ᠬᠣᠴᠣᠷᠤᠭᠳᠠᠨᠠ ᠭᠡᠵᠦ ᠁ – ᠰ ᠂ ᠯᠤᠴᠢᠨ Хоцрогдоно гэж ᠁ – С ᠂ Лочин
333ᠬᠣᠴᠣᠷᠤᠭᠳᠠᠨᠠ ᠭᠡᠵᠦ ᠁
( ᠬᠣᠱᠣᠩ ᠥᠭᠦᠯᠡᠯᠭᠡ)
ᠬᠥᠮᠦᠨ ᠬᠣᠴᠣᠷᠤᠭᠳᠠᠨᠠ ᠭᠡᠵᠦ ᠴᠠᠭ ᠢ᠋ᠶ᠋ᠠᠨ ᠪᠣᠯᠬᠤ ᠪᠠᠷ ᠮᠥᠨ ᠴᠦ᠍ ᠠᠮᠠᠷᠬᠠᠨ ᠠᠵᠢ᠃ ᠬᠣᠴᠣᠷᠤᠭᠳᠠᠯ ᠭᠡᠭᠴᠢ ᠶᠠᠭᠤ ᠪᠣᠯᠬᠤ ᠶ᠋ᠢ ᠪᠢ ᠶᠠᠰᠤ ᠮᠢᠬᠠᠨ ᠳ᠋ᠠᠭᠠᠨ ᠬᠦᠷᠲᠡᠯᠡ ᠮᠡᠳᠡᠳᠡᠭ ᠬᠥᠮᠦᠨ ᠦ᠌ ᠨᠢᠭᠡ ᠪᠢᠯᠡ᠃ ᠶᠠᠭᠠᠬᠢᠭᠠᠳ ᠲᠡᠢᠮᠦ ᠪᠣᠯᠤᠭᠰᠠᠨ ᠶᠤᠮ ᠪᠣᠢ ᠭᠡᠪᠡᠯ ᠬᠡᠳᠦᠨ ᠵᠢᠯ ᠦ᠋ᠨ ᠡᠮᠦᠨᠡ ᠦᠢᠯᠡᠳᠪᠦᠷᠢᠴᠢᠨ ᠦ᠌ ᠡᠪᠯᠡᠯ ᠦ᠋ᠨ ᠬᠣᠷᠢᠶᠠᠨ ᠳ᠋ᠤ᠌ ᠲᠠᠢᠯᠤᠨ ᠰᠣᠩᠭᠣᠭᠤᠯᠢ ᠶ᠋ᠢᠨ ᠬᠤᠷᠠᠯ ᠳᠡᠭᠡᠷᠡ《 ᠭᠠᠯᠵᠠᠭᠤ》 ᠶᠠᠩᠵᠢᠨ ᠪᠣᠰᠴᠤ ᠢᠷᠡᠭᠡᠳ᠄
— ᠡᠨᠡ ᠬᠦ᠌ ᠨᠥᠬᠥᠷ ᠲᠠᠭᠪᠠ ᠪᠣᠯᠪᠠᠰᠤ ᠣᠷᠴᠢᠨ ᠦᠶᠡ ᠶ᠋ᠢᠨ ᠬᠥᠭᠵᠢᠯ ᠡᠴᠡ ᠮᠠᠰᠢᠳᠠ ᠶᠡᠬᠡ ᠪᠡᠷ ᠬᠣᠴᠣᠷᠤᠭᠳᠠᠭᠰᠠᠨ ᠪᠥᠭᠡᠳ ᠠᠵᠢᠯ ᠤ᠋ᠨ ᠠᠷᠭᠠ ᠪᠠᠷᠢᠯ᠂ ᠪᠤᠰᠤᠳ ᠲᠠᠢ ᠬᠠᠷᠢᠯᠴᠠᠬᠤ ᠬᠠᠷᠢᠯᠴᠠᠭᠠ ᠨᠢ ᠪᠦᠳᠦᠭᠦᠯᠢᠭ ᠡᠲᠡᠭᠡᠳ ᠮᠥᠨ ᠪᠣᠯᠠᠢ᠃ ᠬᠣᠶᠠᠷ ᠳᠣᠯᠣᠭᠠ ᠬᠣᠨᠣᠭ ᠤ᠋ᠨ ᠡᠮᠦᠨᠡ ᠨᠠᠮᠠ ᠶ᠋ᠢ ᠺᠣᠨᠲ᠋ᠣᠷ ᠲᠤ ᠨᠢ ᠣᠷᠣᠬᠤ ᠳ᠋ᠤ᠌ ᠵᠥᠪᠰᠢᠶᠡᠷᠡᠯ ᠠᠪᠤᠭᠰᠠᠨ ᠦᠭᠡᠢ᠂ ᠬᠦᠨᠳᠦᠳᠬᠡᠭᠰᠡᠨ ᠦᠭᠡᠢ ᠭᠡᠬᠦ ᠵᠡᠷᠭᠡ ᠪᠡᠷ ᠵᠠᠩᠨᠠᠭᠰᠠᠨ᠁ ᠭᠡᠳ ᠯᠡ《 ᠠᠶᠤᠩᠭᠠ》 ᠪᠠᠭᠤᠯᠭᠠᠵᠤ ᠨᠢᠭᠤᠷ ᠢ᠋ ᠮᠢᠨᠢ ᠤᠯᠠᠢᠯᠭᠠᠨ᠂ ᠨᠢᠳᠦ ᠶ᠋ᠢ ᠮᠢᠨᠢ ᠪᠦᠯᠲᠡᠢᠯᠭᠡᠭᠰᠡᠨ ᠡᠴᠡ ᠬᠣᠢᠰᠢ《 ᠬᠣᠴᠣᠷᠤᠭᠳᠠᠭᠰᠠᠨ》 ᠭᠡᠳᠡᠭ ᠦᠭᠡ ᠶ᠋ᠢ ᠰᠣᠨᠣᠰᠬᠤ ᠲᠠᠢ ᠵᠡᠷᠭᠡ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠰᠠᠭᠤᠳᠠᠯ ᠳ᠋ᠠᠭᠠᠨ ᠬᠠᠪᠢᠴᠢᠳᠠᠭ( ᠣᠢᠷᠠᠲᠤᠵᠤ ᠣᠴᠢᠬᠤ) ᠵᠠᠩ ᠲᠠᠢ ᠪᠣᠯᠤᠭᠰᠠᠨ ᠶᠤᠮ ᠳᠠ᠃ ᠲᠡᠷᠡ ᠬᠤᠷᠠᠯ ᠤ᠋ᠨ ᠳᠠᠷᠠᠭᠠ ᠪᠢ ᠥᠪᠡᠷ ᠦ᠋ᠨ ᠰᠢᠭᠦᠮᠵᠢᠯᠡᠯ ᠢ᠋ ᠥᠷᠨᠢᠭᠦᠯᠵᠦ《 ᠨᠥᠬᠥᠷ ᠲᠠᠭᠪᠠ ᠴᠢ ᠦᠨᠡᠬᠡᠷ ᠬᠣᠴᠣᠷᠤᠭᠳᠠᠵᠠᠢ᠂ ᠣᠳᠣᠬᠠᠨ ᠪᠡᠶᠡ ᠪᠡᠨ ᠪᠣᠯᠪᠠᠰᠤᠷᠠᠭᠤᠯᠵᠤ( ᠡᠷᠳᠡᠮ ᠮᠡᠳᠡᠯᠭᠡ ᠡᠵᠡᠮᠰᠢᠬᠦ) ᠬᠠᠮᠲᠤ ᠠᠵᠢᠯᠯᠠᠳᠠᠭ ᠲᠡᠷᠢᠭᠦᠨ ᠦ᠌ ᠬᠥᠮᠦᠰ ᠢ᠋ᠶ᠋ᠡᠨ ᠭᠦᠢᠴᠡᠵᠦ ᠲᠡᠷᠢᠭᠦᠯᠡᠬᠦ ᠨᠢ ᠪᠠᠢᠭ ᠭᠡᠬᠦ ᠳ᠋ᠦ᠍ ᠲᠡᠳᠡᠨ ᠦ᠌ ᠪᠠᠷᠤᠭ ᠲᠤ ᠬᠦᠷᠬᠦ ᠲᠠᠯᠠ ᠪᠠᠷ ᠲᠣᠳᠣᠷᠬᠠᠢ ᠲᠥᠯᠥᠪᠯᠡᠭᠡ ᠵᠣᠬᠢᠶᠠᠨ ᠠᠵᠢᠯᠯᠠᠰᠤᠭᠠᠢ》 ᠭᠡᠰᠡᠨ ᠬᠠᠲᠠᠭᠤ ᠲᠤᠰᠢᠶᠠᠯ ᠥᠭᠭᠦᠭᠰᠡᠨ ᠪᠢᠯᠡ᠃
