪᠢᠷᠭᠠ
ᠬᠠᠪᠢᠷᠭᠠ ᠪᠠᠨ ᠵᠣᠬᠢᠬᠤ ᠬᠡᠮᠵᠢᠶᠡ ᠪᠡᠷ ᠲᠠᠰᠤᠳᠠᠨ ᠬᠡᠷᠴᠢᠭᠡᠳ ᠂ ᠬᠠᠯᠠᠭᠤᠨ ᠲᠣᠰᠣᠨ ᠳ᠋ᠤ᠌ ᠬᠠᠭᠠᠷᠢᠨ ᠪᠣᠯᠭᠣᠭᠰᠠᠨ ᠤ᠋ ᠳᠠᠷᠠᠭᠠ ᠳᠠᠪᠤᠰᠤᠨ ᠨᠤᠨᠲᠠᠭ ᠪᠤᠶᠤ ᠴᠠᠭᠠᠨ ᠰᠢᠬᠢᠷ ᠰᠠᠴᠤᠵᠤ ᠲᠡᠪᠰᠢᠯᠡᠭᠰᠡᠨ ᠢ᠋ ᠬᠠᠭᠠᠷᠢᠮᠠᠯ ᠬᠠᠪᠢᠷᠭᠠ ᠭᠡᠨᠡ᠃
ᠬᠣᠨᠢᠨ ᠠᠭᠤᠰᠬᠢ ᠶ᠋ᠢᠨ ᠪᠥᠮᠪᠥᠭᠡ
ᠬᠣᠨᠢᠨ ᠠᠭᠤᠰᠬᠢ ᠪᠡᠨ ᠬᠢᠲᠤᠭᠠᠨ ᠮᠥᠷᠥ ᠪᠡᠷ ᠪᠠᠯᠪᠠᠴᠢᠨ ᠨᠢᠴᠠᠯᠠᠵᠤ ᠳᠠᠪᠤᠰᠤ ᠪᠠ ᠰᠠᠷᠢᠮᠰᠠᠭ ᠢ᠋ ᠰᠠᠢᠲᠤᠷ ᠬᠣᠯᠢᠭᠠᠳ᠂ ᠪᠡᠯᠡᠳᠬᠡᠭᠰᠡᠨ ᠰᠢᠩᠭᠡᠨ ᠭᠤᠯᠢᠷ ᠪᠤᠶᠤ ᠴᠠᠷᠳᠠᠭᠤᠯ ᠳ᠋ᠤ᠌ ᠲᠥᠷᠥᠵᠦ᠂ ᠳᠠᠬᠢᠨ ᠪᠤᠴᠠᠯᠤᠭᠰᠠᠨ ᠲᠣᠰᠣᠨ ᠳ᠋ᠤ᠌ ᠲᠥᠷᠥᠵᠦ ᠪᠣᠯᠭᠣᠭᠠᠳ ᠲᠡᠪᠰᠢᠯᠡᠭᠰᠡᠨ ᠢ᠋ ᠬᠣᠨᠢᠨ ᠠᠭᠤᠰᠬᠢ ᠶ᠋ᠢᠨ ᠪᠥᠮᠪᠥᠭᠡ ᠭᠡᠨᠡ᠃
ᠬᠣᠨᠢᠨ ᠤᠭᠤᠴᠠᠨ ᠬᠠᠭᠠᠷᠢᠮᠠᠯ
ᠬᠣᠨᠢᠨ ᠤᠭᠤᠴᠠᠨ ᠮᠢᠬᠠ ᠪᠤᠶᠤ ᠭᠤᠶᠠ ᠶ᠋ᠢᠨ ᠮᠢᠬᠠ ᠶ᠋ᠢ ᠶᠡᠬᠡᠬᠡᠨ ᠬᠡᠰᠡᠭᠯᠡᠨ ᠬᠡᠷᠴᠢᠭᠡᠳ ᠳᠠᠪᠤᠰᠤᠨ ᠨᠤᠨᠲᠠᠭ ᠵᠡᠷᠭᠡ ᠦᠨᠦᠷ ᠠᠮᠲᠠᠲᠠᠨ ᠢ᠋ ᠮᠢᠬᠠᠨ ᠳᠡᠭᠡᠷᠡ ᠪᠡᠨ ᠰᠠᠴᠤᠵᠤ᠂ ᠬᠢᠲᠤᠭᠠᠨ ᠮᠥᠷᠥ ᠪᠡᠷ ᠣᠯᠠᠨᠲᠠ ᠳᠡᠯᠡᠳᠴᠦ ᠂ ᠪᠠᠭᠠ ᠰᠢᠭ᠋ ᠪᠤᠴᠠᠯᠤᠭᠰᠠᠨ ᠲᠣᠰᠣᠨ ᠳ᠋ᠤ᠌ ᠬᠠᠭᠠᠷᠢᠬᠤ ᠶ᠋ᠢ ᠤᠭᠤᠴᠠᠨ ᠬᠠᠭᠠᠷᠢᠮᠠᠯ ᠭᠡᠨᠡ᠃
ᠶᠠᠰᠤᠨ ᠱᠥᠯᠥ ᠶ᠋ᠢᠨ ᠢᠳᠡᠭᠡᠨ
ᠶᠠᠰᠤᠨ ᠱᠥᠯᠦᠨ ᠳ᠋ᠦ᠍ ᠴᠢᠨᠠᠭᠰᠠᠨ ᠳᠣᠲᠣᠷ ᠴᠤᠯᠤ ᠪᠤᠶᠤ ᠮᠢᠬᠠ ᠵᠡᠷᠭᠡ ᠶ᠋ᠢ ᠳᠥᠷᠪᠡᠨ ᠠᠶᠠᠭᠠᠨ ᠳ᠋ᠤ᠌ ᠬᠤᠪᠢᠶᠠᠨ ᠲᠠᠯᠪᠢᠨᠠ ᠃ ᠡᠭᠦᠨ ᠢ᠋ ᠶᠠᠰᠤᠨ ᠱᠥᠯᠥ ᠶ᠋ᠢᠨ ᠢᠳᠡᠭᠡᠨ ᠭᠡᠨᠡ᠃
ᠵᠠᠷᠢᠮ ᠨᠤᠲᠤᠭ ᠤ᠋ᠨ ᠢᠳᠡᠭᠡᠨ ᠄
ᠬᠣᠨᠢᠨ ᠵᠢᠷᠦᠬᠡᠨ ᠰᠢᠷᠠᠮᠠᠯ
ᠬᠣᠨᠢᠨ ᠵᠢᠷᠦᠬᠡ ᠨᠢᠭᠡ ᠂ ᠲᠥᠪᠡᠳ ᠭᠦᠷᠭᠦᠮ ᠭᠤᠷᠪᠠᠨ ᠴᠢᠨ ᠬᠡᠷᠡᠭᠯᠡᠨᠡ ᠃ ᠤᠷᠢᠳ ᠢ᠋ᠶ᠋ᠠᠷ ᠭᠦᠷᠭᠦᠮ ᠢ᠋ᠶ᠋ᠡᠨ ᠨᠢᠭᠡᠨ ᠠᠶᠠᠭᠠ ᠰᠡᠪᠢᠮᠧᠳᠡᠭ ᠦ᠋ᠨ ᠤᠰᠤᠨ ᠳ᠋ᠤ᠌ ᠳᠡᠪᠲᠦᠭᠡᠨ ᠪᠠᠭᠠ ᠳᠠᠪᠤᠰᠤ ᠬᠢᠵᠦ ᠲᠤᠩᠭᠠᠯᠠᠭ ᠰᠥᠮᠥᠰᠦ ᠶ᠋ᠢ ᠨᠢ ᠠᠪᠤᠭᠠᠳ ᠂ ᠰᠢᠪᠠᠭᠠᠨ ᠳ᠋ᠤ᠌ ᠱᠣᠷᠣᠯᠠᠨ ᠰᠢᠷᠠᠵᠤ ᠪᠠᠢᠭᠠ ᠵᠢᠷᠦᠬᠡᠨ ᠳᠡᠭᠡᠷᠡ ᠪᠡᠨ ᠰᠢᠷᠠᠵᠤ ᠪᠠᠷᠠᠲᠠᠯᠠ ᠨᠢ ᠠᠭᠠᠵᠢᠮ ᠢ᠋ᠶ᠋ᠠᠷ ᠳᠦᠷᠭᠢᠭᠡᠳ ᠰᠢᠷᠠᠬᠤ ᠪᠠᠨ ᠵᠣᠭᠰᠣᠨᠠ ᠃ ᠡᠭᠦᠨ ᠢ᠋ ᠵᠢᠷᠦᠬᠡᠨ ᠰᠢᠷᠠᠮᠠᠯ ᠭᠡᠨᠡ ᠃ ᠡᠭᠦᠨ ᠢ᠋ᠶ᠋ᠡᠷ ᠵᠢᠷᠦᠬᠡ ᠠᠮᠤᠷ ᠦᠭᠡᠢ ᠪᠤᠬᠢᠨᠢᠳᠤᠨ ᠭᠣᠨᠢᠷᠬᠠᠭᠠᠳ ᠦᠯᠦ ᠪᠠᠶᠠᠰᠬᠤ ᠡᠪᠡᠳᠴᠢᠨ ᠢ᠋ ᠵᠠᠰᠠᠨᠠ᠃
ᠬᠣᠨᠢᠨ ᠪᠥᠭᠡᠷᠡᠨ ᠰᠢᠷᠠᠮᠠᠯ
ᠬᠣᠨᠢᠨ ᠪᠥᠭᠡᠷᠡ ᠨᠢᠭᠡ ᠬᠣᠣᠰ᠂ ᠭᠦᠷᠭᠦᠮ ᠨᠢᠭᠡ ᠴᠢᠨ ᠣᠷᠣᠨᠠ᠃ ᠪᠣᠯᠭᠣᠬᠤ ᠠᠷᠭᠠ ᠨᠢ ᠬᠣᠨᠢᠨ ᠵᠢᠷᠦᠬᠡ ᠲᠡᠢ ᠠᠳᠠᠯᠢ᠃ ᠨᠠᠷᠢᠨ ᠨᠢᠷᠤᠭᠤ ᠶ᠋ᠢᠨ ᠴᠣᠴᠢᠮᠠᠭ ᠡᠪᠡᠷᠰᠢᠶᠡᠯ ᠳ᠋ᠦ᠍ ᠰᠠᠢᠨ᠃
ᠬᠣᠨᠢᠨ ᠰᠡᠭᠦᠯ ᠦ᠋ᠨ ᠬᠠᠭᠠᠷᠢᠮᠠᠯ
ᠬᠣᠨᠢᠨ ᠰᠡᠭᠦᠯ ᠦ᠋ᠨ ᠵᠤᠵᠠᠭᠠᠨ ᠲᠠᠯᠠ ᠥᠭᠡᠳᠡ᠂ ᠮᠠᠭᠤ ᠰᠠᠷᠬᠢᠨᠠᠭ ᠰᠢᠭ᠋ ᠨᠢᠮᠭᠡᠯᠡᠨ ᠬᠡᠷᠴᠢᠭᠡᠳ᠂ ᠬᠣᠶᠠᠷ ᠬᠡᠷᠴᠢᠮ ᠪᠦᠷᠢ ᠶ᠋ᠢᠨ ᠵᠠᠪᠰᠠᠷ ᠲᠤ᠌ ᠱᠦᠭᠦᠭᠰᠡᠨ ᠥᠷᠥᠮᠡ ᠬᠠᠪᠴᠢᠭᠤᠯᠤᠨ᠂ ᠰᠢᠩᠭᠡᠨ ᠵᠢᠭᠤᠷᠠᠭᠰᠠᠨ ᠭᠤᠯᠢᠷ ᠲᠤ᠌ ᠲᠥᠷᠥᠵᠦ ᠠᠪᠤᠭᠠᠳ ᠪᠤᠴᠠᠯᠤᠭᠰᠠᠨ ᠲᠣᠰᠣᠨ ᠳ᠋ᠤ᠌ ᠬᠠᠭᠠᠷᠢᠵᠤ ᠪᠣᠯᠭᠣᠭᠠᠳ ᠳᠡᠭᠡᠷᠡ ᠨᠢ ᠴᠠᠭᠠᠨ ᠰᠢᠬᠢᠷ ᠥᠷᠥᠵᠦ ᠲᠡᠪᠰᠢᠯᠡᠨᠡ᠃ ᠡᠭᠦᠨ ᠢ᠋ ᠬᠣᠨᠢᠨ ᠰᠡᠭᠦᠯ ᠦ᠋ᠨ ᠬᠠᠭᠠᠷᠢᠮᠠᠯ ᠭᠡᠨᠡ᠃
ᠬᠣᠨᠢᠨ ᠭᠤᠷᠪᠠᠨ ᠴᠤᠯᠤ ᠶ᠋ᠢᠨ ᠬᠠᠭᠠᠷᠢᠮᠠᠯ
ᠡᠯᠢᠭᠡ ᠂ ᠵᠢᠷᠦᠬᠡ ᠂ ᠪᠥᠭᠡᠷᠡ ᠬᠠᠭᠠᠷᠢᠵᠤ ᠱᠥᠯᠦᠨ ᠳ᠋ᠦ᠍ ᠪᠤᠴᠠᠯᠭᠠᠨ ᠦᠨᠦᠷ ᠠᠮᠲᠠ ᠬᠠᠴᠢᠷᠯᠠᠨ ᠲᠡᠪᠰᠢᠯᠡᠨᠡ ᠃ ᠡᠭᠦᠨ ᠢ᠋ ᠭᠤᠷᠪᠠᠨ ᠴᠤᠯᠤ ᠶ᠋ᠢᠨ ᠬᠠᠭᠠᠷᠢᠮᠠᠯ ᠭᠡᠨᠡ᠃
ᠬᠣᠨᠢᠨ ᠠᠭᠤᠰᠬᠢᠨ ᠪᠣᠷᠳᠣᠮᠠᠯ
ᠵᠢᠷᠭᠤᠭᠠᠨ ᠯᠠᠩ ᠭᠣᠭᠣᠳ ᠤ᠋ᠨ ᠰᠢᠭᠦᠰᠦ ᠶ᠋ᠢ ᠨᠢᠭᠡ ᠵᠢᠩ ᠵᠢᠭᠤᠷᠠᠮᠠᠯ ᠭᠤᠯᠢᠷ ᠲᠤ᠌ ᠬᠢᠵᠦ ᠳᠡᠭᠡᠷᠡ ᠨᠢ ᠬᠠᠭᠠᠰ ᠵᠢᠩ ᠰᠢᠷᠠ ᠲᠣᠰᠣ᠂ ᠨᠠᠯᠢᠰᠠᠮ ᠬᠣᠶᠠᠷ ᠯᠠᠩ ᠂ ᠨᠣᠢᠲᠠᠨ ᠭᠠ ᠶ᠋ᠢᠨ ᠰᠢᠭᠦᠰᠦ ᠵᠡᠷᠭᠡ ᠶ᠋ᠢ ᠲᠡᠭᠰᠢ ᠨᠠᠢᠷᠠᠭᠤᠯᠤᠨ ᠬᠢᠭᠡᠳ ᠠᠭᠤᠰᠬᠢᠨ ᠳ᠋ᠤ᠌ ᠴᠢᠳᠬᠤᠨ ᠪᠣᠯᠭᠣᠵᠤ ᠱᠥᠯᠦᠨ ᠳ᠋ᠦ᠍ ᠲᠥᠷᠥᠵᠦ ᠢᠳᠡᠨᠡ ᠃ ᠡᠭᠦᠨ ᠢ᠋ ᠠᠭᠤᠰᠬᠢᠨ ᠪᠣᠷᠳᠣᠮᠠᠯ ᠭᠡᠨᠡ᠃
ᠨᠡᠢᠳᠡᠮ ᠬᠢᠵᠦ ᠪᠣᠢ ᠢᠳᠡᠭᠡᠨ᠄
ᠰᠢᠷᠠᠭᠰᠠᠨ ᠡᠯᠢᠭᠡ
ᠬᠣᠨᠢ ᠢᠮᠠᠭᠠᠨ ᠤ᠋ ᠲᠦᠭᠦᠬᠡᠢ ᠡᠯᠢᠭᠡ ᠶ᠋ᠢ ᠰᠥᠰᠥ ᠶ᠋ᠢ ᠨᠢ ᠠᠪᠴᠤ ᠬᠠᠶᠠᠭᠠᠳ ᠰᠡᠮᠡᠵᠡᠨ ᠥᠭᠡᠬᠦᠨ ᠳ᠋ᠦ᠍ ᠪᠠᠭᠯᠠᠵᠤ ᠰᠢᠷᠠᠭᠠᠳ ᠱᠦᠷᠬᠡᠢ ᠪᠡᠷ ᠨᠢ ᠢᠳᠡᠨᠡ ᠃ ᠡᠨᠡ ᠨᠢ ᠨᠢᠳᠦᠨ ᠳ᠋ᠦ᠍ ᠲᠤᠰᠠᠲᠠᠢ᠃
ᠪᠣᠷᠳᠣᠭᠰᠠᠨ ᠳᠡᠯᠢᠭᠦᠦ
ᠬᠣᠨᠢ᠂ ᠢᠮᠠᠭᠠᠨ ᠤ᠋ ᠳᠡᠯᠢᠭᠦᠦ ᠶ᠋ᠢ ᠬᠢᠲᠤᠭᠠ ᠶ᠋ᠢᠨ ᠦᠵᠦᠭᠦᠷ ᠢ᠋ ᠳᠣᠲᠣᠷᠠ ᠨᠢ ᠣᠷᠣᠭᠤᠯᠵᠤ ᠰᠡᠮᠡᠯᠵᠦ ᠤᠭᠤᠲᠠ ᠭᠠᠷᠭᠠᠭᠠᠳ ᠳᠣᠲᠣᠷᠠ ᠨᠢ ᠬᠡᠷᠴᠢᠭᠰᠡᠨ ᠥᠭᠡᠬᠦ ᠮᠢᠬᠠ᠂ ᠰᠣᠩᠭᠢᠨᠠ ᠪᠤᠶᠤ ᠬᠦᠮᠡᠯᠢ ᠵᠡᠷᠭᠡ ᠪᠡᠨ ᠬᠢᠵᠦ ᠪᠣᠷᠳᠣᠭᠠᠳ ᠣᠶᠣᠵᠤ ᠴᠢᠨᠠᠵᠤ ᠢᠳᠡᠨᠡ᠂ ᠡᠭᠦᠨ ᠢ᠋ ᠪᠣᠷᠳᠣᠭᠰᠠᠨ ᠳᠡᠯᠢᠭᠦᠦ ᠭᠡᠨᠡ᠃
ᠵᠢᠩᠨᠡᠭᠰᠡᠨ ᠪᠥᠭᠡᠷᠡ
ᠬᠣᠨᠢᠨ ᠪᠥᠭᠡᠷᠡ ( ᠳᠣᠲᠣᠷ ) ᠢ᠋ ᠪᠢᠲᠡᠭᠦᠦ ( ᠥᠭᠡᠬᠦ ᠲᠡᠢ ) ᠪᠡᠷ ᠠᠪᠴᠤ ᠵᠢᠩᠨᠡᠵᠦ ᠢᠳᠡᠬᠦ ᠶ᠋ᠢ ᠬᠡᠯᠡᠨᠡ᠃ ᠡᠨᠡ ᠨᠢ ᠬᠠᠷᠠ ᠪᠥᠭᠡᠷᠡ ᠶ᠋ᠢᠨ ᠬᠦᠢᠲᠡᠨ ᠬᠡᠢ ᠳ᠋ᠦ᠍ ᠰᠠᠢᠨ᠃
ᠴᠢᠨᠠᠭᠰᠠᠨ ᠪᠥᠭᠡᠨᠰᠦᠭ
ᠬᠤᠷᠠᠭᠠ ᠂ ᠢᠰᠢᠭᠡ ᠂ ᠪᠢᠷᠠᠭᠤ ᠶ᠋ᠢᠨ ᠴᠠᠭᠠᠯᠠᠭᠰᠠᠨ ᠪᠥᠭᠡᠨᠰᠦᠭ ᠂ ᠰᠦᠨ ᠳ᠋ᠦ᠍ ᠴᠢᠨᠠᠬᠤ ᠪᠤᠶᠤ ᠠᠮᠤᠰᠤ ᠬᠢᠵᠦ ᠢᠳᠡᠬᠦ ᠶ᠋ᠢ ᠬᠡᠯᠡᠨᠡ ᠃ ᠦᠷᠢᠶᠡᠨ ᠦ᠌ ᠴᠠᠭᠠᠯᠠᠭᠰᠠᠨ ᠪᠥᠭᠡᠷᠡ ᠶ᠋ᠢ ᠭᠠᠯ ᠳ᠋ᠤ᠌ ᠰᠢᠷᠠᠵᠤ ᠢᠳᠡᠨᠡ᠃
