ᠨᠠᠢᠷ – ᠨ ᠂ ᠢᠰᠢᠳᠠᠪᠠᠬᠠᠢ Hайр – Н ᠂ Ишитавхай
244ᠨᠠᠢᠷ (ᠭᠤᠷᠮᠤᠰᠤᠨ ᠦᠭᠦᠯᠡᠯᠭᠡ 3 )
ᠨᠠᠢᠷ ᠶᠡᠬᠡ ᠬᠥᠯ ᠲᠡᠢ ᠬᠣᠯᠠ ᠣᠢᠷᠠ ᠳ᠋ᠤ᠌ ᠴᠣᠤᠷᠢᠶᠠᠲᠠᠢ ᠡᠬᠢᠯᠡᠭᠰᠡᠨ ᠨᠢ ᠬᠣᠲᠠ ᠭᠠᠵᠠᠷ ᠤ᠋ᠨ ᠬᠠᠮᠤᠭ ᠤ᠋ᠨ ᠲᠣᠮᠣ ᠵᠣᠭᠣᠭ ᠤ᠋ᠨ ᠭᠠᠵᠠᠷ ᠤ᠋ᠨ ᠨᠢᠭᠡ ᠶ᠋ᠢ ᠶᠠᠭᠤᠲᠠᠢ ᠬᠡᠦᠳᠡᠢ ᠨᠢ ᠬᠥᠯᠥᠰᠥᠯᠡᠵᠦ ᠠᠪᠤᠭᠰᠠᠨ ᠶᠠᠪᠤᠳᠠᠯ ᠪᠠᠢᠯᠠ᠃ ᠣᠢ ᠲᠡᠮᠳᠡᠭᠯᠡᠭᠴᠢ《 ᠦᠨᠡ ᠬᠠᠢᠷᠠᠯᠠᠬᠤ ᠦᠭᠡᠢ ᠰᠢᠦ》 ᠭᠡᠰᠡᠨ ᠪᠠᠢᠪᠠ᠃
ᠯᠤᠤᠵᠠᠩ ᠭᠤᠸᠠᠢ ᠶ᠋ᠢᠨ ᠨᠠᠰᠤᠨ ᠤ᠋ ᠣᠢ ᠳ᠋ᠤ᠌ ᠬᠣᠲᠠ ᠬᠥᠳᠡᠭᠡ ᠡᠴᠡ ᠣᠯᠠᠨ ᠬᠥᠮᠦᠨ ᠴᠤᠭᠯᠠᠵᠠᠢ᠃ ᠢᠷᠡᠭᠰᠡᠨ ᠬᠥᠮᠦᠨ ᠪᠣᠯᠭᠠᠨ ᠭᠠᠷ ᠴᠠᠢᠯᠭᠠᠬᠤ ᠪᠡᠯᠡᠭ ᠲᠠᠢ᠂ ᠥᠪᠡᠷ ᠲᠦ᠋ᠨᠢ᠂ ᠠᠪᠠᠭᠠᠢ ᠳ᠋ᠤᠨᠢ᠂ ᠬᠡᠦᠬᠡᠳ ᠲᠦ᠋ᠨᠢ ᠭᠡᠰᠡᠨ ᠶᠠᠭᠤᠮᠠ ᠲᠠᠢ ᠬᠥᠮᠦᠨ ᠴᠦ᠍ ᠮᠡᠷ ᠰᠡᠷ ᠪᠠᠢᠪᠠ᠃ ᠡᠷᠦᠬᠡ ᠶ᠋ᠢᠨ ᠬᠥᠮᠦᠨ ᠦ᠌ ᠲᠣᠭᠠ ᠪᠠᠷ ᠪᠡᠯᠡᠭ ᠲᠠᠢ ᠢᠷᠡᠭᠰᠡᠨ ᠬᠥᠮᠦᠨ ᠴᠠᠭᠠᠨᠠ ᠯᠠ ᠨᠢᠭᠡ ᠨᠦᠮᠵᠦᠭᠲᠡᠢ ᠬᠣᠭᠣᠯᠠᠨ ᠤ᠋ ᠰᠢᠷᠡᠭᠡᠨ ᠳ᠋ᠦ᠍ ᠰᠠᠭᠤᠬᠤ ᠳ᠋ᠠᠭᠠᠨ ᠴᠣ ᠭᠡᠷ ᠦ᠋ᠨ ᠡᠵᠡᠨ ᠳ᠋ᠦ᠍ ᠢᠯᠡ ᠦᠵᠡᠭᠳᠡᠬᠦ ᠨᠢᠭᠤᠷ ᠪᠠᠷᠠᠳᠠᠨ ᠰᠠᠭᠤᠳᠠᠯ ᠣᠯᠤᠭᠠᠳ ᠰᠠᠭᠤᠴᠢᠬᠠᠭᠰᠠᠨ ᠪᠠᠢᠪᠠ᠃
ᠶᠠᠪᠤᠵᠤ ᠶᠠᠪᠤᠵᠤ ᠬᠠᠮᠤᠭ ᠤ᠋ᠨ ᠲᠣᠮᠣ ᠪᠡᠯᠡᠭ ᠠᠮᠠᠯᠠᠭᠰᠠᠨ ᠬᠥᠮᠦᠨ ᠭᠡᠬᠦ ᠶᠦᠮ ᠪᠣᠯ ᠬᠥᠳᠡᠭᠡᠨ ᠡᠴᠡ ᠢᠷᠡᠭᠰᠡᠨ ᠨᠢᠭᠡᠳᠦᠯ ᠦ᠋ᠨ ᠳᠠᠷᠤᠭᠠ ᠨᠠᠢᠵᠠ ᠨᠢ ᠪᠠᠢᠯᠠ᠃ ᠲᠡᠷᠡ ᠶᠠᠭᠤ ᠠᠮᠠᠯᠠᠭᠰᠠᠨ ᠪᠣᠢ ᠭᠡᠪᠡᠯ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠬᠠᠮᠤᠭ ᠤ᠋ᠨ ᠥᠨᠳᠥᠷ ᠠᠭᠤᠯᠠ — ᠶᠡᠬᠡ — ᠰᠠᠨᠰᠠᠷ ᠢ᠋ ᠦᠨᠡᠭᠡ ᠲᠡᠢ᠂ ᠴᠢᠨᠣᠠ ᠲᠠᠢ᠂ ᠲᠠᠤᠯᠠᠢ ᠲᠠᠢ᠂ ᠬᠠᠳᠠ ᠲᠠᠢ᠂ ᠶᠠᠷᠭᠠᠢ ᠲᠠᠢ ᠨᠢ ᠲᠠᠨ ᠳ᠋ᠤ᠌ ᠳᠤᠷᠠᠰᠬᠠᠴᠢᠬᠠᠶᠠ ᠭᠡᠰᠡᠨ ᠪᠠᠢᠯᠠ!
