《 ᠵᠦᠭᠡᠷ ᠡ ᠂ ᠵᠦᠭᠡᠷ 》 – ᠰ ᠂ ᠨᠠᠳᠮᠢᠳ " Зүгээр өө ᠂ зүгээр" – С ᠂ Надмид
306《 ᠵᠦᠭᠡᠷ ᠡ ᠂ ᠵᠦᠭᠡᠷ 》
ᠰ᠂ ᠨᠠᠳᠮᠢᠳ
(ᠱᠣᠭ ᠥᠭᠦᠯᠡᠯᠭᠡ )
ᠥᠩᠭᠡᠷᠡᠭᠰᠡᠨ ᠵᠤᠨ ᠤ᠋ ᠠᠳᠠᠭ ᠰᠠᠷᠠ ᠶ᠋ᠢᠨ ᠨᠢᠭᠡ ᠣᠷᠣᠢ ᠶᠤᠮᠰᠠᠨ᠃ ᠠᠵᠢᠯ ᠠ᠋ᠴᠠ ᠪᠠᠨ ᠲᠠᠷᠬᠠᠭᠠᠳ ᠭᠡᠷ ᠤᠷᠤᠭᠤ ᠪᠠᠨ ᠠᠯᠬᠤᠵᠤ ᠶᠠᠪᠤᠲᠠᠯᠠ 《 ᠭᠠᠯᠵᠠᠭᠤ 》 ᠳ᠋ᠠᠮᠪᠠ ᠭᠡᠭᠴᠢ ᠲᠠᠭᠠᠷᠠᠯᠳᠤᠳᠠᠭ ᠶᠤᠮ ᠪᠠᠢᠨᠠ᠃ ᠲᠡᠷᠡ ᠲᠠᠨᠢᠮᠠᠬᠠᠢᠷᠠᠨ ᠰᠦᠢᠳ ᠮᠠᠢᠳ ᠪᠣᠯᠵᠤ᠂ ᠨᠠᠮᠠ ᠶ᠋ᠢ ᠬᠣᠶᠠᠷ ᠰᠣᠭᠣ ᠪᠠᠷ ᠮᠢᠨᠢ ᠳᠡᠰ ᠲᠡᠪᠡᠷᠢᠨ ᠬᠥᠯ ᠢ᠋ ᠮᠢᠨᠢ ᠬᠥᠨᠳᠡᠢᠷᠡᠲᠡᠯᠡ ᠳᠡᠭᠡᠭᠰᠢ ᠡᠷᠭᠦᠭᠡᠳ ᠄
– ᠣᠸᠠ᠂ ᠪᠠᠰᠠ ᠡᠢᠮᠦ ᠰᠣᠨᠢᠨ ᠬᠥᠮᠦᠨ ᠲᠡᠢ ᠭᠡᠨᠡᠳᠲᠡ ᠤᠴᠠᠷᠠᠬᠤ ᠭᠡᠵᠢ᠃ ᠵᠠ ᠲᠡᠭᠡᠭᠡᠳ ᠪᠡᠶᠡ ᠴᠢᠨᠢ ᠰᠠᠢᠨ ᠤᠤ ? ᠵᠢᠭᠠᠬᠠᠨ ᠲᠤᠷᠠᠭᠠ ᠶᠤᠮ ᠤᠤ ᠳᠠ᠂ ᠠᠯᠢ ᠡᠰᠡᠪᠡᠯ ᠪᠦᠷ ᠲᠠᠷᠭᠤᠯᠠᠴᠢᠬᠠᠭᠰᠠᠨ ᠴᠦ᠍ ᠶᠦ᠍ᠮ ᠳ᠋ᠦ᠍ ᠭᠡᠮᠡᠨ ᠨᠢᠳᠦ ᠪᠡᠨ ᠲᠣᠮᠣ ᠵᠢᠵᠢᠭ ᠪᠣᠯᠭᠠᠨ ᠤᠴᠢᠷ ᠢ᠋ ᠨᠢ ᠣᠯᠤᠮᠠ ᠦᠭᠡᠢ ᠣᠯᠠᠨ ᠶᠠᠭᠤᠮᠠ ᠶᠠᠷᠢᠵᠤ ᠭᠠᠷᠤᠯᠠ᠃