ᠴᠢᠬᠢᠭᠰᠡᠨ ᠬᠣᠰ ( ᠬᠣᠰᠬᠢᠨᠠᠭ ᠪᠣᠷᠳᠣᠬᠤ )
ᠬᠣᠨᠢ ᠢᠮᠠᠭᠠᠨ ᠤ᠋ ᠬᠣᠰᠬᠢᠨᠠᠭ ᠢ᠋ ᠬᠣᠷᠭᠣᠯ ᠢ᠋ ᠨᠢ ᠠᠷᠴᠢᠵᠤ ᠴᠡᠪᠡᠷᠯᠡᠭᠡᠳ ᠴᠣᠷᠣᠢ᠂ ᠰᠠᠢᠨ ᠰᠠᠷᠬᠢᠨᠠᠭ ᠢ᠋ ᠰᠤᠷᠯᠠᠨ ᠵᠦᠰᠦᠵᠦ ᠂ ᠨᠠᠷᠢᠨ ᠭᠡᠳᠡᠰᠦ ᠵᠡᠷᠭᠡ ᠶ᠋ᠢᠨ ᠬᠠᠮᠲᠤ ᠴᠢᠬᠢᠵᠦ ᠡᠷᠭᠢᠭᠦᠯᠦᠭᠰᠡᠨ ᠢ᠋ ᠴᠢᠬᠢᠭᠰᠡᠨ ᠬᠣᠣᠰ ᠭᠡᠨᠡ᠃
ᠦᠩᠬᠦᠯᠴᠡᠭ ᠴᠢᠬᠢᠬᠦ
ᠨᠢᠷᠤᠭᠤᠨ ᠤ᠋ ᠭᠣᠣᠯ ᠮᠢᠬᠠ ᠪᠤᠶᠤ ᠴᠣᠷᠣᠢ ᠶ᠋ᠢᠨ ᠳᠣᠲᠣᠷ ᠮᠢᠬᠠ ᠪᠠᠷ ᠪᠣᠷᠳᠣᠨᠠ᠃
ᠰᠢᠭᠢᠷᠡ ᠂ ᠲᠣᠯᠣᠭᠠᠢ ᠬᠤᠢᠬᠠᠯᠠᠭᠰᠠᠨ ᠢᠳᠡᠭᠡᠨ
ᠮᠠᠯ ᠤ᠋ᠨ ᠰᠢᠭᠢᠷᠡ ᠂ ᠲᠣᠯᠣᠭᠠᠢ ᠶ᠋ᠢ ᠭᠠᠯ ᠳ᠋ᠤ᠌ ᠬᠤᠢᠬᠠᠯᠠᠵᠤ ᠤᠬᠢᠶᠠᠨ ᠴᠡᠪᠡᠷᠯᠡᠭᠡᠳ ᠴᠢᠨᠠᠵᠤ ᠢᠳᠡᠳᠡᠭ ᠢ᠋ ᠬᠡᠯᠡᠨᠡ᠃
ᠬᠣᠷᠬᠣᠭ ᠢᠳᠡᠬᠦ
ᠬᠠᠪᠤᠷ ᠴᠠᠭ ᠂ ᠬᠠᠩᠰᠢ ᠶ᠋ᠢᠨ ᠦᠶᠡ ᠲᠠᠪᠤ ᠠ᠋ᠴᠠ ᠳᠡᠭᠡᠭᠰᠢ ᠬᠣᠨᠢᠴᠢᠳ ᠨᠡᠢᠯᠡᠵᠦ ᠂ 5 ᠵᠢᠯ ᠡᠴᠡ ᠳᠡᠭᠡᠭᠰᠢ ᠬᠣᠨᠢ ᠬᠠᠷᠢᠭᠤᠯᠤᠭᠰᠠᠨ ᠬᠠᠰᠢᠷ ᠮᠠᠯᠴᠢᠨ ᠤ᠋ ᠰᠦᠷᠦᠭ ᠡᠴᠡ ᠲᠠᠷᠭᠤ ᠰᠠᠢᠲᠠᠢ ᠬᠣᠨᠢ ᠶ᠋ᠢ ᠰᠢᠯᠢᠵᠦ ᠠᠯᠠᠭᠠᠳ ᠂ ᠭᠦᠵᠡᠭᠡ ᠶ᠋ᠢ ᠨᠢ ᠴᠡᠪᠡᠷᠯᠡᠵᠦ ᠤᠰᠤ ᠬᠢᠬᠦ ᠂ ᠲᠡᠭᠦᠨ ᠳ᠋ᠡᠭᠡᠨ ᠲᠤᠶᠠᠴᠢᠭᠰᠠᠨ ᠮᠢᠬᠠ ᠪᠠᠨ ᠬᠢᠵᠦ ᠂ ᠬᠠᠳᠬᠤᠭᠰᠠᠨ ᠮᠣᠳᠣᠨ ᠠ᠋ᠴᠠ ᠡᠯᠭᠦᠵᠦ ᠂ ᠳᠣᠣᠷᠠ ᠨᠢ ᠭᠠᠯ ᠲᠦᠯᠡᠵᠦ ᠂ ᠴᠢᠯᠠᠭᠤ ᠤᠯᠠᠢᠰᠬᠠᠭᠠᠳ᠂ ᠤᠯᠠᠢᠰᠬᠠᠭᠰᠠᠨ ᠴᠢᠯᠠᠭᠤ ᠪᠠᠨ ᠪᠠᠢᠨ ᠳᠠᠬᠢᠨ ᠬᠢᠵᠦ ᠮᠢᠬᠠ ᠪᠠᠨ ᠪᠣᠯᠭᠣᠭᠰᠠᠨ ᠤ᠋ ᠳᠠᠷᠠᠭᠠ ᠳᠡᠭᠡᠵᠢ ᠶ᠋ᠢ ᠨᠢ ᠲᠡᠭᠷᠢ ᠭᠠᠵᠠᠷ ᠲᠤ᠌ ᠡᠷᠭᠦᠭᠡᠳ ᠣᠯᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠠᠭᠤᠯᠴᠠᠨ ᠢᠳᠡᠳᠡᠭ ᠃ ᠡᠭᠦᠨ ᠢ᠋ ᠬᠣᠷᠬᠣᠭ ᠢᠳᠡᠨᠡ ᠭᠡᠳᠡᠭ ᠃ ᠠᠷᠠᠰᠤ ᠲᠣᠯᠣᠭᠠᠢ ᠶ᠋ᠢ ᠨᠢ ᠡᠵᠡᠨ ᠳ᠋ᠦ᠍ᠨᠢ ᠪᠤᠴᠠᠭᠠᠬᠤ ᠳ᠋ᠠᠭᠠᠨ ᠄《ᠲᠠᠨ ᠤ᠋ ᠬᠣᠨᠢ ᠪᠠᠷ ᠲᠡᠭᠷᠢ ᠳᠠᠬᠢᠪᠠ 》 ᠭᠡᠵᠦ ᠲᠠᠯᠠᠷᠬᠠᠨᠠ ᠃ ᠡᠵᠡᠨ ᠨᠢ 《ᠮᠢᠨᠦ ᠬᠣᠨᠢ ᠶ᠋ᠢ ᠲᠡᠭᠷᠢ ᠵᠣᠭᠣᠭᠯᠠᠵᠠᠢ ᠭᠡᠵᠦ ᠪᠡᠶᠡᠰᠦᠨ ᠣᠳᠣ ᠮᠢᠨᠦ ᠮᠠᠯ ᠥᠰᠦᠨᠡ 》 ᠭᠡᠵᠦ ᠪᠠᠶᠠᠷᠯᠠᠨᠠ ᠃ ᠡᠭᠦᠨ ᠢ ᠭᠣᠣᠯᠳᠠᠭᠤ ᠬᠡᠰᠢᠭᠲᠡᠨ ᠂ ᠰᠥᠨᠢᠳ ᠦ᠋ᠨ ᠨᠤᠲᠤᠭ ᠢ᠋ᠶ᠋ᠠᠷ ᠬᠠᠪᠤᠷ ᠴᠠᠭ ᠂ ᠬᠠᠩᠰᠢ ᠶ᠋ᠢᠨ ᠦᠶᠡ ᠬᠣᠨᠢᠴᠢᠳ ᠬᠣᠨᠢᠨ ᠤ᠋ ᠥᠰᠦᠯᠲᠡ ᠪᠣᠢᠵᠢᠯᠲᠠ ᠶ᠋ᠢ ᠪᠡᠯᠭᠡᠳᠡᠨ ᠵᠥᠩᠨᠡᠵᠦ ᠬᠤᠷᠠᠨ ᠢᠳᠡᠳᠡᠭ ᠵᠠᠩᠰᠢᠯᠲᠠᠢ ᠪᠠᠢᠳᠠᠭ᠃
ᠬᠣᠨᠢᠨ ᠱᠥᠯᠥ
ᠮᠣᠩᠭᠣᠯᠴᠤᠳ ᠡᠷᠲᠡ ᠳᠡᠭᠡᠳᠦ ᠦᠶᠡ ᠡᠴᠡ ᠪᠡᠨ ᠬᠣᠨᠢᠨ ᠱᠥᠯᠥ ᠪᠡᠷ ᠡᠮ ᠲᠣᠮ ᠪᠣᠯᠭᠠᠵᠤ ᠤᠤᠭᠤᠭᠠᠳ ᠪᠡᠶᠡ ᠶ᠋ᠢᠨ ᠲᠠᠮᠢᠷ ᠨᠥᠬᠥᠵᠦ ᠴᠣᠭ ᠰᠦᠯᠳᠡ ᠪᠡᠨ ᠪᠠᠳᠠᠷᠠᠭᠤᠯᠳᠠᠭ ᠃ ᠭᠡᠬᠦ ᠳ᠋ᠡᠭᠡᠨ ᠱᠥᠯᠥ ᠪᠡᠨ ᠣᠯᠠᠨ ᠶᠠᠩᠵᠤ ᠪᠠᠷ ᠬᠢᠳᠡᠭ᠃
