ᠣᠷᠣᠢ ᠦᠭᠡᠢ ᠰᠦᠮᠡ – ᠬᠣᠷᠢᠨ ᠭᠤᠷᠪᠠ ᠂ ᠨᠣᠮ ᠬᠠᠶᠠᠯᠴᠠᠨ ᠴᠣᠭᠣᠷᠠᠭᠰᠠᠨ ᠨᠢ Оройгүй сүм – Хорин гурав ᠂ Ном хаялцан цуурсан нь - Oroigui sum 23
747ᠬᠣᠷᠢᠨ ᠭᠤᠷᠪᠠ ᠂ ᠨᠣᠮ ᠬᠠᠶᠠᠯᠴᠠᠨ ᠴᠣᠭᠣᠷᠠᠭᠰᠠᠨ ᠨᠢ
ᠴᠠᠰᠤ ᠴᠠᠭᠠᠨ ᠴᠤ᠌ ᠤᠰᠤ ᠨᠢ ᠬᠠᠷᠠ
ᠴᠠᠭᠠᠰᠤ ᠴᠠᠭᠠᠨ ᠴᠤ᠌ ᠪᠢᠴᠢᠭ ᠨᠢ ᠬᠠᠷᠠ
ᡀᠠᠰᠠ ᠵᠣᠣ ᠶ᠋ᠢᠨ ᠪᠠᠷᠠᠪᠠᠡᠭ ᠬᠡᠢᠳ ᠦ᠋ᠨ ᠡᠭᠦᠳᠡᠨ ᠳ᠋ᠦ᠍ ᡀᠠᠷᠠᠮᠪᠠ ᠶ᠋ᠢᠨ ᠨᠣᠮ ᠬᠠᠶᠠᠯᠴᠠᠬᠤ ᠲᠡᠷᠡ ᠣᠨᠴᠠᠭᠠᠢ ᠡᠳᠦᠷ ᠲᠡᠢ ᠪᠡᠨ ᠨᠢᠭᠡ ᠯᠡ ᠮᠡᠳᠡᠭᠰᠡᠨ ᠰᠠᠨᠵᠢ ᠵᠣᠯᠭᠠᠬᠤ ᠪᠣᠯᠴᠢᠬᠠᠵᠠᠢ᠃ ᠮᠠᠷᠭᠠᠰᠢ ᡀᠠᠷᠠᠮᠪᠠ ᠶ᠋ᠢᠨ ᠨᠣᠮ ᠬᠠᠶᠠᠯᠴᠠᠨᠠ ᠭᠡᠬᠦ ᠡᠴᠡ ᠦᠨᠡᠮᠰᠢᠭᠳᠡᠬᠦ ᠦᠭᠡᠢ ᠪᠠᠢᠯᠠ᠃ ᠬᠡᠵᠢᠶᠡ ᠡᠨᠡ ᠣᠷᠣᠨ ᠳ᠋ᠤ᠌ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠡᠷᠭᠢᠨ ᠰᠠᠨᠠᠪᠠᠯ ᠶᠠᠭᠠᠬᠢᠬᠤ ᠶᠢᠨ ᠵᠠᠭᠤᠷᠠ ᠦᠭᠡᠢ ᠯᠡ ᠨᠢᠭᠡᠨ ᠷᠠᠪᠵᠤᠩ ᠤ᠋ᠨ ᠨᠢᠭᠡ ᠮᠥᠴᠡᠯᠭᠡ ᠬᠡᠳᠦᠢ ᠨᠢ ᠥᠩᠭᠡᠷᠡᠴᠢᠬᠡᠭᠰᠡᠨ ᠪᠠᠢᠯᠠ᠃ ᠬᠣᠷᠢ ᠡᠷᠭᠢᠮᠡ ᠨᠠᠰᠤᠲᠠᠢ ᠪᠠᠨᠳᠢ ᠠᠷᠤ ᠭᠠᠵᠠᠷ ᠠ᠋ᠴᠠ ᠢᠷᠡᠭᠰᠡᠨ ᠲᠡᠷᠡ ᠡᠳᠦᠷ ᠰᠠᠨᠠᠭᠠᠨ ᠤ᠋ ᠦᠵᠦᠭᠦᠷ ᠲᠦ᠍ ᠠᠯᠤᠰᠯᠠᠨ ᠪᠦᠳᠡᠭᠢᠷᠡᠵᠡᠢ᠃ ᠠᠯᠲᠠᠳᠠᠮᠠᠯ ᠤᠢᠰᠤᠨ ᠮᠠᠯᠠᠭᠠᠢ ᠡᠮᠦᠰᠬᠦ ᠡᠷᠬᠡ ᠶ᠋ᠢ ᠣᠯᠵᠤ᠂ ᠠᠷᠪᠠᠨ ᠪᠡᠷᠬᠡᠲᠦ ᠪᠤᠶᠤ ᠭᠠᠪᠵᠢ ᠴᠣᠯᠠ ᠲᠠᠢ ᠨᠢᠭᠡᠨ ᠪᠣᠯᠤᠭᠠᠳ ᠲᠥᠷᠥᠭᠰᠡᠨ ᠨᠤᠲᠤᠭ ᠤ᠋ᠨ ᠪᠠᠷᠠ ᠶ᠋ᠢ ᠬᠠᠷᠠᠬᠤ ᠣᠢᠷᠠᠳᠴᠤ ᠪᠠᠢᠯᠠ᠃ ᠣᠳᠣ ᠲᠡᠷᠡ ᡀᠠᠰᠠ ᠵᠣᠣ ᠶ᠋ᠢᠨ ᠶᠡᠬᠡ ᠳᠤᠭᠠᠩ ᠤ᠋ᠨ ᠡᠭᠦᠳᠡᠨ ᠳᠡᠭᠡᠷᠡᠬᠢ ᠳᠡᠪᠵᠢᠶᠡᠨ ᠳᠡᠭᠡᠷᠡ ᠭᠠᠷᠴᠤ ᠲᠥᠪᠡᠳ ᠣᠷᠣᠨ ᠤ᠋ ᠮᠡᠷᠭᠡᠳ ᠯᠠᠮᠠ ᠨᠠᠷ ᠤ᠋ᠨ ᠡᠮᠦᠨᠡ ᠨᠣᠮ ᠬᠠᠶᠠᠯᠴᠠᠬᠤ ᠶ᠋ᠢ ᠵᠠᠪᠳᠤᠨ ᠪᠠᠢᠨᠠ᠃ ᠨᠣᠮ ᠬᠠᠶᠠᠯᠴᠠᠨ ᠴᠣᠭᠣᠷᠠᠵᠤ ᠴᠢᠳᠠᠪᠠᠯ ᡀᠠᠷᠠᠮᠪᠠ ᠴᠣᠯᠠ ᠶ᠋ᠢ ᠣᠯᠵᠤ᠂ ᠪᠤᠷᠬᠠᠨ ᠤ᠋ ᠡᠨᠡᠬᠦ ᠣᠷᠣᠨ ᠳ᠋ᠤ᠌ ᠵᠣᠷᠢᠵᠤ ᠢᠷᠡᠭᠰᠡᠨ ᠬᠡᠷᠡᠭ ᠢ᠋ᠶ᠋ᠡᠨ ᠪᠦᠲᠦᠭᠡᠨᠡ᠃ ᠠᠯᠤᠰ ᠲᠡᠷᠲᠡᠭᠡ ᠵᠡᠭᠦᠨ ᠬᠣᠢᠲᠤ ᠵᠦᠭ ᠲᠦ᠍ ᠬᠡᠳᠦᠨ ᠮᠢᠩᠭᠠᠨ ᠤ᠋ ᠴᠠᠭᠠᠨᠠ ᠪᠠᠷᠠᠭᠤᠨ ᠠ᠋ᠴᠠ ᠡᠮᠦᠨᠡ ᠶ᠋ᠢ ᠴᠢᠭᠯᠡᠨ ᠴᠡᠩᠬᠡᠷᠯᠡᠬᠦ ᠬᠠᠷᠠ ᠠᠵᠢᠷᠭᠠ ᠶ᠋ᠢᠨ ᠨᠢᠷᠤᠭᠤᠨ ᠤ᠋ ᠴᠠᠴᠤᠷᠠᠭᠠ ᠭᠣᠣᠯ ᠢ᠋ᠶ᠋ᠠᠷ ᠨᠤᠲᠤᠭᠯᠠᠬᠤ ᠡᠳᠦᠭᠡ ᠶᠡᠬᠡ ᠯᠡ ᠨᠠᠰᠤᠵᠢᠵᠤ ᠶᠠᠳᠠᠷᠠᠭᠰᠠᠨ ᠬᠠᠢᠷᠠᠲᠤ ᠡᠴᠢᠭᠡ ᠰᠠᠢᠨᠴᠣᠭᠲᠣ ᠡᠨᠡᠷᠢᠯᠲᠦ ᠡᠬᠡ ᠴᠡᠨᠳᠡ ᠶ᠋ᠢᠨ ᠪᠦᠬᠦᠢᠯᠡ ᠨᠠᠰᠤᠨ ᠤ᠋ ᠮᠥᠷᠥᠭᠡᠳᠦᠯ᠂ ᠢᠲᠡᠭᠡᠯ ᠨᠠᠶᠢᠳᠠᠪᠤᠷᠢ ᠶ᠋ᠢ ᠲᠡᠢᠨ ᠬᠦ᠌ ᠭᠦᠢᠴᠡᠭᠡᠭᠡᠳ ᠨᠤᠲᠤᠭ ᠶᠤᠭᠠᠨ ᠵᠣᠷᠢᠨ ᠪᠤᠴᠠᠬᠤ ᠳ᠋ᠤ᠌ ᠪᠣᠯᠤᠨᠠ᠃ ᠶᠠᠭᠤ ᠣᠯᠵᠤ ᠠᠪᠤᠭᠠᠳ ᠪᠤᠴᠠᠬᠤ ᠲᠤᠬᠠᠢ ᠪᠣᠳᠣᠵᠤ ᠪᠠᠢᠭᠠ ᠪᠢᠯᠡ ᠭᠡᠵᠦ ᠭᠡᠨᠡᠳᠲᠡ ᠰᠠᠨᠵᠢ ᠭᠠᠪᠵᠤ ᠥᠪᠡᠷ ᠡᠴᠡ ᠪᠡᠨ ᠠᠰᠠᠭᠤᠯᠠ᠃ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠠᠰᠠᠭᠤᠯᠲᠠ ᠳ᠋ᠤ᠌ ᠲᠡᠷᠡ ᠥᠪᠡᠷ ᠢ᠋ᠶ᠋ᠡᠨ ᠬᠠᠷᠢᠭᠤᠯᠠᠬᠤ ᠳ᠋ᠤ᠌ ᠪᠠᠨ ᠶᠡᠬᠡ ᠯᠡ ᠶᠠᠳᠠᠷᠠᠳᠠᠭ ᠵᠠᠩᠰᠢᠯ ᠲᠠᠢ ᠪᠣᠯᠵᠠᠢ᠃ ᠥᠪᠡᠷ ᠡᠴᠡ ᠪᠡᠨ ᠥᠪᠡᠷ ᠢ᠋ᠶ᠋ᠡᠨ ᠬᠠᠷᠢᠭᠤᠯᠵᠤ ᠴᠢᠳᠠᠬᠤ ᠪᠠᠷ ᠦᠭᠡᠢ ᠲᠡᠢᠮᠦ ᠠᠰᠠᠭᠤᠯᠲᠠ ᠠᠰᠠᠭᠤᠳᠠᠭ ᠪᠣᠯᠵᠤ ᠡᠬᠢᠯᠡᠭᠰᠡᠨ ᠨᠢ ᠭᠠᠪᠵᠤ ᠶ᠋ᠢᠨ ᠳᠡᠮᠵᠢᠶᠡ ᠪᠠᠷᠢᠭᠰᠠᠨ ᠠ᠋ᠴᠠ ᠬᠣᠢᠰᠢ ᠶᠤᠮ᠃ ᠭᠠᠪᠵᠤ ᠶ᠋ᠢᠨ ᠳᠠᠮᠵᠢᠶᠠ ᠶ᠋ᠢ ᠰᠠᠢᠨ ᠪᠠᠷᠢᠭᠰᠠᠨ ᠠ᠋ᠴᠠ ᠬᠣᠢᠰᠢ ᠢᠯᠡᠷᠬᠡᠢ ᠠᠢᠮᠠᠭ ᠰᠠᠪᠠ᠂ ᠰᠤᠳᠤᠷ ᠤ᠋ᠨ ᠠᠢᠮᠠᠭ ᠰᠠᠪᠠ᠂ ᠸᠢᠨᠠᠢ ᠶ᠋ᠢᠨ ᠠᠢᠮᠠᠭ ᠰᠠᠪᠠ ᠶ᠋ᠢ ᠦᠵᠡᠨ ᠳᠠᠭᠤᠰᠬᠠᠭᠠᠳ ᠵᠢᠷᠤᠬᠠᠢ ᠲᠠᠷᠨᠢ ᠶ᠋ᠢᠨ ᠨᠣᠮ ᠢ᠋ ᠭᠦᠢᠴᠡᠭᠡᠵᠡᠢ᠃ ᠣᠲᠠᠴᠢ ᠮᠠᠨᠠᠯ ᠤ᠋ᠨ ᠤᠬᠠᠭᠠᠨ᠂ ᠣᠷᠣᠨ ᠬᠡᠢᠳ ᠢ᠋ ᠪᠣᠰᠬᠠᠬᠤ ᠶᠣᠰᠣᠨ ᠬᠣᠶᠠᠷ ᠰᠠᠨᠵᠢ ᠭᠠᠪᠵᠤ ᠶ᠋ᠢᠨ ᠢᠯᠡᠭᠦᠦ ᠰᠣᠨᠢᠷᠬᠠᠳᠠᠭ ᠨᠣᠮ ᠪᠣᠯᠤᠭᠰᠠᠨ ᠢ᠋ ᠵᠢᠭ᠌ᠳᠠᠭᠠᠨ ᠤ᠋ ᠬᠢᠨ ᠡᠴᠡ ᠴᠣᠭᠰᠣᠩ ᠨᠠᠢᠵᠠ ᠨᠢ ᠢᠯᠡᠭᠦᠦ ᠰᠠᠢᠨ ᠮᠡᠳᠡᠵᠦ ᠪᠠᠢᠯᠠ᠃ 《ᠴᠡᠭᠡᠵᠢ ᠶ᠋ᠢ ᠮᠢᠨᠢ ᠪᠦᠷᠢᠨ ᠪᠡᠲᠡᠭᠢᠷᠡᠲᠡᠯᠡ ᠳᠦᠭᠦᠷᠦᠭᠰᠡᠨ ᠬᠣᠭᠣᠰᠣᠨ ᠴᠢᠨᠠᠷ ᠤ᠋ᠨ ᠨᠣᠮ ᠢ᠋ᠶ᠋ᠠᠷ ᠬᠥᠭᠡᠷᠦᠬᠦᠢ ᠡᠴᠢᠭᠡ᠂ ᠡᠬᠡ ᠬᠣᠶᠠᠷ ᠶᠠᠭᠤ ᠶ᠋ᠢ ᠪᠡᠨ ᠬᠢᠨᠡ ᠳᠡ᠃ ᠬᠠᠷᠢᠨ ᠪᠢᠯᠢᠭ ᠴᠢᠨᠠᠷ ᠤ᠋ᠨ ᠨᠣᠮ ᠦᠵᠡᠵᠦ᠂ ᠮᠡᠰᠡ ᠵᠠᠰᠠᠯ᠂ ᠶᠢᠨᠵᠠᠡᠭ᠂ ᠳᠣᠨᠵᠠᠡᠭ ᠦ᠋ᠨ ᠲᠠᠯᠠ ᠶ᠋ᠢᠨ ᠶᠠᠭᠤᠮᠠ ᠪᠠᠷ ᠡᠪ ᠳᠦᠢᠲᠡᠢ ᠪᠣᠯᠪᠠᠯ ᠠᠷᠠᠢ ᠳᠡᠭᠡᠷᠡ ᠦᠭᠡᠢ ᠤᠤ?》 ᠭᠡᠵᠦ ᠪᠡᠷᠢᠮᠦᠭ ᠡᠮᠡᠭᠡᠨ ᠠᠮᠢᠰᠬᠤᠭᠠᠳᠠᠭᠰᠠᠨ ᠰᠥᠭᠡᠩᠭᠢ ᠳᠠᠭᠤᠨ ᠢ᠋ᠶ᠋ᠠᠷ ᠬᠡᠯᠡᠭᠡᠳ ᠭᠠᠷ ᠳᠡᠭᠡᠷᠡ ᠨᠢ ᠨᠠᠰᠤᠨ ᠬᠤᠲᠤᠭ ᠪᠣᠯᠤᠭᠰᠠᠨ ᠢ᠋ ᠡᠨᠡ ᠮᠥᠴᠡ ᠳ᠋ᠦ᠍ ᠳᠠᠬᠢᠭᠠᠳ ᠯᠠ ᠰᠠᠨᠵᠢ ᠡᠷᠭᠢᠨ ᠰᠠᠨᠠᠯᠠ᠃ ᠬᠡᠳᠦᠬᠡᠨ ᠵᠢᠯ ᠦ᠋ᠨ ᠡᠮᠦᠨᠡ ᠲᠡᠷᠡ ᠡᠮᠡᠭᠡᠨ ᠶᠢᠷᠲᠢᠨᠴᠦ ᠶ᠋ᠢ ᠣᠷᠬᠢᠭᠰᠠᠨ᠃ ᠲᠡᠭᠦᠨ ᠡᠴᠡ ᠬᠣᠢᠰᠢ ᠰᠠᠨᠵᠢ ᠶᠡᠬᠡ ᠯᠡ ᠥᠨᠥᠴᠢᠷᠡᠭᠰᠡᠨ ᠢ᠋ᠶ᠋ᠡᠨ ᠪᠠᠢᠩᠭᠤ ᠮᠡᠳᠡᠷᠡᠵᠦ ᠪᠠᠢᠯᠠ᠃ 《ᠠᠨᠢᠭ ᠭᠣᠮᠪᠣ ᠳ᠋ᠠᠭᠠᠨ ᠣᠴᠢᠵᠤ ᠪᠣᠱᠣᠭᠠ ᠪᠠᠷ ᠨᠢ ᠠᠯᠬᠤᠭᠠᠳ ᠯᠠ ᠨᠢᠳᠦ ᠠᠨᠢᠬᠤ ᠶᠤᠮᠰᠠᠨ ᠳᠠ!》 