《ᠰᠠᠢᠬᠠᠨ》ᠰᠠᠨᠠᠭᠠ ᠲᠠᠢ ᠬᠥᠮᠦᠨ – ᠳ ᠂ ᠨᠠᠸᠠᠩᠰᠥ᠋ᠷᠦᠩ ( ᠴᠤᠪᠤᠷᠠᠯ ᠥᠭᠦᠯᠡᠯᠭᠡ) " Сайхан " санаатай хүн – Д ᠂ Наваансүрэн ( Цуврал өгүүллэг)
271《ᠰᠠᠢᠬᠠᠨ》ᠰᠠᠨᠠᠭᠠ ᠲᠠᠢ ᠬᠥᠮᠦᠨ
ᠳ ᠂ ᠨᠠᠸᠠᠩᠰᠥ᠋ᠷᠦᠩ
( ᠴᠤᠪᠤᠷᠠᠯ ᠥᠭᠦᠯᠡᠯᠭᠡ)
ᠮᠠᠨ ᠤ᠋ ᠬᠢ ᠳᠣᠣᠷᠠ ᠠ᠋ᠴᠠ ᠳᠡᠭᠡᠷᠡ ᠪᠡᠨ᠂ ᠳᠡᠭᠡᠷᠡ ᠡᠴᠡ ᠳᠤᠤᠷᠠ ᠪᠠᠨ ᠬᠦᠷᠲᠡᠯᠡ ᠡᠪ ᠨᠢᠭᠡᠳᠦᠯ ᠲᠡᠢ᠂ ᠠᠵᠢᠯ ᠡᠭᠦᠷᠭᠡ ᠠᠯᠢᠪᠠ ᠪᠦᠬᠦᠨ ᠢ᠋ ᠨᠢᠭᠡᠨ ᠰᠠᠨᠠᠭᠠ ᠨᠢᠭᠡᠳᠦᠭᠰᠡᠨ ᠬᠦᠴᠦ ᠵᠣᠷᠢᠭ ᠢ᠋ᠶ᠋ᠠᠷ ᠬᠢᠳᠡᠭ᠂ ᠪᠦᠲᠦᠭᠡᠳᠡᠭ᠂ ᠬᠡᠯᠡᠯᠴᠡᠳᠡᠭ᠂ ᠰᠢᠢᠳᠳᠡᠭ ᠶᠣᠰᠣᠲᠠᠢ ᠲᠠᠪᠤᠨ ᠬᠤᠷᠤᠭᠤ ᠲᠡᠭᠰᠢ ᠬᠠᠮᠲᠤ ᠣᠯᠠᠨ ᠪᠢᠯᠡ᠃
ᠶᠠᠭᠤᠮᠠ ᠪᠦᠬᠦᠨ ᠳ᠋ᠦ᠍ ᠨᠢᠭᠡᠨ ᠬᠥᠮᠦᠨ ᠰᠢᠭ ᠰᠠᠨᠠᠭᠠ ᠰᠡᠳᠬᠢᠯ ᠨᠡᠢᠯᠡᠬᠦ ᠤᠴᠢᠷ ᠠᠵᠢᠯ ᠦᠢᠯᠡ᠂ ᠠᠮᠢᠳᠤᠷᠠᠯ ᠠᠬᠤᠢ᠂ ᠰᠤᠷᠤᠯᠭᠠ ᠬᠥᠳᠡᠯᠮᠦᠷᠢ ᠴᠠᠭ ᠢᠮᠠᠭᠲᠠ ᠥᠩᠭᠡᠲᠡᠢ᠂ ᠥᠭᠡᠳᠡ ᠲᠠᠢ ᠪᠠᠢᠳᠠᠭ᠃ ᠪᠡᠶᠡ ᠪᠡᠶᠡ ᠳ᠋ᠡᠭᠡᠨ ᠡᠯᠢᠭᠡᠰᠡᠭ ᠲᠤᠲᠤᠨᠤ᠂ ᠡᠪᠯᠢᠭ ᠨᠦᠬᠦᠷᠰᠡᠩ᠂ ᠲᠤᠳᠠᠭᠳᠠᠯ ᠢᠶᠠᠨ ᠴᠤ᠌᠂ ᠣᠯᠣᠯᠲᠠ ᠪᠠᠨ ᠴᠤ᠌ ᠦᠨᠡᠯᠡᠨᠡ᠂ ᠳ᠋ᠦᠩᠨᠡᠨᠡ᠂ ᠰᠢᠭᠦᠮᠵᠢᠯᠡᠨᠡ᠂ ᠲᠤᠩᠭᠠᠨᠠ᠂ ᠳᠡᠮᠵᠢᠨᠡ᠂ ᠳᠡᠯᠭᠡᠷᠡᠭᠦᠯᠦᠨᠡ᠃
ᠲᠡᠭᠡᠭᠰᠡᠨ᠂ ᠨᠢᠭᠡ ᠰᠠᠷᠠ ᠠᠵᠠ ᠦᠭᠡᠢ ᠪᠠᠢᠭᠠᠳ ᠢᠷᠡᠭᠰᠡᠨ ᠴᠢᠨᠢ ᠬᠡᠷᠡᠭ ᠪᠢᠰᠢᠳᠡᠵᠦ ᠬᠡᠩᠭᠡᠷᠭᠡ ᠬᠠᠭᠠᠷᠠᠭᠰᠠᠨ ᠪᠠᠢᠪᠠ᠃ ᠳᠠᠷᠤᠭᠠ ᠣᠷᠣᠯᠠᠭᠴᠢ ᠲᠠᠢ ᠪᠠᠨ᠂ ᠨᠢᠭ᠌ᠲᠠᠯᠠᠨ ᠨᠢᠷᠪᠠ ᠲᠠᠢ ᠪᠠᠨ᠂ ᠪᠠᠢᠴᠠᠭᠠᠭᠴᠢ ᠵᠢᠭᠠᠪᠤᠷᠢᠯᠠᠭᠴᠢ ᠲᠠᠢ ᠪᠠᠨ᠂ ᠪᠢᠴᠢᠭᠡᠴᠢ ᠵᠠᠷᠤᠯᠭᠠ ᠲᠠᠢ ᠪᠠᠨ᠂ ᠭᠠᠯᠴᠢ ᠮᠠᠨᠠᠭᠠᠴᠢ ᠲᠠᠢ ᠪᠠᠨ ᠬᠣᠨᠢ ᠴᠢᠨᠣᠠ ᠪᠣᠯᠴᠢᠬᠠᠭᠰᠠᠨ ᠨᠢᠭᠡ ᠨᠢ ᠭᠠᠯ ᠭᠡᠪᠡᠯ ᠨᠥᠭᠥᠭᠡ ᠨᠢ ᠤᠰᠤ ᠭᠡᠵᠦ᠂ ᠨᠢᠭᠡ ᠨᠢ ᠲᠡᠮᠡᠭᠡ ᠭᠡᠪᠡᠯ ᠨᠥᠭᠦᠭᠡ ᠨᠢ ᠢᠮᠠᠭᠠ ᠭᠡᠵᠦ ᠬᠡᠳᠡᠷᠯᠡᠵᠦ ᠶᠠᠷᠳᠠᠭᠯᠠᠵᠤ ᠬᠡᠷᠡᠭᠦᠯ ᠮᠠᠷᠭᠤᠭᠠᠨ ᠪᠣᠯᠣᠨᠠ᠃
ᠪᠡᠶᠡ ᠪᠡᠶᠡᠨ ᠢᠶᠡᠨ ᠨᠡᠬᠡᠷᠡᠨ ᠬᠠᠢᠷᠠᠯᠠᠨ ᠡᠶᠡᠯᠳᠡᠭ ᠵᠥᠭᠡᠯᠡᠨ ᠤᠭᠲᠤᠳᠠᠭ᠂ ᠠᠭᠤᠯᠵᠠᠳᠠᠭ᠂ ᠦᠨᠡᠨ ᠰᠠᠨᠠᠭᠠᠨ ᠠᠴᠠ ᠪᠠᠨ ᠬᠠᠷᠢᠯᠴᠠᠳᠠᠭ᠃ ᠨᠥᠬᠥᠷᠰᠡᠭ᠂ ᠨᠠᠢᠢᠵᠠᠷᠬᠠᠭ᠂ ᠰᠠᠢᠬᠠᠨ ᠵᠠᠩᠰᠢᠯ᠂ ᠬᠡᠷᠦᠭᠰᠡᠨ ᠭᠢᠯᠤᠢᠭᠰᠠᠨ᠂ ᠥᠲᠥᠭᠰᠡᠨ ᠰᠦᠲᠦᠭᠰᠡᠨ᠂ ᠶᠥᠭᠡᠭᠡᠭᠰᠡᠨ᠂ ᠶᠣᠭᠳᠠᠯᠠᠭᠰᠠᠨ ᠦᠭᠡ ᠠᠶᠠᠯᠭᠤ ᠰᠢᠷᠦᠭᠦᠨ ᠲᠤᠷᠢᠭᠤᠨ ᠢᠶᠠᠷ ᠰᠣᠯᠢᠭ᠍ᠳᠠᠵᠠᠢ᠃ ᠲᠡᠭᠦᠨ ᠦ ᠪᠤᠷᠤᠭᠤ᠂ ᠡᠭᠦᠨ ᠦ᠌ ᠪᠤᠷᠤᠭᠤ ᠭᠡᠵᠦ ᠨᠢᠭᠡ ᠨᠢ ᠨᠥᠭᠦᠭᠡ ᠳ᠋ᠡᠭᠡᠨ ᠲᠦᠯᠬᠢᠵᠦ ᠠᠵᠢᠯ ᠦᠢᠯᠡ ᠶᠢᠨ ᠡᠷᠴᠢ ᠬᠦᠴᠦ ᠴᠤ᠌ ᠰᠤᠯᠪᠠᠢᠭᠰᠠᠨ ᠤᠯᠪᠠᠢᠭᠰᠠᠨ ᠪᠠᠢᠪᠠ᠃ ᠬᠠᠮᠲᠤ ᠣᠯᠠᠨ ᠤ ᠥᠷᠨᠢᠭᠦᠨ ᠬᠥᠭᠵᠢᠬᠦᠨ ᠠᠭᠤᠯᠵᠠᠯᠲᠠ᠂ ᠦᠳᠡᠰᠢᠯᠡᠭᠡ᠂ ᠲᠣᠭᠯᠠᠭᠠᠮ᠂ ᠨᠠᠭᠠᠳᠤᠮ ᠪᠦᠷ ᠴᠥᠭᠡᠷᠡᠵᠦ ᠬᠠᠶᠠ ᠨᠢᠭᠡ ᠶᠠᠭᠤᠮᠠ ᠪᠣᠯᠪᠠᠯ ᠵᠣᠵᠢᠭ ᠢᠮᠠᠭᠠ ᠰᠢᠭ᠋ ᠭᠠᠭᠴᠠ ᠨᠢᠭᠡ ᠪᠡᠷ ᠢᠶᠡᠨ ᠳᠤᠷᠠ ᠪᠠᠷ ᠢᠶᠠᠨ ᠳᠣᠷᠬᠢᠵᠤ ᠠᠶᠠ ᠦᠭᠡᠢᠳᠡᠪᠡᠯ ᠬᠡᠷᠡᠭᠦᠯ ᠮᠠᠷᠭᠤᠭᠠᠨ ᠵᠣᠳᠣᠭᠠᠨ ᠴᠤᠤᠬᠢᠶᠠᠨ ᠴᠤ᠌ ᠬᠦᠷᠳᠡᠭ ᠪᠣᠯᠣᠯᠠ᠃
ᠤᠴᠢᠷ ᠢ᠋ ᠨᠢ ᠣᠯᠵᠤ ᠬᠤᠵᠢᠷ ᠢ᠋ ᠨᠢ ᠲᠤᠩᠭᠠᠬᠤ ᠭᠡᠵᠦ ᠬᠤᠷᠠᠯ ᠵᠥᠪᠯᠡᠯᠭᠡᠨ ᠬᠢᠨᠠᠯᠲᠠ ᠰᠢᠯᠭᠠᠯᠲᠠ ᠪᠢᠰᠢᠬᠦᠢ ᠣᠯᠠᠨ ᠬᠢᠵᠡᠢ᠃ ᠤᠳᠠᠯ ᠦᠭᠡᠢ ᠮᠠᠨ ᠤ ᠬᠢ ᠳᠣᠲᠣᠷᠠ ᠪᠠᠨ ᠬᠡᠳᠦ ᠬᠡᠳᠦᠨ ᠲᠠᠯᠠ ᠪᠣᠯᠵᠤ ᠲᠡᠳᠡ ᠥᠪᠡᠷ ᠬᠣᠭᠣᠷᠣᠨᠳᠤ ᠪᠠᠨ ᠬᠠᠯᠵᠠ ᠳᠤᠯᠬᠤ ᠪᠣᠯᠵᠤ ᠡᠨᠡ ᠪᠥᠬᠥᠨ ᠢ ᠰᠢᠭᠤᠳ ᠲᠤᠩᠭᠠᠬᠤ ᠭᠡᠵᠦ᠂ ᠴᠠᠭ ᠤᠷᠤᠰᠬᠠᠵᠤ᠂ ᠭᠣᠣᠯ ᠠᠵᠢᠯ ᠠᠷᠤ ᠳ᠋ᠤ᠌ ᠬᠣᠴᠣᠷᠵᠤ ᠭᠦᠢᠴᠡᠯᠡ᠃ ᠲᠣᠭᠲᠠᠮᠠᠯ ᠬᠤᠷᠠᠯ ᠲᠣᠭᠠ ᠠᠯᠳᠠᠵᠤ ᠲᠣᠢᠮᠦ ᠦᠭᠡᠢ ᠣᠯᠠᠨ ᠬᠥᠮᠥᠨ ᠦᠨᠳᠦᠰᠦᠨ ᠡᠭᠦᠷᠭᠡ ᠠᠵᠢᠯ ᠲᠥᠷᠥᠯ ᠢ᠋ᠶ᠋ᠡᠨ ᠣᠷᠬᠢᠵᠤ ᠡᠳᠦᠷ ᠰᠥᠨᠢ ᠦᠭᠡᠢ ᠨᠣᠢᠷ ᠬᠣᠭᠣᠯᠠ ᠦᠭᠡᠢ ᠰᠠᠭᠤᠵᠤ ᠪᠠᠢᠵᠤ ᠬᠡᠷᠡᠭ ᠦᠨ ᠡᠵᠡᠨ ᠬᠡᠩᠭᠡᠷᠭᠡ ᠶᠢᠨ ᠲᠣᠬᠢᠭᠤᠷ ᠬᠡᠨ ᠪᠣᠯᠬᠤ ᠶᠢ ᠠᠷᠠᠢ ᠴᠢᠷᠠᠢ ᠣᠯᠣᠯᠠ᠃ ᠠᠷᠭᠠᠮᠵᠢᠶᠠ ᠲᠠᠢ ᠠᠯᠠᠭ ᠮᠣᠷᠢ ᠪᠠᠨ ᠠᠳᠤᠭᠤᠨ ᠳ᠋ᠠᠭᠠᠨ ᠠᠯᠠᠭᠠ ᠭᠡᠵᠦ ᠡᠷᠢᠯ ᠳᠦ ᠠᠯᠤᠰᠯᠠᠨ ᠮᠣᠷᠳᠠᠭᠰᠠᠨ ᠲᠠᠭᠠᠷᠠᠦᠬᠠᠨ ᠮᠠᠯᠴᠢᠨ ᠰᠢᠭ᠋ ᠪᠢᠳᠠ ᠴᠤ᠌ ᠠᠷᠠᠢ ᠠᠯᠤᠰᠯᠠᠨ ᠮᠣᠷᠳᠠᠭᠰᠠᠨ ᠪᠠᠢᠵᠠᠢ᠃ ᠲᠡᠷᠡ ᠬᠣᠪ ᠤ᠋ᠨ ᠲᠤᠯᠤᠮ ᠬᠣᠶᠠᠷ ᠦᠵᠦᠭᠦᠷᠲᠡᠢ ᠵᠡᠭᠦᠦ ᠪᠢᠳᠡᠨ ᠦ᠌ ᠳᠡᠷᠭᠡᠳᠡ ᠪᠠᠢᠵᠠᠢ᠃ ᠮᠠᠨ ᠤ ᠳᠤ ᠴᠠᠮᠪᠠ ᠭᠡᠳᠡᠭ ᠨᠢᠭᠡ ᠬᠥᠮᠥᠨ ᠪᠠᠢᠳᠠᠭ᠃ ᠲᠡᠷᠡ ᠬᠥᠮᠦᠨ ᠡᠨᠳᠡᠬᠢ ᠶ᠋ᠢᠨ ᠠᠬᠠᠮᠠᠳ ᠠᠵᠢᠯᠲᠠᠨ ᠤ᠋ ᠨᠢᠭᠡ᠂ ᠬᠡᠯᠲᠡᠰ ᠦ᠋ᠨ ᠳᠠᠷᠤᠭᠠ ᠪᠢᠯᠡ᠃ ᠳᠡᠷᠭᠡᠳᠡ ᠪᠠᠨ ᠲᠠᠺᠲᠢᠺ ( ᠪᠠᠢᠯᠳᠤᠬᠤ ᠪᠣᠳᠣᠯᠭᠠ ) ᠲᠠᠢ᠂ ᠲᠠᠰᠢᠶᠠᠨ ᠳ᠋ᠠᠭᠠᠨ ᠨᠠᠭᠠᠨ ( ᠭᠠᠷ ᠫᠤᠤ ) ᠲᠠᠢ ᠭᠡᠭᠴᠢ ᠪᠡᠷ ᠮᠠᠨ ᠤ᠋ ᠴᠡᠮᠪᠡ ᠦᠵᠡᠭᠦᠯᠪᠡᠯ ᠳᠢᠫᠯᠤᠮ( ᠦᠨᠡᠯᠡᠬᠦ) ᠲᠡᠢ᠂ ᠵᠡᠭᠦᠪᠡᠯ ᠷᠣᠮᠪᠣ ( ᠰᠦᠢᠬᠡᠯᠵᠢᠨ ) ᠲᠡᠢ᠂ ᠰᠠᠢᠨ ᠭᠡᠳ ᠣᠨᠴᠠᠭᠠᠢᠯᠠᠨ ᠲᠡᠷᠢᠭᠦᠯᠡᠳᠡᠭ ᠦᠭᠡᠢ᠂ ᠮᠠᠭᠤ ᠭᠡᠳ ᠰᠡᠭᠦᠯᠳᠡᠵᠦ ᠬᠣᠴᠣᠷᠳᠠᠭ ᠦᠭᠡᠢ ᠶᠣᠰᠣᠲᠠᠢ ᠯᠠ ᠳᠤᠮᠳᠠᠴᠢ ᠬᠥᠮᠦᠨ᠃ ᠨᠠᠰᠤ ᠲᠣᠭᠲᠠᠭᠰᠠᠨ ᠳᠠᠭᠤ ᠴᠥᠭᠡᠨ ᠴᠠᠭ ᠢᠮᠠᠭᠲᠠ ᠨᠢᠭᠡ ᠶᠠᠭᠤᠮᠠ ᠲᠠᠶ ᠨᠣᠴᠣᠯᠳᠤᠵᠤ ᠰᠠᠭᠤᠨᠠ᠃ ᠬᠡᠷᠪᠡ ᠭᠠᠭᠴᠠ ᠬᠠᠭᠤᠳᠠᠰᠤ ᠠᠯᠪᠠᠨ ᠪᠢᠴᠢᠭ ᠲᠥᠯᠥᠪᠯᠡᠬᠦ ᠭᠡᠳ ᠬᠠᠭᠠᠰ ᠡᠳᠦᠷ ᠨᠤᠬᠤᠳᠠᠭ ᠢ᠋ ᠨᠢ ᠮᠡᠳᠡᠬᠦ ᠦᠭᠡᠢ ᠬᠥᠮᠦᠨ ᠪᠣᠯ ᠴᠠᠮᠪᠠ ᠶ᠋ᠢ ᠪᠦᠲᠦᠭᠡᠯᠴᠢ ᠬᠥᠮᠦᠨ ᠳ᠋ᠦ᠍ ᠲᠣᠭᠠᠴᠠᠬᠤ ᠪᠢᠯᠡ᠃ ᠭᠡᠰᠡᠨ ᠴᠤ᠌ ᠬᠥᠮᠦᠨ ᠭᠡᠮ ᠢ᠋ᠶ᠋ᠡᠨ ᠲᠡᠮᠡᠭᠡ ᠭᠡᠳᠡᠭᠡᠷ ᠢ᠋ᠶ᠋ᠡᠨ ᠶᠠᠮᠠᠷ ᠮᠡᠳᠡᠬᠦ ᠪᠢᠰᠢ᠂ ᠴᠡᠮᠪᠡ ᠥᠪᠡᠷ ᠢ ᠪᠡᠨ ᠪᠦᠬᠦᠨ ᠢ᠋ ᠮᠡᠳᠡᠳᠡᠭ ᠴᠢᠳᠠᠳᠠᠭ ᠬᠥᠮᠦᠨ ᠭᠡᠵᠦ ᠪᠣᠳᠣᠳᠠᠭ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ ᠶᠠᠭᠠᠬᠢᠵᠤ ᠡᠢᠵᠦ ᠪᠠᠢᠭᠠᠳ ᠠᠯᠪᠠᠨ ᠲᠤᠰᠢᠶᠠᠯ ᠤ᠋ᠨ ᠥᠨᠳᠥᠷᠯᠢᠭ ᠥᠭᠡᠳᠡ ᠨᠢᠭᠡᠨ ᠪᠣᠯᠪᠠᠴᠤ ᠱᠠᠲᠤ ᠠᠬᠢᠬᠤ ᠶ᠋ᠢ ᠬᠡᠵᠢᠶᠡᠨ ᠡᠴᠡ ᠪᠡᠨ ᠳᠣᠲᠣᠷᠠ ᠪᠠᠨ ᠠᠭᠤᠯᠵᠤ ᠶᠠᠪᠤᠳᠠᠭ ᠪᠠᠢᠵᠠᠢ᠃ ᠲᠡᠭᠡᠭᠡᠳ ᠲᠡᠷᠡ ᠠᠩ ᠴᠠᠪ ᠨᠢ ᠶᠠᠭ ᠯᠠ ᠰᠠᠭᠠᠵᠠᠩ ᠤ᠋ᠨ ᠠᠩ ᠴᠠᠪᠠ ᠰᠢᠭ᠋ ᠠᠭᠠᠵᠢᠮ ᠠᠭᠠᠵᠢᠮ ᠶᠡᠬᠡᠰᠦᠭᠰᠡᠭᠡᠷ ᠪᠠᠢᠵᠤ ᠴᠡᠮᠪᠡ ᠶ᠋ᠢᠨ ᠪᠣᠳᠣᠯ ᠢ᠋ᠶ᠋ᠠᠷ ᠥᠪᠡᠷ ᠢ᠋ ᠨᠢ ᠨᠢᠭᠡ ᠭᠢᠰᠬᠢᠭᠦᠷ ᠱᠠᠲᠤ ᠠᠬᠢᠬᠤ ᠳ᠋ᠤ᠌ ᠡᠨᠡ ᠪᠠᠢᠭᠤᠯᠭᠠ ᠶ᠋ᠢᠨ ᠬᠥᠮᠦᠰ ᠦ᠋ᠨ ᠡᠪ ᠲᠦᠨᠵᠢᠩ ᠰᠠᠳᠠᠭᠠ ᠪᠣᠯᠤᠭᠰᠠᠨ ᠠᠵᠢ᠃ ᠠᠷᠭᠠ ᠴᠠᠷᠭᠠ ᠬᠡᠷᠡᠭᠯᠡᠵᠦ ᠪᠠᠢᠭᠠᠳ ᠳᠠᠷᠤᠭᠠ ᠶ᠋ᠢ ᠲᠦᠯᠬᠢᠴᠢᠬᠡᠪᠡᠯ ᠣᠷᠣᠯᠠᠭ᠍ᠴᠢ ᠳᠠᠷᠤᠭᠠ ᠴᠤ᠌ ᠳᠡᠭᠡᠭᠰᠢ ᠨᠢᠭᠡ ᠭᠢᠰᠬᠢᠭᠦᠷ᠂ ᠪᠢ ᠴᠤ᠌ ᠣᠷᠣᠯᠠᠭ᠍ᠴᠢ ᠳᠠᠷᠤᠭᠠ ᠶ᠋ᠢᠨ ᠪᠠᠢᠷᠢ ᠤᠷᠤᠭᠤ ᠨᠢᠭᠡ ᠭᠢᠰᠬᠢᠭᠦᠷ ᠠᠬᠢᠨᠠ᠃ ᠣᠷᠣᠯᠠᠭᠴᠢ ᠳᠠᠷᠤᠭᠠ ᠶ᠋ᠢ ᠲᠦᠯᠬᠢᠴᠢᠬᠡᠪᠡᠯ ᠪᠢ ᠪᠠᠰᠠ ᠨᠢᠭᠡ ᠭᠢᠰᠬᠢᠭᠦᠷ ᠠᠬᠢᠨᠠ ᠭᠡᠵᠦ ᠪᠣᠳᠣᠬᠤ ᠳ᠋ᠠᠭᠠᠨ ᠬᠠᠮᠤᠭ ᠤ᠋ᠨ ᠲᠡᠷᠢᠭᠦᠨ ᠳ᠋ᠦ᠍ ᠳᠠᠷᠤᠭᠠ ᠣᠷᠣᠯᠠᠭᠴᠢ ᠬᠣᠶᠠᠷ ᠢ᠋ ᠮᠥᠷᠭᠥᠯᠳᠦᠬᠦᠯᠬᠦ ᠪᠡᠷ ᠡᠷᠡᠰᠯᠡᠨ ᠰᠢᠢᠳᠴᠡᠢ ᠃