ᠬᠠᠷᠠ ᠱᠥᠯᠥ
ᠲᠤᠰᠬᠠᠢ ᠪᠤᠴᠠᠯᠭᠠᠭᠰᠠᠨ ᠱᠥᠯᠥ ᠃ ᠪᠡᠶᠡ ᠲᠠᠮᠢᠷᠳᠠᠵᠤ ᠬᠡᠢ ᠡᠷᠭᠦᠭᠳᠡᠭᠰᠡᠨ ᠬᠥᠮᠦᠨ ᠳ᠋ᠦ᠍ ᠤᠤᠭᠤᠯᠭᠠᠳᠠᠭ᠃
ᠪᠢᠲᠡᠭᠦᠦ ᠱᠥᠯᠥ
ᠠᠶᠠᠭᠠ ᠪᠤᠶᠤ ᠸᠠᠭᠠᠷ ᠰᠠᠪᠠ ᠳ᠋ᠤ᠌ ᠬᠣᠨᠢᠨ ᠤ᠋ ᠬᠠᠷᠠ ᠮᠢᠬᠠ ᠪᠠᠨ ᠬᠡᠷᠴᠢᠨ ᠂ ᠳᠠᠪᠤᠰᠤ ᠂ ᠦᠨᠦᠷ ᠠᠮᠲᠠᠲᠠᠨ ᠬᠠᠮᠲᠤ ᠪᠠᠷ ᠲᠠᠭᠠᠷᠠᠭᠤᠯᠵᠤ ᠬᠢᠭᠡᠳ ᠠᠶᠠᠭᠠ ᠂ ᠸᠠᠭᠠᠷ ᠤ᠋ᠨ ᠠᠮᠠ ᠪᠠᠨ ᠡᠯᠳᠡᠵᠦ ᠨᠢᠮᠭᠡᠯᠡᠭᠰᠡᠨ ᠭᠤᠯᠢᠷ ᠢ᠋ᠶ᠋ᠠᠷ ᠪᠦᠷᠢᠬᠦ ᠶᠦᠮ ᠤᠤ ᠂ ᠲᠤᠰᠬᠠᠢ ᠪᠡᠯᠡᠳᠬᠡᠭᠰᠡᠨ ᠴᠠᠭᠠᠨ ᠪᠥᠰ ᠢ᠋ᠶ᠋ᠡᠷ ᠪᠦᠷᠢᠵᠦ ᠵᠢᠩᠨᠡᠨᠡ ᠃ ᠪᠣᠯᠭᠣᠭᠠᠳ ᠤᠤᠭᠤᠨᠠ ᠃ ᠲᠠᠮᠢᠷᠳᠠᠭᠰᠠᠨ ᠢ᠋ ᠰᠡᠷᠭᠦᠭᠡᠨᠡ ᠃
ᠳᠠᠪᠬᠤᠷ ᠬᠠᠢᠰᠤ ( ᠲᠣᠭᠣᠭᠠ )
ᠢᠷᠭᠡ ᠶ᠋ᠢᠨ ᠪᠦᠬᠦ ᠶᠠᠰᠤ ᠮᠢᠬᠠ ᠶ᠋ᠢ ᠴᠢᠨᠠᠵᠤ ᠱᠥᠯᠥ ᠭᠠᠷᠭᠠᠬᠤ ᠶ᠋ᠢ ᠳᠠᠪᠬᠤᠷ ᠬᠠᠢᠰᠤ ᠨᠡᠷᠡᠬᠦ ᠭᠡᠨᠡ ᠃ ᠠᠯᠠᠭᠰᠠᠨ ᠬᠣᠨᠢᠨ ᠤ᠋ ᠮᠢᠬᠠ ᠶ᠋ᠢ ᠪᠠᠭᠠ ᠰᠢᠭ᠋ ᠱᠤᠯᠤᠭᠠᠳ ᠡᠪᠡᠷ ᠂ ᠬᠣᠭᠢᠰᠣ ᠶ᠋ᠢ ᠨᠢ ᠮᠤᠯᠲᠤᠯᠤᠨ ᠂ ᠪᠦᠬᠦ ᠶᠠᠰᠤ ᠶ᠋ᠢ ᠭᠡᠭᠡᠭᠳᠡᠭᠦᠯᠦᠯ ᠦᠭᠡᠢ ᠵᠢᠴᠢ ᠭᠡᠳᠡᠰᠦ ᠳᠣᠲᠣᠷ ᠠ᠋ᠴᠠ ᠨᠠᠷᠢᠨ ᠭᠡᠳᠡᠰᠦ ᠂ ᠭᠦᠵᠡᠭᠡᠨ ᠦ᠌ ᠬᠤᠵᠢᠷᠬᠠᠢ ᠂ ᠰᠠᠢᠨ ᠮᠠᠭᠤ ᠰᠠᠷᠬᠢᠨᠠᠭ ᠂ ᠡᠯᠢᠭᠡ ᠂ ᠠᠭᠤᠰᠬᠢ ᠶ᠋ᠢᠨ ᠬᠣᠷᠮᠣᠢ ᠂ ᠬᠣᠰᠬᠢᠨᠠᠭ ᠂ ᠳᠡᠯᠢᠭᠦᠦ ᠲᠤᠰ ᠪᠦᠷᠢ ᠡᠴᠡ ᠪᠠᠭᠠ ᠬᠤᠪᠢ ᠠᠪᠴᠤ ᠂ ᠪᠦᠬᠦᠯᠢ ᠪᠥᠭᠡᠷᠡ ᠵᠢᠷᠦᠬᠡ ᠶ᠋ᠢᠨ ᠬᠠᠮᠲᠤ ᠪᠢᠲᠡᠭᠦᠦ ᠲᠣᠭᠣᠭᠠᠨ ᠳ᠋ᠤ᠌ ᠬᠢᠵᠦ ᠡᠰᠡᠬᠦᠯᠡ ᠪᠢᠲᠡᠭᠦᠦ ᠰᠠᠪᠠ ᠲᠠᠢ ᠲᠣᠭᠣᠭᠠᠨ ᠳ᠋ᠤ᠌ ᠰᠠᠭᠤᠯᠭᠠᠵᠤ ᠪᠢᠲᠡᠭᠦᠯᠡᠭᠡᠳ ᠳᠡᠭᠡᠷᠡ ᠨᠢ ᠰᠥᠰᠥᠨ ᠡᠴᠡ ᠪᠠᠭᠠ ᠳᠤᠰᠤᠭᠠᠵᠤ ᠂ ᠮᠥᠰᠥᠨ ᠰᠢᠬᠢᠷ ᠂ ᠴᠠᠭᠠᠨ ᠱᠠᠲᠠᠩ ᠂ ᠪᠤᠷᠠᠮ ᠂ ᠵᠥᠭᠡᠢ ᠶ᠋ᠢᠨ ᠪᠠᠯ ᠲᠤᠰ ᠪᠦᠷᠢ ᠲᠠᠪᠤᠨ ᠴᠢᠨ ᠂ ᠬᠠᠷᠠ ᠠᠷᠢᠬᠢ ᠂ ᠦᠬᠡᠷ ᠦ᠋ᠨ ᠰᠢᠷᠠ ᠲᠣᠰᠣ ᠲᠤᠰ ᠪᠦᠷᠢ ᠨᠢᠭᠡ ᠯᠠᠩ ᠂ ᠬᠣᠶᠠᠷ ᠰᠣᠩᠭᠢᠨᠠ ᠂ ᠲᠠᠪᠤᠨ ᠬᠠᠯᠠᠭᠤᠨ ᠪᠠᠭᠠ ᠬᠢᠵᠦ ᠬᠦᠢᠲᠡᠨ ᠤᠰᠤ ᠶ᠋ᠢ ᠳᠦᠭᠦᠷᠲᠡᠯᠡ ᠬᠢᠵᠦ ᠂ ᠵᠥᠭᠡᠯᠡᠨ ᠭᠠᠯ ᠢ᠋ᠶ᠋ᠠᠷ 3 ᠂ 4 ᠴᠠᠭ ᠪᠤᠴᠠᠯᠭᠠᠵᠤ ᠭᠠᠷᠭᠠᠨᠠ ᠃ ᠲᠡᠭᠡᠭᠡᠳ ᠲᠣᠰᠣ ᠶ᠋ᠢ ᠨᠢ ᠠᠪᠴᠤ ᠰᠡᠷᠢᠭᠦᠨ ᠭᠠᠵᠠᠷ ᠲᠠᠯᠪᠢᠵᠤ ᠂ ᠡᠪᠡᠳᠴᠢᠲᠡᠨ ᠳ᠋ᠦ᠍ ᠥᠷᠯᠥᠭᠡ ᠪᠦᠷᠢ ᠬᠡᠪᠲᠡᠭᠡ ᠳ᠋ᠦ᠍ᠨᠢ 2 – 3 ᠯᠠᠩ ᠬᠠᠯᠠᠭᠤᠯᠵᠤ ᠤᠤᠭᠤᠯᠭᠠᠨᠠ ᠃ ᠡᠨᠡ ᠬᠦ᠌ ᠱᠥᠯᠥ ᠶ᠋ᠢ 21 – 49 ᠬᠣᠨᠣᠭ ᠤᠤᠭᠤᠪᠠᠯ ᠬᠡᠢ ᠡᠷᠭᠦᠵᠦ ᠲᠠᠮᠢᠷ ᠠᠯᠳᠠᠬᠤ ᠂ ᠲᠣᠯᠣᠭᠠᠢ ᠡᠷᠭᠢᠵᠦ ᠴᠢᠬᠢ ᠱᠤᠤᠭᠢᠬᠤ ᠂ ᠪᠡᠶᠡ ᠰᠤᠯᠳᠠᠢᠵᠤ ᠲᠠᠮᠢᠷᠳᠠᠬᠤ ᠂ ᠨᠣᠢᠷ ᠠᠯᠳᠠᠬᠤ ᠂ ᠬᠣᠳᠣᠭᠣᠳᠣ ᠰᠡᠷᠢᠭᠦᠨ ᠢ᠋ᠶ᠋ᠡᠷ ᠡᠪᠡᠳᠬᠦ ᠵᠡᠷᠭᠡ ᠶ᠋ᠢ ᠵᠠᠰᠠᠵᠤ ᠲᠤᠰᠠᠯᠠᠨᠠ ᠃ ᠭᠡᠬᠦ ᠳ᠋ᠡᠭᠡᠨ ᠶᠢᠰᠦ ᠡᠬᠢᠯᠡᠬᠦ ᠳ᠋ᠦ᠍ ᠤᠤᠭᠤᠨᠠ ᠃ ᠡᠨᠡ ᠱᠥᠯᠥ ᠶ᠋ᠢ ᠤᠤᠭᠤᠭᠰᠠᠨ ᠬᠥᠮᠦᠨ ᠂ ᠡᠳᠦᠷ ᠤᠨᠲᠠᠬᠤ ᠂ ᠬᠥᠳᠡᠯᠮᠦᠷᠢ ᠂ ᠲᠠᠮᠢᠷ ᠬᠢᠬᠦ ᠂ ᠲᠠᠭᠠᠷᠠᠵᠤ ᠪᠣᠷᠣᠭᠠᠨ ᠳ᠋ᠤ᠌ ᠨᠤᠷᠠᠬᠤ ᠵᠡᠷᠭᠡ ᠶ᠋ᠢ ᠴᠡᠭᠡᠷᠯᠡᠨᠡ ᠃ ᠪᠠᠳᠬᠠᠨ ᠪᠣᠷᠣ ᠂ ᠡᠯᠢᠭᠡ ᠰᠥᠰᠥᠨ ᠡᠪᠡᠳᠴᠢᠨ ᠂ ᠴᠢᠰᠤᠨ ᠣᠢᠯᠲᠠ ᠲᠠᠢ ᠬᠥᠮᠦᠨ ᠤᠤᠭᠤᠵᠤ ᠪᠣᠯᠬᠤ ᠦᠭᠡᠢ ᠃
ᠶᠠᠰᠤᠨ ᠱᠥᠯᠥ
ᠮᠢᠬᠠ ᠶ᠋ᠢ ᠨᠢ ᠮᠥᠯᠵᠢᠵᠦ ᠴᠡᠪᠡᠷᠯᠡᠭᠰᠡᠨ ᠦᠬᠡᠷ ᠬᠣᠨᠢᠨ ᠤ᠋ ᠶᠠᠰᠤ ᠶ᠋ᠢ ᠬᠡᠮᠬᠡᠯᠦᠭᠡᠳ ᠴᠢᠨᠠᠵᠤ ᠤᠤᠭᠤᠬᠤ ᠶ᠋ᠢ ᠬᠡᠯᠡᠨᠡ ᠃ ᠡᠨᠡ ᠨᠢ ᠪᠡᠶᠡ ᠶ᠋ᠢ ᠲᠠᠮᠢᠷᠵᠢᠭᠤᠯᠤᠨ ᠬᠡᠢ ᠶ᠋ᠢ ᠨᠠᠮᠳᠠᠭᠤᠯᠬᠤ ᠦᠢᠯᠡᠳᠦᠯ ᠲᠡᠢ᠃
ᠭᠣᠷᠬᠣᠭ ᠱᠥᠯᠥ
ᠪᠠᠰᠠ ᠪᠢᠲᠡᠭᠦᠦ ᠱᠥᠯᠥ ᠭᠡᠳᠡᠭ ᠃ ᠬᠣᠶᠠᠷ ᠬᠠ ᠭᠤᠶᠠ ᠂ ᠤᠭᠤᠴᠠ ᠂ ᠡᠪᠴᠢᠭᠦᠦ ᠂ ᠰᠡᠭᠡᠷ ᠂ ᠬᠦᠵᠦᠭᠦᠦ ᠵᠡᠷᠭᠡ ᠲᠣᠭᠲᠠᠯᠳᠤ ᠮᠥᠴᠢ ᠪᠦᠬᠦᠨ ᠡᠴᠡ ᠲᠠᠪᠤᠨ ᠴᠢᠨ ᠣᠷᠴᠢᠨ ᠠᠪᠴᠤ ᠂ ᠪᠠᠰᠠ ᠡᠯᠢᠭᠡ ᠂ ᠠᠭᠤᠰᠬᠢ ᠂ ᠵᠢᠷᠦᠬᠡ ᠂ ᠪᠥᠭᠡᠷᠡ ᠵᠡᠷᠭᠡ ᠡᠴᠡ ᠲᠤᠰ ᠪᠦᠷᠢ ᠲᠠᠪᠤᠨ ᠴᠢᠨ ᠠᠪᠴᠤ ᠂ ᠨᠠᠷᠢᠨ ᠬᠡᠷᠴᠢᠨ ᠨᠤᠨᠲᠠᠭᠯᠠᠭᠠᠳ ᠰᠣᠩᠭᠢᠨᠠ ᠂ ᠳᠠᠪᠤᠰᠤ ᠂ ᠦᠨᠦᠷ ᠠᠮᠲᠠᠲᠠᠨ ᠢ᠋ ᠲᠡᠩᠴᠡᠭᠦᠯᠦᠨ ᠬᠢᠵᠦ ᠰᠠᠢᠨ ᠰᠠᠷᠬᠢᠨᠠᠭ ᠪᠤᠶᠤ ᠭᠦᠵᠡᠭᠡ ᠶ᠋ᠢᠨ ᠪᠤᠯᠤᠩ ᠳ᠋ᠤ᠌ ᠬᠢᠵᠦ ᠨᠠᠷᠢᠨ ᠮᠣᠳᠣᠨ ᠱᠣᠷᠣ ᠪᠠᠷ ᠰᠦᠪᠡᠯᠡᠵᠦ ᠣᠯᠣᠰᠣ ᠪᠠᠷ ᠰᠠᠢᠲᠤᠷ ᠪᠣᠭᠣᠵᠤ ᠪᠡᠬᠢᠯᠡᠭᠡᠳ ᠤᠰᠤ ᠪᠤᠶᠤ ᠱᠥᠯᠦᠨ ᠳ᠋ᠦ᠍ ᠬᠢᠵᠦ ᠪᠤᠷᠭᠠᠰᠤᠨ ᠭᠠᠯ ᠢ᠋ᠶ᠋ᠠᠷ ᠠᠯᠭᠤᠷᠬᠠᠨ ᠢ᠋ᠶ᠋ᠠᠷ 3 ᠂ 4 ᠴᠠᠭ ᠴᠢᠨᠠᠵᠤ ᠭᠠᠷᠭᠠᠭᠠᠳ ᠪᠦᠯᠢᠶᠡᠨ ᠢ᠋ᠶ᠋ᠡᠷ ᠤᠤᠭᠤᠨᠠ᠃
ᠳᠥᠷᠪᠡᠨ ᠰᠢᠮᠡᠳᠦ ᠶ᠋ᠢᠨ ᠱᠥᠯᠥ
ᠬᠣᠨᠢᠨ ᠤ᠋ ᠪᠣᠷᠪᠢ ᠂ ᠲᠣᠢᠭ ᠂ ᠲᠠᠯᠤᠨ ᠶᠠᠰᠤᠨ ᠤ᠋ ᠪᠠᠷᠢᠭᠤᠯ ᠂ ᠣᠬᠣᠷ ᠰᠡᠭᠦᠯ ᠦ᠋ᠨ ᠶᠠᠰᠤ ᠶ᠋ᠢ ᠲᠡᠷᠡ ᠬᠡᠰᠡᠭ ᠦ᠋ᠨ ᠬᠢᠨᠢ ᠮᠢᠬᠠ ᠲᠠᠢ ᠴᠠᠪᠴᠢᠨ ᠠᠪᠴᠤ ᠳᠠᠪᠤᠰᠤ ᠬᠢᠬᠦ ᠦᠭᠡᠢ ᠪᠡᠷ 5 – 6 ᠵᠢᠩ ᠤᠰᠤᠨ ᠳ᠋ᠤ᠌ ᠤᠳᠠᠭᠠᠨ ᠴᠢᠨᠠᠵᠤ 2 ᠵᠢᠩ ᠪᠣᠯᠲᠠᠯᠠ ᠰᠢᠷᠭᠡᠭᠡᠭᠡᠳ ᠬᠠᠯᠠᠭᠤᠨ ᠪᠦᠯᠢᠶᠡᠨ ᠪᠤᠶᠤ ᠡᠰᠡᠬᠦᠯᠡ ᠡᠮᠴᠢ ᠶ᠋ᠢᠨ ᠰᠠᠨᠠᠭᠤᠯᠭᠠ ᠪᠠᠷ ᠡᠮ ᠦ᠋ᠨ ᠬᠠᠮᠲᠤ ᠤᠤᠭᠤᠨᠠ᠃ ᠡᠭᠦᠨ ᠢ᠋ ᠳᠥᠷᠪᠡᠨ ᠰᠢᠮᠡᠲᠦ ᠶ᠋ᠢᠨ ᠱᠥᠯᠥ ᠭᠡᠨᠡ ᠃ ᠡᠨᠡ ᠨᠢ ᠡᠪᠡᠳᠴᠢᠲᠡᠨ ᠢ᠋ ᠡᠷᠡᠭᠦᠯᠵᠢᠭᠦᠯᠬᠦ ᠪᠤᠶᠤ ᠬᠥᠭᠰᠢᠳ ᠨᠠᠰᠤᠲᠠᠳ ᠢ᠋ ᠲᠠᠮᠢᠷᠵᠢᠭᠤᠯᠬᠤ ᠳ᠋ᠤ᠌ ᠲᠡᠵᠢᠭᠡᠯ ᠶᠡᠬᠡᠲᠦ ᠢᠳᠡᠭᠡᠨ ᠪᠣᠯᠠᠢ᠃
ᠲᠥᠮᠥᠰᠥ ᠲᠡᠢ ᠬᠣᠨᠢᠨ ᠱᠥᠯᠥ
