ᠴᠢᠭᠢᠷᠰᠦᠨ ᠮᠠᠯᠠᠭᠠᠢ – ᠴ ᠂ ᠮᠥᠩᠬᠡ Чигэрсэн малгай – Ч ᠂ Мөнх
282ᠴᠢᠭᠢᠷᠰᠦᠨ ᠮᠠᠯᠠᠭᠠᠢ
ᠴ᠂ ᠮᠥᠩᠬᠡ
( ᠬᠣᠱᠣᠩ ᠥᠭᠦᠯᠡᠯᠭᠡ)
ᠮᠤᠭᠤᠨᠤᠨ᠂ ᠪᠠᠷᠢᠭᠠᠳᠠ ᠶ᠋ᠢᠨ ᠳᠠᠷᠤᠭᠠ ᠠ᠋ᠴᠠ ᠡᠭᠦᠷᠭᠡ ᠠᠪᠤᠮᠠᠭᠴᠠ ᠤᠬᠤᠨᠠ ᠶ᠋ᠢᠨ ᠤᠷᠤᠭᠤ ᠶᠠᠭᠠᠷᠠᠪᠴᠢᠯᠠᠨ ᠮᠣᠷᠳᠠᠪᠠ᠃ ᠵᠠᠮ ᠳ᠋ᠠᠭᠠᠨ ᠨᠢᠭᠡᠨ ᠠᠢᠯ ᠢ᠋ᠶ᠋ᠠᠷ ᠪᠠᠭᠤᠵᠤ ᠤᠬᠤᠨᠠ ᠶ᠋ᠢ ᠬᠠᠯᠵᠠᠨ ᠤ᠋ ᠬᠣᠲᠠ ᠳ᠋ᠤ᠌ ᠪᠠᠢᠭᠰᠠᠨ ᠰᠤᠷᠠᠭ ᠭᠠᠷᠤᠭᠠᠳ ᠲᠡᠷᠡ ᠵᠦᠭ ᠴᠢᠭᠯᠡᠪᠡ᠃ ᠮᠣᠭᠤᠨᠤᠨ ᠣᠷᠣᠢ ᠪᠣᠯᠵᠤ ᠪᠠᠢᠬᠤ ᠳ᠋ᠤ᠌ ᠬᠠᠯᠵᠠᠨ ᠤ᠋ ᠬᠣᠲᠠ ᠳ᠋ᠤ᠌ ᠣᠴᠢᠵᠤ ᠤᠬᠤᠨᠠ ᠭᠤᠸᠠᠢ ᠶ᠋ᠢᠨ ᠰᠠᠭᠠᠷᠠᠯ ᠮᠣᠷᠢ ᠤᠶᠠᠭᠠᠨ ᠳᠡᠭᠡᠷᠡ ᠪᠠᠢᠭᠠ ᠶ᠋ᠢ ᠬᠠᠷᠠᠭᠠᠳ ᠨᠢᠭᠡᠨᠲᠡᠭᠡᠭᠦᠷ ᠡᠷᠢᠯ ᠪᠦᠲᠦᠮᠵᠢ ᠲᠡᠢ ᠳ᠋ᠦ᠍ ᠪᠠᠶᠠᠷᠯᠠᠭᠰᠠᠨ ᠠᠪᠠᠴᠤ ᠨᠥᠭᠦᠭᠡᠲᠡᠭᠦᠷ ᠲᠡᠭᠦᠨ ᠲᠡᠢ ᠠᠭᠤᠯᠵᠠᠬᠤ ᠠ᠋ᠴᠠ ᠪᠠᠭᠠ ᠵᠡᠷᠭᠡ ᠵᠢᠷᠦᠬᠡᠰᠢᠶᠡᠨ ᠣᠷᠣᠵᠠᠢ᠃ ᠮᠣᠭᠤᠨᠤᠨ ᠣᠷᠣᠬᠤ ᠳ᠋ᠤ᠌ ᠤᠬᠤᠨᠠ ᠭᠤᠸᠠᠢ ᠰᠢᠨᠡᠬᠡᠨ ᠴᠢᠭᠢᠷᠰᠦᠨ ᠮᠠᠯᠠᠭᠠᠢ ᠪᠠᠨ ᠰᠠᠭᠠᠯᠳᠤᠷᠭᠠᠯᠠᠨ ᠠᠷᠤ ᠨᠢᠷᠤᠭᠤᠨ ᠳᠡᠭᠡᠷᠡ ᠪᠡᠨ ᠬᠠᠶᠠᠴᠢᠬᠠᠭᠰᠠᠨ ᠬᠡᠳᠦᠨ ᠠᠶᠠᠭᠠ ᠲᠠᠭᠱᠠ ᠶᠠᠭᠤᠮᠠ ᠣᠯᠵᠤ ᠪᠠᠯᠭᠤᠭᠰᠠᠨ ᠪᠣᠯᠤᠯᠲᠠᠢ ᠤᠯᠠᠭᠠᠨ ᠵᠡᠭᠡᠷᠳᠡ ᠪᠣᠯᠴᠢᠬᠠᠭᠠᠳ ᠨᠢᠭᠤᠷ ᠨᠢ ᠤᠯᠠᠢᠵᠤ ᠦᠭᠡ ᠨᠢ ᠣᠯᠠᠰᠢᠷᠠᠭᠠᠳ ᠬᠠᠩᠬᠠᠯᠵᠠᠨ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠮᠣᠭᠣᠨᠣᠨ ᠢ᠋ ᠬᠠᠷᠠᠵᠤ᠄
— ᠳᠡᠭᠦᠦ ᠬᠦᠦ ᠬᠠᠮᠢᠭᠠ ᠵᠣᠷᠢᠵᠤ ᠶᠠᠪᠤᠨᠠ ᠭᠡᠵᠦ ᠠᠰᠠᠭᠤᠪᠠ᠃ ᠮᠣᠭᠤᠨᠤᠨ᠄
— ᠪᠢ ᠲᠠᠨ ᠲᠠᠢ ᠯᠠ ᠠᠭᠤᠯᠵᠠᠬᠤ ᠭᠡᠵᠦ ᠶᠠᠪᠤᠨᠠ᠂ ᠲᠠ ᠪᠢᠳᠡ ᠬᠣᠶᠠᠷ ᠢ᠋ ᠨᠥᠭᠥᠭᠡᠳᠦᠷ ᠦ᠋ᠨ ᠳᠣᠲᠣᠷᠠ ᠬᠠᠩᠭᠠᠢ ᠤᠷᠤᠭᠤ ᠰᠦᠷᠡᠯ ᠳ᠋ᠦ᠍ ᠶᠠᠪᠤ ᠭᠡᠵᠦ ᠪᠠᠷᠢᠭᠠᠳᠠ ᠶ᠋ᠢᠨ ᠳᠠᠷᠤᠭᠠ ᠬᠡᠯᠡᠵᠦ ᠪᠠᠢᠨᠠ ᠭᠡᠪᠡᠯ ᠤᠬᠤᠨᠠ ᠭᠤᠸᠠᠢ ᠶ᠋ᠢᠨ ᠠᠭᠤᠷ ᠨᠢ ᠲᠡᠷᠡ ᠳᠠᠷᠤᠢ ᠳᠦᠷᠡᠯᠵᠡᠨ᠄
— ᠳᠤᠷᠠ ᠦᠭᠡᠢ ᠪᠠᠨᠳᠢ ᠳ᠋ᠤ᠌ ᠳᠠᠷᠤᠵᠤ ᠰᠠᠬᠢᠯ ᠬᠦᠷᠲᠡᠭᠡᠬᠦ ᠭᠡᠭᠴᠢ ᠨᠢ ᠪᠣᠯᠬᠤ ᠨᠢ ᠰᠢᠪ ᠳᠡ᠃ ᠬᠡᠨ ᠭᠤᠸᠠᠢ ᠨᠢ ᠴᠦ᠍ ᠲᠤᠰᠢᠶᠠᠭᠰᠠᠨ᠂ ᠪᠢ ᠬᠠᠩᠭᠠᠢ ᠶ᠋ᠢᠨ ᠬᠠᠶᠠᠭᠳᠠᠯ ᠢ᠋ ᠬᠠᠷᠠ ᠬᠥᠯᠥᠰᠥ ᠪᠡᠨ ᠠᠰᠬᠠᠷᠠᠭᠤᠯᠤᠨ ᠪᠠᠢᠵᠤ ᠠᠪᠴᠢᠷᠠᠬᠤ ᠦᠭᠡᠢ᠃ ᠲᠡᠭᠦᠨ ᠢ᠋ ᠴᠢᠨᠢ ᠶᠠᠮᠠᠷ ᠮᠠᠯ ᠢᠳᠡᠬᠦ ᠪᠣᠢ? ᠮᠠᠨ ᠤ᠋ ᠲᠠᠯᠠ ᠭᠠᠵᠠᠷ ᠤ᠋ᠨ ᠮᠠᠯ ᠮᠣᠳᠣ ᠢᠳᠡᠵᠦ ᠪᠣᠢᠵᠢᠳᠠᠭ ᠦᠭᠡᠢ᠂ ᠳᠠᠭᠠᠨᠠ ᠢᠳᠡᠵᠦ ᠥᠰᠦᠭᠰᠡᠨ ᠶᠦᠮ ᠴᠢᠨᠢ᠃ ᠰᠦᠷᠡᠯ ᠭᠡᠳᠡᠭ ᠴᠢᠨᠢ ᠮᠣᠳᠣ ᠰᠢᠦ ᠳᠡ᠂ ᠶᠠᠭᠤᠮᠠ ᠮᠡᠳᠡᠬᠦ ᠦᠭᠡᠢ ᠵᠣᠯᠳᠣᠷᠣᠢ ① ᠬᠡᠦᠬᠡᠳ ᠦ᠋ᠳ ᠲᠡᠢᠮᠦ ᠶᠠᠭᠤᠮᠠ ᠶᠠᠷᠢᠵᠤ ᠲᠦᠪᠡᠭ ᠤᠳᠠᠬᠤ ᠶᠤᠮ᠃ ᠴᠢ ᠴᠢᠨᠢ ᠲᠦᠷᠦᠭᠦᠴᠢ ᠶ᠋ᠢᠨ ᠬᠤᠷᠠᠯ ᠳᠡᠭᠡᠷᠡ ᠰᠦᠷᠡᠯ ᠠᠪᠴᠢᠷᠠᠶᠠ ᠭᠡᠵᠦ ᠳᠥᠪᠴᠢᠬᠡᠨᠡᠭᠡᠳ ᠪᠠᠢᠭᠰᠠᠨ ᠪᠠᠢᠬᠠ ᠠ᠋᠂ ᠳᠤᠷᠠ ᠲᠠᠢ ᠪᠠᠷ ᠳᠡᠭᠦᠦ ᠮᠢᠨᠢ ᠶᠠᠪᠤ ᠳᠠ᠂ ᠠᠬᠠ ᠨᠢ ᠳᠥᠴᠢ ᠬᠦᠷᠲᠡᠯᠡ ᠮᠠᠯ ᠮᠠᠯᠯᠠᠭᠠᠳ ᠰᠦᠷᠡᠯ ᠦᠭᠡᠢ ᠪᠣᠯᠤᠭᠠᠳ ᠯᠠ ᠪᠠᠢᠭᠠ ᠶᠤᠮ ᠭᠡᠵᠦ ᠠᠭᠰᠤᠷᠴᠤ ᠡᠬᠢᠯᠡᠪᠡ᠃
ᠬᠡᠳᠦᠬᠡᠨ ᠬᠣᠨᠣᠭ ᠤ᠋ᠨ ᠡᠮᠦᠨᠡ《 ᠲᠠᠯᠠ ᠶ᠋ᠢᠨ ᠲᠤᠶᠠᠭᠠ》 ᠨᠢᠭᠡᠳᠦᠯ ᠦ᠋ᠨ ᠡᠪᠦᠯ ᠦ᠋ᠨ ᠪᠡᠯᠡᠳᠬᠡᠯ ᠲᠡᠵᠢᠭᠡᠯ ᠦ᠋ᠨ ᠪᠠᠭᠠᠵᠠ( ᠰᠠᠭᠤᠷᠢᠨ ᠭᠠᠵᠠᠷ) ᠪᠠᠢᠭᠤᠯᠬᠤ ᠲᠤᠬᠠᠢ ᠬᠤᠷᠠᠯᠳᠤᠵᠤ ᠬᠠᠩᠭᠠᠢ ᠠ᠋ᠴᠠ ᠰᠦᠷᠡᠯ ᠲᠠᠲᠠᠬᠤ ᠲᠠᠯᠠ ᠪᠠᠷ ᠶᠠᠷᠢᠯᠴᠠᠵᠠᠢ᠃ ᠡᠨᠡ ᠰᠠᠨᠠᠯ ᠢ᠋ ᠶᠡᠬᠡᠩᠬᠢ ᠨᠢ ᠳᠡᠮᠵᠢᠭᠰᠡᠨ ᠪᠣᠯᠪᠠᠴᠤ ᠵᠠᠷᠢᠮ ᠲᠤᠬᠠᠢᠯᠠᠪᠠᠯ ᠤᠬᠤᠨᠠ ᠨᠠᠷ ᠤ᠋ᠨ ᠬᠡᠳᠦᠨ ᠬᠥᠮᠦᠰ ᠠᠢᠬᠤᠪᠲᠤᠷ ᠲᠠᠲᠠᠭᠠᠯᠵᠠᠭᠰᠠᠨ ᠪᠠᠢᠵᠠᠢ᠃ ᠤᠬᠤᠨᠠ ᠭᠤᠸᠠᠢ ᠲᠡᠷᠡ ᠬᠤᠷᠠᠯ ᠳᠡᠭᠡᠷᠡ ᠴᠤ᠌ ᠡᠨᠡ ᠦᠭᠡ ᠪᠡᠨ ᠬᠡᠯᠡᠵᠦ ᠪᠠᠢᠵᠠᠢ᠃ ᠲᠡᠢᠮᠦ ᠴᠦ᠍ ᠤᠴᠢᠷ ᠠ᠋ᠴᠠ ᠮᠣᠭᠤᠨᠤᠨ ᠤᠬᠤᠨᠠ ᠭᠤᠸᠠᠢ ᠲᠠᠢ ᠠᠭᠤᠯᠵᠠᠬᠤ ᠠ᠋ᠴᠠ ᠪᠠᠨ ᠲᠦᠪᠡᠭᠰᠢᠶᠡᠵᠦ ᠶᠠᠪᠤᠭᠰᠠᠨ ᠬᠡᠷᠡᠭ ᠪᠢᠯᠡ᠃ ᠤᠬᠤᠨᠠ ᠭᠤᠸᠠᠢ ᠡᠨᠡ ᠠᠵᠢᠯ ᠢ᠋ ᠳᠡᠮᠵᠢᠬᠦ ᠦᠭᠡᠢ᠂ ᠲᠡᠭᠡᠭᠡᠳ ᠴᠦ᠍ ᠣᠳᠣ ᠰᠣᠭᠲᠣᠭᠤ ᠪᠠᠢᠭᠠ ᠤᠴᠢᠷ ᠪᠦᠷ ᠴᠦ᠍ ᠶᠠᠷᠢᠶᠠ ᠲᠣᠬᠢᠷᠠᠬᠤ ᠦᠭᠡᠢ ᠨᠢ ᠭᠡᠳᠡᠭ ᠢ᠋ ᠮᠣᠭᠤᠨᠤᠨ ᠮᠡᠳᠡᠵᠦ ᠡᠷᠡᠭᠦᠯ ᠪᠣᠯᠤᠭᠰᠠᠨ ᠬᠣᠢᠨᠠ ᠨᠢ ᠶᠠᠷᠢᠯᠴᠠᠶᠠ ᠭᠡᠳ ᠰᠢᠢᠳᠦᠭᠡᠳ᠄
— ᠪᠢ ᠮᠠᠷᠭᠠᠰᠢ ᠲᠠᠨ ᠤ᠋ ᠬᠢ ᠪᠡᠷ ᠣᠴᠢᠶᠠ ᠳᠠ ᠭᠡᠳ ᠪᠤᠴᠠᠯᠠ᠃ ᠮᠣᠭᠤᠨᠤᠨ ᠤ᠋ ᠶᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠤᠬᠤᠨᠠ ᠲᠡᠷᠡ ᠣᠷᠣᠢᠵᠢᠨ ᠢ᠋ᠶ᠋ᠠᠨ ᠠᠷᠢᠬᠢᠳᠠᠵᠤ ᠰᠦᠷᠡᠯ ᠭᠡᠳᠡᠭ ᠴᠢᠨᠢ ᠬᠠᠩᠭᠠᠢ ᠶ᠋ᠢᠨ ᠬᠠᠠᠶᠠᠭᠳᠠᠯ᠂ ᠳᠠᠭᠠᠨᠠ ᠭᠡᠳᠡᠭ ᠴᠢᠨᠢ ᠲᠠᠯᠠ ᠶ᠋ᠢᠨ ᠰᠢᠷᠠ ᠲᠣᠰᠣ᠂ ᠬᠠᠷᠢᠨ ᠬᠠᠩᠭᠠᠢ ᠶ᠋ᠢᠨ ᠬᠢᠨ ᠮᠠᠨ ᠤ᠋ ᠳᠠᠭᠠᠨᠠ ᠶ᠋ᠢ ᠠᠴᠢᠵᠤ ᠠᠪᠠᠴᠢᠪᠠᠯ ᠲᠠᠭᠠᠷᠠᠨᠠ ᠭᠡᠵᠦ ᠬᠡᠨ ᠲᠠᠭᠠᠷᠠᠯᠳᠤᠭᠰᠠᠨ ᠪᠦᠬᠦᠨ ᠳ᠋ᠦ᠍ ᠠᠭᠰᠤᠮ ᠲᠠᠯᠪᠢᠭᠰᠠᠭᠠᠷ ᠶᠠᠪᠤᠵᠠᠢ᠃ ᠰᠣᠭᠲᠣᠭᠤ ᠤᠬᠤᠨᠠ ᠲᠠᠢ ᠬᠡᠨ ᠴᠦ᠍ ᠮᠠᠷᠭᠤᠯᠳᠤᠬᠤ ᠶ᠋ᠢ ᠬᠦᠰᠡᠭᠰᠡᠨ ᠦᠭᠡᠢ᠃ ᠤᠬᠤᠨᠠ ᠴᠤ᠌ ᠠᠷᠢᠬᠢᠨ ᠤ᠋ ᠬᠠᠯᠠᠭᠠᠳ ᠠ᠋ᠴᠠ ᠪᠣᠯᠤᠭᠠᠳ ᠳᠠᠭᠠᠨᠠ ᠬᠠᠳᠤᠭᠠᠳ ᠬᠤᠷᠢᠶᠠᠬᠤ᠂ ᠬᠠᠩᠭᠠᠢ ᠤᠷᠤᠭᠤ ᠵᠥᠭᠡᠭᠡᠬᠦ ᠪᠣᠯᠤᠮᠵᠢ ᠦᠭᠡᠢ ᠭᠡᠳᠡᠭ ᠢ᠋ ᠴᠦ᠍ ᠮᠠᠷᠲᠠᠵᠠᠢ᠃
ᠮᠠᠷᠭᠠᠰᠢ ᠨᠢ ᠮᠣᠭᠤᠨᠤᠨ ᠦᠦᠷ ᠴᠦᠣᠷ ᠢ᠋ᠶ᠋ᠠᠷ ᠮᠣᠷᠳᠠᠵᠤ ᠤᠬᠤᠨᠠ ᠶ᠋ᠢᠨ ᠳ᠋ᠦ᠍ ᠣᠴᠢᠪᠠᠯ ᠲᠡᠷᠡ ᠭᠡᠷ ᠲᠡᠭᠡᠨ ᠢᠷᠡᠭᠰᠡᠨ ᠦᠭᠡᠢ᠃ ᠪᠣᠳᠣᠪᠠᠯ ᠬᠠᠯᠵᠠᠨ ᠤ᠋ ᠬᠢᠨ ᠦ᠌ ᠨᠠᠭᠠᠳᠤ ᠬᠣᠲᠠ ᠳ᠋ᠤ᠌ ᠤᠨᠠᠭᠰᠠᠨ ᠪᠢᠵᠡ ᠭᠡᠳ ᠣᠴᠢᠪᠠᠯ ᠦᠨᠡᠬᠡᠷ ᠴᠦ᠍ ᠰᠠᠭᠠᠷᠠᠯ ᠮᠣᠷᠢ ᠨᠢ ᠬᠠᠷᠠᠭᠳᠠᠪᠠ᠃ ᠮᠣᠭᠤᠨᠤᠨ ᠲᠡᠭᠦᠨ ᠦ᠌ ᠪᠠᠢᠭᠠ ᠠᠢᠯ ᠳ᠋ᠤ᠌ ᠣᠷᠣᠪᠠᠯ ᠤᠬᠤᠨᠠ ᠳᠥᠩᠭᠡᠵᠦ ᠰᠠᠶᠢ ᠪᠣᠰᠤᠭᠰᠠᠨ ᠪᠣᠯᠤᠯᠲᠠᠢ ᠴᠠᠢ ᠣᠭᠣᠴᠢᠵᠤ ᠰᠠᠭᠤᠨᠠ᠃ ᠲᠡᠷᠡ ᠪᠡᠷ ᠥᠩᠭᠡᠷᠡᠭᠴᠢ ᠣᠷᠣᠢ ᠬᠡᠲᠦᠷᠡᠭᠦᠯᠦᠨ ᠠᠷᠢᠬᠢᠳᠠᠭᠰᠠᠨ ᠨᠢ ᠢᠯᠡᠳᠲᠡ᠂ ᠨᠢᠭᠤᠷ ᠨᠢ ᠬᠥᠭᠡᠭᠡᠵᠦ᠂ ᠨᠢᠳᠦ ᠨᠢ ᠪᠦᠯᠴᠡᠢᠵᠡᠢ᠃ ᠮᠤᠭᠤᠨᠤᠨ ᠢ᠋ ᠬᠠᠷᠠᠮᠠᠭᠴᠠ ᠪᠠᠨ ᠳᠤᠷᠠ ᠦᠭᠡᠢ ᠨᠢ ᠬᠦᠷᠦᠭᠰᠡᠨ ᠪᠣᠯᠤᠯᠲᠠᠢ ᠬᠠᠷᠠᠭᠠ ᠪᠠᠨ ᠪᠤᠷᠤᠭᠤᠯᠠᠨ ᠢᠷᠪᠠᠢᠨᠠ᠃
ᠮᠣᠭᠤᠨᠤᠨ ᠤᠬᠤᠨᠠ ᠶ᠋ᠢ ᠴᠡᠢᠯᠡᠵᠦ ᠳᠠᠭᠤᠰᠤᠮᠠᠭᠴᠠ᠄
— ᠵᠠ ᠣᠳᠣ ᠲᠠᠨ ᠤ᠋ ᠬᠢ ᠤᠷᠤᠭᠤ ᠣᠴᠢᠬᠤ ᠤᠤ ᠭᠡᠵᠦ ᠠᠰᠠᠭᠤᠪᠠ᠃
— ᠦᠭᠡᠢ ᠪᠢ ᠠᠢᠯ ᠢ᠋ᠶ᠋ᠠᠷ ᠪᠠᠭᠤᠨᠠ ᠭᠡᠵᠦ ᠤᠬᠤᠨᠠ ᠵᠥᠷᠢᠪᠡ᠃ ᠲᠡᠷᠡ ᠪᠡᠷ ᠮᠠᠯᠠᠭᠠᠢ ᠪᠠᠨ ᠡᠮᠦᠰᠬᠦ ᠭᠡᠰᠡᠨ ᠮᠠᠯᠠᠭᠠᠢ ᠨᠢ ᠪᠠᠢᠭᠰᠠᠨ ᠦᠭᠡᠢ ᠬᠡᠰᠡᠭ ᠪᠣᠳᠤᠯᠬᠢᠯᠡᠰᠭᠢᠬᠰᠠᠨ ᠢ᠋ᠶ᠋ᠠᠨ᠄
— ᠪᠢ ᠥᠴᠥᠭᠡᠳᠦᠷ ᠣᠷᠣᠢ ᠮᠠᠯᠠᠭᠠᠢ ᠲᠡᠢ ᠢᠷᠡᠭᠰᠡᠨ ᠤᠤ? ᠭᠡᠵᠦ ᠠᠢᠯ ᠤ᠋ᠨ ᠠᠪᠠᠭᠠᠢ ᠠ᠋ᠴᠠ ᠠᠰᠠᠭᠤᠪᠠ᠃ ᠠᠪᠠᠭᠠᠢ᠄
— ᠣᠷᠣᠢ ᠮᠠᠨ ᠤ᠋ ᠬᠣᠲᠠᠨ ᠳ᠋ᠤ᠌ ᠢᠷᠡᠬᠦ ᠳ᠋ᠦ᠍ ᠮᠠᠯᠠᠭᠠᠢ ᠲᠠᠢ ᠬᠠᠷᠠᠭᠳᠠᠭᠰᠠᠨ ᠶᠤᠮᠰᠠᠨ᠂ ᠳᠣᠷᠵᠢ ᠶ᠋ᠢᠨ ᠳ᠋ᠦ᠍ ᠣᠷᠬᠢᠭᠰᠠᠨ ᠶᠤᠮ ᠪᠣᠯᠪᠠ ᠤᠤ ᠳᠠ ᠭᠡᠪᠡ᠃ ᠤᠬᠤᠨᠠ ᠵᠤᠤᠬᠠᠨ ᠤ᠋ ᠪᠠᠷᠠᠭᠤᠨᠲᠠᠢ ᠰᠠᠭᠤᠵᠤ ᠪᠠᠢᠭᠰᠠᠨ ᠵᠢᠭᠠᠯ ᠬᠦᠦ ᠳ᠋ᠦ᠍ ᠬᠠᠨᠳᠤᠨ᠄
— ᠠᠯᠢᠪ ᠮᠢᠨᠦ ᠳᠡᠭᠦᠦ ᠭᠦᠶᠦᠭᠡᠳ ᠢᠷᠡ᠂ ᠳᠣᠷᠵᠢ ᠶ᠋ᠢᠨ ᠡᠴᠡ ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠮᠠᠯᠠᠭᠠᠢ ᠶ᠋ᠢ ᠠᠪᠤᠭᠠᠳ ᠢᠷᠡ ᠭᠡᠪᠡ᠃ ᠬᠦᠦ ᠴᠦ᠍ ᠳᠤᠭᠤᠯᠭᠠᠪᠤᠷᠢᠲᠠᠢ ② ᠭᠣᠳ ᠬᠢᠨ ᠭᠠᠷᠤᠯᠠ᠃
— ᠤᠬᠤᠨᠠ ᠭᠤᠸᠠᠢ ᠲᠠᠨ ᠤ᠋ ᠮᠠᠯᠠᠭᠠᠢ ᠡᠨᠡ ᠮᠥᠨ ᠪᠠᠢᠬᠠ ᠭᠡᠳ ᠲᠠᠯᠠ ᠶ᠋ᠢ ᠨᠢ ᠦᠬᠡᠷ ᠢᠳᠡᠴᠢᠬᠡᠭᠰᠡᠨ ᠮᠠᠯ ᠤ᠋ᠨ ᠪᠠᠭᠠᠰᠤ ᠪᠣᠯᠤᠭᠰᠠᠨ ᠰᠢᠨᠡᠬᠡᠨ ᠴᠢᠭᠢᠷᠰᠦᠨ ᠮᠠᠯᠠᠭᠠᠢ ᠶ᠋ᠢᠨ ᠲᠠᠮᠲᠤᠭ ᠠᠪᠴᠢᠷᠠᠪᠠ᠃ ᠥᠪᠡᠷ ᠦ᠋ᠨ ᠬᠢᠨᠢ ᠮᠠᠯᠠᠭᠠᠢ ᠭᠠᠷᠴᠠᠭᠠ ᠦᠭᠡᠢ ᠮᠥᠨ ᠪᠣᠯᠬᠤ ᠶ᠋ᠢ ᠤᠬᠤᠨᠠ ᠲᠠᠨᠢᠮᠠᠭᠴᠠ ᠨᠢᠳᠦ ᠨᠢ ᠲᠣᠮᠣ ᠪᠣᠯᠵᠤ᠄
— ᠢᠳᠡᠮᠡᠬᠡᠢ ᠵᠣᠯᠢᠭ ᠤ᠋ᠳ᠂ ᠲᠤᠷᠠᠵᠤ ᠦᠬᠦᠮᠡᠷ ᠦ᠋ᠳ ᠭᠡᠵᠦ ᠬᠠᠷᠢᠶᠠᠯ ᠲᠠᠯᠪᠢᠵᠤ ᠡᠬᠢᠯᠡᠪᠡ᠃ ᠡᠭᠦᠨ ᠢ᠋ ᠬᠠᠷᠠᠭᠠᠳ ᠮᠣᠭᠤᠨᠤᠨ ᠤ᠋ ᠭᠡᠵᠢᠭᠡ ᠬᠦᠷᠬᠦ ᠰᠢᠭ ᠪᠣᠯᠵᠤ᠄