ᠭᠡᠵᠦ ᠪᠡᠷᠢᠮᠦᠭ ᠡᠮᠡᠭᠡᠨ ᠬᠡᠴᠢᠨᠡᠨ ᠴᠦ᠍ ᠣᠯᠠᠨ ᠤᠳᠠᠭᠠ ᠰᠠᠨᠠᠭᠠᠰᠢᠷᠠᠨ ᠬᠡᠯᠡᠵᠦ ᠪᠠᠢᠪᠠ ᠳᠠ ᠃ ᠲᠡᠷᠡ ᠪᠦᠬᠦᠨ ᠢ᠋ ᠨᠢ ᠭᠦᠢᠴᠡᠯᠳᠦᠭᠦᠯᠵᠦ ᠠᠮᠵᠢᠯ ᠦᠭᠡᠢ ᠲᠡᠭᠦᠨ ᠢ᠋ ᠨᠠᠰᠤ ᠪᠠᠨ ᠶᠡᠭᠦᠯᠡᠬᠦ ᠶ᠋ᠢ ᠨᠢ ᠬᠠᠷᠠᠭᠰᠠᠨ ᠳ᠋ᠠᠭᠠᠨ ᠰᠠᠨᠵᠢ ᠶᠡᠬᠡᠳᠡ ᠭᠡᠮᠰᠢᠳᠡᠭ ᠪᠠᠢᠯᠠ᠃ ᠬᠡᠳᠦᠨ ᠵᠢᠯ ᠦ᠋ᠨ ᠡᠮᠦᠨᠡ ᠠᠩᠬᠠ ᠤᠳᠠᠭᠠ ᠪᠡᠷᠢᠮᠦᠭ ᠡᠮᠡᠭᠡᠨ ᠢ᠋ ᠲᠡᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠨᠢ ᠰᠠᠨᠵᠢ ᠶᠡᠬᠡ ᠭᠠᠢᠬᠠᠵᠤ ᠪᠢᠯᠡ᠃ 《ᠠᠨᠢᠭ ᠭᠣᠮᠪᠣ ᠭᠡᠵᠦ ᠡᠪᠦᠭᠡᠨ ᠨᠢ ᠯᠡ ᠶᠦ᠍ᠮ ᠪᠠᠢᠬᠠ ᠳᠠ᠃ ᠬᠠᠮᠢᠭᠠ ᠪᠠᠢᠳᠠᠭ ᠶᠤᠮ ᠪᠣᠯ?》 ᠭᠡᠮᠡᠨ ᠤᠳᠠᠲᠠᠯᠠ ᠡᠷᠡᠭᠡᠯᠵᠡᠵᠦ ᠪᠢᠯᠡ᠃ ᠲᠡᠭᠡᠭᠡᠳ ᠨᠢᠭᠡ ᠤᠳᠠᠭᠠ ᠲᠡᠰᠴᠦ ᠴᠢᠳᠠᠭᠰᠠᠨ ᠦᠭᠡᠢ 《ᠡᠮᠡᠭᠡ᠂ ᠠᠨᠢᠭ ᠭᠣᠮᠪᠣ ᠭᠤᠸᠠᠢ ᠬᠠᠮᠢᠭᠠ ᠰᠠᠭᠤᠳᠠᠭ ᠶᠤᠮ ᠪᠣᠢ? 》ᠭᠡᠵᠦ ᠠᠰᠠᠭᠤᠴᠢᠬᠠᠭᠰᠠᠨ ᠴᠢᠨᠢ ᠪᠡᠷᠢᠮᠦᠭ ᠡᠮᠡᠭᠡᠨ ᠡᠯᠢᠭᠡ ᠪᠡᠨ ᠬᠥᠰᠢᠲᠡᠯᠡ ᠢᠨᠢᠶᠡᠵᠦ ᠪᠢᠯᠡ᠃ 《ᠶᠡᠬᠡ ᠬᠣᠯᠠ ᠪᠣᠢ!》 ᠭᠡᠰᠡᠨ ᠬᠠᠷᠢᠭᠤ ᠪᠠᠷ ᠪᠡᠷᠢᠮᠦᠭ ᠡᠮᠡᠭᠡᠨ ᠢᠨᠢᠶᠡᠳᠦ ᠪᠡᠨ ᠪᠠᠷᠢᠭᠰᠠᠨ ᠶᠤᠮᠰᠠᠨ᠃ ᠲᠡᠭᠦᠨ ᠡᠴᠡ ᠬᠣᠢᠰᠢ ᠰᠠᠨᠵᠢ ᠲᠡᠷᠡ ᠬᠦ᠌ ᠪᠡᠷᠢᠮᠦᠭ ᠡᠮᠡᠭᠡᠨ ᠦ᠌ ᠡᠪᠦᠭᠡᠨ ᠨᠢ ᠠᠨᠢᠭ ᠭᠣᠮᠪᠣ ᠭᠡᠳᠡᠭ ᠬᠥᠮᠦᠨ ᠪᠠᠢᠳᠠᠭ ᠭᠡᠵᠦ ᠪᠦᠷᠢᠨ ᠢᠲᠡᠭᠡᠴᠢᠬᠡᠵᠡᠢ᠃ 《ᠶᠠᠭᠠᠬᠢᠵᠤ ᠡᠨᠡ ᠬᠥᠭᠡᠷᠦᠬᠦᠢ ᠡᠮᠡᠭᠡᠨ ᠢ᠋ ᠠᠯᠤᠰ ᠬᠣᠯᠠ ᠪᠠᠢᠭᠠ ᠡᠪᠦᠭᠡᠨ ᠲᠡᠢ ᠨᠢ ᠠᠭᠤᠯᠵᠠᠭᠤᠯᠳᠠᠭ ᠶᠤᠮ ᠪᠢᠯᠡ ᠳᠠ?》 ᠭᠡᠵᠦ ᠦᠶᠡ ᠦᠶᠡ ᠪᠣᠳᠣᠬᠤ ᠪᠣᠯᠤᠯᠠ᠃ ᠲᠡᠭᠡᠲᠡᠯᠡ ᠨᠢᠭᠡ ᠶᠡᠬᠡ ᠤᠳᠠᠭᠰᠠᠨ ᠦᠭᠡᠢ ᠪᠡᠷᠢᠮᠦᠭ ᠡᠮᠡᠭᠡᠨ ᠬᠡᠪᠲᠡᠷᠢ ᠳ᠋ᠦ᠍ ᠣᠷᠣᠪᠠ᠃ ᠡᠳᠦᠷ ᠬᠣᠨᠣᠭ ᠢ᠋ᠶ᠋ᠠᠷ ᠪᠡᠶᠡ ᠨᠢ ᠮᠠᠭᠤᠳᠠᠵᠤ ᠡᠬᠢᠯᠡᠪᠡ᠃ ᠰᠠᠨᠵᠢ ᠠᠷᠭᠠ ᠪᠠᠨ ᠪᠠᠷᠠᠬᠤ ᠳ᠋ᠤ᠌ ᠪᠠᠨ ᠫᠦᠷᠪᠦᠳᠣᠨᠣᠢ ᠮᠠᠷᠠᠮᠪᠠ ᠶ᠋ᠢ ᠨᠢᠭᠡ ᠡᠳᠦᠷ ᠵᠠᠯᠠᠵᠤ ᠭᠡᠷ ᠲᠦ᠍ ᠪᠡᠨ ᠠᠪᠠᠴᠢᠭᠰᠠᠨ ᠴᠢᠨᠢ ᠪᠡᠷᠢᠮᠦᠭ ᠡᠮᠡᠭᠡᠨ ᠴᠢᠩ ᠳ᠋ᠡᠭᠡᠨ ᠲᠤᠯᠲᠠᠯᠠ ᠠᠭᠤᠷᠯᠠᠵᠤ᠂ ᠮᠠᠷᠠᠮᠪᠠ ᠶ᠋ᠢ ᠬᠥᠭᠡᠭᠡᠨ ᠭᠠᠷᠭᠠᠵᠠᠢ᠃ ᠪᠡᠷᠢᠮᠦᠭ ᠡᠮᠡᠭᠡᠨ᠂
— ᠵᠣᠷ ᠮᠡᠳᠡᠳᠡᠭ ᠯᠠᠮᠠ ᠠ᠋ᠴᠠ ᠵᠣᠪᠠᠯᠠᠩ ᠦᠵᠡᠭᠰᠡᠨ ᠴᠢᠪᠠᠭᠠᠨᠴᠠ ᠳᠡᠭᠡᠷᠡ ᠭᠡᠵᠦ ᠦᠭᠡ ᠲᠡᠢ ᠶᠦᠮ᠃ ᠡᠨᠡ ᠦᠯᠦ ᠬᠠᠯᠵᠠᠨ ᠮᠠᠷᠠᠮᠪᠠ ᠪᠠᠷ ᠶᠠᠭᠤ ᠪᠠᠨ ᠬᠢᠨᠡ? ᠭᠡᠵᠦ ᠠᠭᠤᠷᠯᠠᠪᠠ᠃
— ᠰᠠᠢᠨ ᠮᠠᠷᠠᠮᠪᠠ ᠭᠡᠳᠡᠭ ᠪᠣᠯᠬᠣᠷ ᠯᠠ ᠲᠠᠨ ᠢ᠋ ᠡᠳᠡᠭᠡᠷᠡᠭᠦᠯᠬᠦ ᠪᠡᠷ ᠵᠠᠯᠠᠭᠰᠠᠨ ᠶᠤᠮ ᠳᠠ ᠭᠡᠵᠦ ᠰᠠᠨᠵᠢ ᠬᠡᠯᠡᠲᠡᠯᠡ ᠪᠡᠷᠢᠮᠦᠭ ᠡᠮᠡᠭᠡᠨ ᠪᠦᠷ ᠴᠦ᠍ ᠠᠭᠤᠷᠯᠠᠵᠤ᠂
— ᠮᠠᠷᠠᠮᠪᠠ᠂ ᠳᠣᠣᠷᠠᠮᠪᠠ ᠳ᠋ᠤ᠌ ᠪᠢ ᠰᠦᠵᠢᠭ ᠪᠠᠭᠤᠷᠠᠭᠰᠠᠨ ᠬᠥᠮᠦᠨ᠃ ᠬᠣᠭᠣᠰᠣᠨ ᠴᠢᠨᠠᠷ ᠤ᠋ᠨ ᠨᠣᠮ ᠢ᠋ᠶ᠋ᠠᠷ ᠪᠡᠲᠡᠭᠢᠷᠡᠴᠢᠬᠡᠭᠰᠡᠨ ᠠᠮᠢᠲᠠᠳ ᠪᠠᠢᠳᠠᠭ ᠶᠤᠮ᠃ ᠮᠠᠷᠠᠮᠪᠠ ᠵᠠᠯᠠᠭᠰᠠᠨ ᠳ᠋ᠤ᠌ ᠣᠷᠣᠪᠠᠯ ᠴᠢ ᠨᠠᠳᠠ ᠳ᠋ᠤ᠌ ᠡᠭᠡᠵᠡᠭᠡᠢ ᠮᠥᠭᠥ ᠨᠢᠭᠡ ᠰᠢᠷᠬᠡᠭ ᠢ᠋ ᠣᠯᠤᠭᠠᠳ ᠥᠭ! ᠭᠡᠵᠦ ᠱᠠᠭᠠᠷᠳᠠᠵᠠᠢ᠃ ᠰᠠᠨᠵᠢ ᠲᠡᠷᠡ ᠮᠥᠭᠥ ᠶ᠋ᠢ ᠣᠯᠬᠤ ᠶ᠋ᠢ ᠵᠠᠪᠳᠤᠨ ᠵᠠᠬᠠ ᠤᠷᠤᠭᠤ ᠶᠠᠪᠤᠬᠤ ᠪᠣᠯᠤᠭᠰᠠᠨ ᠳ᠋ᠤ᠌ ᠡᠮᠡᠭᠡᠨ᠂
— ᠡᠭᠡᠵᠡᠭᠡᠢ ᠮᠥᠭᠥ ᠶ᠋ᠢ ᠡᠨᠡᠳᠬᠡᠭ ᠭᠠᠵᠠᠷ ᠠ᠋ᠴᠠ ᠠᠪᠴᠢᠷᠠᠳᠠᠭ ᠶᠤᠮ᠃ ᠫᠡᠸ᠋ᠪᠡᠸ ᠨᠠᠷ ᠠ᠋ᠴᠠ ᠬᠠᠢ! ᠭᠡᠵᠦ ᠵᠠᠬᠢᠪᠠ᠃ ᠰᠠᠨᠵᠢ ᠲᠡᠷᠡ ᠳᠣᠣᠷᠠ ᠪᠠᠨ ᠵᠠᠬᠠ ᠣᠷᠣᠵᠤ ᠴᠠᠭᠠᠨ ᠣᠷᠬᠢᠮᠵᠢ ᠨᠥᠮᠥᠷᠦᠭᠰᠡᠨ ᠫᠡᠸ᠋ᠪᠡᠸ ᠨᠠᠷ ᠪᠤᠶᠤ ᠢᠨᠳᠣᠣ ᠤ᠋ᠳ ᠢ᠋ ᠬᠠᠢᠵᠤ ᠣᠯᠤᠭᠠᠳ ᠡᠭᠡᠵᠡᠭᠡᠢ ᠮᠥᠭᠥ ᠭᠡᠭᠴᠢ ᠶ᠋ᠢ ᠰᠤᠷᠠᠭᠯᠠᠭᠰᠠᠭᠠᠷ ᠪᠠᠢᠵᠤ ᠬᠣᠶᠠᠷ ᠭᠤᠷᠪᠠᠨ ᠰᠢᠷᠬᠡᠭ ᠮᠥᠭᠥ ᠣᠯᠵᠤ ᠠᠪᠴᠢᠷᠠᠭᠰᠠᠨ ᠶᠤᠮᠰᠠᠨ᠃
— ᠠᠰᠢᠭᠦᠢ᠂ ᠡᠨᠡ ᠮᠥᠭᠥ ᠴᠢᠨᠢ ᠯᠡ ᠨᠠᠳᠠ ᠳ᠋ᠤ᠌ ᠲᠤᠰᠠ ᠪᠣᠯᠤᠨᠠ᠃ ᠲᠡᠭᠦᠨ ᠡᠴᠡ ᠪᠢᠰᠢ ᠲᠦᠮᠡᠨ ᠮᠠᠷᠠᠮᠪᠠ ᠪᠠᠢᠭᠠᠳ ᠨᠡᠮᠡᠷᠢ ᠦᠭᠡᠢ ᠭᠡᠵᠦ ᠪᠡᠷᠢᠮᠦᠭ ᠡᠮᠡᠭᠡᠨ ᠪᠠᠶᠠᠷᠯᠠᠵᠤ ᠪᠢᠯᠡ᠃ ᠲᠡᠷᠡ ᠮᠥᠭᠥ ᠶ᠋ᠢ ᠤᠰᠤᠨ ᠳ᠋ᠤ᠌ ᠤᠬᠢᠶᠠᠭᠠᠳ ᠨᠢᠭᠡ ᠠᠶᠠᠭᠠ ᠰᠦᠨ ᠳᠣᠲᠣᠷᠠ ᠬᠢᠵᠦ ᠬᠡᠳᠦᠨ ᠴᠠᠭ ᠥᠩᠭᠡᠷᠡᠬᠦ ᠳ᠋ᠦ᠍ ᠰᠦ ᠨᠢ ᠠᠶᠠᠨᠳᠠᠭᠠᠨ ᠲᠠᠷᠠᠭ ᠪᠣᠯᠤᠨ ᠪᠦᠷᠢᠯᠳᠦᠵᠦ ᠣᠷᠬᠢᠳᠠᠭ ᠠᠵᠢ᠃ ᠪᠦᠷᠢᠯᠳᠦᠭᠰᠡᠨ ᠲᠠᠷᠠᠭ ᠢ᠋ ᠤᠤᠭᠤᠭᠠᠳ ᠳᠠᠬᠢᠭᠠᠳ ᠯᠠ ᠰᠦᠨ ᠳ᠋ᠦ᠍ ᠬᠢᠵᠦ ᠲᠠᠯᠪᠢᠬᠤ ᠳ᠋ᠤ᠌ ᠲᠡᠷᠡ ᠰᠦ ᠮᠥᠨ ᠯᠡ ᠲᠠᠷᠠᠭ ᠪᠣᠯᠤᠨ ᠪᠦᠷᠢᠯᠳᠦᠨᠡ᠃ ᠡᠢᠨ ᠬᠦ᠌ ᠪᠡᠷᠢᠮᠦᠭ ᠡᠮᠡᠭᠡᠨ ᠬᠡᠳᠦᠨ ᠰᠠᠷᠠ ᠶ᠋ᠢᠨ ᠲᠤᠷᠰᠢ ᠭᠠᠭᠴᠠᠬᠦ ᠡᠭᠡᠵᠡᠭᠡᠢ ᠮᠥᠭᠥ ᠪᠡᠷ ᠪᠦᠷᠢᠭᠰᠡᠨ ᠲᠠᠷᠠᠭ ᠢ᠋ᠶ᠋ᠠᠷ ᠬᠣᠭᠣᠯᠠᠯᠠᠵᠤ ᠪᠡᠶᠡ ᠨᠢ ᠨᠡᠯᠢᠶᠡᠳ ᠬᠥᠩᠭᠡᠷᠡᠵᠦ ᠤᠬᠠᠭᠠᠨ ᠰᠠᠨᠠᠭᠠ ᠨᠢ ᠰᠠᠷᠠᠭᠤᠯ ᠪᠣᠯᠵᠤ ᠪᠢᠯᠡ᠃ ᠪᠡᠷᠢᠮᠦᠭ ᠡᠮᠡᠭᠡᠨ᠂
— ᠨᠠᠮᠠᠶ᠋ᠢ ᠵᠢᠵᠢᠭᠬᠡᠨ ᠬᠥᠬᠥᠯ ᠰᠤᠨᠵᠢᠭᠤ ᠲᠠᠢ ᠥᠬᠢᠨ ᠪᠠᠢᠬᠤ ᠲᠡᠷᠡ ᠡᠷᠲᠡ ᠶ᠋ᠢᠨ ᠴᠠᠭ ᠲᠤ᠌ ᠶᠤᠮᠰᠠᠨ᠃ ᠬᠥᠭᠡᠷᠦᠬᠦᠢ ᠡᠬᠡ ᠮᠢᠨᠢ ᠨᠠᠰᠤ ᠡᠴᠦᠰᠯᠡᠬᠦ ᠶ᠋ᠢᠨ ᠢ᠋ᠶ᠋ᠡᠨ ᠳᠠᠪᠠᠭᠠᠨ ᠳᠡᠭᠡᠷᠡ ᠨᠠᠳᠠ ᠳ᠋ᠤ᠌ ᠵᠠᠬᠢᠵᠤ ᠪᠢᠯᠡ᠃ 《ᠣᠳᠣ ᠡᠬᠡ ᠴᠢᠨᠢ ᠲᠡᠰᠦᠰᠢ ᠦᠭᠡᠢ ᠨᠢ ᠪᠣᠯᠤᠯᠲᠠᠢ᠃ ᠥᠬᠢᠨ ᠴᠢᠮᠠ ᠳ᠋ᠤ᠌ ᠮᠢᠨᠢ ᠬᠠᠨᠢ ᠲᠦᠰᠢᠭ ᠪᠣᠯᠬᠤ ᠬᠥᠮᠦᠨ ᠪᠠᠢᠬᠤ ᠦᠭᠡᠢ᠃ ᠡᠴᠢᠭᠡ ᠴᠢᠨᠢ ᠪᠤᠷᠬᠠᠨ ᠤ᠋ ᠣᠷᠣᠨ ᠬᠦᠷᠬᠦ ᠪᠡᠷ ᠭᠤᠷᠪᠠᠨ ᠵᠢᠯ ᠦ᠋ᠨ ᠡᠮᠦᠨᠡ ᠲᠥᠪᠡᠳ ᠤᠷᠤᠭᠤ ᠶᠠᠪᠤᠭᠠᠳ ᠰᠤᠷᠠᠭ ᠦᠭᠡᠢ ᠪᠣᠯᠤᠭᠰᠠᠨ᠃ ᠮᠥᠷᠭᠥᠯᠴᠢᠨ ᠳᠠᠭᠠᠵᠤ ᠲᠥᠪᠡᠳ ᠣᠷᠣᠪᠠᠯ ᠡᠴᠢᠭᠡ ᠲᠡᠢ ᠪᠡᠨ ᠠᠭᠤᠯᠵᠠᠵᠤ ᠶᠠᠭᠤᠨ ᠮᠠᠭᠠᠳ᠃ ᠡᠴᠢᠭᠡ ᠲᠡᠢ ᠪᠡᠨ ᠠᠭᠤᠯᠵᠠᠪᠠᠯ ᠤᠲᠠᠢ᠂ ᠭᠦᠮᠪᠦᠮ᠂ ᡀᠠᠰᠠ ᠶ᠋ᠢᠨ ᠶᠡᠬᠡ ᠪᠤᠷᠬᠠᠨ ᠰᠢᠲᠦᠭᠡᠨ ᠳ᠋ᠦ᠍ ᠮᠥᠷᠭᠥᠵᠦ᠂ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠲᠥᠯᠥᠭᠡ ᠪᠤᠶᠠᠨ ᠦᠢᠯᠡᠳ》 ᠭᠡᠵᠦ ᠬᠡᠯᠡᠭᠡᠳ ᠵᠡᠰ ᠭᠣᠣ ᠲᠠᠢ ᠰᠠᠬᠢᠭᠤᠰᠤ ᠪᠠᠨ ᠡᠬᠡ ᠮᠢᠨᠢ ᠨᠠᠳᠠ ᠳ᠋ᠤ᠌ ᠬᠦᠵᠦᠭᠦᠨ ᠡᠴᠡ ᠪᠡᠨ ᠠᠪᠴᠤ ᠥᠭᠭᠦᠭᠰᠡᠨ ᠶᠤᠮᠰᠠᠨ᠃ ᠲᠡᠭᠡᠭᠡᠳ ᠯᠡ ᠬᠥᠭᠡᠷᠦᠬᠦᠢ ᠡᠬᠡ ᠮᠢᠨᠢ ᠥᠩᠭᠡᠷᠡᠭᠰᠡᠨ᠃ ᠪᠢ ᠭᠡᠳᠡᠭ ᠠᠮᠢᠲᠠᠨ ᠡᠬᠡ ᠶ᠋ᠢᠨ ᠵᠠᠬᠢᠭᠰᠠᠨ ᠢ᠋ᠶ᠋ᠠᠷ ᠮᠥᠷᠭᠥᠯᠴᠢᠨ ᠳᠠᠭᠠᠵᠤ᠂ ᠲᠦᠮᠡᠨ ᠭᠠᠵᠠᠷ ᠢ᠋ ᠲᠤᠭᠤᠯᠤᠨ ᠪᠤᠷᠬᠠᠨ ᠤ᠋ ᠣᠷᠣᠨ ᠭᠡᠭᠳᠡᠭᠰᠡᠨ ᠡᠨᠡ ᠲᠥᠪᠡᠳ ᠭᠠᠵᠠᠷ ᠢᠷᠡᠵᠦ ᠪᠢᠯᠡ᠃ ᠲᠡᠭᠦᠨ ᠡᠴᠡ ᠬᠣᠢᠰᠢ ᠶᠠᠭ ᠵᠢᠷᠠᠨ ᠵᠢᠯ᠂ ᠨᠢᠭᠡ ᠷᠠᠪᠵᠤᠩ ᠥᠩᠭᠡᠷᠡᠯᠡ᠃ ᠡᠴᠢᠭᠡ ᠪᠡᠨ ᠴᠦ᠍ ᠣᠯᠤᠭᠰᠠᠨ ᠦᠭᠡᠢ᠃ ᠪᠤᠶᠠᠨ ᠴᠤ᠌ ᠦᠢᠯᠡᠳᠴᠦ ᠴᠢᠳᠠᠭᠰᠠᠨ ᠦᠭᠡᠢ᠃ ᠨᠢᠭᠡ ᠪᠡᠶᠡ ᠪᠡᠨ ᠡᠯᠡᠭᠡᠵᠦ ᠳᠠᠭᠤᠰᠤᠯᠠ᠃ ᠰᠡᠭᠦᠯ ᠳ᠋ᠦ᠍ ᠬᠠᠯᠬᠠ ᠮᠢᠴᠠᠭ ᠦ᠋ᠨ ᠬᠢᠨ ᠡᠴᠡ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠰᠤᠷᠠᠭ ᠢ᠋ ᠭᠠᠷᠭᠠᠭᠰᠠᠨ᠃ ᠡᠴᠢᠭᠡ ᠮᠢᠨᠢ ᠤᠭᠤᠯᠢᠨ ᠲᠣᠯᠣᠭᠠᠢ ᠲᠠᠢ ᠬᠥᠮᠦᠨ ᠪᠠᠢᠵᠠᠢ᠃ ᠲᠡᠭᠦᠨ ᠳ᠋ᠦ᠍ ᠨᠢ ᠲᠥᠪᠡᠳ ᠦ᠋ᠳ ᠰᠢᠨᠤᠭᠠᠳ ᠬᠥᠭᠡᠷᠦᠬᠦᠢ ᠡᠴᠢᠭᠡ ᠶ᠋ᠢ ᠮᠢᠨᠢ ᠪᠦᠷᠢᠯᠭᠡᠵᠦ ᠣᠷᠬᠢᠭᠰᠠᠨ ᠶᠤᠮ ᠭᠡᠨᠡ ᠯᠠᠢ᠃ ᠡᠴᠢᠭᠡ ᠶ᠋ᠢᠨ ᠭᠠᠪᠠᠯᠠ ᠶ᠋ᠢᠨ ᠶᠠᠰᠤ ᠪᠠᠷ ᠠᠶᠠᠭᠠ ᠬᠢᠵᠦ ᠯᠠᠪᠷᠠᠩ ᠬᠡᠢᠳ ᠦ᠋ᠨ ᠬᠠᠩᠪᠤ ᠳ᠋ᠤ᠌ ᠡᠷᠭᠦᠬᠦ ᠭᠡᠵᠦ ᠲᠡᠢᠮᠦ ᠮᠠᠭᠤᠬᠠᠢ ᠬᠡᠷᠡᠭ ᠬᠢᠭᠰᠡᠨ ᠢ᠋ ᠮᠡᠳᠡᠭᠡᠳ ᠨᠠᠳᠠ ᠳ᠋ᠤ᠌ ᠲᠥᠪᠡᠳ ᠭᠠᠵᠠᠷ ᠠᠷᠢᠭᠤᠨ ᠨᠠᠨᠳᠢᠨ ᠶᠠᠭᠤᠮᠠ ᠪᠠᠢᠬᠤ ᠦᠭᠡᠢ ᠪᠣᠯᠵᠤ᠂ ᠭᠤᠲᠤᠷᠠᠬᠤ ᠶ᠋ᠢᠨ ᠡᠷᠬᠡᠨ ᠳ᠋ᠦ᠍ ᠰᠢᠮᠨᠠᠨᠼ ᠤ᠋ᠨ ᠰᠠᠬᠢᠯ ᠬᠦᠷᠲᠡᠭᠡᠳ ᠠᠨᠢᠭ ᠭᠣᠮᠪᠣ ᠳ᠋ᠤ᠌ ᠰᠠᠭᠤᠭᠰᠠᠨ ᠶᠤᠮ ᠳᠠ》 ᠭᠡᠵᠦ ᠶᠠᠷᠢᠭᠰᠠᠨ ᠦᠭᠡ ᠪᠣᠯᠭᠠᠨ ᠨᠢ ᠰᠠᠨᠵᠢ ᠭᠠᠪᠵᠤ ᠶ᠋ᠢᠨ ᠴᠢᠬᠢᠨ ᠳ᠋ᠦ᠍ ᠣᠳᠣ ᠴᠤ᠌ ᠲᠣᠳᠣᠬᠠᠨ ᠰᠣᠨᠣᠰᠤᠭᠳᠠᠬᠤ ᠰᠢᠭ᠋ ᠪᠣᠯᠵᠤ ᠪᠠᠢᠯᠠ᠃ ᠭᠠᠰᠢᠭᠤᠨ ᠬᠤᠪᠢ ᠲᠠᠪᠢᠯᠠᠩ ᠢ᠋ ᠡᠳ᠋ᠯᠡᠭᠰᠡᠨ ᠲᠡᠷᠡ ᠡᠮᠡᠭᠡᠨ ᠰᠠᠨᠠᠮᠰᠠᠷ ᠦᠭᠡᠢ ᠲᠣᠬᠢᠶᠠᠯᠳᠤᠯ ᠢ᠋ᠶ᠋ᠠᠷ ᠰᠠᠨᠵᠢ ᠲᠠᠢ ᠠᠭᠤᠯᠵᠠᠵᠤ᠂ ᠲᠡᠭᠦᠨ ᠢ᠋ ᠦᠬᠦᠯ ᠡᠴᠡ ᠠᠪᠤᠷᠠᠭᠠᠳ᠂ ᠳᠠᠷᠠᠭᠠ ᠪᠠᠷ ᠨᠢ ᠣᠯᠠᠨ ᠵᠢᠯ ᠲᠣᠭᠣᠭᠠ ᠶ᠋ᠢ ᠨᠢ ᠪᠠᠷᠢᠵᠤ ᠲᠥᠷᠥᠭᠦᠯᠦᠭᠰᠡᠨ ᠡᠬᠡ ᠰᠢᠭ ᠨᠢ ᠢᠵᠢᠯᠢᠳᠦᠭᠰᠡᠨ ᠶᠤᠮᠰᠠᠨ᠃ ᠶᠠᠳᠠᠭᠤ᠂ ᠡᠭᠡᠯ ᠲᠡᠷᠡ ᠡᠮᠡᠭᠡᠨ ᠦ᠌ ᠬᠠᠯᠠ ᠦᠵᠡᠵᠦ᠂ ᠬᠠᠰᠢᠷ ᠲᠠᠨᠢᠭᠰᠠᠨ ᠤᠬᠠᠭᠠᠯᠢᠭ ᠰᠡᠳᠬᠢᠯ ᠢ᠋ ᠰᠠᠨᠵᠢ ᠪᠢᠰᠢᠷᠡᠵᠦ ᠶᠠᠪᠤᠳᠠᠭ ᠪᠠᠢᠪᠠ᠃ ᠪᠠᠰᠠ ᠦᠷᠦ ᠡᠪᠡᠳᠦᠨ ᠬᠦᠨᠳᠦᠳᠬᠡᠳᠡᠭ ᠰᠠᠨ᠃
ᠡᠭᠡᠵᠡᠭᠡᠢ ᠮᠥᠭᠥ ᠪᠡᠷ ᠪᠦᠷᠢᠭᠰᠡᠨ ᠲᠠᠷᠠᠭ ᠤ᠋ᠨ ᠬᠦᠴᠦ ᠪᠡᠷ ᠪᠡᠷᠢᠮᠦᠭ ᠡᠮᠡᠭᠡᠨ ᠬᠡᠳᠦᠨ ᠰᠠᠷᠠ ᠶ᠋ᠢᠨ ᠲᠤᠷᠰᠢ ᠪᠡᠶᠡ ᠪᠡᠨ ᠡᠵᠡᠮᠳᠡᠵᠦ ᠪᠠᠢᠯᠠ᠃ ᠲᠡᠭᠡᠭᠡᠳ ᠨᠢᠭᠡᠨ ᠡᠳᠦᠷ ᠰᠠᠨᠵᠢ ᠶ᠋ᠢ ᠳᠠᠭᠤᠳᠠᠵᠤ᠂ ᠪᠢ ᠴᠦ᠍ ᠲᠡᠰᠬᠦ ᠦᠭᠡᠢ ᠨᠢ ᠰᠢᠭ ᠪᠠᠢᠨᠠ᠃ ᠴᠢᠮᠠ ᠳ᠋ᠤ᠌ ᠰᠡᠭᠦᠯᠴᠢ ᠶ᠋ᠢᠨ ᠦᠭᠡ ᠪᠡᠨ ᠬᠡᠯᠡᠶᠡ᠃ ᠴᠢᠨᠦ ᠪᠠᠭᠰᠢ ᠴᠣᠢᠮᠴᠣᠭ ᠭᠡᠯᠦᠩ ᠭᠡᠵᠦ ᠪᠠᠢᠭᠰᠠᠨ ᠪᠢᠵᠡ? ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌ ᠨᠢ ᠰᠠᠨᠵᠢ ᠭᠡᠨᠡᠳᠲᠡ ᠴᠣᠴᠢᠷᠳᠠᠨ ᠬᠠᠮᠤᠭ ᠪᠡᠶᠡ ᠨᠢ ᠴᠡᠴᠡᠷᠡᠬᠦ ᠰᠢᠭ ᠪᠣᠯᠪᠠ᠃ ᠣᠯᠠᠨ ᠵᠢᠯ ᠦ᠋ᠨ ᠲᠡᠷᠲᠡᠭᠡ ᠵᠤᠯᠠ ᠶ᠋ᠢᠨ ᠭᠣᠣᠯ ᠪᠣᠯᠤᠨ《ᠬᠠᠢᠯᠠᠭᠰᠠᠨ》 ᠪᠠᠭᠰᠢ ᠯᠠᠮᠠ ᠶ᠋ᠢᠨ ᠢ᠋ᠶ᠋ᠡᠨ ᠨᠡᠷᠡ ᠶ᠋ᠢ ᠭᠡᠨᠡᠳᠲᠡ ᠲᠡᠷᠡ ᠬᠦ᠌ ᠡᠮᠡᠭᠡᠨ ᠡᠴᠡ ᠰᠣᠨᠣᠰᠤᠨᠠ ᠭᠡᠵᠦ ᠣᠭᠲᠣ ᠰᠠᠨᠠᠭᠠ ᠦᠭᠡᠢ ᠶᠠᠪᠤᠵᠠᠢ᠃ ᠪᠡᠷᠢᠮᠦᠭ ᠡᠮᠡᠭᠡᠨ ᠴᠠᠭᠠᠰᠢ ᠨᠢ᠂
— ᠪᠠᠭᠰᠢ ᠶ᠋ᠢᠨ ᠴᠢᠨᠢ ᠲᠤᠬᠠᠢ ᠪᠢ ᠰᠣᠨᠣᠰᠤᠭᠰᠠᠨ᠃ ᠲᠡᠭᠡᠭᠡᠳ ᠴᠢᠮᠠ ᠶ᠋ᠢ ᠡᠷᠢᠵᠦ ᠣᠯᠤᠭᠰᠠᠨ ᠶᠤᠮ᠃ ᠠᠰᠢᠭᠦᠢ ᠴᠢ ᠪᠠᠭᠰᠢ ᠰᠢᠭ᠋ ᠢᠶᠠᠨ ᠰᠠᠢᠨ ᠬᠥᠮᠦᠨ ᠪᠣᠯᠵᠠᠢ᠁ ᠭᠡᠳ ᠴᠢᠮᠡᠭᠡ ᠦᠭᠡᠢ ᠬᠡᠰᠡᠭ ᠵᠠᠭᠤᠷᠠ ᠪᠣᠳᠣᠯᠭᠠᠰᠢᠷᠠᠭᠰᠠᠨ ᠢ᠋ᠶ᠋ᠠᠨ᠂
— ᠪᠠᠭᠰᠢ ᠴᠢᠨᠢ ᠴᠢᠮᠠ ᠳ᠋ᠤ᠌ ᠶᠠᠭᠤ ᠴᠤ᠌ ᠵᠠᠬᠢᠭᠠ ᠦᠭᠡᠢ ᠤᠤ? ᠭᠡᠪᠡ ᠃ ᠰᠠᠨᠵᠢ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠰᠠᠶᠢ ᠯᠠ ᠪᠦᠳᠡᠭᠢ ᠪᠡᠲᠡᠭᠢ ᠶᠠᠭᠤᠮᠠ ᠣᠷᠣᠵᠤ ᠢᠷᠡᠯᠡ᠃ ᠲᠡᠷᠡ ᠨᠢᠭᠡᠨ ᠲᠦᠭᠰᠢᠭᠦᠷᠢᠲᠡᠢ ᠬᠠᠷᠠᠩᠭᠤᠢ ᠰᠥᠨᠢ ᠯᠠᠮᠠ ᠪᠠᠭᠰᠢ ᠶ᠋ᠢᠨ ᠵᠠᠬᠢᠵᠤ ᠪᠠᠢᠭᠰᠠᠨ ᠦᠭᠡ ᠨᠢᠭᠡ ᠨᠢᠭᠡ ᠪᠡᠷ ᠢ᠋ᠶ᠋ᠡᠨ ᠰᠡᠷᠭᠦᠨ ᠲᠣᠳᠣᠷᠠᠬᠤ ᠰᠢᠭ᠋ ᠪᠣᠯᠤᠨ᠂ 《ᠪᠠᠭᠰᠢ ᠶ᠋ᠢ ᠴᠢᠨᠢ ᠬᠡᠨ ᠨᠢᠭᠡᠨ ᠬᠥᠮᠦᠨ ᠰᠤᠷᠠᠭᠯᠠᠪᠠᠯ ᠡᠭᠦᠨ ᠢ᠋ ᠥᠭᠭᠦᠭᠡᠷᠡᠢ》 ᠭᠡᠵᠦ ᠵᠠᠬᠢᠭᠰᠠᠨ ᠨᠢ ᠰᠠᠢ ᠯᠠ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠯᠠ᠃ ᠰᠠᠨᠵᠢ ᠰᠡᠳᠬᠢᠯ ᠢ᠋ᠶ᠋ᠡᠨ ᠪᠠᠷᠢᠵᠤ ᠶᠠᠳᠠᠨ᠂
— ᠪᠠᠭᠰᠢ ᠯᠠᠮᠠ ᠮᠢᠨᠢ ᠪᠤᠶᠠᠨ ᠦᠢᠯᠡᠳᠬᠦ ᠶ᠋ᠢᠨ ᠢ᠋ᠶ᠋ᠡᠨ ᠡᠮᠦᠨᠡᠬᠡᠨ ᠨᠠᠳᠠ ᠳ᠋ᠤ᠌ ᠨᠢᠭᠡ ᠵᠢᠵᠢᠭᠬᠡᠨ ᠪᠣᠭᠣᠳᠠᠯ ᠲᠠᠢ ᠶᠠᠭᠤᠮᠠ ᠥᠭᠭᠦᠭᠡᠳ 《ᠨᠠᠮᠠᠶ᠋ᠢ ᠰᠤᠷᠠᠭᠯᠠᠵᠤ ᠠᠰᠠᠭᠤᠭᠰᠠᠨ ᠬᠥᠮᠦᠨ ᠳ᠋ᠦ᠍ ᠥᠭᠭᠦᠭᠡᠷᠡᠢ》 ᠭᠡᠵᠦ ᠵᠠᠬᠢᠭᠰᠠᠨ ᠶᠤᠮ᠃ ᠲᠡᠷᠡ ᠨᠢ ᠲᠠ ᠶᠤᠮ ᠤᠤ? ᠭᠡᠵᠦ ᠠᠰᠠᠭᠤᠯᠠ᠃ ᠪᠡᠷᠢᠮᠦᠭ ᠡᠮᠡᠭᠡᠨ ᠦ᠌ ᠴᠢᠷᠠᠢ ᠳ᠋ᠤ᠌ ᠶᠡᠷᠦ ᠪᠤᠰᠤ ᠶ᠋ᠢᠨ ᠭᠡᠷᠡᠯ ᠭᠡᠭᠡ ᠲᠤᠰᠬᠤ ᠰᠢᠭ᠋ ᠪᠣᠯᠵᠤ᠂ ᠥᠩᠭᠡ ᠣᠷᠣᠨ ᠲᠤᠶᠠᠭᠠᠷᠠᠬᠤ ᠶ᠋ᠢ ᠰᠠᠨᠵᠢ ᠠᠵᠢᠵᠤ ᠮᠡᠳᠡᠪᠡ᠃ ᠡᠮᠡᠭᠡᠨ ᠡᠪᠡᠳᠴᠢᠨ ᠢ᠋ᠶ᠋ᠡᠨ ᠲᠠᠭ ᠮᠠᠷᠲᠠᠨ ᠥᠭᠡᠷᠡᠴᠢᠯᠡᠭᠳᠡᠪᠡ᠃
