ᠰᠠᠭᠤᠴᠢᠬᠠᠯᠠ – ᠨ ᠂ ᠢᠰᠢᠳᠠᠪᠠᠬᠠᠢ Суучихлаа – Н ᠂ Ишитавхай
290ᠰᠠᠭᠤᠴᠢᠬᠠᠯᠠ
ᠨ᠂ ᠢᠰᠢᠳᠠᠪᠬᠠᠢ
< ᠭᠤᠷᠮᠤᠰᠤᠨ ᠥᠭᠦᠯᠡᠯᠭᠡ 1 >
ᠯᠤᠲᠠ ᠣᠢᠷᠠ ᠠ᠋ᠴᠠ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠲᠡᠭᠦᠰᠦᠭᠴᠢ ᠶ᠋ᠢᠨ ᠬᠢ ᠪᠡᠨ ᠡᠩᠭᠡᠷ ᠦ᠋ᠨ ᠲᠡᠮᠳᠡᠭ ᠢ᠋ ᠡᠳᠦᠷ ᠪᠦᠷᠢ ᠭᠢᠯᠠᠯᠵᠠᠲᠠᠯᠠ ᠵᠦᠯᠭᠦᠨ ᠵᠡᠭᠦᠵᠦ ᠶᠠᠪᠤᠳᠠᠭ ᠪᠣᠯᠤᠯᠠ᠂ ᠲᠡᠷᠡ ᠲᠡᠮᠳᠡᠭ ᠤᠭ ᠨᠢ ᠯᠤᠲᠠ ᠶ᠋ᠢᠨ ᠡᠩᠭᠡᠷ ᠢ᠋ ᠠᠷᠪᠠᠨ ᠲᠠᠪᠤᠨ ᠵᠢᠯ ᠴᠢᠮᠡᠵᠦ ᠶᠠᠪᠤᠭᠠ ᠶᠤᠮ ᠪᠠᠢᠨᠠ᠃
ᠨᠠᠢᠵᠠ ᠨᠠᠷ ᠨᠢ᠄
— ᠠ᠋ ᠴᠢᠨᠦ ᠨᠠᠭᠠᠳᠤᠬᠢ ᠴᠢᠨᠢ ᠥᠩᠭᠡ ᠠᠯᠳᠠᠵᠤ ᠣᠷᠬᠢᠵᠤ ᠭᠡᠮ᠂ ᠴᠠᠭᠠᠨᠠ ᠠ᠋ᠴᠠ ᠨᠢ ᠵᠡᠰ ᠴᠤᠬᠤᠢᠵᠤ ᠪᠠᠢᠨᠠ᠃ ᠣᠳᠣᠬᠠᠨ ᠥᠩᠭᠡᠯᠡᠭᠦᠯᠦᠭᠡᠴᠢ ᠭᠡᠵᠦ ᠵᠥᠪᠯᠡᠳᠡᠭ ᠪᠣᠯᠪᠠ᠃ ᠨᠠᠢᠵᠠ ᠨᠠᠷ ᠤ᠋ᠨ ᠢ᠋ᠶ᠋ᠠᠨ ᠲᠡᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠯᠤᠲᠠ ᠳᠤᠷᠠᠮᠵᠢᠬᠠᠨ ᠢᠨᠢᠶᠡᠮᠰᠦᠭᠯᠡᠭᠡᠳ᠄
— ᠵᠠ ᠵᠠ ᠶᠠᠭᠠᠬᠢᠳᠠᠭ ᠶᠤᠮ᠂ ᠵᠡᠰ ᠴᠤᠬᠤᠢᠪᠠᠯ ᠴᠤᠬᠤᠢᠵᠤ ᠯᠠ ᠶᠠᠪᠤᠭ᠂ ᠡᠨᠡ ᠶᠠᠮᠠᠷ ᠠᠵᠢᠯ ᠳ᠋ᠤ᠌ ᠨᠥᠯᠥᠭᠡᠯᠡᠬᠦ ᠡᠳ᠋ ᠪᠢᠰᠢ ᠭᠡᠳ ᠥᠩᠭᠡᠷᠡᠭᠦᠯᠳᠡᠭ ᠪᠠᠢᠪᠠ᠃
— ᠦᠭᠡᠢ ᠠ᠋ ᠲᠡᠢᠮᠦ ᠪᠢᠰᠢ ᠠ᠋ ᠳᠠᠷᠤᠭᠠ ᠠ᠋᠂ ᠠᠩᠬᠠ ᠰᠢᠷᠡᠭᠡᠨ ᠦ᠌ ᠠᠷᠤ ᠠ᠋ᠴᠠ ᠲᠠᠨ ᠤ᠋ ᠡᠨᠡ ᠲᠡᠮᠳᠡᠭ ᠦᠦᠷ ᠦ᠋ᠨ ᠴᠣᠯᠮᠣᠨ ᠰᠢᠭ᠋ ᠭᠢᠯᠠᠯᠵᠠᠵᠤ᠂ ᠳᠠᠷᠤᠭᠠ ᠴᠤ᠌ ᠰᠢᠨᠡ᠂ ᠲᠡᠮᠳᠡᠭ ᠴᠤ᠌ ᠰᠢᠨᠡ᠂ ᠶᠠᠭᠤᠮᠠ ᠪᠦᠬᠦᠨ ᠭᠢᠯᠠᠯᠵᠠᠵᠤ ᠶᠠᠪᠤᠳᠠᠭ ᠪᠠᠢᠯᠠ ᠭᠡᠵᠦ ᠨᠠᠷᠢᠨ ᠪᠢᠴᠢᠭ ᠦ᠋ᠨ ᠳᠠᠷᠤᠭᠠ ᠳ᠋ᠣᠮᠪᠠ ᠭᠡᠭᠴᠢ ᠠᠮᠠᠲᠠᠢᠬᠠᠨ ᠬᠡᠦᠬᠡᠨ ᠢ᠋ ᠬᠡᠯᠡᠬᠦ ᠳ᠋ᠦ᠍ ᠯᠤᠲᠠ ᠠᠭᠤᠷᠯᠠᠬᠤ ᠶᠠᠩᠵᠤ ᠣᠷᠣᠵᠤ᠄
— ᠲᠡᠭᠡᠭᠡᠳ᠂ ᠲᠡᠭᠡᠭᠡᠳ? ᠣᠳᠣ ᠶᠠᠮᠠᠷ ᠪᠣᠯᠤᠭᠠᠳ ᠪᠠᠢᠨᠠ᠃ ᠴᠢ ᠶᠡᠷᠦ ᠨᠢ ᠶᠠᠭᠤ ᠶᠠᠷᠢᠭᠠᠳ ᠪᠠᠢᠨᠠ᠃ ᠠ ᠪᠢ ᠴᠢᠨᠦ ᠡᠨᠡ ᠦᠭᠡᠯᠡᠭᠡᠳ ᠪᠠᠢᠭᠠ ᠶ᠋ᠢ ᠣᠢᠯᠠᠭᠠᠬᠤ ᠦᠭᠡᠢ ᠪᠠᠢᠨᠠ᠃ ᠮᠢᠨᠦ ᠡᠩᠭᠡᠷ ᠳᠡᠭᠡᠷᠡᠬᠢ ᠮᠠᠭᠤᠳᠠᠵᠤ ᠪᠠᠢᠭᠠ ᠪᠣᠯᠬᠤ ᠠ᠋ᠴᠠ ᠪᠢᠰᠢ᠂ ᠴᠢᠨᠦ ᠭᠡᠵᠢᠭᠡᠨ ᠳᠠᠷᠤᠭᠤᠯᠤᠭᠠ ᠮᠠᠭᠤᠳᠠᠵᠤ ᠪᠠᠢᠭᠠ ᠪᠢᠰᠢ ᠭᠡᠵᠦ ᠲᠷᠧᠰᠲ( ᠨᠢᠭᠡᠳᠦᠯ) ᠦ᠋ᠨ ᠳᠠᠷᠤᠭᠠ ᠬᠡᠯᠡᠪᠡ᠃