ᠵᠢᠩ ᠮᠢᠬᠠ ᠶ᠋ᠢ ᠬᠠᠭᠠᠰ ᠵᠢᠩ ᠲᠥᠮᠥᠰᠥ ( ᠢᠮᠠᠬᠤ ᠤᠷᠲᠤ ᠬᠢᠲᠤᠭᠠᠨ ᠮᠥᠷᠥ ᠴᠢᠨᠡᠭᠡ ᠵᠤᠵᠠᠭᠠᠨ ᠬᠡᠷᠴᠢᠨᠡ ) ᠲᠡᠢ 4 ᠵᠢᠩ ᠤᠰᠤᠨ ᠳ᠋ᠤ᠌ ᠰᠣᠩᠭᠢᠨᠠ ᠬᠤᠸᠠᠵᠤᠤ ᠂ ᠳᠠᠪᠤᠰᠤ ᠲᠠᠢ ᠬᠢᠵᠦ ᠪᠤᠴᠠᠯᠭᠠᠭᠠᠳ ᠂ ᠳᠠᠬᠢᠨ ᠵᠥᠭᠡᠯᠡᠨ ᠭᠠᠯ ᠳᠡᠭᠡᠷᠡ ᠲᠥᠮᠥᠰᠥ ᠶ᠋ᠢ ᠨᠢ ᠵᠥᠭᠡᠯᠡᠷᠡᠬᠦ ᠦᠶᠡ ᠳ᠋ᠦ᠍ ᠨᠠᠷᠢᠨ ᠬᠡᠷᠴᠢᠵᠦ ᠳᠡᠪᠲᠦᠭᠡᠭᠰᠡᠨ ᠲᠥᠪᠡᠳ ᠬᠠᠰᠢ ᠂ ᠫᠦᠨᠲ᠋ᠢᠦᠽᠢ ᠪᠡᠨ ᠬᠢᠵᠦ ᠲᠠᠪᠤᠨ ᠮᠢᠨᠦ᠋ᠲ ᠪᠤᠴᠠᠯᠭᠠᠭᠠᠳ ᠠᠪᠴᠤ ᠦᠨᠦᠷ ᠦ᠋ᠨ ᠣᠬᠢ ᠶ᠋ᠢ ᠬᠢᠵᠦ ᠠᠶᠠᠭᠠᠯᠠᠨᠠ ᠃ ᠡᠭᠦᠨ ᠢ᠋ ᠲᠥᠮᠥᠰᠥ ᠲᠡᠢ ᠬᠣᠨᠢᠨ ᠱᠥᠯᠥ ᠭᠡᠳᠡᠭ᠃
ᠯᠤᠤᠪᠠᠩ ᠲᠠᠢ ᠬᠣᠨᠢᠨ ᠱᠥᠯᠥ
ᠨᠠᠷᠢᠨ ᠬᠡᠷᠴᠢᠭᠰᠡᠨ ᠬᠠᠭᠠᠰ ᠵᠢᠩ ᠬᠣᠨᠢᠨ ᠮᠢᠬᠠᠨ ᠳ᠋ᠤ᠌ ᠨᠢᠭᠡ ᠯᠤᠤᠪᠠᠩ ᠬᠡᠷᠴᠢᠨ ᠬᠢᠭᠡᠳ ᠳᠡᠭᠡᠷᠡ ᠨᠢ ᠭᠠᠭᠤᠯᠠ ᠂ ᠵᠦᠷᠪᠠᠭ ( ᠭᠣᠣᠯ ᠢ᠋ ᠨᠢ ᠠᠪᠴᠤ ᠬᠠᠶᠠᠨᠠ ) ᠂ ᠭᠠᠮᠠᠷ ᠂ ᠪᠢᠪᠢᠯᠢᠩ ᠂ ᠫᠣᠸᠠᠷᠢ ᠶ᠋ᠢ ᠲᠤᠰ ᠪᠦᠷᠢ ᠨᠢᠭᠡ ᠴᠢᠨ ᠬᠢᠵᠦ ᠂ ᠰᠣᠩᠭᠢᠨᠠ ᠶ᠋ᠢᠨ ᠴᠠᠭᠠᠨ ᠭᠤᠷᠪᠠᠨ ᠰᠢᠷᠬᠡᠭ ᠲᠡᠢ ᠪᠤᠴᠠᠯᠭᠠᠨ ᠱᠥᠯᠦᠨ ᠳ᠋ᠦ᠍ᠨᠢ ᠳᠠᠪᠤᠰᠤ ᠵᠢᠶᠠᠩᠶ᠋ᠢᠤ ᠬᠢᠵᠦ ᠭᠤᠯᠢᠷ ᠤ᠋ᠨ ᠵᠣᠭᠣᠰᠤᠨ ᠪᠣᠭᠣᠷᠰᠣᠭ ᠬᠢᠵᠦ ᠪᠣᠯᠭᠣᠬᠤ ᠪᠤᠶᠤ ᠡᠰᠡᠬᠦᠯᠡ ᠱᠥᠯᠦᠨ ᠳ᠋ᠡᠬᠢ ᠰᠢᠭᠠᠷᠤᠭ ᠢ᠋ ᠱᠦᠭᠦᠨ ᠲᠤᠩᠭᠠᠯᠠᠭᠰᠢᠭᠤᠯᠤᠭᠠᠳ ᠪᠤᠳᠠᠭᠠ ᠬᠢᠵᠦ ᠪᠤᠴᠠᠯᠭᠠᠨ ᠢᠳᠡᠨᠡ᠃ ᠡᠭᠦᠨ ᠢ᠋ ᠯᠤᠤᠪᠠᠩ ᠲᠠᠢ ᠬᠣᠨᠢᠨ ᠱᠥᠯᠥ ᠭᠡᠨᠡ᠃ ᠡᠭᠦᠨ ᠢ᠋ ᠪᠥᠭᠡᠷᠡ ᠶ᠋ᠢᠨ ᠲᠠᠮᠢᠷ ᠪᠠᠭᠤᠷᠠᠵᠤ ᠬᠦᠴᠦᠨ ᠲᠠᠮᠢᠷ ᠰᠤᠯᠠᠷᠠᠨ ᠂ ᠬᠥᠯ ᠪᠡᠯᠬᠡᠭᠦᠰᠦ ᠬᠦᠴᠦᠨ ᠦᠭᠡᠢ ᠪᠣᠯᠣᠭᠰᠠᠳ ᠢ᠋ ᠵᠠᠰᠠᠨᠠ᠃
ᠨᠣᠭᠣᠭᠠ ᠲᠠᠢ ᠬᠣᠨᠢᠨ ᠮᠢᠬᠠᠨ ᠱᠥᠯᠥ
ᠵᠢᠩ ᠬᠣᠨᠢᠨ ᠮᠢᠬᠠ ᠶ᠋ᠢ ᠬᠢᠲᠤᠭᠠᠨ ᠮᠥᠷᠥ ᠴᠢᠨᠡᠭᠡ ᠵᠤᠵᠠᠭᠠᠨ ᠬᠡᠷᠴᠢᠵᠦ ᠳᠥᠷᠪᠡᠨ ᠵᠢᠩ ᠤᠰᠤᠨ ᠳ᠋ᠤ᠌ ᠬᠢᠵᠦ ᠬᠦᠴᠦᠲᠡᠢ ᠭᠠᠯ ᠢ᠋ᠶ᠋ᠠᠷ ᠪᠤᠴᠠᠯᠭᠠᠭᠠᠳ ᠂ ᠳᠠᠬᠢᠨ ᠵᠥᠭᠡᠯᠡᠨ ᠭᠠᠯ ᠳᠡᠭᠡᠷᠡ 20 ᠮᠢᠨᠦ᠋ᠲ ᠴᠢᠨᠠᠭᠠᠳ ᠬᠢᠭᠰᠡᠨ ᠴᠠᠭᠠᠨ ᠨᠣᠭᠣᠭᠠ ᠲᠥᠮᠥᠰᠥ ᠶ᠋ᠢ ᠵᠥᠭᠡᠯᠡᠷᠡᠬᠦ ᠦᠶᠡ ᠳᠠᠪᠤᠰᠤ ᠂ ᠬᠤᠸᠠᠵᠤᠤ ᠂ ᠰᠣᠩᠭᠢᠨᠠ ᠬᠢᠵᠦ ᠬᠤᠳᠬᠤᠭᠠᠳ ᠭᠠᠷᠭᠠᠨᠠ ᠃ ᠡᠭᠦᠨ ᠢ᠋ ᠨᠣᠭᠣᠭᠠ ᠲᠠᠢ ᠬᠣᠨᠢᠨ ᠱᠥᠯᠥ ᠭᠡᠨᠡ᠃
ᠲᠥᠷᠥᠵᠦ ᠢᠳᠡᠬᠦ ᠬᠣᠨᠢᠨ ᠮᠢᠬᠠᠨ ᠱᠥᠯᠥ
ᠨᠢᠮᠭᠡᠨ ᠬᠡᠷᠴᠢᠭᠰᠡᠨ ᠬᠣᠨᠢᠨ ᠮᠢᠬᠠ ( ᠦᠬᠡᠷ ᠂ ᠢᠮᠠᠭᠠ ᠶ᠋ᠢᠨ ) ᠢ᠋ᠶ᠋ᠡᠨ ᠬᠠᠯᠠᠭᠤᠨ ᠲᠣᠭᠣᠭᠠᠨ ᠤ᠋ ᠪᠤᠴᠠᠯᠤᠭᠰᠠᠨ ᠱᠥᠯᠥ ᠳ᠋ᠦ᠍ ᠲᠥᠷᠥᠨ ᠪᠣᠯᠭᠣᠵᠤ ᠢᠳᠡᠬᠦ ᠶ᠋ᠢ ᠬᠡᠯᠡᠨᠡ ᠃ ( ᠨᠢᠮᠭᠡᠨ ᠬᠡᠷᠴᠢᠭᠰᠡᠨ ᠮᠢᠬᠠ ᠂ ᠴᠠᠭᠠᠨ ᠨᠣᠭᠣᠭᠠ ᠂ ᠳᠡᠪᠲᠦᠭᠡᠭᠰᠡᠨ ᠫᠦᠨᠲ᠋ᠢᠦᠽᠢ᠂ ᠬᠠᠢᠳᠠᠢ᠂ ᠰᠣᠩᠭᠢᠨᠠ᠂ ᠰᠠᠷᠢᠮᠰᠠᠭ᠂ ᠰᠣᠷᠢᠰᠤ ᠵᠡᠷᠭᠡ ᠶ᠋ᠢ ᠠᠰ ᠠᠰ ᠲᠤᠨᠢ ᠪᠡᠯᠡᠳᠬᠡᠭᠡᠳ ᠠᠯᠢ ᠳᠤᠷᠠᠲᠠᠢ ᠪᠠᠨ ᠲᠥᠷᠥᠨ ᠪᠣᠯᠭᠣᠵᠤ ᠢᠳᠡᠬᠦ ᠶ᠋ᠢ ᠬᠡᠯᠡᠨᠡ᠃