— ᠲᠡᠷᠡ ᠨᠢ ᠪᠢ ᠮᠥᠨ ! ᠪᠠᠭᠰᠢ ᠯᠠᠮᠠ ᠲᠠᠢ ᠴᠢᠨᠢ ᠠᠭᠤᠯᠵᠠᠵᠤ ᠴᠢᠳᠠᠭᠠ ᠦᠭᠡᠢ ᠳ᠋ᠡᠭᠡᠨ ᠪᠢ ᠭᠣᠮᠣᠳᠠᠯ ᠲᠠᠢ ᠪᠠᠢᠨᠠ᠃ ᠪᠢᠳᠡ ᠬᠣᠶᠠᠷ ᠤᠤᠯ ᠨᠢ ᠠᠨᠢᠭ ᠭᠣᠮᠪᠣ ᠳ᠋ᠤ᠌ ᠠᠭᠤᠯᠵᠠᠬᠤ ᠤᠴᠢᠷᠲᠠᠢ ᠪᠠᠢᠭᠰᠠᠨ ᠶᠤᠮ᠃ ᠴᠢᠳᠠᠭᠰᠠᠨ ᠦᠭᠡᠢ᠃ ᠬᠤᠪᠢ ᠲᠠᠪᠢᠯᠠᠩ ᠲᠡᠢᠮᠦ ᠪᠠᠢᠵᠤ ᠯᠠ ᠳᠠ᠃ ᠵᠠ ᠶᠠᠭᠠᠬᠢᠶᠠ ᠭᠡᠬᠦ ᠪᠣᠢ? ᠪᠠᠭᠰᠢ ᠯᠠᠮᠠ ᠶ᠋ᠢᠨ ᠢ᠋ᠶ᠋ᠡᠨ ᠥᠭᠭᠦᠭᠰᠡᠨ ᠶᠠᠭᠤᠮᠠ ᠶ᠋ᠢ ᠴᠢ ᠨᠠᠳᠠ ᠳ᠋ᠤ᠌ ᠦᠵᠡᠭᠦᠯᠦᠭᠡᠴᠢ! ᠭᠡᠵᠦ ᠪᠡᠷᠢᠮᠦᠭ ᠡᠮᠡᠭᠡᠨ ᠦᠭᠡ ᠪᠡᠨ ᠵᠥᠭᠡᠭᠡᠨ ᠬᠡᠯᠡᠬᠦ ᠳ᠋ᠦ᠍ ᠰᠠᠨᠵᠢ ᠤᠬᠤᠰᠬᠢᠨ ᠪᠣᠰᠴᠤ ᠭᠦᠩᠭᠠᠷᠪᠠ ᠶᠢᠨ ᠳᠣᠲᠣᠷᠠ ᠠ᠋ᠴᠠ ᠵᠢᠵᠢᠭᠬᠡᠨ ᠪᠣᠭᠣᠳᠠᠯ ᠲᠠᠢ ᠶᠠᠭᠤᠮᠠ ᠶ᠋ᠢ ᠣᠯᠵᠤ ᠠᠪᠴᠢᠷᠠᠯᠠ᠃ ᠭᠠᠷ ᠨᠢ ᠴᠡᠴᠡᠷᠡᠬᠦ ᠶ᠋ᠢ ᠥᠪᠡᠷ ᠢ᠋ᠶ᠋ᠡᠨ ᠮᠡᠳᠡᠵᠦ᠂ ᠪᠠᠭᠰᠢ ᠯᠠᠮᠠ ᠶ᠋ᠢ ᠪᠡᠨ ᠳᠤᠷᠠᠰᠤᠨ ᠪᠣᠳᠣᠯᠠ᠃ ᠲᠡᠭᠡᠭᠡᠳ ᠪᠡᠷᠢᠮᠦᠭ ᠡᠮᠡᠭᠡᠨ ᠳ᠋ᠦ᠍ ᠲᠡᠭᠦᠨ ᠢ᠋ ᠬᠣᠶᠠᠷ ᠭᠠᠷᠳᠠᠨ ᠪᠠᠷᠢᠯᠠ᠃ ᠡᠮᠡᠭᠡᠨ ᠲᠡᠭᠦᠨ ᠢ᠋ ᠮᠥᠨ ᠯᠡ ᠬᠣᠶᠠᠷ ᠭᠠᠷᠳᠠᠨ ᠠᠪᠬᠤ ᠳ᠋ᠤ᠌ ᠪᠠᠨ ᠮᠣᠢᠨᠣᠭ ᠬᠤᠷᠤᠭᠤ ᠨᠤᠭᠤᠳ ᠨᠢ ᠬᠣᠭᠣᠷᠣᠨᠳᠣ ᠪᠠᠨ ᠡᠪᠯᠡᠬᠦ ᠦᠭᠡᠢ ᠴᠡᠴᠡᠷᠡᠵᠦ ᠪᠠᠢᠬᠤ ᠶ᠋ᠢ ᠰᠠᠨᠵᠢ ᠠᠵᠢᠭᠯᠠᠪᠠ᠃ ᠡᠮᠡᠭᠡᠨ ᠨᠥᠭᠥᠭᠡᠬᠢ ᠵᠦᠢᠯ ᠢ᠋ ᠳᠤᠬᠤᠨ ᠳ᠋ᠤ᠌ ᠪᠠᠨ ᠬᠦᠷᠭᠡᠨ ᠠᠳᠢᠰ ᠠᠪᠤᠭᠠᠳ ᠬᠣᠶᠠᠷ ᠨᠢᠳᠦ ᠪᠡᠨ ᠠᠨᠢᠨ ᠬᠡᠰᠡᠭ ᠵᠠᠭᠤᠷᠠ ᠪᠣᠳᠣᠯᠭᠠᠰᠢᠷᠠᠯᠠ᠃ ᠬᠣᠯᠠ ᠶ᠋ᠢᠨ ᠶᠠᠭᠤᠮᠠ ᠶ᠋ᠢ ᠳᠤᠷᠠᠰᠤᠨ ᠪᠣᠳᠣᠵᠤ᠂ ᠣᠭᠲᠣ ᠥᠭᠡᠷᠡ ᠶᠢᠷᠲᠢᠨᠴᠦ ᠪᠡᠷ ᠲᠡᠷᠡ ᠠᠶᠠᠯᠠᠵᠤ ᠪᠠᠢᠬᠤ ᠰᠢᠭ᠋᠂ ᠡᠪᠡᠳᠴᠢᠨ ᠳ᠋ᠦ᠍ ᠨᠡᠷᠪᠡᠭᠳᠡᠭᠰᠡᠨ ᠪᠡᠶᠡ ᠪᠡᠨ ᠮᠠᠷᠲᠠᠴᠢᠬᠠᠭᠰᠠᠨ ᠮᠡᠲᠦ ᠪᠣᠯᠵᠠᠢ᠃ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠬᠣᠶᠠᠷ ᠨᠢᠳᠦᠨ ᠡᠴᠡ ᠨᠢ ᠨᠢᠯᠪᠤᠰᠤ ᠮᠡᠯᠮᠡᠷᠡᠨ ᠭᠠᠷᠴᠤ ᠦᠷᠴᠢᠯᠡᠭᠡᠲᠦ ᠬᠠᠴᠠᠷ ᠳᠡᠭᠡᠭᠦᠷ ᠨᠢ ᠮᠡᠯᠡᠷᠡᠨ ᠤᠷᠤᠰᠪᠠ᠃ 《ᠲᠠ ᠨᠠᠮᠠᠶ᠋ᠢ ᠪᠠᠨ ᠥᠷᠥᠰᠢᠶᠡᠨ ᠰᠣᠶᠣᠷᠬᠠᠭᠠᠷᠠᠢ》 ᠭᠡᠵᠦ ᠡᠮᠡᠭᠡᠨ ᠠᠮᠠᠨ ᠳᠣᠲᠣᠷᠠ ᠪᠠᠨ ᠪᠠᠷᠤᠭ ᠳᠤᠭᠤᠯᠳᠠᠬᠤ ᠦᠭᠡᠢ ᠪᠡᠷ ᠰᠢᠪᠡᠨᠡᠨ ᠬᠡᠯᠡᠪᠡ᠃ ᠯᠠᠮᠠ ᠪᠠᠭᠰᠢ ᠴᠣᠢᠮᠴᠣᠭ ᠭᠡᠯᠦᠩ ᠳ᠋ᠦ᠍ ᠨᠢ ᠬᠠᠨᠳᠤᠨ ᠬᠡᠯᠡᠵᠦ ᠪᠠᠢᠭᠠ ᠶ᠋ᠢ ᠰᠠᠨᠵᠢ ᠣᠢᠯᠠᠭᠠᠯᠠ᠃ ᠡᠮᠡᠭᠡᠨ ᠲᠡᠢᠨ ᠬᠦ᠌ ᠨᠡᠯᠢᠶᠡᠳ ᠤᠳᠠᠭᠰᠠᠨ ᠢ᠋ᠶ᠋ᠠᠨ᠂
— ᠵᠠ ᠬᠦᠦ ᠮᠢᠨᠢ᠂ ᠡᠭᠦᠨ ᠦ᠌ ᠪᠠᠷᠢᠮᠲᠠ ᠶ᠋ᠢ ᠲᠠᠢᠯᠤᠭᠠᠳ ᠬᠠᠷᠠᠭᠣᠯᠣᠭᠠᠲᠠᠭᠠᠬᠠᠴᠢ ! ᠭᠡᠵᠦ ᠭᠤᠶᠤᠯᠠ᠃ ᠰᠠᠨᠵᠢ ᠲᠡᠷᠡ ᠪᠣᠭᠣᠳᠠᠯ ᠲᠠᠢ ᠶᠠᠭᠤᠮᠠ ᠶ᠋ᠢ ᠬᠢᠴᠢᠶᠡᠩᠭᠦᠢᠯᠡᠨ ᠨᠡᠭᠡᠭᠡᠵᠦ ᠡᠮᠡᠭᠡᠨ ᠳ᠋ᠦ᠍ ᠬᠠᠷᠠᠭᠤᠯᠪᠠ᠃ ᠬᠠᠰᠢ ᠬᠠᠮᠢᠭᠠᠰᠢ ᠪᠠᠨ ᠬᠣᠶᠠᠷ ᠽᠦᠨ ᠦ᠌ ᠬᠡᠮᠵᠢᠶᠡ ᠲᠡᠢ ᠳᠥᠷᠪᠡᠯᠵᠢᠨ ᠠᠯᠲᠠ ᠠᠵᠠᠢ᠃ ᠳᠡᠭᠡᠳᠦ ᠲᠠᠯᠠ ᠶ᠋ᠢᠨ ᠬᠠᠪᠲᠠᠭᠠᠢ ᠳᠡᠭᠡᠷᠡ ᠸᠴᠢᠷ ᠰᠢᠭ᠋ ᠶᠠᠭᠤᠮᠠ ᠵᠢᠷᠤᠵᠠᠢ᠃ ᠡᠮᠡᠭᠡᠨ ᠲᠡᠭᠦᠨ ᠢ᠋ ᠢᠯᠢᠵᠦ ᠦᠵᠡᠭᠰᠡᠨ ᠢ᠋ᠶ᠋ᠡᠨ ᠳᠠᠬᠢᠨ ᠪᠠᠰᠠ ᠳᠤᠬᠤᠨ ᠳ᠋ᠤ᠌ ᠪᠠᠨ ᠬᠦᠷᠭᠡᠨ ᠠᠳᠢᠰ ᠠᠪᠤᠭᠠᠳ᠂
— ᠵᠠ ᠡᠭᠦᠨ ᠢ᠋ ᠸᠴᠢᠷ ᠵᠢᠷᠤᠭᠠᠰᠤ ᠲᠠᠢ ᠲᠠᠯᠠ ᠠ᠋ᠴᠠ ᠨᠢ ᠲᠡᠭ ᠳᠤᠮᠳᠠᠭᠤᠷ ᠨᠢ ᠬᠤᠪᠢᠶᠠᠭᠠᠳ ᠨᠢᠭᠡ ᠬᠡᠰᠡᠭ ᠢ᠋ ᠨᠢ ᠠᠨᠢᠭ ᠭᠣᠮᠪᠣ ᠳ᠋ᠤ᠌ ᠡᠷᠭᠦᠭᠡᠷᠡᠢ! ᠨᠥᠭᠦᠭᠡ ᠬᠡᠰᠡᠭ ᠢ᠋ ᠪᠠᠷᠢᠨᠲᠠᠭ ᠲᠤ᠌ ᠨᠢ ᠪᠣᠭᠣᠭᠠᠳ ᠨᠤᠲᠤᠭ ᠲᠤ᠌ ᠪᠠᠨ ᠠᠪᠴᠤ ᠬᠠᠷᠢᠭᠠᠷᠠᠢ᠃ ᠶᠠᠮᠠᠷ ᠨᠢᠭᠡᠨ ᠬᠥᠮᠦᠨ ᠡᠭᠦᠨ ᠢ᠋ ᠰᠤᠷᠠᠭᠯᠠᠵᠤ ᠢᠷᠡᠪᠡᠯ ᠥᠭᠭᠦᠭᠡᠷᠡᠢ! ᠭᠡᠵᠦ ᠵᠠᠬᠢᠯᠠ᠃
— ᠠᠨᠢᠭ ᠭᠣᠮᠪᠣ ᠭᠡᠵᠦ ᠬᠡᠨ ᠶᠦ᠍ᠮ ᠪᠣᠢ? ᠭᠡᠮᠡᠨ ᠰᠠᠨᠵᠢ ᠭᠠᠢᠬᠠᠨ ᠠᠰᠠᠭᠤᠯᠠ᠃ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠪᠡᠷᠢᠮᠦᠭ ᠡᠮᠡᠭᠡᠨ ᠠᠨᠢᠭ ᠭᠣᠮᠪᠣ ᠭᠡᠵᠦ ᠶᠡᠬᠡ ᠶᠠᠷᠢᠬᠤ ᠪᠣᠯᠤᠭᠰᠠᠨ ᠨᠢ ᠲᠡᠭᠦᠨ ᠦ᠌ ᠭᠠᠢᠬᠠᠰᠢ ᠶ᠋ᠢ ᠲᠥᠷᠥᠭᠦᠯᠵᠡᠢ᠃ ᠠᠨᠢᠭ ᠭᠣᠮᠪᠣ ᠭᠡᠵᠦ ᠨᠢᠭᠡ ᠬᠥᠮᠦᠨ ᠪᠠᠢᠭᠠ ᠶᠤᠮ ᠠ᠋ ᠳᠠ ᠭᠡᠮᠡᠨ ᠲᠠᠭᠠᠮᠠᠭᠯᠠᠵᠤ ᠶᠠᠳᠠᠪᠠᠴᠤ ᠠᠰᠠᠭᠤᠵᠤ ᠵᠢᠷᠦᠬᠡᠯᠡᠭᠰᠡᠨ ᠦᠭᠡᠢ ᠪᠢᠯᠡ᠃
— ᠠᠨᠢᠭ ᠭᠣᠮᠪᠣ ᠭᠡᠵᠦ ᠬᠥᠮᠦᠨ ᠪᠢᠰᠢ ᠠ᠋᠃ ᠠᠮᠳᠣᠣ ᠶ᠋ᠢᠨ ᠣᠷᠣᠨ ᠳ᠋ᠤ᠌᠂ ᠮᠠᠨ ᠤ᠋ ᠨᠤᠲᠤᠭ ᠣᠷᠣᠬᠤ ᠵᠠᠮ ᠳ᠋ᠤ᠌ ᠠᠨᠢᠭ ᠭᠣᠮᠪᠣ ᠭᠡᠳᠡᠭ ᠰᠢᠮᠨᠠᠨᠼ ᠤ᠋ᠨ ᠬᠡᠢᠳ ᠪᠠᠢᠳᠠᠭ ᠶᠤᠮ᠃ ᠲᠡᠨᠳᠡ ᠮᠢᠨᠦ ᠬᠠᠮᠤᠭ ᠵᠠᠯᠠᠭᠤ ᠨᠠᠰᠤ ᠥᠩᠭᠡᠷᠡᠵᠡᠢ᠃ ᠠᠢ ᠳᠠ᠂ ᠰᠡᠭᠦᠷᠡᠰᠦ ᠠᠯᠳᠠᠮᠠᠷ ᠶᠤᠮ! ᠭᠡᠵᠦ ᠪᠡᠷᠢᠮᠦᠭ ᠡᠮᠡᠭᠡᠨ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠰᠠᠨᠠᠭᠠ ᠠᠯᠳᠠᠵᠤ᠂ ᠳᠠᠬᠢᠨ ᠪᠣᠳᠣᠯᠭᠠᠰᠢᠷᠠᠯᠠ᠃ ᠰᠠᠨᠵᠢ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠦ᠋ᠨ ᠵᠣᠪᠠᠯᠠᠩ ᠢ᠋ ᠳᠡᠪᠡᠷᠡᠭᠡᠬᠦ ᠦᠭᠡᠢ ᠶ᠋ᠢᠨ ᠲᠤᠯᠠᠳᠠ ᠳᠠᠭᠤ ᠦᠭᠡᠢ ᠰᠠᠭᠤᠵᠤ ᠪᠠᠢᠪᠠ᠃
