ᠰᠢᠲᠠᠷᠠᠴᠢᠨ ᠬᠦᠦ-ᠳᠣᠮᠣᠭ ᠦᠯᠢᠭᠡᠷШатарчин хүү-Домог үлгэр
1544 ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ᠌᠂ ᠨᠠᠰᠤᠨ ᠥᠨᠳᠥᠷ ᠪᠣᠯᠤᠭᠰᠠᠨ ᠡᠮᠡᠭᠡᠨ ᠡᠪᠦᠭᠡᠨ ᠬᠣᠶᠠᠷ ᠭᠠᠭᠴᠠ ᠬᠦᠦ ᠲᠡᠢ ᠪᠡᠨ ᠠᠮᠢᠳᠤᠷᠠᠳᠠᠭ ᠪᠠᠢᠵᠠᠢ᠃ ᠨᠢᠭᠡ ᠡᠳᠦᠷ ᠡᠴᠢᠭᠡ ᠨᠢ ᠬᠦᠦ ᠳ᠋ᠦ᠍ ᠪᠡᠨ ᠨᠠᠰᠤᠨ ᠤ᠋ ᠵᠠᠯᠠᠭᠤ ᠳᠡᠭᠡᠷᠡ ᠬᠣᠯᠠ ᠶᠠᠪᠤᠵᠤ᠂ ᠬᠥᠮᠦᠨ ᠠᠷᠠᠳ ᠲᠠᠢ ᠠᠭᠤᠯᠵᠠᠵᠤ᠂ ᠡᠷᠳᠡᠮ ᠨᠣᠮ ᠰᠤᠷᠤᠭᠠᠳ ᠢᠷᠡᠭᠡᠷᠡᠢ ᠭᠡᠵᠦ ᠭᠤᠷᠪᠠᠨ ᠰᠢᠷᠬᠡᠭ ᠶᠦᠮᠪᠦᠦ ᠥᠭᠴᠦ᠂ ᠠᠶᠠᠨ ᠵᠠᠮ ᠳ᠋ᠤ᠌ ᠪᠠᠨ ᠰᠠᠢᠨ ᠶᠠᠪᠤᠬᠤ ᠶ᠋ᠢ ᠢᠷᠦᠭᠡᠵᠡᠢ᠃ ᠢᠩᠭᠢᠭᠡᠳ ᠬᠦᠦ ᠠᠶᠠᠨ ᠵᠠᠮ ᠳ᠋ᠤ᠌ ᠪᠠᠨ ᠭᠠᠷᠴᠠᠢ᠃ ᠣᠯᠠᠨ ᠬᠣᠨᠣᠭ ᠶᠠᠪᠤᠵᠤ ᠭᠡᠨᠡ᠂ ᠲᠡᠭᠡᠭᠡᠳ ᠶᠠᠪᠤᠵᠤ ᠪᠠᠢᠲᠠᠯᠠ ᠠᠯᠤᠰ ᠲᠦ᠍ ᠯᠢᠮᠪᠦ ᠶ᠋ᠢᠨ ᠰᠠᠢᠬᠠᠨ ᠠᠶᠠᠯᠭᠤ ᠰᠣᠨᠣᠰᠳᠠᠨᠠ᠂ ᠬᠦᠦ ᠲᠡᠷᠡ ᠰᠠᠢᠬᠠᠨ ᠠᠶᠠᠯᠭᠤ ᠶ᠋ᠢ ᠴᠢᠩᠨᠠᠭᠰᠠᠭᠠᠷ ᠨᠢᠭᠡᠨ ᠠᠢᠯ ᠤ᠋ᠨ ᠭᠠᠳᠠᠨᠠ ᠶᠠᠪᠤᠭᠠᠳ ᠣᠴᠢᠵᠠᠢ᠂ ᠬᠥᠮᠦᠰ ᠦ᠋ᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠬᠠᠷᠠᠪᠠᠯ ᠨᠢᠭᠡ ᠬᠥᠮᠦᠨ ᠬᠤᠯᠤᠰᠤᠨ ᠯᠢᠮᠪᠦ ᠲᠠᠲᠠᠵᠤ ᠪᠠᠢᠨᠠ ᠭᠡᠨᠡ᠃ ᠬᠦᠦ ᠲᠡᠷᠡ ᠬᠥᠮᠦᠨ ᠡᠴᠡ᠄ 《ᠡᠨᠡ ᠶᠠᠮᠠᠷ ᠤᠴᠢᠷ ᠲᠠᠢ ᠶᠠᠭᠤ ᠭᠡᠳᠡᠭ ᠡᠳ᠋ ᠪᠣᠢ ? 》 ᠭᠡᠵᠦ ᠠᠰᠠᠭᠤᠪᠠᠯ᠄ 《ᠰᠠᠢᠨ ᠰᠤᠷᠪᠠᠯ ᠡᠷᠳᠡᠮ᠂ ᠮᠠᠭᠤ ᠰᠤᠷᠪᠠᠯ ᠶᠡᠷᠦ ᠶ᠋ᠢᠨ ᠨᠢᠭᠡᠨ ᠯᠢᠮᠪᠦ ᠶᠦᠮ ᠳᠡ ! 》 ᠭᠡᠵᠦ ᠬᠠᠷᠢᠭᠤᠯᠵᠠᠢ᠃ ᠲᠡᠭᠡᠪᠡᠯ ᠲᠠ ᠨᠠᠳᠠ ᠳ᠋ᠤ᠌ ᠡᠨᠡ ᠡᠷᠳᠡᠮ ᠢ᠋ᠶ᠋ᠡᠨ ᠵᠢᠭᠠᠵᠤ ᠥᠭᠭᠦᠭᠡᠴᠢ 》 ᠭᠡᠰᠡᠨ ᠳ᠋ᠦ᠍ ᠯᠢᠩᠪᠦᠴᠢᠨ᠄ 《ᠴᠢ ᠰᠤᠷᠴᠤ ᠴᠢᠳᠠᠬᠤ ᠶᠤᠮ ᠪᠣᠯ ᠵᠢᠭᠠᠵᠤ ᠪᠣᠯᠣᠯᠭᠦᠢ ᠶᠠᠭᠠᠬᠢᠬᠤᠪ 》 ᠭᠡᠳ ᠱᠠᠪᠢ ᠪᠠᠨ ᠪᠣᠯᠭᠠᠨ ᠠᠪᠴᠤ ᠭᠡᠨᠡ᠃
ᠢᠩᠭᠢᠭᠡᠳ ᠨᠢᠭᠡ ᠵᠢᠯ ᠥᠩᠭᠡᠷᠡᠵᠦ ᠬᠦᠦ ᠰᠠᠢᠨ ᠯᠢᠮᠪᠦᠴᠢᠨ ᠪᠣᠯᠵᠠᠢ᠃ ᠬᠦᠦ ᠶᠠᠪᠤᠬᠤ ᠪᠣᠯᠵᠤ᠂ ᠪᠠᠭᠰᠢ ᠳ᠋ᠤ᠌ ᠪᠠᠨ ᠨᠢᠭᠡ ᠶᠦᠮᠪᠦᠦ ᠪᠡᠨ ᠥᠭᠴᠡᠢ᠃ ᠪᠠᠭᠰᠢ ᠨᠢ ᠴᠦ᠍ ᠬᠦᠦ ᠳ᠋ᠦ᠍ ᠯᠢᠮᠪᠦ ᠪᠡᠨ ᠪᠡᠯᠡᠭᠯᠡᠵᠡᠢ᠃ ᠢᠩᠭᠢᠭᠡᠳ ᠬᠦᠦ ᠲᠡᠨᠳᠡ ᠡᠴᠡ ᠶᠠᠪᠤᠵᠠᠢ᠃ ᠬᠦᠦ ᠶᠠᠪᠤᠭᠰᠠᠭᠠᠷ ᠪᠠᠢᠲᠠᠯᠠ ᠨᠡᠯᠢᠶᠡᠳ ᠶᠠᠳᠠᠷᠠᠵᠤ ᠵᠠᠮ ᠳ᠋ᠤ᠌ ᠨᠢ ᠲᠠᠭᠠᠷᠠᠯᠳᠤᠭᠰᠠᠨ ᠠᠢᠯ ᠳ᠋ᠤ᠌ ᠣᠷᠣᠲᠠᠯᠠ᠂ ᠭᠡᠷ ᠲᠦ᠍ ᠣᠯᠠᠨ ᠬᠥᠮᠦᠨ ᠲᠣᠭᠣᠷᠢᠭᠠᠳ ᠰᠠᠭᠤᠴᠢᠬᠠᠭᠰᠠᠨ ᠳᠤᠮᠳᠠ ᠨᠢ ᠨᠢᠭᠡ ᠬᠥᠮᠦᠨ ᠶᠠᠭᠤᠮᠠ ᠪᠢᠴᠢᠭᠡᠳ ᠰᠠᠭᠤᠨᠠ ᠭᠡᠨᠡ᠂ ᠬᠦᠦ ᠲᠡᠭᠦᠨ ᠢ᠋ ᠶᠡᠬᠡ ᠰᠣᠨᠢᠷᠬᠠᠨ᠄ 《ᠬᠥᠮᠦᠨ ᠭᠤᠸᠠᠢ ᠲᠠ ᠶᠠᠭᠤ ᠬᠢᠳᠡᠭ ᠬᠥᠮᠦᠨ ᠪᠣᠢ ? 