ᠲᠡᠭᠡᠭᠡᠳ ᠡᠪ ᠢ᠋ ᠨᠢ ᠣᠯᠵᠤ ᠡᠭᠡᠵᠡᠭ ᠢ᠋ ᠨᠢ ᠲᠠᠭᠠᠷᠠᠭᠤᠯᠬᠤ ᠭᠡᠵᠦ ᠡᠳᠦᠷ ᠦ᠋ᠨ ᠪᠣᠳᠣᠯ ᠰᠥᠨᠢ ᠶ᠋ᠢᠨ ᠵᠡᠭᠦᠳᠦ ᠪᠣᠯᠵᠤ ᠲᠠᠷᠢᠬᠢ ᠲᠣᠯᠣᠭᠠᠢ ᠪᠠᠨ ᠣᠯᠠᠨ ᠬᠣᠨᠣᠭ ᠵᠣᠪᠠᠭᠠᠵᠠᠢ᠃
ᠴᠡᠮᠪᠡ ᠡᠷᠬᠢᠯᠡᠭᠰᠡᠨ ᠠᠵᠢᠯ ᠢ᠋ᠶ᠋ᠠᠨ ᠢᠩᠭᠢᠰ ᠳᠡᠭᠡᠰ ᠬᠢᠵᠦ ᠣᠷᠬᠢᠭᠠᠳ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣ ᠭᠤᠷᠪᠠ ᠶ᠋ᠢᠨ ᠳᠤᠮᠳᠠ ᠶᠠᠰᠤ ᠬᠠᠶᠠᠵᠤ ᠬᠣᠯᠢᠵᠤ ᠰᠦᠯᠡᠬᠦ ( ᠤᠷᠠᠨ ) ᠠᠷᠭᠠ ᠬᠠᠢᠵᠤ ᠤᠯᠠᠢᠷᠠᠨ ᠰᠠᠭᠤᠳᠠᠭ ᠪᠣᠯᠵᠠᠢ᠃ ᠲᠡᠭᠡᠲᠡᠯᠡ ᠨᠢ ᠨᠢᠭᠡ ᠡᠳᠦᠷ ᠮᠠᠨᠠᠭᠠᠴᠢ ᠴᠡᠪᠡᠷᠯᠡᠭᠴᠢ ᠬᠣᠶᠠᠷ ᠬᠥᠭᠰᠢᠨ ᠬᠣᠭᠣᠷᠣᠨᠳᠣ ᠪᠠᠨ ᠴᠢ ᠠᠵᠢᠯ ᠠ᠋ᠴᠠ ᠬᠣᠵᠢᠮᠳᠠᠯᠠ᠂ ᠴᠢ ᠥᠪᠡᠷ ᠢ᠋ᠶ᠋ᠡᠨ ᠤᠨᠲᠠᠳᠠᠭ ᠭᠡᠵᠦ ᠲᠣᠭᠯᠠᠵᠤ ᠪᠠᠢᠬᠤ ᠶ᠋ᠢ ᠰᠣᠨᠣᠰᠤᠭᠠᠳ ᠬᠥᠬᠡ ᠢᠨᠢᠶᠡᠳᠦ ᠨᠢ ᠬᠦᠷᠴᠡᠢ᠃ ᠡᠭᠦᠨ ᠡᠴᠡ ᠦᠵᠦᠭᠦᠷ ᠣᠯᠵᠤ ᠠᠩᠬᠠᠨ ᠤ᠋ ᠲᠤᠷᠰᠢᠯᠲᠠ ᠬᠢᠵᠡᠢ᠃ ᠮᠠᠨᠠᠭᠠᠴᠢ ᠡᠪᠦᠭᠡᠨ ᠳ᠋ᠦ᠍ ᠴᠡᠪᠡᠷᠯᠡᠭᠴᠢ ᠠᠪᠠᠭᠠᠢ ᠲᠠᠨ ᠢ᠋ ᠳᠡᠨᠭᠳᠡ ᠤᠨᠲᠠᠵᠤ ᠪᠠᠢᠳᠠᠭ ᠭᠡᠵᠦ ᠪᠠᠢᠨᠠ᠂ ᠬᠠᠰᠢᠷ ᠬᠥᠮᠦᠨ ᠠᠷᠠᠢ ᠦᠭᠡᠢ ᠪᠢᠵᠡ᠃ ᠬᠡᠷᠪᠡ ᠲᠡᠢᠮᠦ ᠪᠣᠯ ᠳᠡᠮᠡᠢ ᠰᠢᠦ᠂ ᠰᠠᠢᠬᠠᠨ ᠰᠠᠨᠠᠭᠠᠨ ᠳ᠋ᠠᠭᠠᠨ ᠡᠨᠡ ᠤᠳᠠᠭᠠ ᠥᠩᠭᠡᠷᠡᠭᠡᠶᠡ ᠭᠡᠵᠡᠢ᠃ ᠳᠠᠷᠠᠭᠠ ᠨᠢ ᠴᠡᠪᠡᠷᠯᠡᠭᠴᠢ ᠠᠪᠠᠭᠠᠢ ᠲᠠᠷ ᠠᠭᠤᠯᠵᠠᠭᠠᠳ ᠲᠠ ᠶᠡᠷᠦ ᠨᠢ ᠲᠠᠩᠳᠠ ᠠᠵᠢᠯ ᠠ᠋ᠴᠠ ᠪᠠᠨ ᠬᠣᠵᠢᠮᠳᠠᠳᠠᠭ ᠶᠤᠮ ᠤᠤ᠂ ᠮᠠᠨᠠᠭᠠᠴᠢ ᠡᠪᠦᠭᠡᠨ ᠲᠠᠨ ᠢ᠋ ᠲᠠᠩᠳᠠ ᠬᠣᠵᠢᠮᠳᠠᠳᠠᠭ ᠭᠡᠵᠦ ᠪᠠᠢᠨᠠ ᠭᠡᠵᠡᠢ᠃ ᠡᠪᠲᠡᠢ ᠰᠠᠢᠨ ᠪᠠᠢᠳᠠᠭ ᠡᠪᠦᠭᠡᠨ ᠡᠮᠡᠭᠡᠨ ᠬᠣᠶᠠᠷ ᠪᠡᠶᠡ ᠪᠡᠶᠡ ᠳ᠋ᠡᠭᠡᠨ ᠶᠠᠭᠤᠮᠠ ᠰᠠᠨᠠᠵᠤ ᠡᠬᠢᠯᠡᠵᠡᠢ᠃ ᠪᠢ ᠬᠡᠵᠢᠶᠡ ᠲᠡᠭᠡᠵᠦ ᠲᠠᠩᠳᠠ ᠤᠨᠲᠠᠵᠤ ᠪᠠᠢᠭᠰᠠᠨ ᠶᠤᠮ ᠪᠣᠢ ᠭᠡᠵᠦ ᠨᠢᠭᠡ ᠨᠢ ᠪᠣᠳᠣᠬᠤ ᠳ᠋ᠤ᠌᠂ ᠪᠢ ᠬᠡᠵᠢᠶᠡ ᠲᠡᠭᠡᠵᠦ ᠲᠠᠩᠳᠠ ᠠᠵᠢᠯ ᠠ᠋ᠴᠠ ᠪᠠᠨ ᠬᠣᠴᠣᠷᠴᠤ ᠪᠠᠢᠭᠰᠠᠨ ᠶᠤᠮ ᠪᠣᠢ ᠭᠡᠵᠦ ᠨᠥᠭᠦᠭᠡ ᠶ᠋ᠢᠨ ᠬᠢᠨᠢ ᠠᠭᠤᠷ ᠬᠦᠷᠴᠡᠢ᠃ ᠲᠡᠭᠡᠭᠡᠳ ᠡᠨᠡ ᠮᠠᠭᠤ ᠶᠠᠭᠠᠬᠢᠯᠠ ᠭᠡᠵᠦ ᠨᠠᠮᠠ ᠶ᠋ᠢ ᠮᠡᠳᠡᠵᠦ ( ᠳᠠᠯᠳᠠᠭᠤᠷ ᠬᠣᠪᠯᠠᠬᠤ) ᠪᠠᠢᠭᠠ ᠶᠤᠮ ᠪᠤᠢ᠃ ᠮᠠᠲᠠᠬᠤ ᠮᠠᠲᠠᠬᠤ ᠳ᠋ᠠᠭᠠᠨ ᠬᠡᠯᠲᠡᠰ ᠦ᠋ᠨ ᠳᠠᠷᠤᠭᠠ ᠳ᠋ᠤ᠌ ᠮᠡᠳᠡᠨᠡ ᠭᠡᠨᠡ ᠭᠡᠵᠦ ᠶᠠᠭᠤᠮᠠ ᠰᠠᠨᠠᠯᠴᠠᠨ ᠤᠳᠠᠯ ᠦᠭᠡᠢ ᠪᠡᠶᠡ ᠪᠡᠶᠡ ᠪᠡᠨ ᠭᠢᠯᠤᠢᠨ ᠥ ᠰᠡᠪ ᠡᠷᠢᠯᠴᠡᠬᠦ ᠪᠣᠯᠵᠠᠢ᠃ ᠠᠩᠬᠠᠨ ᠤ᠋ ᠬᠢᠨᠢ ᠲᠤᠷᠰᠢᠯᠲᠠ ᠠᠮᠵᠢᠯᠲᠠ ᠲᠠᠢ ᠪᠣᠯᠤᠭᠰᠠᠨ ᠳ᠋ᠤ᠌ ᠴᠡᠮᠪᠡ ᠳᠡᠯᠪᠡᠷᠡᠲᠡᠯᠡ ᠪᠡᠨ ᠪᠠᠶᠠᠷᠯᠠᠵᠤ ᠤᠷᠮᠠ ᠵᠣᠷᠢᠭ ᠨᠢ ᠨᠡᠮᠡᠭᠳᠡᠭᠡᠳ ᠳᠠᠯᠠᠢ ᠶ᠋ᠢᠨ ᠴᠢᠨᠡᠭᠡ ᠶ᠋ᠢ ᠠᠭᠤᠯᠠ ᠶ᠋ᠢᠨ ᠴᠢᠨᠡᠭᠡ ᠪᠣᠯᠭᠠᠵᠤ ᠡᠷᠭᠦᠨ ᠳᠡᠪᠡᠷᠡᠭᠡᠨ ᠥᠰᠬᠡᠨ ᠳᠠᠪᠤᠰᠤᠯᠠᠵᠤ ᠬᠥᠮᠦᠨ ᠪᠦᠷᠢ ᠶ᠋ᠢᠨ ᠬᠣᠭᠣᠷᠣᠨᠳᠣ ᠬᠣᠪ ᠵᠦᠭᠡᠭᠡᠵᠦ ᠬᠣᠯᠢᠶᠠᠨ ᠪᠠᠩᠲᠠᠩ ᠬᠤᠳᠬᠤᠵᠤ ᠣᠷᠬᠢᠵᠠᠢ᠃ ᠴᠡᠮᠪᠡ ᠬᠥᠮᠦᠨ ᠪᠦᠷᠢ ᠳ᠋ᠦ᠍ ᠯᠡ ᠪᠢ ᠴᠢᠮᠠ ᠳ᠋ᠤ᠌ ᠭᠡᠮ ᠦᠭᠡᠢ ᠰᠠᠨᠠᠭᠰᠠᠨ ᠳᠠᠭᠠᠨ ᠰᠠᠢᠬᠠᠨ ᠰᠠᠨᠠᠭᠠᠨ ᠲᠠᠭᠠᠨ ᠬᠡᠯᠡᠬᠦ ᠳ᠋ᠦ᠍ ᠲᠡᠷᠡ ᠴᠢᠮᠠ ᠶ᠋ᠢ ᠲᠡᠭᠡᠭᠡᠳ ᠯᠡ ᠪᠠᠢᠨᠠ᠂ ᠡᠨᠡ ᠴᠢᠮᠠ ᠶ᠋ᠢ ᠢᠩᠭᠢᠭᠡᠳ ᠯᠡ ᠪᠠᠢᠨᠠ ᠭᠡᠵᠦ ᠭᠦᠶᠦᠭᠰᠡᠭᠡᠷ ᠪᠠᠢᠭᠠᠳ ᠮᠠᠨ ᠤ᠋ ᠬᠢᠨ ᠢ᠋ ᠰᠢᠭᠤᠳᠠᠢ ᠳ᠋ᠤ᠌ ᠬᠢᠭᠰᠡᠨ ᠦᠬᠡᠷ ᠦ᠋ᠨ ᠡᠪᠡᠷ ᠰᠢᠭ ᠪᠣᠯᠭᠠᠵᠠᠢ᠃ ᠲᠡᠭᠡᠭᠡᠳ ᠲᠡᠷᠡ ᠴᠡᠮᠪᠡ ᠴᠢᠨᠢ ᠶᠠᠭᠠᠬᠢᠭᠰᠠᠨ ᠪᠣᠢ ᠶᠠᠭᠠᠬᠢᠬᠤ ᠶᠠᠭᠤ ᠪᠠᠢᠬᠤᠪ᠂ ᠨᠡᠢᠲᠡ ᠶ᠋ᠢᠨ ᠡᠮᠦᠨᠡ ᠨᠢᠭᠤᠷ ᠢ᠋ᠶ᠋ᠠᠨ ᠤᠯᠠᠢᠯᠭᠠᠵᠤ ᠨᠢᠳᠦ ᠪᠡᠨ ᠪᠦᠯᠲᠡᠢᠯᠭᠡᠵᠦ ᠵᠥᠷᠢᠭᠦᠦ ᠪᠡᠨ ᠰᠣᠨᠣᠰᠴᠤ ᠪᠤᠷᠤᠭᠤ ᠪᠠᠨ ᠬᠦᠯᠢᠶᠡᠭᠡᠳ ᠳᠡᠭᠡᠭ᠍ᠰᠢ ᠨᠢᠭᠡ ᠬᠢᠰᠭᠡᠭᠦᠷ ᠠᠬᠢᠬᠤ ᠨᠢ ᠪᠣᠣ ᠬᠡᠯᠡ᠂ ᠳᠣᠷᠣᠭ᠍ᠰᠢ ᠬᠣᠶᠠᠷ ᠱᠠᠲᠤ ᠭᠤᠯᠠᠰᠴᠤ ᠣᠷᠬᠢᠭ᠍ᠰᠠᠨ ᠶᠤᠮ᠃ ᠥᠭᠡᠷᠡ ᠶᠢ ? ᠪᠣᠯᠣᠨᠠ ᠪᠣᠯᠣᠨᠠ᠃
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠤᠭ᠍ᠴᠢ ᠰᠠᠷᠠᠨᠠ
2023᠂ 12᠂ 7 ᠤ᠋ ᠡᠳᠦᠷ