ᠮᠠᠩᠨᠠᠢ ᠳᠤ ᠪᠣᠰᠳᠠᠭ ᠬᠥᠮᠦᠨ – ᠳ ᠂ ᠨᠠᠸᠠᠩᠰᠥ᠋ᠷᠦᠩ ( ᠴᠤᠪᠤᠷᠠᠯ ᠥᠭᠦᠯᠡᠯᠭᠡ) " Магнайд босдог хүн – Д ᠂ Наваансүрэн ( Цуврал өгүүллэг)
323ᠮᠠᠩᠨᠠᠢ ᠳᠤ ᠪᠣᠰᠳᠠᠭ ᠬᠥᠮᠦᠨ
ᠳ ᠂ ᠨᠠᠸᠠᠩᠰᠥ᠋ᠷᠦᠩ
( ᠴᠤᠪᠤᠷᠠᠯ ᠥᠭᠦᠯᠡᠯᠭᠡ)
ᠮᠠᠩᠨᠠᠢ ᠳ᠋ᠤ᠌ ᠪᠣᠰᠳᠠᠭ ᠬᠥᠮᠦᠨ ᠭᠡᠬᠦ ᠪᠡᠷ ᠲᠠ ᠨᠥᠬᠥᠳ ᠪᠥᠬᠡ ᠬᠥᠮᠦᠨ ᠦ᠌ ᠲᠤᠬᠠᠢ ᠶᠠᠷᠢᠬᠤ ᠨᠢ ᠭᠡᠵᠦ ᠰᠠᠨᠠᠭᠤᠵᠠᠢ᠃ ᠮᠠᠨ ᠤ᠋ ᠭᠣᠴᠣᠣ ᠪᠥᠬᠡ ᠬᠥᠮᠦᠨ ᠪᠢᠰᠢ ᠠ᠋᠃ ᠵᠢᠭᠠᠪᠤᠷᠢᠯᠠᠭᠴᠢ ᠬᠢᠳᠡᠭ ᠳᠠᠷᠠᠰᠤ ᠰᠢᠭ ᠨᠠᠷᠢᠬᠠᠨ ᠥᠨᠳᠥᠷ᠂ ᠣᠳᠣ ᠪᠠᠰᠠ ᠨᠠᠰᠤ ᠰᠡᠭᠦᠳᠡᠷ ᠨᠢ ᠵᠠᠭᠤ ᠶ᠋ᠢᠨ ᠲᠠᠯᠠ ᠳᠥᠭᠥᠵᠦ ᠶᠠᠪᠤᠭᠠ ᠶ᠋ᠢᠨ ᠬᠠᠷᠠᠭᠠ ᠪᠠᠷ ᠪᠠᠬᠠᠨ ᠳᠣᠬᠢᠢᠵᠤ ᠶᠠᠪᠤᠭᠠ ᠬᠥᠮᠦᠨ᠂ ᠭᠣᠴᠣᠣ ᠶ᠋ᠢ ᠮᠠᠨ ᠤ᠋ ᠬᠢᠨ ᠵᠠᠷᠢᠮ ᠳ᠋ᠠᠭᠠᠨ ᠳᠠᠷᠬᠠᠨ ᠠᠪᠤᠷᠭᠤ ᠭᠡᠳᠡᠭ᠃
