ᠰᠠᠢᠬᠠᠨ ᠢᠨᠢᠶᠡᠳᠡᠭ ᠬᠥᠮᠦᠨ – ᠳ ᠂ ᠨᠠᠸᠠᠩᠰᠥ᠋ᠷᠦᠩ ( ᠴᠤᠪᠤᠷᠠᠯ ᠥᠭᠦᠯᠡᠯᠭᠡ) Сайхан инээдэг хүн – Д ᠂ Наваансүрэн ( Цуврал өгүүллэг)
311ᠰᠠᠢᠬᠠᠨ ᠢᠨᠢᠶᠡᠳᠡᠭ ᠬᠥᠮᠦᠨ
ᠳ ᠂ ᠨᠠᠸᠠᠩᠰᠥ᠋ᠷᠦᠩ
( ᠴᠤᠪᠤᠷᠠᠯ ᠥᠭᠦᠯᠡᠯᠭᠡ)
ᠮᠠᠭᠤᠬᠠᠢ ᠢᠨᠢᠶᠡᠳᠡᠭ ᠬᠥᠮᠦᠨ ᠭᠡᠵᠦ ᠨᠡᠭᠡᠷᠡᠨ ᠬᠠᠮᠢᠭᠠ ᠨᠢ ᠪᠠᠢᠬᠤᠪ᠃ ᠬᠥᠮᠦᠨ ᠪᠦᠷ ᠯᠡ ᠥᠪᠡᠷ ᠢ᠋ ᠪᠡᠨ ᠰᠠᠢᠬᠠᠨ ᠢᠨᠢᠶᠡᠳᠡᠭ ᠭᠡᠵᠦ ᠰᠠᠨᠠᠳᠠᠭ᠃ ᠭᠡᠬᠦ ᠳ᠋ᠡᠭᠡᠨ ᠢᠨᠢᠶᠡᠬᠦ ᠣᠯᠠᠨ ᠶᠠᠩᠵᠤ ᠯᠠ ᠳᠠ᠃ ᠠᠩᠭᠠᠢᠵᠤ ᠠᠷᠰᠠᠢᠵᠤ᠂ ᠤᠷᠪᠠᠢᠵᠤ ᠳᠠᠷᠪᠠᠢᠵᠤ᠂ ᠤᠬᠢᠯᠠᠩᠨᠠᠵᠤ ᠤᠤᠬᠢᠯᠠᠵᠤ᠂ ᠦᠷᠴᠡᠢᠵᠦ ᠳᠠᠷᠴᠡᠢᠵᠦ᠂ ᠢᠷᠪᠠᠢᠵᠤ ᠶᠠᠩᠲᠠᠢᠵᠤ᠂ ᠢᠷᠠᠭᠯᠠᠵᠤ ᠢᠨᠴᠠᠭᠯᠠᠵᠤ᠂ ᠮᠠᠨᠴᠠᠢᠵᠦ ᠴᠢᠨᠴᠠᠢᠵᠦ᠂ ᠬᠠᠬᠠᠵᠤ ᠴᠠᠴᠠᠵᠤ᠂ ᠬᠠᠨᠢᠶᠠᠯᠭᠠᠵᠤ ᠨᠠᠢᠲᠠᠭᠠᠵᠤ᠂ ᠳᠣᠮᠪᠣᠢᠵᠤ ᠪᠥᠮᠪᠥᠢᠵᠦ᠂ ᠵᠢᠮᠡᠢᠵᠦ ᠣᠮᠣᠢᠵᠤ᠂ ᠲᠠᠴᠢᠭᠢᠨᠠᠵᠤ ᠫᠠᠴᠢᠭᠢᠨᠠᠵᠤ᠂ ᠲᠠᠲᠠᠭᠠᠯᠵᠠᠵᠤ ᠠᠲᠠᠭᠠᠯᠵᠠᠵᠦ᠂ ᠲᠠᠭᠯᠠᠵᠤ ᠪᠥᠭᠯᠡᠵᠦ ᠠᠯᠢ ᠣᠯᠠᠨ ᠶᠠᠩᠵᠤ ᠪᠠᠷ ᠢᠨᠢᠶᠡᠬᠦ ᠶ᠋ᠢ ᠲᠣᠭᠠᠴᠢᠵᠤ ᠪᠠᠷᠠᠬᠤ ᠪᠣᠢ᠃ ᠮᠠᠨ ᠤ᠋ ᠭᠢᠯᠮᠠᠭᠠᠨ ᠡᠨᠡ ᠪᠦᠬᠦᠨ ᠡᠴᠡ ᠱᠠᠯ ᠥᠭᠡᠷᠡ ᠪᠡᠷ ᠢᠨᠢᠶᠡᠨᠡ᠃ ᠭᠢᠯᠮᠠᠭᠠᠨ ᠢ᠋ ᠢᠨᠢᠶᠡᠬᠦ ᠳ᠋ᠦ᠍ ᠳᠡᠷᠭᠡᠳᠡ ᠨᠢ ᠬᠡᠳᠦᠨ ᠯᠡ ᠬᠥᠮᠦᠨ ᠪᠠᠢᠨᠠ ᠴᠥᠮ ᠳᠠᠭᠠᠵᠤ ᠢᠨᠢᠶᠡᠨᠡ᠃ ᠢᠨᠢᠶᠡᠬᠦ ᠪᠡᠷ ᠦᠭᠡᠢ ᠶᠠᠭᠤᠮᠠᠨ ᠳᠡᠭᠡᠷᠡ ᠯᠡ ᠭᠢᠯᠮᠠᠭᠠᠨ ᠢᠨᠢᠶᠡᠨᠡ᠂ ᠢᠨᠢᠶᠡᠬᠦ ᠢᠨᠢᠶᠡᠬᠦ ᠳ᠋ᠡᠭᠡᠨ ᠤᠴᠢᠷᠲᠠᠢ ᠨᠢ ᠠᠷᠭᠠ ᠦᠭᠡᠢ ᠢᠨᠢᠶᠡᠨᠡ᠃ ᠲᠡᠭᠡᠭᠡᠳ ᠮᠠᠨ ᠤ᠋ ᠬᠢᠨ ᠤᠭ ᠨᠢ ᠶᠣᠭᠳᠠᠯᠠᠵᠦ ᠭᠢᠯᠮᠠᠭᠠᠨ ᠢ᠋ ᠰᠠᠢᠬᠠᠨ ᠢᠨᠢᠶᠡᠳᠡᠭ ᠬᠥᠮᠦᠨ ᠭᠡᠵᠦ ᠨᠡᠷᠡᠯᠡᠭᠰᠡᠨ ᠪᠢᠯᠡ᠃ ᠪᠢᠳᠡᠨ ᠦ᠌ ᠡᠨᠡ ᠰᠠᠨᠠᠭᠠ ᠶ᠋ᠢ ᠭᠢᠯᠮᠠᠭᠠᠨ ᠲᠤᠩᠭᠠᠭᠰᠠᠨ ᠡᠰᠡᠬᠦ ᠶ᠋ᠢ ᠪᠤᠤ ᠮᠡᠳᠡ᠂ ᠶᠠᠮᠠᠷ ᠴᠤ᠌ ᠭᠡᠰᠡᠨ ᠡᠨᠡ ᠨᠡᠷᠡ ᠳ᠋ᠦ᠍ ᠳᠤᠷᠠᠲᠠᠢ ᠪᠢᠯᠡ᠃ ᠭᠢᠯᠮᠠᠭᠠᠨ ᠳᠡᠭᠡᠳᠦ ᠳᠠᠪᠬᠤᠷ ᠲᠤ ᠢᠨᠢᠶᠡᠵᠦ ᠪᠠᠢᠭᠠ ᠨᠢ ᠳᠣᠣᠷᠠᠲᠤ ᠳᠠᠪᠬᠤᠷ ᠲᠤ ᠰᠣᠨᠣᠰᠳᠠᠳᠠᠭ ᠢ᠋ ᠦᠯᠦ ᠥᠭᠦᠯᠡᠨ ᠨᠢᠭᠡᠨ ᠵᠦᠢᠯ ᠢ᠋ ᠲᠣᠳᠣᠷᠭᠤᠯᠪᠠᠯ᠄
