ᠲᠡᠷᠡ ᠭᠤᠸᠠᠢ – ᠨ ᠂ ᠢᠰᠢᠳᠠᠪᠠᠬᠠᠢ Тэр гуай – Н ᠂ Ишитавхай
281ᠲᠡᠷᠡ ᠭᠤᠸᠠᠢ
ᠨ ᠂ ᠢᠰᠢᠳᠠᠪᠠᠬᠠᠢ
< ᠭᠤᠷᠮᠤᠰᠤᠨ ᠥᠭᠦᠯᠡᠯᠭᠡ 2 >
ᠲᠡᠷᠡ ᠭᠤᠸᠠᠢ ᠴᠠᠭ ᠲᠠᠭᠠᠨ ᠴᠠᠯᠭᠢᠵᠤ ᠶᠠᠪᠤᠭᠰᠠᠨ ᠡᠷᠡ ᠠ᠋᠃ ᠡᠳᠦᠷ ᠨᠢ ᠠᠵᠢᠯ ᠢ᠋ᠶ᠋ᠠᠨ ᠬᠢᠵᠦ ᠢᠷᠡᠴᠢᠭᠡᠭᠡᠳ ᠰᠥᠨᠢᠵᠢᠨ ᠢ᠋ᠶ᠋ᠡᠨ ᠳᠠᠯᠤᠤ ᠨᠦᠳᠦᠵᠦ ᠨᠣᠢᠷ ᠲᠠᠢ ᠨᠣᠢᠷ ᠦᠭᠡᠢ ᠬᠣᠨᠣᠨᠠ᠃ ᠲᠡᠭᠡᠭᠰᠡᠨ ᠬᠢᠷᠢᠨᠡ ᠨᠢ ᠠᠵᠢᠯ ᠠ᠋ᠴᠠ ᠥᠷᠯᠥᠭᠡ ᠬᠣᠵᠢᠮᠳᠠᠵᠤ ᠣᠷᠣᠢ ᠶᠠᠪᠤᠵᠤ ᠦᠵᠡᠭᠡ ᠦᠭᠡᠢ᠃ ᠣᠳᠣ ᠴᠤ᠌ ᠲᠡᠷᠡ ᠯᠠ ᠶᠠᠩᠵᠤ ᠪᠠᠷ ᠢ᠋ᠶ᠋ᠠᠨ᠃
— ᠠᠵᠢᠯ ᠳᠡᠭᠡᠷᠡ ᠰᠠᠭᠤᠬᠤ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠴᠤ᠌ ᠶᠠᠭᠠᠬᠢᠬᠤᠪ ᠦᠨᠡᠨ ᠬᠦ᠌ ᠵᠢᠳᠬᠦᠯ᠂ ᠲᠡᠰᠪᠦᠷᠢᠲᠡᠢ ᠬᠥᠮᠦᠨ᠂ ᠥᠪᠡᠷ ᠦ᠋ᠨ ᠬᠢᠨᠢ ᠶᠠᠷᠢᠳᠠᠭ ᠢ᠋ᠶ᠋ᠠᠷ ᠪᠣᠯ ᠵᠥᠭᠡᠭᠡᠭᠴᠢ ᠶ᠋ᠢᠨ ᠣᠷᠣᠭᠤᠯᠵᠤ ᠥᠭᠭᠦᠭᠰᠡᠨ ᠠᠶᠠᠭᠠ ᠴᠠᠢ ᠶ᠋ᠢ ᠤᠤᠭᠤᠬᠤ ᠳ᠋ᠤ᠌ ᠴᠤ᠌ ᠭᠡᠰᠡᠨ ᠠᠯᠪᠠᠨ ᠤ᠋ ᠬᠡᠷᠡᠭ ᠲᠤ ᠰᠠᠭᠠᠳ ᠤᠴᠠᠷᠠᠬᠤ ᠶᠤᠮ ᠭᠡᠳ ᠲᠣᠯᠣᠭᠠᠢ ᠰᠡᠭᠰᠦᠷᠦᠨᠡ ᠃ ᠴᠠᠭ ᠢ᠋ ᠲᠡᠭᠡᠵᠦ ᠨᠠᠷᠢᠨ ᠠᠰᠢᠭᠯᠠᠵᠤ ᠰᠤᠷᠤᠭᠰᠠᠨ ᠬᠥᠮᠦᠨ ᠳ᠋ᠦ᠍ ᠪᠦᠲᠦᠭᠡᠯ ᠴᠣᠬᠣᠮ ᠠᠭᠤᠯᠠ ᠣᠪᠣᠭᠠ ᠰᠢᠭ᠋ ᠪᠠᠢᠬᠤ ᠪᠠᠷ ᠯᠠ ᠳᠠ᠃ ᠲᠡᠷᠡ ᠭᠤᠸᠠᠢ ᠴᠠᠭ ᠠᠰᠢᠭᠯᠠᠯᠲᠠ ᠭᠣᠣᠯᠯᠠᠵᠤ ᠰᠤᠷᠤᠭᠰᠠᠨ ᠬᠥᠮᠦᠨ ᠪᠣᠯᠬᠤ ᠪᠠᠷ ᠠᠵᠢᠯ ᠤ᠋ᠨ ᠴᠠᠭ ᠢ᠋ᠶ᠋ᠠᠷ ᠰᠣᠨᠢᠨ ᠰᠡᠳᠬᠦᠯ ᠶᠠᠭᠤᠮᠠ ᠤᠩᠰᠢᠬᠤ ᠪᠠᠢᠲᠤᠭᠠᠢ ᠱᠠᠬᠠᠢᠵᠤ ᠴᠤ᠌ ᠬᠠᠷᠠᠬᠤ ᠦᠭᠡᠢ᠃
ᠡᠳᠦᠷ ᠦ᠋ᠨ ᠬᠢᠭᠰᠡᠨ ᠠᠵᠢᠯ᠂ ᠲᠥᠯᠥᠪᠯᠡᠭᠰᠡᠨ ᠪᠢᠴᠢᠭ ᠰᠡᠯᠲᠡ᠂ ᠲᠦᠭᠡᠭᠡᠭᠴᠢ ᠡᠴᠡ ᠬᠦᠯᠢᠶᠡᠵᠦ ᠠᠪᠤᠭᠰᠠᠨ ᠰᠣᠨᠢᠨ᠂ ᠰᠡᠳᠬᠦᠯ ᠲᠡᠢ ᠳᠠᠪᠬᠤᠷᠳᠠᠵᠤ ᠰᠢᠷᠡᠭᠡᠨ ᠳᠡᠭᠡᠷᠡ ᠨᠢ ᠲᠡᠪᠬᠡᠢᠵᠦ ᠣᠪᠤᠬᠠᠷᠠᠭᠰᠠᠭᠠᠷ ᠪᠠᠢᠭᠠᠳ ᠥᠪᠡᠷ ᠢ᠋ᠶ᠋ᠡᠨ ᠴᠠᠭᠠᠨᠠ ᠠ᠋ᠴᠠ ᠨᠢ ᠦᠵᠡᠭᠳᠡᠬᠦ ᠦᠭᠡᠢ ᠰᠢᠬᠠᠮ ᠪᠣᠯᠳᠠᠭ ᠪᠠᠢᠯᠠ᠃ ᠣᠳᠣ ᠴᠤ᠌ ᠲᠡᠷᠡ ᠯᠠ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ᠃ ᠲᠦᠷᠦᠭᠦᠴᠢ ᠡᠴᠡ ᠬᠣᠷᠣᠬᠤ ᠨᠢ ᠬᠣᠷᠣᠳᠠᠭ᠂ ᠭᠡᠬᠦ ᠳ᠋ᠡᠭᠡᠨ ᠲᠡᠷᠡ ᠭᠤᠸᠠᠢ ᠶ᠋ᠢᠨ ᠲᠥᠯᠥᠪᠯᠡᠭᠰᠡᠨ᠂ ᠵᠦᠢᠯ᠂ ᠴᠣᠬᠣᠷᠯᠠᠭᠰᠠᠨ ᠴᠠᠭᠠᠰᠤ᠂ ᠱᠠᠯᠢᠲᠠᠢ ᠬᠣᠯᠠ ᠶᠠᠪᠤᠭᠠ ᠦᠭᠡᠢ ᠰᠠᠢᠨ ᠳ᠋ᠠᠭᠠᠨ ᠯᠠ ᠲᠷᠧᠰᠲ ᠦ᠋ᠨ ᠳᠠᠷᠤᠭᠠ ᠳ᠋ᠤ᠌ ᠬᠦᠷᠦᠨᠡ᠃ ᠢᠩᠭᠢᠬᠦ ᠨᠢ ᠭᠠᠵᠠᠷ ᠤ᠋ᠨ ᠳᠠᠷᠤᠭᠠ ᠣᠷᠣᠯᠠᠭᠴᠢ ᠨᠠᠷ ᠠ᠋ᠴᠠ ᠪᠤᠴᠠᠨᠠ᠂ ᠲᠡᠭᠡᠬᠦᠯᠡᠷ ᠲᠡᠷᠡ ᠭᠤᠸᠠᠢ ᠶ᠋ᠢᠨ ᠰᠢᠷᠡᠭᠡᠨ ᠳᠡᠭᠡᠷᠡᠬᠢ ᠨᠢᠮᠭᠡᠷᠡᠨᠡ᠂ ᠴᠥᠭᠡᠷᠡᠨᠡ ᠭᠡᠵᠦ ᠪᠠᠢᠬᠤ ᠦᠭᠡᠢ᠂ ᠭᠣᠣᠯᠳᠠᠭᠤ ᠯᠠ ᠵᠠᠰᠠᠪᠤᠷᠢ ᠲᠠᠢ ᠬᠠᠭᠤᠳᠠᠰᠤ ᠳᠦᠭᠦᠷᠡᠩ ᠪᠠᠢᠳᠠᠭ᠃ ᠪᠦᠷ ᠳᠡᠢᠯᠬᠦ ᠪᠡᠨ ᠪᠠᠢᠭᠠᠳ ᠢᠷᠡᠬᠦ ᠪᠡᠷ ᠨᠢ ᠬᠡᠯᠲᠡᠰ ᠢ᠋ᠶ᠋ᠡᠷ ᠢ᠋ᠶ᠋ᠡᠨ《 ᠲᠦᠷᠭᠡᠨ》 ᠠᠪᠴᠤ ᠭᠠᠵᠠᠷ ᠠ᠋ᠴᠠ ᠪᠠᠨ ᠬᠥᠮᠦᠨ ᠬᠦᠴᠦ ᠨᠡᠮᠡᠵᠦ ᠪᠠᠢᠵᠤ ᠦᠶᠡ ᠦᠶᠡ ᠰᠦᠪᠪᠦᠲ᠋ᠨᠢᠺ ᠬᠢᠵᠦ ᠵᠢᠭᠠᠬᠠᠨ ᠳᠤᠮᠳᠠᠷᠠᠭᠤᠯᠬᠤ ᠤᠳᠠᠭᠠ ᠭᠠᠷᠳᠠᠭ᠃ ᠲᠡᠭᠡᠭᠡᠳ ᠴᠣᠬᠣᠮ ᠠᠴᠢᠶᠠᠯᠠᠯ ᠤ᠋ᠨ ᠢ᠋ᠶ᠋ᠠᠨ ᠬᠤᠪᠢ ᠳ᠋ᠤ᠌ ᠠᠪᠤᠭᠠᠳ ᠦᠵᠡᠬᠦ ᠶᠦᠮ ᠪᠣᠯ ᠲᠤᠰᠠᠯᠠᠬᠤ ᠵᠠᠯᠠᠭᠤ ᠶ᠋ᠢᠨ ᠬᠤᠭᠤᠰ ᠡᠳᠦᠷ ᠪᠠᠢᠳᠠᠭ ᠶᠤᠮ᠃
ᠦᠭᠡ ᠦᠰᠦᠭ ᠵᠠᠰᠠᠪᠤᠷᠢ ᠶ᠋ᠢᠨ ᠶᠡᠬᠡᠩᠬᠢ ᠨᠢ ᠱᠠᠭᠠᠷᠳᠠᠯᠭᠠ ᠥᠬᠡᠢ ᠭᠠᠵᠠᠷ ᠲᠤ ᠲᠤᠰᠢᠶᠠᠭᠰᠠᠨ ᠴᠢᠨᠠᠷ ᠤ᠋ᠨ ᠦᠭᠡ ᠬᠡᠷᠡᠭᠯᠡᠵᠦ᠂ ᠵᠢᠱ᠌ᠢᠶᠡ ᠨᠢ᠄《 ᠪᠠᠶᠠᠷ ᠢ᠋ ᠬᠦᠷᠭᠡᠰᠦᠭᠡᠢ》 ᠭᠡᠴᠢᠬᠡᠭᠰᠡᠨ ᠪᠠᠢᠳᠠᠭ᠃
ᠬᠠᠷᠢᠨ ᠮᠠᠨᠢ ᠡᠷᠡ ᠶ᠋ᠢᠨ ᠰᠡᠳᠦᠭᠰᠡᠨ ᠨᠢᠭᠡ ᠵᠦᠢᠯ ᠪᠣᠯ ᠰᠡᠭᠦᠯ ᠦ᠋ᠨ ᠵᠢᠯ ᠦ᠋ᠳ ᠲᠥᠯᠤᠪᠯᠭᠰᠡᠨ ᠲᠣᠭᠲᠠᠭᠠᠯ ᠲᠤᠰᠢᠶᠠᠯ ᠵᠡᠷᠭᠡ ᠳ᠋ᠦ᠍ᠨᠢ《 ᠬᠥᠳᠡᠯᠮᠦᠷᠢ ᠶ᠋ᠢ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ᠋ ᠦᠨᠳᠦᠰᠦ ᠲᠡᠢ ᠵᠣᠬᠢᠶᠠᠨ ᠪᠠᠢᠭᠤᠯᠵᠤ》 ᠭᠡᠰᠡᠨ ᠦᠭᠡ ᠨᠡᠯᠢᠶᠡᠳ ᠪᠢᠴᠢᠭᠳᠡᠬᠦ᠂ ᠲᠥᠯᠥᠪᠯᠡᠭᠳᠡᠬᠦ ᠪᠣᠯᠤᠭᠰᠠᠨ ᠶᠤᠮ᠃ ᠡᠭᠦᠨ ᠢ᠋ ᠪᠡᠨ ᠲᠡᠷᠡ ᠭᠤᠸᠠᠢ ᠠᠭᠤᠯᠭᠠ ᠪᠠᠶᠠᠵᠢᠭᠤᠯᠤᠭᠰᠠᠨ《 ᠰᠢᠨᠡ ᠰᠠᠨᠠᠭᠠ》 ᠭᠡᠳ ᠱᠠᠭᠠᠷᠳᠠᠯᠭᠠ ᠥᠬᠡᠢ ᠭᠠᠵᠠᠷ ᠠ᠋ᠴᠠ ᠬᠠᠰᠤᠬᠤ ᠭᠡᠵᠦ ᠣᠷᠣᠯᠳᠣᠭᠰᠠᠨ ᠬᠥᠮᠦᠨ ᠲᠡᠢ ᠮᠠᠷᠭᠤᠯᠳᠤᠳᠠᠭ ᠪᠣᠯᠤᠯᠠ ᠬᠡᠯᠡᠴᠡᠨᠡ᠃