ᠭᠣᠴᠣᠣ ᠶᠠᠭᠠᠬᠢᠭᠠᠳ ᠡᠢᠮᠦ ᠨᠡᠷᠡ ᠬᠡᠵᠢᠶᠡ ᠠᠪᠤᠭᠰᠠᠨ ᠢ᠋ ᠪᠢ ᠮᠡᠳᠡᠬᠦ ᠦᠭᠡᠢ ᠠ᠋᠂ ᠡᠨᠡ ᠬᠥᠮᠦᠨ ᠮᠠᠨ ᠤ᠋ ᠳ᠋ᠤ᠌ ᠢᠷᠡᠬᠦ ᠳ᠋ᠡᠭᠡᠨ ᠯᠡ ᠡᠢᠮᠦ ᠨᠡᠷᠡ ᠲᠡᠢ ᠪᠠᠢᠭᠰᠠᠨ ᠶᠤᠮ᠃ ᠭᠣᠴᠣᠣ ᠪᠢᠳᠡ ᠬᠣᠶᠠᠷ ᠠᠷᠪᠠᠭᠠᠳ ᠵᠢᠯ ᠨᠢᠭᠡ ᠳᠣᠣᠷᠠ ᠠᠵᠢᠯᠯᠠᠵᠤ ᠪᠠᠢᠭᠠ ᠶᠤᠮ᠃ ᠭᠣᠴᠣᠣ ᠰᠢᠭᠦᠮᠵᠢᠯᠡᠳᠡᠭ ᠴᠦ᠍ ᠪᠠᠢ ᠰᠢᠭᠦᠮᠵᠢᠯᠡᠳᠡᠭ ᠦᠭᠡᠢ ᠴᠦ᠍ ᠪᠠᠢ ᠬᠠᠮᠢᠭᠠ ᠦᠭᠡᠢ ᠲᠣᠮᠣ ᠵᠢᠵᠢᠭ ᠶᠠᠮᠠᠷ ᠯᠠ ᠬᠤᠷᠠᠯ ᠵᠥᠪᠯᠡᠯᠭᠡᠨ ᠪᠣᠯᠤᠨᠠ᠂ ᠠᠪᠴᠤ ᠳᠠᠪᠬᠢᠳᠠᠭ ᠣᠮᠣᠭᠯᠠᠩ ᠮᠣᠷᠢ ᠰᠢᠭ᠋ ᠲᠡᠷᠢᠭᠦᠯᠡᠨ ᠪᠣᠰᠴᠤ ᠪᠡᠯᠡᠨ ᠵᠠᠯᠠᠨ ᠬᠥᠪᠦᠭᠦᠯᠵᠦ ᠭᠠᠷᠤᠨᠠ᠃ ᠲᠡᠷᠡ ᠴᠦ᠍ ᠪᠠᠢᠲᠤᠭᠠᠢ ᠢᠯᠡᠳᠬᠡᠭᠴᠢ ᠢᠯᠡᠳᠬᠡᠯ ᠢ᠋ᠶ᠋ᠡᠨ ᠳᠤᠮᠳᠠ ᠨᠢ ᠣᠷᠣᠭᠠ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠪᠣᠰᠬᠤ ᠭᠡᠳ ᠥᠨᠳᠡᠯᠵᠡᠭᠡᠳ ᠤᠨᠠᠳᠠᠭ ᠶᠤᠮ᠃ ᠰᠠᠶ᠋ᠢᠬᠠᠨ ᠶᠠᠭᠠᠬᠢᠭᠠᠳ ᠴᠦ᠍ ᠪᠣᠢ ᠮᠠᠨ ᠤ᠋ ᠳ᠋ᠤ᠌ ᠨᠢᠭᠡ ᠡᠳᠦᠷ ᠭᠤᠷᠪᠠᠨ ᠬᠤᠷᠠᠯ ᠳᠠᠷᠠᠭᠠᠯᠠᠨ ᠪᠣᠯᠤᠯᠠ᠂ ᠡᠬᠢᠯᠡᠭᠡᠳ ᠬᠠᠷᠢᠭᠤᠴᠠᠯᠭᠠᠲᠠᠨ ᠤ᠋ ᠵᠥᠪᠯᠡᠯᠭᠡᠨ ᠪᠣᠯᠵᠤ ᠳᠠᠷᠠᠭᠠ ᠨᠢ ᠡᠪᠦᠯ ᠦ᠋ᠨ ᠪᠡᠯᠡᠳᠬᠡᠯ ᠦ᠋ᠨ ᠲᠤᠬᠠᠢ ᠡᠭᠦᠷᠭᠡ ᠥᠭᠬᠦ ᠳ᠋ᠦ᠍ ᠭᠣᠴᠣᠣ ᠪᠣᠯᠬᠤ ᠤᠤ ᠭᠡᠳ ᠯᠡ ᠪᠣᠰᠤᠯᠠ᠃
ᠬᠥᠮᠦᠰ ᠭᠣᠴᠣᠣ ᠶ᠋ᠢ ᠦᠭᠡ ᠬᠡᠯᠡᠬᠦ ᠪᠡᠷ ᠪᠣᠰᠬᠤ ᠪᠦᠷᠢ ᠰᠢᠪᠠᠷ ᠠᠪᠢᠷ ᠭᠡᠯᠴᠡᠨ ᠪᠥᠭᠡᠮ ᠱᠤᠤᠭᠢᠶᠠᠨ ᠪᠣᠯᠳᠠᠭ᠃ ᠭᠣᠴᠣᠣ ᠤᠷᠢᠲᠤᠳᠠᠭᠰᠠᠨ ᠶᠤᠮ ᠤᠤ ᠭᠡᠮᠡᠷ ᠤᠷᠲᠤ ᠲᠤᠷᠠᠩᠬᠠᠢ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠢᠯᠡᠳᠬᠡᠭᠴᠢ ᠶ᠋ᠢᠨ ᠰᠢᠷᠡᠭᠡ ᠲᠣᠬᠣᠢᠯᠳᠤᠨ ᠳᠠᠷᠤᠭᠠ ᠥᠭᠡᠳᠡ ᠬᠠᠭᠠᠰ ᠡᠷᠭᠢᠭᠡᠳ ᠶᠠᠷᠢᠵᠤ ᠭᠠᠷᠤᠯᠠ᠃ ᠶᠠᠷᠢᠭᠠᠳ ᠯᠠ ᠪᠠᠢᠬᠤ ᠶᠤᠮ ᠁ ᠶᠠᠷᠢᠭᠠᠳ ᠯᠠ ᠪᠠᠢᠬᠤ ᠶᠤᠮ ᠶᠠᠭᠤ ᠶᠠᠷᠢᠭᠠᠳ ᠪᠠᠢᠪᠠ? ᠳᠠᠷᠤᠭᠠ ᠶ᠋ᠢᠨ ᠢᠯᠡᠳᠬᠡᠯ ᠢ᠋ ᠡᠰᠢ ᠲᠠᠲᠠᠵᠤ ᠡᠨᠳᠡ ᠲᠡᠨᠳᠡ ᠨᠢ ᠳᠠᠷᠤᠭᠠ ᠶ᠋ᠢᠨ ᠬᠡᠯᠡᠳᠡᠭ ᠦᠨᠡᠨ᠂ ᠮᠠᠨ ᠤ᠋ ᠳᠤ ᠤᠳᠤᠷᠢᠳᠤᠯᠭᠠ ᠶ᠋ᠢᠨ ᠰᠢᠢᠳᠪᠦᠷᠢ ᠶ᠋ᠢ ᠮᠠᠭᠤ ᠪᠡᠶᠡᠯᠡᠭᠦᠯᠳᠡᠭ ᠬᠥᠮᠦᠨ ᠨᠠᠳᠠ ᠠ᠋ᠴᠠ ᠡᠬᠢᠯᠡᠭᠡᠳ ᠵᠥᠩᠳᠡᠭᠡᠨ ᠪᠠᠢᠨᠠ ᠯᠠ ᠭᠡᠬᠦ ᠶᠦᠮ᠃ ᠳᠠᠷᠤᠭᠠ ᠡᠪᠦᠯ ᠦ᠋ᠨ ᠪᠡᠯᠡᠳᠬᠡᠯ ᠬᠠᠩᠭᠠᠯᠲᠠ ᠦᠭᠡᠢ ᠪᠠᠢᠨᠠ ᠭᠡᠵᠦ ᠲᠠ ᠪᠢᠳᠡᠨ ᠳ᠋ᠦ᠍ ᠠᠩᠬᠠᠷᠤᠭᠤᠯᠵᠤ ᠪᠠᠢᠨᠠ᠃ ᠪᠢᠳᠡ ᠳᠣᠣᠷᠠ ᠪᠦᠷᠢᠨ ᠪᠣᠳᠣᠬᠤ ᠴᠠᠭ ᠪᠣᠯᠵᠠᠢ ᠯᠠ ᠭᠡᠨᠡ᠃ ᠲᠡᠭᠡᠭᠡᠳ ᠳᠠᠷᠤᠭᠠ ᠶ᠋ᠢᠨ ᠶᠠᠷᠢᠶᠠ ᠥᠭᠦᠯᠡᠪᠦᠷᠢ ᠪᠦᠷᠢ ᠶ᠋ᠢ ᠳᠠᠪᠲᠠᠭᠰᠠᠭᠠᠷ ᠬᠣᠶᠠᠷ ᠬᠥᠮᠦᠨ ᠦ᠌ ᠶᠠᠷᠢᠬᠤ ᠴᠠᠭ ᠨᠥᠭᠴᠢᠭᠡᠪᠡ᠃ ᠬᠥᠮᠦᠰ ᠴᠠᠭ ᠢ᠋ᠶ᠋ᠠᠨ ᠬᠠᠷᠠᠨ ᠳᠤᠷᠠ ᠦᠭᠡᠢᠴᠡᠨ ᠰᠢᠪᠡᠷ ᠠᠪᠢᠷ ᠭᠡᠯᠴᠡᠪᠡ᠃ ᠤᠴᠢᠷ ᠤᠳᠬᠠ ᠦᠭᠡᠢ ᠬᠡᠯᠬᠢᠶᠡ᠂ ᠬᠣᠯᠪᠣᠭᠳᠠᠬᠤ ᠦᠭᠡᠢ ᠬᠠᠴᠢᠨ ᠮᠠᠭᠲᠠᠭᠠᠯ ᠰᠣᠨᠣᠰᠴᠤ ᠡᠪ ᠦᠭᠡᠢ ᠪᠠᠢᠳᠠᠯ ᠳ᠋ᠤ᠌ ᠣᠷᠣᠭᠰᠠᠨ ᠳᠠᠷᠤᠭᠠ ᠴᠠᠭ ᠪᠣᠯᠵᠤ ᠪᠠᠢᠨᠠ ᠰᠠᠨᠠᠯ ᠢ᠋ᠶ᠋ᠠᠨ ᠬᠡᠯᠡ ᠭᠡᠵᠦ ᠬᠡᠳᠦᠨᠲᠡ ᠱᠠᠭᠠᠷᠳᠠᠪᠠ᠃ ᠭᠣᠴᠣᠣ ᠡᠴᠦᠰ ᠲᠦ ᠨᠢ ᠭᠡᠵᠦ ᠠᠷᠪᠠ ᠳᠠᠬᠢᠨ ᠳᠠᠪᠲᠠᠭᠠᠳ ᠶᠡᠨᠳᠡᠷ ᠡᠴᠡ ᠳᠤᠷᠠ ᠲᠠᠢ ᠳᠤᠷᠠ ᠦᠭᠡᠢ ᠪᠠᠭᠤᠵᠤ ᠢᠷᠡᠪᠡ᠃ ᠳᠠᠷᠠᠭᠠ ᠨᠢ ᠪᠦᠬᠦ ᠠᠵᠢᠯᠲᠠᠳ ᠤ᠋ᠨ ᠵᠥᠪᠯᠡᠯᠭᠡᠨ ᠦᠢᠯᠡᠳᠪᠦᠷᠢᠴᠢᠨ ᠦ᠌ ᠬᠣᠷᠢᠶᠠᠨ ᠤ᠋ ᠪᠦᠬᠦ ᠭᠡᠰᠢᠭᠦᠳ ᠦ᠋ᠨ ᠬᠤᠷᠠᠯ ᠳᠠᠷᠠᠭᠠᠯᠠᠨ ᠪᠣᠯᠬᠤ ᠳ᠋ᠤ᠌ ᠭᠣᠴᠣᠣ ᠠᠯᠢ ᠠᠯᠢᠨ ᠳ᠋ᠤᠨᠢ ᠰᠠᠨᠠᠯ ᠰᠢᠭᠦᠮᠵᠢᠯᠡᠯ ᠭᠠᠷᠭᠠᠴᠢᠬᠠᠳᠠᠭ ᠤ᠋ᠨ ᠮᠠᠩᠨᠠᠢ ᠳ᠋ᠤ᠌ ᠪᠣᠰᠤᠯᠠ᠃ ᠥᠷᠯᠥᠭᠡ ᠶ᠋ᠢᠨ ᠶᠠᠷᠢᠭᠰᠠᠨ ᠢ᠋ᠶ᠋ᠠᠨ ᠦᠭᠡ ᠦᠰᠦᠭ ᠬᠡᠭᠡᠯ ᠦᠭᠡᠢ ᠯᠡ ᠨᠤᠷᠰᠢᠨ ᠳᠠᠪᠲᠠᠵᠤ ᠭᠠᠷᠤᠯᠠ᠃ ᠣᠯᠤᠯᠲᠠ ᠠᠮᠵᠢᠯᠲᠠ ᠪᠠᠢᠨᠠ ᠯᠠ ᠭᠡᠨᠡ ᠳᠤᠲᠠᠭᠳᠠᠯ ᠬᠣᠴᠣᠷᠤᠭᠳᠠᠯ ᠵᠥᠩᠳᠡᠭᠡᠨ ᠯᠡ ᠭᠡᠨᠡ ᠰᠠᠢᠨ ᠢ᠋ ᠨᠢ ᠴᠦ᠍ ᠰᠠᠭᠠᠷ ᠢ᠋ ᠨᠢ ᠴᠦ᠍ ᠣᠨᠴᠠᠯᠠᠨ ᠴᠣᠬᠣᠵᠤ ᠤᠨᠤᠵᠤ ᠨᠡᠷᠡᠯᠡᠬᠦ ᠦᠭᠡᠢ ᠪᠦᠳᠦᠭᠦᠪᠴᠢᠯᠡᠵᠦ ᠪᠦᠷᠬᠦᠭᠳᠡᠭᠦᠯᠵᠦ ᠥᠩᠭᠡᠷᠡᠪᠡ᠃ ᠥᠨᠥᠳᠥᠷ ᠦ᠋ᠨ ᠭᠤᠷᠪᠠᠨ ᠬᠤᠷᠠᠯ ᠠ᠋ᠴᠠ ᠯᠠ ᠯᠠᠪ ᠨᠢᠭᠡ ᠴᠠᠭ ᠢ᠋ ᠨᠢ ᠭᠣᠴᠣᠣ ᠱᠣᠮᠪᠣᠳᠠᠴᠢᠬᠠᠯᠠ᠃ ᠬᠣᠷᠢᠨ ᠵᠢᠯ ᠠᠯᠪᠠ ᠬᠠᠭᠠᠵᠤ ᠮᠠᠩᠨᠠᠢ ᠳ᠋ᠤ᠌ ᠪᠣᠰᠳᠠᠭ ᠬᠥᠮᠦᠨ ᠭᠡᠳᠡᠭ ᠨᠡᠷᠡ ᠬᠣᠴᠢ ᠠᠪᠲᠠᠯᠠ ᠮᠥᠨ ᠴᠦ᠍ ᠣᠯᠠᠨ ᠴᠠᠭ ᠱᠣᠮᠪᠣᠳᠠᠭᠠᠳ ᠬᠠᠢᠷᠠᠨ ᠴᠠᠭ ᠠᠵᠢᠯ ᠳ᠋ᠤ᠌ ᠲᠤᠰᠠ ᠲᠠᠢ᠂ ᠠᠩᠬᠠᠷᠴᠤ ᠠᠪᠤᠭᠤᠰᠢᠲᠠᠢ ᠶᠠᠭᠤᠮᠠ ᠶᠠᠷᠢᠵᠤ ᠪᠠᠢᠭᠰᠠᠨ ᠢ᠋ ᠮᠠᠨ ᠤ᠋ ᠬᠢᠨ ᠮᠡᠳᠡᠬᠦ ᠦᠭᠡᠢ ᠶᠠᠭ ᠯᠠ ᠰᠠᠯᠬᠢᠨ ᠳ᠋ᠤ᠌ ᠳᠤᠤᠭᠠᠷᠴᠤ ᠪᠠᠢᠭᠠ ᠯᠣᠩᠬᠣ ᠰᠢᠭ᠋ ᠰᠠᠨᠠᠭᠳᠠᠳᠠᠭ ᠶᠤᠮ᠃ ᠡᠢᠮᠦ ᠬᠠᠴᠢᠨ ᠬᠥᠮᠦᠰ ᠡᠨᠳᠡ ᠲᠡᠨᠳᠡ ᠮᠡᠷ ᠰᠡᠷ ᠴᠦ᠍ ᠭᠡᠰᠡᠨ ᠲᠠᠭᠠᠷᠠᠯᠳᠤᠬᠤ ᠯᠠ ᠶᠤᠮ᠃ ᠬᠠᠷᠢᠨ ᠬᠠᠴᠢᠨ ᠡᠢᠮᠦ ᠬᠥᠮᠦᠰ ᠨᠢᠭᠡ ᠠᠯᠪᠠᠨ ᠭᠠᠵᠠᠷ ᠣᠯᠠᠨ ᠢ᠋ᠶ᠋ᠠᠷ ᠪᠥᠭᠡᠮ ᠪᠠᠢᠬᠤ ᠨᠢ ᠬᠣᠪᠣᠷ᠂ ᠰᠠᠢᠨ ᠯᠠ ᠪᠣᠯ ᠬᠣᠶᠠᠷ ᠪᠠᠢᠳᠠᠭ ᠶᠤᠮ᠃ ᠤᠴᠢᠷ ᠨᠢ ᠭᠡᠪᠡᠯ ᠡᠳᠡ ᠨᠢᠭᠡ ᠳᠣᠣᠷᠠ ᠪᠠᠢᠬᠤ ᠳ᠋ᠠᠭᠠᠨ ᠪᠡᠶᠡ ᠪᠡᠶᠡ ᠳ᠋ᠡᠭᠡᠨ ᠰᠦᠷᠡᠬᠡᠢ ᠬᠠᠯᠠᠲᠠᠢ ᠤᠴᠢᠷ ᠨᠢᠭᠡ ᠨᠢ ᠨᠥᠭᠦᠭᠡ ᠪᠡᠨ ᠨᠢᠳᠤᠷᠴᠢᠬᠠᠭᠠᠳ ᠪᠠᠢᠳᠠᠭ ᠶᠤᠮ᠃ ᠶᠠᠭᠠᠬᠢᠪᠠᠯ ᠳᠡᠭᠡᠷᠡ ᠪᠣᠢ? ᠬᠠᠷᠢᠨ ᠠ᠋᠂ ᠴᠡᠴᠡᠷᠯᠢᠭ ᠦ᠋ᠨ ᠳᠣᠲᠣᠷᠠᠬᠢ ᠰᠢᠷᠠᠯᠵᠢ ᠶ᠋ᠢ ᠶᠠᠭᠠᠬᠢᠳᠠᠭ ᠪᠢᠯᠡ ᠳᠠ᠃ ᠲᠡᠭᠡᠳᠡᠭ ᠯᠡ ᠬᠡᠷᠡᠭ ᠳᠡ᠃
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ
ᠬᠢᠨᠠᠭ᠍ᠴᠢ : ᠲᠤᠭ᠍ᠴᠢ ᠰᠠᠷᠠᠨᠠ
2023᠂ 12᠂ 10 ᠤ᠋ ᠡᠳᠦᠷ