ᠳ᠋ᠣᠮᠪᠠ ᠳᠥᠭᠥᠵᠦ ᠰᠠᠭᠤᠭᠠᠳ ᠬᠡᠷᠡᠯᠳᠦᠬᠦ ᠶᠠᠩᠵᠤ ᠣᠷᠣᠵᠤ ᠬᠣᠭᠣᠯᠠᠢ ᠵᠠᠰᠠᠨ᠄
— ᠪᠢ ᠶᠠᠮᠠᠷ ᠲᠠᠨ ᠤ᠋ ᠨᠠᠭᠠᠳᠤ ᠡᠩᠭᠡᠷ ᠳᠡᠭᠡᠷᠡᠬᠢ ᠶ᠋ᠢᠨ ᠴᠢᠨᠢ ᠲᠥᠯᠥᠭᠡ ᠬᠡᠯᠡᠭᠰᠡᠨ ᠪᠣᠯᠬᠤ ᠠ᠋ᠴᠠ ᠪᠢᠰᠢ ᠰᠠᠭᠤᠳᠠᠯ ᠤ᠋ᠨ ᠲᠠᠨᠢ ᠲᠤᠬᠠᠢ ᠶᠠᠷᠢᠭᠠ ᠦᠭᠡᠢ ᠪᠠᠢᠨᠠ᠃
— ᠠ ᠤᠤᠬᠠᠢ᠂ ᠴᠢ ᠪᠠᠰᠠ ᠮᠢᠨᠦ ᠰᠢᠷᠡᠭᠡ ᠰᠠᠨᠳᠠᠯᠢ ᠤᠷᠤᠭᠤ ᠰᠠᠨᠠᠭᠠ ᠲᠠᠢ ᠪᠠᠢᠨᠠ ᠤᠤ? ᠨᠡᠷᠡ ᠲᠡᠢ ᠪᠡᠷ ᠨᠢ ᠴᠢ ᠡᠨᠡ ᠰᠢᠷᠡᠭᠡᠨ ᠳᠡᠭᠡᠷᠡ ᠰᠠᠭᠤᠭᠠᠲᠠᠭᠠ ᠯᠠ ᠳᠠ᠂ ᠠᠯᠢ ᠬᠢᠷᠢ ᠵᠣᠬᠢᠬᠤ ᠨᠢ ᠪᠣᠢ᠂ ᠲᠡᠭᠡᠭᠡᠳ ᠬᠣᠶᠠᠭᠤᠯᠠ ᠪᠠᠨ ᠰᠠᠭᠤᠳᠠᠯ ᠢ᠋ᠶ᠋ᠠᠨ ᠰᠣᠯᠢᠭᠠᠳ ᠦᠵᠡᠶᠡ ᠭᠡᠵᠦ ᠯᠤᠲᠠ ᠳᠦᠷᠢᠮᠳᠡᠪᠡ᠃
ᠲᠷᠧᠰᠲ ᠦ᠋ᠨ ᠳᠠᠷᠤᠭᠠ ᠤᠲᠠᠰᠤ ᠪᠠᠨ ᠰᠢᠭᠦᠷᠡᠨ ᠠᠪᠴᠤ ᠭᠠᠷᠠᠰᠢ ① ᠤᠷᠤᠭᠤ ᠵᠠᠯᠭᠠᠭᠤᠯᠵᠤ᠄ ᠮᠢᠨᠦ ᠮᠠᠰᠢᠨ ᠢ᠋ ᠶᠠᠭᠠᠷᠠᠯᠲᠠᠢ ᠢᠷᠡᠭᠦᠯ ᠭᠡᠪᠡ᠃ ᠢᠩᠬᠡᠲᠡᠯᠡ ᠨᠠᠷᠢᠨ ᠪᠢᠴᠢᠭ ᠦᠨ ᠳᠠᠷᠤᠭᠠ ᠨᠢ ᠳᠠᠷᠤᠭᠠ ᠪᠠᠨ ᠲᠠᠢᠳᠬᠤᠷᠠᠭᠤᠯᠬᠤ ᠤᠬᠠᠭᠠᠨ ᠰᠡᠢᠯᠵᠦ᠄