》 ᠭᠡᠬᠦ ᠳ᠋ᠦ᠍᠄ 《ᠠᠬᠠ ᠨᠢ ᠬᠥᠮᠦᠰ ᠦ᠋ᠨ ᠭᠤᠶᠤᠭᠰᠠᠨ ᠶᠣᠰᠣᠭᠠᠷ ᠪᠢᠴᠢᠭ ᠵᠠᠬᠢᠳᠠᠯ ᠬᠢᠵᠦ ᠠᠮᠢᠳᠤᠷᠠᠳᠠᠭ ᠶᠤᠮ ᠳᠠ 》 ᠭᠡᠵᠡᠢ᠃ ᠲᠠᠨ ᠤ᠋ ᠪᠢᠴᠢᠬᠦ ᠡᠷᠳᠡᠮ ᠴᠢᠨᠢ ᠵᠥᠪᠬᠡᠨ ᠣᠯᠵᠠ ᠠᠰᠢᠭ ᠲᠤ᠌ ᠬᠡᠷᠡᠭᠲᠡᠢ ᠶᠦᠮ ᠤᠤ ? ᠡᠰᠡᠬᠦᠯᠡ ᠥᠭᠡᠷᠡ ᠪᠠᠰᠠ ᠶᠠᠭᠤᠮᠠᠨ ᠳ᠋ᠤ᠌ ᠬᠡᠷᠡᠭᠲᠡᠢ ᠶᠦᠮ ᠤᠤ ? 》 ᠭᠡᠵᠦ ᠠᠰᠠᠭᠤᠵᠠᠢ᠃ ᠪᠢᠴᠢᠭ ᠨᠣᠮ ᠳ᠋ᠤ᠌ ᠰᠠᠢᠨ ᠰᠤᠷᠤᠯᠴᠠᠪᠠᠯ ᠡᠷᠳᠡᠮ᠂ ᠡᠨᠡ ᠡᠷᠳᠡᠮ ᠢ᠋ ᠰᠤᠷᠪᠠᠯ ᠠᠮᠢᠳᠤᠷᠠᠯ ᠢ᠋ᠶ᠋ᠠᠨ ᠲᠡᠳᠬᠦᠬᠦ ᠡᠴᠡ ᠭᠠᠳᠠᠨᠠ ᠬᠠᠭᠠᠨ ᠭᠡᠷ ᠦ᠋ᠨ ᠬᠡᠷᠡᠭ ᠢ᠋ ᠰᠢᠢᠳᠴᠦ ᠶᠠᠪᠤᠬᠤ ᠴᠢᠳᠠᠯ ᠲᠠᠢ ᠪᠣᠯᠤᠨᠠ 》 ᠭᠡᠰᠡᠨ ᠳ᠋ᠦ᠍᠂ 《ᠲᠡᠭᠡᠪᠡᠯ ᠲᠠ ᠡᠨᠡ ᠡᠷᠳᠡᠮ ᠢ᠋ ᠨᠠᠳᠠ ᠳ᠋ᠤ᠌ ᠵᠢᠭᠠᠵᠤ ᠥᠭᠭᠦᠭᠡᠴᠢ !》 ᠭᠡᠬᠦ ᠳ᠋ᠦ᠍᠂ 《ᠵᠠ᠂ ᠶᠠᠭᠠᠬᠢᠬᠤᠪ᠂ ᠴᠢ ᠰᠠᠢᠨ ᠰᠤᠷᠴᠤ ᠴᠢᠳᠠᠬᠤ ᠶᠤᠮ ᠪᠣᠯ ᠪᠢ ᠵᠢᠭᠠᠵᠤ ᠥᠭᠴᠦ ᠪᠣᠯᠤᠨᠠ 》᠃
ᠢᠩᠭᠢᠭᠡᠳ ᠬᠦᠦ ᠡᠷᠳᠡᠮ ᠨᠣᠮ ᠰᠤᠷᠤᠯᠴᠠᠭᠰᠠᠭᠠᠷ᠂ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠨᠢᠭᠡ ᠵᠢᠯ ᠢ᠋ ᠠᠷᠤ ᠳ᠋ᠤ᠌ ᠪᠠᠨ ᠣᠷᠬᠢᠵᠠᠢ᠃ ᠬᠦᠦ ᠴᠦ᠍ ᠡᠷᠳᠡᠮ ᠨᠣᠮ ᠰᠠᠢᠨ ᠰᠤᠷᠴᠠᠢ᠃
ᠪᠠᠭᠰᠢ ᠨᠢ᠄ 《ᠵᠠ᠂ ᠴᠢ ᠪᠢᠴᠢᠭ ᠦ᠋ᠨ ᠡᠷᠳᠡᠮ ᠳ᠋ᠦ᠍ ᠰᠠᠢᠨ ᠰᠤᠷᠤᠯᠴᠠᠵᠠᠢ ! 》 ᠭᠡᠳ ᠪᠢᠷ ᠶᠠᠨᠲᠠᠢ ᠬᠣᠶᠠᠷ ᠢ᠋ᠶ᠋ᠠᠨ ᠪᠡᠯᠡᠭ ᠪᠣᠯᠭᠠᠨ ᠥᠭᠴᠡᠢ᠃
ᠬᠦᠦ ᠪᠠᠶᠠᠷᠯᠠᠭᠰᠠᠨ ᠢ᠋ᠶ᠋ᠠᠨ ᠢᠯᠡᠷᠬᠡᠢᠯᠡᠭᠡᠳ᠂ ᠨᠢᠭᠡ ᠶᠦᠮᠪᠦᠦ ᠪᠡᠨ ᠪᠠᠭᠰᠢ ᠳ᠋ᠤ᠌ ᠪᠠᠨ ᠥᠭᠭᠦᠭᠡᠳ ᠠᠶᠠᠨ ᠵᠠᠮ ᠳ᠋ᠤ᠌ ᠪᠠᠨ ᠭᠠᠷᠴᠠᠢ᠃
ᠲᠡᠭᠡᠲᠡᠯᠡ ᠨᠢᠭᠡ ᠭᠡᠷ ᠲᠠᠭᠠᠷᠠᠯᠳᠤᠵᠤ᠂ ᠭᠡᠷ ᠲᠦ᠍ ᠣᠷᠣᠪᠠᠯ ᠬᠣᠶᠠᠷ ᠬᠥᠮᠦᠨ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠳᠦᠷᠰᠦ ᠲᠡᠢ ᠮᠣᠳᠣ ᠪᠠᠷ ᠲᠣᠭᠯᠠᠭᠠᠳ ᠤᠬᠠᠭᠠᠨ ᠠᠯᠠᠭᠠ ᠭᠡᠨᠡ᠃ ᠬᠥᠮᠦᠨ ᠣᠷᠣᠵᠤ ᠢᠷᠡᠭᠰᠡᠨ ᠢ᠋ ᠠᠩᠵᠠᠭᠠᠷᠠᠬᠤ ᠴᠤ᠌ ᠦᠭᠡᠢ ᠪᠠᠢᠨᠠ ᠭᠡᠨᠡ᠃ 《ᠠᠮᠤᠷ ᠪᠠᠢᠨᠠ ᠤᠤ ? 》 ᠭᠡᠬᠦ ᠳ᠋ᠦ᠍ ᠬᠠᠷᠢᠭᠤ ᠠᠯᠠᠭᠠ᠂ ᠬᠦᠦ ᠳᠠᠬᠢᠭᠠᠳ ᠯᠠ᠄ 《ᠪᠢ ᠠᠶᠠᠨ ᠵᠠᠮ ᠤ᠋ᠨ ᠬᠥᠮᠦᠨ ᠪᠠᠢᠨᠠ᠂ ᠲᠠ ᠬᠣᠶᠠᠷ ᠶᠠᠭᠤ ᠬᠢᠭᠡᠳ ᠢᠩᠭᠢᠵᠦ ᠤᠬᠠᠭᠠᠨ ᠢ᠋ᠶ᠋ᠠᠨ ᠠᠯᠳᠠᠨᠠ ᠤᠤ ? 》 ᠭᠡᠰᠡᠨ ᠳ᠋ᠦ᠍ ᠨᠥᠭᠦᠭᠡ ᠬᠣᠶᠠᠷ᠄ 《ᠪᠢᠳᠡ ᠬᠣᠶᠠᠷ ᠰᠢᠳᠡᠷᠡ ᠭᠡᠭᠴᠢ ᠶᠠᠭᠤᠮᠠ ᠶ᠋ᠢ ᠲᠣᠭᠯᠠᠵᠤ ᠪᠠᠢᠨᠠ ᠳᠠ ᠬᠦ 》᠃
《ᠡᠨᠡ ᠴᠢᠨᠢ ᠲᠡᠭᠡᠭᠡᠳ ᠶᠠᠭᠤᠨ ᠳ᠋ᠤ᠌ ᠬᠡᠷᠡᠭᠲᠡᠢ ᠶᠦᠮ ? 》᠃
《ᠬᠡᠷᠪᠡ ᠰᠢᠳᠡᠷᠡ ᠶ᠋ᠢ ᠰᠠᠢᠨ ᠰᠤᠷᠬᠤ ᠶᠤᠮ ᠪᠣᠯ ᠬᠣᠶᠠᠷ ᠭᠦᠷᠦᠨ ᠦ᠌ ᠡᠵᠡᠨ ᠬᠠᠭᠠᠨ ᠡᠷᠬᠡ ᠵᠡᠷᠭᠡ ᠪᠡᠨ ᠪᠤᠯᠢᠶᠠᠯᠴᠠᠯᠳᠤᠵᠤ ᠬᠡᠨ ᠨᠢ ᠬᠡᠨ ᠢ᠋ ᠪᠡᠨ ᠳᠡᠢᠯᠬᠦ ᠪᠣᠢ ᠭᠡᠳᠡᠭ ᠶᠡᠬᠡ ᠬᠡᠷᠡᠭ ᠢ᠋ ᠰᠢᠢᠳᠴᠦ ᠪᠣᠯᠤᠨᠠ᠂ ᠬᠠᠷᠢᠨ ᠮᠠᠭᠤ ᠰᠤᠷᠪᠠᠯ ᠶᠡᠷᠦᠳᠡ ᠶ᠋ᠢᠨ ᠨᠢᠭᠡ ᠵᠤᠭᠠ ᠴᠡᠩᠭᠡᠯ ᠶᠦᠮ ᠳᠡ 》 ᠭᠡᠵᠡᠢ᠃
《ᠬᠣᠶᠠᠷ ᠠᠬᠠ ᠮᠢᠨᠢ᠂ ᠲᠠ ᠬᠣᠶᠠᠷ ᠬᠢᠷᠢ ᠰᠠᠢᠨ ᠰᠢᠲᠠᠷᠠᠴᠢᠨ ᠪᠣᠢ ?》 ᠭᠡᠵᠦ ᠠᠰᠠᠭᠤᠵᠠᠢ᠃ 《ᠪᠢᠳᠡ ᠬᠣᠶᠠᠷ ᠡᠨᠡ ᠭᠦᠷᠦᠨ ᠳ᠋ᠦ᠍ ᠪᠡᠨ ᠠᠯᠳᠠᠷ ᠲᠠᠢ ᠰᠠᠢᠨ ᠰᠢᠲᠠᠷᠠᠴᠢᠳ ᠳᠠ᠂ ᠳᠡᠭᠦᠦ ᠮᠢᠨᠢ 》 ᠭᠡᠯᠡ᠃
《ᠲᠡᠭᠡᠪᠡᠯ ᠲᠠ ᠬᠣᠶᠠᠷ ᠡᠨᠡ ᠰᠢᠲᠠᠷᠠ ᠪᠠᠨ ᠨᠠᠳᠠ ᠳ᠋ᠤ᠌ ᠵᠢᠭᠠᠵᠤ ᠥᠭᠭᠦᠭᠡᠴᠢ》 ᠭᠡᠰᠡᠨ ᠳ᠋ᠦ᠍᠂ 《ᠴᠢ ᠰᠠᠢᠨ ᠰᠤᠷᠴᠤ ᠴᠢᠳᠠᠬᠤ ᠶᠤᠮ ᠪᠣᠯ ᠵᠢᠭᠠᠵᠤ ᠥᠭᠴᠦ ᠪᠣᠯᠤᠨᠠ 》 ᠭᠡᠳ ᠱᠠᠪᠢ ᠪᠠᠨ ᠪᠣᠯᠭᠠᠨ ᠠᠪᠴᠤ ᠭᠡᠨᠡ᠃
ᠬᠦᠦ ᠢᠩᠭᠢᠭᠡᠳ ᠨᠢᠭᠡ ᠪᠡᠷ ᠨᠢ ᠰᠢᠳᠡᠷᠡ ᠵᠢᠭᠠᠯᠭᠠᠵᠤ᠂ ᠨᠥᠭᠦᠭᠡ ᠲᠡᠢ ᠨᠢ ᠲᠣᠭᠯᠠᠭᠰᠠᠭᠠᠷ ᠨᠢᠭᠡ ᠵᠢᠯ ᠥᠩᠭᠡᠷᠡᠵᠡᠢ᠃ ᠨᠢᠭᠡ ᠡᠳᠦᠷ᠄ 《ᠵᠠ ᠣᠳᠣ ᠬᠦᠦ ᠮᠢᠨᠢ ᠴᠢ ᠰᠠᠢᠨ ᠰᠢᠲᠠᠷᠠᠴᠢᠨ ᠪᠣᠯᠵᠠᠢ᠂ ᠪᠢᠳᠡ ᠬᠣᠶᠠᠷ ᠡᠨᠡ ᠰᠢᠲᠠᠷᠠ ᠶ᠋ᠢ ᠴᠢᠮᠠ ᠳ᠋ᠤ᠌ ᠪᠡᠯᠡᠭ ᠪᠣᠯᠭᠠᠨ ᠥᠭᠭᠦᠶᠡ》 ᠭᠡᠬᠦ ᠳ᠋ᠦ᠍ ᠬᠦᠦ ᠶᠡᠬᠡᠳᠡ ᠪᠠᠶᠠᠷᠯᠠᠨ ᠰᠢᠲᠠᠷᠠ ᠶ᠋ᠢ ᠬᠦᠯᠢᠶᠡᠨ ᠠᠪᠴᠤ ᠦᠯᠡᠳᠡᠭᠰᠡᠨ ᠶᠦᠮᠪᠦᠦ ᠪᠡᠨ ᠥᠭᠭᠦᠭᠡᠳ ᠨᠤᠲᠤᠭ ᠤ᠋ᠨ ᠵᠦᠭ ᠶᠠᠪᠤᠵᠠᠢ᠃
ᠬᠦᠦ ᠶᠠᠪᠤᠭᠰᠠᠭᠠᠷ ᠵᠠᠮ ᠳ᠋ᠤ᠌ ᠬᠠᠭᠠᠨ ᠤ᠋ ᠬᠤᠳᠠᠯᠳᠤᠭᠠᠴᠢᠨ ᠲᠠᠢ ᠲᠠᠭᠠᠷᠠᠯᠳᠤᠵᠠᠢ᠃ ᠬᠠᠭᠠᠨ ᠤ᠋ ᠬᠤᠳᠠᠯᠳᠤᠭᠠᠴᠢᠨ᠄ 《ᠵᠠ᠂ ᠬᠠᠮᠢᠭᠠ ᠠ᠋ᠴᠠ ᠬᠠᠮᠢᠭᠠ ᠬᠦᠷᠴᠦ ᠶᠠᠪᠤᠭᠠ ᠬᠡᠨ ᠦ᠌ ᠬᠦᠦ ᠪᠣᠢ 》 ᠭᠡᠰᠡᠨ ᠳ᠋ᠦ᠍᠂ 《ᠡᠷᠳᠡᠮ ᠨᠣᠮ ᠰᠤᠷᠤᠭᠠᠳ ᠨᠤᠲᠤᠭ ᠪᠤᠴᠠᠵᠤ ᠶᠠᠪᠤᠨᠠ᠃》ᠭᠡᠵᠦ ᠬᠦᠦ ᠬᠡᠯᠡᠵᠡᠢ᠃ 《ᠴᠢ ᠮᠠᠨ ᠤ᠋ ᠠᠴᠢᠶᠠ ᠪᠠᠷᠠᠭᠠ ᠶ᠋ᠢ ᠵᠥᠭᠡᠭᠡᠵᠦ ᠠᠵᠢᠯᠯᠠᠬᠤ ᠦᠭᠡᠢ ᠤᠤ ? ᠪᠢ ᠴᠢᠮᠠ ᠳ᠋ᠤ᠌ ᠬᠥᠯᠥᠰᠥ ᠮᠥᠩᠭᠥ ᠶ᠋ᠢ ᠴᠢᠨᠢ ᠥᠭᠬᠦ ᠪᠣᠯᠤᠨᠠ 》 ᠭᠡᠬᠦ ᠳ᠋ᠦ᠍᠂ ᠬᠦᠦ᠄ 《ᠪᠢ ᠨᠤᠲᠤᠭ ᠠ᠋ᠴᠠ ᠪᠠᠨ ᠭᠠᠷᠤᠭᠠᠳ ᠭᠤᠷᠪᠠᠨ ᠵᠢᠯ ᠪᠣᠯᠤᠯᠠ᠂ ᠬᠣᠶᠠᠷ ᠬᠥᠭᠰᠢᠨ ᠳ᠋ᠦ᠍ ᠪᠡᠨ ᠬᠡᠳᠦᠨ ᠶᠠᠭᠤᠮᠠ ᠲᠠᠢ ᠣᠴᠢᠪᠠᠯ ᠪᠠᠶᠠᠷᠯᠠᠨᠠ ᠳᠠ 》 ᠭᠡᠵᠦ ᠪᠣᠳᠣᠭᠠᠳ ᠵᠥᠪᠰᠢᠶᠡᠷᠡᠵᠡᠢ᠃ ᠢᠩᠭᠢᠭᠡᠳ ᠬᠦᠦ ᠲᠡᠳᠡᠨ ᠦ᠌ ᠬᠦᠨᠳᠦ ᠬᠦᠴᠢᠷ ᠠᠵᠢᠯ ᠢ᠋ ᠬᠢᠵᠦ ᠳᠠᠭᠠᠵᠤ ᠶᠠᠪᠤᠭᠰᠠᠭᠠᠷ ᠨᠢᠭᠡ ᠰᠠᠷᠠ ᠪᠣᠯᠵᠤ ᠨᠤᠲᠤᠭ ᠴᠤ᠌ ᠣᠢᠷᠠᠲᠤᠵᠠᠢ᠃ ᠨᠢᠭᠡᠨ ᠡᠳᠦᠷ ᠪᠠᠭᠤᠳᠠᠯᠯᠠᠭᠠᠳ ᠠᠮᠠᠷᠠᠵᠤ ᠰᠠᠭᠤᠬᠤ ᠳ᠋ᠤ᠌᠄ 《ᠨᠣᠶᠠᠨᠲᠠᠨ ᠨᠤᠲᠤᠭ ᠤᠰᠤ ᠮᠢᠨᠢ ᠣᠢᠷᠠᠲᠤᠯᠠ᠂ ᠲᠠ ᠮᠢᠨᠦ ᠵᠠᠷᠤᠭᠳᠠᠭᠰᠠᠨ ᠬᠥᠯᠥᠰᠥ ᠶ᠋ᠢ ᠮᠢᠨᠢ ᠥᠭᠭᠦᠨᠡ ᠤᠤ ? 》 ᠭᠡᠵᠡᠢ᠃ ᠲᠡᠭᠡᠭᠰᠡᠨ ᠨᠥᠭᠦᠭᠡ ᠨᠣᠶᠠᠨᠲᠠᠨ᠄ 《ᠴᠢ ᠮᠠᠭᠤ ᠪᠣᠭᠣᠯ ᠶᠠᠭᠤ ᠭᠡᠨᠡ ᠬᠦ᠂ ᠴᠢ ᠶᠠᠭᠠᠬᠢᠭᠰᠠᠨ ᠵᠠᠳᠠᠷᠠᠭᠰᠠᠨ ᠠᠮᠢᠲᠠᠨ ᠶᠤᠮ᠂ ᠡᠨᠡ ᠮᠠᠭᠤ ᠠᠮᠢᠲᠠᠨ ᠢ᠋ ᠪᠠᠷᠢᠵᠤ ᠬᠦᠯᠢ 》 ᠭᠡᠵᠦ ᠬᠦᠦ ᠶ᠋ᠢ ᠪᠠᠷᠢᠪᠴᠢᠯᠠᠵᠤ ᠳᠥᠷᠪᠡᠨ ᠮᠥᠴᠢ ᠶ᠋ᠢ ᠨᠢ ᠬᠦᠯᠢᠭᠡᠳ᠂ ᠲᠦᠰᠢᠮᠡᠯ ᠨᠢᠭᠡ ᠪᠢᠴᠢᠭ ᠪᠢᠴᠢᠵᠦ᠂ ᠬᠦᠦ ᠶ᠋ᠢᠨ ᠭᠡᠵᠢᠭᠡᠨ ᠦ᠌ ᠤᠭ ᠲᠤ᠌ ᠪᠡᠬᠢᠯᠡᠭᠡᠳ ᠬᠣᠶᠠᠷ ᠵᠠᠷᠤᠴᠠ ᠳ᠋ᠤ᠌ ᠪᠠᠨ ᠬᠠᠨᠳᠤᠨ ᠲᠤᠰᠢᠶᠠᠵᠠᠢ᠃ 《ᠡᠨᠡ ᠵᠠᠳᠠᠷᠠᠭᠰᠠᠨ ᠠᠮᠢᠲᠠᠨ ᠢ᠋ ᠮᠠᠨᠵᠤ ᠡᠵᠡᠨ ᠬᠠᠭᠠᠨ ᠳ᠋ᠤ᠌ ᠬᠦᠷᠭᠡ 》 ᠭᠡᠮᠡᠨ ᠶᠠᠪᠤᠭᠤᠯᠵᠠᠢ᠃ ᠬᠦᠦ ᠠᠶᠠᠨ ᠵᠠᠮ ᠳ᠋ᠤ᠌ ᠶᠠᠪᠤᠭᠰᠠᠭᠠᠷ ᠶᠡᠬᠡᠳᠡ ᠶᠠᠳᠠᠷᠠᠵᠠᠢ᠂ ᠲᠡᠭᠡᠭᠰᠡᠭᠡᠷ ᠨᠢᠭᠡ ᠲᠣᠰᠬᠣᠨ ᠳ᠋ᠤ᠌ ᠢᠷᠡᠵᠦ ᠭᠡᠨᠡ᠃
ᠲᠣᠰᠬᠣᠨ ᠤ᠋ ᠵᠠᠬᠠ ᠳ᠋ᠤ᠌ ᠢᠷᠡᠭᠡᠳ ᠵᠢᠭᠠᠬᠠᠨ ᠠᠮᠠᠷᠠᠬᠤ ᠪᠠᠷ ᠰᠢᠢᠳᠴᠡᠢ᠃ ᠲᠡᠭᠡᠭᠡᠳ ᠠᠮᠠᠷᠠᠵᠤ ᠰᠠᠭᠤᠲᠠᠯᠠ ᠰᠢᠲᠠᠷᠠᠴᠢᠨ ᠬᠦᠦ 《ᠵᠠ᠂ ᠡᠷᠡ ᠤᠯᠤᠰ ᠤ᠋ᠳ ᠤ᠋ᠨ ᠢᠯᠭᠠᠭᠠ ᠶᠠᠭᠤ ᠪᠠᠢᠬᠤᠪ᠂ ᠪᠢ ᠡᠨᠡ ᠬᠦᠯᠢᠶᠡ ᠪᠠᠭᠯᠠᠭᠠᠨ ᠳ᠋ᠤ᠌ ᠦᠨᠡᠬᠡᠷ ᠶᠡᠬᠡ ᠶᠠᠳᠠᠷᠠᠵᠤ ᠪᠠᠢᠨᠠ᠂ ᠲᠠ ᠬᠣᠶᠠᠷ ᠮᠢᠨᠦ ᠡᠨᠡ ᠬᠦᠯᠢᠶᠡᠰᠦ ᠶ᠋ᠢ ᠲᠠᠢᠯᠤᠭᠠᠴᠢ᠂ ᠪᠢ ᠲᠠ ᠬᠣᠶᠠᠷ ᠲᠦ᠍ ᠨᠢᠭᠡ ᠰᠣᠨᠢᠨ ᠶᠠᠭᠤᠮᠠ ᠦᠵᠡᠭᠦᠯᠦᠮᠡᠷ ᠪᠠᠢᠨᠠ 》 ᠭᠡᠰᠡᠨ ᠴᠢᠨᠢ᠄ 《ᠶᠠᠭᠤ ᠦᠵᠡᠭᠦᠯᠬᠦ ᠶᠦᠮ ᠪᠣᠯ ᠰᠤᠯᠠᠯᠠᠬᠤ ᠤᠤ 》᠂ 《ᠠᠢ᠂ ᠵᠢᠭᠤᠲᠠᠴᠢᠬᠠᠬᠤ ᠪᠠᠢᠬᠠ 》᠂ 《ᠠᠢ ᠡᠨᠡ ᠮᠠᠭᠤ ᠬᠠᠮᠢᠭᠠ ᠬᠣᠯᠠᠳᠠᠬᠤ ᠭᠡᠵᠦ ᠳᠡ 》᠃ ᠡᠢᠨ ᠬᠦ᠌ ᠶᠠᠷᠢᠯᠴᠠᠭᠠᠳ ᠰᠢᠲᠠᠷᠠᠴᠢᠨ ᠬᠦᠦ ᠶ᠋ᠢ ᠰᠤᠯᠠᠯᠠᠯᠠ᠃ ᠰᠢᠲᠠᠷᠠᠴᠢᠨ ᠬᠦᠦ ᠡᠪᠦᠷ ᠡᠴᠡ ᠪᠡᠨ ᠯᠢᠮᠪᠦ ᠭᠠᠷᠭᠠᠨ ᠲᠠᠲᠠᠨᠠ᠂ ᠨᠥᠭᠦᠭᠡ ᠬᠣᠶᠠᠷ ᠪᠡᠶᠡ ᠪᠡᠶᠡ ᠪᠡᠨ ᠲᠦᠰᠢᠨ ᠬᠥᠭᠵᠢᠮ ᠦ᠋ᠨ ᠠᠶᠠᠨ ᠳ᠋ᠤ᠌ ᠤᠶᠠᠷᠠᠨ ᠰᠣᠨᠣᠰᠴᠤ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠲᠦᠳᠡᠯ ᠦᠭᠡᠢ ᠬᠣᠶᠠᠭᠤᠯᠠ ᠪᠠᠨ ᠤᠨᠲᠠᠭᠠᠳ ᠥᠭᠴᠡᠢ᠃
