ᠬᠤᠯᠠᠭᠠᠢ ᠰᠣᠷᠣᠭᠰᠠᠨ ᠨᠢ – ᠴ ᠂ ᡀᠠᠮᠣᠰᠦ᠋ᠷᠦᠩ Хулгай сурсан нь – Ч ᠂ Лхамсүрэн
377ᠬᠤᠯᠠᠭᠠᠢ ᠰᠣᠷᠣᠭᠰᠠᠨ ᠨᠢ
ᠴ ᠂ ᡀᠠᠮᠣᠰᠦ᠋ᠷᠦᠩ
( ᠱᠣᠭ ᠥᠭᠦᠯᠡᠯᠭᠡ)
ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠡᠮᠦᠨᠡ ᠦᠶᠡ ᠳ᠋ᠦ᠍ ᠠᠢᠮᠠᠭ ᠬᠤᠰᠢᠭᠤᠨ ᠳ᠋ᠠᠭᠠᠨ ᠠᠯᠳᠠᠷᠲᠠᠢ ᠰᠠᠢᠨ ᠡᠷᠡ ᠪᠠᠢᠵᠠᠢ᠃ ᠲᠡᠷᠡ ᠰᠠᠢᠨ ᠡᠷᠡ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠠᠢᠮᠠᠭ ᠬᠣᠰᠢᠭᠤ ᠬᠠᠷᠠᠵᠤ ᠠᠷᠠᠳ ᠤ᠋ᠨ ᠡᠳ᠋ ᠭᠦᠷᠦᠩᠭᠡᠨ ᠳ᠋ᠦ᠍ ᠬᠢᠮᠤᠰᠤᠨ ᠤ᠋ ᠴᠢᠨᠡᠭᠡ ᠴᠤ᠌ ᠬᠦᠷᠳᠡᠭ ᠦᠭᠡᠢ ᠤᠴᠢᠷ ᠲᠡᠭᠦᠨ ᠢ᠋ ᠨᠤᠲᠤᠭ ᠤ᠋ᠨ ᠬᠢᠨ ᠰᠠᠢᠨ ᠰᠢᠷᠠᠪ ᠭᠡᠳᠡᠭ ᠪᠣᠯᠵᠠᠢ᠃ ᠰᠠᠢᠨ ᠰᠢᠷᠠᠪ ᠭᠤᠸᠠᠢ ᠨᠠᠰᠤ ᠪᠠᠨ ᠵᠢᠷᠠ ᠭᠠᠷᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠬᠤᠯᠠᠭᠠᠢ ᠬᠢᠬᠦ ᠪᠡᠨ ᠪᠣᠯᠢᠵᠤ ᠭᠠᠯ ᠤ᠋ᠨ ᠢᠯᠴᠢ ᠪᠠᠷᠠᠳᠠᠨ ᠭᠡᠷ ᠦ᠋ᠨ ᠮᠤᠬᠤᠷ ᠰᠠᠬᠢᠵᠤ ᠰᠠᠭᠤᠬᠤ ᠪᠣᠯᠵᠠᠢ᠃ ᠲᠡᠷᠡ ᠨᠤᠲᠤᠭ ᠳᠤ ᠪᠠᠨ ᠪᠤᠲᠠ ᠪᠤᠭ ᠨᠡᠢᠯᠡᠭᠰᠡᠨ ᠮᠢᠩᠭᠠ ᠰᠢᠬᠠᠮ ᠮᠠᠯ ᠲᠠᠢ ᠯᠤᠪᠰᠠᠩᠬᠦᠦ ᠶ᠋ᠢᠨ ᠬᠢ ᠭᠡᠵᠦ ᠨᠢᠭᠡ ᠠᠢᠯ ᠪᠠᠢᠵᠠᠢ᠃ ᠯᠤᠪᠰᠠᠩᠬᠦᠦ ᠡᠬᠡᠨᠡᠷ ᠲᠡᠢ ᠪᠡᠨ ᠬᠣᠶᠠᠭᠤᠯᠠ ᠠᠵᠠᠢ᠃ ᠲᠡᠳᠡᠨ ᠦ ᠬᠢ ᠨᠢᠭᠡ ᠵᠣᠨ ᠰᠠᠢᠨ ᠰᠢᠷᠠᠪ ᠤᠨ ᠬᠢ ᠲᠠᠢ ᠵᠣᠷᠢᠭᠤᠳᠠ ᠰᠠᠭᠠᠬᠠᠯᠲᠠ ᠪᠠᠭᠤᠵᠤ ᠪᠠᠢᠨ ᠪᠠᠢᠨ ᠠᠢᠯᠴᠢᠯᠠᠨ ᠢᠷᠡᠵᠦ ᠵᠠᠯᠠᠭᠤ ᠳ᠋ᠠᠭᠠᠨ ᠬᠤᠯᠠᠭᠠᠢ ᠬᠢᠵᠦ ᠶᠠᠪᠤᠭᠰᠠᠨ ᠢ᠋ ᠨᠢ ᠰᠠᠢᠨ ᠰᠢᠷᠠᠪ ᠢ᠋ᠶ᠋ᠠᠷ ᠶᠠᠷᠢᠭᠤᠯᠵᠤ ᠡᠳᠦᠷᠵᠢᠨ ᠰᠠᠭᠤᠳᠠᠭ ᠪᠣᠯᠵᠠᠢ᠃ ᠪᠠᠢᠨ ᠪᠠᠢᠭᠰᠠᠭᠠᠷ ᠶᠡᠷᠦ ᠨᠢ ᠰᠠᠢᠨ ᠡᠷᠡ ᠪᠣᠯᠵᠤ ᠬᠤᠯᠠᠭᠠᠢ ᠬᠢᠶᠡ ᠪᠠᠢᠵᠠ᠂ ᠶᠣᠰᠣᠲᠠᠢ ᠡᠷᠡ ᠬᠥᠮᠦᠨ ᠦ᠌ ᠬᠢᠳᠡᠭ ᠬᠡᠢ ᠮᠣᠷᠢ ᠲᠠᠢ ᠠᠵᠢᠯ ᠪᠠᠢᠨᠠ᠃ ᠰᠠᠢᠨ ᠬᠤᠯᠠᠭᠠᠢᠴᠢ ᠪᠣᠯᠪᠠᠯ ᠲᠤᠩ ᠠᠮᠠᠷᠬᠠᠨ ᠪᠠᠶᠠᠵᠢᠬᠤ ᠶᠤᠮ ᠪᠠᠢᠨᠠ ᠭᠡᠵᠦ ᠡᠳᠦᠷ ᠦ᠋ᠨ ᠪᠣᠳᠣᠯ ᠰᠥᠨᠢ ᠶ᠋ᠢᠨ ᠵᠡᠭᠦᠳᠦ ᠪᠣᠯᠳᠠᠭ ᠪᠣᠯᠵᠠᠢ᠃ ᠡᠨᠡ ᠰᠠᠨᠠᠭᠠ ᠪᠣᠳᠣᠯ ᠢ᠋ᠶ᠋ᠠᠨ ᠡᠬᠡᠨᠡᠷ ᠲᠡᠭᠡᠨ ᠬᠡᠯᠡᠬᠦ ᠳ᠋ᠦ᠍ ᠤᠤᠬᠠᠢ ᠶ᠋ᠢᠨ ᠳᠡᠰ ᠳᠤᠷᠠᠲᠠᠢ ᠪᠠᠢᠵᠠᠢ᠃ ᠲᠡᠭᠡᠭᠡᠳ ᠯᠤᠪᠰᠠᠩᠬᠦᠦ ᠰᠠᠢᠨ ᠰᠢᠷᠠᠪ ᠤ᠋ᠨ ᠳ᠋ᠤ᠌ ᠳᠠᠬᠢᠨ ᠳᠠᠬᠢᠨ ᠢᠷᠡᠵᠦ ᠬᠤᠯᠠᠭᠠᠢ ᠬᠢᠬᠦ ᠠᠷᠭᠠ ᠤᠬᠠᠭᠠᠨ ᠵᠢᠭᠠᠵᠤ ᠠᠯᠢ᠂ ᠪᠢ ᠵᠠᠪᠠᠯ ᠰᠤᠷᠤᠨᠠ᠂ ᠶᠡᠷᠦ ᠨᠢ ᠰᠢᠭᠢᠷᠡ ᠶ᠋ᠢ ᠴᠢᠨᠢ ᠬᠠᠲᠠᠭᠠᠵᠤ ᠵᠠᠯᠭᠠᠮᠵᠢᠯᠠᠨ ᠥᠪᠯᠡᠶᠡ ᠭᠡᠵᠦ ᠥᠭᠡᠳᠡ ᠤᠷᠤᠭᠤ ᠦᠭᠡᠢ ᠱᠠᠯᠠᠭᠠᠳ ᠰᠠᠯᠬᠤ ᠪᠠᠨ ᠪᠣᠯᠢᠵᠠᠢ᠃ ᠴᠢ ᠬᠤᠯᠠᠭᠠᠢ ᠬᠢᠵᠦ ᠶᠠᠭᠠᠬᠢᠭᠰᠠᠨ ᠴᠤ᠌ ᠴᠢᠳᠠᠬᠤ ᠦᠭᠡᠢ᠂ ᠲᠡᠷᠡ ᠴᠢᠨᠢ ᠲᠡᠢᠮᠦ ᠠᠮᠠᠷ ᠠᠵᠢᠯ ᠪᠢᠰᠢ᠃ ᠬᠡᠷᠪᠡ ᠴᠢᠮᠠ ᠶ᠋ᠢ ᠬᠤᠯᠠᠭᠠᠢ ᠰᠤᠷᠴᠢᠬᠠᠳᠠᠭ ᠶᠤᠮ ᠪᠣᠯ ᠪᠢ ᠡᠨᠡ ᠭᠠᠩᠰᠠ ᠪᠠᠨ ᠵᠦᠭᠡᠷ ᠥᠭᠭᠦᠴᠢᠭᠡᠨᠡ ᠭᠡᠵᠦ ᠲᠥᠭᠡ ᠤᠷᠲᠤ ᠴᠢᠯᠠᠭᠤᠨ ᠰᠣᠷᠣᠭᠤᠯ ᠲᠠᠢ ᠭᠠᠩᠰᠠ ᠪᠠᠨ ᠰᠠᠢᠨ ᠰᠢᠷᠠᠪ ᠭᠠᠷᠭᠠᠬᠤ ᠳ᠋ᠤ᠌ ᠯᠤᠪᠰᠠᠩᠬᠦᠦ ᠶ᠋ᠢᠨ ᠬᠣᠷᠣᠬᠠᠢ ᠨᠢ ᠬᠦᠷᠴᠦ ᠰᠢᠨᠤᠯ ᠨᠢ ᠰᠢᠲᠠᠵᠠᠢ᠃ ᠵᠠᠪᠠᠯ ᠴᠢᠳᠠᠨᠠ᠂ ᠬᠥᠮᠦᠨ ᠦ᠌ ᠴᠢᠳᠠᠭᠰᠠᠨ ᠢ᠋ ᠪᠢ ᠶᠠᠭᠠᠬᠢᠭᠠᠳ ᠴᠢᠳᠠᠬᠤ ᠦᠭᠡᠢ ᠪᠠᠢᠬᠤᠪ ᠭᠡᠬᠦ ᠳ᠋ᠦ᠍᠂ ᠬᠡᠷᠪᠡ ᠴᠢᠳᠠᠬᠤ ᠦᠭᠡᠢ ᠪᠣᠯ ᠶᠠᠭᠠᠬᠢᠬᠤᠪ ᠭᠡᠵᠦ ᠰᠠᠢᠨ ᠰᠢᠷᠠᠪ ᠠᠰᠠᠭᠤᠵᠠᠢ᠃
ᠯᠤᠪᠰᠠᠩᠬᠦᠦ ᠰᠢᠯᠢ ᠪᠡᠨ ᠮᠠᠭᠠᠵᠢᠯᠠᠨ ᠰᠠᠭᠤᠭᠰᠠᠨ ᠢᠶᠠᠨ ᠲᠡᠭᠡᠪᠡᠯ ᠪᠢ ᠠᠵᠠᠷᠭᠠ ᠠᠳᠤᠭᠤ ᠲᠠᠰᠤᠯᠵᠤ ᠥᠭᠭᠦᠨᠡ ᠭᠡᠵᠦ ᠴᠡᠭᠡᠵᠢ ᠬᠠᠩᠬᠠᠯᠵᠠᠭᠤᠯᠵᠠᠢ᠃
— ᠵᠠ ᠶᠠᠭᠠᠬᠢᠬᠤᠪ ᠲᠡᠭᠡᠪᠡᠯ ᠳᠠᠷᠠᠭᠠ ᠨᠢᠭᠡ ᠡᠳᠦᠷ ᠲᠤᠷᠰᠢᠵᠤ ᠦᠵᠡᠶᠡ᠂ ᠬᠡᠵᠢᠶᠡ ᠴᠤ᠌ ᠮᠠᠭᠠᠳ ᠦᠭᠡᠢ ᠰᠢᠦ ᠪᠡᠯᠡᠨ ᠪᠠᠢᠵᠤ ᠪᠠᠢᠭᠠᠷᠠᠢ ᠭᠡᠵᠡᠢ᠃ ᠯᠤᠪᠰᠠᠩᠬᠦᠦ ᠬᠠᠷᠢᠭᠠᠳ ᠡᠬᠡᠨᠡᠷ ᠲᠡᠭᠡᠨ ᠪᠠᠶᠠᠷ ᠬᠥᠷ ᠪᠣᠯᠭᠠᠨ ᠰᠠᠢᠨ ᠰᠢᠷᠠᠪ ᠤ᠋ᠨ ᠴᠢᠯᠠᠭᠤᠨ ᠰᠣᠷᠣᠭᠤᠯ ᠲᠠᠢ ᠭᠠᠩᠰᠠᠨ ᠤ᠋ ᠲᠤᠬᠠᠢ ᠪᠥᠭᠡᠮ ᠶᠠᠷᠢᠶᠠ ᠪᠣᠯᠤᠭᠰᠠᠭᠠᠷ ᠤᠨᠲᠠᠬᠤ ᠪᠠᠷ ᠬᠡᠪᠲᠡᠭᠰᠡᠨ ᠪᠣᠯᠪᠠᠴᠤ ᠨᠣᠢᠷ ᠨᠢ ᠬᠦᠷᠦᠭᠰᠡᠨ ᠦᠭᠡᠢ᠂ ᠲᠡᠭᠦᠨ ᠡᠴᠡ ᠬᠣᠢᠰᠢ ᠬᠡᠴᠢᠨᠡᠨ ᠬᠣᠨᠣᠭ ᠨᠣᠢᠷ ᠦᠭᠡᠢ ᠬᠣᠨᠣᠭᠰᠠᠨ ᠢ᠋ ᠪᠤᠤ ᠮᠡᠳᠡ᠃ ᠢᠷᠡᠬᠦ ᠪᠦᠷᠢ ᠳ᠋ᠦ᠍ᠨᠢ ᠰᠠᠢᠨ ᠰᠢᠷᠠᠪ ᠯᠤᠪᠰᠠᠩᠬᠦᠦ ᠶ᠋ᠢ ᠮᠠᠷᠭᠠᠰᠢ ᠭᠡᠵᠦ ᠪᠤᠴᠠᠭᠠᠳᠠᠭ ᠪᠠᠢᠵᠠᠢ᠃ ᠨᠢᠭᠡ ᠡᠳᠦᠷ ᠡᠬᠢᠯᠡᠭᠡᠳ ᠰᠢᠷᠦᠭᠦᠨ ᠪᠣᠷᠣᠭᠠᠨ ᠣᠷᠣᠭᠠᠳ ᠳᠠᠷᠠᠭᠠ ᠨᠢ ᠵᠦᠰᠡᠷᠡᠵᠡᠢ᠃ ᠡᠢᠮᠦ ᠡᠳᠦᠷ ᠬᠠᠮᠢᠭᠠ ᠠ᠋ᠴᠠ ᠶᠠᠪᠤᠨᠠ ᠭᠡᠵᠦ ᠳᠡ ᠭᠡᠳ ᠰᠠᠢᠨ ᠰᠢᠷᠠᠪ ᠤ᠋ᠨ ᠳ᠋ᠤ᠌ ᠣᠴᠢᠭᠰᠠᠨ ᠦᠭᠡᠢ ᠬᠠᠷᠢᠨ ᠣᠷᠣᠨ ᠳ᠋ᠠᠭᠠᠨ ᠣᠷᠣᠭᠠᠳ ᠤᠨᠲᠠᠵᠠᠢ᠃ ᠭᠡᠲᠡᠯᠡ ᠨᠠᠷᠠ ᠵᠢᠷᠭᠠᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠰᠠᠢᠨ ᠰᠢᠷᠠᠪ ᠲᠡᠳᠡᠨ ᠦ᠌ ᠳ᠋ᠦ᠍ ᠢᠷᠡᠵᠦ᠄
— ᠵᠠ ᠬᠠᠷᠠᠩᠭᠤᠢ ᠪᠣᠯᠬᠣᠷ ᠶᠠᠪᠤᠨᠠ᠃ ᠬᠣᠭᠣᠯᠠ ᠤᠮᠳᠠ ᠪᠠᠨ ᠰᠠᠢᠨ ᠢᠳᠡᠵᠦ ᠤᠤᠭᠤ᠂ ᠬᠣᠯᠠ ᠶᠠᠪᠤᠨᠠ ᠰᠢᠦ ᠭᠡᠵᠡᠢ᠃ ᠯᠤᠪᠰᠠᠩᠬᠦᠦ ᠪᠠᠶᠠᠷ ᠬᠥᠷ ᠪᠣᠯᠵᠤ ᠲᠠᠪᠠᠲᠠᠢ ᠲᠤᠬᠠᠲᠠᠢ ᠢᠳᠡᠵᠦ ᠤᠤᠭᠤᠭᠠᠳ ᠬᠠᠷᠠᠩᠭᠤᠢ ᠪᠣᠯᠣᠮᠠᠭᠴᠠ ᠰᠠᠢᠨ ᠰᠢᠷᠠᠪ ᠲᠠᠢ ᠴᠣᠭ ᠬᠤᠯᠠᠭᠠᠢ ᠳ᠋ᠤ᠌ ᠮᠣᠷᠳᠠᠵᠠᠢ᠃ ᠰᠠᠢᠨ ᠰᠢᠷᠠᠪ ᠳᠠᠭᠤ ᠱᠣᠣ ᠴᠤ᠌ ᠦᠭᠡᠢ ᠶᠥᠷᠭᠡᠭᠦᠯᠦᠭᠰᠡᠭᠡᠷ ᠪᠠᠢᠨᠠ᠂ ᠯᠤᠪᠰᠠᠩᠬᠦᠦ ᠴᠤ᠌ ᠳᠠᠭᠠᠭᠠᠳ ᠯᠠ ᠱᠣᠭᠰᠢᠭᠠᠳ ᠯᠠ ᠪᠠᠢᠵᠠᠢ᠃ ᠡᠷᠭᠢᠨ ᠲᠣᠭᠣᠷᠢᠨ ᠳᠡᠰ ᠬᠠᠷᠠᠩᠭᠤᠢ ᠪᠣᠯᠵᠤ ᠯᠤᠪᠰᠠᠩᠬᠦᠦ ᠳ᠋ᠦ᠍ ᠬᠠᠵᠠᠭᠤ ᠳ᠋ᠤ᠌ ᠶᠠᠪᠤᠭᠠ ᠰᠢᠷᠠᠪ ᠴᠤ᠌ ᠦᠯᠦ ᠦᠵᠡᠭᠳᠡᠬᠦ ᠠᠮᠤᠢ᠃