— ᠠᠨᠢᠭ ᠭᠣᠮᠪᠣ ᠳ᠋ᠤ᠌ ᠡᠷᠡ ᠬᠥᠮᠦᠨ ᠣᠷᠣᠭᠤᠯᠳᠠᠭ ᠦᠭᠡᠢ ᠶᠦ᠍ᠮ᠃ ᠭᠡᠬᠦ ᠳ᠋ᠦ᠍ ᠪᠡᠨ ᠡᠷᠭᠦᠯ ᠪᠠᠷᠢᠴᠠ ᠥᠭᠬᠦ ᠭᠡᠰᠡᠨ ᠬᠥᠮᠦᠨ ᠢ᠋ ᠬᠥᠭᠡᠭᠡᠳᠡᠭ ᠦᠭᠡᠢ᠃ ᠰᠠᠨᠵᠢ ᠭᠠᠪᠵᠤ ᠴᠢ ᠤᠳᠠᠬᠤ ᠦᠭᠡᠢ ᠨᠣᠮ ᠬᠠᠶᠠᠯᠴᠠᠭᠠᠳ ᡀᠠᠷᠠᠮᠪᠠ ᠴᠣᠯᠠ ᠬᠦᠷᠲᠡᠨᠡ᠃ ᠲᠡᠭᠡᠭᠡᠳ ᠨᠤᠲᠤᠭ ᠪᠤᠴᠠᠬᠤ ᠪᠢᠵᠡ᠃ ᠲᠡᠷᠡ ᠵᠠᠮ ᠳ᠋ᠤ᠌ ᠪᠠᠨ ᠯᠠ ᠠᠨᠢᠭ ᠭᠣᠮᠪᠣ ᠶ᠋ᠢ ᠳᠠᠭᠠᠷᠢᠵᠤ ᠥᠩᠭᠡᠷᠡᠭᠡᠳ ᠮᠢᠨᠦ ᠵᠠᠬᠢᠭᠰᠠᠨ ᠢ᠋ ᠭᠦᠢᠴᠡᠭᠡᠨᠡ ᠪᠢᠵᠡ᠃ ᠵᠣᠪᠠᠯᠠᠩ ᠦᠵᠡᠭᠰᠡᠨ ᠪᠦᠰᠡᠭᠦᠢ ᠬᠥᠮᠦᠨ ᠠᠨᠢᠭ ᠭᠣᠮᠪᠣ ᠳ᠋ᠤ᠌ ᠰᠡᠳᠬᠢᠯ ᠢ᠋ᠶ᠋ᠡᠨ ᠲᠠᠢᠳᠬᠤᠷᠠᠭᠤᠯᠳᠠᠭ ᠶᠤᠮ᠃ ᠶᠡᠷᠦ ᠨᠢ ᠲᠡᠷᠡ ᠬᠡᠢᠳ ᠢ᠋ ᠦᠵᠡᠭᠡᠳ ᠣᠷᠬᠢᠬᠤ ᠳ᠋ᠤ᠌ ᠢᠯᠡᠭᠦᠳᠡᠬᠦ ᠶᠠᠭᠤᠮᠠ ᠪᠠᠢᠬᠤ ᠦᠭᠡᠢ᠃ ᠪᠤᠷᠬᠠᠨ ᠤ᠋ ᠤᠬᠠᠭᠠᠨ ᠠ᠋ᠴᠠ ᠬᠥᠮᠦᠨ ᠦ᠌ ᠤᠬᠠᠭᠠᠨ ᠢᠯᠡᠭᠦᠦ ᠶ᠋ᠢ ᠪᠢ ᠲᠡᠨᠳᠡ ᠤᠬᠠᠭᠠᠷᠠᠭᠰᠠᠨ ᠶᠤᠮ ᠳᠠ ᠭᠡᠵᠦ ᠪᠡᠷᠢᠮᠦᠭ ᠡᠮᠡᠭᠡᠨ ᠬᠡᠯᠡᠭᠡᠳ ᠨᠢᠳᠦ ᠠᠨᠢᠵᠠᠢ᠃ ᠡᠨᠡ ᠪᠦᠬᠦᠨ ᠢ᠋ ᠶᠠᠭᠠᠬᠢᠭᠠᠳ ᠴᠤ᠌ ᠶᠤᠮ ᠪᠣᠢ ᠨᠣᠮ ᠬᠠᠶᠠᠯᠴᠠᠵᠤ᠂ ᠳᠠᠮᠵᠢᠶᠠ ᠪᠠᠷᠢᠬᠤ ᠶ᠋ᠢᠨ ᠡᠮᠦᠨᠡᠬᠢ ᠡᠳᠦᠷ ᠦ᠋ᠳ ᠲᠦ᠍ ᠰᠠᠨᠵᠢ ᠭᠠᠪᠵᠤ ᠳᠤᠷᠠᠰᠤᠨ ᠰᠠᠨᠠᠵᠠᠢ᠃ ᠪᠤᠷᠬᠠᠨ ᠤ᠋ ᠭᠦᠨ ᠤᠬᠠᠭᠠᠨ ᠤ᠋ ᠳᠠᠯᠠᠢ ᠳ᠋ᠤ᠌ ᠭᠦᠨᠵᠡᠭᠡᠢᠷᠡᠨ ᠵᠢᠪᠬᠦ ᠲᠣᠰᠤᠮ ᠲᠡᠷᠡ ᠳᠠᠯᠠᠢ ᠶ᠋ᠢᠨ ᠤᠰᠤ ᠨᠢ ᠬᠥᠭᠡᠰᠦ ᠮᠡᠲᠦ ᠬᠥᠩᠭᠡᠨ ᠶᠦ᠍ᠮ ᠰᠢᠭ ᠲᠡᠭᠦᠨ ᠳ᠋ᠦ᠍ ᠦᠶᠡ ᠦᠶᠡ ᠪᠣᠳᠣᠭᠳᠠᠬᠤ ᠪᠣᠯᠪᠠᠴᠤ ᠲᠡᠢᠮᠦ ᠪᠣᠳᠣᠯ ᠤ᠋ᠨ ᠰᠡᠵᠢᠭᠦᠷ ᠭᠠᠷᠬᠤ ᠪᠦᠷᠢ ᠳ᠋ᠦ᠍ 《ᠨᠢᠭᠦᠯ᠂ ᠠᠯᠳᠠᠰ ᠪᠣᠯᠤᠨᠠ》 ᠭᠡᠵᠦ ᠴᠡᠭᠡᠷᠯᠡᠨ ᠥᠪᠡᠷ ᠦ᠋ᠨ ᠰᠡᠳᠬᠢᠯ ᠰᠠᠨᠠᠭᠠᠨ ᠤ᠋ ᠭᠦᠨ ᠳ᠋ᠦ᠍ ᠬᠠᠴᠢᠨ ᠭᠠᠢᠬᠠᠮᠠᠷ ᠰᠢᠮᠨᠤᠰ ᠠᠮᠢᠯᠠᠨ ᠲᠥᠷᠥᠬᠦ ᠡᠴᠡ ᠪᠣᠯᠭᠣᠮᠵᠢᠯᠠᠳᠠᠭ ᠪᠠᠢᠯᠠ᠃ ᠳᠠᠮᠵᠢᠶᠠ ᠪᠠᠷᠢᠬᠤ ᠶ᠋ᠢᠨ ᠰᠡᠭᠦᠯᠴᠢ ᠶ᠋ᠢᠨ ᠪᠡᠯᠡᠳᠬᠡᠯ ᠬᠢᠵᠦ ᠪᠠᠢᠭᠠ ᠡᠨᠡ ᠡᠳᠦᠷ ᠦ᠋ᠳ ᠲᠦ᠍ ᠳᠠᠬᠢᠭᠠᠳ ᠯᠠ ᠰᠡᠳᠬᠢᠯ ᠦ᠋ᠨ ᠰᠢᠮᠨᠤᠰ ᠪᠣᠰᠬᠤ ᠠᠶᠠᠲᠠᠢ ᠪᠣᠯᠤᠭᠰᠠᠨ ᠨᠢ ᠲᠡᠭᠦᠨ ᠳ᠋ᠦ᠍ ᠡᠪ ᠦᠭᠡᠢ ᠰᠠᠨᠠᠭᠳᠠᠯᠠ᠃ ᠵᠠᠷᠢᠮ ᠳ᠋ᠤ᠌ ᠪᠠᠨ ᠨᠢᠭᠡ ᠲᠠᠯᠠ ᠠ᠋ᠴᠠ ᠯᠢᠨᠰᠠᠷᠠᠢ ᠭᠠᠪᠵᠤ ᠯᠦᠩᠳᠡᠩᠵᠤᠨᠠᠢ᠂ ᠨᠥᠭᠦᠭᠡ ᠲᠠᠯᠠ ᠠ᠋ᠴᠠ ᠨᠣᠮ ᠦᠭᠡᠢ ᠡᠮᠡᠭᠡᠨ ᠪᠡᠷᠢᠮᠦᠭ ᠬᠣᠶᠠᠷ ᠨᠣᠮ ᠬᠠᠶᠠᠯᠴᠠᠵᠤ᠂ ᠭᠡᠷᠡᠴᠢ ᠪᠡᠷ ᠨᠢ ᠰᠠᠨᠵᠢ ᠭᠠᠪᠵᠤ ᠵᠣᠭᠰᠣᠵᠤ ᠪᠠᠢᠬᠤ ᠰᠢᠭ᠋ ᠴᠦ᠍ ᠰᠠᠨᠠᠭᠳᠠᠨᠠ᠃ ᠥᠨᠥᠳᠥᠷ ᠮᠥᠨ ᠲᠡᠢᠮᠦ ᠰᠡᠳᠬᠢᠭᠳᠡᠯ ᠲᠥᠷᠥᠭᠰᠡᠨ ᠡᠴᠡ ᠤᠯᠠᠮᠵᠢᠯᠠᠨ ᠲᠠᠯᠢᠢᠭᠠᠴᠢ ᠪᠡᠷᠢᠮᠦᠭ ᠡᠮᠡᠭᠡᠨ ᠢ᠋ ᠳᠤᠷᠠᠰᠤᠨ ᠰᠠᠨᠠᠪᠠ᠃ ᠲᠡᠷᠡ ᠡᠮᠡᠭᠡᠨ ᠬᠠᠷᠠ ᠤᠬᠠᠭᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠶᠡᠬᠡ ᠯᠡ ᠭᠠᠢᠬᠠᠮᠠᠷ ᠶᠠᠭᠤᠮᠠ ᠪᠣᠳᠣᠵᠤ᠂ ᠶᠠᠷᠢᠳᠠᠭ ᠪᠠᠢᠭᠰᠠᠨ ᠠ᠋ᠴᠠ ᠰᠠᠨᠵᠢ ᠶ᠋ᠢᠨ ᠴᠢᠬᠢᠨ ᠳ᠋ᠦ᠍ ᠬᠣᠨᠣᠭᠰᠢᠵᠤ᠂ ᠤᠯᠠᠮᠵᠢᠯᠠᠭᠠᠳ ᠪᠣᠳᠣᠯ ᠰᠠᠨᠠᠭᠠᠨ ᠳ᠋ᠤ᠌ ᠨᠢ ᠨᠡᠪᠴᠢᠭᠰᠡᠨ ᠶᠦ᠍ᠮ ᠪᠢᠰᠢ ᠪᠢᠵᠡ ᠠ᠋ ?
《ᠡᠢᠮᠦ ᠶᠠᠭᠤᠮᠠ ᠪᠣᠳᠣᠵᠤ ᠪᠠᠢᠭᠰᠠᠨ ᠠ᠋ᠴᠠ ᠮᠠᠷᠭᠠᠰᠢ ᠨᠣᠮ ᠬᠠᠶᠠᠯᠴᠠᠬᠤ ᠳ᠋ᠤ᠌ ᠶᠠᠭᠤ ᠠᠰᠠᠭᠤᠬᠤ ᠪᠠᠨ ᠪᠢᠯᠡᠭᠦᠳᠡᠭᠰᠡᠨ ᠨᠢ ᠳᠡᠭᠡᠷᠡ ᠦᠭᠡᠢ ᠤᠤ?》 ᠭᠡᠵᠦ ᠰᠠᠨᠵᠢ ᠥᠪᠡᠷᠲᠡᠭᠡᠨ ᠳᠠᠬᠢᠨ ᠱᠠᠭᠠᠷᠳᠠᠯᠠ᠃
ᠮᠠᠷᠭᠠᠰᠢ ᠨᠢ ᠁ ᡀᠠᠰᠠ ᠵᠣᠣ ᠶ᠋ᠢᠨ ᠪᠠᠷᠠᠪᠠᠡᠭ ᠶᠡᠬᠡ ᠳᠤᠭᠠᠩ ᠤ᠋ᠨ ᠡᠮᠦᠨᠡ ᠣᠯᠠᠨ ᠯᠠᠮᠠ ᠨᠠᠷ ᠴᠤᠭᠯᠠᠷᠠᠯᠠ᠃ ᠨᠣᠮ ᠬᠠᠶᠠᠯᠴᠠᠵᠤ᠂ ᠳᠡᠮᠵᠢᠶᠡ ᠪᠠᠷᠢᠬᠤ ᠳ᠋ᠤ᠌ ᠣᠷᠣᠯᠴᠠᠬᠤ ᠪᠠᠷ ᠢᠷᠡᠵᠡᠭᠡᠵᠡᠢ ᠃ ᠨᠣᠮ ᠬᠠᠶᠠᠳᠠᠭ ᠳᠠᠪᠵᠠᠶᠠ ᠶ᠋ᠢ ᠵᠠᠰᠠᠵᠤ ᠪᠡᠯᠡᠳᠬᠡᠭᠰᠡᠨ ᠪᠠᠢᠪᠠ᠃ ᠠᠷᠪᠠᠨ ᠪᠡᠷᠬᠡᠲᠦ ᠭᠡᠳᠡᠭ ᠭᠠᠪᠵᠤ ᠴᠣᠯᠠᠲᠠᠨ ᠠ᠋ᠴᠠ ᠮᠢᠶᠡᠭᠷᠢᠮᠪᠠ᠂ ᠵᠢᠳᠡᠷᠢᠮᠪᠠ᠂ ᠵᠣᠭᠷᠢᠮᠪᠠ᠂ ᠶᠥᠭᠡᠵᠡᠷᠢ᠂ ᠮᠠᠨᠷᠠᠮᠪᠠ ᠠ᠋ᠴᠠ ᠡᠬᠢᠯᠡᠭᠡᠳ ᠮᠠᠰᠢ ᠬᠡᠲᠦᠷᠡᠭᠰᠡᠨ ᠪᠤᠶᠤ ᠷᠠᠪᠵᠠᠮᠪᠠ᠂ ᠯᠠᠪᠷᠠᠩ ᠬᠡᠢᠳ ᠲᠦ᠍ ᠨᠣᠮ ᠬᠠᠶᠠᠯᠴᠠᠵᠤ ᠢᠯᠠᠭᠰᠠᠨ ᠳᠣᠣᠷᠠᠮᠪᠠ᠂ ᠲᠠᠷᠨᠢ ᠶ᠋ᠢᠨ ᠨᠣᠮ ᠳ᠋ᠤ᠌ ᠴᠠᠢᠷᠠᠭᠰᠠᠨ ᠠᠭᠷᠠᠮᠪᠠ᠂ ᡀᠠᠰᠠ ᠵᠣᠣ ᠳ᠋ᠤ᠌ ᠨᠣᠮ ᠬᠠᠶᠠᠵᠤ ᠢᠯᠠᠭᠰᠠᠨ ᠲᠡᠭᠦᠰᠬᠡᠯ ᠦᠭᠡᠢ ᠡᠷᠳᠡᠮᠲᠦ ᠭᠡᠭᠳᠡᠬᠦ ᡀᠠᠷᠠᠮᠪᠠ ᠴᠣᠯᠠᠲᠠᠨ ᠨᠤᠭᠤᠳ ᠬᠦᠷᠲᠡᠯᠡ ᠣᠯᠠᠨ ᠲᠣᠭᠠᠨ ᠤ᠋ ᠡᠷᠳᠡᠮᠲᠦ ᠯᠠᠮᠠ ᠨᠠᠷ ᠴᠤᠭᠯᠠᠷᠠᠭᠰᠠᠨ ᠢ᠋ ᠬᠠᠷᠠᠭᠠᠳ ᠰᠠᠨᠵᠢ ᠶ᠋ᠢᠨ ᠵᠢᠷᠦᠬᠡ ᠦᠬᠦᠬᠦ ᠰᠢᠭ ᠪᠣᠯᠵᠤ᠂ ᠭᠢᠷᠪᠢᠰᠢᠨ ᠪᠢᠰᠢᠭᠦᠷᠬᠡᠭᠰᠡᠨ ᠪᠠᠢᠳᠠᠯ ᠲᠠᠢ ᠪᠠᠷ ᠴᠢᠯᠠᠭᠤᠨ ᠳᠡᠪᠵᠢᠶᠡᠨ ᠳ᠋ᠦ᠍ ᠭᠠᠷᠴᠤ ᠣᠴᠢᠯᠠ᠃ ᠠᠯᠲᠠᠳᠠᠭᠰᠠᠨ ᠣᠢᠰᠤ ᠪᠠᠷ ᠬᠢᠭᠰᠡᠨ ᠥᠷᠭᠡᠨ ᠬᠦᠷᠢᠶᠡᠲᠦ ᠴᠠᠩ ᠮᠠᠯᠠᠭᠠᠢ ᠪᠠᠨ᠂ ᠵᠠᠩᠴᠢ ᠲᠠᠢ ᠪᠠᠨ ᠠᠪᠴᠤ ᠲᠠᠯᠪᠢᠭᠠᠳ ᠰᠠᠨᠵᠢ ᠡᠷᠭᠢᠨ ᠲᠣᠭᠣᠷᠢᠨ ᠢ᠋ ᠠᠵᠢᠭᠯᠠᠪᠠ᠃ ᠣᠯᠠᠨ ᠤ᠋ ᠳᠤᠮᠳᠠ ᠰᠢᠪᠡᠷ ᠠᠪᠢᠷ ᠶᠠᠷᠢᠶᠠ ᠳᠡᠭᠳᠡᠯᠡ᠃ ᠰᠠᠨᠵᠢ ᠪᠠᠷᠠᠭᠤᠨ ᠭᠠᠷ ᠲᠤ᠌ ᠡᠷᠢᠭᠡ ᠪᠡᠨ ᠪᠠᠷᠢᠵᠤ ᠲᠦᠷ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ ᠵᠡᠭᠦᠨ᠂ ᠪᠠᠷᠠᠭᠤᠨ ᠠᠯᠠᠭᠠ ᠶ᠋ᠢ ᠬᠠᠪᠰᠤᠷᠤᠨ ᠲᠠᠰᠢᠬᠤ ᠳ᠋ᠤ᠌ ᠬᠥᠮᠦᠰ ᠲᠠᠭ ᠴᠢᠮᠡᠭᠡ ᠦᠭᠡᠢ ᠪᠣᠯᠤᠯᠠ᠃ ᠲᠡᠷᠡ ᠳᠠᠷᠤᠢ ᠵᠡᠭᠦᠨ ᠭᠠᠷ ᠤ᠋ᠨ ᠠᠯᠠᠭᠠ ᠶ᠋ᠢ ᠳᠣᠭᠣᠭᠰᠢ ᠬᠠᠷᠠᠭᠤᠯᠤᠨ᠂ ᠪᠠᠷᠠᠭᠤᠨ ᠤ᠋ ᠬᠢ ᠶ᠋ᠢ ᠳᠡᠭᠡᠭᠰᠢ ᠨᠢ ᠴᠢᠭᠯᠡᠭᠦᠯᠦᠨ 《ᠳ᠋ᠢᠰ》 ᠭᠡᠵᠦ ᠴᠢᠩᠭᠠ ᠳᠤᠤᠭᠠᠷᠤᠯᠠ᠃ ᠵᠡᠭᠦᠨ ᠭᠠᠷ ᠢ᠋ ᠳᠣᠭᠣᠭᠰᠢ ᠤᠨᠵᠢᠭᠤᠯᠤᠨ᠂ ᠠᠯᠠᠭᠠ ᠶ᠋ᠢ ᠭᠠᠵᠠᠷ ᠴᠢᠭᠯᠡᠭᠦᠯᠦᠭᠰᠡᠨ ᠨᠢ ᠠᠯᠢᠪᠠ ᠨᠢᠭᠦᠯᠲᠡᠨ ᠦᠷᠡᠵᠢᠭᠦᠯᠬᠦ ᠦᠭᠡᠢ ᠶ᠋ᠢᠨ ᠲᠤᠯᠠ ᠲᠠᠮᠤ ᠶ᠋ᠢᠨ ᠬᠠᠭᠠᠯᠭᠠ ᠶ᠋ᠢ ᠲᠠᠭᠯᠠᠯᠠ ᠭᠡᠰᠡᠨ ᠳᠣᠬᠢᠶᠠ ᠪᠣᠯᠤᠨᠠ᠃ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠠᠯᠠᠭᠠ ᠶ᠋ᠢ ᠳᠡᠭᠡᠭᠰᠢ ᠬᠠᠷᠠᠭᠤᠯᠤᠨ ᠡᠷᠭᠦᠬᠦ ᠨᠢ ᠤᠷᠢᠳᠤ ᠨᠢᠭᠦᠯ ᠬᠢᠭᠰᠡᠨ ᠢ᠋ᠶ᠋ᠡᠷ ᠳᠠᠬᠢᠨ ᠲᠥᠷᠥᠯ ᠠᠷᠠᠯᠵᠢᠬᠤ ᠳ᠋ᠤ᠌ ᠪᠠᠨ ᠡᠭᠦᠷᠦᠨ ᠭᠠᠷᠤᠭᠰᠠᠨ ᠭᠠᠢ ᠶ᠋ᠢ ᠪᠦᠬᠦᠨ ᠢ᠋ ᠲᠡᠳᠡᠨ ᠭᠠᠷᠭᠠᠬᠤ ᠶ᠋ᠢ ᠵᠥᠩᠨᠡᠵᠡᠢ 《ᠳ᠋ᠢᠰ!》 