ᠮᠡᠳᠡᠷᠡᠯ ᠦᠨ ᠰᠠᠭᠠᠲᠠᠯ – ᠬ᠌᠊ ᠂ ᠽᠠᠨᠳᠠᠷᠠᠪᠠᠢᠳᠢ Мэдрэлийн саатал – Г᠂ Зандарбайдий
275ᠮᠡᠳᠡᠷᠡᠯ ᠦᠨ ᠰᠠᠭᠠᠲᠠᠯ
ᠭ᠌᠊· ᠽᠠᠨᠳᠠᠷᠠᠪᠠᠢᠳᠢ
( ᠬᠣᠱᠣᠩ ᠥᠭᠦᠯᠡᠯᠭᠡ)
ᠬᠡᠦᠬᠡᠳ ᠢᠶᠡᠨ ᠴᠡᠴᠡᠷᠯᠢᠭ ᠲᠤ ᠬᠦᠷᠭᠡᠵᠦ ᠶᠠᠪᠤᠲᠠᠯᠠ ᠪᠠᠷᠠᠭᠤᠨ ᠭᠠᠷ ᠲᠠᠯᠠ ᠶ᠋ᠢᠨ ᠪᠠᠢᠰᠢᠩ ᠤ᠋ᠨ ᠳᠡᠷᠭᠡᠳᠡᠬᠢ ᠠᠷᠪᠠᠨ ᠨᠢᠭᠡᠨ ᠤᠯᠢᠶᠠᠰᠤ ᠨᠠᠪᠴᠢ ᠪᠠᠨ ᠳᠡᠯᠭᠡᠭᠡᠳ ᠦᠵᠰᠬᠦᠯᠡᠩᠲᠡᠢᠶᠡ ᠬᠠᠷᠠᠭᠳᠠᠪᠠ᠃ ᠡᠳᠡᠭᠡᠷ ᠤᠯᠢᠶᠠᠰᠤ ᠶ᠋ᠢ ᠡᠨᠳᠡ ᠠᠵᠢᠯᠯᠠᠳᠠᠭ ᠳ᠋ᠠᠰᠢ ᠭᠡᠵᠦ ᠮᠠᠨ ᠤ᠋ ᠠᠩᠭᠢ ᠶ᠋ᠢᠨ ᠨᠢᠭᠡ ᠨᠥᠬᠥᠷ ᠠᠷᠠᠴᠢᠯᠠᠵᠤ ᠤᠷᠭᠤᠭᠤᠯᠤᠭᠰᠠᠨ ᠪᠣᠯᠬᠣᠷ ᠨᠢ ᠪᠢ ᠲᠡᠳᠡᠭᠡᠷ ᠮᠣᠳᠣ ᠶ᠋ᠢ ᠰᠣᠨᠢᠷᠬᠠᠳᠠᠭ ᠶᠤᠮ᠃ ᠳᠠᠰᠢ ᠶ᠋ᠢ ᠡᠷᠲᠡ ᠠᠵᠢᠯ ᠳ᠋ᠠᠭᠠᠨ ᠢᠷᠡᠴᠢᠬᠡᠭᠡᠳ ᠮᠣᠳᠣ ᠪᠠᠨ ᠤᠰᠤᠯᠠᠵᠤ ᠲᠣᠷᠳᠣᠵᠤ ᠶᠠᠪᠤᠬᠤ ᠳ᠋ᠤᠨᠢ ᠪᠢ ᠮᠡᠨᠳᠦᠯᠡᠵᠦ ᠭᠠᠷ ᠡᠷᠭᠦᠭᠡᠳ ᠥᠩᠭᠡᠷᠡᠳᠡᠭ ᠶᠦᠮ᠃《 ᠡᠨᠡ ᠥᠷᠯᠥᠭᠡ ᠮᠠᠨᠢ ᠡᠷᠡ ᠠᠯᠠᠭᠠ》 ᠭᠡᠵᠦ ᠪᠣᠳᠣᠮᠠᠭᠯᠠᠨ ᠶᠠᠪᠤᠵᠤ ᠪᠠᠢᠲᠠᠯᠠ ᠵᠡᠭᠦᠨ ᠭᠠᠷ ᠲᠠᠯᠠ ᠶ᠋ᠢᠨ ᠪᠠᠢᠰᠢᠩ ᠤ᠋ᠨ ᠭᠠᠳᠠᠭᠠ ᠨᠢᠭᠡ ᠬᠥᠮᠦᠨ ᠳᠠᠭᠤᠳᠠᠵᠤ ᠳᠠᠯᠠᠯᠵᠤ ᠪᠠᠢᠨᠠ᠃ ᠳᠥᠭᠥᠨ ᠣᠴᠢᠪᠠᠯ ᠮᠥᠨ ᠮᠠᠨ ᠤ᠋ ᠠᠩᠭᠢ ᠶ᠋ᠢᠨ ᠳᠠᠸᠠ ᠤᠷᠲᠤ ᠲᠦᠷᠡᠢ ᠲᠡᠢ ᠠᠵᠢᠯ ᠤ᠋ᠨ ᠭᠤᠲᠤᠯ ᠡᠮᠦᠰᠦᠭᠡᠳ ᠬᠦᠷᠵᠡ ᠳᠥᠷᠥᠭᠡᠯᠡᠨ ᠵᠣᠭᠰᠣᠵᠤ ᠪᠠᠢᠨᠠ᠂ ᠣᠢᠷᠠ ᠳ᠋ᠤ᠌ ᠠᠭᠤᠯᠵᠠᠭᠠ ᠦᠭᠡᠢ ᠤᠴᠢᠷ ᠰᠣᠨᠢᠨ ᠰᠠᠨᠠᠭᠳᠠᠪᠠ᠃ ᠲᠡᠷᠡ ᠪᠡᠷ ᠮᠥᠴᠢᠷ ᠨᠢ ᠳᠣᠬᠢᠢᠴᠢᠬᠠᠭᠰᠠᠨ ᠨᠢᠭᠡ ᠭᠠᠴᠤᠷᠠ ᠶ᠋ᠢᠨ ᠦᠨᠳᠦᠰᠦ ᠤᠷᠤᠭᠤ ᠬᠦᠷᠵᠡ ᠪᠡᠷ ᠯᠠᠪᠬᠠᠨ ᠭᠢᠰᠬᠢᠭᠰᠡᠨ ᠢ᠋ᠶ᠋ᠡᠨ ᠪᠣᠯᠢᠭᠠᠳ ᠨᠠᠮᠠ ᠶ᠋ᠢ ᠤᠭᠲᠤᠨ ᠢᠷᠡᠪᠡ᠃ ᠮᠠᠨ ᠤ᠋ ᠬᠥᠮᠦᠨ ᠰᠢᠮᠡᠯᠳᠡᠭ ᠦ᠋ᠨ ᠪᠤᠬᠠ ᠰᠢᠭ᠋ ᠭᠣᠯᠴᠣᠢᠵᠤ ᠲᠠᠷᠭᠤᠯᠠᠭᠠᠳ ᠶᠡᠬᠡ ᠪᠠᠭᠤᠷᠢ ᠰᠠᠭᠤᠷᠢ ᠲᠠᠢ ᠪᠣᠯᠤᠭᠰᠠᠨ ᠬᠠᠷᠠᠭᠳᠠᠨᠠ᠃ ᠡᠨᠳᠡᠬᠢ ᠶ᠋ᠢᠨ ᠣᠷᠣᠯᠠᠭᠴᠢ ᠳᠠᠷᠤᠭᠠ ᠪᠠᠷ ᠬᠡᠳᠦᠨ ᠵᠢᠯ ᠠᠵᠢᠯᠯᠠᠵᠤ ᠪᠠᠢᠭᠠ ᠭᠡᠨᠡ᠃ 《 ᠨᠢᠭᠡ ᠬᠣᠲᠠ ᠳ᠋ᠤ᠌ ᠪᠠᠢᠭᠠ ᠮᠥᠷᠳᠡᠯᠡ ᠪᠡᠨ ᠳᠠᠭᠠᠷᠢᠯᠳᠤᠬᠤ ᠦᠭᠡᠢ ᠪᠠᠢᠨᠠ ᠰᠢᠦ》 ᠭᠡᠵᠦ ᠪᠢ ᠬᠡᠯᠡᠪᠡ᠃《 ᠵᠠᠪ ᠵᠠᠢ ᠮᠠᠭᠤ》 ᠭᠡᠵᠦ ᠳᠠᠸᠠ ᠬᠡᠯᠡᠵᠦ ᠪᠠᠢᠨᠠ᠃《 ᠠᠯᠪᠠᠨ ᠭᠠᠵᠠᠷ ᠤ᠋ᠨ ᠳᠠᠷᠤᠭᠠ ᠬᠥᠮᠦᠨ ᠬᠢᠷᠢ ᠪᠢᠵᠡ ᠳᠡ》 ᠨᠠᠳᠠ ᠳ᠋ᠤ᠌ ᠪᠣᠳᠣᠭᠳᠠᠪᠠ᠃ ᠠᠩᠭᠢ ᠶ᠋ᠢᠨ ᠨᠠᠢᠵᠠ ᠮᠠᠨᠢ ᠨᠢᠭᠡ ᠯᠡ ᠨᠠᠯᠠᠢᠭᠰᠠᠨ᠂ ᠠᠢᠪᠤᠩ ᠲᠠᠢᠪᠤᠩ ᠶᠠᠭᠤᠮᠠ ᠰᠢᠭ᠋ ᠪᠣᠯᠴᠢᠬᠠᠵᠠᠢ᠃ ᠤᠭ ᠨᠢ ᠣᠶᠤᠲᠠᠨ ᠪᠠᠢᠬᠤ ᠳ᠋ᠠᠭᠠᠨ ᠬᠠᠶᠢ ᠬᠥᠶᠢ ᠠᠯᠢ ᠲᠠ ᠨᠠᠷ ᠶᠠᠭᠤ ᠤᠩᠰᠢᠴᠢᠬᠠᠪᠠ᠂ ᠰᠢᠨᠡ ᠨᠣᠮ ᠬᠠᠮᠢᠭᠠ ᠠ᠋ᠴᠠ ᠣᠯᠪᠠ᠂ ᠦᠭᠭᠦᠭᠡᠷᠡᠢ ᠨᠠᠭᠠᠨᠠ ᠴᠠᠭᠠᠨᠠ ᠭᠡᠰᠡᠨ ᠭᠢᠯᠪᠠᠯᠵᠠᠭᠤᠯᠤᠭᠰᠠᠨ ᠵᠠᠯᠠᠭᠤ ᠪᠠᠢᠳᠠᠭ ᠰᠠᠨ ᠭᠡᠵᠦ ᠪᠣᠳᠣᠭᠳᠠᠨᠠ᠃ ᠪᠢᠳᠡᠨ ᠦ᠌ ᠳᠡᠷᠭᠡᠳᠡ ᠨᠢᠭᠡ ᠡᠪᠦᠭᠡᠵᠢᠶᠡᠷ ᠬᠥᠮᠦᠨ ᠶᠡᠬᠡ ᠲᠡᠢ ᠲᠡᠪᠳᠡᠩᠭᠦᠢ ᠬᠦᠷᠴᠦ ᠢᠷᠡᠭᠡᠳ《 ᠳᠠᠷᠤᠭᠠ ᠠ᠋ ᠤᠨᠤᠭᠠ ᠰᠠᠭᠠᠳᠠᠭᠠᠳ ᠪᠢ ᠬᠣᠵᠢᠭᠳᠠᠴᠢᠬᠠᠯᠠ》 ᠭᠡᠪᠡ᠃ ᠳᠠᠷᠤᠭᠠ《 ᠨᠡᠭᠡᠷᠡᠨ ᠯᠡ ᠲᠡᠢᠮᠦ ᠶᠦᠮ ᠪᠣᠯ ᠣᠳᠣ ᠶᠠᠭᠠᠬᠢᠬᠤᠪ》 ᠭᠡᠰᠡᠨ ᠢ᠋ᠶ᠋ᠡᠨ《 ᠴᠠᠭᠠᠳᠤᠭᠤᠯᠠ ᠴᠢᠨᠢ ᠢᠷᠡᠭᠡ ᠦᠭᠡᠢ ᠯᠡ ᠪᠠᠢᠨᠠ》 ᠭᠡᠪᠡ᠃
— ᠬᠠᠪᠤᠷ ᠪᠣᠯᠵᠤ ᠵᠠᠩᠰᠢᠯᠲᠤ ᠰᠦᠪᠪᠦᠲ᠋ᠨᠢᠺ ᠢ᠋ᠶ᠋ᠡᠨ ᠡᠬᠢᠯᠡᠵᠦ ᠪᠠᠢᠨᠠ ᠤᠤ ᠳᠠ ᠭᠡᠵᠦ ᠰᠠᠭᠤᠯᠠ᠃ ᠳᠠᠸᠠ ᠬᠠᠴᠢᠨ ᠦᠷᠴᠢᠢᠵᠦ ᠢᠷᠪᠠᠢᠭᠰᠠᠨ ᠢ᠋ᠶ᠋ᠠᠨ᠄
— ᠠ ᠲᠡᠢᠮᠦ᠁ ᠵᠣᠪᠠᠯᠠᠩ ᠲᠠᠢ ᠶᠤᠮ ᠭᠡᠳ ᠬᠤᠪᠬᠠᠢᠷᠠᠭᠰᠠᠨ ᠭᠠᠴᠤᠷᠠ ᠤᠷᠤᠭᠤ ᠬᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠵᠢᠭᠠᠵᠤ᠄
— ᠡᠨᠡ ᠬᠡᠳᠦ ᠶ᠋ᠢ ᠤᠷᠭᠤᠭᠤᠯᠬᠤ ᠭᠡᠵᠦ ᠵᠢᠯ ᠪᠣᠯᠭᠠᠨ ᠯᠠ ᠰᠣᠯᠢᠳᠠᠭ ᠶᠤᠮ ᠭᠡᠪᠡ᠃ ᠪᠢ ᠵᠡᠷᠭᠡᠯᠡᠳᠡᠭᠡ ᠪᠠᠢᠰᠢᠩ ᠢ᠋ ᠵᠢᠭᠠᠵᠤ《 ᠲᠡᠳᠡᠨ ᠦ᠌ ᠮᠣᠳᠣ ᠶᠠᠮᠠᠷ ᠰᠦᠷᠡᠬᠡᠢ ᠤᠷᠭᠤᠵᠤ ᠪᠠᠢᠨᠠ》 ᠭᠡᠰᠡᠨ ᠳ᠋ᠦ᠍ ᠮᠠᠨᠢ ᠬᠥᠮᠦᠨ ᠳᠤᠷᠠ ᠦᠭᠡᠢᠴᠡᠭᠰᠡᠨ ᠪᠠᠢᠷᠢ ᠲᠠᠢ ᠪᠠᠷᠠᠭᠤᠨ ᠬᠥᠯ ᠢ᠋ᠶ᠋ᠡᠷ ᠭᠢᠰᠬᠢᠨ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠬᠦᠷᠵᠡᠨ ᠦ᠌ ᠪᠡᠨ ᠡᠰᠢ ᠶ᠋ᠢ ᠲᠠᠯᠪᠢᠵᠤ ᠭᠠᠵᠠᠷ ᠤᠨᠠᠭᠠᠭᠠᠳ《 ᠨᠢᠭᠡ ᠳᠣᠣᠷᠠ ᠪᠠᠢᠵᠤ ᠡᠳᠡᠨ ᠦ᠌ ᠬᠢ ᠰᠢᠭ ᠶᠠᠭᠠᠬᠢᠭᠠᠳ ᠮᠣᠳᠣ ᠪᠠᠨ ᠤᠷᠭᠤᠭᠤᠯᠬᠤ ᠦᠭᠡᠢ ᠪᠠᠢᠨᠠ ᠭᠡᠵᠦ ᠷᠠᠶᠣᠨ( ᠲᠡᠭᠦᠷᠭᠡ) ᠶ᠋ᠢᠨ ᠬᠢᠨ ᠵᠠᠩᠨᠠᠵᠤ ᠯᠠ ᠪᠠᠢᠳᠠᠭ ᠶᠤᠮ᠂ ᠮᠠᠨ ᠤ᠋ ᠬᠠᠷᠠ ᠳ᠋ᠠᠰᠢ ᠁》 ᠭᠡᠰᠡᠨ ᠢ᠋ᠶ᠋ᠡᠨ ᠰᠢᠯᠦᠰᠦ ᠪᠡᠨ ᠵᠠᠯᠭᠢᠭᠠᠳ《 ᠲᠡᠷᠡ ᠯᠠ ᠠᠷᠠᠴᠢᠯᠠᠳᠠᠭ ᠶᠤᠮ ᠭᠡᠰᠡᠨ᠂ ᠲᠡᠢᠮᠦ ᠯᠡ ᠰᠦᠷᠡᠬᠡᠢ ᠠᠮᠢᠲᠠᠨ ᠪᠣᠯᠤᠭᠰᠠᠨ ᠶᠤᠮ ᠪᠠᠢᠬᠠ ᠳᠠ᠂ ᠴᠢ ᠪᠢᠳᠡ ᠴᠤ᠌ ᠮᠡᠳᠡᠨᠡ ᠳᠠ᠂ ᠲᠡᠢᠮᠦ ᠠ᠋ ᠪᠠᠨᠳᠢᠶᠠ》 ᠭᠡᠳ ᠮᠥᠷᠥ ᠪᠡᠨ ᠬᠠᠪᠴᠢᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠬᠣᠶᠠᠷ ᠡᠮᠡᠭᠲᠡᠢ ᠬᠦᠷᠵᠡ᠂ ᠰᠢᠭᠤᠳᠠᠢ ᠪᠠᠷᠢᠨ ᠬᠦᠷᠴᠦ ᠢᠷᠡᠪᠡ᠃ ᠳᠠᠸᠠ ᠲᠡᠳᠡᠨ ᠢ᠋ ᠬᠠᠷᠠᠭᠠᠳ《 ᠮᠠᠨ ᠤ᠋ ᠬᠢᠨ ᠢᠷᠡᠵᠦ ᠪᠠᠢᠨᠠ᠂ ᠥᠨᠥᠳᠥᠷ ᠡᠨᠡ ᠬᠡᠳᠦᠨ ᠶᠠᠭᠤᠮᠠ ᠶ᠋ᠢ ᠱᠣᠪᠣᠢᠯᠭᠠᠨᠠ᠂ ᠲᠡᠭᠡᠬᠦ ᠦᠭᠡᠢ ᠶᠦᠮ ᠪᠣᠯ ᠪᠠᠰᠠ ᠨᠢᠭᠡ ᠨᠢ ᠢᠷᠡᠵᠦ ᠣᠮᠣᠭᠳᠠᠨᠠ》 ᠭᠡᠰᠡᠨ ᠢ᠋ᠶ᠋ᠡᠨ ᠮᠢᠨᠦ ᠮᠥᠷᠦᠨ ᠳᠡᠭᠡᠭᠦᠷ ᠠᠯᠤᠰ ᠬᠠᠷᠠᠵᠤ᠂ ᠭᠠᠷ ᠢ᠋ᠶ᠋ᠠᠨ ᠬᠡᠢ ᠵᠠᠩᠭᠠᠨ ᠬᠥᠶᠢ! ᠮᠠᠰᠢᠨ ᠠ᠋ᠴᠠ ᠬᠣᠯᠠᠳᠠ ᠭᠡᠵᠦ ᠬᠠᠰᠬᠢᠷᠪᠠ᠃ ᠲᠡᠭᠡᠬᠦᠯᠡᠷ ᠨᠢ ᠮᠠᠨ ᠤ᠋ ᠥᠬᠢᠨ ᠰᠠᠭᠤᠳᠠᠯ ᠤ᠋ᠨ ᠬᠠᠷᠠ ᠮᠠᠰᠢᠨ ᠤ᠋ ᠬᠢᠨᠢ ᠬᠠᠵᠠᠭᠤ ᠳ᠋ᠤ᠌ ᠣᠴᠢᠭᠠᠳ ᠳᠦᠷᠰᠦ ᠪᠡᠨ ᠬᠠᠷᠠᠵᠤ ᠬᠣᠯᠠᠳᠠᠵᠤ ᠣᠢᠷᠠᠳᠴᠤ ᠪᠠᠢᠭᠠ ᠬᠠᠷᠠᠭᠳᠠᠪᠠ᠃ ᠪᠢ ᠥᠬᠢᠨ ᠢ᠋ᠶ᠋ᠡᠨ ᠳᠠᠭᠤᠳᠠᠪᠠ᠂ ᠲᠡᠷᠡ ᠭᠦᠶᠦᠵᠦ ᠢᠷᠡᠪᠡ᠃ ᠳᠠᠸᠠ ᠢᠨᠢᠶᠡᠮᠰᠦᠭᠯᠡᠵᠦ ᠮᠠᠨ ᠤ᠋ ᠥᠬᠢᠨ ᠦ᠌ ᠲᠣᠯᠣᠭᠠᠢ ᠶ᠋ᠢ ᠢᠯᠪᠢᠵᠦ ᠦᠬᠦᠭᠡᠷᠲᠦᠭᠡᠳ《 ᠮᠢᠨᠦ ᠳᠡᠭᠦᠦ ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠮᠠᠰᠢᠨ ᠳ᠋ᠤ᠌ ᠪᠢᠲᠡᠭᠡᠢ ᠭᠠᠷ ᠭᠥᠷᠥᠭᠡᠷᠡᠢ᠂ ᠬᠤᠷᠤᠭᠤᠨ ᠤ᠋ ᠬᠡ ᠭᠠᠷᠴᠢᠬᠠᠳᠠᠭ ᠶᠤᠮ》 ᠭᠡᠪᠡ᠃
— ᠬᠤᠷᠤᠭᠤᠨ ᠤ᠋ ᠬᠡ ᠭᠠᠷᠪᠠᠯ ᠶᠠᠭᠠᠬᠢᠳᠠᠭ ᠶᠤᠮ ᠪᠣᠢ ᠠᠬᠠ ᠠ᠋ ᠭᠡᠵᠦ ᠥᠬᠢᠨ ᠠᠰᠠᠭᠤᠪᠠ᠃
— ᠣᠭᠲᠣ ᠠᠷᠢᠯᠳᠠᠭ ᠦᠭᠡᠢ ᠶᠦᠮ ᠭᠡᠵᠦ ᠳᠠᠸᠠ ᠲᠣᠪᠴᠢ ᠬᠠᠷᠢᠭᠤᠯᠪᠠ᠃
ᠬᠥᠮᠦᠨ ᠦ᠌ ᠶᠠᠭᠤᠮᠠ ᠣᠷᠣᠯᠳᠣᠯᠠ ᠳᠡᠮᠡᠢ ᠶᠠᠭᠤᠮᠠ ᠠᠰᠠᠭᠤᠯᠠ ᠭᠡᠵᠦ ᠪᠢ ᠥᠬᠢᠨ ᠢ᠋ᠶ᠋ᠡᠨ ᠵᠢᠮᠯᠡᠪᠡ᠃ ᠳᠠᠸᠠ ᠮᠠᠨ ᠤ᠋ ᠥᠬᠢᠨ ᠢ᠋ ᠥᠮᠥᠭᠡᠷᠡᠵᠦ《 ᠬᠡᠦᠬᠡᠳ ᠵᠠᠩᠨᠠᠵᠤ ᠶᠠᠭᠠᠬᠢᠬᠤ ᠶᠤᠮ᠂ ᠡᠪᠡᠢ ᠡᠪᠡᠢ》 ᠭᠡᠵᠦ ᠬᠠᠯᠠᠭᠠᠰᠤ ᠪᠠᠨ ᠲᠡᠮᠲᠡᠷᠢᠨ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠ ᠡᠷᠢᠭᠰᠡᠨ ᠢᠶᠡᠨ《 ᠵᠣᠪᠠᠯᠠᠩ ᠲᠠᠢ ᠶᠤᠮ᠂ ᠱᠠᠯ ᠵᠠᠯᠭᠠᠬᠤ ᠲᠠᠢ》 ᠭᠡᠪᠡ᠃ ᠪᠢ ᠭᠠᠢᠬᠠᠵᠤ《 ᠶᠠᠭᠤ ᠪᠣᠯᠪᠠ》 ᠭᠡᠵᠦ ᠠᠰᠠᠭᠤᠪᠠ᠃ ᠳᠠᠸᠠ《 ᠮᠣᠳᠣ ᠲᠠᠷᠢᠬᠤ》 ᠭᠡᠰᠡᠨ ᠢ᠋ᠶ᠋ᠡᠨ《 ᠤᠷᠭᠤᠭᠤᠯᠵᠤ ᠴᠢᠳᠠᠳᠠᠭ ᠨᠢ ᠠᠭᠤᠯᠠ ᠣᠪᠣᠭᠠ ᠰᠢᠭ᠋ ᠤᠷᠭᠤᠭᠤᠯᠤᠨᠠ ᠯᠠ ᠪᠢᠵᠡ᠃ ᠮᠠᠨ ᠤ᠋ ᠡᠨᠡ ᠬᠡᠳᠦᠨ ᠬᠤᠪᠠᠬᠠᠢ ᠶ᠋ᠢ ᠬᠠᠷᠠᠭᠠᠴᠢ᠂ ᠤᠷᠵᠢᠨᠤᠨ ᠤᠯᠢᠶᠠᠰᠤ᠂ ᠨᠢᠳᠤᠨᠤᠨ ᠭᠠᠴᠤᠷᠠ ᠲᠠᠷᠢᠭᠰᠠᠨ ᠪᠠᠢᠳᠠᠭ ᠦᠭᠡᠢ᠃ ᠡᠨᠡ ᠵᠢᠯ ᠳᠠᠬᠢᠭᠠᠳ ᠤᠯᠢᠶᠠᠰᠤ᠂ ᠬᠣᠢᠲᠤᠨ ᠬᠤᠰᠤ ᠲᠠᠷᠢᠪᠠᠯ ᠶᠠᠭᠠᠬᠢᠬᠤ ᠪᠣᠯ?》 