ᠲᠡᠢᠨ ᠪᠡᠶᠡ ᠪᠡᠨ ᠪᠣᠯᠪᠠᠰᠤᠷᠭᠤᠯᠬᠤ ᠶ᠋ᠢᠨ ᠲᠤᠯᠠᠳᠠ᠍ ᠡᠳᠦᠷ ᠪᠦᠷᠢ ᠶ᠋ᠢᠨ ᠰᠣᠨᠢᠨ ᠤ᠋《 ᠣᠷᠣᠨ ᠪᠦᠬᠦᠨ᠁》 ᠡᠴᠡ ᠨᠢ ᠠᠪᠤᠭᠠᠳ《 ᠢᠨᠳ᠋ᠸᠺᠡᠰ》( ᠢᠯᠡᠳᠬᠡᠭᠴᠢ ᠲᠣᠭᠠ) ᠬᠦᠷᠲᠡᠯᠡ ᠨᠢ ᠤᠩᠰᠢᠳᠠᠭ ᠪᠣᠯᠪᠠ᠃《 ᠮᠥᠨ ᠨᠠᠰᠤᠨ ᠳ᠋ᠤ᠌ ᠬᠦᠷᠥᠭᠴᠢᠳ ᠡᠴᠡ》 ᠣᠯᠠᠨ ᠬᠥᠮᠦᠨ ᠦ᠌ ᠭᠠᠷ ᠳᠠᠮᠵᠢᠨ ᠶᠠᠪᠤᠬᠤ ᠠᠳᠠᠯ ᠶᠠᠪᠤᠳᠠᠯᠲᠤ ᠰᠣᠨᠢᠨ ᠨᠣᠮ ᠤ᠋ᠨ ᠳᠣᠲᠣᠷᠠ ᠶ᠋ᠢ ᠲᠡᠳᠦᠢ ᠯᠡ ᠨᠠᠷᠢᠨ ᠡᠰᠡ ᠣᠢᠯᠠᠭᠠᠪᠠᠴᠤ ᠶᠡᠬᠡ ᠠᠮᠲᠠᠷᠬᠠᠭᠰᠠᠨ ᠳᠦᠷᠢ ᠦᠵᠡᠭᠦᠯᠦᠨ ᠤᠩᠰᠢᠨᠠ᠃ ᠪᠠᠭᠠ ᠳ᠋ᠠᠭᠠᠨ ᠠᠯᠲᠠᠢ ᠨᠤᠲᠤᠭ ᠤ᠋ᠨ ᠴᠢᠯᠠᠭᠤᠷᠬᠠᠭ ᠭᠠᠵᠠᠷ ᠬᠥᠯ ᠨᠢᠴᠦᠭᠦᠨ ᠶᠡᠬᠡ ᠭᠦᠶᠦᠳᠡᠭ ᠪᠠᠢᠭᠰᠠᠨ ᠠ᠋ᠴᠠ ᠪᠢᠴᠠᠷᠠᠵᠤ ᠬᠡᠪ ᠠᠯᠳᠠᠭᠰᠠᠨ ᠬᠥᠯ ᠢ᠋ ᠮᠢᠨᠢ ᠬᠠᠪᠴᠢᠨ ᠵᠣᠪᠠᠭᠠᠬᠤ ᠥᠯᠮᠡᠢ ᠬᠠᠪᠴᠢᠭ ᠱᠠᠬᠠᠢ᠂ ᠨᠠᠷᠢᠨ ᠥᠮᠥᠳᠥ ᠡᠮᠦᠰᠴᠦ᠂ ᠣᠢᠷᠠ ᠶ᠋ᠢᠨ ᠬᠠᠷᠠᠭᠠ ᠲᠠᠢ ᠨᠢᠳᠦᠨ ᠳ᠋ᠡᠭᠡᠨ ᠵᠤᠵᠠᠭᠠᠨ ᠬᠠᠷᠠ ᠰᠢᠯ ᠵᠡᠭᠦᠵᠦ ᠬᠣᠴᠣᠷᠤᠭᠳᠠᠯ ᠠ᠋ᠴᠠ ᠪᠡᠶᠡ ᠪᠡᠨ《 ᠬᠠᠮᠠᠭᠠᠯᠠᠬᠤ》 