ᠭᠡᠮᠡᠨ ᠰᠠᠨᠠᠭᠤᠯᠬᠤ ᠨᠢ ᠮᠠᠨᠽᠤᠰᠢᠷᠢ ᠶ᠋ᠢᠨ ᠵᠢᠷᠦᠬᠡᠨ ᠲᠠᠷᠨᠢ ᠢ ᠤᠷᠢᠬᠤ ᠡᠬᠢᠯᠡᠯ ᠳᠠᠭᠤᠨ ᠶᠤᠮ᠃ ᠡᠢᠨ ᠬᠦ᠌ ᠦᠢᠯᠡᠳᠬᠦ ᠨᠢ ᠨᠣᠮ ᠬᠠᠶᠠᠯᠴᠠᠬᠤ ᠶ᠋ᠢᠨ ᠬᠠᠲᠠᠭᠤ ᠲᠣᠭᠲᠠᠭᠠᠭᠰᠠᠨ ᠵᠠᠢᠭ ᠶᠣᠰᠣ ᠪᠢᠯᠡ᠃ ᠡᠢᠮᠦ ᠦᠢᠯᠡᠳᠦᠯ ᠢ᠋ ᠬᠢᠮᠡᠭᠴᠡ ᠨᠣᠮ ᠬᠠᠶᠠᠯᠴᠠᠬᠤ ᠪᠠᠷ ᠴᠤᠭᠯᠠᠷᠠᠭᠰᠠᠨ ᠯᠠᠮᠠ ᠨᠠᠷ ᠲᠠᠭ ᠴᠢᠮᠡᠭᠡ ᠦᠭᠡᠢ ᠪᠣᠯᠵᠤ ᠰᠠᠨᠵᠢ ᠶ᠋ᠢᠨ ᠵᠦᠭ ᠭᠥᠯᠢᠷᠡᠨ ᠰᠢᠷᠳᠡᠵᠡᠭᠡᠯᠡ᠃ ᠰᠣᠷᠢᠨ ᠰᠣᠨᠵᠢᠬᠤ ᠪᠠᠢᠳᠠᠯ ᠢᠯᠡᠷᠬᠡᠢ ᠪᠥᠯᠥᠭᠡ᠃ ᠠᠩᠬᠠᠨ ᠤ᠋ ᠠᠰᠠᠭᠤᠯᠲᠠ ᠶ᠋ᠢ ᠬᠡᠨ ᠪᠦᠬᠦᠨ ᠲᠠᠢᠯᠵᠤ ᠴᠢᠳᠠᠬᠤ ᠬᠥᠩᠭᠡᠨ ᠶᠠᠭᠤᠮᠠ ᠪᠠᠷ ᠭᠠᠷᠭᠠᠬᠤ ᠪᠠᠷ ᠰᠠᠨᠵᠢ ᠪᠣᠳᠣᠵᠤ ᠪᠠᠢᠭᠰᠠᠨ ᠶᠣᠰᠣᠭᠠᠷ ᠢ᠋ᠶ᠋ᠠᠨ ᠣᠷᠣᠭᠰᠢ ᠨᠢᠭᠡ ᠠᠯᠬᠤᠵᠤ ᠡᠮᠦᠨᠡ ᠡᠩᠨᠡᠭᠡᠨ ᠳ᠋ᠦ᠍ ᠰᠠᠭᠤᠭᠠ ᠯᠠᠮᠠ ᠨᠠᠷ ᠤ᠋ᠨ ᠨᠢᠭᠡᠨ ᠦ᠌ ᠡᠮᠦᠨᠡ ᠣᠴᠢᠵᠤ᠂
— ᠰᠠᠨᠰᠠᠷ ᠤ᠋ᠨ ᠶᠠᠭᠤᠮᠠ ᠪᠦᠬᠦᠨ ᠤᠭ ᠠ᠋ᠴᠠ ᠶᠠᠭᠤᠨ ᠳ᠋ᠤ᠌ ᠪᠦᠲᠦᠳᠡᠭ ᠪᠣᠢ? ᠲᠥᠷᠥᠨ ᠲᠦᠭᠡᠬᠦ ᠶ᠋ᠢᠨ ᠶᠣᠰᠣᠨ ᠠ᠋ᠴᠠ ᠭᠠᠵᠢᠭᠤ ᠨᠢ ᠶᠠᠭᠤ ᠪᠣᠢ? ᠭᠡᠵᠦ ᠲᠥᠪᠡᠳ ᠢ᠋ᠶ᠋ᠡᠷ ᠠᠰᠠᠭᠤᠯᠠ᠃ ᠲᠡᠷᠡ ᠯᠠᠮᠠ ᠵᠠᠯᠠᠭᠤᠬᠠᠨ ᠬᠥᠮᠦᠨ ᠪᠠᠢᠯᠠ᠃ ᠲᠡᠢᠮᠦ ᠯᠡ ᠬᠦᠨᠳᠦ ᠠᠩᠬᠠᠨ ᠤ᠋ ᠠᠰᠠᠭᠤᠯᠲᠠ ᠪᠠᠨ ᠲᠠᠯᠪᠢᠬᠤ ᠵᠣᠷᠢᠯᠭᠠ ᠲᠠᠢ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠰᠠᠨᠵᠢ ᠪᠡᠶᠡᠯᠡᠭᠦᠯᠪᠡ᠃ ᠠᠩᠬᠠᠨ ᠤ᠋ ᠠᠰᠠᠭᠤᠯᠲᠠ ᠠᠮᠠᠷᠬᠠᠨ ᠮᠥᠷᠲᠡᠭᠡᠨ ᠬᠡᠨ ᠴᠦ᠍ ᠬᠠᠷᠢᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯ ᠶᠡᠬᠡ ᠤᠴᠢᠷᠲᠠᠢ ᠪᠠᠢᠳᠠᠭ ᠢ᠋ ᠲᠡᠷᠡ ᠲᠤᠷᠰᠢᠯᠭᠠ ᠠ᠋ᠴᠠ ᠮᠡᠳᠡᠵᠡᠢ᠃ ᠯᠠᠮᠠ ᠨᠠᠷ ᠵᠠᠯᠠᠭᠤ ᠲᠣᠰᠤᠮ ᠢ᠋ᠶ᠋ᠠᠨ ᠭᠦᠨ ᠤᠬᠠᠭᠠᠨ ᠤ᠋ ᠨᠣᠮᠯᠠᠯ ᠴᠡᠭᠡᠵᠢᠯᠡᠳᠡᠭ ᠦᠭᠡᠢ᠂ ᠤᠬᠠᠭᠠᠷᠠᠳᠠᠭ ᠴᠤ᠌ ᠦᠭᠡᠢ ᠶ᠋ᠢ ᠰᠠᠨᠵᠢ ᠵᠢᠡᠭ᠌ᠳᠠᠭᠠᠨ ᠤ᠋ ᠬᠢᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠷᠢᠮᠵᠢᠶᠠᠯᠠᠨ ᠮᠡᠳᠡᠨᠡ᠃ ᠠᠰᠠᠭᠤᠯᠲᠠ ᠠᠪᠤᠭᠰᠠᠨ ᠯᠠᠮᠠ ᠬᠡᠢ ᠯᠡ ᠠᠩᠭᠠᠯᠵᠠᠨ ᠴᠢᠷᠠᠢ ᠨᠢ ᠤᠯᠠᠢᠬᠤ ᠶ᠋ᠢ ᠰᠠᠨᠵᠢ ᠠᠵᠢᠭᠯᠠᠪᠠ᠃ ᠳᠡᠷᠡᠨ ᠢ᠋ ᠬᠠᠷᠢᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ ᠶ᠋ᠢ ᠮᠡᠳᠡᠮᠡᠭᠴᠡ ᠠᠯᠠᠭᠠ ᠪᠠᠨ ᠳᠠᠬᠢᠨ ᠨᠢᠭᠡ ᠤᠳᠠᠭᠠ ᠴᠢᠩᠭᠠ ᠲᠠᠰᠢᠭᠠᠳ ᠤᠤᠯ ᠠᠰᠠᠭᠤᠯᠲᠠ ᠪᠠᠨ ᠳᠠᠪᠲᠠᠵᠤ ᠰᠠᠨᠰᠠᠺᠠᠲ ᠬᠡᠯᠡ ᠪᠡᠷ ᠲᠠᠯᠪᠢᠯᠠ᠃ ᠰᠠᠨᠰᠠᠺᠷᠲ ᠢ᠋ᠶ᠋ᠠᠷ ᠲᠡᠷᠡ ᠪᠦᠷ ᠴᠦ᠍ ᠱᠣᠩ ᠦᠭᠡᠢ ᠨᠢ ᠲᠣᠳᠣᠷᠬᠠᠢ ᠪᠠᠢᠯᠠ᠃《ᠬᠡᠷᠪᠡ ᠡᠨᠡ ᠠᠰᠠᠭᠤᠯᠲᠠ ᠶ᠋ᠢ ᠲᠡᠷᠡ ᠵᠠᠯᠠᠭᠤ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠰᠠᠭᠤᠵᠤ ᠪᠠᠢᠭᠠ ᠱᠢᠷᠦᠨ ᠤᠯᠠᠭᠠᠨ ᠴᠢᠷᠠᠢᠲᠤ ᠷᠠᠪᠵᠠᠨᠪᠠ ᠠ᠋ᠴᠠ ᠠᠰᠠᠭᠤᠭᠰᠠᠨ ᠪᠣᠯ ᠴᠤ᠌ ᠳᠣᠣᠷᠠ ᠨᠢ ᠯᠡ ᠬᠠᠷᠢᠭᠤᠯᠬᠤ ᠪᠠᠢᠭᠰᠠᠨ ᠳᠠ 》 ᠭᠡᠵᠦ ᠰᠠᠨᠵᠢ ᠳᠣᠲᠣᠷᠠ ᠪᠠᠨ ᠪᠣᠳᠣᠯᠠ᠃ ᠨᠣᠮ ᠬᠠᠶᠠᠳᠠᠭ ᠬᠥᠮᠦᠨ ᠦ᠌ ᠨᠢᠭᠡ ᠠᠰᠢᠭ ᠨᠢ ᠠᠰᠠᠭᠤᠬᠤ ᠬᠥᠮᠦᠨ ᠢ᠋ᠶ᠋ᠡᠨ ᠥᠪᠡᠷ ᠢ᠋ᠶ᠋ᠡᠨ ᠰᠣᠩᠭᠣᠳᠠᠭ ᠲᠤ᠌ ᠪᠠᠢᠯᠠ᠃ ᠴᠢᠷᠠᠢ ᠵᠢᠰᠦ ᠪᠡᠷ ᠨᠢ ᠬᠡᠨ ᠪᠣᠯᠬᠤ ᠶ᠋ᠢ ᠲᠠᠭᠠᠮᠠᠭᠯᠠᠵᠤ᠂ ᠠᠰᠠᠭᠤᠯᠲᠠ ᠪᠠᠨ ᠲᠠᠭᠠᠷᠠᠭᠤᠯᠬᠤ ᠳ᠋ᠤ᠌ ᠪᠣᠯᠤᠮᠵᠢ ᠲᠠᠢ ᠶᠤᠮ᠃ ᠰᠠᠨᠵᠢ ᠡᠭᠦᠨ ᠳ᠋ᠦ᠍ ᠪᠠᠰᠠ ᠶᠡᠬᠡ ᠣᠯᠵᠠᠭᠤᠷᠬᠠᠵᠤ ᠪᠠᠢᠪᠠ᠃ ᠨᠥᠭᠦᠭᠡ ᠯᠠᠮᠠ ᠰᠠᠨᠰᠠᠺᠷᠲ ᠢ᠋ᠶ᠋ᠠᠷ ᠠᠰᠠᠭᠤᠭᠰᠠᠨ ᠢ᠋ ᠰᠠᠨᠰᠠᠺᠷᠲ ᠢ᠋ᠶ᠋ᠠᠷ ᠬᠠᠷᠢᠭᠤᠯᠬᠤ ᠶᠣᠰᠣᠲᠠᠢ ᠪᠣᠯᠪᠠᠴᠤ ᠶᠠᠭᠤ ᠴᠤ᠌ ᠬᠡᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠨᠢ ᠢᠯᠡᠷᠬᠡᠢ ᠪᠣᠯᠤᠯᠠ᠃ ᠰᠠᠨᠵᠢ ᠲᠡᠭᠦᠨ ᠢ᠋ ᠬᠠᠷᠢᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠨᠠ ᠭᠡᠳᠡᠭ ᠢ᠋ ᠣᠯᠠᠨ ᠳ᠋ᠤ᠌ ᠮᠡᠳᠡᠭᠳᠡᠬᠦ ᠶ᠋ᠢᠨ ᠲᠤᠯᠠᠳᠠ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠠᠯᠠᠭᠠ ᠪᠠᠷ ᠵᠡᠭᠦᠨ ᠠᠯᠠᠭᠠ ᠪᠠᠨ ᠨᠢᠭᠡ ᠤᠳᠠᠭᠠ ᠴᠢᠩᠭᠠ ᠲᠠᠰᠢᠵᠤ ᠳᠣᠬᠢᠶᠠ ᠥᠭᠭᠦᠯᠡ᠃ ᠲᠡᠭᠡᠭᠡᠳ ᠤᠤᠯ ᠠᠰᠠᠭᠤᠯᠲᠠ ᠶ᠋ᠢ ᠲᠡᠭᠦᠨ ᠳ᠋ᠦ᠍ ᠭᠤᠷᠪᠠᠳᠠᠬᠢ ᠤᠳᠠᠭᠠ ᠪᠠᠨ ᠲᠠᠯᠪᠢᠬᠤ ᠶᠣᠰᠣᠲᠠᠢ ᠲᠤᠯᠠ ᠰᠢᠩᠭᠠᠯ ᠬᠡᠯᠡ ᠪᠡᠷ ᠳᠠᠬᠢᠨ ᠠᠰᠠᠭᠤᠯᠠ᠃ ᠰᠢᠩᠭᠠᠯ ᠢ᠋ᠶ᠋ᠠᠷ ᠶᠠᠷᠢᠬᠤ ᠳ᠋ᠤ᠌ ᠨᠢ ᠨᠣᠮ ᠬᠠᠶᠠᠯᠴᠠᠬᠤ ᠪᠠᠷ ᠢᠷᠡᠭᠰᠡᠨ ᠯᠠᠮᠠ ᠨᠠᠷ ᠳᠠᠭᠤ ᠠᠯᠲᠠᠨ ᠭᠠᠢᠬᠠᠵᠠᠭᠠᠯᠠ᠃ ᠰᠠᠨᠵᠢ ᠰᠢᠩᠭᠠᠯ ᠬᠡᠯᠡ ᠶ᠋ᠢ ᠳᠥᠩᠭᠡᠵᠢ ᠯᠡ ᠭᠠᠳᠠᠷᠯᠠᠵᠤ ᠪᠠᠢᠭᠠ ᠲᠤᠯᠠ ᠣᠯᠠᠨ ᠶᠠᠭᠤᠮᠠ ᠶᠠᠷᠢᠵᠤ ᠴᠢᠳᠠᠬᠤ ᠦᠭᠡᠢ ᠪᠡᠨ ᠮᠡᠳᠡᠨᠡ᠃ ᠭᠡᠪᠡᠴᠦ ᠨᠣᠮ ᠬᠠᠶᠠᠯᠴᠠᠬᠤ ᠪᠠᠷ ᠢᠷᠡᠭᠰᠡᠳ ᠦ᠋ᠨ ᠳᠣᠲᠣᠷᠠ ᠱᠠᠰᠢᠨ ᠤ᠋ ᠪᠤᠷᠬᠠᠨ ᠤ᠋ ᠡᠷᠳᠡᠮ ᠳ᠋ᠦ᠍ ᠥᠨᠳᠥᠷ ᠴᠣᠯᠠ ᠬᠦᠷᠲᠡᠭᠰᠡᠨ ᠠᠶᠢᠬᠤᠪᠲᠤᠷ ᠠᠮᠢᠲᠠᠨ ᠨᠤᠭᠤᠳ ᠣᠯᠠᠨ ᠪᠠᠢᠭᠠ ᠲᠤᠯᠠ ᠲᠡᠳᠡᠨ ᠦ᠌ ᠳᠣᠪᠲᠣᠯᠬᠤ ᠵᠣᠷᠢᠭ ᠢ᠋ ᠪᠠᠭᠤᠷᠠᠭᠤᠯᠬᠤ ᠵᠣᠷᠢᠯᠭᠠ ᠪᠠᠷ ᠰᠢᠩᠭᠠᠯ ᠬᠡᠯᠡ ᠪᠡᠷ ᠬᠣᠶᠠᠷ ᠭᠤᠷᠪᠠᠨ ᠠᠰᠠᠭᠤᠯᠲᠠ ᠪᠡᠯᠡᠳᠴᠡᠢ᠃