ᠪᠢ ᠰᠠᠨᠳᠤᠷᠴᠤ ᠪᠡᠶᠡ ᠪᠡᠨ ᠰᠠᠢᠨ ᠪᠠᠢᠭᠠ ᠶ᠋ᠢ ᠶᠠᠭᠠᠷᠠᠨ ᠥᠴᠢᠭᠡᠳ᠂ ᠬᠠᠷᠢᠭᠤ ᠮᠡᠨᠳᠦ ᠮᠡᠳᠡᠪᠡᠯ ᠳ᠋ᠠᠮᠪᠠ᠄
– ᠵᠠ ᠡᠷᠬᠢᠮ ᠮᠢᠨᠢ ᠂ ᠴᠢ ᠪᠠᠢᠨᠠ ᠰᠢᠦ ᠂ ᠶᠡᠬᠡ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠶ᠋ᠢᠨ ᠣᠷᠣᠰ ᠬᠡᠯᠡᠨ ᠦ᠌ ᠪᠠᠭᠰᠢ ᠨᠠᠷ ᠠ᠋ᠴᠠ ᠴᠣᠬᠣᠮ ᠬᠡᠨ ᠢ᠋ ᠨᠢ ᠰᠠᠢᠨ ᠲᠠᠨᠢᠬᠤ ᠪᠣᠢ ᠭᠡᠵᠦ ᠠᠰᠠᠭᠤᠯᠠ᠃
– ᠬᠡᠨ ᠢ᠋ ᠨᠢ ᠴᠦ᠍ ᠰᠠᠢᠨ ᠲᠠᠨᠢᠬᠤ ᠦᠭᠡᠢ᠃
– ᠲᠡᠭᠡᠪᠡᠯ ᠲᠡᠳᠡᠨ ᠦ᠌ ᠲᠠᠨᠢᠯ ᠂ ᠳᠣᠲᠣᠨᠣ ᠬᠥᠮᠦᠰ ᠡᠴᠡ ᠮᠡᠳᠡᠬᠦ ᠶᠠᠭᠤᠮᠠ ᠪᠠᠢᠨᠠ ᠤᠤ ?
– ᠪᠠᠢᠬᠤ ᠦᠭᠡᠢ ᠶᠡᠷᠦ ᠲᠠᠨᠢᠬᠤ ᠦᠭᠡᠢ ᠃ ᠴᠢ ᠶᠠᠭᠠᠬᠢᠬᠤ ᠭᠡᠪᠡ ? ᠬᠡᠮᠡᠭᠰᠡᠨ ᠳ᠋ᠦ᠍ ᠳ᠋ᠠᠮᠪᠠ ᠨᠢᠭᠡ ᠶᠠᠭᠤᠮᠠ ᠬᠡᠯᠡᠮᠡᠷ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠴᠢᠷᠠᠢ ᠨᠢ ᠭᠡᠨᠡᠳᠲᠡ ᠬᠠᠴᠢᠨ ᠪᠣᠯᠤᠭᠠᠳ ᠄
– ᠵᠦᠭᠡᠷ ᠠ᠋ ᠂ ᠵᠦᠭᠡᠷ ᠭᠡᠯᠡ᠃
ᠳ᠋ᠠᠮᠪᠠ ᠠ᠋ᠴᠠ ᠠᠷᠠᠢ ᠴᠦ᠍ ᠰᠠᠯᠤᠭᠠᠳ ᠠᠷᠪᠠ ᠠᠯᠬᠤᠲᠠᠯᠠ 《 ᠲᠤᠮᠫᠷᠤᠭ 》 ᠬᠡᠮᠡᠬᠦ ᠳ᠋ᠣᠨᠤᠢ ᠲᠠᠢ ᠠᠭᠤᠯᠵᠠᠴᠢᠬᠠᠪᠠ᠃ ᠲᠠᠨᠢᠮᠠᠬᠠᠢᠷᠠᠬᠤ ᠪᠠᠰᠠ ᠰᠦᠢᠳ ᠮᠠᠢᠳ᠃ ᠲᠡᠷᠡ ᠪᠡᠷ ᠤᠷᠲᠤ ᠤᠯᠠᠭᠠᠨ ᠬᠡᠯᠡ ᠪᠡᠨ ᠪᠤᠯᠲᠠᠯᠵᠠᠭᠤᠯᠤᠨ᠄
– ᠰᠠᠢᠨ ᠤᠤ ? ᠬᠦᠢ᠂ ᠨᠥᠭᠦᠭᠡ ᠮᠠᠭᠤ ᠡᠪᠡᠳᠴᠢᠨ ᠲᠡᠢ ᠬᠡᠦᠬᠡᠨ ᠴᠢᠨᠢ ᠪᠡᠶᠡ ᠭᠠᠢᠭᠤᠢ ᠤᠤ ? ᠭᠡᠵᠦ ᠪᠠᠢᠨᠠ᠃
– ᠰᠠᠢᠨ ᠰᠠᠢᠨ᠂ ᠴᠢᠨᠦ ᠪᠡᠶᠡ᠂ ᠡᠬᠡᠨᠡᠷ ᠬᠡᠦᠬᠡᠳ ᠦ᠋ᠳ ᠴᠢᠨᠢ ᠰᠠᠢᠨ ᠯᠠ ᠪᠢᠵᠡ ᠳᠡ ᠭᠡᠪᠡᠯ᠂
– ᠨᠠᠢᠵᠠ ᠠ᠋᠂ ᠴᠢ ᠶᠡᠬᠡ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠶ᠋ᠢᠨ ᠲᠣᠭᠠᠨ ᠤ᠋ ᠪᠠᠭᠰᠢ ᠨᠠᠷ ᠠ᠋ᠴᠠ ᠬᠡᠨ ᠢ᠋ ᠨᠢ ᠰᠠᠢᠨ ᠲᠠᠨᠢᠬᠤ ᠪᠣᠢ ᠭᠡᠪᠡ᠃
– ᠬᠡᠨ ᠢ᠋ ᠴᠦ᠍ ᠲᠠᠨᠢᠬᠤ ᠦᠭᠡᠢ᠃
– ᠲᠡᠭᠡᠪᠡᠯ ᠲᠡᠳᠡᠨ ᠦ᠌ ᠣᠢᠷᠠ ᠳᠣᠲᠣᠨᠣ ᠬᠥᠮᠦᠰ ᠡᠴᠡ ᠲᠠᠨᠢᠬᠤ ᠤᠤ?