— ᠳᠠᠷᠤᠭᠠ ᠲᠠ ᠠᠭᠤᠴᠢᠯᠠᠭᠠᠷᠠᠢ᠂ ᠪᠢ ᠲᠠᠨ ᠳ᠋ᠤ᠌ ᠡᠪ ᠦᠭᠡᠢ ᠶᠠᠭᠤᠮᠠ ᠬᠡᠯᠡᠴᠢᠬᠡᠬᠦ ᠰᠢᠭ ᠪᠣᠯᠤᠯᠠ᠂ ᠢᠩᠭᠢᠬᠦ ᠳ᠋ᠦ᠍ ᠲᠠᠨ ᠤ᠋ ᠮᠠᠰᠢᠨ ᠢ᠋ ᠰᠣᠯᠢᠵᠤ ᠳᠠᠷᠤᠭᠠ ᠳ᠋ᠤ᠌ ᠰᠢᠨᠡ ᠮᠠᠰᠢᠨᠠ ᠥᠭᠭᠦᠨᠡ ᠭᠡᠵᠦ ᠥᠴᠥᠭᠡᠳᠦᠷ ᠭᠠᠷᠠᠰᠢ ᠶ᠋ᠢᠨ ᠳᠠᠷᠤᠭᠠ ᠨᠠᠳᠠ ᠳ᠋ᠤ᠌ ᠬᠡᠯᠡᠭᠰᠡᠨ ᠰᠢᠦ᠃ ᠲᠠᠨ ᠳ᠋ᠤ᠌ ᠬᠡᠯᠡᠪᠡ ᠤᠤ? ᠭᠡᠰᠡᠨ ᠳ᠋ᠦ᠍ ᠯᠤᠲᠠ ᠴᠢᠷᠠᠢ ᠬᠤᠪᠢᠰᠬᠠᠵᠤ ᠳᠠᠭᠤ ᠵᠥᠭᠡᠯᠡᠷᠡᠭᠡᠳ ᠪᠦᠰᠡᠭᠦᠢ ᠤᠷᠤᠭᠤ ᠬᠠᠨᠳᠤᠵᠤ᠄
— ᠴᠢ ᠶᠠᠭᠤ ᠭᠡᠨᠡ ᠠ᠋᠂ ᠮᠢᠨᠦ ᠲᠡᠷᠭᠡ ᠶ᠋ᠢ ᠴᠠᠭᠠᠳᠤᠭᠤᠯᠠ ᠴᠢᠨᠢ ᠰᠣᠯᠢᠬᠤ ᠪᠠᠷ ᠪᠣᠯᠤᠯᠠ ᠤᠤ᠂ ᠶᠠᠮᠠᠷ ᠶᠠᠭᠤᠮᠠ ᠢᠷᠡᠳᠡᠭ ᠪᠣᠯ ᠳᠠ? ᠴᠠᠭᠠᠳᠤᠭᠤᠯᠠ ᠴᠢᠨᠢ ᠡᠭᠡᠭᠡᠳ ᠶᠡᠷᠦ ᠨᠢ ᠶᠠᠭᠤ ᠶᠠᠷᠢᠵᠤ ᠪᠠᠢᠨᠠ? ᠭᠡᠬᠦ ᠳ᠋ᠦ᠍ ᠬᠡᠦᠬᠡᠨ ᠵᠤᠮᠠᠯᠵᠠᠨ ᠪᠠᠢᠵᠤ᠄
— ᠮᠡᠳᠡᠭᠰᠡᠨ ᠦᠭᠡᠢ ᠳᠠᠷᠤᠭᠠ ᠠ᠋᠂ ᠪᠠᠰᠠ ᠨᠢᠭᠡ ᠰᠢᠨᠡ ᠬᠥᠮᠦᠨ ᠮᠠᠨ ᠤ᠋ ᠳ᠋ᠤ᠌ ᠢᠷᠡᠬᠦ ᠳᠡ᠃
— ᠠᠯᠢ ᠬᠡᠯᠲᠡᠰ ᠲᠦ ᠲᠡᠷᠡ ᠪᠣᠢ? ᠳᠤᠲᠠᠭᠤ ᠣᠷᠣᠨ ᠲᠣᠭᠠ ᠪᠠᠢᠬᠤ ᠦᠭᠡᠢ ᠰᠢᠦ ᠳᠡ᠃