ᠤᠭ ᠨᠢ ᠭᠠᠵᠠᠷ᠂ ᠤᠰᠤ᠂ ᠠᠩ ᠠᠮᠢᠲᠠᠨ᠂ ᠠᠭᠤᠯᠠᠰ ᠨᠡᠢᠲᠡ ᠶ᠋ᠢᠨ ᠥᠮᠴᠢ ᠯᠡ ᠳᠡ ᠭᠡᠰᠡᠨ ᠴᠦ᠍ ᠲᠥᠷᠥᠭᠰᠡᠨ ᠨᠤᠲᠤᠭ ᠤᠰᠤ ᠪᠠᠨ ᠳᠤᠷᠠᠰᠴᠤ ᠶᠠᠪᠤᠭ ᠬᠡ ᠪᠢᠵᠡ ᠬᠡᠯᠴᠡᠨᠡ᠃
ᠬᠥᠳᠡᠭᠡᠨ ᠡᠴᠡ ᠢᠷᠡᠭᠰᠡᠨ ᠬᠥᠮᠦᠨ ᠲᠡᠢᠮᠦ ᠪᠡᠯᠡᠭ ᠠᠮᠠᠯᠠᠭᠰᠠᠨ ᠲᠤᠬᠠᠢ ᠣᠢ ᠳ᠋ᠤ᠌ ᠤᠷᠢᠭᠳᠠᠭᠰᠠᠨ ᠬᠡᠨ ᠬᠥᠮᠦᠨ ᠦᠭᠡᠢ ᠨᠢᠭᠡ ᠶ᠋ᠢ ᠪᠣᠳᠣᠵᠤ ᠶᠠᠭᠠᠬᠢᠵᠤ ᠳᠡᠷᠡᠨ ᠡᠴᠡ ᠳᠠᠪᠠᠭᠤ ᠵᠦᠢᠯ ᠠᠮᠠᠯᠠᠨ ᠳᠤᠷᠠᠰᠬᠠᠳᠠᠭ ᠪᠢᠯᠡ ᠭᠡᠰᠡᠨ ᠪᠣᠳᠣᠯ ᠳ᠋ᠤ᠌ ᠣᠷᠣᠵᠠᠢ᠃
ᠨᠢᠭᠡ ᠨᠥᠬᠥᠷ ᠡᠢᠨ ᠪᠣᠳᠣᠭᠰᠠᠨ ᠨᠢ᠄ ᠪᠢ ᠪᠣᠯ ᠯᠤᠤᠵᠠᠩ ᠭᠤᠸᠠᠢ ᠶ᠋ᠢ ᠶᠡᠷᠦ ᠡᠴᠡ ᠪᠠᠨ ᠯᠠ ᠮᠠᠭᠲᠠᠨ ᠳᠠᠭᠤᠯᠠᠶᠠ᠃ ᠤᠷᠢᠳᠤ ᠡᠮᠦᠨᠡ ᠬᠡᠨ ᠴᠦ᠍ ᠳᠠᠭᠤᠯᠠᠵᠤ ᠰᠣᠨᠣᠰᠤᠭᠠ ᠦᠭᠡᠢ ᠦᠭᠡ ᠪᠡᠷ ᠮᠠᠭᠲᠠᠬᠤ ᠨᠢ ᠵᠦᠢᠲᠡᠢ᠃ ᠵᠢᠱ᠌ᠢᠶᠡᠯᠡᠬᠦ ᠶᠦᠮ ᠪᠣᠯ᠂ ᠮᠠᠨ ᠤ᠋ ᠯᠤᠤᠵᠠᠩ ᠭᠤᠸᠠᠢ ᠬᠡᠨ ᠴᠦ᠍ ᠣᠯᠤᠭᠠ ᠦᠭᠡᠢ ᠬᠠᠮᠤᠭ ᠤ᠋ᠨ ᠰᠠᠢᠬᠠᠨ ᠠᠪᠠᠭᠠᠢ ᠶ᠋ᠢ ᠠᠪᠤᠭᠰᠠᠨ ᠬᠥᠮᠦᠨ᠃ ᠲᠣᠯᠤᠭᠠᠳᠠᠬᠢ ᠳᠡᠭᠡᠷᠡ ᠪᠡᠨ ᠡᠢᠮᠦ ᠰᠠᠢᠬᠠᠨ ᠬᠥᠮᠦᠨ ᠲᠡᠢ ᠭᠡᠷᠯᠡᠭᠰᠡᠨ ᠡᠪᠦᠭᠡ ᠳᠡ ᠭᠡᠳ ᠣᠷᠬᠢᠭᠰᠠᠨ ᠴᠢᠨᠢ ᠬᠠᠵᠠᠭᠤ ᠶ᠋ᠢᠨ ᠬᠢᠨᠢ ᠨᠥᠬᠥᠳ ᠵᠢᠮᠡᠯᠡᠵᠦ ᠨᠢᠭᠡ ᠨᠥᠬᠥᠷ ᠰᠠᠭᠤᠳᠠᠯ ᠠ᠋ᠴᠠ ᠪᠠᠨ ᠤᠬᠤᠰᠬᠢᠨ ᠪᠣᠰᠴᠤ᠄
— ᠳᠠᠮᠳᠢᠨ ᠴᠢ ᠪᠤᠷᠤᠭᠤ ᠶᠠᠷᠢᠵᠤ ᠪᠠᠢᠨᠠ᠃ ᠬᠤᠪᠢ ᠶ᠋ᠢᠨ ᠠᠰᠠᠭᠤᠳᠠᠯ ᠤᠷᠤᠭᠤ ᠨᠢ ᠣᠷᠣᠵᠤ ᠪᠠᠢᠨᠠ᠃ ᠬᠤᠪᠢ ᠶ᠋ᠢᠨ ᠠᠰᠠᠭᠤᠳᠠᠯ ᠤᠷᠤᠭᠤ ᠨᠢ ᠳᠡᠩᠳᠡᠭᠦᠦ ᠬᠠᠨᠳᠤᠵᠤ ᠪᠤᠰᠤᠳ ᠤ᠋ᠨ ᠳᠣᠲᠣᠭᠠᠳᠤ ᠬᠡᠷᠡᠭ ᠲᠦ ᠣᠷᠣᠯᠴᠠᠯᠠ᠃ ᠵᠦᠢ ᠨᠢ ᠤᠯᠤᠰ ᠨᠡᠢᠭᠡᠮ ᠳ᠋ᠡᠭᠡᠨ ᠪᠠᠢᠭᠤᠯᠤᠭᠰᠠᠨ ᠭᠠᠪᠢᠶᠠᠨ ᠠ᠋ᠴᠠ ᠨᠢ ᠭᠣᠣᠯᠯᠠᠵᠤ ᠶᠠᠷᠢᠬᠤ ᠬᠡᠷᠡᠭᠲᠡᠢ᠂ ᠵᠢᠱ᠌ᠢᠶᠡᠯᠡᠬᠦ ᠶᠦᠮ ᠪᠣᠯ ᠪᠢᠳᠡ ᠴᠤᠭᠯᠠᠷᠠᠭᠠᠳ ᠥᠨᠥᠳᠥᠷ ᠣᠢ ᠶ᠋ᠢ ᠨᠢ ᠲᠡᠮᠳᠡᠭᠯᠡᠵᠦ ᠪᠠᠢᠭᠠ ᠯᠤᠤᠵᠠᠩ ᠭᠤᠸᠠᠢ ᠪᠣᠯ ᠮᠠᠰᠢ ᠲᠣᠮᠣ ᠤᠷᠠᠨ ᠪᠦᠲᠦᠭᠡᠯᠴᠢ ᠬᠥᠮᠦᠨ《 ᠤᠴᠢᠷᠲᠠᠢ ᠭᠤᠷᠪᠠᠨ ᠲᠣᠯᠣᠭᠠᠢ》 ᠲᠠᠭᠤᠤᠷᠠᠢ ᠪᠢᠴᠢᠭᠰᠡᠨ ᠦ᠌ ᠤᠴᠢᠷ ᠲᠥᠷᠥ ᠶ᠋ᠢᠨ ᠱᠠᠩᠨᠠᠯ ᠬᠦᠷᠲᠡᠭᠰᠡᠨ ᠬᠥᠮᠦᠨ ᠭᠡᠪᠡ᠃
ᠲᠠᠮᠪᠠᠯ ᠢ᠋ ᠲᠡᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠯᠤᠤᠵᠠᠩ ᠭᠤᠸᠠᠢ ᠫᠠᠯᠬᠢᠵᠤ ᠨᠢᠭᠤᠷ ᠨᠢ ᠴᠢᠪᠠᠭᠠ ᠰᠢᠭ᠋ ᠴᠢᠰ ᠤᠯᠠᠭᠠᠨ ᠪᠣᠯᠴᠢᠬᠠᠯᠠ᠃