– ᠶᠡᠷᠦ ᠲᠠᠨᠢᠬᠤ ᠦᠭᠡᠢ ᠂ ᠴᠢ ᠶᠠᠭᠠᠬᠢᠬᠤ ᠪᠣᠢ? ᠭᠡᠪᠡ ᠂ ᠭᠡᠲᠡᠯᠡ ᠮᠥᠨ ᠯᠡ ᠴᠢᠷᠠᠢ ᠨᠢ ᠬᠤᠪᠢᠷᠠᠬᠤ ᠮᠡᠲᠦ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ᠄
– ᠵᠦᠭᠡᠷ ᠠ᠋ ᠂ ᠵᠦᠭᠡᠷ ᠭᠡᠵᠦ ᠬᠡᠯᠡᠩᠭᠦᠲᠡ ᠳᠠᠷᠤᠢ ᠰᠠᠯᠵᠤ ᠡᠦᠲᠦᠯᠡ ᠃ 《 ᠦᠭᠡᠢ ᠶᠡᠷᠦ ᠨᠢ ᠵᠦᠭᠡᠷ ᠠ᠋ ᠂ ᠵᠦᠭᠡᠷ ᠭᠡᠨᠡ ᠰᠢᠦ ᠃ ᠲᠡᠢᠮᠦ ᠪᠠᠢᠬᠤ ᠳ᠋ᠠᠭᠠᠨ ᠲᠠ ᠨᠠᠷ 》 ᠭᠡᠵᠦ ᠪᠣᠳᠣᠭᠠᠳ ᠬᠡᠳᠦ ᠠᠯᠬᠤᠲᠠᠯᠠ 《 ᠳᠣᠯᠭᠣᠨᠴᠣᠭ 》 ᠬᠤᠴᠢᠲᠤ ᠳᠣᠯᠵᠢᠳᠮᠠ ᠲᠠᠢ ᠲᠠᠭᠠᠷᠠᠯᠳᠤᠳᠠᠭ ᠶᠤᠮ ᠪᠠᠢᠨᠠ᠃ ᠭᠤᠷᠪᠠᠬᠠᠨ ᠬᠣᠨᠣᠭ ᠤᠨ ᠡᠮᠦᠨᠡ ᠠᠭᠤᠯᠵᠠᠭᠰᠠᠨ ᠠᠲᠠᠯᠠ ᠭᠤᠴᠢᠨ ᠵᠢᠯ ᠤᠴᠠᠷᠠᠭᠠ ᠦᠭᠡᠢ ᠠᠨᠳᠠ ᠨᠠᠢᠵᠠ ᠰᠢᠭ᠋ ᠰᠦᠵᠢᠷᠡᠵᠦ ᠰᠦᠢᠳ ᠪᠣᠯᠵᠤ ᠪᠠᠢᠭᠠ ᠭᠡᠳᠡᠭ ᠬᠠᠴᠢᠨ᠃
– ᠶᠠᠭ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠢᠨᠠ ᠰᠢᠦ ᠂ ᠮᠠᠭᠤ ᠴᠢᠰᠤ ᠴᠢᠨᠢ! ᠶᠠᠭᠠᠬᠢᠭᠰᠠᠨ ᠥᠲᠡᠯᠳᠡᠭ ᠦᠭᠡᠢ ᠯᠦᠲᠡ ᠪᠣᠢ ? ᠭᠡᠰᠡᠨ ᠢ᠋ᠶ᠋ᠡᠨ ᠤᠯᠠᠷᠢᠭᠰᠠᠨ ᠪᠠᠯᠠᠷᠠᠭᠰᠠᠨ ᠨᠢᠭᠡ ᠶᠠᠭᠤᠮᠠ ᠰᠠᠨᠠᠪᠠ ᠪᠣᠯᠣᠯᠲᠠᠢ ᠬᠢ᠂ ᠬᠢ ᠬᠥᠬᠥᠷᠡᠨ ᠬᠡᠰᠡᠭ ᠵᠠᠭᠤᠷᠠ ᠭᠡᠲᠡᠩ ᠭᠣᠳᠣᠩ ᠭᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠄
– ᠵᠠ ᠲᠡᠭᠡᠭᠡᠳ ᠰᠠᠢᠨ ᠯᠠ ᠪᠢᠵᠡ ᠳᠡ ᠭᠡᠪᠡ ᠃
– ᠰᠠᠢᠨ ᠪᠠᠢᠯᠭᠦᠢ ᠶᠠᠭᠠᠬᠢᠬᠤᠪ᠂ ᠴᠢᠨᠦ ᠪᠡᠶᠡ ᠯᠠᠭᠱᠠᠨ ᠁ ᠭᠡᠲᠡᠯᠡ᠂
– ᠬᠥᠶᠢ ᠡ᠂ ᠴᠢ ᠶᠡᠬᠡ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠶᠢᠨ ᠮᠣᠩᠭᠣᠯ ᠬᠡᠯᠡᠨ ᠦ ᠪᠠᠭᠰᠢ ᠨᠠᠷ ᠠᠴᠠ ᠬᠡᠨ ᠲᠠᠢ ᠨᠢ ᠬᠠᠮᠲᠤ ᠪᠠᠢᠭᠠ ᠪᠢᠯᠡ? ᠭᠡᠪᠡ᠃
– ᠲᠠᠨᠢᠬᠤ ᠪᠠᠢᠲᠤᠭᠠᠢ ᠨᠡᠷᠡ ᠶ᠋ᠢ ᠨᠢ ᠴᠦ᠍ ᠮᠡᠳᠡᠬᠦ ᠦᠭᠡᠢ᠃
– ᠲᠡᠭᠡᠪᠡᠯ ᠪᠠᠢᠨᠠ ᠰᠢᠦ᠂ ᠲᠡᠳᠡᠨ ᠦ ᠰᠠᠢᠨ ᠲᠠᠨᠢᠳᠠᠭ ᠬᠥᠮᠥᠨ ᠡᠴᠡ ᠁
– ᠦᠭᠡᠢ ᠡ᠂ ᠦᠭᠡᠢ ᠶᠡᠷᠦ ᠳ᠋ᠡᠭᠡᠨ ᠴᠢᠭ ᠲᠠᠨᠢᠬᠤ ᠦᠭᠡᠢ᠂ ᠴᠢ ᠶᠠᠭᠠᠬᠢᠬᠤ ᠪᠣᠢ? ᠬᠡᠮᠡᠪᠡᠯ ᠳᠤᠯᠵᠢᠳᠮᠠ ᠨᠢᠳᠦ ᠪᠡᠷ ᠢᠶᠡᠨ ᠨᠢᠭᠤᠷ ᠢ ᠮᠢᠨᠢ ᠵᠤᠯᠭᠠᠷᠠᠲᠠᠯᠠ ᠣᠷᠢᠶᠠᠯᠭᠠᠬᠤ ᠮᠡᠲᠦ ᠰᠢᠷᠪᠢ ᠲᠠᠲᠠᠭᠠᠳ ᠮᠥᠨ ᠯᠠ᠄
– ᠵᠠ ᠳᠠ᠂ ᠪᠠᠷᠤᠭ ᠯᠠ ᠵᠦᠭᠡᠷ ᠠᠰᠠᠭᠤᠭᠰᠠᠨ ᠶᠤᠮ ᠭᠡᠵᠦ ᠬᠡᠯᠡᠩᠭᠦᠲᠡ ᠤᠷᠲᠤ ᠭᠠᠷ ᠢ᠋ᠶ᠋ᠠᠨ ᠬᠠᠶᠠᠯᠠᠨ ᠡᠦᠲᠦᠯᠡ᠃
《ᠲᠡᠢᠮᠦ ᠪᠠᠢᠬᠠ ᠳ᠋ᠠ ᠴᠢ》 ᠭᠡᠰᠡᠨ ᠰᠢᠭ ᠳᠤᠯᠵᠢᠳᠮᠠ ᠬᠡᠦᠬᠡᠨ ᠦ ᠬᠣᠢᠨᠠ ᠠ᠋ᠴᠠ ᠬᠠᠷᠠᠨ ᠬᠠᠷᠠᠨ ᠪᠢ ᠭᠡᠷ ᠦ᠋ᠨ ᠵᠦᠭ ᠶᠠᠭᠠᠷᠠᠨ ᠠᠯᠬᠤᠯᠠ᠃ 《 ᠡᠨᠡ ᠨᠥᠭᠦᠳ ᠮᠠᠨᠢ ᠶᠠᠭᠤ ᠯᠠ ᠪᠣᠯᠤᠭᠠᠳ ᠶᠡᠬᠡ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠶ᠋ᠢᠨ ᠪᠠᠭᠰᠢ ᠨᠠᠷ ᠢ᠋ ᠰᠤᠷᠠᠭᠯᠠᠭᠠᠳ ᠪᠠᠢᠨᠠ ᠪᠣᠢ 》 ᠭᠡᠵᠦ ᠭᠠᠢᠬᠠᠨ ᠱᠠᠲᠤ ᠪᠠᠷ ᠦᠭᠰᠦᠨ ᠶᠠᠪᠤᠲᠠᠨᠠ ᠠᠢᠯ ᠤ᠋ᠨ ᠳᠡᠮᠪᠡᠭᠡ ᠡᠪᠦᠭᠡ ᠲᠠᠶᠠᠭ ᠤ᠋ᠨ ᠢ᠋ᠶ᠋ᠠᠨ ᠪᠠᠷᠢᠭᠤᠯ ᠢ᠋ᠶ᠋ᠠᠷ ᠲᠣᠬᠣᠢ ᠠ᠋ᠴᠠ ᠭᠣᠬᠠᠳᠠᠨ ᠪᠠᠷᠢᠵᠤ ᠵᠣᠭᠰᠣᠭᠠᠪᠠ᠃
– ᠬᠦᠦ ᠮᠢᠨᠢ ᠴᠢ ᠬᠦᠯᠢᠶᠡᠵᠡᠨᠡ ᠂ ᠶᠡᠬᠡ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠢᠮᠢ ᠹᠢᠽᠢᠺ ᠦ᠋ᠨ ᠪᠠᠭᠰᠢ ᠨᠠᠷ ᠠ᠋ᠴᠠ ᠰᠠᠢᠨ ᠲᠠᠨᠢᠳᠠᠭ ᠬᠥᠮᠦᠨ ᠪᠠᠢᠨ ᠤᠤ ? ᠭᠡᠵᠦ ᠰᠢᠯᠭᠠᠯᠠ᠃
– ᠬᠡᠨ ᠢ᠋ ᠴᠦ᠍ ᠲᠠᠨᠢᠬᠤ ᠦᠭᠡᠢ᠃
– ᠲᠡᠭᠡᠪᠡᠯ ᠳ᠋ᠧᠺᠡᠨ ( ᠰᠠᠯᠪᠤᠷᠢ ᠶ᠋ᠢᠨ ᠳᠠᠷᠤᠭᠠ ) ᠂ ᠲᠠᠩᠬᠢᠮ ᠤ᠋ᠨ ᠡᠷᠬᠢᠯᠡᠭᠴᠢ ᠨᠠᠷ ᠠ᠋ᠴᠠ ᠨᠢ ᠲᠠᠨᠢᠬᠤ ᠤᠤ ?
– ᠦᠭᠡᠢ ᠃
– ᠲᠡᠭᠡᠪᠡᠯ ᠬᠦᠦ ᠮᠢᠨᠢ ᠴᠢ ᠪᠣᠯᠪᠠᠰᠤᠷᠠᠯ ᠤ᠋ᠨ ᠶᠠᠮᠤᠨ ᠤ᠋ ᠳᠠᠷᠤᠭᠠ ᠠᠵᠢᠯᠲᠠᠨ ᠨᠤᠭᠤᠳ ᠠ᠋ᠴᠠ ᠲᠠᠨᠢᠬᠤ ᠤᠤ ?
– ᠲᠠᠨᠢᠬᠤ ᠦᠭᠡᠢ᠃
– ᠲᠡᠭᠡᠪᠡᠯ ᠲᠡᠳᠡᠨ ᠢ᠋ ᠰᠠᠢᠨ ᠲᠠᠨᠢᠳᠠᠭ ᠬᠥᠮᠦᠰ ᠡᠴᠡ ᠠᠯᠢ ᠨᠢᠭᠡ ᠡᠴᠡ ᠵᠢᠰᠦ ᠮᠡᠳᠡᠬᠦ ᠤᠤ ?
– ᠮᠡᠳᠡᠬᠦ ᠦᠭᠡᠢ᠃
– ᠦ ᠬᠠᠷᠠᠯᠠ !
– ᠡᠪᠦᠭᠡ ᠲᠠ ᠶᠠᠭᠠᠬᠢᠬᠤ ᠭᠡᠪᠡ ᠠ᠋ ?
– ᠵᠠ ᠳᠠ ᠬᠦᠦ ᠮᠢᠨᠢ ᠪᠠᠷᠤᠭ ᠯᠠ ᠵᠦᠭᠡᠷ ᠠ᠋ ! ᠭᠡᠵᠦ ᠬᠡᠯᠡᠭᠡᠳ ᠳᠡᠮᠪᠡᠭᠡ ᠡᠪᠦᠭᠡ ᠤᠷᠮᠠ ᠮᠠᠭᠤᠲᠠᠢᠬᠠᠨ ᠪᠣᠯᠵᠤ ᠲᠠᠶᠠᠭ ᠢ᠋ᠶ᠋ᠠᠨ ᠲᠣᠨᠨ ᠲᠤᠬ ᠳᠤᠤᠭᠠᠷᠭᠠᠨ ᠳᠣᠭᠣᠭᠰᠢ ᠤᠷᠤᠭᠤᠳᠠᠪᠠ᠃
《 ᠶᠠᠮᠠᠷ ᠬᠠᠴᠢᠨ ᠶᠤᠮ ᠪᠣᠢ ᠂ ᠶᠡᠬᠡ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠠ᠋ᠴᠠ ᠨᠢᠭᠡ ᠶᠡᠬᠡ ᠲᠣᠮᠣ ᠬᠥᠮᠦᠨ ᠨᠠᠰᠤ ᠪᠠᠷᠠᠭᠰᠠᠨ ᠶᠤᠮ ᠪᠣᠯᠪᠠ ᠤᠤ 》 ᠭᠡᠬᠦᠴᠢᠯᠡᠨ ᠪᠣᠳᠣᠭᠰᠠᠭᠠᠷ ᠭᠡᠷ ᠲᠡᠭᠡᠨ ᠣᠷᠣᠵᠤ ᠢᠷᠡᠲᠡᠯᠡ ᠡᠬᠡᠨᠡᠷ ᠄
– ᠮᠢᠨᠤ ᠡᠪᠦᠭᠡᠨ ᠶᠡᠬᠡ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠶ᠋ᠢᠨ ᠪᠠᠭᠰᠢ ᠨᠠᠷ ᠠ᠋ᠴᠠ ᠲᠠᠨᠢᠬᠤ ᠮᠡᠳᠡᠬᠦ ᠬᠥᠮᠦᠨ ᠴᠦ᠍ ᠪᠠᠢᠳᠠᠭ ᠦᠭᠡᠢ ᠪᠢᠵᠡ ᠳᠡ ᠭᠡᠵᠦ ᠪᠠᠢᠨᠠ᠃
– ᠪᠠᠢᠯᠭᠦᠢ ᠶᠠᠭᠠᠬᠢᠬᠤᠪ ᠂ ᠶᠠᠮᠠᠷ ᠬᠡᠷᠡᠭ ᠭᠠᠷᠪᠠ ᠠ᠋ ? ᠭᠡᠵᠦ ᠠᠯᠢ ᠪᠣᠯᠬᠤ ᠠᠶᠠᠲᠠᠢᠬᠠᠨ ᠢ᠋ᠶ᠋ᠠᠷ ᠠᠰᠠᠭᠤᠵᠤ ᠶᠠᠭᠤ ᠪᠣᠯᠤᠭᠰᠠᠨ ᠢ᠋ ᠬᠡᠯᠡᠭᠦᠯᠬᠦ ᠰᠠᠨᠠᠭᠠ ᠲᠠᠢ ᠣᠢᠷᠠᠲᠤᠨ ᠣᠴᠢᠵᠤ ᠰᠠᠭᠤᠪᠠᠯ᠂
– ᠵᠦᠭᠡᠷ ᠠ᠋ ᠂ ᠵᠦᠭᠡᠷ ᠭᠡᠵᠦ ᠪᠠᠢᠬᠤ ᠦᠭᠡᠢ ᠤᠤ᠃ ᠠᠭᠤᠷ ᠴᠦ᠍ ᠬᠦᠷᠬᠦ ᠰᠢᠭ !
– ᠶᠠᠭᠤᠨ ᠤ᠋ ᠴᠢᠨᠢ ᠵᠦᠭᠡᠷ ᠵᠦᠭᠡᠷ ᠭᠡᠵᠢ! ᠬᠡᠯᠡ ᠴᠢ ᠭᠡᠮᠡᠨ ᠰᠦᠷ ᠦᠵᠡᠭᠦᠯᠦᠨ ᠠᠶᠤᠯᠭᠠᠬᠤ ᠳᠦᠷᠢ ᠭᠠᠷᠭᠠᠪᠠᠯ ᠤᠭ ᠤ᠋ᠨ ᠠᠶᠤᠮᠠᠬᠠᠢ᠂ ᠪᠠᠰᠠ ᠠᠯᠢᠪᠠ ᠶ᠋ᠢ ᠨᠢᠭᠤᠵᠤ ᠰᠤᠷᠤᠭᠠ ᠦᠭᠡᠢ ᠡᠬᠡᠨᠡᠷ ᠮᠠᠨᠢ ᠄
– ᠮᠠᠨ ᠤ᠋ ᠶᠡᠷᠦᠩᠬᠡᠢ ᠨᠢᠭᠲᠠᠯᠠᠨ ᠤ᠋ ᠲᠣᠮᠣ ᠥᠬᠢᠨ ᠨᠢ ᠡᠨᠡ ᠵᠢᠯ ᠬᠤᠩᠺᠦᠶ᠋ᠷᠰ ① ᠲᠤ ᠣᠷᠣᠬᠤ ᠪᠣᠯᠵᠤ ᠭᠡᠨᠡ ᠭᠡᠪᠡ ᠃ ᠪᠢ ᠲᠡᠷᠡ ᠳᠠᠷᠤᠶ 《 ᠵᠠᠶᠠᠭᠠ ᠨᠢ ᠬᠠᠶᠠ᠂ ᠨᠡᠭᠡᠷᠡᠨ ᠮᠠᠷᠭᠠᠰᠢ ᠴᠢᠨᠢ ᠶᠡᠬᠡ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠶ᠋ᠢᠨ ᠡᠯᠰᠡᠯᠲᠡ ᠶ᠋ᠢᠨ ᠰᠢᠯᠭᠠᠯᠲᠠ ᠪᠣᠯᠬᠤ ᠭᠡᠵᠦ ᠪᠠᠢᠭᠠ ᠶᠤᠮ ᠪᠠᠢᠨᠠ ᠰᠢᠦ ᠳᠠ 》 ᠭᠡᠵᠦ ᠪᠣᠳᠣᠭᠠᠳ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠢᠨᠢᠶᠡᠳᠦ ᠠᠯᠳᠠᠯᠠ᠃
– – – –
① ᠤᠷᠤᠯᠳᠤᠭᠠᠨᠲᠤ ᠰᠢᠯᠭᠠᠯᠲᠠ ᠭᠡᠰᠡᠨ ᠤᠳᠬᠠ ᠲᠠᠢ ᠣᠷᠣᠰ ᠦᠭᠡᠨ ᠤ ᠮᠣᠩᠭᠣᠯᠴᠢᠯᠠᠭᠰᠠᠨ ᠳᠠᠭᠤᠳᠠᠯᠭᠠ᠃
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠤᠭ᠍ᠴᠢ ᠰᠠᠷᠠᠨᠠ
2023᠂ 12᠂ 18 ᠤ᠋ ᠡᠳᠦᠷ