ᠶᠠᠰᠤᠨ ᠤ᠋ ᠬᠠᠨᠳᠠ
ᠪᠦᠬᠦᠯᠢ ᠬᠣᠨᠢᠨ ᠤ᠋ ᠶᠠᠰᠤ ᠶ᠋ᠢ ᠮᠢᠬᠠ ᠶ᠋ᠢ ᠨᠢ ᠴᠡᠪᠡᠷᠯᠡᠨ ᠠᠪᠤᠭᠠᠳ ᠲᠣᠭᠣᠭᠠᠨ ᠳ᠋ᠤ᠌ ᠬᠢᠵᠦ ᠴᠢᠨᠠᠭᠰᠠᠨ ᠱᠥᠯᠥ ᠶ᠋ᠢ ᠶᠠᠰᠤᠨ ᠤ᠋ ᠬᠠᠨᠳᠠ ᠱᠥᠯᠥ ᠭᠡᠨᠡ ᠃ ᠶᠠᠰᠤ ᠪᠠᠨ ᠥᠷᠯᠥᠭᠡ ᠡᠴᠡ ᠦᠳᠡ ᠪᠣᠯᠲᠠᠯᠠ ᠪᠤᠴᠠᠯᠭᠠᠬᠤ ᠶᠠᠪᠤᠴᠠ ᠳ᠋ᠠᠭᠠᠨ ᠲᠣᠰᠣ ᠶ᠋ᠢ ᠨᠢ ᠬᠡᠳᠦ ᠤᠳᠠᠭᠠ ᠬᠠᠮᠤᠨ ᠠᠪᠴᠤ ᠴᠢᠨᠠᠭᠰᠠᠭᠠᠷ ᠶᠠᠰᠤᠨ ᠳᠣᠲᠣᠷᠠᠬᠢ ᠰᠤᠳᠠᠰᠤ ᠨᠢ ᠦᠵᠡᠭᠳᠡᠬᠦ ᠦᠭᠡᠢ ᠪᠣᠯᠵᠤ ᠶᠠᠰᠤ ᠨᠢ ᠭᠡᠭᠡᠨ ᠥᠩᠭᠡᠲᠡᠢ ᠪᠣᠯᠬᠤ ᠳ᠋ᠤ᠌ ᠱᠦᠭᠦᠨ ᠭᠠᠷᠭᠠᠵᠤ᠂ ᠵᠥᠭᠡᠯᠡᠨ ᠭᠠᠯ ᠳᠡᠭᠡᠷᠡ ᠲᠠᠯᠪᠢᠨᠠ᠃ ᠲᠦᠯᠡᠭᠳᠡᠬᠦ ᠶ᠋ᠢ ᠬᠢᠴᠢᠶᠡᠨ ᠪᠠᠢᠵᠤ ᠬᠠᠨᠳᠠᠷᠠᠭᠰᠠᠨ ᠬᠠᠨᠳᠠ ᠶ᠋ᠢ ᠦᠷᠡᠯ ᠪᠣᠯᠭᠠᠨ ᠰᠠᠯᠬᠢ ᠨᠡᠪᠲᠡᠷᠡᠬᠦ ᠦᠭᠡᠢ ᠰᠡᠷᠢᠭᠦᠨ ᠭᠠᠵᠠᠷ ᠲᠠᠯᠪᠢᠵᠤ ᠬᠠᠲᠠᠭᠠᠵᠤ ᠠᠪᠤᠨᠠ᠃ ᠬᠣᠭᠣᠯᠠ ᠳ᠋ᠤ᠌ ᠬᠢᠪᠡᠯ ᠣᠨᠴᠠ ᠰᠠᠢᠬᠠᠨ ᠠᠮᠲᠠᠲᠠᠢ᠃ ᠡᠪᠡᠳᠴᠢᠲᠡᠨ ᠥᠷᠯᠥᠭᠡ ᠪᠦᠷᠢ ᠪᠤᠰᠣᠯ ᠦᠭᠡᠢ᠂ ᠰᠠᠷᠠ ᠤᠤᠭᠤᠪᠠᠯ ᠲᠠᠮᠢᠷ ᠣᠷᠣᠵᠤ ᠡᠪᠡᠳᠴᠢᠨ ᠢᠯᠠᠷᠢᠰᠢᠨᠠ᠃
ᠬᠢᠷᠤᠮᠴᠠᠭ ᠱᠥᠯᠥ
ᠦᠭᠦᠴᠡ ᠬᠢᠬᠦ ᠳ᠋ᠡᠭᠡᠨ ᠢᠮᠠᠭᠠᠨ ᠤ᠋ ᠡᠯᠢᠭᠡ ᠂ ᠠᠭᠤᠰᠬᠢ ᠂ ᠭᠡᠳᠡᠰᠦ ᠳᠣᠲᠣᠷ ᠢ᠋ ᠵᠢᠵᠢᠭᠯᠡᠨ ᠬᠡᠷᠴᠢᠵᠦ᠂ ᠴᠢᠰᠤᠨ ᠤ᠋ ᠬᠠᠮᠲᠤ ᠭᠦᠵᠡᠭᠡᠨ ᠳ᠋ᠦ᠍ᠨᠢ ᠬᠢᠵᠦ ᠬᠥᠯᠳᠡᠭᠡᠭᠡᠳ ᠡᠪᠦᠯ ᠳ᠋ᠡᠭᠡᠨ ᠪᠠᠢᠨ ᠪᠠᠢᠨ ᠪᠤᠴᠠᠯᠭᠠᠵᠤ ᠱᠥᠯᠥ ᠤᠤᠭᠤᠬᠤ ᠶ᠋ᠢ ᠬᠢᠷᠤᠮᠴᠠᠭ ᠱᠥᠯᠥ ᠭᠡᠨᠡ᠃
ᠣᠯᠣᠭᠠᠢ ᠶ᠋ᠢᠨ ᠱᠥᠯᠥ
ᠬᠣᠨᠢ ᠢᠮᠠᠭᠠᠨ ᠤ᠋ ᠣᠯᠣᠭᠠᠢ ᠶ᠋ᠢ ᠤᠬᠢᠶᠠᠨ ᠴᠡᠪᠡᠷᠯᠡᠵᠦ ᠳᠣᠲᠣᠷᠠ ᠨᠢ ᠮᠢᠬᠠ᠂ ᠨᠣᠭᠣᠭᠠ ᠶ᠋ᠢ ᠲᠠᠭᠠᠷᠠᠭᠤᠯᠤᠨ ᠬᠢᠵᠦ ᠳᠠᠪᠤᠰᠤ ᠣᠷᠬᠢᠭᠠᠳ ᠠᠮᠠ ᠶ᠋ᠢ ᠨᠢ ᠤᠲᠠᠰᠤ ᠪᠠᠷ ᠪᠣᠭᠣᠨ ᠴᠢᠨᠠᠵᠤ ᠢᠳᠡᠬᠦ ᠶ᠋ᠢ ᠣᠯᠣᠭᠠᠢ ᠶ᠋ᠢᠨ ᠱᠥᠯᠥ ᠭᠡᠨᠡ᠃ ᠨᠠᠰᠤᠲᠠᠢ ᠬᠥᠮᠦᠨ ᠪᠤᠶᠤ ᠲᠠᠮᠢᠷ ᠮᠠᠭᠤᠲᠠᠢ ᠡᠪᠡᠳᠴᠢᠲᠡᠨ ᠳ᠋ᠦ᠍ ᠲᠠᠮᠢᠷ ᠣᠷᠣᠭᠤᠯᠤᠨᠠ᠃
ᠭᠤᠷᠪᠠᠨ ᠰᠢᠮᠡᠲᠦ ᠶ᠋ᠢᠨ ᠱᠥᠯᠥ
ᠰᠢᠳᠦᠯᠡᠩ ᠬᠣᠨᠢᠨ ᠤ᠋ ᠳᠠᠯᠤ ᠶ᠋ᠢᠨ ᠪᠠᠷᠢᠭᠤᠯ ᠂ ᠪᠣᠷᠪᠢ ᠶ᠋ᠢᠨ ᠶᠠᠰᠤ ᠂ ᠲᠦᠢᠭ᠋ ᠦ᠋ᠨ ᠶᠠᠰᠤ ᠶ᠋ᠢ ᠮᠢᠬᠠᠨ ᠠ᠋ᠴᠠ ᠱᠤᠯᠤᠵᠤ ᠠᠪᠤᠭᠠᠳ ᠪᠢᠲᠡᠭᠦᠦ ᠰᠠᠪᠠᠨ ᠳ᠋ᠤ᠌ ᠵᠢᠩᠨᠡᠵᠦ ᠱᠥᠯᠥᠰᠢᠭᠰᠡᠨ ᠱᠥᠯᠥ ᠶ᠋ᠢ ᠬᠡᠯᠡᠨᠡ ᠃ ᠡᠨᠡ ᠨᠢ ᠠᠷᠬᠠᠭ ᠢ᠋ ᠵᠠᠰᠠᠵᠤ ᠲᠠᠮᠢᠷ ᠢ᠋ ᠰᠠᠢᠵᠢᠷᠠᠭᠤᠯᠤᠨᠠ᠃
ᠳᠥᠷᠪᠡᠨ ᠰᠢᠮᠡᠳᠦ ᠶ᠋ᠢᠨ ᠱᠥᠯᠥ
ᠲᠥᠯᠥᠭᠡᠨ ᠡᠮᠡ ᠬᠣᠨᠢᠨ ᠤ᠋ ᠳᠠᠯᠤ ᠶ᠋ᠢᠨ ᠪᠠᠷᠢᠭᠤᠯ ᠂ ᠪᠣᠷᠪᠢ ᠂ ᠲᠣᠢᠭ ᠤ᠋ᠨ ᠶᠠᠰᠤ ᠂ ᠬᠠᠷᠠ ᠰᠡᠭᠡᠷ ᠵᠡᠷᠭᠡ ᠶ᠋ᠢ ᠮᠢᠬᠠᠨ ᠠ᠋ᠴᠠ ᠨᠢ ᠱᠤᠯᠤᠵᠤ ᠠᠪᠤᠭᠠᠳ ᠲᠣᠭᠣᠭᠠᠨ ᠳ᠋ᠤ᠌ ᠬᠢᠵᠦ ᠳᠠᠪᠤᠰᠤ ᠲᠠᠭᠠᠷᠠᠭᠤᠯᠤᠭᠠᠳ ᠱᠥᠯᠥ ᠭᠠᠷᠭᠠᠨ ᠤᠤᠭᠤᠬᠤ ᠶ᠋ᠢ ᠬᠡᠯᠡᠨᠡ᠃ ᠡᠨᠡ ᠮᠥᠨ ᠰᠢᠮᠡᠵᠢᠭᠦᠯᠬᠦ ᠦᠢᠯᠡᠳᠦᠯ ᠲᠡᠢ᠃