ᠰᠢᠲᠠᠷᠠᠴᠢᠨ ᠬᠦᠦ ᠯᠢᠮᠪᠦ ᠪᠡᠨ ᠲᠠᠲᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠨᠥᠭᠦᠭᠡ ᠬᠣᠶᠠᠷ ᠤ᠋ᠨ ᠤᠨᠲᠠᠭᠰᠠᠨ ᠢ᠋ ᠬᠠᠷᠠᠭᠠᠳ ᠬᠥᠭᠵᠢᠮᠳᠡᠬᠦ ᠪᠡᠨ ᠠᠭᠠᠵᠢᠭᠤᠬᠠᠨ ᠪᠣᠯᠢᠵᠤ ᠭᠡᠨᠡ᠃
ᠲᠡᠭᠡᠭᠡᠳ ᠨᠥᠭᠦᠭᠡ ᠬᠣᠶᠠᠷ ᠲᠤ᠌ ᠪᠠᠨ ᠣᠢᠷᠠᠲᠤᠨ ᠦᠵᠡᠬᠦ ᠳ᠋ᠦ᠍ ᠮᠥᠨ ᠴᠦ᠍ ᠰᠡᠷᠡᠬᠦ ᠰᠢᠨᠵᠢ ᠦᠭᠡᠢ ᠬᠤᠤᠬᠢᠷᠠᠵᠤ ᠪᠠᠢᠯᠠ᠃ ᠲᠡᠷᠡ ᠵᠠᠪᠰᠠᠷ ᠰᠢᠲᠠᠷᠠᠴᠢᠨ ᠬᠦᠦ ᠭᠡᠵᠢᠭᠡᠨ ᠡᠴᠡ ᠪᠡᠨ ᠪᠢᠴᠢᠭ ᠢ᠋ ᠠᠪᠴᠤ ᠤᠩᠰᠢᠪᠠ ᠭᠡᠨᠡ᠃ 《ᠬᠣᠷᠢᠨ ᠬᠣᠶᠠᠷ ᠨᠠᠰᠤᠲᠠᠢ᠂ ᠬᠦᠳᠡᠷ ᠴᠢᠭᠢᠷᠠᠭ ᠵᠠᠯᠠᠭᠤ᠂ ᠮᠠᠨᠵᠤ ᠡᠵᠡᠨ ᠬᠠᠭᠠᠨ ᠲᠠᠨ ᠳ᠋ᠤ᠌ ᠬᠦᠷᠭᠡᠭᠦᠯᠪᠡ᠂ ᠣᠴᠢᠬᠤ ᠪᠠᠷ ᠨᠢ ᠮᠠᠩᠭᠤᠰ ᠤ᠋ᠨ ᠬᠠᠭᠠᠨ ᠳ᠋ᠤ᠌ ᠰᠢᠲᠠᠷᠠ ᠶ᠋ᠢᠨ ᠮᠥᠷᠥᠢ ᠳ᠋ᠦ᠍ ᠥᠭᠴᠦ ᠪᠣᠯᠤᠨᠠ 》ᠭᠡᠰᠡᠨ ᠪᠢᠴᠢᠭ ᠢ᠋ ᠤᠩᠰᠢᠭᠠᠳ᠂ ᠲᠡᠭᠦᠨ ᠢ᠋ ᠤᠷᠠᠵᠤ ᠬᠠᠶᠠᠭᠠᠳ᠂ ᠪᠢᠷ ᠶᠠᠨᠲᠠᠢ ᠪᠠᠨ ᠭᠠᠷᠭᠠᠭᠠᠳ᠂ ᠳᠠᠬᠢᠨ ᠢᠩᠭᠢᠵᠦ ᠪᠢᠴᠢᠵᠡᠢ᠃ 《ᠬᠣᠷᠢᠨ ᠬᠣᠶᠠᠷ ᠨᠠᠰᠤᠲᠠᠢ᠂ ᠬᠦᠳᠡᠷ ᠴᠢᠭᠢᠷᠠᠭ ᠬᠦᠷᠡᠩ ᠪᠣᠷᠣ ᠵᠠᠯᠠᠭᠤ᠂ ᠲᠠᠪᠤᠨ ᠲᠡᠮᠡᠭᠡ ᠠᠴᠢᠶᠠ ᠪᠠᠷ ᠬᠤᠳᠠᠯᠳᠤᠨ ᠠᠪᠴᠤ᠂ ᠮᠠᠨᠵᠤ ᠡᠵᠡᠨ ᠬᠠᠭᠠᠨ ᠲᠠᠨ ᠳ᠋ᠤ᠌ ᠬᠦᠷᠭᠡᠭᠦᠯᠪᠡ᠂ ᠣᠴᠢᠬᠤ ᠪᠠᠷ ᠨᠢ ᠭᠦᠩᠵᠦ ᠲᠡᠢ ᠪᠡᠨ ᠭᠡᠷᠯᠡᠭᠦᠯᠬᠦ ᠶ᠋ᠢ ᠬᠦᠰᠡᠶᠡ 》 ᠭᠡᠵᠦ ᠪᠢᠴᠢᠵᠡᠢ᠃ ᠲᠡᠭᠡᠭᠡᠳ ᠬᠠᠭᠤᠴᠢᠨ ᠬᠡᠪ ᠢ᠋ᠶ᠋ᠡᠷ ᠨᠢ ᠭᠡᠵᠢᠭᠡᠨ ᠳ᠋ᠦ᠍ ᠣᠷᠢᠶᠠᠨ ᠬᠢᠭᠡᠳ ᠤᠨᠲᠠᠭᠠᠳ ᠥᠭᠴᠡᠢ ᠭᠡᠨᠡ᠃
ᠥᠷᠯᠥᠭᠡ ᠨᠠᠷᠠ ᠮᠠᠨᠳᠤᠵᠤ ᠨᠥᠭᠦᠭᠡ ᠬᠣᠶᠠᠷ ᠤ᠋ᠨ ᠨᠢᠭᠡ ᠨᠢ ᠰᠡᠷᠡᠵᠦ ᠰᠠᠨᠳᠤᠷᠤᠨ ᠪᠣᠰᠴᠤ ᠰᠢᠲᠠᠷᠠᠴᠢᠨ ᠬᠦᠦ ᠪᠠᠢᠭᠠ ᠡᠰᠡᠬᠦ ᠶ᠋ᠢ ᠬᠠᠷᠠᠨ᠂ ᠬᠦᠦ ᠤᠨᠲᠠᠵᠤ ᠪᠠᠢᠭᠠ ᠶ᠋ᠢ ᠬᠠᠷᠠᠭᠠᠳ ᠰᠠᠨᠠᠭᠠ ᠨᠢ ᠠᠮᠠᠷᠠᠨ ᠬᠦᠦ ᠶ᠋ᠢᠨ ᠳᠡᠷᠭᠡᠳᠡ ᠣᠴᠢᠭᠠᠳ᠄ 《ᠴᠢ ᠦᠨᠡᠬᠡᠷ ᠰᠠᠢᠨ ᠬᠦᠦ ᠪᠠᠢᠨᠠ᠂ ᠴᠢ ᠪᠢᠳᠡ ᠬᠣᠶᠠᠷ ᠢ᠋ ᠤᠨᠲᠠᠭᠰᠠᠨ ᠬᠣᠢᠭᠤᠷ ᠰᠠᠬᠢᠨ ᠬᠠᠮᠠᠭᠠᠯᠠᠵᠤ ᠬᠣᠨᠣᠭᠰᠠᠨ ᠳ᠋ᠤ᠌ ᠦᠨᠡᠬᠡᠷ ᠶᠡᠬᠡ ᠪᠠᠶᠠᠷᠯᠠᠯᠠ᠂ ᠵᠠ ᠢᠩᠭᠢᠭᠡᠳ ᠶᠠᠪᠤᠶᠠ ᠳᠠ 》 ᠭᠡᠳ ᠬᠦᠦ ᠶ᠋ᠢ ᠬᠦᠯᠢᠭᠰᠡᠨ ᠴᠦ᠍ ᠦᠭᠡᠢ ᠵᠠᠮ ᠳ᠋ᠤ᠌ ᠭᠠᠷᠴᠠᠢ᠃᠂