ᠵᠠ ᠶᠠᠷᠰᠢᠭ ᠳᠠ᠂ ᠦᠭᠡ ᠦᠰᠦᠭ ᠢ᠋ᠶ᠋ᠡᠷ ᠬᠥᠭᠡᠭᠡᠴᠡᠯᠳᠦᠵᠦ ᠲᠡᠷᠡ ᠭᠤᠸᠠᠢ ᠲᠠᠢ《 ᠦᠰᠲᠡᠨ》 ᠪᠣᠯᠤᠭᠠᠳ ᠴᠤ᠌ ᠶᠠᠭᠠᠬᠢᠬᠤᠪ ᠬᠡᠯᠡᠴᠡᠬᠦ ᠪᠣᠯᠪᠠᠴᠤ ᠴᠠᠭᠠᠨᠠ ᠨᠢ ᠠᠵᠢᠯ ᠤ᠋ᠨ ᠡᠷᠬᠡ ᠠᠰᠢᠭ ᠬᠣᠬᠢᠷᠠᠵᠤ ᠪᠠᠢᠭᠠ ᠪᠣᠯᠬᠣᠷ ᠨᠥᠬᠥᠳ ᠨᠢ ᠲᠡᠪᠴᠢᠭᠡᠳ ᠪᠠᠢᠬᠤ ᠬᠡᠴᠡᠭᠦᠦ᠂ ᠶᠠᠭᠠᠬᠢᠬᠤᠪ ᠬᠣᠶᠠᠷ ᠨᠢᠭᠡ ᠵᠢᠯ ᠴᠤ᠌ ᠭᠡᠰᠡᠨ ᠪᠠᠢᠶᠠ ᠬᠡᠯᠡᠴᠡᠬᠦ ᠴᠠᠭ ᠪᠠᠢᠭᠰᠠᠨ ᠠᠪᠠᠴᠤ ᠲᠡᠷᠡ ᠲᠡᠰᠦᠭᠡᠳ ᠪᠠᠢᠭᠰᠠᠨ ᠵᠢᠯ ᠦ᠋ᠳ ᠬᠡᠳᠦᠢᠨ ᠨᠢ ᠥᠩᠭᠡᠷᠡᠴᠢᠬᠡᠭᠰᠡᠨ ᠪᠠᠢᠨᠠ᠃ ᠲᠡᠷᠡ ᠭᠤᠸᠠᠢ ᠶ᠋ᠢᠨ ᠡᠮ ᠦ᠋ᠨ ᠴᠢᠯᠥᠭᠡ ᠲᠡᠢ ᠡᠳᠦᠷ ᠨᠢ ᠣᠯᠠᠰᠢᠷᠠᠭᠰᠠᠭᠠᠷ ᠵᠢᠯ ᠦ᠋ᠨ ᠲᠠᠢᠯᠤᠨ ᠭᠠᠷᠬᠤ ᠳ᠋ᠤ᠌ ᠨᠡᠢᠭᠡᠮ ᠦ᠋ᠨ ᠳᠠᠭᠠᠳᠬᠠᠯ ᠠ᠋ᠴᠠ ᠬᠠᠮᠤᠭ ᠤ᠋ᠨ ᠣᠯᠠᠨ ᠤᠳᠠᠭᠠ ᠲᠡᠳᠬᠦᠮᠵᠢ ᠠᠪᠤᠭᠰᠠᠨ ᠬᠥᠮᠦᠨ ᠲᠡᠷᠡ ᠭᠤᠸᠠᠢ ᠪᠠᠢᠯᠠ᠃
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠬᠢᠨᠠᠭ᠍ᠴᠢ : ᠲᠤᠭ᠍ᠴᠢ ᠰᠠᠷᠠᠨᠠ
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠪᠠᠭᠠᠲᠤᠷ
2023᠂11᠂12