ᠰᠢᠩᠭᠠᠯ ᠪᠤᠶᠤ ᠠᠷᠰᠯᠠᠨ ᠲᠢᠪ ᠦ᠋ᠨ ᠲᠤᠬᠠᠢ ᠪᠤᠷᠬᠠᠨ ᠤ᠋ ᠨᠣᠮ ᠳ᠋ᠤ᠌ ᠶᠡᠬᠡ ᠭᠠᠷᠳᠠᠭ ᠪᠣᠯᠪᠠᠴᠤ ᠯᠠᠮᠠ ᠨᠠᠷ ᠭᠣᠣᠯᠳᠠᠭᠤ ᠲᠥᠪᠡᠳ᠂ ᠰᠠᠨᠰᠠᠺᠷᠲ ᠬᠣᠶᠠᠷ ᠯᠠ ᠬᠡᠯᠡ ᠪᠡᠷ ᠡᠷᠳᠡᠮ ᠢ᠋ᠶ᠋ᠡᠨ ᠵᠤᠵᠠᠭᠠᠷᠠᠭᠤᠯᠳᠠᠭ ᠠᠵᠠᠢ᠃ ᠰᠢᠩᠭᠠᠯ ᠬᠡᠯᠡ ᠶ᠋ᠢ ᠲᠡᠳᠡ ᠲᠡᠳᠦᠢ ᠯᠡ ᠣᠢᠰᠢᠶᠠᠳᠠᠭ ᠦᠭᠡᠢ ᠪᠠᠢᠪᠠ᠃ ᠬᠠᠷᠢᠨ ᠴᠤ᠌ ᠰᠠᠩᠭᠠᠰᠪᠠ ᠨᠠᠷ ᠤ᠋ᠨ ᠣᠷᠣᠨ ᠭᠡᠵᠦ ᠶᠡᠬᠡ ᠯᠡ ᠳᠣᠣᠷᠠ ᠳ᠋ᠤ᠌ ᠦᠵᠡᠳᠡᠭ ᠴᠦ᠍ ᠤᠳᠠᠭᠠ ᠪᠠᠢᠯᠠ᠃
ᠰᠢᠩᠭᠠᠯ ᠢ᠋ᠶ᠋ᠠᠷ ᠪᠠᠢᠲᠤᠭᠠᠢ ᠲᠥᠪᠡᠳ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠨᠥᠭᠥᠭᠡᠬᠢ ᠠᠰᠠᠭᠤᠯᠲᠠ ᠶ᠋ᠢ ᠬᠠᠷᠢᠭᠤᠯᠵᠤ ᠴᠢᠳᠠᠭᠠ ᠦᠭᠡᠢ ᠵᠠᠯᠠᠭᠤ ᠯᠠᠮᠠ ᠢᠯᠠᠭᠳᠠᠯ ᠢ᠋ᠶ᠋ᠠᠨ ᠬᠦᠯᠢᠶᠡᠯᠡ᠃ ᠰᠠᠨᠵᠢ ᠲᠡᠭᠦᠨ ᠦ᠌ ᠢᠯᠠᠭᠳᠠᠯ ᠢ᠋ ᠬᠦᠯᠢᠶᠡᠯᠭᠡᠭᠰᠡᠨ ᠦ᠌ ᠳᠣᠬᠢᠶᠠ ᠪᠣᠯᠭᠠᠵᠤ ᠪᠠᠷᠠᠭᠤᠨ ᠮᠥᠷᠦᠨ ᠳᠡᠭᠡᠷᠡ ᠨᠢ ᠭᠠᠷ ᠢ᠋ᠶ᠋ᠠᠨ ᠬᠦᠷᠭᠡᠪᠡ᠃ ᠢᠩᠭᠢᠭᠡᠳ ᠳᠠᠷᠠᠭᠠ ᠶ᠋ᠢᠨ ᠬᠥᠮᠦᠨ ᠦ᠌ ᠡᠮᠦᠨᠡ ᠣᠴᠢᠵᠤ ᠠᠰᠠᠭᠤᠯᠲᠠ ᠪᠠᠨ ᠳᠠᠬᠢᠨ ᠲᠠᠯᠪᠢᠯᠠ᠃ ᠲᠡᠷᠡ ᠨᠢ ᠨᠥᠭᠥᠭᠡᠬᠢ ᠱᠢᠷᠦᠨ ᠤᠯᠠᠭᠠᠨ ᠴᠢᠷᠠᠢᠲᠤ ᠷᠠᠪᠵᠠᠮᠪᠠ ᠠᠵᠠᠢ᠃
— ᠰᠠᠨᠰᠠᠷ ᠤ᠋ᠨ ᠶᠠᠭᠤᠮᠠ ᠪᠦᠬᠦᠨ ᠤᠭ ᠠ᠋ᠴᠠ ᠪᠤᠷᠬᠠᠨ ᠤ᠋ ᠶᠡᠬᠡ ᠬᠣᠲᠠ ᠮᠠᠨᠳᠠᠯ ᠳ᠋ᠤ᠌ ᠪᠦᠲᠦᠮᠦᠢ᠃ ᠲᠥᠷᠥᠨ ᠲᠦᠭᠡᠬᠦᠢ ᠶ᠋ᠢᠨ ᠶᠣᠰᠣᠨ ᠠ᠋ᠴᠠ ᠭᠠᠵᠢᠭᠤᠳᠠ ᠶᠠᠭᠤᠮᠠ ᠣᠷᠴᠢᠯᠠᠩ ᠳ᠋ᠤ᠌ ᠦᠭᠡᠢ ᠪᠣᠯᠪᠠᠴᠤ ᠦᠵᠡᠭᠳᠡᠯ ᠰᠠᠨᠰᠠᠷ ᠤ᠋ᠨ ᠶᠠᠭᠤᠮᠠᠰ ᠰᠡᠳᠬᠢᠯ ᠳ᠋ᠦ᠍ ᠠᠯᠠᠭᠳᠠᠮᠠᠢ! ᠭᠡᠵᠦ ᠲᠡᠷᠡ ᠯᠠᠮᠠ ᠲᠥᠪᠡᠳ ᠬᠡᠯᠡ ᠪᠡᠷ ᠨᠤᠲᠠ ᠲᠠᠢ ᠬᠠᠷᠢᠭᠤᠯᠤᠯᠠ᠃ ᠯᠠᠮᠠ ᠨᠠᠷ ᠴᠥᠮ ᠯᠡ ᠳᠦᠩᠭᠢᠨᠡᠯᠳᠦᠨ ᠰᠠᠢᠰᠢᠶᠠᠵᠤ ᠪᠠᠢᠯᠠ᠃ ᠨᠢᠭᠡᠨᠲᠡ ᠠᠰᠠᠭᠤᠯᠲᠠ ᠨᠢ ᠬᠠᠷᠢᠭᠤᠯᠤᠭᠳᠠᠭᠰᠠᠨ ᠪᠣᠯᠬᠣᠷ ᠰᠠᠨᠵᠢ ᠲᠡᠭᠦᠨ ᠢ᠋ ᠥᠭᠡᠷᠡᠴᠢᠯᠡᠵᠦ ᠲᠡᠭᠦᠨ ᠡᠴᠡ ᠤᠷᠭᠤᠭᠤᠯᠤᠭᠰᠠᠨ ᠰᠢᠨᠡ ᠠᠰᠠᠭᠤᠯᠲᠠ ᠭᠠᠷᠭᠠᠬᠤ ᠶᠣᠰᠣᠲᠠᠢ ᠪᠣᠯᠪᠠ᠃ ᠷᠠᠪᠵᠠᠮᠪᠠᠲᠠᠩ ᠤ᠋ᠨ ᠬᠠᠵᠠᠭᠤ ᠳ᠋ᠤ᠌ ᠪᠠᠰᠠ ᠨᠢᠭᠡᠨ ᠵᠠᠯᠠᠭᠤᠪᠲᠤᠷ ᠯᠠᠮᠠ ᠪᠠᠢᠬᠤ ᠲᠤᠯᠠ ᠲᠡᠭᠦᠨ ᠳ᠋ᠦ᠍ ᠬᠠᠨᠳᠤᠵᠤ᠂
— ᠪᠤᠷᠬᠠᠨ ᠤ᠋ ᠴᠢᠭᠤᠯᠭᠠᠨ ᠬᠤᠷᠠᠨ ᠦᠢᠯᠡᠳᠬᠦ ᠨᠢ ᠥᠨᠳᠥᠷ ᠦ᠋ᠨ ᠢᠵᠠᠭᠤᠷ ᠣᠯᠬᠤ ᠪᠣᠢ᠃ ᠪᠤᠶᠠᠨ ᠲᠡᠭᠦᠨ ᠦ᠌ ᠦᠷᠡ ᠨᠢ ᠣᠷᠴᠢᠯᠠᠩ ᠳ᠋ᠤ᠌ ᠡᠷᠭᠢᠬᠦ ᠮᠥᠨ ᠪᠤᠶᠤ᠃ ᠬᠣᠭᠣᠰᠣᠨ ᠴᠢᠨᠠᠷ ᠤ᠋ᠨ ᠤᠬᠠᠭᠠᠨ ᠪᠢᠰᠢᠯᠭᠠᠨ ᠦᠢᠯᠡᠳᠬᠦ ᠨᠢ ᠨᠢᠰᠸᠠᠨᠢᠰ ᠪᠦᠬᠦᠨ ᠢ᠋ ᠪᠠᠷᠠᠬᠤ᠂ ᠪᠤᠷᠬᠠᠨ ᠤ᠋ ᠬᠤᠲᠤᠭ ᠣᠯᠬᠤ ᠮᠥᠨ ᠪᠤᠶᠤ ᠡᠰᠡᠪᠡᠰᠦ ᠪᠢᠰᠢ ᠪᠤᠶᠤ? ᠭᠡᠵᠦ ᠲᠥᠪᠡᠳ ᠢ᠋ᠶ᠋ᠡᠷ ᠠᠰᠠᠭᠤᠯᠠ᠃ ᠯᠠᠮᠠᠳᠠᠨ ᠲᠡᠭᠦᠨ ᠳ᠋ᠦ᠍ ᠬᠠᠷᠢᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠯᠠ᠃ ᠭᠤᠷᠪᠠᠨ ᠬᠡᠯᠡ ᠪᠡᠷ ᠭᠤᠷᠪᠠ ᠳᠠᠪᠲᠠᠨ ᠠᠰᠠᠭᠤᠬᠤ ᠳ᠋ᠤ᠌ ᠲᠡᠷᠡ ᠦᠭᠡ ᠬᠡᠯᠡᠵᠦ ᠡᠰᠡ ᠴᠢᠳᠠᠪᠠ᠃ ᠪᠤᠰᠤᠳ ᠤ᠋ᠨ ᠡᠮᠦᠨᠡ ᠡᠴᠡ ᠬᠠᠷᠢᠭᠤᠯᠬᠤ ᠶᠣᠰᠣ ᠦᠭᠡᠢ ᠲᠤᠯᠠ ᠮᠡᠳᠡᠳᠡᠭ ᠨᠢ ᠬᠠᠯᠠᠭᠯᠠᠵᠤ ᠪᠠᠢᠯᠠ᠃ ᠡᠭᠦᠨ ᠢ᠋ ᠢᠯᠠᠭᠳᠠᠭᠰᠠᠨ ᠳ᠋ᠤ᠌ ᠲᠣᠭᠠᠴᠠᠵᠤ ᠪᠠᠷᠠᠭᠤᠨ ᠮᠥᠷᠦᠨ ᠳ᠋ᠦ᠍ ᠨᠢ ᠭᠠᠷ ᠢ᠋ᠶ᠋ᠠᠨ ᠬᠦᠷᠭᠡᠭᠡᠳ ᠳᠠᠷᠠᠭᠠᠬᠢ ᠬᠥᠮᠦᠨ ᠳᠡᠭᠡᠷᠡ ᠣᠴᠢᠪᠠ᠃ ᠮᠠᠷᠠᠮᠪᠠ ᠴᠣᠯᠠ ᠲᠠᠢ ᠨᠢᠭᠡᠨ ᠠᠵᠢ᠃ ᠨᠢᠭᠡᠨᠲᠡ ᠮᠠᠷᠠᠮᠪᠠ ᠪᠣᠯᠬᠣᠷ ᠡᠮᠴᠢᠯᠡᠬᠦ ᠡᠷᠳᠡᠮ ᠲᠡᠭᠦᠰ ᠭᠡᠰᠡᠨ ᠦᠭᠡ ᠪᠣᠯᠤᠨᠠ᠃ ᠡᠢᠮᠦ ᠳ᠋ᠦ᠍ ᠲᠡᠭᠦᠨ ᠳ᠋ᠦ᠍ ᠮᠥᠨ ᠯᠡ ᠲᠠᠭᠠᠷᠬᠤ ᠠᠰᠠᠭᠤᠯᠲᠠ ᠥᠭᠪᠡᠯ ᠵᠣᠬᠢᠨᠠ᠃ 《ᡀᠠᠩᠲᠤᠪᠠᠴᠤᠩᠪᠤ ᠠ᠋ᠴᠠ ᠠᠰᠠᠭᠤᠳᠠᠭ ᠶᠤᠮ ᠤᠤ᠂ ᠡᠰᠡᠪᠡᠯ ᠴᠢᠮᠧᠢᠵᠢᠲᠦ ᠡᠴᠡ ᠤᠤ?》 ᠭᠡᠵᠦ ᠰᠠᠨᠵᠢ ᠳᠣᠲᠣᠷᠠ ᠪᠠᠨ ᠡᠷᠡᠭᠡᠯᠵᠡᠨ ᠪᠣᠳᠣᠯᠠ᠃ ᠣᠲᠠᠴᠢ ᠶ᠋ᠢᠨ ᠲᠠᠪᠤᠨ ᠤᠬᠠᠭᠠᠨ ᠪᠤᠶᠤ ᠱᠠᠵᠢᠭᠠ ᠳ᠋ᠤ᠌ (ᠡᠷᠬᠡᠲᠡᠨ ᠰᠢᠨᠵᠢᠬᠦ)᠂ ᠵᠠᠵᠢᠭᠠ ᠳ᠋ᠤ᠌ (ᠡᠮᠭᠡᠭ ᠰᠤᠳᠤᠯᠬᠤ)᠂ ᠮᠠᠨᠠᠵᠣᠲ (ᠶᠠᠰᠤ ᠪᠠᠷᠢᠬᠤ) ᠴᠢᠮᠧᠢᠵᠢᠲ (ᠡᠮ ᠪᠠᠷᠢᠬᠤ) ᡀᠠᠩᠲᠤᠪᠴᠢᠮᠪᠠ (ᠳᠣᠲᠣᠷᠠ ᠶ᠋ᠢᠨ ᠡᠮᠨᠡᠯᠭᠡ) ᠡᠳᠡᠭᠡᠷ ᠢ᠋ ᠰᠠᠨᠵᠢ ᠶᠡᠬᠡ ᠰᠣᠨᠢᠷᠬᠠᠨ ᠰᠤᠳᠤᠯᠵᠤ᠂ ᠰᠠᠢᠨ ᠮᠡᠳᠡᠳᠡᠭ ᠪᠣᠯᠤᠭᠰᠠᠨ ᠪᠠᠢᠯᠠ᠃ ᠮᠢᠩᠭᠠᠨ ᠮᠥᠴᠢ᠂ ᠲᠠᠪᠤᠨ ᠴᠤᠯᠤ ᠂ ᠭᠤᠷᠪᠠᠨ ᠬᠦᠷᠳᠦ ᠂ ᠠᠷᠪᠠᠨ ᠬᠣᠶᠠᠷ ᠰᠤᠳᠠᠰᠤ᠂ ᠲᠠᠪᠤᠨ ᠣᠨᠢᠰᠣ ᠶ᠋ᠢᠨ ᠲᠤᠬᠠᠢ ᠳ᠋ᠤ᠌ ᠮᠡᠳᠡᠬᠦ ᠦᠭᠡᠢ ᠶᠠᠭᠤᠮᠠ ᠦᠭᠡᠢ ᠪᠣᠯᠵᠠᠢ᠃ ᠬᠠᠷᠢᠨ ᠡᠮᠭᠡᠭ ᠰᠤᠳᠤᠯᠬᠤ᠂ ᠢᠯᠠᠩᠭᠤᠶᠠ ᠳᠣᠯᠣᠭᠠᠨ ᠲᠠᠮᠢᠷ ᠳᠣᠷᠣᠶᠢᠳᠠᠬᠤ ᠶ᠋ᠢ ᠡᠮᠨᠡᠬᠦ ᠳ᠋ᠦ᠍ ᠪᠡᠨ ᠠᠷᠠᠢ ᠳᠤᠲᠠᠮᠠᠭ᠂ ᠶᠠᠰᠤ ᠪᠠᠷᠢᠬᠤ ᠪᠤᠶᠤ ᠮᠠᠨᠠᠵᠣᠲ ᠤ᠋ᠨ ᠤᠬᠠᠭᠠᠨ ᠳ᠋ᠤ᠌ ᠲᠠᠭᠠᠷᠠᠤ ᠪᠠᠢᠪᠠ᠃
— ᠬᠦᠴᠢ ᠪᠡᠷ ᠢᠳᠡᠭᠴᠢ ᠶ᠋ᠢᠨ ᠠᠷᠪᠠᠨ ᠨᠢᠭᠡᠨ ᠴᠢᠳᠠᠯᠲᠠᠨ ᠠ᠋ᠴᠠ ᠯᠦᠨᠲᠡᠪᠠᠳᠭᠠᠰᠦᠮᠡ ᠳ᠋ᠦ᠍ ᠶᠠᠭᠤ ᠬᠡᠷᠡᠭ ᠪᠣᠯᠬᠤ ᠪᠢᠯᠡ? ᠭᠡᠵᠦ ᠰᠠᠨᠵᠢ ᠬᠠᠮᠤᠭ ᠤ᠋ᠨ ᠡᠩ ᠦ᠋ᠨ ᠰᠢᠬᠠᠮ ᠵᠦᠢᠯ ᠢ᠋ ᠰᠢᠩᠭᠠᠯ ᠬᠡᠯᠡ ᠪᠡᠷ ᠠᠰᠠᠭᠤᠵᠤ ᠣᠷᠬᠢᠭᠰᠠᠨ ᠴᠢᠨᠢ ᠨᠥᠭᠥᠭᠡᠬᠢ ᠮᠠᠷᠠᠮᠪᠠ ᠲᠡᠷᠡ ᠬᠡᠯᠡ ᠳ᠋ᠦ᠍ ᠲᠠᠭᠠᠷᠠᠤ ᠪᠠᠢᠭᠰᠠᠨ ᠤ᠋ ᠤᠯᠠᠮ ᠠ᠋ᠴᠠ ᠴᠤ᠌ ᠶᠤᠮ ᠤᠤ ᠬᠠᠷᠢᠭᠤᠯᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠯᠠᠮᠠ ᠨᠠᠷ ᠳᠤᠷᠠ ᠦᠭᠡᠢᠴᠡᠬᠦ ᠮᠡᠲᠦ ᠳᠦᠩᠭᠢᠨᠡᠯᠳᠦᠬᠦ ᠨᠢ ᠰᠣᠨᠣᠰᠤᠭᠳᠠᠯᠠ᠃ ᠮᠠᠷᠠᠮᠪᠠ ᠲᠡᠷᠡ ᠪᠡᠷ ᠣᠯᠠᠨ ᠳ᠋ᠤ᠌ ᠶᠡᠬᠡ ᠠᠯᠳᠠᠷᠰᠢᠭᠰᠠᠨ ᠬᠥᠮᠦᠨ ᠪᠠᠢᠯᠠ᠃ ᠭᠡᠪᠡᠴᠦ ᠰᠢᠩᠭᠠᠯ ᠬᠡᠯᠡ ᠪᠡᠷ ᠠᠰᠠᠭᠤᠯᠲᠠ ᠢᠷᠡᠨᠡ ᠭᠡᠵᠦ ᠪᠣᠳᠣᠭᠠ ᠦᠭᠡᠢ ᠶᠠᠪᠤᠵᠠᠢ᠃ ᠶᠠᠭᠤ ᠴᠤ᠌ ᠣᠢᠯᠠᠭᠠᠭᠠ ᠦᠭᠡᠢ ᠲᠤᠯᠠ ᠭᠤᠷᠪᠠᠨᠲᠠ ᠳᠠᠪᠲᠠᠬᠤ ᠳ᠋ᠤ᠌ ᠬᠠᠷᠢᠭᠤ ᠬᠡᠯᠡᠭᠰᠡᠨ ᠦᠭᠡᠢ᠃ ᠲᠡᠭᠡᠬᠦ ᠡᠴᠡ ᠲᠡᠭᠡᠬᠦ ᠭᠡᠵᠦ ᠰᠢᠩᠭᠠᠯ ᠢ᠋ᠶ᠋ᠠᠷ ᠯᠠ ᠠᠰᠠᠭᠤᠭᠠᠳ ᠪᠠᠢᠵᠠᠢ᠃ ᠬᠡᠳᠦ ᠬᠡᠳᠦᠨ ᠯᠠᠮᠠ ᠨᠣᠮ ᠬᠠᠶᠠᠯᠴᠠᠬᠤ ᠠ᠋ᠴᠠ ᠲᠠᠲᠠᠭᠠᠯᠵᠠᠨ ᠭᠠᠷᠴᠤ ᠶᠠᠪᠤᠯᠠ᠃ ᠲᠡᠳᠡ ᠳᠤᠷᠠ ᠦᠭᠡᠶᠢᠴᠡᠯ ᠢ᠋ᠶ᠋ᠡᠨ ᠢᠩᠭᠢᠵᠦ ᠢᠯᠡᠷᠬᠡᠢᠯᠡᠵᠡᠢ᠃