ᠶᠠᠪᠤᠭᠰᠠᠭᠠᠷ ᠬᠠᠭᠠᠨ ᠤ᠋ ᠣᠷᠳᠣᠨ ᠳ᠋ᠤ᠌ ᠬᠦᠷᠴᠦ᠂ ᠬᠦᠦ ᠶ᠋ᠢᠨ ᠭᠡᠵᠢᠭᠡᠨ ᠦ᠌ ᠳᠣᠣᠷᠠᠬᠢ ᠪᠢᠴᠢᠭ ᠢ᠋ ᠠᠪᠤᠭᠠᠳ ᠡᠵᠡᠨ ᠬᠠᠭᠠᠨ ᠳ᠋ᠤ᠌ ᠪᠠᠷᠢᠵᠠᠢ᠃ ᠲᠠᠪᠤᠨ ᠲᠡᠮᠡᠭᠡ ᠠᠴᠢᠶᠠ ᠪᠠᠷ ᠬᠤᠳᠠᠯᠳᠤᠵᠤ ᠠᠪᠤᠭᠠᠳ᠂ ᠥᠬᠢᠨ ᠲᠡᠢ ᠮᠢᠨᠢ ᠰᠠᠭᠤᠯᠭᠠᠬᠤ ᠪᠠᠷ ᠶᠠᠪᠤᠭᠤᠯᠤᠯᠠ ᠭᠡᠨᠡ᠃ ᠬᠠᠴᠢᠨ ᠶᠤᠮ ᠳᠠ ᠭᠡᠳ ᠬᠠᠭᠠᠨ ᠳᠠᠬᠢᠨ ᠳᠠᠬᠢᠨ ᠤᠩᠰᠢᠪᠠ ᠭᠡᠨᠡ᠃ ᠮᠢᠨᠦ ᠢᠲᠡᠭᠡᠯᠲᠦ ᠰᠠᠢᠨ ᠲᠦᠰᠢᠮᠡᠯ ᠪᠢᠴᠢᠭᠰᠡᠨ ᠪᠣᠯᠬᠣᠷ ᠨᠢᠭᠡ ᠯᠡ ᠤᠴᠢᠷ ᠲᠠᠢ ᠪᠠᠢᠬᠤ ᠭᠡᠳ ᠣᠢᠷᠠᠯᠴᠠᠭᠠᠬᠢ ᠲᠦᠰᠢᠮᠡᠯ ᠳ᠋ᠦ᠍ ᠪᠡᠨ ᠡᠢᠨ ᠬᠦ᠌ ᠲᠤᠰᠢᠶᠠᠵᠠᠢ᠃ ᠡᠨᠡ ᠬᠦᠦ ᠳ᠋ᠦ᠍ ᠬᠠᠩᠪᠤ ᠲᠣᠷᠭᠠᠨ ᠳᠡᠪᠡᠯ ᠭᠤᠲᠤᠯ ᠡᠮᠦᠰᠦᠭᠦᠯᠦᠭᠡᠳ᠂ ᠨᠠᠭᠠᠰᠢ ᠨᠢ ᠤᠷᠤᠭᠤᠯ᠂ ᠪᠠᠰᠠ ᠲᠡᠭᠡᠭᠡᠳ ᠭᠦᠩᠵᠦ ᠶ᠋ᠢ ᠳᠠᠭᠤᠳᠠ ᠭᠡᠯᠡ᠃ ᠭᠦᠩᠵᠦ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠳᠠᠭᠤᠳᠠᠭᠰᠠᠨ ᠶᠣᠰᠣᠭᠠᠷ ᠣᠷᠣᠵᠤ ᠢᠷᠡᠯᠡ᠃ ᠬᠦᠳᠡᠷ ᠴᠢᠭᠢᠷᠠᠭ ᠪᠡᠶᠡ ᠲᠡᠢ ᠬᠦᠷᠡᠩ ᠪᠣᠷᠣ ᠵᠠᠯᠠᠭᠤ ᠭᠠᠳᠠᠨᠠ ᠠ᠋ᠴᠠ ᠣᠷᠣᠵᠤ ᠢᠷᠡᠪᠡ ᠭᠡᠨᠡ᠃ ᠬᠠᠭᠠᠨ ᠯᠢᠮᠪᠦᠴᠢᠨ ᠬᠦᠦ ᠳ᠋ᠦ᠍ ᠡᠢᠨ ᠬᠦ᠌ ᠬᠡᠯᠡᠵᠡᠢ᠂ ᠴᠢᠮᠠ ᠶ᠋ᠢ ᠮᠢᠨᠦ ᠥᠬᠢᠨ ᠲᠡᠢ ᠰᠠᠭᠤᠯᠭᠠᠬᠤ ᠭᠡᠵᠦ ᠬᠤᠳᠠᠯᠳᠤᠵᠤ ᠠᠪᠤᠭᠰᠠᠨ ᠶᠤᠮ ᠪᠠᠢᠨᠠ᠂ ᠴᠢᠮᠠ ᠶ᠋ᠢ ᠪᠢᠳᠡ ᠲᠤᠷᠰᠢᠨᠠ᠂ ᠬᠡᠷᠪᠡ ᠮᠢᠨᠦ ᠥᠬᠢᠨ ᠴᠢᠮᠠ ᠳ᠋ᠤ᠌ ᠰᠡᠳᠬᠢᠯ ᠲᠡᠢ ᠪᠣᠯᠪᠠᠯ ᠬᠤᠷᠢᠮ ᠨᠠᠢᠷ ᠬᠢᠬᠦ ᠪᠣᠯᠤᠨᠠ᠂ ᠠ !ᠦᠭᠡᠢ ᠪᠣᠯ ᠴᠢᠮᠠ ᠶ᠋ᠢ ᠰᠢᠲᠠᠷᠠ ᠶ᠋ᠢᠨ ᠮᠥᠷᠥᠢ ᠳ᠋ᠦ᠍ ᠥᠭᠭᠦᠨᠡ᠃ᠢᠩᠭᠢᠭᠡᠳ ᠰᠢᠲᠠᠷᠠᠴᠢᠨ ᠬᠦᠦ ᠬᠠᠭᠠᠨ ᠤ᠋ ᠣᠷᠳᠣᠨ ᠳ᠋ᠤ᠌ ᠰᠠᠭᠤᠬᠤ ᠪᠣᠯᠵᠠᠢ᠃
ᠨᠢᠭᠡᠨ ᠡᠳᠦᠷ ᠬᠦᠦ ᠭᠠᠭᠴᠠᠭᠠᠷ ᠶᠠᠪᠤᠵᠤ ᠪᠠᠢᠭᠠᠳ᠂ ᠨᠢᠭᠡᠨ ᠠᠭᠤᠯᠠᠨ ᠳᠡᠭᠡᠷᠡ ᠭᠠᠷᠴᠤ ᠠᠯᠤᠰ ᠢ᠋ ᠬᠠᠷᠠᠵᠤ ᠪᠠᠢᠲᠠᠯᠠ ᠭᠦᠩᠵᠦ ᠢᠷᠡᠵᠦ ᠡᠢᠨ ᠬᠦ᠌ ᠬᠡᠯᠡᠵᠡᠢ᠃
《ᠴᠢ ᠡᠨᠡ ᠴᠠᠰᠤ ᠲᠠᠢ ᠠᠭᠤᠯᠠᠨ ᠳ᠋ᠤ᠌ ᠪᠢᠲᠡᠭᠡᠢ ᠭᠠᠷᠴᠤ ᠪᠠᠢᠭᠠᠷᠠᠢ᠂ ᠡᠨᠡ ᠠᠭᠤᠯᠠᠨ ᠴᠠᠭᠠᠨᠠ ᠬᠥᠮᠦᠨ ᠦ᠌ ᠮᠢᠬᠠ ᠢᠳᠡᠳᠡᠭ ᠮᠢᠬᠠᠴᠢᠨ ᠮᠠᠩᠭᠤᠰ ᠤ᠋ᠨ ᠬᠠᠭᠠᠨ ᠪᠠᠢᠳᠠᠭ ᠶᠤᠮ ᠠ᠋᠂ ᠮᠠᠨ ᠤ᠋ ᠬᠠᠭᠠᠨ ᠡᠴᠢᠭᠡ ᠲᠡᠭᠦᠨ ᠲᠡᠢ ᠪᠦᠬᠦᠯᠢ ᠪᠦᠲᠦᠨ ᠬᠥᠮᠦᠨ ᠢ᠋ᠶ᠋ᠡᠷ ᠮᠥᠷᠥᠢᠴᠡᠨ ᠰᠢᠳᠡᠷᠡ ᠲᠣᠭᠯᠠᠭᠰᠠᠭᠠᠷ ᠪᠠᠷᠤᠭ ᠬᠥᠮᠦᠨ ᠠᠷᠠᠳ ᠢ᠋ᠶ᠋ᠠᠨ ᠳᠠᠭᠤᠰᠬᠠᠬᠤ ᠰᠢᠬᠠᠵᠤ ᠪᠠᠢᠨᠠ 》᠃ 《ᠴᠢ ᠶᠠᠭᠤ ᠭᠡᠨᠡ᠂ ᠬᠥᠮᠦᠨ ᠢ᠋ᠶ᠋ᠡᠷ ᠮᠥᠷᠥᠢ ᠲᠠᠯᠪᠢᠳᠠᠭ ᠭᠡᠪᠡ ᠤᠤ 》᠂ 《ᠲᠡᠢᠮᠦ ᠠ᠋᠂ ᠰᠢᠲᠠᠷᠠ ᠲᠣᠭᠯᠠᠵᠤ ᠬᠡᠨ ᠬᠣᠵᠢᠭᠳᠠᠭᠰᠠᠨ ᠨᠢ ᠬᠥᠮᠦᠨ ᠢ᠋ᠶ᠋ᠡᠨ ᠥᠭᠳᠡᠭ 》᠃ 《ᠬᠦᠦ ᠶ᠋ᠢ ᠮᠠᠩᠭᠤᠰ ᠤ᠋ᠨ ᠬᠠᠭᠠᠨ ᠤ᠋ ᠮᠥᠷᠥᠢ ᠳ᠋ᠦ᠍ ᠥᠭᠭᠦᠭᠡᠷᠡᠢ 》 ᠭᠡᠵᠦ ᠬᠡᠯᠡᠭᠰᠡᠨ ᠤᠴᠢᠷ ᠢ᠋ ᠣᠳᠣ ᠯᠠ ᠬᠦᠦ ᠣᠢᠯᠠᠭᠠᠵᠤ ᠭᠡᠨᠡ᠃ ᠬᠦᠦ ᠭᠦᠩᠵᠦ ᠳ᠋ᠦ᠍ ᠬᠠᠨᠳᠤᠨ᠄《ᠲᠠ ᠨᠠᠮᠠ ᠶ᠋ᠢ ᠬᠠᠭᠠᠨᠲᠠᠨ ᠲᠠᠢ ᠪᠠᠨ ᠰᠢᠳᠡᠷᠡ ᠲᠣᠭᠯᠠᠶᠠ ᠭᠡᠵᠦ ᠪᠠᠢᠨᠠ ᠭᠡᠵᠦ ᠬᠡᠯᠡᠵᠦ ᠥᠭᠭᠦᠭᠡᠴᠢ !》ᠭᠡᠵᠡᠢ᠃《ᠠᠪᠤ ᠲᠠᠨ ᠲᠠᠢ ᠲᠣᠭᠯᠠᠬᠤ ᠦᠭᠡᠢ ᠪᠠᠢᠬᠠ ᠠ᠋᠂ ᠭᠡᠪᠡᠴᠦ ᠪᠢ ᠲᠠᠨ ᠤ᠋ ᠬᠡᠯᠡᠭᠰᠡᠨ ᠢ᠋ ᠬᠡᠯᠡᠭᠡᠳ ᠦᠵᠡᠶᠡ !》ᠭᠡᠵᠡᠢ᠃