— ᠳᠤᠲᠠᠭᠤ ᠣᠷᠣᠨ ᠲᠣᠭᠠ ᠪᠠᠢᠬᠤ ᠦᠭᠡᠢ ᠠ᠋᠂ ᠲᠡᠭᠡᠬᠦ ᠳ᠋ᠡᠭᠡᠨ ᠥᠪᠡᠷ ᠦ᠋ᠨ ᠡᠭᠦᠷᠭᠡᠲᠦ ᠠᠵᠢᠯ ᠢ᠋ ᠳᠡᠢᠯᠬᠦ ᠦᠭᠡᠢ ᠶᠦᠮ ᠤᠤ ᠠᠵᠢᠯ ᠳ᠋ᠤ᠌ ᠬᠠᠢᠩᠭᠤ ᠬᠠᠨᠳᠤᠳᠠᠭ ᠭᠠᠭᠴᠠ ᠨᠢᠭᠡ ᠬᠥᠮᠦᠨ ᠢ᠋ ᠵᠣᠬᠢᠬᠤ ᠲᠡᠩᠴᠡᠬᠦ ᠠᠵᠢᠯ ᠳ᠋ᠤ᠌ ᠰᠢᠯᠵᠢᠭᠦᠯᠬᠦ ᠭᠡᠰᠡᠨ ᠪᠢᠵᠡ ᠳᠡ ᠭᠡᠲᠡᠯᠡ ᠯᠤᠲᠠ ᠬᠡᠦᠬᠡᠨ ᠦ᠌ ᠳᠡᠷᠭᠡᠳᠡ ᠡᠴᠡ ᠠᠷᠤ ᠲᠠᠢᠰᠢ ᠪᠠᠨ ᠬᠡᠳᠦᠨ ᠠᠯᠬᠤᠮ ᠤᠬᠤᠷᠢᠵᠤ᠄
— ᠮᠥᠨ ᠮᠥᠨ ᠭᠡᠵᠦ ᠰᠢᠷᠡᠭᠡ ᠥᠭᠡᠳᠡ ᠪᠡᠨ ᠳᠥᠭᠥᠵᠦ ᠬᠦᠷᠬᠦ ᠵᠠᠮ ᠳ᠋ᠠᠭᠠᠨ ᠡᠩᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠥᠨᠥᠬᠢ ᠲᠡᠮᠳᠡᠭ ᠢ᠋ ᠰᠠᠯᠠᠭᠠᠯᠠᠭᠰᠠᠨ ᠭᠠᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠲᠡᠮᠲᠡᠷᠢᠨ ᠦᠵᠡᠭᠡᠳ ᠰᠠᠭᠤᠳᠠᠯ ᠳᠡᠭᠡᠷᠡ ᠪᠡᠨ ᠯᠠᠭ ᠬᠢᠨ ᠰᠠᠭᠤᠬᠤ ᠴᠢᠮᠡᠭᠡ ᠨᠢ ᠡᠭᠦᠳᠡᠨ ᠤ ᠵᠢᠵᠢᠭᠦᠷ ᠲᠦ ᠬᠦᠷᠲᠡᠯᠡ ᠰᠣᠨᠣᠰᠳᠠᠪᠠ᠃
– – – –
① ᠮᠠᠰᠢᠨ ᠲᠡᠷᠭᠡᠨ ᠦ ᠠᠭᠤᠯᠬᠤ
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ
ᠬᠢᠨᠠᠭ᠍ᠴᠢ : ᠲᠤᠭ᠍ᠴᠢ ᠰᠠᠷᠠᠨᠠ
2023᠂ 11᠂ 10 ᠤ ᠡᠳᠦᠷ