ᠨᠡᠢᠲᠡ ᠶ᠋ᠢᠨ ᠵᠢᠱ᠌ᠢᠭ ᠳᠠᠭᠠᠳᠠᠭ ᠪᠣᠯᠤᠯᠠ᠃ ᠮᠢᠨᠦ ᠪᠡᠶᠡ ᠰᠤᠷᠭᠠᠭᠤᠯᠢ ᠲᠡᠭᠦᠰᠦᠭᠡᠳ ᠤᠳᠠᠭᠠ ᠦᠭᠡᠢ ᠭᠢᠯᠠ ᠴᠢᠯᠡ ᠪᠣᠯᠤᠭᠰᠠᠨ ᠵᠠᠯᠠᠭᠤ ᠲᠠᠢ ᠬᠠᠮᠲᠤ ᠠᠵᠢᠯᠯᠠᠳᠠᠭ ᠶᠤᠮ᠃ ᠥᠷᠯᠥᠭᠡ ᠨᠠᠮᠠ ᠶ᠋ᠢ ᠣᠷᠣᠵᠤ ᠢᠷᠡᠬᠦ ᠳ᠋ᠦ᠍ ᠵᠠᠯᠠᠭᠤ ᠨᠥᠬᠥᠷ ᠮᠠᠨᠢ ᠪᠢᠴᠢᠨᠡ ᠭᠡᠵᠦ ᠴᠤ᠌ ᠵᠡᠷᠡᠢᠯᠭᠡᠵᠦ ᠪᠠᠢᠪᠠ᠃ ᠲᠠᠨᠢᠳᠠᠭ ᠬᠥᠮᠦᠨ ᠲᠡᠢ ᠪᠡᠨ ᠠᠭᠤᠯᠵᠠᠬᠤ ᠪᠦᠷᠢ ᠮᠡᠨᠳᠦᠯᠡᠵᠦ ᠬᠠᠵᠠᠭᠤ ᠪᠠᠷ ᠨᠢ ᠥᠩᠭᠡᠷᠡᠬᠦ ᠳ᠋ᠡᠭᠡᠨ《 ᠪᠠᠶᠠᠷᠯᠠᠯᠠ᠂ ᠲᠠᠨ ᠳ᠋ᠤ᠌》᠂《 ᠠᠭᠤᠴᠢᠯᠠᠭᠠᠷᠠᠢ᠂ ᠨᠠᠮᠠ ᠶ᠋ᠢ》 ᠮᠡᠲᠦ ᠶ᠋ᠢᠨ ᠦᠭᠡ ᠬᠡᠯᠡᠵᠦ ᠮᠡᠬᠦᠢᠨ ᠲᠣᠩᠭᠣᠯᠵᠠᠵᠤ ᠪᠠᠢᠬᠤ ᠨᠢ ᠬᠣᠴᠣᠷᠤᠭᠳᠠᠭᠠ ᠦᠭᠡᠢ ᠬᠥᠮᠦᠨ ᠦ᠌ ᠰᠢᠨᠵᠢ ᠭᠡᠵᠦ ᠪᠣᠳᠣᠳᠠᠭ ᠤᠴᠢᠷ ᠡᠨᠡ ᠤᠳᠠᠭᠠ ᠴᠤ᠌ ᠬᠡᠳᠦᠢᠪᠡᠷ ᠵᠠᠯᠠᠭᠤ ᠨᠥᠬᠥᠷ ᠡᠴᠡ ᠬᠣᠷᠢ ᠭᠠᠷᠤᠢ ᠠᠬᠠ ᠪᠣᠯᠪᠠᠴᠤ᠄
— ᠰᠠᠢᠬᠠᠨ ᠨᠣᠢᠷᠰᠤᠪᠠ ᠤᠤ ᠳᠠ ᠭᠡᠵᠦ ᠬᠢᠷᠢ ᠳ᠋ᠡᠭᠡᠨ ᠴᠣᠪᠣᠭᠣ ᠳᠤᠤᠭᠠᠷᠴᠤ ᠨᠠᠬᠢᠯᠵᠠᠪᠠ᠃