— ᠪᠢᠳᠡ ᠣᠳᠣ ᠬᠠᠮᠢᠭᠠ ᠶᠠᠪᠤᠵᠤ ᠪᠠᠢᠨᠠ᠃ ᠭᠠᠵᠠᠷ ᠢ᠋ᠶ᠋ᠠᠨ ᠮᠡᠳᠡᠵᠦ ᠪᠠᠢᠭᠠ ᠪᠢᠵᠡ ᠭᠡᠵᠦ ᠰᠠᠢᠨ ᠰᠢᠷᠠᠪ ᠢ᠋ ᠠᠰᠠᠭᠤᠬᠤ ᠳ᠋ᠤ᠌ ᠬᠠᠮᠢᠭᠠ ᠶᠠᠪᠤᠭᠠ ᠪᠠᠨ ᠮᠡᠳᠡᠬᠦ ᠦᠭᠡᠢ ᠪᠣᠯᠪᠠᠴᠤ ᠯᠤᠪᠰᠠᠩᠬᠦᠦ ᠨᠡᠷᠡᠯᠬᠡᠵᠦ ᠬᠠᠮᠢᠭᠠ ᠡᠢᠮᠦ ᠣᠯᠠᠨ ᠭᠣᠣᠯ ᠪᠠᠢᠳᠠᠭ ᠪᠢᠯᠡ ᠭᠡᠵᠦ ᠪᠣᠳᠣᠨ ᠪᠠᠢᠭᠰᠠᠭᠠᠷ ᠠᠷᠪᠠᠭᠠᠳ ᠥᠷᠲᠡᠭᠡ ᠭᠠᠵᠠᠷ ᠤ᠋ᠨ ᠲᠡᠷᠲᠡᠭᠡ ᠪᠠᠢᠳᠠᠭ ᠣᠯᠠᠨ ᠰᠠᠯᠠᠭᠠ ᠭᠣᠣᠯ ᠰᠠᠨᠠᠭᠠᠨ ᠳ᠋ᠤᠨᠢ ᠣᠷᠣᠵᠤ᠄
— ᠰᠠᠯᠬᠢᠲᠤ ᠶ᠋ᠢᠨ ᠭᠣᠣᠯ ᠢ᠋ᠶ᠋ᠠᠨ ᠮᠠᠲᠠᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ ᠰᠢᠷᠠᠪ ᠭᠤᠸᠠᠢ ᠮᠢᠨᠢ ᠭᠡᠵᠦ ᠠᠵᠢᠭ ᠦᠭᠡᠢ ᠬᠠᠷᠢᠭᠤᠯᠵᠠᠢ᠃ ᠰᠠᠢᠨ ᠰᠢᠷᠠᠪ ᠴᠤ᠌ ᠬᠠᠷᠢᠭᠤ ᠳ᠋ᠤᠨᠢ᠄
— ᠣᠪᠣᠭᠠ ᠣᠪᠣᠭᠠ ᠬᠤᠯᠠᠭᠠᠢᠴᠢ ᠬᠥᠮᠦᠨ ᠭᠠᠵᠠᠷ ᠢ᠋ᠶ᠋ᠠᠨ ᠢᠩᠭᠢᠵᠦ ᠯᠡ ᠮᠡᠳᠡᠳᠡᠭ ᠪᠠᠢᠬᠤ ᠬᠡᠷᠡᠭᠲᠡᠢ ᠭᠡᠬᠦ ᠳ᠋ᠦ᠍ ᠯᠤᠪᠰᠠᠩᠬᠥᠥ ᠶ᠋ᠢᠨ ᠪᠠᠶᠠᠷᠯᠠᠭᠰᠠᠨ ᠭᠡᠳᠡᠭ ᠲᠤᠢᠯ ᠦᠭᠡᠢ᠂ ᠭᠠᠩᠰᠠ ᠴᠤ᠌ ᠮᠢᠨᠦᠬᠢ ᠪᠣᠯᠤᠨᠠ ᠭᠠᠢᠭᠤᠢ᠂ ᠴᠢ ᠪᠠᠰᠠ ᠨᠠᠮᠠ ᠶ᠋ᠢ ᠪᠠᠰᠤᠭᠠᠳ ᠪᠠᠢᠯᠠ ᠤᠤ᠂ ᠭᠠᠢᠭᠤᠢ ᠬᠦ᠂ ᠯᠤᠪᠰᠠᠩᠬᠦᠦ ᠶ᠋ᠢᠨ ᠬᠡᠨ ᠪᠣᠯᠬᠤ ᠮᠡᠳᠡᠵᠦ ᠠᠮᠠ ᠪᠠᠨ ᠪᠠᠷᠢᠬᠤ ᠪᠣᠢ᠃ ᠬᠤᠯᠠᠭᠠᠢᠴᠢ ᠬᠥᠮᠦᠨ ᠭᠠᠵᠠᠷ ᠲᠣᠪᠴᠢᠯᠠᠳᠠᠭ ᠠᠷᠭᠠ ᠲᠠᠢ ᠪᠠᠢᠳᠠᠭ ᠶᠤᠮ ᠪᠠᠢᠨᠠ᠃ ᠬᠠᠷᠢᠨ ᠲᠡᠷᠡ ᠠᠷᠭᠠ ᠶ᠋ᠢ ᠨᠢ ᠶᠠᠭᠠᠬᠢᠵᠤ ᠮᠡᠳᠡᠵᠦ ᠠᠪᠤᠶᠠ ᠳᠠ ᠭᠡᠵᠦ ᠪᠣᠳᠣᠵᠠᠢ᠃ ᠨᠢᠭᠡ ᠭᠠᠵᠠᠷ ᠵᠣᠭᠰᠣᠭᠠᠳ ᠰᠠᠢᠨ ᠰᠢᠷᠠᠪ ᠯᠤᠪᠰᠠᠩᠬᠦᠦ ᠶ᠋ᠢ ᠲᠣᠬᠣᠢ ᠪᠠᠷ ᠢ᠋ᠶ᠋ᠠᠨ ᠨᠢᠳᠤᠷᠤᠨ ᠬᠠᠰᠢᠶᠠ ᠲᠠᠢ ᠬᠣᠨᠢ ᠬᠠᠷᠠᠵᠤ ᠪᠠᠢᠨᠠ ᠤᠤ ᠭᠡᠬᠦ ᠳ᠋ᠦ᠍ ᠯᠤᠪᠰᠠᠩᠬᠦᠦ ᠰᠠᠨᠳᠤᠷᠤᠭᠰᠠᠨ ᠢ᠋ᠶ᠋ᠠᠨ ᠬᠠᠷᠠᠵᠤ ᠪᠠᠢᠨᠠ ᠭᠡᠵᠡᠢ᠃
— ᠵᠠ ᠲᠡᠭᠡᠪᠡᠯ ᠬᠠᠰᠢᠶᠠᠨ ᠤ᠋ ᠢᠷᠣᠭᠠᠷ ᠳᠤ ᠵᠣᠭᠰᠣᠵᠤ ᠪᠠᠢᠭᠠ ᠢᠷᠭᠡ ᠶ᠋ᠢ ᠳᠡᠭᠦᠷᠠ ᠭᠡᠵᠡᠢ᠂ ᠯᠤᠪᠰᠠᠩᠬᠦᠦ ᠠᠷᠠᠢ ᠶᠠᠳᠠᠨ ᠵᠢᠭᠠᠯᠭᠠᠵᠤ ᠪᠠᠢᠵᠤ ᠢᠷᠭᠡ ᠶ᠋ᠢ ᠰᠢᠭᠦᠷᠡᠨ ᠳᠡᠭᠦᠷᠦᠭᠡᠳ ᠬᠣᠶᠠᠭᠤᠯᠠ ᠪᠠᠨ ᠨᠡᠯᠢᠶᠡᠳ ᠶᠠᠪᠤᠭᠠᠳ ᠭᠣᠣᠯ ᠤ᠋ᠨ ᠵᠠᠬᠠ ᠳ᠋ᠤ᠌ ᠢᠷᠡᠵᠦ ᠯᠤᠪᠰᠠᠩᠬᠦᠦ ᠬᠣᠨᠢ ᠪᠠᠨ ᠭᠠᠷᠭᠠᠵᠤ ᠰᠠᠢᠨ ᠰᠢᠷᠠᠪ ᠭᠡᠳᠡᠰᠦ ᠶ᠋ᠢ ᠨᠢ ᠠᠷᠢᠯᠭᠠᠵᠠᠢ᠂ ᠯᠤᠪᠰᠠᠩᠬᠦᠦ ᠴᠤᠴᠢᠭᠰᠠᠨ ᠢ᠋ᠶ᠋ᠠᠨ᠄
— ᠰᠢᠷᠠᠪ ᠭᠤᠸᠠᠢ ᠰᠡᠲᠡᠷ ᠲᠡᠢ ᠬᠣᠨᠢ ᠪᠠᠢᠨᠠ᠂ ᠰᠡᠲᠡᠷ ᠢ᠋ ᠨᠢ ᠶᠠᠭᠠᠬᠢᠬᠤ ᠪᠢᠯᠡ ᠭᠡᠬᠦ ᠳ᠋ᠦ᠍᠂
— ᠮᠠᠯ ᠤ᠋ᠨ ᠰᠡᠲᠡᠷ ᠢ᠋ ᠬᠡᠭᠡᠷᠡ ᠬᠠᠶᠠᠳᠠᠭ ᠦᠭᠡᠢ ᠶᠦᠮ᠂ ᠲᠦᠷᠡᠢᠪᠴᠢᠯᠡᠴᠡᠭᠡ᠃ ᠬᠠᠷᠢᠭᠠᠳ ᠭᠠᠯ ᠳ᠋ᠤ᠌ ᠡᠷᠭᠦᠴᠢᠭᠡᠷᠠᠢ ᠭᠡᠵᠦ ᠰᠠᠢᠨ ᠰᠢᠷᠠᠪ ᠬᠠᠷᠢᠭᠤᠯᠤᠭᠠᠳ ᠬᠣᠨᠢᠨ ᠤ᠋ ᠮᠢᠬᠠ ᠶ᠋ᠢ ᠯᠤᠪᠰᠠᠩᠬᠦᠦ ᠶ᠋ᠢᠨ ᠮᠣᠷᠢᠨ ᠳ᠋ᠤ᠌ ᠭᠠᠨᠵᠤᠭᠠᠯᠠᠭᠠᠳ᠄