ᠭᠡᠳ ᠨᠠᠳᠠ ᠠ᠋ᠴᠠ ᠬᠠᠷᠢᠭᠤ ᠬᠦᠰᠡᠬᠦ ᠮᠡᠲᠦ ᠲᠣᠮᠣ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠰᠢᠷᠲᠡᠪᠡ᠃ ᠳᠡᠮᠡᠢ ᠯᠡ ᠲᠡᠭᠦᠨ ᠢ᠋ ᠲᠠᠢᠳᠬᠤᠷᠠᠭᠤᠯᠬᠤ ᠰᠠᠨᠠᠭᠠ ᠲᠠᠢ《 ᠦᠨᠡᠨ ᠳ᠋ᠡᠭᠡᠨ ᠪᠢᠳᠡ ᠴᠤ᠌ ᠮᠣᠳᠣ ᠵᠦᠯᠭᠡ ᠲᠠᠷᠢᠬᠤ ᠳᠤᠷᠠᠲᠠᠢ ᠪᠣᠯᠤᠭᠠᠳ ᠲᠠᠷᠢᠵᠤ ᠰᠠᠭᠤᠯᠠ᠃ ᠬᠠᠷᠢᠨ ᠤᠷᠭᠤᠭᠤᠯᠵᠤ ᠰᠤᠷᠤᠭᠠ ᠦᠭᠡᠢ ᠶᠦᠮ ᠳᠡ》 ᠭᠡᠯᠡ᠃ ᠳᠠᠸᠠ ᠢᠯᠡᠭᠦᠦ ᠦᠭᠡᠨ ᠳ᠋ᠦ᠍ ᠳᠤᠷᠠᠲᠠᠢ ᠬᠣᠪᠴᠢ ᠡᠮᠡ ᠰᠢᠭ ᠨᠢᠳᠦ ᠪᠡᠨ ᠲᠣᠮᠣ ᠳᠡᠭᠡᠷᠡ ᠲᠣᠮᠣ ᠪᠣᠯᠤᠭᠠᠳ《 ᠶᠠᠭᠠᠬᠢᠨᠠ ᠭᠡᠨᠡ ᠬᠥᠶᠢ᠂ ᠨᠡᠭᠡᠷᠡᠨ ᠰᠢᠦ᠂ ᠲᠠᠷᠢᠵᠤ ᠰᠤᠷᠤᠯᠠ᠂ ᠤᠷᠭᠤᠭᠤᠯᠵᠤ ᠰᠤᠷᠤᠭᠠ ᠦᠭᠡᠢ ᠭᠡᠨᠡ᠂ ᠶᠠᠭ ᠯᠠ ᠦᠨᠡᠨ ᠳᠡ》 ᠭᠡᠳ ᠳᠡᠰ ᠳᠡᠰ ᠭᠡᠲᠡᠯᠡ ᠬᠥᠬᠦᠷᠡᠭᠰᠡᠨ ᠢ᠋ᠶ᠋ᠡᠨ ᠮᠢᠨᠦ ᠮᠦᠷᠦᠨ ᠳᠡᠭᠡᠷᠡ ᠭᠠᠷ ᠢ᠋ᠶ᠋ᠠᠨ ᠲᠠᠯᠪᠢᠵᠤ《 ᠴᠢ ᠡᠭᠦᠨ ᠢ᠋ ᠪᠡᠨ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠᠨ ᠳ᠋ᠤ᠌ ᠪᠢᠴᠢᠨᠡ ᠰᠢᠦ᠂ ᠪᠢ ᠬᠠᠷᠠᠭᠠᠳ ᠯᠠ ᠪᠠᠢᠨᠠ》 ᠭᠡᠪᠡ᠃ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠳᠠᠸᠠ ᠨᠠᠮᠠ ᠶ᠋ᠢ ᠬᠥᠲᠥᠯᠵᠦ ᠨᠢᠭᠡᠨᠲᠡ ᠵᠢᠯᠢᠢᠭᠴᠢ ᠪᠣᠯᠤᠭᠰᠠᠨ ᠲᠠᠪᠤᠨ ᠭᠠᠴᠤᠷᠠ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠷᠭᠡᠳᠡ ᠠᠪᠴᠢᠷᠠᠪᠠ᠃ ᠦᠨᠳᠦᠰᠦ ᠶ᠋ᠢ ᠨᠢ ᠳᠠᠮᠫᠤᠤ( ᠰᠢᠭᠤᠳᠠᠢ) ᠪᠠᠷ ᠣᠷᠢᠶᠠᠭᠰᠠᠨ ᠬᠡᠳᠦᠨ ᠤᠯᠢᠶᠠᠰᠤ ᠳᠡᠷᠭᠡᠳᠡ ᠨᠢ ᠬᠡᠪᠲᠡᠵᠦ ᠪᠠᠢᠨᠠ᠃ ᠳᠠᠸᠠ ᠭᠠᠴᠤᠷᠠ ᠶ᠋ᠢ ᠵᠢᠭᠠᠵᠤ《 ᠡᠨᠳᠡ ᠶᠠᠭᠤ ᠴᠤ᠌ ᠲᠠᠷᠢᠭᠠᠳ ᠨᠡᠮᠡᠷᠢ ᠦᠭᠡᠢ᠂ ᠭᠡᠬᠦ ᠳ᠋ᠡᠭᠡᠨ ᠬᠡᠯᠡ ᠠᠮᠠᠨ ᠤ᠋ ᠨᠡᠮᠡᠷᠢ ᠬᠠᠷᠠ ᠰᠢᠷᠣᠢ ᠢᠷᠡᠬᠦ ᠳ᠋ᠦ᠍ ᠥᠨᠥᠳᠥᠷ ᠡᠨᠡ ᠬᠡᠳᠦ ᠶ᠋ᠢ ᠰᠠᠭᠤᠯᠭᠠᠬᠤ ᠠ᠋ᠴᠠ》 ᠭᠡᠪᠡ᠃ ᠲᠡᠭᠡᠲᠡᠯᠡ ᠲᠡᠭᠦᠨ ᠦ᠌ ᠬᠦᠰᠡᠭᠰᠡᠨ ᠠᠴᠢᠶᠠᠨ ᠤ᠋ ᠲᠡᠷᠭᠡ ᠬᠦᠷᠴᠦ ᠢᠷᠡᠪᠡ᠃ ᠳᠠᠸᠠ ᠬᠠᠯᠠᠭᠠᠰᠤ ᠪᠠᠨ ᠲᠡᠮᠲᠡᠴᠢᠨ ᠰᠠᠨᠳᠤᠷᠴᠤ᠄
《 ᠬᠠᠷᠠ ᠰᠢᠷᠣᠢ ᠢᠷᠡᠯᠡ᠂ ᠠᠯᠢ ᠪᠢ ᠶᠠᠪᠤᠶᠠ᠂ ᠨᠥᠭᠦᠭᠡ ᠮᠠᠭᠤ ᠲᠡᠷᠭᠡ ᠪᠡᠨ ᠬᠣᠯᠠᠳᠠᠭᠤᠯᠤᠶᠠ᠃ ᠡᠨᠡ ᠴᠢᠨᠢ ᠰᠠᠯᠬᠢᠨ ᠳᠡᠭᠡᠷᠡ ᠨᠢ ᠮᠠᠭᠠᠵᠢᠨᠳᠠᠭᠠᠳ ᠥᠭᠭᠦᠨᠡ》 ᠭᠡᠵᠦ ᠬᠡᠯᠡᠭᠡᠳ ᠤᠬᠤᠰᠬᠢᠵᠦ ᠬᠡᠳᠦ ᠠᠯᠬᠤᠭᠰᠠᠨ ᠢ᠋ᠶ᠋ᠠᠨ ᠡᠷᠭᠢᠵᠦ ᠬᠠᠷᠠᠭᠠᠳ《 ᠠᠭᠤᠴᠢᠯᠠᠭᠠᠷᠠᠢ ᠪᠠᠨᠳᠢᠶᠠ᠂ ᠳᠠᠷᠠᠭᠠ ᠲᠣᠬᠢᠲᠠᠢ ᠬᠠᠭᠤᠴᠢ ᠬᠥᠭᠡᠷᠥᠶᠡ》 ᠭᠡᠪᠡ᠃ ᠬᠡᠦᠬᠡᠳ ᠬᠦᠷᠭᠡᠬᠦ ᠴᠠᠭ ᠴᠤ᠌ ᠪᠣᠯᠴᠢᠬᠠᠵᠤ᠂ ᠲᠡᠢᠨ ᠶᠠᠪᠤᠬᠤ ᠳ᠋ᠠᠭᠠᠨ ᠪᠢ《 ᠡᠨᠡ ᠳᠠᠸᠠ ᠴᠢᠨᠢ ᠣᠶᠤᠲᠠᠨ ᠪᠠᠢᠬᠤ ᠳ᠋ᠠᠭᠠᠨ ᠶᠠᠮᠠᠷ ᠬᠥᠮᠦᠨ ᠪᠠᠢᠯᠠ》 ᠭᠡᠵᠦ ᠪᠣᠳᠣᠪᠠ᠃
᠁ ᠪᠢᠳᠡ ᠬᠠᠪᠤᠷ ᠤ᠋ᠨ ᠰᠢᠯᠭᠠᠯᠲᠠ ᠳ᠋ᠤ᠌ ᠪᠡᠯᠡᠳᠬᠡᠵᠦ ᠪᠠᠢᠯᠠ᠃ ᠰᠥᠨᠢ ᠳᠦᠯᠢ ᠪᠣᠯᠲᠠᠯᠠ ᠰᠠᠭᠤᠵᠠᠭᠠᠵᠤ ᠬᠡᠨ ᠤᠩᠰᠢᠵᠤ ᠪᠠᠢᠭᠠ᠂ ᠬᠡᠨ ᠤᠨᠲᠠᠵᠤ ᠪᠠᠢᠭᠠ ᠶ᠋ᠢ ᠴᠣᠩᠬᠣᠨ ᠤ᠋ ᠬᠢᠨᠢ ᠭᠡᠷᠡᠯ ᠢ᠋ᠶ᠋ᠡᠷ ᠲᠠᠭᠠᠮᠠᠭᠯᠠᠳᠠᠭ ᠪᠠᠢᠵᠤ ᠪᠢᠯᠡ᠃ ᠮᠠᠷᠭᠠᠰᠢ ᠰᠢᠯᠭᠠᠯᠲᠠ ᠪᠣᠯᠬᠤ ᠭᠡᠵᠦ ᠪᠠᠢᠬᠤ ᠳ᠋ᠤ᠌ ᠶᠠᠭᠠᠬᠢᠭᠠᠳ ᠴᠤ᠌ ᠶᠤᠮ ᠪᠢ ᠬᠠᠮᠫᠠ ① ᠨᠤᠭᠤᠳ ᠢ᠋ᠶ᠋ᠠᠷ ᠭᠡᠰᠦᠮᠡᠷ ᠰᠠᠨᠠᠭᠳᠠᠯᠠ᠃ ᠵᠡᠷᠭᠡᠯᠡᠳᠡᠭᠡ ᠪᠠᠢᠰᠢᠩ ᠳ᠋ᠤ᠌ ᠠᠩᠭᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠡᠨ ᠬᠡᠳᠦᠳᠦᠭᠡᠷ ᠴᠣᠩᠬᠣᠨ ᠳ᠋ᠤ᠌ ᠪᠠᠢᠳᠠᠭ ᠢ᠋ ᠲᠣᠭᠠᠯᠠᠵᠤ ᠪᠠᠢᠲᠠᠯᠠ ᠳ᠋ᠠᠰᠢ ᠶ᠋ᠢᠨ ᠴᠣᠩᠬᠣ ᠲᠣᠳᠣ ᠭᠡᠷᠡᠯ ᠲᠡᠢ ᠬᠠᠷᠠᠭᠳᠠᠪᠠ᠃ ᠰᠣᠨᠢᠨ ᠰᠠᠨᠠᠭᠳᠠᠪᠠ᠃ ᠮᠠᠨ ᠤ᠋ ᠡᠷᠡ ᠡᠳᠦᠢ ᠳ᠋ᠦ᠍ ᠭᠠᠳᠠᠭᠤᠷ ᠯᠠ ᠲᠡᠨᠦᠵᠦ ᠶᠠᠪᠤᠳᠠᠭ ᠰᠠᠨ ᠶᠠᠭᠤᠨ ᠪᠤᠵᠠᠭᠠᠢ ᠶᠠᠭᠤᠮᠠ ᠪᠣᠯᠪᠠ ᠭᠡᠵᠦ ᠪᠣᠳᠣᠭᠳᠠᠨ ᠬᠦᠷᠴᠦ ᠣᠴᠢᠪᠠ᠃ ᠳ᠋ᠠᠰᠢ ᠬᠥᠯ ᠠᠴᠢᠴᠢᠬᠠᠭᠰᠠᠨ ᠠᠳᠠᠭᠠᠷ ᠰᠢᠷᠲᠡᠭᠡᠳ ᠪᠣᠳᠣᠯᠭᠠᠰᠢᠷᠠᠵᠤ ᠬᠡᠪᠲᠡᠨᠡ᠃《 ᠡᠷᠬᠢᠮ ᠪᠢᠰᠢᠯᠭᠠᠵᠤ ᠯᠠ ᠪᠠᠢᠨᠠ ᠤᠤ》 ᠭᠡᠵᠦ ᠬᠠᠰᠬᠢᠷᠬᠤ ᠳ᠋ᠤ᠌ ᠴᠣᠴᠢᠵᠤ ᠤᠬᠤᠰᠬᠢᠨ ᠪᠣᠰᠪᠠ᠃ ᠤᠨᠲᠠᠵᠤ ᠪᠠᠢᠭᠰᠠᠨ ᠶᠤᠮ ᠰᠠᠨᠵᠠᠢ᠃ ᠳ᠋ᠠᠰᠢ ᠪᠣᠯ ᠰᠣᠨᠢᠨ ᠬᠡᠦᠬᠡᠳ ᠪᠠᠢᠯᠠ᠃ ᠪᠠᠭᠰᠢ ᠯᠧᠭᠼ ② ᠤᠩᠰᠢᠬᠤ ᠳ᠋ᠤ᠌ ᠪᠢᠴᠢᠬᠦ ᠦᠭᠡᠢ ᠴᠢᠩᠨᠠᠵᠤ ᠰᠠᠭᠤᠭᠠᠳ ᠪᠠᠢᠷᠢᠨ ᠳ᠋ᠠᠭᠠᠨ ᠢᠷᠡᠭᠡᠳ ᠲᠣᠭᠲᠠᠭᠠᠭᠰᠠᠨ ᠢ᠋ᠶ᠋ᠠᠨ ᠪᠢᠴᠢᠭᠡᠳ ᠠᠪᠳᠠᠭ᠃ ᠣᠢ ᠲᠣᠭᠲᠠᠭᠠᠮᠵᠢ ᠰᠠᠢᠲᠠᠢ᠂ ᠰᠢᠯᠭᠠᠯᠲᠠ ᠶ᠋ᠢᠨ ᠦᠶᠡ ᠳ᠋ᠦ᠍ ᠳᠡᠷᠡᠨ ᠢ᠋ ᠪᠡᠨ ᠨᠢᠭᠡ ᠬᠠᠷᠠᠴᠢᠬᠠᠭᠠᠳ ᠯᠠ ᠭᠦᠢᠴᠡᠭᠡ᠃ ᠪᠤᠰᠤᠳ ᠦᠶᠡ ᠳ᠋ᠦ᠍ ᠬᠢᠴᠢᠶᠡᠯ ᠳᠠᠪᠲᠠᠨᠠ ᠭᠡᠵᠦ ᠪᠠᠢᠬᠤ ᠦᠭᠡᠢ ᠡᠯᠳᠡᠪ ᠶᠠᠩᠵᠤ ᠶ᠋ᠢᠨ ᠨᠣᠮ ᠰᠣᠨᠢᠷᠬᠠᠵᠤ ᠪᠠᠷᠢᠯᠭᠠ ᠶ᠋ᠢᠨ ᠮᠡᠷᠭᠡᠵᠢᠯ ᠳ᠋ᠡᠭᠡᠨ ᠣᠭᠲᠣ ᠬᠠᠪᠢᠳᠠᠬᠤ ᠦᠭᠡᠢ ᠪᠤᠭ ᠮᠠᠯ ᠤ᠋ᠨ ᠥᠯᠥᠨ ᠭᠡᠳᠡᠰᠦ ᠠᠷᠠᠴᠢᠯᠠᠬᠤ ᠲᠤᠬᠠᠢ ᠨᠣᠮ ᠬᠦᠷᠲᠡᠯᠡ ᠤᠩᠰᠢᠵᠤ ᠰᠠᠭᠤᠨᠠ᠃ ᠲᠡᠭᠡᠭᠰᠡᠨ ᠮᠥᠷᠲᠡᠯᠡ ᠪᠡᠨ ᠠᠪᠬᠤ ᠯᠠ ᠭᠡᠰᠡᠨ ᠳ᠋ᠦᠩ ᠢ᠋ᠶ᠋ᠡᠨ ᠠᠪᠤᠨᠠ᠃ ᠲᠡᠭᠦᠨ ᠳ᠋ᠦ᠍ ᠭᠠᠭᠴᠠᠬᠠᠨ ᠬᠥᠮᠦᠨ᠂ ᠮᠠᠨ ᠤ᠋ ᠳᠠᠸᠠ ᠯᠠ ᠳᠤᠷᠠ ᠦᠭᠡᠢ᠂《 ᠡᠨᠡ ᠶᠡᠷᠦ ᠨᠢ ᠶᠠᠮᠠᠷ ᠰᠢᠳᠢ ᠪᠡᠷ ᠡᠢᠮᠦ ᠳ᠋ᠦᠩ ᠠᠪᠴᠢᠬᠠᠭᠠᠳ ᠪᠠᠢᠨᠠ》 ᠭᠡᠵᠦ ᠬᠠᠯᠬᠠᠯᠠᠨᠠ᠃ ᠬᠡᠷᠪᠡ ᠳ᠋ᠠᠰᠢ ᠶ᠋ᠢ ᠢᠩᠭᠢᠭᠡᠳ ᠬᠡᠪᠲᠡᠵᠦ ᠪᠠᠢᠭᠠ ᠶ᠋ᠢ ᠬᠠᠷᠠᠪᠠᠯ ᠳᠠᠸᠠ《 ᠶᠠᠮᠠᠷ ᠴᠤ᠌ ᠡᠳᠦᠷ ᠰᠥᠨᠢ ᠦᠭᠡᠢ ᠤᠩᠰᠢᠵᠤ ᠮᠢᠬᠠ ᠪᠠᠨ ᠢᠳᠡᠭᠡᠳ ᠭᠤᠷᠪᠠ ᠠᠪᠳᠠᠭ᠂ ᠶᠠᠮᠠᠷ ᠨᠢ ᠢᠩᠭᠢᠵᠦ ᠲᠠᠪᠠ ᠪᠠᠷ ᠢ᠋ᠶ᠋ᠠᠨ ᠬᠤᠷᠬᠢᠷᠠᠵᠤ ᠪᠠᠢᠭᠠᠳ ᠣᠨᠴᠠ ᠠᠪᠳᠠᠭ ᠶᠤᠮ ᠪᠣᠢ》 ᠭᠡᠳ ᠯᠡ ᠰᠢᠲᠠᠴᠢᠬᠠᠨᠠ ᠳᠠ ᠭᠡᠵᠦ ᠪᠣᠳᠣᠭᠳᠠᠪᠠ᠃ ᠪᠢ ᠳ᠋ᠠᠰᠢ ᠶ᠋ᠢᠨ ᠵᠠᠩ ᠢ᠋ ᠮᠡᠳᠡᠬᠦ ᠤᠴᠢᠷ ᠠ᠋ᠴᠠ ᠣᠯᠠᠨ ᠴᠤ᠌ ᠶᠠᠭᠤᠮᠠ ᠶᠠᠷᠢᠭᠰᠠᠨ ᠦᠭᠡᠢ᠂ ᠭᠠᠷᠬᠤ ᠳ᠋ᠠᠭᠠᠨ ᠭᠡᠷᠡᠯ ᠢ᠋ᠶ᠋ᠡᠨ ᠤᠨᠲᠠᠷᠠᠭᠠᠬᠤ ᠭᠡᠰᠡᠨ《 ᠭᠡᠷᠡᠯ ᠲᠡᠢ ᠤᠨᠲᠠᠬᠤ ᠰᠠᠢᠬᠠᠨ》 ᠭᠡᠵᠦ ᠪᠠᠢᠨᠠ᠃ ᠳᠠᠸᠠ ᠶ᠋ᠢᠨ ᠳ᠋ᠦ᠍ ᠣᠷᠣᠬᠤ ᠳ᠋ᠤ᠌ ᠮᠠᠨ ᠤ᠋ ᠡᠷᠡ ᠰᠢᠷᠡᠭᠡ ᠪᠠᠷ ᠯᠠ ᠨᠢᠭᠡ ᠨᠣᠮ ᠳᠡᠪᠲᠡᠷ ᠳᠡᠯᠭᠡᠴᠢᠬᠡᠭᠰᠡᠨ ᠬᠣᠭᠣᠯᠠ ᠪᠠᠨ ᠢᠳᠡᠵᠦ ᠰᠠᠭᠤᠨᠠ᠃ ᠨᠢᠳᠦ ᠨᠢ ᠤᠯᠠᠢᠭᠠᠳ ᠨᠢᠭᠤᠷ ᠨᠢ ᠴᠣᠩᠬᠣᠢᠬᠰᠠᠨ ᠢ᠋ ᠬᠠᠷᠠᠪᠠᠯ ᠶᠡᠬᠡ ᠯᠡ ᠤᠩᠰᠢᠵᠤ ᠪᠠᠢᠬᠤ ᠮᠡᠲᠦ᠃
— ᠵᠠ ᠡᠷᠬᠢᠮ ᠶᠡᠬᠡ ᠪᠢᠰᠢᠯᠭᠠᠵᠤ ᠪᠠᠢᠨᠠ ᠤᠤ᠂ ᠶᠠᠳᠠᠷᠠᠴᠢᠬᠠ ᠤᠤ?
— ᠶᠠᠷᠢᠬᠤ ᠶᠠᠭᠤᠮᠠ ᠪᠢᠰᠢ᠂
— ᠵᠢᠭᠠᠬᠠᠨ ᠠᠮᠠᠷᠠᠭᠠᠴᠢ᠂ ᠴᠢ ᠶᠡᠷᠦ ᠨᠢ ᠰᠡᠭᠡᠭᠡ ᠰᠡᠪᠡᠭᠡ ᠦᠭᠡᠢ ᠤᠩᠰᠢᠵᠤ ᠪᠠᠢᠨᠠ ᠳᠠ᠂ ᠨᠢᠭᠡᠮᠦᠰᠦᠨ ᠨᠢᠳᠤᠷᠭᠠᠯᠠᠵᠤ ᠰᠤᠷᠪᠠᠯ ᠁ ᠭᠡᠲᠡᠯᠡ ᠮᠠᠨ ᠤ᠋ ᠡᠷᠡ ᠮᠢᠨᠦ ᠶᠠᠷᠢᠶᠠ ᠶ᠋ᠢ ᠲᠠᠰᠤᠯᠵᠤ ᠨᠢᠭᠡ ᠮᠠᠭᠤ ᠪᠠᠯᠠᠢ ᠪᠠᠭᠰᠢ ᠠ᠋ᠴᠠ ᠪᠣᠯᠤᠭᠠᠳ ᠲᠦᠷᠦᠭᠦᠴᠢ ᠶ᠋ᠢᠨ ᠤᠯᠠᠷᠢᠯ ᠢ᠋ᠶ᠋ᠠᠷ ᠨᠢᠭᠡ ᠰᠠᠢᠨ ᠠᠪᠴᠢᠬᠠᠭᠰᠠᠨ ᠶᠤᠮ᠂ ᠳᠡᠭᠡᠭᠡ ᠦᠭᠡᠢ ᠶᠦᠮ ᠪᠣᠯ ᠣᠨᠴᠠ ᠭᠠᠷᠴᠤ ᠪᠣᠯᠬᠤ ᠯᠠ ᠪᠠᠢᠭᠰᠠᠨ᠃ ᠪᠢ ᠶᠡᠷᠦ ᠨᠢ ᠶᠠᠭᠠᠬᠢᠭᠠᠳ ᠲᠠ ᠨᠠᠷ ᠤ᠋ᠨ ᠠᠪᠳᠠᠭ ᠳ᠋ᠦᠩ ᠢ᠋ ᠠᠪᠴᠤ ᠪᠣᠯᠳᠠᠭ ᠦᠭᠡᠢ ᠶᠦᠮ ᠪᠣᠢ᠃ ᠮᠠᠭᠤᠰᠠᠢᠨ ᠶᠠᠭᠤᠮᠠ ᠨᠤᠭᠤᠳ ᠵᠠᠭᠤᠨ ᠲᠥᠭᠥᠷᠢᠭ ᠦ᠋ᠨ ᠨᠡᠮᠡᠭᠳᠡᠯ ᠲᠡᠢ ᠳᠣᠳᠢᠭᠠᠷ( ᠶᠡᠬᠡᠷᠬᠡᠭ) ᠪᠠᠢᠬᠤ ᠶᠤᠮ ᠠ᠋᠃ ᠬᠥᠮᠦᠨ ᠠᠪᠴᠤ ᠪᠣᠯᠳᠠᠭ ᠶᠤᠮ ᠪᠣᠯ ᠠᠪᠤᠨᠠ ᠳᠠ ᠬᠦ᠃ ᠡᠳᠦᠷ ᠰᠥᠨᠢ ᠦᠭᠡᠢ ᠬᠣᠭᠣᠯᠠ ᠨᠣᠢᠷ ᠦᠭᠡᠢ ᠤᠩᠰᠢᠵᠤ ᠪᠠᠢᠭᠠᠳ ᠪᠣᠯᠬᠤ ᠦᠭᠡᠢ ᠪᠣᠯ ᠭᠤᠶᠤᠵᠤ ᠪᠠᠢᠭᠠᠳ ᠠᠪᠤᠨᠠ ᠳᠠ᠃
— ᠭᠤᠶᠤᠬᠤ ᠰᠢᠦ᠂ ᠲᠡᠷᠡ ᠴᠤ᠌ ᠬᠠᠷᠢᠨ ᠶᠠᠷᠰᠢᠭ ᠪᠠᠢᠨᠠ᠃
— ᠶᠠᠮᠠᠷ ᠬᠠᠮᠢᠶᠠ ᠲᠠᠢ᠂ ᠳ᠋ᠦᠩ ᠪᠣᠯ ᠳ᠋ᠦᠩ᠃ ᠬᠣᠵᠢᠮ ᠬᠥᠮᠦᠨ ᠨᠠᠳᠠ ᠠ᠋ᠴᠠ《 ᠴᠢ ᠡᠨᠡ ᠲᠠᠪᠤ ᠶ᠋ᠢ ᠶᠠᠭᠠᠬᠢᠵᠤ ᠠᠪᠤᠭᠰᠠᠨ ᠪᠣᠢ》 ᠭᠡᠬᠦ ᠶᠦᠮ ᠪᠣᠢ᠂ ᠰᠤᠷᠤᠯᠭᠠ ᠶ᠋ᠢᠨ ᠨᠡᠮᠡᠭᠳᠡᠯ ᠠᠪᠴᠤ ᠯᠠ ᠪᠠᠢᠪᠠᠯ ᠪᠣᠯᠤᠯᠠ᠃
— ᠶᠡᠬᠡ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠳ᠋ᠦᠩ ᠴᠢᠬᠤᠯᠠ ᠤᠤ᠂ ᠴᠢᠨᠠᠷ ᠴᠢᠬᠤᠯᠠ ᠤᠤ?