ᠵᠠᠯᠠᠭᠤ ᠨᠥᠬᠥᠷ ᠮᠢᠨᠦ ᠵᠦᠭ ᠲᠣᠯᠣᠭᠠᠢ ᠪᠠᠨ ᠦᠯᠦ ᠮᠡᠳᠡᠭ ᠳᠣᠬᠢᠭᠠᠳ ᠦᠷᠭᠦᠯᠵᠢᠯᠡᠭᠦᠯᠦᠨ ᠪᠢᠴᠢᠵᠦ ᠡᠬᠢᠯᠡᠪᠡ᠃ ᠲᠡᠭᠦᠨ ᠳ᠋ᠡᠭᠡᠨ ᠶᠡᠬᠡ ᠤᠯᠠᠢᠷᠠᠭᠰᠠᠨ ᠪᠣᠯᠤᠯᠲᠠᠢ ᠵᠠᠯᠠᠭᠤ ᠨᠥᠬᠥᠷ ᠢ᠋ᠶ᠋ᠡᠨ ᠠᠵᠢᠭᠯᠠᠪᠠᠯ ᠨᠢᠳᠦ ᠭᠢᠯᠪᠠᠭᠤᠯᠤᠭᠰᠠᠨ ᠡᠷᠢᠶᠡᠨ ᠫᠢᠳ᠋ᠵᠠᠺ ① ᠤᠨ ᠬᠢᠨᠢ ᠵᠠᠬᠠ ᠡᠷᠭᠢᠭᠰᠡᠨ ᠬᠠᠷᠠᠭᠳᠠᠪᠠ᠃ ᠥᠴᠥᠭᠡᠳᠦᠷ ᠪᠠᠰᠠ ᠵᠠᠬᠠ ᠨᠢ ᠡᠷᠭᠢᠭᠰᠡᠨ ᠪᠠᠢᠬᠤ ᠶ᠋ᠢ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠰᠠᠨᠠᠭᠠᠳ ᠮᠠᠨ ᠤ᠋ ᠦᠢᠯᠡᠳᠪᠦᠷᠢ ᠶ᠋ᠢᠨ ᠡᠳ᠋ ᠪᠢᠵᠡ ᠳᠡ᠂ ᠭᠠᠳᠠᠭᠠᠳᠤ ᠶ᠋ᠢᠨ ᠪᠣᠯ ᠢᠩᠭᠢᠵᠦ ᠪᠣᠰᠤᠭᠠᠳ ᠪᠠᠢᠬᠤ ᠦᠭᠡᠢ ᠭᠡᠵᠦ ᠪᠣᠳᠣᠨ᠄
— ᠠᠭᠤᠴᠢᠯᠠᠭᠠᠷᠠᠢ᠂ ᠠᠨᠳᠠ ᠠ᠋! ᠭᠡᠪᠡᠯ ᠲᠡᠷᠡ ᠪᠢᠴᠢᠵᠦ ᠪᠠᠢᠭᠰᠠᠨ ᠶᠠᠭᠤᠮᠠ ᠪᠠᠨ ᠲᠦᠷ ᠣᠷᠬᠢᠨ ᠨᠢᠳᠦ ᠪᠡᠨ ᠳᠦᠷᠯᠡᠢᠯᠭᠡᠨ ᠨᠠᠳᠠ ᠤᠷᠤᠭᠤ ᠬᠠᠷᠠᠪᠠ᠃ ᠡᠨᠡ ᠵᠠᠯᠠᠭᠤ ᠳ᠋ᠤ᠌ ᠪᠠᠭᠠ ᠪᠣᠯᠪᠠᠴᠤ ᠲᠤᠰᠠ ᠪᠣᠯᠬᠤ ᠭᠡᠵᠦ ᠪᠣᠢ ᠳ᠋ᠠᠭᠠᠨ ᠶᠡᠬᠡ ᠯᠡ ᠳᠣᠳᠢᠭᠠᠷ᠄
— ᠠᠭᠤᠴᠢᠯᠠᠭᠠᠷᠠᠢ ᠠᠨᠳᠠ ᠠ᠋᠂ ᠫᠢᠳ᠋ᠵᠠᠺ ᠤ᠋ᠨ ᠴᠢᠨᠢ ᠵᠠᠬᠠ ᠡᠷᠭᠢᠴᠡᠭᠰᠡᠨ ᠪᠠᠢᠨᠠ ᠭᠡᠵᠦ ᠶᠡᠬᠡ ᠪᠣᠯᠪᠠᠰᠤᠨ ᠬᠡᠯᠡᠭᠡᠳ《 ᠡᠨᠡ ᠨᠥᠬᠥᠷ ᠨᠠᠳᠠ ᠪᠠᠶᠠᠷᠯᠠᠯᠠ ᠭᠡᠵᠦ ᠬᠡᠯᠡᠭᠡᠳ ᠡᠷᠭᠢᠭᠰᠡᠨ ᠵᠠᠬᠠ ᠪᠠᠨ ᠵᠠᠰᠠᠨᠠ ᠪᠠᠢᠬᠠ》 ᠭᠡᠵᠦ ᠪᠣᠳᠣᠨ ᠰᠡᠳᠬᠢᠯ ᠶᠠᠯᠢᠭᠦᠢ ᠳᠣᠭᠳᠣᠯᠣᠰᠬᠢᠪᠡ᠃ ᠭᠡᠲᠡᠯᠡ ᠵᠠᠯᠠᠭᠤ ᠨᠥᠬᠥᠷ ᠮᠢᠨᠢ᠄
— ᠠ ᠲᠡᠷᠡ ᠶᠠᠭᠠᠬᠢᠬᠤ ᠪᠣᠢ ᠭᠡᠳ ᠶᠡᠷᠦ ᠲᠣᠭᠣᠭᠰᠠᠨ ᠰᠢᠨᠵᠢ ᠦᠭᠡᠢ ᠪᠠᠢᠪᠠ᠃ ᠪᠢ ᠮᠠᠯ ᠭᠠᠢᠬᠠᠵᠤ ᠵᠠᠯᠠᠭᠤ ᠨᠥᠬᠥᠷ ᠮᠠᠨᠢ ᠨᠠᠮᠠ ᠶ᠋ᠢ ᠬᠥᠯ ᠡᠴᠡ ᠲᠣᠯᠣᠭᠠᠢ ᠬᠦᠷᠲᠡᠯᠡ ᠬᠠᠷᠠᠭᠠᠳ᠄
— ᠲᠠ ᠭᠠᠢᠬᠠᠬᠤ ᠶᠠᠪᠤᠳᠠᠯ ᠦᠭᠡᠢ᠂ ᠫᠢᠳ᠋ᠵᠠᠺ ᠤ᠋ᠨ ᠵᠠᠬᠠ ᠪᠣᠰᠬᠠᠬᠤ ᠴᠢᠨᠢ ᠰᠢᠨᠡ ᠮᠣᠣᠳ᠋ ᠪᠣᠯᠤᠭᠠᠳ ᠪᠠᠢᠭᠠ ᠶᠤᠮ ᠰᠢᠦ ᠬᠢᠳᠡᠭ ᠪᠠᠢᠨᠠ᠃
— ᠠ᠋ ᠲᠠ ᠮᠢᠨᠢ! ᠬᠣᠴᠣᠷᠤᠭᠳᠠᠬᠤ ᠦᠭᠡᠢ ᠶ᠋ᠢ ᠬᠢᠴᠢᠶᠡᠭᠰᠡᠭᠡᠷ ᠪᠠᠢᠭᠰᠠᠨ ᠬᠢᠷᠢᠨᠡ ᠪᠡᠨ ᠶᠠᠭᠠᠬᠢᠬᠤᠯᠠᠷ ᠢᠩᠭᠢᠵᠦ ᠭᠠᠭᠴᠠᠬᠠᠨ ᠥᠷᠯᠥᠭᠡ ᠪᠣᠯᠬᠤ ᠳ᠋ᠤ᠌ ᠪᠦᠷ ᠬᠣᠴᠣᠷᠣᠭᠳᠠᠴᠢᠬᠠᠳᠠᠭ ᠪᠠᠢᠨᠠ ᠠ᠋?
– – – –
① ᠡᠸᠦ᠋ᠷᠦᠫᠡ ᠬᠤᠪᠴᠠᠰᠤᠨ ᠤ ᠴᠠᠮᠴᠠ
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ
ᠬᠢᠨᠠᠭ᠍ᠴᠢ : ᠲᠤᠭ᠍ᠴᠢ ᠰᠠᠷᠠᠨᠠ
2023᠂ 11᠂ 28 ᠤ᠋ ᠡᠳᠦᠷ