ᠭᠢᠯᠮᠠᠭᠠᠨ ᠬᠡᠳᠦᠢ ᠵᠠᠪ ᠦᠭᠡᠢ ᠪᠠᠢᠭᠰᠠᠨ ᠴᠤ᠌ ᠥᠷᠯᠥᠭᠡ ᠡᠴᠡ ᠣᠷᠣᠢ ᠪᠣᠯᠲᠠᠯᠠ ᠬᠡᠳᠦᠨ ᠥᠷᠥᠭᠡ ᠳᠡᠮᠵᠢᠵᠦ ᠢᠨᠢᠶᠡᠵᠦ ᠠᠮᠵᠢᠨᠠ᠃ ᠮᠠᠨ ᠤ᠋ ᠥᠷᠥᠭᠡᠨ ᠳ᠋ᠦ᠍ ᠣᠷᠣᠵᠤ ᠢᠷᠡᠬᠦ ᠳ᠋ᠡᠭᠡᠨ ᠳᠠᠷᠤᠭᠠ ᠶ᠋ᠢᠨ ᠲᠤᠬᠠᠢ ᠶᠠᠷᠢᠨᠠ᠃ ᠮᠠᠨ ᠤ᠋ ᠳᠠᠷᠤᠭᠠ ᠴᠤ᠌ ᠶᠠᠭᠠᠬᠢᠬᠤᠪ ᠳᠠ ᠮᠡᠷᠭᠡᠵᠢᠯ ᠮᠡᠳᠡᠯᠭᠡ ᠪᠠᠷ ᠯᠠ ᠳᠤᠯᠢᠬᠠᠨ ᠨᠥᠬᠥᠷ᠂ ᠭᠡᠬᠦ ᠳ᠋ᠡᠭᠡᠨ ᠫᠷᠠᠺᠲ᠋ᠢᠭ( ᠦᠢᠯᠡᠳᠦᠯᠭᠡ) ᠪᠡᠷ ᠯᠤᠲᠠ ᠡᠷᠡ ᠭᠡᠴᠢᠭᠡᠭᠡᠳ ᠨᠢᠭᠡ ᠰᠠᠢᠬᠠᠨ ᠢᠨᠢᠶᠡᠭᠡᠳ ᠭᠠᠷᠤᠨᠠ᠃ ᠵᠡᠷᠭᠡᠯᠡᠳᠡᠭᠡ ᠥᠷᠥᠭᠡᠨ ᠳ᠋ᠦ᠍ ᠣᠷᠣᠭᠠᠳ《 ᠣᠷᠣᠯᠠᠭᠴᠢ ᠳᠠᠷᠤᠭᠠ ᠴᠤ᠌ ᠶᠠᠭᠠᠬᠢᠬᠤᠪ ᠳᠠ ᠶᠡᠬᠡ ᠯᠡ ᠮᠤᠢᠬᠤᠷ ᠬᠡᠷᠴᠡᠬᠡᠢᠲᠡᠭᠦᠬᠡᠨ ᠨᠥᠬᠥᠷ ᠳᠡ᠂ ᠦᠭᠡᠢ ᠲᠡᠭᠡᠭᠡᠳ ᠡᠢᠮᠦ ᠣᠯᠠᠨ ᠶᠠᠩᠵᠤ ᠶ᠋ᠢᠨ ᠪᠢᠳᠡ ᠰᠢᠭ᠋ ᠤᠯᠤᠰ ᠢ᠋ ᠴᠤ᠌ ᠡᠢᠮᠦᠷᠬᠦᠦ ᠠᠷᠭᠠ ᠪᠠᠷ ᠵᠠᠬᠢᠷᠵᠤ ᠪᠠᠢᠬᠤ ᠦᠭᠡᠢ ᠪᠣᠯ ᠭᠣᠷᠢ ᠦᠭᠡᠢ ᠴᠤ᠌ ᠪᠠᠢᠳᠠᠭ ᠪᠠᠢᠬᠤ ᠳᠠ》 ᠭᠡᠳ ᠢᠨᠢᠶᠡᠨᠡ᠃ ᠭᠤᠷᠪᠠᠳᠠᠬᠢ ᠥᠷᠥᠭᠡᠨ ᠳ᠋ᠦ᠍ ᠣᠷᠣᠬᠤ ᠳ᠋ᠠᠭᠠᠨ《 ᠮᠠᠨ ᠤ᠋ ᠨᠢᠭᠲᠠᠯᠠᠨ ᠮᠥᠨ ᠰᠦᠷᠡᠬᠡᠢ ᠳᠠᠭᠠᠭᠠᠵᠤ ᠪᠠᠢᠨᠠ ᠰᠢᠦ᠂ ᠭᠤᠷᠪᠠᠨ( ᠰᠢᠯ) ᠬᠥᠨᠲᠥᠷᠡᠭᠡᠳ ᠶᠠᠪᠤᠭᠠᠳ ᠥᠭᠴᠦ ᠪᠠᠢᠨᠠ᠃ ᠲᠡᠭᠡᠭᠡᠳ ᠶᠠᠭᠠᠬᠢᠬᠤᠪ ᠬᠥᠭᠡᠷᠦᠬᠦᠢ ᠬᠡᠷᠡᠭ ᠲᠦᠪᠡᠭ ᠭᠠᠷᠭᠠᠬᠤ ᠦᠭᠡᠢ ᠶᠦᠮ ᠠ᠋》 ᠭᠡᠳ ᠢᠨᠢᠶᠡᠨᠡ᠃ ᠣᠷᠣᠢ ᠠᠵᠢᠯ ᠲᠠᠷᠬᠠᠬᠤ ᠦᠶᠡ ᠳ᠋ᠦ᠍ ᠶᠠᠪᠤᠭᠰᠠᠭᠠᠷ ᠪᠠᠢᠭᠠᠳ ᠴᠡᠪᠡᠷᠯᠡᠭᠴᠢ ᠬᠦᠷᠴᠢᠭᠡᠭᠰᠡᠨ ᠪᠠᠢᠨᠠ᠃《 ᠮᠠᠨ ᠤ᠋ ᠡᠨᠡ ᠴᠡᠪᠡᠷᠯᠡᠭᠴᠢ ᠠᠪᠠᠭᠠᠢ ᠭᠡᠵᠦ ᠮᠥᠨ ᠨᠢᠭᠡ ᠵᠠᠪᠠᠭᠠᠷᠠᠭᠤᠯᠵᠤ ᠭᠦᠢᠴᠡᠬᠦ ᠶᠣᠮ ᠡ 》 ᠭᠡᠰᠡᠨ ᠢ᠋ᠶ᠋ᠡᠨ 《 ᠡᠨᠡ ᠣᠯᠠᠨ ᠥᠷᠥᠭᠡ ᠲᠠᠰᠤᠯᠭᠠ ᠶ᠋ᠢ ᠴᠤ᠌ ᠠᠷᠭᠠ ᠦᠭᠡᠢ᠂ ᠬᠦᠴᠦᠨ ᠨᠢ ᠬᠦᠷᠳᠡᠭ ᠦᠭᠡᠢ ᠪᠠᠢᠭᠠ ᠳᠠ》 ᠭᠡᠳ ᠢᠨᠢᠶᠡᠨᠡ᠃ ᠮᠠᠷᠭᠠᠰᠢ ᠨᠢ ᠪᠠᠰᠠ ᠯᠠ ᠳᠡᠭᠡᠷᠡ ᠡᠴᠡ ᠨᠢ ᠠᠪᠤᠭᠠᠳ ᠳᠣᠣᠷᠠ ᠨᠢ ᠬᠦᠷᠲᠡᠯᠡ ᠶᠠᠷᠢᠭᠠᠳ ᠶᠠᠷᠢᠭᠠᠳ ᠴᠤ᠌ ᠭᠡᠵᠦ ᠮᠠᠭᠤᠯᠠᠭᠠᠳ ᠮᠠᠭᠤᠯᠠᠭᠰᠠᠨ ᠢ᠋ᠶ᠋ᠠᠨ ᠪᠦᠷᠬᠦᠭᠳᠡᠭᠦᠯᠦᠭᠡᠳ ᠢᠨᠢᠶᠡᠨᠡ᠃
ᠭᠢᠯᠮᠠᠭᠠᠨ ᠤ᠋ ᠳᠣᠯᠣᠭᠠ ᠬᠣᠨᠣᠭ ᠤ᠋ᠨ ᠰᠠᠢᠬᠠᠨ ᠢᠨᠢᠶᠡᠳᠦ ᠨᠢ ᠨᠢᠭᠲᠠᠯᠠᠨ ᠠᠷᠢᠬᠢ ᠶᠡᠬᠡ ᠤᠤᠭᠤᠳᠠᠭ᠂ ᠠᠵᠢᠯ ᠠ᠋ᠴᠠ ᠬᠣᠵᠢᠮᠳᠠᠳᠠᠭ᠂ ᠲᠠᠯᠠ ᠲᠣᠬᠣᠢ ᠲᠠᠲᠠᠳᠠᠭ᠂ ᠴᠠᠯᠢᠩ ᠰᠠᠭᠠᠲᠠᠭᠤᠯᠤᠭᠰᠠᠨ ᠪᠦᠬᠦ ᠯᠡ ᠮᠠᠭᠤ ᠮᠠᠭᠤᠬᠠᠢ ᠶ᠋ᠢ ᠨᠢ ᠢᠯᠡᠴᠢᠯᠡᠵᠦ ᠬᠥᠮᠦᠰ ᠲᠦ ᠵᠠᠷᠯᠠᠴᠢᠬᠠᠭᠰᠠᠨ ᠪᠠᠢᠨᠠ᠃ ᠲᠡᠭᠡᠭᠰᠡᠨ ᠮᠥᠷᠲᠡᠭᠡᠨ ᠬᠡᠯᠡᠳᠡᠭ ᠶᠠᠷᠢᠳᠠᠭ ᠬᠤᠷᠠᠯ ᠵᠥᠪᠯᠡᠯᠭᠡᠨ ᠪᠣᠯᠬᠣᠷ ᠯᠠ ᠤᠰᠤ ᠪᠠᠯᠭᠤᠴᠢᠬᠠᠭᠰᠠᠨ ᠶᠤᠮ ᠰᠢᠭ᠋ ᠲᠠᠭ ᠰᠠᠭᠤᠨᠠ᠃ ᠡᠢᠮᠦ ᠨᠢᠭᠡ ᠰᠠᠢᠬᠠᠨ ᠢᠨᠢᠶᠡᠳᠡᠭ ᠬᠥᠮᠦᠨ ᠪᠠᠢᠳᠠᠭ ᠶᠤᠮ᠂ ᠥᠭᠡᠷᠡ ᠶ᠋ᠢ? ᠪᠣᠯᠤᠨᠠ ᠪᠣᠯᠤᠨᠠ᠃
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ
ᠬᠢᠨᠠᠭ᠍ᠴᠢ : ᠲᠤᠭ᠍ᠴᠢ ᠰᠠᠷᠠᠨᠠ
2023᠂ 12᠂ 5 ᠤ᠋ ᠡᠳᠦᠷ