— ᠳ᠋ᠦᠩ ᠴᠢᠬᠤᠯᠠ᠂ ᠬᠠᠮᠤᠭ ᠭᠣᠣᠯ ᠨᠢ ᠰᠤᠷᠤᠯᠭᠠ ᠶ᠋ᠢᠨ ᠨᠡᠮᠡᠭᠳᠡᠯ᠃
ᠵᠠᠭᠤ ᠭᠡᠳᠡᠭ ᠴᠢᠨᠢ ᠣᠶᠤᠲᠠᠨ ᠬᠥᠮᠦᠨ ᠳ᠋ᠦ᠍ ᠴᠢᠮᠠᠯᠠᠬᠤ ᠶᠠᠭᠤᠮᠠ ᠤᠤ᠂ ᠶᠠᠳᠠᠵᠤ ᠬᠠᠪᠤᠷ ᠤ᠋ᠨ ᠰᠢᠯᠭᠠᠯᠲᠠ ᠠ᠋ᠴᠠ ᠨᠡᠮᠡᠭᠳᠡᠯ ᠲᠡᠢ ᠪᠣᠯᠪᠠᠯ ᠣᠪᠣᠭᠠ ᠬᠡᠳᠦᠨ ᠰᠠᠷᠠ ᠠᠪᠬᠤ ᠶᠤᠮ ᠪᠢᠯᠡ ᠭᠡᠳ ᠳᠡᠰ ᠳᠡᠰ ᠬᠦᠬᠦᠷᠪᠡ᠃
— ᠠᠪᠴᠤ ᠴᠢᠳᠠᠵᠤ ᠪᠠᠢᠪᠠᠯ ᠶᠠᠭᠠᠬᠢᠯᠠ ᠭᠡᠵᠦ ᠪᠠᠭᠠ ᠶᠠᠭᠤᠮᠠ ᠪᠠᠢᠬᠤ ᠪᠣᠢ᠃ ᠭᠡᠬᠦ ᠳ᠋ᠡᠭᠡᠨ ᠴᠢᠳᠠᠯ ᠮᠡᠳᠡᠨᠡ ᠳᠠ ᠰᠠᠨᠠᠭᠠ ᠮᠡᠳᠡᠬᠦ ᠦᠭᠡᠢ᠃
— ᠵᠠ ᠵᠠ ᠴᠢ ᠵᠠᠢᠯᠠ ᠃ ᠴᠢᠮᠠ ᠲᠠᠢ ᠦᠭᠡ ᠨᠡᠢᠯᠡᠬᠦ ᠦᠭᠡᠢ ᠨᠢ᠂ ᠴᠢ ᠰᠠᠢᠬᠠᠨ ᠵᠠᠪ ᠲᠠᠢ ᠬᠥᠮᠦᠨ᠂ ᠴᠠᠭᠠᠳᠤᠭᠤᠯᠠ ᠶ᠋ᠢ ᠪᠡᠨ ᠬᠡᠰᠦᠵᠦ ᠴᠠᠯᠴᠢᠵᠤ ᠶᠠᠪᠤ᠂ ᠪᠢ ᠤᠩᠰᠢᠬᠤ ᠮᠢᠨᠢ ᠁ ᠭᠡᠰᠡᠨ ᠢ᠋ᠶ᠋ᠡᠨ ᠵᠤᠵᠠᠭᠠᠨ ᠨᠣᠮ ᠰᠢᠭᠦᠷᠡᠵᠦ ᠨᠤᠭᠤᠯᠤᠭᠰᠠᠨ ᠬᠠᠭᠤᠳᠠᠰᠤ ᠲᠡᠨᠢᠢᠯᠭᠡᠨ ᠳᠦᠩᠭᠢᠨᠡᠲᠡᠯᠡ ᠤᠩᠰᠢᠪᠠ᠃ ᠪᠢ ᠵᠢᠭᠠᠬᠠᠨ ᠬᠠᠷᠠᠵᠤ ᠰᠠᠭᠤᠪᠠ᠃ ᠳᠠᠸᠠ ᠲᠦᠳᠡᠯ ᠦᠭᠡᠢ ᠡᠪᠰᠢᠶᠡᠯᠭᠡᠭᠰᠡᠨ ᠢ᠋ᠶ᠋ᠡᠨ 《 ᠴᠠᠭᠠᠳᠤ ᠬᠣᠭ ᠤ᠋ᠳ ᠴᠢᠨᠢ ᠶᠡᠬᠡ ᠤᠩᠰᠢᠵᠤ ᠪᠠᠢᠨᠠ ᠤᠤ᠂ ᠥᠨᠥᠬᠢ ᠬᠠᠷᠠ ᠳ᠋ᠠᠰᠢ ᠪᠣᠳᠣᠪᠠᠯ ᠭᠠᠳᠠᠭᠤᠷ ᠪᠣᠷᠪᠢ ᠪᠠᠨ ᠬᠠᠪᠢᠷᠤᠭᠠᠳ ᠭᠦᠶᠦᠭᠰᠡᠨ ᠳᠡ 》 ᠭᠡᠵᠦ ᠤᠨᠲᠤᠭᠤᠴᠠᠪᠠ᠃
— ᠶᠠᠭᠠᠬᠢᠯᠠ ᠭᠡᠵᠦ ᠳ᠋ᠠᠰᠢ ᠭᠠᠳᠠᠭᠤᠷ ᠲᠡᠨᠦᠬᠦ ᠶ᠋ᠢ ᠪᠠᠢᠭᠰᠠᠨ ᠰᠢᠦ ᠳᠡ ᠃ ᠪᠦᠬᠦ ᠡᠬᠡ ᠵᠣᠬᠢᠶᠠᠯ ᠤ᠋ᠨ ᠲᠣᠪᠴᠢᠯᠠᠯ ᠬᠢᠭᠡᠳ ᠠᠰᠠᠭᠤᠯᠲᠠ ᠨᠤᠭᠤᠳ ᠲᠠᠭᠠᠨ ᠬᠠᠷᠢᠭᠤ ᠪᠢᠴᠢᠵᠦ ᠪᠠᠢᠨᠠ᠃ ᠳ᠋ᠠᠰᠢ ᠢᠩᠭᠢᠵᠦ ᠳᠠᠪᠲᠠᠬᠤ ᠶᠤᠮ ᠪᠣᠯ ᠴᠢ ᠪᠢᠳᠡᠨ ᠦ᠌ ᠬᠡᠨ ᠨᠢ ᠴᠤ᠌ ᠲᠡᠭᠦᠨ ᠦ᠌ ᠡᠮᠦᠨᠡ ᠰᠢᠷᠣᠢ ᠬᠠᠶᠠᠬᠤ ᠦᠭᠡᠢ᠃ ᠴᠢ ᠬᠠᠷᠠᠵᠤ ᠯᠠ ᠪᠠᠢᠭᠠᠷᠠᠢ ᠭᠡᠳ ᠳᠠᠮᠰᠢᠭᠯᠠᠵᠤ ᠣᠷᠬᠢᠪᠠ ᠃ ᠳᠠᠸᠠ ᠰᠠᠭᠤᠳᠠᠯ ᠠ᠋ᠴᠠ ᠪᠠᠨ ᠪᠣᠰᠤᠨ ᠬᠠᠷᠠᠢᠵᠤ ᠮᠢᠨᠦ ᠳᠡᠷᠭᠡᠳᠡ ᠦᠰᠦᠷᠴᠦ ᠢᠷᠡᠭᠡᠳ 《 ᠴᠢ ᠨᠡᠭᠡᠷᠡᠨ ᠬᠡᠯᠡᠵᠦ ᠪᠠᠢᠨᠠ ᠤᠤ 》 ᠭᠡᠵᠦ ᠱᠠᠭᠠᠷᠳᠠᠪᠠ ᠃
ᠪᠢ ᠵᠡᠷᠭᠡᠯᠡᠳᠡᠭᠡ ᠣᠶᠤᠲᠠᠨ ᠤ᠋ ᠪᠠᠢᠷᠢ ᠶ᠋ᠢᠨ ᠳᠥᠷᠪᠡᠳᠦᠭᠡᠷ ᠳᠠᠪᠬᠤᠷ ᠤ᠋ᠨ ᠴᠣᠩᠬᠣᠨ ᠤ᠋ ᠬᠣᠢᠨᠠ ᠠ᠋ᠴᠠ ᠨᠢ ᠡᠬᠢᠯᠡᠨ ᠲᠣᠭᠠᠯᠠᠵᠤ᠂
— ᠴᠢ ᠬᠠᠷᠠᠬᠤ ᠦᠭᠡᠢ ᠤᠤ᠂ ᠳ᠋ᠠᠰᠢ ᠶ᠋ᠢᠨ ᠴᠣᠩᠬᠣ ᠭᠡᠷᠡᠯ ᠲᠡᠢ ᠪᠠᠢᠨᠠ᠃ ᠬᠠᠷᠠᠭᠠᠳ ᠯᠠ ᠪᠠᠢᠭᠠᠷᠠᠢ ᠴᠢ᠂ ᠴᠠᠭᠠᠳᠤᠬᠢ ᠴᠢᠨᠢ ᠤᠨᠲᠠᠬᠤ ᠪᠠᠨ ᠪᠠᠢᠭᠰᠠᠨ᠃ ᠪᠠᠰᠠ ᠵᠣᠬᠢᠶᠠᠯ ᠪᠢᠴᠢᠳᠡᠭ ᠶᠦᠮ ᠰᠢᠭ ᠪᠠᠢᠨᠠ ᠯᠠ᠃ ᠨᠠᠳᠠ ᠳ᠋ᠤ᠌ ᠨᠢᠭᠡ ᠰᠠᠢᠬᠠᠨ ᠰᠢᠯᠦᠭ ᠤᠩᠰᠢᠵᠤ ᠦᠭᠭᠦᠭᠰᠡᠨ᠃ 《 ᠨᠠᠭᠠᠯᠢᠩᠬᠠᠢ ᠬᠣᠶᠠᠷ ᠨᠢᠳᠦ ᠴᠢᠨᠢ ᠨᠠᠮᠤᠷ ᠤ᠋ᠨ ᠤᠰᠤ ᠰᠢᠭ᠋ ᠮᠡᠯᠲᠡᠭᠡᠨᠡᠨᠡ᠂ ᠨᠠᠮᠤᠷ ᠤ᠋ᠨ ᠤᠰᠤᠨ ᠤ᠋ ᠳᠣᠯᠭᠢᠶᠠᠨ ᠳ᠋ᠤ᠌ ᠨᠠᠭᠠᠳᠤᠬᠢ ᠨᠥᠬᠥᠷ ᠴᠢᠨᠢ ᠪᠥᠮᠪᠥᠷᠢᠯᠡ 》 ᠭᠡᠳ ᠯᠡ ᠮᠥᠨ ᠴᠤ᠌ ᠠᠶᠠᠯᠭᠤᠲᠠᠢᠬᠠᠨ ᠤᠩᠰᠢᠵᠤ ᠪᠠᠢᠨᠠ ᠯᠠ ᠳᠠ᠃
— ᠦᠭᠡᠢ ᠲᠡᠷᠡ ᠠ᠋ ᠬᠦᠢ᠂ ᠮᠠᠭᠤ ᠬᠣᠭ ᠴᠢᠨᠢ ᠪᠠᠰᠠ ᠰᠢᠯᠦᠭ ᠪᠢᠴᠢᠳᠡᠭ ᠪᠠᠢᠬᠠ ᠨᠢ᠂ ᠰᠢᠯᠦᠭ ᠪᠢᠴᠢᠬᠦ ᠳ᠋ᠦ᠍ ᠮᠥᠩᠭᠥ ᠥᠭᠳᠡᠭ ᠭᠡᠰᠡᠨ ᠪᠢᠵᠡ᠃ ᠠᠯᠢ ᠴᠢ ᠳᠠᠬᠢᠭᠠᠳ ᠤᠩᠰᠢᠭᠠᠳ ᠥᠭ᠂ ᠬᠡᠳᠦᠨ ᠮᠥᠷ ᠪᠣᠢ ᠁ ᠭᠡᠳ ᠲᠣᠯᠣᠭᠠᠢ ᠰᠡᠭᠰᠦᠷᠴᠦ ᠲᠠᠩᠨᠠᠢ ᠲᠠᠭᠰᠢᠪᠠ ᠃
《ᠨᠠᠭᠠᠯᠢᠩᠬᠠᠢ ᠬᠣᠶᠠᠷ ᠨᠢᠳᠦ ᠴᠢᠨᠢ ᠨᠠᠮᠤᠷ ᠤ᠋ᠨ ᠤᠰᠤ ᠰᠢᠭ᠋ ᠮᠡᠯᠲᠡᠭᠡᠨᠡᠨᠡ᠂ ᠨᠠᠮᠤᠷ ᠤ᠋ᠨ ᠤᠰᠤᠨ ᠤ᠋ ᠳᠣᠯᠭᠢᠶᠠᠨ ᠳ᠋ᠤ᠌ ᠨᠠᠭᠠᠳᠤᠬᠢ ᠨᠥᠬᠥᠷ ᠴᠢᠨᠢ ᠪᠥᠮᠪᠥᠷᠢᠯᠡ》 ᠭᠡᠵᠦ ᠨᠠᠮᠠ ᠶ᠋ᠢ ᠤᠩᠰᠢᠬᠤ ᠳ᠋ᠤ᠌ ᠳᠠᠸᠠ ᠬᠠᠭᠤᠯᠵᠤ ᠠᠪᠤᠶᠠ ᠭᠡᠵᠦ ᠬᠦᠰᠡᠪᠡ᠃ ᠲᠡᠷᠡ ᠨᠢᠭᠡ ᠬᠠᠭᠤᠳᠠᠰᠤ ᠠᠪᠴᠤ 《 ᠨᠠᠭᠠᠯᠢᠩᠬᠠᠢ ᠬᠣᠶᠠᠷ ᠨᠢᠳᠦ 》 ᠭᠡᠵᠦ ᠪᠢᠴᠢᠭᠰᠡᠨ ᠢ᠋ᠶ᠋ᠡᠨ ᠢᠩᠭᠢᠵᠦ ᠶᠠᠭᠠᠬᠢᠵᠤ ᠣᠯᠵᠤ ᠬᠡᠯᠡᠪᠡ᠂ ᠨᠠᠭᠠᠳᠤᠬᠢ ᠴᠢᠨᠢ ᠣᠯᠠᠨ ᠮᠥᠷ ᠲᠡᠢ ᠶᠦᠮ ᠤᠤ ᠨᠢᠭᠡ ᠮᠥᠷ ᠲᠡᠭᠡᠨ ᠯᠠᠪ ᠣᠯᠠᠨ ᠦᠭᠡ ᠲᠢ ᠶᠦᠮ ᠪᠠᠢᠨᠠ᠃ ᠬᠡᠷᠪᠡ ᠦᠭᠡ ᠶ᠋ᠢᠨ ᠲᠣᠭᠠ ᠪᠠᠷ ᠮᠥᠩᠭᠥ ᠥᠭᠳᠡᠭ ᠪᠣᠯ ᠡᠨᠡ ᠪᠠᠯᠠᠯᠤᠨᠠ᠂ ᠬᠦᠶᠢ ᠪᠠᠨᠳᠢᠢᠶᠠ ᠴᠠᠭᠠᠳᠤᠬᠢ ᠴᠢᠨᠢ ᠡᠨᠡ ᠰᠢᠯᠦᠭ ᠲᠡᠭᠡᠨ ᠬᠡᠴᠢᠨᠡᠭᠡᠨ ᠲᠥᠭᠥᠷᠢᠭ ᠠᠪᠤᠭᠠ ᠪᠣᠯ᠂ ᠶᠡᠷᠦ ᠨᠢ ᠰᠢᠯᠦᠭ ᠢ᠋ ᠶᠠᠭᠠᠬᠢᠵᠤ ᠪᠢᠴᠢᠳᠡᠭ᠂ ᠪᠢᠴᠢᠭᠰᠡᠨ ᠢ᠋ ᠬᠠᠮᠢᠭᠠ ᠬᠡᠪᠯᠡᠳᠡᠭ ᠪᠠᠢᠨᠠ᠂ ᠰᠠᠢᠨ ᠵᠣᠬᠢᠶᠠᠯ ᠢ᠋ ᠬᠡᠪᠯᠡᠭᠡ ᠦᠭᠡᠢ ᠴᠤ᠌ ᠭᠡᠰᠡᠨ ᠮᠥᠩᠭᠥ ᠥᠭᠳᠡᠭ ᠭᠡᠵᠦ ᠦᠨᠡᠨ ᠪᠣᠯᠪᠠ ᠤᠤ᠂ ᠨᠢᠭᠡ ᠨᠥᠬᠥᠷ ᠨᠠᠳᠠ ᠨᠢᠳᠤᠨᠤᠨ ᠲᠡᠭᠡᠵᠦ ᠶᠠᠷᠢᠵᠤ ᠪᠠᠢᠭᠰᠠᠨ᠂ ᠴᠢ ᠲᠣᠳᠣᠷᠬᠠᠢ ᠶᠠᠭᠤᠮᠠ ᠲᠤᠭᠤᠯᠤᠭᠰᠠᠨ ᠤᠤ ?