ᠬᠣᠨᠢᠨ ᠲᠣᠯᠣᠭᠠᠢ ᠶ᠋ᠢᠨ ᠪᠢᠲᠡᠭᠦᠦ ᠱᠥᠯᠥ
ᠬᠣᠨᠢᠨ ᠲᠣᠯᠣᠭᠠᠢ ᠶ᠋ᠢ ᠡᠷᠡᠦ ᠶ᠋ᠢ ᠨᠢ ᠰᠠᠯᠭᠠᠯ ᠦᠭᠡᠢ ᠬᠤᠢᠬᠠᠯᠠᠵᠤ (ᠡᠰᠡᠬᠦᠯᠡ ᠥᠪᠴᠢᠵᠦ) ᠱᠠᠭᠠᠵᠠᠩ ᠰᠠᠪᠠ ᠪᠤᠶᠤ ᠰᠢᠷ ᠲᠡᠢ ᠰᠠᠪᠠᠨ ᠳ᠋ᠤ᠌ ᠪᠢᠲᠡᠭᠦᠮᠵᠢᠯᠡᠨ ᠬᠢᠵᠦ ᠵᠢᠩᠨᠡᠵᠦ ᠪᠣᠯᠭᠣᠭᠰᠠᠨ ᠱᠥᠯᠥ ᠶ᠋ᠢ ᠬᠡᠯᠡᠨᠡ ᠃ ᠡᠨᠡ ᠨᠢ ᠲᠣᠯᠣᠭᠠᠢ ᠶ᠋ᠢᠨ ᠬᠡᠢ ᠡᠪᠡᠳᠴᠢᠨ ᠳ᠋ᠦ᠍ ᠰᠠᠢᠨ᠃
ᠮᠤᠬᠤᠷ ᠣᠯᠣᠭᠠᠢ ᠶ᠋ᠢᠨ ᠪᠢᠲᠡᠭᠦᠦ ᠱᠥᠯᠥ
ᠮᠤᠬᠤᠷ ᠣᠯᠣᠭᠠᠢ ᠳ᠋ᠤ᠌ ᠮᠢᠬᠠ ᠂ ᠥᠭᠡᠬᠦ ᠂ ᠡᠯᠢᠭᠡ ᠶ᠋ᠢ ᠬᠡᠷᠴᠢᠨ ᠳᠡᠭᠡᠷᠡ ᠨᠢ ᠨᠣᠭᠣᠭᠠ ᠂ ᠳᠠᠪᠤᠰᠤ ᠂ ᠤᠰᠤ ᠶ᠋ᠢ ᠨᠢ ᠲᠠᠭᠠᠷᠠᠭᠤᠯᠤᠨ ᠰᠢᠶᠠᠨᠽᠢ ᠮᠡᠲᠦ ᠨᠠᠢᠷᠠᠭᠤᠯᠤᠨ ᠴᠢᠳᠬᠤᠵᠤ ᠢᠳᠡᠬᠦ ᠶ᠋ᠢ ᠬᠡᠯᠡᠨᠡ ᠃ ᠰᠢᠮᠡ ᠲᠡᠵᠢᠭᠡᠯ ᠰᠠᠢᠨ ᠃ ᠪᠠᠰᠠ ᠪᠣᠷᠳᠣᠭᠰᠠᠨ ᠣᠯᠣᠭᠠᠢ ᠭᠡᠨᠡ᠃
ᠬᠠᠯᠠᠭᠤᠨ ᠲᠣᠭᠣᠭᠠ
ᠵᠡᠭᠦᠨ ᠣᠷᠣᠨ ᠢ᠋ᠶ᠋ᠠᠷ ᠬᠦᠨᠳᠦᠲᠦ ᠵᠣᠴᠢᠨ ᠢ᠋ᠶ᠋ᠠᠨ ᠳᠠᠢᠯᠠᠬᠤ ᠳ᠋ᠤ᠌ ᠬᠠᠯᠠᠭᠤᠨ ᠲᠣᠭᠣᠭᠠ ᠪᠠᠨ 6 ᠪᠤᠶᠤ 8 ᠬᠡᠭᠡᠰᠦᠯᠡᠨ ᠮᠢᠬᠠ ᠨᠣᠭᠣᠭᠠ ᠲᠠᠭᠠᠷᠠᠭᠤᠯᠵᠤ 《ᠬᠠᠯᠠᠭᠤᠨ ᠬᠣᠰᠢᠭᠤᠲᠤ ᠬᠣᠨᠢᠨ ᠰᠢᠭᠦᠰᠦ 》 ᠶ᠋ᠢ ᠣᠷᠣᠯᠠᠭᠤᠯᠳᠠᠭ᠃ ᠡᠭᠦᠨ ᠢ᠋ ᠬᠠᠯᠠᠭᠤᠨ ᠲᠣᠭᠣᠭᠠ ᠭᠡᠨᠡ᠃ ᠳᠤᠮᠳᠠ ᠪᠠᠨ ᠭᠠᠯ ᠪᠦᠬᠦᠢ ᠲᠣᠭᠣᠭᠠ᠃
6 ᠬᠡᠭᠡᠰᠦᠯᠡᠭᠰᠡᠨ ᠬᠠᠯᠠᠭᠤᠨ ᠲᠣᠭᠣᠭᠠ ᠂ 6 ᠬᠠᠭᠤᠷᠤᠯᠭᠠ ᠳᠠᠭᠠᠭᠤᠯᠵᠤ ᠂ ᠪᠦᠬᠦᠯᠢ ᠬᠣᠨᠢ ᠶ᠋ᠢ ᠣᠷᠣᠯᠠᠳᠠᠭ ᠂ 8 ᠬᠡᠭᠡᠰᠦᠯᠡᠭᠰᠡᠨ ᠨᠢ 8 ᠲᠠᠪᠠᠭ ᠢ᠋ ᠣᠷᠣᠯᠠᠵᠤ ᠂ ᠮᠥᠨ 6 ᠠᠶᠠᠭᠠ ᠳᠠᠭᠠᠭᠤᠯᠵᠤ ᠂ ᠮᠥᠨ ᠬᠣᠨᠢᠨ ᠰᠢᠭᠦᠰᠦ ᠶ᠋ᠢ ᠲᠥᠯᠥᠭᠡᠯᠡᠨᠡ᠃ ᠭᠡᠬᠦ ᠳ᠋ᠡᠭᠡᠨ ᠲᠣᠯᠣᠭᠠᠢ ᠲᠠᠯᠠ ( ᠲᠣᠭᠣᠭᠠᠨ ᠳ᠋ᠤ᠌ ᠠᠮᠠ ᠲᠠᠯᠠ ᠶ᠋ᠢᠨ ᠡᠰᠡᠷᠭᠦ ) ᠶ᠋ᠢᠨ ᠬᠡᠭᠡᠰᠦᠨ ᠳ᠋ᠦ᠍ ᠬᠠᠷᠠ ᠮᠢᠬᠠᠨ ᠪᠣᠭᠣᠷᠰᠣᠭ ( ᠸᠠᠨᠽᠢ ) ᠪᠠᠷ ᠂ ᠰᠡᠭᠦᠯ ᠲᠠᠯᠠ ᠶ᠋ᠢᠨ ᠬᠡᠭᠡᠰᠦᠨ ( ᠲᠣᠭᠣᠭᠠᠨ ᠤ᠋ ᠠᠮᠠᠨ ᠲᠠᠯᠠ ) ᠳ᠋ᠤ᠌ ᠬᠣᠨᠢᠨ ᠰᠡᠭᠦᠯ ᠦ᠋ᠨ ᠨᠢᠮᠭᠡᠨ ᠵᠦᠰᠦᠮᠡᠯ ᠢ᠋ᠶ᠋ᠡᠷ ᠬᠡᠭᠡᠰᠦᠯᠡᠵᠦ ᠪᠤᠰᠤᠳ ᠢ᠋ ᠨᠢ ᠠᠯᠢ ᠪᠡᠯᠡᠳᠬᠡᠭᠰᠡᠨ ᠢ᠋ᠶ᠋ᠡᠷ ᠬᠡᠭᠡᠰᠦᠯᠡᠵᠦ ᠬᠢᠨᠡ᠃
ᠬᠠᠯᠠᠭᠤᠨ ᠲᠣᠭᠣᠭᠠ ᠣᠷᠣᠭᠤᠯᠬᠤ ᠶᠣᠰᠣᠨ
ᠲᠣᠯᠣᠭᠠᠢ ᠲᠠᠯᠠ ᠶ᠋ᠢ ᠭᠣᠣᠯ ᠵᠣᠴᠢᠨ ᠤ᠋ ᠵᠦᠭ ᠬᠠᠨᠳᠤᠭᠤᠯᠵᠤ ᠣᠷᠣᠭᠤᠯᠬᠤ ᠪᠥᠭᠡᠳ ᠭᠣᠣᠯ ᠵᠣᠴᠢᠨ ᠬᠥᠨᠳᠡᠭᠰᠡᠨ ᠦ᠌ ᠳᠠᠷᠠᠭᠠ ᠪᠦᠭᠦᠳᠡᠭᠡᠷ ᠢᠳᠡᠯᠴᠡᠨᠡ᠃
ᠬᠠᠯᠠᠭᠤᠨ ᠲᠣᠭᠣᠭᠠ ᠪᠠᠭᠤᠯᠭᠠᠬᠤ ᠶᠣᠰᠣᠨ
ᠮᠥᠨ ᠨᠠᠷᠠᠨ ᠵᠥᠪ ᠢ᠋ᠶ᠋ᠡᠷ ᠡᠷᠭᠢᠭᠦᠯᠵᠦ ᠲᠣᠯᠣᠭᠠᠢ ᠲᠠᠯᠠ ᠶ᠋ᠢ ᠭᠠᠳᠠᠭᠰᠢ ᠬᠠᠨᠳᠤᠭᠤᠯᠤᠨ ᠪᠤᠴᠠᠭᠠᠨᠠ᠃