— ᠪᠢᠰᠢ ᠠ᠋ ᠲᠡᠷᠡ ᠴᠢᠨᠢ ᠨᠠᠴᠤᠭᠳᠣᠷᠵᠢ ᠶ᠋ᠢᠨ ᠬᠢ ᠪᠠᠢᠬᠤ ᠦᠭᠡᠢ ᠤᠤ ᠭᠡᠵᠦ ᠨᠢᠭᠡ ᠨᠥᠬᠥᠷ ᠮᠤᠬᠤᠷ ᠤ᠋ᠨ ᠰᠢᠷᠡᠭᠡᠨ ᠡᠴᠡ ᠥᠨᠳᠡᠯᠵᠡᠬᠦ ᠳ᠋ᠦ᠍ ᠨᠥᠭᠥᠭᠡᠬᠢ ᠳᠠᠮᠪᠠᠯ ᠲᠣᠯᠣᠭᠠᠢ ᠪᠠᠨ ᠳᠤᠩᠰᠢᠵᠤ ᠣ ᠲᠡᠢᠮᠦ ᠰᠢᠦ ᠨᠡᠭᠡᠷᠡᠨ ᠬᠥᠭᠵᠢᠮ ᠢ᠋ ᠨᠢ ᠪᠢᠴᠢᠭᠰᠡᠨ ᠯᠡ ᠳᠡ᠃
— ᠪᠢᠰᠢ ᠠ᠋᠂ ᠳᠠᠮᠳᠢᠨᠰᠦ᠋ᠷᠦᠩ ᠦ᠋ᠨ ᠬᠢ᠃ ᠳᠠᠮᠪᠠᠯ ᠪᠦᠷ ᠴᠦ᠍ ᠪᠤᠳᠤᠯᠢᠵᠤ ᠴᠣᠬᠣᠮ ᠬᠡᠨ ᠦ᠌ ᠳ᠋ᠦ᠍ ᠣᠷᠣᠵᠤ ᠢᠷᠡᠭᠡᠳ ᠪᠠᠢᠭᠠ ᠪᠠᠨ ᠮᠡᠳᠡᠬᠦ ᠪᠡᠨ ᠪᠣᠯᠢᠭᠠᠳ᠄
— ᠵᠠ ᠡᠨᠡ ᠬᠤᠨᠳᠠᠭᠠ ᠪᠠᠨ ᠡᠷᠭᠦᠶᠡ ᠭᠡᠳ ᠰᠠᠭᠤᠵᠤ ᠣᠷᠬᠢᠪᠠ᠃
ᠤᠭᠤᠴᠠ ᠢᠳᠡᠭᠡ ᠲᠠᠯᠪᠢᠭᠰᠠᠨ ᠰᠢᠷᠡᠭᠡᠨ ᠦ᠌ ᠠᠷᠤ ᠠ᠋ᠴᠠ ᠯᠤᠤᠵᠠᠩ ᠤ᠋ᠨ ᠠᠵᠢᠯ ᠤ᠋ᠨ ᠭᠠᠵᠠᠷ ᠤ᠋ᠨ ᠳᠠᠷᠤᠭᠠ ᠲᠠᠮᠪᠠ ᠰᠢᠯᠤᠭᠤᠬᠠᠨ ᠣᠭᠯᠣ ᠬᠠᠷᠠᠢᠨ ᠪᠣᠰᠴᠤ᠄
— ᠵᠠ ᠨᠥᠬᠥᠳ ᠠ᠋᠂ ᠥᠨᠥᠳᠥᠷ ᠨᠠᠢᠷ ᠢ᠋ ᠡᠭᠦᠨ ᠢ᠋ᠶ᠋ᠡᠷ ᠵᠠᠪᠰᠠᠷᠯᠠᠶᠠ᠂ ᠮᠠᠷᠭᠠᠰᠢ ᠠᠵᠢᠯ ᠤ᠋ᠨ ᠡᠳᠦᠷ ᠬᠡᠳᠦᠢ ᠮᠥᠨ ᠠᠪᠠᠴᠤ ᠪᠢᠲᠡᠭᠦᠬᠡᠨ ᠳ᠋ᠡᠭᠡᠨ ᠬᠠᠭᠠᠯᠲᠠᠢ ᠬᠡᠮᠵᠢᠶᠡᠨ ᠳ᠋ᠦ᠍ ᠨᠠᠢᠷ ᠢ᠋ᠶ᠋ᠠᠨ ᠦᠷᠭᠦᠯᠵᠢᠯᠡᠭᠦᠯᠬᠦ ᠶᠦᠮ ᠪᠠᠢᠨᠠ᠂ ᠲᠠ ᠪᠦᠬᠦᠨ ᠳ᠋ᠦ᠍ ᠨᠢᠭᠡ ᠵᠦᠢᠯ ᠢ᠋ ᠡᠨᠡ ᠴᠤᠭᠯᠠᠭᠰᠠᠨ ᠵᠠᠪᠰᠢᠶᠠᠨ ᠢ᠋ ᠳᠠᠯᠢᠮᠳᠠᠭᠤᠯᠵᠤ ᠵᠠᠷᠯᠠᠬᠤ ᠭᠡᠵᠦ ᠰᠠᠨᠠᠯᠠ᠄
ᠢᠷᠡᠬᠦ ᠵᠢᠯ ᠮᠠᠨ ᠤ᠋ ᠨᠢᠭᠲᠠᠯᠠᠨ ᠰᠡᠮᠲᠡᠨ ᠭᠤᠸᠠᠢ ᠶ᠋ᠢᠨ ᠣᠢ ᠪᠣᠯᠤᠨᠠ! ᠲᠠ ᠪᠦᠬᠦᠨ ᠳ᠋ᠦ᠍ ᠡᠷᠲᠡᠬᠡᠨ ᠳᠣᠭᠣᠯᠭᠠᠵᠤ ᠪᠠᠢᠭᠠᠷᠠᠢ ᠭᠡᠵᠦ ᠨᠠᠳᠠ ᠳ᠋ᠤ᠌ ᠪᠠᠰᠠ《 ᠳᠠᠭᠠᠭᠠᠯᠠᠭᠠᠭᠰᠠᠨ》 ᠶᠤᠮ᠃ ᠰᠡᠮᠲᠡᠨ ᠭᠤᠸᠠᠢ ᠪᠣᠯ ᠬᠠᠭᠤᠴᠢᠨ ᠪᠣᠷᠵᠢᠭᠢᠨ ᠤ᠋ ᠨᠠᠢᠷᠴᠢ ᠨᠤᠲᠤᠭ ᠤ᠋ᠨ ᠬᠥᠮᠦᠨ᠃ ᠣᠳᠣ ᠶ᠋ᠢᠨ ᠵᠠᠷᠢᠮ ᠠᠢᠯ ᠤ᠋ᠨ ᠬᠢᠵᠦ ᠪᠠᠢᠭᠠ ᠰᠢᠭ᠋ ᠵᠣᠯ ᠶᠠᠭᠤᠮᠠ ᠬᠢᠬᠦ ᠦᠭᠡᠢ ᠭᠡᠵᠦ ᠪᠠᠢᠳᠠᠭ ᠰᠢᠦ᠃ ᠨᠡᠯᠢᠶᠡᠳ ᠳᠣᠷᠪᠢᠲᠠᠢ ᠶᠠᠭᠤᠮᠠ ᠪᠣᠳᠣᠵᠤ ᠪᠠᠢᠭᠠ ᠬᠥᠮᠦᠨ᠃ ᠯᠠᠪ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠣᠷᠣᠰᠢᠨ ᠰᠠᠭᠤᠵᠤ ᠪᠠᠢᠭᠠ ᠭᠤᠳᠤᠮᠵᠢ ᠪᠠᠨ ᠳᠣᠷᠭᠢᠲᠠᠯᠠ ᠨᠠᠢᠷ ᠬᠢᠬᠦ ᠰᠠᠨᠠᠭᠠ ᠲᠠᠢ ᠶᠤᠮ ᠳ᠋ᠠᠭ ᠠ ᠭᠡᠵᠦ ᠬᠡᠯᠡᠲᠡᠯᠡ ᠨᠢ ᠨᠢᠭᠡ ᠠᠮᠠᠨᠴᠢᠷ ᠪᠦᠰᠡᠭᠦᠢ ᠰᠢᠷᠡᠭᠡᠨ ᠦ᠌ ᠠᠳᠠᠭ ᠠ᠋ᠴᠠ ᠰᠤᠭᠤ ᠦᠰᠦᠷᠦᠨ ᠪᠣᠰᠴᠤ᠄