ᠠᠰᠠᠭᠤᠯᠲᠠ ᠶ᠋ᠢᠨ ᠳᠠᠷᠠᠭᠠᠬᠢ ᠲᠣᠬᠢᠶᠠᠯ ᠨᠢ ᠵᠢᠩᠵᠠᠢ ᠯᠠᠮᠠ ᠵᠠᠯᠰᠠᠡᠭ ᠲᠦ᠍ ᠳᠠᠭᠠᠷᠢᠯᠳᠤᠭᠰᠠᠨ ᠳ᠋ᠤ᠌ ᠰᠠᠨᠵᠢ ᠶᠡᠬᠡ ᠭᠠᠢᠬᠠᠯᠠ᠃ ᠭᠡᠪᠡᠴᠦ ᠠᠯᠠᠭᠠ ᠪᠠᠨ ᠬᠠᠪᠰᠤᠷᠤᠨ ᠴᠢᠩᠭᠠ ᠳᠣᠬᠢᠶᠠ ᠥᠭᠭᠦᠮᠡᠭᠴᠡ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ᠂
— ᠺᠱᠠᠲ᠋ᠷᠢ ᠪᠠ ᠪᠷᠠᠬᠠᠮᠠᠨ᠂ ᠸ ᠠᠰᠢᠶᠠ ᠪᠠ ᠰᠢᠳᠤᠷ ᠮᠥᠨ ᠸᠠᠰᠧᠲ᠋ᠳᠬᠠ ᠲᠡᠷᠢᠭᠦᠲᠡᠨ ᠳᠣᠯᠣᠭᠠᠨ ᠵᠠᠢᠭ ᠳᠣᠲᠣᠷᠠ ᠪᠡᠶᠡ᠂ ᠰᠡᠳᠬᠢᠯ᠂ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠪᠠᠷᠢᠵᠤ ᠴᠢᠳᠠᠪᠠᠯ ᠡᠨᠡᠬᠦ ᠠᠮᠢᠳᠤᠷᠠᠯ ᠳ᠋ᠤ᠌ ᠪᠠᠨ ᠶᠠᠭᠤ ᠪᠣᠯᠬᠤ ᠰᠠᠨ ᠪᠣᠯ? ᠭᠡᠵᠦ ᠠᠰᠠᠭᠤᠪᠠ᠃ ᠵᠠᠯᠰᠠᠡᠭ ᠵᠢᠩᠵᠠᠢ ᠬᠡᠩᠭᠡᠷᠭᠡ ᠴᠠᠩ᠂ ᠪᠦᠷᠢᠶᠡ ᠪᠢᠰᠬᠢᠭᠦᠷ᠂ ᠳᠠᠮᠠᠷᠤ ᠳᠣᠡᠭ᠌ᠷᠠᠭᠠ ᠠ᠋ᠴᠠ ᠥᠭᠡᠷᠡ ᠶᠠᠭᠤᠮᠠ ᠮᠡᠳᠡᠬᠦ ᠦᠭᠡᠢ ᠮᠥᠷᠲᠡᠭᠡᠨ ᠨᠣᠮ ᠬᠠᠶᠠᠯᠴᠠᠬᠤ ᠪᠠᠷ ᠢᠷᠡᠭᠰᠡᠨ ᠳ᠋ᠦ᠍ ᠨᠢ ᠰᠠᠨᠵᠢ ᠭᠠᠢᠬᠠᠵᠠᠢ᠃ ᠭᠡᠪᠡᠴᠦ ᠬᠥᠮᠦᠨ ᠢ᠋ ᠪᠤᠤ ᠪᠠᠰᠤ ᠭᠡᠳᠡᠭ ᠡᠷᠲᠡᠨ ᠦ᠌ ᠰᠤᠷᠭᠠᠯ ᠶᠣᠰᠣᠭᠠᠷ ᠪᠡᠶᠡ ᠪᠡᠨ ᠪᠠᠷᠢᠨ 《ᡀᠠᠷᠠᠮᠪᠠ ᠳ᠋ᠤ᠌ ᠲᠠᠯᠪᠢᠬᠤ ᠠᠰᠠᠭᠤᠯᠲᠠ ᠶ᠋ᠢ ᠵᠢᠩᠵᠡᠢ ᠳ᠋ᠦ᠍ ᠲᠠᠯᠪᠢᠬᠤ ᠴᠤ᠌ ᠭᠡᠵᠦ ᠳᠡ》 ᠭᠡᠮᠡᠨ ᠪᠣᠳᠣᠯᠠ᠃ ᠵᠢᠩᠵᠠᠢ ᠯᠠᠮᠠ ᠬᠠᠷᠢᠭᠤᠯᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠬᠠᠷᠢᠭᠤ ᠨᠢ ᠬᠣᠶᠠᠷᠬᠠᠨ ᠯᠠ ᠦᠭᠡ ᠬᠡᠷᠡᠭᠲᠡᠢ ᠭᠡᠳᠡᠭ ᠢ᠋ ᠴᠦ᠍ ᠶᠡᠬᠡᠩᠬᠢ ᠯᠠᠮᠠ ᠮᠡᠳᠡᠵᠦ ᠪᠠᠢᠵᠠᠢ᠃ ᠡᠢᠨ ᠬᠦ᠌ ᠨᠣᠮ ᠬᠠᠶᠠᠯᠴᠠᠬᠤ ᠨᠢ ᠳᠠᠯᠴᠠᠮ᠂ ᠵᠡᠩᠴᠠᠮ ᠭᠡᠳᠡᠭ ᠨᠤᠲᠠᠯᠠᠬᠤ᠂ ᠨᠢᠴᠤᠭᠠᠬᠤ ᠬᠣᠶᠠᠷ ᠡᠭᠡᠯᠵᠢᠯᠡᠨ ᠲᠡᠭᠦᠨ ᠢ᠋ ᠨᠢᠭᠡᠳᠬᠡᠨ ᠴᠣᠭᠯᠣᠮᠳᠠᠬᠤ ᠲᠡᠷᠢᠭᠦᠲᠡᠨ ᠬᠣᠣᠰᠯᠠᠵᠤ ᠦᠳᠡ ᠡᠴᠡ ᠡᠮᠦᠨᠡ ᠶ᠋ᠢᠨ ᠲᠤᠷᠰᠢ ᠦᠷᠭᠦᠯᠵᠢᠯᠡᠯᠡ᠃ ᠶᠡᠬᠡᠩᠬᠢ ᠠᠰᠠᠭᠤᠳᠠᠯ ᠨᠢ ᠬᠠᠷᠢᠭᠤ ᠦᠭᠡᠢ ᠦᠯᠡᠳᠡᠭᠰᠡᠨ ᠳ᠋ᠦ᠍ ᠰᠠᠨᠵᠢ ᠶ᠋ᠢᠨ ᠰᠡᠳᠬᠢᠯ ᠥᠶᠥᠭ ᠪᠠᠢᠯᠠ᠃ ᠨᠣᠮ ᠬᠠᠶᠠᠬᠤ ᠠᠵᠢᠯ ᠢ᠋ ᠲᠡᠳᠦᠢ ᠯᠡ ᠠᠩᠵᠠᠭᠠᠷᠠᠵᠤ ᠪᠡᠯᠡᠳᠬᠡᠭᠡ ᠦᠭᠡᠢ ᠳ᠋ᠦ᠍ ᠪᠡᠨ ᠪᠠᠷᠠᠪᠠᠡᠭᠬᠡᠢᠳ ᠦ᠋ᠨ ᠲᠣᠮᠣ ᠲᠣᠯᠣᠭᠠᠢ ᠯᠠᠮᠠ ᠨᠠᠷ ᠳᠠᠭᠠ ᠮᠠᠭᠤᠲᠠᠢᠬᠠᠨ ᠪᠠᠢᠯᠠ᠃ ᠶᠠᠭᠤᠨ ᠳ᠋ᠤ᠌ ᠲᠡᠷᠡ ᠶ᠋ᠢ ᠰᠠᠨᠵᠢ ᠮᠡᠳᠡᠭᠰᠡᠨ ᠦᠭᠡᠢ᠃
— ᠨᠣᠮ ᠬᠠᠶᠠᠯᠴᠠᠵᠤ ᠴᠣᠭᠣᠷᠠᠨ ᠭᠠᠷᠤᠭᠰᠠᠨ ᠳ᠋ᠤ᠌ ᠪᠠᠶᠠᠷ ᠬᠦᠷᠭᠡᠶᠡ! ᠭᠡᠵᠦ ᠠᠯᠢ ᠬᠡᠳᠦᠢᠨᠡᠢ ᠳᠣᠯᠢᠩᠭᠠᠷ ᠵᠠᠩ ᠲᠠᠢ ᠴᠣᠭᠰᠣᠩ ᠨᠢᠯᠤᠭᠤᠬᠠᠨ ᠳᠠᠭᠤ ᠪᠠᠷ ᠪᠠᠶᠠᠷ ᠬᠦᠷᠭᠡᠯᠡ ᠃
— ᠲᠡᠭᠦᠰᠬᠡᠯ ᠦᠭᠡᠢ ᠡᠷᠳᠡᠮᠲᠦ ᠪᠤᠶᠤ ᡀᠠᠷᠠᠮᠪᠠ ᠴᠣᠯᠠ ᠥᠭᠬᠦ ᠳ᠋ᠦ᠍ ᠪᠣᠯᠤᠮᠵᠢ ᠲᠠᠢ ᠬᠥᠮᠦᠨ ᠣᠢᠷᠠ ᠳ᠋ᠠᠭᠠᠨ ᠭᠠᠷᠤᠭᠠ ᠦᠭᠡᠢ᠃ ᠡᠨᠡ ᠮᠣᠩᠭᠣᠯ ᠶᠠᠭᠠᠬᠢᠭᠠᠳ ᠡᠢᠮᠦ ᠰᠦᠷᠡᠬᠡᠢ ᠪᠣᠯᠪᠠ? ᠭᠡᠵᠦ ᠪᠠᠷᠠᠪᠠᠡᠭ ᠬᠡᠢᠳ ᠦ᠋ᠨ ᠭᠢᠷᠭᠠᠴᠤᠤᠯ ᠬᠣᠭᠣᠷᠣᠨᠳᠣ ᠪᠠᠨ ᠶᠠᠷᠢᠵᠤ ᠪᠠᠢᠬᠤ ᠶ᠋ᠢ ᠰᠠᠨᠵᠢ ᠪᠠᠰᠠ ᠴᠢᠬᠢᠨ ᠦ᠌ ᠪᠡᠨ ᠦᠵᠦᠭᠦᠷ ᠢ᠋ᠶ᠋ᠡᠷ ᠰᠣᠨᠣᠰᠤᠭᠠᠳ ᠠᠪᠤᠯᠠ᠃
— ᠪᠢᠯᠢᠭ ᠦ᠋ᠨ ᠶᠡᠬᠡ ᠬᠠᠯᠠᠭᠤᠨ ᠣᠴᠢ ᠪᠠᠷ ᠠᠰᠠᠷᠣ ᠠᠳᠬᠠᠭ ᠤ᠋ᠨ ᠵᠥᠭᠡᠯᠡᠨ ᠬᠤᠷᠠ ᠪᠠᠭᠤᠬᠤ ᠶ᠋ᠢ ᠶᠡᠷᠦᠨᠳᠡᠭᠯᠡᠨᠡ! ᠭᠡᠵᠦ ᠨᠢᠭᠡ ᠬᠥᠮᠦᠨ ᠴᠢᠬᠢᠨ ᠳ᠋ᠦ᠍ ᠨᠢ ᠰᠢᠪᠡᠨᠡᠪᠡ᠃ ᠡᠷᠭᠢᠨ ᠬᠠᠷᠠᠪᠠᠯ ᠫᠠᠭ᠍ᠰᠠᠡᠭ ᠪᠠᠢᠯᠠ᠃ ᠲᠡᠷᠡ ᠶᠡᠷᠦ ᠪᠠᠶᠠᠷᠯᠠᠭᠰᠠᠨ ᠰᠢᠨᠵᠢ ᠦᠭᠡᠢ᠂ ᠬᠠᠷᠢᠨ ᠴᠤ᠌ ᠠᠭᠤᠷᠯᠠᠨ ᠳᠤᠷᠠ ᠦᠭᠡᠢᠴᠡᠭᠰᠡᠨ ᠮᠡᠲᠦ ᠴᠢᠷᠠᠢ ᠲᠠᠢ ᠬᠠᠷᠠᠭᠳᠠᠯᠠ᠃《ᠡᠨᠡ ᠫᠠᠭ᠍ᠰᠠᠡᠭ ᠶᠠᠭᠠᠬᠢᠭᠰᠠᠨ ᠠᠲᠠᠭᠠᠷᠬᠠᠤ ᠠᠮᠢᠲᠠᠨ ᠪᠣᠢ? ᠵᠢᠭ᠌ᠳᠠᠭᠠᠨ ᠤ᠋ ᠬᠢᠨ ᠮᠠᠨᠢ ᠴᠥᠮ ᠯᠡ ᠪᠠᠶᠠᠷ ᠬᠥᠭᠡᠷ ᠪᠣᠯᠵᠤ ᠪᠠᠢᠬᠤ ᠳ᠋ᠤ᠌ ᠡᠨᠡ ᠯᠡ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠫᠠᠳ ᠬᠠᠷᠠ ᠴᠢᠷᠠᠢᠯᠠᠴᠢᠬᠠᠭᠠᠳ ᠪᠠᠰᠠ ᠶᠠᠭᠤ ᠭᠡᠳ ᠪᠠᠢᠭᠠ ᠶᠤᠮ ᠪᠣᠢ? ᠪᠤᠷᠬᠠᠨ ᠤ᠋ ᠨᠣᠮᠣᠨ ᠠ᠋ᠴᠠ ᠠᠪᠤᠭᠰᠠᠨ ᠦᠭᠡ ᠪᠡᠷ ᠢ᠋ᠶ᠋ᠡᠨ ᠨᠠᠳᠠ ᠭᠠᠢᠬᠠᠭᠤᠯᠬᠤ ᠭᠡᠰᠡᠨ ᠶᠦ᠍ᠮ ᠪᠣᠯᠪᠠ ᠤᠤ?》 ᠭᠡᠵᠦ ᠰᠠᠨᠵᠢ ᠳᠣᠲᠣᠷᠠ ᠪᠠᠨ ᠪᠣᠳᠣᠯᠠ᠃
᠁ ᠮᠣᠩᠭᠣᠯ ᠤ᠋ᠨ ᠨᠢᠭᠡ ᠯᠠᠮᠠ ᠨᠣᠮ ᠬᠠᠶᠠᠯᠴᠠᠵᠤ ᠪᠠᠷᠠᠪᠠᠡᠭ ᠬᠡᠢᠳ ᠦ᠋ᠨ ᠬᠢᠨ ᠢ᠋ ᠫᠠᠭ ᠰᠠᠭᠤᠯᠭᠠᠭᠰᠠᠨ ᠲᠤᠬᠠᠢ ᠮᠣᠳᠣᠨ ᠤᠯᠠᠭᠠ ᠲᠠᠢ ᠴᠤᠤ ᠦᠭᠡ ᠨᠢ ᡀᠠᠰᠠ ᠳᠠᠶᠠᠭᠠᠷ ᠲᠠᠷᠬᠠᠪᠠ᠃ ᠲᠡᠷᠡ ᠦᠭᠡ ᠶ᠋ᠢᠨ ᠴᠠᠭᠠᠨᠠ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠶᠠᠭᠤᠮᠠ ᠨᠢᠭᠤᠭᠳᠠᠵᠤ ᠪᠠᠢᠭᠰᠠᠨ ᠢ᠋ ᠰᠠᠨᠵᠢ ᠲᠡᠷᠡ ᠡᠳᠦᠷ ᠲᠦ᠍ ᠪᠡᠨ ᠶᠡᠷᠦ ᠭᠠᠳᠠᠷᠯᠠᠭᠰᠠᠨ ᠦᠭᠡᠢ᠂ ᠬᠠᠷᠢᠨ ᠴᠤ᠌ ᠨᠡᠷᠡ ᠴᠤᠤ ᠲᠠᠢ ᠠᠮᠢᠲᠠᠳ ᠲᠠᠢ ᠨᠣᠮ ᠬᠠᠶᠠᠯᠴᠠᠵᠤ ᠳᠡᠢᠯᠦᠭᠰᠡᠨ ᠳ᠋ᠦ᠍ ᠪᠡᠨ ᠪᠠᠬᠠᠷᠬᠠᠬᠤ ᠰᠡᠳᠬᠢᠯ ᠲᠥᠷᠥᠵᠡᠢ᠂ ᠣᠯᠠᠨ ᠵᠢᠯ ᠬᠥᠮᠦᠨ ᠦ᠌ ᠭᠠᠵᠠᠷ ᠨᠣᠮ ᠱᠠᠭᠠᠢᠵᠤ ᠰᠠᠭᠤᠭᠰᠠᠨ ᠤ᠋ ᠪᠠᠨ ᠬᠡᠷᠡᠭ ᠢ᠋ ᠪᠦᠲᠦᠭᠡᠪᠡ ᠭᠡᠵᠦ ᠳᠣᠳᠢᠭᠠᠷᠬᠠᠨ ᠪᠣᠳᠣᠯ ᠲᠠᠢ ᠪᠠᠷ ᠰᠢᠪᠠᠷ ᠲᠠᠭᠠᠵᠠᠨ ᠳ᠋ᠤ᠌ ᠪᠠᠨ ᠪᠤᠴᠠᠵᠤ ᠢᠷᠡᠪᠡ᠃