ᠲᠡᠭᠡᠭᠡᠳ ᠭᠦᠩᠵᠦ ᠠᠪᠤ ᠳ᠋ᠤ᠌ ᠪᠠᠨ ᠬᠡᠯᠡᠵᠦ ᠭᠡᠨᠡ᠃ ᠡᠭᠦᠨ ᠢ᠋ ᠰᠣᠨᠣᠰᠤᠭᠰᠠᠨ ᠬᠠᠭᠠᠨ ᠶᠡᠬᠡᠳᠡ ᠠᠭᠤᠷᠯᠠᠵᠤ᠂ 《ᠡᠬᠢ ᠵᠠᠬᠠ ᠪᠠᠨ ᠠᠯᠳᠠᠭᠰᠠᠨ ᠴᠠᠳᠢᠭ ᠦᠭᠡᠢ ᠠᠮᠢᠲᠠᠨ᠂ ᠲᠡᠭᠦᠨ ᠢ᠋ ᠴᠠᠭᠠᠵᠠᠯᠠ ! 》 ᠭᠡᠮᠡᠨ ᠲᠤᠰᠢᠶᠠᠬᠤ ᠳ᠋ᠤ᠌᠂ 《ᠲᠡᠷᠡ ᠬᠦᠦ ᠶ᠋ᠢ ᠴᠠᠭᠠᠵᠠᠯᠠᠬᠤ ᠳ᠋ᠤ᠌ ᠠᠮᠠᠷᠬᠠᠨ᠂ ᠬᠠᠷᠢᠨ ᠲᠠ ᠮᠠᠩᠭᠤᠰ ᠤ᠋ᠨ ᠬᠠᠭᠠᠨ ᠲᠠᠢ ᠰᠢᠳᠡᠷᠡ ᠲᠠᠯᠪᠢᠵᠤ ᠬᠣᠵᠢᠭᠳᠠᠭᠠᠳ ᠡᠳᠦᠢ ᠲᠡᠳᠦᠢ ᠬᠥᠮᠦᠨ ᠢ᠋ᠶ᠋ᠡᠨ ᠠᠯᠳᠠᠭᠰᠠᠨ ᠮᠥᠷᠲᠡᠯᠡ ᠪᠡᠨ ᠲᠡᠷᠡ ᠬᠥᠮᠦᠨ ᠲᠡᠢ ᠲᠣᠭᠯᠠᠭᠠᠳ ᠦᠵᠡᠬᠦ ᠳ᠋ᠦ᠍ ᠪᠣᠯᠬᠤ ᠦᠭᠡᠢ ᠨᠢ ᠶᠠᠭᠤ ᠪᠠᠢᠭᠠ ᠶᠤᠮ ᠪᠣᠢ ? 》 ᠭᠡᠵᠡᠢ᠃ᠬᠠᠭᠠᠨ ᠪᠣᠳᠣᠵᠤ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠥᠬᠢᠨ ᠳ᠋ᠦ᠍ ᠪᠡᠨ ᠬᠠᠨᠳᠤᠵᠤ᠄《ᠲᠡᠷᠡ ᠬᠦᠦ ᠶ᠋ᠢ ᠰᠢᠳᠡᠷᠡ ᠮᠡᠳᠡᠳᠡᠭ ᠶᠦᠮ ᠪᠣᠯ ᠬᠦᠷᠦᠭᠡᠳ ᠢᠷᠡ ᠭᠡᠵᠦ ᠬᠡᠯᠡ ! 》 ᠭᠡᠵᠡᠢ᠃
ᠢᠩᠭᠢᠭᠡᠳ ᠬᠠᠭᠠᠨ ᠬᠦᠦ ᠬᠣᠶᠠᠷ ᠰᠢᠳᠡᠷᠡ ᠲᠣᠭᠯᠠᠵᠠᠢ᠃ ᠬᠦᠦ ᠬᠠᠭᠠᠨ ᠢ᠋ ᠬᠣᠵᠢᠵᠤ ᠭᠡᠨᠡ᠃ ᠬᠠᠭᠠᠨ ᠳᠠᠬᠢᠭᠠᠳ ᠨᠢᠭᠡ ᠲᠣᠭᠯᠠᠶᠠ ᠭᠡᠵᠦ ᠭᠡᠨᠡ᠃ ᠬᠦᠦ ᠳᠠᠬᠢᠭᠠᠳ ᠯᠠ ᠬᠠᠭᠠᠨ ᠢ᠋ ᠬᠣᠵᠢᠵᠠᠢ᠃ ᠬᠠᠭᠠᠨ ᠬᠦᠦ ᠳ᠋ᠦ᠍ ᠬᠠᠨᠳᠤᠨ᠄ 《ᠵᠠ᠂ ᠬᠦᠦ ᠮᠢᠨᠢ᠂ ᠴᠢ ᠦᠨᠡᠬᠡᠷ ᠰᠠᠢᠨ ᠰᠢᠲᠠᠷᠠᠴᠢᠨ ᠶᠤᠮ ᠪᠠᠢᠨᠠ᠂ ᠮᠠᠩᠭᠤᠰ ᠤ᠋ᠨ ᠬᠠᠭᠠᠨ ᠪᠢᠳᠡ ᠬᠣᠶᠠᠷ ᠭᠤᠷᠪᠠᠨ ᠵᠢᠯ ᠳᠠᠷᠠᠭᠠᠯᠠᠨ ᠰᠢᠲᠠᠷᠠ ᠲᠣᠭᠯᠠᠨ᠂ ᠮᠠᠩᠭᠤᠰ ᠤ᠋ᠨ ᠬᠠᠭᠠᠨ ᠬᠣᠵᠢᠪᠠᠯ ᠨᠠᠳᠠ ᠠ᠋ᠴᠠ ᠬᠣᠵᠢᠯ ᠤ᠋ᠨ ᠲᠣᠭᠠ ᠪᠠᠷ ᠨᠢᠭᠡ ᠬᠥᠮᠦᠨ ᠠᠪᠳᠠᠭ ᠶᠤᠮ᠂ ᠬᠠᠷᠢᠨ ᠪᠢ ᠬᠣᠵᠢᠪᠠᠯ ᠬᠣᠶᠠᠷ ᠭᠦᠷᠦᠨ ᠢ᠋ ᠨᠢᠭᠡᠳᠬᠡᠬᠦ ᠪᠡᠷ ᠮᠥᠷᠥᠢ ᠲᠠᠯᠪᠢᠭᠰᠠᠨ ᠪᠣᠯᠪᠠᠴᠤ ᠨᠢᠭᠡ ᠴᠦ᠍ ᠬᠣᠵᠢᠭᠰᠠᠨ ᠦᠭᠡᠢ ᠬᠠᠷᠢᠨ ᠠᠯᠪᠠᠲᠤ ᠢᠷᠭᠡᠳ ᠢ᠋ᠶ᠋ᠡᠨ ᠠᠯᠳᠠᠭᠰᠠᠭᠠᠷ ᠪᠠᠢᠭᠠᠳ ᠳᠠᠭᠤᠰᠬᠠᠬᠤ ᠭᠡᠵᠦ ᠪᠠᠢᠨᠠ᠂ ᠵᠠ ᠬᠦᠦ ᠮᠢᠨᠢ ᠮᠠᠩᠭᠤᠰ ᠤ᠋ᠨ ᠬᠠᠭᠠᠨ ᠲᠠᠢ ᠰᠢᠲᠠᠷᠠ ᠲᠠᠯᠪᠢᠵᠤ ᠦᠵᠡᠬᠦ ᠦᠭᠡᠢ ᠤᠤ?》 ᠭᠡᠵᠡᠢ᠃