— ᠪᠢ ᠰᠢᠯᠦᠭ ᠪᠢᠴᠢᠳᠡᠭ ᠦᠭᠡᠢ ᠪᠣᠯᠬᠣᠷ ᠰᠣᠨᠢᠷᠬᠠᠭᠰᠠᠨ ᠦᠭᠡᠢ᠂ ᠪᠣᠳᠣᠪᠠᠯ ᠬᠡᠪᠯᠡᠭᠰᠡᠨ ᠦ᠌ ᠬᠢᠨᠢ ᠳᠠᠷᠠᠭᠠ ᠱᠠᠩᠨᠠᠯ ᠥᠭᠳᠡᠭ ᠪᠢᠵᠡ ᠳᠡ᠃
— ᠵᠠ ᠲᠡᠢᠮᠦ ᠴᠤ᠌ ᠪᠠᠢᠬᠠ᠂ ᠬᠠᠴᠢᠨ ᠶᠤᠮ ᠰᠢᠦ᠂ ᠵᠣᠬᠢᠶᠠᠯ ᠪᠢᠴᠢᠯᠡ ᠭᠡᠵᠦ ᠮᠥᠩᠭᠥ ᠥᠭᠳᠡᠭ᠃ ᠮᠢᠨᠦ ᠪᠣᠳᠣᠯ ᠢ᠋ᠶ᠋ᠠᠷ ᠪᠣᠯ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠵᠣᠬᠢᠶᠠᠯ ᠢ᠋ ᠬᠡᠪᠯᠡᠭᠦᠯᠦᠭᠰᠡᠨ ᠬᠥᠮᠦᠨ᠂ ᠬᠡᠪᠯᠡᠳᠡᠭ ᠭᠠᠵᠠᠷ ᠨᠢ ᠵᠣᠬᠢᠶᠠᠯ ᠬᠡᠪᠯᠡᠵᠦ ᠥᠭᠭᠦᠯᠡ ᠭᠡᠵᠦ ᠮᠥᠩᠭᠥ ᠲᠥᠯᠥᠮᠡᠷ ᠰᠠᠨᠠᠭᠳᠠᠬᠤ ᠶᠤᠮ᠃ ᠬᠡᠷᠪᠡ ᠲᠡᠭᠡᠳᠡᠭ ᠪᠣᠯ ᠪᠢ ᠬᠡᠪᠯᠡᠯ ᠦ᠋ᠨ ᠡᠵᠡᠨ ᠪᠣᠯᠤᠨᠠ᠂ ᠮᠤᠨᠳᠠᠭ ᠡᠵᠡᠨ ᠪᠣᠯᠤᠨᠠ᠃ ᠲᠡᠭᠡᠭᠡᠳ ᠮᠠᠭᠤ ᠳ᠋ᠠᠰᠢ ᠶ᠋ᠢᠨ ᠨᠣᠮ ᠢ᠋ ᠬᠡᠪᠯᠡᠵᠦ ᠭᠠᠭᠴᠠ ᠱᠤᠯᠤᠬᠤ ᠶᠤᠮᠰᠠᠨ᠂ ᠳᠠᠩᠴᠤ ᠲᠡᠭᠡᠳᠡᠭ ᠦᠭᠡᠢ ᠨᠢ᠃ ᠵᠠ ᠡᠨᠡ ᠳᠡᠮᠡᠢ ᠶᠠᠭᠤᠮᠠ ᠴᠤ᠌ ᠶᠠᠭᠠᠬᠢᠬᠤᠪ᠂ ᠲᠡᠭᠡᠭᠡᠳ ᠴᠠᠭᠠᠳᠤ ᠳᠠᠰᠢ ᠴᠢᠨᠢ ᠣᠨᠴᠠ ᠰᠤᠷᠴᠤ ᠨᠡᠮᠡᠭᠳᠡᠯ ᠠᠪᠤᠨᠠ᠂ ᠪᠠᠰᠠ ᠳᠡᠭᠡᠷᠡ ᠨᠢ ᠰᠢᠯᠦᠭ ᠪᠢᠴᠢᠵᠦ ᠮᠥᠩᠭᠥ ᠠᠪᠤᠨᠠ᠂ ᠬᠠᠭᠠᠷᠠᠲᠠᠯᠠ ᠪᠠᠨ ᠪᠠᠶᠠᠵᠢᠬᠤ ᠨᠢ ᠠ᠋᠃
— ᠠᠲᠠᠭᠠᠷᠬᠠᠭᠠᠳ ᠪᠠᠢᠪᠠᠯ ᠴᠢ ᠥᠪᠡᠷ ᠢ᠋ᠶ᠋ᠡᠨ ᠪᠢᠴᠢᠬᠦ ᠦᠭᠡᠢ ᠤᠤ? ᠵᠠᠷᠢᠮ ᠰᠢᠯᠦᠭ ᠢ᠋ ᠤᠩᠰᠢᠭᠠᠳ ᠡᠢᠮᠦᠷᠬᠦᠦ ᠴᠤ ᠪᠢᠴᠢᠵᠦ ᠪᠣᠯᠤᠮᠠᠷ ᠰᠢᠬ ᠰᠠᠨᠠᠭᠳᠠᠬᠤ ᠦᠭᠡᠢ ᠪᠠᠢᠨᠠ ᠭᠡᠵᠢ ᠤᠤ᠃
ᠳᠠᠸᠠ ᠢᠯᠡᠳᠲᠡ ᠰᠡᠷᠭᠦᠵᠦ ᠤᠩᠰᠢᠬᠤ ᠭᠡᠵᠦ ᠳᠡᠯᠭᠡᠭᠰᠡᠨ ᠨᠣᠮ ᠢ᠋ᠶ᠋ᠠᠨ ᠬᠠᠮᠬᠢᠵᠤ ᠴᠠᠭᠠᠰᠢ ᠲᠦᠯᠬᠢᠭᠡᠳ ᠄
— ᠨᠡᠭᠡᠷᠡᠨ ᠲᠡᠢᠮᠦ ᠰᠢᠦ ᠢᠯᠭᠠᠭᠠ ᠦᠭᠡᠢ᠂ ᠨᠠᠳᠠ ᠳ᠋ᠤ᠌ ᠪᠠᠰᠠ ᠰᠢᠯᠦᠭ ᠢ᠋ ᠪᠢᠴᠢᠴᠢᠬᠡᠵᠦ ᠪᠣᠯᠬᠤ ᠶᠠᠭᠤᠮᠠ ᠪᠣᠳᠣᠭᠳᠠᠳᠠᠭ᠂ ᠤᠬᠠᠭᠠ ᠨᠢ ᠬᠡᠨ ᠪᠢᠯᠡ ᠳᠠ᠂ ᠡᠬᠡ ᠳ᠋ᠡᠭᠡᠨ ᠨᠢᠭᠡ ᠵᠠᠬᠢᠶᠠ ᠪᠢᠴᠢᠭᠰᠡᠨ ᠁ ᠲᠡᠢᠮᠦ ᠲᠡᠢᠮᠦ ᠰᠠᠨᠠᠯᠠ ᠂ 《 ᠪᠤᠭᠤᠷᠤᠯ ᠡᠵᠢ ᠳ᠋ᠡᠭᠡᠨ 》 ᠭᠡᠵᠦ ᠨᠢᠭᠡ ᠢᠷᠠᠭᠤ ᠨᠠᠢᠷᠠᠭᠤᠯᠭᠠ᠂ ᠲᠡᠷᠡ ᠪᠣᠯ ᠪᠢᠴᠢᠬᠦ ᠳ᠋ᠦ᠍ ᠶᠠᠭᠤ ᠪᠠᠢᠬᠤᠪ ᠳᠠ᠂ ᠵᠠᠬᠢᠶᠠ ᠰᠢᠦ ᠳᠡ᠃ ᠲᠣᠯᠣᠭᠠᠢ ᠬᠣᠯᠪᠣᠬᠤ ᠯᠠ ᠶᠠᠭᠤᠮᠠ ᠪᠢᠵᠡ᠂ ᠷᠣᠮᠠᠨ ᠢ᠋ ᠴᠤ᠌ ᠭᠡᠰᠡᠨ ᠪᠢᠴᠢᠵᠦ ᠪᠣᠯᠤᠨᠠ᠃ ᠲᠣᠮᠣ ᠯᠠ ᠶᠠᠭᠤᠮᠠ ᠪᠢᠴᠢᠳᠡᠭ ᠶᠦᠮ ᠪᠢᠯᠡ᠃ ᠵᠠ ᠲᠡᠷᠡ ᠲᠣᠯᠰᠲ᠋ᠣᠢ ᠰᠢᠭ᠋ ᠪᠣᠯ ᠪᠢᠴᠢᠵᠦ ᠪᠣᠯᠬᠤ ᠶᠠᠭᠤᠮᠠ ᠪᠣᠳᠣᠭᠳᠠᠭᠰᠠᠨ᠃ ᠠᠢᠯ ᠤ᠋ᠨ ᠵᠠᠷᠤᠴᠠ ᠬᠡᠦᠬᠡᠨ ᠢ ᠨᠢᠭᠡ ᠶᠡᠬᠡ ᠠᠮᠠᠷᠬᠠᠨ ᠵᠢᠷᠮᠦᠰᠦᠨ ᠪᠣᠯᠭᠠᠴᠢᠬᠠᠳᠠᠭ ᠪᠠᠶᠠᠨ ᠲᠠᠢᠵᠢ ᠲᠠᠢ ᠵᠣᠬᠢᠶᠠᠯ ᠪᠠᠢᠳᠠᠭ ᠦᠭᠡᠢ ᠤᠤ ᠳᠠ ᠁ ᠭᠡᠳ ᠳᠥᠷᠪᠡᠨ ᠬᠤᠷᠤᠭᠤ ᠪᠠᠨ ᠲᠡᠭᠰᠢᠯᠡᠵᠦ ᠡᠢᠮᠦ ᠵᠤᠵᠠᠭᠠᠨ᠂ ᠲᠡᠭᠦᠨ ᠢ᠋ ᠴᠢᠨᠢ ᠪᠢ ᠤᠩᠰᠢᠭᠰᠠᠨ ᠰᠢᠦ᠃ ᠡᠰᠡ ᠵᠠᠯᠬᠠᠭᠤᠷᠠᠪᠠᠯ ᠲᠡᠷᠡ ᠬᠢᠷᠢ ᠶ᠋ᠢᠨ ᠪᠢᠴᠢᠬᠦ ᠦᠭᠡᠢ ᠶᠠᠭᠠᠬᠢᠳᠠᠭ ᠶᠣᠮᠠ ᠪᠤᠢ ? ᠭᠡᠰᠡᠨ ᠢ᠋ᠶ᠋ᠡᠨ ᠰᠤᠷᠤᠭᠰᠠᠨ ᠵᠠᠩ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠳᠡᠰ ᠳᠡᠰ ᠬᠥᠬᠥᠷᠡᠭᠡᠳ᠂ ᠵᠠ ᠪᠠᠰᠠ ᠥᠭᠡᠷᠡ ᠵᠣᠬᠢᠶᠠᠯ ᠴᠤ᠌ ᠪᠣᠢ ᠳᠠ᠂ ᠪᠢ ᠤᠷᠠᠨ ᠵᠣᠬᠢᠶᠠᠯ ᠨᠢᠭᠡ ᠶᠡᠬᠡ ᠤᠩᠰᠢᠳᠠᠭ ᠦᠭᠡᠢ ᠪᠣᠯᠬᠣᠷ ᠨᠡᠷᠡᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠠᠢᠨᠠ ᠭᠡᠪᠡ᠃
ᠳᠠᠸᠠ ᠥᠨᠳᠡᠰᠬᠢᠵᠦ ᠳᠥᠷᠪᠡᠳᠦᠭᠡᠷ ᠳᠠᠪᠬᠤᠷ ᠤ᠋ᠨ ᠴᠣᠩᠬᠣ ᠶ᠋ᠢ ᠲᠣᠭᠠᠯᠠᠭᠰᠠᠨ ᠢ᠋ᠶ᠋ᠠᠨ᠄
— ᠬᠠᠷᠠ ᠳ᠋ᠠᠰᠢ ᠴᠢ ᠤᠩᠰᠢᠵᠤ ᠠᠯᠳᠠᠵᠤ ᠪᠠᠢᠨᠠ ᠳᠠ ᠬᠦ᠂ ᠲᠡᠷᠡ ᠣᠯᠠᠨ ᠡᠬᠡ ᠵᠣᠬᠢᠶᠠᠯ ᠤ᠋ᠨ ᠲᠣᠪᠴᠢᠯᠠᠯ ᠢ᠋ ᠬᠢᠴᠢᠬᠡᠯᠡ ᠭᠡᠨᠡ᠃ ᠠᠮᠵᠢᠭᠤᠯᠵᠤ ᠪᠠᠢᠨᠠ ᠮᠠᠭᠤ ᠬᠠᠷᠠ ᠴᠢᠨᠢ᠃ ᠴᠢᠮᠠ ᠠ᠋ᠴᠠ ᠳᠣᠣᠷᠠ ᠣᠷᠣᠬᠤ ᠦᠭᠡᠢ ᠳᠡ᠂ ᠴᠢᠨᠦ ᠠᠪᠢᠶᠠᠰ ᠢ᠋ ᠠᠪᠤᠭᠠᠳ ᠲᠣᠭᠠᠯᠠᠵᠤ ᠰᠠᠭᠤᠬᠤ ᠴᠠᠭ ᠪᠣᠢ ᠪᠠᠢᠯᠭᠦᠢ ᠭᠡᠵᠦ ᠵᠠᠨᠤᠯᠲᠠᠢᠬᠠᠨ ᠬᠡᠯᠡᠭᠡᠳ ᠨᠣᠮ ᠢ᠋ᠶ᠋ᠠᠨ ᠰᠢᠭᠦᠷᠡᠨ ᠠᠪᠤᠪᠠ᠃
ᠲᠡᠭᠦᠨ ᠳ᠋ᠦ᠍ ᠰᠠᠭᠠᠳ ᠪᠣᠯᠬᠤ ᠦᠭᠡᠢ ᠶ᠋ᠢ ᠪᠣᠳᠣᠵᠤ ᠪᠢ ᠲᠦᠷᠭᠡᠨ ᠭᠠᠷᠪᠠ᠃ ᠳᠠᠸᠠ 《 ᠨᠠᠢᠵᠠ ᠠ᠋ ᠴᠢ ᠤᠰᠤ ᠭᠣᠭᠣᠵᠢᠭᠤᠯᠴᠢᠬᠠᠭᠠᠷᠠᠢ᠂ ᠨᠣᠢᠷ ᠬᠦᠷᠪᠡᠯ ᠴᠡᠯ ᠬᠦᠢᠲᠡᠨ ᠤᠰᠤ ᠪᠠᠷ ᠨᠢᠭᠤᠷ ᠲᠣᠯᠣᠭᠠᠢ ᠪᠠᠨ ᠰᠢᠪᠰᠢᠬᠦ ᠵᠦᠭᠡᠷ ᠪᠠᠢᠳᠠᠭ ᠶᠤᠮ 》 ᠭᠡᠪᠡ ᠃
ᠥᠷᠯᠥᠭᠡᠭᠦᠷ ᠳᠠᠸᠠ ᠮᠠᠨ ᠤ᠋ ᠳ᠋ᠤ᠌ ᠣᠷᠣᠵᠤ ᠢᠷᠡᠪᠡ᠃ ᠲᠡᠷᠡ ᠪᠠᠷ ᠰᠥᠨᠢᠵᠢᠨ ᠤᠩᠰᠢᠯᠠ᠂ ᠤᠩᠰᠢᠬᠤ ᠶᠣᠰᠣᠲᠠᠢ ᠶᠠᠭᠤᠮᠠ ᠪᠠᠨ ᠴᠤ᠌ ᠪᠠᠷᠠᠯᠠ᠃ ᠡᠦᠲᠦ ᠠᠪᠬᠤ ᠭᠡᠰᠡᠨ ᠳ᠋ᠦᠩ ᠯᠡ ᠬᠡᠷᠡᠭᠲᠡᠢ ᠰᠢᠯᠭᠠᠯᠲᠠ ᠳ᠋ᠤ᠌ ᠣᠴᠢᠶᠠ ᠳᠠ ᠡᠷᠲᠡᠬᠡᠨ ᠥᠭᠭᠦᠴᠢᠬᠡᠶᠡ ᠭᠡᠵᠦ ᠪᠠᠶᠠᠰᠬᠤᠯᠠᠩᠲᠠᠢ ᠬᠡᠯᠡᠭᠡᠳ 《 ᠰᠢᠯᠦᠭᠴᠢ ᠶ᠋ᠢᠨ ᠬᠢ ᠪᠡᠷ 》 ᠳᠠᠭᠠᠷᠢᠬᠤ ᠭᠡᠪᠡ᠃ ᠪᠢᠳᠠ ᠬᠣᠶᠠᠷ ᠳ᠋ᠠᠰᠢ ᠶ᠋ᠢᠨ ᠳ᠋ᠦ᠍ ᠣᠷᠣᠪᠠ᠃ ᠨᠠᠷᠠ ᠬᠡᠳᠦᠢᠨ ᠬᠥᠭᠡᠷᠴᠢᠭᠡᠭᠰᠡᠨ ( ᠳᠡᠭᠳᠡᠴᠢᠭᠡᠭᠰᠡᠨ ) ᠪᠠᠢᠬᠤ ᠳ᠋ᠤ᠌ ᠭᠡᠷᠡᠯ ᠮᠡᠯᠲᠡᠢᠭᠰᠡᠨ ᠥᠷᠥᠭᠡᠨ ᠳ᠋ᠦ᠍ ᠳ᠋ᠠᠰᠢ ᠲᠠᠢᠪᠤᠩ ᠨᠢ ᠠᠷᠭᠠ ᠦᠭᠡᠢ ᠨᠣᠢᠷᠰᠤᠵᠤ ᠪᠠᠢᠯᠠ᠃ ᠳᠠᠸᠠ ᠭᠡᠷᠡᠯ ᠥᠭᠡᠳᠡ ᠬᠢᠯᠠᠮᠬᠢᠵᠤ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠂ ᠬᠡᠭ! ᠤᠨᠲᠠᠬᠤ ᠤᠨᠲᠠᠬᠤ ᠳ᠋ᠠᠭᠠᠨ ᠪᠠᠰᠠ ᠭᠡᠷᠡᠯᠲᠡᠢ ᠤᠨᠲᠠᠳᠠᠭ ᠪᠠᠢᠨᠠ ᠰᠢᠦ ᠭᠡᠳ ᠳ᠋ᠠᠰᠢ ᠶ᠋ᠢᠨ ᠬᠥᠨᠵᠢᠯᠡ ᠶ᠋ᠢ ᠬᠠᠤ ᠲᠠᠲᠠᠪᠠ᠃ ᠴᠠᠭᠠᠳᠤᠬᠢ ᠨᠢ ᠨᠣᠢᠷᠮᠤᠭᠯᠠᠵᠤ 《ᠲᠤᠮᠤᠭᠠ ᠲᠠᠢ ᠪᠠᠢ 》 ᠭᠡᠵᠦ ᠤᠴᠠᠭᠠᠷᠯᠠᠪᠠ᠃ ᠳᠠᠸᠠ ᠲᠣᠯᠣᠭᠠᠢ ᠶ᠋ᠢ ᠨᠢ ᠥᠨᠳᠡᠢᠯᠭᠡᠭᠡᠳ 《 ᠬᠦᠶᠢ᠂ ᠴᠢ ᠡᠬᠡ ᠵᠣᠬᠢᠶᠠᠯ ᠤ᠋ᠨ ᠲᠡᠮᠳᠡᠭᠯᠡᠯ ᠢ᠋ᠶ᠋ᠠᠨ ᠥᠭᠭᠦᠭᠡᠳᠡᠬᠡ᠂ ᠪᠢ ᠲᠡᠭᠦᠨ ᠢ᠋ ᠴᠢᠨᠢ ᠰᠢᠯᠭᠠᠯᠲᠠ ᠳ᠋ᠤ᠌ ᠣᠷᠣᠬᠤ ᠶ᠋ᠢᠨ ᠨᠠᠭᠠᠨᠠ ᠲᠦᠷᠭᠡᠨ ᠬᠠᠷᠠᠭᠠᠳ ᠬᠢᠶᠡ 》 ᠭᠡᠬᠦ ᠳ᠋ᠦ᠍ ᠴᠠᠭᠠᠳᠤᠬᠢ ᠨᠢ ᠨᠢᠳᠦ ᠪᠡᠨ ᠨᠤᠬᠤᠯᠤᠨ《ᠬᠢᠭᠰᠡᠨ ᠶᠠᠭᠤᠮᠠ ᠪᠠᠢᠬᠤ ᠦᠭᠡᠢ ᠬᠤᠳᠠᠯ ᠠ᠋ ᠬᠡᠭᠦᠨᠡ ᠦᠵᠡ ᠯᠡ ᠳᠡ ᠴᠢ 》 ᠭᠡᠳ ᠴᠦᠩᠬᠦ ᠪᠡᠨ ᠲᠦᠯᠬᠢᠪᠡ᠃ ᠳᠠᠸᠠ ᠱᠠᠯᠠ ᠤᠷᠤᠭᠤ ᠨᠢᠯᠪᠤᠭᠠᠳ ᠡᠭᠦᠳᠡ ᠤᠷᠤᠭᠤ ᠶᠠᠪᠤᠬᠤ ᠳ᠋ᠠᠭᠠᠨ ᠨᠠᠳᠠ ᠥᠭᠡᠳᠡ ᠬᠠᠷᠠᠭᠠᠳ 《 ᠮᠠᠭᠤ ᠬᠠᠷᠠ ᠬᠤᠳᠠᠯᠴᠢ᠂ ᠳᠠᠯᠠᠨ ᠲᠠᠰᠤᠭᠠ 》 ᠭᠡᠴᠢᠬᠡᠭᠡᠳ ᠭᠠᠷᠴᠤ ᠤᠳᠪᠠ᠃ ᠰᠢᠯᠭᠠᠯᠲᠠ ᠡᠬᠢᠯᠡᠪᠡ᠃ ᠳᠠᠸᠠ ᠪᠢᠯᠧᠲ ᠰᠤᠭᠤᠯᠤᠭᠠᠳ ᠤᠷᠲᠤ ᠲᠠᠯᠠ ᠳ᠋ᠤ᠌ ᠰᠠᠭᠤᠪᠠ᠃ ᠲᠡᠷᠡ ᠪᠡᠷ ᠬᠡᠰᠡᠭ ᠵᠠᠭᠤᠷᠠ ᠪᠢᠯᠧᠲ ᠢ᠋ᠶ᠋ᠡᠨ ᠰᠢᠷᠳᠡᠨ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠬᠤᠷᠤᠭᠤ ᠪᠠᠨ ᠭᠤᠵᠤᠢᠯᠭᠠᠨ ᠪᠠᠭᠰᠢ ᠶ᠋ᠢ ᠳᠠᠭᠤᠳᠠᠪᠠ᠃ ᠪᠠᠭᠰᠢ ᠪᠢᠯᠧᠲ ᠢ᠋ ᠨᠢ ᠤᠩᠰᠢᠭᠰᠠᠨ ᠢ᠋ᠶ᠋ᠠᠨ ᠲᠡᠭᠦᠨ ᠢ᠋ ᠨᠢᠭᠡ ᠠᠵᠢᠭᠯᠠᠴᠢᠬᠠᠭᠠᠳ ᠬᠤᠯᠠᠳᠪᠠ᠃ ᠳᠠᠸᠠ ᠨᠠᠳᠠ ᠥᠭᠡᠳᠡ ᠬᠠᠷᠠᠪᠠ᠃ ᠲᠣᠯᠣᠭᠠᠢ ᠰᠡᠭᠰᠦᠷᠴᠦ ᠪᠠᠢᠨᠠ᠃ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠴᠢᠮᠠᠷᠬᠠᠢ ᠶ᠋ᠢᠨ ᠲᠤᠰ ᠭᠠᠵᠠᠷ ᠭᠠᠷ ᠢ᠋ᠶ᠋ᠠᠨ ᠠᠷᠪᠠᠭᠠᠨᠠᠭᠤᠯᠪᠠ᠃ ᠳᠠᠸᠠ ᠶ᠋ᠢᠨ ᠨᠢᠳᠦ ᠴᠢᠰ ᠤᠯᠠᠢᠵᠤ ᠦᠰᠦ ᠨᠢ ᠥᠷᠪᠠᠢᠵᠤ ᠬᠠᠷᠠᠭᠳᠠᠬᠤ ᠨᠢ ᠦᠷᠦ ᠡᠪᠡᠳᠦᠯ ᠲᠡᠢ ᠠᠵᠢ᠃ ᠪᠡᠯᠡᠳᠬᠡᠯ ᠦ᠋ᠨ ᠴᠠᠭ ᠳᠠᠭᠤᠰᠴᠤ ᠳᠠᠸᠠ ᠢᠨᠳᠡᠷ ᠲᠦ᠍ ᠭᠠᠷᠪᠠ᠃ ᠲᠡᠷᠡ ᠬᠣᠷᠣᠮᠬᠠᠨ ᠳᠠᠭᠤ ᠦᠭᠡᠢ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠨᠠᠭᠠᠯᠢᠩᠬᠠᠢ ᠬᠣᠶᠠᠷ ᠨᠢᠳᠦ ᠴᠢᠨᠢ ᠭᠡᠳ ᠠᠮᠠ ᠨᠢ ᠠᠩᠭᠠᠯᠵᠠᠪᠠ᠃ ᠪᠠᠭᠰᠢ ᠨᠠᠷ ᠳᠠᠸᠠ ᠶ᠋ᠢᠨ ᠵᠦᠭ ᠭᠠᠢᠬᠠᠨ ᠬᠠᠷᠠᠪᠠ᠃ ᠳᠠᠸᠠ ᠲᠣᠩᠭᠣᠢᠪᠠ᠂ ᠲᠦᠳᠡᠯ ᠦᠭᠡᠢ ᠲᠣᠯᠣᠭᠠᠢ ᠥᠨᠳᠡᠢᠯᠭᠡᠵᠦ ᠨᠠᠭᠠᠯᠢᠩᠬᠠᠢ ᠁ ᠨᠠᠭᠠᠯᠢᠨ ᠁ ᠨᠢᠳᠦ ᠭᠡᠳ ᠲᠠᠭ ᠪᠣᠯᠵᠤ ᠵᠥᠪᠬᠡᠨ ᠠᠮᠠ ᠨᠢ ᠥᠮᠥᠯᠵᠡᠨ ᠬᠣᠶᠠᠷ ᠨᠢᠳᠦᠨ ᠡᠴᠡ ᠨᠢ ᠨᠢᠯᠪᠤᠰᠤ ᠭᠠᠷᠪᠠ᠃ ᠠᠩᠭᠢ ᠶ᠋ᠢᠨ ᠪᠠᠭᠰᠢ ᠪᠣᠰᠴᠤ ᠳᠠᠸᠠ ᠶ᠋ᠢ ᠰᠤᠭᠤᠳᠠᠵᠤ ᠪᠠᠭᠤᠭᠠᠳ 《 ᠮᠡᠳᠡᠷᠡᠯ ᠦ᠋ᠨ ᠰᠠᠭᠠᠲᠠᠯ 》 ᠪᠣᠯᠵᠤ ᠪᠠᠢᠨᠠ ᠭᠡᠪᠡ᠃ ᠲᠤᠰᠠᠯᠠᠭᠴᠢ ᠪᠠᠭᠰᠢ 《 ᠬᠡᠳᠦ ᠶᠠᠳᠠᠷᠠᠴᠢᠬᠠᠵᠠᠢ 》 ᠭᠡᠰᠡᠨ ᠢ᠋ᠶ᠋ᠡᠨ ᠳᠠᠸᠠ ᠲᠡᠢᠰᠢ ᠰᠠᠭᠤ ᠲᠠᠢᠪᠤᠰᠢᠷᠠ ᠭᠡᠪᠡ᠃ ᠬᠣᠶᠠᠷ ᠪᠠᠭᠰᠢ ᠰᠢᠪᠡᠨᠡᠯᠳᠦᠪᠡ᠃
— ᠡᠭᠦᠨ ᠳ᠋ᠦ᠍ ᠴᠢᠨᠢ ᠳ᠋ᠦᠩ ᠲᠠᠯᠪᠢᠬᠤ ᠤᠤ ?