— ᠵᠠ ᠶᠠᠭᠠᠬᠢᠬᠤᠪ ᠴᠢ ᠬᠤᠯᠠᠭᠠᠢ ᠬᠢᠵᠦ ᠴᠢᠳᠠᠬᠤ ᠨᠢ᠂ ᠮᠠᠢ ᠭᠡᠳ ᠭᠠᠩᠰᠠ ᠪᠠᠨ ᠥᠭᠭᠦᠭᠰᠡᠨ ᠳ᠋ᠦ᠍ ᠯᠤᠪᠰᠠᠩᠬᠦᠦ ᠴᠤ᠌ ᠬᠢᠵᠠᠭᠠᠷ ᠦᠭᠡᠢ ᠪᠠᠶᠠᠷᠯᠠᠭᠠᠳ ᠲᠠ ᠬᠣᠨᠢᠨ ᠤ᠋ ᠮᠢᠬᠠ ᠶ᠋ᠢ ᠠᠪᠤᠭᠠᠴᠢ ᠭᠡᠬᠦ ᠳ᠋ᠦ᠍ ᠰᠠᠢᠨ ᠰᠢᠷᠠᠪ᠄
— ᠵᠦᠭᠡᠷ ᠠᠩᠬᠠᠨ ᠤ᠋ ᠣᠯᠵᠠ ᠪᠠᠨ ᠴᠢ ᠠᠪ᠂ ᠬᠣᠵᠢᠮ ᠪᠣᠯ ᠶᠠᠭᠠᠬᠢᠬᠤᠪ ᠬᠤᠪᠢᠶᠠᠨᠠ ᠪᠢᠵᠡ ᠬᠡᠵᠡᠢ᠃
ᠲᠡᠨᠳᠡ ᠡᠴᠡ ᠬᠣᠶᠠᠭᠤᠯᠠ ᠪᠤᠴᠠᠬᠤ ᠵᠠᠮ ᠳ᠋ᠠᠭᠠᠨ ᠣᠷᠣᠵᠤ ᠶᠠᠪᠤᠲᠠᠯᠠ ᠲᠩᠷᠢ ᠴᠡᠯᠮᠡᠵᠦ ᠡᠭᠦᠯᠡᠨ ᠦ᠌ ᠴᠠᠭᠠᠨᠠ ᠠ᠋ᠴᠠ ᠰᠠᠷᠠ ᠱᠠᠬᠠᠢᠨ ᠡᠷᠭᠢᠨ ᠲᠣᠭᠣᠷᠢᠨ ᠪᠦᠷᠦᠯᠵᠡᠨ ᠬᠠᠷᠠᠭᠳᠠᠵᠤ ᠡᠬᠢᠯᠡᠵᠡᠢ᠃ ᠶᠠᠭ ᠡᠨᠡ ᠦᠶᠡ ᠳ᠋ᠦ᠍ ᠲᠡᠷᠡ ᠬᠣᠶᠠᠷ ᠯᠤᠪᠰᠠᠩᠬᠦᠦ ᠶ᠋ᠢᠨ ᠭᠠᠳᠠᠨᠠ ᠢᠷᠡᠴᠢᠭᠰᠡᠨ ᠪᠠᠢᠵᠠᠢ᠃ ᠯᠤᠪᠰᠠᠩᠬᠦᠦ ᠨᠥᠭᠥᠭᠡᠬᠢ ᠴᠠᠭᠠᠰᠢ ᠨᠠᠭᠠᠰᠢ ᠭᠠᠲᠤᠯᠤᠭᠠᠳ ᠪᠠᠢᠭᠰᠠᠨ ᠣᠯᠠᠨ ᠭᠣᠣᠯ ᠶᠠᠭᠠᠬᠢᠯᠠ᠂ ᠶᠠᠭᠠᠬᠢᠭᠰᠠᠨ ᠲᠦᠷᠭᠡᠨ ᠶᠠᠪᠤᠭᠠᠳ ᠢᠷᠡᠪᠡ ᠠ᠋ ᠭᠡᠵᠦ ᠪᠣᠳᠣᠪᠠᠴᠤ ᠲᠠᠷᠭᠤᠨ ᠬᠣᠨᠢᠨ ᠤ ᠮᠢᠬᠠ᠂ ᠠᠩᠬᠠᠨ ᠤ᠋ ᠣᠯᠵᠠ ᠳ᠋ᠠᠭᠠᠨ ᠪᠠᠶᠠᠷᠯᠠᠭᠠᠳ ᠭᠡᠷ ᠲᠡᠭᠡᠨ ᠣᠷᠣᠵᠤ ᠮᠢᠬᠠ ᠪᠠᠨ ᠬᠠᠨᠠᠨ ᠠ᠋ᠴᠠ ᠡᠯᠭᠦᠭᠡᠳ ᠳᠤᠯᠠᠭᠠᠨ ᠬᠥᠨᠵᠢᠯᠡ ᠳ᠋ᠡᠭᠡᠨ ᠣᠷᠣᠵᠤ ᠲᠤᠭ ᠨᠣᠢᠷ ᠲᠠᠭᠠᠨ ᠳᠠᠷᠤᠭᠳᠠᠵᠠᠢ᠃ ᠯᠤᠪᠰᠠᠩᠬᠦᠦ ᠶ᠋ᠢᠨ ᠡᠬᠡᠨᠡᠷ ᠡᠷᠲᠡᠯᠡᠨ ᠪᠣᠰᠤᠭᠠᠳ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠠᠪᠴᠢᠷᠠᠭᠰᠠᠨ ᠣᠯᠵᠠᠨ ᠳ᠋ᠤ᠌ ᠪᠠᠶᠠᠷᠯᠠᠨ ᠪᠠᠷᠠᠭᠤᠨ ᠬᠠ ᠶ᠋ᠢ ᠨᠢ ᠡᠪᠳᠡᠵᠦ ᠲᠣᠭᠣᠭᠠᠨ ᠳᠡᠭᠡᠷᠡ ᠬᠢᠭᠡᠳ ᠭᠠᠷᠴᠤ ᠮᠠᠯ ᠢ᠋ᠶ᠋ᠠᠨ ᠪᠦᠷᠢᠳᠬᠡᠲᠡᠯᠡ ᠨᠢ ᠣᠩᠭᠣᠨ ᠰᠡᠲᠡᠷ ᠲᠡᠢ ᠰᠢᠷᠠ ᠬᠠᠯᠵᠠᠨ ᠢᠷᠭᠡ ᠨᠢ ᠠᠯᠠᠭᠠ ᠪᠠᠢᠵᠠᠢ᠃ ᠰᠠᠨᠳᠤᠷᠴᠤ ᠲᠡᠪᠡᠳᠡᠭᠰᠡᠨ ᠭᠡᠷᠭᠡᠢ ᠨᠢ ᠭᠡᠷ ᠲᠡᠭᠡᠨ ᠣᠷᠣᠵᠤ ᠬᠣᠨᠢᠨ ᠤ᠋ ᠲᠣᠯᠣᠭᠠᠢ ᠶ᠋ᠢ ᠬᠠᠷᠠᠬᠤ ᠳ᠋ᠤ᠌ ᠰᠡᠲᠡᠷ ᠲᠡᠢ ᠬᠣᠨᠢ ᠨᠢ ᠮᠥᠨ ᠪᠠᠢᠯᠠ᠃ ᠳᠠᠭᠤ ᠱᠣᠣ ᠪᠣᠯᠵᠤ ᠨᠥᠬᠥᠷ ᠢ᠋ᠶ᠋ᠡᠨ ᠰᠡᠷᠡᠭᠡᠵᠦ ᠪᠠᠢᠲᠠᠯᠠ ᠰᠠᠢᠨ ᠰᠢᠷᠠᠪ ᠭᠠᠳᠠᠨᠠ ᠠ᠋ᠴᠠ ᠣᠷᠣᠵᠤ ᠢᠷᠡᠭᠡᠳ᠄
— ᠵᠠ ᠯᠤᠪᠰᠠᠩᠬᠦᠦ ᠮᠢᠨᠢ ᠴᠢ ᠴᠤ᠌ ᠠᠯᠵᠢᠬᠤ ᠦᠭᠡᠢ ᠰᠠᠢᠨ ᠬᠤᠯᠠᠭᠠᠢᠴᠢ ᠪᠣᠯᠬᠤ ᠨᠢ ᠳᠡ ᠭᠡᠳ ᠶᠣᠵᠣᠲᠠᠢ ᠢᠨᠢᠶᠡᠬᠦ ᠳ᠋ᠦ᠍ ᠯᠤᠪᠰᠠᠩᠬᠦᠦ ᠶ᠋ᠢᠨ ᠡᠬᠡᠨᠡᠷ ᠢᠴᠢᠬᠦ ᠳ᠋ᠡᠭᠡᠨ ᠳᠠᠭᠤ ᠠᠯᠳᠠᠨ ᠭᠠᠷᠴᠤ ᠭᠦᠶᠦᠵᠡᠢ᠃ ᠯᠤᠪᠰᠠᠩᠬᠦᠦ ᠦᠭᠡ ᠬᠡᠯᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ ᠬᠤᠴᠢᠯᠭᠠ ᠪᠠᠷ ᠲᠣᠯᠣᠭᠠᠢ ᠪᠠᠨ ᠪᠦᠲᠡᠭᠡᠵᠦ ᠪᠦᠬᠦᠯᠢ ᠡᠳᠦᠷ ᠬᠡᠪᠲᠡᠭᠰᠡᠨ ᠶᠦᠮ ᠭᠡᠳᠡᠭ᠃
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ
ᠬᠢᠨᠠᠭ᠍ᠴᠢ : ᠲᠤᠭ᠍ᠴᠢ ᠰᠠᠷᠠᠨᠠ
2023᠂ 11᠂ 22 ᠤᠨ ᠡᠳᠦᠷ