《ᠬᠠᠭᠠᠨ ᠤ᠋ ᠵᠠᠷᠯᠢᠭ ᠶᠤᠮ ᠪᠠᠢᠨᠠ᠂ ᠲᠠ ᠬᠠᠮᠲᠤ ᠪᠠᠢᠪᠠᠯ ᠪᠢ ᠲᠠᠯᠪᠢᠵᠤ ᠪᠣᠯᠬᠤ ᠯᠠ ᠶᠤᠮ ᠪᠠᠢᠨᠠ 》 ᠭᠡᠵᠡᠢ᠃ 《ᠲᠡᠭᠡᠯᠭᠦᠢ ᠶᠠᠭᠠᠬᠢᠬᠤᠪ᠂ ᠪᠢ ᠬᠠᠮᠲᠤ ᠪᠠᠢᠨᠠ᠂ ᠮᠠᠩᠭᠤᠰ ᠤ᠋ᠨ ᠬᠠᠭᠠᠨ ᠤ᠋ ᠳ᠋ᠤ᠌ ᠰᠥᠨᠢ ᠣᠴᠢᠳᠠᠭ ᠶᠤᠮ ᠳᠠ 》 ᠭᠡᠳ ᠰᠥᠨᠢ ᠪᠣᠯᠬᠤ ᠶ᠋ᠢ ᠬᠦᠯᠢᠶᠡᠵᠦ ᠭᠡᠨᠡ᠃
《ᠵᠠ᠂ ᠬᠠᠭᠠᠨᠲᠠᠨ ᠨᠠᠳᠠ ᠲᠠᠢ ᠰᠢᠲᠠᠷᠠ ᠨᠡᠭᠦᠬᠦ ᠪᠡᠷ ᠢᠷᠡᠪᠡ ᠤᠤ ? 》 ᠭᠡᠰᠡᠨ ᠳ᠋ᠦ᠍ ᠬᠠᠭᠠᠨ᠄ 《ᠪᠢ ᠭᠠᠭᠴᠠ ᠬᠦᠦ ᠲᠡᠢ ᠪᠡᠨ ᠲᠠᠨ ᠳ᠋ᠤ᠌ ᠪᠠᠷᠠᠭᠠᠯᠠᠬᠤ ᠭᠡᠵᠦ ᠢᠷᠡᠯᠡ᠂ ᠲᠠ ᠮᠢᠨᠦ ᠬᠦᠦ ᠲᠡᠢ ᠰᠢᠲᠠᠷᠠ ᠲᠣᠭᠯᠠᠭᠠᠳ ᠦᠵᠡᠬᠦ ᠦᠭᠡᠢ ᠤᠤ ? 》 ᠭᠡᠰᠡᠨ ᠳ᠋ᠦ᠍᠂ 《ᠴᠢᠳᠠᠳᠠᠭ ᠶᠤᠮ ᠪᠣᠯ ᠲᠣᠭᠯᠠᠵᠤ ᠪᠣᠯᠬᠤ ᠯᠠ ᠶᠤᠮ 》 ᠭᠡᠬᠦ ᠳ᠋ᠦ᠍᠂ ᠬᠠᠭᠠᠨ᠄ 《ᠮᠢᠨᠦ ᠬᠦᠦ ᠮᠠᠭᠤᠬᠠᠨ ᠲᠣᠭᠯᠠᠳᠠᠭ ᠶᠤᠮ ᠠ᠋ !》 ᠭᠡᠯᠡ᠃ ᠮᠠᠩᠭᠤᠰ ᠤ᠋ᠨ ᠬᠠᠭᠠᠨ ᠮᠡᠷ ᠮᠡᠷ ᠢᠨᠢᠶᠡᠭᠡᠳ᠂ 《ᠵᠠ᠂ ᠴᠢ ᠲᠡᠭᠡᠭᠡᠳ ᠨᠠᠳᠠ ᠲᠠᠢ ᠬᠡᠳᠦᠢ ᠬᠥᠮᠦᠨ ᠢ᠋ᠶ᠋ᠡᠷ ᠮᠥᠷᠥᠢᠴᠡᠬᠦ ᠭᠡᠳ ᠪᠠᠢᠭᠠ ᠶᠤᠮ 》᠂ 《ᠬᠥᠮᠦᠨ ᠢ᠋ᠶ᠋ᠡᠷ ᠮᠥᠷᠥᠢᠴᠡᠬᠦ ᠦᠭᠡᠢ᠂ ᠬᠠᠭᠠᠨ ᠲᠠᠢ ᠲᠣᠯᠣᠭᠠᠢ ᠪᠠᠷ ᠢ᠋ᠶ᠋ᠠᠨ ᠮᠥᠷᠥᠢᠴᠡᠬᠦ ᠰᠠᠨᠠᠭᠠ ᠪᠠᠢᠨᠠ 》 ᠭᠡᠬᠦ ᠳ᠋ᠦ᠍᠂ 《ᠶᠠᠭᠤ ᠭᠡᠨᠡ᠂ ᠲᠣᠯᠣᠭᠠᠢ ᠪᠠᠷ ᠮᠥᠷᠥᠢᠴᠡᠬᠦ ᠭᠡᠪᠡ ᠤᠤ ?》 ᠭᠡᠳ ᠬᠠᠷᠠ ᠬᠢᠲᠤᠭᠠ ᠪᠠᠨ ᠰᠤᠭᠤᠯᠤᠨ᠂ ᠬᠠᠭᠠᠨ ᠠᠪᠤ ᠳ᠋ᠤ᠌ ᠨᠢ ᠪᠠᠷᠢᠭᠤᠯᠵᠤ᠂ ᠬᠦᠷᠡᠩ ᠬᠢᠲᠤᠭᠠ ᠪᠠᠨ ᠰᠤᠭᠤᠯᠤᠨ ᠬᠢᠶᠡ ᠳ᠋ᠦ᠍ ᠪᠡᠨ ᠪᠠᠷᠢᠭᠤᠯᠤᠭᠠᠳ᠂ ᠨᠠᠮᠠ ᠶ᠋ᠢ ᠬᠣᠵᠢᠭᠳᠠᠪᠠᠯ ᠬᠠᠭᠠᠨ ᠲᠠ ᠮᠢᠨᠦ ᠲᠣᠯᠣᠭᠠᠢ ᠶ᠋ᠢ ᠠᠪᠤᠭᠠᠷᠠᠢ᠂ ᠲᠠᠨ ᠤ᠋ ᠬᠦᠦ ᠬᠣᠵᠢᠭᠳᠠᠪᠠᠯ ᠴᠢ ᠲᠡᠭᠦᠨ ᠦ᠌ ᠲᠣᠯᠣᠭᠠᠢ ᠶ᠋ᠢ ᠠᠪᠤᠭᠠᠷᠠᠢ 》 ᠭᠡᠵᠦ ᠬᠢᠶᠡ ᠳ᠋ᠦ᠍ ᠪᠡᠨ ᠬᠡᠯᠡᠵᠡᠢ᠃
ᠢᠩᠭᠢᠭᠡᠳ ᠰᠢᠳᠡᠷᠡ ᠨᠡᠭᠦᠵᠦ ᠡᠬᠢᠯᠡᠵᠡᠢ᠃ ᠬᠡᠳᠦ ᠨᠡᠭᠦᠭᠡᠳ ᠮᠠᠩᠭᠤᠰ ᠤ᠋ᠨ ᠬᠠᠭᠠᠨ ᠬᠣᠵᠢᠭᠳᠠᠵᠤ ᠭᠡᠨᠡ᠃ ᠢᠩᠭᠢᠭᠡᠳ ᠮᠠᠩᠭᠤᠰ ᠤ᠋ᠨ ᠬᠠᠭᠠᠨ ᠤ᠋ ᠲᠣᠯᠣᠭᠠᠢ ᠶ᠋ᠢ ᠠᠪᠴᠠᠢ᠃
ᠤᠬᠠᠭᠠᠨᠲᠤ ᠰᠢᠲᠠᠷᠠᠴᠢᠨ ᠬᠦᠦ ᠬᠠᠭᠠᠨ ᠤ᠋ ᠭᠦᠩᠵᠦ ᠲᠡᠢ ᠭᠡᠷᠯᠡᠵᠦ᠂ ᠬᠤᠷᠢᠮ ᠨᠠᠢᠷ ᠢ᠋ᠶ᠋ᠠᠨ ᠬᠢᠵᠦ᠂ ᠬᠣᠶᠠᠷ ᠭᠦᠷᠦᠨ ᠢ᠋ ᠨᠢᠭᠡᠳᠬᠡᠨ᠂ ᠬᠠᠭᠠᠨ ᠰᠢᠷᠡᠭᠡᠨ ᠳ᠋ᠦ᠍ ᠰᠠᠭᠤᠵᠤ ᠤᠯᠤᠰ ᠭᠦᠷᠦᠨ ᠠᠮᠤᠷ ᠲᠠᠢᠪᠤᠩ ᠳ᠋ᠤ᠌ ᠪᠠᠨ ᠵᠢᠷᠭᠠᠵᠤ ᠭᠡᠨᠡ᠃
ᠬᠥᠮᠦᠨ ᠦ᠌ ᠰᠤᠷᠤᠭᠰᠠᠨ ᠡᠷᠳᠡᠮ ᠮᠡᠳᠡᠯᠭᠡ ᠥᠪᠡᠷ ᠲᠤ᠌ ᠪᠣᠯᠣᠳ ᠥᠷᠥᠭᠡᠯ ᠪᠤᠰᠤᠳ ᠲᠤ᠌ ᠦᠷᠭᠦᠯᠵᠢ ᠳ᠋ᠦ᠍ ᠪᠡᠨ ᠠᠴᠢ ᠲᠤᠰᠠ ᠪᠠᠨ ᠡᠷᠭᠦᠯᠡ ᠭᠡᠰᠡᠨ ᠰᠠᠨᠠᠭᠠ ᠶ᠋ᠢ ᠥᠭᠦᠯᠡᠭᠰᠡᠨ ᠦᠯᠢᠭᠡᠷ ᠢᠩᠭᠢᠵᠦ ᠲᠡᠭᠦᠰᠦᠯᠡ᠃