— ᠶᠠᠭᠠᠬᠢᠵᠤ ᠪᠣᠯᠳᠠᠭ ᠶᠤᠮ ᠪᠣᠢ᠂ ᠣᠢ ᠶ᠋ᠢ ᠢᠩᠭᠢᠵᠦ ᠲᠡᠮᠳᠡᠭᠯᠡᠬᠦ ᠴᠢᠨᠢ ᠭᠡᠮ ᠬᠡᠮᠵᠢᠶᠡᠨ ᠡᠴᠡ ᠬᠡᠲᠦᠷᠡᠵᠦ ᠪᠠᠢᠨᠠ᠃ ᠪᠢ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠣᠢ ᠶ᠋ᠢ ᠥᠭᠡᠷᠡ ᠮᠠᠶᠢᠭ ᠢ᠋ᠶ᠋ᠠᠷ ᠲᠡᠮᠳᠡᠭᠯᠡᠨᠡ᠃ ᠭᠤᠳᠤᠮᠵᠢᠨ ᠳ᠋ᠠᠭᠠᠨ ᠠᠯᠢᠮᠠ ᠵᠢᠮᠢᠰ ᠦ᠋ᠨ ᠮᠣᠳᠣ ᠰᠠᠭᠤᠯᠭᠠᠬᠤ ᠵᠡᠷᠭᠡ ᠪᠡᠷ ᠬᠣᠲᠠ ᠬᠣᠷᠢᠶᠠ ᠪᠠᠨ ᠰᠠᠢᠬᠠᠨ ᠪᠣᠯᠭᠠᠬᠤ ᠳ᠋ᠤ᠌ ᠳᠤᠷᠠᠰᠬᠤ ᠶᠠᠭᠤᠮᠠ ᠦᠯᠡᠳᠡᠨᠡ ᠭᠡᠪᠡ᠃
ᠵᠣᠴᠢᠳ ᠮᠠᠷᠭᠠᠰᠢ ᠳ᠋ᠤᠷ ᠪᠦᠷᠢᠨ ᠠᠵᠢᠯ ᠠᠯᠢᠪᠠ ᠶᠡᠬᠡᠲᠡᠢ ᠳᠠᠬᠢᠵᠤ ᠢᠷᠡᠬᠦ ᠪᠣᠯᠤᠮᠵᠢ ᠮᠠᠭᠤᠬᠠᠨ ᠪᠠᠢᠨᠠ ᠭᠡᠵᠦ ᠬᠡᠯᠡᠭᠡᠳ ᠶᠠᠪᠤᠵᠠᠭᠠᠪᠠ᠃
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠬᠢᠨᠠᠭ᠍ᠴᠢ : ᠲᠤᠭ᠍ᠴᠢ ᠰᠠᠷᠠᠨᠠ
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠪᠠᠭᠠᠲᠤᠷ