ᠥᠬᠢᠨ ᠳ᠋ᠦ᠍ ᠪᠡᠨОхиндоо
545ᠥᠬᠢᠨ ᠳ᠋ᠦ᠍ ᠪᠡᠨ
ᠨᠠᠷᠠ ᠶ᠋ᠢ ᠠᠳᠬᠤᠵᠤ ᠢᠷᠡᠭᠰᠡᠨ ᠶᠦ᠍ᠮ ᠮᠢᠨᠦ ᠥᠬᠢᠨ
ᠨᠠᠰᠤ ᠶ᠋ᠢ ᠮᠢᠨᠢ ᠬᠤᠴᠢᠵᠤ ᠢᠷᠡᠭᠰᠡᠨ ᠶᠦ᠍ᠮ ᠮᠢᠨᠦ ᠥᠬᠢᠨ
ᠨᠡᠷᠡᠲᠦ ᠳ᠋ᠦ᠍ ᠳᠤᠯᠠᠭᠠᠨ ᠶᠠᠪᠤᠭᠤᠯᠬᠤ ᠭᠡᠵᠦ ᠢᠷᠡᠭᠰᠡᠨ ᠶᠦ᠍ᠮ ᠮᠢᠨᠦ ᠥᠬᠢᠨ
ᠨᠠᠨᠳᠢᠨ ᠪᠦᠬᠦᠨ ᠢ᠋ ᠮᠡᠳᠡᠷᠡᠭᠦᠯᠬᠦ ᠭᠡᠵᠦ ᠢᠷᠡᠭᠰᠡᠨ ᠶᠦ᠍ᠮ ᠮᠢᠨᠦ ᠥᠬᠢᠨ
ᠬᠦᠵᠢ ᠳᠡᠯᠡᠬᠡᠢ ᠶ᠋ᠢᠨ ᠴᠡᠴᠡᠭᠡᠰ ᠢ᠋ᠶ᠋ᠡᠷ ᠰᠡᠳᠬᠢᠯ ᠢ᠋ᠶ᠋ᠡᠨ ᠴᠢᠮᠡᠭᠡᠳ
ᠬᠦᠷᠴᠦ ᠪᠣᠯᠬᠤ ᠣᠷᠭᠢᠯ ᠪᠦᠬᠦᠨ ᠳ᠋ᠦ᠍ ᠢᠲᠡᠭᠡᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠳᠡᠭᠦᠯᠢᠭᠡᠳ
ᠬᠥᠮᠦᠨ ᠪᠦᠬᠦᠨ ᠦ᠌ ᠬᠠᠷᠠᠴᠠᠨ ᠤ᠋ ᠣᠳᠣ ᠪᠣᠯᠤᠨ ᠭᠢᠯᠠᠯᠵᠠᠭᠠᠳ
ᠬᠦᠰᠡᠯ ᠦ᠋ᠨ ᠴᠠᠭᠠᠨ ᠣᠷᠭᠢᠯ ᠳ᠋ᠤ᠌ ᠪᠠᠨ ᠬᠤᠨ ᠰᠢᠪᠠᠭᠤ ᠰᠢᠭ᠋ ᠳᠡᠪᠢᠭᠡᠷᠡᠢ
ᠰᠡᠳᠬᠢᠯ ᠰᠡᠳᠬᠢᠯ ᠦ᠋ᠨ ᠵᠥᠭᠡᠯᠡᠨ ᠨᠢ ᠥᠬᠢᠨ ᠦᠷᠡ ᠡᠴᠡ ᠯᠡ ᠣᠨᠳᠣᠷᠳᠠᠭ
ᠰᠡᠮᠡᠬᠡᠨ ᠰᠡᠮᠡᠬᠡᠨ ᠠᠮᠢᠳᠤᠷᠠᠯ ᠤ᠋ᠨ ᠦᠨᠡᠨ ᠥᠬᠢᠨ ᠦᠷᠡ ᠡᠴᠡ ᠢᠪᠢᠯᠳᠡᠭ
ᠰᠠᠨᠠᠭᠠ ᠨᠢ ᠰᠦ ᠲᠡᠢ ᠴᠠᠭᠠᠳᠬᠠᠯ ᠥᠬᠢᠨ ᠦᠷᠡ ᠡᠴᠡ ᠭᠠᠷᠳᠠᠭ
ᠰᠠᠯᠭᠠᠭᠤ ᠣᠷᠴᠢᠯᠠᠩ ᠳ᠋ᠤ᠌ ᠬᠥᠯ ᠬᠤᠴᠢᠬᠤ ᠬᠥᠮᠦᠨ ᠥᠬᠢᠨ ᠦᠷᠡ ᠯᠡ ᠪᠠᠢᠳᠠᠭ
ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠠᠮᠢᠳᠤᠷᠠᠯ ᠢ᠋ᠶ᠋ᠠᠷ ᠠᠬᠢᠨ ᠨᠢᠭᠡ ᠠᠮᠢᠳᠤᠷᠠᠬᠤ ᠬᠥᠮᠦᠨ
ᠡᠷᠬᠡ ᠨᠠᠰᠤᠨ ᠳ᠋ᠤ᠌ ᠪᠠᠨ ᠡᠷᠬᠢᠯᠡᠵᠦ ᠥᠰᠴᠦ ᠶᠠᠪᠤᠭᠠ ᠮᠢᠨᠦ ᠥᠬᠢᠨ
ᠡᠬᠡᠨᠡᠷ ᠬᠥᠮᠦᠨ ᠦ᠌ ᠡᠭᠦᠷᠭᠡ ᠪᠡᠷ ᠨᠠᠰᠤ ᠪᠠᠷ ᠢ᠋ᠶ᠋ᠠᠨ ᠥᠪᠡᠷ ᠢ᠋ ᠪᠡᠨ ᠬᠣᠷᠢᠨᠠ
ᠡᠷᠬᠡ ᠴᠢᠯᠥᠭᠡ ᠲᠡᠢ ᠴᠠᠭ ᠲᠤ ᠪᠠᠨ ᠡᠳ᠋ᠯᠡᠵᠦ ᠶᠠᠪᠤᠭᠠ ᠮᠢᠨᠦ ᠥᠬᠢᠨ
ᠪᠤᠰᠤᠳ ᠤ᠋ᠨ ᠲᠥᠯᠥᠭᠡ ᠬᠠᠩᠭᠠᠯᠲᠠᠲᠠᠢ ᠪᠤᠷᠤᠭᠤᠲᠠᠨ ᠪᠣᠯ
ᠪᠤᠶᠠᠨ ᠨᠡᠭᠦᠯ ᠬᠣᠶᠠᠷ ᠤ᠋ᠨ ᠳᠤᠮᠳᠠ ᠬᠦᠰᠡᠬᠦᠢᠴᠢ ᠪᠥᠬᠥᠢᠵᠦ ᠯᠡ ᠲᠠᠭᠠᠷᠠᠨᠠ
ᠪᠣᠷᠣ ᠴᠤ᠌ ᠭᠡᠰᠡᠨ ᠭᠡᠷ ᠲᠡᠢ ᠪᠠᠢᠭᠠ ᠳ᠋ᠤ᠌ ᠳᠡᠭᠡᠷᠡ ᠪᠡᠨ ᠬᠠᠲᠤᠨ ᠰᠢᠭ᠋ ᠠᠪᠤᠷᠢᠯᠠ
ᠪᠤᠭᠤᠷᠤᠯ ᠠᠮᠢᠳᠤᠷᠠᠯ ᠤ᠋ᠨ ᠨᠢᠷᠤᠭᠤᠨ ᠳ᠋ᠤ᠌ ᠥᠲᠡᠯ ᠪᠣᠯᠲᠠᠯᠠ ᠪᠠᠨ ᠯᠠ ᠪᠣᠭᠣᠯ ᠰᠢᠭ᠋ ᠵᠢᠳᠬᠦᠨᠡ ᠰᠢᠦ ᠳᠡ
ᠲᠡᠢᠮᠦ ᠡᠴᠡ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠭᠡᠷ ᠡᠴᠡ ᠯᠡ ᠡᠷᠪᠡᠬᠡᠢ ᠰᠢᠭ ᠲᠠᠷᠪᠢ
ᠢᠷᠡᠬᠦ ᠠᠮᠢᠳᠤᠷᠠᠯ ᠴᠢᠨᠢ ᠢᠩᠭᠢᠵᠦ ᠲᠠᠩᠳᠠ ᠭᠤᠶᠤᠬᠤ ᠦᠭᠡᠢ
ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠵᠠᠭᠤ ᠠ᠋ᠴᠠ ᠴᠡᠴᠡᠭ ᠰᠢᠭ ᠳᠡᠯᠭᠡᠷᠡ
ᠠᠮᠢᠳᠤᠷᠠᠯ ᠤ᠋ᠨ ᠤᠷᠢᠳᠤ ᠵᠠᠮ ᠢ᠋ᠶ᠋ᠠᠷ ᠴᠢᠮᠠ ᠶ᠋ᠢ ᠤᠳᠠᠭᠠᠨ ᠳᠡᠯᠪᠢᠯᠡᠭᠦ ( ᠳᠡᠯᠪᠢᠭᠡᠯᠡᠬᠦ ) ᠦᠭᠡᠢ
ᠭᠡᠪᠡᠴᠦ ᠮᠥᠩᠬᠡ ᠪᠤᠰᠤ ᠶ᠋ᠢᠨ ᠬᠣᠷᠸᠠ ᠳ᠋ᠤ᠌ ᠮᠥᠩᠬᠡ ᠶ᠋ᠢᠨ ᠬᠠᠢᠷᠠ ᠶᠤᠮ ᠰᠢᠦ ᠥᠬᠢᠨ ᠮᠢᠨᠢ
ᠮᠥᠮᠥ ᠠᠮᠠᠯᠠᠭᠤᠯᠵᠤ ᠵᠠᠪᠢᠯᠠᠬᠤ ᠪᠦᠰᠡᠭᠦᠢ ᠶ᠋ᠢᠨ ᠵᠠᠪᠢᠯᠠᠭᠠ ᠨᠢ ᠶᠦᠮ ᠰᠢᠦ ᠦᠷᠡ ᠮᠢᠨᠢ
ᠮᠥᠴᠢᠷ ᠰᠠᠯᠠᠭᠠ ᠪᠦᠷᠢ ᠨᠢ ᠴᠢᠮᠠ ᠠ᠋ᠴᠠ ᠯᠠ ᠣᠨᠳᠣᠷᠭᠠ ᠲᠠᠢ ᠲᠠᠪᠢᠯᠠᠩ ᠦᠨ ᠢ᠋ᠶ᠋ᠡᠨ
ᠮᠥᠩᠬᠡ ᠵᠠᠰᠠᠯᠠᠭᠳᠠᠬᠤ ᠢᠷᠦᠭᠡᠯ ᠦ᠋ᠨ ᠰᠦᠨ ᠳᠠᠯᠠᠢ ᠨᠢ ᠶᠦᠮ ᠰᠢᠦ ᠮᠢᠨᠦ ᠥᠬᠢᠨ
ᠦᠰᠦᠭ ᠬᠠᠲᠠᠭᠰᠠᠨ ᠨᠢ᠄ ᠮᠣᠳᠣᠲᠤ ᠬᠠᠪᠤᠷᠵᠢᠶᠠ
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠣᠳᠣᠨᠭᠡᠷᠡᠯ
ᠬᠢᠨᠠᠭᠴᠢ ᠪᠠᠭᠰᠢ᠄ ᠢᠷᠡᠭᠡᠳᠦᠢ᠂ ᠭᠠᠷᠮᠠ ᠨᠠᠷ