— ᠤᠬᠤᠨᠠ ᠭᠤᠸᠠᠢ ᠲᠠᠨ ᠤ᠋ ᠰᠦᠷᠡᠯ ᠦ᠋ᠨ ᠮᠠᠯᠠᠭᠠᠢ ᠶ᠋ᠢ ᠬᠥᠬᠡ ᠨᠣᠭᠣᠭᠠ ᠪᠠᠷ ᠢᠳᠡᠭᠰᠡᠨ ᠦᠬᠡᠷ ᠴᠢᠨᠢ ᠬᠠᠪᠤᠷ ᠤ᠋ᠨ ᠬᠠᠬᠢᠷ ᠴᠠᠭ ᠲᠤ ᠵᠠᠪᠠᠯ ᠳᠠᠭᠠᠨᠠ ᠭᠡᠯᠭᠦᠢ ᠪᠦᠷ ᠴᠤ᠌ ᠳᠤᠷᠠᠲᠠᠢ ᠢᠳᠡᠬᠦ ᠪᠢᠰᠢ ᠤᠤ ᠭᠡᠵᠦ ᠶᠥᠭᠡᠬᠦ᠂ ᠤᠴᠢᠷᠯᠠᠬᠤ ᠬᠣᠣᠰᠯᠠᠭᠤᠯᠤᠭᠰᠠᠨ ᠠᠶᠠᠯᠭᠤ ᠪᠠᠷ ᠬᠡᠯᠡᠪᠡ᠃ ᠤᠬᠤᠨᠠ ᠭᠤᠸᠠᠢ ᠶᠠᠭᠤ ᠴᠤ᠌ ᠬᠡᠯᠡᠭᠰᠡᠨ ᠦᠭᠡᠢ ᠬᠡᠰᠡᠭ ᠳᠠᠭᠤ ᠦᠭᠡᠢ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ᠄
— ᠵᠠ ᠳᠡᠭᠦᠦ ᠬᠦᠦ ᠮᠠᠷᠭᠠᠰᠢ ᠠ᠋ᠴᠠ ᠲᠡᠷᠡ ᠬᠠᠩᠭᠠᠢ ᠤᠷᠤᠭᠤ ᠴᠢᠨᠢ ᠶᠠᠪᠤᠬᠤ ᠠᠶᠠ ᠵᠠᠩ ᠪᠣᠳᠣᠶᠠ ᠳᠠ᠂ ᠬᠠᠢᠷᠠᠨ ᠴᠤ᠌ ᠮᠠᠯᠠᠭᠠᠢ ᠮᠢᠨᠢ ᠭᠡᠳ ᠪᠠᠭᠠ ᠵᠡᠷᠭᠡ ᠢᠴᠢᠩᠭᠦᠢᠷᠡᠭᠰᠡᠨ ᠲᠥᠯᠥᠪᠲᠡᠢ ᠰᠤᠯᠠᠪᠲᠤᠷ ᠢᠨᠢᠶᠡᠮᠰᠦᠭᠯᠡᠪᠡ᠃
– – – –
① ᠰᠠᠯᠢᠶᠠ ᠨᠢ ᠠᠷᠢᠯᠤᠭᠠ ᠦᠭᠡᠢ
② ᠦᠭᠡ ᠰᠤᠷᠭᠠᠯ ᠠᠪᠤᠮᠠᠲᠠᠭᠠᠢ
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠪᠠᠭᠠᠲᠤᠷ
ᠬᠢᠨᠠᠭ᠍ᠴᠢ : ᠲᠤᠭ᠍ᠴᠢ ᠰᠠᠷᠠᠨᠠ
2023᠂ 11᠂ 29 ᠤ᠋ ᠡᠳᠦᠷ