— ᠬᠠᠷᠢᠨ ᠠ᠋ ᠬᠦ ᠂ ᠶᠠᠳᠠᠵᠤ ᠪᠦᠲᠦᠨ ᠥᠭᠦᠯᠡᠪᠦᠷᠢ ᠬᠡᠯᠡᠴᠢᠬᠡᠭᠰᠡᠨ ᠪᠣᠯᠤᠭᠠᠰᠠᠢ᠃
— ᠳᠠᠸᠠ ᠴᠤ ᠶᠠᠭᠤᠮᠠ ᠬᠡᠯᠡᠭᠰᠡᠨ ᠰᠢᠦ᠃
— ᠭᠡᠭ᠂ ᠨᠠᠭᠠᠯᠢᠩᠬᠠᠢ ᠬᠣᠶᠠᠷ ᠨᠢᠳᠦ ᠭᠡᠵᠦ ᠶᠠᠮᠠᠷ ᠴᠤ᠌ ᠬᠠᠮᠢᠶᠡ ᠦᠭᠡᠢ ᠶᠠᠭᠤ ᠪᠠᠨ ᠳᠣᠩᠭᠣᠰᠴᠤ ᠪᠠᠢᠭᠠ ᠶᠤᠮ ᠪᠣᠢ᠃
— ᠵᠠ ᠶᠠᠭᠠᠬᠢᠬᠤᠪ ᠰᠠᠢᠨ ᠪᠡᠯᠡᠳᠴᠦ ᠠᠮᠠᠷᠠᠵᠤ ᠪᠠᠢᠭᠠᠳ ᠳᠠᠬᠢᠭᠠᠳ ᠥᠭᠭᠦᠭ᠃
ᠠᠷᠤ ᠶ᠋ᠢᠨ ᠰᠠᠨᠳᠠᠯᠢ ᠳ᠋ᠤ᠌ ᠲᠣᠩᠭᠣᠢᠨ ᠰᠠᠭᠤᠭᠰᠠᠨ ᠳᠠᠸᠠ ᠬᠡᠩᠭᠢᠨᠡᠲᠡᠯᠡ ᠤᠬᠢᠯᠠᠪᠠ᠃ ᠡᠮᠡᠭᠲᠡᠢ ᠣᠶᠤᠲᠠᠨ ᠨᠤᠭᠤᠳ ᠢᠨᠢᠶᠡᠳᠦ ᠪᠡᠨ ᠪᠠᠷᠢᠵᠤ ᠶᠠᠳᠠᠨ ᠤᠷᠤᠭᠤᠯ ᠢ᠋ᠶ᠋ᠠᠨ ᠬᠠᠵᠠᠵᠤ ᠬᠠᠷᠠᠭᠳᠠᠨᠠ᠃ ᠳ᠋ᠠᠰᠢ ᠢᠴᠢᠵᠦ ᠵᠣᠪᠠᠬᠤ ᠦᠭᠡᠢ ᠤᠬᠢᠯᠠᠵᠤ ᠰᠠᠭᠤᠭᠠ ᠳᠠᠸᠠ ᠶ᠋ᠢ ᠦᠷᠦ ᠡᠪᠡᠳᠦᠭᠰᠡᠨ ᠴᠢᠷᠠᠢ ᠲᠠᠢ ᠬᠠᠷᠠᠨᠠ᠃ ᠳᠠᠸᠠ ᠲᠣᠯᠣᠭᠠᠢ ᠪᠠᠨ ᠥᠨᠳᠡᠢᠯᠭᠡᠭᠡᠳ ᠳ᠋ᠠᠰᠢ ᠲᠠᠢ ᠬᠠᠷᠠᠴᠠ ᠲᠤᠯᠭᠠᠷᠠᠭᠰᠠᠨ ᠳ᠋ᠠᠭᠠᠨ ᠵᠣᠪᠠᠵᠤ ᠵᠣᠪᠠᠭᠰᠠᠨ ᠳ᠋ᠠᠭᠠᠨ ᠭᠠᠷ ᠢ᠋ᠶ᠋ᠠᠨ ᠵᠠᠩᠭᠢᠳᠤᠨ ᠵᠠᠨᠤᠪᠠ᠃ ᠳ᠋ᠠᠰᠢ ᠶ᠋ᠢᠨ ᠴᠢᠷᠠᠢ ᠴᠢᠰ ᠤᠯᠠᠢᠪᠠ᠃ ᠲᠡᠭᠦᠨ ᠢ᠋ ᠬᠠᠷᠠᠭᠰᠠᠨ ᠨᠢᠭᠡ ᠡᠮᠡᠭᠲᠡᠢ ᠣᠶᠤᠲᠠᠨ ᠲᠡᠰᠴᠦ ᠴᠢᠳᠠᠯ ᠦᠭᠡᠢ ᠲᠦᠰ ᠬᠢᠲᠡᠯᠡ ᠢᠨᠢᠶᠡᠳᠦ ᠠᠯᠳᠠᠪᠠ᠃ ᠪᠠᠭᠰᠢ ᠥᠨᠳᠡᠢᠵᠦ 《 ᠬᠡᠨ ᠪᠣᠢ᠂ ᠬᠡᠨ ᠪᠣᠢ 》 ᠭᠡᠵᠦ ᠱᠠᠭᠠᠷᠳᠠᠪᠠ ᠁
ᠡᠢᠮᠦ ᠨᠢᠭᠡ ᠶᠠᠭᠤᠮᠠ ᠪᠢᠳᠡᠨ ᠳ᠋ᠦ᠍ ᠲᠣᠬᠢᠶᠠᠯᠳᠤᠭᠰᠠᠨ ᠢ᠋ ᠪᠣᠳᠣᠨ ᠢᠷᠡᠭᠰᠡᠨ ᠵᠠᠮ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠤᠴᠠᠵᠤ ᠶᠠᠪᠤᠬᠤ ᠳ᠋ᠤ᠌ ᠳᠠᠸᠠ ᠮᠠᠨᠢ ᠬᠡᠳᠦᠨ ᠬᠥᠮᠦᠨ ᠲᠡᠢ ᠴᠣᠭ ᠨᠢᠭᠡ ᠬᠤᠪᠠᠬᠠᠢᠷᠠᠭᠰᠠᠨ ᠭᠠᠴᠤᠷᠠ ᠬᠣᠪᠬᠤ ᠲᠠᠲᠠᠭᠠᠳ ᠶᠡᠬᠡ ᠯᠡ ᠡᠷᠡᠯᠭᠦᠦ ᠰᠢᠲᠠᠵᠤ ᠬᠠᠷᠠᠭᠳᠠᠨᠠ᠃ ᠲᠡᠷᠲᠡᠭᠡ ᠣᠶᠤᠲᠠᠨ ᠠᠬᠤᠢ ᠴᠠᠭ ᠤ᠋ᠨ ᠢ᠋ᠶ᠋ᠠᠨ ᠰᠢᠭ᠋ ᠠᠬᠢᠭᠤ ᠳ᠋ᠦᠩ ᠦ᠋ᠨ ᠲᠥᠯᠥᠭᠡ ᠰᠤᠷᠤᠯᠭᠠ ᠶ᠋ᠢᠨ ᠨᠡᠮᠡᠭᠳᠡᠯ ᠦ᠋ᠨ ᠲᠥᠯᠥᠭᠡ ᠤᠯᠠᠢᠷᠠᠵᠤ ᠮᠠᠭᠤᠷᠠᠵᠤ ᠤᠨᠠᠲᠠᠯᠠ ᠪᠠᠨ ᠤᠩᠰᠢᠵᠤ ᠪᠠᠢᠭᠰᠠᠨ ᠰᠢᠭ᠋ ᠢ᠋ᠶ᠋ᠡᠨ ᠡᠨᠡ ᠬᠣᠲᠠ ᠨᠡᠢᠭᠡᠮ ᠦᠨ ᠠᠵᠤ ᠠᠬᠤᠢ ᠶᠢ ᠬᠢᠮᠠᠭᠠᠳᠠᠪᠠᠯ ᠮᠠᠨ ᠤ ᠠᠩᠭᠢ ᠶᠢᠨ ᠳᠠᠸᠠ ᠶᠠᠮᠠᠷ ᠴᠤ᠌ ᠬᠥᠷᠥᠰᠥᠨ ᠳᠦ ᠶᠠᠭᠤ ᠴᠤ᠌ ᠤᠷᠭᠤᠭᠤᠯᠵᠤ ᠴᠢᠳᠠᠨᠠ ᠳ᠋ᠠ ᠭᠡᠵᠦ ᠪᠣᠳᠣᠭᠳᠠᠨᠠ᠃ ᠬᠠᠵᠠᠭᠤ ᠪᠡᠷ ᠨᠢ ᠥᠩᠭᠡᠷᠡᠵᠦ ᠶᠠᠪᠤᠲᠠᠯᠠ ᠮᠠᠨᠢ ᠬᠥᠮᠥᠨ ᠦ ᠳᠠᠭᠤ ᠴᠢᠩᠭᠠᠷᠠᠵᠤ 《 ᠶᠠᠮᠠᠷ ᠬᠠᠮᠢᠶᠠ ᠪᠠᠢᠭᠰᠠᠨ ᠶᠤᠮ᠂ ᠰᠠᠭᠤᠯᠭᠠᠵᠤ ᠣᠷᠭᠢᠶᠠ᠂ ᠤᠷᠭᠤᠬᠤ ᠦᠭᠡᠢ ᠳᠡᠭᠡᠨ ᠵᠠᠶᠠᠭᠠ ᠨᠢ ᠲᠡᠢᠮᠦ》 ᠭᠡᠵᠦ ᠬᠡᠯᠡᠭᠡᠳ ᠲᠠᠰ ᠲᠠᠰ ᠬᠦᠬᠦᠷᠡᠭᠰᠡᠨ ᠢᠶᠡᠨ ᠨᠠᠳᠠ ᠤᠷᠤᠭᠤ ᠬᠠᠷᠠᠭᠠᠳ 《ᠲᠡᠢᠮᠦ ᠡ᠂ ᠪᠠᠨᠳᠢᠢᠶᠠ》 ᠭᠡᠳ ᠨᠢᠳᠦ ᠢᠷᠮᠡᠪᠡ᠃ ᠬᠥᠮᠥᠨ ᠭᠡᠳᠡᠭ ᠴᠠᠭ ᠤᠨ ᠤᠷᠤᠰᠬᠠᠯ ᠳᠤ ᠰᠣᠨᠢᠨ ᠪᠣᠯᠬᠤ ᠶᠤᠮ ᠳ᠋ᠠ᠃
– – – –
①《 ᠳᠣᠲᠣᠨᠣ ᠶ᠋ᠢᠨ ᠨᠠᠢᠵᠠ ᠨᠤᠭᠤᠳ》 ᠭᠡᠰᠡᠨ ᠬᠠᠷᠠ ᠶᠠᠷᠢᠶᠠᠨ ᠤ᠋ ᠦᠭᠡ
② ᠠᠮᠠᠨ ᠶᠠᠷᠢᠶᠠ ᠬᠡᠯᠪᠡᠷᠢ ᠪᠡᠷ ᠬᠢᠴᠢᠶᠡᠯ ᠤᠳᠤᠷᠢᠳᠬᠤ
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ ᠂ ᠳᠠᠪᠰᠢᠯᠲᠦ
ᠬᠢᠨᠠᠭ᠍ᠴᠢ : ᠲᠤᠭ᠍ᠴᠢ ᠰᠠᠷᠠᠨᠠ
2023᠂ 11᠂ 11 ᠤ ᠡᠳᠦᠷ